☆HLWILY☆ - 6 By Dingdi Pachuau

 ☆HLWILY☆ - 6 By Dingdi Pachuau

Ka pa leh Nu Mawii inkârah thil awm a awm a nih ringin ringhlel rêng rêngin hun ka hmang chho a, rinhlelh theihna tùra an pahniha an awm dùn lai leh han inmitmei ralh lam ka hmu thei bawk si lo, rilru nuam lo leh an pahnih inkâra thil awm hriat tuma mitmei reng chu kawng lehlamah chuan a hahthlâk duh khawp mai. An induh a lo nih hlauh chuan ka thin a rim ngawt ang, ka pain kei aia thlâkhlelh, ngaihsak leh duat a nei dâwn ta tihna a ni dâwn si a, chu dinhmun Nu Mawii'n min luahlàn daih tùr chu ka duh lo a ni.

Ka u ka hrilh chuan min ngaihtuahin ngaihtuah loh tùr tùr a ngaihtuah phah ang tih ka hlau si a, sawipui tùr erawh ka mamawh ngawih ngawihin ka hria. Sti hrilh ta ringawt ila, kan chhûngkaw chanchin a ni dâwn si a, a tân min sawipui chu a nuam duh dâwn lo bawk si, rilru nuam lo zetin ka hun chu ka hmang chho ta a ni ber mai.

Ka ngaihtuahna chu ka hmêl leh cheziaah a lang chhuak a ni ngei ang, school-a Michael-a'n min hmuh chuan thawveng zet hian,"I hmêl chuh, eng nge lungngaihna i nei em ni? Han sawi teh, rilru hahna i nei a nih chuan, i rilru tihahtu chu ka hnek pawp a ni mai," a lo ti vat a, kei chuan," Nei lo ve," tiin ka nui lui sak a, ka hmêla ka ngaihtuahna ka lo lan chhuahtîr chu zia lo ka ti kher mai.

"Khi pa vàng khian em ni i rilru i tihhah a?" a tih leh chuan ka en vat a, 'Khi pa' a tih chu ka hre chiang ngang mai si a, a hming pawha sawi duh lova chutia a han ti 'Khi pa' duh tlat chuan eng emaw ngaihtuahna min neihtîr hial mai ka ti.

"Țawng zàwi deuh teh, mi dang hian an hre rêu rêu ang e," tiin ka kut chuan 'Sawi tawh suh' tih nân ka hmui chu ka han khawih zoh a, ani pawh chu a ngawi ve mai a; mahse, a hnu deuhah chuan," Hlim hmel puin awm la ka duh alawm, i hlim lo hmèl hmuh ka duh lo," a ti leh ta sap a, tûn țum chu a țawng zàwi ve ta deuh e.

"Ka lâwm e, ka hlim reng alawm, hei min en la," tiin a hmuh theih tur chuan ka han nui lui leh a, ani erawh chuan," I nui lui a nih kha," a rawn ti ta khauh a.

"Mi dang vàngin ka rilru a hah lo, ih, chhûngkaw thil lam a nia," tiin thil dang a sawi kual thui leh hma chuan thu dik chu ka hrilh ta záwk a, min rawn en vang vang a, chutah," A nih tak chu, min hrilh duha puih theihna che ka nei a nih chuan..." a ti ta sap a, kei pawh chu nui sak chung hian ka lu ka bu nghat a, dâr a rawn ri zui ta bawk nèn, kan titi zawm thei ta lo va.

Ka haw lamah Sti dàwr nghâk ka tlawh haw zawk a, tlawh zawk ka ti tak nain min chàr rei ta phian a, ka tum aia tlaiah ka haw. Kan inhmu khât ta deuh a, nimin lamah a rawn inkhâwm bawk si lo nèn, hmaichhana han inhmuh meuh chuan sawi tùr kan lo ngah dun khawp mai hi a lo nia, hunin min daih lo lek lek zàwk a ni, dàn ngai têin Damon-a chanchin ațangin  bul kan țan leh phawt a, nuih a tiza thei si a, ka haw lam pawh ka nui haw var var mai rêng a ni.

Ka pa leh Nu Mawii chu an awm dàn a ngai reng tho a, danglam ta ber chu keimah hi ka nih hmel. A hma anga hlim hmel kha ka pu hlei thei tlat lo va, kan awm tlànhoin ka mitmei ru a, rinhlelh theihna tùr chu zawng ni berin a lang. Anni lah chu an ngai reng a, hlim hmel puin min bia a, an titi a, kei țawng duh ber țhin kha ka ngawi kur ta fo mai.

Ka pa chuan ka awm dàn danglam chu a lo hre thiam ve nasa a, a chhan min zâwt ta vat a; mahse, a chhan dik tak hrilh duh lovin ka nè nè ral a, ka pa chuan," School lamah hian i hah lutuk a nih ka ring, bâng daih mai ta che," a ti ta hial mai a, chu zet chu ka duh loh ber thil a ni si a, ka awm dàn ka siam țhat a ngaihzia ka hre chhuak uar uar mai; mahse, Nu Mawii nèn an inkâr mawlh chu ka ngaihtuah lo thei bawk si lo.

*******

"I va bâwr ve!!"

Inkhai bâwr țeuh chung chuan ka ding khawng ât mai. A aw ațang chuan tu nge a nih ka hre chiang ngang mai si a, chutia ka inkhai bâwr lutuk min hmu chu ka duh lo a ni, ka inhmehin ka lang chhe nasa dâwn mai si a, ka hmu zak a ni; mahse, min hmu tawh tho tho si a, tlànchhiatsan ngaihna a awm tawh lo, a rûkin min nuihzat ngawt ang chu, ka tum loh deuha thil ka lei vak vàng vek a ni.

"Ka lo thlah ang che."  Ka bul lawkah a lo ding reng tawh niin, ka hnial dâwn lai tak chuan hnial hman miah lohin ka thil khai țhenkhat chu min rawn lâksak nghâl zui a, a car lam a pan zui ta a, ka scooty ka ken chhuah loh ni ber kher leh ka inkhai bàwr ni ber khera min hmu fuh chu ka thin a rim ru kher asin. Tih theih dang awm hek lo le, a car pana a kal chu ka zui ve ta ngawt a.

"In vêng kha?"

Hre tùrah ka ngai deuh rawk a nia, min hre chiang lo ve thlâwt a ni he pa hi chuan; mahse, a àwm reng tho. Ka bialpa a ni lo va, ka țhian pawh a ni chuang lo, inhmel hriat țha tak lah kan ni hek lo, engah nge min hriat chian ngawt ang? Eng aiah nge ka awmna vêng hre tùra ka ngaih ngawt ni? Mâwlthlâk lutuk, ka lo indah sâng mah mah a ni.

Kan awmna vêng hrilh pah chuan," Min thlah a ngai lo asin le," ka ti a, lawmthu ka sawi pah sap bawk a. Amah si chêtin țhu lo mah ila a bula ka țhut tho avàng chuan ka awm dàn a danglam leh vek tawh a, ka zãm leh viau tawh a ni, chumi thup nân erawh chuan kan hmalam chu ding takin ka en ngar ngar a, ka kut pawh a rûkin ka hûm ruh tlat bawk a.

"In awmna ka hriat phah thei dâwn a," a lo ti sup a, a thil sawi chuan min tidang chiang khawp mai. Ka en zawk phah nghe nghe a, nui hmel pu deuh leh meng zîm deuh san chung hian min lo en sawr sawr a, ka hawi lêt rang khawp mai.

Kan chuan chhûng chuan a hmel chu ka en tawh lo chiang, min lo en dàn ang khân min lo en leh a nih chuan ka hawi lêt mai mai thei tawh àwm si lo va, ka duh a ni tih ka mitmeng leh hmel ațangin a hre ngei ang, chu chu khawvêla ka thil hlauh ber a ni si a.

Kan in kawta kan din chuan," Thingpui in tùra min sàwm chu i ba ve chuan ka hria," a rawn ti chhuak a, sawm ka tum miah lo nain a polite loh thlâk riaua ka hriat hnuhnawh avàng chuan lût tùr chuan ka sáwm a, sâwm lo pawh ni ila a lo luh tho ka ring, a chhan chu ka thil leiho ka khai chhuah ve hmain a khai chhuak hmasa zâwk tlat si a.

Ka pain  TV a lo en a, a hmel hriat ngai loh tlangvâl nèn kan inzui lût a hmuh chuan min rawn en duh khawp mai a; mahse, ka hai der tlat thung. Damon-a'n a thil khaiho a dah hnu chuan," Lo țhu rawh, thingpui chu ka lo siam ang che," ka ti sap a, Nu Mawii eirawng bâwla lo che vat vat bulah chuan ka khawmuang ta nghâl a.

Thingpui ka va pêk lai chuan ka pa nèn chuan an lo titi tui leh viau hman tawh niin, ka pa hi chuan tu pawh mai hi titipui nuam a ti vek ni maiin ka hria, a hmel hriat ngai lêm loh pawh hi a titipui hluah thei tlat a ni. Ka kal sawn nghâl bîk lo, a mawi lo ve deuh ka tia,an piah deuha țhuin țawng ve chuang lo chuan an titi chu ka ngaithla mai mai a.

Kan bula a awma a țawng dàn leh ka pa bula a țawng dàn chu a dang daih mai. Ka pa bulah chuan mipa puitling dik tak țawngin a țawng a, ka pa thil sawi apiang chu a lo sawi zàwm ve thei zêl bawk, hriat loh pawh a nei lo a niang tih tùr khawpin a lo hre chiang zêl zui a, Mizoram ațanga ram dang chanchin an sawi kài hnu phei chuan ngaihnawm ti takin ka lo ngaithla ve kar a.

A haw hnu chuan ka pa chuan," I țhianpa chu a la naupan hmel nèn, thil a hre zau hrep mai ka ti, a fing ngawt lo maw?" tiin min zâwt a, kei chuan rang zet hian," Ka țhianpa pawh a ni lo, ka thawhna school neitu a nih kha," ka lo ti vat a, chutah," Ka hre chiang bîk lo, a fing ang ka ring," ka ti zui leh zat a, ka rilruin," A lêrhin a luck viau bawk," ka ti zui zat bawk a.

"A titi dàn ațang khân a hriat mai, țhiante i nei fel thei khawpin ka hria, Sti leh Michael-a lah chuti bawk, tûnlaiah chuan țhian fel tak tak neih hi a har ve tawh a nia, i vànnei khawp mai; mahse, nangmah ber hi i fel tlat mai a, chuvàng pawh chu a ni ngei ang," ka pain a tih leh chuan," Ka țhian a ni lo ka tih tawh kha, kan pu, kan Boss a nih deuh ber chu," ka lo ti thung a.

Pathianni inkhâwm bànah Sti a lo lêng a, Damon-a'n a car-a min thlah dàn ka hrilh malh malh lai chuan Michael-a'n min rawn phone ve tlat mai, eng a hria chu ni maw? Amah a ni tih ka hriat avàngin loudspeaker on-in ka chhâng ta vat a.

"Please-in min pui teh, chhuak tùrin ka rawn sâwm dâwn che aw," a rawn ti nghâl teh ngawt a, min ngamtlâk mah mah chu a ni; mahse," Eng thilah nge ni ta, Boss?" tiin nui chung hian ka chhâng a, Sti chuan meng phar deuh ãk ãk hian min lo en ve thung a.

"Rei pawh a ngai lo ang, ka pi tlawh lawk a ni mai. Lo insiam la, ka rawn lam ang che aw, minute 15 hun ka pe ang che," a rawn ti a, ka țawng ve hman hma chuan kan inbiakna chu a titàwp ta daih a, a ngaihna hre lo zet chuan ka phone chu ka en vang vang ringawt a.

"Insiam rawh, hun i neih rei loh chu, kei pawh ka haw tawh ang e," Sti'n a tih chuan," Michael-a hi chu aw...kan inhmuh khàt ve tawh nèn, han titipui deuh reng che ka duh asin le," ka ti vang vang a. Ani erawh chuan," Lungngai suh, i țhianpa chu han pui phawt la, hun thâwl chu kan la nei leh mai ang, a mamawh hmel êm che kha," a lo ti thung a, a ding nghâl bawk a.

"Nia...min hre thiam mai teh, a awmzia ka hriat thiam bîk loh hi, a lo kal hunah ka vìn hrep ang," ka ti ve leh ringawt a, ani erawh chuan," Vìn mai lo ve, mihring chu inmamawh hun nei vek alawm kan nih, a pawimawh viau a niang," a lo ti thung a, a haw ta thuai a, ka ngaih dàn erawh a ni vak lo, Michael-a chuan thil awmzia min hrilh a bâ a ni, a la hmanhmawh viau zui a nia.

Bawngkawna a pi min hmuhpui a duh vàng a lo ni a," Nang bâk han sàwm tùr ka hre lo a ni, a chhan chu nang hi chu i hmel ațang pawh hian i fel a ni tih a hriat theih nghâl mai si a, ka pi làwmna siamsak ka duh si a," a tih chuan la hre thiam chiah lo hian," Eng vàngin maw kei nèna hmuh dun kher chu? Mi dang sàwm tùr pawh i nei țeuh awm si a, kei phei chu min hre dâwn hauh si lo," ka ti ve thung a.

"Ka sawi tawh kha, nang chu i hmel ațang pawhin i fel tih a hriat a, ka țhian hmeichhe dangte chu ka piin min sawisèlsak ziah. A hmuh hun chea a hmel awm dàn ka hmu châk tawh teh a nia," te chu a la ti deuh deuh a, a pi chu a tân a pawimawh viau a ni ngei ang chu. Chutah," Ka kàwm che hi ka vànnei ngawt mai, ka han ngaihtuah chhuak chat thei bawk che a nia, ka pi chuan hmeichhe fel hi min duhpui ţhin a, a duh loh zâwng hi chu amah hmu tùr pawh hian ka hruai nawn tawh ngai lo; mahse, nang chu a duh chi tak i ni tih ka hria a nia, lungngai miah suh,"a ti leh a, mit khap lo chuan ka en phei reng phawt a, chutah," Min hrilh hmasa ni la chuan ka zui miah lo ang che, i va sual tak!" ka ti chhuak ta ringawt a.

A pi hmu tùra kal ve ringawt chu ka duh hleinem. A țhian pawh ni mah ila a pi rilrempui loh țhian ka lo ni thut thei si a, ka tân a zahthlâk dâwn êm asin. Hre sa ni ila chuan ka kal tawp lo ang, Michael-a chu ka ngei ru deuh thut thut a.

"Ka hria alawm, chuvàngin ka hrilh lâwk duh lo che a nih kha," te chu a la ti deuh deuh a, a nui hmel chu ka en a, a nui hmel ka ngei ber țum a la ni ngei ang. Hawi sawn nghat pah chuan," I sual e a!" ka ti nghat a, a nui chhuak hawk hawk a.

"Khatin awm suh, ka pi chu a fel lutuk, a duh lo dâwn lo che tih ka hria alawm. Min sawisèlna lak ațanga min chhanhim theitu tùr chu nangmah chauh hi i ni, i awm pângngai tawp khân awm rawh, rilru tihhah a ngai lo, i țha tâwk a ni," a tih leh chuan lei sei féin ka chhuah khum ta ringawt a.

Michael-a pi tê reuh chu, ka huphurh ang aiin a lo fel reuh a! Sam țuak vâr vo niin a ngo reuh sia, sâp pitar a ang reuh tawp. Min han en ngun khawp mai a, ka lài lek lek a ni; mahse, min chibaiin a titi ta seuh seuh a, hmuh ka huphurh tehlul nèn, a bula awm nuam ka ti ta phian mai.

Album hlai zet mai chu min enpuiin Michael-a têt lai thlalâk hi min kawhhmuh a, a hahmai bal seu mai leh a țap pàr lai thlalâk han hmuh chuan a nuih loh theih loh, Michael-a lah chu kan piah deuha ding chunga a kekawr ipte zen ût chung chuan," Ka pi, kha kha dah bo tawh teh, a zahthlâk, ka hmel a chhe si," ner nûng chung chuan a lo ti a, a pi erawh chuan," Chhe lo ve, hêng hun lai hi a ngaihawm ëm asin, tunah hi chuan in puitling vek tawh a, hêng hun lai ang hian ngaih pawh min ngai tawh lo va, hmuh pawh kan inhmuh khàt tawh êm hi," a lo ti thung a, chutah," In ril a țâm em? Lo thleng tùr lo thleng leh phawt se kan eiho dâwn nia aw," a ti leh a, tu tak lo thleng tùr awm ni maw?

Thlalâk ena ka kèu dan dan lai chuan," Ka pi, kan lo thleng e, kan tlai lo tiraw?" tih ri chu ka hria a, makti deuh hian ka hawi chhuak nghâl vat a, Damon-a leh nula pakhat, sam buang deuh thâng, chhe lo zet mai hi kan țhutna room-ah chuan an rawn inzui lût ta nghâl a, chu nu chhiat loh reuhzia chuh, a sam leh a inthuamna zawng zawng chu a inhmeh vek, mit tla dâwn lek lekin ka lo enin a nia ka rin ni.

"Tlai lo ve, lo kal r'u, hei i naute pahnih nèn hian kan lo nghâk reng che u a, kan lo hlim tlâng khawp asin, tunah chuan ei tùr pawh kan ei thei tawh ang," Michael-a piin a tih chuan Sambuangi lak ațang chuan ka mit ka la sawn ve ta chauh a, Damon-a ka en leh a, min lo en kur avàngin ka hawi sawn leh vat a, en tùr dang ka hriat tâk mai loh avàng chuan Michael-a lam chu ka en a, ani erawh chuan pâwn lam daih a lo melh thung a.

Ka hre thiam chiah lo. Michael-a leh Damon-a hi inchhûngkhat an lo ni reng tihna em ni? 'Ka pi' kha an ti ve ve si a, cousin an lo ni reng tihna a ni ngei ang, mit khap lo lêk chuan Michael-a chu ka melh ta reng a. Ani hian Damon-a'n a pi a tlawh ve tho dâwn tih a hria a ni chiang mai.

"Min lo nghah rei lutuk loh hrâm ka beisei," Damon-a'n a tih chuan a pi chuan," Rei lo ve, lo țhu rawh u, ei tùr ka'n lâktîr nghâl ang e," a ti a, a tho nghâl vat a, engtia awm tùr nge ka hre lo, ka zãm leh viau tawh a ni. A pi chu ei tùr ka va lâkpui dâwn em ni ang? Min hruaitupa Michael-a lah chu a la ding ngur mai si a.

Kan hun hman dàn chu mumang lam a ang lek lek hialin ka hria. A pi chuan Michael-a bialnuah min ngai hmiah tih ka hria, Michael-a chuan hrilh fiah tum miah lo hian a ngawi ngur mai a. Damon-ate pahnih lah  kan hmaah tak an țhu dùn a, ka boruak tawn hre hauh lo chuan Michael-a pi chu a țawng barh barh reng a, Damon-ate nèn inhma tawna țhu kan nih avàng chuan hawina tùr lam ka hre lo, Michael-a țawng duh lo ta thut chu ka ngei ngawih ngawih, țawng ve zauh zauh tal se...

"Ka tum loh deuhin ka hmu thut che a," Damon-a'n ka hnunga a rawn tih sup chuan ka phu deuh zawk a, ka kut chu sil zovin ka inher a, kan inhma chhawn ta ràn mai.

"Michael-a nèn hian pi thuhmun in lo nei reng a..." ka ti ta ringawt a, eng vànga sawi chhuak nge ka nih pawh ka hre lo, vawiin hian ka hre chhuak ve chiah si a, mak ka ti êm a ni. Hei vàng hi a lo nih chiah hi, Michael-a khân Damon-a hi a lo hlauh tehchiam loh ni. 

"Chu, pi thuhmun kan nei chu i duh vak nange?"

Ni lo, chutiang lam pawh a ni lo, engtin nge school-ah khân a unaupa Michael-a vàng hian dàn thar kha a siam theih? Inhmuh thiam loh deuhna an lo nei sa tawh tihna em ni zãwk? A unaupa a nih si chuan a hmingchhiat theihna lama hum tum awm zâwk tak, dàn thar a siam khum sauh sauh a ni si a, bâkah, kan inngaizâwng hauh bawk si lo.

"Pi in nei fel khawp mai," tia ka chhàn chuan," A nih, keini hi, kan fel  i ti ve tho em?" a rawn ti chhuak zat a, ka kalna tùr dãla a din tlat avàngin ka kal sawn thei mai si lo va, ka zàmzia thup hrãm hrãm tum chuan ka nui hak a.

"Kawng min kian thei ang em?" ka tih pawh chuan chêt sawn a tum chuang lo a nih hmel, chiang zeta min en chhuk pah hian," Michael-a hlatsan tùr khân ka hrilh che ni khân ka hre si a," a ti daih a.

Ka ngei deuh thut a, intihuai lui vein," School compound chhûng a nih loh hi," ka ti ve salh a, chutia ka chhâng ngam chu mak a ti ve ngawt ang chu, kei pawhin ka sawi zawh veleh chuan chutianga ka chhãng ngam chu mak ka inti ve tho!

Ka rin loh deuhin a nui hawk a," Huaisen reuh lutuk! School compound-" a sawi zawh hma chuan Michael-a'n min rawn ko ta hlauh mai a, ka thaw huai thei. Ani pawh chuan kawng min kian ta nghâl a, ka kal sawn rang teh e.

*THIL A NIHNA DIK TAK I HRIAT HMAA CHHÀNNA CHU NUIHZATTHLÂK NIHNA MAI CHAUH A NI*