☆HLWILY☆ - 5 By Dingdi Pachuau

 ☆HLWILY☆ - 5 By Dingdi Pachuau

Ani hi chu mipa a ni a, kei chu hmeichhia. Kan inkârah eng mah awm lo mah se rinhlelh thilthua hmingchhe thei kan ni, kan hming lo chhe ta se, kei chu hmeichhia ka nih avàngin ka tân a pawi thui thei viau ang a, ka hmalam hun thui tak a chhiat phah ngei bawk ang. Ani zawng mipa a ni a, a hming pawh a chhe rei ve hauh lo ang, mipa leh hmeichhia chu kan inang lo êm! Bâkah, school ațanga hmingchhiaa hnawh chhuah ngai khawp nih chu ka duh bîk lo hrim hrim.

Ka pa a lo haw chuan hlim takin an titi leh nghâl bawrh bawrh a, dam lohna pawh a nei lo. Zanriah ei khamah erawh chuan," Ka lu a nuam vak lo deuh a," tiin a room lamah a kal ta daih a, ka zui ve vat a, khuma a mu tur chu a pang ka dehsak a, a lo sa var mai.

"Pa, i lo haw kha chuan nuam lo hmel pawh i puin ka hre lo, nge  vawiin lamah i lo nuamsam lo sa deuh reng tawh em ni  zâwk?" tiin ka zâwt a, ani chuan," Nia, chhùn lamah pawh khân tlêm chuan a nuam lo deuh tawh a; mahse, eng tham mah a ni lo va, damdawi erawh ka han hmawm hrâm a, min chhâwk a nih ka ring," a lo ti a. A mutna tùr chu ka lo siamsak vat a, rizai chu hlìmsakin a mut hnuah chuan ka sintîr a.

"Inah haw daih mai tùr a nia, nuam lo chung chung chuan kal lui tawh suh, i nat phah vak zâwk ang," tiin ka zilh ve malh malh a. A damdawi dahna bûr lâksakin tui bottle ka la a, khum bula dawhkàn hniam tê chungah chuan ka chhawpsak nghâl bawk a. Nâ hi a nei khât ve a, chuvàngin ka ngaihtuah a ni, ka u tih lohah chuan amah chauh hi ka neih chhun a ni tawh a, rei tak dam dùnin hun hmang dùn reng ila tih hi ka duh a ni, ani lo min duattu tùr ka nei tawh si lo.

Ka phone a rawn ri a, Michael-a'n rawn lèn a tum niin, kan in bul mai a lo thleng tawh hi a lo ni a, han hnar chi a ni tawh si lo, ka pa chuan," Va chhuak rawh, min ngaihtuah a ngai hleinem, i nu Mawii a awm a, ka mamawh chuan ka lo ko mai dâwn nia," a ti a, ka pa mu chu en vang vangin," Aw le, Nu Mawii chu ka lo luhtîr nghâl ang," ka ti a, ka chhuak ta nghâl a.

Michael-a thil sawi tùr hriatzia hi chu aw... Ninawm miah si lo hian ngaihnawm takin a nunhlui, a têt lai leh lehkha a zir chhoh dànte chu a sawi a, ka lo inrawlh zauh zauh bawk a. Nui chunga a luck theih țhinzia a sawi lai chuan," Ka ring a ni, tunah pawh hian i kawp țûnin ka ring," ka lo ti zauh a, ani lah chuan," Loh theih nâng! Pakhatah ringawt chuan innghah ngam a harsa alawm, nang pawh hei ka hêl tlut tlut che a, mitmei pawh min la hmuh duh miah loh hi, thang tam tak kam a ngai alawm," a lo ti mai a, a la nui sâwng zui.

"Khatin min ti suh aw, i bialnute ka hmuh hunah,'Ngaihzàwn tlâk a ni lo, kalsan vek r'u,' tiin ka au lauh lauh ang," ka tih chuan a nui hawk hawk a, kei pawh chu ka nui ve tho a.

"Pawi lo, ka chang theuh mai dâwn che a. I hrilh nî là lá ațangin mi dang buaipui ka ngai tawh dâwn lo ang a, nangmahah ka insâwrbing thei tawh dâwn tihna a ni mai a," awlsam zet hian a lo ti leh mai a.

"Hei, chutin ti miah suh, vawiina school rules tharin a phal miah loh kha aw, hna chàn ka duh miah lo a nia," nui chunga ka tih leh chuan," School compound tih vêl hian min tibuai pha ve tehchiam lo. Chuan, dàn hi zam a nih chiah hian han palzùt salh mai hi ka châk ziah bawk," a rawn ti sar sar a.

"I hlauhawm e!"  Nui var var chung hian," Min hlauh loh tawp kha aw," tiin a mit chu a siai sak a, chutah," Nula tân ka hlauhawm loh, ka fel thei lutuk," a ti zui leh zat a.

Mut dâwnah ka pa chu ka tlawh leh zawk a, a pang a lo la sa deuh a; mahse, nichín ai kha chuan zia tawh tak a ni. Nu Mawii chuan a lo țhutchilh ràn a, a chal chu tuiin a lo dehsak a ni ngei ang, plastic bowl-ah towel vâr hi a lo la inchiah a. Ka han țhu ve leh rih a, amah a muthilh theih avàng chuan làwmawm ka ti a, a hnu deuhah phei chuan a pang pawh a dai ve thei ta bawk a, Nu Mawii hnênah chuan mutsan tùrin ka ti a, kei pawh mu tùrin ka room lamah chuan ka kal ta nghâl a. A khawsik chuan a thlah chhawm ve mai ka ring a, a ngaihtuahawm lo tùrah ka ngai.

A tûka ka thawh chuan ka pa room lam chu ka pan vat a, a lo harh tawh nain a lo la tho chhuak peih meuh lo niin, Nu Mawii chuan a lo buaipui hman leh tawh a. Nizàn lama ka mu ta kha țhangharh chhin pawh nei miah lovin ka muhìl bawrh bawrh a ni si a, ka pa chu lo buai deuh pawh ni se ka hre tawp nâng, kan ina Nu Mawii lo awm kher kher hi chu kan vànnei ngawt mai.

Inrinni a nih vàngin school kala chhuah a ngai lo va, nilêngin ka pa chu ka awmpui ta a, chhùn lamah a khua a sik lo va, tlai lamah erawh a khua a rawn sik leh a, entîr ka duh viau nain inentîra chhuah a peih loh avàngin ka hmêl hriat doctor ka râwn ve tawp a. Ani pawh chuan doctor-ah kal ngei se a lo ti ve viau a; mahse, damdawi chu min chawh ve ta tho a, a khawsik a reh theih loh chuan Thawhțanni lama inentîr ngei tùrin min chah bawk a.

Kum upa lam ve deuh a nih tawh avàngin ka ngaihtuah lo thei lo va, Pathianni zànah a sik leh a, Thawhțanniah chuan entîra hruai ngei ka duh avàngin school chawlh hreh viau mah ila ka chawlh mai a ngai dâwn a ni. Ka pa erawh chuan,"School chawlh a ngai lo, i nu Mawii a awm a, min kalpui thei mai ang, min ngaihtuah lutuk a nih kha," tiin min hnial a, kei erawh chuan," Nang bâk ngaihtuah tùr ka nei hleinem, i dam loh chuan hrehawm ka ti alawm," ka ti ve thung a.

Nu Mawii pawh chuan," Hun rei kan sêng nâng, ka lo kalpui ang e, nang chu hna i neih kha, school kal rawh khai, in lamah tih tùr ka nei hran chuang hleinem," a lo ti ve a. Chutia an tih avàng chuan kei school chawlh hreh over tân chuan thâwk huaina tham a tlingin ka hria. Nu Mawii'n a hruai theiha a hruai a duh phawt chuan pawi pawh ka ti lo.

School rules thar puan kha Michael-a tân chuan awmzia a awm tam lo khawp mai. Min chhaih dàn a ngai reng a, a ngai reng ni mai lovin min hlatsan lo tulh tulh ni maiin ka hria. Thawhpui hmeichhe dang pawh a chhaih reng tho a, kei nèn hi chuan kan lo inngam tlâk ve deuh bawk nèn, a hma ai khân min hnaih sauh ni berin ka hria. Kei lahin Damon-a min hmuh dun ka hlauh țhin avàngin ka theihtâwpin inthiar fihlìmsan ka tum ve hrâm hrâm țhin bawk a, a châng hi chuan a awm dan hi ka hre thiam lo lek lek dâwn țhìn. Damon-a hi a hlau ve miah lo em ni ang? A tân he hna hi a pawimawh ve miah lo em ni zâwk? An chhûngkaw dinhmun hi ka hriatpui tehchiam lo nain an rethei lo tih chu ka hria, he hna hi thawk kher lo pawh ni se hna dang a hmu thei lutuk dâwn tih a inhria pawh a ni mahna, a chhan chu lehkha thiam tak niin Science subject kaihhnawih lam chu 'mãn lutuk' an tih ang hi a ni tlat.

Vawiin chu Damon-a a rawn lan leh tâk avàngin Michael-a hlat thei ang ber tùr chuan ka inthiar fihlîm hrâm hrâm a, hriat loh leh hmuh loh laia staff room-a lo luh thut a chîng si a, kei ka invèn loh chuan Michael-a lah hian engah vak a ngai ve si lo va.

Tlaia kan bâng office ațanga ka chhuak chu ka hnung chiahah min rawn zui niin, a car bula Damon-a lo ding ka hmuh avàng chuan tlêmin ka tàwi deuh a, Michael-a chuan min rawn su dat mai.

"Mak thei! Oh, ka su nâ che em? I ding chut a," Michael-a chuan a ti sup a, ka din chhan chu a rawn hmu chawpchilh ve nghâl a ni ang chu, a nui hak a, ka kokia a kut rawn nghah pah hian," I nat loh chuan kal thuai teh ang, rawn pèn haw leh ka duh a, i pa kha ka kàwm leh châk tawh bawk a," a hma aia ring deuh zâwk chuan a ti leh a. Damon-a'n min en dun reng avàng chuan ka chhâng ve duh lo va, ka kokia a kut a rawn nghah pawh chu ka lâk thlâksak a; mahse, a tûka a office-a Damon-a kohna ka dawng ta tho. Ka hma chiahah Michael-a koh a ni ve  tawh bawk.

"Lo țhu la, kha kha lo en teh," tiin a bul chiaha țhutna chu a melh pah zauh a, ngawi rengin a thu chu ka zàwm a, a bul hnaih deuha ka han țhut chuan a cologne hman rim chu ka hre nghâl cham cham mai. Mipa rimtui hman tùr chi dik tak niin a siamtute'n hmeichhe hîp tura an duan a nihna chu keimahah chuan a hlawhtling takzet a ni.

Ka hma dawhkàna laptop-a thil lo lang chu ka bih a, questionnaire lam a niin ka hria. Chutia ka bih lai chuan ka hnunglama rawn dingin ka dawhkàn kîl chung chu a kut pahnih chuan a rawn nem a, a innem khalh a nih chu. Kei chu a ângchhûngah ka țhu ta khar mai, a rawn kûn hniam ve pah tho si a, chêt zeuh chu sawi loh, thâwk pawh ka thaw ngam ta lo. A khabe chu ka chhîpah a rawn nghat lo chauh ni maiin ka hria a, 'thaw ngam ĺo ve' ti lo chuan ka thinphu erawh a ring lutuk a, a hriat hial ka ring.

"Class i nei chuang lo... niin ka hria a, hêng hi chhàn vek a țha ka ti a, i chhâng thei vek tùrah ka ngai bawk a," tia a rawn țawng chhuah chuan ka chhîp chu a rawn nghawr deuh thei hialin ka hria, questionnaire lam ka ngaihven thei lo, min hnaih lutukna chuan min tibuai a, thil dang min ngaihtuahtîr thei lo. A kut dinglam chu chêt sawnin monitor-a thil lang chu a tisawn a, chumi pah chuan a rawn kûn hniam zual sauh bawk a, ka țhu tawm tê nasa viau a ni, a cologne rim tui zet lah chuan ka hnâr a verh nasa a, a rimtui bawk si, ka thidang mai ang tih pawh ka hlau hlel lo ve.

"I hriat thiam loh a awm a nih chuan min zâwt mai la," tiin a tàwpa tàwpah chuan a kal sawn ve ta hrâm a, a kal sawn chiah chu thâwk ka la nghâl huai huai mai. A ângchhûnga awm kha a nuam nge nuam lo pawh ka hre thiam lo, a rimtui viau a ni tih leh ka zãm hluah hluah a ni tih erawh chiang takin ka hre thei thung.

Questionnaire chhàn harsa a nih loh avàngin ka ti zung zung a; mahse, ka bul lawka a țhut ve rùn avàng erawh chuan ka zãm a, ka kut hmâwr pawh a hit leh vek tawh, va en lo mah ila a rawn hawi zauh zauh tih ka hre ru reng si a, zäm deuh chung chuan eng emaw ti tak chuan nuam ka ti ru viau lawi a, ka star-zia hi ka chezia ațanga a hriat chhuah loh hrâm erawh ka beisei thung.

Ka zawh dâwnah chuan ka bulah chuan a rawn kal leh a; mahse, a hmaa a awm dàn ang kha chuan a rawn awm tawh lo. Ka chhànna chu a rawn en ve a, ka zo fel chiah tihah chuan," Michael-a nèn in inkârah hian eng thil chiah nge awm?" a rawn ti ta sup mai a, ka che lai chu ka tàwp chiang khawp mai.

Ka chhàn lawk loh avàng chuan," School leh a chhûnga thawkte hming a chhiat hi ka duh lo, a lak ațangin inthiar fihlîm ang che," a rawn ti leh sup a, chutah," I zawh tawh chuan i kal thei tawh ang," a ti zui zat a, ka țhu zawm tawh lo chiang khawp mai, tlàn chhuah dàwr dáwr hial ka duh nain ka insûmin ka inthunun hrâm hrâm a, inrintâwk hmel zetin ka chhuak ta zâwk a, pâwna ka chhuah hnuah erawh chuan ka âwm ka dawm a, thâwk lain ka ding vang vang rih phawt, chuti lo chu ka tlu mai ang tih ka hlau a ni.

Michael-a chuan thil awmzia min lo zâwt vat a, kei pawh chuan Damon-a min tirhna chu ka hrilh ve mai a, a lak ațanga inthiar fihlîm tùra min hrilh erawh chu ka hrilh tel lo, hrilh kher a țùlna ka hre hran lo a ni.

"A intithu mah mah chu a ni," Michael-a'n sehchilh deuh naka a tih sap chuan makti deuh hian ka en vat a, ani erawh chuan min en lovin a en ngai a lo en reng thung a, a insehruh dàn ațang chuan a lungawi vak lo tih ka hre thei a.

"Hotu ber a nia, a duhnaah chuan min tîr thei miau alawm," ka lo ti thung a, a dik rêng bawk a, a duh phawt chuan min bàn vang vang thei bawk ang chu.

"Eng emaw sawi a nei lo maw?" min en chuang lo chuan a ti leh a, ka chhàn hma chuan ka hawi kual tê tê phawt a, mi dang staff room-a awm ve chuan kan țawng chu an hriat ve loh hrâm ka beisei takmeuh.

"Nei lo," tia ka chhàn chuan min rawn en ta chiah a, kei erawh chuan ka mit ka la sawn ve vat thung, dâwt ka sawi tih a hria ang tih ka hlau a ni. Ani pawh chuan min ringhlel hran lo a ni ang," A țhat hlauh chu, eng emaw sawi a nei a nih chuan min hrilh hreh suh ang che," a ti leh a, chutah," Khaw'nge, class kal leh tawh ang hmiang," ti chhuak hluaiin a ding a, a dawhkàna Class Vii Science textbook keng chuan a chhuak ta nghâl a.

Damon-a sawi vàng pawh ni êm êm lo chuan School compound chhûngah chuan Michael-a chu ka theih dàn apiangin ka hlatsan ve ta deuh a, hlatsan tihah kan inbe reng tho a; mahse, inhnaihchilh deuha țhut leh min rawn kuah thuak ang chite chu ka theih angin pumpelh ka tum a ni ber, keimah avànga a hmingchhiat ka duh lo va, school hmingchhiat ka duh loh bâkah kei ngei pawhin hmingchhiat chu ka duh bïk lo. Michael-a, kan school leh kei, kan pathuma hmingțhatna leh hmingchhiatna chu ka kutah a awm a, ka fîmkhur hlê a țha a ni mai.

Ka pa pawh a zia ta viau mai. Nu Mawii a țangkai khawp mai, kei lah chu ni tina school ka kal a ngai si a, ka pa lo enkawl theitu a awm chu ka lâwm a ni, doctor-in a natna dik tak hre chhuak thei lo mah se kan theihtâwpin kan enkawl țha a, a zia viau tawh a ni, kárleh lamah chuan office pawh a kai ve thei tawh ang chu.

Tlai khat chu ni dang aiin kan bâng hma ve deuh a, ka haw hma thei ve ta tlat mai, a chhan chu kan school naupang pakhat Siammawia nu boral kan râl a, hun hman a rei lêm loh avangin kan haw hmá thei ta a ni. Michael-a a rawn pêng hman lo ve tlat a, keimah chauh chuan ka haw ta vang vang a, kan ina ka luh chuan a lo reh țhiap reuh a, ka pate ina an lo awm ka rin tehlul nèn, an kal chhuak zawk em maw ni le? Ka hawi kual vêl lai chuan ka pa room ațanga nui ri rawn chhuak chuan ka beng a verh zar mai, Nu Mawii nui rî a ni, ka pa nui ríin a rawn zawm zat bawk.

Ka han ngaithla chiang a, hlim taka nui rî a ni tlat. Anni pahnih hi, eng thil nge an tih ni? Room-ah, an pahnih chauhin hlim takin an nui a nia, ka pa kha a dam țha lo kha a ni si a, an va hlim dùn ar ar sî ve...!!!

Ka room-ah lûtin muangchâng hian ka inthlâk a, ka khumah ka țhu leh deuh vang vang phawt a, chumi hnuah chuan choka lamah ka kal ve ta chauh. Ei tùr ka lâk chhuah lai chuan Nu Mawii a rawn kal ve a, bowl ruak hi a rawn chawi bawk a, min hmuh chuan," I lo haw tawh a ni maw? I lo thlenna a rei tawh em?" tiin min be nghâl vat a, kei chuan en lêm lo chuan," Rei vak lo, ka pa eng nge a lo an zêl?" tiin ka zâwt ve thung a.

"A țha lutuk tawh e, ei tùr a ei zo chiah a," Nu Mawii'n a tih chuan," Țhat hmel viau tak kha, in nui dùn awr awr alawm," ka rilru chuan ka ti nghat nghat a; mahse, a rì chuan  ka sawi chhuak chuang lo.

Ei tùr chu ka pa room-ah ka chawi lût a, ani pawh chuan min lo hmuh chuan," I lo haw tawh a ni maw?" tiin nui deuh var var chung hian min lo bia a, kei chuan ngun zeta ka pa hlim nui hmel en pah chuan," Eng nge thil țha deuh hriat i nei em ni?  I hlim hmel riauin ka hria, i dam țha chiang tawh a niang chu maw?" ka ti duah a, a khum bula chair-ah chuan ka țhu nghâl a.

"Dam țha tawh e, ka dam vâk tawh alawm," tiin ka pa chuan min chhâng a, a khuma ka țhu lo chu mak a ti deuh a niang, min en vang vang a; mahse, ka en duh lo der tlat thung a.

"A țhat hlauh chu, i dam țhat hi ka duh ber alawm," tiin ei tùr chu ka hâwp zauh a, room chu ka hawi kual vêl a, chutah, ka pa khum awm dàn chu chîk zet hian ka en leh ta a, nichîn deuha hlim taka an nuih khân eng thil nge an tiha engtin nge an awm tih hriat chhuah ka tum rilru a ni ber ang chu; mahse, han hmehbel tùr leh ngaih țhat lohna tùr ka hmu hran lo nain rinhlelhna ka nei ru tho bawk si. 

"Min enkawl țha êm alawm, i awm loh hlànin i nu Mawii'n nangmah ang chiaha țhain min enkawl bawk a, ka pangchan phah vek ang tih ka hlau hial zâwk a ni," ka pa chuan nui chung hian a ti a, a nuih dàn pawh chu ka ringhlel zo vek mai. Nu Mawii nen hian an inkârah eng emaw tak a awm a ni chiang mai, dam țha lo ve si heti taka hmel hlim han put theih chu, an induhtawn a ni hial lo maw...

Ni lo, chu thil chu a ni thei lo. Nu Mawii hi ka nu a ni lo va, kan awmpui țhìn mai a ni, ka nu dinhmun tùr luahin ka pa nupui tùr a ni thei lo ang, kan inkâra a tlâk zeh ka phal thei ngai lo bawk ang.

"Eng thil nge thleng a? Vawiin tlaia i lo haw chu i hmel a dik lo deuh tlatin ka hria, chhùn lamah thil thleng a awm em ni?"  Ka hmêlah ka ngaihtuahna ka lo tilang pek a ni chiang mai, ka pa hian min hre chiang nasa mai si a, dâwt ka hrilh thei hauh lo ang.

"Eng mah a awm lo, ka chau deuh a niang, kan school naupang nu boral kan râl a, chuvàng pawh chu a ni maithei a ni," ka ti ta ringawt a, ka pa chuan," A nih chu, thihna hi chu a runthlâk a nia, mihring piang chhuak tawh phawt hi chuan kan la tawng vek dâwn si a, kan tawn hun tùr lah hi tumahin kan hre hauh si lo, chuvàng chuan, kan hlim theih hun lai, kan dam țhat laia hlim taka hun kan hman hi a hlu teh a nia," a ti charh charh a.

A thil sawi dàn chuan ka rinhlelhna a tizual leh sawt mai.

*HLAWHCHHAMNA HI THIL ZAWNG ZAWNG TÀWPNA EMAW I LO TI NGAWT ANG E, ZIRLAI BUL ȚANNA CHAUH A NI ZÂWK*