☆HLWILY☆ - 1 By Dingdi Pachuau
Ka lam hawia car muang zeta rawn tlãn phei chu ka en reng a, en loh duh viau mah ila a khalhtu lak ațang chuan mit lâk sawn har ka ti si a ni. Ka thin a phu rang dat dat viau a, duh lovin ka âwm chu ka nem tãwk a; mahse, ka nem tãwk avàng ringawt chuan a phu muang thei chuang lo.
He khawvêla mipa piang chhuak tawh zîngah ka thin tiphu rang dat dat theitu chu amah chiah hi a la niin ka hria! Hmãn ațang tawhin tûn thlengin, ka hmuh apiangin ka awm dàn a dik thei lo va, chhûngril lamah phùrna nasa tak neiin ka awm dàn phung ka la hloh ziah zui, inthunun ka tum nasa thei viau a; mahse, ka hmuh theiha a rawn awm leh meuh hi chuan ka inthunun tumnate chuan min thlawh bosan hneh thei lutuk ringawt, tunah pawh che lovin ka en leh ngut ngut tawh hi.
Ani erawh chuan min rawn en ve lo, hmuh pawh min rawn hmu tawp nãng. A bulah chuan a bialnu, a kawp lai mêk nia an sawi Elena-i chu a țhu a, a bialnu lam hawia a khi deuh sak ka hmuh phei chuan ka ni deuh nghulh mai, thîkna nasa tak ka nei nghâl bawk a, traffic a jam avàngin ka hmuh chian theihna lai takah chuan an la ding zui a.
Ka en reng lai chuan Sir Damon-a chuan Elena-i kut chu la kãngin a fawhsak zoh a, chutih lai tak chuan," A mak thei vung vung êm mai, miin mi ã emaw an ti che ang e," tiin ka țhian ţha ber Sti chuan ka kokia rawn khawih zoh pah chuan a ti sap a, mit la sawna amah ka en chuan ani pawh chuan Sir Damon-a leh Elena-i chu a hmu ve tho tih ka hre nghâl a.
"Hmm...Buaithlâk thei!! Star tawh lo mai teh, a hre ve bawk si lo che a, bâkah, a lërh bawk si, Star ringawt pawh hi a hahthlâk dâwn hian ka hre êm mai," a ti zui leh zat a, chutah, ka kutah kàiin," Kalsan ang, an induh lai i thlìr reng chuan i rilru a na mai mai," tia nui deuh chung hian an dàwr awmna lamah chuan min hruai phei ta nghâl a.
Ni e, he pa star hi chu a hahthlâk hi chu ka ti țhìn a ni. A chanchin hi ka hre hneh ve țhìn bawk si a, a chhiat loh avàng leh an hausak vàng hian a lãr ve thawkhat a, bialnu pawh a ngah thei viau rêng a ni. A luck êm avàng hian a lêrh ve pah bawk a ni tih ka hre thiam a, a hriate'n an han sawi tak tak phei hi chuan a bialnu hluite rêng rêng hian an la duh êm êm vek a; mahse, amah zâwk hian a hnê țhìn niin an sawi, a dik tak tak pawh ka ring, a pâwnlam lan dàn, a hmêl, mitmeng leh chezia ringawt ațang pawh hian a nungchang tùr àwm chu a hriat theih ruak tlat a ni.
Mahse, chuti chung chung pawh chuan ka star êm êm reng a, a hawiher hmêl lang chapo lek lekte chu ngei viau àwm zâwk tak ka nih laiin ngei lam aiin ka duh phah sauh niin ka hria, ka bànsan thei chuang lo, ka hmuh lohin ka ngai veng veng a, ka hmuh ve chhunah lah, amah chauhin ka hmu ngai lo va, ka rilru hrehawm belhchhah tùrin a bulah hmeichhia ka hmu ziah bawk, hei hi tawrh hrehawm ka ti ber țhìn. Min hria emaw hre ve lo emaw pawh ni se a bulah hian hmeichhe chhe lo deuh hi chu hmu tek ve tawh lo hrãm ila...
Dàwra kan luh hnu chuan,"Ho ka tihpui viau na chein i tân chuan a ho lo heavy thei tho a; mahse, a nula kawpte ngaihtuah hian i tân hi chuan chance a awm theiin ka ring lo, chuvàngin," tiin thâwk a la huai a, zàwi deuh záwk hian," Mi dang melh ve tawh teh," a ti ta thlâwt a.
Engtin mah ka chhâng lo, ka melh ringawt a, ani lah chuan," Tikhân, ngawi ve ziah suh, a chanchin ka sawi ve chhunah lah hian i ngawi kawr ziah, eng emaw tak sawi ve țhìn rawh," te chu a ti leh lawi a, min rawn melh rum pah bawk a.
"Bànsan tùra min sawipui hi chuan sawi tùr ka hre lo țhìn alawm," tiin dik takin ka chhâng ve ta a, ani chuan thâwk la leh huaiin," I rilru luhlul uchuak hi ka ning, ani lo mipa țha leh fel an tam heavy, beiseitu pawh i neih nual kha, tu emaw ber kha chhâng tawh ang che, i chhàn loh pawhin keimahin ka chhànsak ang che," a ti ta leh bawrh bawrh a. Kan țawng chu kan piah deuha a nu dàwr nghâk chuan a lo hre pha a ni chêk ang chu," Chu, tu emaw chu a va luck àwm ve..?" a rawn ti ta a!
"LalSti hi chu, i țawng ring thei lutuk a, i nuin a lo hriat vek chu aw..." ti sapin Sti chu rum fê hian ka melh a, Nu Laltei lam hawi erawh chuan zak ru deuh tak chung hian ka nui lui a," A ti ve mai mai a nih hi, amah hi a luck lutuk a, a buai a nih ber zâwk hi," ka ti thung a.
"Nu, i beng kha lo chhu ngawng mai mai teh, kan thil sawi hi nu lo hriat ve chi pawh a ni lo, a pawimawh lutuk a," Sti chuan nui chung hian a ti a, a nu pawh chu a nui ve hawk hawk a; mahse, dàwrtu a neih tâk avàngin min rawn ngaihsak chhunzawm hman ta chuang lo va.
Haw kawngah chuan,"Vawiina kan interview-na kha kan tling thei mai dâwnin i hria em?" a ti leh daih a, nui deuh chung hian," Tling thei mai ang," awlsam zet hian ka lo ti thung a, kan chhûngte hnênah kan interview dâwn tih kan sawi lang lo ve ve a, kan tlin loh palh thut tâkah a zahthlâk dâwna kan hriat vàng a ni.
"Hotu deuh bera lang hmelchhiat heavy-zia kha, kan tling a nih ngai chuan kan hrawn ngei a ngai dâwn si a, ni tina a hmêl hmuh chu a peihawm loh dâwn sa e," a ti leh a, a nui kar kar pah a, kei erawh chuan," Tlin hma hmaa chutiang lo sawite chu a," ka ti a; mahse, ka nuih a za tho. An inah chuan pêng ve leh rih tùrin min ti nain ka haw tlang ta thung a, kan in hi a inhlat lêm lo va, kan inkàwm nasa a, kan inhnaih vàng pawh hi a ni maithei, kan inlèn pawh viau bawk a ni.
Inah chuan ka pa a lo awm tawh a," Pa chu, vawiin i va bâng hma àwm ve a?!" tiin ka zâwt vat a, ani pawh chuan," Nia, vawiin chu ka lu a na deuh ruai ruai reng a, ka rawn haw hma ta mai a ni," a lo ti a, a bulah chuan țhu thla vatin," A ni maw? A va zia lo ve! I inentîr nghâl em?" tiin a pang chu ka dehsak nghâl a, ka pang chu ka dek leh zat a, kei ai chuan a pang chu a lum chiang mai.
"Aw, entîr e, damdawi pawh ka ei tawh e, min chhâwk țêp tawh ang," ka pa chuan a ti leh a, ka bag chu dah țhain," A zia lo êm mai, i lu chu hmehsak i duh em? Ka lo hmet dâwn em niang?" tiin ka záwt a, ani chuan," A, ngai lo mai rawh se, han inthlâk fel la, i ei tùr ka rawn lei haw kha va ei rawh, a daih chuan a tui lo ang," a ti a.
Yes...Ei tùr min rawn hawn leh e, ka pa hi chuan fanu naupang zâwk ka nih avàng hian a nih ka ring, min duatin min ngaihsak êm êm țhìn a, a bula ka duh ka sawi apiang hi chu min tihhlawhtlinsak ziah țhin. Chumi avàng erawh chuan ka duh duh a bulah ka sawi tihna a ni lo, ka pa hi ka hmangaihin ka duat ve tho a, ka nu tel miah loha a chàwi len ka nih vàng hian keh thei dawm takin min dawm țhìn tih pawh ka hria, ka têt lai chuan ka pangchang ve thei viau tih chu ka hria a; mahse, ka puitlin chhoh ve hnu hi chuan ka theihnaah ka duat lêt ve ta zâwk țhìn. Nikum October thla khân ka u chiah hmeichhiain pasal min neihsan a, ka u awm loh tâk hnu ațang phei hi chuan kan inngaihsak tawn viau, a khua a harin a lung a lêng viau ang tih ka hlau ţhìn a; mahse, chutiang lam chu a sawi lang ngai lêm lo.
Kum 13 vêl ka nih ațangin awmpui pakhat kan nei a, tûn thlengin rinawm takin min la awmpui ngar ngar a, 'Nu Mawi' tiin kan ko mai a, a hma kha chuan hnam dang a ni nge kan hnampui a ni tih pawh ka hre lo, a țawng a ze si lo va, kan hnampui ni tùrah ka ngai ve ngawt a, tûn hnuah hian Mizo hnahthlâk hnam pêng zînga mi chu a ni tih ka hre chhuak a, a chhûngte dang chu Manipur lamah an awm vek a ni àwm e.
Eirawng a lo bâwl mawlh mawlh a, min lo hmuh chuan ka pa ei tùr min lo hawn chu min lo kawhhmuh vat a," I ei thuai loh chuan a dài mai ang," tiin, a hna chu a chhunzawm leh nghâl zat a, ka pa hi a duh khirh deuh avàngin chawhmeh lam hi a siam țeuh mai ţhin, ka pa hian siam a duh dàn a sawi kual dûm a, Nu Mawii hian eng mah sawisêl lovin ka pa sawi ang chiah chiah chuan a siam mai țhìn a, a châng chuan keimah hian duh khirh ka lo ti țhìn a, Nu Mawii hriat loh chuan ka pa chu khirh lo deuh tùrin ka hrilh ve fo; mahse, awmzia chu a nei tam lêm lo khawp mai.
Ei tùr ei pah chuan Vànglaini phêk chu ka kêu dan dan a, hna ruak awmna chuan ka mit a la leh chat mai. Hlawh tam lamah ka buai lo va, mahni thawh chhuah ngei pawisa neih hi ka châk ber chu a ni. Ka pa hi chuan lehkha ka zir peih chhûng chu zir zêl mai tùrin min duh a, a dik ve tho, a hlawh hi keini pathum hian kan kham tâwk viau mai si a, hna zawngin ka chhuak a ni tih pawh ka hrilh duh lo rêng a ni.
DM Higher Academy Middle Section-a English zirtîrtu hna ruak awm chuan ka mit a la nghâl chat a, hlawh pawh chu ka rin aiin a tam daih mai. Nia, school lâr ve tâwk tak a ni a, School tharlâm deuh tak ni si-ah chuan zirlai pawh an ngah thei viau rêng a ni, dìl ve mai chi niin ka hria, ka tling kher ang tihna a ni chuang lo va, dìl ve hrim hrim ila, ka tlin loh leh ngai awh kha a ni leh mai dâwn a, hloh tùr ka nei chuang hleinem.
Sti pawh ka hrilh ve a, ani erawh chuan a lo peih lo nasa niin,"Zirtîrtu nih chu ka peih hlawl lo, mi ai kalin ka inhlawh tawh a, ka sim hmak," a lo ti a, ka sâwm nawn tawh lo chiang khawp mai; mahse, application ka theh luhnaah chuan min kalpui ve leh tho.
Kan hna dìlah kha chuan kan tling lo ve ve a, waiting list-ah erawh kan awm thung. Kan hlawhchham ve ve chu kan innuih chiam a, engthâwl zet hian," Hmelchhe-heavy-a kan hmu thei dâwn ta lo tihna a ni mai a," a ti a, a nui tak khiah khiah a!
"Heavy hi uar viau teh suh, a mawi lo bawk si," ka lo ti hlak a, ani erawh chuan," Mawi e a! Mawi heavy tawp a ni mai," tiin," Nang zirtîrtu i ni ang a, naupang i zirtîr chiam chiam laiin kei chuan dàwr ka lo nghâk dar dar thung ang a, kan va inhahdam hleih dâwn tehlul êm!" a ti leh a.
"A ho êm mai a, pawisa ka thawh chhuah phawt chuan a țha a ni mai," ka lo ti thung a, chutah,"Tlin hma chuan hawh, sawi tawh lo ang, kan lo sawi chiam hian kan hlawhchham duh deuh ni tlatin ka hria," ka ti leh a. Ani pawh chuan," Nia tiraw? A ni ngei ngei ang, thil dang sawi daih ang aw, nizàn chu Làwmnoa nèn kan inbauh deuh a," tiin a bialpa chanchin lamah chuan a pakai ta nghâl a.
*******
Zirtîrtu lâkna tùra ka interview dâwn nî chuan ka inuluk ve deuh a, ka sam pawh ka khuih uluk khawp mai, makeup erawh ka hmang duh lo va, lipgloss erawh ka hmang ve hlek thung. Makeup nèn hi chuan duh angin ka confi thei lo țhìn a, lipgloss ka inhnawih zawh chuan ka confi-na kawrchung ka han ha leh a, dârthlalanga inenin ka nui sak a, ka inpeih ta e.
School hmunah interview tùr a nih avàngin hma takah ka thleng a, mi dang pawh an lo awm ve nual tho nia. Ka han hawi kual vêl a, an thawven hmèl hlawmin an nervous loh hmèl hlawm viauin ka hria, kei erawh chu chhûngril lamah tlêmin ka nuam lo deuh up thung; mahse, ka hmêla lan chhuahtîr erawh ka tum lo ve khawp thung.
Dâr 11-ah interview țan tùr a ni a, minute 10 vêl a la awm ang tihah chuan Sir Damon-a ka hmu ta tlat mai, chu pawh kan zîngah, kan bul maiah a la ni zui! Mak ka ti khawp mai a, chu zawng aia mak lehzual chu, a bulah zuitu, hmeichhia an awm miah lo, ka hmu miah lo!
"Rindik?!"
Tu tak a ko chu ni maw? Ka en leh vat a, a hmel hriat a hmu a ni ngei ang chu; mahse, mi dang en lovin keimah chu min lo en reng a!
"Rindik, eng nge i tih ve dâwn?"
Mi dang pawh chuan min rawn ta țhap mai, keimah min bia a ni ngei ang; mahse, Rindiki ka ni hleinem, ka hming chu Lalruatkimi a ni.
"Min bia em ni?" tiin a ngaihna hre lo lek lek hian ka ti sap a, ka thin chu a phu su dup dup mai. Ani lah chuan," Niang chu, Rindiki dang an awm hleinem," a lo la ti zui a, min bia chu lãwm viau mah ila, ka hming ni lova min ko chu ka lunghnûr deuh hlek, mi dangah min ngai a ni ngei ang chu.
~FLASHBACK~
"Rindik, i ţhiannu kha han chhan teh, a dikna i hria em?"
Hei hi Sir Damon-a'n min kohna hmasa ber a ni, ka hming a nih loh avàngin keimah min sawina a ni tih ka hre lawk lo nghe nghe a; mahse, min rawn en avàng chauhin keimah min rawn tihna a ni tih ka hre leh chiah a ni.
Ka ding a, ka bul chiaha țhu Sandy a zawhna chu ka thiam ve tak a nih avàngin ka sawi nghâl a, ka sawi dik avàng chuan kan pahnih chuan min țhuttîr ta nghâl bawk a, ka hming ni lovin min ko mah se nuam ka ti veng veng tho, a chhan chu zawhna a siam ka thiam miau mai si a.
Sir Damon-a hi mathematics Sir a ni a, mathematics chu a thiam thlâwt a ni. A thiam mai bâkah naupang hriat thiam theih dàn tùra mi zirtîr a thiam hle mai a, amah avàng liau liaua Mathematics pawh hi zir ka ni. A class-ah hi chuan ka awm țhain hmun dang ka hawi chhin ngai lo, a mitmeng nalh zet mai a'n dêt kual vêl hi hmuhnawm ka ti a, hmeichhe lam hawia a rawn khîk deuh sak phei hi chuan kan insik nawk nawk lo chauh a ni.
Class X ka zir laiin ka duh angin Mathematics hi ka chak lo va, ka pa pawhin min manganpui a, tuition lâkna tùr ka dap ka dap hnuah mi dang hnên ațangin Sir Damon-a hi ka hre ta a, a hnêna tuition kal pawh an lo awm nual niin, ka kal ve ta chiah a. Ka hmuh vawi khatna ațangin hmelțha ka tiin a zùnah ka uai nghâl a ni ber ang chu, kum 15 ka nih kum a ni a, nulaa chhiar tham la ni lo mah ila ani ka hmuh ațang chiah hian hmeichhia ka nihzia ka hre chiang ngang mai.
Sti nèn têt tê ațanga inkàwm niin kan school luhna pawh a inang zêl a, Matric kan pass hnuah ani chu St.Paul's-ah a kal a, kei erawh chu kal ve duh lovin Sir Damon-a thawhna LZ Memorial School-ah ka lût ta daih a, Sti pawh hian a hre thiam lo țhelh nghe nghe a, chutiang bawkin ka pa leh ka u pawhin a chhan min zâwt a, hrilh țha duh lovin," An uniform a nalh alawm, ka ha ve châk a," ka ti tlat a, tih vak ngaihna an hre bîk lo. Ka sawi dik ve lah tak a, an uniform hi a nalh reuh a, zirna lah a țha tho bawk nèn, min hnial duh lo ni maiin ka hria.
Ka pà ve hi ka tia, Sir Damon-a vàng liau liauin ka best friend bulah pawh school ka kal loh phah rap a nia. Ka Star dàn chu pui tak hi a ni ringawt, a hnuah Sti pawh chu ka hrilh ve ta a, min ngei viau a; mahse, min nuih leh ta vak vak zâwk a. Sunday-a kan inhmuh apiangin Sir Damon-a chanchin chu ka hrilh ve ziah țhin, min zâwt emaw zâwt lo emaw pawh ni se ka hrilh ziah tho.
Ni khat chu car mawi zet hi a rawn khalh a, a chhiat loh êm avàngin hmeichhia hian kan star vek ni hialin ka hria. Hemi ni pawh hian veranda ațangin kan thlïr far hlawm a, ani pawh hian a hmelțha tih hi a inhre ve a ni ngei ang, ngêng deuh ngalh hian driver seat ațang chuan a rawn chhuak a, chutah, a rawn hawi chhuak a, kan lo en deuh țhap tih a hmuh vàng chu a ni ngei ang, a'n khi leh deuh sak a, chutah, hma lamah kal kualin passenger seat chu a hawng a, nula sam buang thâng leh ngo zet mai hi a rawn chhuak ta nghâl a, ka bul chiaha ding Miriami chuan," A bialnu a nih khu, an nihna a rei tawh," a ti chhuak ta sap a.
An va inhmeh tehlul êm! Chhe lo dùn bawk si, an hausak dun hmel bawk si; mahse, ka thinlung chu engtin emaw ni tak hian a rawn awm, ka sawi thiam chiah lo, chu nu, a bialnu nia Miriami sawi chu Sir Damon-a tân chuan ka duhpui thei tlat lo a nih chu, ka ngei ru deuh nghâl tlat mai! Engtizia nge? Ka thîk em ni?
Nilêngin ka awm a nuam lo va, class la tùra kan room-a a rawn luh erawh chuan tlêmin ka dik leh deuh tawh a, fiah zet leh thiam zet hian min rawn zirtîr leh char char a, greenboard-ah pawh chuan a chawk pah nghâl a, hnehsawh tak a ni.
Ka bula țhu Sandy chuan," En teh, a zungbun saw, a thar a ni chiang mai, nimin kha chuan a bun miah lo tih ka hria," zàwi sap hian a rawn ti a, ka en ve nghâl vat bawk a, a kut dinglam kutzungte u-ah chuan Rangkachak ngei a ni tih hriat tak hi a lo bun vah a, a kut sei thlarh nèn chuan a inhmeh takzetin ka hria.
"A bialnu pêk kha a ni ngei ang," a rawn tih leh phei chuan ka rilru a ni deuh ruai mai a, a rûk tak chuan ka thinlung chu a na takzet a ni. Ka star mai mai a ni tawh lovin ka hria, kei hian ka ngaizâwng tak tak tawh a ni ngei ang.
Nilêngin a bialnu kha office-ah a awm ve a ni ngei ang chu, tlai bànah chuan an inphur haw leh a, hmeichhia mai ni lovin mipa lam pawh chuan an en duh ngang mai. Mipahoin an en zâwk tak chu a bialnu chu a ni mah a, a vun a ngoin a inha tight ve bawk si a, a pian a nalh bawk nèn, an mit a tla lo chauh hlawm niin ka hria.
Rilru hlim lo zetin ka haw hnang hnang a, in ka thlen pawh chuan lehkha zir pawh ka peih lo. Kapa lo hawin ei tùr min rawn hawnsak ta hlauh zãwk a, chuti ni lo phei se chuan zankhua pawhin ka mood a off ngeiin ka ring.
"Engah nge i mood i tih-off ve ngawt a? Sir ngaizâwng rual pawh i la nih loh hi, i zak lo'm ni? I va lêrh ve!" tiin ka inhau ru mawlh mawlh a; mahse, ka rilru ka thlâk danglam thut thei bawk si lo, hrehawm ka va ti tak!
*I KAA I SAWI CHHUAH AIIN I NUNGCHANGIN THU A HRIL RING FÊ TIH HRIAIN I NUNGCHANG I ULUK HRÂM HRÂM DÂWN NIA*
Phurawm lehpek e
ReplyDeleteWrileuKtae-shi_Charleston Brent Humphrey https://wakelet.com/wake/lr1EHrOcUiSI3UOA8I-dx
ReplyDeleteduscecharno