☆HLWILY☆ - 9 By Dingdi Pachuau

 ☆HLWILY☆ - 9 By Dingdi Pachuau

Tlangvâl lo lêng ve ta chu, nula nih ve bawk si chuan lo kawm loh theih a ni lo va, thingpui ka lumsak ve a, titipui tùr erawh ka hre lo kher mai. Zah rûkna ka nei bawk si nèn, ka pa awm ve se ka tih ber țum a la ni ngei ang, ani lah chu engtizia emaw ni, a room lamah a tawm char char a, a rawn dîkdãk hauh lo, Nu Mawii nèn an awm dùn a ni maithei a ni.

"I chhûngte hi an awm nange?" a tih chuan," Awm e, room lamah an kal lawk a nih kha," ka ti ve zaih a, keimah chauhin ka hmachhawn si a, min zuama ka duh loh dàna(ti ila ka thinphu tirang zâwng leh ka hnial theih loh tùrin tihna a ni ber zâwk ang chu) a awm ka hlauh vànga chutiang chu sawi ka ni.

Mahse, chu chuan a thil sawi duhah chuan tìmna a pe hauh lo nge, zahna a nei hauh lo ka ti zâwk dâwn ni, confi tih zet hian," An awm lo hlauh chu a tihzia e, ka thil sawi tùr lah hi an lo ngaihthlâk ve tùr chi a ni pawhin ka hre lo," tiin min rawn en a, chutah," Eng vànga restaurant ațang khân lêt vat  rawt nge i nih a? Ka sawi duh pawh ka la sawi zo hman hleinem," a rawn ti leh ta a.

Zahnain min rawn chîm leh ta, ka hmai a sa hat hat mai a, amah pawh ka en ngam leh ta lo, chhuat chu ka bih ta ngar mai a, țawng ve dàn tùr pawh ka hre lo, ka ngawi tawp ringawt.

"Kan sawi duh hi chu sawi thuai thuai a țha ber, sawi thei lo leh sawi hman lovin kan awm thut thei, ka sawi duh hi chu chu ka zêp ve ngai lo bawk. Nula fel leh duhawm tak i ni ka tih tawh kha, thu dik tak a nih kha," a ti leh ta a, ka sen țûn țûnin ka ring, ka zak êm a ni.

"I țawng duh si lo va, ka duh duh ka sawi mai dâwn a ni," ti lehin a nui hawk a,"I zak a ni maw?  Mahse, nang anga nula zakzum tak hi an innocent duh tih ka hria, ka duh zâwng tak a ni bawk," te chu a la ti deuh deuh a! Men ngaihna leh awm ngaihna ka hre tawh hlawl lo.

Khuma mua maimichhìn vang vang pah chuan zanina a țawng dàn leh awm dànte chu ka ngaihtuah lét a, chu pawh chuan min la tizak chem chem thei nia! Engtin nge khati khawp khân a huaisen theih le? A inringtâwk bawk si, a lêng rei hran miah lo va, sawi erawh a nei nual, a mal malin a thil sawi zawng zawngte kha a indawt dànin ka la ngaihtuah chhuak vek thei.

A inrintâwkna kha mi dang tân chuan ngeiawm a ni thei maithei; mahse, kei chu amah min hîp zualtu a ni tlat. Chapo hmêl lek lek pu chunga a han hawi țhin pawh chu mi dang chuan an ngei maithei, ka ngei ve chuang hauh lo, ngei ahnêkin amah ti'amah' hliah hliahtu-ah ka ngai tlat. A khîk deuh sak zâwnga a mit sîr lama inrîn pahnih lo lang kalh țhin chuan kum naupang tak a ni tawh lo tih a lantîr a, hei pawh hi inhmeh ka ti, ka bialpa chu ni ta se chuan ka fawhsak nasa thei ngawt ang chu.

Ka thil ngaihtuah avàng chuan ka mit chu ka hup ta vat a, keimah ka inzahpui deuh thut a ni. Chhûngril takah chuan lêrh ka inti ru khawp mai, zahthlâk hian, zanin zet chu ka ngaihtuahna miin an hre thei ang tih a hlauhawm khawpin ka hria. Miin ngaihzâwng nei ngai lovah min ngai ngei àwm si a, a rûkin duh ka nei ru reng bawk sia...

Sti nèn rei zet kan inbiak leh tâk avàngin ka muhil har khawp mai a, zanina Damon-a lo lèn chungchâng leh kan awm dàn ka hrilh vàng vek a ni. A phûr thei si a, kei lahin Star ngawih ngawih chanchin han sawi lah chu hrehawm ka lo ti vak bawk si lo nèn, kan rei leh zêk ziah. Rei zet games khèla khuma ka leh ka leh hnuah chuan ka mut pawh a lo chhuak ve țan ta a, Damon-a thil sawi pakhat,"Hei aia hriat chian lehzual che hi ka duh a, chhuahpui zauh zauh chea kawm zauh zauh che pawh ka duh ngei ang, i duh zâwng leh i ngainat zâwngte hriat ka duh si a," tih chu ngaihtuah pah rauh rauh chuan ka muhìl ve ta a.

A frank a, a zei pah bawk a, min duh thu min hrilh nghâl hmiah mai kha a ni a, chuvàng tak chuan school kala inhmuh leh pawh ka huphurh rêng a ni, țawngkain engtin chhâng ve lêm lo mah ila ani ang mi zei leh nula chinchâng hre tawh chuan ka haw lo a ni tih a hre chiang ngawt ang chu, bâkah, a bula ka awm țhin dàn leh ka mitmeng ațangin min chhiar thei vek ang tih ka ringhel lo, a haw dâwna ka bán tawn tawna vuan chunga ka beng bula min duh thu a sawi ngamna chhan pawh kha ka awm dàn vàng a nih ka ring, rilru chhûngrilah làwmna leh phùrna nei mah ila hmuh leh hun ka huphurh lo thei chuang lo, ka zak dâwn êm asin.

Mahse, dàn zamtu a ni bawk a, school-ah chuan a dàn zam ngei bawhchhetu-ah a țang lo. Staff room-a a rawn luh zauh châng pawhin hmeichhe lam chu a ngaihven lo mai ni lovin kan lam hawiin a mit pawh a rawn lèn ngai lo, a hma khân hetiang hian a lo awm țhìn rêng em tih ka ngaihtuah a, ka hre thei mai tawh lo, min duh thu a sawi kha a ti tak tak em aw ka tih phah hial a ni,  min en ngai bawk si lo va.

Damon-a a rawn lèn ațanga kár khat pawh a la ral lo ang tihah chuan Michael-a chuan," Nakzàn chu min chhuahpui rawh aw, i pa pawh ka rawn dìlsak mai ang che, i pawimawh lutuk, ka pi birthday a nia, i tel ngei kha a phût ru àwm si a," a ti a, ei tùr kan ei lai a ni a, thil ei lai chàwl meuhin  ka en a.

"Khatiang khân min en suh, a hma daiha hrilh che kha ka duh lo a, i lo huphurh țùng ang tih ka hlau ve alawm. En teh, huphurh miah suh, mi kan tam viau lo ang, ka pi lahin a nèl viau tawh che kha, hruai ngei che ka tum thu pawh ka hrilh tawh nghe nghe," a ti leh a, ka thaw hawk ringawt. A pi hmuhpui ngawr ngawr leh birthday-a kal chu ka huphurh lutuk lo; mahse, Damon-a a kal ve leh ngei àwm si a, hmeichhia a hruai tel leh ngei pawhin ka ring, chu tak chu hmuh ka duh lo, amah pawh hmuh ka hreh tho bawk.

Mahse, ka hnial thei lo, ka hnialna chu a ngaithla duh miah lo a ni zâwk mah. " Thilpêk tùr i lei a ngai lo ang, ka lei sa vek tawh a nia, ka pi chuan thilpêk hi a làwm ve a, a ngaihlu viau bawk a ni," a ti leh bawrh bawrh a.

Ka pa min dilsak a tum viau nain ngai ka tih loh avàngin a tilui ta bîk lo. Ka pa ka hrilh chuan ani chuan," E, kal ngei rawh khai, nula i ni a, chhuah ve zauh zauh pawh hi a țha ngai, a pawi miah lo; chutih rualin awm dàn chin erawh hriat a ngai thung; mahse, ka ngaihtuah lo che, ngaihtuah ngaiin i awm lo ang tih ka hria a ni," a lo ti dap dap a, ka rilru a tinuam suai suai mai, ka pa min rinna chu tihchhiat ka tum lo mai ni lovin min rin ang ngei chuan ka awm reng ang.

Michael-a khân mi tam vak lo tùr khân a sawi si a, ka rin aiin an lo tam daih mai. Ka mãwl hi ka tia, engah nge mi tam vak lo tùra ka ngaih theih le? Michael-a pa hian pianpui unau a nei nual si a, an fate zawng zawng leh an túte nèn phei chuan awm ve duah tùr chu an ni rêng a ni. A pi chuan min hmuh tawh avàngin min lo la hre reng a, rei erawh kan inbe hman bîk lo, mi dang lo kal a lo be ve zêl duh si a, programme țan hmain Michael-a chuan bathlàr lamah min hruai chhuak leh rih a.

Damon-a ka la hmu miah lo. A lo kal ve dâwn lo a niang, a nu leh pate erawh kha chu an rawn kal ngei a, chibai pawh ka chibai nghe nghe, a pi khân min chibaitîr miau mai a ni. Damon-a nu leh pate an ni tih a hnu daihah Michael-a'n min hrilh chauh a, Damon-a chuan a pa a chhùn ka ti hnuhnawh viau mai; mahse, a nu mitmeng a chhùn ka ti thung, a nu mitmeng chu a mawi sir ser reuh hle a, a nulât țhat lai phei chuan a chhe lo reuh ngawt ang ka ti, a nulian lêm lo nain a zùna uai chu a nareuh ngawt ang.

Michael-a chuan in chhûnga awmte chu min kawhhmuh diat diat pahin an inlaichìn dàn chu min hrilh zêl a, ngun taka ngaithlain an hmel chu ka en ngun hlawm viau a, an thlahtute an hmel chhe lêm lo bawk a, an hmel chhe lo hlawm khawpin ka hria. Mi awmthei tak tak an ni hlawm ngei bawk ang chu, an pâwnlam lan dàn incheina ațangin judge thiam vak lo mah ila an chezia leh hawiherah a hriat ruak ka ti tho tho.

Michael-a u fanuin min rawn koh avàngin kan lút ve ta thuai a, an lo kim viau tawh a niang Damon-a pawh ka va hmu ve ta tlat mai, ka en zawk tak tak a ni a; mahse, a bulah nula chhe lo zet a țhu tih ka hmu hman tho, hetiang lamah hi chuan ka mit hi a vârin a fing ve tlat. A hmaa a rawn hruainu kha chu a ni tawh miah lo, a thar a nei leh tawh chiang mai.

Birthday cake chu an bei changkãng khawp mai, a man a tam bawk a, a tui viau bawk a ni. Naupangho chuan nuam an han ti khawp a, an awm ve nual bawk nèn, an ri laih laih mai, puitlingho pawh kan bãng chuang lo, a chângin kan nui dar dar a, ei leh in lam kan hnianghnãr bawk a, ka puarin ka tlai khawp mai, Michael-a lahin ka ei tlêm ang tih hlauin min lâksak reng mai a, ka puar tawh thu leh ka duh tawh loh thu ka sawi fê hnuah a ring ve chauh niin ka hria, ani pawh a puar ve viauin ka ring, ka puar loh a hlauh vàng leh ka zah a hlauh vàngin a ei lui ve țeuh țeuh miau si a.

A hnuah chuan birthday party tak tak hmang chhovin music an play a, an lâm dual dual a, a țhen lah fiamthua lo lãm an awm bawk nèn, boruak a țang țha at at khawp mai. Naupanghoin nuam an ti lehpek, nui ar ar chungin an lãm nghang nghang hlawm a, a hnu deuhah lâm thiam deuhin hma an hruai a, Michael-a pawh chuan lâm ve tùrin min sâwm a; mahse, ka làm thiam loh thu hrilhin ka lo hnial thung. Ka lâm thiam lo miau alawm, eng lâm mah ka thiam lo. Thãwm chu ring hret angin lang mah se an hlim hlawm êm a, hmuhnawm ka ti.

A hnuah in chhûng boruak hot tak chu tlànsanin in chung lamah kan chho a, pâwn boruak chu a nuam sawng sawng khawp mai. Duhãm zet hian ka hîp lût kâwk kâwk a, Michael-a chu a lo nui hak hak a.

"I ning viau ang tih chu ka hre reng; mahse, hmun danga han hruai bo daih che kha i duh ka ring chiah lo va," a tih chuan ka lo bu nghat nghat a," A dik alawm, bâkah, an hlim hmel hmuh kha a nuam ve rêng rêng,  nang pawh i lo lâm thiam khawp mai," ka tih chuan a nui leh hak hak a.

"Ka pi tihhlim nân kan lâm țhin alawm, lâm lo bîk nih ka duh lo va," a tih chuan," Ka lâm ve si lo va?" ka lo ti vat a, ani chuan,"An hre thiam lutuk ang che, bâkah, i zakzum tih an hre vek tho a," a lo ti mai a, chutah," Tui bottle ka zu la leh lawk ang e, i lo awm ngam ang tiraw?" tiin min rawn en a.

"Ngam lo ang, min hruai ve mai rawh," nui chunga ka tih chuan ani pawh chu a nui ve a," Ka rei lo ang," tiin in hnuai lam pan chuan a pên zui ta nghâl a. A kal hnu chuan ka maimichhîng vang vang a, Damon-a kha làm lai vêl khân ka hmu miah lo kha a ni a, a hmeichhe rawn hruai nèn khân 'chance' an nei a ni ngei ang chu, lêrh ve bawk si, luck bawk si.  A lo lèna a thil sawi kha ka ngaihtuah lêt a, ka thaw hawk hawk ringawt, dâwt chu a sawi chiang a ni, a hmeichhe duh zâwng chi ka ni thei lo hrim hrim, a hmeichhe kawpte ka ngaihtuah lêt hian kan inang lo tehlam lutuk a, lei leh vàn ang vêl zeta inang lo kan ni.

"Zanin zet chu i mawi kher mai!"

Ka meng nghâl zawk mai! Engtin nge hetah ka awm tih a rawn hriat ni? A hriat avànga rawn kal ve nge a nih a, in chhûng boruak ningin a rawn tei chhuak zâwk? Hm, rawn kalpui a neih kha, a ning lo tawp ang, a rawn tei chhuak satliah mai a nih hi.

"Michael-a a rawn chho-" ka hmui a rawn hup chat, chuvàng chuan ka sawi zawm thei lo, chumi pah chuan a kut pakhat chuan ka kâwngah rawn vuan nghâlin amah si chêt chuan min pawm bet ta nghâl a. A chêt dàn chu a rang teh thut êm a, ka che ve hman lo, melh chho kalin min kuah ang chuan ka awm tawp ringawt, tàl chhuah pawh ka tum lo.

Chutah, ka hmui a hupna kut chu la sawnin a rawn kûn hniam ta thut a, a hmui chuan ka hmui chu a rawn sîktîr ta, chutah chiah chuan ka harh chhuak zawk mai a, ka tãl nghâl laih laih bawk; mahse, a bân pahnihin min kuah bet thei tawh a, ka tãl chhuak thei lo chiang khawp mai. Ka tàl nasat poh leh min kuah nghet ting mai, bâkah, kan taksa a inhnaihchilh zual zêl bawk a, ka tàwpsan mai loh chuan a phùrna ka tichhuak zual ting maiin ka hria a ni, a chhan chu tlàwm a tum dâwn hauh si lo.

"Hetia tih hi i cho tlat a ni, in chhûngah khãn vawi khat tê pawh min melh duh lo va," ti sup supin ka kut pahnih chu ka hnung lamah a kut pakhatin a chelh kawp a, ka sîr lam bangah min nêk bet bawk si nèn, țan a har țalh mai, a malin ka mal pahnih a nêk bet tlat bawk si a, tàl chhuah a rem hlawl lo.

"Min thlah teh, miin min hmu rêu rêu ang e," ka ti ta ringawt a, mi min hmuh ka duh lo, a laichìnte vek an ni lehnghâl, bâkah, a bialnu khân a rawn zawng maithei, Michael-a lah a rawn chho mêk tawh ngei bawk ang, ani nèna min hmuh dun hi ka duh hauh lo.

"Anniho.! In hnuaiah nuam an ti lutuk! Tu mah an rawn kal lo ang, chuvàng chuan, inthlah dul teh," a ti leh sup a, a thil sawi avàng mai chuan ka inthlah dul thei hleinem, a bulah hian engtin nge inthlah dul thei se min tih ni? Hetianga min nêk bet rùn chung lehnghâl hian...

"Min thlah teh! Min thlah duh loh chuan ka au vak a ni mai," tiin ka han vau ve chhin a; mahse, chhe tê pawhin a thêngthãwngah a thawk lo nasa a ni tih hriat tak hian a nui hawk a.

"Nangmah vànga police man chu hlauin min ring a maw? Ka thlah dâwn lo che, chuti a nih chuan i au thei tihna, han au chhin teh, ka hre châk zâwk hial mai ka ti!" a ti duh chauh lehnghâl a, ka bei a dawng titih nghâl mai rêng bawk a, au ta chiah mah ila tu mahin ka au ri an hria pawhin ka ring chuang lo.

"School-ah ka insûm hrâm hrâm ziah, ka insûm tawh dâwn lo," tih leh rawn kùn hniam rual leh zatin min rawn fâwp ta nghâl a, ka chhâng lêt lo mai ni lovin ka lo tãl vat a; mahse, a hma zawng aiin min nêk bet nghet leh ta, nâ ka tih avànga ka àn zawk lai chuan remchângah la fuhin a lei zei zet chu a rawn chhawr nghâl zat a.

Chhâng lêt lo tùrin ka insûm ngar ngar; mahse, min fawh rei deuh hnuah chuan ka thluak a tibuai țan! Mipain min fâwp ngai hauh si lo va, chhàn lêt dàn tùr pawh ka hre chuang lo nain infawh chu thil hrehawm tak a niin ka hre lo; mahse, chutia ka duh lo chung min fâwp lui duh mai chuan ka rilru a tina tlat mai a nih chu, min duh ni khân a insawi si a, min duh a nih chuan ka zai ngai takin min dawm tùrah ka ngai; mahse, a ni hauh si lo, tihluihna a hmang tlat si, ka kut chu hûm ruhin ka rilru nat avànga ka mittui tla tùr chu dan kîr ka tum hrâm hrâm a; mahse, ka hlawhchham a nih hmel, ka biang chu a rawn lum thla ta pap a.

Ani pawh chuan ka mittui tla chu a lo hai bîk miah lo, tàwp thutin," I țap... Enga..ti nge? Eng.. eng thil nge...ka tihsual?" a ti buh ta nuai a. 

"Eng thil phiangsen nge i lo tih a!!!" Michael-a thinrim awki ring tak chu ka hre vau vau mai, chutah, tisa ri no chawk ri ka hre leh zat a, chumi rual chiah chuan Damon-a chu a thle sawk bawk, Michael-a'n a hnek a ni chiang mai!

*CHUAILOPÂR PAWH A CHUAI THEIHNA KHAWVÊLAH HIAN KUMHLUN TÙR RÊNG A AWM LO, I HMEL ȚHATNA PAWH KHÂN CHUAI NÍ A NEI NGEI DÂWN, INDUHA CHAPO THEI RÊNG KAN AWM LO*