☆KA NGHÂK CHHUAK DÂWN LO CHE MAW...☆ - 2 By Dingdi Pachuau

 ☆KA NGHÂK CHHUAK DÂWN LO CHE MAW...☆ - 2 By Dingdi Pachuau

Mi dang inngaizâwngte hian an ti ve ngai em ka hre lo va, kan phone kan inkawl thleng țhìn a, a luck rohzia ka hriat phah. Thu a thiam ka tih tawh kha, betu a nei theiin inbox lama rawn ûm zuitu pawh an awm ve nual țhìn. Fb lamah hi chuan a active vak lo va, whatsApp group lamah hian a thu ziak mawi tak tak chu a post mai ţhin, ka tân pawh thu mawi leh thlum zet zet min phuahsak fo a, ka lãwm thei a nia, kei aiin kum khat chauhin upa mah se a thu ziak hi a puitling bîk ka ti țhìn. 

Kan han inkawp chho ve zël a, kan inngaiin kan inthlahlel  dùn ve bawk nèn, 'vawi khatin vawi hnih a hring' an tih angin hun âwl leh hmun âwl kan neiha kan hmuh phawt chuan kan chesual ta fo va, dik tak chuan hnial chu ka duh ve ţhìn alawm; mahse, a hun a lo thlen hi chuan ka hnial thei ngai bík lo, kan inhmangaihin kan induh tawn a, kan inthlâkhlelhna a pung a, a duh ka tihpuitlinsak khân min hmangaihna kha a pung sawtin ka hre țhìn bawk a ni.

Hmeichhe dik tak leh kum tling tawh ni bawk si, mipa dik tak nèna nupa nun hmang dùn zauh zauh ta chu, ka thla tin hunbî ka chhiar kim lo ta chiah mai.  Ka rai a nih chu ka la ring chuang lo, a chhan chu kan mut dun hma pawhin thla hnih khat àwl zauh zauh châng ka nei ve tho a, ka ngaih ka tițha lo hran lo; mahse, thla thum lai mai a nih tâkah chuan ka dam lo ta a, ka inentîr a, ka zun kawnga bacteria a awm vàng a lo ni a, 'Hei vang chiah hi a nih hi ka la period loh' ka la ti fan a. Ani pawhin ka dam lo chu min ngaihtuah viau mai, class țhulh țhakin min kalpui a, ka thla a timuang asin; mahse, ka inentir chuan rah țha a chhuah chuang lo, dam phah ahnêkin khawsik ka nei chho leh a, ka inentîr leh chuan doctor hnênah chuan ka period loh thu chu ka hrilh ta a, doctor khân a rûk tak chuan máwl chu min ti ve ngawtin ka ring; mahse, inrinhlelhna tùrin luak chhuak leh thil huat/ngei ka nei bawk si lo va, ka period lo zauh zauh bawk nèn, mãwl ka inti duh ngawt bîk lo.

Doctor chuan pregnancy test kit leia in-test tùr chuan min ti ta a, Putara pawh chuan min kalpui leh thlap a, kan pahnihin kan lei dun nghe nghe a. A tûk zînga test tùrin doctor chuan min hrilh a, Putara chuan," I test hunah a result min rawn hrilh ngei ngei rawh aw," tiin min chah thlap nghe nghe a, a tûka ka test chuan ka lo rai ngei a ni tih a chiang ta hle mai. Ka hlauthãwng hran lo, min chah angin Putara hnênah chuan ka rai thu chu text-a hrilhin, test kit-a mi chu thlâ lain ka va thawn tel bawk a, ani pawh chuan min rawn be ta vat a; mahse, ka rin loh lam daih thu ka hre ta thung a!

"Titla mai ang, tunah rih chuan nupui nei thei dinhmunah pawh ka la ding lo, damdawi tùr chu ka rawn ngaihtuah ang," a rawn ti ta mai! A thil sawi chuan min țhãwngin ka rilru a tina takzet a, ka thin a rim bawk si a, ka țawng thei lawk lo nghe nghe a.

"Zorinpui, I zak lo'm ni!!? I fa i thisen hi titla tùrin min duh maw?!! I va'n lo mak ve..!!! Min lo hmangaih ve viau emaw ka lo ti a, dâwt vek a lo nih hi!" tiin phone chu ka titàwp nghâl a, min rawn biak a tum leh pawhin ka chhâng duh lo, whatsApp-ah pawh ka block ta nghâl a, ka rai hmaa a thil sawi leh ka rai tih a hriat hnua a thil sawi inpèrsan lutuk chuan ka thinlung a tinain ka thin a tirim takzet a ni.  A hmaa a bula ka sawi ang ngeiin kan khaw lama haw tùr chuan ka inbuatsaih ta nghâl a, ka hma hmain zan khat erawh chu  *Ka fa lo piang tùr hi ka thisen a nia, tualthah ka duh lo, kan khuaah ka haw dâwn*  tiin message ka va thawn a, min rawn call nghâlin inhmuhpuiah min rawn sâwm a, kei pawh chuan ka hmuh tàwpna tùr a nih avàngin ka lo aw ve mai a.

Kan inhmu ta ngei a, a tàwp nân tiin min nei mai tùr chuan ka thiam táwkin ka thlêm a; mahse, min hnial leh tho. Ka thinlung nâ chu ka tlâwm ngawih ngawih a ni, ka hmangaih êm êm leh min hmangaih êm êmtu nia ka hriat, ka thianghlimna ka hlan hnu pawha a duh ka tihpuitlinsak ziah hian min neih a duh lo mai ni lovin a fa lo piang tùr pawh duh lovin titla tùrin min la ti ngar ngar a nia! 

Ka tlàwmna pawh chuan awmzia a nei hlawl lo tih hriain," Dam chhûngin kan inhmu tawh dâwn lo nia, mangțha le, inenkawl țha la, țha takin i zirlai chu i zo dâwn nia," tiin a dam thei ang berin ka thlah a, ka thinlung chhûngrîl erawh chu a rûm tlawk tlawk thung; mahse, àn khum leh thinrim khum chiam khân awmzia a nei chuang lo va, ka tum lo bawk, ka hmangaihna kha a la ngai reng si a, kei hi chuan ni tinin ka thlâkhlelhna leh ka hmangaihna a zual deuh deuh dâwn tih ka hria a, ka hmangaih êm êm hian heti khawp hian min tina thei ang tih lo ngaihtuah pha ila chuan aw...

Ka ngaihtuah a, kan khuaa ka chhûngte, ka nu leh pate'n an hriat huna an rilru nat tùrzia leh hrehawm an tih tùrzia chu ka ngaihtuah thui ngam lo zâwk a ni. An fanuin sâwn paiin a sâwn painapa lah chuan mawhphurhna a la ngam lo chu a ni si a, ngaihtuah chian chuan a zahthlâk ngawih ngawih a ni, ka rilru nâ leh hrehawm ti lutuk chu ka țap deuh reng mai a, ka mittui hi a tla deuh reng a ni ber mai.Eng mah ka tih a tui lo va, chaw ka ei thei bawk si lo, ka rilru nâ, mangang hrehawm ti lutuk chuan vawi khat chu damdawi ka bâr ve ringawt nghe nghe a; mahse, vànneihthlâk takin ka ti dâwn nge, nautein a chhiat phah lo a ni chêk ang chu, a pângngai reng tho.

September thlaa kan khuaa ka haw chu ka chhûngte an lo lãwm thiam khawp mai a, ka rài thu la hre miau hek lo le, ka hrilh lawk ngam lo nghe nghe a. Ka awm tawp a, ka nau paiin thla lina hmang chho mêk ni mah se naute ka pai a ni tih ka dulah chuan a la hriat loh avàngin ka chhûngte leh mite chuan ka rai tih an la hre lo. Keimah ngeiin ka hrilh hreh êm avàngin ka ţhiannu ve ber hnênah ka chhûngte bula ka rai thu hrilh tùr chuan ka ti a, a hrilh ve ngei bawk. Min hau nasain an thin ka tiur khawp mai; mahse, an tih tùr dik tak an ti a ni, ka tih dik loh a ni miau mai si a, min hauin min vaw hrep pawh ni se eng mah sawi thei ka ni lo; mahse, an fanu ka ni miau a, eng ang pawhin thil sual ti mah ila min hmangaih vàngin ka tih dik lohah min hauin min zilh a ni tih ka hria, ka haw lo, min hmangaih êm êm vàng a ni tih ka hre miau alawm, ka tân hian an hlû asin.

Thinrimin min hau nasa mah se țha takin ka rai chu min enkawl chho a, kei lah chuan rài chu ka'n haw chho khawp mai a, ka dam lo a, khumbetin ka na lehnghâl a, ka chhûngte'n min hmangaihna ropuizia leh min ngaihsakzia ka hriat thar phah hlé a ni. Putara nèn ni tin zan tina inbe ziah țhin kha kan ni a, vawilehkhata kan han inbe ta lo thut chuan ka rilru a tihrehawm zualin a chungah thinrim viau mah ila a han reh vung vung mai chu ka ngaih a zual phah sawtin ka hria a, ka chhûngte hriat loh hian ka mittui a tla fo țhìn, khumbeta ka dam loh lai phei chuan ka ngai zual a, min hmangaih miah lotu a ni tih hre mah ila ka ngai lo thei si lo, ka mamawh êm êm lai hian ani ka ngaihtuah chhuah loh chuan tu dang nge ka ngaihtuah chhuah tehlul ang le? Ka hmangaih ber leh kathlâkhlelh êm êm, a fa hial pawh ka pai duh kha a ni miau mai si a.

Naute pa chhûngte pawh chuan an fapa fa ka pai a ni tih an hriat chuan min rawn bia a, a nu ngeiin min rawn biain," A zirlai hi a la laklawh si a, han zir zo phawt se, naute pawh a lo piang fel hman tawh ang a, in innei ngei ngei ang," a tih avàng chuan tlêmin beiseina ka nei ve leh deuh a, ka beiseina beitham zet chuan ka puma ka thisen ringa naute rawn țhang lian ve mêk tân chuan chakna min neih thartîr a, Putara țawngka ber hre lo mah ila a nu țawngkam tlêm tê pawh chuan min chhâwk ve viau a ni.

A number ka block ka tih tawh kha, min rawn biak chu a tum ve fo tih a nu țawngkam ațangin ka hria a, a nuin min hrilh leh zêl dàn chuan an khuaa a exam zo a han haw lawk pawh khân kan inngaihzàwn thu leh a zirlai a zawh hnua nupuia min neih a duh thute pawh a lo han sawi a ni àwm e, tak tak ni maw? Dik tak chuan ka ring ngam tawh lo a ni; mahse, a nu chuan dâwt a sawi duh êm chu ka ring meuh si lo. A nu hian min rawn biak peih êm avàng hian la hmu lo mah ila ka ngaina ve tawp a ni.

Mihring hi kan lo mak thei hi ka tia! Hrisêl lo tak chuan nau chu ka pai chho ve zêl a, naute ka neih dâwn thlaa ka in-checkup chuan ka Hb a lo hniam nasa mai a, doctor chuan," Hetiang chuan neih pângngaiin i nei thei lo ang," min ti a, ka chak theih nân thisen chawte min khaisak a, ka neih hma kâr chiahah tui chhia a rawn pût a, damdawi inah admit ka ni a, ka hrisêl lo lutuk chu hrehawm ka ti țhìn, damdawi in boruak chuan min tichau zual niin ka hria, chutih lai tak chuan a ni thu hriat hrehawm tak, min tihrehawm zualtu chu ka hriat tâk ni. Putara'n ngaihzâwng a lo nei niin, ka thiam loh pawh a ni tel tho maithei, ka haw tâk avànga a lunglêngin ngaihzâwng a nei ta niin ka ring; mahse, ka haw ațanga thla hnihnaah chauh a nia a neih țan ni, a rei lo lulai ka ti a, ka rilru a tina thar ngawih ngawih. 

Ka thil hriat chuan min tichau zual a, Inrinni zànah ka pum rawn nâin ka kâwng a rawn nâ a, nau ka nei hnai dâwn a nih ka ring nghâl a, a lo ni ve chiah bawk. Ka nau nei tùr mawlh kha, ka vei rei si, ka neih hun tùra an tihah pawh khân ka nei thei si lo, san a pe nasa tawh si, san loh tum pawhin a theih loh; mahse, ka nei thei chuang si lo, nâ ka tih êm avàng khân ka thih loh hi ka ring miah lo, a chhan chu ka kumkuruh a káu thei tlat si lo va, ka chàu lutuk tawh bawk si nèn, thih mai pawh kha ka duh hial a ni. A tûk nilêngin ka vei a, zànah pawh ka nei thei bawk si lo, chuti chung chuan hmunpui lam min la panpui deuh deuh a, ka chau lutuk a, eng mah hre lovin ka awm nghe nghe a, ka harh chhuah chuan ka nu ka bulah awmin ka kutah a lo vuan a," Bawihte, țang fan fan rawh, naute pawh a țha a nia, intichakin  intipaukhauh la, țha takin Pathian zârah i nei ngei ngei ang, i pawimawh a nia aw," tiin min fuih sauh sauh a, chu chuan chakna min pe thar a, damdawi in inzaina room-ah zàn dâr 9:30-ah min nawr lût a, thisen unit 3 min pe bawk, zàn dâr 10:20-ah mipa fa chu zai chhuakin a nu leh pa thil tih sual hre ve map lo fapa chu ka nei ta. Damdawi inah kâr khat chhûng chu hmêl hriat loh kârah ka nuin min awmpui a, nu hmangaihna ropuizia leh ka tâna a inpêkzia ka hre chhuak thar leh a ni.

Naute pi(Putara nu) chuan min be peih viau ka tih tawh kha, min biak apiangin beiseina ka neih theih tùr deuhin țawngkam a nei ziah a," Naute a rawn hmuh hunah chuan a rilru pawh a kîr ang a, in innei thei ngei ang," a ti țhin, Putara pawhin a nu phone ațang chuan min rawn be zauh zauh a, naute chanchin lam chu min zâwt deuh ber. An chhûnga naute chu rawn en an tum țhin a; mahse, rokhawlhna remchâng tak leh remchan lohna remchâng tak a awm ve ziah a, hun a lo kal a, covid-19 lockdown kha a rawn ni leh a, thil a buaithlâk ta vek a ni. A Krismas kawr tùr leh toys erawh chu hei kum hnih chu an rawn thawn ta, kawr leh toys an rawn thawn ka hmuh hian ka rilruah a thar leh rauh rauh ziah.

Putara bialnu nia an sawi chu thu thiam ve tak a ni a, an sawi ka hriat dànin November ațangin an inngaizâwng a, chutih lai chuan a bialnu chu a rai tawh a; mahse, mi dang fa a ni. An inngaizãwng chho zêl a, mi fa pai lai a ni tih Putara'n a hriat hnuah chuan țhen a duh viau laiin harsa a ti ve tawh si. Putara nu chuan," Mo atân chuan ka duh zâwk che a, bâkah, ka tupa nu i ni bawk a,"tiin min hrilh țhìn. A bialnu chuan Putara nèna kan chanchin pawh chu a lo hria niin," Nang aiin a nuin mo atân min duh zâwk, i fapa aiin ka fa pawh hian Apuia a chhùn daih zâwk," te min rawn ti țhin a, chutiang lo pawh chuan thu dêngkhãwng tak tak, hriat nuam lëm lo tak takin min rawn ti fo mai; mahse, kei chuan ka chhâng lêt duh lo, ka chan hi ka hria a, țawngkam na tak tak hmang ve tùr ka ni lo tih pawh ka hria. Putara nèn kan chanchin a hre ve vek a, a fa hial paiin fapa pawh ka nei tawh a ni tih pawh a hria a, eng rilru nge ka put tehrêng ni, a khawngaihna dîlin Putara chu kalsan hrâm tùrin ka han ngèn ta pek a nih chu; mahse, hmangaihna hi zawng, a lo mak êm a lo ni, a bialnu lah chuan kaltîr a lo tum lo nasa; mahse, a hnu daihah an ințhen tih ka hria.

A nau neihna damdawi inah pawh a va kal ve ni tùr a ni, ka thin a han rim khawp mai a, a bialnu min ţawng khum dàn chu pài daih harsa ka tih êm avàng chuan a nu phone ațangin ka àn khum a," I bialnu fa kha i fa maw lo ni a? I lo thei hle mai, ka fapa ai pawhin a fa chuan nangmah a chhùn zâwk che a nia," ka tih khum a, ani pawh a lo lungawi lo khawp mai a," Ka fa a ni lo, kan nih tirh khân a rai daih tawh, ka tel ve teuh lo mai, tiang kawngah hi chuan tihsual nawn leh ka duh tawh bîk lo," tiin a lo phâ ve nasa, kei pawhin a fa a nih ka rin vàng pawh a ni chuang lo va, ka àn khum ve mai mai a ni.

Putara țhianpa Hruaia pawhin min rawn be ve zauh zauh a, a țhianpa hruaia naute rawn enpui a tum thute min hrilh a," Ka rawn kalpui te te ang a, min chàmsan hlen ang tih erawh chu a hlauhawm viau mai a, mahni chauha lêt chu  ka duh miah lo," tiin min fiam țhìn a, Hruaia țawngka ațang pawh chuan naute chu rawn hmuh ve ngei a tum viau niin a lang. Beisei bo tawh hnu chu beiseina thar ka nei dêt dêt leh a, a fapa hi a hmuh chuan a rilru pawh a kìr ve theih deuh ka ring bawk a ni; mahse, hun a nei remchâng hlei thei lo va, a chhuanlam mai mai nge phei chu ka hre lo, tikhân lockdown khân a rawn nang buai leh ta bawk si a, tûn thlengin a fapa chu a la rawn hmu lo ta chu a nih hi.

Ka tâna khuanu ruat hi a ni lo hrim hrim a nih ka ring țhin , Aizawla kan kalin kan inhmu lo va, Krismas dâwna kan inbiakin țha takin kan inbia a, Bawihtea bulah pawh," Ama nèn lo zin ula, kawr mawi deuh deuh kan lei dâwn nia," a ti a; mahse, kan zin dâwn khân kan khua kha containment zone-ah an puang leh si a, a dik lo vêl vek a ni ber mai.

Tichuan, beisei bo hnu beiseina ka neih ve țan rauh rauh tawh laiin bialnu a nei leh tih ka hre leh ta a, ka beiseina neih ve chhun pawh chu beidawnnain a rawn thlâk nghâl a, ka thinlung pawh a tikehsawm chiang ta khawp mai. A nu pawhin tihngaihna a hre tawh lo va, min hnèm thiam tawh lo, Putara chuan a tàwpna tùra min rawn biain," Ka tel lovin hmalam pan rawh," min rawn ti ta a nih chu, chutiang bâka inhnarna țawngkam chu a awm thei tawh dâwn em ni? Ka thinlung hi a na thei tawh lo zâwk ni berin ka hria, a tikeh sawm vek tawh a, a tihkeh sawm vek tawh avangin na leh chuang tùr a awm tawh lo a ni. Min kalsan a, ani chuan ka tel lovin hmalam a pan ta zël mai.

*PUTAR, KA NGHÂK CHHUAK THEI DÂWN TA LO CHE MAW...NI E, I HMALAM HUN ATÂN  DUHSAKNA ȚHA TINRÊNG KA HLÀN A CHE*

Ka fapa, harsa taka ka neih pawhin tunah chuan kum hnih hmel a lo hmu ve ta, ani hi chu awm lo se chuan he khawvêl hi nuam ti pawhin ka hmang lovin ka ring. Ani vàng chauh hian ka dam ve hrâm hrâm ni berin ka hria, a lo țhan len hun, thil awmzia hre thiam rual a nih huna a pa chanchin min zawh hun tùr ka ngaihtuah a, chu hun chu ka va huphurh dáwn tak êm! Mahse, kan dam a nih ngai chuan kan la tawn ngei tùr hun a la ni si, engtin nge ka hrilh tâk ang le? A pa chu mipa ve si, mahni thutiam pawha ding ngam lo mihring a ni tiin ka hrilh ngam ang em? Min kalsanin kan nufa hian min hnuchhawn ta a ni tih hi ka hrilh ngam kher ang em? Amah nghâk tùrin min ti kha a ni a; mahse, ka nghâk chhuak thei dâwn ta lo chu a nih hi, mipa ka hmangaih êm êm chuan amah vànga ka harsatna tawh chu min hriatpui duh lovin min hnuchhawnin min kalsan ta. Thih daih te hi ka châk țhìn a; mahse, Bawihtea ka ngaihtuah a țûl bawk si, nun hi harsa ka ti ngawih ngawih, a tel lova hun hman chhoh ka huphurh lutuk, ka thi mai ang tih te ka hlau.

Mahse, a tel lovin heti chen Bawihtea ka lo pawm tlei tawh a, a tel lovin kum hnih chuang zet hun ka lo hmang liam ve tawh bawk a, ka la thi bîk hauh lo, ka dam thei ngei ang a, ka dam chhuak  ngei pawhin ka ring, Pathian zârah ka fapa hian min dampui bawk ang a, ani hi ka nunna hnâr a ni, ani hian min dampui phawt chuan engah nge nun chu harsa ka tih viau lêm ang? Mipa, mahni thutiam pawha ding ngam lo nun nei a pa ang hi a fapa hian chhùn ve miah lo tùr leh entawn ve miah lo tùrin ka enkawl ang a, ka tawrh ang hi tu mah tawrhtîr ve lo tùrin ka fapa hi a len hunah ka chah mawlh mawlh bawk ang. Mite pawhin ka tawn ang hi an tawng ve ngei alawm; mahse, kei chuan ka chhiat  phah vek a, nun ka hloh phah titih dér a nih hi. 

Kan awmna hi thingtlâng a ni a, țhian ka kàwm ngai lo va, ka fapa awmin inah ka tâp chawt reng a ni ber. Chhuak harh ve tùrin min ti fo a; mahse, thingtláng zia hi chu a buaithlâk, insawisèl kan peih si a, kei phei chu sâwn pawm ka ni lehnghâl a, min sawi duh bîk zualin ka hria. Chhuahna a awm ve chhunah chhuakin inchei ve deuh ila," Nu a ni tawh sia, a inti-nula leh țan tawh a nih dâwn hi," an ti a,  han inla-nu deuh ila," Fa pakhat a nei ve dêk dêk a," tiin min sawisêl leh a, awm dàn thiam a har, chuvàng chuan ka chhuak ngai lo; mahse, ka chhûngte hian min zilhin min fuih nasa a, 

He thu ka sawi chhuahna chhan chu ka tawn ang tawng hi an la awm chho ve zêlin ka ring a, khawvêl a ni miau si a, chuvàng chuan, beidawng mai lova fight țàng țâng tùra ka duh vàng a ni. Kei pawhin a hunlai kha chuan hrehawm ka ti a, tihtlâk pawh ka rilrûk a, damdawi pawh ka bàr hial nghe nghe kha; mahse, Pathianin a lo remti lo a ni ngei ang, min hrem chho mawlh mawlh berchu a nih hi; mahse, ka tâna țha tùr zâwk a lo ni ngei ang.  I lo tisual ve palh a nih pawhin mahni tihsual hi pawm ngam ila, tisual nawn tawh lo tùrin invêng ila, la tisual ve lote pawhin hei hi inzir nân leh invèn nân lo hmang se tih ka duh a, kan tihsual kan pawm ngama kan tihsual nawn loh nâna kan invèn hian hremna nasa zâwk kan pumpelh thei ngei ang tih ka ring tlat a ni.

Chuan, he khawvêlah hian kan hmangaih ber berte pawh hi min tina êm êmtu an ni thei tih hria ila, kan hmangaih berte pawh hi kan nupui pasal tùr an ni vek kher chuang lo tih hriain hmalam pan tum ang u. A harsa alawm, kei pawhin harsa chu ka ti chiang ; mahse, a theih tih ka hria, nun beidawnga indawm kun mai lovin chak taka awmin hmalam pan i tum tlat ang u tih hi ka chah leh bawk che u a ni e.

(Ka khawngaih reuh lutuk; mahse, hmeichhe chak tak niin nun hlim thei tak a ni reuh a, a hmalam hunah hlimna tam tak neiin MIPA DIK TAK a tawn ngei ka beiseipui takzet a ni)

*MIPA CHU MIPA A NIHNA ANG TAKA A NUN HIAN HMEICHHE TÂN INNGHAHNA TLÂK A TLING ȚHÌN*