☆HLWILY☆ - 17 By Dingdi Pachuau

 ☆HLWILY☆ - 17 By Dingdi Pachuau

"Zanin chu ka lêng rei deuh dâwn a nia, ka hmuh lo rei tawh êm mai che a, i bulah hmu thei chea awm reng ka duh rih a ni," a tih leh chuan,"I chau viau lo em ni? I chauh viau ka lo ring deuh ringawt a," ka lo ti a.

"Ka hmu tawh che a, ka chauhna zawng zawng pawh a reh duak tawh; mahse, tlêm chu a la awm hlek, i kut ka vawn chuan chu pawh chu a reh thei ngeiin ka ring," ka mal chunga ka kut ka dah en ràn pah chuan a ti leh a, ka nui deuh sak a, a fiamthu mah ni se chutiang fiamthu chu ngaihthlâk hrehawm ka ti lo. Zàna a rawn lèn apiangin ka pate awm loh hnuah chuan min hnaih thei ang bera țhuin ka kut a vuan ngei ngei țhìn a, zanina min vuan lawk lo hi mak ka ti ru viau zâwk a ni.

A lamah ka kut veilam chu ka phar chhuak a, a lo vawn atân ka ti a ni. Ani pawh chuan a kut lum thar thar chuan a lo vuan vat a, min vawn mai duh tâwk lo chuan a lamah, amah hnaih thei tur chuan min pawt zui ta nghâl a. Eng mah kan sawi lo, sawi ngai pawh ka ti lo, min ngaiin min thlahlel ve tak tak niin ka hria, kei pawhin ka ngai, ka pate inneihna vêlah khân buai hle lo phei ila chuan ka ngai zual ngawt ang, ka buai ve êm a, hun tam zâwkah ka ngaihtuah thei lo zâwk a.

"Hetia kuah vawng vawng che hi ka châk ber a ni," nghet zeta min kuah  lai chuan a ti sup a, chutah,"Ka zin chhuak zing ve viau tawh a, hetia ka chhuah châng hian ngaih ka nei ngai lo; mahse, tûn țum ka zin chu ka dik thei tlat lo, rawn haw thuai thuai ka châk a nia aw..." tiin thâwk a la hawk a, min kuah nghet lutuk a, thâwk a har țêp a ni.

A thil sawi chu ka tân chuan thu làwmawm leh hlu lutuk vek a ni, min ngaih thu a han sawi chhuak ve a nia, a ka ațang hian hetiang thu hi chhuak ve theia mawi ni pawhin ka hre lo a nia, a làwmawm dangdai tlat.

"Ka pate thilpëk i rawn hawnsak vàng khân ka lâwm e, dik tak chuan khatiang kha i ngaihtuah chhuah ka ring pha miah lo va," tiin làwmthu chu ka hrilh ve sap sap a, pahnih chauha awm e ti lo chuan kan țawng zàwi dùn khawp a, kan phun deuh sar sar a ni ber àwm e.

"Nia, i pate inneihni zîng kára ka rawn biak che khân ka ngaihtuah chhuak thut a, insiam chûk chûkin ka lei nghâl alawm, ka theihnghilh ka hlau si a," a ti a, innghèng chialin thatchhe zetin kan țhu dun a, ka kut chu a la vuan ràn a, a la thlah phal bîk lo a niang, ka la sawn duh bîk lo.

"Ka pa làwmzia kha, khatiang khân thilpêk i pe ang tih a ngaihtuah pha miah lovin ka ring, kei pawhin ka ring pha chuang lo-" ka tih lai chuan," A fanu ka duh miau chuan a pa làwmna ka siamsak kha a ngai ve miau si a," tiin a nui suk a, mawi ka tih deuh chi ang khân a meng sawr sawr pah bawk a, a mithmul sei er zet nèn chuan a men dàn chu a inhmeh thlâwt, a meng bedroom lo mah mah zâwk a!

A sawi lâwk ang ngeiin a lêng rei a; mahse, ka ning hauh lo. Min ngaitu hi ka ngai a, min thlahleltu hi ka thlahlel ve bawk a, kan inhmu lo rei ve bawk nèn, kan ãm ve a ni mai.

Mut hmunah chuan kan awm dàn chu ka ngaihtuah lêt a, zak lo reuh hi ka inti khawp mai. Ani chu mipa a ni a, mipaah pawh naupang chhe zawk zawk lo leh hringnun lo hmang tam ve tawh a ni a, chubâkah, nula lamah phei chuan ngaihtuahawm lo tak a ni, ngaihtuahawm lo han ti ila ngaihtuahawm tak a ni zâwk ang chu, a zeiin experience a ngah tawh àwm si a, kan inngaizâwng ve ta hi ka tifuh ber ang em tih ka ngaihtuah rauh rauh a ni. Kei chu a kawp ţhin hmeichhiate nèn kan inang lo si a, min ning thuai mai ang em? Ka zei lêm si lo, a rilru tak tak ni lêm lo hi min hrilh mai mai te hi a ni lo maw? Mahse, a awm dàn ațang kha chuan min ngai ve tak tak a ang ka ti bawk si.

Tûkțhuan ei laiin ka pain," Nizàna mi kha kan mâkpa hual a ni em? Damon-a maw kha a hming kha?" tiin min fiam zuk zuk a, ka zak chu ka sen awp awpin ka ring, hetiang lam hi kan sawi khât ve si a, nu leh pa bulah chuan sawi a nuam miah lo. Nu Mawii( 'ka nu' tia koh hi ka la harsat tlat a nih chu, 'Nu Mawi' ka la ti zuk zuk fo) chu lo inrawlh vatin," A fel hmel khawp mai, mâkpa hmel țha leh fel tak kan nei dâwn a nih hmel kha," a lo ti ve a, chhâng lovin ka nui ringawt a.

Ka pa chuan," A fing ve tlat a nih kha, pa ber lamah țuanin min han tilãwm phawt a, pa ber kan làwm tawh ber chuan thil a fel nghâl kuar mai dâwn a ni," a ti leh a, kei chuan," Chutiang lam pawh a ni lo," tiin ka zak chu ka nui leh rih a, ka pa vêk chuan," A zahthlâk hleinem, mi ang pângngai nih chuan ngaihzâwng hi chu neih tùr a ni ngai a nia, mi aia over erawh chuan awm hauh loh tùr, hmeichhe lam chungchângah hi chuan i nu hian a zilh thiam zâwk ang che," a ti a, a tho ta nghâl a.

Nu Mawii chuan," A, Bawihi hi chu zilh ngaiah pawh ka ngai lo che, ngaihzâwng pawh i nei ngai lêm lo niin ka hria a, a dik ngei pawhin ka ring. Tunah i lo nei ve ta a ni mai a, tlêm lai deuh kha chuan Michael-a zâwk hi i bialpa emaw ka ti a," nui deuh chung hian a ti a, kei pawh chuan,"Michael-a chu ka țhian a nia, ka thawhpui a ni bawk a, a fel êm êm bawk a ni," ka lo ti ve a, chutiang chuan thil pawi lo chin chu kan sawi dùn a, kan titi dàn ațang chuan nufa tak tak kan nih duh hmel ka ti; mahse, hetiang lam hi kan sawi vawi khatna a nia, ka inthlahrung deuh, nuam ka ti fahran lo.

Kan inkawp chho ve zêl a, an chhûngkaw chanchin leh a seilen chhoh dànte ka hre chho ve zêl a, chutiangin ani pawhin ka chanchin chu a hre ve tho bawk ang chu. A chanchin tam zâwk hi chu ka zawh vànga hria ka ni, Sunday zànah bâk a inkhâwm ngai lo tih a sawi mauh mai a, mak ka ti ru angreng khawp mai. Eng nge Sunday chhùnah a tih țhin ni, chhùna inkhâwm àwm zãwk tak, zànah ber kher a inkhâwm tlat a! Kei chu ka dam phawt  chuan sunday  inkhâwm hi chu ka hmaih ngai lo, zànah(Sunday leh Inrinni) pawh ka hman chuan ka ti ve hrâm hrâm, Nilai zàn erawh hi chu ka inkhâwm khât viau thung, țhalai thil tihah erawh ka tel ve ziah thung bawk.

Fùr lo thlen hma tak takin ka pate pahnih chu Nu Mawii chhûngte hnéna zin tùrin an chhuak a, ka tur lui ve deuh a ni. A haw tùr kan dang tawh a, tunah an innei tawh bawk nèn, a chhûngte hmuhpui thuai kha ka pa tihmâkmawhah ka dah ve tlat a ni, ka pa pawhin a hnial lo bawk.

Ka pate awm loh chuan Sti riakah ka sâwm a, ka hlau chuang lo nain Sti a awm hian a nuam ve a, mahnia kan in lian puia han awm rek rek chu a khawharthlâk êm mai, Sti a țawng duh a, a reh lo deuh ang.

Zan khat chu Rinsiama a lo lêng tlat mai, Sti'n a hrilh a ni chiang mai, ka zawh rûk lah chuan min chhâng țha duh dêr lo lehnghâl a, a lo lêng chu pawi ka ti hran lo. Damon-a a rawn lêng hman si lo va, kawm tùr mi dang an awm ve hi ka lãwm zâwk a ni. 

"Tikhân, lo inkàwm r'u, in tùr ka lo buatsaih ang," tiin ka tho a, hun thâwl pêk dun ve ngei ka tum a ni. Sti chuan," Ni e, inlêng i nei ve mang si lo va, awt deuhin min lo thlîr mai rawh," a lo ti salh a. Nui hawk hawk chung hian," Ka awt hran lo na che uin, intithei viau chuang suh, naktûk zànah chuan..." tiin ka sawi zawm duh lo va, choka lamah ka lût ta nghâl a.

Khua a dur deuh vàng nge, zanin chu zan dang aiin a lum viauin ka hria, sûr se a țha ang, a súr chuan  kawrlum hák a ngai leh ngei ang a, ka ke hmâwr a vawh phei chuan tlawh lum tùr kha ka duh leh ngei bawk ang chu; mahse, Sti awm lai a nia, ka huphurh lêm lo. Ka khumah kan mu dùn a, a duh lo chung ka va khan lui țhìn a, a țê chhe nasa thei viau nghe nghe a ni; mahse, min nsm sawn ngai chuang lo.

A tûk zàna Damon-a a rawn lèn chuan thei lam ei tùr a rawn keng nual a, Sti chuan ka beng bulah zawi sap hian," Mâkpa rangkachak tùr," a ti a, kal sawn nghâlin," Apple kha ka lo zai dâwn em ni ang? A tharlâm sawr sawr bawk sia, a tui ngawt ang," a ti a, dawhkàna Damon-a thei rawn ken chu a khai sawn nghâl a.

"A pawi miah lo, i peih phawt chuan," ka lo ti a, ani lah chuan," Kei chu i chhiahhlawh mai ka ni e," nui duh miah lo hian a ti leh kher a, han sih vak ka châk kher mai, a tih dàn kher kher kha.

Hun thâwl chu min pe ve ngei a, ngai ka ti lêm lo nain room lamah min luhsan daih sia, tu ma dîpdàl lohin innghèng chialin kan țhut leh tâk kha. 

"Huan kan nei a, nakinah thlai leh thei a rah hunah i kal ve duh ang em?" a tih chuan," In nei tak tak maw?" ka ti vat a, ka en nghâl vat bawk a.

"Nei e, a hla deuh hlek nain a hmun a nuam a, hun âwl ka neih chuan ka kal ve fo asin," a ti leh a, huana a chetla tùr chu ka mitthlà chhin a, a inhmeh lo dâwn riauin ka hre tlat pek a nih chu. Ani hi zawng, chapo hmel deuh lek leka țawng leh nuih te, hmelhmai siam danglam paha a han țawng țhinte leh a kut han chelek hrim hrimte hi a zei a; mahse, chu chu  nula bulah a nia ka tih ni, huana chetla tùrin ka mitthlà thiam chiah lo a ni ber ang chu.

"Kal i phal ve chuan ka kal ve duh, engtikah nge kan kal ang?" phûr rilru tak chuan ka ti a, huana a chetla ka hmuh theih chuan ka vànnei dâwn êm asin, bâkah, min sâwm ve duh hrim hrim pawh chu ka lãwm, a bula kal ve tùrin min duh tihna a nia, làwmawm deuh asin.

"Hun remchâng hmasa berah kan kal dâwn nia, ka pain kan huan hmun a lei dâwn khân min râwn der ve a, ka ngaihtuah ngai loh thil a ni nain khawpui chhuahsan zeuh zeuh nân țha dáwn riauin ka hria a ni, lui lian vak lovin huan chu a tan tlang a, sangha, kaikuang leh chakaite pawh an awm ve nghe nghein ka hria.  Mi huan kan lei chu a ni tho nain kan leina a rei ve leh tawh a, thei pawh kan phun belh țeuh tawh a ni, a țhang duh deuh phei chu an puitling nual tawh a, thei kung awm sa lah an puitling vek tawh bawk nèn, a nuam ve reuh asin," tiin chhuang takin an huan chanchin chu min hrilh ve sup sup a.

Ka ngaihtuah zâwng pawhin ka chãk tù tú tawh. Khawiah emaw han lèn chhuah hi ka châk ve țhìn a; mahse, lèn chhuah dáwnin lènna tùr ka hre bawk si lo, chhuaka an huan ka han hmu thei tùr chu ka phûr lo thei lo a ni. 

Ka pate lo haw hnuah ruah a sûr nasa ve țan ta. Fùr a ni miau tawh mai a, ruah chu sûr tùr a ni rêng a ni. Ka pate awm loh lai kha chuan ruah a sùr hian ka ngaihtuahna a kal kual vak țhìn a, ka pate zinnaah chuan ruah a sûr ve vak ang a, an awmna lei a tawlh anga, ka hmuh phâk lohah hian an boral dùn mai ang tiin thil țha lo tak tak ka ngaihtuah kual ta țhin a, lo haw vat vat se ka ti țhin viau a ni. 

Nu Mawii'n puan leh slipper min rawn hawn a, puan chu man to tak chu a ni lo nain min rawn hawnsak duhna thinlung avàng chuan ka lãwm a, min ngaihtuah ve reng a ni tih ka hriat phah a, ka lãwm lo thei lo a ni. Ka pa ve thung chuan rucksack min rawn hawn ve thung a, a țangkaina tùr ka hre lo nain min rawn hawnsak ve miau mai a, ka lãwm tho tho. Kei pawhin an lo haw huna siam atân ka tih cake chu ka ur ve tlauh tlauh a, a tih dàn chu youtube lamah en pah zélin hlawhtling takin ka ur zo ve ta a, ka rin aiin a tui daih zui lehnghâl a, anni pawhin tui an ti ve ngang a niang, kan ei țeuh mai.

Zànah ruah a sî seng seng reng a, Damon-a pawh a rawn lèn peih ka ring lo. Chhûm a zîng deuh chuai lehnghâl a, khaw awm dàn chu ka ngaina lo takzet a ni. Michael-a number ka hmet chhuak a, 'Vawiin lam a rawn lang si lo va, va be mai mai teh ang' tiin, min rawn chhâng ve vat a.

"E, vawiin lamah i rawn kal si lo va, i buaipui zo thei maw?" ka ti a, chhùna ka biak bâk kha ka be zui ta si lo va, a hlawhtling em tih ka hre lo a ni.

"Aw, buaipui zo thei e, min rawn zâwt har ka lo ti tawh khawp a, ka lo vui lek lek hial a ni," tiin a dàn ngai tê chuan a rawn nui lehnghâl zat a, inthiam lohna nei deuh hlek chung chuan," Nia, i țhiannu hi ka mãwl thei êm a ni, i țhian nih pawh hi ka tling zo lo chu a nih hi," ka ti sap a.

"Hei, ka ti mai mai a nih kha, vawiin chu ka awm si lo va, min lo ngai em? I khua a har viau lo maw?" a rawn tih leh chuan," Har ve bawk ang chu, titipui tùr ber kha i awm lo tlat si a," tiin ka chhâng a, chutah," Khawiah nge i awm a? I lêng chhuak a ni maw? Nula inah em ni?" tia nui chungin a thuphungin ka zâwt a.

"Lêng chhuak lo, vawiina ka chhuak ka haw, in ka thlen hnu lawkah ka nu a chau deuh thut ringawt a, lèn chhuah lam pawh a lang thei lo," a rawn tih chuan,"A ni maw? Eng vàng nge a? Tunah eng nge a an tawh?" tiin ka zâwt nghâl vat a.

"A zia hret hret chuan ka hria."

"Damdawi inah in kalpui nghâl lo em ni a?" ka tih leh chuan," A ngai lo ang, bâkah, amah hian damdawi in luh a duh ngai lo va, a duh lo chung panpui kha kan duh bík lo va," tiin min chhâng leh zêl a.

Kan inbiak zawh chuan ka pate hnênah chuan thil awmzia hrilhin ka insiam sawk sawk a, ka pa chuan car chahbi min pe vatin," Fîmkhur deuhin khalh la aw, i thlen hunah chanchin min rawn hrilh ve ang a, kan lo ngaichang reng ang," a ti a, Nu Mawii'n ka inthuam lum loh a lo hlau a niang, coat min lo lâk chhuahsak bawk a, tlaivàr pawh ngai thut se tiin ka insiam lâwk deuh reuh a, ka hmanhmawh nèn, ka chhuak zui ta nghâl a.

Michael-ate in ka va thlena min lo hmuh chuan mak a lo tih hmel viau," I lo kal dâwn tih sawi la chuan ka rawn hruai mai tùr che a nia," a lo ti vat a, mak a ti hmel phèna a hlim hmel erawh ka hmuh hmaih chuang lo.

"Ka rawn inkhalh thei reng alawm," tiin ka hawi kual a, in chhûngah chuan an lo awm ve nual mai, an chhûngte deuh vek an nih ka ring teh ngawt a, chhúngkhat an ngah êm kha, e, taka, Damon-a pawh a awm ve maithei a ni.

"Lo lût rawh, a zahthlâk loh, chhûngte vek an nih hi," tiin min hruai lût nghâl a, a nu mutna room lamah min luhpui zêl a, khumah a nu kiangah chuan hmeichhe pahnih an lo țhu a, khum bulah sofa hûngin chutah chuan pathum an lo țhu bawk a, min hmuh chuan min be lêm lovin min lo nuih sak sak hlawm a, an țawng ring ngam hlawm lo a nih hmel.

"Nichín kha chuan a rawn țawng ve peih a, tunah chuan a peih leh tawh lo va," tiin a nu chanchin chu a sawi sap sap a, țhutna a awm loh avàng chuan kan ding rei lo, bâkah," Tih theih kan nei chuang lo va, hmun dangah awm ang," a ti deuh tlat a, hrehawm ka tih a hlau pawh a ni mahna!

Sitting room lama kan phei chuan Damon-a rawn kal ve chiah nèn kan intâwk ta chiah mai, ka ding dat a, a lo awm ve a nih chiah hi, ka nuih sak a, ani erawh chu a lo nui ve hauh lo thung. Min en rûn phawt a, chutah, Michael-a a melh leh rulh a, nuam lo ka ti sung sung thei hial mai. Biak mai dàn tùr pawh ka hre lo, mi an awm ve nual bawk sia, ka din dàn lah chu a lài hû mai lehnghâl.

*THEIHTÂWP CHHUAH LEH BEIDAWNG LOVA BEIH ZÊL HI HLAWHTLINNA BUL BER A NI*