☆HLWILY☆ - 15 By Dingdi Pachuau

 ☆HLWILY☆ - 15 By Dingdi Pachuau

A chhuah nghâl daih avàng chuan ka huphurh zual a ni, ka huphurhzia chu ka hmêlah ka lo tilang deuh a ni maithei, Michael-a chuan," I huphurh em? Ka lo kalpui dâwn che em niang?" a rawn ti a, huphurh viau mah ila, inkalpuitîr  êm chu a tihchi loh, tlàwmah ka la ve bawk a, huphurh loh hmel ang taka nui sak chung hian,"A ngai lo ve," ka lo ti a, ka tho nghâl vat a, ani pawh chuan min en zui vang vang ringawt a.

A office-a ka han luh lai chuan tukverh lam hawiin, a kekawr ipte zen chung chuan a lo ding a, inthlahrung ru tak chuan," Eng thil nge ni ta, Sir?" ka ti dêk dêk a, kawngka bul maiah chuan ka ding bawk a.

Ani chu a che eih lo, rawn hawi pawh rawn hawi map lo chuan," Țhu rawh," a ti nghut ringawt a, ka hnaih ber chair chu panin ka țhu ta nghâl a, a lungawi loh chhan tùr àwm chu ka ngaihtuah a, Michael-a nèn kan inhnaih viau lai leh kan infiam lai kha min lo hmu a ni ngat mai, school compound mai ni lovin staff room chhûng a ni si a, a dàn zam kan bawhchhiaah min ngai a ni chiang.

A ngawih leh tâk daih avàng leh a rawn hawi bawk si loh avàng chuan ka tih tùr hre lo chu ka hawi kual a, a hmaa ka hmuh ai ngawt kha chuan a chhûng pawh a lo tichangtlung tawh a, a nuam khawp mai, a neitupa ber hi han thinrim lo phei se chuan nuam ka tih deuh tùr chi a ni tlat.

"Michael-a nèn hian eng inlaichìnna nge in neih dik takin min  chhâng rawh."

A rawn inher lai ka lo hre miah lo. A kekawr ipte kha a la zen thûn a, a hmel erawh chu a hma ai kha chuan hmuh a hrehawm lo deuh chuan ka hria. A țawngka chhuak vâwt raih pawh kha tunah chuan tlêmin ngaihthlâk a nuam ta deuh... chuan ka hria.

"Min chhâng rawh. Dàn ka siam a, dàn bawhchhetu ni tùrin ka duh lo ve ve che u," a rawn tih leh chuan," Dàn kan bawhchhe lo," tiin intihuaisenin ka lo chhâng lêt ve ta vat a.

"Eng thil nge ka hmuh si kha?" tuna a aw chhuak erawh hi chu a vawt leh ta deuh, min melh kul mai lehnghâl a, a mitmeng mawi ka tih êm êm țhin pawh kha mawi lam aiin hlauhawm lamah a kal tawh rih.

"Michael-a nèn hian țhian inkawm ang bâkin kan inkàwm lo, mipa mah ni se-" ka tih lai chuan,"Ni e, mipa a ni, kei pawh mipa, mipa ve ve kan ni," a lo ti leh vat a, mit khap hauh lova min melh kul avàng leh a aw chhuak nèlawm loh zet avàng chuan nuam lo ka ti takzet a ni.

"Kan inkârah eng mah a awm lo, lo awm ta pawh ni se-" ka la țawng lai chuan," A awm lo ang, a awm tùr a ni lo, ka unaupa hi dàn zawm loh avànga hnawh chhuah a ni tùr a ni lo, chumi kawngah chuan mawh i phur a ni," a lo ti leh a, min rawn pan hnai a, a thil sawi chu mak ka tih ëm avàng leh amah ka hlauh pah bawk avàng chuan che sawn ngam lovin ka lo en reng ringawt a.

"Eng thil nge Michael-a hnênah hian i hmuh?"

A zawhna chu ka hriat thiam loh avàng chuan chhàn ngaihna hre lovin ka en deuh hâ a, ka hre thiam lo, eng thil nge Michael-a hnên ațangin ka hmuh?!!

"Mipa a nihna anga a pêk theih che chu ka pe ve thei che, chu aia tam daih pawh chu, ani ai chuan ka zei bawk-" a biang chu a ri ta sawk mai, engtik laiin nge ka kut chu ka vai chhuah hman pawh ka hre lo, ka kut na vang vang avàng chuan ka bêng ngei a ni tih ka hre ve chauh.

"Mi tenawmpa...Eng hmuhin nge min hmuh? Nawhchizuar ka ni em ni?" ka thinrim êm avàng chuan ka țawng chu a sehchilh nak mai a, ka insûm thei lo, ka melh lêt kal mai a, tunah tak hi chuan hlauhna ka nei eih lo. Min koh chhoh chhan ka hre ta bawk a, awm reng a țùlna ka hre lo, a duh leh min hnawt chhuak rawh se, hetiang mi tenawm bula hna thawh hi ka duh bîk lo.

Kawngka bul ka thlen chuan ka bânah min rawn hman a, min pawt lêt dâwrh mai. Ka lo inring lo bawk nèn, a âwmah ka va bei chawt a, nghet mangkhènin min lo kuah bet tlat bawk a, tàl chhuah ka tum ve nasa, ka tãl laih laih a; mahse, min kuahtu chuan min kuah nghet êm kher a ni, ka tãl chhuak thei lo nasa.

"Min thlah rawh!" ka ti hul hak a, ka la tâl laih laih bawk; mahse, ka tàl nasat poh leh min pawm nghet ting a, kan taksa a innâwk nasa zêl bawk a ni tih ka hriat chhuah chuan ka tãl chiam duh ta lo, min thlah lo bawk nèn, țawngkam țhaa dàwr ka duh ta zâwk a ni.

Ani erawh chuan min thlah chuang lo, a ke chuan kawng a la khãr țha sauh sauh zui a, chu chuan min ti-awm nuam lo nasa mai. He pa hian a office-ah hian min sual chu a tum a ni êm lo ang chu maw, ka rilruah hlauhthàwnna a rawn lût nghâl zat a.

"Min thlah rawh, engtia min tih nge i tum? Ka au vak a ni mai," tiin ka hlauhthàwn avàng chuan ka rilrua awm ang ang chu ka sawi chhuak a, ani lah chu ka rin loh deuhin a nui chhuak hawk a, chu thil chuan ka tãl lai pawh a titàwp chawih mai.

"Engtin mah ka tih loh che hi, han tãl leh chiah zâwk teh, nulaho easy leh lutuk hi tàl pawh an tum chhin ngai lo va, hetia tãl deuh laih laih han kuah beh hi ka tân thil thar a ni tlat, chona thar," tiin a hmaa ka țhutnaah chuan min nawr țhu ta nghâl a, kei pawh chu ka tãl ta bîk lo,  kan taksa innâwk kha ka duh lo a ni.

"Tãl leh teh," nui deuh sûnga a tih chuan," I sawi tùr i sawi zawh tawh chuan ka kal tawh ang e," țha takin ka ti ve thung a, thinrim lova dàwr ka duh, ani chu mipa a nia, mipa leh hmeichhia awm dùnah hmeichhia bawk hi mualpho zâwk kan ni ziah a, eng thil pawh lo thleng thei a ni si a.

"Michael-a hlat hian i awm thei ang em? I hlatsan loh chuan eng pawh ka ti duh mai ang,"nui sûng chunga a tih leh chuan thinrim ru zet hian," Min vau tihna em ni? Hmeichhe vau àwm tâwk lek maw i lo nih?" tham lo tak chuan ka ti lêt ve ta a, a la na ngang a niang, min rawn hnaihin ka țhutna chair bân pahnih chu nghet zet hian a kut chuan a rawn hmer ngawt ngawt a, kei erawh chuan min rawn tawk hlau takin ka chair hnung chu ka lo nghèng dâwrh a.

"Min tithinrim suh," a chêt dàn ang aia țawngkam dam thlup hian a rawn ti chhuak nghat a, mak ka ti hial zâwk a ni, chutah,"Engah nge nang duh tùr che hian min siam ni?" a ti zui leh zat a.

A thil sawi chu ka hre dik lo emaw ka ti hial mai. Kan inmelh hnai khawp a, a mit hnuailam sîra khuavang te reuh tê pawh ka hmuh theih phah, a nei tih ka lo hre hauh lo.

"Ka duh che tih i hriat kha," tiin a rawn kûn hnai leh a, ka tán chuan han tawlh sawn leh ngaihna a awm tawh lo, chair hnung ka nghèng rân tawh a, han tawlh leh theihna tur ãwl hlek pawh a awm tawh lo, hawi sawn ngaihna pawh a awm tawh lo hialin a nia ka rin ni.

"Hawi sawn suh," ka ngaihtuahna hria ni awm takin a la rawn ti sup zui, a mitmeng chuan min hìp beh tlat avàngin ka hawi sawn thei lo hrim hrim, ka chunga a thil tih tùr pawh ka hre thei vuai vuaiin ka hria; mahse, ka che sawn thei lo va, ka melh sawn thei hek lo, min hîp bet nghet lutuk tlat.

A office ațanga ka chhuah chuan pâwnah ka ding khùr dar dar thei hial mai, ka lu a hai chhalh mai a, ka awm dàn leh thâwk dàn pawh a la normal thei lo, ka sam leh ka kawr chu ka kut khùr dar dar chuan ka tuai țha leh mawlh mawlh a, a office chhûngah khân ka intuai țha nasa viau tawh a nia; mahse, mi dangin min lo rinhlelh mai ka la hlau tho a ni. Ka hmui chu ka'n tuai leh ringawt a, chutah, maimichhîng vang vangin ka thaw hawk hawk a, muangchângin ka pên ve ta chhat chhat a.

Zànah a rawn lan ka rin tehlul nèn, a lo lang miah lo, phone-in biak erawh chu min rawn bia. Pângngai takin min rawn bia a; mahse, keimah zâwk hi ka pângngai thei lo tlat a ni, ka beng bul maia a aw chuan engtin emaw ni tak min awmtîr tlat mai a, vawiina a office chhûnga kan awm dàn kha ka ngaihtuah lêt lo thei lo, a aw ri mawlh mai hian ngaihtuah loh tùr tùr min ngaihtuah chhuahtîr zêl. Zak lo pawh ka inti ru viau mai a; mahse, kawng lehlamah chuan kum heti chen amah ngar ngarah hian rilru ka pe a, ka mipa duh leh vei êm êm a ni a, zei taka min duh thu min han hrilh chuan ka tân hnial a harin ka lo duh ber țhin a ni bawk nèn, a lakah chuan dawl ang maiin ka zawr hnâp a ni ber mai, ka hnial thei lo. Țawngka kherin ka chhâng lo a ni maithei; mahse, ka awm dàn leh chezia ațangin ka duhzia chu ani ang chuan a hre chiang ngawt ang chu.

Khami nî, a office-a min koh nî ațang khân office pawh a rawn kal regular ta khawp mai a, staff room-ah pawh a rawn lawr zing ta viau. A rawn lawr chhan nia ka rin chu Michael-a hi a ni, kan inkawp niin a ngai ni berin ka hria. Țhian mai kan ni tia ka han hrilh ve ngial pawh khân a ãwih țha duh tlat lo kha a ni a, Michael-a lah hi min hnaih zet zet hian a rawn țhu ziah a, Damon-a hmuh theih ngei tùr hian min rawn bekbàwr ve ziah lehnghâl, a rûk tak chuan nuam lo ka ti thei khawp mai, a chhan chu Damon-a hian țawngkain sawi chhuak miah lo mah se a chezia ațang hian Michael-a a thîkzia hi ka hre ve thei tlat țhin.

Sti pawh Damon-a nèna kan chungchâng chu ka hrilh a, a phûr nasa mai; mahse," A duh tak tak che chuan a làwmawm, nang lahin i lo nghâk rei ve tawh bawk a; mahse, fîmkhur la aw, a nunphung chu i hriat chian kha, i rilru tinatu mai a ni ang tih ka hlau, ka venthàwnpui che tihna a nih chu," a ti a.

"A dik alawm, ka țhian i nia, ka natna tùr chu i duh lo tawp ang. Nia, dik tak chuan kei pawh hian ka la ringhlel rum rum a ni, min duh tak tak hi ka la ring thei lo, a hmeichhe lo kawp tawhte nèn kan dang hlak si a," ka ti a, Sti thil sawi vàng chuan ka rilru a nuam lo thar leh deuh a, Damon-a kawp theiha ka awm ta mai chu ka inchhîr leh hnuhnawh deuh bawk a.

"Mahse, a luck êm vànga lêrh a ni a, i enkawl thiam ve pawh a ngai ang, chuan, i duh takin a lo duh che hi ka lawmpui êm êm che a ni, hlim takin ngaihzáwng neih nun hi chèn ve rawh, a hlimawm ve a nia, hringnun tak tak i dai chho ve țan dâwn ta a, ka lo làwm a che," tiin a rawn nui hawk hawk a.

Damon-a nèn hian kan inngaizâwng lo ka tih chuan dâwt ka sawi deuh chuan ka ring, țawngkain min duh thu a sawi a, kei phei chuan ka sawi ve hauh lo; mahse, zàna a rawn lèna kan pahniha kan awm tawh chuan inngaizâwng ang chiahin kan awm, bâkah, Michael-a a thîk deuh țum phei chuan naupang lungawi lo ang mai hian a awm a, a țawng duh lo va, sawi tùr a vâng thei khawp mai.

Nu Mawii haw tum ni kâr a lo her chhuak ta, Damon-a nen kan boruak vàngin Nu Mawii'n haw a tum tih pawh ka lo theihnghilh țhelh a ni, a rûka ka hlim êm avàngin ka pa lungngai hmel leh Nu Mawii hlim lo hmel chu ka lo hmuh hmaih pek a lo ni. Ka tih tùr kha ka hre chhuak leh a, zanin chu ka pa ka titipui hmasa phawt ang, a dawtah Nu Mawii.

Ka huphurh ve tho; mahse, hei hi ka tihsual rah a ni a, a siam ţha theitu chu keimah hi ka ni, ka tlai tawh mah mah maithei, tlai lo hlauh ila...

"Pa, Nu Mawii haw hi i phal tak tak em ni? Engati nge hnialna thu i sawi miah loh a?" tiin ka kut chu ka elh niap niap a, khuma ka pa țhu chu ka en zauh zauh bawk a.

"Bawihte, keia uibeh thei a ni hleinem, a chungah thu ka nei lo va, a duh ti thei tùrin zalènna a nei a ni," a tih charh charh chuan," Pa, min ngaidam rawh, hetiang thlentu hi keimah ka ni, keimah vàng vek a ni, ka hmakhua leh ka hlimna tùr chauh ka lo thlîr a, mahni hmasial takin in hlimna kha ka hmu thei lo va, min ngaidam ang che," ka ti chhuak ta nghâl a.

Ka pa chuan min en vang vang a, kei erawh chuan en lêt rei ve duh lovin, ka rilru hrehawmna avàng chuan hnuai lam ka bih ta daih a, ka pa mitmenga hlim lohna kha ka en rei ngam lo a ni, mawhphurtu ka ni si a.

"Ni lo ve, Bawihte. Kei chu ka upa tawh a, mihring ngaihah pawh ka dam rei ve tawh a-" a tih lai chuan," Ni lo, chutiang sawi suh, Pa, khatiang khãn sawi tawh miah suh, rei tak min dampui ang a, pasal neia fate ka neih hun thleng min dampui ang chu. Pa, min ngaidam lul rawh, chutiang chu sawi tawh suh aw," tia men pùr chung chuan a bulah chuan ka țhu hnai a, a kut chu ka vawnsak a.

"Pa, ka thiam loh vek a ni, i hlimna ka lâk bosak tawh che kha ka la kîr leh ngei ang, min kalsan lam kha chu sawi tawh miah suh aw, i awm loh chuan ka thi ve nghâl a ni mai," tiin ka mittui chu a tla nghâl zawih zawih a, ka thinlung chu inchhìrna hian a khat a, a hlimna hmuh ve chhun mahni hma ka sial avàng maia ka paih bosak chu ka inchhîr ngawih ngawih a ni.

"I thiam loh a awm hauh lo, ngaihdam pawh i ngai lo, ka fanu duat kha i ni reng a, i ni reng bawk ang," ka pain zaidam taka ka sam chûl hliau hliau paha a tih chuan ka pa chu ka kuah a, ka inhnît hlap hlap a.

Nu Mawii room-a ka luh chuan mut inpeih tawh tih hriat tak hian mutkawr a lo ha tawh a, a sam pawh a lo khuih pial zân tawh mai. Min hmuh chuan nui hmel pu hian," Lo lût rawh, eng nge ni ta? Mamawh i nei em ni? I mut daih tawh ka ring asin," a lo ti vat a, min ngei hmel leh lungawi lo hmel a pu hauh lo.

Sawi țan dàn tùr chu ka han ngaihtuah kual a, ka vàn riau mai; mahse, ngawih reng hun a ni lo tih ka hria, ka insangmar thuai a, zah theih loh chhuahin," Nu Mawi, haw lo hrãm la ka ti ngawt mai, ka pain a mamawh bâkah che kan in chhûng hian a mamawh hle si che a, i awm loh chuan kan in hi in a ni thei pawhin ka ring lo," ka ti chhuak ta a.

A lo nui mai a," Ni lo ve, ka lo awm rei tawh avàngin chutiang chuan i ngai mai mai a nih chu, ka haw lohna a rei ve tawh a, ka chhûngteho pawh hmuh an châkawm ve tawh a ni, ka haw loh rei tawh avàngin min dem viau tawh bawk ang," a lo ti a, kei chuan," A nih leh, zu haw lawk la, lo chho leh tal la?" ka lo ti țâlh a.

"Lo chhoh leh an remti tawh kher lo ang, ka awm bosan rei tawh si a," a tih leh chuan," Nu Mawi, khawngaih takin, min ngaidam hrãm rawh, ka pa nèn hian in la induh phawt chuan rem lohna ka siam tawh hauh lo ang, ka pa nèn hian min kalsan lo mai rawh, ka pa hi a awm thei lo ang," tiin tlàwm leh zah pawh dáwn lo chuan ka ngèn ka ngawih ngawih a.

"Bawihi, chutiang tùr a ni ngai lo, chhûngte ka nei ve a, kum tam kan inhmu tawh lo bawk nèn, ka tân haw hi a țha a ni," a lo ti leh a, a hmela tumruh hmel ka hmuh chuan a chunga ka awm dàn kha ka inchhîr ngawih ngawih, kohkìra nawh reh vek theih ni se ka ti takzet.

"A nih, i lo chho leh ang tiraw?" tiin ka la beidawng duh bîk lo va, tuna ka beidawn ringawt chuan ka pa nèn hian kan chân hlen thei tlat a ni, ka pa hlimna pêk lêt leh ka duh si a.

"Ka ring tawh chiah lo," a tih chuan," Nu Mawi, min ngaidam hrâm rawh, kei min hua a nih pawhin ka pa tal hi chu haw suh aw, i tel lo chuan a hlim thei dâwn si lo, khawngaihin, haw lo hrâm mai rawh, ka pa vàng tal pawhin," tiin ka ngèn leh hrâm hrãm a.

Mahse, ka ngèn hlawhchham, a chhan chu haw a tum tlat a ni tih a sawi chhuak leh a, a chhûngte pawh a hrilh vek tawh thu leh anni pawhin an lo beisei tawh thu a sawi a ni.

Ka inchhìrnain bân a pèl a, ka pa ka khawngaih avàngin hlim takin awm a har ka ti. Ka pa hlim lohzia chu ka hmu chiang si a, hrehawm ka ti, a hlimna ka pe lêt thei lo a nih hmel ta si a, beiseina sâng tak neiin Nu Mawii kha ka be ve kha a ni a, ka pa pawhin ka lakah beiseina a neih ve ngei ka ring; mahse, chu a beiseina chu ka tihbosak vek ta si a.

"I hlim hmel ka hmuh theih nân eng thil nge ka tih ngai?"

Ka pa chungchâng ka lo ngaihtuah nasat avàngin ka hmêlah ka hlim lohna ka lo lantîr a ni chiang mai, nui lui sak chung hian," Thil dang ka lo ngaihtuah a ni, thingpui i duh em?" ka ti ta daih a.

"Eng thil nge thleng? Michael-a..." a la tih lai chuan," Eng thil mah a ni lo, chhûngkaw thil a nia ka lo ngaihtuah ni, ka tihpalh a ni e," ka lo ti vat a, min en vung vung hnuah chuan," Tih theih ka nei em?" a ti leh a.

"A ngai lo ve, keima'n ka ti thei alawm," tia ka chhàn leh chuan a nui suk a,"Ka duh chî tak, nula inringtâwk hi ka ngaisâng," a lo ti ve a, kei pawh ka nui ve sak tho nain ka inrintâwk lohzia chu ka inhre chiang hle thung a ni.

*BEISEINA AWM TAWH MIAH LO ANGA I NGAIH TLAT CHUAN BEISEI TÙR A AWM LO MAI ANG, BEISEINA I NEIH TLAT ERAWH CHUAN BEISEI TÙR A AWM LEH MAI ȚHIN*