☆HLWILY☆ - 12 By Dingdi Pachuau

 ☆HLWILY☆ - 12 By Dingdi Pachuau

Thlèng ka sil zawh chuan ka pain chaw ei kham thingpui hâng a rawn lam leh hmain tiin no hnih ka thli chhuak a, Michael-a nèna an awmna lam chu panin ka va pe ta nghâl a. TV-a chanchin thar thlîr pah chuan an in a, kei pawh an bulah chuan ka țhu ve nghâl tho nain ka mawng ka hûng nghet thei mawlh lo, rilruin ngaihtuah dang a nei miau si a.

Michael-a phone a rawn ri dat dat a, thinphu dup dup chuan ka melh deuh hrâ a, Damon-a a nih mai ka lo hlau deuh a niang; mahse, a lo ni lo hlauh," Aw, nu?" tia Michael-a'n a chhàn chuan ka thaw deuh huai mai, ka pa pawhin TV volume chu a lo tizàwi ve bawk a.

An inbiak zawh chuan min rawn enin," Kimkim, ka haw thuai a ngai tlat mai, a hmanhmawhthlâk riau mai si a, a țhing pawh ka âwm hman dâwn lo a nih hi, thingpui hi ka in zo ang a, ka haw mai ang," a ti a, kei chuan," A pawi lo, zan dangah i lo lêng leh thei alawm, a pawimawh hmel sia, a țhing âwm tùr pawhin ka tiluilo mai ang che," nui chung hian ka lo ti a, a chhan a sawi lêm loh avàng chuan zawh ka tum bîk lo, ka pa pawh chuan," A nih tak chu, zan dang pawh a la awm zêl dáwn alawm," a lo ti ve bawk a. Michael-a chu a hmanhmawhthlâk ngang a ni ang, thingpui chu a in zo thuai thuai a, veranda thleng ka thlah a.

A tlàn liam thleng chu ka thlîr a, a pil hnu chuan pangpâr en kualin ka la ding khawmuang ta rih a, chutih lai chuan Damon-a car ngei mai chu  kan kawtah a rawn inhûng ve leh ta chiah mai, a car hi chu ka hai tawh bîk lo, Michael-a nèn an va inhmu teuh tak êm! Ka thaw huai thei. Car ațanga chhuaka  kan gate a rawn luh thleng chuan ka lo en reng a, a chhe lo lehpek kher asin, ka mit pawh ka la sawn thei lo a nih ber hi.

"Min lo hmuah kher chu ka phût ngam hauh lo nain ka lâwm khawp mai," a rawn tih chuan ka inhre chhuak chiah, ka hawi sawn ta nghâl bawk a, a sawi dàn takah lo hmuak ka nih duh hmel tak tak ka ti hnuhnawh. Michael-a'n chaw a rawn eia a haw ka thlah liam chiah a ni tih hre ta se chuan hetiang thu hi a sawi chhuak kherin ka ring lo.

Vànneihthlâk takin ka pa chu TV enin a lo la țhu hlauh mai a, kan pahnih chauhin kan țhu thei dâwn rih lo ve. Damon-a a hmuh chuan a lo hriat ve tawh avang chuan a lo be ve hlut a, TV en pah tho chuan an titi dùn a, kei chu țhu rei lovin Damon-a in tùr siam tùrin ka tho leh ta rih a.

Mahse, ka pa chu a țhu rei lo. A kal hnu chuan kan ngawi dùn ràn reng phawt a, kei phei chu ka țhu deuh ât a, ka inthlah dul thei lo, rilru lam lah chuti bawk. Chutia ngawih reng chu fuh ka ti bîk miah lo; mahse, han sawi mai tùr ka hre tlat lo a ni, ka inngaihtuah rauh rauh lai chuan a mipa zâwk chu țawng hmasaah a rawn țang ta a," In chhûngkua hi member in tlêm ve tho sia, i khua a har țhìn àwm mang e," tiin ka rin loh lam daih a rawn sawi chhuak a.

"Har hran chuang lo, têt tê ațanga ka țhan chhohpui a nia, han khawhar viau ngaihna pawh ka hre chuang lo," tiin ka lo chhâng a, a ni lah tak a, ka u a awm ve lai phei kha chuan tu mah dang ka ngai bîk lo. Ka nu ka ngai ti ila ka pain nu kan nei lo a ni tih hriat miah loh khawpa țhain min uapin min enkawl a, mi han awh ngawih ngawih ka nei bîk lo; mahse, ka u a han awm tâk lohah leh hetia ka pa leh Nu Mawii inkára thil a awm tâk hnuah hi chuan a rûk tak chuan ka khua a har ve ta deuh, unau mipa emaw hmeichhe pakhat tal emaw eng eng emaw ka sawipui theih tùr la nei ila chu ka ti ta viau a ni.

"Hmeichhia hi chuan thil han sawipui tùr hi in mamawh êm bîk a, chuvàng chuan a nia ka tih, ka naute pahnih pawh kha hmeichhia ve ve an ni bawk a, an inkàwm ngeihin sawi tùr apui hi an ngah thei si a, khatiang kha i ni ve tùrah ka lo ngai mai asin," min rawn melh rùn chung chuan a ti a.

"A dik reng mai, ka u la awm lai kha chuan keini pawh kan titiin ho tê tê kan sawi peih ve tho alawm, hmeichhe nihphung ve rêng a niang," ka tih chuan a nui chhuak hak a.

"Ka nu sawi dàn nèn a inang chiah. Ka naute pahnih lehkha zir tùr tìtî ka hauh lai khân 'Hmeichhia chuan eng eng emaw sawipui melh melh tùr țhian emaw unau emaw kan mamawh bîk alawm, hmeichhia leh mipa kan inang lo, hre thiam mai rawh' a ti ziah ţhìn," a ti ve leh a.

Chutiang mai mai chu sawiin kan titi a, kei pawh ka rin aiin ka țawng tam daih mai. A thutak rùn dâwn emaw tih laiin titi ho tê tê a sawi a, a hnu deuhah phei chuan ka taksa leh rilru thlah dulin ka nui hawk hawk thei ta hial mai, ka huphurh ang a ni miah lo.

TV kha ka off lêm lo va, kan titi chhûng chuan a lo in-play ve miah miah mai a, kan titi kârlakah kan en ve zawk zawk tho a, bâkah, laih lutuk dâlah ka duh ve rêng rêng a ni.

Mahse, kan titi chatlak laia kan en lai chuan Jason Statham leh Shu Qi chu an lo indût ţan ta mai, ka hmet sawn ngam tawh si lo, chu mai bâkah, amah va melh pawh ka ngam tawh lo,  che lovin ka țhu reng ringawt a, TV pawh ka en ngam tawh lo, chhuat lam enin ka melh hniam ngar ringawt.

"Infawh hi eng angin nge i ngaih?"

Chutiang inzawh te chu a! Ka chhâng duh teuh lo mai, ka țhiannu chu ni se chuan tlêmin a zia deuh mahna, mipa a ni a, chutah, mipaah pawh mipa chhe lo, zei, lêrh leh luck tak ka star êm êm a la ni zui.

Ka chhâng dâwn lo emaw ka ti hman tawh a; mahse, tlàwmah ka la deuh a, bâkah, ka chhâng ngam lo emaw a ti ang tih ka hlauh avàng chuan," Ngaih dàn ka nei lo," ka ti mãwl ta tawp a, ani lah chu a lo la nui hawk zui, mahni lo maha zahnâk laiin.

"Dik takin sawi ve mai la, mi ang pângngai nih chuan ngaih dàn a neih loh theih loh," tiin nui hmel la pu deuh chung chuan min rawn en a," Nula tlangvâl niha ngaihzâwng neih chuan thil thar a ni lo va, thil thleng ngei ngei tùr a ni bawk. Mi pahnih inkâra inthlâkhlelhna lan chhuahtîrna a nih bâkah a tua ve ve taksa leh rilru tân thil hrisêl tak a ni bawk asin," a ti leh duah a.

"A ni mahna!" ka ti sap ringawt a, hetiang lam hi chu sawipui ka châk lêm lo, ka bialpa pawh lo ni ta se hetiang lam kher sawipui hi chu ka zak tho ang. Bâkah, bialpa ka la nei ngai lo va, ka hmui pawh la virgin-in  tu mipa hmui mah ka la fâwp ngai lo a ni tih hrilh hriat kher erawh ka tum hauh lo.

Mahse, he pa hi a mak chu ka ti. A pi Birthday zàna min fawh a tum bâk kha hun fâl a hmuh pawhin a tum chhin tawh ngai lo, min duh thu chu a sawi, a zêp lo; mahse, a țûl a nih loh chuan kut hmâwr pawhin min tawk lo, lêrh leh dik lo riaua ka ngai hi ka lo ngai dik lo em ni aw ka tih phah rum rum tawh. A lo lêng zauh zauh a, ka pain min awmpui reng lo, kan pahniha kan awm dun pawhin min melh rùn rûn țhìn tih mai lohah hi chuan a nghal lo; mahse, a bialnu ka ni tlat lo va, chuvàng pawh chu a ni mahna le.

Sti leh ka uin ka ngaih dàn min țâwmpui loh avàngin ka pa leh Nu Mawii chanchin chu ka sawi chhuak ngai tawh lo va, ka pa pawhin a sawi chhuak tawh lêm lo; mahse, ka awm dànah hi chuan ka pawmpui lutuk lo a ni tih chu a hriat thiam tho ka ring, chutiangin Nu Mawii pawhin. Mi â an ni lo va, kei fing lo ber mai hian ka awm dàna ka thup thiam loh bâkah ka danglam tlat si a, anni puitling lehzual chuan an man thiam êm êm ang, chuvàng chuan ka pa pawh hian a sawi chhuak duh tawh lo a niang.

"I mood swing hi a nasa ve ngawt mai, i period țêp em ni?" Michael-a'n a rawn tih sar sar chuan," I lo hriat ve kher pawh a ngai lo," tiin lei ka chhuah khum a, a nui hawk hawk a.

"Thil eng emaw thleng a awm em? Min hrilh i duh chuan engtik lai pawhin i tân chuan ka inhawng a nia," thutak deuh zâwka a tih leh chuan," Hmeichhia hi chu, hriat thiam hi kan ngai a nia," ka ti ve leh a, ani pawh chuan," A dik alawm, hmeichhiaah min ngai la, rilru hrehawmna leh buainate i nei a nih phei chuan inbun ruah hi a țha ve a nia, khawiah mah a chhuak lo ang," a lo ti leh a.

Nia, ka țhian a nia, school-ah ni tina ka hmuh theih a ni bawk. Mipa mah ni se ka kàwm ngeih a, țawng duh viau mah se a kamtam lo bawk. A bialnu chu a la vànnei ngawt ang chu, mi hlim thei, mi hriat thiamna  ngah leh mi ngaihsak thiam tak a ni bawk si.

Kan chhûngkaw chanchin chu ka hrilh ta a, nia, inbun ruahna hi ka mamawh ve alawm, hmeichhia ka ni miau mai a, ani pawh chuan nui miah lo hian ngun zetin ka thu sawi chu a lo ngaithla ve kar a. Ka sawi zawh chuan," A nih tak chu, ka lo inrawlh vena tùr chu a awm hauh lo nain i tân chuan hriat thiam a har ve dáwn a nih chu, ka hriat thiampui khawp mai che," a ti dap dap a.

Ka thâwl deuh huaiin ka hria, eng tih theih nei lo mah se ka dinhmun min hriat thiampui tal a, ani ang, ka dinhmun hre thiam tùr hi ka mamawh rêng a ni.

"Nia, ka pa hian hmangaih takin min enkawl chho ngar ngar a, a hlimna hi ka duhpui, nupui pawh nei leh mah se pawi ka ti lo, a hlimna a nih dâwn phawt chuan; mahse, nupui a nei tê tê ang a, min mamawh lo thuai dâwn si a, chu chu ka duh lo a ni," ka ti sap sap a, chutah," A nupui chuan min duat lo anga min ning ang ka ti lo, ka pa zâwk chua nupui a neih chuan min ngai tawh lo ang a, a nupui thar chu a ngaiin a dah pawimawh hmasa ber tawh dâwn a ni," ka ti leh a.

A lu a bu nghat nghat a,"A dik alawm, kawppui an neih chuan an kawppui kha an dah pawimawh hmasak ber tùr a ni tawh a ni. Kei pawh hian ka duh tak nupui nei ta chiah ila ka chhûngte ka thlauhthlâk phah vek ang chu ka ti lo; mahse, ka nupui chu ka dah pawimawh hmasa lo thei tawh lo ang, a chhan chu ka dam chhûnga ka kawppui tùr, a nuamah leh a hrehawmah pawh tia thu ka thlunpui kha a ni dâwn si a," a ti leh dap dap a, chutah," Mahse, chutia ka tih avàng chuan lungngaih phah nân leh i rilru tihhrehawm belh nân hmang miah suh, i pa chuan a duat leh a ngaihsak dàn ngai rengin a duatin a ngaihsak ang che, chutiangin i nu Mawii pawhin, an awm dàn thlãk thut tùrah chuan ngai duh lêm suh, an fanu duat kha i ni tho tho dâwn. I pa a hlim chuan nang pawh i hlim ang, i hlim chuan i pa pawh a hlim ang, chutiang zél chuan. Tunah pawh hian i pa chuan hrehawm ti ru takin hun a hmang maithei asin, a chhan chu i pa chuan i awm dàn, chezia leh hawiher engkim a man thiam vek dâwn si a, a fanu duat i hlim loh chuan a hlim thei bîk hauh lo ang tih hi ka rin dàn a ni," a ti leh duah a.

Chu thil ka hrilh ațang chuan Michael-a nèn chuan  kan inhnaih sawtin ka hria, țhian ai mah chuan u mipa ka nei ta ni maiah ka inngai hial. Hmeichhia hi chuan thil sawipui tùr hi kan lo mamawh êm a lo ni, tunah hi chuan ka rilru tâwt tak pawh a zia tawh lutuk, kan in chhûnga ka awm dàn pawh a danglam hret hretin ka ring bawk.

February ni 14, Valentine's day pawh khêl lovin a lo inher chhuak leh ta, ngaihzâwng nei lêm lo mah ila he nî hi chu ka ngaihlu ve țhìn, a chhan chu a mamawhte hnêna thisen pêk hun atân ka hman țhin vàng a ni.  Kum 5 zet chu ka lo pe ve ta a, kum 5 mah ni se vawi 7 zet ka pe ve tawh thung, thisen ka pêk avàngin ka taksaah harsatna ka tawh phah chuang bawk si lo va, a mamawhte thisen pe ve theia ka awm chu ka lãwm êm êm zâwk a ni.

Vawiinah pawh hian pêk tumin ka inbuatsaih leh a, hrisêl pângngai tak ka nih avàngin zàn lama Michael-a min sàwmna pawh ka hnarsak bík lo, ka buai ka inring lêm lo a ni.

Chawhma class kan kal a, chawhnuah thisen pe tùrin an buatsaihna hmunah Michael-a nèn chuan kan kal a, ka taksa dinhmun min check felsak vek hnuah chuan khumah chuan mu zarin thisen chu ka pe ve leh ta a, Michael-a pawhin a pe ve a, ani phei chuan nurse-te chu a fiam kual a, an nui dar dar nghe nghe a.

Tlaiah chuan ina hawin zanriah ei kham veleha chhuak thei tùrin ka insiam nghâl ap a, khawi lai hmunah tak nge kan kal dâwn hre lo mah ila a nawm ka ring ve ngawt a, a chhan chu Michael-a nuam tihna hmun chu a nawm ngei ka ring ve tlat a ni, party pawh a ni chiah lo, min hruai chhuah ve kha a duh tlat a ni.

Min rawn lam a, car-in kan tlân vang vang a, Bawngkàwn lamah kan tlân a, chhun êng chu ni se chuan kan kalna chu ka chhui thiam maiin ka ring a; mahse, zàn lamah hi chuan ka buai tlat zêl, ka kal ngai lohna lam a ni miau bawk si a.

In hnuaiah kan lût a, in hnuai tihah chêp a ni hran lo, nula tlangvâl an lo awm ve niai niai a; mahse, a kawpin tu mah an awm lo thung. Hmeichhia chu room khatah awmin mipa pawh room khatah. Room khat tihah chuan  an inhmu vek thei tho, mal chenin an awmna room chu a indaidang ve a ni mai, room an chei dàn lah chu a nuamin light êng rawng no nghial chuan a kâp  romantic raih maiin ka hria. Bangah chuan lehkhabu chhiar tùr a inrem țhût mai a, ka mit an la hlawm kher mai.

Hmeichheho awmna ka pan nghâl a, anni chuan min lo be siam siam a, ka hriat ngai an ni miah si lo, min hre ngai àwm bîk si lo, mak ka ti ru khawp mai a; mahse, a hnuah chuan ka hre thiam, țhian siam dàn an lo practice a lo ni, țha ka tiin nachâng hria ka ti viau a ni, lehkhabu chhiar awm ve bawk mah se hmeichhe tam zâwk chuan titi siam siam chu an tuipui  záwk a nih hmel.

Dâr 9 vêla haw tùrin kan inbe lâwk vek tawh a, chuvàng chuan kan inngaihsak tawn tawh rih lo. Titina biala ka awm deuh reng hnuah chuan lehkhabu chhiar tùr chu ka en  ve ta chauh a, a ngaihnawm hmel hlawm lutuk, ka en dan dan a, pakhat chu ka la chhuak a, chair-a țhu chuan ka han chhiar ve țan a.

Mahse, rei ka chhiar thei ta hauh lo mai. Tlêmin ka lu a rawn hai deuh a, ka han maimichhîng vang vang a, ka zia deuh hnuah chuan ka han chhiar leh a; mahse, a ngai tê bawkin ka lu a rawn hai leh deuh chiai chiai a, ka tilui duh ta lo. Lehkhabu chu dahin mi awm loh deuhna lam pan ka rilrûk ta deuh a, thlang lamah boruak thianghlim hîp tùr chuan ka chhuak ta rih a.

Mi awm an lo awm lo bawk a, duh tâwkin boruak chu hîpin ka thaw hawk hawk a, bang nghèng pah chuan ka luhai deuh tihziaawm theih beiseiin ka maimichhîng leh vang vang bawk a. Vawiina thisen ka pêk vàng kha em ni le hetia ka awm le? Kum dangah pawh ka pe ziah a, hetiang hian ka awm ngai si lo.

Haw ka rawt mai dâwn em niang? Mahse, kan thlenna pawh a la rei fahran si lo va, Michael-a lah hmuh mai theihin a awm mai bawk si lo. Maimichhîng vang vang chung chuan ka inngaihtuah a; mahse, tunah chuan boruak thianghlim ka hîp tam ta bawk a, tlêm chuan ka zia deuhin ka hria.

"I lu a haia i awm a nuam lo a nih chuan ka hruai haw thei reng che a nia."

He pa hi, a lo awm ve reng a ni maw? Engtik lai khân nge a lo luh ve ni? nge kan kal hma khân a lo awm ve reng tawh zàwk?

"Eng nge i tih ve a?" tiin meng chuang lo chuan ka zâwt a, țhenawm chiaha music play ri rawn chhuak chuan ka țawng chu a hliah khuh țêp a ni, tukverh an rawn hawng kher a, a bengchheng țêp a ni.

"Tlangvâl ka ni alawm," tiin a nui hawk a, chutah," I kalpuipa lah chuan  i lu a hai a ni tih a rawn hre tawp nâng, nuam a ti lutuk, a țhian hluite a hmu a, an hlim tlâng khawp mai, tunah tak hi chuan keimah bâk rawn ngaihtuahtu che an awm hauh lo a nia, i lu chu a hai viau em?" a rawn ti leh a.

A thil sawi chuan min tiluhai zualin ka hria. Music play ri ring bawk nèn, ka lu chu a nghawr tluk tluk ni berin ka hria, a zia lo thei khawp mai.

"Vawiina thisen i pêk vàng kha a ni thei ang em?" Min rawn hnaih viau tawh mai. Kan awmna chu êng viau lo mah se min hmu chiang thei viau tho ang, a mit a vàr hmel si a, kei chu ka la meng ngam lo.

"Ka hre lo le," tiin ka han meng chhin a, ka lu hai chu ka vir muai muai niin ka hria, tlu mai dâwna ka inhriat avàng chuan inchelhna tùr zawngin ka phar chhuak a, a kut chak zet chuan min lo man vat a.

"Haw ang, i dik lo nasa a nih kha," tiin min kuah a, kei pawh chuan a kâwngah ka kuah vat a, ka thlah ngam bîk lo, ka tlûk ka hlau ber.

"Michael-a ka hrilh tal loh chuan-" ka la sawi lai mêk chuan," Tunah chuan nangmah i pawimawh ber, nakinah ani chu ka hrilh mai dâwn nia, tuar hrâm hrâm rawh," tiin ka inrin hman hma chuan min pawm kãng ta nawlh mai a, tlâk ka hlauh avangin a nghâwnga kuah pahin ka țê deuh țhat a.

"Min thlah teh, pawm kher ka ngai lo," ka tih chuan," Inkuah ai kha chuan kan tum ram kan thleng hma thei zâwk ang, nghet tak khân min kuah mai teh," a lo ti mai a, min kalpui vâwk vâwk ni berin ka hria, ka hnial zui ta lo, a nghâwnga ka kuahna pawh ka thlah chuang lo.

Motor-a min dah luh pawh chuan ka meng ngam lo va, engtizia nge ni ang aw, hetiang hian ka awm ngai si lo va ti rilruin Michael-a chu ka ngaihtuah chhuak a, chutah," Michael-a chu phone tawh teh, ka chin a hriat loh chuan a lo buai palh ang," ka ti leh a.

"Ani lam chu a hmanhmawhthlâk loh, i awm dàn hi a dik lo, ka țhian doctor kan pan phawt dâwn nia," tiin motor chu a tinung a, kan tlãn ta nghâl a.

Doctor chuan ka bp check-in damdawi min eitîr a, minute 15 vél zet kan țhut chawlh hnu chuan ka zia ta viau mai, ka lu hai chu a reh fel vek tawh chu ka ti hauh lo; mahse, a hma ai chuan a zia tawh lutuk ringawt.

"Vawiin thisen i pe a, i taksa fit angin lang mah se zàn lamah i mu țha lo țhìn a niang, vawiin lama thisen i pëk phei chuan zanin chu chhuak miah lo tùr i ni asin, chawlh vang vang tùr a nia," tiin Damon-a țhianpa Dr Ricky-a chuan min hrilh malh malh a.

"Ngawi mai mai teh, a chawlh hahdama a mut daih te chuan hetah hian ka rawn hruai thei tawp nâng," Damon-a chuan a lo ti ve thung a. Rei țhu lovin kan chhuak leh ta a, Michael-a a phone tawh bawk a, entin tak nge ka chanchin chu a hrilh ang tih hre lo mah ila a țha tawh tho tho, chanchin hrilh miah lova hawsan ka ni tawh lo tlat, bâkah, a țhian hluite a hmuh phei chuan tihbuai kha ka duh miah lo.

"Ka lãwm e aw,  lo awm hlauh lo la chuan engtin nge ka awm ang tih ka hre miah si lo va," ka ti sap a, Bangalore-ah khân làwmthu ka hrilh hauh lo va, zaninah hi chuan hrilh ve ngei hi ka ba tlat a ni.

"Vah zau pawh hi a țha phian asin," a lo ti duh chauh a, a motor chu hnehsawh zet hian a khalh par par a, mak tak maiin him riau hian ka inhre tlat a nih chu.

Kan in bul kan thlen chuan dâr 9 a ri ve tawh a, a din fel hnua ka chhuk dâwn chuan," Ngawi rawh lawk," a tih avàng chuan ka țhu leh rih a. Ani chu chhuakin ka țhutna lam kawngkhàr chu a rawn hawng a, chhuahna tùr kawng min kian mai dâwn emaw ka tih lai chuan a rawn kûn hniam ve ta thung a, mak ti takin ka lo en hau ngei ang chu.

"Zanin chu ka phû ve tlat a ni," tih sup pah chuan ka khabe chu a kut pakhat chuan rawn chelhin ka hmuiah chuan min rawn fâwp ta a, ka che sawn lo chiang asin, ka țhu khawng awt a nih ber chu; mahse, a tàwpsan duh miah lo. Ka chhàn lêt hma chuan beidawng lovin min fâwp ngar ngar mai a, dik tak chuan chhàn lêt ka duh; mahse, ka thiam ve lo a ni, mipa ka la fâwp ngai lo tih a hre ngei ngei ang.

Ka chhàn lét lai ka hre miah lo nia. Ka inhriat chhuah meuh chuan ani pawh seat-ah chuan a rawn țhu thla titih deuh tawh niin, a âwmah chuan khùr deuh dar dar chuan ka nem sawn ta a, ani pawhin min tilui bîk lo.

"Duhawm tâwk lekin min chhâng lêt thiam, thlâkhlelhawm tâwk chiahin i zei bawk."

Ka zahzia mai chuh! Room-a ka luh hnuah pawh ka thaw a sa phat phatin ka hria, khua a la vawh ve tehlul nèn.

*I NUNA HARSATNA LO THLENG KHA NANGMAH TICHHETU CHE A NI LO,NANGMAHA THEIHNA LEH CHAKNA I THUHRÛK KHA HMANG CHHUAK THEI TÙRA RAWN ȚANPUITU CHE A NI ZÂWK*