☆HLWILY☆ - 10 By Dingdi Pachuau

 ☆HLWILY☆ - 10 By Dingdi Pachuau

Chêt nachâng ka hre lo, bâkah, thil thleng chu a thleng thut a, ngaihtuahna fîm pawh a put hman loh, ka hlauh êm avàngin ka che thei lo bawk. A ri no leh sawk a; mahse, Damon-a chu a tlu hauh lo, a pai ve deuh chauh a ni. Lo dawh mai lova a hnek lêt ve nghâl phat ka ring a nia; mahse, ka rin dàn ang lo chuan a  khawih lêt ve hauh lo, a lo dawh tawp ringawt, thinrim taka Michael-a chu a hnek lêt dâwrh ka rin tehlul nen. Chutah," Duh tâwk rawh!" ti vatin a ding ngîl a, Michael-a pawh en lo chuan min rawn en a, eng mah sawi tawh chuang lo chuan kan bul ațang chuan a kal sawn ta nghâl a, kal sawn ta na na na chu Michael-a pawhin a ûm zui bîk lo; mahse, au zuiin," I chêt dàn mawi lo zet kha chîng tam tawh suh, chuan, Kimikimi hi hnaih tawh bawk suh ang che," a ti zui hrâm a.

Chutah, min rawn hnaihin," A tinâ che em? Kan mi tenawmpa chuh..." thinrim tih hriat tak hian a ti leh nghat nghat a, min rawn kuahin," A chêt dàn hi ka ngaidam thei tawh lo, ka dawhtheihnain a tlin tawh hlawl lo a ni, a hmel ka hmu leh a nih vaih chuan," tiin a inhrosa pah a, kei chu tlêmin ka lo inthiam lo deuh hlek a, an unau inhmuh thiam loh phahna ka ni chu a ni ta mai si a.

"Engtin mah...ka awm lo, min tina lo," ka lo ti sap a, tlêmin ka thâ erawh a khùr deuh a, ka zak bawk. Kan awm dàn chu mumang ni se, țhanharh rualin reh daih se ka ti khawp mai; mahse, mumang a ni mawlh si lo, mumang ni se ka ti takzet a ni. Damon-a chungah khân ka thin a rim chiah em ka hre lo; mahse, ka rilru erawh a tinâ, ka chunga a chêt duh dàn kha...

In chunga rei lutuk lo min awmpui hnu chuan in hnuai lamah min chhukpui a,min lo notice viau ang tih ka hlauh rûk tehlul nèn, mahni buai buaiin an buai ve hlawm a, mi dang mi dang an ngaihsak hman bîk lo. A țhen an lo titi a, a țhen zaiin an lâm a, naupang lah an lo la bengchheng viau bawk. Damon-a hmel hmuh tùr awm ve hauh lo chu vànneihthlâk tak a ni, a haw daih a ni ngei ang chu. A chhûngte bulah chuan chhuanlam eng nge a va siam chu ka hre hauh lo, Michael-a chuan min hawpui ve nghâl daih a, pawi ka ti lo khawp mai.

A la tlai chhe lo bawk nèn, kan in bul kan thlena chhuk a phal rih loh pawh chuan ka hnial lo, a țawng ve leh tlat tawh si a. A hmel a lang pângngai zân lo va, kawng tluanin a țawng lo bawk,  țawng duh ve bawrh bawrh țhin tak mai chutia a ngawi reng mai chu a thin a la rim reng a nih ka ring a, kei pawh chuan a thinrimna punlun zâwngin eng mah ka sawipui duh bîk lo; mahse, zanina a awm dàn hian ka ngaih chu a tițha lo ve tlat, chhuk a phal rih loh thu a sawi pawh chuan hnial enah ka en lo.

Rei fê ţawng lova kan țhut leh deuh vang vang hnu chuan thâwk la hawk hawk phawtin, chutianga vawi nga vêl zet a a tih hnu chuan a zia ve deuh ta a niang," Zanin chu ka kut ka vêng hman ngang lo a ni, ka thinrimna a rawn titho thar leh miau si a," a ti ta charh charh a.

"A pawi ka ti khawp mai, keimah vàng vek a ni," ka lo ti sap a, ani erawh chuan a lu a lo thing nar nar a," Nangmah vàng a ni lo, amah vàng kha a ni. Ka unaupa a ni na vàng vàngin lêrh ve tak mai a ni a,  hmeichhia a mit la deuh leh a duh zâwng deuh tawh phawt chu, mi kawplai a ni emaw ni lo emaw sawi lovin a bitum chat țhìn, kalsan hauh lo tùr che kha ka ni a," a ti leh sap sap a, chutah," Ka duh aiin ka hnek na lo deuh a ni, a hmel țha tak kha lo hnek sàwi vek tùr hi ka ni a," tiin a nui lui sak a, a za lo hle a ni tih erawh a chiang khawp thung.

Mut hmunah chuan Michael-a thil min hrilh kha ka ngaihtuah lêt a, an pahnih inkârah boruak eng emaw awm tlata ka hriat kha a lo dik chiah a ni. Michael-a hian Damon-a hi a hlau bîk hauh lo, chuvàng tak chuan Damon-a dàn siam thar ' School compound chhûnga inngaihzàwn phal loh' tih pawh kha engah mah ngai duh lovin Damon-a hmuh lai pawh khân min be luia min hnaih lui ngat zêl kha a lo ni, khatia min hrilh ták hnuah kha chuan  Damon-a chunga a thinrim viau pawh kha àwm ka tihpui ve ta viau mai.

Damon-a'n a bialnu a lo mutpui miau mai si, chu pawh a(Michael-a) bialnu a ni tih hre reng chung lehnghâlin. Ni e, a nain a thinrimthlâk ngawt ang chu, Michael-a bialnu  chu ka dem tel viau rualin Damon-a te ang tlangvâl zei leh chhe lo thlèmna chu hnar a har ngawt ang, hmeichhe duh chi tak a ni si a, sum a neih bâkah a hmel a lo țha tel kher bawk nèn. Michael-a tân erawh a thangtlàwmthlâk ngawt ang. A bialnu mutpuitu chu mi hrang daih ni se chuan a thinrimna pawh a chungah a hrithla thei mai ang a, chutiang chu ni lovin a unaupa ngei a lo ni si, kum 3 zet liam tawh mah se, a theihnghilh thei lo niin a sawi a nih kha. Kei pawh ni ta ila amah ka hmuh apiangin ka hre chhuak ziahin ka inring, a zahthlâk dâwn bâkah 'mipa ka ni' inti tân chuan tlâwm hluah hluah intihna tham zet a tling ngei ang.

"A nih, i bialnu nèn chuan in ințhen ngei ang tiraw?" tiin ka lo zâwt hmanmawh a nih kha, kei ni ila ka țhen chiang vawng vawng khawp ang.

"Aw... Chelh luih ngaihna ka hre lo, kan inkawp lai renga mi dangin an mutpui theih si chuan...Ka tlâwm asin, ka tlâwm takzet. Damon-a'n a kawp rei duh dâwn lo tih pawh ka hre sa vek; mahse, kei ni lo mipa duh dang a thlan miau chuan lo inrawlh ka tum ta bîk lo a ni, ka rin ang chiahin a kawp rei lo kher mai bawk a, ngaihdam min rawn dîl leh nain lo pawm leh kha chu ka tum ta bîk lo a ni, ka thinlungah ser reh thei lo min hnutchhiahsak tawh si a, inkawp leh kha ka tân leh a tân sâwtna a awm tawh dâwn lo a ni," tiin min chhâng a nih kha.

Damon-a kher kher pawh, Michael-a bialnu a ni tih hre reng chungin engtin nge maw mutpui atân a lo thlèm theih rêng rêng ni? A pianpui unau ni lo mah se a patea fapa a ni a, a sawi dàn lah khân an chhûngkua an inpawh viau bawk. Chuti chung chunga a unaupa bialnu a lo mutpui duh mai chu a mak a ni, ani kher ni lo mi dang mutpui tùr a hmuh tam dâwn tehlul nèn, Michael-a tân chuan thinrimthlâk deuh mai tùr a ni, a hmêl a hmuh apiangin a bialnu nèna an thil tih kha a hre chhuak ziah àwm si a, ka khawngaih roh mang e.

He pa ka lo star hi chu a pawi vawng vawng ta ni berin ka hria. A unaupa bialnu pawh mutpui mai duh a ni si a, hei lo pawh hi nunhlui chhe tak tak leh hriat reng tlâk loh a nei țeuh ngei ang chu, hmeichhe lamah a nia ka tih ni. Mipa nungchang ka duh ang mizia a nei mawlh lo, ka duh loh lam zar zar a nei deuh vek zâwk maiin ka hria. A inrintâwkna erawh  ka duh thlâwt, min hîp viau țhìn nghe nghe a nih kha.

'Nunhlui chhe tak leh hriat reng tlâk loh' tih han ngaihtuah chhuah tâkah chuan mi tu pawh mai hian nunhlui duhawm lêm lo tak chu kan nei vek hialin ka ring, kei ngei pawh hian hriat chhuah pawh duh tawh lêm loh ka nei ve tho; mahse, hun kal tawh  nunhlui a ni a, khami hunah khân kan chêng reng tawh bîk lo, hmalam panin kan kal ve vek tawh a, nunhluia chèn reng chu tu mahin kan duh tawh bîk nâng. A țhente phei chu, nunhlui țha lo an nei hauh lo a ni ang tih tùr khawpa dinhmun sáng leh țhaah an invawrh sâng thei a, nunhlui țha lo an lo nei ve ngai a nih pawhin chu nunhluiah chuan an chêng tawh lo takzet tih hriat hliah hliah thei khawpin an bei nasa țhin.

Mahse, mihring kan ni miau a, mi chanchin a țha lam aia a chhe lam sawi chhuah nuam ti chi hi kan ni ve hrim hrim bawk, kan tâna țangkaina nei rêng rêng lo sawiin kan kûr luai luai a, miin a nunhlui a kalsan tawh pawhin a nunhluia la chêng tlat angah ngaih phêt kan tum a, la hre ve lote'n an hre lo palh hlauh ang e tih hlauin kan hrilh hre mawlh mawlh mai țhìn, miin theihnghilh an duh êm êm an nunhlui țha lo chu a țha lo tih hre reng chungin kan kan phawrh leh ta țhin a nia, engtiangin nge mi thinlung kan tihnat thar leh tih lam rêng kan dâwn chang lo țhìn.

Michael-a'n a hnek zàn ațang khân mumal takin Damon-a ka hmu tawh lo. School-a 'A lo kal' an tih nî pawh hian a hmel ka hmu ve ngai lo, school tuala a car inhûng erawh ka hmu zauh zauh, vawi khat erawh chu car-a a lût tùr a tukkhum lam ka hmu zawk, chy pawh vawi khatchauh, chuti chung chung pawh chuan ka thin a phu nasa leh viau tho, a tukkhum lam ringawt pawh hian keimahah effect a nei lian viau chu a ni tak si a...

Staff room-ah a rawn lang ngai tawh lo va, a zak deuh nge ni ang aw ka ti ru țhin, amah hnektupa lah hian a hneka chanchin lam hi vawi khat tê pawh a sawi chhuak leh tawh ngai bawk si lo nèn, a reh tlawk tlawk ni berin ka hria. Ka hmuh loh vang vang hi chuan ka hmu leh châk thut țhin; mahse, hmu dâwn ta chiah ila, ka huphurh ngawt ang! Hmu châk si, huphurh bawk siin ka awm. A la chhe lo reng àwm si a, tûnlai tak hian tu hmeichhia nge a kawp leh tâk ang? Ka laka a chêt dàn avàng khân a inthiam lo ve deuh ang em? Chuvàngin em ni ka hmuha a rawn inlan ngai tâk loh le?

Thil thlen țantirh lam kha chuan Michael-a chuan zirtîrtu hna chu bànsan a tum ut ut a; mahse, ka thiam ang tâwkin ka chelhin ka ngèn ve a, bànsan lo tùrin ka thlêm ve nasa bawk. Keimah vàng chauha bànsan lo a ni chu ka ti dawt ngam lo nain ka ngenna chuan awmzia a nei ve tho chuan ka hria, a bànsan lo chu ka lãwm êm êm a ni. Han ti deuh pùng púng țhin mah se a rilru hi a chhe lo a ni tih ka hre chiang ve tawh bawk a, a tihtauh ve deuh châng leh a lungawi loh deuh châng pawh hian dawhthei takin, zaidam takin ka chhàwn zêl a, a titàu rei hlei thei bîk lo.

Krismas a hnai ve tawh a, rilru pawhin Bethlehem lam a hawi ruih tawh mai. Kumin chu hunpui laiin kohhran lamah chanvo kan nei dâwn lo bawk a, Sti nèn pawh kan inrawt phûr nasa  tawh mai. Hmân ațanga kan lo tum ve tawh a nia, 'Pawisa kan khâwl tam ve deuh hunah zin ang' tiin, tam tak chu khâwl hman lo mah ila kan mamawh tâwk tùr chu khâwl hmanah kan inngai. Zin kan tum thu chu ka pa pawh ka hrilh tawh a, ani pawhin a lo phal ve mai bawk a, kumn dang ang chu ni se a phalin ka ring meuh lo, 'chance' neih a duh vàng a nih ka ring.

"Khawiah maw in zin dâwn a?" a tih chuan en vat pah hian," Engtin nge kan zin dâwn tih i hriat? Nang hi min lo ngaithla ru a ni lo maw?" ka ti a. A ni lah tak a, Sti leh a chhúngte leh kei leh ka pate tih loh chuan zin kan tum thu an hriat ka ring lo a ni; mahse, hei, a lo hre tlat.

"Mai mai a, ngaihthlâk rûk kher i ngai lo, thil hi chu ka hre ve thei alawm, beng pahnih ka neih hi, khawi hmunah maw in zin dâwn a?" a lo ti leh thung a, a nui pah sûng a.

"Hun ãwl neih lai tiin Bangalore lamah zinkhawthawn kan tum deuh mai mai maw le, lo kal ve i tum êm lo ang chu maw?" ka tih chuan a hmui a lo tipawrh a, chutah, hawi deuh hmakin," Sual viau lo teh, min sâwm ve zâwk tùr hi i ni asin le, țhian min phatsan duh ania," a ti bul bul a.

"Mipa zinpui kan duh lo alawm."

A hmela ka thil sawi a âwih lohzia tilang chung leh tûm deuh hmak chung chuan," A lo nih tak chu! Thil țha deuh min lo hawn thei tihna a ni mai," a ti deuh hmak a, a nui duh lo der kual vêl leh a tûm hmak hmêl chuan ka nuih a tiza ngang mai. Hetiang hmel put hi a inhmeh ve  hlawl si lo va, a laka inthlahrung deuh dâk tùr ka nih àwm vei nèn, ka nuih a tiza tlat zâwk.

Kan zin ta ngei a, keimahni ang thoa khualzin pawh an lo tam khawp mai. Sti nuteite inah kan thleng a, thlen loh tum theih pawh a ni lo, kan pahnih chauha hmun danga thlen an phal thei lo a ni. Kan inhmu khâwm chu kan hlim lai lai bawk a, kan thãwm pawh a na angreng viau mai; mahse, mi tân harsatna kan thlen chuang lo va, pawi miah lo.

Sti patea(a nutei pasal) hian Bangalore-ah hna a thawk a, an chhûngkuain an khawsa a ni, an fateah nula leh tlangvâl awmin an naute phìr erawh an la tê deuh hlek a, an chhang a khât ve khawp chuan ka hria. Bangalore-ah hian vawi hnih chauh kan la kal avàngin kan la mikhual viau a, chuvàngin kan chhuah duhna lamah pawh an fanu, kan rualpui Chdi'n min hruai kual dâwn a ni, Sti patea ruahman a ni a, kan han hnial deuh nain Chdi ber chuan chhuah kual chu a lo châk ve tho bawk si a, kan hnial duh bîk lo.

Krismas niah chuan kan inkhâwm ve a, inkhâwm pawh kan țha khawpin ka hria. Hmel hriat kan nei lêm lo nain Mizo awmte an fel hlawm a, min be siam siam hlawm a, kan mikhual rùn bîk ta lo.

Hmun hrang hrangah kan kal kual a, Sti pek chuan thlalâk a'n uar khawp a, che hlek ila," Khawi maw, selfie lawk ang u," a ti deuh reng mai a, Chdi phei chuan a nuih nasa thei khawp mai. A phone memory a hek ve khawpin ka ring, Chdi nèn kan lang tam ve dáwn tho tih ka hria a, ka duh hunah ka inthawntîr mai thei dâwn tho a, chuvàng chuan ka hmet ve peih lo.

"Pa, Pa Zika fapa Mapuia birthday kha an làwm dâwn a, min sàwm ve kha aw, kan chhûngin," Chdi'n chaw ei laia a tih chuan a pa chuan," E, chutia min sàwm techuan kan kal vek mai ang chu," a lo ti awlsam thên mai a, Nutei (Sti koh dàn angin ka ko ve mai)chuan," Ni dáwn tak e, tukin lamah pawh khân min rawn hrilh tawh alawm, ka sawi ang ka tia, ka lo mangnghilh leh daih tawh niin," a lo ti ve chuar chuar a.

Sti nèn chuan kal tumna rilru pawh kan nei ve lo a nia; mahse, Patea'n a phal tlat si lo, kal vek a rawt tlat a, kan hnial ngam leh si lo nèn, phûr fahran lo chuan insiam sawk sawkin an rual chuan kan kal ve ta a. Lawm pui viau an tum a ni ang, an inah pawh làwm lovin mi nâwlpuite hawh theih chi hall-ah an làwm dâwn a, a hmun kan va thlen chuan mi pawh an lo awm nual tawh a, an nalh hlawm viau bawk. 

Sti chu ka melh ralh a, ani pawh chuan min lo melh ve ralh tho. Kan incheina a simple-in kan nalh vak si lo va, mi an lo nalh hlawm si nèn, a inthlahrunawm duh khawp mai; mahse, ka rilruin ka  inthiam ru mawlh mawlh a, keini chu mikhual mai kan nia, kan peih lo chunga kal kan nih bâkah birthday lawmnaah kan kal ngai lo va, an thuamhnaw hâk ang tam zâwk phei hi chu keini pahnih hi chuan hâk pawh kan ha thiam lo ang tih tùr khawpa maksakte an ni hlawm a, tuna kan inthuam dàn hi chëtpui a nuamin a hahdam zaih mai a, mi dang inthuam dàn hi chu mawi taka phuar ang reng an ni dâwn a ni, an awhawm lo êm mai tiin ka inthiam chawp a ni.

Kei aiin Sti hi a kâwlhrâwng a, hun rei a ngai lo, a leng leh halh tawh mai, hmel hriat loh hlîr mai ni hlawm mah se, titipui tùr a chhar chhuak leh thuaiin, a hnuah phei chuan a lâm ve dâwrh dâwrh hial mai, kei chu lâm su dual dual bulah pawh awm peih lovin ka kal sawn deuh a, țhutna panin ka țhu chàwl vang vang ta zâwk a.

"Lâm dùn ila, Bawihi?"

Min rawn betupa chu ka en chho vat a, a lo nui sâng mai. Ka hmel hriat a ni lo va, ani pawhin min hmuh vawi khatna tho a niin ka ring.

"Làm chu?" tiin a kut chu a rawn phar chhuak a, ka làm ngai loh avàng leh tu nge a nih ka hriat loh avàngin làmpui ka tum lo.

"A pawi hle mai, ka lâm ngai lo va, min hre thiam rawh," ka tih chuan a nui ta hawk a, "Khawiah nge i lo awm  bîk țhin a? Lâm ngai lo nula, hetiang birthday party-a i kal hi chuan lâm ngei tùra ngaih i ni asin, changkâng lo lutuk!" tiin a phun zui nghâl a, a thaw rim ațang chuan a lem hlek a ni tih hriain ka ner  deuh sak a, chutah," Làm chu ka lo zirtîr ang che," tiin ka kut chu a rawn man thut a, țhutna ațang chuan min pawt tho pah nghâl  bawk a, țanna hman pawh a awm lo; mahse, min pawh din hnu chuan ka tãl ve ta phat a.

"Ka duh lo, min-"

"Honey... Ka rawn lêt har deuh hlek a, min hre thiam hrâm rawh, hei, tu nge ni a?" tiin tu emaw hian ka kâwngah a rawn kuah nghâl a, a aw ațang chuan tu nge a nih ka hre chiang khawp mai, ka hai thei ngai lo ang.

"Țhianpa, tu nge i nih a?" tiin min pawt thotu chuan rum zet hian Damon-a chu a melh ta khui mai a, min la thlah lo, Damon-a chuan,"I țhianpa ka nih ka ring lo. Chuan, ka nula hruai a nih hi, thlah nghâl rawh, i nula hruai làmpui ve mai ta che," a lo ti ve thung a, a aw chhuak no lo zet mai chuan min timûr ar ar thei hialin ka hria. 

Phun deuh nung nung hian ka kut a chelhna chu a thlah ve mai a, muangchâng  hian a kal sawn ta nghâl bawk a, Damon-a a ngam lo deuh hlek chu a ni, ani hi rawn inrawlh lo ta se, ka duh lo chung chu min làmpui mai ang em?...

"Ka làmpui thei che 'ngem, please?"

Ka phu deuh dâwrh maiin ka hria! Hawi chhuakin a hmel chu ka en vat a, min nuihzat hmel a pu lo va, titak

hmel puin min en lo chhuk ve rùn a.

"Ka lâm ngai lo, chuan, min thlah thei tawh ang, ka lâwm e," ka lo ti nuai thung a, ka thil sawi teh nuai chu, a rawn inrawlh avàngin làwmthu ka hrilh a, ka kâwng a kuahna chu min thlah tùrin ka duh bawk a, ka làm ngai loh thu ka hrilh bawk, a inzawm lo hlawm kher mai.

Ani erawh chuan,"Engtin mah ka ti lo ang che, min hlau suh, kha pa lak ațanga ka chhan che avàng erawh kha chuan vawi khat chauh tal chu làmpui che ka phûin ka hria," a lo ti thung a, ka kâwng a kuahna pawh a thlah chuang lo.

"Ka lâm ngai lo," ka tih leh chuan," Ho mai mai, ka lâm ngai bîk lo," tih leh a kut lehlama ka kut rawn chelh rualin làmna lam pan chuan min vir pheipui ta nghâl a, hnial hman pawh a ni lo. Ka zah avàng chuan hawi pawh ka hawi chhuak ngam lo va, a âwm chu ka bih ngar ringawt. Miin min en țhupin ka ring deuh ngawt a, làmpui ngaihna ka hre lo, min chêtpui ang ang chuan ka awm ringawt.

"A har lo, heti zawng hi a ni mai," tiin min sûkpui zêl a, ka țang deuh țùng nain a tih dàn ang chuan ka awm ve zêl tho a, a hnu deuha," Ka pi in chunga i laka ka awm dàn avàng khân min la hua em?" a rawn tih tâkah chuan ka hawi chhuak ta vat a.

Min rawn en chhuk ve kur a, rei en lovin ka hawi sawn leh ta daih a, ka zahna avàng chuan lum ka ti up up maiin ka hria.

"I huat thu ka sawi a nih chuan min bêng pawp mai rawh; mahse, ka rilru erawh a thlâk thei chuang lo ang, ka duh che ka tih kha, kha kha thu dik a ni, khami zàna ka chêt dàn pawh kha chhuanawm viau lo mah se khatiang khân chêt ka la châk reng tho," a rawn tih leh phei chuan zahna avàngin ka bîng mum mum mai. Ani lah hi a zak ve dèr mai si lo, a thu sawi mi dangin an rawn hre pha ve thei lo erawh ka lâwm khawp mai, hre thei ta se, a zahthlâk dâwn lutuk si a!

Mi zîngah ka bêng dâwn lo tih a hriat sa vàng a ni ngei ang' min bêng pawp mai rawh' a tih ni. A che ngeiawm thiam ve chiang êm asin.

"Helaia hmuh che hi ka inring miah lo-" a tih lai chuan," Eng nge i tih ve zãwk a?" ka lo ti a, kan pahnih inkâr hi sawi loha thil dang sawi daih ka duh, a remchâng viauin ka hre bawk.

"Hei, U Zika, Mapuia pa hi ka țhian a nia, ka awm remchàn lai niin min sâwm ve a," a tih chuan za lo zet hian a rûkin lang lo lamah ka nui a, a upa roh tawh viau si a, kan rualpuite pawhin 'Pa zîka' an tih laiin ani hi chuan 'U Zika' a ti deuh kher si a, a inla senior leh lutuk chu ka haw lek lek a ni.

"Sti nèn chauh khân em ni in kal a?"a tih leh chuan," Ni lo, Sti nuteite chhûngkua pawh an tel," ka lo ti vat a, Sti pawh a lo hmu daih tawh a ni tih hriat reng, an lo inbe daih tawh hial lo'ng maw?

"Ni lo, Aizawl ațangin a nia ka tih," a tih chuan chhâng lovin ka bu nghat ringawt a, chutah, ka hawi chhuak zawk chuan Sti'n lâm paha a bân a rawn vai chu ka va hmu fuh ta nghâl a, ka hawi lêt ta vat mai. Haw hunah thil min zâwt nasa leh dâwn lutuk, kan muhìl har leh ngawt ang chu.

*BEISEINA HIAN ZÀN THIM BER PAWH HI CHHÙN ÊNG NUAM TAKAH A CHANTÎR THEI ȚHÌN*