☆HLWILY☆ - 11 By Dingdi Pachuau

 ☆HLWILY☆ - 11 By Dingdi Pachuau

Thlah haw min tum nain ka hnial tlat a, min hruai chhuah vàng chu ni ta se chuan ka hnial lo ang; mahse, kalpuite ka nei a, kan haw tlâng leh dial ang chu, bâkah, kan thlenna hre kher lo se ka duh.

Ka rin ang chiah. Zàna kan han mu tùr chu," Le, engtin nge in lo inhmuh chhuah nalh theih le? Ni lo, nang hi, kan zin dâwn tih i lo hrilh a ni maw?" a rawn ti ta chiah mai, kan haw kawng tluan khân a ngawi reng thei ka ti rêng a, in thlen hnuah pawh Damon-a chungchãng lam rêng rêng a sawi chhuak lo a nih kha, sawi chhuah dàn tùr a lo ngaihtuah char char a ni ngei ang chu.

"Teuh lo mai! Zanina ka hmu thut kha kei pawhin mak ka ti ve rêng asin," tia ka chhàn chuan âwih lo tih hriat tak hian min en a, chu chu ka hmuh chuan," Engah nge maw min âwih loh ngawt le? Ka pa leh Michael-a bâk ka hrilh lo," ka ti  țha leh a.

"Hrilh pawh ni la engtin mah ka ti dâwn lo che," tiin a nui ta var var a, chutah," In lâm thiam dùn khawp mai," a ti zui zat bawk a, kei chuan rang fahran hian," Ngawi hmãwn rawh!" ka lo ti țhat a, chu chuan a nuih a tiza zual sauh a, khum bêng  meuh chuan a nui tak awr awr a, tihngaihna hre lovin ngei deuhin ka melh ringawt a!

"A bulah chuan hma i sâwn khawp e," a nuihza zualpui a reh tâk hnu chuan a ti leh a, kei erawh chuan," Han țang tùrin hun min pe tlat lo a ni, ka lâm ngai lo tih chu i hriat kha," ka lo ti leh a, khum lu lamah chuan țhuin ka bân chu ka tuai hoh hoh a.

"Ngaihzâwng i neih theih miah loh chhan a ni tih inhre ta se, mak a ti ve ngawtin ka ring, kan try dâwn chhin em niang?" a rawn tih leh chuan râpthlâk ti deuh hian ka melh hrãwk a, ani lah chuan," Khatiang khân min melh hrê hrû suh, i duh reng tho a, in inkawp rem theih chuan hlêp hlang a ni mai dâwn asin, a hausak hmel bawk si," a lo ti leh a.

"Duh tâwk teh!" ka tih țhat lai chuan," Sawi dik loh ka nei lo, a duh che a, nang pawhin i duh a, i duh thu hrilh mai la, a fel vek a ni mai. Hetia induh kual vêl lo hian...A, in chapo dùnin in induhtâwk dùn si, ka ning," a ti ta hlak hlak a.

Kan mut tak tak hnuah pawh chuan ka muhìl thei lawk lo va, Sti thil sawi 'In chapo dùnin in induhtâwk dùn si'  a tih chuan ka rilru a luah a ni. Ka chapo vàng em ni le? Damon-a hian min duh thu kha chu a sawi tawh ngei 

mai a; mahse, a nungchang leh awm dànte hi, dik tak chuan hmân ațanga ka lo duh tawh leh ka vei ngawih ngawih țhin niin min duh thu sawi mah se, rin ngam a har ka ti a ni. A lêrhin a luck si, hmeichhia a kawp zut a, a unaupa bialnu hial pawh a mutpui duh a nia! A thuhrimah, a hmeichhe kawp, a duh zâwngte nèn kan inang hek lo, pâwn lam lan dàn chu thuhran...A, a  kawp duh chi ka ni mawlh lo. A thu sawi kha rin ngam har deuh mai asin, tunah hian nihpui dâwn ta chiah ila,  amahah hian ka innghat ngam tak tak ang em? Ka ring thei ang em? Chu chu ka ngaihtuah lo thei lo, chuvàng tak chuan min duh thu min hrilh pawh khân a lakah ka rilru ka sawi lang ve ngam lo a ni, rei lo te inkawpa ințhen leh mai mai kha ka duh zâwng a ni ve dâwn si lo. Ka duh thu ka sawi ve duh loh chhan chu ka chapo vàng tihna em ni dâwn ta?

A tûk zànah chuan mak tak maiin Chdite inah chuan Damon-a a rawn lang nawlh mai,  mak ka tihzia mai chuh! Biak nachâng pawh ka hriat loh lai chuan Sti a lo bengvâr hlauh a, lo biain a lo welcome țha hle a, a titipui nghâl bawrh bawrh a, mi dang pawh chuan an be ve bawrh bawrh  tho, an lo hre sa ve tho a ni ang,  keimah ber chuan biak nachâng ka lo hre lo. Rei tak a lêng bîk lo va, a haw hnuah chuan an titi mam mam a, an thil sawi dàn ațang chuan Damon-a chu an hriat ngai mi a lo ni miah lo tih ka hre ve chauh, an hmel hriat sa ang mai khân an be bawrh bawrh si a, mak ka ti khawp mai, kan awmna lah a rawn hre chat bawk si.

Mahse, vawiin lamah khân Sti nèn an lo inbia a ni àwm e, Sti sawi leh dànin.  Engtin nge maw a phone number te a lo neih theih ni? Ani lah chuan min fiam zãrh zãrh reng a.

"I awm dàn ațang khân i rilru a hre sa vek ang! Zanina i awm dàn dêk dûk ang kha chuan awm tawh suh ang che, lo awm lo phei ila chuan i mualpho ringawt dâwn asin, zei ve deuh teh, ngaihzâwng neih ngai loh pawina a nih kha," a ti zãrh zãrh a, a thu sawi tàwp ber chu engah mah ngai duh lo hian," Zei viau kher a ngai lo, mipain nupui atân an duh lo," ka ti ve thung a, sawi chhuak fuh ka inti kher mai, chutiang chuan kan thawhpui mipate'n an sawi țhìn si a.

"Khawi lam tlangvâl luck lo thu sawi nge maw i lo hriat ve ni?" a tih chuan ka nui sak a," Ka sawi dik i ti viau lo maw? Zei deuh an nih chuan an ti țhangin an practice ngun viau tawh tihna a ni si a, ti ngai lo tân chuan zei viau theih ni hek lo le, nang pawh, i zei viau chuan pasal tùr i hmu lo mai ang, an hlau mai ang che, chuvàng chuan keimahah chuan ngaihțha takin awm rawh, nakinah chuan min la rawn pan sup sup mai ang," ka ti a, ka nui var var zui a.

"Mu mai teh, Zei-lo-lian." Min chhàn ngaihna a hre ta bîk lo a ni chiang, ka țawngkam avànga a dang ve tih hriat chu nuam deuh mai a ni.

Damon-ate nèn chuan kan haw tlâng lo, kan haw hun tùr nî a hria a, kan haw hma chiah nîah a haw daih. A chêt dàn hi ka hre thiam lo, min duh niin a insawi a, Bangalore-a kan thlenna in address a hre bawk, chuti chung chuan zan khat bâk kha a rawn lêng lo va, chhùn lamah ni se kan hmu ngai hek lo. A țawngkam chiahin min duh a niang, nge, a rin anga ka pâk huam loh avàngin ani ang, inla pà ve tak leh luck zet chu a chaponain a ur thlu ta ni ang? Pawi lo, ka hlêp lo va, ka hloh lo bawk tihna.

In ka thlen tûk zîngah tûkțhuan kan ei kham, hmun ka tihfel lai chuan ka bulah ka pa chu rawn kal hnaiin," Bawihte, thil sawipui che ka duh a, i tihfel zawhah room lamah min rawn hmu rawh aw," a ti a, office an la kài bîk loh avàngin ni tin ina awm chu a hna a ni rih.

Hmun ka tihfel hnu chuan ka room-ah lût leh zawkin chumi hnuah chuan ka pa room chu ka pan ve ta chauh a, tukverh bulah lo dingin pâwn lam chu a lo thlîr vang vang a; mahse, ka lût tih a lo hriat chuan rawn inherin min lo nuih sak a, khumah chuan ka țhu mai a, ani erawh chu rawn țhu ve ta lo chuan min hmachhawnin a rawn ding hnai a.

"I rin loh lam daih a ni maithei a," tiin bul a han țan phawt a, mit pawh khap lo chuan ka lo en reng a, a thil sawi tùr àwm ang chu rin sa ka nei thei mai si a. Chutah, sawi zawm lehin thutak zet hian," I nu Mawii nèn hian kan induh a, nupui atân hial pawh ka duh a ni, nu i mamawh ve tho a, chutiangin kei pawhin, kum kha leh chen nupui nei lovin, nu nei lovin kan awm dùn a, nu i mamawh êm êm laia nu ka hmuhsak mai loh vàng che erawh kha chuan min dem loh hrâm ka beisei, a chhan chu i nu dinhmun kha luah zo lo mah ila ka theih tâwpa țha leh duatin ka enkawl che a ni. Kum upat tawh lama hetia duh ka han nei ta mai hi zahthlâk i tiin i rilrem loh zâwng tak a ni ang tih chu ka hlau ru khawp mai a; mahse, ka fanu duat i ni a, ka dinhmun hre thiam bertu i ni bawk, min hnial duh pawh ka ring lo bawk a ni," a ti ta dap dap mai le!

Ka ngawi reng a, chhàn mai ngaihna ka hre lo, ka lo rin țhin dàn chu a dik chiang ta a, hetia a sawi chhuah hun hi ka lo nghâk reng nain a sawi chhuah tâkah erawh min dêng dawt tho. Nu Mawii hi fel lo ka ti pawh a ni lo, hun hrehawmah leh harsat lai pawha kan chhúngkua min enkawl chho ngar ngartu a ni; mahse, a nihna dik takah chuan kan awmpuinu a ni a, kan awmpuinu ka pa nupui a han ni ta ringawt mai tùr chu, mi min ngaih dàn tùr ka ngaihtuahnaah a lo lût hmasa leh ber lo thei lo. A zahthlâk dâwn êm asin, hnunglamah min sawi zui sep sep ang a...

"I nu Mawii hi kan hriat chian tak chu ni lo se chuan i nu atâna neih kher pawh ka tum chuang lo; mahse, kan chhûngkua min enkawltu, kan hma ngai êm êmtu leh kan harsat lai ber pawha min kalsan duh lova min awmpui țàng țángtu a ni a, nu ber dinhmun a hauh tlat vànga awm reng ni lovin min kalsan duh lova awm a ni, nang pawhin nu ang tluk hialin i en țhìn a nih kha."

Ka pa thil sawi avàng chuan khumah  pawh muhìl thei lo chuan ka let ka let a, rilru mumal ka pu thei lo. Ka u hian a hre ve tawh ang em? Ka pa hian min hrilh hmasak zâwk ngei ka ring a, chuti a nih chuan a la hrilh lo maithei, ka va hrilh ve dâwn em niang? Va hrilh ta ringawt ila a rilru ka tihhrehawm phah mai mai lo ang maw?

A muthilh daih tawh chu ka ring tho nain ka va text ta tho a, naktûka a chhiar pawhin a pawi chuang lo, ka rilru a tâwt si a, inpaih thàwl ka mamawh tlat a ni.

Zînga ka thawh chuan Nu Mawii a lo tho leh diam tawh a, ka tho hma lutuk lo nain Nu Mawii hi chu a tho hma thei ve hrim hrim. Rawng a lo bâwl malh malh a, min hmuh chuan min lo be nghál siam siam a, ka laka a awm dàn leh min biak dàn chu a danglam phah pawhin ka hre lo, keimahi hi a ni danglam ta ber chu, ka chhâng lêt țâwk a ni ber mai; mahse, a pângngai thei ang berin lan ka tum ve fan tho.

Ka pa lo thawh hmain Nu Mawii hnênah chuan ka u thil ka hawnsak pêk ka tum avàngin ka chhuak dâwn tih ka hrilh a, pêk ka tum tho nain Sti bula kal phawt ka duh a ni. Ani pawh chuan," Ni e, in inhmu khât si a, a lo lãwm ngawt ang, va chhuak rawh khai," a lo ti a, Stite inah chaw ka ei ang a, chaw ei khamah ka ute inah min kalpui tùrin ka sâwm nghál ang chu.

Ka text sa tawh avàngin a lo tho ve tawh a, min lo hmu hmasa bertu a nu chuan min lo chiauau hlut a, çoffee min lo siamsak nghâl avàng chuan ka hnial hman lo, Sti chuan," Ka thawh  hma phah vang vang che aw, thil țûl leh pawimawh tak min sawipui duh a nih ka ring nghâl mai a, hawh, ka room lamah coffee in pahin han titi ang hmiang," tiin a room lam chu min panpui ta nghâl a.

Nizàn lama ka pa thil sawi chu ka hrilh ve nghâl malh malh a, ani leh ni lo ang takin ka țawng chhûng chuan lo inrawlh miah lovin a lo ngawi ve kar mai! Ka sawi chhûng chuan ka thil sawi ngaihtuah mûk tih hriat takin hian a melh ngai chu melhin a mit chu a khap leh sak sak țhìn a.

Ka sawi zawh chuan a ngawi reng rih phawt a, țawng lehin," Nupui a neih leh hi ka duh lo pawh a ni hran lo; mahse, Nu Mawii ber kher hi chu,'ka nu' theiin ka ring lo a ni," ka ti leh a, ani pawh lo țawng chhuak ve tain," I nu Mawii i duh loh chhan chu ka hriat thiampui reng  tho mai che; 'Nu' tia koh phei chu a har ngawt ang, a țantìrah chuan," a ti dap dap  a, lo inrawlh vatin," Chu rêng, ka pa nupui ni ve si, mãwl biak ringawt chu a tihchi hauh loh ang, 'Nu Mawi' tih lah a dik tawh dâwn bawk si lo. Chu zawng ai chuan, miin kan hnunglama min sawi zui tùr ka ngai ngam lo a ni," ka lo ti leh a.

"A, an sawi zui che u a nih pawhin an sawi rei peih teuh lo ang che u, bâkah, mi sawi tih mai maite chu chhuanlam pawh a tling lo, kâr hnih khat chu an sawi mahna che u, chu aia rei an sawi peih lo ang," a lo ti thung a, chutah, sawi zawm lehin," I ngaihtuah atâna ka duh chu maw, i pa hmalam hun hi a ni, nang hian i awmpui reng thei dâwn lo, pasalte i la nei duh ve ang a, chutih hunah chuan i pa chu tuin nge enkawl ta ang? Ni lo, min lo tibuai rih suh, ka sawi zo phawt ang," tiin țawng tuma ka lo âng zuau zuau chu min khap leh rih phawt a, chutah, sawi zawm lehin," Mâkpa chhûngkhunga pasal i nei a nih ngawt loh chuan, i pa tãn hian nupui neih leh hi a țha a ni, ka țhian i ni a, ka hmangaih chein i pa pawh ka ngaihtuahpui che a ni, hemi kawngah hi chuan i pa lamah ka țang tlat, nupui nei leh se tih hi ka duh tlat a nih chu," a ti leh duah a.

Chutiang chiah chuan ka u pawh chuan rilru a lo pu ve a," Mâte, ka pain a duat dáwn ta lo chein a ngaihsak lo sawt ang che tihna a ni lo, a dam loh leh theih loh nikhuaa amah enkawltu a neih pawh a ngai ve alawm," a tih chuan," Keimah ka awm reng alawm," ka lo ti vat a, nui hmel pu deuh pah hian a lu a thing nar nar a.

"Chutiang a ni ngawt thei lo alawm, nakinah pasal a chhia a țha i hmuh ve hunah amah chauh chuan a ngaihtuahawm dâwn asin," a tih lai chuan lo inrawlh vatin," Chutiang chuan sawi ve ziah lo teh u, pasal ka nei lo tawp anga ni mai alawm, bâkak, mâkpa chhûngkhung pawhin a theih a," ka ti țhat a, ani erawh chu a rawn nui chhuak ta hak hak thung a.

"A, ka naute hi, ka naute kha i la ni reng a nia. Mâkpa chhûngkhung lam kha chu sawi lo ang," a ti phawt a, chutah, thutak deuh zâwk hian," Heti chen ka pa hian nupui nei tawh lovin min enkawl tawh a, kan puitling ve ve a, kei phei chuan hei pasal ka nei daih tawh nghe nghe a, nang lah nula hlawh nei, mahni inchãwm thei i ni tawh bawk nèn, ka pain Nu Mawii a neih chu remtihpui mai la? A naute duat kha i la ni reng dâwn tho alawm," tiin min rawn en a, a mitmenga tih takzeta min ngenna chu ka hmu thiam ve tho.

Scooty ka ken chhuah loh avàngin kein ka haw hnang hnang a, Sti khân  min kalpui thei ta si lo va, mahni chauha ka han kal hnak hnak mai chu ka inkhawngaih rilru khawp mai. Tihian, min ngaihtuahtu leh min ngaihsaka min duattu ka neihchhun ber ka pain nupui min neihsan chuan min ngaihtuahtu nei tawh lovin ka thênna lamah ka thên ka thên tawh mai dâwn si a, ka ngaihsakna lam a phût tawh dâwn bawk si lo.

Ka hah avàngin chàwl turin dàwrah ka lût rih a, ka ril a țâm lêm lo nain eng mah lam lova țhut ve ringawt a tih chi loh avàngin in tùr ka han lam a, ka nghah chhûngin ka phone chu la chhuakin ka khawih ve ta rih a.

"Nula induh! I rawn haw hnuah pawh min be duh lo va," tiin ka bulah tu emaw hi a rawn țhu ve nghâl a, en loh pawhin tu nge tih hre tho mah ila ka en chho ta vat tho a.

"Min zui ru a ni maw?" 

Nui hawk hawk chung hian," Nula hmel țha awmna hi chu ka hre chat thei alawm, maimichhîng chung pawhin i awmna chu ka rawn hre chat chat zêl thei zêl ang chu," inti țawngkam thiam zet hian a lo ti a, ner deuh nâng hian ka en a, ani erawh chu a nui sûng thung a.

Kan țhut deuh reng hnu chuan,"I mood a off, on a ngai tlat, eng thil nge tih i duh?" tiin ngun zet hian hnai zetah min en a, chutia min rawn en hnãi lutuk chu nuam ka ti lo va, hawi sawnin," Mood off chângte chu a awm ve bawk ang chu, mihring ka ni ve miau a," ka ti a, a lam ka hawi  hnuah erawh chuan ka nui lui sâng a.

"Chawhnu lam chu ka hman ve tawh bawk a, in ina rawn lèna i thil min rawn hawn rawn lam paha rawn lèn ka tum a; mahse, hei ka hmu fuh ta hlauh mai che a, a tihzia khawp mai, rawn țhâwn buai che ngai lovin, i ke i keng em?" a ti nghâl vat vat a, kei chuan," Ken loh țum tak," ka lo ti a.

"A țhat hlauh chu, ka phur châk che alawm, nula hmel țha phurh a khât bawk si a," nui vur vur chunga a tih chuan,"I ninawm, ka hawn leh lo mai ang che aw," ka ti ve khar khar a.

Kan ei man pea kan chhuah hnu chuan," Vawiin chu Bike ni lova car ka han keng chhuak kher kher chu pawi ka ti takzet a ni, Bike-a han phurh vâwk vâwk che ka châk asin le..." a ti vang vang a, ka nui hak hak a.

"A va mak àwm váwk váwk ve! Kei atân chuan car i keng hlauh chu ka làwmthu a ni e, min hmu hauh lo tùrte hian min lo hmu rêu rêu anga, insawi fiah vak te hi a ngai palh ang," ka ti a, ani lah chuan rang zet hian," Chutiang an awm ang tih pawh ka lo hre hleinem, nia, insawi fiah vak i ngaih palh tâkin, lût nghâl mai rawh le," tiin a car kawngkhàr chu ka luh nân a hawng ta nghâl a.

Eng eng emaw a sawi a, ka mood chhe lutuk pawh a zia leh ta e, hei tak hi Michael-a bula awm nuam ka tih chhan a ni țhìn. Min fiam a, min chhaih a, min tinui a, amah a nui duh bawk nèn, nun hi a tizângkhai thei țhìn viau a ni.

Inah pawh ka pa a titipui leh bawrh bawrh a, ka che lài tùr leh ka dangâwk tùr pawh a tibo hmiah thei nia, kan inhmu lo ang tih ka hlau hnuhnawh ta khawp mai. Zanriah ei ve nghâl tùrin ka sâwm a, ka pa pawhin a lo sâwm ngawrh ve viau bawk a, ka pa sàwm meuh chu hnial a hreh ve deuh a ni ang, 'aw' min pawh ve ta a. Ani a tel ve chuan chhûngkaw chungchâng kan titina tùr pawh ka pumpelh thei ngei ang.

Zanriah ei hma deuh chuan ka phone a rawn ri a, ngaihsak vak lo chuan ka han chhâng a; mahse, Damon-a aw ngei maiin," Zaninah ka rawn lêng dâwn, rawn ar nghal luh tawp duh lovin ka rawn hrilh lâwk che a nih chu," a rawn thùm deuh dût chuan ka phone chu ka en nawn leh ngat, number ringawt ațangin a ni a, amah a ni ang tih ka ngaihtuah pha lo rêng rêng.

Ka chhàn ve hmaa a dah daih avàng chuan insehruh țeuhin phone chu ka hmer ngawt ngawt a, he pa han nghalzia hi chu aw, a zak bawk si lo, engtia han tih chi nge maw ni le? Michael-a a awm ve bawk si, a rawn lèn chuan an inhmu ngei dâwn asin, engtin nge ni ta ang? 

"Siampui i ngai em?"

Michael-a a rawn lan tâkah chuan harh chhuakin nui sak chung hian," A ngai lo, lo țhu mai mai teh, ka pate kha lo va titipui leh rih rawh, ka siam zo thuai ang," ka ti vat a, thlèng lain chaw ei chu ka siam zui ta nghâl a.

Rilrua helhkam nei țûn chung chuan chaw chu ka ei a, ei pawh ka ei tam lo, Michael-a leh Damon-a an inhmu ngei dâwn si a, chu chu ka huphurh lâwk êm a ni. An inkâr boruak ka hre sa vek si, Michael-a'n min huat phah ang em? Nge a unaupa chungah, a hmuh hun hunah phubâ lain kut a thlâk ang? 

"I ril a țâm mang nange a?" Nu Mawii'n a rawn tih chuan ka hawi chhuak vat a, Michael-a leh ka pa pawhin min lo en ve chiah a, inthiam lo deuh hlek hian," Umm...dàwrah kan rawn chàwl a, ka la puar deuh a ni ang," ka ti ta ringawt a, Michael-a chu en lehin," Ei țeuh rawh aw," ka ti thung a, ka ei tam loh avàngin a puar lo ang tih ka hlau.

Chaw ei khama kan chaw eina thlèng vêl ka seng fel lai pawh chuan ka rilru a nuam thei tawh hauh lo. A rawn lang thut mai ang tih ka hlau a, Michael-a lahin haw thuai a tum hmel si loh, ka rilru a hrehawmin a hah ngawih ngawih maiin ka hria. Thâwk ka han la leh ringawt a, chutah," Ho êm mai, inhmu mah se, eng nge ni chuang ang? An inhmu ve palh a ni mai a, ka thiam loh pawh a ni dáwn hleinem, rilru hah chiam a țûl lo," tiin ka han inhnèm chawp a; mahse, rilru a nawm phah chuang dêr lo.

*KHAWVÊLAH HIAN MI CHAK LOTE TÂN THIL 'THEIH LOH' HI A VA TAM ȚHÌN ÊM! MAHSE, BEIDAWNG LOVA HMALAM PANA PÊN LUIH ȚÂLH ȚÂLH HI MI CHAK NIHNA CHU A LO NI MAI SI*