☆HLWILY☆ - 24 By Dingdi Pachuau

 ☆HLWILY☆ - 24 By Dingdi Pachuau

Mahse, hetia a thîkna a tihlan chiam hian ka duhna a zual sauh țhin tlat a nih chu, min duh ve a ni tih a lantîrna ni miau hek le, min duh a ni tih hriat hi nuam ka ti hliah hliah a, thîkthu hi pe chhiain han lungawi lo lek lek angin lang mah se, a lungawi lo rei ngai chuang lo, min duh viau lo se chuan Michael-a lakah a thîkthu a chhe hauh lo ang ka ti ve tlat.

A lungawi lo thawi dam nân kan ina lêng leh rih turin ka sâwm a, eng danga min chhâng lo chuan min zui lût ve mai bawk a, ka pate an lo la meng a, an han titi hlut leh rih a, rei vak loah chuan min mutsan a, an mut hnuah a'n țawng duh lo țha leh vêl bawk a, ka thiam ang tâwk chuan ka'n thlèm ve kha, naupang titau thlèm nèn chuan a dang deuh; mahse, ka hre thiam ve tlat a, titau chung chuan a haw ta bîk lo.

Pathianniah Stite inah ka pêng a, Rinsiama chawhnu lamah a rawn lêng dâwn si a, a rawn lèn hmain titi a duh a, pèn tum vak lo ka ni nain ngen tak têa min ngen avàngin ka pêng ta a ni.

A room-a kan luh veleh chuan,"Ka inthlâk chhûngin Damon-a nèna in chanchin min han hrilh teh," a ti a, a pheikhawk chu a tlawh phelh nghâl zat a, hawi kualin,"Han hrilh tùr che pawh ka hre lo, kan la inkawp chho zël tih chu i hria a," ka lo ti thung a.

"Inneih lamte in sawi dun tawh em?" inthlâk mawlh mawlh paha a tih leh chuan," Teuh lo mai!" ka lo ti vat a, chutah," Pasal han neoh ringawt chu a... Bâkah, a la hma êm mai, kan la nula chho chauh dâwn alawm," ka ti leh a, ani erawh chuan," Chutiang a ni ringawt lo, hmeichhia phei chu kan țhat lai chhûng a rei miah lo a nia. Han ti ila, Damon-a hi chu nupui han neih thuai duh hmél a pu lo ve e, tlangvàl hi a kham har ve ngawt ang chu!" a ti leh bawrh bawrh a. Lêrh hi a ti ve si a, Damon-a thlavang han hauh deuha a lêrh vak loh thu han sawi chiam pawh chu ngai ka ti hran lo.

A inthlâk zo ka bula a rawn țhut chuan," Eng lo a nia, Rinsiama hian kumin chhûng ngeia inneih a duh thu a sawi a," a ti a, âwih lo deuh hian ka en a, a fiamthu emaw ka ti; mahse, a hmelah chuan tifiam hmel a lang hauh lo.

"I duh loh thu i sawi em?" ka tih chuan," Ka duh lo hleinem," a lo ti mai a, chiang zeta en pah hian," Pasal neih i duh tawh maw?!" ka ti hâ a, ka mit pawh ka khap lo, ka thu hriat chu mak ka ti êm a ni.

"Ka hmangaih a ni."

"Chu pawh ni se," ka lo ti vat a," I hmangaih avàng chuan pasal neih i duh ta a, hmâ i la ti lo em ni?" ka ti leh a, kei aia pasal neih hmât a tum chu mak ka ti, an inhriatna lah a la rei lo bawk si.

"Nakkum khian Maldives lamah a kal daih dâwn a," a tih chuan," Maldives a!! Eng nge a tih dâwn?" ka lo ti hû a, ani chuan," A nutei'n a rawn chah a ni àwm e, eng chena rei nge a awm dâwn a hriat si loh a," a ti leh a.

"Chuan, in inneih chuan i zui ve mai dâwn tihna maw?" ka tih leh chuan," Ni mai ang chu," a lo ti leh mai a. Ka en vang vang a, ani pawh chuan min rawn en vein," Inneih a rawt tâkah chuan kei pawhin țha maiin ka hria a, a lo haw leh theih hunah chuan ka lo senior viau tawh àwm si a," a ti leh a, a nui pah a.

Ka haw hnuah chuan Sti thil sawi chu ka ngaihtuah rauh rauh a, an tum dàn anga an awm a nih chuan kumin ngei hian ka Țhiani chuan pasal a nei dâwn tihna a ni dâwn si a, kan va inang dâwn lo tak! Ka ngai ngawt ang chu, ka hmu khât tawh dâwn asin, kan inhlat vang vang dâwn êm mai. Rinsiama hi a sual lo tùrah ngai ila, a lan dànah hi chuan Țhiani hi a duhin a hmangaih êm hi maw, Țhiani lahin pasal atân hial a lo duh ve bawk a, a làwmawm lamah ngai ang. An innei a nih chuan a dinpui tùr ka ni ngei bawk ang a...A va phùrawm si ve! 

Damon-a nèn hi chuan hetiang lam hi chu kan la sawi ngai hauh lo, tlêm lai deuha fanu fapa chungchâng a sawi kha a sawi chhuah teuh ber a la nih ka ring, inneih lo duh ve ta teh rêng pawh ni se kei hian pasal neih ka inhuam ve tawh em? Tunah hi chuan ka la inhuam thlâwt lo chiang, hna nghet pawh ka la nei lo va, pasal tùra chhûngte iai nih a hlauhawm e a. Bâkah, Damon-a hian nupui atân min duhin min hmangaih chiah ang em ka hre chiang hauh lo, tlangvâlin nula a duh ang hi chuan min duh ve ngei a ni tih chu ka hria. A, hetiang lam hi chu la ngaihtuah lo teh ang, kei pawh pasal neih ka la inhuam loh hi, ngaihtuah tùr a la tam lutuk!

Hna ka dìla ka tlin loh avàng mai chuan ka beidawng hauh lo. Newspaper ka hmuh theih chin enin hna ruak an post ka en ziah a, ka pa lahin a hmuh theih chinah min lo enpui ve bawk a; mahse, ka duh zâwng tak ka hmu fuh ngai lo. Bank hna ruak hi chu ka hmu fo, ka tihchi-ah ka ngai lo, bâkah, ka subject lâk nèn a inkaihhnawih lo nasa, ka line a ni lo chiang.

Damon-a'n a thîk avàng maiin Michael-a biak loh chu ka tum lêm lo va, ani pawhin min rawn be fo tho. A hna a zawm hnuah a hna chungchâng chu ka zâwt a, nuam a tih leh tih loh ka zâwt a ni deuh ber ang chu. Ani chuan nuam a tih ve tawh thu rawn sawiin a thlalâk a rawn thawn nghâl zat a, amahin office hran a lo nei niin, a nawm hmel reuh phian mai.

"I hman hunah rawn lêng ve rawh aw," a rawn tih chuan," A, i lal hmel sia, ka zak ang," tiin ka lo chhâng a, a rûm nghat chu ka hre pha.

"Ka bulah chuan awm la chuan ka hlap er zawk ang che maw le!" a rawn tih chuan ka nui hak hak a," Ka awm lo hlauh mai. Tak tak chuan, ka la rawn lêng ngei ngei ang, ka țhianpa hna thawhna hmun chu hmuh ve pawh a châkawm alawm," ka ti a.

"In pa kha chu rawn hruai tel lo la aw, a thîkthu a chhe si," a tih chuan ka nui leh hawk a," A ninawm, nang pawh hian a thîk theih tùr zâwng hian tilui ziah lo la, naupang chhia ang mai," ka lo ti ve zat a.

"Pawi miah lo, ka tilui zêl dâwn, lo huatpui lo la."

Kei erawh chuan,"Duh tâwk teh u, a buaithlâk thei êm mai, nge ka tlàn bosan daih zâwk dáwn che u ni," ka ti a, a lo nui hak a," Tlãn bo chhin teh a," a la rawn ti zui zat a, țha tê tê pawhin a inbiak theih loh.

Naupang an exam a, an exam lai chuan Damon-a chu a zin a, exam zawh lama zin tum a ni mah zâwk a; mahse, a tum hma ta thut a, a chhan ka zâwt lêm lo nain mak ka ti deuh, a chhan chu min zinpui kha a tum ve deuh sia; mahse, a pawi lo, keimah pawhin ka zin ve thei tho a, bákah, Sti pawhin a duh ve leh ang, ka la sâwm chhin miah lo nain zin hi chu nuam a ti ve thei si a, a nulat laia a zin tàwpna ber pawh a ni tawh maithei asin.

A zan khatnaah chuan min rawn video-call a, kâr khat bâk a zin dâwn chuang lo nain a ngaihawm ve vung vung tho ka ti. Phone-a inhmuh hi chu a ho tlat alawm, hmaichhan ngei, a tak ngeia inhmuh tluk hi a awm lo.

"Ka ngai nghâl dèr mai che," a rawn tih chuan," Mipa i nih kha, ka sawi tùr ni àwm zâwk tak a ni," ka lo ti thung a, ka ngaih thu chu ka sawi duh hauh lo, zanin pawh a rawn lang lo va, a reh ruih mai asin, bâkah, a zin thut si a, ka hre lâwk bawk si lo.

"Mipa pawhin ka ngai thei tho che alawm," a tih leh chuan," Kha lamah khân nula țha tak tak, han melh zeuh tùr an tam ang chu," nui chung hian ka ti a, ani erawh chuan," Vai nula hmel țha ang chi hi ka melh peih ve lo, ka ngaih chu Mizo nula ngei a ni," a rawn ti leh a.

"Ka rawn in-teleport mai dâwn em niang?" ka tih chuan," Theih tak tak se ka ti hle mai," a rawn ti leh mai a, a thu mai ni lovin a tak takin min ngai ve pawh a ni maithei a ni.

"Michael-a a rawn lèn chuan a fâlin lo awmpui miah suh aw," zàwi fiah tak sia a rawn tih leh chuan," Ani chu ka țhianpa a ni ka tih tawh kha, i nau a ni bawk, thîk tawh lo teh," ka ti dam diai a, a thîk hian a rilru a tihrehawm mai mai a ni, Michael-a hi țhian ang bâkin ka en hauh si lo va.

"A rawn lêng ngei ngei ang, lo mu hma daih zël rawh, ka bialnu i nih kha, tiraw? Mipa dangin an rawn rìm che hi ka duh lo a ni."

A tûk zànah chuan Michael-a chu a rawn lêng tak tak a! Min rawn hrilh lâwk thlap a, Damon-a'n thîk viau mah se lo hnial ringawt chu a tihchi bîk loh, ka hmu khât ve tawh bawk nèn, ka hmu chêr deuhin ka hria.

Ka pate nèn chuan an inkàwm a, ka nu pawh chuan a nêl khawp mai. A titipui ve bawrh bawrh nghâl a, ani hi zawng a țawng duhin fiamthu a duh bawk a, a polite êm êm bawk si, ngainat loh theih pawh a ni lo, mipa fel tak hi chu a ni ve chiang alawm. 

Kan hlim dar dar viau nain a tûk zàna Damon-a'n min rawn biak chuan a rawn lungawi lo nasa mai. A chhan ka zawh chuan,"Nizànah Michael-a a rawn lêng a ni maw? Min hrilh hauh lo va,"" a rawn ti ta chiah a. Nia, ka hrilh lêm lo, min zâwt lêm lo bawk a, nizàna min rawn biak khân a tlai ve tawh deuh a, ka hrilh loh chhan pawh ka hrilh chuan a thinrim leh ka rin vàng a ni pakhat bawk.

"Min zâwt si lo va, bâkah, i thin a rim leh ka hlau alawm," tiin dik takin ka chhâng a, ani chuan," Rim e, en la?" tiin thlalâk hi min rawn thawn a, Michael-a whatsapp status screenshot ni àwm tak a ni. Kan țhu dùn lai niin kan nui ve ve bawk, hei hi chu a rei ve deuh tawh, tuna kan school-a a la thawh laia mi daih tawh a ni nghe nghe.

"Engah nge i thlalâk a lo hman ve ngawt a?" a tih chuan,"He thlalâk hi a rei ve tawh, school-a a la thawh laia mi daih tawh kha a nia," ka lo ti ve a, thinrim sehchilh deuh nak hian," Thlalâk ai mah chuan thu ziak khân min tithinrim, zilh deuh hlak a ngai a nih kha," a ti leh a.

*Zanin chu a nuam hle mai*  Chu tê chauh chu a lo thinrimpui ve êm êm chu a ni si a, a nuihzatthlâk zâwk! Mahse, a thinrim lai kâra lo nuih chu a tihchi miah loh, Michael-a lah hian a chhaih kawlh thiam si, a thîkthu a chhèm alhsak zêl chu a nih àwm hi.

Michael-a number ka nei ve reng sia, a status chu ka hmu ve miah lo nia! Ani hi, min hide a ni hial lo maw? A u tihthinrim nân status a up tih hriat reng reng, buaithlâk thei țhìn mang e, an inkâr hi engtikah tak fel ang maw?

Naupang an exam zo a, ani pawh a rawn haw ve tawh bawk. A rawn haw zànah a rawn lêng zawk a, chu pawh lungawi lo deuh chungin, țha takin ka lo bia a, a lung a awi vak lo tih hre mah ila keimah vànga lungawi lo a nia, a thawi damtu tùr ka ni tih ka hria.

Sti chuan zin chu a lo duh ve a, kan awlsam khawp mai. A nulât laia a zin chhuah hnuhnung ber tùr nia ringin a phûr ve khawp mai, Damon-a chu ka hrilh sa lêm lo, kan chhuah hnuah ka hrilh chauh. A hre thiam lo ngei mai; mahse, min rawn vìn miah lo. Khaw chhak lam tlángdung kan han fang a, Champhaiah zan hnih kan riak a, Mizo hmun hlui hrang hrangte fangin Fârkàwnah zan khat kan riak bawk. Ka kal ngai lohna hmun a ni bawk a, hlâwk ka inti ngei mai, thla pawh kan la țeuh, Sti phei chuan video-in a cover char char. Keini chauh lo pawhin an lo tlawh ve nual a, Hla Kungpui Mual, Khawbung phei chu Zirlai ni àwm tak group hnihin an lo tlawh ve a, nuam an tiin an bengchheng ve reuh khawp mai.

Thla kan la ho a, anmahni hruaitu ni  ngeia lang an Sir chuan min be bawrh bawrh a, kan pahnih chauh pawhin thla kan la dùn nghe nghe, a țawng duh barh barh bawk a, an school hming, school  awmna vêng hming  pawh min hrilh nghe nghe a, kan vêng ațang chuan hla deuh viau mah se an school hming hrim hrim hi chu a lãr ve a, school naupang pawh an nei tam thei viau, zirna lah a chhe hran lo bawk nèn, a àwm viau a ni.

Chûng kan thlalâk chu engtin nge Damon-a chuan a lo hmuh theih ni, min rawn biain a rawn thinrim leh deuh ringawt bawk a! A va ho thei tak êm! Sti bula ka sawi chuan," Ka status a lo en a nih chiah chu, a ho e, țhen daih rawh, thîkthu a pe chhe si, a lo lérh tak zet a nih chiah hi," a ti barh barh a.

"Eng mah lovah chuan a thinrim rei lo ang, kan zin tùr kha ka hrilh lâwk duh si lo va, a lungawi lo a nih kha, a reh ve mai ang," ka ti a, a rûk tak erawh chuan a lung a awi lo tak tak ang tih chu ka hlau, chuvàngin kan thlalâkho pawh ka pho chhuak ve duh lo rêng a ni; mahse, min zinsan thut kha kei pawh ka lung a awi hran bîk lo, ka hrem ve deuh bawk a ni.

A lungawi lo kal tluang zêl ni hmiang ka ti mai, ka haw zànah pawh a rawn lang miah lo, Michael-a a rawn lang thung. Damon-a chu a thil tùr ka hawnsak ve rân a nia, pawi lo, a lungawi hunah, a rawn kal hunah ka pe chauh ang.

School kan kal bawk si lo nèn, zàna a rawn lèn loh chuan inhmuh a khât a, ka ngai vawng vawng mai; mahse, tlawn hmasatu nih ka tum lo, min rawn biak loh chuan biak hmasak ka tum lo, zînga min wish-na erawh ka chhâng lêt ve tho.

Zirtírtu hna ruak ka hmu leh ta, hei chu MPSC hnuai a ni ta thung e. Post a tam lutuk lo nain dìl ngei ka tum thung. A hlawh pawh a țha ngei dâwn, bâkah hei chu a nghet a ni dâwn bawk, a zia ka ti tak tak a ni. Khawpui chhûngah chuan thawhna a awm dâwn hauh lo tih a hriat sa reng mai a; mahse, a pawi hleinem, hmun dang daiha han thawh vea boruak hran han hip ve pawh a châkawm ve alawm, hna ruak ka hmuh ațang ringawt pawhin ka lo hisàp nasa, ka nuih a za zâwk.

A titau lungawi lo rei thei ta bîk lo a niang, a rawn lêng leh ta nge nge a, ka lo be țha hûrh lo. Ani pawh a rawn lêng ve mai mai tho a ni, a țawng țha duh lo khawp mai, min en run run reng ringawt a, kei lahin ani țawng țha duh lo vêl chu ka be țha duh bîk lo ngei a, kan ngawi rei thei vang vang khawp mai.

A haw dâwnah erawh a duhthawh leh hle si, ka han chhâng lêt duh lawk lo va, chu erawh engah mah a ngai lo kher mai, a hnu deuhah erawh kan inngaihzia leh kan inthlâkhlelhna chu kan lantîr ve ve a, kan insûm thei ta bîk lo.

Kan boruak chu a pângngai chho leh ta, chutih rual chuan Michael-a a chimawm thiam khawp mai a, Damon-a thîk tham lek lek hian engtin emaw min tih zauh a chîng a, ani Damon-a lah thin nel tak a lo ni bawk si lo nèn, kan buai leh laih țhìn a, Michael-a ka hauh lahin a sâwt chiam bawk si lo.

Written exam-ah ka tling a, interview hi chu ka huphurh lêm loh avàngin tling ve mai thei tùrah ka inngai deuh a, he ka thil tih hi Damon-a ka hrilh lo teh mial a, a hre miah lo bawk, ka tling ve ta hlauh a nih chuan ka surprise duh a ni. 

Stite chu November thla, ni 18-ah an innei dâwn ta a nih chu. A la rei deuh viau nain inbuatsaihna hun an nei rei deuh tihna a ni mai a, a țha tho alawm. Chutih laiin pasal a nei dáwn tih a lo hriatin a bialpa hlui Lawmnoa khân a rawn hêl țha leh ni àwm tak a ni, zak lo ka ti khawp mai. Stite inah pawh a kal zauh zauh a ni àwm e, Rinsiama pawhin a lo hria a; mahse, buaina êm a siam lo va, mi ang pângngai a nih ve tho avàngin an en liam tawp mai a ni awm e, Sti chu a thin a rim thei khawp mai a, ka bulah phei chuan," Police mantîr hial a nia ka duh ni, zak lo lutuk mai! A la rui deuh ziah lehnghâl a," a ti nang nang țhin.

Ka interview-ni chuan ka college kalpui țhin Nunfela ka hmu ve bawk a, ani pawhin a lo ti ve tho a lo ni a, kan phûl dùn hlut mai, Post 50 awmah interview hmachhawn tùr mi 200 dâwn kan awm a, tling tùr chuan tih țhat a ngai ve khawp dâwn a ni. A huphurh leh huphurh loh chu ka han zâwt a, a huphurh lêm loh thu min hrilh chuan bu nghat pahin ka nui sak a.

"Țha deuhin i ti dâwn nia, tling ngei ang che," tiin ka thlah a, kei aiin a lût hmasa dâwn miau si a, ani pawh chuan," Nang pawh țha deuhin le, tlin tum ve ve ang, ka rawn chhuah hunah min zawhna ka hrilh ddwn che nia," nui chung hian a ti ve a. Huphurh lutuk lêm lo mah ila ka thin chu a phu ve deuh dup dup tho chuan ka hria.

Mahse, ka rin aiin ka chhâng țha ve chuan ka hria. Zawhna min zâwt chipchiar khawp mai a, ka subject concern lam chu min zâwt nasa a, ka master-na a ni ve bawk a, ka chhâng țha viau bawk a ni.

Ni khat chu Damon-a chuan rawn tlawhtu a nei ta tlat mai. Ka hriat mi a ni lo va, a chhe vak lo tih leh a inchei nalh viau tih chiah ka lo hria. In chung lama a chhoh hnu chuan thawhpui class la lote chuan min fiam sap sap a, ka nui liam ringawt. Kan inkawp tih an hre ve vek tawh a, mi fiam an peih bawk a, kan lo inhre nêl ve tawh bawk nèn, hmeichhe lam phei chuan min fiamin zawhna min zâwt chîk thei viau a ni, kei lahin fiamthuin ka chhâng ve zêl bawk a.

Chu nu chu a rawn chhuk har khawp mai. Chhùn chawlh dáwn hnaih chuan Damon-a chu ka han text a; mahse, a phone a en lo nge ni, min rawn chhâng miah lo.

* I HRINGNUNA I HLIMNAIN A CHÎM SÀN THEIH BER LAI CHU MITE'N I THEIH LOH TÙR NIA AN SAWI I TIH LAI TAK KHÂN A NI*