☆HLWILY☆ - 21 By Dingdi Pachuau

 ☆HLWILY☆ - 21 By Dingdi Pachuau

Zan khat chu zanriah ei laiin ka pa chuan," Bawihte, tihian private school-ah hlawh sâng lo têin zirtîrtu hna i thawk a ni a, zirtírtu hna hi i tuina a nih chuan a țha ka tihpui reng mai che; mahse, ka'n ti teh ang, hei aia sâng hi i thawk thei ngei ang tih ka hria a ni, pawisa tam zâwk ît viau vàng pawh ni chuang lovin, chu lovah, hna nghet țha neia pawisa  tam zâwk i lâk luh theih phei chuan nangmah ngei hian nuam i ti dâwn a ni.  Hna dang zawng chung pawhin a thawh theih tho a, hna ruak dang hi melh pah thei la ka ti khawp mai," a ti dap dap a, ka chaw ei lai chàwl meuhin ka pa chu ka en a, chutiang lam chu ka lo ngaihtuah ngai hauh lo, Damon-a bula ka awm theiha ka hmuh theih chuan ka lo duh tâwk viau mai asin.

"A la naupang alawm, a thawk reng bîk nâng," ka nu chuan a lo ti ve a, ka pa chuan,"Thawh laklawh hi a awm ve a nia, lukhãwng nei tehchiam lova inhamtàn reng hi a theih viau bawk a ni," a ti leh a, kei chu țawng ve lo chuan ka pa thil sawi chu ka lo ngaihtuah kual thui zêl a, dik ka tih viau vàng pawh chu a ni mahna, ka chhâng lo.

"Hlawh tam zâwk tùr hna a hmuha hmun danga thawh daih a lo ngaih palh hlauh chuan...?" ka nuin a tih chuan ka pa chuan,"A, chu êm chu a thleng bîk nâng tiraw, Bawihte? I tel lo chuan i nu nèn chauh chuan kan khua a har àwm mang e, thingtlâng lama thawh ngai lo tùr chi hna zawng mai rawh," nui hmêl pua a tih chuan ka nu chuan," Kha, i huphurh êm kha," a lo ti vat a, kan nui leh rih a; mahse, ka nui nain ka pa thil sawi chhuah chuan ka ngaihtuahna a luah zui vang vang tho.

Ni e, mihring hian kan hma hun tùr kan hre lo va, tunah hlimin nuam ti takin hun hmang mah ila, kan hma lawkah harsatna kan tâwk thei. Ka ngaihtuah thui zêl a, Damon-a nèn hian kan inkawp reng lo thei, inngaizâwng zawng zawng hi an inkawp reng kher lo va, an innei vek kher lo bawk. Ani hi ka pasal tùr pawh a ni lo thei, țawng thu chhe lovah, kan lo ințhen hlauh a nih phei chuan a school-ah hian ka thawk chhunzawm zêl duh kher ang em? Amah hi chu a hnunglam ațang tal pawha hmuh ka la duh cheu ang; mahse, hmeichhe dang nèna hmuh dun chu, hrehawm ka ti viau dâwn si a, chu ai chuan hmun danga thawh daih ka duh ngei ang chu.

Ka phone riin ka ngaihtuahna ram ata chu min kai harh a, Sti a lo ni a, kan inbe rei leh khawp mai, Damon-a chanchin min zâwt a, keiin Rinsiama nèna an chanchin ka zâwt leh bawk a, a țawng duh si a, kan inbe tàwp hlei thei lo a ni ber mai.

Kan inbe zo chiah tihah Damon-a'n min rawn be leh chiah bawk, a rawn lungawi lo deuh bûr lehnghâl. Min rawn biak a tum a, Sti nèn kan inbiak rei avàngin min be thei lo a lo ni. A lungawi lo țawng deuh nghut nghut chu ka nuih a.

"Sti nèn kan inbe rei deuh a ni, hre thiam rawh, kan inbiak ve dàn a nia, bâkah, min rawn be hmasatu a ni sia, amahin a duh tâwk hmaa lo duh tâwk daih kha chu a nuam lo ve a," ka ti duah a, ani lah chuan la lungawi lo tih hriat tak hian,"Dârkàr khat chuang lai in inbia a, eng thil nge in sawi zozai ni? Hmeichheho lah hi, sawi tùr hi in ngah thei si," a rawn ti leh bul bul a, a la lungawi loh vàng a ni tih ka hriat avàngin ka pàwr duh miah lo va. A sawi duh  a rawn sawi a, kan inbiak tàwp dâwna," Zanin chu i mumangah min lo hmuh tum ang che, school-ah inhmuh i duh ngai si lo," a rawn tih chuan ka nui hak a.

"Teh rêng mai, in mitthi lumennaah chuan ka rawn kal ve ang a, ka rawn enthla dûk dûk ang che," ka ti a, ka nui leh hak hak a, ani pawh chuan," Nia, nula chhe lo deuh bulah pawh ka lo țhu reng thei a nia," a rawn ti zui ve zat a, rei inbe tawh lovin kan inbe tàwp zui a. Kan inbiak zawh chuan ka thaw huai a, message type hi a peih ve lo va, inbiak mai hi a duh zâwk ziah țhìn. Zanin pawh mitthi lumen tùr an neih thu min hrilh paha min rawn biak tum a ni a, Sti nèn kan inbiak rei êm avàngin min lo nghâk ngat ngat a lo ni, min rawn message mai se buaina a awm lo mai tùr hi a nia.

Ka pa thil sawi khân ka rilru a luah reng avàngin newspaper lama hna ruak an rawn dah țhin chu ka en țhìn a, ka pa pawhin hna ruak zawnna group-a hna ruak awm țhin chu min hrilh ziah bawk. Hna nghet țha tak neih chu ka duh ve alawm, bâkah, ka ngaih dàn chuan hna kan duha kan thawk duh a nih si chuan khawi lai hmun pawh ni se kan pan dàwr dàwr mai tùrah ka ngai, Aizawl khera thawh hi ngai ka ti hran lo; mahse, Damon-a hmu thei lova hmun danga hna thawh daih kher chu ka duhthusàm a ni miah lo thung.

Favàng a rawn inher chhuak a, ka bula a lo sawi tawh angin an huanah chuan hun remchâng hmasa berah kan kal leh a, boruak a nuam a, vangvat a awm tawh lo bawk a, nuam ka ti kher mai. A hmaa kan kal khân an thlâmah khân tu mah an awm lo ni khân ka hre sia, tunah chuan nupa ni àwm tak hi an lo awm tawh a, kan thlen hnu lawkah an chhuak daih thung. An huan enkawltute an nih ka han ring rawk a, chuti ni lo se chuan an awm lo tawp ang.

"A hmaa kan kal pawh khân an awm reng tawh alawm, Aizawla an rawn kal nî takin kan kal ve zâwk a nih kha, huana thei zawng zawng hi an enkawl puitlin vek a ni kan ti thei ang chu, thlai hnah kan hawn zawng zawng pawh kha an chìn vek a nia, hetia ka kal châng hian min hawntîr ve țhìn a, huan kan tlawh khàt deuh chuan an hralh ve mai țhìn, a chhan chu an ei sêng chuang si lo va, a chhiat mai mai ai chuan tiin, an chin tam leh pawisa an la lût tam a ni ve mai," tiin min  hrilh dap dap a.

"A nih tak chu, nangmahni lam in fel a nih chu a, thlai an chìn an hralhna man in hûitîr vek chuan," ka tih chuan," A, anmahni hi an fel reuh êm a ni, Aizawla an rawn kal châng apiang lahin min rawn tlawhin an thlai thar eng eng emaw hi min rawn kensak ve ziah a, ka nu leh pa hian fel an tiin an duat nupa viau bawk, țhat leh țhat a inlâwm a nih ber chu," a lo ti leh mai a, ka lo bu nghat nghat a.

Luiah kalin chakai khawrh ka rawt a, ka thu chu a zàwm ve mai bawk a, kaikuang te tak tê té chu a awm nual a, chituangin sangha pawh; mahse, chakai chu a vâng viau, Chèngkawl pawh a vâng, pahnih chu ka hmu, a bial ve ve a la ni zui.

"Man la, chèngkawl khawrh i ni mai," a tih chuan a thu âwih chuan ka man tak tak a! Ka kut lehlam ve veah ka keng a, a tê dùn bawk sia, man tê ka inti ve khawp mai. Min nuih suk pah chuan," I chèngkawl man chu han keng lang la, thla ka lo lâk ang che," a ti a, phûr zet hian ka in-pose zui nghâl a.

Tui chu ke lâwngin ka han dai per chhak chhak a, nuam ka ti khawp mai, luiah ka kal ngai si lo va, ãm taka hun hman chu ka duh, video-in a lo la char char tih a hnu daihah ka hre chauh. Sangha manna tùr min siamsak a, ka veh hnai ve thên thên a, ka han suak nalh a, sangha ni lovin kaikuang lian ve deuh pakhat ka suak fuh a lo ni a, ka hlim chu zuangin ka rãk teng tung a, ka insûm thei lo, kaikuang ka vawi khat manna a ni miau alawm le.

"I kaikuang leh chèngkawl man hi chhùmin chhùnchaw kan fâk dâwn em ni ang?" a tih chuan thutak zet hian," A, a tlêm e, kan ei khawp nâng," ka lo ti vat a, min chhàn zawm loh avàng chuan ka en chho vat a, a lo nui sûng ka hmuh chuan a tifiam mai mai a ni tih ka hre chiah.

"I va sual tak!"

A nui hawk hawk a," I man chhun an ni sia, ei loha han chhuah leh ringawt chu ka rilru natpui che alawm," a tih leh chuan," Ka man tawh tho tho alawm, chhuah leh daih chu pawi ka ti teuh lo, kan kal leh hunah an lo inthlahpung țeuh hman ang a," ka ti a, chèngkawl pahnih chu luiah chuan ka chhuah nghâl a, Kaikuang chhuah leh ka tum chuan," Kha kha chu thlâmah kan rawh ang a, i ei dâwn nia, i man ve liau liau a ni si a," a rawn ti a.

Vawiin huan kan kal zet chu nuam ka ti tak zet a ni. Khua a nuam si, boruak a nuam bawk si, rannung pawhin an hre thiam ve chêk a ni ang, thlâm bula pangpâr pár vul chûk chu phêngphehlep leh khuaiin an rawn vir lat lat reng a, thil dang ngaihsak lovin hmuhnawm ti takin ka thlîr reng a, a hnuah phei chuan thlá ka lâksak ta țeuh nghe nghe a.

Kan haw hma deuh chuan lui bula thlai hnah chu la turin kan kal leh a, ka thiam loh a ring deuh nge, lâk dàn tùr chu min hrilh a, kei chuan," Ka thiam ve bawk aw," ka lo ti hlar a, ani chuan," Thiam tho chuan ka ring a; mahse, i la na lutuk ang tih ka lo hlau deuh alawm le, a chhan chu hralh atân an duh leh dâwn sia, kan lâk nat viau chuan a chawr har ang a, hralh hunah an hralh tam thei lo palhah ka ti deuh," a lo ti duah a, chutia a sawi tâkah chuan ka inthiam lo ta deuh a.

"Ka lo hre lo a nih chu, i lâk dàn ka en ang a, a lâk awm chin chauh ka la dâwn nia," ka tih chuan," Good, i va fel tak êm!" tiin min han nuih suk a, kei pawh chuan ka nuih lêt ve sak a.

*******

Nilaini a ni a, ka tih dàn ngai têin school kal tur chuan hlim taka zai rât rât pah chuan ka insiam a, ka hmai leh hmui ka duh ang taka ka chei hnu chuan dawhkàna bag chu  lain ka chhuak a, ka nu hnênah chuan ka kal dâwn tih chu ka hrilh pah nghâl a.

Scooty ka dahna bul ka thlen dàwn chuan ka bag hrui chu a rawn chat hmawk mai a, a zipper ka zip țha hlauh a, eng mah a tla chhuak lo hlauh. Inah lût lehin ka bag chu ka thlâk a, chat hmawk tùr khawpa ka ken chhuah ngun àwm ka hriat loh nèn, mak ka ti khawp mai. 

Ka vànduai nî tùr a ni ve hrim hrim a niang, school thlen hma kawng chanve vêl a la awm ang tihah chuan ka scooty chu a thi leh hmiah mai a, ka han tihluih viau pawhin a nung thei rêng rêng lo. Ka mang a ang khawp mai a, workshop hnai bera dah tùr pawhin ka nawr a ngai dâwn a, agent-a kalpui dâwn phei chuan school ka tlai over dâwn chiang si, tihngaihnaawm hek lo, workshop hnai berah chuan ka luhpui ta ringawt a.

Dâr a ri țêp, Assembly kan nei dâwn lehnghâl a, tunah pawh hian ke pawhin kal ila ka tlai tawh ngei ngei dâwn. Michael-a ka han phone chhin a, a la thei lo. Damon-a ka han ti leh a, ani pawhin a la thei chuang lo, vawiin chu hauh ka tuar mai a ngai dâwn a nih hi, ka harsatna tawh ka hrilh erawh chuan min hre thiam ve mial mahna!

School ka tlai ta sa sa tiin ka han nghâk deuh rèn ráwn a, an siam țhat theih nghâl mai bîk loh avàngin school lamah ka kalsan ta rih a, school gate bul ka thlen chuan Michael-a lût tùr chu ka hmu chawpchilh nghâl a, ka ko vat a. Thil awmzia chu kan inhrilh dùn a, ani pawh a bike a lo chiangkuang lo ve tho lo niin, intiam rual kan nih duh hmel tawp; mahse, a rûk tak chuan ka lãwm phian, a chhan chu keimah chauhin ka tlai bîk si lo va.

Mahse, Assembly an lo zawh fel tawh avàngin a nuam lo khawp mai. Inthlahrun a nâ, min lo la fiam zui bawk a, ka tihngaihna hre lo chuan," Michael-a hi alawm a bike a lo tichhe ve kher a," ka ti ringawt a, ani lah chuan," Ka tichhia a ni lo, amahin a chhe ve tawp a ni zâwk," a lo ti ve vat a, kan nui dar dar a.

Mahse, kan nui rei lêm lo, Michael-a nèn chuan kohna aw mawi kan hre nghâl zat a, hauh kan tuar dâwn tihna; mahse, harsatna tâwk thei vek alawm kan nih le, a lo hre thiam ve êm ang chu maw.

A office chhûnga Michael-a nèn ding dùna kan han hmachhawn ràn chu thil nuam tak chu a ni lo alawm, kan thil tawn kan sawi ve ve a, sawi hnuhnung zâwk ka nih avàngin ka sawi tàwpnaah chuan ngaihdam ka dîl tel pah bawk a.

"Chance i zawng a ni tiraw? Min tihthinrim hi i tum ve hrim hrim a ni, engati nge heti tak maia ka chunga i duh viau chhan hi? Kimkimi hi ka bialnu a ni tih i hre reng, engati nge i lo inrawlh ve tlat ni?" a rawn tih nghut nghut chuan mak ti tak hian ka en hau ringawt a! Ani erawh chuan Michael-a chauh chu a en ding ngar thung a.

"I hre sual a nih chu!"  Ani pawh a țawngka chhuak chu ngaihno a bei ta lo khawp mai, anni pahnih hi buai lohna tùrah an buai chho dâwn tlata hriatna ka nei, unau an ni lehnghâl a, boruak neiin thawhpuite thleng thlengin an hria ang tih ka hlau.

"Chutiang eng mah a awm lo, duh tâwk r'u," tiin hlauthâwng tak chung chuan ka lo inrawlh ve a, Damon-a chuan min melh hauh lo hian," Lo inrawlh suh, he thil hi a ințanna a rei tawh, eng thil nge a hriat ni? Sawi fel rawh se," a ti nghut nghut mai a, an unau chuan an inmelh rùn tawh mai bawk si, inrawlha lo țawng ve pawh a ngamawm tawh loh.

"Min tihthinur hi i tum ve hrim hrim a ni tiraw? Eng nge a chhan? Kimkimi ka chan zâwk vàng hian maw?" Dawhkàn chu a ri bur mai a, ka phu chiang kher mai. Dawhkàn chunga thil awmho pawh chu an kãng dâwrh hlawmin ka hria.

"Hriat loh der tum suh, theihnghilh tum mah la kei chuan ka theihnghilh ve ngai lo ang, i unaupa bialnu duh ngawih ngawih pawh mutpui duh mihring i nih hi, khâng hunlai ațang tawh khân kan inkâra inbeihna hi chu a ințan tawh. I hria tiraw? I hria, rilru na taka min siamtu kha i ni, eng ang mihringin nge i nih? Nula tam tak mutpui tùr i hmuh laiin eng thlarau sual nge i thinlunga lûta mahni unaupa bialnu ngawih ngawih pawh mutpui duh nge i nih?" thìnrim sehchilh nawk nawk chung chuan Michael-a chuan a ti ta sak sak a, a thinrim êm avàng chuan amah pawh chu a khùr dar dar thei hial a ni.

"Eng dâwt phuahchawp nge i sawi-" Damon-a'n a tih lai chuan,"Dâwt phuahchawp ka sawi lo, Kimkimi pawh engkim ka hrilh vek tawh, vènthàwn tùr a awm lo a nia, hlauthãwng duh suh," za lo tih hriat taka nui lui hawk chung chuan Michael-a chuan a ti ve thung a. Hrehawm ka va ti tak! Tlan chhuahsan daih ka duh thut thut a; mahse, a tihchi si loh, an insual ang a, an mualpho zêk ang tihte ka ngaihtuah thleng a, hlauthãwng ru tak chuan ka ding reng a, thâwk pawh ka thaw țha ngam lo hialin ka hria.

"Tu i bialnu nge maw i sawi ni? I bialnu êm mutpui duh tùrah chuan min ngai mah ta che, mutpui tùr chu ka hmu ve, hmeichhia ka hmuh apiang mutpui tùrah min ngai suh," Damon-a'n rum zeta melh chunga a tih chuan Michael-a chuan," I ropui ve ngawt mai; mahse, hlimna tluantling a thlen lo ang che, i pawi khawih hian a la ei lêt ve khawp ang che," tiin a ngawi leh rih phawt a, chutah," Ka bialnu tia ka kawhhmuh che kha i hriat duh chuan i la hria ang chu? Bazârah a nih nghe nghe kha, khami hnu lawkah khân a nih kha i mutpui nghe nghe ni, ka thinlung tina zual tùrin a hnuah i kalsan zui bawk a," tiin râpthlâk tih hmel zet hian a chek tlawk tlawk a.

"Chutiang ka hre lo ve. Chumi phuba lâk nân chuan Kimkimi hi i hmang ta a, a dik tiraw? Ani hi chu lo duh ve tum duh suh, han tum chhin chiah mah la, i duh ang takin indo chu kan țan dâwn tihna a ni mai," Damon-a chuan engah mah ngaih loh hmel zet hian a lo ti a, Michael-a chuan,"Kum thum chuang zet kal ta ațang khân kan țan tawh zâwk, kan hria ang chu," a ti lêt chhak mai a, chutah," I sawi chhuah a ni bawk a, ka han tum a niang chu, ka châk zâwng tak a ni alawm, inchhîr suh ang che," tiin Damon-a lak ațang chuan a mit chu la sawnin min rawn en a, a nui sak a.

"Duh tâwk rawh, i rilru a buai a nih kha, chhuak tawh rawh," Damon-a chuan a ti leh a, Michael-a ve thung chuan," Inchhîr ngai suh ang che; chhuak turin min duh bawk a, naktûk ațang chuan he hmunah hian min hmu ngai tawh lo ang," a ti leh a.

Chu chuan a tithinrim thar deuh a niang," Tunah hian chhuak nghâl rawh, min han vau ve khanglâng a ni maw? I thiamna kha i lo chhuang viau a ni ang e, ka mamawh hran lo," Damon-a chuan a ti ta hmiah a; mahse, Michael-a chuan engah mah a ngai lo a niang, a nui hawk duh chauh a.

"Naupang leh thawhpuite laka i mualpho loh nân vawiin chiah chu ka han awm rih ang e," tiin min rawn en a," Kan chhuk dâwn em niang? Class i nei ve thovin ka hria," a ti leh a, a hmel chu ți deuh hlek hian ka lo en lêt ve a, thinrim hmel a pu tawh lo, a hmel leh țawngkam pawh a pângngai leh vek tawh!

"Ani hi chu biak duhna ka la nei, chhuksan rawh," Damon-a'n a tih chuan," Duat viau rawh, a kalsan hlauh che ang e, a kalsan che chuan i thiam loh liau liau a ni ang," tiin min rawn nuih leh a, Damon-a office ațang chuan a chhuak ta nghâl a.

A chhuah hnu chuan sawi tùr a vâng kher mai, a reh vawng vawng mai a, kei țawng duh ve tak pawhin sawi tùr ka hre lo. Ni lo, sawi tùr chu a awm țeuh a; mahse, tunah tak hi chuan a bo vek.

"A thil sawi kha a awmzia i hria em?"

Ka en vat a, min lo en ve reng bawk a, Michael-a bialnu mutpui chungchâng vêl kha a nih ringin a hnu deuhah chuan ka lu chu ka bu nghat a.

Thinrim zet hian," Engah nge a bialnu chu mutpui tlata min ngaih ni?  A bialnu tih hre reng chungin ka mutpui duh a ring maw? Mahni unaupa bialnu mutpui tùr khawp chuan hmeichhia hi ka tlachham bîk lo asin," a ti ta buan buan a, a thin a rim hmel si a, țawng pawh țawng ngam lovin ka awm hmunah chuan ka ding tlawk tlawk ringawt a.

*HRINGNUN KAWNG CHHUK CHHO HI ZAWH HREHAWM VIAU ȚHÌN MAH SE HMANGAIHNA A AWM TLAT CHUAN ZAWH A LO NUAM MAI ȚHIN*