☆HLWILY☆ - 23 By Dingdi Pachuau

 ☆HLWILY☆ - 23 By Dingdi Pachuau

An unau chuan direct-in zu inbe duh țhak lo chuan, keimah ber chu ka țawng char char a ni mai.  Inbe duh hek lo le, pakhatin min bia a, ka chhâng a, pakhat a lo ngawi hmak a, a hnuah pakhatin min be leh a, pakhat a lo ngawi leh hmak bawk a, kan boruak chu a hahthlâk lek lek a ni. A upa zâwkin 'U zâwk ka nih hi' tih a tum lo, a ţawng loh kâr pawhin hmun dang melh lovin ngun zet zetin min en rùn reng mai a, a lungawi lo hmêl chu thup a tum lêm lo, pakhat lahin a u zâwk chu engah vak ngai lo tih hriat zet hian nui hmêl puin min be sârh sârh reng a, inang lo tak chu an ni. 

Michael-a chu a lêng rei lo, a haw dâwn chuan," Thil chu aw, rawn lam la; mahse, i rawn lam dâwnah min rawn hrilh hmasa thung la?" a ti a, kei pawh chuan," Teh rêng mai, rei ka rial phal nâng," nui chung hian ka lo ti a. 

Michael-a ka thlah liam, a bul hnaia ka va țhut chuan,"Va lam kher a ngai lo," a lo ti nghut a, ngaihtuah lo zet hian," Eng chu maw?" ka ti zoh a, ani chuan," A rawn keng ve thei reng alawm, engah nge a rawn ken nghâl mai loh? Va lam kher a ngai lo, keiman ka leisak mai ang che," a ti leh nghut nghut a. Michael-a thil min rawn hawn chungcháng kha a lo lungawi lohpui a nih pek hi, hahthlâk roh hian, Thîkthu-a hi a.

"A mak thei, i unaupa a nih kha, ka țhianpa ve ngawih ngawih-" ka la tih lai mêk chuan," Ka thîk chuan țha deuhin be lo mai la," a lo ti hmanhmawh a, sawi chhunzawm lo chuan ka en vang vang a, chutah, thaw hak pahin,"I za deuh zawr zawr em?" ka ti ta daih a, ka nui pah deuh bawk a.

Nui ve miah lo leh mit khap miah lo chuan min en leh vung vung phawt a, chutah, a mit tizîm deuh san hian,"Eng maw?" hriat thiam loh hmel tak hian a ti leh a, kei chuan nui chung hian," I thîkthu vàng khân maw le," ka ti phawt a, chutah, thutak deuh zâwk hian," Ani kha chu ka țhian a ni, in inang lo. Keimah vànga in buai hi ka duh lo viau bawk, a upa zâwk i ni a, rilru puitling tak pu tùr i ni," tiin ka han hrilh ve ngial a.

"Ka thïk tho si chuan...?"

"Thîk tho lo la, i nau a nia, mi dang mi hrang daih lah a ni hek lo," ka tih chuan," Mipa a ni ve tho alawm," a lo ti leh a, a thil sawi chuan sawi leh tùr pawh min tihre tawh lo. A, sawi tawh lo mai teh ang, țawng a tam mai mai.

*******

Ka pa min ràwn ang chuan hna thawh tùr chu ka melh pah ve zêl a, hna ruak awm ka hriat apiang chu ka chhui zui ve a, hna hmuh hma hauh chuan ka thawh duh zâwng tùr chu ka'n thliar ve nghauh nghauh bawk a, a châng chuan ka nuih a za angreng, hna hmu hawt si lo leh ka tling ang nge tling lo ang tih pawh hriat hmaa ka duh zâwng lo thliar hran ve chu zahthlâk tiin ka han innuih leh rih țhìn bawk a.

Michael-a min rawn hawn 'handbag' pawh chu Damon-a min hruaina hnuaiah ngei ka va lam tawh a! A mawi ka ti khawp mai, vawi hnih vawi thum lai chu ka khai chhuak tawh, a man zât a sawi duh hauh lo nain a tlâwm lo ang tih chu han en rêng rêng pawhin a hriat reng. Michael-a'n thil min leisak chu Damon-a'n tlàwmah a la a, handbag pawh pahnih lai min leisak tawh! Ka han hnial nasa ve a nia; mahse, a lungawi lo dâwn dâwn ta mai si.

"Michael-a leisak che pawh i la duh a, ka leisak ve che a ni mai, la mai rawh," a ti tlat a, ka hnial ve viau nain Michael-a chu țanfungah a hmang tlat a, a tawpah chuan tlâwm záwkah țangin ka lâksak ta nge nge. A lungawi loh ai chuan ka ti mai, a man a to dùn bawk a, a mawi bawk nèn, zahpuiawm lo tak a ni, chutah, ka bialpa ngei min pêk a la ni zui, a rûk tak chuan nuam ka ti veng veng, Michael-a min pêk a thîk vànga min leisak ni lovin a bialnu ka nih vàng liau liaua làwmthu sawi nân min leisak ni phei se chuan ka lãwm zual ngawt ang chu.

Kum tàwp a lo ni a, Krismas chu hlim takin kan hmang a, Sti leh Rinsiama nèn inkawpin, Damon-a erawh chu véng hran daih a nih avàngin biak in lamah kan inkawp hlei thei lo va, zàn lamah erawh chuan a hman chuan a rawn kal ve ziah thung. Michael-a nèn pawh kan la inbe ve reng a, lèn erawh a rawn lêng khât ta deuh, a zin rei si a, in lamah hnathawh tùr a ngah deuh tawh ni àwm tak a ni.

Ka hman châng apiangin lehkhabu chhiarin ka hna zawnna lama pawimawh tùr nia ka rin chu ka en kual țhìn a, a chhan chu February thla khian exam tùr pahnih ka nei dâwn a, pakhat chu DRDA hnuaiah niin pakhat erawh chu DEO hna a ni thung, tlin chu inring viau lêm lo mah ila tih ve hrim hrim ka duh, experience atân pawh a țha alawm.

School țan leh tawhin class pawh kan kal regular leh tawh a, thawhpuite nèn inbiain inkàwm ve tho țhìn mah ila Michael-a anga kawm ngeih kha ka nei leh tawh rih si lo va, a rûkin ka khua a har ve țhin, Damon-a erawh ka hrilh duh hauh lo, staff room-a rawn kal phêt a tum palh ang, bâkah Michael-a a thîk pah bawk nèn, buaina a tam mai mai, engkim, a zawng zawng hrilh vek ka tum teuh lo mai. Mipa leh hmeichhia chu kan inang lo va, hmeichhe rilru leh boruak tawn ang hi an hre thiam ve lo. Ka haihawtin ka hlim thei ve êm zâwk a, a bula ka awm hi chuan Michael-a ka ngai tih pawh hi ka lo theihnghilh leh țhìn, hetia min ngaihtuah viau hnuah phei hi chuan mi lêrh tak a ni tih kha ka ring ta lo hial, hmeichhe dang a be lai ka hmu tawh lo va, a phur lai pawh ka hmu chuang lo. 

Ka haihawt avàngin buaina ka tâwk ta chiah. Ka School kal tùrin ka bag ka ken chhuah theihnghilh a, thil țûl pawimawh ka dah sa vek tawhna bag chu ka dahna ka hre leh ta tlat lo, ka hmanhmawh deuh tawh avàng chuan bag ka hmuh remchàn ka la ta ringawt a.

Class ka lâk lai chuan ka pum a rawn na țan ta raih raih mai a, ka pum ti ila ka tai bâwr a ni ber zâwk ang chu, engah vak ngai duh lovin zirtîrna chu ka pêk chhunzawm zêl a, ka zo hman hrâm tihah chuan nat tak têin a rawn na ta a, staff room ka lût a, ka chair-ah chuan țhuin ka tai chu ka han dawm vang vang a, nâ ka tih êm avàng chuan ka thlan a tla barh barh thei hial a ni.

Ka period dáwn hi chuan ka tai bâwr hi chu a na ziah a; mahse, tún țum chu a dang deuh tlat, hetiang êma nâ hi chuan ka awm ngai lo. Calendar chu ka en a, a lo hun leh reng tawh tak alawm le, nimin lama ka kâwng kham ka tih viau pawh kha, a lo hun leh tawh vàng a lo nih chiah hi; mahse, tai báwr nâ ka nei lâwk miah si lo, ka inring lêm lo pawh chu a àwm ve deuh tho chuan ka hria. Ka bag chu lain toilet awmna lamah chuan nâ ti ru tak chung chuan ka kal ta a, a chhûnga ka luha ka bag ka hawn chuan 'Thil pawimawh' ka dah reng țhin chu ka hmu ta miah lo, engtiklai pawhin pahnih thum chu ka dah reng țhìn kha a ni sia... Hm, ka bag ken ngai loh ka keng chhuak tak alawm, hei phei chu ka keng chhuak khât viau nghe nghe.

Engtin nge ka tih tâk ang? Hetia țhut reng lah hi a tih chi miah si loh a, lo lút duhte an awm ve dáwn asin. 'Thil pawimawh' mawlh chu, Pathianin haihawt a lo siam kher kher hi chu ka haw ve ngawt mai, ka bag ken țhin ka dahna ka hriat loh vàngin tunah ka che buai chu a ni dèr ta si. Haihawt hi paih bo daih theih se...

Ka tai a nat avànga ka indawm kun lai chuan ka phone chu a rawn ri chawpchilh ve leh bawk a, A pawimawh viau ang em? Chêt sawn ka va peih lo tak! Chhàn loh mai chu ka duh rum rum hial a, Michael-a a nih teh chuan a châk lo ngawt ang chu, tûn ang huna min rawn biakte tum mai mai. Țhen deuh sak sak chung bag ațang chuan ka phawrh a, ka han en chuan Damon-a zâwk a lo ni a.

"Hello?"

"I aw chuh! I țha em?" a rawn ti nghâl, ka aw chu a thâm deuh tih ka hria, ka țawng peih lo khawp; mahse, Boss kha a ni ve miau si a, ka chhàn loh chuan thil awmzia hre tùrin Staff room-ah min rawn kalchilh ngei bawk ang.

A rawn lang rang khawp mai. Mak ka ti, 'thil pawimawh' pawh a rawn keng thlap niin, a zak miah lo, zah ahnêkin min ngaihtuah tak zet tih chu a aw chhuak leh chezia ațang chuan a hriat theih vek. Ka chhuak chu ngaihtuah tih hriat tak hian min lo en a, za lo tak chuan ka nuih sak a; mahse, ka nui lui rei lo khawp mai, ka tai nâ avàng chuan ka kûn leh nghâl zat a. Thawhpuite min hmuh leh hmuh loh lam pawh a ngaihven tawh lo, ka bag chu lain kei pawh chu min rawn pawm nawlh a, a motor lam pan chuan zo zet hian min pawm phei ta vâw vâw a.

Passenger seat-a min nghah hnu chuan," Office-ah thil pawimawh i la dah em?" tiin min zâwt nghâl a, ka lû ka thing zoh a, chutah, driver side lama rawn lûtin," Haw ang aw," a ti leh sup a, a tlân chhuak nghâl a ni mai, hnial tum ni ila hnialna hun min pe hauh lo; mahse, hnial ka tum lo, ka peih vêl lo.

Kawnga kan tlàn lai pawh chuan min ngaihtuah tih hriat tak hian min rawn en leh țhìn a, țawng erawh a țawng chhuak lêm lo, a car chu hneh zetin a khalh a, a chângin ka kut a rawn vuan leh zauh bawk a.

"Ei châk emaw in châk emaw i nei em?"

Hming hmerha ei châk êm êm chu nei lo mah ila thil sa deuh tak lam ka eiin ka in châk tunah tak hi chuan, coffee tui tak sa ver vawr, a nih loh pawhin soup sa ver vawr ka in châk.

"Coffee sa ver vawr emaw soup sa ver vawr," ka tih sap chuan kawng laklawhah chuan dingin," Lo nghâk lawk rawh aw," a ti a, a chhuak zui ta nghâl a. Rei pawh ka nghâk lo, coffee sa ver vawr a va lei niin, tlân pah chuan ka in a, ka nuam ve deuh huaiin ka hria.

Inah tu mah an awm loh avàngin room-ah min pawm lût a, ka hnial ve deuh nain min muttîr lui tlat a, ka period vànga ka nâ reh theih dàn tùr chu min zâwt a, kei pawh chuan ka nat deuh chânga ka tih țhin dàn chu ka hrilh ve mai bawk a, hetia min ngaihsak hi nuam ka ti tlat, ni dangah chuan period vànga ka nat pawhin keimah chauha tuarin ka awm tlawk tlawk mai a, tuna hetia min ngaihsaka min ngaihtuahtu awm hi nuam ka ti, min tipangchang tlat.

In tùra min siamsak, Sawhthing zai lèp chhum tui chu glass noah rawn kengin a lum lai chuan min han intîr a, ka in zawh vek hma chu a kal sawn duh hauh lo. Ka in zawh hnu chuan no chu dawhkàna dahin," A la na viau em? Ka lo chùlsak dâwn che em niang?"a ti zui zat a, khumah chuan a rawn țhu thla nghâl bawk a, châk viau mah ila chu êm chu ka ngam lo.

"Ka lâwm e, ngai lo mai rawh se."

"I duh chu sawi mai rawh, ka tih theih tâwk tihsak che ka duh a ni," a tih leh chuan," Chuti, tuilum ip min charge-sak dâwn em niang?" ka ti sap a, a tho nghâl vat a, tuilum ip dahna ka hrilhna lam chu pan vatin a la chhuak a, current-ah chuan a charge ta nghâl a.

"I ril a țâm em? Ka siamsak thei-" ka tih lai mêk chuan," Țâm lo, bâkah, nangmah hi i pawimawh hmasa ber, a nat chhûng chu mu reng rih rawh," a lo ti leh vut a, rei vak lova tuilum a so tâk bawrh bawrh avàng chuan a ngaihven ta vat a.

Min awmpui ta reng a, tuilum ipa ka tai bâwr vêl ka deh vang vang chuan tlémin a zia deuh chuan ka hria a, min țhutchilh khur mai bawk nèn," Ka zia viau tawh asin, awmpui pawh ka ngai tawh lo ang, tih tùr i ngah àwm sia?" ka ti ta nge nge a, kaltîr chu duh lovin ui viau mah ila office lamah tih tùr pawimawh tak tak a nei leh țeuh àwm si a.

"I dam chian hunah i Scooty la turin ka chhuak ang," a tih chuan Scooty lam rêng rêng ka lo hrechang tawh hauh lo a ni tih ka hre chhuak nghâl, ka tâi na kha a na ve êm bawk a ni. 

Nilêng chuan min awmpui ta ringawt, a haw duh bîk si lo va, ka bulah a rawn mu ve lo chauh a ni. Ka kut a chelh reng a, tuilum ip charge leh a ngaih hunah a tho vat a, kan ei tùr a buaipui bawk a, chutiang chuan hun kan hmang nilêng. Chawhnu dâr 3 rîk hmain ka scooty la tùrin a chhuak a, a rawn haw chuan ka nute  pawh an rawn haw tawh a, chutia ina ka lo awm reng tih an hriat chuan thil awmzia min zâwt sawk sawk a.

Chuta țang chuan thawhpuite lakah pawh zêp hlen theih a ni ta meuh lo, min fiam ta zauh zauh a, staff room-ah lah a rawn lang zeuh zeuh ta bawk nèn, an hre lo thei ta lo va. Ani làwmah tlàin," Ka duh hunah ka hruai chhuak thei tawh dâwn che a, a làwmawm êm mai," a lo ti daih a, staff room-a a awm loh laia min fiamnate a rawn hre ve tawh si lo, nuam ti tak si, zak lumti up up chunga ka nuih ringawt nî a tam chho ta viau a ni.

Valentine's day-ah rose pâr vâr14 min pe a, zànah zanriah min ei chhuahpuiin chutah chuan gift min pe leh bawk a, min duhna a tihlan dàn, kan inkár a ngaihpawimawh dàn chu nuam ka ti a, ka hlim hlê bawk a ni. Sti leh Rinsiama pawh an ni nghet ve tawh bawk a, ka lawmpui êm êm. Chutih rualin Michael-a erawhin bialnu a nei rih lo tluang zêl, bialnu nei lo ta chu Valentine's day pawh chu niléngin inah awmin amah chauhin hun a hmang a ni àwm e, ka khawngaih roh khawp mai. Bialnu țha tak nei se, hlim se ka duhpui, amah mi hlim thei tak leh fel tak a ni a, a duh phawt chuan bialnu tùr chu a haihchham lo ang tih ka ring, a hawi lo ve rih êm a ni.

Ka hna dìl tura written exam chu Damon-a hriat chhuah loh theih tùr, school țhulh lo thei ang berin ka kalpui a, DRDA lama ka exam ni chuan Michael-a pawh ka hmu ve nawlh nia! A lo try ve niin, ani chu a tling mai ang, bâkah, hna țha tak hmu thuai se ka duhpui viau bawk. A tling mai ang, kei aiin a chhâng țha a, kei chu a hming ve mai a ni, bâkah, a hnà tùr ka hre chiang lêm lo bawk a, ka tlin loh leh a pawi lo.

DEO chu ka try leh bawk a, tlêmin a awl ta deuh. DRDA-ah chuan written-ah pawh ka tling zo lo ta rêng a, Michael-a erawh a tling chiang, interview erawh a la bâk ve tho; mahse, a tling thei thoin ka ring.

DEO-ah chuan ka inziak tling ve mai a, interview-ah ka tla ta thung. Pawi pawh ka ti chuang lo, post kha a tam lo hrim hrim bawk a, bâkah, kei aia thiam an tam êm a lo ni. Michael-a ve thung chu mi 15 an lâk zîngah chuan a tițha ber dawttu a ni pha a, ka lawmpui khawp mai. Ani zawng, a phû a ni, a bright êm!

Ka pa chuan min fuih sauh sauh a,"I lo beidawng ngawt ang e, hlawhchhamah pawh inngai suh, inzir nân hmang hlauh thung rawh, i tum tiruh la, i duh tak hna chu a lo chhuak mai ang," a ti a, ka nu pawhin min fuih ve sauh sauh bawk a, rilru tina lo tùra min fuih pahin," Tling ta la chuan Damon-a i hmu khât viau tawh dâwn si a, chuvàng chuan i tling lo hi a țha zâwkin ka hria, i tling ta lo rau rau, Damon-a pawh a lâwm zâwk daih ang, chu zawng ai chuan, mâkpa lehkha thiam leh hausa, mahni pawha school din thei neih thuai hi ka nghâkhlel nasa tawh a ni," tiin min fiam pah a, hna dìlah tling lo e ti lo chuan kan chhûngkua chu kan hlim phian a.

Michael-a a hna dìla a tling chu kan làwm a, tu vak mah a sâwm lo nain an chhûngkua bâkah țhenrual an ngah a, an in chu a khat mawi tâwk thei tho. Damon-a'n min kalpui a, amah tak hi chuan kal a tum lêm lo, kal lo mah se kei chu kal ka tum sa hrim hrim thung; mahse, keimaha min kaltîr chu a tum teuh lo mai.

Choka lama ei tùr kan ei laiin lawmpuina thilpêk ka pe a, hlim nui var var chung hian," A ngai ka ti hauh lo nain min pêk chuan hnial ka tum lo, ka roh nasa dâwn si a," a ti a, kei chuan," Roh kher a ngai lo, a țûlah i hmang dâwn nia," ka ti thung a, ani lah chuan," Ka phal teuh lo mai, nula hmel țha min pêk hi chu ka hmang phal tawp nâng," a lo ti leh a.

Damon-a a rawn inrawlh vat a," Hmang rawh ti na na na, hmang mai mai la ti nia," a lo ti nghut a, a unaupa nèna kan infiam chu a lo hmu thei lo pek a ni chiang mai, he pa tak hi chu aw...

"Ka thu thu a ni," pakhat lah chuan a lo ti ve leh bawk a, an inkár a buai ka hlauh avàng chuan," Aw, ka pe tawh che a, i duh leh hmang la, i duh leh dah țha la, kut ka sil e," nui chung hian ka ti a, Damon-a lam chu hawiin ka mitmei chuan ka han khap ve nghâl zat a.

"Dik chiah!" awlsam zet hian Michael-a chuan a lo ti a," Min pe tawh a, ka thu thuin ka ti thei tawh," a ti leh zat a, Damon-a lâwm lo mitmeng chu ka hmu reng, an țawngkam leh awm dàn naupangchhe dùn lutuk chu ho ka va ti tak!

Haw kawngah Damon-a chu a țawng țha duh hauh lo, a thin a rim a nih loh pawhin a titau a ni ngei ang, a upat ve tawh nèn, naupangchhe chêtin a chê a, mi puitling tak leh innghahna tlâk a nih ka rin ve tawh tehlul nèn, kei ai pawhin a naupangchhia ka ti!

"Thinrim kher lo la?"

"Engah nge i biak țhat hûrh kher a?" a rawn tih chhuah tâkah chuan ka nui hak a," Ka be țha hûrh hran hleinem, a hna hmu hi ka lawmpui ve êm a ni," ka tih chuan," A lam hawiin i nui bîk a," a lo ti leh nghut a.

"Tunah pawh hei, i lam hawiin ka nuih ve tho hi," tiin a lam hawi chuan ka nui var var a, nui ve hauh lo chuan min rawn en zawk a, kawng lam en leh nghâlin," Ka thîk theih tùr tâwk chiahin i ngaihsak țhìn," a ti leh a.

He khawvêl hi chu aw, a va hahthlâk țhìn tak!

*A CHÂNG CHUAN THUTLÛKNA HO TÊ NIA KAN NGAIH HI KAN NUN PUM SÁWI DANGLAM VEKTU A NI VE FO*