☆HLWILY☆ - 26 By Dingdi Pachuau

 ☆HLWILY☆ - 26 By Dingdi Pachuau

Chhuah chu ka duh hauh lo a; mahse, ani pawh hi a luhlul ve thawkhat a ni tih ka hriat tawh avàngin a tawpah chuan ka chhuak ta nge nge a, motor nghèng hian kàwi sàwi zetin a lo ding a.

Țawng hauh lo leh che sawn hauh lo chuan min lo en reng a, a din dàn ațang rêng chuan a rui chhe viau a nih hmel, engtin nge a car chu a khalh theih rêng rêng ni? Chêtsual a hlau eih lo a niang.

"Ka lo chhuak a, hei min hmu tawh bawk a, i haw thei tawh ang," tiin a bul deuh chiah ka thlen hma chuan ka ding ta dat a, ani erawh chuan min chhâng lém lo, min la en ngur mai.

Ka ngawih leh vang vang hnuah chuan țawng a tum ve mang bawk si lo nèn,"A tlai tawh si a, miin min hmu palh hlauh ang e, hmeichhe tân a mawi hauh si lo," ka tih leh chuan a rûm ta nghut a," Lût tawh rawh, ka thil sawi erawh kha chu lo ngaihtuah zui ang che," ti leh nghutin a car chu a hawng zui a, chêt nachâng hre lovin ka en reng ringawt. 

"Lût rawh ka tih chu, i din reng chuan i duh loh tawp thil ka ti duh mai ang," tiin min rawn en a, car kawngkhàr chu a la hawng reng a, lût lovin a la ding reng bawk a. Eng thil nge ka duh loh tawp tùr chu ni ang? Ka en leh a, a hmui pet sàwi paha a meng deuh sawr sawr ka hmuh chuan ka hre chhuak ta thut a, rang zet hian," Mangțha le," tiin ka inher ta vat a, a nui hawk ri ka la hre zui, ka biang a sa ham ham mai.

In chhûnga ka luh chuan a tlãn chhuak thãwm ka ngaichang deuh reng phawt a, ka rin aiin a tlân chhuak har. Minute 5 deuhthaw zet chu a ding leh rihin ka hria, ka phone a rawn nghawr dat a, ka en vat a, amah a lo ni, a tlân chhuak thâwmin a zui nghâl zat bawk.

*Ka ruih vànga inneih thu kha sawi ka ni lo, ka rui lo , ka rilru a fïm vek, ka hmu ta bawk che a, ka muhil thei tawh ang, muttui*  tih hi a lo ni a, a tlàn chhuah hma khân a lo type ve chiang a ni, ka nui sak a, ka hlim ru veng veng mai. Khumah chuan ka han mu thla a, nichina a thil sawi kha, 'i duh loh tawp thil' a tih khân min mutpui chungchâng a sawi chiang a ni, engtin nge chu chu a ngaihtuah theih ni? Mipa ngaihtuahnaah hian khatiang hlîr kha a awm em ni zâwk? 

Ka mut tak tak hma chuan tho lehin ka hmai ka phih leh a, night cream inhnawiha dârthlalang hmaa ka din lai chuan ka thuamhnaw hâk chu ka han en chiang a, ka inhup ta chawt mai. Hei vàng hi a lo nih chiah hi, min lo en reng chhan kha, ka kawr hâk chhah lêm lo tak hnuaiah chuan kawrhnuai ka ha hauh lo, a hre thei a ni ngei ngei ang, bâkah, ka kekawr lah chu a chhîng reuh si, a va tihchi loh tak! Min rawn phone khân ka chhuak ve ringawt a nih tak kha, kawrhnuai ka ha lo a ni tih tal chu hre lo se aw...

Mahse, a hnua kan inhmuh leh țhin hnuah pawh khami zàn chungchâng kha a them tê pawhin a sawi chhuak ngai miah lo, inneih lam pawh chu min sawipui leh tawh chuang lo, a tih tak tak kha ka ring lo rêng a ni, 'Ka rui lo' kha a ti tak nain ka ring hran lo, rui lo hai lovin awm se, inneih lam kha chu a sawi chhuak hauh lo ang le.

*******

Kum hnih zet a liam ve ta reng mai. Hun liam chak dàn hi, Theiriat Gov't Middle School-a ka thawhna pawh kum khat zén zâwn a ni ve tawh a nia, dam chuan hun hi a lo kal chak a nih chiah hi. Ka thawhnaah chuan ka kawm rual tùr thawk an awm ve lo nain kan Mathematics teacher Pu Dinga a dam țha thei lo va, a aiah a fanu Mitei a rawn kal ţhin a, chu nèn chuan kan inkàwm tâwk viau mai, kan inrual viau bawkin ka hria. Anni chu Theiriatah an awmna a rei tawh a, amah Mitei pawh hi Theiriata sei lian a ni nghe nghe, a țawng duhin a nui duh khawp mai. Kan school-ah hian hmàr lam mi pahnih kan awm a, hmàr lam mi kan nih avàngin min en hrang lo va, kan țawngkam hman leh sawi dàn inang lo zauh awm țhìn erawh chu kan nuih titamtu a ni, kan inhmuhsit leh en hniam avànga nui țhin kan ni lo tih ka chiang a, ka nêl êm êm tawh zâwk, senior hlawm viau tawh mah se an khirh hran lo va, hrehawm ka ti lêm lo.

Ka in luah ka thlen dâwn chuan chung lam aţang chuan,"U Kimkim, i lehkha tùr ni àwm tak i pheikhawk dahnaah khân ka dah a nia," Rinpuii chuan a rawn ti vau vau a," E, aw le," tiin ka chhâng lêt ve a. Rinpuii hi zawng a la naupang ve a, han au làng láng pawh hi a la zak lêm lo, ka inlêng regular a ni a, an in hnuai chiah ka luah vàng pawh hi a ni mahna a rawn kal zut țhin; mahse, tûnlai tak hi chuan test an nei hnai a, a nu leh pate'n an khap bet ve ta deuh rih zâwk a ni.

Ina ka luh hma chuan pheikhawk dahna chu hawngin lehkha chu ka la chhuak a, ka lût zui ta nghâl a. Mahnia chetla ngai lo tih takah ka in luaha ka han haw hi chuan ka khua a la har deuh tlat zêl nia. Ka nu emaw ka pa emaw min lo chhàwntu tùr an lo awm tùrah ka la ngai tlat a,  tûn thleng hian a la ni. Ka luah țahtirh lamah phei kha chuan zan tin deuhthaw kha ka nu emaw ka pa emaw khân min rawn be țhin a, ka mut hmunah ka țap ziah bawk a nih kha. Tunah chuan ka țap ngai ta bîk lo; mahse, ka pate chuan min la rawn be ziah thung, ka nuin min ngaihtuah zâwk a, chaw ka nghei mai mai hlauin ka chawhmeh leh chaw ka chhum dan tùr chu min rawn hrilh a, ka siam ngei a ni tih a hriat theih nân ka chawhmeh thlalâk chu ka thawn țhin, an tel lovin ka awm a, ka tel lovin an awm ve bawk a, kan inngaiin kan inngaihtuah tawn a ni ber ang chu.

Tlaia eirawng ka bàwl lai chuan Sti'n min rawn text a, a dam țha lo niin a rawn sawi a, min ngaih thu leh Mizorama rawn haw a châk tawh thute chu a rawn sawi tel nual a. Ani nèn hian kan inbe zut lo nain kan in-text ve deuh reng a, kan hman hun a inan chiah loh țhin avàngin inbiak lam hi chu kan uar fahran lo, an chhuk țantirh lam kha chuan kan in-video call ve zut a, a bulah a pasal Rinsiama awm tho mah se mi dang 'Eng a?' tihpui theih loh hlîr mai bula khawsak chu nuam a ti fahran lo a ni chêk ang chu, ka hre thiam reng mai. Ani țawng duh lutuk tak mai a ni a, a bulah Rinsiama a awm reng thei bîk lo ang a, Rinsiama nutei lah nu țawng tam lo tak a lo ni bawk nèn, a khua a har viau ang, ka khawngaih reuh, min ngaih tak tak pawh ka ring.

*Engati nge i dam țhat loh a? Ka va khawngaih reuh tak che êm! Ngawi teh, nang hi, i ruak lo țan dâwn te hi a ni lo maw?* tiin ka chhâng lêt a, Pelh pâr kan tùr chu ka thian pah mawlh mawlh a.

*Ni lo ang, bâkah, ka period-na a la rei lo alawm, Rinsiama lah hian,' Rai thuai la ka ti ngawt mai,' a ti ziah a; mahse, duh hun hunah a rai theih ngawt bîk si loh a* tia min rawn chhàn chuan ka nuih a tiza angreng. Nia, Rinsiama kha chuan fa neih vat a duh a nih kha, Sti erawh kha chuan a duh lêm lo, kei pawh ni ila ka duh rih ka ring lo, hmun dang daiha awm lehnghâl phei chuan ka rai duh lawk lo ngei ang.

*Pathianin hun a tih hunah in la nei mai ang, hmanhmawh vut vut hi a țha ber chuang lo*  ka ti ve a, ani pawh chuan *Dik chiah, mihring lam lo hmanhmawh ve chiam hi awmzia a awm lêm lo. E tak a, han melh deuh i nei tawh em? Ka rawn call dâwn che aw?*  a rawn ti leh a.

Awkâ ngeiin kan inbe ta thung a, a rawn dîlchhûtin min zâwt chîk khawp mai a, kei lah chuan dik tak bâkin chhàn ngaihna ka hre lo, han melh deuh ka nei lo va, ka neih theih rih pawh ka ring lo. Tlangvâlin min lo melh em tih phei chu ka hre lo hulhual, ka ngaihven lo bawk a.

"Khati khân awm reng suh, i senior mai ang, kan fate chu i fate'n an ngam lo nasa dâwn asin," nui chunga a rawn tih chuan," A pawi lo, i fate'n ka fate an awmin an la paw lâwp lâwp dáwn tihna a ni mai a," nui chung vêk hian ka ti lêt ve a, kan nui dun hawk hawk a.

Pelh pár ka kan tùr chu a thlalâk ka thawn a, a ei ve chák thu a rawn sawi thuai a," Chhim lamah i awm a, i vànnei e, Pelh pár pawh duh tâwkin i ei thei dâwn bîk a nia," a rawn ti leh sârh sârh a, kei chuan," In rawn haw hunah in rawn zin ang a, ka lo hmehpui reng dâwn che u nia," ka lo ti ve thung a.

Zanriah ei khamah chuan Rinpuii u chiah Rinchhani rawn lûtin," Zanin chu kal ve ila tiraw?" a rawn tih chuan hre thiam chiah lo deuh hian ka lo en a, chutah," Khawiah maw?" ka ti ta nghâl a, ani chuan," Ni dáwn tak! Ka va mâwl thei tak êm! Venglai YMA-in hla kan zir dâwn a, kan conductor Bva'n lo hrilh tùr chein min ti a, ka lo theihnghilh hman țêp a ni," a ti bawrh bawrh a.

He khua ka thawh ațanga a vawi khat nân YMA hla zirnaah chuan ka kal ve ta a, țhalai an lo tam khawp mai. Hmel hriat an tam ve tawh bawk a, min lo be ve liam liam hlawm a," I va ti țha ve!" an tih loh leh," Zai ring thei bawk a," tiin min fiam a, biak ina ka zai ve pawhin ka zai ring lo an ti thei lutuk a, chuvànga min fiam chu an ni. Hall chhúngah chuan YMA member hla zir tùr chu kan tlim hmur maiin ka hria, țhalai rual awm kháwm ta chu an bengchheng hlawm khawp mai a; mahse, hruaitute'n an khap daih hnu chuan thehmeh ang maiin a reh ta țhuap thung a. Kan President chuan hla zir tùr chu sawi fiahin a copy min pe diat diat hlawm a, kan indaih vek loh avàngin a țhen kan inen țâwm bawk a. Kan hla zir tùr chu ka hriat ngai pawh a ni lo, ka thiam ve hlauh chuan ka hlâwk ngawt ang chu, Aizâwlah khân YMA lamah ka in hmang ngai miah si lo, mitthi an awmin kan kal ve tawp a,  tlaivàr a ngaihin kan tlaivâr ve leh tawp  bawk a, Aizawl ka chhuahsan chu ka hlâwk dâwn khawp e.

A țantìrh zàn a ni bawk a, kan zir rei lo. In chung nula Rinchhani leh țhenawm hnai tlangvâl pahnih Vla leh Tluangate nèn kan haw tlâng a, anni hi college kal lai niin tlangvâl fel ve tak an ni. An țawng barh barh reng a, Rinchhani'n," Pa Marama hi chu a strict ve thei sia, kan thiam hma ngawtin ka ring," a tih chuan Vla chuan," Strict ve tak a ni, an inah vawi khat kan lêng ve tawh alawm, a mu duh bîk miah lo, kan lèn chhan ber pawh titipui thei lovin ama hovin kan titi tluan țhak a nih kha," nui chung hian a lo ti a. Tluanga thung chuan," In ti âwihawm loh ve ém alawm, Suzanne-i la naupanzia ngaihtuah la, tunah high school a chhuak ve deuh chauh a nia," a lo ti a.

Rinchhani chuan," A ni tak tak maw, Vl? In rîm mak ve ém bawk a nih chu a," a lo ti a, ani lah chuan," Țhiante alawm,' Lêng ang u,' an ti tlat a, ka han lènpui ve a nia, hmun danga mi ve ve an nih avàngin khawtual mi chuan ka han zui ve e ka tia, ka sim hmak tawh," nui hak hak chung hian a lo ti leh a.

Ina ka haw chuan ka nu missed call ka hmu a, phone ka keng duh lo kha a ni a, ka han phone lêt ta vat a. Hla kan zir chungchâng ka hrilh chuan," I va ti țha ve aw...!! Ni e, khatiang lamah khân i theih phawt chuan inhmang ve rawh, mahni chauha ina i awm chuan kan ngaihtuah nasa lo thei si lo che a, țhian siamna a nih bâkah tlângnèlna a ni pah bawk a nia," a rawn ti siam siam a.

*******

"Nizàn chu ka bialpa nèn kan ințhen ringawt a," Mitei'n a tih sar sar chuan ka en vat a, ani pawh chuan min lo enin a nui tãwi tak ringawt a.

"Engati maw?" tiin ka han záwt a, ani chu a thaw hak phawt a, chutah," Min lo kawp tak tak a! Duh thlang fel tùrin ka ti a, min kalsan thei lo ve ve tih a sawi teh rêng a nih chu! Ka ngaih dàn a pèl ta lutuk a, duh viau mah ila kawp nih chu tlàwmah ka la ve si a, ințhen thu ka sawipui ta ringawt a ni," a ti leh sar sar a.

A țawng duh a, a thurûk țhen țhen pawh min hrilh ve nual rêng a ni, min ring ngam ve tawp a niang chu; mahse, kei chuan ka chanchin ka hrilh ve hran lo, mi hrilh kher ka tum lo bawk. Theihnghilh vek ka duh a, ka hun kal tawh zawng zawng kha phùm bo vek ka duh êm êm bawk a; mahse, hei ka la hlawhtling thei vak rih lo chu a nih hi, chumi avàng erawh chuan mi hrilh ve kher ka tum chuang lo.

Mut hmunah chuan korean drama ka en a, mittui tla pùrin ka en a, ka inhnît fuih fuih lo chauh a ni, zîng ka thawh pawhin ka mit a bui deuh lâk mai rêng a, vûr tlangin ka han dep ve tak nain awmzia a awm vak lo chu a ni.

Mitei chu hlim tak angin lang mah se a hlim lo a ni tih chu ka hre ru ràn mai a, ka khawngaih reuh khawp mai, a chan leh ka chan chu inang ka ti a, ka khawngaih lo thei lo, a hun laia hrehawm ka tihzia leh zàn pawh ka mut theih ngai loh kha, Mitei thil tawn chuan theihnghilh ka duh êm êm ka hun kal tawh chu min hriat chhuahtîr leh uar uar a ni. Theihnghilh tumin hmun hranah, hmel hriat pakhat mah awm lohna khuaah hna thawkin ka nu leh pate pawh hmu phâk lovin ka awm phah a ni a; mahse, tunah hian ka hun kal tawh chu ka hmaah nimin ang maia chiang leh fiahin a rawn lang leh ta iar mai.

~~Flashback~~

"A pawi ka ti; mahse, tihngaihna dang a awm si lo va, hlim hmêl i put luih hrâm hrâm a ngai a ni," tiin min khawngaih hmel zet hian Sti chuan a ti sap sap a, za lo tih hriat taka nui sak chung hian ka en lët ve a, nizàn thleng pawh khân Damon-a chuan min biak chu a la tum ve char char a; mahse, ka hmu duh lo a nih kha, kan inkâr avàng chuan hlim luih harsa ka ti tak zet a ni; mahse, ka bestie Sti pasal neih ni a ni a, keimah vànga a pasal neih ni boruak nuam lo taka a hmang tùr chu ka duh bîk lo, hlim luih tumin theih tâwp chu ka chhuah ve chiang chu a ni a, eng tak ang ang maw?

Min cheitute'n min chei nalh bawk a, mawi ve viauin ka inhria, hlim hmel pu phei ila chuan ka mawi zual ngei ang chu. Sti pawh a nalh khawp mai, la damkawr hmel deuh mah se a hlim hmel chu hmuh a nuam viau, a kawr erawh a thâwl ta deuh hlek thung, siam țhat ngai a tih lêm loh avàng chuan a nih ang angin a ha chhuak tawp mai a ni. Kei erawh chuan ka siam țhattîr thung, thâwl deuha hâk a dik ve thei si lo va.

Tluang takin kan zo ve thei mai, kei pawhin ka tum ve bawk a, hrehawm ti lutuk lovin ka tlingtla ve thei a, ka lâwm khawp mai. Michael-a a rawn kal ve a, min ngaihtuah khawp mai; mahse, ngaihtuah ka ngaih loh thu chu ka hrilh ve a, hlat erawh min hlatsan lo khawp mai, thla pawh kan lâk dun ve nghe nghe kha.

November thlaa inneih tum kha an ni a; mahse, an inneih hma kár ațanga Sti a dam loh avàngin an sawn hla ta ringawt kha a ni a, damdawi inah lûtin a awm rei zêk lehnghâl, Rinsiama nèn kan riahpui zak zak mai a, Damon-a leh Michael-a'n an rawn kan ve zauh zauh bawk.

Michael-a rawn kal zauh zauh hi a hre ve si a, chu chu a thîk lehpek ta a, bâkah, Rinsiama leh Sti enkawltu doctor fai ser sawr zet chu a thîk pah bawk a, a buaithlâk a ni, a thîkthu chhe lutuk hi a buai phah fo chu a nih hi. Michael-a lah hian a thîk a ni tih hre rànin Damon-a thîk theih dàn tur ngei chuan a che salh zêl bawk a, ka hauh phah ve fo bawk. Kawm tawh lohah te ka han vau fiam ve țhin a, a nui liam mai mai, engah mah a ngai teuh lo. Fiamthu hian," Min thîk pawh hi a àwm viau a ni, mipa chuan mipa chezia ațang hian thil tam tak kan hre thei si a," a ti mai a, a sawi awmzia chu ka hre lo, hriat pawh ka tum hran lo bawk.

Damon-a nèna kan buai țanna bul ber chu, School-ah a bialnu hlui Elena-i kha a rawn lêng a, a rawn lenchilh a ni tih ka lo hre miah lo va, chhùn chawlh dâwnah kan school naupang pakhat chanchin sawipui tùra hmuh tuma ka han chho chu, Elena-i nèna an lo infâwp chu ka hmu ta a. Kawngka a inhawng huai mai si a, hmuh tum loh deuhin ka han hmu a ni, min hmuh ka hlauhzia mai chuh!! Chêt sawn ka tum a, ka ke lah chuan zung a kaih ta emaw tih tùrin ka chêt sawn thei miah lo. Chutah, Elena-i aw ngei maiin," Ka pum chhûnga naute pawh hian a pa a hmu ve châk tawh ngawt ang chu," nui har har chunga a tih chuan ka harh chhuak thut a, rang zetin ka kal sawn ta nghâl a.

Bumin ka lo awm reng a nih chu. An lo la inkawp reng a ni, a hriat vek alawm, inkawp lo se, khatiang khân... naute chungchângte kha... Ka âwm chu ka dawm a, ka kaihza thâ khùr dar dar avàng chuan bang nghèngin  ka ding leh rih a, ka bengah chuan Elena-i thil sawi ri hlîr mai chu a ri nawn tlut tlut mai a, tihreh tumin ka beng chu ka han hup ngawt a, a reh thei chuang si lo, ka han maimichhîng leh a, chiang leh fiah zetin an infáwp lai chu ka hmu leh bawk si, au nghek nghek mai ka va han châk tak!

Rilru fîm put ka tum hrâm hrâm  a, engtin nge chawhnu pum chu pângngai taka ka awm tluan theih aw ka ti hial a ni, a tûk Inrinni a ni chu a làwmawm zual. Hmuh ka châk lo, khati chen min lo bum duhtu hmêl kha hmuh leh ka duh tawh rih lo.

Ka awm dàn pângngai taka awm ka tum viau asin; mahse, ka nu leh pate chuan an lo hai lo nasa, chaw ka ei thei lo va, eng mah ei châkna ka nei lo a ni ber, zànah ni se ka mu thei miah lo bawk, ka thinlung chu a na ngawih ngawih a, kum kha leh chen ațanga ka lo duh ngawih ngawih leh mipa dang rêng rêng ka ngaihtuah theih lohna chhan mipa, ka kawp lai rengin min kawp lai renga a bialnu hlui a lo hmu ru reng chuan min tina tak zet a ni, a fa hial a la pai zui, eng nge tih theih ka neih? Ka tlâwm hluah hluahin ka hriat bâkah ka zak ngawih ngawih bawk. Thawhpuite'n an hriat hunah phei chuan, ka ngaihtuah thui ngam lo, hetiang tùr a ni tih lo hria ila chuan a kawp theihin ka awm hauh lo tùr hi a nia; mahse... tuin nge hmalama thil lo thleng tur hre thei ngai le?

Ka nu leh pain ka awm dàn ațanga min rinhlelh avàngin thil awmzia min záwt a, chuta țang chiah chuan ka țap chhuak thei, a hma zawng kha chuan ka țap thei lo va, ka thin hi a na ngawt ngawt ringawt mai a ni, awm ngaihna hre lovin ka bîng mup mup a, a hrehawm tak zet a ni; mahse, ka țah chhuah theih ațang chuan tlêmin ka zia chho ta a, thil ei erawh ka thei chuang lo, ka mittui a tla deuh reng a, zànah ni se ka mu thei chuang lo va, ka tân chuan chhùn leh zanin awmzia a nei lo a ni ber ang chu.

Ka awm dàn a mumal loh avàng chuan damdawi in hial ka thleng a, school kal thei ziazâng ka nih loh avàng chuan ka chàwl tawp mai. Sti damdawi in ațanga a chhuahna a la rei fahran lo va, in lama inenkawl deuh rih a ngaih avàngin inneihna pawh Kum tharah an sawn ringawt rêng a ni, chutah, kei damdawi in lamah ka han lût ve leh ta bawk a, kan boruak chu a buai nuai a nih ber chu.

Damon-a call ka chhâng ngai lo va, a text pawh ka en ngai lo. A hnuah phei chuan phone chu ka off daih nghe nghe a, damdawi inah a rawn kal ve tih erawh ka hria; mahse, ka lo hmu duh lo va, hmuh châkna ka nei lo bawk. Min tina êm a, ka hmuh hi a phûin ka hre thei lo a ni, bâkah, enga tân nge min hmuh a la rawn tum ni? Engkim a tawp tawh, a tàwp vek tawh. A bialnu hlui a rai a, a fa ngei paiin an infâwp lai ka hmu a, chu bâk bâk, ka lakah a rinawm zo lo va, chu chu rawn insawi fiah a tum ang maw? Ka mit ngeiin ka hmu a, ka bengin ka hre bawk, hmua hretu kha tu mit leh tu beng mah a ni lo, ka mit leh ka beng ngei a ni, ka hmu sualin ka hre sual lo tih ka chiang ve êm!

Michael-a a rawn lang a, ani hi zawng engkima min hre thiamtu ngang hi a ni a, ka awm dàn ațangin thil awmzia a hre ruak a niang, min rawn riahpui a, thil awmzia erawh vawi khat mah min zâwt lo, ei tùr țha leh ka ei theih tùr a rawn keng țeuh a, damdawi ina ka awm chhûng, kár khat chhûng chu min riahpui tluan țhak a ni. Sti erawhin min rawn kan ve hrâm a, chu pawh ka chhuah hnu ina ka awm tawh hnuah a ni, a la damkawr ve si a, ka khawngaih ve leh chhâwng, a chêr reuh lutuk a.

Ka pain kan principal hnênah thil awmzia hrilhin ani pawhin min lo hre thiam viau mai a, ka kal loh chhûng atâna thawktu tùr erawh an inbiak dan ka hre lo, ka pa ka zâwt si lo va. Ani lahin eng mah min hrilh lo; mahse, a hnuah erawh bànna a lo va theh lût fel diam tawh tih ka nu hnên ațangin ka hre ve ta thung a, pawi pawh ka ti lo, buaina tùr ka nei tawh lo ve, a fanu duat kha ka ni miau mai si a, Damon-a bula thawh chu a phal tawh lo bur a ni ber ang chu.

Stite inneih hma daih zàna Damon-a nèn kan inhmuh khân fiah takin thil awmzia chu ka hrilh a, ka hmuh chiana ka hriat chian êm vàng ka ti mai, a insawi fiah miah lo va, a sawi chhun chu," Ka thu sawi ngaithla ve la?" tih leh ," Min ring thei lo maw?", "Min kalsan hlen i tum tak tak maw?" tih chauh a ni. Ka kalsan thei lovin a ring a ni ngei ang chu, ni e, ka duhzia a hria a,  chuvàng chuan ka kalsan theih a ring lo a niang, chuvàng rêng chuan min lo kawp bawk a ni.

Ka sawi hmaih țêp, MPSC hnuaia zirtîrtu hna lâknaah khân vànneihthlâk takin ka tling ve hlauh mai a, kum thar session thar ațangin  țan tùr a ni a, Aizawl khaw chhûng ni chiah lova thawh ka duh ang ngeiin Lunglei district -ah daih ka awm dâwn bawk, pawi ka ti lo nasa. Aizawl hi chu Damon-a nèn kan tân a zîm lutuk a, chhuahsan vang vang ka duh.

Ka nu leh pa chuan min ngaihtuah êm êm reng a; mahse, keimahin ka tum ve êm a, Aizawl chhuahsanna remchâng a ni ve bawk nèn, ka tum tlang a, anni pawhin tumruhna rilru ka nei thei chu min lawmpui khawp mai a; mahse, nu leh pa rilru an put miau avàngin min ngaihtuah êm êm tho.

Min thlah thlap a, ka in luah tur chenin min tihfelsak vek. Mahniin ka ti thei ve tih ka hrilh pawhin," Hei chauh hi," an ti tlat a, min ngaihtuah vàng a ni tih hriain ka hnial ta lo. Kâr khat dâwn min awmpui hnuah an haw phei ta chauh a, ka khua a har rak rak asin aw...

Damon-a lam hawi thil rêng rêng ka ngaihtuah duh lo va, ka ngaihtuah dâwna ka hriat chuan tih tùr ka zawng vat țhin a, games ka khèl a, film ka en a, lehkhabu ka chhiar bawk a, in chung tleirãwl Rinpuii a lo lêng ve țhin bawk nen, ka zia khawp mai, ngaihtuah loh ka tum tlat avàng chuan hlawhtling ve viauin ka inhre țhin; mahse, zàn mut hun erawh hi chu hrehawm ka ti thlâwt a ni, zàn mut hun awm lo se aw tiin ka ngaihtuah phah hial a ni.

~~End of Flashback~~

Inrinni a ni a, Mitei nèn Lungleiah kan zu kal ve mai mai a, ka chhuah ngai loh êm avàngin nimin lama min sàwm pawh khân ka hnial duh lo rêng a, karin aiin nuam ka ti ta phian zui a. Bazârahte kalin dàwr hrang hrangah min luh kualpui a, tlereuh dàwra min luhpui lehin," Hawh, bengbeh en ang," a ti a, kei pawh chuan ka enpui ve nghâl mai bawk a.

Bengbeh pathum lai a lei a, a chhan ka zawh chuan," A, kan țhenawma naupang pathumin min chah miau si a," a ti mai a, a bengbeh lei chu naupang beh mai mai atân chuan to ka lo ti ru khawp mai a; mahse, ka sawi chhuak ta lo. A pawisa a nia, a duh duh a lei thei alawm.

Kan chhuak dáwn chiah tihah chuan kan piah chiah dàwr ațanga aw rawn chhuakin," Ranngo ka rawn zawng ve bawk ang chu," a tih avàng chuan ka ding deuh chawt mai. He aw chhuak hi chu khawiah pawh awm mah ila ka hai thei ngai lo ang, tu aw nge tih hre tùrin a hmel ka hmuh kher a ngai lo, hmân ațanga ka lo hriat bel êm êm tawh 'aw' kha a ni miau mai si a.

"Eng thil nge ni ta?" Mitei'n a rawn tih chuan ka harh chhuak ta vat a, a kuta chelhsak vatin," Ih, khuta pheikhawk kan enna dàwrah khân kal leh lawk ang," tiin ka pawt nghâl dàwr dáwr a, kan piah chiaha dàwra mi chuan min rawn hmu ang tih ka hlau a ni, kei pawhin hmuh ka hlau, hmuh ka duh lo, ka thin chu a va phu nasa tak êm! Ka thâ pawh a khùr dar dar mai.

*HRINGNUN KAWNG CHHUK CHHO HI HRIAT THIAM PHÂK BÂK A NI, KHAWI HMUNAH NGE A HRUAI DÂWN CHE TIH LEH KHAWIAH NGE A TÀWP DÂWN TIH I HRE HAUH LO*