☆HLWILY☆ - 27 By Dingdi Pachuau

 ☆HLWILY☆ - 27 By Dingdi Pachuau

Rei ve angreng tak ka en kual hnuah Secondhand sneakers pakhat ka lei ta ringawt mai, Damon-a aw ka hriat vàng vek a ni, ka tha khùr leh ka thin phu nasa lutuk a reh deuh tâk hnu chuan kan chhuak leh ta a, rilru erawh a nuam duh fahran lo khawp mai, ka hmu ang tih hlauvin ka hawi kual ru deuh reng a; mahse, ka hmu ta bîk êm lo ve.

Kan ril a țàm avàng chuan Classic-ah kan chàwl a, ei tùr kan order țeuh mai. Lunglei kal a khât ve si a tiin kal chhunah kan ei nghek mai ang chu kan ti a, Damon-a ka hmuh ka ring chiah lo bawk nèn, hlauhthàwnna rilru dah bovin hlim takin kan titi barh barh a. A bialpa hluiin a rawn message dànte chu min hrilhin," Min rawn beisei leh nasa, a rin aiin min lo ngai ve daih pawh a ni maithei a ni; mahse, kawp nih kha ka duh lo hrim hrim a, ka chhâng ngai chuang lo, a rûk tak chuan chhàn ka châk thei a nia," a ti barh barh a.

A dinhmun hi ka hriat thiampui a, ka khawngaih reuh khawp mai. Kei pawhin ka lo tawng silawng ve deuh tawh bawk nèn, a hrehawm dàn tùr chu ka hria; mahse, hnem dàn tùr erawh ka hre chuang lo, hun hian a la hnèm ve mai ang, a tâna Pathianin a ruatsak a nih chuan an ințhen hlen chuang nâng.

"A duh tak tak che a nih chuan, a inchhìr tak tak a nih chuan ka tihna, chàn hlen che a phal hauh lo ang, hun hi han liamin han nghâk deuh phawt la, a hriat mai ang," ka lo ti ve a, chutiang bãk chuan sawipui ngaihna ka hre lo, ka ngaih dàn dik tak ka sawi chhuak ve rêng bawk a ni.

Kan ei tùr kan ei zo țêp tawh ang tihah chuan," Ka hmel hriat hlui ka hmu tlat mai," a ti sap a, kan piah lam chu a hawi pah bawk a, ka hawi ve zawk nain tlangvâl pahnih rawn inzui ka hmuh chuan ka hawi lêt leh nghâl vat a, tunah tak hi chuan ka 'hmel hriat țhin' kha ka hmu ang tih ka hlau, chuvàngin ka hawi duh vak lo.

An inbe ta chiah a, kei erawh chuan ka ei tùr chu ka lo ei mial mial thung. Chu pa chuan," Theiriatah em ni i la awm char char a?" a rawn ti a, Mitei chuan," Niang chu, kan khua a ni miau a," tiin nui chung hian a chhâng a, chu pa pawh chuan,"Ni ve tho mai, i tawm char char țhìn a niang maw? Ka hmu khât êm mai che," a ti leh a, Mitei chuan," Aw, tawm a ni mai ang chu, ka pa dam țhat loh avàngin a ai ka school țhin a," a ti leh a, ka phone-a message a rawn thlen avàngin an inbiakna chu ka ngaithla chhunzawm ta lo, Sti message chu ka chhâng ta daih a.

A lo rai ve țan niin, ka lawmpui khawp mai, a bîk takin Rinsiama ka lawmpui zual a, a chhan chu naute a awt ve si a, ani kha chuan neih thuai kha a duh a nih kha, tunah zawng pa a ni ve dâwn ta si a, a hlim ngawt ang chu. Kan in-text ta reng a, Mitei'n," A hlimawm viau a nih ka ring, i hlim hmel êm mai," a rawn tih chuan ka en vat a, a hmel hriatpa kha a lo awm hnai tawh miah lo.

"Aw, thu làwmawm lam a nia," ti pahin ka nui sak a," Ka țhiannu ka kawm ber țhinin nau a pai ve țan a, min rawn hrilh a," ka ti a, ani pawh chuan," A nih tak chu, an inneihna a rei tawh em?" a lo ti ve vat a, kei chuan," Rei ve deuh tawh tho mai, inneihnaa ka dinpui a ni nghe nghe a," ka ti a.

"An lawmpuiawm a nih chu, an innei rei ve deuh tawh tho sia, bâkah, hmeichhe tân hian rai vat loh chuan ngaihțhat loh a awl duh ngawt ang, rai duh rih loh vànga damdawi an ei a nih ngawt loh chuan," a ti leh barh barh a, kan ei zo ta thuai a, thovin ei man kan pe a, kan chhuak ta nghâl a.

Zanriah ei khamah chuan Rinpuii a rawn lang zawk a, inkhâwm tùra ka insiam lai a ni a," Lo awm rawh, ka'n insiam lawk ang e," ka ti a, room-ah chuan ka luhsan a, rei pawh ka insiam lo, ka chhuah leh chuan," U Kimkim, tlangvâl inlêng hi i nei ngai lovin ka hria, bialpa i nei lo em ni?" a lo ti a.

"Nei nâng, kei chu min duhtu pawh ka hmu zo ve lo va," nui chung hian ka ti a, ani erawh chuan," A, duhtu che chu ka hre reng, an sawi țhin che a, lo lèn pawh an duh țhin; mahse, an zak a," a ti leh a, ka nui chhuak ta hak hak a. 

A ni ve lah tak a, tlangvâl inlêng hi ka nei ngai lo khawp mai. Min nèl loh vàng nge, kei hian ka hawi loh hrim hrim vàng ni ang ka ti ve țhin, pawi ka ti teh chiam lo nain nula tân chuan a zahthlâk ve deuhna lai a awm ve a, hetia Rinpuii'n a sawi chhuah tãkah hi chuan ka thiam loh a nih ka ring deuh ta rum rum mai.

Inkhâwm hi ka ngaipawimawh ve a, Inrinni zàn, Chawlhni leh zàn hi chu ka inkhâwm ve ziah ang a ni, in chung nula nèn hian kan inzui mai a, ani lah hi tlangvâl ngaihtuah lo chi a lo ni ve bawk nèn, kan ngaihtuahawm dùn nge ngaihtuahawm lo dùn pawh ka hre thiam lo, senior over tak tak hma hian tlangvâlho hian min hlau dùn mai ang tih pawh ka hlau hlel lo ve.

Chawlhni zàna kan inkhâwm bâng ka ina ka lût deuh chiah tihah chuan ka kawngkhàr chu a rawn ri koh koh a, Rinpuii a ni leh pek ang chu,"Rinpui, lo lût mai mai teh," nui chung chuan ka ti a, ka la inthlâk lo nain ka kawr chung zâwk chu ka phelh tawh a, ka in chhûnga rawn lût zân zân ka hmuh tâkah chuan ka nui tàwp chiang khawp mai, hetah eng nge a lo tih?! Engtin nge ka awmna a hriat?!! Ka hmuh hnuhnun ber ai kha chuan a lo chêr deuh tawh a nih hi, a biang pawh hmulin a bawh deuh a, a sam pawh a lo sei deuh tawh bawk. A lang bawrchhawr lek lek a; mahse, a lang 'pà' ka ti leh tlat thung, bâkah, pa a ni ve tawh bawk a, a intuaihnûm peih tawh lo a niang. 

"Eng nge i lo tih!!" Biak ka tum lo asin le; mahse, ka tum loh deuhin ka țawng chhuak hmasa zâwk ta tlat a nih si hi. Ani lah chuan," Min en reng dáwn nge kan țhu dâwn?" a lo ti daih thung a, a la ding reng lah tak a, kei lahin mit tla lek lekin ka lo en reng bawk nèn, ka zak hnuhnawh dâwn dâwn a; mahse, zahna lam chu dah țhain ka hawi sawn a, ka rilru siamin amah bawk chu ka en leh a.

"Eng nge i lo tih tih kha ka zâwt chein ka hria," ka ti ta sak a, ka aw chu a ring hran lo, țhu duh lo chuan ka ding reng a, ka inkuangkuah thãn bawk, hawi sawn duh lo chuan luhlul tak hian ka en ngar a.

"Ka lo lêng maw le," a lo ti mai a, chutah, a hawi kual a," A nawm reuh hi le," tiin, a hnuah chuan long chair-ah chuan a țhu thla ta a; mahse, keimah min rawn ep zâwng tak chuan a țhu thung a, chutah, "Zawn hmuh che i har hle mai," a rawn ti chhuak leh sup a.

Hah, min zawng maw? Eng atân maw? A dâwt thu sawi âwih turin maw? Ni lo ve, tunah chuan nula tleirãwl ve tê mai, amah âtchilh tlattu, mãwl tak leh a bula eng mah sawisêl ngam lo țhin kha ka ni tawh lo, tunah chuan ka lo upa ve deuh tain ka rilru pawh a nêm tawh bîk lo va, dâwt thu âwih rual pawh ka ni tawh lo bawk.

"Țhu rawh, 'ngah nge i din uaih reng a? Inlêng zâwk pawh ka țhut tawh hi," a rawn tih leh chuan," Eng nge i lo tih dâwn?" ka ti țha leh a, ka țhu chuang lo va, ka che sawn hek lo. Ani pawh chuan che lovin ngawi rengin min rawn en leh vung vung a, ni dang chu ni se chuan ka lai leh tawh ngawt ang chu, chhûngril taka nuam ti deuhin leh lai deuh siin ka awm leh ngei ang; mahse, tunah chuan a dang tawh, nat ka tum tawh lo.

"Chance dang min pe rawh."

Ka nui hak a, maimichhîngin ka lu ka thing nak bawk, a huaisen ka ti a ni. A dâwt sawi, a insawi fiahna zozaite kha, ka thaw hak a, chutah, meng chhuakin,"Na taka min siamtu hian chance dang ka pêk che i phût maw? Eng angin nge min hmuh a?" ka ti chhuak hlawl mai a, ka thin a rim avàng chuan ka țawng pawh a sehchilh deuh hlek a, ani pawh hian a hre ngei ang chu.

"Engati nge min rin loh? Ka bialnu duh tak--" a țawng lai mêk chuan," I bialnu ka ni tawh lo, i bialnu hlui chu ka ni mahna le," tiin ka lo inrawlh vat a, a bulah hian țawngkam mawihnai deuh pawh ka hmang thei meuh lo chu a nih hi. Ani pawh chuan țawng chhunzawm tawh  lo chuan min en ta ngur a, mak min ti ve deuh pawh a ni mahna.

A hnu deuhah chuan," Min rinna chhe tê pawh i nei lo tihna a lo ni a," a ti leh sup a, kei chuan," Rin che maw? Chu chuan eng thil nge min thlen i hria em? Natna chauh min thlen a ni, ni e, ka ring che, ka ring țhin che; mahse, kha ka rinna che khân natna chauh min thlen, ka rin êm êm lai che khân nang chuan kha ka rinna che  kha tichhiain..." tiin, sawi zo duh lo chuan ka ngawi ta daih a, khatih hun laia ka rilru natna kha a rawn lêt leh a, chu chu duh lo chuan ka hmui chu ka pet fan fan a.

"Kimkim, min rin leh theih nân eng thil nge ti tùra min duh?" 

"Eng thil mah, ka rinna che i tichhe vek tawh a, chuvàngin eng thil mah ti suh, ka ring leh thei tawh lo ang che," ka tih leh chuan min en vung vung a, a hmel ațang chuan eng nge a ngaihtuah ka hre thei lo, a mitmeng mawi ka tih êm êm țhin chuan ngun zetin min en reng a, a mawi ngaiin la mawi reng mah se tunah chuan bumtu mitmeng mawi satliah mai a ni tawh.

A rawn ding chhuak a, ka lam pana a rawn kal chuan," Min rawn hnaih suh," ka lo ti țhat a, ani pawh a ding chiang khawp mai, a kut pharin,"Ka khawih dâwn lo che," a ti phawt a, chutah," Bialpa i la nei lo tih ka hria, chuvàngin, chance dang min pe leh tùrin ka duh mai che a ni, min rinna chhe vek tawh kha ka siam țha leh vek ang, eng thil pawh tih ngai se," a ti leh a.

q"I tum thlàwn dâwn tihna a nih chu," hul haka ka tih leh chuan," Ka tum ang a, kan hria ang chu, ka tum phawt chuan ka ti thei tih ka chiang a ni," mahni inrintâwk hmel zet hian a ti a, a mitmenga tumruhna chu ka hmu thei nghâl bawk. Ka chhâng tawh lo, a duh leh tum se, keia lo sawi tùr a awm tawh lo ve, a thu thu alawm.

Mut hmunah chuan ka awm dàn chu ka ngaihtuah lêt a, awm dàn mawi tak chu a ni lo chiang alawm; mahse, ka han hmuh chiah khân ka natna kha a rawn lêt leh tlat mai si a, a na thei ang bera lo chhàn zêl duhna kha ka nei tlat a ni, ani pawh khân mak min ti ang, nia, ka mak tawh alawm, ka puitling ve tak tak tawh a, kum 30 ka tling ve țêp tawh nghe nghe.

A zak lo hi ka ti ve hrim hrim, fa a nei tawh a, chu pawh min kawp lai rengin a bialnu hlui lakah min rinawm lohsan a nia. Hmeichhia a hmuh rêng rêng a hmeichhe țhiante angin a sawi zêl a, țhiante ni na nâ nâ chu tiin ka thîk viau pawhin ka tilang ngai lo va, hrilh pawh ka hrilh ngai lo a nih kha, ani ve hian mipa ka biak leh ka kawm ve ber Michael-a, a unaupa ngawih ngawih pawh a thîk hluah hluah țhìn a nia, ka lo va khawngaihthlâk tak!

Mahse, tunah chuan a ni tawh lo. A duh duh chu kàwmin hmu se, kawp se, mutpui se, fa hial pawh paitîr zêl rawh se, ka na tawh lo ang, na leh chuang tùr ka awm tawh lo, ka thinlung a tikeh darh chhe vek tawh tlat a, han nat leh chuan ngaihna ka hre tawh lo.

Michael-a'n min rawn text a, ani nèn hi chuan kan la inbe reng a, kan boruak a hriat țantirhah phei kha chuan Damon-a nèn pawh an insual phah hial a ni, ka tân liau liau a lo hnek a ni àwm e. Min ngaihtuahin min hauh ve a, ngainat pawh ka ngaina rêng a ni. Ka rilru nat ber lai pawhin min hnèm a, ka tân a awm reng țhin, hmun danga hna ka thawk tùr kha min ngaihtuah hle mai a, mahni chauh lehnghâl chuan min ngaihtuahin ka awm thei lo ang tih a hlau a ni; mahse, ka tum luih tlat avàng khân min thlah ve ta hrâm a nih kha. Inthlahrung tak khân min hmangaih thu kha min hrilh a, Damon-a vànga ka nat êm avànga min hnemna atâna min hrilh mai a nih kha ka ring a; mahse, a lo ni lo va, ka khawngaih roh khawp mai. Kei chuan țhian ang bâkin ka en thei si lo va, ka thinlung hi mi dang tân ka hlàn tawh tlat si a ni,  ka tidanglam thei lo. A unaupa lâk tlâk loh zet mai tân ka thinlung ka lo serh hrang tlat tawh a, mi dang ka hlàn thei tawh lo. A châng chuan mãwlmang takin 'Michael-a hian min ngaihtuahin min hmangaih a, engati nge ka chhàn mai loh ang' tiin ka ngaihtuah a; mahse, thil dik a ni thei bawk si lo, ka tina mai mai ang a, a nat bâkah kei ngei pawh ka na tel tho ang a, kan hlim chuang lo ang tih ka hre tlat a ni, hmangaihnaah hi zawng, mi pahnih inkâr a pawimawh si a.

*Lungleiah ka rawn kal thut maithei a ni*  tia a message ka chhiar chuan ka nui sak a, rawn phei thei hlauh se ka ti kher mai, inhmuhna a rei ve leh deuh tawh a, inhmuh a châkawm ve leh tawh tlat. Min hmangaih thu min hrilh avàng mai khân ka be hreh chuang lo va, ka kawm hreh phah chuang lo, ani lahin ka chhàn loh avàng khân min kawm hreh phah chuang lo bawk a, kan la inbe char char tho, kan inbiaka kan titi rêng rêng hian Damon-a rim nam lam rêng rêng hi kan sawi chhuak ngai miah lo thung a, ani pawhin min hmangaih thu chu vawi khat a sawi bâk kha a sawi lang leh tawh chuang lo.

*Lo kal thei thut la*  tiin ka thawn lêt ve a, ani pawh chuan  *Naktûkah khian a chiang thei chauh ang, ka rawn phei theih hlauh chuan ka rawn tlawh ngei ngei ang che, hun chêp tak kârah pawh ni se*  a rawn ti leh a, rawn phei thei tak tak se ka ti tak zet a ni. Zanina Damon-a rawn kal thu hi hrilh chhin zauh ila mak a ti ve ngawt ang chu, a thin a rim ngei pawhin ka ring, a unaupa mah ni se a haw ve hlê si a.

*Tlawh lo thei nâng, Boss ka nih hi*  ka tih chuan nui lem tam tâwk hi a rawn thawn a, kei pawh ka nui ve sûng mai, Damon-a vànga ka thinrimnate chu Michael-a chuan a tibo leh țan deuh dèr mai. A bula awm leh kha a thlâkhlelhawm ve hrim hrim bawk, hlim loh ber lai pawhin kan nui vur vur ziah a nih kha.

A tûka school ka kal, Office-a ka luh chuan Mitei chuan min lo hnaih vatin," Nizàn khân i țhianpa khân a rawn tlawh che em?" a lo ti nghâl vat a, en deuh hâ hian," Tu ka țhianpa maw?" tiin ka zâwt lêt zat a, ka bag chu ka dawhkànah chuan ka dah nghâl a.

"A hming ka hre lo, Inrinni pawh khân  Classic-ah khân a rawn chàwl tel ve nghe nghe, ka hmel hriat ka biak Hmudikate nèn khân an nia, nizàn khân Hmudikate nèn chuan an rawn lêng a," a tih leh chuan Damon-a a sawina a ni tih ka hria. Classic-a kan chawlh lai khân a rawn chàwl ve tih chu ka lo hre hauh lo, min hmu tihna a ni ngei ang, chu pa mai mai chuh, Mitei hnên ațang hian ka awmna pawh a hria a ni ngei ang.

"E, Damon-a kha a nih dâwn chu, Aizawl lam mi hmel hriat hlui ve tho a nia," awlsam zet hian ka lo ti mai a, engah mah ngaih loh hmel takin ka awm lui a ni. Mitei chuan," A hming ka hre lo, a hria che kha mak ka ti lutuk a, i bialpa hlui emaw nangmah star-tu che emaw a nih ka lo ring a," rawn thle hnai deuh pah hian a rawn ti sar sar a, a nui sâng  pah bawk a.

"Hmel hriat hlui satliah mai mai," ka lo ti thung a, Damon-a chuan hria se chuan a duh lo ve khawp ang le, a indah sâng ve thei nasa mai si a.

"Tlangvâl senior ve lam chu a nih tawh àwm kha; mahse, amah kha a changkâng ka ti, a hmel pawh a chhe lo, a la pà tel zui a," nui kar kar chung hian a ti leh a, mi dang an rawn luh ve tâk avàng chuan a sawi chhunzawm ta lo va, ka thaw huai mai. Ni e, a hmel a țha a, a pà bawk, a la sawi tel loh, mitmeng mawi tak, mi hîp thei zet a nei bawk, chutah, a la hausa viau zui, school pawh a nei, a luck-in a zei bawk, hmeichhe lamin an pâk thei hle, ka va hre hneh tak!

Michael-a chu a rawn phei thei tak tak a! Mahse, zan hnih chauh a riak thei dâwn ni awm a ni; mahse, a pawi chuang lo, Lunglei nèn chuan kan inhlat chuang lo va, ka inah chaw rawn ei ziah se a ni mai.

Video call-in inbe fo mah ila a taka a rawn hmuh chuan nuam a tih chi tak a niang," Ka vawi khat rawn kalna a ni nain ka lo tàl fona hmun ang maiin ka nêl tawhin ka hria, i in pawh a nuam e," a ti a, a hlim nui hmel chu hmuh a nuam khawp mai. Ani hi chu a hmel a dang ve hran lo va, Damon-a angin a inzuah buk ve hran lo bawk nèn, a fai sar mai a, hmuh pawh a nuam vah mai.

"I awm theih chhûng chu awm ve rawh aw, i duh leh tlângahte ka lènpui che ang a, i la kal tawp nâng," ka tih chuan," A châkawm khawp mai; mahse, ka hman ngûtin ka ring lo, hna thila rawn kal ka ni si a," a lo ti thung a. Kei pawh chuan," Ka ti ve mai mai a nih kha, hun thâwl i neih hunah ka la fanpui vek ang che, kei pawh vawi khat chauh ka la kal ve tho a nia," ka ti ve leh a.

Zanriah ei hma chuan Rinpuii chuan min rawn ko dût dût a, amah ka hmu mang bawk si lo va, Michael-a a awm ve avàngin a rawn chhuk zak a nih ka ring nghâl a, zanriah kan ei kham hnuah erawh chuan a rawn kal ta tho a, ka rin ang ngeiin Michael-a a hmuh chuan a lai chhe kher mai, khawngaihthlâk zâwk hian, a star a ni chiang mai!

Tlangvâl fel ngang ta chu, Michael-a chuan a be bawrh bawrh a, sawipui tùr a hre bawk a, a lai lutuk hmel pawh chu a zia ve deuh ta, țawng erawh a țawng tlêm khawp mai.

Zàna riak ve mai tùrin ka ti nain a hnial ve tlat thung a, ka țhian ni mah se mipa a ni a, țhenawm khawvêng mitmei min vènpui vàngin Lunglei lama riak tùrin a lêt thla leh a, riak mah se engah mah ka ngaih loh dáwn tehlul nèn; mahse, a țha vek e, a dâwn thui a, hmingchhiat theihna lak ata min hum leh ta phawt e.

Damon-a erawh a reh leh ta rih a, a haw phei ta nge Lungleiah a la awm reng tih pawh ka hre lo, ngaihven pawh ka tum chuang lo, lo kal tawh lo se, hmu tawh miah lo ila tih chu ka duh a ni mai, awmze awm lova buai ka peih tawh lo.

"U Kimkim, i țhianpa kha a hmel țha i ti ve em?" Rinpuii'n a tih chuan ka en vat a, a lo sen deuh țân țân ka hmuh chuan ka rin dikzia chu ka hre mai, hmel țha a ti a, a star chiang a ni.

"Ti hran nâng, a hmel țha em ni?"ngaihven loh hmel deuh hian ka ti a, a rûk tak chuan amah chu ka thlithlai pah reng a, nuam tih hmel deuh taka," Țhat êm kha, mipaah chuan a la hmel țha ber ang chu. U Kimkim, i mit chu a del si lo va tiraw? Engtin nge hmel țha lo i tih theih a?" a tih leh chuan ka nui sak a.

"Ka țhian ka kawm ngeih tak a nia, a hmel ka en kán țhin a niang, hmel țha i tih thu chu ka'n hrilh ang a, a lãwm ngawt ang chu, țha titu hi a nei khât ve si a," ka tih chuan a sen leh țân țân phawt a, chutah," Bialnu a nei em?" a rawn ti leh phawng a. Ka nuih a za tak zet, a la ã ve bawk si a, lian pui rilru țhansan chi ang kha a ni ve a, a thil sawi, a țawngkam chhuak chu a inhmeh lo tak zet a ni.

*******

*Zaninah rawn lèn ka tum a, hun thâwl min lo siamsak la ka duh khawp mai*

A hming rawn ziak miah lo mah se amah bâk a ni thei lo. Zak thei lo ve bawk siah! Zanin phei chu YMA hla zir zàn a nia, ka kal ve daih dáwn asin, a duh leh rawn lêng se, a hawihai ve a ni mai, hla zir loh phah nán ka hmang lo ang.

*I HLIMNA DÃLTU, LÂKSAKTU CHE LEH I TÂNA ȚHA LO CHU KALSAN NGAM THEI TÙR KHAWPIN NANGMAH KHA INZAH THIAM ANG CHE*