☆HLWILY☆ - 8 By Dingdi Pachuau

 ☆HLWILY☆ - 8 By Dingdi Pachuau

Min hrilh deuh nual; mahse, ka hriat dàn kha a duhawm vak loh, ka thlen hnuah chauh ka la hre zui. Ka han thinrim der ve deuh reng kha a ni a; mahse, Michael-a hi zawng, han thinrim der khum reng theih a ni mawlh lo, min be bawrh bawrh reng a, ka țawng duh hma hi chuan min be reng peih mai a nia, a tàwpah hi chuan hnehna changin min be țawng leh nge nge ţhin. Ka ngaina a, a hlim hmel hmuhte hi nuam ka ti țhin.

Chhâng lêm lo chuan ka lu ka bu nghat ringawt a, ei tùr chu rawn siam zo vat vat se, ei thuaiin school-ah lêt leh thuai ila ka duh ber mai, Michael-a hmachhawn erawh ka huphurh ru khawp mai.

"Engtin nge Rindiki tih hi i hming a nih loh theih le? " Chu a zawhna avàng chuan ka en vat a, ani pawh chuan a chair hnung nghèng ar ar pah chuan min lo en ve reng a, a mitmeng mawi zet chu a'n meng zím pah deuh bawk a, en rei duh lovin ka hawi sawn ta daih a.

"LZ Memorial-ah khân i kal țhin tiraw?" a rawn tih leh chuan ka bu nghat a, chutah," Khatah pawh khân Rindiki ti char charin ka hria che a, i hming hi i thlâk daih chu a ni si lo a maw?" a ti leh a.

"Rindiki ka la ni ngai lo hrim hrim," tiin ka lo chhâng vat a, ani erawh chuan," 'Rindik' tia ka koh chein min chhàn ve ziah tho kha," a lo ti thung a, ka nui ta ringawt, a tidik ve bawk si alawm, khâng hun lai khân amah kha ka zah theih êm avàngin 'Rindiki' ka nih loh thu pawh kha ka hrilh ngam ngai lo a nih kha.

"Min ko der a niang ka tih vàng a nih kha," ka ti leh țâlh tho. Khâng hun lai pawh khân min lo hre ve reng tawh tihna a ni a; mahse, min hre sa angin a awm duh hauh si lo, a la strict êm êm zui. 

"Ka tân chuan 'Rindiki' i ni tho tho."

Teh țâlh chuan. A hmel hriat hmeichhe zîngah Rindiki tih hming pû an awm a ni ngei ang, chu nèn chuan kan inang viau pawh a ni maithei bawk, a bialnu tu emaw ber pawh a lo ni thei tho bawk.  A, ka lo ngaihtuah buai chiamna tùr a awm hleinem, Rindiki ka ni chuang lo va.

Ei tùr a rawn thlen chuan ka tâ tur chu ka hmaah min chhawp remsak thlap a, chumi hnuah a tâ ve tùr chu a la ve ta chauh a." Ei țeuh rawh, ka hruai chhuah che i ni a, puar lova i lêt ka duh miah lo a nia," a ti zui zat a.

An thil siam chu a tui khawp mai, a hriat tawh țhin vàng a nih ngei ka ring heta min hruai ni. Ka duh aiin ka puar ngei pawhin ka ring, ei tùr kan inchhawp tam êm mai.

"Tui i ti chiang," nui deuh suka a tih chuan," Ti e," ka lo ti ve mai bawk a, dâwt sawi kher a țûlin ka hre lo. Ani pawh chuan," Tui i ti ang tih ka hriat avàngin alawm hetah hian ka hruai che, an siam thianghlim bawk a," a ti leh a.

Ka rilruah chuan zawhna tam tak a lo lût zut zut a; mahse, pakhat tê mah chu ka sawi chhuak ngam lo. Hmeichhe eng zât nge he restaurant-ah hian a hruai tawh ang? Kei hi eng zahna nge ka nih? A hruai châk hmeichhia an tam dâwn si, kei ngei pawh hian a bula awma a hmeichhe hruai chhuah nih chu ka châk ve fo țhin a ni; mahse, tunah hian a bulah amah hmachhawn zâwngin ka țhu a, chhûngrilah nuam tihna leh zahna, hlimna leh phùrna nei țûnin a hmel hmuh châk reng țhin mah ila, a châng châng chauhin ka en ve ngam țâwk a nih hi, zawhna zawhte chu khawi lam hi a ni ringawt. 

"School-a thawh hi hrehawm i ti em?" tia zawhna a rawn phuh chhuah leh tâkah chuan ka suangtuahna ram ata inthing harh vatin ka en vat a," Aih... ti lo ve," bah deuh nak hian ka lo ti vat a, ani chuan," Eng thil nge maw i lo ngaihtuah le? Ka seh dâwn lo che, inthlah dul tak khân awm rawh, School compound a nih loh avàngin eng lam hawi pawh kan sawi thei vek a nia," a chair hnung nghèng ar ar pah chuan a ti leh a, a hmui pet sàwi deuh pah chuan tlêmin nui hmêl a pu deuh bawk a.

"Kan lêt tawh dâwn em?" ka lo ti ve thung a, ei tùr kan ei zo thawkhat tawh a, he pa bula awm reng hi ka châk viau nain ka hlau pah deuh, ami hìpna a nasa si, a awm dàn engkim mai hian min hîpin a bula ka awm rei chuan a zùn hian min dâwi ã vek palh ang, chuan, a laka ka rilru puthmang leh awm dàn hi a hre chhuak palh hlauh ang tih ka hlau bawk, ka inthup thiam si lo...mahse, tunah pawh hian a hre chhuak tawh hial maithei a ni.

"Kan ei zo chauh a, pum a ngaihtuahawm alawm, țhu lawk ang, a la tlai loh hi," tiin dàwhkàna a phone chu a melh zoh a, ka hnial ngam leh tawh dêr lo.

Chutah," I pa kha titipui a nuam ka ti riau mai, a dam țha maw?" a rawn ti a, rang zet hian," Um, dam țha e," ka lo ti vat a, sawi chhunzawm tùr a bo leh nghâl duak mai, a zo dèr, ka ngawi leh ta vang vang a.

"I țhiannu dàwr nghâk kha, a hming kha Sti tiraw?" a rawn tih leh chuan," Aw...Sti," ka ti a, han chhunzawm leh dàn tùr pawh ka hre leh ta chuang lo, school compound ni lo mah se titipui tùr ka hre hlawl lo. Ni lo, ka hre țeuh a, ka sawi ngam lo a ni zâwk. A rûk tak chuan, min sawipui se ka tih hi min sawipui ang tih ka hlau hluah hluah, sawi se ka tih kha sawi lo se ka duh tihna a nih ber chu, awmze awm lo rilru ka pu a ni ber mai.

Vànneihthlâk takin ka ti dâwn nge, dawhkàna a phone dah chu a rawn ri ta hlauh mai a, a rûkin ka lo mitsìr reng a, a tìrah chuan a ngaihtuah țha duh vak lo va, a ring deuh reng hnuah a la ve chauh, la kãnga en pah chuan a phun hluk a, a bialnu a nih loh pawhin hmeichhia tu emaw a hriat țhin a nih ka ring.

"Aw, tlaiah, bànah ni rawh se." Chu zawng chu a sawi a, a duh tâwk ta daih. Dawhkàna phone dah chuan a thaw deuh huai a, min rawn en tâk thut avàng chuan ka lo hawi sawn hman awkawng lo mai, kan inen ta ràn mai.

"Hmeichhia hi in inang lo ve thei ngawt mai tiraw? Mipa pawh kan ni ve tho mai," tiin a han țhu țha deuh a, dawhkànah a kiu pahnih rawn nghatin a rawn âwn hnai a, chutah," Nula duhawm tak i ni tih i inhria em?" a rawn ti ta daih mai!

A thil sawi chu fiamthu a nih ka ring! Mit khap lo lêk chuan ka en a, ani pawh chuan nui hmel pu hauh lo chuan min en lêt ve rùn mai," Nula duhawm tak leh mahni inring tâwk tak, ka duh chi tak!" a ti leh sup a, chutah chiah chuan ka mit la sawnin ka zah avàng chuan ka bîng nghâl mup mupin ka hre bawk. Nichina a thil sawi hmasak kha chu fiamthu-ah ka ngaihsak mai a, tuna a thil sawi erawh hi chuan min ti-awm nuam lo nghâl, tlangvâl zei leh luck tak bulah kaawm a ni tih ka lo theihnghilh hman țêp a ni.

"Lêt tawh ang," tiin amah pawh en ngam lo chuan ka tho ta thuai a, ka bag pawh chu ka la nghâl bawk a, ka rilru takah chuan amah nghâk lova kea kal mai ka duh zâwk a; mahse, a hla ve tham deuh a, ka hah viau bâkah ka thlan a tla hluam ang tih ka hlau deuh a ni. 

Ani pawh a rawn chhuak ve nghâl mai bawk a, a bula car chhúnga chuan pawh chu ka huphurh ru tûk ta mai, khatiang lam kha min sawipui leh ang tih ka hlau a ni. Nuam ti viau tùra ka nih laiin khatiang teh tawl kha chuan ka hriat ka ring pha lo, bâkah, ka zak bawk, a zahthlâk êm asin. Kawplai nei a ni a, ani ang tlangvâl luck leh zei tân chuan khatiang țawngkam kha chu engah mah a ngai lo ang, nula tân chuan a ui lo viau bawk ang; mahse, kei ang nula, ngaihzâwng pawh la nei chhin lo tân chuan awm ngaihna hriat a har êm asin, ani tâna eng mah ni lo kha ka tân chuan a zahthlâk, bâkah, a thil sawiah ka tawlh thlu tùr a ni lo.

A lam pawh en duh lo chuan sîr lam ka hawi deuh tlat a, ka țawng lo, ani pawh a țawng bîk chuang lo. Kan tlàn rei deuh hnuah erawh chuan," I thin a rim lo tiraw? Ka hmuh dàn che ka sawi a ni ve mai a, ngaih huat tùrin ka sawi miah lo a nia," a rawn ti chhuak ta a, chutah,"I thin a rim chuan min chùm chawrh mai rawh, nula hmelțha chum chu ka tuar thei mai ang," a ti leh zat a.

School gate thlen hmain ka chhuk daih a, ani pawh chuan a sawi buai chuang lo, thawhpuite'n min lo hmuh palh ka duh lo a ni. Min lo hmu palh hlauh a nih chuan zawhna a tam dâwn lutuk, Michael-a hnêna chhuanlam siam tùr mawlh chu...

Pathian hian dâwt ka sawi a phal rih lo a niang ka ti tawp mai, Michael-a ka hmu lo hlauh mai, a lo awm lo va, mi dang lo awmho lah chu phone khawihin an lo kûn ngar hlawm bawk a, min lo ngaihsak hran lo. Thinphu dèp dêpin ka chair-ah chuan ka țhu a, khawiah nge maw Michael-a chu a lo kal ve daih ni? A lo lêt hunah zawhna a tam viau tho ang em? Ka rilru a la hahdam kim lo deuh.

Dâr 1 rîk nân minute 5 chiah a awm tawh tihah chuan Michael-a leh Puia chu an rawn inzui lût ta a, min rawn hmuh veleh chuan Michael-a chuan," Duh aiin kan rei a," tiin a dawhkàna a phone chu lain,"Ka phone lah hi ka ken chhuah theihnghilh daih zui a," a rawn ti nghâl vat a, kei chuan," In buai viau a nih hi ka lo ti mai a," tiin rinhlelhawm lo thei ang ber chuan ka lo chhâng ve a.

"Um, rin aiin thlâk a lo harsa deuh a, ka han khawihpui ve bawk alawm le, oil rim ka nam rum rum lo maw?" a tih leh chuan," Nam lo ve, i rim  a tui pângngai," ner sak chung hian ka ti a, ani pawh chu a ner ve sak a, a țhutnaah chuan a țhu ve nghâl a.

"Michael-a chu awm lo se chuan tunah pawh hian kan la zo pawhin ka ring lo, a làwmawm tak tak a ni," Puia chuan a rawn ti làng lâng a, Michael-a chuan,"In nu phurh nân hmang țhìn lo la chuan ka siampui miah lo ang che, in nuin a àn khum tùr che ka ngaingam ngang lo a ni," nui chung hian a lo ti a,  Puia pawh chuan," Chu chu a pawimawh viau a ni, mi pahnih inkâr chhiat theihna a ni tlat," nui chung tho hian a lo ti ve a.

Michael-a chuan min rawn enin," Thil eiin i chhuak em? I puar thei maw? Ka tel lovin i puar thei lo ang tih ka lo hlau viau a," a ti a, tlêmin a nui pah deuh bawk a, kei chuan," Puar mah mahin ka hria, i tel lo hian ka puar thei mah zâwk a nih hmel," nui hak hak chung hian ka lo ti thung a, dár a rîk tâk hnuah chuan titi zawm tawh lovin naupang zirlaibu kan en ta daih a.

Michael-a'n eng mah min zâwt hran lo chu ka lâwm khawp mai. Damon-a nèn kan chhuak tih hre na se zawng, min zâwt mawlh mawlhin ka ring, ka tân chuan Puia bike part lo țha chiah lo pawh chu malsàwmna chi khat a lo ni e.

Zanriah ei laiin ka pa chuan,"I uin min rawn bia a, an in kan hmuhpui ve a phût a, min sâwm a, engtikah nge kan lèn theih ang?" tiin min râwn ve a, kei chuan," Zànah nge chhùnah?" ka lo ti vat a, ka pa chuan," I hman hun hunah a ni mai; mahse, zàn lamah a nih dâwn chuan hma deuh hleka kan kal a ngai ve ang, a chhan chu kan lêng rei hman dâwn si lo va," a lo ti leh a.

Nu Mawii chuan,"Zàn lama lèn in tih chuan hma deuh takah eirawng a bawl theih a nia," a lo ti a, ka pa chuan," Chutiang pawh a ngai chuang lo, i bàwl hun hi a tâwk chiah, chaw ei hun sawn hma deuh chauh kha a ni mai, kha lamah kha chuan buaina a awm lo ve," tiin a lo chhunzawm a,  ka en a, ka pain Nu Mawii a nuih deuh sak chu ka hmuh chuan ka melh sawn ta vat a. 

Zànah mood off zetin Sti nèn kan inbia a, vawiina ka hun hman dàn chu hrilhin Damon-a a chanchin a sawi chhuak tih ka hrilh chuan," A ni maw? Min lo hre ve a nih chu! A țha dâwn lutuk e, chuan, a chhaih deuh vêl che maw? Um, kawng a inhawng deuh nghâl, beiseina a awm, lungngai miah suh," a rawn ti nghâl bawrh bawrh a.

"Ani ang tlangvâl experience nei tawh leh luck over tân khatiang țawngkam mai mai kha chu eng mah a ni lo, hmeichhe eng zât nge a hrilh tawh a i rin? Tam tak maw le, min tihzah a tum ve mai mai a ni," ka lo ti thung a. A ni tak tak, Damon-a hian min chhaih der alawm, a der mai maiin, Michael-a nèn kan inkawp deuha a hriat vàng a ni thei ang em? A laka ațanga inthiar fihlîm tùra min hrilhtu kha a nia,  Michael-a hming hi keimah vàngin a chhiat a hlau a ni ngei ang.

"Eng zât pawh chu lo hrilh tawh mah se a tún hun hi alawm pawimawh ber, a hun kal tawhah chuan i la tel ve tlat si lo va, a tûn hun hman mêka a hmeichhia i nih chuan-" a la sawi lai chuan ka lo pawt chat a," A hmeichhia nih ka duh lo, hmeichhia a ngah lutuk! Vawiina kan chawlh dun lai pawhin an rawn phone hman tho," ka lo ti vat a, ani chuan," Min sawi zawhtîr phawt ta che, 'a hmeichhia'  han tihah khân a hmeichhe duh leh a kawp duh tih sawi ka tumna a nih kha, chutiang dinhmunah chuan dintîr che ka tum dáwn alawm, lo inrawlh ve miah suh ang che, ka tifel thei ang," a rawn ti leh barh barh a.

"Hei, min tihpui miah suh, a bulah han sawi chhuak na teh, i châk lo ang aw, a hmeichhia zâwkina  tih hmasak phei chu ka thinlung hian a duh bau lo, zahthlâk lutuk," ka lo ti ve thung a, ka ngaihtuah zâwng ringawt pawhin ka zak, a zahthlâk dâwn lutuk.

"Thlarau rethei, lo ngawi rih teh! Kan ti hmasa ang ka tih loh kha, lo lungngai suh. A thuhrimah, mipain tih hmasak tùr tih hi a awm bîk lo, hmeichhiain chêt a lãk hmasak hun pawh a awm ve tho alawm, mipa zei lêm lo bulah phei chuan a hmeichhia zâwkin chêt a lâk loh chuan a duh rûk viau pawhin a chàn theuh thei a nia, timing hi a pawimawh heavy aw ka expi ațangin a nih chu ka sawi ni," a rawn ti leh barh barh a.

Kan inbe rei a nia aw. Sti bulah hi chuan duh aiin thil ka sawi tam ziah ţhìn. Zanina ka mood off deuh pawh kha kan inbiak lai kha chuan ka theihnghilh vek, Damon-a chanchin sawi hian duh aiin ka lo tui mah mah țhìn a, hun rei leh rei loh lam ka lo ngaihtuah chang ngai lo, tunah pawh hei zàn dár 11 a ri dáwn, minute 7 chauh a awm leh tawh!

A hma kha chuan Damon-a hmuh ka châkin ni tin mai khân ka mit ka lèn kual deuh reng țhìn kha a nia, tunah hi chuan ka hmu ang a, min hmu ve ang tih mawlh ka hlau zek zek tawh. Zàn ka mutnaahte hian a thil sawi kha ka ngaihtuah țhìn a, rilruah làwmna nei tel tho mah ila zahna ka nei tam zâwk ziah. Min hmu ang a, min biain chawlhpuiah min sâwm ang tih mawlh ka hlau, ka ni tin hun hman dàn chu dang leh tawh tak a ni.

*******

Michael-a'n," Bialnu ka nei chuang lo va, ka pi lahin ka bialnuah a ngai nghet hmiah bawk che a, nang lahin bialpa i nei lo bawk a, inkawp law law mai ang," nui țhâ chunga a tih chuan," I tih dik loh a nih kha, engah nge i pi bula min hruai ni? Dâwt hrilh kher a ngai lo a nia," ka lo ti thung a, ka nui duh miah lo bawk a, ani lah chuan," Dâwt pawh a ni vak chuang hleinem, thu dikah chantîr thên ila, a țha viau tak ang chu tiraw?" awlsam zet hian a ti leh a.

"Ngawi mai mai teh," ka tih chuan," Thu dikah kan chantîr ang, vawiin ațang hian ka pi ngaih dànah mai ni lovin mi zawng zawng ngaih dànah pawh ka bialnu i ni ta e," lo tiin ka kut chu lain a han fâwp zoh a, mi min hmuh hlauvin ka kut chu ka la lêt ta vat a, chutah," Insúm teh, insûm teh, min hretuten min lo hmu rêu rêu ang e, i bialnu ka ni tak tak emaw an ti palh ang," tiin a ei tùr chah chu melh zohin," Ei rawh, a daih chuan a tui dâwn hauh lo a nia," ka ti leh a.

"Eng nge, ka bialnu nih pawh chu i va duh àwm lo ve a? Tuna ka duat aia lêt 10 vêl hian ka duat dâwn che asin," tiin nui deuh chung hian min rawn en phei a, kei pawh ka nui lo thei chuang lo. Kûn hnai deuhin," School compound a ni ang tih a hlauhawm a nia, sawi tawh rêng rêng suh, tuna min duat dàn hi ka duh tâwk tiu teu khawp mai, hei aia min duat chuan awmphung ka hre lo ang," ka ti sar sar a, chutah,"I pi rilru hlimna erawh lâksak ka duh lo; mahse, nakînah erawh i hrilh fiah deuh chu a ngai ang," ka ti leh a.

Zanriah ei khama țhutkhâwmnaa ka țhut maimai lai chuan doorbell a rawn ri  ral ral a, tu tak ni ang maw ti ru nauh nauh chung chuan ka lo chhàwn vat a, ka pa inlêng tùr an nih ka'n ring deuh ngawt a; mahse, kawngkaa rawn lût ka hmuh chuan chu ka rinna chuan min thlawh bosan chiang kher mai.

"Rawn biak che ka tum a, min chhâng thei lo va," rawn lût paha a tih chuan ka phone ka room-ah ka charge daih tih ka ngaihtuah chhuak ve chiah.

Hmuh ka hreh tawh asin le. Zanin phei chu a rawn inthuam nalh hle si, ti ila ani hi chu engtin pawhin inthuam se, a màwipui vek mai si a, ka mitah hi chuan a lang chhe ngai lo.

"Lo țhu rawh, eng nge ni ta?" tiin țhutna ka kawh hmuh vat a, ani pawh chu a rawn țhu ve mai a, min rawn țhut hnaih viau lehnghâl, han țhut sawn daih lah chu a tih chi hran si loh, min hnaih lutuk chuan a hùhâng hi tawrh a hrehawm ka ti, min tibuai.

"Eng nge i duh a?" ka tih leh chuan," Nula inah tlangvâl ka lo lêng a, duh chu ka neih ngei ka ring bawk," min rawn en pah chuan a ti leh ta, min chhànna chuan min tihamhaih zo leh ta vek mai, țawng leh tùr a bo vek.

*I BEIH HRÂM HRÂM PEIH CHHÛNG CHUAN I TÂN BEISEINA LEH HLAWHTLINNA A AWM RENG A NI*