☆HLWILY☆ - 18 By Dingdi Pachuau

 ☆HLWILY☆ - 18 By Dingdi Pachuau

Michael-a chuan," Choka lamah kal ila," a ti a, ka en vat a, ani pawh chuan min enin Damon-a chu a en leh a, a hmêlah erawh eng mah a lantîr lo.

Chokaah chuan tleirâwl chhuak zawt pahnih leh mipa naupang pakhat an lo awm a, kan lût min lo hmuh chuan tleirâwl pakhat zâwk chuan," In tùr in duh em?" tiin Michael-a chu a lo zâwt vat a, ani chuan,"Kan lâwm viau ang chu," nui chung hian a ti a, khua a vawh ve deuh sûk avàng chuan ka hnial duh lêm lo va.

Dawhkànah chuan thingpui no hnih rawn dahin,"Pa Mikey-a țhiannu kha i ni tiraw?" tiin nui sêng hian min rawn bia a, ka en deuh hau ringawt a, Michael-a chuan," Engtik laiin nge i lo hmuh a, Naute?" a lo ti a, ani chuan," Àpi birthday zànah i rawn hruai kha, in inhmeh kha kan lo ti lutuk a," nui sêng chung hian a ti leh a, Michael-a chuan min rawn kuah thut a, ka en chho rang lutuk ringawt, ani lah chu a lo nui sûng a.

"I mit hi a fing ve ngawt mai! In unauah chuan i mit a fing ber, chuan, thingpui min lo pêk avàngin kan lâwm e, mi felnu," tiin Michael-a chuan a han fak hlak a, min kuahna chu min thlah nghâl bawk a, chu tleirâwl tê chu nui sen sen chung chuan a kal sawn ta nghâl a.

"Ka tu leh fateho hi an fel asin aw," tiin," Thingpui kha in rawh, a sat lai taka in hi a tui bîk a nia, a vâwt i ti lo sawt bawk ang," a ti leh zat a, țawng ve lêm lo chuan ka ban nghâl a, ka in hlak a, no ka dah thla leh ka hawi chhuah chuan Damon-a'n choka leh sitting room indaidanna kawngkhàr nghènga min lo thlîr reng chu ka hmu ta nghâl a.

Kan inkár chu hla lêm lo mah se Michael-ate țawng  kha a rawn hre phâk kher chuan ka ring lo a; mahse, chuti chung chung pawh chuan nuam lo tihna ka nei tho tho, min rawn en kur si a, nichína ka nuih lah khân min nuih lêt ve hauh si lo. Michael-a min kuah fiam laite khân min lo en reng tawh ang em?

Chutah, kan lam panin a rawn phei ve ta, ka thin a phu dèp dêp mai. In chhûngah hi chuan a thinrimna a tihlan ngam chu ring chiah lo mah ila  ka hlauthãwng, nakin deuhah Michael-a chungah hian a thinrimna a hrithla mai ang em?

Kan bula rawn țhu ve chuang lo chuan," Naute, thingpui no khat chu min han thlit ve la?" a ti a, ka en lo nain kan bul maiah chuan a ding tih ka hria. Michael-a'n," I fel ve ngawt mai, ruah sûr hnuaiah i rawn kal vang vang a nia, tih theih nei chuang lo mah ila, hetia i awm ve hian a nuam ve tlat," a tih chuan,"Nia, tih theih neih a châkawm khawp mai. Tlaivàr te a ngaih tâkin ka tia, thawmhnaw lum pawh ka rawn keng ringawt a, car chhûngah ka la dah a," ka lo ti vat a, ka țhianpa nu a ni a, kala menpui a ngaih chuan menpui hi chu ka tih tùr a ni ve tlat a ni.

"I fel ka ti thlâwt rêng a ni, tlaivàr erawh ngai lo tùrah ngai ila, i inhuamnaah làwmthu ka sawi e," Michael-a chuan a ti leh a, min enin a nui pah sâng a, kei pawh chu nui vein chhàn erawh ka chhâng lêt tawh lo thung. 

Damon-a chu țhu lovin a ding reng a, biak hmasak chu țhain ka hria a, a lam hawia inher remin," Lo țhu ve rawh," tiin ka han be ta nge nge a, Michael-a pawh chu a lo bu ve nghut a, min hnial ka ring deuh a nia; mahse, min hnial hauh lo chuan ka bul chiaha chair chu pawt chhuakin a rawn țhu ve nghâl a, min rawn țhut hnaih viau lehnghâl a, mi dang an awm ve sia, bâkah, kan bul chiahah Michael-a a țhu ve reng nèn, nuam lo duh tak a ni.

"Hmuh che ka inring pha hauh lo va," a rawn tih sup chuan," Chanchin ka lo hre har zâwk a," ka lo ti thung a, inthiam lo deuh tak hian Michael-a chu ka en phei a, ani lah chuan," Ka hrilh lo che a, i tân hriat ngaihna a awm hleinem; mahse, hei i lo thleng tho alawm," ka rilru hria ni àwm tak chuan a lo ti vat a.

Rei mawi ve tâwk tak ka meng a, tlaivâr tùra ka inrin tehlul nèn, ngai an ti lo tlat a, a cousin pasal la nei lo nurse pahnih leh Michael-a u chiah Stephen-a, doctor thiam takin an riahpui dâwn a, ngaihtuahawm a nih pawhin doctor leh nurse-in an vil dâwn a, a ngaihțhatthlâk deuh. An chhûng hnaivai ni lo awmchhun ka nih avàng chuan làwmthu min hrilh siam siam hlawm a, a làwmawm viau rualin zahthlâk ka ti tel bawk, Michael-a bialnuah min ngai vek àwm si a.

Ka haw dâwn chuan ruah a tla tawh lo va, chhûm erawh a la zîng chuai mai. Michael-a chuan min ngaihtuah khawp mai a, min thlah hial a duh a; mahse, ka hnial ve tlat thung, motor khalh chhuak ngai lo lutuk ka ni bîk lo va, bâkah, tûn ang hunah chuan motor veivâk an tam vak tawh lo ang chu maw.

Kan in ka thlen dâwn chuan kan gate luhna dãl tùr takin motor a lo inhûng a, mak ka ti kher mai, horn ka pe a, tu motor tak chu ni maw, a dah lài mang e ka tih rilrûk lai chuan motor ațanga Damon-a rawn chhuak ka hmuh tâkah chuan ka meng ãwk mai. Min lo chãng reng tihna em ni? Haw tùra a chhuahna kha a rei ve viau tawh si a.

Motor dârthlalang chu a rawn kik karh karh a, 'down' pahin a kalhna pawh chu ka hawng ta nghâl a. Ani pawh chuan rawn hawngin a rawn țhu lût ve nghâl zat bawk a.

"I rawn haw har phian mai," a tih chuan," Nia... hetia min lo nghah hi ka ring pha miah lo," ka ti lêt nghâl a, a hmêl chu chîk ru zet hian ka en a; mahse, thinrim hmel leh lungawi lo hmel pawh a puin ka hre lo.

"Zanin chu ka insûm nasa lutuk a, ka puak keh lo chauhin ka hria! Awm pawh ka awm rei theih loh kha, i rawn haw har bawk si a, motor lo tlãn zât ka lo chhiar ka lo chhiar ringawt alawm, a vaiin 68  chiah a ni a, nang hi 69-na i ni," a ti sup sup a, a thaw ham ham bawk a.

Leh nge nge tak chuan! Ka en deuh ràn rán reng a. Motor tlãn zât chu a lo chhiar thlap tak tak em ni le? Han âwih lo ngawt dàwn ila, dáwt min hrilh êm chu ka ring phal meuh si lo.

"Haw thuai kha a nuam bîk lo alawm, bâkah, mi dang pawh an la haw bîk lo  va, zàn rei pawh a la ni êm êm chuang lo bawk nèn," ka lo ti a, ani chuan," Chuti, car-ah kan la țhu rei thei deuh dâwn tihna a nih chu," a lo ti thên a.

Min lo nghah ve hrâm hrâm manah car-ah chuan rei ve tâwk tak chu ka țhutpui a, ka kut nghet takin a vuan a, amah si chêt chuan min kuah bawk a, a thinrimna a tilang lo leh Michael-a a thîkna a sawi lang lo chu ka lãwm kher mai, min kuah laite kha a hmu ve vek àwm si a. 

"A mak ve ngawt mai, ka kawp ve deuh ho hian mipa dang an melh nia ka hriat chuan ka ûm zui ngai lo a nia, nang hi chu ka la nghâk țàng țâng zâwk che chu a ni sia, ka rilru pawh hi ka hre thiam tawh lo," a ti sup sup chuan làwm avàngin ka khi sak a, duh taka en pahin," Mahse, kei chuan mipa dang ka melh hleinem, Michael-a hi chu ka țhianpa a ni ka tih tawh kha, țhian ang chiahin ka en," ka lo ti ve a.

"Nia, i sawi tawh a, kha vàng chiah khân thîkna thinlung ka neih pawh ka tilang chhuak lo hrâm hrâm a ni, ka insûm nasa ka tih tawh kha, hmeichhe dang chu ni la chuan him pawh i him tawh kher lo ang, ka thil sawi chuan a tihlau che em?" tiin min rawn en ve a, kan inmelh hnai khawp mai.

"Hlau țêp," ka tih chuan a nui hawk a," Min hlauh loh nasat hi maw, min hlau ni la ka bulah hian i țhu tawh hauh lo ang," a ti a, kei erawh chu ka nui ve ngam lo. A duh ang taka a chêt chuan ka hnial ngam kher ang em? A bulah hian ka him rei thei ang em?  A kawpteho anga min cheibàwl chuan a duh ang tihhlawhtlin ngei a tum ve mai lo'ng maw?

"Ti ta daih ila, a inthlahrunawm viau nain zàn a rei tawh viau lo maw?" ka ti ta nge nge a, zàn rei tawh lamah kan pahnih chauh lehnghâlin, hetiang lam sawipui hi chu a fuh chiah lo ang, mipa zei tak a ni si a, min han tilui chhin tase, ka hnial thei lo palh ang.

"I hlauthãwng țan a ni maw?" tiin a nui leh hawk a, chutah, eng sawi set set lo chuan min rawn fâwp leh thut a, a la duhthawh êm êm zui, ka thaw a chham lo chauh a ni, kan inthlah chiah chu thâwk ka la hap hap mai.

"Ka kaltîr tawh rih mai ang che, zanin atân chuan," tiin car ațang chuan a chhuak ta nghâl a, han mangțhàna hun pawh min siam lo, a car-ah chuan lûtin a tlãn chhuak ta nghâl a, tlêma tlêmah min tihamhaih lek lek zâwk a ni.

*******

Ni a lang ve ar mai, a chhuak a țha ve bawk a, weather forecast lamah pawh vawiin chu khua țha tùrah an puang a, zàn lam erawh a sùr leh rin a ni thung. Damon-a nèn an huana kal kan tum ni a ni a, zàn lama ka țawngțainaah ka telh nasa a, a hlawhtlinna ka hmu chu ka lãwm viau a ni.

Ka pain Manipur ațanga rucksack min rawn hawn ve kha ka ak chhuak a, tûn hi ah chhuahna hun dik tak a ni. Damon-a'n eng mah keng lo turin min ti nain kan ei tùr chhang leh in tùr lam flask-ah ka keng a, ka nuin min siampui vek a ni. Hun hlim taka hmang tùrin min chah sauh sauh a, kei pawh chuan hlim nui sângin," Khua a țha reng turah ngai ila, ka hlim viau pawhin ka ring bawk," ka ti a, Damon-a rawn kal hma chu phûr tak leh helhhawlh takin ka vei tawn sek a.

Car keng lovin Thar a rawn keng a, a rawng pawh a sen vât vât mai. Sunglass a rawn vuah a, Motor leh a khalhtupa chu an inhmeh ngawih ngawihin ka hria, a kamis țial hâk hnuaiah chuan T-shirt dum a ha a, a jeans pâwl thâwl lam lek lek, a khûp țet leh a kamis hâk hmalam inhawng huai mai chuan tlangvál awm țha duh lo tak a antîr nain a inhmeh hle si, a tilang pàin a tilang sexy tlat ka ti leh tlat pek a.

"Vawiin khaw țha chu a tih chi tak tak a ni," kan tlàn laia a tih chuan," Nia, a làwmawm ngawt mai," ka lo ti ve a, ka rucksack ken ve kha ka la pawm țât a, chu chu a hmuh chuan," Eng nge a chhûngah khân awm a?" a rawn ti a, kei chuan," Eng vak mah, chhang leh kan in tùr a ni mai," ka lo ti a.

"Engah nge i pawm tlat a?"

"Pawm hi a nuam alawm," ka tih chuan a nui hawk a, amah pawh en duh lo chuan sîr lam ka hawi a, ka kut chu dah chhuakin boruak chu ka hîp vang vang a.

"Kha, hei hi vuah ve rawh," tiin Sunglass hi a kut lehlam chuan min rawn pe a, khawi laia mi nge a lo ban hman ni? Ka lo ban ve vat a; mahse, ka vuah nghâl mai lo. Ka zak deuh tlat, ka zah avàng hian sunglass hi ka ngaina vak lo rêng a ni.

"I inhmeh ngawt ang!" a la rawn ti zui a, vuah hreh nâklaiin, ka pe lêt leh lo chauh a ni; mahse, mak a tiin a hre thiam lo ang tih ka hlau deuh a, chuvàng chuan ka pe lêt bîk êm lo.

"Music i ngaithla duh em?" a tih chuan," Aw, i duh ve tho chuan," ka lo ti vat a, dik tak chuan titi ai chuan zai ngaihthlâk chu ka duh daih zàwk si a, duh zâwng ka neih leh neih loh min zawh chuan hindi hlaa ka duhho chu ka lo sawi zat zat a.

"Ber kher chuan," a ti sup a, kei chuan," I duh loh chuan i duh i play thei ang, vai hla hi a lunglènthlák thei êm a ka tih vàng a nia," ka lo ti vat a; mahse, ka duh ka sawi hla chu a play ta tho a. Hla cool leh mawi  zet zet panga vêl kan ngaihthlâk hnu chuan," Kan cool zo vek dâwnin ka hria," nui suk chunga tiin," Pakhat ka duh ve deuh ngaithla ve ang aw," a ti a, a han play nghâl zat a, music țan tìr lama vaiho khuang tabla ben ri a rawn rîk țang țang chuan ka nui hak a.

"Nui ngawt suh, a mawi asin," a rawn tih chuan tlêmin ka inthiam lo deuh a, vai zaipâwl ka ti mai, an rawn zai dual dual a, la nui deuh țhâ chung chuan ka ngaithla zél a, chutah, Atif Aslam aw ri ka hriat tâkah chuan," E, chu pa chu..!" ka ti ta chùl a. A zai thiam ka tih bâkah a chhe lo tel ka ti bawk a, Indian chu ni kher lo mah se zai thiam ka ti êm êm tho.

"A hla thu awmzia chu i hria em?" tia ka zawh chuan," Hre ve nial nual," ti ringawtin min chhâng a, ka zâwt lui zêl a, a hnuah chuan min hrilh fiahsak ta vek a, he pa hi, ka duh zual sawtin ka hria, hindi a lo thiam nasa niin, a lo inthup thei hle mai ka ti.

Thlâm lam kan pan nghâl a, ei tùr kan kente kan daha kan țhut deuh hnu chuan," Kan fang kual dáwn em ni ang?" a ti a, a ding chhuak nghâl a, kei pawh ding ve nghâl zatin thu ãwih takin ka zui nghâl vat a. An huan chu a hmunhma a remin a nuam viau mai, thei kûng chi hrang pawh a tam khawpin ka hria. Thei kung hming chu min hrilh pah zêl a, a lukhum parh khum chu inhmeh ka tih êm avàngin a țawng lai leh a hmêl ka hmuh theih lai chuan ka lo en leh vawng vawng țhin. A rubber boot lah chu inhmeh ka tiin pà ka ti khawp bawk a, a inthuamna/a inbel apiang hi a inhmeh vek a nih àwm hi maw.

"Chèngkawl kan khawrh dáwn em?" ka tih chuan," I ei châk maw?" a lo ti a, kei chuan," Châk pawh ka sawi lo, ka hmu châk a," ka lo ti thung a, zawrh hi chu kan lei ve zauh zauh a, a awmna tak hi ka la hre ve ngai lo a ni. 'Khawrh' an tih chhan tak hi ka hre châk bawk, an man țhin ni mai tùrah ka lo ngai a, chuvàng chuan, 'khawrh' ve chu ka châk a ni.

"Tunah chuan tui a tam viau si a, tui a nut phei chuan kan hmu thei lo ang, ni dangah ti mai ila?" a tih tâkah chuan," A, ka ti mai mai a nih kha," ka ti a, kan kal kual leh a, ka ke chu a rawn thak deuh ngar ngar a, engah vak ngai duh lo chuan ka kal zêl a, a hnuah erawh chuan," Ka ke chu a va thak tak!" tiin ka ding rih a, ka mawza bun chu keuin ka zuk hiat a, a hnuah ka zuk en kher a, chutah tak chuan ka țê chhuak ta chiam a!

"Eng thil-" a tih mêk lai chuan," Vangvat, vangvat ka kâi!" tiin ka au vak a, ka che sawn ngam tawh hauh lo bawk. Min rawn hnaih nghâl thuai a, ka ke chu rawn enin Vangvat chu a kutin a la ni ngei tùr a ni, en pawh ka en ngam lo, ka khùr dar dar mai.

"Ka la tawh e, a zûkna che a la rei lo a niang, puar pawh a la puar lo," tiin a chem ken chuan Vangvat chu a tihlum a, ka awm a tinuam lo zo vek. Vangvat kher hi chu  TV-a ka hmuh pawhin ka mûr vek thei țhin, ka râp lutuk ringawt.

Thlâm lamah chuan kan lêt ta daih a, ni a dul leh deuh tawh a; mahse, thlan a tla hman tho nia, Damon-a pawh a thaw a sa phang mai, a lukhum chu hlîpin a inzâp hauh hauh a, kei pawh ka kutin ka inzâp ve tho.

"Nakin deuhah thei hawn tùr chu ka lo dàwn nia, nang chu thlãmah hian i lo awm ang a, Vangvat a lo kal hlauh chuan min lo ko vak dâwn nia," a ti a, chutia Vangvat a sawi chhuah leh tâkah chuan ka inen kual vat vat a; mahse, a dang ka kai lo a niang, ka hmu lo.

"A hlauhawm êm asin," ka tih chuan a nui hak a, ka lo ner nâng thung. Ka ner hmel min hmuh chuan,"Ka rin aiin i lo țê ring thei reuh a, sual che pawh lo tum dâwn ta ila khatianga ringa i au dâwn chuan ka tlãnchhe duh hial maithei a ni," nui duh miah lo chuan a ti leh a.

"Ka au nasa ngawt ang, kha aia ring daih khân," ka lo ti ve thung a, ka sawi zo chiah tihah chuan min rawn bawhthlu titih ta deuh mai, țan pawh ka lo țang hman lo, hlauhthàwnna pawh nei thiam lo chuan ka melh chho hau a, ani pawhin min rawn melh chhuk ve rùn a.

"Han au chiah la," cho zeta a rawn tih tâk supah chuan kan pahnih chauhin kan awm a ni tih ngaihtuah chhuak thutin,"Ni lo, ti miah suh, i ti miah lo ang," ka ti ta ruai mai. Mawi ka tih dàn ang chiaha meng sawr sawr chung chuan," Tunah tak hi chuan ka rilruah thil dang a awm miah lo," tiin a rawn kûn hniam nghâl zat a, hnial chu ka duh chiang alawm, hetiang boruakah phei hi chuan; mahse, hnial theih miah lohin min nawr thiam a, a tàwpah chuan hnehna a chang leh ta nge nge a, ani ang mi zei lutuk leh tawn hriat lo ngah tawh tân chuan thlèm thlûk ka har lo ngawt ang chu.

Mahse, min fawh bâk hmabâk sâwn tumna a nei bîk lo a niang, chuti chu ni lo se chuan ka rilru fìm lai hian ka au chiam tak tak ang, a nih loh tal pawhin ka lo dang ve țang țáng ang.

*SÊIH HIAN MAN A NEI LO NAIN A THIL TIH THEIH ERAWH HI CHU A HLU VET VET VIAU SI*

LO SÊIH VE ȚHIN TEH, I INCHHÎR LO ANG