☆EARTH ANGEL☆ - 27 By Dingdi Pachuau

 ☆EARTH ANGEL☆ - 27 By Dingdi Pachuau

Ka va kan ta ngei a; mahse, hmêl hlim takin min lo chhàwn a, a awm dàn en chuan a nuamsam lo a ni tih pawh a hriat loh, damdawiin a chhâwk lai pawh a lo ni mahna, a nih loh pawhin, nuamsam lo satliah mai mai a ni ang. Hlim tak chuan kan titi a, a nu pawh lo tel vein coffee tui takin min siam a, rei lutuk lo ka awm hnu chuan ka haw  ve ta a.

A tûkah chuan result chu ka lam ta ngei a, result țha lo tak chu a ni lo nain inenkawl erawh ka ngai nasa dâwn a ni, tlâkchham ka lo ngah mai a, damdawi ei tùr lei nân pawisa hman nasat a ngaih dâwn avàng chuan ka rilru erawh a hrehawm ve deuh, Remruati sawi ang deuhin tlangvâl ve pui tawh, pawisa hman dâwna chhûngte pùr ngaih ziah chu a fuh lo, ka pawisa ah chhuah ve chuan damdawi pawimawh zual nia ka hriat chauh ka lei a. Ka leiho pawh hian hna an thawk ve viau tùrah ka ngai, ka ei țhat viau phawt chuan.

Class țanin min nang chho leh a, peih lo viau mah ila Mami hnêna ka lo tiam ve tawh tihpuitlin chu ka tum ruh ve tlat a, bâkah, Remruati ka ngaihtuah tel pah lo thei lo bawk a, a tân zahpuiawm lo lehsum lamah pawh innghahna tlâk nih ka duh tlat a ni. Ani pawhin ka tumzia a hre ve a, inhmuh chhên loh a rawt ta rêng a, a hma pawhin kan inhmu chhên ngai chuang lo nain tûna ka thil zirah hian eng eng emaw tih neuh neuh tùr a lo tam ve tawh bawk a, ka hnial thei lo, hnial thei pawh ka ni lo, class țan chhoh nî ațangin ka buai ve nghâl viau.

A vawi khatna atân ka nu leh pate pawisa dîl miah lovin Valentine's day-a ka bialnu pêk tùr gift țha ve tâwk tak ka lei lâwk a, ka thil lei lâwk pawh chu ka hrilh hauh lo. A hmuh hunah chuan a hlim ve ngawtin ka ring, a phu ve zawk ngei ang. Ka dah țha khiau mai a, Valentine's day lo thleng tùr ka la nghahhlelh ber țum a ni chiang alawm.

Kan inhmu khât deuh nain kan inbiain kan in-text reng a, a hrisèlna a pan deuh avàngin hun ãwlah pawh ka lèn chhuahpui duh lo, inenkawl țhain dam țha thuai thuai se, Valentine's day-ah chuan dam var hman se ka duh a ni. Hruai chhuah ve ngei ka duh dâwn si a, an ina han hman dun teh tlawng chu ka duh bîk lo.

Ka pass țha a, ka hlim viau mai. Remruati pawhin min lawmpui hle a, chu mai bâkah, ka nu leh pa pawh an lãwm ve viauin ka hria. Ka nu phei hi chu hlim hmel hi a pu deuh reng tawh ni maiin ka hria, dik tak chuan kei ka lo rùi ngai tawh bawk si lo va, min hau ri leh a âng thãwm hriat tùr a awm tawh lo bawk nèn, kei ngei pawh hian nuam ka ti, ka zêp lo, ka pa hian ngaihzâwng a nei tawh lo chiangbàng a ni tih hre chiang phei ila chuan kan in chhûng hi nuam ka ti viau tawh ang, tuna ka hlimna hi chu a la famkim chiah lo tlat, ka nu khawngaihna ka nei leh tlat țhin.

Ka pa chuan damdawi ka lei kim loh zawng chu min leisak vek a, ka inentîrna result kha ka nuin a lo hmuh a ni ngei ang, damdawi lei tùr a tam tham ve deuh bawk a, ka pawisa neihin a daih a ring lo ve a ni ngei ang. Remruati lah hian min rawn biak apiangin ka zirlai bâkah ka pa nèn kan inkâr min rawn zâwt ziah a, sawi dàn vak hre lo mah ila a hma ai chuan inhnaih tawh tak kan ni tih thu ka hrilh ve țhìn a, hmasâwnna a awm zêl a ni tih a hriatin a lãwm thei kher mai.

"Ka beidawng miah lo a nia, in inkâr a țhat zêl theih nân ka dîl ziah a, bâkah, i pa pawh pasal țha leh rinawm,  pa țha tak a nih ngei theih nân ka dìlpui ziah bawk. A result ka hmuh hma chu ka lo dîl ngawrh sauh sauh bawk ang, Pathian hian tih theih loh a nei lo a, beidawng lova kan dìl phawt chuan result țha kan hmu ngei ang," a rawn ti siam siam a.

"Mahse, damlo an awm pawhin kan țawngțaipui a, an dam vek chuang hleinem, thinlung leh tihtak zeta kan țawngțai pawhin result duhawm kan hmu vek chuang lo," tiin ka lo hnial a, sawi dik ka inti ve chiang êm! Kan têt deuh lai pawhin kan class-a mi hmeichhe damlo kan țawngțaipui vak a, kan sir leh miss zawng zawngte nèn; mahse, a dam miah lo, a thi daih tho. Khatih lai pawh khân kan thinlung tak takin kan dîl ve chiang alawm.

"Kan duh a hnênah kan dîl a, min tihhlawhtlinsak vek kher chuang lo, ni e, a dik alawm. A duh dànin min chhâng mai țhìn a, a duh dàn kha keini duh dàn ang diak diak chu a ni lo ang; mahse, a remruatna hi a fel êm êm thung a ni. Kan dìl zawng zawng hi min tihhlawhtlinsak ta vek se, mihring hi kan buai nuai nuai mai zâwk lo ang maw," tiin a rawn nui hak hak a, chutah," Rinawmi'n a tân nang hi a lo dìl che a keiin ka tân ka lo dìl bawk si che chuan kan insual mai dâwn asin," a ti leh a, ka nui ve hawk mai.

Ka ngaihtuahin ka chîk ru ve fo a, ka pa pawh hian a bialnu kha a thlah ta em ni aw ka ti ve fo, a chhan chu tlai lam office bàn hian a lêng kãwi ngai tawh lo, in ka thlen hian inah a lo awm daih tawh țhìn, bâkah, ka nu bulah hian a tâp peih ta viau bawk a, ka nu hlim hmêl hian a ko ve pawh a ni mahna. A ngaihzâwng hi țhen vang vang tawh se ka ti, ka nu hian a hriat chhuah ka hlau, hre chhuak ta se hetiang hlim hmël hi a pu thei hauh lo ang, a nun a chhe vek mai ang.

Tlai khat chu ka va be hmasa ve tlat a, a hlim aw ri hriat chu a nuam ka ti khawp mai. "Ka rawn be har che i ti a ni chiang mai," a rawn tih chuan," Ni  nâng, thil ka lo ngaihtuah kual a, chu thil chu kan tihpuitlin hunah chuan i hlim dâwn tih ka hria a ni. I nghah rei a ngai dâwn tawh lo a nia, Valentine's day hma ní chiahah kan tihlawhtling ang," ka ti a, phùr tih hriat tak hian," Eng thil? Ka hre châk tawh a nia!" a rawn ti vat a, kei erawh chuan," Ka hruai chhuah hunah che i hre mai ang," tiin ka lo zëp ve tlat thung a.

Mahse, mihring hian kan hma hun kan va hre lo tehlul êm tih ka ngaihtuah, Valentine's day thlen hma, kâr khat vêl a la awm tihah chuan damdawi inah a lût thut mai tih min rawn hrilh a, ka hlauthãwng teh asin! Chhùn kan chawlh laiin a ni a, class pawimawh deuh chawhnu lamah la nei dâwn mah ila ka rilru a nuam lo, ka tlãn haw vat a, inah pawh pêng lovin damdawi in lam ka pan ta nghâl a, ka rilruah chuan hlauhthàwnna hlîr a awm. A mak teh thut êm mai a, damdawi ina lût thut tùrah ka la ngaihtuah chhin rêng rêng lo, a lo damlo viau rêng rêng em ni? Kan inhmuh hnuhnun berah kha chuan damlo hmel pawh a put loh kha, bâkah, ni tin zan tin kan inbia a, damlo angin a awm ngai lo bawk, chanchin ka zawh lahin a dam țhat thu min hrilh ziah a nih kha.

Ka hlauhthàwnna belh chhah tùrin ICU-ah a lo la awm zui, mipa mah ni ila sawi tùr rêng ka hre lo va, hlauhthàwnna avàngin ka thaw a sa pup pup maiin ka hria. A chhûngte lo awm țaih bulah chuan ka ding ve deuh reng a, anni pawh chuan hlim hmel an pu thei bîk lo. Pastor nupui leh pastor fate ni mah se an hmêlah hlauhthàwnna a lang a, an mitmengah lungngaihna a lang a ni, ka dem lo ve, mihring ve tho an nia, an fanu leh an unaunu, dinhmun hlauhawma a awm chuan an hlauthãwng ve tho ang chu, mipa mah ni ila a chhûngte hi hnem dàn ka hre miah lo.

A hnu deuhah a nu chuan," Roddick, hlauthãwng lutuk lo ang u, eng êm a ti lo ang, a rawn harh thuai mai ang," tiin min rawn hnèm a, a thil sawi chuan min hnèm fahran lo nain hlauhthàwnawm lam thu ngaihthlâk ai chuan tlêm chuan a zia; mahse, ka rilru chu a la ipik lutuk.

"Engtin nge a awm  chiah a? A awm deuh thut tihna a ni ang maw?" tiin a nu chu ka han zâwt leh rih a, ani chuan," Nuamsam lo tih kha chu a sawi zauh zauh a; mahse, damdawi a ei a, a zia mai zêl a, vawiina hetia a awm hma khân a lu a nat thu kha a sawi a, a sawi hnu rei lo te hnuah nikhaw hre lovin a awm ta nghâl a ni, a pa lah chu a zin lai a ni lehnghâl a," a ti sap sap a.

A nu chu hnèma țawng thlamuan tùr ka nih ve nèn, ka țawng thei tlat lo, ka kha a chih tlat ni maiin ka hria. A chhan chu hetiang a dinhmuna ding tawhte ka hre ve nual tawh a, tu mah dam chhuak an awm tlat lo. Hnuk fei ber ka hriat kha kâr khat chhúng chu ICU-ah dahin ventilator hmangin an thâwktîr a; mahse, a hnuah a thi ta tho. Ka thinlung chu hlauhthàwnna leh  thlaphànna sawi hleih theih loh hian min vûr hlup hlup

niin ka hria a, ka thawte chu a chham mai dâwnin ka hria, kalsan hreh viau mah ila ka thâwk a hrehawm tlat avàng chuan pâwn lamah ka tlãn chhuak ta a.

Pâwn boruak chu hîpin ka thaw kâwk kâwk a, rei vak lo hnuah chuan tlêmin ka zia ta deuh. Ka âwm hi na taka țhàm beh, nawr beh ang tlatin ka hria a, thâwk harsa ka ti lutuk a ni, ka thâwk leh kâwk kâwk țhìn a, chutianga minute 10  vêl zet ka tih hnuah chuan ka zia ta viau e. A chhûng lama ka luh leh pawh chuan nichîna ka awm dàn ang kha chuan ka awm ta bîk lo, chanchin ngaichangin kan awm reng a; mahse, hmasàwnna lam emaw țhat loh belhna lam emaw kan hre lo, ventilator hmanga thâwktîr a ni a, hmuh ka châk viau nain tûn dinhmunah hi chuan hmuh ka duh lo, a tân hian ka chak táwk lo tlat.

Zànah pawh ka haw lo, ka nu leh pate pawh chanchin ka hrilh a, ka țhiante pawh ka hrilh. Ka nu leh pate chu an rawn kal ve thuai a, ka damdawi leh ka mamawh tùr min rawn kensak bawk a, tih theih nei hek lo le, rei tak pawh an awm lo, ka țhiante pawh an rawn lang ve bawk a; mahse, damdawi in chhûnga tam tak awm phal loh a nih avàngin ka hawtîr leh thuai hlawm a, Remruati chhûngte lam an awm nual si nèn, tam tak awm kha a remchâng thei bîk lo va, kei erawh chu ka inthlahrung duh bîk lo va, ka awm lui ve tlat a.

Chhìn khat té mah ka chhîng lo, ka mut a chhuak deuh dâwn nia ka hriat chuan pâwnah ka chhuak a, rilru bîng mup chungin inthlarung deuhin ka țawngțai a, a rì phei chuan ka duh teuh lo. Ka rilruin ka țawngțai  a ni ber ang chu, ka mangangin ka hlauthãwng ve êm bawk a ni, min kalsan daih ang tih ka hlau takzet. 

Hma kan sâwn lo khawp mai, a nu leh a laizawnte hmel phelh phang mai leh hlim lo hmel chuan an rilru leh an ngaihtuahna a tilang chiang viauin ka hria. An tê ber a ni a, an duatin keh thei dawmin an dawm tih ka hria, an rilru a hrehawm ngawt ang, pa ber zin lai a la ni zui.

A tûkah pawh chuan class ka țhulh tawp. A hmasâwnna lang lêm lo mah se kalsan daih chu ka duh lo, a lo harh thut thei a, chutih hunah chuan ka hming a lam ngeiin ka ring tlat a, chu rinna chuan min kal hlattîr thei lo. Ka hming a lam laia ka lo awm bo daih chuan a fuh dâwn lo êm mai.

Ei tùr chi hrang hrang an chhawp a; mahse, ei thei abar pawh kan awm chuang lo, kei phei chuan ei ka tum lo hrim hrim. Natna khuma nikhaw hre lova a leh reng laiin ei tùr ka lo ei thei bîk lo ang, kei hi a dinhmunah sâwn ding ve ta ila, natna khuma ka leh reng laiin ei tùr a ei duh bîkin ka ring lo.

A pa a rawn thleng har ka ti kher mai. Engtin nge tûn ang hunahte a zin bo theih réng réng ni? Chanchin a hre ve tawh àwm si a, rawn hàwn ve vat mai àwm, pastor mahni chhûngte ngaihthah tak a lo nih dâwn hi, a nupui fanaute thlamuana hnem an ngaih tehlul nèn.

Zànah chuan doctor chuan a kut a rawn chêt niin an sawi a, chu hlek pawh chuan beiseina thar min pe niin ka hria, chu beiseina rawn ëng sêt sêt chuan min hlaysan lovin rawn alh êng pup se ka ti ngawt mai. Beidawn lan ka hlauh avàngin ka thup hrãm hrãm a, beiseina ka nei chau viau a ni tih an hriat kher kha ka duh bîk lo a ni.

Mihringte hian tih theih hi kan va nei tlêm tehlul êm! Ka țawngțainaah a dam lehna ka dîl a; mahse, chhàn ka la ni si lo, min ensan a niang. Kei chu mi țha leh fel ka ni ve lo va, sunday-ah pawh ka inkhâwm khât, hei vang hi em ni min chhàn duh miah loh?

Pathian thil rèl dan hi kei mi sual hian ka hre thiam phâk ve hlawl lo. Khawvêl thiamna hmanga doctor-te pawhin a nunna chhan tuma an beih laiin, kei leh a chhûngte leh ka țhiante  hmangaihna pawh chuan a nunna chu kan chelh thei ta lo, kan chelh ding zo ta lo a ni. Mittui nèn kan chelh a, kan ko va; mahse, a kal lui ta tho. Ka hre thiam thei lo, a țawngkam khat pawh hre lova min liamsan hi ka tuar na takzet a ni. A nunnain a tlin ta ngang lo tih doctor-te'n an sawi laiin mi dang tam tak awm ve mah se awrâwl  chhuah meuhin ka țap a, ka rilru a nat êm avàng leh ka hriat thiam loh êm avàng chuan ã thei mai dâwnin ka inhre hial nghe nghe.

Ka awm dàn chu a mumal lo viau tih ka hria. A biang lum ham ham țhin, lo dai ta riai mai chu ka chûl ka chûl a, ka mittui pawh a tla lo, ka chûl ka chûl ringawt. Nupa țâng țhen hi eng anga nâ nge a nih ka hre lo va, a râthlâkin a na viau ang tih chu ka ring; mahse, anni chu nupa an nih miau avàngin duh tâwkin mi mitmei vêng hauh lovin an insûnin an ințah bawrh bawrh thei ang, kei chuan mitmei vèn tùr ka nei a, nupa kan nih miau loh avàngin mi dang ka zah a ngai; mahse, ka zah zo meuh lo chu a nih hi, ka țap chhuak râwih râwih lo mai a ni, ka thinlung natzia erawh chu tu mahin min hriatpui lo ang, țawngka mai hian a sawi fiah phâk lo, a na ngawih ngawih.

Kuang thla kan lâkpui a, thlànmual thleng kan thlah a, țhiante'n min kalpui zêl a, thlànmuala thlamuanna thuchah a pain a sawi chuan min hnèm zo lo, a pa hian a ngai ve miah lo a nih te ka ring hial mai, thuchahte a la sawi thei a nia. A țawngțai laite chuan ka meng reng a, kuang chu ka thlîr reng ringawt, a hmel mai pawh ni lo a kuang pawh ka hmu rei tawh dâwn si lo, ka thinlung hi a va na tak êm! A rûm vawng vawng a ni.

Khêl lovin Valentine's Day chu a rawn inher chhuak ta ngei mai, ka lo suangtuah ve dàn chuan nimin lam khân parlour-ah ka kalpui ang a, a duh ang rawng takin a sam kan colour ang ka ti a nia, a duhthusàm pakhat kha a ni ve si a; mahse, ruahmanna thawrawng mai a lo ni si, kan ruahmanna ve hi chu eng mah lo mai a va ni chiang êm! A duhthusàm pawh ka tihhlawhtlinsak hman si lo. Ka dawhkàna vawiin ngeia pëk tùra ka dah țhat khiau, a pâwn lam pawh mawi taka ka tuam thlap chu ka en vawng vawng a, ka pe hman ta lo chu a ni si a, he thil ka lei laia ka hlimzia tak te kha, hetiang thil hi kan chungah a lo thleng dâwn tih ka suangtuah pha miah si lo.

Remruati nuin min rawn bia a, hreh zetin an inah chuan ka va kal a, anni pawh an hmelah hlimna a lang lo, nui lui mah se an mitmengah lungngaihna leh natna  bâk hmuh tùr a awm lo. A duh min pêk hnu chuan rei pawh ka awm lo, mi an awm ve nual si a, ka haw hma ta daih  a, mi bula awm pawh ka châk lo, mahni chauha awm ka duh ber.

Remruati diary, lehkhathawn leh vawiina min pêk a tum ve ngei mai chu ka room-ah chuan ka keng lût a,  gift chu ka hawng duh rih lo phawt a, a lehkhathawn chu thâwk ka lâk hawk hawk hnuah ka chhiar ta chauh a.

'Ka hmangaih che tih thu hi ka hrilh tawh che tiraw? Mahse, hrilh nawn leh che hi ka la duh fan a, ka thâwk tàwp thlengin, he ka taksaa ka thinphû a phut tawp thleng pawhin ka hmangaih reng ang che, he taksa hi a thi thei a ni thei; mahse, ka hmangaihna che chu thi thei taksa hian a tithi ve ngai lo ang, chatuan thleng pawhin ka hmangaih ang che. Kan hma hun hi kan hre hauh lo nain ka hmangaihna che hi chu a ding reng ang. He ka taksa hi lo awngrawpin thihna hial pawhin min pawh țhen tum mah se, ka hmangaihna che hi chu a pawt țhen ve thei ngai lo ang.

Ka hmangaih reng ang che, chatuanin'.

Ka chhiar tàwp rih, ka thaw hawk phawt a, chutah, ka mittui chu dan rual lohin a rawn tla ta zung zung mai. Min lo hmangaih êm êm a ni tih hriatna chuan min vèl lo thei lo, kei pawhin ka hmangaih asin; mahse, ka hrilh ve hman ta lo a nih kha, lo hrilh hman ila aw...

Ka zia deuh hnu chuan ka chhiar zawm leh a.

'Mihring taksa hi chu a lo ințhen a ni maithei, ka kal hmasa a ni thei, chutih hunah pawh chuan min rawn ngaihtuahin i suangtuahnaah khân min han chèntîr la, min ngaih vàngin țah tum lo la, ka hmangaihna che hian lo inhnem i tum dàwn nia. Van ramah ka lo nghâk ang che a, i lo thlen ve hun thlîrin hlim takin, chatuana ințhen tawh miah lo tùrin ka lo nghâk ang che'

Ka thinlung chu a rûm vawng vawng mai, amah ngaiin a rûm vawng vawng a, a țap a, a hmangaihna thua inhnem chu sawi loh, ka thinlung a tina zâwk  a nih hi, ani chuan min kalsan tawh si a, dam chhûng hian ka hmu tawh dâwn si lo, biak ina kal tùr pawhin min rawn sâwm tawh ngai dâwn lo, min rawn sàwm laite khân chhuanlam siam lo khân lo inkhàwm ve zat zat ila...Aw, inchhìrna hlïr mai...

Pen leh lehkhapuan ka la chhuak a, ka rilru tâwt lutuk tihziaawm nân chair-ah chuan țhuin he thu hi ka ziak chhuak ta mawlh mawlh a.

'Ka hmangaih, ka hmangaih che tih hrilh lo chea ka kaltîr thei che hi ka inchhîr, ni lo, ka kaltîr che a ni lo, ka ko lawm lawm che a, i liam ta a ni zâwk. I awmna chu a nuam em? Natna leh hrehawmna awm tawh lohna tih chu a dik tak tak em? Ka lei vàntirhkoh, ka ngaihzia che hi i hriaem? Keimah chauha min hnutchhiah mai hi min khawngaih ve lo em ni? Min hmangaih a nih chuan engati nge i kal dâwnah pawh țawngkam khat tê pawha min biak loh? Vawi khat tê pawh min melh lo tiraw? A nâ ka ti asin, tunah pawh hian a nâ ka la ti ngawih ngawih.

Inkhâwm tùra min sàwmna ka lo hnar țhinte kha ka inchhîr, hetiang hian min kalsan dâwn tih chu hria ila chuan ni tin ka zui mai tùr che a nia, min ngaidam rawh aw, ka dàwn a tãwi êm a ni, mi sual zâwk hi mi fel zâwkin min kalsan daih a, keimah mai chuan ka petek nasa leh ang tih ka hlau. Min vêng reng rawh aw, ka hmuh theih ka lei vàntirhkoh i nih ţhin kha.'

Ka ziah zawh hnu chuan a diary kdwm chu ka melh vang vang a, hei chu ka chhiar ngam rih lo, gift min pêk a tum ve ràn chu ka melh leh a, hêng te hi a lo lei lâwk ve reuh a ni tak si a...

*HRINGNUNAH HIAN INHMANGAIH TAK TAKTE HIAN NUN AN TINUAMIN AN TIHLIM A; MAHSE, HLIMNA TLUANTLING AN NEI VEK KHER LO, PAKHAT ZÂWK ZÂWKIN AN LIAMSAN HMASA FO, HRINGNUN A NI MIAU ALAWM LE*

~A TÀWP TA~

(Min hau s'u🙈🏃‍♀️🏃‍♀️🏃‍♀️)