☆HLWILY☆ - 3 By Dingdi Pachuau

 ☆HLWILY☆ - 3 By Dingdi Pachuau

Ka thawh chhuah pawisa hmanga ka pa thil tùr leh Nu Mawii leh ka u kawr ka leisak ve thei chu ka hlim kher mai. Thil man to tak ka leisak thei lo tih chu ka hria a; mahse, ka thawh chhuah ngei hmanga leisak theia ka awm hrim hrim chu ka lãwm tâwk viau a ni.

Nu Mawii kawr tùr ka pêk chuan a lo lãwm thiam khawp mai a, làwmthu min hrilh mawlh mawlh a," Tunah chuan hmăn deuha hmeichhe naupang duhawm tak kha nula puitling hlawh nei i lo ni ta a, ka lawmpui chein i kawr min leisak pawh a mawi ka ti, ka lãwm tak tak a ni, Chawlhni lo thlen veleh ka ha nghâl ang," tiin a nui var var a, ka làwm tluk zetin a lãwm ve niin ka hria, min enkawlin min awmpui rei ve tawh a, ka pa pawisa thawh chhuah hmangin a thawmhnaw chu leisak ve zauh zauh mah ila ka thawh chhuah ngei hmanga ka leisak ve thei ta chu ka tân chuan a làwmawm êm a ni.

Ka pa pawh a lãwm thiam ngang mai, a han over mai mai khawp a, a bun lai chapal chu dahin ka leisak chapal chu a inthawlh zui nghâl daih a, chutiang chiah chuan a kawr hâk lai pawh chu hlîpin a thar chu a ha leh zui zat a.

"Ka fanu min leisak ngei mai hi ha nghâl ila ka màwipui zâwk bâkah hâk a nuam daih zâwk, i chapal lei lah hi ka bun nuam tih zâwng tak a ni bawk, a dûp nuam bawk si, i lei thiam khawp mai," a ti a, chhuatah chuan a han kal kual vêl a, a ti der lo niin ka hria. Kum upa lam a ni chho ve tawh bawk nèn, a tâna bun nuam tùr ka zawng kual nasa a, lei fuh ka inti ve viau a ni.

"Pa, ka ute hi chaw eiah sâwm ila tiraw? An hmanin i ring em?" ka tih chuan," A hman ngût ang em maw chu...Nimina ka phone kha chuan an pa kha a hna avàngin Champhai lamah a awm rih a, tuna an in luah lai lah kha an extend a, a buai viau thu a rawn sawi tlat a ni," tiin ka pa chuan min lo chhâng a.

"A nih tak chu, a buai viau chuan chaw eia sàwm pawh chu a inthlahrunawm dâwn a nih chu a. Engati nge an pa bulah chuan a kal ve loh le?" ka ti vang vang a, ka pa chuan," A, an buai laia an pa a zui ve daih te chuan a fuh nâng, in lamah mistiri leh hlawhfate ei tùr ilo fahran pawh lo buaipui ve a ngai ang a," a lo ti a; mahse, kei chuan," Pasal nei ta vêka pasalte bula awm theih loh chu, kei ni ta ila hrehawm ka ti ngawtin ka ring, zui luih țâlh ka tum tlat ang," ka lo ti thung a.

A nui a," Chutiang ringawt chuan a awm theih bîk tawh nâng, pasal a nei ve tawh a, a nu leh pa thute a zawm a ngai ve tawh alawm, a duh thu ang ringawta a awm chuan fanu fel, mo fel a ni thei nâng," a ti leh a, dik ti ve tho mah ila ka u awm dàn tùr chu ka ngaihtuah a, a bulah a pasal awm ve hauh lovin ni tin lunglêng ru takin a buai dâwn a ni si a, ka khawngaih reuh tho, a pasal chhûngte an lo sual deuh phei chuan...

Ka thawhpuite zîngah chuan kei aia junior awm lo mah se min en hrang bîk lo va, kei aia kum hnih thuma upa an ni hlawm tlângpui a, kan inrual seng sawng hlawm êm avàng chuan nuam ka ti a, kan titi duh zâwng a rual tlângin fiamthu an duh ve hlawm bawk si a, ka tlângnêl har lo viau a ni. 

Ni khat chu break laiin Michael-a, Science zirtîrtu chuan," Miss Kimkim, hei, nula tlangvâl țhè țhàw kan ni hlawm a, tlangvâl zîngah hian han duh deuh leh han thinlài deuh te i nei tawh em? Sawi zak lo la, tihian kan insawipui vek zêl a nia," a rawn ti a, ka piah chiaha țhu a nih avàng chuan ka en nghâl vat a, fiamthu hmêl ni lova ti tak hmêl a put avàng chuan ka nui hmêl chu a tàwp titih nghâl a.

Mahse, fiamthu hian,"Chutiang tùrin ka la hrawn rei lo hlawm êm mai che u, nakîn deuhah chuan in ni fur maithei a ni, in fel hlawm si a," ka ti a, ka nui leh nghâl bawk a.

"Hrawn rei kher a ngai hleinem, duh tùr hi chu vawi khat chauh hmuh pawh hi a tâwk êm êm a ni," a lo tih chuan Miss Tetei chuan," A nei lo tihna a ni mai alawm, insawi luh phêt tum lo la?" a lo ti vat a, mi dang chu an lo nui tat tat hlawm a. Michael-a chuan," Nang ka zâwt lo che, lo inrawlh ve suh," a lo ti vat a, țawng pàwr viau mah se a fiamthu a ni tih ka hre ve nghâl mai a.

Miss Mabiaki chuan," Hmêl thar apiang hi chu i lo hlah lo ve ngawt mai, i hming pawh hi Tharlàwma ti tawh ila a țha ang," a lo ti ve a, amah chu a nui nghâl hak hak a, Michael-a chuan," Ni tina nangni hmêl hlui deuh mai han chhài tum ngawt ai chuan hmêl thar chu a phùrawm zãwk ang chu, tiraw Miss Kimkim?" tia min rawn en chuan nui chung hian ka lo bu nghat a," Kha maw, ani pawhin hmêl hlui ai ngawt chuan hmêl thar a duh zâwk a nih chiah kha, kan rilru pawh a inmil țan viauin ka hria," a rawn ti leh zat a, kan nui ta dar dar a.

Chutia kan nuih dar dar lai chuan Sir Damon-a a rawn lût hlawl mai. A chhiat lohzia lehpek chu, tihdanglamin ka awm leh nghâl zat a. Ka thunun theih miah lohin ka thin a rawn phu su dup dup a, ka mar a phu rang at at bawk, inthunun tumin boruak ka han hîp vang vang a, muangchângin ka thaw chhuak leh a.

Mi dang chuan an țhutna ațanga thovin an lo chiauau vat a, kei erawh chu che lovin ka țhutnaah ka lo țhu reng thung. A sam sei deuh lek lek tawh chu a thur lek lek em aw tih tùr hian a lang kãwi deuh niai a, a bawrchhawr ti dâwn ila a ni miah si lo, ani phei chuan a inhmeh viau lawi a ni. Min rawn en kual dan dan a, a hmêl a tak rùn avàng chuan hmachhawn a huphurhawm ka lo ti ru ve tawp. Chutah, Michael-a en  lehin eng emaw hi a hrilh sap a, a chhuak zui leh ta mai a. Michael-a chuan min rawn enin," A hmu duh che a nih chu," a rawn ti ta a.

Ka thin a va phu rang leh dawt dawy ve! Eng atân nge min hmuh a duh le? Min hau dáwn em ni ang? Nge min bàn dâwn? Mahse, engah nge min bàn ngawt ang?

"Keimah..maw?" ka ti ban deuh chat a, ani chuan," Aw, nangmah ngei mai kha," tiin a chàwl deuh dat a, chutah," Huphurh viau suh, a seh lo ang che. Thawk thar deuh hi chu a ko țhìn alawm, a ko har zâwk che a," a lo ti leh mai a, tlêm chuan ka awm a nuam deuh hlek; mahse, ka huphurh tho.

"Khawiah nge ka hmuh dâwn?" ka ti leh a, Tetei chuan," Principal room-ah han kal tawp rawh, chutah chuan kan hmu ţhìn," a lo ti vat a, ka țhutna ațanga thovin Principal room lam chu ka pan ta nghâl a, ka innghah reitîr thei lo ang, a hnuaia thawk ka ni si a, ka kut ka hûm ruh a, ka luh hmain kawngka bulah ding leh datin thâwk ka la vang vang a, kawngkhàr chu ka hawng ta chauh a.

Principal chu a chair-ah a lo țhu vùng a, luh ka'n dîl leh rih a, ka luh chuan ka han hawi kual vél a, Sir Damon-a chu ka hmu ta mai lo. Hetah hian a lût lo em ni le? Miss Tetei khân hetah hian hmu tùr khân min hrilh si a.

"Eng nge ni ta, Miss Kimkim?" tiin Principal chuan min lo bia a, kei chuan inthiam lo deuh tak hian,"Sir, hetah hian Sir Damon-a kha a lo kal em? Hmu tùrin ka rawn kal a," ka ti a, ani chuan," A lo la lût miah lo, in chung lamah zâwk khian a chho a ni lo maw le?" a lo ti a, ka inthiam lo zual ta sauh mai.

"A nih tak chu, Sir, ka kal leh nghâl mai ang," tiin inthiam lo tak chuan kawngka lam chu ka pan ta nghâl a, ka chhuak tùr leh Sir Damon-a rawn lût tùr chu kan intâwk ta chiah a, kan inmelh chiang khawp mai,a mitmeng nalh lutuk leh vâwt reih rawih vàng chu a ni ngei ang, che thei lovin second eng emaw zát chu ka ding khawng reng mai! A mitmeng uk kharh mai chu a mawi takzet a, a mithmul sei er sang mai chuan a mitmeng chu a tilang mawiin chumi chung chiaha a mithmul dum chhah țha tak ațang chuan a luhlul thawkhat ang tih chu a hriat theih mai; mahse, mipa luhlul hi chu ka duh zâwng tak mai a nia, nêm lam ai chuan luhlul...

"Miss thar kha i ni maw?" tia Sir Damon-a a rawn țawng chhuah tâkah chuan ka ngaihtuahna ram ațang chuan ka harh chhuak zawk mai a, zak ru deuh tak chung hian," Aw...ni e..." ka ti sap a, ka chhâng ban angreng viau mai. Min hmuh duh avànga min ko ni na na na,"Miss thar kha i ni maw?" min han tih leh rih chu, he pa hi chu a che ngeiawm thiam ve chiang alawm.

Principal lam chu hawiin," Sir, nakinah ka rawn kal leh mai ang aw," tiin a kut chu a vai zoh a, chutah, inher vutin in chung lam chhohna step-ah chuan a pên chho ta nghâl a. Ka hawi ã lek lek dâwn alawm le, min kalsan leh ta daih bawk si a," Min rawn zui rawh," pawh chu a ti mang bawk si lo. Ka ding rèn ráwn phawt a, chutah, in chung lamah chuan ka chho ve ta chauh a.

In chung lam hi ka la kal chhin lo hrim hrim, ka pên chho zêl a, ka han thlen chhoh chuan ka thaw nghâl hak a! In chung zâwl deuh vek niin room pathum vêl zet chu a lo la awm a, room sak lohna chin pawh chu a chung zàr deuh vek niin nilum aina tùr hmun zau vak lo zuah hlek a awm leh a, chulaiah chuan Nihliap lian pui zàr niin chair pahnih leh dawhkàn lian vak lo pakhat hi a inhûng a, thingpui in paha inkawmna hmun tùr a nih ka ring. Helai hi a lo nuam ber a lo nih hi, a thawvengin a hmun a lo sâng deuh tawh bawk a, thlifîm pawh a lo thaw nghâl seng seng hial alawm, boruak uap chu a awm thei miah lo ang.

Sir Damon-a ka hmuh mai loh avàng chuan ka hawi kual a, room lo hnai ber kawngkhàr chu a inhawn deuh avàng chuan chutah chuan a awm a nih ringin ka pan phei ta nghâl a, tîm deuh hlek chuan kawngkhàr chu ka kik a.

"Yess..?"

Sir Damon-a aw a ni tih ka hriat chuan ka thaw deuh huai a, chutah kut hûm ruh țha lehin," Sir, ka lo lût thei ang em?" tiin luh chu ka dîl ta a. Ka va luh lai chuan a dawhkàn hmaah chuan a lo ding a, dawhkàn chunga lehkha lo awm darh deuh nuai chu a lo thlêk kual a, chutah, rawn hawi chhuaka min rawn enin," Eng nge ni ta?" a rawn ti ta daih mai!

A thil sawiin min tihhamhaih êm avàng chuan ka chhâng lawk lo va, ka en lêt ve ràn ringawt a; mahse, a hnu deuhah chuan," Sir Michael-a'n hmu tùr chein min hrilh a, ka lo kal a," ka ti a, a mit chu vawi khat khap sakin," Lo țhu rawh," tiin a dawhkàn sîra revolving chair awmna lam chu a bûk khum zoh a, nuam ti lo ru zeta panin ka va țhu ta thãn a. A la buai chhûng chuan room chhûng chu ka meĺh kual a, hmeichhe mit ațanga en chuan mawi taka chei chu a ni lêm lo; mahse, a chhûnga thil awmte hi thil țha tak, belhchian dâwl leh man to tak vek a ni tih ka hria, a neitupa tiamin. Hêng bungrua zawng zawng ai hian a neitupa hi a țha ber, ngeiawm thiam viau mah se a țha tho tho.

"Rindiki tiraw i hming kha?" 

Ka maimichhing zawk a, he hming hi eng vànga rawn sawi chhuak ziah nge a niha eng vànga he hminga min ko ziah nge maw a nih ni? A hmel hriat, tu emaw Rindiki tih hming pu an awm a ni ngei ang, chu nu nèn chuan kan hmêl a inang viau pawh chu a ni mahna le...

"Ni lo, Sir, Lalruatkimi ka nia," ka ti chhuak ve ta a, a rawn nui chhuak hawk zui a, phâwk zet hian ka melh nghâl dâwrh mai!

"Rindiki i ni lo hi thil mak tak a ni," a ti leh ringawt a, chhàn ngaihna  hre lo chuan ka en reng a, chhàn țûl ber pawhin ka hre chuang lo, mak a ti ve a ni mai. A hnuah chuan eng eng emaw hriat tùr țangkai a sawi chhunzawm a, ka lo ngaithla ngun viau a; mahse, ka ngaih dànah chuan tuna a thil sawi hi chu Principal sawi tùr ni àwmah ka lo ngai zâwk a, min han hmuh duh nân êm chuan a ho mah mah em aw ka ti rilru pah nap nap a, chutih lai chuan kawngkhàr lamah rì a rawn awm a, ka hawi phei vat a, hmeichhe aw hian," Ka rin aiin i rei daih a, ka rawn kal ta mai, tih tur kan neih kha i theihnghilh ta a niang ka ti a," a rawn ti lût a, a bialnu Elena-i ngei mai a lo ni, a chhiat lohzia chu, Sir Damon-a bialnu a ni a, a bialnu tawh phawt chu an chhe thei lo hrim hrim a ni tawp mai.

"Oh, inlêng i nei a ni maw?" tiin a hmui chu a hup zoh a, Sir Damon-a chu nui deuh chung leh inthiam lo àwm hmêl deuh hian a melh sawr sawr a; mahse, a rûk tak chuan a inthiam lo miah lo ang tih chu ka hre ru ve thiam tho. Ani thung chu hriat tham loh hian a phun deuh sup a, thinrim hmel erawh a pu hauh lo thung, chutah," Mikhual duhawmin kan titi tui lai min rawn tibuai ta si a, hun remchâng dangah kan sawi leh mai dâwn nia," tiin mawihnai tak chuan a thil sawi chu a ti tàwp ta a, ka tân awm reina chi a ni lo tih ka hre thiam ve tho. Ka ding ta vat a, Sir Damon-a lam hawi chuan ka bu deuh zoh a, ani erawh chuan Elena-i  chauh chu a lo melh leh tawh a, ka chhuak ta vat a.

Pâwnah chuan ka âwm ka dawm vang vang a, ka hmuh khàt tawh tehlul nèn, ka hmuh chhunah pawh a bialnu nèn leh bawk ka hmu leh chu a ni a, he pa star ringawt pawh hi thil hahthlâk chu a va ni tehlul êm! Ka hmu châk êm êm a, chutih rualin ka hmu hreh tho bawk a, amah ka hmuh apiang lah hian rilru thinlung tina thei thil ka tawng ziah a, amah ka hmuha ka hlimna zawng zawng kha vawilekhatah lâk bo ang hmiahin a bo duak mai ţhin, amah vànga ka hlimna hian a daih rei thei thlâwt lo.

Chawhnu pum chuan ka rilruah ka chhuah hnu khân eng thil nge an tih ang tih mawlh chu ka ngaihtuah a, class ka lâk lai pawhin ka ngaihtuah bâng chuang lo, thil ni lo pui pui ka ngaihtuah chhuak a, class kal pawh phùr a har khawp mai.

Zanah Sti a rawn lêng a, vawiina thil thleng chu ka hrilh ve ta nghâl a, ani chuan," An inkawp rei ve ta riau, a nupui tùr a nih ka ring deuh hial tawh a ni. I sawi dàn hmangin Damon-a hi kum naupang tak chu a ni tawh lo phawt ang a, nupui neih hun ve tak pawh a ni ang, a school naupang pawh zirtîrtu i ni tawh a nia, nupui nei thuai se a țha ang," a lo ti daih a.

"I sawi râpthlâk e a! Nupui a neih daih te'n... Hetia a lo la tlangvál ve reng pawh hi a țha alawm, pa ai chuan tlangvâl hmêl hmuh chu a nuam zâwk alawm," ka tih chuan a nui khêk nasa mai.

"Kei chu pathlawi  zei deuh chin ka duh asin, a nih loh tal pawhin tlangvâl  hnahkhat senior lam deuh, min duat deuh tùr ka duh,"a tih chuan," Lawmnoa hi, pathlawi a ni em ni? A nih loh palh hlauh chuan pathlàwitîr vat la"  ka lo ti vat a.

"Tlangvâl țha lai ngat a nih hi; mahse, ani chu a zei, eng mah zirtîr a ngai lo, pathlawi leh senior lam deuh ai pawhin a zei, han inbauhin han ințhêțhù zauh zauh mah ila  ka bàn phal teuh lo mai," a ti ta duah a, ka nuih ve thung a.

"Ka rilru hi thunun zo vek thei mah ila Sir H-a hi chu ka star leh tho ang, hmu zing lo mah ila amah ka hmuha ka thinphu rang viau țhìnte hian mi bîk a nihna a tilang țhìn a, amah avànga ka marphu rang sauh țhìnte hi pawisa tam tak pawhin thleng thei dâwn ila ka phal chuang lo ang," uar zet hian ka ti tàn tân a.

"I duh hlum lo chauh hi chu a ni tiraw? Lum hlumah pawh i hlawh duh hialin a nia ka rin ni," Sti'n a tih leh chuan," Duh mai ang chu, dam chhuah mial pawh thil awm thei a nia," ka tih chuan a nui thlêr vak vak a.

"Aw, a țha, a bialnu a țhen hun a awm ve chêk ang a, chutih hun chu kan bawh chat dãwn nia, Star tawh lo tura hrilh che chu awmzia a awm lo êm mai, i bànsan chuang si lo," a ti bawrh bawrh a, kei pawh chuan," Ni e, bànsan tùrin min ti tawh lo hrãm teh, ka thâwk tàwp thlenga star țhak ka duh," ka lo ti a.

Sir Damon- chu ka hmu ta zauh zauh, a mei pawhin a thlahthlam ngai lo. Ani pawhin min hmu ve ziah tho; mahse, min hria angin a awm ngai lo, ni e, min hre reng leh tawh lo pawh a ni maithei a, ani zawng hmel hriat leh hmuh a ngah ang a, kei ve mai hi chu min hre reng tawp lo ang, ka hming pawh a hriat fuh hleih theih loh kha. 

Ka pa hrisèlna a pan deuh avàngin office lamah chawlh a la a, inah a awm ta rih a. Kei lah ni tin ka chhuah a ngai ve ta miau mai si a, chhùn lama ka awmpui hman si loh avàngin zan lamah hi chuan a bulah ka tâp chawt a, ka riahpui lo chauh a ni, ka theih ang tâwkin ei leh in lamah ka duat a, a rûk tak chuan ka ngaihtuah khawp mai. Chhunah inah Nu Mawii a awm hlauh a, a peihsam loh deuh pawhin a tîr thei a, chhùn lamah chuan ani, Nu Mawii'n  tih tùr vak a nei lo bawk nèn, tlêm chuan ka ngaihtuah lo thei deuh hlek ; mahse, chhùn chawlh laiin a chanchin ngaichângin ka va be ziah thung. Rilru khingbai deuha ka awm vàngin Sir Damon-a pawh chumi kâr zet chu ka hmu lo, a lo kal tho a; mahse, ka hmu lo.

Michael-a'n min fiam zuk zuk a, a hnu daihah ka hre chhuak leh chiah, ka zak thar khawp mai. Kei kha mi thar ka nih avàngin intiam rualin min fiam a lo ni a, Sir Damon-a khân min ko miah lo a lo ni, ka ngaihtuah lët a, ka zak rauh rauh khawp mai. A room-a kan awm khân a thil sawi kha min koh phah nân êm chuan a ho thamlam rêng a ni, Principal-in khatiang lam kha chu a sawi zauh zauh a, aniin a office meuha min koh chhan atân chuan a ho rêng a ni. Michael-a chu ka ngei deuh lek lek a; mahse, mi dang, tharlâm apiang chu chutiang chuan an lo fiam țhìn a lo ni a; mahse,chuti chung chung pawh chuan zahthlâk ka la ti  fan tho, sawisêl ngam ila chuan ka sawisêl ngei ngei ang.

Tetei chuan," Kei phei chu ka che chhia asin aw...Principal room-ah ka va zawng a, ka hmuh lawk loh avàngin ka zawng kual nasa a, ka hmuh veleh lah chuan ka ko chiah tihah a kal sawn a, ka ûm zui tak lawm lawm a; mahse, a lo fel hlauh a, ka mualpho lo chauh a ni," a lo ti vat a, chu chuan tlêmin min hnèm deuh a, chuti chu ni lo se chuan Michael-a chu ka ngei ngawt ang.

Kâr khat zet a chawlh hnuah chuan ka pa pawh a lo zia ta deuh a, ka phal lo deuh chung chu a office lui ta a, a nawm loh belh phah ang tih ka hlauhpui a ni; mahse, eng êm chu a ti bîk ta lo va, a hnuah chuan a dam lo a ni tih pawh a hriat leh tawh loh. Rilru hlim deuh leh ngaihngam takin ka school leh thei ta a, thawhpuite pawhin min lo chîk deuh a ni ang, Mabiaki'n," I hmel hmuh a nuam ta, kâr kalta kha chuan i rilru a buai hmel deuh a," a ti a, Tetei pawh chuan," Nia, tunah chuan delh hlum saei tum pawh i ang ta lo," a lo ti ve a,  Michael-a melh ralh pah chuan," Lalmichael-a vàng hi alawm," ka lo ti nghat a, ani chuan," Engah ngawt maw?" a lo ti ve thung a.

"Khatianga infiam kha chu a tih chi loh e, a zahthlâk ve alawm le," ka ti ve thung a, ka pa dam loh chungchâng kha chu ka sawi lang duh lêm lo.

"A ho lutuk! Zak miah suh, hriat pawh a hre leh tawh lo ang che," a lo ti mai a, chutah, rawn kûn phei deuhin," A bialnu khân a rawn phâwk lo che u maw?"a rawn ti sar sar a. 

"Phâwk tùrin kan awm lo hlauh, ka rawn chhuak rang alawm," tiin nui chung hian ka chhâng a, mi dangin fiamthu an thawh tâk avàng chuan kan sawi zawm ta lo.

"Hmuh țha ka hmu, en teh u, a meiin a rawn zui lo teh tlat zui!" Tetei chuan a ti chhuak thut a, chutah, hre chhuak thutin a hmui chu a hup a, a hmel chu a sen nghâl awp awp a. Amah chu enin ka hawi phâwk deuh a; mahse, a rei lo, Office chhûngah chuan Sir Damon-a chu a rawn pên lút ta nghâl a.

*KAN MAMAWH HMASAK NI MIAH LO HI KAN BEISEIIN KAN NGAIHVEN HMASA FO ŢHIN*

-I mamawh hmasak ber kha beiseiin ngaihven hmasa ber teh le-