☆HLWILY☆ - 16 By Dingdi Pachuau

 ☆HLWILY☆ - 16 By Dingdi Pachuau

Ani hi chu Michael-a angin ka nêl ve lo va, kan chanchin engkim hi hrilh ka tum lêm lo bawk. Bâkah, inkàwm țhin leh inkawp nghet pawh kan la ni lo va, tlangvâlin nula a duh angin min duh a, chutiangin kei pawhin, kan inkawp rei ang em tih pawh kan hre hauh lo, hunin a la hril zêl ang chu.

"Inrinni lo awm tùr chu lo buai miah suh aw, ka hauh lâwk che a nia, hruaina tùr che ka nei,"Michael-a'n phone-a a rawn tih chuan Damon-a chu ka en ringawt a, ani pawh chuan min lo en ve kur a. Nuam lo ti rilru tak hian," Khawiah maw?" ka ti ta ringawt a.

"Ka sawi duh rih lo, lo indah ãwl la a ni mai, nuam i ti viau ang," tiin a dàn ngai têin a rawn nui leh a, han nuiha han zawh chian ka duh viau nain Damon-a a țhu ve kur bawk nèn, a ngai hua ang tih ka hlau pah deuh bawk si," A nih tak chu," ka ti ta ringawt a.

"Tlangvâl inlêng i nei a ni maw? I țawng țhat duh loh dànah," tia a rawn nuih leh chuan," Nei lo," tiin ka chhâng mai a, Damon-a pawh ka en duh lo, Michael-a chuan min be zo thuai thuai se ka ti, kan inbiak zawh huna Damon-a țawng chhuah hmasak ber tur ngaihthlâk ka huphurh lâwk.

"I țawng țha duh lo êm mai, ka be rei lo ang che, i inlêngpa chu min lo cho dâwn nia. Inrinni mawlh chu, ka rawn remind leh mai ang che," tiin kan inbiakna chu a titàwp ta nghâl a, kan inbe zo chu ka thaw huai mai.

"Michael-a chuan eng atân nge a rawn biak che a?"  Engtin nge Michael-a a ni tih a lo hriat theih ni? A hming a lo hmu ru a ni lo maw? Nge a țawng chu a lo hre pha zâwk?

"Engtin nge i hriat theih a?" ka tih chuan," Ka awmin ka lêng a ni tih hre reng chungin engtin nge a rawn biak ngam che ni?" a tih nghut chuan," Ani chu ka țhianpa a nia, a duh hunah chuan min rawn be ve bawk ang chu," ka lo ti thung a.

"Ka hmeichhe kawp lai i ni tih hi a la hre nange? Hrilh a ngai a nih chu, mipa dang lo tel ve hi ka duh ngai lo," a tih leh chuan makti deuh takin ka en ringawt a, a rilru put dàn chu mak ka ti a ni, Michael-a phei chu a unau ngawih ngawih a ni si a.

"I hrilh dâwn nge ka hrilh dâwn? Kan inkâra mipa dang an awm hi ka duh lo," tiin chiang zet hian min rawn en a, ka rilru tê tê chuan," Kei pawhin kan inkârah mipa dang mai ni lovin hmeichhe dang an awm ka duh bîk lo," ka ti a; mahse, ka sawi chhuak ngam dêr lo thung.

"Michael-a chu keiman ka hrilh ang," ka ti a, ani hian a hrilh a nih chuan an unau inkârah eng emaw a awm thar leh ang tih ka hlau, huphurh ru viau mah ila keimah ngeiin hrilh ka duh.

"Nula leh tlangvâl inkâra tlangvâl dang an lo awm ve hian buaina a awm țhìn a, chu chu ka duh loh vàng a nia, a dik tiraw? Bâkah, Michael-a en dàn che hi ka hre thiam ve tho," a ti leh a, a thil sawi tàwp lam chu ka âwih loh êm avàng chuan ka nui deuh a, Michael-a a thîk tlat mai hi chu buaithlâk ve tak a ni.

"Pumbilh che ka duh alawm, 'mahni hma a sialthlâk êm mai' i tih pawhin a dik, ka hma ka sial alawm, hetiang chungchângah kher kher hi chuan, ka bialnu chu mi dangin an rawn beisei ve ka duh hauh lo, beisei theiha i awm duh pawh ka ring lo bawk," min rawn hnaih sauh pah chuan a ti a, a thil sawi chu kawng lehlamah chuan dik ka ti khawp mai, kei pawhin ka bialpa hi hmeichhe dangin an rawn beisei ve ka phal hauh lo.

"Inkawp chungchângah hian ka strict a nia aw; mahse, kan buai lohna tùrin strict over loh ka tum ang, hun kan hmang chho dun tam zêl ang a, kan inhre chiang chho telh telh mai ang," tia a nuih deuh suk chuan a va hmel țha chiangkuang tak! A hmelah hi chuan sawisèl tùr ka hre thlâwt lo, hmân ațanga ka lo duh ve ngar ngar kha a ni bawk a, a zunah hi chuan ka uai ve hnêp hnâwp chiang a ni, kan pahnih inkârah chuan strict deuh pawh ni se pawi ka ti lo ang,  a strict poh leh ka strict ve a ni mai.

A dàn siam 'School compound chhûnga ngaihzâwng neih loh' tih kha chu amah ber hian a bawhchhia chu a nih hi; mahse, bawhchhe lo tùrin a insûm ve nasa țhìn tih ka hria. Staff office-a rawn lang sek lo turin ka hrilh ngam ve tawh a, ani erawh chuan," Engtin mah kan awm dùn chuang lo, kan inkawp tih pawh tu mahin an hre lo ang, kha dàn kha siam țhat a ngai a ni," a ti țhin. Michael-a hnênah Damon-a nèna kan inkâr thil ka la hrilh loh miau avàngin ani pawh hian min ringhlel hran lo a niang, a lo ring rilru thei tho bawk a.

Michael-a hrilh chu ka huphurh viau nain hrilh loh chuan a la hre tho tho dâwn si a, bâkah, Damon-a bulah' Ka hrilh ang' ka tih tawh avàng khân tlànchhiatsan reng chu thil dik a ni lo, engtin min ti bîk nâng, ka thih phah êm lo ang chu! Inrinni zàna a țhianpa fanu birthday lawmnaa kan kal kan haw lamah chuan ka hrilh ta rãwih a.

A motor chu kawngpui sîr zau laiah a dintír phawt a, chutah chuan thil awm dan chu ka hrilh ve ta a ni. Ka hrilh chuan ngawi vang vangin min en vang vang phawt a, a thin a rim deuh a nih ka ring a, nuam lo chu ka ti ve khawp mai; mahse, thinrim awka pawh ni chuang lo hian,"Ka ringhlel ru rêng a ni, i lakah hian tihluihna a hmang em? Tihluihna hmangin a hneh chhuh che nge, a vau che?"tiin min en vang vang a.

"Aih, hmang lo, min vau lo bawk. Michael, nang ka hriat hma daih che ațang tawha ka lo star tawh a nia, chutih lai chuan kei pawh zirlai, school naupang mai ka la ni," ka ti a, ka chanchin chu ka hrilh barh barh a. Ka sawi tàwp khàr nân chuan," Tûn hnai têa duh thar thut ka ni lo va, amah pawhina min hriat hma daih ațang tawha duh tawh ka ni," ka ti leh dap dap a.

"A nungchang leh awm dàn zawng zawng hre vek chungin maw?" Michael-a'n a rawn tih chuan," Aw.." ka ti ban deuh chat a, a hre thiam ang tih erawh ka hlau khawp mai. A nungchang leh awm dàn, a luck-zia leh a lêrh si-zia an sawi dàn zawng zawng leh ka mita ka hmuh ve ngeite pawhin amah hi min hnualsuattîr thei lo zo chu a nih ber hi, a  hmêl țhatna hian ka thluak a tibuai zo vek a, a rilru, taksa leh thlarau nèn lam ka duh fai vek a ni ber ang chu, ani angin min lo duh ve thei mai hi thil mak deuh chu a ni.

"Nakinah i nat ka hlauhpui khawp mai che, Kimkim. Hringnun i la dai tlêm si a, ka rèl leh sawi chhiatna lam ni lovin Damon-a hi a luck-in a lêrh a, a hmêl a țhain nulate duh chi tâk a ni tih ka hria; mahse, a hmel țhatna leh nula lama a zeinate hi an tân thang hlauhawm tak a ni tih tu mahin an ngaihtuah pha lo, a duh tâwk hunah chuan hnuchhawnin a kalsan mai țhin; mahse, chutiang chu i chungah chuan thleng ve lul suh se," a ti a, a kuta a khabe dawm chung chuan min en vang vang a.

Nui sakin," Hmalam hun chu tu mahin kan hre thei si lo va, hunin a la rawn hril ang chu. Michael, min ngei lo tiraw? Min ngei pawh ni la ka hre thiam lutuk ang che, kan inkâr hi ka hrilh ngam lawk lo che a, i thin a rim ang tih ka hlauh vàng a nia," ka ti a, ani pawh chuan," Keia lo thinrimna tùr a awm hleinem, i hlim hi ka duh a ni, ka sawi țhaih cheah ngai lo la; mahse, na taka a siam che erawh ka hlau viau a ni," a ti ve leh a.

A bialnu chunga Damon-a chêt duh dàn ka hria a; mahse, chu chuan min duh lohtîr phah chuang lo. Ani ang hmel țha leh pian nalh, luck leh zei êm êm, hausa bawk, lehkha thiam leh mahni intodelh bawk si chu tu hmeichhia mahin an hnar thei lo ang, a lakah hian hmeichhiate an inbarh lût hmasa tlângpuiin ka ring bawk, a dik ngei ang.

Hun chu a liam ve zêl a, Nu Mawii haw tum ni pawh a hnai takzet ta, ka theih ang ang chuan ka pa chu titipuiin tihhlim ka tum  ve a; mahse, ka hlawhtling lêm lo, a hlim hmel hmuh tùr a awm lo, a hlim lo hmel mawlh hi hmuh hrehawm ka ti țhìn. Nu Mawii nèn an la induh reng tih lah chu a chiang êm êm mai si a, ka rilru an tihahin hrehawm ka ti takzet a ni. Eng pawh ni se, vawi hnih khat chu sawi chhuah leh tùr a ni. Ka pa bulah pawh chuan," Pa, Nu Mawii pawh hi titipui ve chhin la, nangin i sawipui phawt chuan a nêm ngeiin ka ring a ni," ka ti leh ngawt țhin.

Ani erawh chuan," Bawihte, tihngaihna ka hre bîk lo a ni, a rilru hi a luhlulin a sawh sawn mai mai ngai si lo va, tûn țum pawh hi haw a tum ruh êm a, a duh dàn ka zahsak ve a ngai bawk a ni," a lo ti a, thil eng emaw ka ngaihtuah vang vang a, a fuh hlauh chuan...țha dáwn lutuk, ka tih theih hnuhnung ber a ni tawh bawk ang. Chhùn lamah ka tih dàn tùr ka ngaihtuah nasa a, țha ber tùr ka la hre thiam rih lo deuh; mahse, a haw hma ngeia ka tih a ngai si, chuti lo chuan hun ka nei tawh lo mai ang.

Naktip mai khi a haw hun tùr chu a ni ta, Sti zanriah eiah ka sâwm a, ani erawh hi chu ka tih tùr ka hrilh hre lo hrim hrim. Chaw ei khama Sitting room-a kan țhut lai chuan ka tih tùr chu tiin Nu Mawii hmaah chuan ka țhingțhi ta rap mai!

"Nu Mawi, khawngaihin, haw suh, ka thil lo tihsual tawhah khân i  ngaihdamna ka dîl takmeuh a, ka thil tihsual hian keimah mai min vaw chhe lo va, ka pa nèn in pahniha inkâr, chu mai a ni lo, kan chhûngkaw boruak a tichhe vek a ni, khawngaihin ngaihtuahna thar hmang leh la, ka dìlna hi min tihhlawhtlinsak hrâm rawh," tiin a țhutna bulah chuan ka țhingțhi a, Sti leh ka pa leh Nu Mawii min ngaih dàn tùr pawh ka ngaihtuah duh lo, hei chauh hi tih theih ka neih chhun a ni tawh si a.

"Bawihi, hetiangin awm suh, ka rilru i tihrehawm ania," tiin ka bân bul tawn tawnah chuan rawn vuanin min chelh din a tum a; mahse, duh lovin," Khawngaihin, ka ngèn che a ni, ka pa hi ka khawngaih a, nangmah pawh ka khawngaih bawk che, in induh dun reng si a, in ingaihtuah dùn lo em ni? In inkârah harsatna ka siam tawh hauh lo ang, khawngaihin, ka ngèn ngawih ngawih che," tiin Nu Mawii chu ka en a, tunah hi chuan ka tlâwm ngawih ngawih, a chunga ka rilru put dàn leh a laka ka awm dànah khân ka tisual hle a ni tih ka hre si a.

Chutah, ka rin miah lohin ka bulah chuan Sti a rawn țhingțhi ve leh ta, ani pawh chuan," Ni e, Nu Mawi, Kimkimi hi ngaidamin inngaihtuah țha leh hrâm rawh, ka bulah a inchhìr thu a sawi a, a thil tihchhiat siam țhat a duh a, remti hrãm rawh, ka ngenpui takzet a ni, ka pa nèn hlim taka in awm hi kan duh a ni," a rawn ti ve nghâl a, hetiang hi a rawn ti ve ang tihngaihna ka hre hauh lo.

Ka pa pawh chu a lo inrawlh ve ta," Mawii, naupangte'n ngaihdam min dil chuan kan ngaidam țhin a ni ngai e, inngaihtuah țha leh mai teh, in khuaa i hawin i hlim dâwn chuang lo, chutiangin kei pawh ka hlim ngai lo ang, hlimna i ban phâk maia a awm lai hian dam chhûnga hlim loh tlat hi em ni i thlan luih țâĺh dâwn?" a rawn tih chuan Nu Mawii chu beisei nei zet hian ka en kal a.

"Bawihi, ngaidam tùr chein eng thil sual mah i ti hleinem," a rawn tih chuan," Ni lo, kan chhûngkaw boruak hlim lai ka tichhe vek a ni, kha hlimna boruak kha neih lêt leh ka duh. Ka pa nèn hian hlim leh turin ka duh che u, in duh phawt chuan innei ula, in inneih hnu lamah in khuaah chuan in duh phawt chuan in zin dùn zâwk ang a, tiraw, Pa? Chu chu i duh dàn a ni em?" tiin ka pa chu ka en a.

"Duh tehrêng mai," tiin Nu Mawii chu a en a," Mawii, tunah chuan kan zavaia hlimna chu i kutah a awm ta e; mahse, ka nawr lui lo ang che, i thu thu a ni e," a ti leh a, chumi hnuah chuan boruak a reh ta dak mai. Thinphu dèp dêpin Nu Mawii chu kan en țhap ni berin ka hria, a rilru a la tikhauh tlat ang tih ka hlau takzet a ni, a rûkin ka lo țawngțai mawlh mawlh a.

Mahse, thu lawmawm lam a rawn phuh chhuak ta. Sti nèn kan lãwm lutuk chu kan inkuah nawk nawk a, ka pa hlim hmel leh Nu Mawii zak hmel kâra hlimna chu ka hmuh hmaih miah lo bawk, tunah chuan chhûngkua tak tak ang kan ni tawh ang a, hlimna kan hloh tawh ngei kha kan nei lêt leh ngei ang.

Haw thla lovin a chhûngte kan phone ang a, anni remtihna leh remruatna angin inneihna chu kan buatsaih ang, chutiang kan sawi lai chuan ka pa chuan," Mite tih ang khera tih a ngai lo, kan upa tawh a, intlãn koh ang kha a ţha ber ang, mi tam deuh pawh a ngai chuang lo," a lo ti a.

"Intithu țan asin, Nu Mawi, in inneih hma hauhin a duh dàn a sawi a nia, hnial pawh i hnial ngam náng," fiamthua Sti'n a tih chuan Nu Mawii pawh chuan," A tih dàn kha ka pawmpui zêl tùr chu a ni mai a," a lo ti ve a, a nui hmêl pawh tunah chuan a lem tawh lo ve, hmuh a nuam leh zak tawh, chutiangin keini pawh kan ni vek tho ang chu.

Nu Mawiite chhûng lam pawhin thil awm dàn hre thiamin rei an rial duh bîk lo. A hma thei ang berin inneihna kan buatsaih a, nula tlangvâl pãngngai ang an nih tawh loh avàngin chhûng leh khat tak takte nèn chauh inneihna hun chu hmangin  a hautak lo thei ang berin kan buatsaih a, țhian țha tak tak pawh kan sâwm kim lo, Michael-a erawh a sàwm hmaih theih loh, Damon-a erawh a zin lai a ni hlauh a, a tihzia phian e. Awm se chuan Michael-a a thîk lehpek ang. Sti pawhin Rinsiama a rawn hruai ve zân mai, tunah chuan a hmel pawh chhia a ti phal tawh bîk lo a niang, anni pawh hi inkawp tak tak tawh se ka ti, an inhmeh dùn viau asin. 

Ka ngaihtuah tlêmin ka lo mãwl hi ka tia, a hma khân ka pa leh Nu Mawii an induha inneih hial ka pain a sawi khân mahni hmasial takin min ngaihsak loh leh min duat loh ka rin avàng khân ka remti lo kha a ni a, kei aia Nu Mawii a ngaihsak zâwk tlat rinna khân min tibuaiin min tihlim lo a ni ber a niang chu; mahse, tunah chuan kha kha ka lo tisual chhiava a ni tih ka hre tawh. Ka pa hlim hmel leh Nu Mawii hlim hmel chuan hlimna min pe a, min ngaihsak lohna a awm miah lo. An inngaihsak tawnna chuan min tihlim a, min tinui a, kan in chhûngah pawh hlim nui ri hriat tùr a awm leh ta, mahni indah pawimawh lutukna hian chhûngkhur a lo siam ţha miah lo a ni tih ka hriat chian phah, tu pawh hi pawimawh lo bîk kan lo awm lo va, kan pawimawh dan a inang lo mai a ni, mahni indah pawimawh lutuk chu a hmasialthlâk ka ti ta riau.

Damon-a a rawn haw a, zàna a rawn lèn ka ring deuh nain a chauh ka rin avàngin ka phût ngam lo, min rawn be lêm lo va, tlaia kan inbiak tawh avàngin ngai a ti tawh lovah ka ngai mai a; mahse, zanriah ei kham sitting room-a kan țhut khâwm laia a rawn lan hlawl chuan mak ka ti ang reng khawp mai, a rawn lèn ka rin ngam loh vàng a ni ber ang chu. A hmel ka hmuh chiah chuan ka lo ngaihzia ka hriat chhuah phah nghe nghe, in lamah ka pate innei tùr thil vêlah ka buai lutuk a, hetia a hmel ka han hmuh chiah hian  a ngaihawmzia leh ka duhzia ka hre thar leh vawng vawng mai a, chuvàng chuan ka lak ațangin ka mit kalasawn hlei thei lo va, ka en deuh reng nghe nghe a ni.

Ka pate chuan an lo be vat a, Nu Mawii pawhin a lo be ve a, an inneih laia a awm theih loh avànga thuphâ chawiin an inneih present tùr a rawn ken chu ka pate chu a pe a, ka pa chu a lãwm thiam khawp mai.

"A ngai hauh lo asin aw," tiin," I tilãwmawm lutuk, mite anga innei pawh kan ni lo va, a hming tak taka innei ang kan nia, hetiang pui pui pawh hi kan beisei lo rêng rêng," a ti bawrh bawrh a, a rûk tak chuan Damin-a chu ka lo chhuang khawp mai. A bengvâr ka ti a, chutiang a lo ngaihtuah thleng chu mak pawh ka ti a ni.

Ka pate kal sawn hnu, kan pahnih chauha kan awm tâkah chuan," Min lo ngai em?" a ti thãwp sat a, zêp duh lêm lo chuan," Aw, ngai e," ka ti ve mai a, min en rùn nain kei pawhin ka en lêt ve rân tho a, ka zak duh bîk lo, ka ngai ve êm alawm. 

"Ka ring e...kei pawhin ka ngai che asin, vainu hmel chhe pui pui leh thau zet zet  hlîr ka hmu ni tin a, khaw lum leh chauh nèn chuan a inhmeh lo takzet a ni," a tih chuan ka lo nui sak a, nia, a inhmeh lo ve khawp ang le.

*BEIDAWN DUH TLAT LOHNA HIAN CHAKNA LEH HLAWHTLINNA MIN THLEN ȚHIN*