☆HLWILY☆ - 13 By Dingdi Pachuau

 ☆HLWILY☆ - 13 By Dingdi Pachuau

Kan awm dàn avàng chuan Damon-a hmuh ka hreh thar ta khawp mai, 'office-ah a rawn lût thut mai ang a', 'a nih loh pawhin a office-ah amah hmu tùrin min rawn ko thut ta se, ka hreh àwm mang e,' tih vêl mai mai chu ka ngaihtuah a, chutiang ngaihtuahna chuan ni tin min tibuai a ni ber mai. Michael-a lah chuan  ngaihdam min dîl  nasain a inthiam thei hlawl lo, chubâkah, min hruai hawtu kha Damon-a a lo ni kher bawk si nèn, ka bulah chuan a thinrimna tilang lêm lo mah se a rûk chuan a thinrim ngawtin ka ring, Damon-a'n a biakin engtin nge a hrilha eng thil nge a sawipui chu ka hre hauh lo; mahse, an inkâr a lo țha lo sa tawh bawk nèn, Damon-a khân thiam loh a va chantîr chiam zâwk em niang, ngaihdam min dîl nasa lutuk chu ka khawngaih zâwk.

Vànneihthlâk takin School lamah Damon-a  chu hmuh tùrin a awm lo va, rilru kil khatah awm rùn mah se amah hmuh loh miau chuan a zia tho tho. Eng emaw buaina in lamah a nei ve pawh a ni maithei a ni, ti ila, ka âwih chiah lo deuh, ani hi zawng upa ve deuh tawh mah se a awm dàn ațang hian mi puitling tak a nih duh loh hmel hi ka tia, tleirãwl hawklak rual lek ni maia ngaih châng ka nei fo bawk, nupui neih hun tak a ni ve tawh a nia; mahse, tlangvàl a la duh tlatna hian a rilru tùr àwm chu a hril chiang viauin ka hria. Nge ni, kei hian ka lo puh chhe viau zâwk ni...

Mahse, school neitu a ni miau mai a, rawn lang ve leh nawlh mai. A car awm chhûng chuan rilru nuam leh ngaihngam takin ka hun ka hmang thei lo va, class-a kal vat vat duhin ka țhu hlè hlé thei lo bawk; mahse, nilêng chuan office -a a rawn lan loh bâkah min rawn ko lo bawk.  Thaw huai tùr ka nih nèn, ka thaw huai chuang miah lo. Khatia ka infawhtîr theih avàng ngawt khân kei hi a lakah ka lo indah sâng ta viau em ni tiin ka ngaihtuah a, ka zak leh hnuhnawh ta viau mai. Nula chu tam tak, ni leh lo, a chhiar sèn loh a fâwp tawh zâwk ang chu maw le, a nula fawh theih zînga pakhat ve mai ka ni zâwk, chuti chung chuan kei hian a lakah awmze nei ta riauin leh min duh ve ta riau niin ka lo ngai deuh niin ka hria, a zahthlâk ngawt mai. Kan infawhna khân amahah awmzia a nei lovin a thêngthãwngah takngial pawh a thawk àwm tawp si lo va, mi mãwl leh khawngaihthlâk tak chu ka lo ni! 

"Khatiang khân inngaihtuah ngur ngur ziah suh, i pate bawk chuan em ni i rilru tibuai leh a?" Michael-a'n a rawn tih sar sar chuan ka harh chhuak zawk a, za lo zetin ka nuih ringawt. Ka thil ngaihtuah chu a hria ang tih a hlauhawm zâwk, Damon-a nèna kan thil tih kha a rim ara pawh a hre tùr a ni lo, tawp mai a.

"Zànah lo lêng la, i hman chuan?" tiin ka sâwm ve zaih a, ani lah chuan phûr zet hian," A, min sâwm ve tlat mai! Lêng dâwn chiang lutuk, nula hmel țha sàwmna ka hnar a nih ngai chuan khawvêla mi â ber ka ni ngei ang," a lo ti hluai zui a, rum deuh taka ka'n melh zui leh hrâm kha. Lêng tùra ka sàwm chhan chu ka chunga a inthiam lohnate hi reh ve tawh se ka tih vàng a ni, bâkah, mahni in chhûnga rilru mal deuha awm leh inngaihtuah ngut ngut hi ka ning ve bawk, ka pa ngaihsakna, duatna leh ngaihtuahna ka chang pha tawh si lo, ka mal êm mai. A hma kha chuan tu mah hi ka awt bîk lo va, kan in hi ka ngaiin thlen hlàn ka nghâkhlel țhin; mahse, tunah hi chuan in thlen hi ka huphurhin thlen thuai thuai châkna pawh ka nei  tawh lo, ka pa pawh hian a rûkin min ngei ni tlatin ka hre tawh, Nu Mawii nu atâna ka pawm theih loh vàng hi a niang.

A rawn lêng ta ngei a, ani hi zawng a boruak hi a ngai reng tih theih a ni mai. Ka pa chu a be leh nghâl bawrh bawrh a, ka pa tân pawh hian a ngainat loh theih loh. Nu Mawii erawh an bulah a awm rei lo, ani hi chu zanriah ei kham hian a room lamah a kal deuh nghãl tlângpui hrim hrim a, ka pain mamawhah a ko a nih loh hi chuan kan bulah hian a awm khât, TV han en ve zauh erawh a nei tho. Hetia kan boruak a nih deuh hnuah phei hi chuan TV pawh a en zeuh ngai tawh lo, ka ngaihbel deuh vàng nge phei chu ka hre lo, ka hmuh lai phei hi chuan ka pa bulah pawh hian a awm ngai tawh lo, ka hmuh loh lamah erawh ka hre lo thung a.

Sti'n min rawn biak avàngin ka room lamah kalin ka be leh rih a, kan inbe rei phian mai.  Ani hi chu rei lo tê biak hi ka tum chhin peih lo, "Ka hman rei lo a nia," han ti ila, "Ka be rei dâwn lo che, hei chauh hi," tiin, hei chauh hi vawi sawmhnih chuang a tlin tawh chuan dârkâr dâwn hi a lo awh leh nge nge țhìn. A bialpa Lawmnoa nèn khân an ințhen tawh a, tunah hian betu a nei mêk a ni àwm a, chu mi chungchâng chu min hrilh a ni. A hming chu Rinsiama a ni a, a hmel chu a țha tehchiam bîk lo a niang, a nuihpui nasa thei êm mai; mahse, fel hmel a ti viau thung. An inhriatna pawh a la rei lo viau a, amah Sti sawi dàn phei chuan ngaihzâwng nei lova awm rih a duh thu a hrilh a, ani Rinsiama pawh chuan nawr luih a tum loh thu leh a lo nghah theih thu a hrilh a ni àwm e.

"Hmuh ve mai mai pawh a châkawm e a," ka tih chuan nui awr awr chung hian," A hmel chhe si, hmuh kher a ngai lo, bâkah, ka bialpa pawh a la ni hleinem," a lo ti deuh tlat thung a, ka nuih chu a tiza angreng, hmuh han phal loh deuh tlat mai chu.

Ka pate bula ka lêt leh chuan an lo la titi dun nain an tui tehchiam tawh lo a niang, ka țhut ve hnu rei vak loah chuan ka pa chu a tho ta rêng a; mahse, a tih dàn țhin pângngai a nia, ngaihțhat lohna tùr a awm chuang lo.

Inrinni zîngah Nu Mawii chawhmeh bazár turin a chhuak a, keiin eirawng ka bâwl ve thung a, rin loh deuhin ka bulah ka pa chu a lo tawlh ve hrut hrut a, ka be hran chuang lo; mahse, a hnu deuhah chuan amah zâwk chuan," Bawihte, a hmaa kan awm dàn pângngai khân awm leh ang u, hetia mahni in chhûng ngeia nuam lo ti taka hun i hmang hi hmuh hrehawm ka ti êm mai che. Nupui chu ka nei lo ang, i Nu Mawii pawh țha taka biain a hma ang chiah khân enin be bawrh bawrh rawh, hrehawm a ti ve dâwn ém asin. A bul ber chu keima thiam loh a ni, ka kum a upat ve tawh nèn, ka hlimna tùr ringawt ka lo ngaihtuah avàngin min ngaidam dâwn nia. Hêng zawng zawng hi theihnghilh vek ila, a hmaa hlim taka kan awm ang khân awm leh vek ang u," a rawn ti ta chuar chuar a, ka en zawk a, ani erawh chuan a kut chauh lo enin a tuai pah nauh nauh bawk a, a hlim lo hmel leh inthiam lo hmel ka hmuh chuan nuam lo ka ti kher mai.

Chhàn lêt tuma ka ka ka àn zuau lai chuan Nu Mawii bazâr a rawn thleng chawpchilh a, ka chhâng hman ta lo. Ka pa chuan a lo buaipui vat a, kei pawhin rawng ka bàwl zawh tawh avàng chuan tihpui chu ka tum ve deuh ûk a, pên hnih pawh ka pên hman tawh; mahse, ka țhulh leh, ka ding ta daih, a hma deuh pawha buaipui vak ngai hlei lovin lo buaipui deuh tâk chûk chu ka inthiam lo hnuhnawh a ni. Bazâr kal haw bág lo lâksaka chawhmehte a dahna tùra daha lo buaipui kha chu a țha tih ka hre reng; mahse, ka ti ta chuang lo.

Chaw kan ei chhûng chuan ka pa chu a țawng bawrh bawrh a, Nu Mawii pawhin a lo chhàwn zauh zauh a, kei erawh chu ka rilrua inthiam loh rûkna a awm tlat avàng chuan ka țawng ve lo. Ka pa thil sawi khân ka ngaihtuahna a luh leh ngut ngut tawh a ni, Nu Mawii nèn pawh hian an sawi dùn ngei ang a, ka awm dàn avàngin nuam lo an ti dùn ve ve anga, chuvàng chuan inneih loh kha an rawt a ni ngei ngei ang, hlima lãwm viau tùr ka nih laiin ka hlimin ka lãwm thei chuang tlat lo, rilruah inthiam lohna leh nuam tih lohna a awm tlat.

Pathianni inkhâwm bànah chuan Stite inah ka pêng a, a room-ah awmin kan titi a, thil ei pah chuan Rinsiama chanchin kan sawi a, kan nui vak vak a, kei ngei pawhin kan in chhûngkhur boruak chu dah bovin a thil sawi chu ka nuihpui vak vak a. Chutih lai chuan a nuin min rawn ko a, a țhian tu emaw a rawn kal tih a sawi chuan Sti chuan," Tu tak ni ang maw?" tiin hriat loh hmel tak hian min en hê hâw a, kei pawh chuan," Rawn lèn tum an awm ang a, nang hian i mangnghilh tawh zâwk a ni lo maw?" ka lo ti ve a.

"Chutiang ka hre lo, nangmah hi rawn lèn tum kha chu i ni ngei mai a; mahse, hei i lo lêng reng tawh bawk sia," a ti leh mai a, kan thil eina chu sengin a room ațang chuan kan chhuak ta nghâl a.

Sitting room-a tlangvâl hàng lam deuh min hnungchhawn zâwnga lo țhu ka hmuh chuan ka hriat ngai mi a ni lo ang tih ka ring thei nghâl mai a, Sti pawh chuan a hmu ve nghâl a, min rawn kheuh zawk a, phun hlak chungin ka en vat a, ner sawk chung hian," Rinsiama," a ti sap a, chutia a tih tâkah chuan a hnunglam ațang ringawt pawh chuan a hmel chhiat hmel ka ti thla ve nghâl rawk a.

" E, i lo lêng a ni maw? I va fel ve," tiin Sti chuan țawngkam hawihhâwm takin nui chung hian a bia a, a ep chiaha kan țhut ve ve avàng chuan a hmêl pawh chiang takin ka hmu thei tawh a, Sti sawi ang deuhin a hmêl chu a țha lêm lo; mahse, a awka chhuak a fel khawp mai, a zàidam hmel êm êm zui. Mipa țawng duh tak leh țawng phawr phawr chi chu a nih loh hmel viau a ni, chubâkah, tlângvâl lian pui e ti lo chuan a nui hmel hmuh chuan naupang a ang, a nui chen chen mai a, nui hmêl pawisawi lo kan tih ang chi hi a ni.

Haw ka tumin Sti chuan a phal tlat lo va, amah chauha Rinsiama kawm chu a duh lo a nih ka ring deuh ngawt a, ka haw lui lo, zanriah eiah min la sâwm zui zêl a; mahse, chu êm chu ka hnial ve a, Rinsiama haw hnuah ka haw ve ta chauh a ni.

Inkhâwm ka tum deuh nain ka țhulh leh a, ka room-ah awm mai maiin naktûk lama kan tih tùrte ka en thuak thuak a, a hnu deuhah erawh chuan vawiin lama Rinsiama sawi movie, 'hmuhnawm lutuk' a tih chu ka en ve ta daih a, a lo hmuhnawm thawkhat bawk e. Ka movie ngainat chi ni tehchiam lo mah se hmuhnawm ka ti reuh khawp mai, a changtute'n an chang thiam bawk a, a chângin ka mittui a tla lek lek a, a chângin ka thin a lo rim viau bawk a, ka en chhûng zawng chuan ka țang țùng reng ni maiin ka hria.

Ka zîng tho chu mak deuh maiin Damon-a thuthawnin min lo hmuak reng mai a, ka phone sana en tum ka ni a; mahse, message lo awm vang mai chuan ka mit a la ta zâwk a ni.

*Vawiin chu scooty rawn keng lovin taxi rawn hmang mai teh, tlai lamah kan in lama min zui haw lawk a ngai dâwn si a*  tiin. Vawi thum lai ka chhiar nawn, a rìin vawi hnih nèn, tukin zîng dâr 3:45-amin rawn thawn a ni, nizàn ka mut dáwnah data ka off theihnghilh lehnghâl a nih hi. Eng nge a awmzia ni le, an ina ka zui haw chhan tùr àwm chu ka hre thiam lo, eng vàng nge ni ang? Ka infawhtîr theih vàng mai khân ka chungah thu neih a tum tihna em ni?

A thu thu leh a tih dàn ang anga awm ka duh lohna lantîr ka duh ve rêng rêng, a bialnu pawh ka ni lo va, school lam kaihhnawih thil chu ni se thil dang daih a ni a, chu chu ka hriat phawt a ngai a ni.

*A chhan ka zâwt thei che ang em? School/ subject lam kaihhnawih thilah em ni?* tiin ka zâwt ve ta hrãm a, min rawn chhàn nghâl vat chu ka ring lêm lo khawp a nia; mahse, min rawn chhâng vat mai!

*Aw, i subject kaihhnawih thilah a ni e*  tiin min rawn chhâng. Ka thaw deuh huai, bâkah, hei hi ka lo indah sâng ve țhìn bawk a ni, engati nge a lakah hian hlu deuh tak ni tùra ka inngaih tlat zêl ni? Mãwl leh lutuk mai, ka â takzet tawh a nih hi, vawi hnih khat min fawhna khân amahah awmzia a nei lo, a lakah eng mah ka ni lo tih hi rilru fîmin ka vawng kar reng tùr a ni.

Ka chhuah dâwn thleng chuan scooty chu ka keng ang nge keng lo ang tiin ka rilru chu a inbùk a, a hnuah erawh thutlûkna siamin, scooty chu keng lovin taxi ka hmang ta zâwk a, Michael-a'n a hriat chuan mak min ti ve ngawt ang. 

School ka thlen hnuah erawh mãwl ka inti ru khawp mai. Scooty kha lo keng hle hle ila, duh leh tlai bànah chuan inah tlãn haw leh rihin a hnuah Damon-ate inah chuan kal țha leh ta mai zâwk ila tiin ka inngaihtuah a, a thu anga ka awm ta mai chu mãwl ka inti takzet a ni, ngaihtuah tlêm ka inti, a chhan chu tlai bànah chuan a car-ah, a bulah chuangin ka țhut a ngai ang a, thawhpuite'n min hmu vek dâwn asin, Michael-a'n min hmuh hlauh phei chuan...

Michael-a chuan scooty ka keng lo tih chu a lo hre ngei a, a chhan pawh min lo zâwt vat nghe nghe. Chhuanlam siam mai a harsa lo va, ani pawhin thutakah a ngai hmiah mai bawk; mahse, tlai lam a ni huphurhawm ta chu. Ka rilru zawng zawng sênga ka ngaihtuah hnuah chuan kan bàn hunah gate páwnah chhuakin khawiah emaw kal lawk tur angin ka chhuak anga, thawhpuite an haw vek hnuah ani rawn tlân chhuak ve chauh se tiin. Ngaihtuah chhuak țha ka inti khawp mai, fimkhur takin ka thil ngaihtuah chu phone-ah type chhuakin a number-ah chuan ka thawn a, min hnial deuh ka rin tehlul nèn, a rawn 'I duh dàn le' ve mai bawk, a țha e.

Tlaia an in lam pana kan tlàn lai chuan," Eng nge i hlauhthàwn viau a?" tia nui hmel pu deuha min rawn en chuan ka en țha ve duh lo va, kawng lam chu en ngarin,"Thawhpuite rinhlelh kai ka duh lo, an sawi theiha awm ka duh lo bawk," ka ti a, ani lah chuan," Thil țûlah alawm i lo kal dâwn," a lo ti leh mai thung a.

"Insawi fiah ka peih lo," tia ka chhàn leh chuan a ngawi ve ta a, ama dàn siam ngei bawhchhia anga a lan ka duh loh bâkah inngaizãwng lo mah ila sawi theiha awm loh hi ka duh ber bawk.

In lian pui mai hmuh ka inrin laiin a dinna hmuna in ding erawh chu a lian hran miah lo nia! Kawt zâwl erawh a nei zauin compound an neih țhat hmel viau bawkin ka hria. A chhuah chuan ka chhuak ve mai a, a kal chu a hnungah ka zui ve dat dat bawk a, ka hawi vak vak duh lo, ka ngam lo a ni zâwk mah ang chu.

In chhûngah chuan tu mah ka hmu lo, in chung lamah min chhohpui a, tîm leh hreh ru takin ka zui chho det det  a, ani lah chuan ka hreh ang tih a ring pha lo nge, min nghâk hran lo, a kal dàn ngai rengin a kal a, ka zui ve zêl tùrah a ngai a ni ang, ka ding deuh vang vang a, a room lama zui luh ringawt chu thil dik a ni thei lo.

"Lo kal rawh."

Min nghah avàng chuan tîm deuh hlek chung chuan ka zui leh ta a, a room lian puiah ka zui lût ta hlawl mai, hawi kual lo tùr chuan ka inthunun nasat viau a ngai ta bawk.  In kha a pâwn lam lan dàn ațang kha chuan a len loh hmel  hle si a; mahse, a lo ni hauh lo, a chhûnga awm chiah hian a lo zau nuam viau a ni, architect thiam tak kut chhuak a ni ngei mai.

"Lo țhu rawh," tiin țhutna lam chu a melh zauh a, tuna kan awmna hi a lan dàn ațang chuan study room ni àwm tak a ni, amah a awm ve reng avàng chuan ka hawi kual vak ngam lo va, ka mit erawh a hmuh loh lai chuan ka lèn kualtîr nasa khawp mai.

"Ka'n inthlâk lawk ang e, ei tùr ka rawn dahtîr bawk ang e," tiin a chhuak ta nghâl a, in hnuai lamah chuan a chhuk lo tih chu ka hre chiang a, hemi room piah chiahah hian a room a awm a ni ngei ang a, chutah chuan a inthlâk ngei bawk ang chu. A chhuah hnuah chuan thâwk la huai huaiin ka hawi kual nasa a, room chhûng awm dàn engkim chu hmuh hmaih neih ka tum lo, engkim chu a awmna tùr dik takah a awm vek niin a lang, a fel fai thlarh mai.

A rawn luh leh lai chuan banga thlalâk intâr chu ka lo en vang vang a, computer dawhkàn hmaa chair vir theia țhut pah chuan," Khalai parcel-a mi kha a nia, ka room lamah parcel hnih a la awm bawk a, țangkai tùr ber ber nia i rin i thlang chhuak dâwn nia," a ti a, phone vibrate ri ka hre nghâl a, chumi rual chuan a kekawr ipte ațangin a phone chu a phawrh chhuak bawk a. A chhâng a, loudspeaker a on nghál bawk a.

"Ka rawn kal, in chungah i awm tiraw? Rawn hmuh lawk che ka duh a, ka rawn chho nghâl mai a nia."  Hei chu Michael-a aw a ni tlat mai! Hetah ka awm tih a hriat  chuan, min hmuh hlauh chuan engtin nge ni ang? Eng thil nge thleng ang? 

"Ka bihrûk a ngai!" tiin ka tho hluai a, hetah hi chuan bihrûkna tùr hmun a awm miah lo, Michael-a'n min hmu tùr a ni lo, a theih loh, bihrûk vat a ngai. Ka tlãn chhuak a, hei hi mi in, ka kal ngai lohna leh Damon-ate in a ni tih lam ka ngaihtuah pha tawh lo, Michael-a'n Damon-a nèn min hmu dùn tùr a ni lo, ka bihrûk a ngai a ni tawp mai, chu chauh chu ka ngaihtuah.

Room ka hmuh hmasak berah chuan ka tlãn lût tawp a, chutah pawh chuan awm ngam lovin bathroom-ah ka tlãn lût leh a; mahse, hei pawh hi a him chuang lo, a rawn hawng thei tlat, tlãn lêt lehin thawmhnaw dahna kual pum mai chu ka hawng a, ka țhu lût ta ringawt. Kawngkhàr pawh ka khâr țha thei lo, kachêp lutuk si a, chutah chuan thinphu hlawp hlawpin ka țhu a, maimichhîng vang vangin ka âwm chu ka dawm bawk a, Michael-a chuan min rawn hmuh loh hrâm ka beisei, eng nge maw a rawn tih rêng rêng ni? Rawn kal timing lo lutuk mai.

Ka ke chu ka chêt țhat theih loh avàng chuan a rawn kham țan a, chêt a harin kaawmna chu a tâwt bawk nèn, helaiah kher hian engati nge ka lo luh ni, ka che sawn ngam tawh bawk si lo, ka ke kham chu a rawn mu chho țan ta, a rei telh telh a, a mu ta churh churh mai. Study room lamah lah chuan mipa țawng bul bul thãwm chu la awm rengin Michael-a chuan haw mai a latum lo a niang, an thil sawi ka hre ve  thei bawk si lo. Haw thuai thuai se ka va ti tak!

Tunah tak hi chuan che sawn tùr pawhin ka beih fê chu a ngai tawh ngei ang, ka malthla zawng zawng chu ka ke lèr thlengin a mu churh churh a, a chhah vek tawh nèn, a na lutuk chu ka țah chhuah loh nân ka hmui ka pet fan fan ringawt. Michael-a ka huat ber țum a ni ngei ang chu, rawn kal lo se chuan hetiang dinhmunah hian ka ding àwm tawp si lo, haw thuai thuai se ka va ti tak êm! Ka na lutuk chu ka țap chhuak lo chauh tawh a ni.

Engtia rei nge a awm pawh ka chhút thiam tawh lo, dárkár tam tak a ral ni hialin ka hria, ka hminga min ko ri ka hria a, ka chhâng thei lo, ka țap mai dáwn asin, chutah, ka awmna chu a rawn hawng ta.

"Ka zawng nasa che, hetah i lo awm daih a ni maw?"

Ka che sawn thei dér si lo. Ka awm dàn hre lo lêk chuan nuihza awka tih hriat tak hian," I lo muhìl hman elo? A awm tawh lo, lo chhuak tawh la," a rawn ti leh a, ka țawng chuan ka țap mai dâwn si, ka mittui a tla lo chauh bawk, min nuihzat avàng chuan ka thin erawh a rim viau lawi a.

"Lo chhuak rawh," a tih leh tâkah chuan," Ka che sawn thei lo, ka ke a mu vek," țap awka lek lek chuan ka ti chhuak ta țiau a, ka mittui rawn tla chu duh lovin ka khap per sak sak bawk a, ka mittui tla lai kher hi chu hmuhtîr ka duh lo a ni.

"Oh...Ka lo hre lo, Sorry lutuk aw," tiin a rawn kûn hniam  ta vat a, min nuihzatna awka kha chu a awm tawh bîk lo nain mittui la tling pam chung chuan rûm theih tâwpin ka lo melh a, engah mah ngai lo tih hriat tak hian zo zetin min pawm chhuak ta lawp a, ka nat lutuk avàng chuan kei ka lo țê thawt țhawt bawk a, min nuih ka rin nèn, a nui bîk miah lo.

*LUNGÀWINA HI THIL NEIH TAM LAMAH A INNGHAT LO, A NEITU RILRU LAMAH A NI ZÂWK E*