☆HLWILY☆ - 22 By Dingdi Pachuau

 ☆HLWILY☆ - 22 By Dingdi Pachuau

"Chuan, a thu sawi kha i lo ring bawk a...?" a ti leh a, mit khap lêk lo chuan min rawn melh kur bawk a, ka chhâng lawk lo nain a hnuah chuan ka lu ka bu deuh zauh a. Eng nge, a mutpui ka ring  miau alawm, a lêrh ve thawkhatin nula lakah a luck ve tâwk tih ka hre ve bawk a.

A phun hluk a, min hnungchhawn zâwnga dingin a thaw hawk hawk ri chu ka hre thei a, che hauh lova rei fê a din  hnuah chuan rawn hawi lehin,"I kal thei tawh ang," a ti ta sup a, ka hre thiam lo deuh hlek dàwn a; mahse, ka chhuak ta thuai tho a. 

Michael-a hmêl leh cheziaah chuan Damon-a nèna an boruak neih chu a lang chhuak miah lo, thawhpuite chu biain a țawng bawrh bawrh reng a, fiamthu thawhin a nui var var tho; mahse, kei chuan a hmaikáwr vuah mai a ni tih ka hre kar thung, a fing fel êm a, mi dang lakah chuan a tilang mai mai lo ang tih ka hre ve tlat a ni.

A tûkah chuan a sawi ang ngeiin a rawn lang ta lo, a țawng chhuak mai mai lo a ni tih ka hre fiah chiah. Ni e, a thin a rimin a rilru kha a na ve êm a, a lo inup rei tawh bawk nèn, a thil tih hi thil țha ber a nih chu ring hran lo mah ila amahin a duh phawt chuan ka hriat thiampui reng mai. Han chàwl deuh vang vang se, a rilru pawhin dam hun a la nei ang ve a, bâkah, Damon-a pawhin Michael-a tih mai mai lohzia a hre chhuak ve thei bawk ang a, an inkâr siam țhat nân pawh a lo țha zêk maithei asin.

Chhùnah chuan ka va text a, zîng kâr hma takah a lo zin chhuak daih tawh niin, Lungleiah a awm tih min rawn hrilh chuan mak ka ti kher mai. A hna a bànsan tâk avànga a hun âwl neih làwm tùra a zin thu a rawn sawi chuan kawng lehlamah chuan ka awt ru viau mai. Hun thâwl neiin a duhna lam lamah a thang kual thei bîk ta si a, a nuam viau ang chu.

A tûk lamah chuan Science zirtîrtu atân hmeichhe pakhat a rawn kal ve ta thung a, ni khat chiah Science zirtîrtu nei lovin kan awm tihna a nih chu. Damon-a hmel hriat țha tak a nih ka ring ve ngawt a, a dik ngei bawk ang, nimin lamah Michael-a a rawn kal ta lo bawk nèn, a buai viauin ka ring, zànah pawh a rawn lêng lo va, biak erawh chu min rawn be zawk thung; mahse, a buai thu erawh a sawi lang hauh lo, kei pawhin ka zâwt chiah lo bawk a. Mipa induh tâwk ve tak a ni a, buaina a nei a nih pawhin a buaina chu min hrilh mai mai lo ang tih ka hre ve tawh bawk a ni.

Michael-a awm lo chu ka khua a har ru khawp mai, ka kawm ber țhin kha a ni ve bawk a, ani pawhin a rûk chuan min ngai ve tho ang. A zinna lama a thlalâk tharlâm deuh deuh chu intithei deuh hian min rawn thawn sek a, min rawn awhthîk a ni ber ang chu, hun ãwl neiha zin ve min tichâk zo vek. Zin ve ka châk thu ka hrilh lah chuan," Rawn zin ve a ngai lo, țha deuh khân school kha kal la, i tân a țha ber," a la rawn ti zui a, ei tùr tui hmel zet zet thlalâk min rawn thawn lehin," I duh chuan ka rawn hawn ve ang che," a ti zat a.

Michael-a hi chu ka țhianpa a ni a, a châng phei hi chuan ka unaupa ang maiin ka en deuh țhinin ka hria, ka chungah a fel a, a rin tlâk a, unau mipa ka lo nei lo bawk nèn, nulain tlangvâl a en anga ka en loh miau vàng hian a ni mahna, Damon-a'n a thîk viau pawh hian a langah hi chuan inthiam lo angin lang ve țhin mah ila chhûngril lamah hi chuan engah vak ka ngai lêm lo.

Michael-a nèn an ințhêțhù ațang chuan Damon-a chuan a theih ang tâwkin min ngaihsak ve ta thung a, ka kawm ber țhin a awm ta lo tih a hre ve kar pawh a ni mahna le. Nuam ka ti, Michael-a awm loh tâk vànga rilru khingbâiin awm mah ila Damon-a min ngaihsakna chu nuam ka ti khawp mai. Kan inkawp a ni tih hi School lama thawhpuite'n an hriat erawh ka la hlau reng a, chuvàng chuan, school hour chhûng hi chuan min ngaihsak miah lo tùrin ka ti țhìn, hre thiam lo lek lek tawhin a lungawi lo dâwn dâwn bawk a; mahse, ka thiam ang tâwka hrilh fiaha ngen tak têa ka ngen avàng chauh chuan a rawn tilui ta bîk lo, a dàn siam ngei bawhchhetua țang turin ka duh lo a ni.

Ni khat chu hnial theih miah lohin kan ina rawn kalin chhuak tùrin min rawn nghâk ta tlat mai, a rawn lang thut a ni ber, țhàwn lâwk pawh ka ni chuang lo. Min hruaina tùr leh kan tih tùr min hrilh duh bawk si lo va, thuamhnaw hâk dàn tùr pawh ka hre thiam chiah lo, dárthlalang hmaah ka inthlêk ka inthlêk ringawt mai a; mahse, a tàwpah chêtpui nuam leh hâk nuam, mi zîngah pawh zahpuiawm lo tùr chu ka thlang ta ringawt a, room ațanga ka chhuah pah chuan ka sana chu ka'n thlêk zauh a, minute 13 chiah insiam nân ka hmang.

Sitting room-ah ka nu nèn an lo țhu dùn a, min hmuh veleh chuan a lo ding vut a, min en vung vung pah bawk a. Ka lai ve lek lek mai; mahse, lai lo ang tak chuan," Kan kal nghâl mai dâwn em niang?" ka ti nghâl zat  a. Min chhâng lêm lo chuan min melh vung vung a, ka nuin," Nia, kal rawh u, in hmanhmawh hmel êm mai," nui deuh chunga a lo tih ve tâkah erawh chuan," Aw le," a ti vut a, kan chhuak chu a ni nghâl mai.

Hmun pawimawh deuhah thil eng emaw ti tùrin min hruai dâwn emaw ka ti a, dàwra thil chi hrang hrang min leipui hnuah an in lamah min kalpui leh rih a, a insiam leh phawt anga kan chhuak dâwn chauh a nih ka la ring leh fan a; mahse, an in ațang chuan kan chhuak ta miah lo.

"I insiam dâwn lo em ni?"

"Eng aiah chuan maw?" min en mang hlei lova a tih chuan," Kan chhuak dâwn lo'm ni?" tiin ka zâwt a, ani lah chuan," Khawiah maw?" a lo ti mai a, a phone chu a la khawih mawlh mawlh reng a, ka en ràn rán phawt a, chutah," A nih, eng nge kan tih dâwn a?" ka ti ta a.

A phone chu a țhutna bul dawhkànah chuan a dah hmasa tê tê phawt a, chutah, min rawn enin a nui ta suk a," Thil tê tê," tiin a ding ta nghâl a, a kut rawn phar chhuakin," Ka room-ah chho phawt teh ang," a ti zui leh zat a. Ka kut phar chhuak ve chuang lo chuan ka ding a,"I chhûngte an awm bawk si lo va, hetah hian ka lo awm rih zâwk ang e," ka lo ti thung a, a room-ah, kan pahnih chauh lehnghâlin, a fuh lo ang, ka hlauthãwng, a chhûngte tu emaw ber chu inah hian awm ve se chuan a zia deuh tùr.

"Ka khua a har hman dâwn asin," ti supin min rawn pan a, ka kutah chuan rawn chelhin," I hlauthãwng a ni maw? Hlau suh, thil țha lo ka ti dáwn lo," a ti a, in chung lamah chuan min kai chho zui ta nghâl a, han hnial chiam dàn pawh ka hre lo. A thuhrimah, engah nge maw thil țha lo ka lo ngaihtuah hman ni? A ti bîk kher nâng; mahse, a bulah hi chuan ngaihtuah loh theih pawh a ni chiah lo a ni.

"I chhûngte chu engtik hunah nge an rawn haw ang?" a room kan thlen chhoh chuan ka ti a, han sawi mai tùr ka vàn êm a ni. Thil dang min sawipui ang tih ka hlau pah bawk nèn, a chhûngte chu lo haw thuai se ka ti a ni.

"Zànah bâk a ni lo ang," a lo ti mai a, chutah," Lo țhu rawh, ka'n intleuh lawk ang e," ti leh zatin bathroom lam chu a pan ta nghâl a, a lût fel chiang tih ka hriat hnuah chauh a room chu enin ka hawi kual ngam ta chauh. A hmaa ka hmuh ang tho kha a ni, a zauin a felfai leh viau a, a room parda mil tak mutpuan a phah a, a lukham kâwr leh a rizai kâwr chu a inang ve thung, hmuh a nuam viau mai.

Ka hawi kual zêl a, ka thil en tâk avàng chuan ka nui sak ringawt. Ka bihrúkna hmun ngei kha, che lova ka awm rei lutuk avànga ka ke a mut nghe nghe kha, ka țap lo chauh a nih kha maw, a lo rei ve leh ta hle mai. Dawhkàn chunga lehkhabu ni awm tak chhah deuh ka hmuh chuan ka hre chiang châk deuh a, ka pan hnai vat a, lehkhabu ni lovin photo album a lo ni a, a inbual hlànin ka en zo hman êm ang chu maw.

A thlalâk chi hrang hrang niin, a tét lai thlalâk pawh a lo awm nual mai. A  nausèn lai aţanga kum 3 vêl a nih thleng vêl ni àwm a ni, a chumin a ngo reuh sia, a hmel pawh a țha kher asin, a nu pawhin pawm nuam a ti ve ngawt ang chu, a chhuang ve ngawt bawk ang. Kei ni ta ila, hetianga naute hmel țha pawmtu han nih chu, nuam ka ti dâwn lutuk, ka chhuang thei ngawt ang!

"Eng nge i lo tih?" Ka beng bul lawka a rawn tih chuan ka phu zawk mai a, a biangah ka la intauh dawt zui. Nâ a tih ka rin avàng chuan ka inthiam lo zui zat a; mahse, engah mah a ngai lêm lo a niang," Thil sual ti rù ang mai," a ti sup a, ka bulah chuan a rawn țhu ve nghâl a, a sahbawn hman rim nge a shampoo nge a shower gel rim pawh ka thliar thiam chiah lo, a rim a thiang ngei mai. Ka mitsîrin chung lamah thuamhnaw a inbel lo tih ka hmu, hnuai lamah erawh eng emawni chu a ha, boxer  nge kekawrbùl pângngai tih erawh ka hre chiah lo.

"Nizàna ka nuin a en khân a lo dah lût lo a ni maw?" a ti leh a, ka bul chétah a rawn țhu ve si a, thuamhnaw inbel a nei mang bawk si lo nèn, ka va lài tak! Thâwk pawh ka thaw chhuak ngam mang hleinem le! Thlalâk chu ka en nain ka hmu chiang tawh lo, ka bula țhu chuan ka boruak a tidanglam vek.

"Ka chum i ti em?" a rawn tih chuan ka melh zawk a, thlalâk chu en lehin," Umm, I duhawm bâkah i hmêl țha reuh lutuk bawk," ka lo ti sap a, dáwt sawi kher ngai ka ti lo. " A nih, tunah hian ka la hmêl țha tho em?" a tih leh chuan," Aw... chhe chuang lo," bah deuh nak hian ka ti leh a.

"Chhe chuang lo... um, a țha tho e. Chuti a nih chuan, fapa kan neih hunah ka têt lai aia chum leh duhawm nei ang aw," a rawn tih leh tâkah chuan thlalâk en tawh lo chuan ka melh ngai ka melh reng ringawt! A thil sawi kha, fapa neih hunah...!!  Ani nèn hian fapa kan nei ang maw?! Nupuia min neih a duh tihna em ni? Inneih a duh ang maw? A ni tak tak em? Fapa a duh, fapa kan neih hunah...

"Fanu kan nei a nih pawhin nangmah ang chiaha hmêl țha ni se ka duh, fapa chuan a pa chhùnin fanu chuan a nu chhun se tih hi ka suangtuah ve țhin a ni," a ti leh sup sup a, en lo mah ila min rawn en reng tih ka hre chiang khawp mai. Chuvang tak chuan ka lài a, melh pawh ka melh ngam lo. Chutah, min rawn kuah ta thut mai, amah si chêta min kuah avàng chuan a rim tui zet chu ka hre chiang zual a, sahbawn rim chu a ni lo tih pawh ka hre thei nghâl.

"Ni tin deuhthaw ka hmu thei chung che pawh hian i hmêl hmuh ka kham thei lo va, hmu reng thei chung chea ka khawih thei si lo che hi hrehawm ka ti țhìn tak zet a ni. Hetia kuah chea fawh vang vang che hi ka duh țhìn a," tiin a kut pahnih chuan ka biang tawnah chelhin amah en thei tur chuan min kuai dâk a, en loh theih pawh a ni lo, ani pawh chuan chiang zetin min rawn melh chhuk ran a.

A hnua kan awm dàn chu inngaizâwngte awm dàn ang a ni; mahse, tûn țum chu a boruak a dang, hun thâwl leh fianrial kan neih chângin min kuahin kan infâwp fo va; mahse, tûn țum hi chu, kan awmna a fianrial zual deuh bawkin kan duhthawh zual deuh a niang, a khumah kan tlu dùn ta rual mai. 

Khum a ni tih ka hriat chuan hlauthâwng takin ka melh ta rân a, ani erawh chuan nui suk chung hian," I hlauthãwng hmel pawh a lo țha leh zêl tho a,"tiin min fawh chhunzawm leh zat a, ka bengkáwmahte chuan duat takin min fáwp a, ka rilru a fïm rei thei ta lo, duhthawh takin min fâwp chhunzawm leh tawh miau si a.

"I laka ka insùm nasat țhin zia hi, hria la min khawngaih thei ngawt ang," ti sup supin ka nghâwngah chuan a fâwp leh ta thung a, kei pawhin a sam la hnâwng lek lek chu ka lo tuaisak ve a, a khawih ang ang chuan awmin ka lo dawh hârh hârh ni berin ka hria, a khawih theih tùr leh a fawh theih tùrin ka lo insiamrem zêl a ni tawp, ka thluakah thil dang a awm thei tawh lo, amah Damon-a chauh lo chu.

"Damon..."

"He laia khuavàng hi i inhmeh ka ti țhin," tiin ka ngháwnga khuavàng, lang chiang zet ka ngei deuh țhin chu a fâwp zoh a, ka nui sak mai. Ka ngei thei viau asin, chutia inhmeh min tih chuan ka ngei tawh miah lo ang.

Min thunun hneh êm avàng chuan thil dang ka ngaihtuah thei lo va, inhawng takin min tih dàn ang ang chuan ka awm zêl a ni, min fawh pawhin amah aia duhthawh mah zâwk hian ka lo chhâng lêt ve zêl a, ka thawmhnaw a phelh pawh chuan ka lo pui ve zêl, ka chêt dan chu a mak hauh lo.

Mahse, ka kekawr kâwng a rawn vawn tâkah chuan ka harh ta kâwk mai a, eng nge a chhan pawh ka hre lo, hlauhthàwnna nasa tak mai neiin  a kutah chuan ka chelhsak ta vat a, chumi pah chuan," Hei chu.. kan ti.. thei lo..ang," ka ti chhuak ta nawk nawk a, ka aw pawh ang ka ti lo, a khùr dar dar a, ka aw ang chiah chuan ka thâ pawh a khùr tel tho.

"Kimkim..." tiin a rawn kûn hniam leh zat a, min rawn fâwp leh nghâl zat bawk, min tibuai leh teuh khawp mai; mahse, ka rilru ka tifîm hrâm hrâm a, thil sual tih loh hrâm ka duh, a tân a țhat loh bâkah ka tân pawh a țha lo, inngaizâwng ni mah ila innei kan la ni tlat lo.

A thil tih chu chhunzawm a tum nain ka lo țang ve ta tlat a, kan kut pawh a insual ve fat fat mai. A zei nasa mai si a, a malin min kherh bet tlat nèn, chêt sawn a har khawp mai; mahse, ka rilru a fîm ve laklawh tlat tawh a, tlàwm mai ka tum lo, thil dik lo hulhual a ni si a.

A tàwpah chuan min thlah duh bawk si lo leh tàwp a tum si lo tihngaihna ka hre lo chuan a remchâng laiah ka seh ta vak mai a, ka seh na deuh a ni maithei, min thlah chiang khawp mai. A tha thlah lai chuan ka țang ve ta vat a, ka tãl chhuak thei ta, amah hlat thei ang ber chuan tawlhin ka thaw ham ham phawt a, ani erawh chuan ka sehna lai, a koki chu a lo chûl hoh hoh a, min enin a nui hawk a.

"A nat reuhzia chu, thisen chu a chhuak êm lo tiraw?" tiin a tuai leh hoh hoh a, a thinrim ka rin nèn, thinrim awka a ni miah lo, inthiam lo ru deuh chuan tlêmin ka thlêk hnai deuh a, ka sehna laia ka ha hnuhma chiang zeta a lan kulh avàng chuan ka nuih a za ve țêp a ni; mahse, ka nui lang duh lo.

"Chhuak lo ve," ka ti phawt a, chutah, zàwi deuh sap hian," Ka tihpalh aw, kawng  dang ka hre lo a ni," ka ti leh zat a, ka âwm chu ka hup deuh țât țãt bawk, kan chêtsual teuhzia chu ngaihtuahin ka thaw deuh hak a.

"A nat rei vaih!" tiin min rawn melh rùn rûn phawt a, chutah, khum ațanga thawh pah chuan," Ei tùr siam kan ngai a nia," a ti leh a, a thuamhnaw dahna lam panin a hâk tùr a la chhuak a, a ha mawlh mawlh a, chutah, min rawn en lehin," I duh chuan i inthlâk ve thei ang, i inthuamna kha chêtpui a nuam vak àwm si lo va, i duh lo la chhuak ve mai rawh," a ti a, room ațang chuan a chhuak ta nghál a, kei erawh chu ka ding reng ringawt.

In hnuai lama ka chhuka min lo hmuh chuan," I inthlâk duh nange?" a lo ti sup a, kei chuan," Ngai pawh ka ti hran lo," ka ti ve mai a, chutah, tîm deuh hlek hian," A la na reng em?" ka ti leh a.

"Nâ e."

"Ka tihpalh deuh tho aw, ka tihluih ni deuh tho mah se, khatiang êma nâ kha chuan seh ka tum bík lo a nia," ka ti a, kawng lehlamah ka inthiam lo va, kawng lehlamah erawh chuan ka inthiam tho bawk a.

"Min hnial kha mak ka ti, ka tawn vawi khatna," a rawn tih chuan mak pawh ka ti lo va, chhàn pawh ka tum hek lo. Ni e, mak a ti ang, tu hmeichhia mahin an hnial phal lo ang, kei ngei pawh kha ka inpe deuhthaw chu a nih kha, han inchhuang thei ka ni bîk lo, ka vànnei mai mai a ni. A duh chuan min tilui thei tho ang, ka hnial thei miah lo bawk ang a...

Ei tùr chu kan siam dùn ta a, ka rin aiin a lo zei daih mai, zei loh pawh a nei lo a nih àwm hi maw. A che zei thlarh mai a, a vawi khat tihna mai a ni lo tih a lang bawk. Nèlawm lo, lérh leh chapo zet nia a lan dàn phènah hian mipa fel pângngai tak a lo inphûm ru ve reng a lo ni, lêrh viau nia ka hriat țhin pawh kha kan inkawp hnu hi chuan a zia ta a niang, kawp dang a nei àwm pawhin ka hre lo.

A bianga chhangphut tlêm kâi chu ka nuih vak vak a, ka nuih chu a duh vak lo nge ni, ka biangah a rawn tât ve thut a, ka lo indang hman si lo, min nuih lêt ve a. Chhangphut chu țhãmin ka han tât ve leh a, kan thil siam pawh ngaihven lo chuan an chokaah chuan kan inûm kual a, ka țê tuar tuar mai. Ani chu a indang thiam deuh a, a chak bawk nèn, ka thuamhnaw chu chhangphut vàngin a vâr ta luai mai.

"Ka thuamhnaw a bàl vek tawh a nia," ka tih lawm lawm pawh chuan a la tàwpsan duh chuang lo, min rawn tât leh nghâl zat a, ka lo țê leh tuar tuar a, a rem lai laiah ka lo tât ve pah bawk, a lu a vàr ve luai tho a, a kekawrbul dum hâk pawh a vár țha tawh khawp mai; mahse, a sàn bîk avàngin kei ang ém chuan a lu-ah leh a thuamhnawah chuan a kâi tam ve lo. Rei fê chu kan inûm kãwi leh a, chhangphut kan lei pawh a kiam sáwt khawp mai.

Chutah, min rawn pawm kãng nawlhin,"I chét chuan chhuat tihfai tùr kan ngah tihna, chhuat ka nâwt ngai lo a nia," a ti sup a, chhangphut vàngin chhuat chu a ngap khawp ang chu, ka tãl ngam bîk lo, min pawm ang ang chuan ka awm ve tawp a.

A room lamah min chhohpuiin," Kan intihfai hmasak phawt a ngai," a ti leh a, a room kan thlen chuan bathroom-ah min luhpui nghâl a, shower hnuaia min nghah pah chuan," Ti hmasa rawh, drawer-ah sâwn towel i hmu thei ang. Chuan, thuamhnaw hâk tùr chu khumah ka lo dah ang," a ti a, bathroom ațang chuan a chhuak zui nghâl zat a.

Ka thuamhnaw zawng zawng ka phelh vek, ka ngap vek si a, hâk leh pawh a huphurhawm khawp mai. A thuamhnaw han hâksak ngawt mai chu thil dik niin ka hre lo, ka haw hunah ka nu leh pate'n mak an lo ti lutuk palh ang.

A ngaihtuah thui ka ti khawp mai. Ka intleuh zo ka chhuakin khuma ka hâk tùr a thuamhnaw leh hmeichhe underwear thar lo awm ka hmuh chuan ka ding chat a, engtin nge hmeichhe underwear-te a lo kawl theih ni? A lo kawp tawhte laka a tih țhin dàn pawh a ni mahna.

Nilêngin an inah chuan kan awm a, a chângin movie kan en a, games min khelhpui bawk a, a chângin a chhang siam tui tak tak chu kan ei a, ei pah chuan ka han fak ve luam bawk a, ani pawh a nui ve suk suk mai. Chhuat erawh a phal lo chung chungin ka nâwt lui a, ka nawh chhûng chuan ka bulah a lo tâp ve reng tho, lo nawh ve erawh a tum lo, ka phût lo hrim hrim bawk. Amah pawhin a sawi lâwk tawh kha, chhuat a nâwt ngai lo. 

"Kei aiin i inhmeh daih zâwk," a tih chuan kaen vat a, a kawr ka hâk chu a lo en reng a ni tih ka hmuh chuan kawr chu țhãm khãwr deuh țãtin," Ka hâk zawh loh êm hi a," ka lo ti sap a, ani erawh chuan," Khatiang tak kha a sexy," a lo ti daih thung a. 

Ka haw dâwn hnaih lama a room-a kan awm lai chuan," I kè kha a la mu țhìn em?" a rawn ti chhuak a, kei chuan," Aih, mu lo, ka chêt theih lohnaah ka awm leh tawh lo va," ka lo ti ve mai a. A nui hawk a, ka en vat a, a nuihza mitmeng ka hmuh chuan," Min nuihzat a ni maw?" ka ti leh hnuhnawh a. Ka han titau der ve ngial a; mahse, engah mah min ngai duh lo, a thêngthãwngah ka thawk lo a niang, a hnuah deuhah phei chuan ka titau rei peih ta bîk lo va.

*******

Hun âwl leh remchâng ve deuh kan neih pawhin min mutpui chu a tum tawh bîk lo, chutiang hun chu neihpui loh theih dàn kazawng ve hrâm hrâm țhin bawk. A chhan chu ka insûm thei tawh bîk kher lo thei si a, chutianga innghah ai chuan fianrial neihpui loh mai kha a țha zâwkin ka hria a ni, fianrialah chuan thlèmna a hnai bîk si a.

Zan khat chu Michael-a a rawn lang ve hlawl mai, kan ri chùl mai a, kan inhmuh lohna a rei ve tawh bawk nèn, a àwm ve viau a ni. Ka nu leh pa pawhin an lo làwm thiam viau mai a, ka pa nèn phei chuan inpawh takin an titi leh nghâl vat rêng a ni.

Tlêmin a lang chêr deuh a; mahse, a hmel erawh a țha sauh zâwkin  ka hria, hlim hmel a put vàng pawh chu a ni mahna, eng nge a tih țhin tih ka zawh chuan," Ka zin kual mai mai, ina awm chuan hman lohna chi tin hian min hmuak țhìn si a, ka tlàn bosan ve rih a ni," a lo ti mai a.

"Intithei viau lo teh," ka lo ti hlak a, zin ka châk ve si a, hun âwl ka nei thei si lo, min intihtheih khum ni maiin ka hria a ni.

"Intithei ve bawk ang chu," nui chunga a tih chuan," Hun a la awm ve chêk ang chu!" ka lo ti nghat a, chu chuan a nuih a tiza sauh a niang, a nui leh ta var var a.

"Ka la hruai ve dâwn che nia," a tih lai chuan doorbell a rawn ri a, ka lo chhâng vat a, Damon-a a lo ni. A rawn lût a, Michael-a a rawn hmuh chuan a rawn melh ràn rán phawt a, chutah, min rawn enin," Hei, i inlêng chu khawi lam khual nge ni a?" a'n ti salh a, ka en tawn zak zak a, chhàn mai dàn tùr ka hre lo, a zawhna chu ka rin loh lam daih a ni si a; mahse, Michael-a chu a lo diau awkawng  lo mai niin.

Engah mah ngaih loh hmel zet hian," Inlêng polite lo zet i nei a ni maw?" a lo ti vut a, chutah, min rawn enin," Kimkim, i thil tùr țha deuh ka rawn hawn che asin, i rawn lam ngei erawh ka phût thung ang," nui chung hian a ti a. Kei chuan," A ni maw? chutiang chu min rawn ken nghâl mai tùr a nia," ka lo ti vat a, ani erawh chuan," Min rawn tlawh ka phût ve tlat a," a lo ti thung a.

"Naupanchhiatthlâk!" Damon-a chuan a lo ti hluk a, a awm dàn chu a naupanchhiatthlâk daih zâwk ka ti, a unaupa hi țha taka be ve mai tùr a ni asin le.

*MI DANGTE TIPHÛRA FUIH TÙR HIAN MI FEL FAMKIM NIH KHER A NGAI LO VE*