☆HLWILY☆ - 20 By Dingdi Pachuau

 ☆HLWILY☆ - 20 By Dingdi Pachuau

Ngawi rengin scooty chu ka pan a, ka chuang sawk sawk a, ka tlàn thuai loh chuan ruahin min rawn nan hman thei tlat, a rûk tak chuan ka hmanhmawh hle a ni, tukin ka kal dâwna ka pain scooty keng lova car keng tùra min tih kha ka inchhìr loh nân ruah sùr hmaa in ka thlen hman a ngai.

Ka hnungah Michael-a'n min lo zui ve zél a ni tih in ka thlenin ka hre chiah, ka bula a rawn din ve tâkah chuan makti zet hian ka melh chho a, ani erawh chu a lo nui sûng thung a; mahse, a nui rei lo, ruah mal a rawn tlâk phuar phuar tâkah chuan in chhûng lam kan pan vat a, ina kan luh dâwn chuan," Eng nge i lo tih dâwn?" ka ti leh hnuhnawh a.

"Ka lo lêng rih dáwn, hei ruah a tla sia, ka haw chuan min nan huh vek dâwn asin," a lo ti mai a, min kal pèlin inah chuan min luh khalh zui zat a.

Ruah chu a rawn baw zui ta tlãwrh tlãwrh a, ka room lama ka inthlâk fel hmain Michael-a in tùr thingpui chu ka siamsak a, ka nuin," Va inthlâk rawh, ka lo siamsak thei reng alawm," a tih chuan," A, i buai êm mai, ka hman reng tho a, a har hleinem," ka lo ti thung a, ka pêk hnuah chuan room-ah lûtin ka inthlâk zui ta a.

A sûr rei phian mai, Michael-a chu zanriah ei ve nghâl tùrin kan ti a, chaw pawh kan chhum vek a nia; mahse, an chhûngkuaah hian a țangkai viau a nih ka ring, an rawn phone a, ruah la tla sung sung kárah chuan a haw lui ta tho. Ka pa nèn chuan car chu khalh haw mai tùrin kan ti nasa a; mahse," A buaithlâk, raincoat ka keng tho alawm," a ti tlat a, a pawimawh viau bawk a ni ngei ang.

Ruah chu a sûr chhunzawm zêl a, chaw ei khamah rei lo tê chu TV enin ka pate bulah chuan ka țhu ve a, ka pa chuan min fiam zauh zauh reng a, Damon-a leh Michael-a chu fiamthua bùk tawnin ka nu nèn chuan duhthu an sãm a, za vak lovin ka lo nui ka lo nui ringawt. Boruak a vawh sûk avàng chuan hma deuh taka mut daih ka duh a, vawiin lam boruak lum lutuk lo mah se mut hmain tuilumin ka inbual leh phawt a, ka khumah chuan ka mu ta thãn a.

Ka phone a rawn nghawr ri dat dat a, light ka off vek tawh avangin peih lo zet chuan ka han meng a, ka han en chuan Damon-a a lo ni a, eng atân nge maw min rawn call ni?  Lucy bulah a awm lo em niang?

"Ka rawn lêng dâwn," a rawn tih chuan âwih lo zet hian," Ruah súr chung hian maw?!" ka ti țhat a, min lo en rengtu chu awm se chuan ka meng phâwk vak chu min lo hmu chiang khawp ang!

"Aw, ka hmu châk che a," a rawn tih leh chuan," Ka mu tawh," ka ti deuh nghat a, ka thin a rawn rim deuh thut a ni, nizàn lam leh vawiin lamah pawh min be lo va, hmuh tùr pawhin a awm hek lo. Tunah phei chuan ka mu tawh lehnghâl a, ruah a súr bawk nèn, min hmu duh a nih chuan naktûk nghâk ve mai rawh se.

Thil dang sawi kual lo chuan,"Ka rawn kal," tiin kan inbiakna chu a titàwp nghâl daih a, ka phone chu ka en deuh reng ringawt, ngeiawm thiam ve tak chu a ni! Kei pawh ka thiam ve tho ang chu, ka tho duh bîk  lo ang, a duh leh rawn kal rawh se, tûn ang zàna rawn lèn tum rêng rêng, tihchi loh lutuk!

Ka mu reng a, ka thin a rim deuh tlat avàng chuan ka mu lui tlat a ni, a rawn kal peih tak tak pawh ka ring chuang lo, a rawn kal tâk leh min hmu lovin a haw leh dâwn tihna a ni mai a... 

Ka phone chu a rawn nghawr leh dat dat a, ka han en chuan amah bawk a lo ni leh a, ka chhâng duh lo dâwn dâwn a; mahse, dik lo deuha ka hriat avàng chuan a tàwp a tàwpah chuan ka chhâng leh hrâm a, a rawn kal tak tak a nih hmel riau. Pâwna a awm thu a rawn sawi chuan ka âwih chiah lo deuh a," Ka mu tawh ka tih kha, haw rawh," ka ti leh a.

"Ka hmuh che a ngai, lo tho rawh le."

Ka thaw hawk a," Min hmuh i duh chuan naktûkah min hmu mai dâwn nia," ka ti leh a, ani lah chuan,"Lo tho leh lawk mai rawh, ka lo nghâk reng ang che," a ti leh a, chutah," Gate bulah ka ding ringawt, in kalh tawh bawk si a," a rawn ti leh a.

He pa hi chu aw... Gate bula a din chuan, ruah a la sûr bawk nèn, a ke lam chu a huh ve khawp ang, tûn ang hunah chuan rawn kal loh mai tùr a nia, khaw țhat zàn awm reng laiin khaw chhiat zànah kher, a khawlhkham zâwng khera han chêt.

Ka tho ta nge nge a, ka la thinrim reng tho avàng chuan ka rilruin," Ka lo be țha viau tùrah a ngai a niang e, ka be țha dâwn teuh lo mai, min hmuh a duh bawk a, ka hmêl ka hmuhtîr hnuah haw nghâl rawh se," tiin ka inngaihtuah sauh sauh a.

Ka pate an mut tawh avàng chuan light pawh a thim vek tawh a, ka han tiêng țha leh a, kawngkhàr hawnga veranda-a ka va chhuah chuan boruak a vawt vur mai, ruah pawh a la tla sung sung reng mai. Inkuangkuahin ka han hawi chhuak a, gate bulah chuan a lo ding reng tak tak a! Dâwt a lo sawi bîk lo, nihliap pawh a khum lo em maw ni, he pa hi chu aw...

Kan inhmachhawn ràn mai, a raincoat hâk ațang chuan tui a far fup fup a, a dinnaah pawh chuan tui far chu a luang deuh zûih thei hial a; mahse, chu chu a ngaihsak lo a nih hmel, min en rùn reng a.

"Eng nge ni ta? Min hmu duh ni khân i insawi a, hei min hmu tawh bawk a, chuan..." tiin ka sawi zo duh lo lui a, ka aw chhuak pawh ka tichang lui ve a ni, lo biak hûrh ka tum lo.

"In chhûngah kan lût dâwn lo'm ni?" a ti ve thung a, kei chuan," Ruah sùr laiin engati nge bike i khalh chhuah a?" ka ti ve thung a, car a khalh fo a, zanin ataka ruah sùr lai lehnghâla bike a rawn khalh tlat mai hi ka hre thiam lo a ni. A inlâk maksak duh vàng nge, a normal chiah lo záwk ni?

"Ka hlîp rih mai ang e," tih leh a raincoat lian zet chu hlih a rual nghâl a, bànna tùr a hmuh mai loh avàng chuan ka lo bansak vat a, a lo thleng ta rau rau lo thinrim khuma haw tùra han nawr nghâl chu nuam ka ti bîk lo, a ngilneih loh thlâk  ka ti hnuhnawh a ni.

In chhûnga kan luh hnu chuan a kut leh a hmai hrûk hul nân towel ka pe a, a pheikhawk lam erawh chu tihngaihna ka hre lo. A hma zawng pawha car-a rawn kal ziah si, zanin ber khera bike a rawn khalh chhuak hi mak ka ti lo thei lo, tûn ang hunah hi chuan mi â ber pawhin bike an khalh chhuak duh dâwn em ni? A âtthlâk êm mai a.

Thingpui ka thlitsak hnu chuan a bulah pawh țhu lovin a piah deuh hlekah chuan ka țhu a, chu chu a hmuh chuan," Min hlau chu a ni lo tiraw?" a rawn ti a, ka en zawk a, hawi sawn leh nghâlin," In rawh, a sat lai khân," ka lo ti thung a. A mit pahnih hnuailam val deyh kulh leh a mitmeng sen deuh rûm avàng chuan a normal chiah lo a nih ka ring, in țhin a neih hi chu ka ring ru ve deuh tho a; mahse, rui chhia, chhia leh țha hriatna hloh khawp chuan a in duh ka ring lo, mi lehkha thiam leh mi pângngai chunglam a ni si a; mahse, a tùnlai ve êm a, in lam chi-ah kher hi chuan a fihlìm ka ring lo, a dik ngei bawk ang.

"Vawiin tlaia Michael-a nèn in inzui haw kha ka hmu reng che u asin," a rawn tih chuan ka lo thaw deuh hawk a, a rûk tak chuan zak lo ka lo ti khawp mai. Michael-a khân min zui haw a ni tih ka hre hauh lo a nih kha, tih tak takah chuan ani pawh a car-ah a bialnu hlui a phur ve tho alawm, a kawplai ngei a bialnu pawh min nghilh țhak mai a nia.

"Kha lam kha chu sawi lo teh ang, min hmuh i duh chhan chu sawi mai la," ka lo ti thung a, ani chuan," Ka bialnu i nia, ka hmu châk  che-" a tih lai mêk chuan," Hei min hmu tawh a," ka lo ti hmanhmawh a. Meng nûr deuh hlek chunga," Ka bulah pawh i țhu duh lo va, ka ngaih che nèn," a tih leh chuan ka nui chhuak ta hawk a, ka nuih a zat vàng a ni lo, ka thin a tirim a ni zâwk.

"A lo nih chu," ka ti mai a, ka țawng a rin loh avàng chuan ka lâwm khawp mai, a awm dàn hi pángngai tak ni se chuan ka awm dàn ațang hian eng nge ka lungawi loh chhan nia a bulah pawh ka țhut duh loh chhan hi a hre tawh ngei ang, hmâna a bialnu ni țhin a lo haw avàng maia min han be duh lo leh min han theihnghilh țhak thei hi a lungawithlâk tehchiam loh. A nun chu a ni; mahse, hetia inpal mai mai hi chu ka duh bîk lo.

"Kimkim, ka chau a nia, țha takin inbe teh ang," a tih chuan," Chau ang, ni e, i bialnu hlui a rawn haw a, min hrechang hlek lovin nun in chèn a, nizàn lamah pawh in meng rei a ni lo'm ni?" ka ti rilru mawlh mawlh a, a rì erawh chuan ka sawi chhuak lo.

"Hei kan inbe reng alawm," ka tih chuan," Ka chauhna hi belhchhah lo teh, ka ngaih che nèn," a lo ti thung a, sawi zawm lehin," Nizànah pawh hna ka thawk tlaivár a nia, min khawngaih lo em ni?" a ti leh a, a mit chu a khap deuh sak sak a. Hm, hna a lo thawk tlaivâr a nih àwm chu. Nia, Lucy nèn khân hna an lo thawk tlaivâr pawh chu a ni mahna...

"A nih chu, a va pawi ve!" ka tih chuan a chek hluk a," I hmel ațang khân pawi i ti miah lo tih a lang reng a ni, eng nge a chhan? Ruah sûr pawh pawisa thei lovin ka rawn pan ve țâwk țâwk che a, min ngai ve miah lo tihna em ni? Biak pawh min rawn be duh lo va," a ti bul bul a, thingpui no chu dawhkàna dahin ka lam hawiin a rawn inher a," Nge, lungawi lohna i nei zâwk?" te chu a la ti tak deuh deuh a!

"Lungawi lo an awm a nih ngai chuan lungawi lohna chhan an nei tihna a ni mai," ka ti lêt thung a, ka awm dàn naupangchhia zet chu ho ka vati tak! Mahse, ka lung  a awi lo tlat bawk si a ni.

"A chhan sawi la?"

"Min hmu tawh bawk a, haw tawh rawh, nizàn lamah hna thawkin Lucy nèn in tlaivâr bawk si, i chau lutuk ang," ka ti daih a, a chhuanlam siam hian min bum tùr a ni lo, ka meng ve reng alawm.

"Lucy..!" ti supin min en vang vang a, chu hming chu ka lo sawi chhuak a ni tih ka hre chiah, sawi chhuah ka tum miah lo asin le; mahse, awmzia a awm tawh lo, ka sawi zo vek tawh.

"Engati nge Lucy chu i rawn sawi tel ve a?" tiin meng suar suar chung chuan min en a, a ngawi leh dat a, chutah," Lucy kha i thîk tihna a ni maw?" a rawn ti leh ta a, nui hmel a rawn pu nghâl a. Kei erawh chuan rang zet hian," Teuh lo!" ka lo ti vat a; mahse, ka chhâng rang lutuk chuan a thil sawi chu a dikzia  ka lo nemnghehsak ni maiin ka hria.

Min rawn hnaih sauhin,"Chuvàng chu em ni min rawn biak duh hauh loh a? Kan awm dùn niin i lo ngai a..." tiin a meng sawr sawr a, chutah,"Țhian hlui a nia, min tur lui nasa ve bawk nèn, chhùnah khân ka chawlhpui a, chumi bâk chu kan inhmu lo, i lo thïk hlauh chu a tihzia e," a ti leh daih a.

"Ka thîk bawk lo," chu ka la ti ve țàng țáng nain a âwih chu ka ring chuang lo, a hming kha ka sawi chhuak palh ta hlauh si a, ka lungawi lohna a hre chhuak lo thei ta lo a ni. 

A hnu deuhah chuan,"Hna ka ngah lutuk a, vawiin tlai dár 5 khân ka zo ve chauh rêng a ni, min hrilh hun a teptêr bâkah zo thuai tùrin min rawn tur hmanhmawh leh bawk si a," a tih chuan," Lucy pawh i chhuahpui hman reng alawm," ka lo ti vat a.

Kan inkâr a fel leh deuh ta. A thil sawi chu ka âwihsak mai loh chuan, Michael-a pawhin 'țhian hlui' a ti mai a nih kha, ani hi zawngin, țhian hlui chu a ngah ang, ka thîk zêl dâwn chuan keimah ka inhrem a ni mai dâwn asin, hetiang hi chu ka huam a ngai a ni, a nun dàn chu ka hriat ve vek tawh kha. Hna a thawh zawh veleh min hmu tùrin a rawn kal ve a ni mai a, chu pawh min ngaih vàng liau liauin, school-ah chuan mi dang mitmei vèn a ngaih avàngin awm dun a rem lo, ka hriat thiam mai zél a țha ang.

"Engati nge tûn ang khaw chhiaah bike-in i rawn kal?" tia ka zawhna chu,"Ka car chahbi ka dahnaah a awm lo va, zawn kual nân hun ka nei lo a ni, hmuh vat che ka duh miau si avàngin bike ka rawn keng tawp mai," tiin min chhâng. Vawiin khân car kha a rawn keng ngei mai a, a normal chiah loh avàngin a dahna a hre chhuak mai thei lo a ni ang.

Inrinnia kan chhuah dun țumin Lucy chu kan hmu leh a, a chêt vêl dàn chu ka ei lo khawp mai. Nui awr awr chungin Damon-a chu a rawn kuah thuak thuak mai a, a bialpa hlui ni mah se a bulah a bialnu ka awm ve reng a, a awm dàn chu hmuh nuam ka ti lo, hmeichhe pángngai thîkthu nei ve thei ka ni tih a hre lo em maw ni? 

Kan haw kawngah chuan ka ngawi ngal mai a, ani erawh chu a țawng zauh zauh  thung; mahse, mipa fing leh chinchâng hria a ni ve tho a, ka awm dàn ațang chuan thil awm dàn chu a man thiam tih ka hria.

"Khatiang hmel kha i inhmeh lo, paih bo daih rawh," a tih chuan," Engtin mah ka awm lo," ka lo ti thung a, ani chuan," Engtin pawh awm se ani chu ka ex a ni a, ka hun kal tawha mi a ni, nang chu ka kawplai ka tûn hun mêka mi i ni thung, in danglamna chu i hre thiam tiraw?" a ti dap dap a.

"Chuti chu thil ka lo zâwt che aw, in pahnihah chuan a tu zâwkin nge ințhen rawt? Engati nge in ințhen?" tiin ka zâwt pah zaih a, min chhàn hma chuan a ngawi vang vang phawt a, a ngaihtuah lêt a ni mahna, a hnu deuhah chuan,"Kan ințhațhen a ni mai," ti ringawtin min chhâng a, min chhànna a tawi êm avang chuan ka en deuh há a; mahse, ka záwt zui zêl duh bîk lo, a sawi chhunzawm châk lo a niang.

Kan inkawp nghet chho ve zêl a, min duhna pawh a lantîr hreh ngai lo, lungawi lohna ka neih chângin dawhthei takin thil awm dàn min zâwtin min hrilh fiah țhin, hei vàng hian ka hlatsan thei ngai lo, ka duhin ka thlahlel a, hmuh hlàn ka nghâkhlel țhìn, ani pawhin ka duh ang chen tho hian min duh ve tho niin ka hria, school lamah erawh kan induhna kan la inthup hrâm hrâm a, sawi theiha awm kha ka duh loh bâkah ani pawhin a duh bîk lo, a hmeichhe lo kawp tawhteah thîkna tùr hmu zauh zauh mah ila a hun kal tawha mite an ni tiin ka inhrilh țhìn a, chu chu amah pawhin min hrilh dàn a ni bawk a, chu chuan ka inhnèm țhìn. Bâkah, ka thinrimna tùr leh lungawi lohna tùrin hmeichhe dang leh a kawp tawhte pawh a niang chu, chûngho chungah  chuan a mit a lèn kual ka hmu ngai hran lo va, hmeichhe dang a biak apianga lo thinrima lo lungawi loh ringawt chu ka duh bîk lo, a rilru têt thlâk ka ti ve tho, bialnu rilru tê zet leh thîkthu chhe zet nih ka duh lo.

*ZÀWI TÊ TÊA KAL HLAU SUH, I RILRU TIHRISÊL HMASA LA, I RILRU A HRISÈL PHAWT CHUAN NUN NUAM TAKIN I HMANG THEI ANG*