☆HLWILY☆ - 14 By Dingdi Pachuau

 ☆HLWILY☆ - 14 By Dingdi Pachuau

A khumah zawi têin min nghat a, ka ke chu ka chêttîr ngam dèr lo, min dah ang ang chuan awmin ka mittui tling kung  pawh chu ngaihsak lovin ka ke chu ka en reng ringawt a.

"Ke mû chu engtin nge an tihreh țhin i hria em?" tia min rawn zawh tâkah chuan ka en zawk a; mahse, ka ke lam chu ka en leh nghâl daih. Chutih rualin, ka tih țhin dàn 'Ke hmáwr tuia tihhuh' chu ka ngaihtuah chhuak nghâl a, a țha ber em tih chu ka hre hauh lo, ka u min hrilh țhin a nia, ka ke a mut churh churh châng hian min tihsak țhìn.

"Bottle-a  tui awm min lo pe thei ang em?" ka tih chuan tho vatin a dawhkàna mi bottle chu a va la nghâl vat a, a lo lêt chuan," Engtin nge i tih dâwn?" a ti nghâl vut a, kei chuan," Ka ke hmâwr ka tihuh dâwn," ka lo ti mai a.

"Chuti a nih chuan hetiang hian a awlsam ber ang," tiin min rawn pawm kâng leh thut a, ka bottle ken lai pawg ka thlauh teuh kher mai. Bang ni maia ka hriat chu a dàra nêk hawngin bathroom zâu leh nuam zet maiah chuan min pawm lût zêl a, chutah, dárthlalang lian pui hmaa toiletries a hùn dulna zâwlah chuan min nghatin, ka ke lam chu sink-ah chuan zawi têin min nghahsak leh a, chumi hnuah chuan tap chu a on zui leh zat a, a kut chuan tui chu dawhin ka ke rêk leh ka chàwn thleng dâwn dâwn chuan a tihuh bawk a.

"A zia deuh em?"

A zia pawhin ka la hre lo; mahse, hrilh kher erawh ka tum chuang lo, min buaipui ve si a. Ka ke chu enin," Aw..." ka ti sap a, ka ke hmâwr chu chêttîr ka tum ru viau nain a la che hlei thei lo, bâkah, a la na lutuk tlat.

"Ka khawih dâwn aw," tih leh ka ke hmàwr deh chu a rual nghâl a, ka phu zawk mai, chutih rual chuan ka țê nghâl țhat bawk; mahse, a kut chu a la sawn duh miah lo. Ka ke hmàwr ve ve chu a kut pahnih chuan a vuan a, zawi tê têa sâwiin a hmet nê nê phawt a, țê chhuak tawh lo turin ka insûm nasa khawp mai. A rei deuh hnuah chuan nâ pawh chu mak takin a reh ve telh telh a, ka hmêl min en reng avàngin a na vak tawh lo tih a hre ve a ni ngei ang, a hma aia nâin a hmet ta nawk nawk a, a reh fel deuh titih ta.

"A tâwk tawh!" tiin a kut chu ka mansak a, ani erawh chuan," A reh hmak thlengin le," a lo ti thung a, ka mansak chu engah vak a ngai lêm lo. A hmet leh nawk nawk a, tunah hi chuan a na tawh lo, min hmehsakna chu a nuam ka ti tawh zâwk.

"A zia tawh, a reh tawh," ka tih hnuah chuan a duhtâwk ve ta chauh a, tap tui chu off-in a kal sawn zawk a, banga a khài towel chuan a kut chu hru hulin ka ke chu a rawn hru ve leh nghâl bawk a, țawng bîk miah lovin a che vêl chu ka lo en reng ringawt, khap ka tum teuh lo, nuam ka ti daih zâwk si a.

Min pawm chhuak leh a, a khum mawng lama țhutna awmah chuan min nghat a," Lo țhu lawk rawh" tiin min chhuahsan ta nghâl a, chutia a chhuak chiah chu ka țhutna ațanga ding chhuakin ka hawi kual ta vat vat a, nichîn deuh ațanga ka buaina ka pheikhawk zawngin ka mit ka lèn kual nasa ta mai. A thawmhnaw dahnaah kha chuan ka luhpui lo ngei mai tih chu ka hria, ka hlauthâwng lutuk khân khawiah nge ka lo chhir bo hman ka hre miah lo a ni!

"Eng thil nge i tih a?" Ka tàwp chiang kher mai, mak min ti ngawt ang chu. A awm loh hlanin ka lo hawi kual nasain ka kal kual nasa si a.

"Ka pheikhawk ka hlihna lai ka hre mai tawh lo va," ka tih chuan a nui hawk a, lu thing deuh nur nur pah chuan," Thawmhnaw dahnaah khân-" a la tih lai mêk chuan," Aih, ka luhpui lo tih ka hria, i study room-ah khân ka tlànsan a ni lo maw le?" ka lo tih khalh vat a, a khum bul leh kil lam chu ka melh kual nasa tawh a, ka hmu zo tlat lo.

A study room-ah chuan ka lo tlànsan ngei a lo ni! Ka bag pawh ka lo kalsan tel daih bawk. Michael-a min hmuh dun ka hlauh luatah thil dang ka lo ngaihtuah chang tawh lo a lo ni.

Min thlah haw kawngah chuan,"Engati nge i hlauhthàwn êm êm a?" tiin min zâwt țha leh a, kei chuan," Thil țha lo záwk a thlen ka duh lo alawm," ka lo ti mai a, a hmel erawh ka en ngam lo. Tunah hi chuan ka hlauhthàwnnate kha a reh tawh si a, ka chêt dàn nuihzatthlâk dàn tùr leh ka chêt chhiatzia chauh kha ka ngaihtuah leh tawh a ni, ani pawh hi a rûk tak chuan a nuih a za ngawt ang chu.

"Engah nge i hlauh chiam? Ka hlau ve hauh hleinem," a lo ti thung a, hahdam hmelzet hian a seat chu a nghèng ar ar pah a, chutah," In inkâra eng emaw awm ang maiin i hlau a nia, eng mah a awm chuang lo, a ni lo'm ni?" a rawn ti zui zat a.

"Awm lo,"han tih dawt chu ka duh bîk loh avàngin," Awm emaw awm lo emaw pawh ni se, min hmuh kha ka duh lo a ni mai," ka ti ve thung a, min rawn en tih ka hria; mahse, ka en duh ve lo, chutah, a rawn nui ta hawk a.

"Ka thawmhnaw dahnaa i awm ka rawn hmuh lai chea i hmêl cute-zia kha!" a rawn ti ta, he pa hian min tihzah a tum a ni chiang mai, ka lang cute dáwn lo nasa tih ka hre ve alawm, ka țap lo chauh a nih kha.

Ka sen awp awp ang chu, ka hnâr tuai zoh pah chuan," Zanin tlai thil thleng kha chu theihnghilh hmiah ang," ka ti a, chu chuan a nuih a tihzat belh a ni ngei ang chu, a nui leh a," A hlimawm alawm le, theihnghilh phal rual a ni lo," te chu a lo la ti deuh deuh a!

Michael-a vàng vek! Rawn kal kher lo se chuan khatiang boruak kha kan tawng kher lo tùr. Ka han ngei viau dâwn a; mahse, engah nge kei kher kher pawh thil sual ti ang maia ka bihrûk kher ni?  An inhmu a, an inbia a, an insual lo bawk. Kei kha Michael-a hmuh tur khân lo awm ta ila, thil pawimawh tia kal ka ni si a, min hmu dùn mah se, Damon-ate in a ni a, Michael-a chuan buaina a siam kher lo tawp ang, engah nge ka lo hlauhthàwn êm êm? Engati nge Damon-a kha ka lo hlauhpui ve êm êm ni?

A, ka ngaihtuah peih tawh lo, theihnghilh hmiah teh ang, thil dang ngaihtuahtùr ka ngah lutuk.

*******

Naupangin school an țan leh tawh a, kei pawh school lamah ni tin ka chhuak leh tawh a. Damon-a pawh ka hmu thei leh țan ta, a hma ai thláwt chuan a rawn lang zing ta bawk, tu nula mahin an rawn zui ngai tawh lo, chuvàng chuan bialnu hi a nei tawh lo em ni aw tiin ka ngaihtuah hial a ni; mahse, ani êm hian bialnu a neih loh chu ka ring ngam meuh bawk si lo. Awm hmunah hian ka lo hlim a, ka lo nui a, a chângin ka lo titau ru deuh bawk a, a hnua ka tihtauh chhan ka ngaihtuah lêt hian ho ka tiin keimah ka innuihzat leh viau țhin bawk a; mahse, hetia a rûka lo star viau mai hi nuam tihna riau ka nei ve leh tlat bawk.

Ni khat chu Sti nèn kan chhuak dùn a, vawiin chu dàwr lamah a kal bîk lo a ni. Kan chhuak dùn khát ve tawh a, thil țûl ti pahin hlim taka hun hman kan tum ve a ni.

"En teh, nizànah Rinsiama a lo lêng leh a, zan danga a lo lêng ang lo takin a rûkin ka lo en chet chet leh reng țhin a, khawngaihna riau ka nei tlat mai a nih chu, ka hre thiam chiah lo," a ti sar sar a, rang zet hian kei chuan," A rûkin i duh țan viau tihna," ka lo ti vat a.

"Duh ka duh lo alawm, a hmel a chhe si," a tih leh chuan," A, chhe lutuk a nih loh tawp kha, a ngo lêm lo a ni ringawt. A nuih khân a nèlawm bawk si," ka lo ti a, ka rilru tak tak ka sawi rêng a ni.

"Nih, Damon-a nge hmel țha i tih Rinsiama?" a rawn tih chuan ka en há a, thlan tùra a rawn khaikhin pahnih inang lo tehchai lutuk avàng chuan ka en lo thei lo.

"Kha, țha i tih zâwk miah loh kha," ner deuh nânga a rawn tih chuan," I rawn khaikhin ber kher kha a mak êm alawm," ka lo ti vat a, ka chhànna a hriat rual chuan a nui ta hak a.

"I chhànna tùr chu ka hre sa reng alawm, chuvàng a nia ka rawn sawi chhuah ni; mahse, a hmel hi chu țha lo mah se, Rinsiama hi chu a fel ve êm a ni, a țawng tam lo, a hmel pawh a țha ka ti lo chiang; mahse, a fel ve chiang thung a ni, amah hre chiangtu apiangin 'fel' an ti zêl," a ti leh a.

"A rûk tak chuan i duh ve tho a nih kha, ni rawh u," ka lo ti hmanhmawh a, ani chuan," Dik tak chuan ngaihzâwng neih loh rih hi ka duh a; mahse... ani lah hi min tur leh min nawr anga lang miah si lo hian a rawn lang ve reng a, inngaihzàwnna lam rêng rêng chu min sawipui ngai miah lo, a chhan chu neih rih loh ka duh thu ka sawi kha a hre tawh miau a; mahse..." ti vang vangin sawi chhunzawm lo chuan a ngawi leh daih a, lassi chu a hîp kâk kâk a. 

"I thu thu a nih ber chu. A nghah theih thu che kha a hrilh tawh che a tiraw?" ka tih chuan a lo bu nghat a, sawi zawmin," Hmêlah buai loh tùr an tih kha, tûnlaiah chuan mi fel hi an țha ngai. Han nghâk deuh vang vang la, i tâ tùr dik tak a nih phawt chuan a kalsan hauh lo ang che, i duh dan pawh a hre thiam lutuk ang," ka ti leh a, ani pawh chuan," Nia... chu chu ka rilru a ni alawm; mahse, a hmêl ka hmuh ka hmuh chuan ka khawngaih chho zêl ang a, ka tum aia hma hian ka rilru ka pe nasa ang tih ka hlau," a ti leh a. A rilru awm dàn inthlâk chho kual vêl chuan a rûkin min tinui var var mai, a duh ru ve reng tawh si a, eng chena rei nge a inup theih ang le? Kei chuan ka duhpui reng mai, mi fel tak a lo nih tak tak phei chuan innghahna tlâk niin a nghet churh mai dâwn asin, a awm dàn leh hawiherah lah khân mi lêrh lo tak a ni tih lah a lang reng bawk si a.

Zanriah kan ei laiin ka pa chu a țawng zauh zauh a, Nu Mawii nèn pawh kan lo chhàwn ve zauh zauh tho. Dik tak chuan Nu Mawii leh ka pa  chungah hian inthiam lohna ka nei ru deuh tlat tawh a, han biak deuh hluai lah hi ka zak ve tawh bawk nèn, a rûkin hrehawm ti takin kan in chhûngah hian hun ka hmang a ni.

"Ka lo ngaihtuah mai mai a, in duh loh zâwng a nih erawh chuan min ngaidam ula, tunah chuan ka awmpui kher hi in ngai tawh lovin ka hria, in remtih chuan hun remchâng hmasa berah kan khaw lamah ka haw ve tawh mai dâwn em maw ni tiin ka lo ngaihtuah a, ka chhûngte pawh ka hmuh lohna a rei ve ta bawk a," Nu Mawii chuan inthlahrung tih hriat tak hian a rawn ti chhuak ta a.

Ka thil țhial lai chu ka tàwp chat a, ka pa lam chu ka melh nghâl ralh bawk, ani pawh chu keimah ang tho, a che bîk lo, Nu Mawii en lo chuan a chawthlèng chu a en chhuk ràn thung a, a rilruah eng tak awm ang maw?

Hetiang lam hi ka hriatah a vawi khat sawi chhuahna a niin ka hria, kum khati chen kha kan bulah awmin nuam a ti ve viau țhìn a, an khaw lam hi a sawi chhuak ngai lo bawk. Hetia kan boruak a awm hnu pawh hian a hlim lo hmel ka hmu ngai chuang lo va, hlim hmel takin pângngai takin min be fo țhìn a nih kha, kei hian hlim hmel puin ka be ngai ta lo zâwk mai pawh a...

"Hrehawm i lo ti tawh viau a ni maw? Ka thiam loh a ni, ui dâwn viau che mah ila keini uibeh theih rual i ni lo bawk a, i duh phawt chuan i haw dâwn nia," ka pa chuan a lo ti awlsam ta êt a, chutah," Mahse, chutih rual chuan, hmanhmawh viau mah la, tún thla hi chu i la awm thei hrãm ang chu tiraw?" a tih zawm leh a.

"A, thei e, a hmanhmawhthlâk chuang lo va," Nu Mawii'n a tih leh chuan," A làwmawm ngawt ang," ka pa chuan a lo ti boh a. Kei erawh chu țawng ve ngaihna ka hre lo, bâkah, ka inthlahrungin ka awm dàn a dik lo vêl vek, Nu Mawii haw tum chhan lah chu hre chiang viauin ka inhre bawk si a.

Mutnaah chuan ka ngaihtuah a, Nu Mawii chu ka khawngaih rualin ka pa ka khawngaih sa bawk. An induh a, ka pa phei chuan nupui atân hial pawh a duh thu a sawi nghe nghe kha, tûn hnai lawkah a ni nghe nghe. Nu Mawii pawhin a lo duh ve tho a, ka pa nèn khân an rilru a thuhmun a ni; mahse, keimah vàng liau liauin an induhna chu ka puitlintîr lo va, induh takte chu keimah vàngin an ințhen dâwn ta a nih hmel.

Ka ngaihbel chu a ni kher lo ang, ka pa hlim hmél hmuh tùr a vâng a, a nui hmel erawh a tilang zauh zauh tho; mahse, a nui hmel 'lem' zet chuan min bum thei chuang lo, a mitmengah chuan nui hmel a lang lo va, lungngai leh khawhar hmel tak a lang zâwk țhin.  Chaw einaah pawh han țawngin han titi bawrh bawrh mah se, a chaw ei tlèm tâkzia chu ka hmuh hmaih hauh lo, mitdel leh rilru hmang thiam lo ka ni bîk tlat lo. 

Nu Mawii pawhin a hma ang chiahin min be tho nain a en ngai a en leh vang vang țhin chu ka hmuh hmaih bîk lo, ani pawh hian ka pa hawsan daih chu a hreh ru ve tho a ni. Engtin nge ka tih ang? A haw hunah ka pa a khua a har dâwn si, duat viauin ngaihsak viau mah ila, a thinlunga Nu Mawii hmun ruak tùr hi kei hian ka hnawh khahsak thei ang em?

Ka rilru a buai ru ta khawp mai, Sti pawh a thuphung chuan ka hrilh ve a, ani lah chuan," A nih chu, i thaw a veng huai tawh dâwn a nih chu," a lo ti awlsam thên a, a hmain ka rilru ka hrilh vek tawh bawk sia, hetia min chhâng hi a mawh lo ve.

"Ka ti lutuk niin ka hre ta, ka pa hlim hmel hmuh tur a awm lo va, chutih rualin Nu Mawii pawh, kei pawh hlim tùr àwm tak ka nih  vei nen, ka hlim phah hauh si lo, ka pa mawlh mai hi, Nu Mawii a haw tak tak chuan a khua a har dâwn êm mai, a khawharna ka hriat thiampui phâk ve ang em? Ka hnèm thiam ang em?" ka ti sap sap a, mahni hma ka lo sial lutuk avànga ka thil tih avàng chuan ngaihtuahna a kal thui lo thei lo a ni.

"Puitling i ni a, i pa hlimna i duh si chuan i tih tùr chu i hria... in ka ring," thutak zeta Sti'n a rawn tih chuan ka en vang vang a, chutah, ka thaw nghâl hawk bawk. Ka tih tùr àwm chu ka hria; mahse... ka ngaihtuah ringawt pawhin min tibuai.

"A mak leh ta vung vung! Engin nge i ngaihtuahna lo luah leh tawh a? Keimah tih loh hi chu ngaihtuah vak vak lo la ka duh ngawt mai," nui var var chung hian Michael-a chuan a kut phar chung hian a ti a.

Nia, ka lo inngaihtuah leh vung vung tawh. Nu Mawii haw tum leh ka pa khawhar tur hian ka ngaihtuahna a luah êm a ni, ka tih tùr lah ka hre kur a, tih dàn tùr, sawi dàn tùrah ka la buai rih bawk a, ka buai nuai mai.

"Thil pawimawh deuh a nia," ka tih chuan," Keimah ka ni lo chu a ni lo tiraw?" a rawn ti leh a, a la nui sâng reng a, chu chu ka hmuh chuan," Ni lo tlat, i ring țhelh," ka ti a, ka nui sak a, ani chuan ka chalah a rawn bêng thak a, chutah, a rawn dawm zui nghâl bawk a.

"I chalah hian a inziak vek alawm, zêp tum ziah mah ta che, a zahthlâk loh, nula dang tih loh dàn pawh a ni chuang lo va," tiin a nui leh var var a, ka hmui ka tihpawrh khum vak a.

"Miss Kimkim, khawngaihin, ka office-ah min rawn hmu lawk thei ang em?"

Chu aw ka hriat chuan ka khawng lo chauh a ni mai! A aw chhuak nèlawm lohzia leh a hmêl leh mitmeng vâwt raih mai chu, min rawn en tlang vek ni maiin ka hria, Michael-a nèn kan inchhaih lai ber kher lehnghâl. Engtia rei nge kan infiam lai chu min lo en tawh ang? A lo luh lai kan hre miah lo chu a ni sia, engtin nge kan lo hmuh loh theih le!

Ka va huphurh tak!

*TLÀWMNA NUN NEI TAM APIANGIN MALSÀWMNA AN DAWNG ȚHIN A, CHAPONA LEH INDUHNA NUN NEI TAM APIANGTE AN CHUAI HMA ȚHIN*