☆HLWILY☆ - 19 By Dingdi Pachuau

 ☆HLWILY☆ - 19 By Dingdi Pachuau

Thil pawi kan ti lo; mahse, kan ti țêp chuan ka hria! A thâwk dàn a mumal lo va, kei pawh eng ruai ka ni chuang lo; mahse, vànneihna hi ka lamah a țang ka ti dâwn nge, Damon-a phone a rawn ri ta hlauh mai a, chu chuan kan thil tih lai min rawn titàwp chiang viau a ni, che lova kan awm vang vang hnuah a tho ta chauh, phone chhâng tùra a thawh chhuah tâk hnuah pawh kei chu ka la mumal lo viau mai a, a hnunglam ringawt pawh ka hmu zak titih mai dâwn, a hnu deuha ka inngaihtuah lêt phei chuan ka zak ru ngawih ngawih. 

Nulát tlangvàl  kawnga chak lo ve tak takte ka hmuh dàn ka ngaihtuah a, anmahni ang dinhmunah khân nichîn khân ka ding a ni, en hniama ngaisâng vak lo thei dinhmunah ka ding ta miah lo. A phone kha rawn ri ta lo se chuan eng chena thui nge kan kal ang kan hre hauh hleinem, kei phei chu inkhâwm ka peih viau lehnghâl a, ka ngaihsàn vak lohte chu Pathianni zîngah bâkah an inkhâwm ngai lo, kohhranah pawh an inhmang vak lo, duh huna in tùr a awm chuan in ve thei mai an ni hlawm bawk, lo pelhê zauh țhin pawh ni se an tân chuan a àwm viau a ni lo'm ni? Mahse, kei ve hi, kei chu kohhrana a mawi tâwka inhmang ve leh in lam chi rêng rêng pawh la tem chhin lo, ruih theih thil laka fihlîm ka ni a, anni nèn chuan tehkhin chi-ah pawh ka inngai ngai lo; mahse, nichîna ka awm dàn kha, a zahthlâk ve hret chu a ni, miin min hmu lo a ni maithei; mahse, engtik lai pawha min hmu rengtu a awm tlat thung si.

Ei tùr kan ei lai pawh chuan ka en țha ngam lo, engtin nge min ngaih ang tih ka ngaihtuah a, min ngai 'easy' tawh ngawtin ka ring, ni rêng ang, ka lo pui țha êm alawm. A awm dàn leh nungchang ka hre sa reng a, chuti chung pawh chuan ka hnâwl phal lo a nih hi, a hmeichhe kawp dàn leh a chêt dàn hre lo ka ni lo, hre sa veka kawp ka ni, ani hi chu ka mawhpuh thei lo ang. Mipa a ni a, a lo kawp țhinte chunga a chêt dàn angin ka chungah chêt a tum a ni mai a, a nih loh dàn a ni hleinem, lo danga lo hnial mai tùr alawm ka nih.

"Thei lawhnaah chuan lo kal ve tho rawh aw, Vangvat i kai a nih leh ka la leh ang a, thil buaithlâk tak a ni chuang hleinem," a tih chuan ka châk ve bawk si, Vangvat ka kai leh ang tih ka hlau bawk si chu ka rilru a inbùk a, mahni chauha thlâma lo awm chu ka hreh ru viau, a bula kal chu ka châk ve bawk, bâkah, ka lo ve châk alawm, min hruai tawh lo maithei asin.

Kan inzui chhuak leh ta a, hmun âwih leh kal hrehawm lai a awm lo va; mahse, ka kal chu min vêngin min thlêk deuh chhên tawh thung. Kei pawhin ka ke lamah chuan Vangvat ka kai em tih chu ka inthlêk fo a, vawi khat chu ka hmuh hmain amah chuan a lo hmu hmasa a, min pawt dingin min lâksak a, ka han hlau thar leh deuh nain a dang chu ka kai tawh bîk lo.

Theihai kan lo țeuh a, keimah ngei pawh chu a kûngah chuan lâwnin ka lo ve a, hnuai lam ațang chuan a hnâi tiper lo tùr chuan min rawn hrilh ngun khawp mai, a hnâi per chuan a perna hmun azirin tisa a tidurh thei tih min hrilh chuan mak ka tiin ka hlauthâwng hnuhnawh viau a; mahse, fîmkhur leh dìm taka lo tùra min hrilh ang chuan ka lo zêl a, a hnâi pawh chuan min per lovin ka hria. Kan duh tâwk kan lawh hnuah thlai hnah lam kan hrût ve ta thung a, ka rin aia ram lama a chêt zei avàng chuan pui lawk lovin mak tiin ka lo thlîr leh vawng vawng țhin a, ka inhriat chhuah veleh pui tùrin ka che vat țhin, kal ve lo tùrin min ti nachungin a che vêl chu hmuhnawm ka tih avàng leh ka hmuh duh avàngin ka zui zêl tho. Vawi khat chu ka rahna a lo nãl deuh a ni chêk ang chu, ka tlu zawt mai a, ka zangthal chiang khawp mai, rang zet hian min rawn kai tho vat a, ka nuih a zat êm avàng chuan ka nui vak vak a, ani pawh a ngawi reng thei ta bîk lo, kan nui dùn ta tlâwrh tlâwrh a, ka insawh na lêm lo bawk a, ka kekawr mawng leh ka kawr hnung lam tlêm a berh ve deuh hlek ringawt.

Khaw țha chu a tihzia takzet a ni, hlim takin hun kan hman theih phah si a, kan haw tùr pawh chu a rûkin ka huphurh hial mai. Motor-a kan luha kan tlàn chhuah chuan ka hawi lêt hial nghe nghe a, min hruai tawh kher lo maithei si a, bâkah, kan hma hun kan hre si lo, min țhen daih phei chuan ka kal leh tawh miah lo ang tih ka hria a ni.

"Tu mah ka la hruai ngai lo," a rawn tih chhuah sup chuan ka en vat a, ka ngaihtuah ka lo kàwm nasa a lo ni. A thil sawi chu ka ngaihtuah a, tu mah a la hruai ngai lo a nih chuan keimah chauh hi min la hruai tihna. Tak tak a ni ang em?  Dâwt min hrilh êm dâwn em ni?

"Mahse, Vangvat hlau chu ka hruai tawh ngai lo ang," a rawn tih leh chuan ka nui ringawt a, nia, a tân khân ka ninawm viau ang, ka dâwih si a, buaipui ka ngai reng mai a nia. Ka en lai takin min rawn en ve a, a nuihza hmel ka hmuh chuan min fiam a ni tih ka hre ve chiah, ka thaw huai mai.

"Vangvat pawh awm mah se a nuam ka ti tho, Vangvat awm loh hunah kal leh ila?" intihuaisen lui chung chuan ka ti a, min sâwm leh pawh ni lova mahni ka in-borti hmasa chu zak lo min ti hialin ka ring, ka sawi zo vek tawh si a, inchhìr viau mah ila tihngaihna a awm tawh dêr si lo.

"Favàng lamah kan tum leh dâwn nia," a lo ti ve mai a, a rilru chhûngril hre lo mah ila chutia min chhâng chu ka lãwm viau tho a ni. Muangchângin motor chu a khalh a, inbe tawh lêm lo chuan kan tlãn zêl a, ka rilru a vâk kual nasa viau mai. Thil eng eng emaw țangkai lêm lo ka ngaihtuah kual a, ka chala a rawn ben tâk karhah chuan ka harh chhuak ve chiah.

"I bulah ka awm ve reng sia," a ti sup a, chutah," I khalh ve chhin châk em?" a ti leh ta daih a, en hau pah chuan," I phal lo ang?" ka lo ti thung. Khalh chu a châkawm ka tih rualin ka la khalh ngai loh a nia, huphurh lo mah ila a ui viau ka lo ring deuh ngawt a.

"Phal e, i duh phawt chuan; mahse, rei lo te chauh aw, hmeichhe motor khalha chuan hi ka thâ a na deuh tlat a," nui hmel pu deuha a tih chuan," Ka ti ve mai mai a nih kha, nangmah khân khalh rawh, kei ai chuan i thiam zâwk ang," ka lo ti a.

Ani chuan,"Favàng lama kan kal leh hunah i khalh dâwn nia, i tân chuan ka ui hauh lo a nia," a ti leh a.

Thil ho mai mai a sawi a, ka lo inrawlh ve zauh zauh bawk a, a hnu deuhah phei chuan a bialnu hluite chanchin ka zâwt a, ka zawh ang ang chu min lo chhâng ve zêl bawk a, a bialnute zîngah chuan Elena-i a lo kawp rei ber a nih chu, a chhe lo êm bawk a ni. A, a bialnute zîngah tu mah chhia an awm lo ang, kei tih loh.

Mak ka tih deuh mai chu thei leh thlai dang a hawn zawng zawng kha TNT Zuangtuia an ei tùrin a pe vek mai chu a ni, theihai kha kan lo tam ve viau a, thlai hnah pawh chuti tho chu; mahse, a bo a bâng awm lovin a pe vek mai a ni, sawi tùr pawh hre lovin ka ngawi reng ringawt mai a ni.

Kan tlai viau phah nghe nghe a, thuphâ chawiin,"Tum aiin in i thleng tlai dâwn tlat mai, hun ka lo chhût sual deuh a ni," a ti sup a, kei chuan," A ho êm mai, naupang pawh kan ni tawh lo va, ngaihtuahawm kan ni hleinem," tiin rang zet hian ka lo chhâng vat a.

Kan hah lo viaua ka hriat nèn, ka taksa a chau ve det a niang, ka khuma ka mu mai mai chu ka lo muhil tlang daih mai a, mut tum pawh ka la ni lo. Zînglam dár hnihah ka țhangharh a, ka room light pawh ka lo la off lo niin, ka tho țaih țaih a, bathroom-ah lûtin ka ha ka va nâwt leh rih a, ka hmai ka phih leh hnuah mu tak tak tùrin ka khum chu ka pan leh ta a. Ka muthilh hma chuan Damon-a thil tih kha ka ngaihtuah chhuak a, mi dangte tâna a thil tih chu ropui ka ti a ni, ka lo ngaihtuah phâk hauh loh thil a ni si a, a tițhain a tiropui ka ti takzet a ni, ka tluk lohzia ngaihtuah zêlin a chhûngrila thil țha inphûm ru reng chu ka hmuh theihah phawrh a ni ta si a, ka duh phah sawtin ka ngaisáng sawt bawk a ni. Pâwn lamah lêrh, chapo, luck leh pawisak nei vak lêm lo angin lang mah se a chhûngril nun thurûk chu mi tam tak tluk loh, kei ngei pawhina ka tluk loh a ni tlat si a ni.

A ni tèlin ka duh telh telh ni ta berin ka hria, ni khat lek pawh a hmel hmu lova awm hrehawm ka ti țan ta hial mai. Hmeichhe dang hi min kawpsan bîk lo niin ka hria a, school-a kan inhmuh tih lohah chuan zànah kan ina a rawn lêng hi ka hmuh chu a ni mai a, hmeichhe dang nèn ka hmu ngai tlat si lo va, min kawp lo tùrah ka ngai ve hmiah mai. Ani pawh hian mipa thîk chiam tùr chu a hmu kher lo ang, Michael-a a ni mai a, ani lah hi ka țhian a ni tih ka hrilh chiang viau tawh bawk si a.

Ni khat erawh chu hmeichhe pakhat hi a rawn kal ve tlat mai. School êma rawn hmuh tuma a rawn kalchilh tlat mai chu mak ka lo ti khawp mai a, staff room-ah lûtin min rawn záwt kher lo phei se chuan rawn hmuh tumin a rawn kal tih pawh ka hre tawp nâng. 

In chung lama a chhoh hnu chuan thawhpuite chuan an sawi zui sap sap a, an lo la hmu ngai bîk lo hlawm a ni ngei ang," Pu ber chuh, school-ah hial rawn hmuh an tum ta mai chu a nia; mahse, a àwm ve tho mai, an rawn kal ngai lo hi ka ti zâwk a, tlangvâl luck leh chhe lo tih takah a kalna apiangah nula hi chu hûng thluah ve tùr chu a ni," Miss Nutei chuan a ti a, Miss Rci pawh chuan," Ani anga luck leh chhe lo hi chu ni ila chuan ka kawp ve țeuh tho ang, a tih hmasak ngai lo hian hmeichhe lam hian an bàwr dâwn tih a lang reng si a," a lo ti ve a, mipa lam erawh chuan an sawi zui ve lo, Michael-a a awm loh lai a ni hlauh chu a zia e, kei pawh class la tùr chuan ka insiam a.

"E, ka hre chhuak, Lucy a nih chiah kha, ka hmu tawhin ka hre rêng a ni, a pu chu sumdâwng hausa hmasa Pu Mana a nia, Mizoram lamah a khawsa tam lovin a rawn chhoh zawk lai a ni ngei ang," Miss Nutei'n a rawn tih tâkah chuan a bialnu hlui ka zawh laia Lucy hming a sawi rîk kha ka hre chhuak nghâl zawk a, chutih rualin ka thinlungah thîkna rawn țêk sakin mahni inhmuhhniamna ka nei nghâl bawk a, ka duh lo kher mai; mahse, a ni tlat si, an thil sawi chu hriat chhunzawm zêl duh lovin class la tùr chuan ka kal ta thuai a.

Class-ah ka taksa awm mah se ka rilru erawh chu in chung lamah a awm daih thung. Eng nge Lucy chuan a a rawn tih réng réng ni? A bialpa hlui a ni tawh a, eng atân nge a la rawn hmuh? Ka ngaihtuah thui zêl a, an inbe sa vek a ni tih chu a rawn pan chat dànah khân a hriat mai a, an lo la inbe țhìn a nih phei chuan an la inthlah tak tak hauh lo ang le. Mizorama a awm ngai loh avàngin an inhmu thei lo ang a, ințhen angin an awm mai mai a ni ngei ang.

Thãwm ka ngaichang ru reng a, an rawn chhuk har ka ti khawp mai. Damon-a car a la awm reng miau avàngin an la rawn chhuk lo a nih ka ring ngawt a, ka țhu hlè hlé thei lo, chhúngrilah hian awm nuam thei lova min siamtu a awm tlat.

Chhùn chawlh dàwnah in chung lam ațang chuan an rawn inzui thla ta a, Lucy chu a rawn nui thla var var mai, a lung a awi hmel khawpin ka hria. Min rawn hmuh ve hlau chuan ka lût ta thuai a, staff room-a rawn lût lo chuan Damon-a car lam an pan a ni ngei ang, car tlãn chhuak thâwmin a zui nghâl a.

Thawhpui dangte min rinhlelh ka duh loh avàngin Damon-a nèn hian school-a kan inhmuh pawhin kan inbe ngai hran lo, mi dang an awm hnai loh erawh chuan kan inbe zawk țhin thung. Staff room-a rawn lût tùr phei chuan ka duh lo hrim hrim, amah pawh ka hrilh vek a, a rawn lût zauh zauh nain kan inkârah thil a awm a ni tih a tilang ngai lo. Tunah pawh khân an rawn luh ka ring lo hrim hrim, hmeichhe dang hruai phei chuan.

Michael-a chuan," A țhian hlui a nih kha, i rilru tihah suh," ka beng bulah chuan a rawn ti sap a, ka en chuan za vak lo hian a lo nui a, kei pawh chu nui lui sakin," Engah vak ka ngai lo, zalèn alawm kan nih," ka lo ti ve mai a; mahse, tunah tak hi chuan zalèn nih loh ka duh, ani pawh a duhna hmun apianga nula hruai kual turin zalènna nei lo se ka ti.

Michael-a hmuh loh lai chuan ka phone chu ka tuai ka tuai a, ka text dâwn em niang? Thil hre lo deuh angin va text ila, dâwt min hrilh duh leh duh loh chu a hriat maiin ka ring. Ka han type niap niap a; mahse, ka delete leh nghâl vek, a lang apaua thîkthu chhe deuh anga lan ka duh lo a ni.

An rawn lêt tawh hauh lo. Chawhnu dâr 3 kan bàn thleng pawh chuan an rawn lêt lo, hmm.. an chàwl rei bîk hle mai maw, zanina a rawn lèn chuan zawhna a dawng tam ve ngawt ang chu, min chhâng ngei ngei tùr hi a ni ringawt.

Mahse, a rawn lêng lo, a reh ruai mai. Min rawn be lo va, min rawn text hek lo, keimah hian ka va text tawp mai dáwn em niang? A buai viau pawh a ni thei tho a; mahse, chu pawh chu ni se min rawn biak loh tal pawhin text táwi tê min hnutchhiah ve tal se...

Keimah zâwk chuan ka va text ta a,*I buai deuh em ni? I reh lutuk a*  tiin, message pawh a tlang nghâl e, a en hunah chuan min rawn hrilh ve mai tùrah ka ngai; mahse, min rawn chhâng miah lo, han call êm chu ka duh meuh si lo, beidawng rilru deuh chuan khumah ka țhu a, engati nge hetia a awm tlat ni? Ka chungah lungawi lohna a nei thut em niang? Ka han ngaihtuah kual a, a lungawi lohna tùr leh a thîk tùr àwm ka ngaihtuah chhuak thei lo, chutiang chu awm miau hek lo le.

A tûk zînga ka phone ka han en chuan a message a lo awm ve ngât mai. Ka hlim rualin ka thin a rim deuh thut a, ka chhiarsak lo mai dâwn em maw ni tih rilru ka pu deuh thut thut a; mahse, 'êm a' ka ti leh ta a, a message chu ka chhiarsak ta nghâl a.

*Rokhawlhna ka nei thut alawm le, muttui*  tih zawng hi min rawn thawn a nih chu, nizàn dâr 11: 53-a min rawn thawn a ni, a va meng rei êm êm ve le! Lucy nèn khân nuam an tàwl a ni ngei ngei ang. Ka rilruin a chhe lam a àwn tlat avàng chuan rinhlelhna rilru ka pu lo thei lo, han ngaihzam emaw han pawmzam emaw lam a lang thei tlat rih lo.

School-ah ka mood chu thlâkin Michael-a min rinhlelh miah lohna tùrin hlim hmel ka pu lui țàng țáng a, min ringhlel lo a ni maithei, ani pawhin nui chungin min be leh bawrh bawrh tawh a, kei pawhin theihtâwpin ka rilru hlim lohna chu dah bovin ka chhâng ve zêl a.

Nilêngin Damon-a hmel chu ka hmu lo, school a rawn kal reng sia, a rawn lawr miah lo, eng nge thil awmzia ni ang? Lucy vàng kha a ni thei ang em? Nizàna a rawn lèn loh chhan kha chu a nih ngei ka ring a...

Ka va han ngaihtuah nasa tak êm!!! Ka ngai êm êm pah bawk si, heti khawp hian a zùnah ka uaiin ka duh ta chu a ni si a, min kiansan a tum a nih hlauh chuan, ka rei,  ka chhe vek a ni mai!

*NUNNA HI A HLU ÊM ÊM A, NUNNA PAKHAT ȚHEUH NEI KAN NIH AVÀNG HIAN MI SUAL BER LEH MI ȚHA BER PAWH NUNNA MIN PETU TÂN CHUAN KAN HLUT DÀN A INANG RENG, HLU LO BÎK RÊNG KAN AWM LO*