☆KA NGHÂK CHHUAK DÂWN LO CHE MAW...☆ -1 By Dingdi Pachuau

 ☆KA NGHÂK CHHUAK DÂWN LO CHE MAW...☆ - 1  By Dingdi Pachuau

(True Story a nih avàngin khaw hming, vêng hming leh mihring hmingte ka thup ve hrâm hrâm aw)

Mizoram hmàr tàwp lam khaw pakhata pianga sei lian ka ni a, lehkha zir hi ka tui theih thlâwt loh avàngin pâwl sàwm ka zir laiin zirna lam chu chawlhsanin ka tuina ber puan țhui lama insàwrbing chu ka tum ta a ni. Naupan lai ațangin, naupang dang ang thovin barbie kawr ka țhuisak ve fo a, thiam tak chu ni lo mah ila nuam ka ti ve êm êm țhin. Chuvàng chuan, zirna lam ka chawlhsan tâk hnu chuan puan țhui thiam tak nih tumin Aizawl lam ka pan ve ta rãwih a.

Kan khua ațang hian Aizawl hi a hla ve phian a, zîng dâr 6-ah chhuakin zàn dâr 9-ah Aizawl kan thleng thei țâwk a ni, Vaivakawna ka pateate inah ka innghat lût ve rih phawt a, a tûka puan țhui ka zirna tùr lama ka kal nghâl a ngaih dâwn avàngin zanriah ka ei hnu lawkah ka mu ta nghâl nghe nghe a, motor ka chuang chau ve deuh bawk a niang, ka muhìl ta thuai a. A túka puan țhui ka zirna tùr hmuna ka va kal chuan an lo fel khawp mai a, an ina awmchilh nghâl tùr ka nih avàngin a rûk tak chuan an lo fel lo ang tih ka hlau ngawih ngawih a ni; mahse, an fel hmel khawpin ka hria. Tichuan, a tûkleh lama an ina awm phei nghâl tùr chuan thu kan titlu ta nghâl a.

Ka awmnate hi chhûngkaw member 4 niin an fel ka ti khawp mai, ka tlângnêl nghâl thuai rêng a. Pa ber chu 'Pa Siam' tiin ka ko ve mai a, nu ber chu 'Nu Te' tiin, an fel êm avàngin ka ko bawrh bawrh reng a, anni lahin an fa ang chiahin min en ve bawk niin ka hria, awm fuh ka inti khawp mai. Ni tin puan țhui zir chuan ka han awm ve ta lauh lauh a, mi țawng duh ve ngang ka nih avàngin țhian pawh ka nei thuai nghe nghe a, ka țhiannu hming chu Atei a ni. Ani pawh puan țhui zir tho a ni a, kan inkàwm ngeih chho khawp mai. 

Hun a ral ve zêl a, puan țhui lam pawh kan tluang chho ve viau mai, nilênga puanțhui khâwl rah chu taksa a khamin chauh a na ve duh khawp mai a, zanriah ei khama hmun seng fel zawh hi chuan ka mu hi a ni deuh nghâl mai, inlêng ka nei ngai bawk si lo va, bâkah, mi inah lehnghâl, inlêng neih ka duh lo hrim hrim bawk.

Zan khat chu ka mu tùr chuan WhatsApp message chhiarin news group lam chu like ka'n pe a, ka mu dâwn chiah tihah chuan ka phone chu a rawn nghawr ri ta dar dar mai a, ka han ban vat a, whatsApp video call a lo ni; mahse, ka chhàn hmain a tàwp ta daih a, chutah, message rawn thleng zui nghâl zatin  *Ka tihpalh lutuk, ka hmet sual a*  tih hi a lo ni a, ka nui ringawt. Kei pawhin ka hmet sual ve fo tho a, ka inthiam lo thei viau a nih kha, chutiang chu a nih ka ring ve nghâl a, a rilru tùr ka hriat thiampui avàng chuan  *A pawi lo ve*  tiin ka chhâng ve ta nghâl a, ka tih dàn țhin pawh ni lêm lo chuan a dp chu ka check chhin a, ka en zêl a, group pakhatah kan lo awm dùn reng chu niin, hei hi a ni Apuia nèn kan intawn țan dàn chu...  Message kha lo chhâng lêt lo ni ta ila tûn dinhmun hi kan thleng kher ang em tih hi tûn thleng hian ka la ngaihtuahin ka la inzâwt fo.

Muthilh ka tum chu min rawn chhâng leh a, kei pawh chuan a inthiam lo viau nia ka hriat avàng chuan  *Ho lutuk, tihsual palh chu a awm thei alawm*  tiin ka chhâng leh a, *Ka lâwm lutuk e*  tiin min rawn chhâng leh a, kei pawh chuan nui deuh chung hian  *Welcome*  tiin ka chhâng leh a, ka mut a chhuah tawh êm avàng chuan message dang min rawn thawn leh pawh chu ka chhâng tawh lo.

A tûk zînga ka harha dâr zât hriat tuma phone ka han en chuan a message  *Good Morning* tih chauh tê hi a lo awm vàng tawh niin, dâr zât pawh en ta lo chuan chu message chu ka en ta reng ringawt a, tâwi tê mah ni se engtin emaw tak hian ka rilru a tihlim ru tlat a nih chu! Ka nui sak a, chhàn lêt pawh ka tum hran chuang lo, phûr zet hian khum ațang chuan ka tho chhuak ta nghâl a.

Chuta țang chuan min rawn text ta ziah a, kei pawhin ka chhâng lêt ve deuh ziah bawk. Mak deuh mai chu ka chhàn lêt lëm loh châng pawha min rawn text a țhulh chuang lo chu a ni, nula ka ni a, hmeichhe cheng a man riau a nih ka ring, huatawm leh ngeiawm ni miah si lo leh ninawm miah si lova mi biak dàn a thiam a, kei pawh chuan ka chhâng țha thei khawp mai. A hnuah phei chuan WhatsApp message mai ni lovin call pângngaiin min rawn bia a, a lo rei leh deuh hnuah phei chuan video call-ah kan kai sâng leh a, amah chhe lo ka tih chi tak a lo ni bawk a, a fel ka ti pah bawk nèn, kan inbiakna chuan awmze ril deuh nei chhovin min duh thu a rawn sawi a, kei pawhin chhâng dawt lo mah ila ka awm dàn ațangin a man thiam maichuan ka ring, mi pângngai a ni tlat alawm, chutia ni tin zan tina inbe țhìn ta chu inhmuh a rawt ta a.

Ka awmna vêng țhenawm lawkah a țhianpa a awm ve a, chutah chuan zanriah a rawn ei dâwn a, zanriah ei khama inhmuh chu kan tum a ni. Ani pawh hi Aizawla lehkha zira awm a ni a, a țhianpa pawh chuti tho, a țhianpa awmna vêng leh ka awmna vêng a inhlat deuh avàng erawh chuan ka lo huphurhpui khawp mai a; mahse, a tak taka inhmuh chu ka châk ve tho bawk si a, ka hnial duh ta lo a ni.

Zanriah ei khamah chuan phûr zet hian ka inbual sawk sawk a, ka inbual zo bathroom ațanga ka chhuah chuan Pa Siama pum a nat thut avàngin damdawi in lama kal thei tùrin an lo insiam fel vek tawh niin, an nupa chuan an kal ta a, kei pawh Apuia lo hmuak tùrin, kan lo sawi lâwk diam tawhna hmun lam pan chuan ka kal ta vat a. Kea a rawn kal avàngin ka nghâk rei ve det a, kan in-text pah reng vàng pawh a ni bawk mahna. A lo thlen chuan kan inhai bîk lo, kan in-video call ngun ve tawh bawk a, a boruak a dik deuh sa bawk nèn, min rawn kuah nghâl chat rêng a, kei pawh chu ka lo țang bîk lo. Kan in lamah kan kal a, in chhûngah naupang pahnih an awm avàngin inchung chhohna step-ah kan țhu a, a hmaa țhuin min kapkalak a, min kuah pah chuan," Ka hmangaih che," a ti sap a, a thu sawi chu ka âwih lo phal miah lo! Ka rilru hlimzia mai chuh, khatiang thu làwmawm kha a sawi ka ring pha miah lo asin, ka thinlung hi hlimnain a luangliam zawih zawih ni berin ka hria! 

Rei tak kan inkàwm hman lo nain kan hlim dùn viau a ni, thu tam kan sawi lo, kan induhna chu chêtziain kan lantîr mai a, kan inhmuh vawi khatnaah ka infawhtír thei hial a ni. Min dem maithei, nia, min demin ka ring; mahse, ka duh ve tawh êm asin, ni tin zan tina min be peihtu leh min duha min hmangaihtu chu ka tân a hlû a, hei bâka hlu tùr thil dang ka hre lo a ni. Ka duh a, ani pawhin min duh a, induh tawna inngaizâwng ta chu kan infâwp ve bawk ang chu, mite tih loh dàn pawh a ni hleinem. Pa Siamate lo haw chuan ani pawh a haw ve nghâl a, zanriah a eina a țhianpate inah khân a riak dâwn a ni, a ţhianpate vêng leh kan vêng hi vêng ințhenawm chiah ni mah ila kan inhlat viau mai a, kea a țhianpa in a kal thleng leh țhak tùr chu ka khawngaih viau a ni; mahse, chu chuan ka rilruah amah duhna min neih belhtîr leh tlat thung a! Min hmu tùr liau liaua vêng hlâ leh hahthlâk pawh sawi lova a rawn kal ngar ngar chu ka lâwm a, min duh ve viau niin ka hriat phah bawk a, khawngaih viau mah ila ka hlim viau lawi si a ni.

Chumi zàn ațang phei chuan inbiak loh ni kan nei ngai tawh lo va, kan inbia a, kan in-text a, kan inthlâkhlelhna zual sauhin ni tin inhmuh kan duh leh ta zêl a; mahse, a buaithlâk thei khawp mai. Ani class kal lai a ni a, kei pawh puan țhui zir mêk ka ni, hun ãwl  kan nei thei ziah bîk lo. 'Hubby' tiin ka ko țhìn a, a hnu deuhah erawh chuan 'Putar' tia kovin ani'n 'Pitar' tiin min ko ve thung a. Mipa fel tak chu a ni ka ti ngam sak, khatih hun lai khân kawng engkimah min care a, ka tân a inpe zovin ani anga mipa fel leh min ngaihtuahtu ka nei kha vànnei ka inti takzet, ani ang kha ka tawn leh theih pawh ka inring tawh lo, pasal atân pawh ka iai lo, ka iai lo mai ni lovin ka duh ngawih ngawih zâwk a ni.

Zan khat chu inhmuh dun kan rawt a, a țhianpa Hruaia inah chaw a rawn ei leh dâwn a, chutah chuan inhmuh chu kan tum ve ta a ni, dik taka sawi chuan min duatin min  ngaihsak si a, a hmêl, chezia leh a țawngkam zawng zawngah ka luangliam vek tawh bawk a, hmuh hlàn hi ka nghâkhlel ve êm êm tawh a ni, ani pawhin min ngaiin min thlahlel ve tho tih ka hria a, hniala chhuanlam siam chu khawilam, kei pawhin ka châk et et reng a ni si a, a lakah hi chuan ka thla hi a muang hliah hliah ni berin ka hria.

Pa Siamate hnênah chhuanlam siamin Apuia hmu tùr chuan ka chhuak ta a, min rawn hruai hman loh avàng chuan keimahin ka kal ta ringawt mai a ni. Phone-in ka kal dàn tùr chu ka zâwt chawp a, ani pawh chuan min rawn hrilh zêl a, ruah a sûr bawk si a, nihliap khumin ruah sûr hnuaiah, khaw thim thet thet tawh hnuah chuan ka ár kawh chhuah ve ngawt mai kha a nia, tûn hnua ka ngaihtuah lët hian khatih hun laia ka lo tum vezia kha aw ka ti  rauh rauh țhìn. 

Ka vawi khat kalna a nih avàngin ka bo viau a, phone-in min hrilh fiah tho mah se a châng chuan mi ka hmuhte kawng chin chu ka zâwt tho bawk, Apuia pawh chuan min ngaihtuah ngang a ni ang, Hruaia in ațangin min tâwk tùrin a rawn kal ve a, kan inhmuh veleh min rawn kuah vat pah chuan," Vâwt i ti em?" a ti sap a. Ni e, vâwt ka ti alawm, ka kekawr tlâng chu a huh vek tawh a, ruah a sûr duh bawk nèn; mahse, min kuah hnu chuan vâwt pawh ka hrechang tawh lo, inkuah chung chuan Hruaia in lam panin kan kal ta a. Kan thlena in ka luh dâwn chuan ka lài ve deuh dat mai, a țhianpa mah ni se ka la hmuh ngai loh avàngin ka zak lo thei lo a ni; mahse, a lo fel roh khawp mai a. Inhrûk hulna tùr puan min lo pêk pah chuan min fiam a, min nuih suk suk a,"Ruah a sûr nasa bawk sia, in duh chuan mu nghâl daih rawh u," a la ti zui a, zak rilru deuh chuan Apuia chu ka melh ringawt a, ani pawh chuan," Nia, pawi lo khawp ang, a vâwt bawk si," a lo ti ve mai a.

"In chungte inah ka han kal lawk ang e, khum pakhat zâwkah khân aw," tiin Hruaia chu in ațang chuan a chhuak nghâl daih a. Riak chhuak tùra ka chhûngte bula ka insawi sa avàngin harsatna tùr chu a awm lo; mahse, chutia khum pakhata han mut dun ngawt chu ni theiin ka hre lo. Inhmuh dun kha chu kan rawt ve ngei a; mahse, mut dun lam ka lo ngaihtuah tel miah lo. Apuia chuan," Mu nghâl ila, vâwt i ti a ni lo'm ni?" a ti a, kei chuan," Mu dùn mah ila min khawih hauh suh ang che, ka kâwng achin hnuailam chu," ka ti ve khar khar a, ani erawh chu a lo nui ringawt a.

Room-ah chuan khum pahnih a lo awm ve ngei a, pakhatah chuan kan țhu a, kan titi a,"Puan hran sin ila; mahse, i duh chuan min rawn kuah thei tho ang," ka ti a, awlsam zet hian a lo aw ve mai bawk a, puan chu sin hrangin ka han mu hmasa phwt a, a rawn mut ve chuan min rawn kuahin min rawn fâwp nghâl chat a, a kuta ka âwm chu rawn chûl nghâlin  hnuailam chùl thlâk a tum chuan a kut chu mansakin," Ka thei lo," ka ti a, lehlam ka hawi nghâl daih a, ani pawh chuan," Tihpalh," a ti sap a, a țhianpa Hruaia a rawn haw ve tawh bawk nèn, kan țawng tawh lo. Light off-in Hruaia pawh chi a rawn mu ta nghâl a, a muhìl hma êm êm zui, a hnâr bur bur mai. Kei erawh chu ka mutna hmun ka sawn  nèn, ka puan sin pan bawk nèn, vâwt ka ti bawk si chu ka muhìl thei miah lo va, ka meng kar mai. Chutia rei tâwk fang mu chunģa ka men hnu chuan a tàwp a tàwpah chuan" Min kuah teh, a vâwt a nia," ka va ti ta nge nge a, a lo la muhìl bîk lo a ni chêk ang chu," Rawn hawi teh," a ti a, a lam hawia ka inlet chiah chu min lo kuahin min fâwp ta nghâl a, induh tawn ve ve kan ni bawk si a, ka țang bîk lo, a zei roh bawk sia, a chinchâng ka hre tam lo bawk nèn, humsual kan dài tâk hial nghe nghe kha; mahse, ka inchhîr lo ang, ka tâna hlu ber chu ka hmangaih leh ka duh ber, pasal atân pawha ka duh ber hnênah ka hlàn miau si a.

A tûka ka harh chuan khuma țhu chung hian min lo thlîr reng tawh a," Good Morning, Bawihte. I tho tawh dâwn em ni ang? Hei, dâr 8 a ri dáwn tawh a, i inphih harh hnuah kan haw nghâl mai dâwn nia," a lo ti a, ka inperh tho rang khawp mai. A țhianpa Hruaia erawh chuan chaw ei ve nghâl mai tùrin min lo ti a; mahse, ka hnial tlat thung a. Kawng hnaih dàn ber (short cut) min hrilh a, Apuia nèn chuan kut invuan rialin kan kal dùn a, kawng hnai ber nia a sawiah pawh chuan dârkâr khat chhûng zet kan kal a ni.

"Innei nghâl mai ila?" a rawn tih chuan ka phu zawk a, ka zak pah deuh bawk a, nizàn lama kan chêt dàn vàng a nih ka ring nghál bawk a.

"Naaa...a zahthlâk, ka duh lo," tiin ka chháng liam tawp a, zirlai a la ni ve bawk si a, nupui a neih duh pawh ka la ring bîk lo a ni; mahse, a lo thutak ve nasa mai a," Min zui haw nghâl mai la, nupa ang kan nih tawh tho kha, mawh, tihian, min zui haw la, kan innei nghâl dâwn alawm," a ti leh a; mahse, kan hmakhua ka thlìr avàngin ka chhâng ţha duh lo, ka hnial zêl a, kan in bul kan thlen hnu chuan," Kha, la rawh," tiin taxi fare tùr ka pe a, a hàwnna tùr a hla vang vang mai si a, ka khawngaih a ni.

Chuta țang chuan a hma aiin kan inpawh ta sawt a, kan inthlâkhlelhna a zual a, kei phei chuan ka thlahlel zual ngawih ngawih mai a ni. Zîng tin zan tinin  thu thlum leh mawi tak takte  ka chhiar tùrin ka phone-ah min hnutchhiah ziah a, amah hi thu leh hla lama tui mi a ni ve bawk nèn, a thu ziak chu ka chhiar nawn fo a, ka tân liau liaua a ziah a nih avàngin ka ngaihhlû êm êm a, ka delete ngai lo. 

Tih takzeta thla thum vêl kan inkawp hnu chuan an khaw lamah a exam zo chu a haw dâwn a, a haw dâwn zànah chuan chhûngte mut hnuah tho chhuakin kan in chungah kan inhmu dùn leh a, hetah pawh hian a duh tihpuitlinsakin nupa chauhin an tih tùr chu ka tihpui leh a, a zùnah hian ka uai nasain ka hmangaihna hian min bual hneh tawh lutuk a, a thu ang angin ka awm tawp a ni ber mai. 

A haw hnu chuan ka ngai takzet a, ani pawhin min ngaiin min rawn ngaihsak hle a, kan inbiain kan in-text ãwl lo va, kan hmalam hun tùrte kan sawi fo țhìn. Zan khat chu," Putar, lo rai ta ila, min nei duh tak tak ang em? Zirlai i la ni bawk sia," tiin ka zâwt ta chawt a, hei hi ka ngaihtuah lo thei lo, rai thei dinhmunah ka ding miau si a.

"Rai lo ang, lungngai suh, i lo rai ta a nih pawhin ka nei ngei ngei ang che," a rawn tih chuan ka nui sak a, a thu sawi hi ka ring lo phal lo, a sawi a nih phawt chuan ka ring êm êm vek.

"Zirlai i la ni bawk sia, tihbuai che ka duh miah lo ang. Ka rai a nih chuan tibuai lo chein kan khuaah ka haw bo daih ang," ka ti leh a, ka rilru tak tak ka sawi a ni; mahse, ani chuan," Ka nei thei rih lo che a nih pawhin ka la rawn zawng chhuak tho ang che, hnate ka nei phawt ang a, ka nei tho tho ang che," a rawn ti leh a, a tihtak êm avàng chuan ka ngaih a țhain ka thla a muang siai siaiin ka hria.

An khuaa kâr hnih vël a awm hnu chuan Aizâwlah rawn kîr lehin kan inngai bawk a ni ang, an inah a bag a vawm lût tawp a, min hmu tùrin a rawn kal nghâl vang vang rêng a, kan inhmu chu kan hlim dùn asin, khâng hun lai ka ngaihtuah lêt hian ka ngai vawng vawng mai ka ti, koh kìr theih miah lohin mual a liam vawng vawng tawh si a.

Kan inkawp nghet ve bawk a, kan ințhen theih ka ring ngai lo. Zan khat chu min rawn biak chuan," Ințhen ang," a rawn ti ringawt mai a, ka hamhaih lutuk a, ka ţawng lawk lo, a hnuah erawh țap chhuakin phone chu ka hmet tàwp tawp mai a, hmaichhan ni lova phone-a rawn sawi a nih avàng chuan ka che sawn thei lo va, ka mittui a tla zawih zawih tawp. A hnuah min rawn phone leh nghâl zat a," Ka fiam chhin mai mai che a nih kha, ka tider a nih kha," a rawn ti leh a, ka rilru nat hmanzia ka ngaihtuah a, țap pùr chung chuan ka nui a, ka ngei lek lek nain ka tilang duh lo va. A hnu thla hnih liam hnuah chuan phuba la vein," Ințhen ang," tiin ka va be ve a, ani pawh chu a țap ve țuau mai. "Engati maw?  Ka hmangaih che alawm, min kalsan suh," a rawn ti țuau mai a, mipain țap țuau chungin min la be ngai si lo va, ka inthiam lo lutuk chuan," Ka fiam che a nih kha," ka ti ta chùl a, ani a thinrim ta thung, a titau a, ka rin aiin a la titau rei zui a, ka thlèm hrep hnuah a lungawi ve thei chauh a ni.

[A laklawh deuh a, hetah hian ka rêk bung ta rih mai aw, chapter 2 bâk a ni dâwn lo]

*SAWI TÙR HRIAT VIAU PAWH HIAN NGAWIH HUN HI HRIAT VE A ȚHA NGAI A NIA*