☆HLWILY☆ - 2 By Dingdi Pachuau

 ☆HLWILY☆ - 2 By Dingdi Pachuau

Ni tin a bialnu chu a rawn hruai ta ziah mai a, hmuh hrehawm ka va ti thei tak! Mahse, Sir Damon-a chu ka ngei phah chuang lo, ka ngei phah lo mai ni lovin a bialnu bula a chêt vêl dàn chu ka hre chiang châk sauh a, a care thiam dâwn chiang tih ka hre si a, an pahniha ka hmuh dun apiang lah hian Sir Damon-a chuan a chhuah nân leh a luh nân a car kawngka hawnsakin a khàrsak leh thlap țhin a, gentleman dik tak chêt dàn tùr niin ka hria a, ka duhna a zual phah sauh țhìn.

Ni khat chu kan school tifaiin hun kan hmang ve a, hmeichhiain tukverh dârthlalang kan nâwt fai a, a harsa deuh laiah mipain min pui bawk a, corridor pheia dârthlalang kan nawh lai chuan Sir Damon-a chu a rawn kal kual a, kan hna thawk chu kan thawk țha nge țha lo a rawn thlîthlai kual a ni ngei ang.

"Sir, a fai tawh viau lo maw?" tiin Mawitei, section B-a mi,  zak lo thei bera ka ngaih chuan a lo zâwt var a, zak lo thei ber nia ka ngaih chhan chu ani hi chuan kan zirtîrtu biak hi a hreh ve hran lo va, a be bawrh bawrh leh a titipui hi ka hmu fo țhin a, chuvàng chuan zak lo thei ka ti a, a châng chuan ka awt ru viau țhìn a ni.

"Fai thawkhat tawh viau mai," tiin Sir Damon-a pawh chuan a chhâng ve mai a, Mawitei vêk chuan nui chung hian," Sir, fai tawh ti ve mai la, kan thawk nasa ve tawh alawm. Chuan, eng emaw function pui tham deuh a awm dâwn em ni?" a ti leh zat a.

"Awm dâwn em aw...?" a tih vang vang lai chuan Sandy chuan min rawn nghawk deuh salh a," Mawitei zahna tlâkchhamzia hi chu aw..." a ti sap a, chhâng lovin Sandy chu ka nuih sak ringawt a, kan bul hnaih deuh taka Sir chu a din avàngin en pawh ka en ngam lo, ka thin erawh a phu ring țha khawp mai.

"A nih, Sir, car-a i lo phurh ziah kha i bialnu a ni tiraw? A chhe lo sia, in inhmeh kan ti thei a nia aw..." Mawitei'n a tih leh tâkah chuan chhûngrilah ka lo zak a, Sandy'n min rawn sik vâwt zui nèn, ka la phu zawk zui, ka thinlungah nuam lo tihna leh thîkna ka nei nghâl bawk a.

"A, mai mai ţhìn a... Le, thawk thuai thuai r'u le, in zawh hma leh in bâng hma thei dâwn tihna a ni mai a," Sir Damon-a'n a tih tâkah chuan Mawitei pawh chuan," Yes, kan bàn hma loh vaih," tiin a thawk țan leh ta nghâl a, Sir pawh chu kan bul ațang chuan a kal sawn ve ta nghâl bawk a.

"Zak lo ve rem rem e..." Sandy chuan a ti leh sar sar a, engtin mah ka chhâng lo. Ngaih dàn hrang daih ka lo nei a, khatia nêl tih hriat taka a han be bawrh bawrh ngam bîk  kha a awhawm ka ti tlat pek a, kan inan loh lutuk avàng chuan Mawitei chu ka awt ru êm êm zâwk a ni.

LZ Memorial-ah chuan kum hnih ka kal a, ka kal chhûng zawng chuan țhian țha tia sawi tùr ka nei lo. Kan class hmeichhia chu kan inkàwm vek nain inkàwm bîk chu kan awm tho a; mahse, kei chuan kawm ngeih fàl bík ka nei ve tlat lo, ka thurûk pawh chu tu mah ka hrilh ngam lo rêng a, țhiante'n zak hauh lova Sir Damon-a chanchin, an star thu leh chhe lo an tih thu an sawi pawh chuan kei chuan ngawi karin an thil sawi chu ka lo ngaithla tawp a ni ber, a chanchin an hriat theih êm avàng erawh chuan an titi chu hriat hmaih ka hlau thei viau a ni.

Vawi khat chu Teacher's day kan hman dâwnin kan section hmeichhe zîngah kei, Sandy leh Miriami chu a buai pâwlah kan țang a, kan senior kum a nih tawh avàngin zirtîrtute hriat kan hlawh tawh a, chuvànga min ruat chhuak chu an ni. Hall-ah zirtîrtu țhenkhat nèn, kan class mipa țhenkhat leh section dang mipa țhenkhat pawh telin, banner târin pangpâr kan buaipui a, țhutna kan rem fel bawk a, mipain sound leh stage an buaipui leh bawk a.

Sir Damon-a chuan," Rindik, in țhian thum khân lo kal ula, thil min lo tihpui lawk teh u," a rawn ti a, ka hming ni lova min rawn koh leh avàng chuan ka lo hre leh lawk lo va; mahse, pangpâr ka khawipui Miriami chuan," Sir-i'n min ko, a rawn hawi reng a nia," a tih tâkah chuan min kohna a ni tih ka hre chhuak leh chiah a, min lo en reng lah tak a.

Mawitei chu ni ila chuan," Sir, Rindiki ka ni lo, Lalruatkimi alawm ka nih," ka ti ngei  ngei ang; mahse, chutia tih chu ka ngam teuh lo mai! Hmanmawh takin kan pangpâr khawih lai chu dahin Sir Damon-a lam chu kan pan phei ta zâwk a, ani pawh chu a inher vut a, pâwnah chhuakin kan zui chhuak ve zël a.

A car-ah chuangin kan tlãn chhuak a, ka bula țhute pahnih chuan min sik nasa lutuk a, ka duk nasa ngawtin ka ring! A car chhûng faizia leh rimtuizia lah chu a, che țawp tak chu a ni lo chiang alawm, ka duhna a zual leh sawtin ka hria.

Pangpâr dàwrah kalin pangpâr mawi kan tih chu min thlantîr a, a ngaihna hre lo takin kan țhian thum chuan kan thlang ve mai a, a rawng a la inang lo vek zui a! Mahse, eng mah sawi lovin dàwr nghâktu hnênah chuan kan thlan chhuah ang chi chu tam tham tak lâk chhuahtîrin motor hnungah chuan kan dah a, pangpar kan thlan rawng mil ribbon a lei nghâl bawk a, kan chhuak leh ta dial a.

Hall-a kan luh leh chuan," In pangpàr thlan kha hmun khatah inpawlhin in khâwi dâwn nia, stage hma taka dah tùr a ni ang aw," a ti a, ani erawh chu ribbon chu kengin office lamah a kal ta daih a, a hnung lam ațanga thlîr zuiin Miriami chuan," Sìr chhiat lohzia hi chu aw..." a ti zui vang vang a, Sandy pawh chuan," A hnunglam ațang pawh sâwn a chhe lo tih a hriat ngawih ngawih, a kal dàn zawng zawng pawh saw, a pà e..." a lo ti a, ka țhiante pahnih chu ka en tawn a, an rilru tùr chu ka hriat thiampui phain ka hria, kan lo duh hlawm hliam hliam êm a lo ni.

Teacher's Day-ah chuan Sir Damon-a chu a rawn chhe lo lehpek hle mai a, hmeichhia zawng zawng chuan chhe lo kan ti vekin ka ring, a dik ngei pawhin ka ring bawk. Chhe lo miau hek le, ka sawi vul chûk thiam lo, a chhe lo hi a ni tawp mai. Ka en leh ngut ngut țhin a; mahse, ka inhriat chhuah châng chuan ka zak leh deuh a, ka hawi sawn leh țhìn. Pangpâr a dawng tam bîk hle a, pen pawh a dawng nual mai. Kei pawhin ka pe ve a, rose pâr sen kan zirtîrtute zawng zawng ka pe vek bawk, amah chauh pêk bîk kha ka zak a, mi dangin ka duh a ni tih an lo hria ang tih ka hlauh vàngin mi dang ka pêk phah a nih ber chu.

Exam-naa tihchhiat ka hlauh êm avàngin lehkha ka zir nasa a, ka fail chu ka ring chuang miah lo nain ka pass chhiat chuan Sir Damon-a hmuh ka zah phah dâwn si a, a subject Mathematics phei chu ka zir nasa viau rêng a ni. Tih pawh ka ti țha ta viau reng a, English subject-ah nèn Letter ka hmu a, a subject-a Letter ka hmu chu ka hlim zual, min hriatpui ve hauh lo mah se ka hlim ru veng veng a ni.

Mahse, ka hlim rei vak lo. School chhuahsanin College chhunzawm a ngai dâwn ta si a, Sir Damon-a ka hmu thei tawh dâwn lo a ni. Ka pain hmun danga College zawm tùrin min duh viau nain ka hnial a, Mizorama ka zawm chuan Sir Damon-a ka la hmu zauh zauh thei dâwn a, chu tal pawh chu ka thlahlel a ni.

~~~END OF FLASHBACK~~~

Ka va duh lo tehlul êm! Zàm loh ka tum tehlul nèn, ka hma zâwnah tak mai chuan Sir Damon-a ngei mai chu a țhu vàng mai si a, ka thin phû nèn, ka mar phu rang bawk nèn, ka zãm chhe lek lek chu a ni, a rûkin ka țang țûng mai a, lum ka ti up up bawk.

Dawhkàn sei pui hmachhawnin mipa panga an țhu tlar a, kei an hmaah tak chuan ka țhu ngar mai a, ka veilam sîr ber ațangin zawhna min zâwt chho a, an fel hmèl viau mai. Zawhna chi hrang hrang, ka zirna kaihhnawih lam min zâwt a, țha takin ka chhâng ve thei zêl mai. Ka application form leh document submit chu an inhlàn chhãwng dan dan a, Sir Damon-a chuan en ve lovin zawhna pawh min zâwt ve lo, mak ka ti rilru deuh viau mai a; mahse, a rûk tak chuan ka lãwm deuh tho, zawhna min zawh hlauh chuan ka zàm belh ang tih ka hlau a ni.

Mahse, a tàwp berah zawhna min zâwt ta tho. Ka documents chu a en phawt a, chutah," Lalruatkimi, Class xii-ah commerce i zir a, College-ah Arts line-ah i inlet ta daih a, eng vàng nge?" tiin, chu zawhna ber kher chu ka rin loh deuh a nih avàngin ka ngawi vang vang phawt a, en kual lo mah ila min en țhap a ni tih ka hre chiang ngang mai.

"Commerce subject kha ka tuina a ni lo tih ka hre chhuak a," tia ka chhàn chuan," Tui lo si engati nge i lâk?" a lo ti leh vat a, a va ngeiawm thiam tak! Chhàn ngaihna ka hre lo lek lek hial a ni; mahse, intihuai luiin," A challenging ka ti a, tuina nei miah lovin kum hnih chhûng  ka zir a; mahse, college-ah erawh ka tuina ber subject ka la ta a ni," tiin inringtâwk tak hian ka chhâng ve ta a, a veilama țhu patling deuh chuan," A va țha ve! Tuina nei miah lova kum hnih chhûng ngawt mai i han zir peih hrim hrim pawh chu, i ti țha hle mai, mark lah chu i la hmu sâng viau zui a," a lo ti charh charh a, chutia  min fakna thu ka han hria chu tlêmin nuam ka ti ta deuh, ka thaw deuh huai nghe nghe a ni.

"I tui lo tih i hre chhuak hlauh chu a țha a nih chu," Sir Damon-a chuan a ti ta daih a, chutah," Zawh tùr che ka nei tawh lo ve," a ti leh a, mi dangte pawh chuan zawh tùr min nei tawh lo a ni chêk ang chu, ka chhuak ta thuai a, pâwn ka thlen chuan ka âwm chu ka dawm vang vang a. Min zawhna kha ngeiawm viau mah se ka chhâng țha ve tho chuan ka hria. Enģti tiha Interview Board zînga țhu ve nge a nih le? Ka lài chhe vek lo chauh chu a nih kha le.

Ka phone la chhuakin Sti ka call nghâl zat a, a ring reng sia, min va chhâng har tak! Ka beidawn lek lek hnuah chuan min rawn chhâng ve ta hrâm a.

"Hei, ka zäm lutuk ka thi lo chauh a ni," ka tih chuan,"Zahngai, zahngai,  engtizia nge ni? Zãm viau lo tùrin ka hrilh mawlh mawlh che kha, muang fân raihin thâwk la țhìn rawh tiin ka hrilh ka hrilh che kha," a rawn ti nghâl chùl a. Interview ka hmachhawna ka zo chiah a ni tih a hre nghâl rêng bawk ang chu, ka hrilh miau alawm.

"Awmzia a awm tam lo, ka hmaah tak Sir H-a a țhut miau chuan zàm loh chu har tak a ni," ka tih chuan," Tu maw?!! Sir H-a maw?!! Damon-a maw țhu a? Eng nge a awmzia?" a rawn ti leh nghâl zat zat a, a aw chhuak ațang chuan ani pawh chuan mak a ti tih ka hre thei mai. Sir H-a tih hi  Class Xii kan zir laia Sir Damon-a hming kan phuahsak a ni a, Sir Handsome-a tih duah aiah Sir H-a kan ti ta mai țhin a, tûn thleng hian ka la hmang zauh zauh a ni.

"Ka hre bîk lo, hotu ve deuh a nih ka ring ringawt, a ngeiawm thiam a nia aw..." ka ti ve ta ringawt a, ka zàm êm avàng khân ka țawng buh nuai lo nain ka aw chhuak kha ka duh aiin a fiah lo deuh ka ti a, interview ve mi dangho kha chu an zàm loh hmèl hlawm si a, an chhâng țhahlawm ngawt ang, ka tlin pawh ka ring  ngam lo. Pawi lo mai, hmun dangah ka zawng leh poh mai a niang chu.

Lunghnûr zetin Sti min lo nghahna lam chu ka pan a, min lo hmuh veleh chuan min kuahin,"Lungngai mah ta che, i tling hrim hrim ang. A school naupang hlui i nia, mi dangho ai chuan i chance a țha hrim hrim," tiin min hnèm a, kei erawh chuan," Ka hming pawh hre dik hlei lo khân a school naupang hlui ka ni tih a hre tawp nâng, Class xii marksheet-ah lang vek mah se school hming kher kha chu a zu en kher lo tawp ang," ka ti chuai raih a.

"I tling hrim hrim ang, ka sawi tawh chu. Mi dang ai ngawt chuan a dah sâng ang che, i tling dâwn sia, kan lo làwm lâwk dâwn em ni ang?" min tihhlim tum tak chuan a ti leh a, a nui var var pah a.

*******

Ka lo tling ve tak tak a! Ka hlimzia mai chuh, Sti ka hrilh hmasa ber a, a dawtah ka u hrilh lehin ka pa erawh chu zanriah kan kîl laiin ka hrilh thung. A phal loh deuh ka rin avànga hrilh duh lawk lo ka ni; mahse, hlim nui var var chung chuan," Uai, fanu hlawh nei thei ka nei ve tawh dâwn a ni maw?" a ti phawt a, chutah," I châk tawh em? I peih tak tak ang maw? Han kal chhin phawt la, i peih ta lo a nih leh i bànsan leh daih mai dâwn nia," a tihzawm leh ta nghâl a.

"Pa, min ngaihtuah suh, ka peih dâwn alawm, ka thawh chhuah ngei pawisain i duh zâwng tak thil ka leisak hmasa ber ang che," tiin hlim tak hian ka nui var var a, ani pawh chuan," A țha alawm," a lo ti ve leh mai bawk a, ka hlim êm avàng chuan min hnial buai duh lo ni maiin ka hria.

Rei rial lovin ka hna chu Joining report pein ka ka zawm ta thuai a, school building a nuam a, compound zau lêm lo mah se a nuam viau a ni. Ka pa chuan min ngaihtuah deuh a ni ang, chhùn chawlh laiin min rawn bia a, ka hna thar leh office chungchâng chu min rawn zâwt luam a," A nuam dâwn àwmin i hria em?  Nge a hrehawm hmel i ti zâwk?" a rawn ti a.

"Pa, min ngaihtuah suh ka tih kha, hei, a nuam dâwn khawp mai, ka thawhpui tùrte pawh an felin an țawng duh a, hrehawm ka ti miah lo ang tih ka hria a ni," tiin min ngaihtuah lutukna thinlung chu ka thiam ang tâwk chuan paih bosak ka tum a. Ka pa a ni a, a tân chuan a fanu naupang, têt lai ațanga nu tel miah lova a enkawl seilen kha ka ni miau mai a, min ngaihtuah viau ţhìn pawh hi ka hre thiam a ni; mahse, hmâna hmeichhe naupang kha ka ni tawh bîk lo va, tunah chuan nula puitling ka ni ve tawh a, pate thawh chhuah ring reng ringawta khawsak chu ka duh tawh bîk lo, puitlin chhoh zêl ka zir a ngai.

Ka thawhna school DM Higher Academy hi Sir Damon-a tâ a lo ni reng a! DM tih pawh hi ama hming chawi ngeia a phuah a lo ni tih pawh chu ka hre chhawm zêl a, Board zînga a lo țhu ve pawh kha aàwm lo miah lo, tunah pawh hian Principal angin awm lo mah se hotu ber a ni tho tho. A school a nia, rawn thawkve chiah lo mah se mi pawimawh ber a ni  tho tiin an sawi ka hria, school-ah pawh a rawn kal zauh zauh a ni àwm e, ka lo hmu ve ngai lêm hlei lo va. Hmuh chu ka châk viau nain a mei a hruai tel leh emaw kha a ni ang a, ka hmuh chuan ka rilru a tihrehawm leh phah ngei àwm bawk si a, ka hmu ngai lo pawh chu kawng lehlamah chuan a zia viau mai.

Ka hna chu hahthlâk tihna lai nei mah ila ka hlawh ka han hmuh zet chuan hahthlâk nia ka hriatna zawng zawng chu a bo vek mai! Ka pa hnênah hlim takin ka pe a, ani pawh chuan hmêl hlim takin a lo dawng ve a; mahse," I hlawh a nia, nangmahin kawl rawh, i duh i lei dâwn nia, kei pawh min leisak dáwn kha, i intiam tawh kha aw," nui chung hian a ti a, pawisa chu ka kutah chuan a rawn hmehbel nghâl bawk a.

"Ka leisak dâwn che alawm, Pa. Eng thil nge kan lei ang?" ka tih chuan," I thawh chhuah liau liau niin a vawi khatna a ni bawk a, ka thil tùr i lei rualin i nu Mawii pawh hi eng emaw tal leisak ve la aw, a lãwm ve dâwn êm asin, thil to tak pawh a ngai chuang nâng," ka pa chuan a ti leh a.

Nu Mawii chu leisak ka lo tum ve ràn rán tho a, chutia ka pain a sawi chhuah tâkah chuan," Nia, ka lo tum ve reng a, ka u kawr tùr pawh leisak tel nghâl bawk ila tiraw?" ka ti ve leh a.

*MAHNI THIAM CHAN NÂN EMAW ENG EMAW MAI MAI BEISEINA AVÀNGA DÂWT SAWI KAN HREH LO A NIH CHUAN CHU NGEI CHU MIN EI CHHETU A LA NI NGEI ANG*