☆HLWILY☆ - 4 By Dingdi Pachuau

 ☆HLWILY☆ - 4 By Dingdi Pachuau

Class X ka zir kum, kum tàwp lam ațanga ka star țan tawh kha a ni a, kum 10 deuhthaw zet a  liam tawh hnu, kum heti chen a liam tawh hnuah pawh hian amah ka hmuh apiang hian ka la danglam zêl chu a nih hi. Mi hi an ni ve țhin tho ang em le? An star êm êm an hmuh hian an awm dàn zawng zawng a buai zo vek ve tho em? Kei chu hei, ka la ni tluang zêl chu a nih hi, tunah pawh hian ka dik lo leh vek tawh! Mahse, mi dang hriat erawh ka hlau hle thung.

"Ni dâwn tak e! Vawiin hi kan inhmuh khâwm hun tùr kha a ni leh tawh tak alawm," Miss Mabiaki chuan a ti sap a, hre thiam vak lo chuan ka en phei zauh a, mi dangin Sir Damon-a an lo chiauau lai chuan Mabiaki chuan," Kum khatah, a tlêm berah vawi thum zirtîrtu leh he school-a thawkte hrim hrim kan inhmu khâwm ziah alawm," a ti leh sar sar a, ka thawh hun chhûng thla khat êrh âwrh chauh a la nih vàngin ka la hre ve lo a nih chiah hi.

"Meeting room ai chuan staff room hi a nuam daih zâwk ang a..." Damon-a chuan a ti a, Michael-a chuan rang zet hian," Nia, nuam daih zâwk ang, hetah hian ti mai ang u hmiang," a lo ti vat a, a nui pah bawk a. Michael-a chu ka en hau ringawt, he pa hian Sir Damon-a hi a ngam ka ti, a thawhna school neitu a ni a, tuna a țawng dàn angte khân mi dang hi chuan fiamthu pawhin an chhâng ngam ve hauh lo ang tih ka ring a, ințhian leh inhmel hriat ţha tak an ni lo a nih chuan Michael-a hi  a zak lo ve hrim hrim a niang.

Meeting kan neih chhûng chuan Sir Damon-a chu a mitah tak vawikhat mah ka en lo, ka hma hla deuh taka min hmachhawn zâwnga țhu ni mah se ka en ngam chuang lo, a âwm achin hnuai lam chu ka en ngam ve țâwk a, a inthuamna chu  ka en uluk viau a ni, simple viau angin lang mah se a inhmeh ka tiin a màwipui ka ti thlâwt. Mi dangin ha ve ta se, entîr nân, Michael-a emaw ka thawhpui mipa dang hian ha ve ta se ani ang êm hi chuan an inhmeh ve thei lo hrim hrim, he pa hi chu a țha ve thlãwt a, sawisèlna tùr ka hre lo, a inthuamna engkim mai hi a inhmeh vêl vek mai a ni.

"Eng nge i ngaihtuah ngur ngur a?" ka beng bul deuha Michael-a'n a rawn tih sar sar chuan ka phu deuh zawk a, phâwk zet hian ka en phei hâ bawk a, ani lah chuan mak tih hmel deuh hian," Eng nge? Thil sual ti ang mai! Min en kur kher suh, thu sawi ngaihthla ta che," a ti leh duah a, chutah," Eng nge a?" a rawn ti țha leh a, ka ngaihtuahna ram atànga ka harh chhuah tawh avàng chuan," Eng mah," tia chhângin ka nui sak a, ka hawi sawn ta nghâl a.

Kan inhmu khâwm zo kan haw tùr Scooty bula ka din lai chuan Michael-a chuan min rawn hnaihin," Nichin khân eng thil maw i lo ngaihtuah a?" a rawn ti țha leh a, en duh lo mah ila min en reng tih ka hria. En lo chuan," I va ho mai mai tak! Mihring ka ni ve a, thil eng emaw ngaihtuah châng chu ka nei ve bawk ang chu," ka lo ti mai a, ani lah chuan," I ngaihtuah ka hria, keimah  ka ni tiraw? Min lo ngaihtuah vung vung chiang a ni, i hmêl aţang khân ka hria," a rawn ti leh a.

"I va hre thei êm êm!" tiin ka nui a, ka helmet chu ka khum ta nghâl a, ani lah chu tàwp mai la tum lo tih hriat tak hian," Ka lo thlah haw dâwn che em ni ang? In inah rawn pêngin kan sawi fel dùn nghâl ang a?" a ti leh a, chutah chiah chuan ka en ve ta chauh a; mahse, ani erawh chuan hmun dang a lo en daih tawh a, a enna lam chu ka en ve vat a, kan piah lawka Sir Damon-a, car pana a kal mêk chu ka hmuh chuan tihdanglamin ka awm leh nghâl vat a.

"Ni dangah le, tih tak takin ka la sâwm zâwk ang che," ka ngawih deuh vang vang hnuah chuan ka ti a, Sir Damon-a ka hmuh leh tâk avàngin ka chhâng thei lawk lo a ni.

"Tak tak maw?" Min la en chuang lo, a en ngai a la en ngar mai. Ani pawh hi mipa mah ni se Sir Damon-a hi chhe lo a ti ve tho a nih ka ring, mipa tân pawha chhe lo leh pà tih tùr chi hi a ni ve miau mai si a, ka dem bîk lo ve, a hmuhnawm ve êm a ni.

Michael-a hi a țawng duh viau a, office-ah ka bulah a ţhu bawk a, min be nêltu ber niin kei pawhin ka nêl ve viau tawh a, țawng duh ngeiawm tak ni si lo hian fiamthu nèn min fiam a, a châng chuan a fiamthu hi ka hre thiam lo lek lek zâwk țhìn, fiam lah hi a dãwl khawp mai a, hmeichheho pawhin kan thawhpui mipa zîngah chuan kan ngam ber rêng a ni. Bâkah, a mawng a zãng a, a țawng duh ang tluk zet hian a thâ pawh a țha a, a tlàwmngai thei viauin ka hre bawk, mi fiam zuk zuk hrât viau mah se bialnu țha tak a neih ka ring tho, tlangvâl hmelchhe lo tak leh hnathawh nei a ni miau a.

"Niang chu!" nui deuh chung hian ka ti a, chutia ka chhàn vàng chu a niang, min rawn en ve ta nge nge a. Nui hmêl pu ve hauh lo titak hmèl zet hian min rawn en a," Hlen chap, sût leh theih tawh loh!" a rawn tih chhuah meuh chuan ka nui chhuak ta hak a! Ka insûm hman lo, a țawngkam hman chu a naupangchhe țawngkam lutuk a, ka nui lo thei lo.

*******

Sir Damon-a ka hmuh zauh zauh theih avàngin school kal chu ka phûr thei khawp mai a, incheina uar tak ni lêm lo mah ila ka hmuh ka rin țhin avàngin ni tinin ka school kal tùr chu ka inchei uluk ve viau țhin a ni, ka hmuh loh rei deuh hi chuan ka haw hi ka nguai haw ruaiin ka hre țhin, bialnu neiin ka rilru ngaihtuahna rawn hre ve lo mah se a hmêl hmuh theih hrim hrim hi ka lãwm a ni tawp mai. Bialnu nei lovin min duhin min han ngaizâwng phei se chuan...

Zirtàwpni a ni a, 1st period ka kal zawh chuan ka off a, ka phone ka kheuh nauh nauh lai chuan ka dàra rawn khawihtu an awm avàng chuan ka hawi chhuak ta vat a, Michael-a lek lo niin, a lo nui sâng a, a kut erawh chu a la sawn leh ta vat a.

"Phone i bih nasa ngur ngur lutuk a, ka biakna che pawh i hre lo," tih pah chuan ka bulah chuan a chair chu pawt pheiin a rawn țhu thla nghâl a, kei chuan," Pheikhawk ka lo en a, a tlâwm hlawm sia, ka pa tân ka lo awt deuh a," ka ti a, mawi ka tih deuh ber pic chu ka hmuh nghâl zat a. Ani pawh chuan thlêk vang vang pah chuan," A nih kha, patling bun atân phei chuan a țha ngawt ang, a zàn hmel reuh bawk si a, a mawi lo chuang miah si lo," a ti ve nghâl mai a.

Thil dang ngaihtuah miah lova pheikhawk chi hrang hrang thlalãk kan en lai chuan," Hello..?" tih thâwm a rawn awm a, ka phu zawk a, Michael-a lu chu ka va tauh dat mai. Chu pawh chu ngaihtuah lo chuan kan hawi chhuak dùn vat a. Chu aw chu ka hriat chian lutuk tawh avàngin ka awm dàn pawh a danglam leh nghâl vek a, chhûngril lamah phùrna nasa tak leh nuam tihna chu a inpawlhsawp a, mitmeng mawi ka tih êm êm țhinin chîk tih hriat zeta Michael-a nèn min en tawn sek tâkah chuan chhûngril lamah ka țim deuh seng seng mai.  Ka awm dàn phung pângngaia awm tumin chu mitmeng mawi tak ațang chuan ka mit chu ka la sawn ta nghâl a, ka ţhut dàn pawh ka siam rem ve nghâl bawk a.

"School-ah inngaihzàwnna boruak a awm tùr a ni lo, School rules a nih chu," ti nghutin," Min rawn hmu rawh," ti leh zatin staff room ațang chuan ding zet hian a kal chhuak ta a, ka en zui reng a, a thil sawi chu ka hre thiam chiah lo, Michael-a nèn chuan kan inngaizâwng emaw a ti a ni ngei ang, a àwm ang lo lutuk a, ka nui chhuak hak mai. Chutah, Michael-a chu enin," Eng nge a sawi awmzia kha? Kan inngaizâwng emaw a ti a ni maw?" ka ti a, ani chuan ngaihpawimawh loh hmel zet hian a dàr a sàn ãk a, ner deuh nâng hian," A nih hmel viau mai," a lo ti duh chauh a.

"A lung a awi vak lo a ni ngei ang, 'Min rawn hmu rawh' a tih khân tu zâwk nge min en? Ka lo en miah lo va," ka ti leh sap a, ani chuan," Keimah maw le, nakinah ka han hmu ang," a lo ti leh mai a, a ngaihpawimawh hmel vak si lo va, nuam lo ka ti ru viau mai. Kan school neitupa a ni si a, a lung kan tihàwi loh hlauh chuan min bàn theitu ber a ni si a, rilru nuam lo ru zet chuan ka ngawi ta rauh rauh a.

"Engah mah ngai duh suh, ka han hmu ang a, a fel vek mai ang," ka hmai bula a kut rawn vai lauh lauh pah chuan a ti a, ka ngaihtuahna ram ațanga harh chhuakin a hmel chu ka en chho a, a lo nui sâng a, za lo zet hian ka nuih lêt ve sak a.

Michael-a kal hnuah chuan mi dangte pawh an rawn lût ve a, an țawng bawrh bawrh a, kei erawh chu ka ngawi reng thung. Michael-a chu engtin nge a lo tih ang tih mawlh ka ngaihtuah a, a thil hmuh ringawt țan chhanah hmangin a lo thinrim khum ang tih mawlh ka hlau a ni, engati nge maw kei pawh khân khati khawpa hnai khân ka lo țhutpui ni? Ka ngaihzâwngpa chu ni se thuhran, ka bialpa pawh ni hlei lo khati khawpa hnaihchilha lo țhutpui rêng rêng...

Nilêngin ka awm a nuam thei ta hlek lo mai a, Michael-a erawh chu a zia a la ngai reng tho. A nui leh reng peih tho a, fiamthu thawhin kei pawh chu min fiam a, a awm dànah engmah a lang lo. Engtin nge Damon-a chuan a lo tih tih chu ka zâwt zawk nain nui chunga engtin mah a lo tih loh thu min hrilh avàngin ka zâwt zui  ngam tawh lo kha a ni a, a thil min hrilh chuan min hnèm hran lo khawp mai.

Thawhțanniah Damon-a chu a lo kal leh a, hmuh ka châk viau țhìn kha a ni a, tunah chuan hmuh ka huphurh rùn tawh mai. A rûkin ka han infuih a, 'Engmah thil sual ka ti lo va, Michael-a nèn lah kan inngaizâwng lo va, hmuh ka huphurh tùr a ni lo' tiin ka infuih a; mahse, a hmêl ka hmuh chuan chûng ka infuih vena pawh chu a thlâwk bo nghâl vek, min rawn kohtîr zui.

Huphurh zet hian in chung lamah chuan ka chho a, eng thil nge min sawipui ang? Eng vanga min hmu duh nge a nih? Michael-a class a kal hlàn a ni a, staff room-a awm pahnih chu mipa ve ve niin anni lah chuan ka boruak tawn chu an hriat ve loh hmel bawk si, kal pah chuan thâwk ka la hawk hawk a, ka zàm lutuk vàng chu a ni ber ang chu, ka kutphah a thlan dap dap hial mai, chuti chung chuan ka kut hmâwr chu a hit vek thung a, a fála inhmuh chu ka huphurh ngawih ngawih mai.

Kawngkhàr bulah chuan ka ding vang vang phawt a, chutah, ka kik ka chauh a. Ka kut thlan dap dap chu nghet zeta hûm ruhin a room chhûngah chuan ka pên lût ta a, amah chauha a lo awm ka rin tehlul nèn, awmpui a lo nei tlat mai. Hmeichhe nui hak hak ri leh mipa nui ri ka hriat ruala anmahni ka hmuh nghâl avàng chuan ka ding chat a, hmeichhia pawh chuan min rawn hmu ve nghâl thuai a, min hmachhawn zâwnga a țhut miau avàngin, a hnuah Damon-a chuan min rawn hmu ve chauh a.

"Miss Ruatkim, ka rawn tihbuai loh hrâm che ka beisei, lo ţhu rawh," tiin ka țhutna tùr min kawhhmuh nân a lu chu a thle zoh a, ka țhu vat a. Chu hmeichhia chu ka la hmu ngai lo, a bialnu tu emaw ber a nih ka ring deuh ngawt a, eng atân ber nge min rawn koh ang aw tih chu ka ngaihtuah a.

Chu nu hming chu Lydia a lo ni a, Damon-a țhianpa nupui niin Damon-ate țhian dun chhuah dun hlàna lo awmpuia lo titipui tùrin min ti a lo ni. Mizo a ni lo va, Mizoțawng pawh a thiam lo rêng a, kei English teacher ka nih avàng leh hmeichhia ka nih ve tho avàngin min rawn ko a lo ni.

A țawng duh barh barh viau a, English pawh a thiamin thil a hre zau hle a ni. A nui duh bawk, amah a changkãng reuh viau nain a inla-changkãng hran lo va, a bula awm pawh a nuam viau mai. A titi siam siam a, țawng duh viau mah se mi tute emaw țawng duh deuh an sawi ang lo takin ka țawng vena hun min siamsak zêl tho. Mizoram a rawn kal vawi khatna a ni a, a hmuh dànte chu ka zâwt a, titi chho zêlin a chanchin, a pasal nèn an intawn dàn, College an kal hun lai leh Damon-ate nèn an inhriat chhoh dànte thleng chuan a sawi siam siam a, ka hriat loh tùr țha țha ka hriat phah țeuh mai, kawng lehlamah chuan ka hlâwk phian ka ti, Damon-a chanchin ka la hriat ngai hauh loh ka hriat phah ta țeuh si a.

Chawhma hun pum chu Damon-a room-ah chuan hun ka hmang ta ringawt mai. An țhian dùn an rawn lët har si, ka class tuin nge lo hnawh khat ang le?  Damon-a'n min ko a ni tihte hi an hre hlawm ang em? Michael-a'n min lo ngaihtuah viau ka'n ring teh ngawt a, class a lâk hlànin ka awm lo daih sia, ka phone ka keng chho bawk si lo nèn, chanchin ka hrilh thei dèr bawk si lo.

Dâr 12:40-ah an rawn lêt ve ta țâwk a, ei tùr an rawn khai lût nual bawk. 'Ka chàwl ve thei ta' ti rilruin ka han thaw huai a, ka rilru hria ni àwm tak hian Damon-a chuan," Ei tùr kha ei rawh, i ei zawh hnuah i chhuk  chauh dâwn nia," tiin min rawn nuih suk a, English a hman ve tho avàng chuan Lydia pawh chuan a lo chhunzawm vat a, chutiangin a pasal pawhin. Ei tùr tui zet kan ei ho hnuah chauh ka chhuk ve ta țâwk a, ka thaw huai huai mai.

Michael-a'n min lo hmuh veleh chuan thil awmzia min lo zâwt chîk nghâl zat a; mahse, thil làwmawm lo lam a ni lo tih ka hrilh chuan nui sâng hian," I han khùr zawih zawih ang tih ka lo hlau khawp mai a," a ti a, kei erawh chuan," Mai mai a, ka hlau hleinem," te chu ka han ti ve a, ka huphurh ang êma thil a thlen loh avàng chuan ka thlâ a ngam leh tawh viau a ni.

Michael-a chuan min biaka min bekbawr a țhulh chuang lo va, min hnaih loh phah chuang lo. Kei erawh chuan a hriat loh chuan hlatsan ka tum ve hrâm hrâm a, Sir Damon-a'n min hmuh dun leh ka hlau tawh a ni. Ngaih dàn dik lo a neih leh ka hlau a; mahse, Michael-a erawh chuan a pawisa lo viau thung chu a nih hi, min  ngaizâwng bîk chuang lo tih ka hriat avàng erawh chuan ka ngaih chu a ngam deuh a.

*******

"Vawiin chu ka rawn pêng haw ve tawh dâwn, a la hma tho bawk si a," Michael-a'n staff room ațanga kan chhuah paha a tih chuan," I thu thu le, Boss," tia nui chung hian ka en a, mi dang kan thu sawi hre phate chuan," Eu, a va nuam àwm bîk ve!!" an lo ti sap sap a, an nui pãt pãt hlawm bawk a, Michael-a chuan,"Nuam ang chu, an in ka la hmuhpui lo va, hei a vui a vui tawh a, kan inkâr a chhiat phah thei takngial dâwnin ka hria," a ti leh zat zat a, run deuh hian ka melh phei a.

"Eng nge, mi awm lai hi chuan khatiang khân min melh rum a, an awm loh laia min melh dàn ang khân min melh ka phal tawh lo mai ang aw," tiin min rawn en rân a, nui hmel a put tho avàng leh a mit a siai deuh sak sak avàng chuan ka nui lo thei lo va, ka nui leh ta nge nge a.

"Kha, i nuih leh tho kha aw, mi dang hmuh laiin min melh rum kher zêl suh," tiin min rawn kuah thuak a, ka tàl hman hma chuan min thlahin," Tlãn hmasa rawh, ka rawn zui ang che," a ti leh zat a. Ka scooty la chhuaka ka tlàn chhuah dâwn lai chuan kan piah lawka Damon-a ding reng chu ka hmu zawk a, min lo en kur niin. Michael-a nèna kan inchhàn uan dàn zawng zawngte kha a lo hre pha vek ang em? E, hre pha lutuk ang, kan inhlat lo êm mai. Kan inngaizâwngah a ngai tak tak ngei ngeiin ka ring.

Michael-a chu kan inah chuan a awm rei zêk mai. Ka pa a lo haw ve tawh vàng  a ni, an pahnih chuan an titi hlut a, ka pa thil sawi apiang mai chu phûr zet hian a lo sawipui ve thei zêl mai a, an țawng bawrh bawrh dàn ațang chuan ka pa chuan kawm nuam a ti tih ka hre mai. Titipui tùr hi a nei lo ve thei êm a, kei leh Nu Mawii hi chu hmeichhia kan ni tlat mai a, mipa titi kan zàwm thiam ve tlat si lo a ni, a lêng rei viau pawh chu a àwm viau e.

Chuta țang chuan Michael-a chu a lo lêng ta zauh zauh a, pawi ka ti hran lo. Ka pain țawngpui tùr a neih phah a, kàwm hlim theitu leh mipa a nihna anga mipa titi sawipui tùr a nei chu ka lawmpui a ni. A chângin carrom board te reuh tê kan kawl ve ràn chu an pen a, a chângin Chess, a chângin Chinese Checker kan ti thùl, kei ngei pawhin ka hlimpui thei khawp mai.

Ka pa chuan min dem chho ta zauh zauh a, kei erawh chuan," Pa, ka thawhpui leh ka țhian a nia, chubâk chu kan inkârah eng thil mah a awm lo; mahse, a lo lêng lo ang tih a hlauhawm ka ti, kan hlimpui dùn thei si a," ka ti țhìn. Kan hlimpui ve êm asin, kan in chhûngah pawh nui ri rawi rawi hriat tùr a tam ve ta si a.

School lamah erawh Damon-a hmel hmuh tùr a vâng ta deuh. Ka han melh ru deuh țhìn a nia; mahse, a vâng viau. Thla khatah vawi khat chu ka hmu maithei tih chauh a ni ta, phûr taka school kal ţhìn kha ka phûr lo thut a, ka phûr lo chu rehin ka phûr leh a, tunah erawh hi chuan ka phûr zar ta lo. A hmel hmuh kha huphurh ru viau țhin mah ila tunah hi chuan hmuh leh ka châk tawh, ka hmu khât lutuk a, ka ngai leh tawh a ni.

"Vawiin hi i rawn chhe lo tlatin ka hria, umm, ka hria e, new hair," tiin Miss Rita-i chuan min nuih har har a. Nia, nimin tlaiah ka sam ka tan tãwi a, coffee rawngin ka dye bawk si a, ka lang danglam viau ang. Sam ngai reng put hi ka ning thut țhìn a, ka tidanglam ve zauh zauh rêng a ni.

"Ka duh ber rawng ka thlansak a nih kha," Michael-a chuan a lo ti vat a, hmeichhia ka thawhpuite chuan an aw an lo thian sap sap a, Michael-a chu nui chung hian ka va melh phei a, a thluak țha lutuk leh thu dik ni àwm taka dâwt, a thu tak sawi hmiah hmiah thei hi ka làwm țhìn viau a ni. Dâwt pawi tak a ni chuang si lo va.

"In nu inhmeh tùr chu i hre hle mai a," mipa lamin an lo tih chuan nui var var chung hian," Keiin ka hriat lohin tu dangin nge hria se in tih?" a lo ti leh vat a, an nui ta dar dar a. Dàr a ri a, kan titi zawm thei ta lo.

Vawiin chu Meeting neih ni a ni a, Sir Damon-a ka hmu leh thei tawh dâwn a ni. Ka hmuh theih dâwn avàngin ka hlimin ka phûr ru viau nghe nghe a, ani'n ka rilru rawn hre ve lo mah se ka hmuh theih hi chuan ka lãwm tâwk viau a ni.

Chhe lo tak a ni, chhe lo tak hi a ni mai. A inthuam dàn zawng zawng chu a inhmehin ka duh dàn vek a ni, a hmel, a vun rawng leh a thawmhnaw inbel chu a inchawih hliah hliah bîk a, ka mitah chuan a langsàr larh bîk a ni.

Thil pawimawh tak tak sawiin kan ngaithla a, school chungchânga hriat tùr leh dàn eng eng emaw inhrilh hre lehin kan hmasâwn dàn hrang hrang kan ngaithla leh a,  a tàwp bera dàn thar a puan chuan rilru a verh zak mai.

"School dàn thar pawimawh deuh: School Compound chhûngah affairs neih phal a ni lo, chutiang thil chu a lo awm a niha man chhuah palh kan awm a nih chuan inngaihdamna a awm thei lo ang."

Ka inhre chhuak nghâl cham cham mai, Michael-a pawh ka en phei ngam lo, he thil hi keini pahnih vànga a siam thar ni ngeiin ka ring, a zahthlâk ka ti a, ka zak a, kan pahnih atân last warning a ni ngei ang tih pawh ka hria.

Michael-a a rawn pêng haw a, ka pa a lo la haw loh avàng chuan kan meeting chungchâng chu sawiin ka titipui a. 

"Min ringhlel chiang a ni tiraw? Kan inngaizâwng tawp si lo va, min sawi chhan ni tlatin ka hria a, a hrehawm ka ti, tlêmin keini pahnih pawh kan fîmkhur a ngai a ni, min fiam zûrh zûrh tawh loh deuh a ngai dâwn a ni. Inngaizâwng lo mah ila min rinhlelh tlat chuan thil a pawi ve thei tlat," tiin ka thiam tâwk chuan Michael-a chu ka hrilh fiah ve a.

"Dàn hi chu bawh chhiat tùra siam alawm a nih, engah vak ka ngai lo," a lo ti thung a, a nui sâng pah a, chutah,"I rilru tihah miah suh, engtin mah min ti thei teuh lo mai, min bàn hauh lo ang," engah mah ngaih loh hmel zet hian a ti leh a.

*MAHNI CHAUHA AWM HUN LAI TAK HI RILRU INVÈN ULUK HUN A NI, SUAL HNAIH HUN LAI TAK A NI*