☆HLWILY☆ - 7 By Dingdi Pachuau

 ☆HLWILY☆ - 7 By Dingdi Pachuau

Kan haw kawngah chuan zawh tùr ka ngah êm avàng chuan sawi chhuah hmasak ber tùr ka hre lo zâwk hial a, zawh hmasak ber tùr ngaihtuah chuan ka ngawi vang vang phawt a.

"I duh duh min zâwt thei a nia, insûm suh." Ka hmel ațangin ka rilrua awm a hre thei a ni ngei ang, ka va en phei lai chuan a lo nui sak a, min rawn en chuang lo chuan kawng lam chauh chu a en ngar a.

"Eng vànga min hrilh lo nge i nih? Hre sa ila chuan ka kalpui hauh lo ang che," ka ti ta ringawt a, a dik chiah bawk. Damon-a leh a bialnu an rawn kal ve dâwn a ni tih hre sa ila chuan ka kal lo chiang viau ang.

"Ka hriat sa vàng alawm ka hrilh duh loh che; mahse, min chhanhim ta tho a, ka lãwm viau tho a nia. Mahni hma ka sial viauin a lang thei maithei bawk; mahse, ka pi hlimna siamsak kha ka duh ve tho bawk si a ni, ka lãwm lutuk e," a rawn tih tâkah chuan sawi leh mai tùr ka hre ta lo, ani hi chuan a pi chungchâng hlîr a lo la ngaihtuah chu a ni si a, keia sawi chhuah chhan zâwk tak erawh chu Damon-a leh a bialnu rawn kal tel ve kha a ni thung a.

"Sir Damon-a nèn chhûngkhat in lo ni reng a...!" a hnu daiha awkaa demna lang lek leka ka tih chuan," Ni e," a lo ti mai a, chu țawngkam bâk chuan min chhàn chhunzawm lo. Sawi chhunzawm châk tehchiam lo angin lang mah se zawh zêl ka duh avàng chuan tàwpsan ka tum hauh lo thung.

"Engati nge i sawi ngai miah loh?" ka ti teh tâwng a, a unaupa a lo ni reng si a, a bulah ka lo rêl phâr lo chauh a ni si. Bâkah, mak ka ti pah êm bawk a ni, Sir Damon-a kha ngam ka ti viau țhin a nih kha, chhûngkhat an lo nih vàng  chiah a lo nih hi.

"Min zâwt ngai bîk em ni?" a rawn ti ve thung a, min tidang lek lek mai. Nia, ka zâwt ngai hauh lo, mipa dang chanchin réng rêng ka țhian mipa, ka nèl êm êm bulah pawh hian ka zâwt ngai hauh lo ang, Sir Damon-a chanchin hlauh phei chu, teuh lo mai!

"A lo nih tak chu!" tia ka chhàn chuan a nui hawk a, min rawn en a, kei pawhin ka lo en ve tho a, tunah chuan a hmel hmuh a nuam leh viau tawh a ni. Damon-ate rawn kal hma, a pi bula a hmel hmuh nuam tak ang kha hmuh tùr a awm leh tawh.

"Ka pi khân a duh hleuh hleuh viau che a ni tih ka hriat khân ka hlim phah viau a ni. Ka pi hian min duat viau țhin a, ka pu boral hnu phei hi chuan hlimnî a hmu khât ve tawh a nia, vawiin zet kha chu a hlimin a titi tam ve viau a, i chungah ka lãwm tak tak a ni, nangmah vàng chaih a ni si a. A tûte zîngah kei hi naupang ber ka nih avàngin min ngaihtuahin nupui nei thuai tùr hian min ti ve ziah a, a chhan chu ka fate a hmu hman lo ang tih a hlau a ni, a bula ka hmeichhe hruaiho zîngah lah hian a lung han dum deuhtu a hmu ngai lo a ni chêk ang chu, zànah min rawn be nghâl ziah a," a ti barh barh a.

"Mahse, bum ka duh ve hleinem, dâwt avànga hlimtîr chu thil țha pawh a ni lo," ka lo ti vat a, ka zah duh lêm lo. Ka bialpa a ni lo miau mai a, a piin Michael-a bialnu anga min ngai tùr kha țha ka ti lo, dâwt mai a ni si a.

"En liam mai mai teh, thil thleng thei lo pawh a ni chuang lo va, bâkah, ka bialnu tak tak pawh i ni lo ang tih a sawi theih miah loh a nia," tia nui țhâ chunga min rawn en chuan ka lo chhiat khum chiam a, a nui nghâl hawk hawk a, a hnu deuha kan inbiak dàn ka ngaihtuah lêt chuan a inngamtlâkthlâk viauin ka hria.

In kan thlen chuan a tlài deuh tawh avàngin a lo lût tel ve ta lo va, ka room lam pana ka kal chuan thlanglam veranda-a ka pa leh Nu Mawiin lo ding dùn ral chu ka hmu thuak a, ka ding chawt a, chutah, min rawn hmuh ve hlauin ban phènah chuan ka ding ta rih a, ka thin a rawn phu dat dat a, rilruah 'làwm lohna' a rawn awm nghâl bawk a.

Min rawn hmu ve miah lo tih an awm dàn ațang chuan ka hria, ka pa chuan a dàrah chuan a kuah a, nui chung hian sîr zâwng chuan Nu Mawii chu a en bawk a, Nu Mawii erawh chuan a en ve lêm lo; mahse, a nuih ve tho chu ka ring ringawt. Ka awm lo tih pawh hre lo lêka an pahniha an hlim dùn ka hmuh chuan ka thin a rim țùng tlat, heti khawp hian ka pa thinlungah ka lo tla na tawh lo tihna a ni si a, meng hnuai deuh raih chuan, min hmuh hlau tak si, thãwm dìm takin ka room lam chu ka pan ta hnà hná a.

Sti bula phûr taka Damon-a leh Michael-ate chanchin chu hrilh ka tum tehlul nèn, ka pate pahnih awm dàn ka hmuh chuan ka mood a ti-off vek a, khumah chuan ka bawk thlawp a, ka maimichhîng ta vang vang a. Ka pa chuan ka tel lovin hlimna dang a hmu thei ta si a, kei hi mamawh ka ni dâwn ta lo a ni. Mamawh lo mai ni lovin tunah tak phei hi chuan an tân hnawksak ka ni tawh hial zâwk ang, ka awm ve chuan an duh angin ka bulah, ka mithmuhah an awm thei dâwn si lo va, an sawi chhuah ngam si loha an tâna mi hnawksak tak ka ni dâwn tihna a nih chu.

Zanriah kìl lai chuan ka pa chu a țawng bawrh bawrh a, kei chu ka ngawi reng thung. Ka pa chuan Nu Mawii nèna an induh thu chu a sawi chhuak ang tih mawlh ka lo hlau a, chaw kan ei chhûng chuan a rûkin ka țang nasa. Nu Mawii pawh chuan ka pa thil sawi chu a lo zàwm ve zauh zauh bawk a,  ka ngaihbel vek tawh vàng nge, ka pa thil sawi chu a lo 'Amen' țha thei ka ti khawp mai. Chaw ei kham veleh chuan ka duh aia ka tlài tawh thu chhuanlamin insiamin inkhâwm tùrin ka chhuak nghâl daih a. Sti ka sâwm a, inkhâwm tùrin kan chhuak na a, thil sawipui ka duh avàngin Biak in erawh kan thleng ta lo.

Ka țhian țha ber a nih avàngin ka pate chanchin chu ka hrilh a, ka rilru a hah thu leh ka pain duh a nei leh tachu ka hriat thiam loh thu chu ka hrilh sap sap a, ani erawh chuan ka ngaih ang chuan a lo ngai ve miah lo niin! 

"I pa chu a lawmpuiawm ka va ti zâwk ve! Khati chen kha nupui tel lovin a lo khawsa tawh a, i u nèn i nu tel hauh lovin a enkawl puitling bawk che u a, a upat deuh hnua duh a neih leh theih chuan țha ka lo tihpui viau zâwk asin, a dam loh nikhuain enkawltu leh bâwihsâwmtu a nei dâwn tihna a nia, chutah, a duh lah chu mi dang, mi hrang daih ni lovin hun rei tak chhûngkua ang maia in lo chènpui tawh i Nu Mawii, nangmahni enkawla pui tlattu che u a lo ni leh bawk a, han ngaihțhat lohna tùr leh rilru hahna tùr a awm hran hleinem," a lo ti ta theuh mai! Ka rin loh deuh dàna țawngkam a neih avàng chuan mak ti deuh hian ka en hâ a.

"I hre lo a nih chu, miin engtin nge an sawi ang? 'A upat hnuah ngaihzâwng a nei țha leh a, chu lah chu an awmpuinu' an ti ang a, a zahthlâk dâwn asin, bâkah, fa an neih leh phei chuan, awi, ka duh teuh lo, ka zak dâwn lutuk! Tûn ang kum tawha chhang han neih leh te chu a, sawi pawh sawi chi loh!" lu thing nar nar pah chuan ka lo ti thung a, ka ngaih dàn chiah a ni bawk. Nu Mawii hi kan awmpuinu a nih avàngin ka hmusit tihna a ni lo va; mahse, mi min sawi dàn tùr ka ngaihtuah a, hrehawm ka tiin ka zak lâwk a ni.

"I ngaihtuah thui lutuk a nih chu, mi min sawi dàn tur tih lam hi chu dàwn vak duh tùr a ni lo, mi dang vàng phei chuan nun hrehawm ti takin hman tum miah loh tùr, beng chhu-ngawng tlat ila, kan duh hi ti hmiah hmiah mai ila a țha ber, mi min sawi dàn tùr kan ngaihchàn leh lutuk chuan kan nun a hlim thei ngai lo ang," a ti leh ta duah a. Min vuipui  leh min țan deuh zâwnga țawngkam a neih loh avàng chuan a rûkin ka vui deuh khawp mai a, ka rilru a hahin hrehawm ka ti ve êm êm a, chuvànga a hnêna inbun ruak ve kha ka nia, inkhâwm bàn hun awm vêlah chuan beidawng ru zetin ka haw ta hnak hnak a.

Kan in boruak leh Micheal- Damon-a chungchâng vêl ka ngaihtuah atalângin țawng pawh ka châk lo va, ka rilru a luah nasa deuh bawk nèn, office-a Michael-a lo luh lai pawh ka lo hre hauh lo niin, ka kut a rawn vawn tâk chawtah chuan ka ngaihtuahna ram ațanga harh chhuakin ka en ta hau a.

"Mi â i ang lutuk! Thil țûl lo ngaihtuah vak vak a ngai lo, i thlenna a rei tawh em?" tiin pângngai takin min be nghâl bawrh bawrh a, ka chhàn hma chuan kan piah deuha țhu Sir Puia chuan," Tukin chu ni dang aiin minute 5 zêtin i rawn tlai, i rawn pêng kãwi a ni lo maw?" tiin Michael-a chu a lo fiam zauh a.

"Ni dang aiin, in ațangin minute 5-in ka rawn chhuak har tihna a nih chu," awlsam zet hian Michael-a chuan a ti a, a nui pah sâng a, chutah, min rawn enin," A ti ve mai mai a nih kha, pèn kawina tùr ka nei hauh lo, in inah a nih ngawt loh chuan," mit siai sak chung hian a ti leh zat a, chhâng lo chuan ka lo ner khum ringawt a.

Chhùnah Damon-a a rawn kal a, a rûkin Michael-a chu ka mitsìr reng a, ni dang angin a lo be hauh lo, a be lo mai ni lovin hmu ang pawhin a awm lo, mak ka ti ru khawp mai, inhmuh thiam lohna eng emaw an nei em ni aw ka ti rilru rauh rauh a. Mi dang chuan an lo be sap sap a; mahse, ani pawh chuan a chhâng lêt hlawm àwm pawhin ka hre lo, țhut pawh țhu lovin a hawi kual a, room chhûnga thil tàr eng eng emaw chu a en kual ni berin ka hria, a hnu deuhah a chhuak leh ta mai a. A chhuah hnu lamah erawh chuan Michael-a chuan ni dang ang bawkin fiamthu a thawh leh bawrh bawrh a, nichin lawk khán utûm ang mai a ni tih a hriat leh tawh loh.

Kan ina awm chu nuam ka tih loh avàng leh chuang riaua ka inhriat tlat avàngin in thlen thuai thuai pawh ka thlahlel tawh lo va, tlai tin deuhthaw Sti dàwr nghahnaah ka pêng haw ta ziah a ni ber. Vanneihthlâk takin Michael-a'n kan ina rawn pèn haw min dîl ta miah lo lehnghâl a, Sti'n ka duh ang leh ka rilru ang min țâwmpui ve lo mah se engkim ka sawipui theih ber a ni si a, a bula awm ka la thlang ber tho tho.

Tlai khat chu ka luh hnu deuh lawkah Damon-a a rawn lût ve niin, Sti nèn pawh kan la inbe rei hman lo va, tho vatin a lo chiauau ta vat a. Keini pawh hmun leh hmuna inhmu kan nih avàng chuan hmuh loh der theih pawh a ni tawh lo, kan inmelh dùn ta ràn mai a.

"I lo awm remchâng hlauh chu a tihzia hle mai, thil min thlanpui lawk rawh aw, ka pi shawl tùr leh lukhum lum tùr a nia, amah pawh i hmuh tawh tho kha," a rawn tih chuan Sti chu a lo tlak karh a; mahse, ka ngaihven duh hauh lo. 

"A duh zâwng ka hre hauh-" ka sawi zawh hman hma chuan," Hmeichhia i nia, hmeichhia chu in duh zâwng leh mawi in tih zâwng inang vek kher lo mah se mipa ai chuan in thlang thiam zâwk ngei ang," a lo ti leh vat thung a, hnial leh dàn tùr pawh ka hre tawh lo.

Sti chuan," Chutiang lam chu kan ngah alawm, Kimkim, he lamah hian," tiin kan awmna piah deuh hlek lam chu kâwkin a kal zui ta nghâl a, zui loh theih pawh a ni lo, Damon-a'n min en rùn bawk si a, Sti chu a rûkin ka ngei țhelh a ni. 

Lukhum leh Shawl kan en chhûng chuan Damon-a chu kan bulah chuan a lo ding ve rùn reng a, ami dîp a na si a, hrehawm ka ti. Ka zàmzia chu a hriat loh hrâm ka beisei, vawi khat phei chu shawl ka zàr pharhna lamah a bân ka va tawk fuh a, ka kut ka lâk lêt ranzia mai chuh! Ka sen țûn țûn loh hrâm ka beisei, ani lah chu eng emaw hriat tham loh sawi hian a phun sup a, anchhia min lawh a ni ngei ngei ang, zei loh theih ngei mai.

Lukhum leh Shawl man an inhlan fel hnu, a chhuah dâwn chuan," Min thlanpui avàngin làwmthu sawi nân naktûkah lunch ka chawi dâwn nia," a ti a, ka chhàn hmain Sti pek chuan," Wow, va vànnei bîk ve! Nihlawh bîk hle mai," a lo ti ve vat a, a nui pah sâng a, ka va melh kawr a, ani lah chuan min en duh lovin  Damon-a lam chauh chu a lo en a, chutah," Min dàwr avàngin kan lãwm e, min lo dàwr leh țhìn dâwn nia," tiin Damon-a chu a thlah liam ta nghâl a.

A chhuak fel ta maw tihah chuan ding zeta min rawn en nghâlin," A pi pawh i lo hmuhpui tawh maw?!! Lalpa leh! Ka au chhuah teuhzia kha, ka hriat miah lohin in lo inhnìmhnai tawh àwm hle mai, min hrilh duh lo vei a maw," a ti nghâl chhar chhar a, ka kut lo vaiin," Ni lo, chutiang lam a ni lo, hrilh che ka tum a, hun ka la nei lo alawm," chu ka ti ve a; mahse, chhuanlam mai a ni. Thu dik lo chu a ni hran lo; mahse, hrilh ka tum lai khân boruak dangin min dêng a, ka hrilh lo chho ta mai kha a ni zâwk. Bâkah, Damon-a nèn inhnimhnaihna kan nei hran lo, kan inkârah phei chuan eng mah a awm lo.

"Min hrilh nghâl rawh, engtik laiin nge a pi chu i lo hmuhpui rêng rêng a? Ka hriatpui miah lohin hmâ in lo sâwn dùn viau tawh mai ka ti!" a tih leh chuan,"Sunday chawhnu lama kan pahniha kan awm laia min rawn betu Michael-a kha i hria tiraw? Michael-a khân a pi min hmuhpui a, Michael-a pi leh Damon-a pi kha thuhmun an lo nia, a pite inah kan va inhmu khâwm nawlh alawm," tiin kan inhmuh dàn zawng zawng chu ka hrilh ta vek a.

"A lo nih mai mai chu a. Mak i ti àwm mang e, Damon-a hmeichhe rawn hruai chu i hmuh tawh hnu a ni em? Hmân deuha mi kha a ni tawh lo em ni?" tia min zawh chuan," Ni nâng, Elena-i kha chu a ni lo, a chhe lo reuh lutuk, a lian lutuk bîk lo nain a nalh tâwk reuh viau," ka lo ti a.

"Nang ai chuan a chhe zâwk hrim hrim ang," a lo ti leh hmanhmawh a, nui chung hian,"Min țannaah ka lâwm e; mahse, ka tluk chuang lo," fiamthu vêk hian ka lo ti ve a, a hnuah phei chuan Damon-a hmeichhe rawn hruai thlâ chu kan rêl dùn a, kan nui dùn hawk hawk a. Ina ka haw hnu thleng pawhin Sti nèna kan thil sawi chu ka ngaihtuah a, ni dang ai chuan ka rilru pawh a zângkhai deuhin ka hria, a hlâwkthlâk phian mai, mi rèl zeuh zeuh pawh hi a lo țha a nih dâwn hi.

A tûk chhùn chawlh hun lai chuan ka phone a rawn ri a, number ringawt a nih avàng chuan ka ngaihsak țhaduh vak lo va; mahse, vawi nga vêl zet ka rïktîr hnu chuan ka chhâng ta tho a, rin loh lam daihin Damon-a a lo la ni zui. 

"Le, chawl tùr chuan chhuak tawh ang le, i rawn chhuak dâwn nge ka rawn lam kher che i phût deuh?"

A țawng chu mi dangin an hre pha em tiin ka hawi kual a, tu mahon min lo en hran lo. He pa hian a lo ti tak tak a nih hi, engah vak ka lo ngai lo va, bâkah, ti tak tak lovin a theihnghilh daih tawh ka ring ve hrim hrim bawk a, ngaihțha deuhin ka lo awm tawh asin le.

"A țûl lo, ka tih theih ve tâwk-"

"Minute khat hun i nei aw, gate pâwna lo nghah che nge i duh school veranda-ah?" a rawn tih leh chuan ka rilru a buai ta map mai. Ka bula Michael-a  awm loh lai tak niin Sir Puia nèn an chhuak lawk a, ka vànnei viau a ni, awm na se chu min lo en kurin min lo ngaihven leh àwm si a. 

Ka chhuak ta nge nge. Ka chhuah mai loh chuan a rawn lût duh mai àwm si a, mi dang hmuh laia chhuahpui ka duh teuh si lo. Sawisep a awm ang a, Michael-a'n min zâwt  ngei bawk ang a, phatmar dàn tùr a vâng dâwn si, a theih hrâm chuan inthiar fihlìm ka duh.

Chawl turin vêng hranah daih kan tlân chhuak a, kan tlàn chhúng chuan Michael-a hnêna chhuanlam siam dàn tùr mawlh ka ngaihtuah a, a vâng nasa mai si a, ka ngaihtuah chhuak thiam mai lo.

"Ngaihtuah chiam duh suh, pângngai tak khân awm zâwk teh," a rawn tih chuan ka phu zawk țêp a ni, ka hmelah ka ngaihtuahna a lang chhuak leh a ni ngei ang chu.

"Khawiah nge min hruai dâwn?" ka tih chuan," Kan thlen hunah i hre mai ang," a lo ti mai a, zawh man a awm lo ve khawpin ka hria. Ka hmel hriat ka hmuh loh hrâm ka beisei, ani nèn hi chuan tu mahin min hmu dùn lo se ka duh, a làr hmel si.

Ngawi rengin ka țhu a, ei tùr a order a, ka duh pawh min zâwt chuang lo. Hetianga mipa inringtâwk hi ka ngaisâng țhin, ka ei duh zâwng min zawh loh avànga inringtâwk a ni ka tihna ni lovin a chezia leh awm dàn hrim hrim hi a inringtâwk lutuk a, hei hi ngaihsànawm ka tiin min hîp țhìn a ni.

"School compound a ni lo tih ka hre reng a nia," nui deuh lek lek hmel pua a rawn tih chuan ka en thuai a; mahse, a mitmengah erawh chuan fiamthùna a lang hauh lo thung.

Ka chhâng lo. A hnuah chuan amah vêk chuan," Ka pi chu, thilpëk a hmuh hunah chuan a lãwm ngawt ang chu, țha leh nalh i tih ber i thlan chhuah an ni bawk si a," a ti leh daih a, lo țawng ve ta vatin," Ka thlan loh pawhin i thlan chhuah tùr tho tho an nih kha," ka lo ti ve thung a.

"Ni lo, awm lo la chuan kha dàwrah pawh khân ka rawn lût lo ang. Ka pi kha khirh lêm lo mah se thil mawi leh țha hi chu a làwm ve a, chutiangin mihring lamah pawh a ni tho, a bula hruai tùr hmeichhia pawh hi thlan uluk a ngai a nia, Michael-a khân a hrilh tho che chuan ka ring a, a dik tiraw?" a ti leh a.

(Duh aiin a tawi; mahse, ka mit tlin tâwk a ni rih tlat😔 hre thiam teh u🙏)

*MI CHANCHIN CHHE LAI AIIN A ȚHA LAI SAWI TAM CHÎNG RAWH, A CHHE LAM SAWI RENG AIA A ȚHA LAM SAWI TAM HIAN MI NUNAH THU A SAWI NASA DUH ZÂWK*