☆HLWILY☆ - 25 By Dingdi Pachuau

 ☆HLWILY☆ - 25 By Dingdi Pachuau

Chawhnu lam class kan kal țan dâwn tawh tihah chuan an rawn inzui thla chu ka hmu ta a, ka hmuh dàn a laklawh êm avàng leh a hmeichhia zâwkin min rawn hmuh ve hman tho avàng chuan ka tawlh sawn nghâl vat duh bîk lo va, kal pah chuan ka en deuh reng a, Damon-a erawh chuan a phone a khawih pah avàng chuan min rawn hmu ve lo a, an chhuak dùn dâwn a ni ngei ang chu.

Chu nu chhe lo tak chu ka lam hawia a rawn nuih deuh hlek avàng chuan za vak lo leh tîm deuh hlek hian ka nuih lêt ve a; mahse, keimah min rawn nuih lêm lo a niang, a hawi sawn nghâl vat a, a rûk tak chuan ka zak chem chem mai. Damon-a chu biain a lam hawiin ani pawh chuan a nuih suk tih ka hmu leh nghâl. Ka zahna chu thinurnain a rawn thlâk a, chu pa mai mai chuh, a phone a khawih reng sia, ka message pawh min han chhâng duh lo vêl a, a châk lo ang chu!

Class ka lâk zawh hnu, office-a lêta ka phone ka han en chuan a message chu a lo awm ve ràn mai. Thinrim rilru deuh chuan ka han en a, a țhian hlui chhuahpui a tum thu min rawn hrilh a lo ni, min chhâng tlai khawhnu êm mai, ka thin a rim tawh tho tho.

Ka chhâng lêt hran lo, chhàn lêt tùr a awm lêm lo bawk a, duh leh chhuahpui daih rawh se, min râwn lo va, chhuahpui a tum thu min hrilh ve a ni mai. Nia, a thu alawm, a duh duh a chhuahpui thei, a chhuahpui ta rêng bawk, ka lo buai chiam lo ang.

Zàn lamah pawh min rawn be hmasa lo bawk a, ka be hmasa duh dèr lo. Chu achhapah, a rawn lêng lo bawk, zan tin chuan a rawn lêng hman bîk lo tih chu ka hria, phût pawh ka phût ngam lo; mahse, zanin kher hi chu ka rilrua a thawh dàn a dang ta deuh tlat, vawiin lama inlêng chhe lo deuh a neih vàng kha a ni alawm, ngaihtuah loh ka tum sateh nain thil dang ka ngaihtuah thei lo.

A țhian hlui tiin a sawi a nih kha, țhian lah hi a nei chhe lo thei si, chuta kárah a țhian hluite hi hmeichhia an ni deuh ziah bawk a, a țhian hluite lakah hi chuan ka tê chem chemin ka inhre țhin. Kei lah hian țhian tia han sawi tùr hi ka nei ve lovin ka neih ve ber Michael-a lah a thïk ziah a, hmeichhe bula a awma ka thîk ve țhinzia leh ka rilru a lo hrehawm ve theih țhinzia hi chu hre ve tùr a ni asin le, Michael-a bula ka awm ve hlek pawhin a thîk ziah a, thîkthu nei ve lovah min ngai a ni ang chu, ka nei ve tho sia.

Zàna a rawn lèn loh chu thuhran, a tûkah pawh chuan school-ah a rawn kal miah lo. Min be bawk si lo va, tukin message-a min 'Good Morning' na chiah chu min biakna a ni mai, engtizia nge maw ni le? Biak hmasak lah chu ka duh bîk si lo.

Tlai bànah Sti dàwr nghahna lamah ka pêng haw a, hmeichhia ka ni bawk a, thil awm dàn chu ka han hrilh ve a, ani lah chuan," I va thei zâwk ve! Țhian hlui tih ringawt, a bialnu hlui a ni zâwk ang, zâwt chiang rawh," a lo ti hmarh hmarh a. "A, biak hmasak ka duh hleinem," ka tih chuan," I be dâwn hleinem, i text zâwk dâwn alawm, țhian hlui tih vànga inngaihthah nghâl ringawt, ka ngaih dàn a ni miah lo," a ti leh bawrh bawrh a. Biak hmasak chu sawi loh, text hmasak pawh chu ka duh lo alawm le, zanina a rawn lan loha min rawn biak loh phawt loh chuan ka text hmasa lo ang.

Mahse, ka ngaihtuahna a rawn hre thei em maw ni tih tùrin zànah min rawn be ve ta, a țhian hlui chanchin lam chu a sawi lang hauh lo va, min ngaih thu sawiin a rawn haw veleha zanriah ei chhuahpui atân min rawn sâwm a ni deuh ber.

"Khawiah nge i awm a?" ka tih chuan,"Thil pawimawhah ka zin lawk, ka zin hmaa ka rawn hmu zawk lo che erawh ka inchhîr ta khawp mai, ka ngai riau che a nih hi," a rawn ti ta mai! Ka hawi â lo chauh a ni, khawiah tak chuan zin ni maw? Thil pawimawh a tih chu engtiang taka pawimawh nge ni ang aw?

"Nangmahin maw i zin?" ka tih leh chuan," Ni chiah lo deuh--" a la țawng lai chuan doorbell a rawn ri a, kawngka bul maia ka din sa avàng chuan," Ngawi lawk aw," ka ti leh rih a, páwn lama mi chu ka han chhàwn a, Michael-a nui var vara a lo ding chu ka hmu ta nghâl a.

"Lo lût rawh," hmui phuna ka tih chuan," Tlangvâl nèn in inbia a ni maw?" ti pahin a rawn lût nghâl a, ka nui sak ringawt, ka pain a lo hmuh chuan a lo be nghâl vat a, kei erawh chu Damon-a nèn kan inbiak laklawh êm avàng chuan țhu ve nghâl lovin ka kal sawn leh rih a.

"Eng nge a rawn tih a?" A awki a dang nghâl daih, ka hre thiam reng; mahse, ani pawh hmeichhe dang a chhuahpui ve tho alawm, Michael-a rawn lêng leh a țawng ri a lo hria chu ka lâwm lehling zâwk, kan awm dàn a inang ta chiah alawm.

"Michael-a maw? A rawn lêng ve ang chu, tlangvâĺ a ni ve alawm," ka tih chuan a rawn rûm nghut a, ka rilru chhûngril chu a nui var var mai. Michael-a chu a rawn lêng lo ang tih ka hlau rilru ta zâwk, rilru nuam lovin awm ve rawh se, kei pawh ka rilru a nuam lo ve tho alawm le.

"A bulah țhu miah suh, chuan, a lam hawiin nui bawk suh ang che," a rawn tih leh chuan,"Nui ve bawk ang chu, ka inlêng a ni alawm," ka ti ve thung a, ka chhàn dàn chu a haw ngawt ang chu; mahse, a pawi ka ti lo, ani pawhin a chhuahpuinu kha a nuih ve tho kha.

"Ka rawn haw veleh thil sawi fel tùr kan nei aw," tiin a ngawi leh phawt a, chutah, a thaw deuh hawk a," Tunah tak hian i bulah ka awm châk hlê a ni," a rawn ti leh a, chutah,"A bulah chuan țhu suh ang che," ti lehin kan inbiakna chu a titàwp ta daih a, a tih tàwp dàn teh tawp chuan min tihamhaih lek lek hial a ni.

Michael-a bula awm hi chu a hahdamthlâk ve ngawt mai. Ka nu leh pa pawh a fiamthu thawhah chuan an nui var var reng mai a, kei pawh Damon-a țhian hlui chu ka theihnghilh lek lek thei hial a ni.

Naktük chhùn chawlh laia an office-a lêng tùrin min sâwm a, ka class neih dàn ka hriat chian loh avàng chuan 'aw' ka pawh ngam chiah lo va,"Class ka neih dàn azir ni rawh se, chawhnu 1st period ka neih loh hlauh chuan a fuh thei ang a," ka ti a, 'Damon-a awm loh lai taka lèn han tum pawh chu' tiin ka ngaihtuah leh deuh bawk a.

Ka mut dâwnah Damon-a chuan min rawn be leh zawk a, min be rei lo, a țawng sehchilh nak dànah chuan a normal chiah lo a niang, he pa hian a in ve zauh zauh chu ka ring tho nain ka hnar phal chuang lo, ka rilru tinatu mai mai erawh ni lul lo se ka ti tak zet. A rui lai chu ka la hmu ngai miah lo nain a tûnlai ve êm a, a inchãwm zo bawk nèn, han tih zauh pawh nei mah se tu mahin an demin ka ring lo; mahse, ka duh dàn chu a ni hlawl lo.

A túka school ka thlen veleh chuan kan routine chu ka en a, vànneihthlâk takin chawhnu 1st chu ka nei lo hlauh mai, ka lêng thei tihna. Michael-a min rawn text-na chu ka chhâng ta nghâl a, Damon-a awm loh veleha lèn chu ka tum lâwk a ni bîk lo; mahse, hun thâwl leh remchâng ka neih a ni ve tlat.

Kawnga ka tlàn lai chuan Damon-a chu ka ngaihtuah a, Michael-ate office-ah ka lêng dâwn a ni tih hria se chuan a lung a awi lo khawp ang le, ka lêng lo leh mai dâwn em ni ang tih ka ngaihtuah thut thut a; mahse, 'êm a' ka ti leh ta a ni, ani pawh a țhian hlui nèn an chhuak dùn ve tho alawm le tiin ka inthiam chawp leh ta zâwk a, hrilh kher pawh ka tum lo.

Michael-a office chu a nuam reuh khawp mai, a awmna hmun chu a thawveng reuh a, room zau tak chu ni lo mah se a fel reuh a, a nuam a ni tawp mai. Min lo welcome țhain a nui var var reng mai a, ka tlawh thei chu a làwmzia a sawi deuh reng bawk,"I lo kal vawi khatna a ni si a, hriat reng nân selfie lawk ang," a ti a, ka inrin hman hma chuan min rawn kuahin a hmet nghâl mawlh mawlh a.

Restaurant-ah chàwl turin min chhuahpui a, a office ațanga kan chhuak chu a thawhpuite chuan an 

lo fiam sap sap a, ani lah chuan âwihawm zet hian," Lo dìm deuh teh u, in tizak palh ang e, a zah hlauh chuan a lo lêng leh duh tawh lo mai ang," a ti a, mit min siai khum sak a, ka nui ve ringawt. Ani thu sawi hi chu âwih vak chi a ni lo tih leh fiamthu a duh viau a ni tih hi an hre ve vek tawh ang chu maw.

"I duh apiang lam hmiah hmiah rawh, ka hlawh a tam ve tawh alawm," nui var var chung hian a ti a, menu chu ka lamah a rawn nawr  phei nghâl bawk a. Kei pawh chuan," Loh theih nâng, a man lama buai a ngaih loh hi chuan ei tam ve thei tak hi ka nia, inchhìr âwih miah loh," nui chung vêk hian ka ti ve a, ei tùr hming inziak thla dal chu ka en zui nghâl zat a.

Ka ei țeuh tak tak a! Kei aiin aniin a la ei tam zui a, restaurant ațanga kan chhuak chu ka duh aia ka ei tam avàng chuan ka dul chu ka zût ka zût a, chu chu min hmuh chuan," I ei tlèm nèn, zût zût teh suh," a ti sap a, kei erawh chuan," Ka puarzia hi e, an thil siam kha a tui hlawm bawk si, duh aiin ka lo bei thak deuh nèn, ka duh ai chuan ka ei tam deuh hret chu a ni," ka lo ti thung a.

Ka tlai bâng chuan Sti ka tlawh kawi leh a, nui var var chung hian," Buaina deuh i neih hi chu a hriat ve ngawt mai, min rawn tlawh ve zut a," a lo ti pek a, kei chuan," Âwihawm loh e, ka hmuh khàt che hi chuan ka ngai tlat che a, chuvàng chu alawm. Pasal min neihsan hunah phei chuan ka hmu khât tawh dâwn teh che a nia," ka ti ve thung a.

A hnua Damon-a nèna kan inbiak dàn ka hrilh chuan," A țha, Michael-a rawn lêng chu a fuh hliah hliah a nih chu, tikhân rilru buaiin awm ve rawh se," a ti a, chutah," Hrem deuh bawk ang che, a lo haw hunah a hmeichhe țhian hlui a chhuahpuinu chanchin kha chiang taka a hrilh lo che a nih chuan Michael-a ka fuihpawrh ang maw le," a ti leh bawrh bawrh a.

"Ti lo ang, an unau inkâr a chhiat tawh sa nèn, tihchhiat belh lul lo ang, bâkah, hmanrua atâna hman ka duh miah lo bawk," ka lo ti a, ani lah chuan engah mah ngai lo tih hriat tak hian," Ho mai mai, kan tihchhiat pawh ni hlei lo, amah Damon-a tihchhiat a nia, a tichhetuin siam țha leh ang hmiang," a lo ti leh mai a.

Zànah Damon-a'n min rawn phone leh a, a rawn thinrim nghâl hlur mai a. Hre thiam lo taka," Eng nge ni ta?" ka han tih chuan," Ka rawn haw nghâl, ka insiam mêk," a rawn ti bung leh nghut mai a, hmanhmawh taka a rawn haw a tum rum rum chhan chu eng tak ni ang maw?

"Min tihthinrim hi i tum ve hrim hrim a ni tiraw?" thinrim sehchilh deuh naka a rawn tih leh chuan,"Engah chuan maw? Ka va hre thiam lo, sawi chiang mai la?" ka ti ve thung a, hre thiam lo miau hek le.

"Eng nge a chhan? Emily ka chhuahpui vàng kha a ni em? Ka țhian hlui a ni ka tih mawlh mawlh kha," a rawn ti leh a, a thil sawi avàng chuan ka bo tulh tulh mai ka ti, ka hre thiam lo, engtiangin nge a thin tihrim nân ka awm a? A țhian hlui nia a sawi chu a hming Emily maw lo ni? Sâp hming nei hi a duh riau a nih àwm hi maw.

"Vawiinah Michael-a office i va tlawh a tiraw? 'Dâwt a nih chu' ti hauh suh," a rawn tih leh chuan a thinrim chhan ka hre thiam ve ta chauh. Engtin nge maw a lo 

 lehpek ni? Ka thawhpuite'n an lo hrilh a niang ti ila tuin nge maw hrilh ang le? A han kawm ngeih deuh tùr ka han ngaihtuah a, ka hre miah lo. Michael-a aia rawn thawk kha a ni thei mai ang em? Ani nèn khân an inpawh hmel ber a, a ni ngei ang chu.

"Min chhâng teh, chhàn pawh min chhâng ngam dâwn nange? Ka awm loh veleh i va tlawh a, ka thin tihrim nân hrim hrim i va tlawh a ni tiraw? I hlawhtling khawp mai, tunah tak hi chuan tualthah duh hial khawpin ka thin a rim a ni," a rawn ti leh nghut nghut mai, a thin a rim a ni tih chuan a țawng dànah pawh chuan a hai theih loh. 

"Dâwt a ni tih sawi ka tum lo, ka va tlawh miau a; mahse, i ngaih ang chu kha a ni lo aw," ka tih chuan," Eng nge ka ngaih ang chu? Ka ngaih dàn i tihna maw? Min han hrilh teh, engtin nge ka ngaih dàn chu?" a rawn ti leh ta sek sek mai. Ani min ngaih dàn tùr chu ka hre vek alawm, Michael-a a thîk avàngin amah hi kawp leh phatsan ta ang hialah min ngai ang chu!

"Min hrilh rawh, eng nge ka ngaih dàn chu?" a rawn tih leh tuarh chuan ka thin a rim ve ta deuh a," I ngaih ang khãn ka awm lo, chu chu a ni mai. Ka țhian a ni a, a office thar ka tlawh ve mai a ni, ka tlawh thei lo em ni? Nang pawh i țhian hluite'n an rawn tlawh che a, ka sawisêl em, ka thîk em, ka thin a rim em?" ka ti lêt ve ta vat a, sawi chhuah loh ka tum viau nain ka insûm thei tawh lo, engah nge a awki a rawn tihsàn viau ni?

"Emily chu ka țhian hlui a nia, thîka thinrim chhan tùr a awm hleinem," a rawn tih leh chuan," Michael-a pawh ka țhian a nia, thîka thinrim chhan tùr a awm hleinem," a tih ang chiah chuan ka ti lét ve leh, a duh leh thinrim rawh se, kei pawh ka thin a rim ve tho.

"Damn...!! Zaninah ka rawn haw dâwn leh lo!" thinrim tih hriat zeta a rawn tih leh chuan," 'Rawn haw rawh' pawh ka ti lo che," ka ti leh salh a, ka chhàn dan chu mak ka inti reuh tawp, chutiang țawngkam hman chu ka duh hauh lo asin le; mahse, ka thunun hlei thei lo a ni ber, amahin a rawn chhuak zêl tlat a ni.

A tàwp ta hmak mai, a thinrim tak zet a nih dáwn kha, a pawi hleinem, kei pawh ka thin a rim ve tho, amah chauh kha thîkthu nei leh thinrim thei a ni bîk lo va, mihring pângngai, thîkthu nei leh thinrim ve thei ka ni tih hre ve mawlh teh se.

Ka muhìl lo chiang asin, ka mutnaah chuan muhìl thei lovin ka let ka let a, kan inbiakna chu ka ngaihtuah lêt a, ka chhàn dàn kha chu dik chu ka ti bîk chiah lo, a thin a rim tih hre rengin kei pawhin ka lo thinrim khum ve a, thil țha tak chu a ni lêm lo a ni, pakhat a thinrim chuan pakhatin zaidawh takin a chhâng tùr a ni asin le.

Mahse, ka thin a rim ve êm a ni.

A hnua ka hriat leh dànin a thinrim êm êm chhan chu a office-a selfie thlalâk kha Michael-a'n a Whatsapp status-ah a lo hmang ni àwm a ni. Ka hmu ve hauh si lo va, Michael-a hian Damon-a chiah hmu thei tùrin a set pek em ni? Ka hmu lo chiang tih ka hria, nge ka number a save ve lo em ni zâwk? Mahse, ka ring chiah si lo.

A rawn haw hnuah pawh chuan naupangchhia takin, min be țha duh lo ngei a; mahse, nghal tak a ni, nghal tak, a che chimawm viau bawk. Min rawn phone zut a, ka chhànin min rawn chhâng duh ngai lo va, a ngawi vung vung ziah, chutiang ti tùr ringawt pawh chuan min rawn tibuai peih a nih chu. Zàna a rawn lènin ka nu leh pate an awm ve lai chuan țha takin, boruak pângngai vekin a bia a, a țawng a, an mut hnu kan pahnih chauha kan awm hnuah erawh a țawng duh ngai lo thung, keiin ka han be țha duh lo bawk a, a reh țha thei țhiap țhiap khawp mai.

Michael-a pawh a rawn lang ve zauh zauh a, ani hi zawng Damon-a angin a naupangchhia ve lo va, hlim lo hmel leh eng emaw boruak nei hmel pawh a pu ngai lo, rilru hahna emaw a lo nei ve a nih pawhin a tilang ngai lo, hlim hmel hi a pu reng mai a, ka awt țhin viau a ni. A unaupa nèn an inang lo lutuk leh an inmil lo viau si chu mak ka ti ru viau țhìn, bialnute hi han nei ve tawh se, aw, a bialnu chu hmeichhe vànnei tak a ni ngei ang chu.

Zan khat chu mut dâwn hnaihah phone-in min rawn be leh a, hetah hi chuan a rui chiang a ni tih ka hria, a hai theih loh, a țawng a sehchilh nasa êm mai.

"Pâwnah ka awm a, rawn chhuak lawk teh," tiin. A va tihchi loh tak! Zàn rei lam a ni ve deuh tawh a, ka nute pawh an mu tawh a, kei erawh chu zàn meng rei țhìn ngang hi ka ni a, chuvàngin ka la mu lo mai a ni.

"Eng nge i lo tih? Haw rawh, mut a hun tawh hi," ka ti a, ka țawng ring ngam lo, room phui viau mah se tûn ang huna inbiak chu a fuh tawh vak lo.

"Ka mu thei lo, ka hmuh phawt che a ngai," a rawn tih leh chuan," Engati nge i ruih a?" ka ti ve ta thung a, ani lah chuan," Ka rui hleinem, tlêm erawh chu ka lem ngei mai a," a ti a, chutah," Lo chhuak mai teh," a rawn ti leh zat a.

"Zàn a rei tawh," ka tih chuan," Ding tlaivâr turin min duh em?" a rawn ti ve thung, a va buaithlâk tak! He pa hi chu aw...

"Zàna hmeichhe chhuah chu a mawi lo, naktûkah inbe leh zâwk ang, a tlai tawh si," ka ti leh a, ani erawh chuan," I luhlul ve ngawt mai tiraw? I lawmawm reuh bawk si. Hawh, innei tawh mai ang ang," a rawn ti ta mai! 

Eng thil nge a rawn sawi hi?!! A ruih vang hi a ni ngei ang chu, a thil sawi hi a tider a nih loh chuan a ruih vànga sawi a ni ngei ang.

"Fiamthu thawh nân sawi chi a ni lo," ka tih chuan," Fiamthu thawhin min hria em ni? Ka fiamthu lo nasa, inneih chu eng nge fiamthu a nihna?" a rawn ti ve leh thung a.

"I ruih vàng a nih kha."

A nui hawk a, chutah, chiang kêk kâwk hian," A ngaihna ka hre tawh lo a ni, innei phawt ila, a dik vek mai ang," a rawn ti leh a.

*HLIMNA KAWNGKHÀR PAKHAT A INKHÀR HIAN, KAWNGKHÀR DANG A INHAWNG LEH ȚHÌN; MAHSE, CHU KAWNG KHÀR TAWH ZÂWK LAM CHU KAN EN RENG ȚHIN AVÀNGIN KAWNGKHÀR INHAWNG LAM CHU KAN HMU LO FO*