☆EARTH ANGEL☆ - 26 By Dingdi Pachuau

 ☆EARTH ANGEL☆ - 26 By Dingdi Pachuau

Ka rin aia hmain Krismas hunpui chu a rawn inher chhuak a! Ka rilru a hlim vàng pawh a ni maithei a ni, hun chu a kal zung zung ni berin ka hria. Krismas nîa inkhâwmnaah inkhâwm ve ngei tùra min tih tlat avàngin ka nu leh pa kal hnuah chuan inkhâwm tùr chuan ka kal ve chauh a, thu sawitu thu sawi tùr ka hriat sa vek avàngin ngaihthlâk ngai pawh ka ti hran lo, a hmingin ka inkhâwm ve mai mai a ni ber ang chu, bialnute laka mark țhat chu mipa tu pawhin kan duh ve alawm. 

Kum dang ang chu ni se chuan țhianteho nèn kan hmangho leh ngei ang a, kan rui leh viau ngei ang chu; mahse, kumin chu ka rui hauh lo, ka rui lo mai pawh ni lovin ka kaah hian zu far khat tê pawh a lût lo, hunpui hi ka zo lo ziah țhin kha a ni si a. Ka zu in hi a duh loh thu a la sawi lang miah lo tih ka hria; mahse, engati nge a bula ka awm dâwn hian in hi ka duh tâk ngai miah loh ni?  Pastor fanu a nihna vàng hi em niang?  Ka âwih chiah lo, a rilru a thianghlim lutuk vàng hi a ni zâwk thei ang em? Zu in hi a țha lêm lo tih ka hriat vàngin a bulah thil țha lo tih chu ka duh lo mai a ni zâwk lo maw? 

Hunpui chhûng chu a bulah ka tâp a ni deuh ber mai. Ka tum loh deuhin a bulah vawi hnih lai ka la inkhâwm zui a, hnial theih miah lohin a awm thiam a ni ber. Hmeichhe thu anga awm duh miah lo kha ka ni ve țhìn a nia, a tàwnah hi chuan kei Vâla hi ka nêm duai duai a nih tâk àwm hi. Ka pa nèn kan inkâr lah chu a vei thar êm êm mai a, ka thiam loh tak zâwk a ni, Krismas dâwn khân thawmhnaw leina tùr pawisa min pe miah lo  va, chu chu a hnênah hian ka vui zauh pek a, kan inkâr a lo țha lêm lo tawh sa nèn, ka insawhtau ve a ni.

"Tlangvâl i ni ve tawh a, kawr thar neih kher ngaiin a hre lo che pawh a ni ang chu. Bâkah, i inhlawhna i nei a, i nuin a pe bawk che a, i nu pêk che kha a pêk ang tluk tho alawm, a pêk kher che i phût a," a ti ta khauh mai. A sawi dik fak fak riau mai si a, sawi mai tùr pawh ka hre lawk lo, a hnu deuhah chuan," Min țan ve dâwn emaw ka ti a," ti nghutin lehlam ka hawi ta daih a, ani lakah hi chuan ka thinrim tak tak pawh a ni chuang lo; mahse, ka tider ve a ni, chuan, ani hi chuan a der tal pawha min țan ve ka phût bawk.

"Ka țan lo che pawh a ni chuang lo, ngun takin han ngaihtuah teh, i pa pawisa pêk kher che ngai lovin i inlei theih tho kha," a tih leh phei chuan sawi tùr ka hre tawh teuh lo, amah vêk chuan," Nangma pawisa thawh chhuah ngeia i thawmhnaw i inlei thei kha ka lo chhuang lutuk che asin, nakinah sawrkâr hna tak tak i thawh hnuah phei chuan i hlawhin i nu leh pate thawmhnawte i leisak lêt ve thei tawh ang a, nuam i ti viau ang," a ti leh duah a.

"Pawisa pêk ka tum pawhin min lâksak duh lo a nia, thawmhnaw phei chu min lâksak duh lo khawp ang, a la a nih pawhin a ha duh chuang lo ang," ka lo ti hmak thung a, ani chu a lo nui mai thung a.

"I titau hmel kha i hmuhnawm roh lutuk!" tiin ka hmel a hmuh theihna  tur lamah chuan a rawn țhu sawn a, ka hawi sawn leh nghâl daih a, ka bânah vuanin min rawn nghèng ta thung a.

"Hetiang hian awm suh," a ti leh phawt a, chutah, rawn dâk chhoin," Ani chuan i pêk loh pawhin pawisa chu a nei țeuh a, pawisa i thawh chhuah ve liau liau chu i mamawh huna i hman atân tiin a lâksak duh lo che a nih chiah chu. I chunga a thinrim avànga lâksak duh loah che ngai suh, ni tina i thawh chhuah liau liau chu nangmàn kawlin, thawh chhuah a harsatzia hriaa i mamawh hun chauha i hman tùrin a thawk chhuak ngeitu nangmah a kawltîr che a, nakina thlabîa hlawh i neih huna i awm dàn tùr a zirtîr lawk che a ni, ni tina i thawh chhuah ve liau liau holam taka i hman leh hman loh a test duh vàngah che kei chuan ka ngai hmiah mai," a ti leh duah a.

"I rilru țhat vàng maiin i ngai sual duh lo a nih kha," ka tih leh chuan," Ka ti tak tak! I pa hi i ngai sual laklawh deuh mai mai a ni, a fapa hi a haw tak tak miah lo ang che, a duh loh zâwng thil tam tak i lo ti tawh țhin pawh a ni maithei; mahse, nang lo fapa a nei lo va, ani lo pa dang i nei lo bawk. In inkâr hi țha se hlim takin awm ula ka ti a ni," a lo ti leh a.

"Ka tân chuan har deuh mai asin, a fapa ka ni lo tih min hrilh hretu pawh amah a nia, eng atân nge min hrilh kher?" ka ti leh a, min hrilh hun lai kha ka ngaihtuah lêt leh a, ka rilru hrehawm lutukin intihhlum hial ka tum nghe nghe a nih kha.

Ka hnung chûl hoh hoh pah chuan," A rilru i tina viau a nih ka ring, khati chen mai a fapa tak tak angin a lo en tawh che a, kum kha leh chen sawi chhuah a duh ngai loh a hrilh che a nih chuan a thin i tirim viau a niang. Hetia in awm hian i hlim chuang si lo va, ka khawngaih che a, hlim takin, a hmaa hlim taka in awm ang khân awm leh tùrin ka duh che u a ni, i pain a be lêm lo che a nih pawhin nangmah hian kovin bia la, in inkâr hi a țhat theih ka ring tlat a ni," a ti a, beisei nei zet hian min rawn en chho kar a.

"Ka be hmasa duh hleinem."

A nui sak a," Kha, naupang tihmawh ang chiahin i awm; mahse, i cute ka ti tawp che aw," tiin ka âwmah chuan a lu chu a rawn nghat a, chutah thutak zet hian," Nangmahin i zir phawt chuan i chungah a sual miah lo ang, i sual lo tih ka hria, țhat han chhuah zeuh la, a chunga i țhat na na na chuan i chungah pawh a sual hauh lo ang, kan chunga țha leh felte chungah tuin nge sual chhuah duh tlat ang?" a ti a, ka hnung chu bêng thapin," Hria maw? A har i ti viau maithei; mahse, i ti thei a nia, ti hmasatuah țang rawh aw, i lamah ka lo țang tlat ang," a ti leh a.

Hlim takin Krismas chu kan hmang liam a, ka hlim avàngin mi dang chu hlim ve viau turah ka dah ngawt a; mahse, ka nu pawh chu a hlim ve tho a ni tih ka hre ve tlat, a chhan chu hunpui chhûngin ka rui tlat si lo va, zànah chhuak țhìn mah ila, ka rui haw ngai lo va, chawhlui ni se kan kíl tlâng ziah thei bawk a, kum dang ang kha ka ni tawh tlat lo a ni. Ka pa erawh chu a lan dàn a ngai reng thung, bialnu kha a la nei reng em tih chu ka hre lo; mahse, inah a awm tam ta viau tih erawh chu ka hria, chawlh hun lai a nih vàng pawh a ni mahna le, ka nu hlim hmel leh a awka dam ta diai erawh hriat hrehawm ka ti lo chiang a ni. A hmaa min vìn leh min thinrim khum rengtu kha a ni tih hriat thiam a har tawh zâwk hial mai!

Kum hlui thlah zàn Remruatite ina hman kan tum avàngin ka inuluk ve khawp mai a, thil eng eng emaw lei ka la duh dâwn avàngin ka nu chu chaw ei kan hman tawh leh tawh loh chu ka zâwt a, ani chuan," Hman tawh e, i pa kha room-ah a awm ang, han ko la?" a lo ti vat a, ka en tawp ringawt. Ani erawh chu chaw ei siam tùrin a phe buai leh  nghâl zat a, ka pa koh chu, ka va phür zar lo ve!

Ka tàwi khawmuang phawt a, ka hreh a ni, ka hreh takzet. Remruati thil sawi kha ka hre chhuak zawk a, ani leh ka nu hi an lo țang dùn a ni lo maw? A ni leh thei lo, kan inah Remruati ka hruai khât e, chutiang lam eng mah an sawi hman lo ang.

Ka maimichhîng vang vang a, thâwk ka la leh hawk a, ka nute room kawngkhàr chu ka kik ta nghâl a, ka pa aw ngei chuan," Lo lût mai mai teh," a rawn ti a, inthiam lo deuh chuan hawngin ka lût a, khumah a lo țhu diai a, lehkhabu a lo chhiar a nih ka ring, min lo hmuh chuan," I nu emaw ka ti che alawm, eng nge ni ta?" a lo ti vat a, a tarmit vuah lai pawh chu a la thla nghâl a.

"Chaw kan ei tawh dâwn a," ka ti ringawt a, biak thui ngaihna pawh ka hre lo. Ani chuan," Aw, ka lo kal e," a ti ve mai a, thu dang sawi tawh lo chuan ka chhuak leh nghál vat a, an room ka chhuahsan hnu chuan ka thaw phei huai huai a, chaw eina room ka va thlen chuan ka nu chuan a lo peih fel ti tih tawh a.

Chaw ei lai chuan ka nu chu a titi siam siam a, thil ho mai mai a sawi kual vêl a ni. Kei chu ka ngawi reng a, chaw chu ka ei mawp mawp a ni ber. Chutah, ka nu chuan min rawn enin," Zaninah khawiah nge in hman dâwn?" a rawn ti chhuak ta a. Rang zet hian," Remruatite inah," ka lo ti vat a, ka nu vêk chuan nui chung hian," Remruati hi i ti țuah hum reng mai chu a nih hi maw," a lo ti a, tlêmin ka zak ve deuh a, ka chhâng lo.

Ka pa chuan," Bike keng chhuak lovin car hi keng chhuak zâwk ang che, zanin ang hi fîmkhur ngaih hun lai tak a ni, i lo fîmkhur pawh a ni maithei; mahse, mi dang fîmkhur loh zâr i zo thei a ni, bike ai chuan car hi ken chhuah a him zâwk ang," a lo ti teh tlat a! Ka nu chuan lo zàwm vatin," Ni e, i pa sawi chu a dik chiah, zàna lìrthei tam hun lai a ni dâwn a, car chu i keng zâwk dâwn nia," a lo ti ve a, chutah," Pawisa i mamawh em?" a ti leh zat a.

"Mamawh ve ang chu, zawh kher a ngai hleinem," ka pa chuan a lo ti leh a, kei chuan," A ngai lo, ka nei," ka lo ti a, ka nu chuan," Zanin chu nulate nèn in hmang dâwn sia, i thlâ a lo phâng palh ang, tam tâwk i pai dâwn nia," nui chung vêk hian a lo ti leh a. Chaw ei khama ka chhuah dâwnah chuan pawisa chu min pe a,"Hman zawh vek tùr tihna pawh a ni chuang lo aw, i pain i thlaphàn a hlau tlat mai si a," a ti sap a, ngai lo ka ti viau nain ka kekawr iptêah a rawn dah lui tlat a, fîmkhur tùrin min chah zui zat bawk a.

Țhiante nèn hmanho pawh a châkawm viau rualin Remruatite ina hman chu an hreh tlat a, pastor in a lo ni ve bawk nèn, a àwm viau a ni, kei pawhin a rûk tak chuan ka hreh; mahse, an ina hman a rawt tlat si a, hmanna tùr hmun dang ka hre chuang bawk si lo nèn, hnehna a chang ta a ni.

Ka rin loh dàn deuha hun ka hman tâk chu! Zàn men rei a remtih loh avàngin dâr 9:30 chiahah an in hnuaia room pakhatah min chhukpui a, eng kan ti dâwn chu ni maw tiin a rûk tak chuan ka phûr ru khawp mai a; mahse, an chhûngkaw țawngțaina pindan a lo ni a!

"Țawngțai ang aw," a ti ta mai.

Ka ding zum reng mai a, a lu chu puanin a khuh sauh sauh a, chuchu ka hmuh chuan," Ka țawngțai ngai lo, sawi tùr pawh ka hre lo ang," ka ti chhuak ta țâwk a, ani nèna țawngțai ka duh teuh lo, a rì phei chuan, zahna hlîr a ni mai.

"Sawi duah a ngai lo,  zanin hun hlimawm taka kan hmang dùn thei leh damna kan chanah Pathian hnênah làwmthu kan hrilh ang a, hlim taka hun kan hman dun leh zêl theih nân damna leh hrisêlna kan dîl leh ang a, Kum thar dam taka kan thlen theih nân pawh. A, i duh leh i mamawh i nu leh pate hnêna i dîl ang kha a ni mai, i ri kher pawhin a ngai chuang lo, harsa luaah ngai lo la," a ti leh a, ka kutah chelhin pindan laili lam pan chuan min kai phei a.

Chhuata a țhingțhit hnu pawh chuan kei chu ka la ding reng a, țawngțai tumna ka nei chuang lo. A lu khuhin a țawngțai ta sap sap a, a sawi tak pawh ka hre chuang lo. Ka la ding reng a, ka meng kar bawk. Ka nuih a za dâwn dâwn a; mahse, a za lo leh thut. A țawngțai chu a ti tak êm êm mai si a, ka nuih ngam teuh lo mai. Mi țawngțai lai nuih ngam tùr êm chuan ka huaisen bîk lo, bâkah, ka bialnu a ni a, nuih tùr pawh ka ni hek lo.

Ka țawngțai lo tluan ta, ka rilru erawh chu a nuam lo ve deuh tho. Ka țawngțai khât ve êm a, ka bangbo chuan ka ring lêm lo nain ka inthlahrung deuh tlat, ka tlangvàl hnu hian ka țawngțai ve tawh em aw tih theih khawpin ka țawngțai khât si a, a bula ţawngțai chu ka thei lo.

"Zanin chu ka hlim takzet a ni, i lo țawngțai emaw țawngțai lo emaw pawh ni se,  ka bulah, ka țawngțaipui theihin i awm hrim hrim a, ka lãwm tâwk viau a ni," tiin ka bânah chuan a rawn vuan a, a nui sâng bawk a.

"Ka țawngțai ve lo," ka ti sup a, amah pawh chu ka en duh lo, ka kun deuh chhal a. Ani erawh chuan," A pawi lo, keiman ka dìl kêp vek tho che alawm, i tân liau liau ka dìl rualin nang ka neih che avàng leh zanin huna ka kianga i awm vàng hian làwmthu ka sawi a, a chhan chu zanina hun hmanpui che hi a hma ațang tawha A hnêna ka thlena ka lo dìl tawh a nia, tihhlawhtlina a awm thei hi ka lâwm, i chungah pawh hian ka lãwm ém ém a ni," a ti leh malh malh a.

Ka haw dâwnah chuan motor thleng min thlah a, a nute'n hun fâl chu min pe ve nain ka che ngam lo hrim hrim. Min thlaha pâwna a lo chhuak ve chu motor chhûngah ka țhutpui a, ka fâwp ve ngam chauh a ni.

"Naktûk chu, i inkhâwm leh ang tiraw? Ina awm mai mai ai chuan inkhâwm chu a țha daih zâwk sia, bâkah, i hlâwk phah ngei pawhin ka ring a ni, inkhâwm rawh aw," a ti leh sar sar a, dik tak chuan, hnial chu ka duh reng laiin duhawm taka min sàwm sar sar si avàng chuan ka hnial thei thlâwt lo a ni.

"Min rawn sâwm la?"

Phûr tih hriat zet hian," Tehrêng mai; mahse, i nu leh pate nèn, in biak inah ngei i inkhâwm duh zâwk ka lo ring a," a lo ti a, kei chuan," Khawi biak inah pawh kan biak chu a ngai vek tho a ni lo'm ni? Inkhâwm rau rau chuan i bula inkhâwm ka duh dâwn a," ka lo ti thung a. Ani pawh chuan," A dik alawm, ka rawn sâwm ngei ngei dâwn che nia," a ti a, chutah," A nih chuan, ka chhuak tawh mai dâwn em niang?" a ti sap a, min rawn melh chho pah bawk a.

"Ka la ui che e, rei lo të chu awm leh rih lawk rawh," tiin ka kuah leh rih a, ani pawh chuan thu âwih takin min kuah lêt ve a, țawng lo chuan thu tam tak kan sawi a, kan duh sawi tùrin țawng rîk kher kan mamawh lo a ni ber mai.

Źàna ka mut dâwnah erawh chuan ka țawngțai ve tlat mai! A chhan chu Remruati lakah khân ka tlâwm lutuk niin ka inhre tlat a, ka țawngțai ve lo kha pawi lo tiin sawi mah se a tlàwmthlâk ka ti a ni, bâkah, ni e, Pathian hnênah chuan kan mamawh kan dîl ve ang chu. Remruati nèn awm dun reng theih ka duh si a, chu chu ka dìl ber chu a ni. Ințhen miah lova inkawp reng theih ka dîl hmiah, min chhâng ngei ang em tih phei chu ka hre lo; mahse, dìl ve hrim hrim ka duh a ni.

Men rei loh ka tum viau nain ka muhil thei lawk lo va, zanlai dâr 12 pelh rawk thleng ka meng a, chutia ka meng thleng ta rau rau chu tiin țhianteho chu text-in kum thar chibai ka bûk hlawm a, a bîk takin Remruati pawh ka text a, thlum takin thu ka phuah thiam lo va; mahse, ka rilru zawng zawng pein thinlunga duhsakna tinrêng nèn ka ziak chhuak ve duah tho.

Chhùnah chuan kan inkhâwm ngei a, an biak inah ka inkhâwm leh mai. Hlim takin a chhûngte pawhin min lo chhàwn a, Remruati hlim hmel chu hmuh a nuam ka ti kher mai. Chawhnu lamah erawh chuan kan țhianho kan inhmu khâwm ve ta thung a, nizàn lama hun kan hman dàn țheuh chu report kan pe a, Joseph-a lo che nasa leh bîk pek a, Mapuia bialnu birthday lawm zàna a kawpnu nèn khân an lo inzui chhunzawm a ni chêk ang chu, nui vur vur chung chuan report chu a pe a.

Muana chuan,"Mipa takin i chë a a ni maw? A hmeichhiate'n an duh ve miau si hi chuan mipa tân chuan insùm hi a har ve bawk a ni," a lo ti a, rang zet hian C-a chuan," Chu, nang pawh i lo insûm lo zeuh zeuh tawh a ni maw?" a lo ti vat a, ani chuan nui huah huah chung hian," Mipa ka ni alawm le, han inpuan zuah zuah thu chu a awm lo nain insùm loh zeuh zeuh châng chu nei ve e," a lo ti a, mi dang pawh chu an lo nui a, kei pawh ka khi ve suk suk tho.

"Mahse, kei chu ka nei ngai lo va, bâkah, ka hlei ve vak lo bawk nèn, Joseph-a ang êm êm chu ka ni lo," Muana chuan a ti leh a, Joseph-a chuan," Ka hlei uchuak bîk lo aw, Muanék. Ka hlei vàng a ni bîk lo, a hmeichhia zâwkte'n min sàwm miau chuan tihbeidawn kha an khawngaihthlâk a, chuvàng chauh chu a ni," a lo ti ve leh a, an insawisa chho a, kan nui ta bãwk bãwk a.

"Roddick-a hi chuan  Pasitori mal pawh a la khawih pawhin ka ring lo," Mapuia'n a rawn tih chuan," A dik chiah!" tiin ka lo bu nghat a, min en ta țhap mai.

"I la khawih lo tak tak maw?!!"

"Khawih nâng, ka fâwp ngam țâwk chauh," ka tih chuan Muana chu a lo chek hlak a, Mapuia ve thung chuan," In ngaih ang ngawt kha ani hi chu a ni lo ang, pastor fanu dik tak a nia, ka u sawi dànin," a lo ti leh a, Muana'n," Nupui atâna țha chi an tih ang hi a ni maw?" a tih chuan," Nupui, fanu, ngaihzâwng, fate nu leh mo atân a țha vek," ka lo ti var a.

"Chu, a bulah chuan i virgin țhut ve ngawih ngawih mai tihna a ni maw?" Muana'n a rawn tih leh chuan an nui leh ta hak a, nui chung hian," I va thlawh fuh tak! A pa pastor bulah phei chuan beramno hmêlhem lo ang maiin a țhu hlè hlê țhin maw le," âwihawm tak hian Mapuia chuan a lo ti a, kan nui leh dar dar a.

"Ani hi chu a dang zak a ni ber mai, a dang ti ila ka dang ta zâwk nge ni pawh ka hre thiam lo, min tidanglam a ni ber ang chu," ka ti a, C-a chuan," Dang e, i danglam tawh alawm; mahse, a țha ka ti, i kawp atân ka duhpui che, hetia awm huat huat reng mai hi chu a țha lêm lo, kan kawppuite, kan ngaihzâwngte azir hian kan țhain kan sual phah ve thei a nia, ngaihzâwng ringawt pawh hi neih fîmkhur ngai ve deuh mai a nia," thutak zet hian a lo ti ve a.

A tìra kan hoh hlawm tehlul nèn, kan titi tàwp lamah chuan kan thutak tlâng hlawm tawh khawp mai a, kan tùnlai nun leh kan vei zâwngte sawiin kan ngaih dàn hrang hrangte kan sawi a, titi ho deuha bul țan kha a tàwpah chuan kan inhlàn vek lo chauh a ni ta mai.

Ka pângngai viau tawh a ka hnâr pawh a thî a reh hlen ve tawh dâwn a niang ka tih laiin zîng khat chu tûkțhuan kan kîl laiin a rawn thî leh ta tlat mai a, inrinna hman pawh a awm lo, a rawn baw hawk a ni ber ang chu.

Ka nu chu a hlauthãwng kher mai, a hlauthãwng lutuk chu a aw pawh a làwi chhe vek thei nia. Pawi ka ti a, chaw ei lai ber kher lehnghâlin, ka nu ka tihlauthãwng chu hrehawm ka ti, ka room-a ka awm laite ni zâwk se, keimahin ka inbuaipui fel leh vek thei mai dâwn si a.

A thî rei phian mai. Chaw pawh ka ei chhunzawm tawh lo, chutiangin ka nu pawh. Ka room-ah min awmpui a, ka bulah a lo ding ve reng a, ka chal leh ka tukkhum bàwr lai vêl chu tuiin a lo tihuh ve reng a, chaw ei leh tùra ka tih pawhin a kal duh lo, ka pa erawh chu office kal tùr a ni a, a ei chhunzawmin ka ring. Naupangchhia pawh ka ni tawh chuang lo va, ngaihtuah pawh ka ngai tawh lo, ka nu pawh hi lo ding reng lo se ka ti, kal sawn daih se.

Luhai deuh chhalha ka khuma ka țhut lai chuan ka pa a rawn lût a," Vawiin chu i peih chuan inentîr la a țhat dâwn kha, tihpalh pawh ni lova hnàr thî ringawt chu a fuh lo, hei, i nu hian pawisa a pe che ang a, kalpui i ngaih pawhin i nu hian hruai mai che se a țha ang," a rawn ti ve a. 

"A ngai lo ang, keimah pawhin ka kal thei alawm," ka lo tih chuan ka nu chuan," Inentîr ngei ngei ang che aw, ka ngaih a țha lo tlat, thisen chhuak vak vak ringawt chu thil dik s ni lo," a lo ti ve a.

Ka nuin kalpui min tum chuan ka phal tlat lo va, tlangvâl ve pui tawh nute'n kalpui nih chù ka duh lo hrim hrim, bâkah, a hlauthãwng hma thei si a, ka hruai duh lo. Remruati a hman chuan hruai ila ka duh zâwk.

Ka be chhin a, ani pawh a lo nuamsam meuh lo a lo ni àwm e, a aw erawh chu a pângngai viau, thil awmzia ka zawh chuan," Min ngaihtuah suh, damdawi ka ei tawh a, ka zia thuai mai ang, han nawm loh zeuh zeuh hian dam hlutzia a lo lang fiah țhìn alawm," tiin a rawn nui hak a, chutah," Nangmah chauha i kal mai a ngai tùr chu ka va khawngaih roh che êm! I han țap ngawt ang e aw," a rawn tih zawm leh a, kei pawh chu ka nui ve a.

Ka inentîr ta ngei a, doctor chuan a theih ang angin min lo endika, ka thisen pawh exam tùrin a la ngei, nghah reng ka peih meuh loh avàngin thisen result chu naktúk lama lam mai tùrin min hrilh a, pawi ka ti lo nasa, ka hmanhmawh rilru alawm, Remruati kan ka duh si a.

*NUAM KAN ZAWN LUTUKNA LAMAH HIAN HREHAWMNA ZÁWK HIAN MIN NANGCHÎNGIN MIN SALBET FO ȚHIN, NUAM I ZAWNG A NIH PAWHIN A RAH CHHUAK TÙR NGAIHTUAH HMASA PHAWT ȚHIN RAWH*