☆LTK☆ - 1 - 6 By Dingdi Pachuau

 

☆LTK☆ - 1- 6 By Dingdi Pachuau

Ka dawhkàn chunga photo frame nalh zeta thlalâk intâr chu hmu hauh lo chuan ka en reng a, chu thlalâk chu en hauh lo pawh ni ila a lan dàn ka hre hneh lutuk tawh. Zîng thawh hlim leh zàn mut dâwn, inbual zawh leh ka room-a ka awm apianga ka en ziah a ni miau a.

Ka hmehsak a ni nghe nghe. Ani kha chuan a hre kher lo maithei, a birthday hma chiah nîa kan lèn chhuahnaa ka hmehsak kha a nia, min en loh lai a nih vàngin a hre kher lo thei.

A mit hmul er târh mai chu a lang chiang hle a, sîr zâwnga lang a nih vàngin a lang chiang lo thei lo. Chutah, a âwm bâwr poh lah mai lah chu a lang chiang khawp mai, a kawr hâk kha a lian lo va, a mar mah mah zâwk.; mahse, a inhmeh êm êm si.

Nui sâng hmel pu angin lang lo mah se a hlim tih ka hre tho. A bengbeh beh lai hi ka leisak kha a ni a, ka pêk khân a lâwm lutuk a, a làm chiam nghe nghe kha. Nimin ang maiin ka rilru mitthlaah chuan a la tharlâm, ka ngaihtuah leh țhìn, ka lu chu ka thing nawk nawk a.

Țhu țhàin thlalâk chu ka en leh ngat a, a hmai chu ka chûl dan dan a, a hnâr ngûl mawi zet, tê fel êt bawk si chu mawi ka tih thu ka hrilh fo. Ani pawh a lâwm thei hle a, min chhaih pahin a ner lui sak sak țhìn a nih kha. A thla ka hmehsak lai hian kan piaha Châwmzil rah tlàn sava hrâm neuh neuh, thlâwk sawn leh zauh zauh țhìn chu a thlîr a nih kha.

*******

"Pui, sava mawizia khi, a thla lâksak ang."

Sava ai chuan kei chuan a hlim hmel chu hmuhnawm ka ti a, mawi ka ti zâwk.

"Hmuhnawm ka tih zâwk chu i hriat ka ring."

Lungawi tih hriat zet hian min rawn melh ralh a, a ner sak bawk a.

"Mi tih hlim veng veng hi chu i thiam ve ngawt mai!"

"Chu lo pawh ka la thiam kha."

A nui sak a, a biang veilam biangsum khuar kelh lang ngei chuan. Amah pawh hian a chhuang ve țhin chuan ka hria, ka chuks ngun bawk.

"A thlâwk sawn dâwn, click thuai teh. Ka room bang màwitu ka neih belh leh dáwn tihna a ni dâwn asin, vat vatin!"

Ka camera lei thar chuan sava te reuh tê chu ka tin vang vang a, a mâwi reuh phian a nih hi. Mami'n mawi a lo ti pawh kha a lo àwm a nih hi, Vanglaini Thlalâkah thawn ve keuh teh ang.

Ka click zawh hnuah chuan," Ka lo en ve aw?" a ti a, ka entîr ve mai bawk a.

"A mawizia hi! Ka phone-ah min thawn ve rawh aw."

"In thlen hnuah chauh."

"Ka hria alawm."

Kan pahnih pawh chuan kan la dùn ve a, a hmui a han tipawrh lui ve ngial a, ka nuih a tiza reuh a nia.

"Eng nge i nuih?"

"Duck-lips!"

"Tûnlaiah chuan an ti ziah alawm."

"Tih loh pawhin a mawi tho."

Dingdihlîp âr âr hian ka hmuiah a rawn fâwp zawk a, chutah, ka hnungah rawn zuang kaiin ka nghâwngah a rawn kuah nghâl zat a.

"Motor thleng min paw thei, ka birthday a hnai tawh si a," a ti a.

"I va rit ve!"

"Ka âwih hlawl lo! 40 kg chu ka tling ve tho aw!"

"I rit ka ti rêng alawm le."

Motor ka hùnna thleng chu ka pua a, a zâng reuh a, ka puak hi a ngèn fo. Ka lakah a pangchang hle țhìn a, kan inhriatna a rei ve tawh vàngin kan innêl viau bawk. Thla 10 kaltaa ka bialnu a nih ațang khân ka duat viau tawh a, ani pawh a pangchang thiam. Ka duat tih a hre ve kar a, pangchan dàn duhawm tak tak a hre țeuh, a han apply phei chuan ka duhna hi a zual sawt sawtin ka hre țhìn.

"Birthday gift țha tâwk tu nge duh le?"

"Naaa, i va sual thiam tak!"

"Sual chiah maw?"

"Aihhhh...sual leh lo," tiin min han nuih tlawn leh a, ka bân chu a rawn vuan pah a.

"Min tlawn thiam viau a ngai ang."

"Khawvélah ka duh ber che!" tiin a kutzungpui chu a tipir vah a.

"Omar ai pawhin?" Mipaah chuan Omar a duh ber tih a sawi ka hre tawh. Chuvàngin, ka han tilui ve deuh sak a ni.

"Aw."

"Tak tak?"

"Tak tak. Ani chu ka dream boy a nia, nang chu ka boyfriend i ni thung a," a ti a, a sawi zâwng chuan a biang chu a sen deuh tàn tán a.

"Tomato ang mai."

"Ka zak ve tho alawm."

"Mahse, i duhawm sawt."

Kan indût hlak phawt a, hmanhmawh lêm lo chuan motor chu tinungin ka tlân chhuak ve ta chauh.

*******

"Vawiin chu i ute i pui ve dâwn lo'm ni? I hman tho bawk a," ka pa chuan a ti a.

"Eng nge an tih dâwn?"

Ka nu chuan rang zet hian," A mak thei! An in luah an sawn dâwn kha, nizànah pawh zanriah kîl laiin ka sawi tawh, i lo ngaithla lo a ni maw?" a lo ti vat a.

"E, ka hria e."

"Chanmari-ah an insawn dâwn a ni àwm e. A pawi lo, tuna an awmna khu chu hnaih viau mah ila naupang tân a hrisêl lêm lo, a zîm deuh bawk si a," ka pa chuan a ti leh a.

Unau pahnih chiah kan ni, ka u hmeichhiain pasal a nei tawh a, fa pawh pahnih lai an nei tawh. Kei pawh naupang chhe tak ka ni tawh lo, kum 28 lai ka ni tawh. Ka nu leh pa hian sawi dawt lo mah se, nupui nei tawh se min ti tih ka hre ru khiau; mahse, duh hun hunah nupui pasal a neih theih ngawt loh. Bâkah, nupui tùr meuh chu, zawn fîmkhur a ngai. Fate nu tùr a ni dâwn a, ka nupui, ka dam chhûnga a nuam leh hrehawmah pawh ka kianga awm tùr, a kianga awm tùr ka ni dâwn. Chuan, ka nu leh pa enkawltu ka ni a, min hmangaihpui thei tùr a ngai bawk.

Ngaihtuah tùr hi tam deuh mai asin. Ni khat thil thua thutlûkna siam ringawt chi a ni hek lo. Dam chhûng nghawng thil a nih vàngin fîmkhur leh uluk taka zawn a ngai. Hmeichhia phei chu an nungchang thup an thiam si, pâwn lama țha tak, chhûng lama kha sî an tam, nulât hun lai hi nungchang thup hun lai a la ni lehnghal.

Ka țhian kawm ber Hminga ka sâwm a, pik-up chu ka khalh chhuak bawk a, bungraw phurh nân chuan a tâwk tiu teu viau.

Kan zu thlen thlâk meuh chuan an lo intifel duak tawh a, thingpui hâng min lo pe leh rih phawt.

"Lalmàmawi, in in luah tùr chu a zau țha em?"

Ka u chuan," Aw, zau ve e. Kan chhûngkua member pali tân pawh a zau țha khawp asin, luah man a to fahran lo lehnghal a," a lo ti a.

"Tui connection a țha ang maw? Naupang tân a him bawk maw?"

"Aw, a țha vek e. Nimin piah khân i u Zova nèn kan en vek tawh alawm."

Ka u fa naupang zâwk Lacie chuan parda phèn ațang chuan min rawn en zoh zoh a, min rawn pawh ngam chiah lo deuh a ni. A zakzum a, an ina ka kal khàt deuh hi chuan min zah tlat zêl.

"Dear Lacie, ka hmu kiau che a nia aw. Lal-a-u nèn in ei tùr ka lo keng a, lo la la?"

A u zâwk Kimkimi chu room ațangin a rawn tlân chhuak nghâl a, min rawn pan vatin," Âpute, ka duh a nia, min pe la?" a rawn ti vat, ka mal chungah a rawn țhu chat bawk.

"Lacie lo kal ve phawt se?"

Kimkimi chuan," Lacie, lo kal rawh, Âputea'n ei tùr a lo keng a nia," a ti lar lar a.

Lacie hi kum 3 chauh a ni a, Kimkimi erawh kum 6 a ni tawh. Mipa an la nei lo va, tunah hian ka u hi a puar chho leh mêk, mipa a nih kan beiseipui viau. U Zova'n mipa a awt ve tawh a.

Lacie chuan muangchâng hian min rawn pan a, a u ka mal chunga a țhut tawh avàngin kan piah deuhah țhuin min rawn en deuh hrek hrek a.

"Ka mal lehlamah hian lo țhu ve la?"

A hnuah erawh chuan min nêl leh lutuk a, ka mal chung ațangin a chhuk leh duh tawh lo.

Bungraw thiarnaah pawh chuan ka bul chêtah a țhu zêl a, ka inpaw lo chauh a ni mai.

Zanriah ei dâwnah kan haw chauh. Engkim kan tih felpui vek a, chaw ei tùrin min sâwm nasa; mahse, ka hnial a, tih tur pawimawh nei angin ka insawi.

An in pêng thlen dâwn chuan," Zanin chu dam lo kan ila?" a ti a.

"Tu dam lo maw?"

"Pu Saia kha, a daih rei vak tawh kher lo ang."

"Convention centre thlanga mi kha maw? A va hla ve!"

"Kan vêng chhûnga mi tho alawm, kohhranah ni se a inhmang ber pâwl a nia."

"Aw le, ka lo sâwm chho ang che."

Zanriah ei khamah chuan ka chhuahna tùr chu ka hrilh a, ka nu chuan," E, a tihzia hlauh chu, han lêng tak rawh. Naktûkah keini pawh i pa nèn kan han lêng ang," a ti a.

Hmingate in ka han thlen chuan a lo inpeih tawh a, a nau chuan thingpui hâng min lo pe vat a.

"Thank you, Cissy."

Ani chuan," A, Mama nèn hian khatiang khân min ko ziah tawh lo teh u, a zawhte hming si," a lo ti a.

"A mawi alawm."

"Mama bialnu pawhin min koh phah lehnghal, ka duh thlâwt lo!"

Nui hawk hawk chung chuan Hminga chuan," I hlim hle kha aw," a lo ti hlak a.

"Min koh leh pawhin ka êih tawh miah lo ang."

Pu Saiate in kan han thlen chuan mi pawh an lo awm ve nual a, nu leh pa an ni deuh vek thung. An in hi a zau hran lo va, chhûngkaw rual tak an ni lêm lo bawk. Kohhranah a inhmang êm a, mi hriat a hlawh phah a ni.

Chhûngkaw awmthei an ni lêm lo va, an in chhûng pawh a phuisui viau lo. Kohhranah inhmang viau lo phei se chuan kei ngei pawh hian ka hre kher lo ang. Tûnlaiah mi kan buai tawh nèn, țhalai hmuh tùr pawh an vâng pharh mai. An tunu awmpuiin thingpui a lo buaipui a, țhalaia kan hotu Zâra'n a lo pui ve bawk a.

Kan lût deuh chiah tihah chuan nula pahnih an rawn lût ve leh a, pakhat chu ka hria, Cindy a nia. Pakhat erawh chu ka la hmu ngai lo, mikhual a nih ka ring, ka lo en zui zêl. En zui loh theih a ni lo, a chhe lo êm kher a ni, vawi khat ena mipa mit la zak hmeichhia chu a ni chiang khawp mai.

A rawn kalpuinu chu ka hriat sa a nih vàngin kan bulah a rawn țhu nghâl chat a, Chhelovi erawhin min rawn pawh ve miah lo.

"In va fel ve! In awmna a hlat nèn," rawn țhu pah chuan a rawn ti sar sar a.

"Nang pawh. I țhiannu saw ko ve ta che, amah chauhin a țhu tho sia?" Hminga chuan a lo ti a.

"Ka țhiannu pawh a ni lo, kan rawn lût rual ringawt a nih kha," a lo ti a.

"Ko ve tal la?"

"A hming pawh ka hre bîk lo."

Thingpui inna no chu Pu Saia tunu chuan a seng fel a, Chhelovi chuan a lo pui vat. Cindy erawh chu kan bula țhuin a la titi barh barh a, seng felpui pawh a tum chuang lo.

A rûkin Chhelovi chezia chu ka lo chîk reng a, nula dangte anga inhnawih huam a ni lo va, a inthuamna pawh a simple khawp. A sam erawh tlêmin a tieng deuh, a inhmeh phian lawi si.

Kan lêng rei ve deuh, damdawiin an chiu a, a muhìl thei ta tihah chuan kan haw ve ta chauh. Chhelovi pawh a haw har bîk lo.

"Kha nu kha tu nge a?"

"OC-i."

"Tu a?!!"

"Officers' choice-i ka tihna a nia."

Chutiang hming chu ka hre tawh na mai. A hming tak a ni bîk miah lo mai, an koh fiamna, an koh elna a ni ber.

"Ka lo hmuh ngai loh vàng a nih kha, a chanchin an sawi chu ka hre tawh e," ka ti a.

"Eng nge, i lo thinlài hman deuh elo? Tihchi miah loh aw."

"Leh ringawt. Ka la hmuh ngai loh vàng alawm."

"A chhe lo viau nain a hlauhawm ru riau tawh a nia, ngaihven hlek suh ang che. Bâkah, i châwm zo chuang lo ang, Officer chin chauh a kawp țhìn," a ti leh a.

"Ka ngaihven lo ve."

A hming tak ka hre hauh lo. Khawi lam mi nge pawh ka hre lo, kan vêng Rahsi vêngah hian in luahin a rawn awm ve a, a chhiat loh vàngin a lâr hle bawk. Kei chu Chennai lamah ka awm tam vàngin kan vêng chanchin hi ka hre tam lo va, tunah chuan kum chanve deuhthaw ka lo awm ve ta a, lâr viau mah se a hmel ka vawi khat hmuhna a ni a, a lo lâr viau pawh chu a àwm ka ti.

"Ramthar nula kha eng nge a chanchin? Hma kan sâwn deuh tawh em?" ti pah chuan min rawn nghawk salh a.

"A chhe lo khawp mai."

"Ani pawhin a huat loh teh che kha, nakzàn chu lêng ila?"

"Kan la ngaihtuah țha dâwn nia."

Mut hmunah chuan maimichhîng vang vangin ka hun kal tawhte ka ngaihtuah kual a, hmangaihna kawnga ka vànduaizia ka ngaihtuah chhuak leh a.

Ramthar nula Afaki hi a chhe lo, a nau admission a rawn tihpuina lamah kan inhmu a, inhre sa pawh kan ni lo. A thil hriat duhah chuan min rawn be ta zêl a, țha takin ka lo chhâng mai zêl. Hminga nèna kan bazàr dun țumin kan inhmu leh a, min lo ko chûl a, restaurant-ah kan chawlhpui tâk nghe nghe kha.

Hminga hian min dem ta deuh tlat a, min biak dàn leh melh dànah min haw lo tih hre tho mah ila ka lo ûksàk tehchiam lo. Ka hun kal tawh kha ka ngaihtuah lêt lo thei lo va, kum 5 vêl zet ral tawh mah se ka theihnghilh thei si lo a nih hi.

Dawhkàn chunga thlalâk chu thlirin," Mâm, min hmu em? Ka rilru chu i hriat kha, min pui teh. Khawiah nge i awm? I thlarau tal chuan min lo thlîr ve reng tho ang tiraw?" tiin ka phun sap sap a.

"Khawiah emaw tak chuan i la nung ve ang tiraw? Mâm, min chhâng teh. Heti chen hi i tel lovin hun ka lo hmang ve tawh a, ni khat tê pawh nangmah theihnghilh ni che ka nei ngai lo asin. Nang engtin nge i awm ve? Min la hre ve țhìn tho ang tiraw?"

"Nge he khawvêl ata hi lâk bo i ni tawh zâwk? He khawvêl nunrâwng tak ata hi himin i lêng tawh zâwk em ni? I hmel vawi khat tal hmuh leh theih ka va châk êm! Hmangaihna awmzia min temtîr te te a, hetia min kal bosan leh daih mai hi engtizia nge ni? Kan inhmuh hnuhnun ber țuma kan inhnial deuh vàng kha chu a ni lo tiraw? Ka ti tak tak lo tih chu i hriat reng kha."

*LEHKHABU HI A KÂWM AȚANGIN KA TEH FO. A KÂWM HI A PAWIMAWH VE ÊM ASIN, A KÂWM MI HÎP LO DEUH CHU CHHIAR KA PHÛR LO FO, IN NIH VE THO KA RING. STORY-AH PAWH A NIH THO HI TIR'U?

MAHSE, A CHHÛNG THU CHHIAR CHHUAH DAP HI A LO PAWIMAWH DAIH ZÂWK A LO NI. CHUVÀNG TAK CHUAN, LEHKHABU CHU A KÂWM AȚANGIN TEH MIAH SUH AW. A CHHÛNGAH THU ȚHA TAK TAK A LO AWM ȚEUH ȚHÌN.

☆LTK☆ - 2 By Dingdi Pachuau

(He thu hi dâwt phuahchawp mai mai aw, rilru hliam leh nâ in lo awm chuan ngaihdam ka dîl nghâl e. In pawi sawi ka tum vàng a ni miah lo aw, hetiang hi in awm pawh ka ring hek lo a nia, dâwt vek a ni e)

Hminga nèn sikul khatah kan thawk dùn a, hei vàng tak hian kan inpawhin ni tin deuhthaw kan inzui a, kan thurûk pawh hi kan inhre tawn viau.

Afaki min rawn text chu Hminga chu ka chhiartîr chhin a, kan inkârah hian kan inkawm ațang hian thurûk a awm tawh lo, thil engkim kan inhrilh vek țhìn.

"A fuh dâwn e, a duh viau si che a, a fel hmel ka ti khawp bawk," a ti sauh sauh a.

"A chhe lo alawm."

"Chhe lo chu chhia ai chuan i duh daih zâwk lo'm ni?" nui chung hian a ti a.

"A dik alawm."

Mahse, hmangaih chu pakhat chauh ka nei. Amah vàng hian ngaihzâwng dang pawh ka la melh thei rih lo va, ka ngaihven rih lo a ni deuh tawp mai. Ka hmangaih êm a, mi dang hmangaih theihna thinlung hi ka nei leh theiin ka ring tawh lo a ni.

"Zaninah lêng ila?"

Ka țhianpa hian min duhsak a, Mami nèna kan chanchin kha chu Hminga nèn kan inhriat hma daih thil a ni, ngaihzâwng nghet ka nei lo tih a hriat hian mak a ti țhìn rêng a, a chhan chu Mami nèna kan chanchin kha a la hre ve tlat lo a ni.

Ka kum a naupang lutuk tawh bîk lo va, hei vàng hian Hminga pawh hian bialnu nghet nei tùrin min duh a, a țhian ka nia, min duhsak tùr pawh a ni ve rêng a ni.

"Naupang test paper check ka duh."

Chhuanlam hi ka siam deuh zêl. Ngaihzâwng neih hi ka la duh tak tak lo a nih ka ring. Kum heti chen a ral hnu pawh hian ka rilru chuan a la beisei reng a, ka thinlung hian a nghâk a, a la beidawnsan thei lo chu a nih hi.

"Chhuanlam fahrah! I duh loh chuan ka tlui miah lo che."

Za lo zet hian ka nui a," Thil hrilh loh che ka la nei a, nang nèna kan inhriat hma daih thil a nia; mahse, tûn thleng hian min la nghawng chu a nih hi," ka ti a.

"Hmeichhe chungchâng maw?

"Aw."

"Min hrilh châkna thinlung i neih chuan ka ngaithla peih reng, puih theihna che a awm chuan puih che ka inhuam bawk tih i hriat ka ring."

"Noon break-ah aw," ka ti a.

Serkawn middle school-ah kan thawk ve ve a, kan thawhna erawh a la rei fahran lo thung. Chennai-ah lehkha zir leh hna thawkin ka awm char char a, Chennai-a ka hun tawn hi a nia ka nun tidanglamtu chu.

Break-ah chuan school ațanga hla vak loa restaurant awm, kan chawlh fona hmunah chuan kan chàwl leh a.

Ei tùr kan chah an la buatsaih lai chuan Hminga chuan," Le, ka hre châk zek zek a nia," a ti a.

"Kan inhriat hma thil a nia."

"Ka hre châk sauh."

Hun kal tawh chu ka mitthla suangtuahnaah a rawn inher lêt zut zut a.

*******

*Bangalore-ah Chapchàr kût kan hmang dâwn asin, rawn hmang ve la?*

College ka kalpui țhin Mumbai-a hna thawk ta Judith-i message a ni. Kan la in-text zauh zauh a, kei pawh company-a ka inhlawh lai a nia, Mizo thil tih hrang hrangah chuan ka tel ve fo, Mizoram lamah chuan hetiang thil tih nikhuaah hian kal ngai lo mah ila hmun dangah hi chuan ka ngai pawimawh viau țhìn.

*Ka hman theih phawt chuan le*

Ka kal ve ta ngei. Mahni hnam thuamin mawi tak takin an inchei a, kei pawhin Thangchhuah kawr ka ha ve ngei, hmun dang ațanga kal ka nih vàngin ka mikhual viau chuang lo.

Hnam làm leh zai mawi tak tak ngaihthlâka en tùr a awm a, Judith-i ngei pawh chu Chheih zàiah a lâm ve. A làm lai chuan kut ka lo bêng uar khawp mai a, a làm tàwp dâwna hmeichhe pakhat a kaih chhuah chiah chuan ka khawvêl hi sâwi nghìnin a awm ta chiah a ni!

Vawm bei thlawp angin ka thinlungah hian a bet nghâl tlat a, a làm chhûng zawng chuan ka mit ka khap pawhin ka hre lo! A chezia chuan ka mit a la ngawih ngawih a, a hawiher kimtlâng leh incheina zawng zawng chu a dik thlap vek, sawisêlna tùr ka hre lo.

An làm zawh veleh chu nu chanchin chu Judith-i ka zâwt ta nghâl a, ani chuan a lo hre khawp mai. A hmel hriat sa a lo ni a, Mumbai-a college kal lai a lo ni a, a hming chu Mami a ni.

Kan piah deuh lawkah a lo țhu niin, ka va pan nghâl ruak. Kut phar chhuak pahin," Ruatpuia ka nia, i lâm thiam hle mai, ka ti tak zet," ka va ti a.

Min rawn en chhoh chiah chuan ka thisen kal lai hi a chàwl țhupin ka hria! A mitmeng pawisawi lo zet mai chuan min melh ta sar mai, ka zâm chhe lek lek!

"Ka lâwm e, Mami ka nia, ka lâwm tak tak a ni."

A hlim hmel phèna a zak hmel chu a hmuhnawm, a sen deuh tal a, a biang chu a ti tài têk bawk a, a duhawm ngawih ngwwih. A awka chhuak dam dap mai chu hriat tawh tih ka nei thei lo ang, rimawi tum thiamin mawi taka rimawi a tum ri hi ka tehkhin.

Hei hi Mami nèn kan inhriat țanna chu a ni.

Kan awmna inang lo mah se a phone number ka neih avàngin ka be țhìn. Hun âwl ka neih apiangin Bangalore-ah chuan chhuanlam siamin ka kal ta ziah, kan inhre chiang chho zêl a, a ni tèlin ka duhna chu a pung chho zêl. Ani pawhin min haw vak bîk lo tih chu ka hre thiam ve tho, zirlai mai a la nih vàng chuan tihbuai ka duh lo viau nain ka duhna chu ka up bo thei tawh lo, hmaichhanah chuan ka hrilh ta chawt a.

Khata a hlim hmel leh zak hmel inpawlh kha thil hmuhnawm tak chu a va ni êm! Ka tân hian a ni lehzual, a chhan chu min haw lo tih hriat tak khân min duh thu kha min hrilh lêt ve tlat atin ni. Mipa hlim ber ka nih loh vêk pawhin a dawttu chu ka niin ka ring bîk lo, an in luahah ka kalchilh rap mai kha a ni a, a cousin pahnih a awmpuite nèn lam khân ka fâwp lo chauh a ni.

Kan in, ka chhûngte leh Mizoram ka ngai lo va, ka rilru zawng zawng chu Bangalore-ah chuan a awm vek tih theih a ni. Chennai pawh nuam ka ti chuang lo, a theih anga zingin Bangalore chu ka kal zut mai, Chennai nèn a lo inhlat tehchiam lo hi ka tân chuan thil țha tak a lo ni.

Laipuitlang, Aizawla awm a ni a, a cousin-te unau pawh Aizawl lam mi tho an ni. Ka biak ngun leh tlawh ngun vàngin a cousin-te pawh ka nêl ve viau tawh a, mi țawng tam tak an nih loh vàngin a châng chuan nuam lo ka ti lek lek țhìn. Mipa leh hmeichhia an ni a, college kal chu an ni lo va, an hnathawh erawh ka hre ta lo.

Mami nèn chuan kan inthlahlel a, min duh ve êm avàng chuan nuam ka ti țhìn. Ka pawisa neih hi a tân ka ui lo va, a mamawh ka zâwt fo țhìn. Ani erawh chuan a chhûngte'n an rawn thawn țhìn tih min hrilh a, mamawh a neih loh thu a sawi mai zêl. College kal lai a nih vàng leh hmeichhia a nih vàng hian mamawh neuh neuh chu a neih ka ring tho a, a bag-ah ka dah ru fo. A hriat chhuah hnuah min hau pahin làwmthu min hrilh țhìn a, chu tak chu nuam ka ti țhìn.

Hun âwl a neih veleh Chennai-a ka in luahah chuan ka hruai a, kâr tàwp a ni a, a cousin-te pawh ka sâwm ve tho nain min hnial thung. Lo kal ve lo se ka duh daih zâwk tho a, min hnial pawh kha ka ring hrim hrim a ni.

A lum a, hrehawm a ti ang tih ka hlauh nèn, nuam a tih thu a sawi chuan ka nui vur vur. Lèn chhuah a duh lo va, inah chuan kan inkhung reng mai.

"Weekend-ah hian assignment leh project hahthlâk deuh i neih loh chuan lo kal ziah la?"

A nui sen sen a, a hnâr te reuh tê, mawi zet chu khawih zohin," Nuam i ti lutuk palh ang," a ti sap a.

"Khawi maw, i hnâr kha, thil a kai a nia," tiin ka hnaih sauh a, ani pawh chuan thil a kai tak tak emaw tiin a lo dawh há a.

Piaisak zauhin," A mawi viuh veuh teh e," ka ti a.

"Thil a kai emaw ka ti!"

"Kai nâng. Hnâr mawi hi ka khawih châk a."

Ner sakin," I va ti ho tak! Mahse, ka lâwm viau bawk si, nang pawh i hnâr a mawi ve tho alawm, a tê lo bawk a," a ti a, ka nuih a tiza reuh tak tak.

"I hnâr ang tiat kha chu pahnih pathumah mi thiamte chuan an siam chhuak thiamin ka ring."

Kan nui dùn vak vak a.

Khua a lum vàngin kan inha bùl viau a, kei phei chuan tàwnzau pawh ka ha peih lo. Kekawrbùl ka ha tawp a, ani pawhin kekawrbùl leh T-shirt pan tê hain a T-shirt hmâwr lam chu a hmun hnihah a suih bâwk a, a inhmeh reuh phian asin.

"I dul thêp zaih kha a sexy ka ti."

"A ni maw? Kei chu tlêm têa sek deuh hlek hi a sexy ka ti zâwk asin, i dul ang te kha," a lo ti a, ka dul chu a thlîr vang vang a.

Nuam ka ti veng veng.

"Tikiar miah suh, a hrisèl loh bâkah a mawi lo."

Khua lum viau mah se kan insi deuh chial peih tho!

Keimah vàng liau liauin exam zawh chawlhah pawh a hâw lo va, min ngai a, min thlahlel ve tih ka hriat hian ka hlim a ni. A chhûngte bulah engtin nge chhuanlam a siam phei chu ka hre lo, kan pahnih chauha han awm dun phei chu nuam tak a ni.

A birthday ka lawmsak a, bengbeh ka leisak phawt a, a hnuah chuan a hnuah a duh ber țhî ka leisak leh a. A lâwm thiam asin, a hlim hmel hmuh nuam ka ti a, keimah leh ka thil pêk vànga a hlim hmel hmuh chu nuam ka ti a, hlimna siamsak zêl pawh ka tum a ni.

A ni têlin, a kum têlin ka hmangaihna a zual zêl. Ka ning thei lo, college a chhuah veleh nupuia neih mai ka duh, ani pawhin kum 20 a pèl chiang tawh ang a, tûn anga min thlahlela min duh ve a nih chuan ani pawhin min hnial bîkin ka ring lo.

Vawi khat erawh kan inbauh ve deuh. Chu pawh mipa ka nih vàng a nia, an in luaha ka kal laiin tlangvâl dang ka hmu a, a cousin mipa țhian a ni tih min hrilh hnuah pawh a bialpa rûk a ni ang ka ti tlat a. Ani lah chu a nui mai mai.

Ner sak hian," Hei, Dulkiar, mi dang ka neihsan che i ring thei maw?! Min ngai rinawm lo hle mai," a ti a.

A hnâr mawi ka tih țhin vàng hian a ner lui țhìn. 'Dulkiar' tia min kohna chhan hi chu, dul kiar chanchin ka sawi peih a, thil țha lo leh hrisêl lo a ni tih ka hrilh fo vàng a ni.

Mahse, tûn țum chu ka nui thei miah lo.

"I thîk a ni maw? Pui, thîk lo teh, a hming pawh ka hre miah lo a nia. A lo kal vawi khatna a ni lehnghâl a, ka hmêl hriat ngai pawh a ni lo," a ti leh a.

Tlêm chuan ka rilru a nuam deuh.

"Hetiang hian awm lo la, ka rilru i tinuam lo a nia, inhmuh thiam loh ka duh lo, i lo kalna a hla si. Min hmu tùrin i rawn kal vang vang a, lungawi lova i hàw ka duh lo bawk. Pui, nangmah chauh ka duh che a, ka hmangaih bawk che tih chu i hriat vek tawh kha," a ti keuh keuh a.

Mipa dang lakah ka ringhlel ngai lo va, min rinawm lohsan lah ka ring ngai hek lo. Khà pa kha a chhe lo teh vawr êm a, ka thîk chhan pawh a ni.

An in luah bathlàr chêp zetah kan ding dùn a, a nuam ti lo hmel han hmuh chuan khà pa ka lo thîk kha ka tisual dêr a ni tih ka hre tho; mahse, ka thîk tho bawk si.

"Nang pawhin mi dang i melh ngai lo ang bawkin kei pawhin mi dang ka melh ngai lo, kan pahnihin kan inneih tawn tawh kha. I ta ka nia, ka ta a ni bawk a, mi dang lo tel ve chu a thiang tawh hlei nem," a ti leh a.

A la naupan reuh nèn hian, țawngkamte hi a thiam reuh a nia.

"Bâkah, ka bialpa ni se i lo kal laiin i hmuh tùrin ka lo awmtîr duh i ring em ni? I lo kal dáwn tih ka hre reng a."

A tidik leh chiah bawk si.

Min rawn hnaih sauh pahin," Pui, ka hmangaih che tih i hriat kha, mi dang ka kawp lo, nangmah chauh-"

Ka kuah thlawp a, mi dang min hmuh leh hmuh loh pawh ka ngaihtuah tawh lo, ka fâwp vawng vawng. Ka thîkna ka tihlan rei leh kan hlim lo rei dâwn a ni si a, min hmangaih thu min hrilh keuh keuh laia thinlung tihsak tlat hi a țûl ber lo.

"Weekend chu ka bulah rawn hmang leh la?"

"Aw le, i phal phawt chuan."

Kan inkawp rei ve ta a, khà pa bâk kha mipa dang ka thîkna ka tilang leh tawh lo. Ka khawvêl a her danglam êm avàng leh ka hmangaih êm avàng chuan ka nupui a nih loh ka ring ngai lo.

Hun kal chakzia chu, College a zo țêp ta. A exam mêk a, ka tlawh ta lo. Ka tihbuai ka hlau a ni. Biak erawh ka be reng, pawisa pawh ka thawn bawk. Ei tùr țha a ei lo ang tih ka hlau a, a exam lai a ni lehnghâl a, țha taka a chhàn loh ka hlauhpui a ni. Ka la sawipui lo nain college a chhuah veleh palai tirh mai ka rilrûk deuh si a.

*******

"Mami kha, a chanchin dang ka zawh leh hma chein, a number i nei a, fb lamah pawh i contact thei mai lo em ni?"

"A fb lohna a rei tawh. Kan inhmuh hnunhnun ber zàna a fb bâk kha a fb leh tawh lo."

"I pà viau nge pà viau lo pawh ka hre lo, i mutpui tawh em? Khum khatah in riak dùn ngeiin ka ring bawk si a?" Hminga chuan a ti a.

Kan inah a rawn lêng a, ka nu leh pa chu Pu Saia kanin an lêng thung.

"Khum khatah chuan riak dùn chiang e; mahse, ka khawih chhe phal lo. Ka hmangaih a, làwițhat zàn hlim taka hman ka duh alawm."

"I va insûm thei ve!"

A nui kur kur a.

"Nia, ka ngaihtuah lêt hian thei ka inti asin. Ka hmangaih êm vàng a nih ka ring. 'Ka lo pà lo viau a niang a' ka ti leh deuh țhìn ve tho."

A nui leh vur vur phawt a," Hun thâwl in nei nasa sia, kei ni ve ra ngat ila ka insûm lo nasa dâwn tih ka hria a ni," a ti leh a, chutah," Le, min hrilh chhunzawm leh tawh la?" a ti leh a.

Chutih lai chuan doorbell a rawn ri a.

Țhenawm nula Diktei a lo ni a," U Pui, Pu Saia kha a țha lo lutuk an tia, kalpui tùr ka nei si lo va, kal in duh ve ang ka tia, ka rawn sâwm che u," a rawn ti a.

"A nih tak chu. Dikte, min lo nghâk lawk rawh aw, ka'n insiam lawk ang e. Țhianpa, ka'n insiam lawk, ka rei lo ang," ka ti a, ka room-ah ka lût nghâl a.

Ka insiam zawh chuan Mami thlalâk chu ka melh leh zawk a, ka chhuak ta nghâl a. Kan hmanhmawh ve deuh bawk a, kan thleng chho thuai, nula tlangvâl an lo tam tawh khawp mai.

Kan thlen hnu rei lo têah a chatthla nghâl deuh mai. An han țap laih laih a, nula tlangvâl kan che sung sung. A țûl țûl kan ti fel a, an in a len loh vàngin tualah silpauline kan zâr nghâl bawk.

Zàn a la rei lo va, information lamah chhiat tawh thu chu an puang deuh nghâl mai bawk a, țhalai kan pung chak khawp mai.

Kawngka bulah ka țhu a, ka piah deuh hlekah Hminga a țhu thung. In a lian lo va, kan țhu khâwm țha kher mai. Hruaitute an fel a, la tleirâwl deuhte pawh ţhutna tùr an siamsak a, thingpui luma sem tùr pawh an awm nghâl vek.

Nula țhutna langsàr lai takah chuan Chhelovi kha a lo țhu a, a țhutna chu tlar hmasa ber a ni. Mi dang aiin a langsàr nalh maiin ka hria, a ngo êm vàng pawh a ni maithei, nge a hmel țhat viau vàng zâwk?

Kan țhutna nèn a inep em vàng chuan ka en lo thei lo, en loh pawh tum mah ila a theih loh. Hmun ngai reng a en theih bîk loh, hâwkdâk vàng pawh ni chuang lo chuan ka va en leh țhìn. Vawi khat tê mah min lo melh chhin lo va, a hawi kual hek lo. A țhut dàn ngaiin a țhu ât reng a, zài a hunah a zâi a, mi dang inthiar tùra an chhuah pawhin ani chu a chhuak ve lo.

Zàn dâr 12:30 vêlah sawhchiar an rawn sem a, kan ri deuh mam mam. Hneichheho chu an titi uar deuh a, ani chuan ngawi rengin sawhchiar chu a ei a, tui a ti fahran lo a ni ang, a ei zo lo. A bula țhute an inbiak pawhin ani chu a ngawi reng a, tu mah a va be ve lo, nula dang pawh chuan an rawn be chuang lo.

Nula mal tak chu a nih dâwn hi.

Dâr 2 vêlah chuan ka mut a rawn chhuak ve deuh a, intihharh tum chuan pâwnah ka chhuak rih a, kuhva eiin mei ka'n țan ve bawk a, ka hîp vang vang a.

Nulaho hi ka khawngaih țhìn, mipa chu kan chhuah hian a mawi lo hran lo; hmeichhia erawh an chhuah an chhuah chuan thil mawi lo tak a ni. An țhu ngawt ngawt a, țhutna nuam takah an țhu bîk bawk si lo va, țang tak taka an zài phei chuan a hahthlâk ngawt ang.

Ka lût leh a, mi dang pawh an chhuak ve nual. Hminga pawh a lo chhuak ve niin, a lo luh hma deuhin a bialnu kha a țhiannu nèn an rawn lût phawt a, a hnu deuhah Hminga a rawn lût, min rawn hmuh chuan a nui deuh suk a.

He pa tak hi chuh!

Chhelovi pawh chu a mut a chhuak ve deuh a ni ang, a meng phelh deuh hlek tawh, a men dàn chu sexy ka tihzâwng tak!

Mi dang chu an mawng a kham deuh tih hriat tak hian ner sak sakin an țhu țha deuh sek hlawm a, ani erawh chu cool zet hian a țhu reng mai. Ka khawngaih deuh tlat nia!

Chhelovi chu Y.M.A hun chhûng chuan ka hmu ziah. Tlar hnung lamah a țhu ngai miah lo, a țawng ve sek ngai lo va, a ngawi reng țhìn.

A chezia leh nungchang chu mak ka ti. Tlangvâlin an en duh thei hle a, kei ngei pawh ka ni tho; nulaho erawh chuan an melh hrek hrekin ka hre thung. Țhian a nei lo a ni ang, han bekbàwr pawh a nei ngai lo.

A inthuam dàn a over lo va, makeup pawh a inhnawih lo ber ber zînga mi a ni ngei ang; mahse, a chanchin ka hriat dàn hi a duhawm vak si lo va, mi pawh hian an țih deuh a nih ka ring ringawt, țhian a neih loh dànah.

"OC-i kha i melh nasa thei ka ti!"

Min lo hmu reng a ni maw? Ka melh lo viau emaw ka lo tih ve nèn.

"Melh loh theih loh. Țhutnain a zir lo alawm."

Y.M.A hun a zo chiah a, kan hâw thla mêk a ni.

"Kan nulaho pawh hian an kàwm serh deuh chu a nih hi maw... A țhian tia sawi tùr an vâng êm mai," a ti leh a.

"A mal hmel khawp mai," ka lo ti a.

"In lamah lo nghâktu a nei țha maithei asin."

An riahchilh êm dâwn em ni? Amah chauha in a luah chuan a theih tho mai a; mahse, a kawpteho hi nupui nei lai an ni fur ang a, chuvàngin an riahchilh bur ngam dâwn em ni? Inhmuh zauh zauh chu thuhran.

"I rin thu sawi ringawt suh," ka lo ti thung a.

"An sawi alawm le! A hmel țhat êm hi, a hmel ațangin pawisa a la lût thei bîk a, a zia viau asin. Lêrh deuh hlek lo se chuan vawi khat han chhài zuai pawh ka pawi ti miah lo; mahse, a sâng lua deuh chu a ni," nui hawk hawk chung chuan a ti leh a.

Hminga hian a hre chiang tawh ang. Kei chu kan vêngah ka awm tam lo ka tih tawh kha, ka lêng chhuak lo bawk nèn, mi chanchin hi ka hre lo viau bawk.

In ka thlen chuan mu nghâl mai lo chuan laptop ka on leh rih a, Mami nèna kan thlalâk chu ka en kual leh phawt a. Mami thlalâk ka hmuh leh tâkah chuan kan inhmuh hnuhnun ber țum kha ka ngaihtuah chhuak leh uar uar a.

*******

"Naktûkah ka haw chho tawh dâwn."

"Chennai-ah min lo tlawh leh lawk dâwn lo em ni?" ka ti ve thung.

A chhoh ni tùr thu hi ka hre lâwk tho nain ka hriat chian meuh chuan ka huphurh lâwk tak tak. Kei pawh chhoh thuai chu ka tum tho a, ka hna hi chiangkuang taka ka bànsan phawt a ngaiin ka hria a, chu chu ka la tifel lo.

An in luahah ka awm ve reng a, a chho dâwn tih ka hriat vànga tlawh ka ni rêng a ni.

"Ticket lâk fel a ni tawh alawm! I sawi har e!"

"Ticket in la thut a nih kha, chhoh i châk tawh ka ti."

Ka kut vuanin," Ka chhûngte'n min tihfelsak vek atin ni. Rawn tlawh leh che pawh ka duh viau nain hun a awm tawh lo a nih hi. I rawn chho ve vat tho ang chu, ka lo nghâk reng ang che," a ti sep sep a.

"Ka ngai dâwn che asin."

Ka thil sawi zet chuh, a naupanchhia ka ti hnuhnawh kher mai.

"Kei deuh hian ka ngai ngawt ang che, ka ngai dâwn lutuk che."

A cousin hmeichhia kha a rawn hâwng ve tawh a, room lama a awm daih vàngin mitmei vèn tùr a awm lo. Mipa lah kha kâr hmasa khân Aizawlah a thlâwk chho tawh bawk, kan free reuh phian.

"Zanin chu hmun danga riak lovin hetah riak tawh rawh aw, room khat a âwl dâwn tho sia."

Sàwmna duhawm chu ka hnar phal hauh lo. Naktûk maiah an hâw chho dâwn a, ka hmuh theih hun chhûng a rei dâwn lo lutuk.

"Chuti, zanin chu tlaivâr ang aw."

Zanriah hnuhnung chu kan kîl tlâng a, a cousin hmeichhia pawh chuan kan boruak chu a hre thiam ve tho a, hun remchâng min pe hnem thiam viau.

A thawmhnaw a siam fel vek tawh a, bengbeh leh țhi ka pêk kha a inbel a, thla kan la dùn hnem viau bawk. Kei ngei pawhin ka birthday -a țhi min leisak awrhin T-shirt dum mawi zet min leisak ka ha bawk.

"Ih maw, Pui, ka ngaihtuah țhìn a, hun remchâng kan neih pawh hian min khawih hi i tum ngai miah lo va, a mak ka ti țhìn. Min duh vak lo nge i ît zâwng ka ni lo ve hrim hrim zâwk?"

Light kan tithim deuh vek tawh, an sitting room ve deuh zàu vak loa long chair-ah chuan ka țhu mu deuh a, ani thung chu ka sîrah rem lo zet hian ka âwm nghèng deuh hian a rawn bawk thung a. Zàn a rei deuh tawh nain mut chu kan tum chuang lo, a cousin nèn khum khatah an mu țhìn a, a cousin chu a mu daih tawh thung.

"Kan inneih hun atan ka khêk a ni. Ka insûm hrâm hrâm a, mipa hrisêl țha tak ka ni bawk nèn, ka insùm nasatzia hi hria la mak i ti zâwk ang," ka ti a.

Ka hmangaih a, duhtâwka khuma han suasam chu ka châk asin. Kan tleiràwl chhoh laia sande school-a kan thu zirte kha lo zir lo ila ka ti tak tak, a nih loh pawhin lo hre lo tal ila... Ka insûm viau asin, mipa rilru a hre pha hauh lo ang.

"A nih, duh ta tlat ila?"

"I duhawm reuh thlâwt! Chuan, ka insûm hrâm hrâmna chu tihnghìn dawt dawt a ni ngei ang."

A nui sen sen a, a hmel pawisawi lo tak chu a duhawm lutuk a, a hmuiah ka zuk fawhsak ngawr ngawr a.

"Ka lâwm e."

Ka thlah mai duh ta lo. Ani pawh chuan min rawn hnaih sauh a, kan hmui insi rengin kan taksa pawh a inthlawp zaih a, a vun nêm leh nâl han chu deh a nuam takzet.

"Ka hmu khât tawh dâwn che sia, kan inhmuh hnuhnun ber-"

A țawng leh tùr chu ka lo titàwp chat. Ani pawhin sawi zawm a tum tawh bîk lo, kan duhâm sâwt viau mai.

Kan pahnih chauhin kan awm emaw kan tih lai chuan room kawngka a rawn ri ta thut a, kan thil tih lai chu kan tàwp dùn chiang lutuk. Che ngam lo chuan kan thaw dùn hle hle ringawt, bathroom kawngkhàr a rîk leh tâkah chuan a tho vat a, bedsheet va la vatin min rawn khuh a, ani pawh a rawn mu ve leh nghâl tho.

Kan thil tih lai pawh chhunzawm a rem tawh lo. Ka chetsualpui teuh hle tih ka ngaihtuah chuan ka inthiam lo viau a, kan inneih hun atân ka khêk chu inneih hmain a pâr mawi ka lo lâwr țêp a ni, a bulah hial ka lo sawi chhuak tawh si a, ka zak hial zâwk.

Zîng khawvàr thleng chuan engtin mah kan awm tawh lo. Ka chetsualpui teuh lutuk avàng chuan ka inthiam lo va, nupuia neih ka tumna a lian sauh bawk.

"Ka rawn chhoh veleh palai ka rawn tîr ang aw, nupuia neih che ka duh a nia," ka ti a.

Mut kham lo tih hriat zeta meng phelh phang chuan," Palai maw?! Nupui neih i duh tawh em ni?" a ti a.

"Nang ka tawn ațang che khân nupui neih ka duh tawh a ni."

"Mahse, Israel ka ni asin."

"Engtin a?!!! Chutiang chu eng thil nge ni ngai? Mizo i nih kha."

"Israel ka ni ka ti, nupui atân min nei thei lo ang?"

"Fiamthu pawhin sawi lo teh! Mizo chu Mizo kan ni mai alawm."

"Israel-ah kan pêm dâwn."

"Chutiang sawi lo teh," tiin ka nui hawk a, a fiamthu thawh dàn chu ka duh dàn a ni miah lo.

"Ka rawn chhoh veleh palai ka rawn tîr ang, ka neih theih loh che chuan ka ru bo che a ni mai."

"Ni lo, a theih loh! Min nghâk ve rih ang chu. Fanu upa ber ka ni ve bawk sia."

"A theih loh! Ka neih theih loh che chuan ka thin a rim viau ang."

Kan țawng ta rih lo.

Ka thlah thlap, kan inhnialna ho tê kha a ngai eng emaw viau ang tih ka hlau hnuhnawh ta. Ka nghâk reng thei, a rem theih hun chu engti chen pawh ni se ka nghâk reng thei ang.

"Tluang deuhin in thlâwk dáwn nia."

"Aw le, kan inhmuh hma zawng mangțha le aw, ka hmangaih che."

Hei hi a țawngkam ka hriat hnuhnung ber chu a ni. Min hmangaih thu min hrilh tal a, a zia deuh.

Mahse, ka call thei lo va, ka be thei hek lo. Kâr tam ral hmain Mizoramah ka chho a, a chanchin ka zâwt chiang nghâl. Israel ramah chuan an lo pêm tak tak nia!! Dâwt min lo hrilh miah lo nia, a sawi lai khân fiamthuah ka ngaihsak kha a ni tak si a. Chu pawh chu lo ni se, min be duh miah lo chu mak ka ti a ni, ka theih ang angin biakpawh ka tum, ka fail zêl. Fb lam ni se a khawih ngai tawh hek lo, mak ka ti asin. Min hmangaih thu kha min hrilh bawk si a, min kalsan bawk si a.

*MI, A PÂWNLAM LAN DÀNAH TEH SUH, A THIL TIHAH TEH ZÂWK RAWH*

☆LTK☆ - 3 By Dingdi Pachuau

Hminga remruatnain Afakite inah chuan kan lêng a, ka vawi khat lènna a ni a, in an nei nuam reuh phian. A zau lutuk lo nain a fel thlap a, an che fel tih a hriat hle mai.

Min lo làwm thiam khawp mai. A nau admission a rawn tihpui kha chu a patea thawhna khawthlang lama mi rethei ve takte fa a lo nia, tunah phei chuan a pateate in, Serkawnah a awm daih tawh nghe nghe. A patea hman loh vàngin admission a rawn tihpui chauh a lo ni a, a fel reuh khawp mai.

"In lo lêng vang vang sia, thingpui tui táwk ka lum ang che u aw?"

Hminga chuan," Kan hnial ngam nâng," a lo ti zauh a, Afaki chu a nui sâng a.

A nu leh pate chuan min be ve luam nain an inthiar fihlîm ta thuai a, Hminga pek chuan," An zei reuh khawp mai," a ti zui sar sar a.

Afaki hi nula fel tak a nih ka ring. Min duh tih chu tilang tho mah se a over lo va, mitmei a vêng thiam khawpin ka hria. Nula fing fel tak chu a nih dâwn hi, a aw chhuak a zaidam a, a nui sâng peih reng bawk.

Nge kan bulah chauh hian hetiang hi a lo ni zâwk? Nulat lai hi nungchang thup hun lai a ni ve a, duh takte bulah phei chuan tlangvâlte pawhin kan thup ve theih viau țhin hi maw.

Hminga pawhin chance chu min pe ve chiang, ngai ka ti hran lêm lo nain ka sawi lang chuang lo.

Dik tak chuan ka phûr zar lo a ni. Mami laka ka rilru pêk ang khân tu nula mah hi ka en thei lo va, ka rilru zawng zawng ka pe thei hek lo. A hma pawhin Hminga hian nula dang min sawipui sateh tawh a, ka ngaihven thei tak tak lo a ni. Ka ti khawngaihthlâk mai mai dâwnin ka hre tlat a, inham buai loh mai finthlâk ka ti țhìn.

Tunah hian step thar kâi ve tùrin ka inbuatsaih leh mêk chu a ni a, kum a lo vei tam ve ta a, ka duh ber Mami lah biakpawh theih loh, a chanchin pakhat tê mah hriat theih loh a ni bur bawk si a. Pasal pawh a lo nei daih tawh maithei asin, ka biak theiha a awm duh loh dànah min theihnghilh țhak a tum tihna a ni ang a, kei ang lo tak hian hlim takin a lo awm thei reng asin. Awmna ngai renga awm lova hma lam pan tùr ka ni ve tawh.

Kei akâr min lo duh ve hi lâwm tùr ka ni zâwk. A hnua ka hriat dànin Afaki chu nula fel, kohhran pawha inhmang tak a lo ni a, bâkah hnathawh nei a lo ni bawk. A hmel chhe lo va, nu leh pa tam zâwk pawhin mo atân an awh tùr a ni, ka vànnei hle zâwk a ni.

Min duh thiam a, zîngah min rawn wish thlap a, thawh pawh a tho hma țhìn a nih dâwn hi. Zîng tina a duhsakna thu ziak han hmuh reng mai chu, a tìrah chuan ka ning țêp a; mahse, chutiang a ti peih ringawt pawh chu ka fak leh ta zâwk a. A hnu deuhah phei chuan a message hmuh loh chuan kim ta lo riaua inhriatna ka nei chho a, ka duh viau lo nain khawngaihna rilru hial ka nei chho leh a, ka theih ang angin ka chhâng lêt ve ta zâwk țhìn.

Kan inkawp ve deuh tâk hnuah chuan kan inah pawh ka hruai ve ta hial a, ka nu leh pate lah chu an lo lâwm khawp lehnghâl a, kan inah hmeichhia ka hruai lût ngai si lo va, ka bialnuah an lo ngai nghâl hmiah rêng a ni.

Sunday a ni a, ruah a sùr nasat avàngin inkhâwm ka peih lo kher mai. Pathianah piangthar chiang vêk vâwk ni lo mah ila inkhâwm hi chu ka dam phawt chuan ka țhulh duh bîk lo. Sande school ka ngai pawimawh viau bawk, kan thu zir vànga Mami pawh kha chêtsualpui lo hrâm hrâm ka ni țhìn rêng a ni.

Peih lo zet chuan ka insiam a, Hminga ka text a, ani phei chuan inkhâwm a lo tum lo. Ka nu nèn kan chhuak a, inkhâwm pawh kan tam fahran lo kher mai. Piangthar țha ber ni àwm fahranin ruah sûr buan buan hnuaiah ka inkhâwm ve chu a ni si a, ka pianthar țhat hmel lutuk a, ka nuih a za zâwk.

Nula țhutna pawh a ruak deuh huai mai. Chhelovi erawh chiang takin ka hmu, he nu hi engtizia nge ni ka hmu thei riau, ka ngaihven deuh nge maw ni le? Mahse, ka ngaihtuah zui ngai loh kha.

Kan inkhâwm chhûng zawngin ka mitsìr ru reng a, he nu hi ka ngaihtuah chian poh leh mak ka ti tlat. Inkhâwm chhûng chuan a chêt àwm pawh ka hre lo, a țhu ding ah mai a, thu sawitu chiah a en kal reng a nih ka ring, a hnung lama țhu ka nih vàngin ka hmu thei chiah lo.

Inkhâwm bànah pawh ruah a la sûr tho. Hâw lawk lovin biak in bathlàrah chuan kan ding khâwm rih a, Chhelovi pawh kan piah deuhah chuan dingin pâwn lam chu a en vang vang reng a, ruah sûr chu a àwn êm avàngin nihliap khuma hàw pawhin kan huh vek thei tho tlat a ni.

Amah chauhin a ding leh ngal reuh a, țhian a nei miah lo hi mak ka ti. A awm dàn leh nun dàn an sawi ka hriat ve te kha tak tak pawh lo ni ta tehrêng se, țhian neih miah loh chu mak ka la ti tho. Kan vênga a awmna a rei tawh tho si a, nula tu emaw ber pawhin kawm ve àwm tak.

Tlangvâl pawhin an be chuang lo va, en erawh an en duh viau. Kei ngei pawh ka bãng chuang lo chu a nih hi, a hmel hi hmuhnawm ka ti tlat, a țha bial kel reuh a, bâkah, zùn a nei tlat.

Engin nge min mawlh tehrêng ni, ka pan phei a, pâwn lam a thlîr vang vang chu," Hàn tawh se i tih hmel hle mai," nui chung hian ka va ti a.

A hmêla maktihna lang chu ka hmu hman, tihlan loh hrâm erawh a tum a nih ka ring.

Min rawn en zawk a, hawi lêt leh nghâlin," Nia," a ti sap a, a lài deuh nge ni, a pheikhawk chhîp zum chuan chhuat chu a khâwng deuh dat dat a.

A lài ve theia ka rin loh nèn, a nun dàn an sawi aţang hi chuan chiang kel kawla min en chunga zei taka min chhàn lêt ka ring deuh rawk a, min melh peih lo pawh a ni thei tho bawk a.

A aw lah chu a thâm deuh chhâlh a. Aw sîn ril rel leh tliang lam deuh a neih ka rin nèn, ka rin dàn hi a dik lo zêl a nih hi.

A inkam sâng ve reuh viau nain ka koki a chen chauh mai a, nula lian chu a ni lo a nih hi. A pian erawh a nalh reuh fú, a mawng bâwr a nalh reuh tlat.

"A sûr tam tawh tiraw?"

"Nia..."

Min chhâng țha duh lo reuh lutuk a, a induh deuh emaw ni ka ti hial. Biak kha ka châk lutuk bîk lo va, engvànga va bia nge ka nih pawh ka hre lo, ka thin a rim deuh ringawt nia. Ka va be ta kher kher kha ka inchhîr rum rum, mi induh kual vel biak hi ka peih lo.

"A hàn țan ta."

Ka biak loh hnu rei vak lovah chuan a rawn ti hliai a. Nia, a lo zia hret tawh a, ruah sûr ãwn deuh pawh kha a lo ngîl tawh a, sûr buan buan tia sawi tùr pawh a ni tawh lo.

"I hâw nghâl dâwn em ni?"

"A zia deuh tawh sia, ka hâw mai ang," a ti a, a nihliap chu a tiparh a, ka lam hawia rawn nui sakin," A nih mai aw," a ti sap a, a kal ta nghâl a.

Ka en zui reng. A nui kha a nalh ka ti thlâwt, rei lo tê chhûng mah ni se thil mawi tak, ka mitthlaa châm reng tùr a ni tih ka hria.

Zàna ka inkhâwm leh pawhin ani pawh chu a lo inkhâwm leh tho. Inkhâwm a peih reuh viau a nih dâwn hi, miin a chanchin an sawi ka hriat dàn kha ka ring ta lo deuh hlek a; mahse, a thil tih țhin thup mawi nân leh a lang a mawi atân a ti pawh a ni thei tho. A chungchâng an sawi ka hriat hmasak nual tawh avàngin a chunga ka rilru put a dik lo hû tawh a, a fuh chiah lo.

Mahse, he nu tê hi mak tihna deuh ka nei tlat. A inkhâwm leh mi zînga a awm ka lo hmu ve ta nual, a țawng ve ngai lo va, a che ve sek ngai lo. Zài hunah țha takin a zâi mai a, țhiante biak rûk sek leh hawi kual ruai ruai a nei ngai lo, țhian a neih loh vàng pawh a ni mahna le. A zahawm ru riau ka ti tlat, a chezia hian ka mit a la tlat zêl.

*******

"Zanin chu lo lêng la?"

"Ka hman lo tlat mai, naupangho test paper check ka ngai a."

"A nih tak chu maw le, i buai ve thei sia tiraw? Kei lah hian ka ngai thei si che a," a rawn ti leh a.

"Ka ngai lo bîk lo che, nia, min hriat thiam ka ngai a nih hi. Naktûk zànah chuan ka hman tawh ngei ang," ka ti a, nuam lo chu ka ti ve reng.

"A pawi lo, naktûk zana i lo lèn hman dâwn tho chuan. I buai tih ka hria alawm."

"Naktûk zànah chuan ngei ngeiin aw."

A tûk zànah chuan ka va lêng ta ngei, Hminga pawh ka sâwm chuang lo. An chhûngte hmun danga mi an lo zin niin, an lo awm ve nual a. Afaki chuan min hmel hriattîr diat diat a, nui sângin min chibai hlawm a.

Tleirâwl chhuak zawt mai Awmtei ti a a hming a sawi chuan," U Afaki hian a sawi zing khawp mai che a, ka hmu thei che chu ka lâwm hle mai. I fel viau pawh ka ring," a rawn ti sar sar a.

"A va lâwmawm ve aw! Min lo sawi tak tak maw?" ka ti ve a.

"Tehréng mai, a duh teh che a nia. Inkawp reng rawh u aw, in inhmeh ka ti tak tak a ni," a ti leh bawrh bawrh a.

"Min lo duh tak tak loh chuan?"

"U Afaki hi chuan, lum hlumah pawh a hlawh duh ang che."

Kan nui dùn var var a, Afaki, thingpui kenga lo kal chuan," Eng nge in lo nuih vur vur a? Min lo rêl a ni maw?" a ti a.

"Rêl deuh hlek."

"In va sual tak! Ka kal sawn hlek chhûng pawhin min lo rêl hman a nia, ka kal sawn tawh miah lo ang," a ti nghat nghat a, a ti der tih kan hre tho va, engah mah kan ngai lo.

A hnu deuhah an bathlàrah kan țhu chhuak ta daih a, inchhûng lamah chuan an tam deuh a, an ri nuai nuai mai si a.

"I lo ning hman em? Kan ri nuai nuai mai si a."

Nui suk pah hian," Ning lo ve, a khawharthlâk loh alawm," ka lo ti vat a.

"Ka chhûngte hi hmu ve la ka tih vàng a nia lêng tùra ka sàwm chhan che chu. An hmu châk che a."

A chhûngte bulah min lo sawi ve țhìn tih hriat chu a nuam ka ti. Min duh lo ni se a sawi ngai lo ang, bâkah, min duh der ve viau hi a țha ve tlat.

"An fel tliar tliar khawp mai, tlangvâl a pumpa ka zak ve țêp asin."

A nui hak hak a," A zahthlâk loh e, i lâr teh a nia," a ti siam siam a.

"Chhûngte bulah chauh hian ka lo lâr ang e!" ka ti zauh a.

No zet hian min rawn melh sar a, ka lo en ve tho avàng chuan zak deuh hlek tih hriat tak hian a nui deuh a.

"Khatiang khân ti kher lo la."

"Engtin?"

"A, i lâr sa reng alawm. Keimahah phei hi chuan engtik lai pawhin i lâr reng alawm," a ti sap a.

"Tak tak?" tiin ka hnaih sauh a.

"Tak tak," uar deuh hian a ti hliai phawt a, chutah," I lakah hian ka ni ve tho em?" a ti leh sap a.

"Ni chiang e."

"Ka tih vàng maiin i ti ve mai mai tiraw?"

"I hre duh chiah em?" Hnaih zetah chuan kan inmelh ta ràn mai.

Afaki hi a zei ka ti thlâwt. Hetiang hi ngaihzàwn an nuam, min tihhlim dàn a hria a, a țawngkam mai ni lo a mitmeng leh chêtzia thlengin mi lèm dàn a thiam, eng mah zirtîr chawp a ngai hauh lo.

Kan indùt mawlh mawlh a, a thaw leh hak țhìn chuan ka thisen a tisâng lek lek mai. Ka duhâm sâwt khawp mai a, ka kut pawhin a awmhmun a sawn nasa khawp mai.

"Puia...?"

A aw làwi rât mai leh a thaw, rang deuh sek sek chu kan thil tih vàng a ni tih ka hai bîk hauh lo.

"A tihchi loh...a nia. Min rawn hmu hlauh ang e."

Engtin kan awm vak pawh a ni lo, nula leh tlangvâl inngaizâwng duhthawh deuh awm dàn bâk ka pèl hauh lo.

"Min duh tak tak lo tihna a ni thei em?"

A ngawi deuh hlek a, kei erawh chuan ka kut chu ka la sawn duh hauh lo.

"Ka duh che tih i hria alawm."

"Chuti?"

"Ih...-"

"Âwmbâwr tal pawh ka khawih i phal lo maw?" ka ti deuh sak a.

Thaw hawk pah hian," Ni lo...Aih, ka phal alawm; mahse..." a ti a, a ngawi leh rih a.

Mi dang chuan kan thâwm leh țawng an rawn hre pha lo hrim hrim, kan țawng zàwi a, thâwm lah kan siam hek lo, kan thaw rî a ni mai.

"Mahse eng nge?"

"Thil țha tak a ni lo alawm, kan insûm thei lo palh ang."

Ka tàwp ta chat. Ni e, ka lo ngaihtuah pha tawh miah lo, Mami pawh kha hetiang chiah hian a bul țanna pawh ho tê, a tàwp lam erawh buaithlâk lek lek a nih kha, sande school-a kan thu zir pawh ka theihnghilh țhak nghe nghe kha. Tlangvâl țha ka ni ka ti hauh lo; mahse, hemi kawngah kher hi chuan ka inchhuang ve asin.

*******

Ni a sa vawl vawl viau mai. Ka nuin damdawi lei tùr min rawn hrilh a, chumi zawng chuan damdawi dàwr tin mai chu ka kal dun dun a, a tàwpah ka nu min chah ngei mai chu ka hmu fuh ta hrâm a.

Pawisa kan inkìr lai chuan hmeichhe aw thám chhálh maiin," Ka pi, vitamin țha ber mai min lo pe teh," a tih chuan ka lo en vat, a aw kha ka hriat hnu a ni miau a.

Chhelovi. Eng nge Aizawlah hian a tih ve ni? A inak bâwr viau lehnghâl a, eng tak chu lei ni maw?

Ka en reng avàng chuan min rawn en ve zawk a, a hawi sawn vat nain min rawn en nawn leh nghâl vat.

Min hre ve chiang, min nuih sak tlat, ka thidang lo chauhin ka hria!

"Kha le, hei pawisa kîr chu aw."

Pawisa kîr chu ka la a, Chhelovi chuan min lo en tawh lo, damdawi lam chu a lo en tawh.

Han biak ka duh viau nain a hming ka hre bawk si lo, min en tawh bawk si lo nèn, rilru bet lo zet chuan ka chhuak ta a.

Ka nuteite scooty ka hawl chhuak bawk a, Laipuitlangah Mamite in lamah ka chho a, an in hi Aizawl ka kal apiangin hmu tùrin ka kal ziah, amah kha hmuh leh ka inring tlat țhìn. Ka biak duh tawh lo mah se a hmel vawi khat tal hmuh leh ka châk țhìn a, ka hmuh ka inring deuh bawk țhìn.

A ngai têin beidawng zetin ka haw leh vang vang a, ka hàw lamah chuan bazar bungkawnah traffic a jam vàngin ka ding deuh reng a, i20 vâr mawi zet maia Chhelovi chuang chu ka hmu zui zat, min rawn hmu ve kher lo ang chu.

Ka en deuh reng, a hlim hmel viauin ka hria. Driver chu ka hmu chiang thei tlat lo, kan tawlh hlek theih tâk hnuah ka hmu chiang thei ta chauh.

Putar lam deuh, hmulphurh chhe ve deuh mai hian a lo khalh niin.

Ka thaw hawk ringawt. He nu hi an sawi ang deuh kha a lo ni tak tak ang em? Nge a chhûngte tu emaw tak a lo ni zâwk? A putea, a patea, atua pawh chu lo ni se a hmel chhe tho tho mai. A chhûngte a ni thei lo ang, ka rilru a dam thei lo.

A hausa hle chu a ni phawt ang maw? Hausa lo se a kawp duh hauh lo ang, damdawi kha tu tân tak lei ang maw? Amah lah kha a dam țhat hmel si a, saw pa lah saw a chaw lâk a tlèm hmel si loh.

Hm, ka rilru a tibuai, a duh duhin a awm thei alawm. A nun a nia, ka lo buai chiamna tùr a awm lo ve.

*TAKNA TAK TAK NEI LO LEH THINLUNG AȚANGA CHHUAK NI LÊM LO FAKNA TU HNÊNAH MAH CHHÂK CHHUAK SUH*

☆LTK☆ - 4 By Dingdi Pachuau

July thla pawh a lo ral leh dâwn ta. Ruah lah chu a sûr duh khawp mai a, a ninawm leh lek lek tawh. Hminga nèn zànah a bialnu rîmin kan chhuak zing si a, chance pêk a ngai ziah bawk si, ruah sûr nèn, ka ning. He pa hi chu duh aiin a duh zing mah mah a ni, chance pêk ziah a ngai a, car-ah ka lo nghâk ziah lehnghâl.

Keini țhian dùn hi chu inkàwm ngeih ve hle e ti lo chuan kan nungchang a inang lo viau. Ani hi chuan hmeichhia a ngam a, a bialnu apiang mutpui a tum ziah. A hlawhtling țhìn bawkin ka hria, tuna a bialnu pawh hi kan hruai chhuak zing leh tawh khawp mai. Hmeichhia hi an lo heti rêng țhìn em ni aw ka tih phah ve fo, pâwn lamah lah chuan sual kai lo leh thianghlim ber angin an lang a, an thil țha lo tih thup nân kohhran an bèl leh a, an nun chhûngril hi a bawlhhlawh ngawih ngawih ka ti fo.

Ka țha e ka ti bîk hauh lo, a chângin zu ka in ve tho a, sex-ah erawh ka fihlîm chiang; mahse, ka ngaihtuah ve fo. A takin ka che chhuak lo a ni mai, bialnu neih chuan hun fâl kan lo nei lo thei lo va, han fawh leh han chùl ruai chu ka ti ve tho bawk. An pangti nêm nâl han han tawh chuan thisen chu a sâng duh khawp, rilru pawh control a har rêng. Mami pawh ka mutpui țêp rêng kha, negative leh positive innâwk hi chu țêk chhuai hi a awm duh rêng a ni.

Mahse, tûn hnua ka ngaihtuah hian a châng chuan ka inchhîr deuh lek lek a, Mami kha lo mutpui hle hle ila, ka fa kha lo pâi se, hetiang hian kan awm kher lo maithei tih ka ngaihtuah chhuak fo. Pà lo min lo ti viau ang em le? Khatiang thlenpui tawha ka puitlin lo kha mak min ti ve ngawtin ka ring țhìn.

Kawngka chu a rawn inhawng a, Hminga chu pawr deuh phung hian a rawn lût a, a sam leh jacket chu a rawn huh deuh phung bawk a, a la rawn nui vur vur zui.

"A nuin min phâwk teuh lutuk a!" A sam hui țha puat pah chuan a ti a.

"Țhianpa, insûm ve deuh teh u."

"Amahin min nawr zêl alawm, a lo duh ve tho si a," a tih chuan ka ngawi ta. A hmeichhia zâwkin chêt a lâk hmasak tlat chuan mipa tân chuan insùm a har dâwn lutuk.

"A râi mai ang?"

"Teuh lo, tûnlaiah an râi duh tawh hlei nem, an fing vek tawh," a lo ti leh mai a.

Ka hre thiam ve uar uar mai.

Taitesena section, Y.M.A-in hla kan zir a, a chhan chu member tharte hian lêngkhâwm hla an thiam lo lutuk tawh a, chu chu hruaitute'n zirtîr an duh a ni. Competition kan nei dâwn a, kan zir ngawrh ve hle a ni.

Chhelovi a rawn lût zah zah a, ka hnunga tlangvâl țhuho chu an thûm deuh nghâl sap sap, ka hnung chiaha țhu chuan," A hmel hi chu a țha ngawt asin, a lêrh ve deuh mai pawh a," a ti sup a, a piaha mi thung chuan," Fanuin a nu a chhùn," a lo ti sup thung a.

"A chhe lo chiang alawm; mahse, a hlauhawm ru tawh ang."

"Pu Chhuana hmei an ti."

"Chance nei ve ta ila, kei chu ka hnial hauh lo ang," a tih chuan a bula mite chu an lo nui hawk a.

Inthlahrun hmel deuh takin a rawn țhu a, tlar hma sîr berah a rawn țhu. Țhian a rawn kalpui ve lo va, heti tak maia a mal hi mak ka ti lo thei lo. Ka en zui ru reng a, a hawi kual lo va, a che sek hek lo. Lêrh tia an sawi hi ka awih lo lek lek hial, a chezia en hian mi lêrh chu a ni lo tlat a ni. A rûk taka a lo lêrh a nih ngawt loh chuan; mahse, a mah chauha in a han luah ngawt mai hi chu mak ka ti lo thei lo, a chanchin kimchang taka hriat ka châk ngawt mai.

Hminga chuan min rawn nghawk deuh salh pah chuan," En zui zêl suh, i chang pha chuang lo. Officer lian i ngam dâwn em ni? Bâkah, a hlauhawm tawh a nia," a rawn ti sar sar a.

*******

TLUANGPUII

~~~~~~~~~~

A va cool tak! A chhe lo asin, a chhe lo ka ti ngawih ngawih. Ka thin chu amah ka hmuh leh avàngin a phu dup dup a, hetiang hian tu mipa mah hian ka thin an la tiphu nasa ngai lo. Han biak ka châk viau a; mahse, a hming ka hre tlat lo. Biak ina min biak lah khân mak ka ti lutuk a, ka lâwm leh hlim bawk si khân sawi tùr rêng rêng ka hre lo a nih kha. Ka chhànna kha a chhum bung tih ka hre nain sawi zawm tùr ka hre hlawl lo, min tibuai vek. Tlangvâlin țha taka min biak vawi khatna a ni hial ang, mak ka ti lutuk.

Rahsivenga in ka luahna hi a rei ve ta. Hmeichhia mahni chauha in luah chu a mawi lêm lo tih ka hria; mahse, tih theih ka nei lo. Ka nuin min duh mawlh si lo va, ka pa lah a boralna a rei tawh si. Ka pa kha bank manager a ni țhìn a, a boral dâwn khân a ro kha min hnutchhiah lo phei se chuan tunah te hian ka va rethei dáwn tak! Ka nu lahin pasal dang a ûm leh daih bawk si a.

Ka pa boral hian kum 14 ka ni ve tawh. In leh lo chu ka nu leh kei min hnutchhiah a, ka pa boral ațanga rei vak loah chuan ka nu chuan zu in a chîng a, ka pa thihsan pawisa pawh zu manah a hmang ral nasa. Pawisa a nei thei sia, tlangvâl chhe lo tak tak a rawn hawpui ziah. An rui chhe thei si, an râk bengchheng peih nèn, ka lo hlau thei khawp mai a, a harhfìm ve deuh laiin ka hau ve țhìn.

Ka hàu chu a ngai thei lo va, in ațang chuan a chhuak ta daih a. Ka hre thiam lo lutuk a, ka pateate ka phone vat. Kan zawng kual nasa a, a hnu deuhah tlangvâl a ûm daih tih kan hria a, ka hàu vàng kha a nih ka ring a, hrehawm ka ti lutuk. Miin an hre pung ve zêl bawk sia, ka zak thei lutuk ringawt. Inah keimah chauhin ka awm duh lo va, ka pateate nupa chuan an hnênah min la ta a ni.

Ka patea hian min duat a, a nupui a lo fel êm êm bawk. Ka pa chhûngte lam hi mi rethei tu mah an awm lo hlauh a, chu chu ka vànneih phah viau. Lehkha ka zir thei a, ka pa ro min hnutchhiah pawh hmang hauh lovin min châwm vek a, nurse ka zir chhuak a, private hospital-ah ka inhlawh ve lâwp lâwp a, ka hlawh neih ve chhun erawh ka pateate ka pe țhìn.

Ka nutei (patea nupui) chuan," Tluangpui, min pe tawh suh, i mamawh lei nân hmang rawh, a nih loh pawhin khâwl zêl la, nakinah i mamawh zâwk ang," min ti țhìn; mahse, min châwm a, hlawh ka neih chuan ka rulh lêt ve a ngai tih ka hria.

Ka nu chanchin chu ka hre zauh zauh, a duhawm lo thei khawp. A pasal ûm nèn kha chuan an ințhen leh deuh nghâl mai a, pawisa nei deuh apiang a kawp lâwr mai. Amah a chhe lo va, a puan a nalh bâkah a vun a nalh bawk a, mipa chuan an iai lo thei khawp ang; mahse, hrehawm ka lo ti ngawih ngawih, in bîk pawh nei lova pawisa pe theitu apiang hnêna khawsak ngawt zêl chu, a fanu hi ka lo zak ngawih ngawih. Miin ' Nu chhe lo deuh inzuar țhìn fanu kha a nih saw' tiin hnung lamah min sawi țhìnin ka hre thìn a, hrehawm ka ti. Aizawl pawh hi nuam ka ti vak lo, ka nu chanchin hi an sawi ka hre zauh zauh bawk si a.

Aizawla awm reng àwm ka nih tehlul nèn, ka nu leh pa diary ka hài chhuak a, ka pa thih hlimchhàwn vêla ka nu diary ziah ațangin unau ka nei tih ka hre chhuak ta tlat a, chu chu zawn chhuah ka duh a, Lungleiah hian ka insawn phei ta a ni. Kan in kha chu mi kan luahtîr a, ka patea ruahmanna vek a ni. In luah man chu bank-ah min dahsak zêl a, nula rethei tak ka ni bîk tawh lo.

Ka pa kha a hmel țha lo va, ka nuin a nei duh kha mak ka ti țhìn. Ka nu kha chu a hmel țha ka ti thei lutuk, a ngo a, ka pa erawh a hàng thung. Ka nu ka chhùn a, ka vun a ngo a, ka pianah pawh ka nu ka chhùn zél; mahse, ka pa kha chhunna lai ka nei ve tho, ka mitmengah leh ka samah ka chhùn. Ka pa kha a sam a kir lek lek a, a țuak nasa viau bawk. Kei pawh chutiang tho chu a ni; mahse, hair colour eng lam deuh ka hmang a, chu chuan tlêmin a khuh thei deuh. Sam dum hi ka awt thei thlâwt, a mawi ka ti.

Ka patea chuan Lunglei lamah hmel hriat a nei ve tho a, 'Pa Chhuan' ka ti mai zêl. Officer a ni a, ani pawh ka patea ang maia hmel țha lêm lo a ni; mahse, ka chungah a fel viau. Inah pawh min rawn tlawh ve zauh zauh, ka unaute chu ka la hre mai rih si lo va, zawn deuh pahin sumdàwnna lam ka khawih pah a ni.

Sumdàwnna hi chu a hming mai a nia, ka patea'n pawisa min rawn thawn ziah a, in luah man leh ka ei tùr zawng zawng a tum vek. Fa an neih loh vàngin an fanuah min ngai hmiah a, kei pawhin ka chhûngte neihchhun an nih vàngin ka ngaihsak êm êm. Unau ka neih ka hmuh chhuah hunah chuan a dang ve deuh mahna, zawn dàn tùr lah ka bangbo êm êm mai si.

Mipa ka be ngai lo va, țhian pawh ka nei ngai lo. Miin min en duh viau hian hrehawm ka ti, ka nu kha ang min ti a niang, min hre chhuak a nih chiah hi tih rilru ka pu ziah. Mi zînga awm pawh nuam ka ti thei lo va, ka mal tlat hmiah mai țhìn. Tlangvâl hawklak țhenkhat hian min chhaih an chîng a, min chhaih dàn lah chu ka duh loh chi hlîr a ni. Ka zak a, min ti-el thei viau chu mak ka ti hran tawh lo, chhàn lêt enah ka en ngai lo thung.

Lungleiah hian chhungkaw pakhat ka chhar thar a, anni hi ka chhûngkaw neihchhun an ni. Kan innêl khawp mai a, Ramthar mawng daihah awm mah se ka hman châng apiangin ka tlawh țhìn, min lo làwm thiam thei si a, anni ka tlawh hi chuan he khawvélah hian ka mal lutuk tih hi ka theihnghilh fo.

Zànah YMA-in hla kan zir leh dâwn a, peih lo viau mah ila hla ka hriat tlèm ém avàngin zir ve ngei ka duh a ni. Miin min en hrek hrek tih hre ru kar mah ila rual pâwl tùra kal tùr ka ni lo va, hla zir tùr ka ni tih ka inhrilh sauh sauh a, phûr lo tak siin ka rilru ka tiphûr lui a, keimah chuan kan zirna tùr hmun chu ka pan leh ta vang vang a.

Mr Cool-a kha ka hmu leh, ka lung a phut dàn a dik lo leh ta. Ka hawi chhuak ngam lo va, ka lài ru êm êm a ni. A rûk tê chuan nuam ka ti veng veng, hetiang rilru hi pu tùr ka ni lo tih ka inhre reng; mahse, ka rilruah hian a awm reng chu a nih hi.

Hla copy sem a nih vàng chuan ka thiam hma viau, zài hi nuam ka ti ve hrim hrim bawk. Ka bula țhu chu a aw a țha hle mai a, a bula zài pawh a nuam, ka aw pawh a țha ve sawtin ka hria.

Chawlh laiin ka phone a rawn ri a, patea a ni tih ka hriat chuan ka chhuak ta vat a.

"Tluangpui, eng nge i tih? I buai em?" a rawn ti a.

"Aih, buai lo ve, hla kan zir a, hei kan chàwl mêk. Eng nge ni ta?" ka ti a.

"A, eng ni lo ve, naktûkah hian rawn phei lawk ka tum a, zanriah chaw min chhum kêp dâwn em ni ang?" a tih chuan phûr zet hian," Aw, tehrêng mai, dâr engtikah nge i lo thlen theih ang?" ka ti a.

"Dâr 5 vêlah chuan ka rawn thleng hmanin ka ring."

"Aw le, ka lo nghâk reng ang che."

Patea lo phei tùr chuan min tihlim hle mai a, ka nui deuh var var reng mai. Hun a neih theih hlauh chuan Ramthar vênga ka chhûngkaw chhar tharte pawh kha ka tlawhpui hman maithei asin.

"A va hlimawm àwm ve!"

Ka phu zawk mai! Cigarette a lo zu vang vang a, min rawn en chuang miah lo mah se keimah bâk min be lo ang, kan bulah mi dang an awm tlat lo.

"Nia..." ka ti ta ringawt a.

"I bialpain thu làwmawm tak a rawn hrilh che a ni maw?"

Hm, bialpa ka neiah a ngai a nih chu. A pawi lo, ka hlut ve hmel deuh alawm.

"Ni maithei."

"A làwmawm duh asin."

"Nia." Bialpa neiin ka awm ve hmiah.

Inbe chhunzawm tawh lo chuan ka lût ta daih a, ani pawh a hnuah a rawn lût. Ka lo en lêm lo nain ka hre thei tho, he pa min biak dàn hi chu min ti-el ni pawhin ka hre lo, mihring pângngai enin min en ve tlat. Ka biak hmasak ngai miah loh hi, mipa fel tak a nih ngei pawh ka ring.

Kan zir rei lutuk lo ve. Kan bàn chuan ka hmanhmawh deuh hlek, ka in luah a hla deuh hlek si a, bâkah kawng lakah tlangvâl hawklak ka tâwk leh ang tih ka hlau, min fiam duhdah thei si.

In luah ka thleng țêp tihah chuan kãwi thim lai deuhah an lo awm leh tak tak, an rùi deuh țhìn bawk sia, ka hlau thei tawp.

"Ehem! I va mal ve!"

"Lo kal ve rawh, inkàwm hlim ang u."

"Pawisa i duh pawhin kan nei a nia."

An nui dar dar a, khur ru dar dar chuan hmanhmawh zetin ka pên hlawk hlawk. Min rawn ûm ang tih ka hlau, ka in luahna hla lutuk hi ka hua.

Hnung lama pên ri khep khep ka hriat vàng chuan ka hlau zual sawt. An zînga pakhat khân min rawn ûm fâl a ni ngei ang, short-cut lama ka kal kher kher chu ka inngei takzet. Kawng pângngaiah khân lo kal hle hle ila țha tùr.

Ka theih anga chakin ka tlân ta dàwr dáwr. Min ûm pha tùr a ni lo, min rawn man hman a nih chuan ka theih ang angin ka sual lêt ang a, ka au vak mai ang.

Ka in luah ka thleng a, hmanhmawh zetin kawngka ka hawng a, ka luh veleh ka kalh nghâl. Ka thin a phu nasa lutuk a, kawngka bulah chuan ka țhu sawp rawp a, ka thâ khùr nasa lutuk avàng chuan ka ding hlei thei lo a ni.

Hetiang a nih dâwn chuan zàn dangah hla ka zir tawh lo ang, zana chhuah hi ka chîng lo viau asin le. Țhian leh kalpui neih loh chuan hmeichhe pakhat tân ringawt chuan a hlauhawm ve êm a ni, zan dangah chuan ka chhuak hma a, ka hâw har ngai lo bawk. Zanin chu ka tlai ve deuh bawk a ni, short cut him lo lamah a ni lehnghâl nèn, a fuh lo vêl vek.

Mutnaah ka țawngțai hnuah chuan ka mu vang vang a, Mr. Cool-a bawk chu ka ngaihtuah leh ta. He pa hian ka ngaihtuahna hi a va luah hneh tak! Zàn ka mut dâwn apiangin ka ngaihtuah lo thei lo, a chhan chu tih-elna tel miah lova min be hmasa bertu a nih ka ring. Min chhaih lo va, mihring pângngai biakin min bia a ni. Ka chanchin hi a la hre ve lo nge, mi pângngaiah min ngai zâwk pawh ka hre lo.

Bialnu a nei ngei ang a, um, a nei ngei ang. A inthuamna inhmeh theihzia leh a mize pà tak si, cool riau bawk si leh țawngkam fel tak si hian min hneh ngawih ngawih, héng zawng zawng aia min hnehtu ber chu hmuhsitna tel hauh lova min bia kha a ni. Tlangvâl mi hìpna ngah zetin min bia a nia, mak ka ti a, ka la âwih thei lo hial a ni. Nge ka hmel lêrh hmel zet hian a mit a la ve zâwk ni ang a, min rawn pawh a tum zâwk ni ang?

Ni lo, a ni lo. He pa hian chutiang zâwngin min en lul lo. Hmeichhe pakhat ve mai angin min en a ni zâwk, a fel êm hi. A inkhâwm ziah lehnghâl a, a chhe lo bawk si. A duh chu a hmu dâwn nasa si a, kei tehlul hi chutiang chuan min en dâwn lo lutuk.

Patea chu tlai dâr 5:30 vêlah a rawn thleng a, ei tùr eng emaw a rawn lei țeuh lehnghâl a, nuteii'n ka thawmhnaw tùr a rawn thawn bawk. Min duat lutuk a, awm dan ka thiam lo lek lek zâwk tawh a ni.

"Bialpa i nei ve tawh em?"

Chaw ei lai mah ni se ka nui vak vak.

"Âwihawm loh e, pate. Nei hman pawh ka nih loh hi, bâkah tuin nge min duh ang?" ka ti nghâl zat a.

"Tluangpui, i nu i chhùn a, nula hmel țha tak i ni alawm."

"Pate, ka hmel hi ka lêrh hmel tiraw?" ka tih chuan min rawn en háw a.

"Engah ngawt maw?"

"Ka hmel hi ka duh lo ngawt mai."

Min en vang vang a," I hmel a țha alawm. I lêrh loh chuan lêrh hmel tih mai mai, engah mah ngai suh, i hmel a țha a, nula zawng zawngte awh mithmul sei mawi tak leh er târh mai i nei a. I mitte hi a mawi a, lêrh hmel ta viauah i inngai mai mai a nih kha," a ti chuar chuar a.

"Ka pa hmel kha lo chhùn zâwk ta ula ka ti țhìn."

A nui hawk hawk a," I la â tak mang e! I pa kha la dam se chuan a va chhuang dâwn țhin tak che êm!" a ti a, chutah," I nu chanchin i hria em?" a ti leh a.

"Hre lo, chanchin țha lo a awm leh em ni?" ka lo ti vat a.

"Awm hran lo ve. Mi nu a luahlàn a; mahse, kha kha chu a rei ve leh deuh ta."

Hetiang hi ka nu dinhmun a nih vàngin ka nu chanchin hre tân chuan zuam ka awl dâwn êm êm si a, hrehawm ka ti rêng a ni. Țha taka awm pawh tum mah ila, hringtunu a dik loh chuan miin min ngai dik lo sa vek tawh dâwn a, mi hmuha inlàr tam loh hi ka duh țhìn rêng a ni.

"I nu pawh hian inhmuh chhuah hun a la nei ve êm ang chu maw?"

Ka ring lo, a dinhmun a tleu tawh a, lei rem hi a rap thiam tawhin ka ring lo. A tâna ka tih theih tâwk chu țawngțai a ni mai. Ka nu tân ka țawngțai ziah a, ka la hmuh leh hriat loh ka unau tân ka dîl țhìn bawk.

*KAN THINRIM TAM BER CHHAN HI CHU KAN CHAPO LEH ÂT VÀNG A NI TLÂNGPUI. DIK IN TI VE EMAW CHU?*

☆LTK☆ - 5 By Dingdi Pachuau

A bialpa Officer Chhuana chuan a rawn phone a ni ngei mai. A sawi ka hriat vuai hman chu 'Ka lo nghák reng ang che' a tih chu a ni, a bialpa chuan hla zir bànah hian a rawn tlawh leh dâwn a nih hmèl, a lo nghâk reng dâwn a nih chu.

Ka cigarette zûk chu ka hîp vang vang a, he nu a hming pawh ka hriat loh 'Chhelovi' titipui harzia leh pawh harzia hi ka ngaihtuah lo thei lo. Ka biak ve chhunah pawh 'Nia', 'Maithei' tih vêl bâkin min chhâng lo a ni a, hmeichhe induhtâwk tak chu a nih ka ring ve ta. Ka lo ngai țha lua deuh a ni ang, mi sawi hi a dik a nih ka ring lehzual ta.

Hla zir bàn veleh a chhuak nghâl vang vang a nia, a bialpa chu a lo nghâkhlel nasa tawh a lo nih dâwn kha. Engati nge ka rilruah hian hmun a rawn chan tlat reuh ni? Ngaihtuah loh ka tum pawhin thil dik lo eng emaw awm ang hian ka nunkhua a hnîm deuh ruih a, ka rilru a kam tlat.

Amah chauha zàn rei lam tawha a hâw chu ka ngaihtuah rilru deuh hlek a, a hnunga zui ve mai duhna rilru ka pu hman a; mahse, a bialpain a rawn tlawh dâwn a, a lo châng ru khiau tawh maithei a, a ngaihtuahawm lo tawp ang ka ti leh hnuhnawh a, ka zui ta lo.

In ka thlena phone ka check chuan Afaki message a lo awm vang tawh. Min duh êm êmtu bialnu ka nei hi ka vànnei asin, a chhe lo viau bawk si.

*In hla zir chu in bang tawh em?*

Ka call ta nghâl a.

"Kan bâng a, in ka thleng chiah a," ka ti a.

"In zir rei hle mai tiraw?"

"Aw, rei ve tho. I la mu nange?"

"Mu lo deuh."

"Inlêng in nei a ni maw?"

A rawn nui har har a," I rawn lèn loh chuan inlêng tùr pawh ka hmu zo lo," a ti phawt a, chutah," I ngaihawm êm a, min rawn text pawh ka nghâk thei lo a nih kha," a ti leh a.

"Ka ngai zâwk che a niang, hei ka rawn call che a nia," ka ti ve thung a.

"Nang chu text aiin call hman i peih zâwk tlat a, a dik tiraw?"

Dik khawp mai. Phone-a thil type nuap nuap hi ka peih záwng a ni ve lo, call hi a rang ber a, hun a hek lo ka ti bawk.

"A dik. Call hi a rang ber alawm."

"Kei chu call-ah hi chuan sawi tùr ka hre lo țhìn a," a tih chuan," Min ngaih thu i sawi thei alawm," ka lo ti vat a.

"Ka sawi tawh kha."

"A sawi nawn leh theih tho, ka ngaithla peih reng a nia," ka ti a.

"Sawi ve tal la?"

"Ka ngai che."

"Kei pawh ka ngai lutuk che, ka hmuh khàt deuh che hian ka ngai che a, ka hmuh ngun che pawhin ka ngai tho che," a ti duah a.

"Min ngaih viau chuan ka rawn kal mai dâwn em niang?" ka tih chuan," Hmmm, i rawn kal peih dâwn tawh lo chiang, sawi el kher lo la," a rawn ti sap a.

"A nih ka lo kal dâwn aw."

"Haha, i peih phawt chuan-"

"Ka rawn kal, lo meng reng rawh," ka ti a, car chahbi lain in ațang chuan ka chhuak nghâl.

Ka va thlen chuan dâr 10:30 vêl chiah a ni a, an in kawta ka ding rî chu a hria a ni ngei ang, kawngka a rawn hawng nghâl bawk a.

"I tih tak tak ka ring pha miah hlei nem," a lo ti sar sar a, a hlim hmel hmuh chu a nuam ngei mai.

"Aw, kan inngai si a."

Rei tak lèn ka tum lo, hmuh hrim hrim ka duh vàng a ni pakhat a, bâkah, min ngaitu hmuh chu châkawm ve deuh mai asin.

A chhûngte an mut tawh vàngin kan thâwm kan dìm a, kan țawng tehchiam lo bawk. Kan țawng chhunah lah kan phun sep sep chauh a, kan inhre vek thei tho. Inhmachhawnin kan țhu a, a chângin kan indût hlak hlak a, a chângin a'n țang der ve bawk a, haw ka tum lahin a phal hauh bawk si lo. Dâr 12 rîk dâwnah ka hâw ta țâwk a, amah ka ngaihtuah vàng a ni mah. Zîngah nguai bûra a thawh ka duh lo a ni.

*******

Favàng boruak chu a nuam viau tawh a, lung pawh a tilêng ve thei lek lek tawh. Mami kha ka ngaihtuah chhuak fo, a chhan chu Afaki nèn kan inzui ngawrh deuh tâk hnu hian ka mumangah ka hmu leh zauh țhìn a, ka be țawng thei ngai miah lo lehnghâl. Afaki hi min duhpui chiah lo nge a thîk ni ang tih te ka ngaihtuah hial țhìn.

Mami, Afaki, Chhelovi. Heng hmeichhe pathum hi ka rilrua ka ngaihtuah ngun deuh an ni. Mami chu ka hmuh phâk lohah a awm tawh a, Afaki chu ka bialnu niin Chhelovi chu Officer Chhuana bialnu, Officers' choice a ni thung. Hmeichhe inang lo zet an ni a, Afaki chu hmeichhe nù zâm mai leh fel tak, țawngkam pawh nêm tak a ni. Chhelovi ka lo ngaihtuah ve ringawt țhìn hi ka inthiam lo va, Afaki ka uiresan ni te hian ka inhre hial; mahse, ka ngaihtuah chhuak lo thei lo. A chhan chu a nui hmel kha ka mitthlaah a châm tlat a ni, khatiang nui hmel ngaihawm sî kha, Mami nui hmelah pawh ka hmu ngai lo. Ka ngaihtuah chhuak fo a, zan khat ka léng haw dàwr têa ka pèn laiin dàwr te piah chiaha scooty ding dat chuan ka mit a la reuh lutuk a, a mawi reuh ka tih vàng a nih bâkah a number chuan ka mit a la zak, a chhan chu ka laptop password-ah ka hmang miau a!

Ka en reng a, a helmet a hlih chiah chuan Chhelovi kha a ni tih ka hria a, mak ka ti lutuk. Helai hnaiah hian in a lo luah reng a nih dâwn hi ka ti rilru a, ka en zui zél.

Garage-ah chuan scooty chu a nawr lût a, ani chu garage sîr step-ah chuan a chho ta, garage chung chiah in chu a luah a nih hmel.

Dàwr nghâktu hnênah chuan chhuanlamah," Ka pi, helai garage chung khi tute'n nge luah a?" ka ti ve zaih.

Ani chuan," Tu nge maw ni kha le? Aizawl lam nula chu a ni ngei mai a, a hming ka theihnghilh daih," a lo ti a.

"E, a la ruak reng emaw ka ti a," ka ti leh zaih, phakar ve lutuk!

Car-a ka luh hma chuan ka hawi chho a, in chu a lo la êng kang mai. Scooty khân a chhuak a, khawiah nge maw a kal reuh ni? A la tlai over lo nain nula tân chuan a fuh vak lo, mawi pawh a mawi lo.

Zirtàwpni a ni a, vawiin chu kan bâng hma ve deuh hlek e. Hminga sikul a kal loh avàngin ka mal hle mai a, a pa Aizawl lamah a hruai a, tûn ni hnih chhúng chu chawlh a la a ni.

Car chuan zawi muangin ka tlân a, zaninah Afaki nèn damlo kan kan tum a, a patea nupui niin damdawi lama beidawng tawh an ni a, a boral hmain hmu ve se min ti a ni.

Bike chak zeta rawn tlân hian min rawn lehpèl a, kan hma lam kawnga oil buakna laiah chuan a tleng chiang kher asin, zawi muanga tlàn tùr asin le!

Kawng sîr deuh taka nu pakhat leh mipa naupang inkài rial chu a va hnâwl a, an tlu chiang kher mai. A ri deuh bur a, second rei lo tê chhûngin chutiang chu thlengin a tàwp leh nghâl. Hmanhmawh zeta car chu tidingin bike khalhtupa pawh ngaihven lo chuan nu pakhat leh naupang lamah chuan ka tlân nghâl vat a. Ka en thuakin Bike khalhtu chu a thi lo tih ka hriat vàng a ni pakhat, kawng chhak lam bangah a han insû a ni, tleng erawh a tleng thui viau.

Nu pakhat chuan a lu a tauh a ni maithei, a bek ațangin thî a rawn chhuak a, "Ka pi, ka pi?" tiin ka ko chiam chiam a, a lu chu a tauh na viau ang tih ka hlau ber, a bul chiaha mipa naupang erawhin hliam a neiin ka hmu lo.

Mi pawh an rawn pung nghâl țawk țawk a, nu chuan ka bân rawn vuanin," Naupang kha...,ngaihven teh," a rawn ti sap a, a la harh țha tih ka hriat chuan naupang chu ka en ta vat a.

A maimichhîng tlat a, a thî a nih chu ka ring lo ve tawp. Ka han pawm a, ka han ko chhin a, a meng chuang lo. A hnu deuhah a awm a rawn insêp deuh dâwrh a, a rawn thaw deuh kâwk kâwk ta bawk a, a kawchhûng lamah thil fel lo a awm a nih ka ring deuh nghâl ringawt. Hlauthâwng fé hian ka ko leh a, ka han sâwi a, engtihna mah a ni chuang lo.

Mi dang an rawn pun khâwm chiam tawh avàngin mipa naupang chu ngaihven hmasak ber a ngai tih ka hria a, ka bul hnaia pa pakhat lo ding hnênah chuan damdawi in ka panpui dâwn tih ka hrilh nghâl. Car ka park-na lamah hmanhmawh zetin ka pawm phei a, Serkawn damdawi in lamah ka tlân ta nghâl a.

Rei lo teah nutling leh bike khalhtu pawh kha damdawi inah an rawn hruai nghâl. Nutling kha chu a harh țha tho nain hliam kha a nei ve tho va, chutiang chiah chuan bike khalhtupa pawh chu.

Mipa naupang chhûngte ka hriat chhun lah chu nultling chu a ni mai a, ani lah hliam a nei tho bawk. Han hrilh chuan tùr ka hre lo, ka mâwl ka ti khawp mai, khalai vêng bul hnaia mite khân an hre ngei àwm si a.

Ka phone ka phawrh dâwn chuan thisen ka ka kai tih ka hre ve chiah. Mipa naupang khân chhûng lamah kher ni lovin pâwn lamah pawh hliam a lo nei reng a nih dâwn kha.

Nula pakhat hmel țha zet hi hmanhmawh zetin a rawn tlân dàwr dáwr a, a hlauhthàwn vàng a ni ngei ang, a hmel chu a dâng hle a, chuti chung pawh chuan hmel țha tak a ni. A chhûngte zînga mi tu emawin thil țha lo tak a tâwk a ni ngei ang, he damdawi inah hian a awm ve ngeiin ka ring bawk.

Nutling bek hliam nei an dahna room-ah hmanhmawh zetin a tlân lût rawk rawk a, a nu a ni ngei ang. Mipa naupang chu tu fa nge ni ta ang? An buaipui rei phian lehnghâl a, a nunna atân a hlauhthàwnawm loh hrâm ka beisei.

"Mipa naupang chhûngte emaw rawn hruaitu emaw in awm em?"

"Ka fapa chu engtin nge a awm?" Ka en vat a, nula emaw ka tih kha nu a lo ni tawh a nih chu! A hmela hlauhthàwnna nasa tak chu tihlan loh hrâm hrâm tum viau mah se a dâng lutuk tlat. A hlauthâwng ngawih ngawih tih a hriat theih tho.

"Ka pi, i fapa chu a ngaihtuahawm tawh loh e, a thâw pawh a pângngai tawh a, a bânah erawh hliam tenau a nei hlek a, a hlauhthàwnawm lo ve," doctor chuan a lo ti vat vat a.

"Ka hmu thei ang tiraw, doctor?"

"Tehrêng mai."

Mipa naupang awmna room-a a luh nghâl avàng chuan hmuh ve ka duh viau tho nain a nu ber a rawn kal tawh bawk a, a ngaihtuahawm tawh lo tih ka hre bawk nèn, muangchâng thâwm dîm tak chuan ka kalsawn ta a.

In ka thlen chuan tu mah an lo awm lo, ka nu chu dàwr lamah a kal chiang a, ka pa hian a zui emaw ni ka ti. Eirawng ka bàwl a ngai leh dâwn a ni ang, ka peih lo kher mai, nichin lawka thil thleng khân min ti-awm nuam lo deuh nghual a, ka thawmhnaw sûk a ngai bawk nèn, awmpui neih hi kan mamawh a ni.

Ka rin dàn chiahin, ka nuin min rawn phone a, eirawng lo bâwl mai tùrin min ti. Kan chhûngkaw ei hi a hauhtak hran lo va, chawhmeh lah siam vak a ngai bawk lo, hahthlâk lo mah se eirawng bàwl kher hi chu, ka thiam loh lam tak a ni tlat. Nupui neih ka ngaihtuah chhuak lo thei lo.

Afaki. Nupui atân meuh chuan ka la ngaihtuah ngai lo. A fel, a chhe lo, kohhranah a inhmang, an vêng mite fak rawn a ni. Ka nupui ni ta se, fate tân nu țha tak a ni thei ngei ang, ka tân ngei pawh nupui rinawm tak leh sawisèl bo tak tùr a ni ngei ang.

Mahse...ka hmangaih em?

Ka duh, ka ngai, ka thlahlel viau bawk. Ka hmangaih em chu ka hre hauh lo, ngaihtuah chian deuh chu ka ngai a ni.

Mami kha ka hmangaih tih ka hre chiang a, ani ang khân Afaki hi ka en hauh lo tih pawh ka hria; mahse, Afaki hi ka duh lo miah si lo.

Zanriah chu hma lam deuhah kan ei a, accident chungchâng kha ka nu leh pa chu ka hrilh ve bawk a. Thil pawimawh ber, awmpui tùr chungchâng chu ka sawipui thuak bawk.

Ka pa chuan," A dik alawm, i nu hi a hah lutuk a, kei lah ka lo upa ve tawh bawk nèn, awmpui neih chu țha ka ti. Bâkah, dàwr nghah ziah pawh hi tha ka ti lo, dâwr nghâk tùr pawh hi chhawr ve ila?" a lo ti a.

"A pawimawh berah chuan min chhâwktu tùr leh in chhûng enkawltu tùr nupui i neih a ngai a nih hi," ka nu chuan a lo ti thung a.

"Tuna i bialnu hi a fel hmel ka ti a, i duh phawt chuan kan duhpui che. Awmpui lâk kher ngai lo hian hetiang lam hi hawi tawh la ka ti bawk. Kan upa telh telh a, i fate kan paw hman lo ang tih ka hlau a ni," a ti leh a.

"Khaih, my dear, chutin nawr nghâl chiam lo la, nupui pasal neihte zawng, thil tih rum rum chi a ni lo a nia. Awmpui tùr chu ngaihtuah phawt ila?" ka pa chuan a lo ti ve leh thung a.

"Ngaihtuah ang. Ani pawhin nupui ngaihtuah ve tawh rawh se, tlangvâl senior a ni mai dáwn asin. Hlawh nei a ni tawh a, chhûngkua pawh din thei a ni tawh," tiin min rawn en a," Nula dukdak lo chu i ngaihzàwn duh ka ring lo va, i ngaihzàwn ngai pawh ka ring hek lo. Chhûngte, nu leh pate sawisep kâi nih tum lovin nupui pawh hming țha, mite fak leh ît rawn tak neih i tum dâwn nia, rilru hahdam leh hlim tlâng taka kan awm theih nân," a ti leh duah a.

"Ok, ka hria e."

"'Hria e, hria e' ti lo hian țan la sauh sauh ang che."

Ka pa chu a lo nui hawk hawk a.

Afaki patea nupui (a nutei) chu a lo chér tawh khawp mai. Thingtlânga awm an ni a, Aizawla an inentîr zo, rawn lêt phei an ni a, a fanuin a va hruai a ni.

A nutei chu min chibaitîr a, ka hmingte a hrilh chuan min hre tawh tih hriat tak hian min rawn nuih a.

"I va fel ve! I hming hi chu ka lo hre ngun tawh asin, Afaki hian i hming hi chu a sawi chàmchî a, hmu lo che mah ila hmu tlukah che ka inngai tawh a," a lo ti a.

Nia, Afaki hi chuan min duh ve viau rêng a ni. A mak ka ti ve ngawt mai, hausa tak ni ila chuan ka hre thiam deuh, chutiang pawh ka ni lo va. A hmingin hlawh ka nei ve a ni ringawt a, ka nu leh pa erawh mi rethei tak an ni lo; mahse, chu chu chhuan chi a ni hauh lo, an pawisa leh sum hi ka tâ a ni lo miau a.

Afaki chu ka chîk ru reng a, ka lo en leh vang vang țhìn bawk. Ka hmangaih chiah em tih hriat chhuah ka tum a ni, a chezia zawng zawng chu keima tâwkah, ka lo chîk viau bawk.

"Engtizia nge min en vung vung reng a? Min tilài țêp a nia," ka bula țhu pah chuan a rawn ti sar sar a.

"I chhe lo êm a."

A mitmengah chuan a lâwm tih a hriat a, min nêk salh pah chuan," Vêl a che, min tilài zual a nia," a ti leh. A biang chu a sen deuh tàn tán, a lài tak tak a nih ka ring.

"Chhe lo tak i ni."

"Ka lâwm e."

A chhe lo rêng, khawiah pawh a zahpuiawm lo ang. Chuti taka chhe lo leh fel chuan min duh ve êm ém chu a ni si a, keimahah hian a khawi lai ber hi nge min duh chhan ber ni ang ka ti fo.

Kan lêng rei lutuk lo ve. Ka thlah haw leh a, an inah pawh rei tak ka awm lo. Ka haw lam chu ka muang deuh hlek a, Afaki chungchâng mawlh chu ka ngaihtuah.

Motor tlán a tam tawh hran lo va, min tâwk zâwnga scooty rawn tlân nèn chuan kan intawhna lai tùr chu kawng a zìm deuh vàngin ka lo ding rih a, muangchângin a rawn tlân ve tho. Kawng a chhoh deuh avàngin leh ani tân kawng chhuk a nih vàngin kan intawhna lai chu a remchâng vak lo a ni.

Scooty number ka hmuh chuan ka phu zawk mai. Chhelovi a nih hi. Khawiah nge a kal dâwn le? Tunah dâr 10 a ri tawh a, ani lah chu hàw kawng lamah tlân lovin a in hlat zâwngin a la tlân tak veu veu reuh a.

Ka rilru ka siam thut, a kalna ka hre châk ta tlat. A bialpa a hmu dáwn a ni ang, remchângah ka inher ta vat a, a tlân chak viau lo bawk a, ka ûm pha thei ngeiin ka ring.

Ka hma hla vak lovah chuan ka hmu ta. A la tlân beuh beuh zél e. Va ûm pha tâwk lo deuh, hmu pha tho si chuan ka tlân ve zêl a, ka rin aiin a tlân mawng tlat!

Ka ûm laklawh tawh, a kalna ka hre ngei tùr a ni tawp. Thil ka ti tawh a, ka tàwpsan lo teh ang, miin an sawina hi a tak tak a ni chiah em tih fiahna remchâng tak pawh a ni thei asin.

Thlànmual bul a niin ka hria, in pakhat lo ding kawtah chuan a ding ta dat a. Ka dinna ve chu a laklawh lutuk ringawt, ka en reng lai chuan a seat hnuai ațang chuan bag phawrhin eng emaw hi a phawrh chhuak a, lukhum a nih duh hmèl, a khum tlatin ka hria.

A êng vak si lo va, ka hmu chiang lutuk lo. In kawngka chu a kik a, a rawn inhawng nghâl, a lût ta daih.

He nu hian helai vêng mawng lutukah hian eng nge a tih? A bialpa Officer-a lah Ramthar vêngah a awm si lo. Bâkah, a luhna hi in lian lo zet leh țha vak lo a ni bawk si, ani hi thil țhà lo a zuar rù te hi a ni lo maw?!

Bihthlâk ka châk ngawih ngawih. Thil țha lo leh zahawm lo tak a ni tih chu ka hria; mahse, eng nge a tih tih ka hre châk, helai thleng thleng ka zui tawh bawk.

Vêng lùn lo tak chu a nih ka ring, ruihhlo tì tân chuan a lùn viau mahna le, mi veivâk hmuh tùr an awm bawk si lo, an țhenawmte in lah chu a hnai viau lo bawk.

Thâwm dìm takin car ațang chuan ka chhuak a, boruak a vawt ve deuh sêk. A in luhna ațangin ka awmna a hla lêm lo bawk a, in chhûnga thâwm awm deuh chu ka hre thei deuh, naupang țawng niin ka hria.

Ka hnaih phei a, light êng ruai pawhin a chhun phâk loh chinah chuan ka ding a, ui an vulh lo hlauh chu ka vànnei khawp mai.

"...zia e, han thaw kâwk kâwk teh."

Hei chu Chhelovi aw a ni.

"A man a to ngawt lo maw?" Patling aw a ni thung.

"To lo ve, tihian nei ula, nakinah in duh chuan min chah leh dâwn nia, kan inbe reng thei alawm."

He nu hian ruihhlo a zuar a ni ngat mai, a chhiat loh nèn aw, a thil tih chu a va țha lo tak em! Bag ang deuh kha a khai lûtin ka hre rêng a ni.

"A va làwmawm dâwn ve! Nang lo chu innghahna kan nei si lo."

"Ka țanpui ve theihna che u a nih hi, inthlahrung miah suh u."

Bihthlâkna tùr ka zawng a, rem lo zet hian ka hmu thei ta. Chhelovi chauh ka hmu a, light dul ruih vàng chuan chiang takin ka hmu thei lo lehnghâl.

Ka hai țhelh, țawng lo se chuan amah a ni tih pawh ka hre miah lo ang. Tarmit lian angreng tak vuah a vuah a, lukhum a khum emaw ka tih kha sam lem (wig) a lo vuah niin! A sam eng buang thar kha a lo bo vek tawh, tunah chuan a sam chu a tâwi kir chiat a, pitar lam pawh a ang deuh e!

A hmel dik tak pawh a lo lantîr duh lo a nih chu! Ruihhlo zuar a nih vangin sam lem a vuah a, tarmit a vuah bawk, khawlaiah an hmu leh ang tih a hlauh vàng chiah! A va fing phakar reuh ve!

*MI AN DAM LAIIN AN NUN LEH AN KHAWSAK AWT NGAWT SUH, AN THIH HNUAH AN THLARAU KHAWIAH NGE A KAL DÂWN I HRE HAUH SI LO*

☆LTK☆ - 6 By Dingdi Pachuau

Ka thil hmuh leh hriat chu ka duh tâwk khawp. Thâwm nei lovin car lamah ka lêt a, a chhûnga ka luh chuan ka insehruh nasa.

He nu hian kan khawtlâng, kan vêng a tițawp a ni. Ruihhlo zuar rùin Officer ngat a kawp a, chu pawh nupui nei lai ngat. Hei tak hi chu a nun a nia, ka va sawisêl phâk lo; mahse, a ruihhlo zawrh hi, hei hi a țha lo. Amah pawh hi a fihlim kher lo ang, chuti a nih chuan a kawp țhin Officer Chhuana pawh he thilah hian a fihlîm kher nâng, ani nèn hian inthurualin thil an ti pawh a ni maithei asin. A hlâwkna an insem a niang, Officer Chhuana hian pawisa a tum ang a, he nu tê hian sem chhuah, zawrh chhuah a tum ang a...

Ka nghâk deuh vang vang nain a lo chhuak har si a, ka tlân ta daih. Lo nghâkin a lo chhuah thleng lo chàn a a ruihhlo zawrh chu bànsan tùra vau ka rilrûk thut thut kha a ni a; mahse, hei lo hun țha hi ka la neih ka ring leh thut a, evidence țha tâwk nèn, ka phone-in ka record thlap tawh ang a, a phamar thei hauh lo ang.

A chhe lo hle tak si a, hetiang a tih duh êm hi chu ka ring pha lo asin. Miin an sawi deuh sep sep pawh kha a lo dik a nih chiah hi, a thil tih thup nân inkhâwm lah chu a peih zêk a, kei lahin mi biak duh loh leh thinhrik kha, ka lo be hmasa âwt âwt a. Aizawla damdawi a leite kha, a mawiah mai mai, ruihhlo a va la rù tih hriat reng.

Ka mut hnuah pawh ka la ngaihtuah chhunzawm zêl. He nu tê hi, a hmel en ang a ni dâwn hauh lo, ngawi tak rawh se, ka la man chhuak dâwn khawp mai. A in luah ka hre tawh bawk a, zalèn taka tuna a chêt ang hian a che reng dâwn lo.

Hmingate rawn haw chu ka tlawh ve a, Afaki pawhin a lo hria a ni chêk ang chu, a rawn kal ve vang vang. A fel reuh a nia, mi fel, chhe lo bawk si leh hlawh nei bawk si kha ka bialnu a ni miau si a, mo atâna duhthusàm chu a ni chiang alawm.

"In inthurual chiang!"

Kei pawhin a rawn kal chu mak ka ti a nia, kan inthurual miah lo! Ka awm tih a hriat vànga rawn kal a nih pawh ka ring chuang lo.

"Loh theih nâng!" ka lo ti thung a.

A pa chu a zia viau, cancer a nih a inring kha a ni a; mahse, a lo ni hauh lo, a kal lam a lo ni daih! Rilru down deuhin a kal a, a natna a inhriat chhuah tâkah chuan a rawn hlim hãw viau, a hmel hmuh pawh a nuam.

Kan lêng rei viau, mi dang pawh an rawn kal ve țak țak a, Afaki'n rawng bàwl a ngaih vàngin kan chhuak dùn, ka va thlah dâwn.

Hminga chuan min zui chhuak vat a.

"Va che nasa lutuk lo ula?" tiin a nui kur kur a.

"Nasa lo thei lo."

"Indim thiam hi a pawimawh a nia, nakin zêlah buaina a awm loh nân," a lo ti leh a. Ani hi zawng hetiang lam hi a ngaihtuah peih zâwng ngang hi a nia, hriat thiam a ngai.

"I rawn kal ve chat kha mak ka ti lutuk maw le!"

Ka lam hawia rawn nui sakin," An rawn hãw phei tih ka hria a, Hminga kha ka text alawm. I awm kha chu ka ring tho a, ka thlen hunah ka rawn text ang che ka ti sa hrim hrim a," a lo ti a.

"I fel hle a ni, ka hmai pawh a uang khawp mai," ka tih leh chuan ka malah a rawn chùm dat a.

"Min fak nasa lutuk ang e," tiin a nui leh hak phawt a, chutah thutak deuh zâwkin," I țhianpa pa a ni a, ka ngai pawimawh alawm," a ti leh a.

"Chuvàng tak chuan alawm i fel ka tih."

An inah chuan ka lêng ve leh reng rih. A chhûngte an awm bawk si lo va, kan free hem hem khawp mai. Eirawng pawh a bâwl hlei thei lo, ka lo tibuai zél a.

"Awm țha teh."

"A nuam alawm."

"Va naupangchhia tak! Ka kut tal hi thlah la, ka thil kan chawh a ngai tawh si, a ût hlauh ang e," a ti a, kei pawh chuan chuti na na na chu tiin ka thlah ve mai bawk a.

A bâwl zo țâwk tihah a chhûngte an rawn hãw. Kei pawh rei ka awm tawh lo, veranda thlengin min thlah a.

"Zaninah lo lêng la?"

"Inkhâwm bànah maw?"

"Ni mai ang chu, i inkhâwm ve țhin em ni a?" a tih chuan," Ka pelh ngai lo," ka lo ti vat a.

"I va ti țha tak! I lo lèn phawt chuan...a ni mai."

Min lo melh sawr sawr a, a sawi tum hre thiam chiah lo mah ila ka lêng châk sawt!

Inkhâwmnaah Chhelovi kha ka hmu leh ngei! Ka thlìr dàn a hè tawh avàngin ka hmu dik thei tawh lo va, a lo inkhâwm ve hmuh ringawt pawh chuan ka thin a tirim tlat! A zak lo reuh ka ti a, a huaisàr ka ti bawk. Nula țha ber angin tlar hma lam lam chu a la chuh zui a, ka la man chhuak khawp ang. Chu thil chu ka inkhâwm chhûng zawnga ka thil ngaihtuah a ni.

Zàn inkhâwm bànah chuan Afakite inah chuan ka va lêng leh ngei, thingpui tui zetin min lo lum a.

"Thingpui cial lutuk a nih kha, nangma tân chiah ka la siam aw."

Hm, hei hi a ni ngei ngei ang, 'I lo lèn phawt chuan...a ni mai' a tih kha. A va ho reuh e, ka lo ngaihtuah ril mah mah asin le!

"Ka lâwm e."

Ka lunghnûr viau dâwn a, thingpui cial tui lutuk chuan min tipângngai leh thei ta. A tui kher asin, a siamtuin a zir bawk a, tui tak a ni.

******

Hun remchang ka melh pah reng a, Chhelovi chu ka thlîthlai ru reng; mahse, kha in a pan lai kha ka châng fuh leh ta rih lo, chhùn lamah a kal a nih chuan remchâng chu a hmu khawp ang, chhùn lam chu ka hman bîk tlat si lo va.

Zanriah kan ei kham chiah chu ka phone a rawn ri ral ral a. Number ka hriat ngai loh ațangin a ni.

"Hello?"

" Serkàwn ațangin a nia, Sir Ruatpuia a ni em aw?" Nutling aw hian a rawn ti țâlh țâlh a.

"Aw, ni e, eng nge ni ta?"

Tu tak ni ang maw? Kan zirlai nu tu emaw ber a ni ang chu.

"Min la hria em aw? Tlêm laia bike-in a sut nutling leh mipa naupang kha i la hria ang tiraw? Khata nutling, naupang kàitu kha ka nia," a rawn ti a.

"A ni maw? In țha zêl em mipa naupang nèn khân? Ka rawn ngaihven ta miah lo che u a."

"Aw, țha e. I chungah kan lãwm tak zet a ni, nangmah vàng liau liauin ka tupain a nunna a chân lo va," a rawn ti leh a.

"Ni lo ve, ka pi. Nangmah zâwkin a nunna i chhan a nih kha, kei chuan eng mah ka ti hlei nem, damdawi inah ka phur phei ringawt alawm," rilru nuam lo zet chuan ka ti a.

"I chunga kan làwmzia hi, sawi ngaihna pawh ka hre lo. Naupang nu leh pa khân hmuh che an duh khawp asin."

"A ngai lo, ka pi. In țha chhuak a, chu chu thil làwmawm ber a ni," ka ti a, nuam ka ti miah lo nia. A chhan chu a hnu lamah mipa naupang pawh kha ngaihven tùr ka nih tehlul nèn, ka lo hrechang tawh miah lo va!

"I number ka nei tawh bawk a, hmuh che kan duh hunah ka lo call thei ang che tiraw?" a rawn ti leh a.

"Tehrêng mai, țha taka in chhuak chu a làwmawm lutuk e," ka ti a.

Ka rilru chu a nuam lo deuh sawtin ka hria. Miin làwmthu min hrilh hian a làwmawm chu ka ti; mahse, nuam ka ti ngai mang tlat lo va, khâng bike-in a hnâwl nutling leh mipa naupang phei kha chu ka hmuh chian leh ka bul lawka thil thleng a ni a, ka țanpui ngei ngei tùr an ni alawm. Làwmthu inhrilh chu nuam ka ti lo, ka tih ngei ngei tùr ka tiha lawmthu min hrilh hian nuam ka ti ngai lo.

Zànah Afakite ina lêng lovin Chhelovi in bul vêlah khân ka va tei kual mai mai a, a in a èn dànah a awm a ni ngei ang. Thil supply a ngai rih lo a ni ang, ngai leh tawh se ka ti asin, ka man chhuak duh.

Sunday-ah thu sawitu chuan chhûngkaw chungchâng a sermon a, chhûngkaw pawimawhzia, nu leh pate'n fa enkawl țhat a țùl thu leh tûnlaia țhalai awm khaw lo tam takte pawh hi chhûngkaw inrelbawl dàn dik tâwk lo vang a nih thute chu a sawi a, Chhelovi chu ka thlîr ru ziah. Vawiin zet chu thu sawitu a en mang tlat lo.

Ruihhlo chungchâng a rawn sawi chhuak leh a, ruihhloin ţhlalai a suat nasatzia leh khawtlâng a tihbuaiziate sawiin ruihhlo ti țhinte pawh hi a bul ber chhûngkua inenkawl fel tâwk loh vang nia a hriat thu sawiin, sum leh pai dah hmasa lova a pawimawh ber Lal Isua dah pawimawh hmasa ber zêl tùrin inkhâwmte chu min chah a, bâkah, chhûngkaw din tumte pawhin Lal Isua nèn chhûngkua din chho tùr leh a lungphùm atân Isua hmang tùr chuan țhalaite min sawmin min chah leh a. Nu leh pate pawh an fate chutianga enkawl chho zêl tùrin fuihna thu țha tak tak a sawi a, kei erawhin Chhelovi tân hlîr ka lo ngaithla, ka tân chuan ka lo dah țha hmak. Inngai fel ve tak chu ka ni.

Ruihhlo a zawrh vàng leh a zah deuh vàngin thu sawitu pawh kha a en ngam lo a ni pakhat ang. Bâkah, a nu leh pa bulah awm lovin thil țha lo a tih duh vàngin in a luah hran ngat a ni a, mak reuh tak chu a ni. A huaisen reuh a, a huaisàr bawk ka ti. Unau a nei lo a ni chêk ang a, nei ni se hetiang hian a unaute'n a awm an phal lo tawp ang. Kei pawh a awm dan hian ka farnu hi awm ve dâwn ta se, ka phal loh bâkah ka kaltîr lo ang.

Mahse, he nu mak ka tihna êm êm chu inkhâwm laia a che ve sek ngai lo leh a hawi sawn ve ngai lo hi a ni, zahawm ka ti tlat. Nula dang ka han en kual a, an inbiak ser ser loh leh an che sek a, ka lo hmu fuh thei si. Hemi kawngah kher hi chuan he nu tê reuh hi ka fak thlâwt, sawisèlna tùr ka hre lo.

Zànah Afaki'n lêng tùrin min sâwm nain ka lêng lo. Ka inkhâwm bànah ka kalna ngaiah bawk khân ka kal leh a, ka zui hâw rù a ni mah ang chu. Ka thlen hnu rei vak loah chuan ani pawh chu kekawr hain bag lian vak lo a rawn ak chhuak leh, helmet a rawn khum chhuak bawk.

E hiau! A supply leh tawh dâwn chiang e, ka châng chhuak ta alawm. Ka rêk chat tawh ang.

Scooty chu a tinung a, a bag chu a seat hnuaia dahin a tlân chhuak a, kei pawh muangchângin zui ru lo deuha langin ka zui ve ta zal zál a.

A kalna ngai lamah bawk khân a ni a tlàn leh ni. Ka zui ve zêl, zanin chu engkim ka record vek ang a, YMA hruaitute ka hrilh hmain amah ka vau lâwk phawt ang, warning ka pêk ve phawt a ngai alawm. Mi sual ber pawh khaihlum a nih hmain hun pêk a nih ve țhin tho kha.

He nu tê hi mi fîmkhur ve tak chu a nih dâwn hi, a kum ang te hi chuan scooty hi chak zet zetin an khalh a ni ngai a, ani hi chu a tlân chak ve vak miah lo. A tâwk chiahin a khalh chak a, a khalh thiam êm êm tho si.

In țha vak loah chuan a lût leh ta a, kei pawh in piah kâwi kawng zau laiah chuan car chu ka dah a, ka zui ru leh țhêm țhêm. Ka phone pawh ka silent hmak, video-in ka capture ngei ngei bawk ang.

Ka bihthlâkna ngaiah bawk chuan ka bihthla leh a; mahse, a țhutna a lo sawn tawh si a, a țhutnaah khân tu mah an lo țhu tawh si lo va, tu mah ka hmu thei tawh lo, bangin min hliah tlat, an țawng erawh ka hre tho, naupang pawh an awm.

"Au Tluangpui, ka len hunah chuan nangmah anga fel hi nih ka tum ngei ngei ang," hmeichhe naupang chuan a ti lar lar a.

Awmhmunah za lo zetin ka lo kiai suk ringawt. A hming ka hre chhuak ta bawk. Tluangpuii. A hming a nalh viau; mahse, a awm dan hian a zir lo.

"Kei chu ka fel hlei nem. Kei aia fel leh hmel țhain i rawn țhang chho ang a, ânu leh âpa i rawn châwm chho ang a, lehkha i zir sauh sauh bawk ang a, hlawh i neih hunah âpa leh ânu kha pawisa i pe țhìn ang a."

Hm, a zilh țhat ve viau chu a.

"Ih maw, nangmah anga damlo enkawltu doctor nih ka duh ve alawm."

Chu naupang chu ka khawngaih zâwk! He nu hian a va bum nasa tawh àwm ve! Ruihhlo supply-tu hi ani tê hian doctor-ah a lo ngai hmiah mai chu a ni si a, a bum thiam khawp e.

Nutling khuh kharh kharh ri ka hria a, hemite chhûng hi ruihhlo an zawrh vang hian Pathianin a la hrem ngeiin ka ring, tuna a khuh rîk dan pawh hi a dik miah lo, âwmnapui lam a ang ka ti. Pathianin a hrem chhunzawm zel ka beisei.

"Ânu, damdawi kha i ei tawh em?" Naupang aw chuan a ti a.

"Aw, ei tawh e, Au Tluangpuii khân min pe tawh a."

Damdawi pawh a lo pe fel diam tawh a nih chu. A va rang ve!

An țawng zawng zawng chu ka lo record vek a; mahse, han man chhuah fakna tùr àwm thil sawi an nei tlat lo, titi satliah mai mai an sawi ni berin ka hria. An titi kârlakah nu ber ni àwm tak chu a khuh leh barh barh țhìn, a hrisêl àwm lo kher asin.

He nu tê hi tihțhaih a ngai a ni.

Car lamah ka phei a, a lo chhuah hun ka nghâk tawp. A lo chhuah hunah ka zui ru leh ang a, a inah ka luhchilh tawp mai ang. A duh leh min report se, a thil tih țhin țha lo hi ka sawi ve mai ang.

A rawn chhuah chuan a tlai ve viau tawh. Pâwnah chuan, ka vànneih asiamin ka ti dâwn nge, a sam lem kha a la la thla lo, scooty-a a chuan hnuah pawh a hlip chuang lo, hei pawh hi ka man chhuahna tùr dik tak a ni e.

Garage-ah a scooty a dah a, ina a chhoh chuan ka zui chho vat. A hnung lama thâwm a hriat chuan a rawn hawi thla vat a, min hmuha a makti hmel chu hmuhnawm tak a ni!

"Khawiah nge i kal a?"

Ka aw chu a nèlawm loh ngawt ang chu. Hmeichhe pakhat ka vau dâwn chu a ni a, nèlawm loh a ngai rêng a ni.

"Eng nge i lo tih dâwn a?"

"I sam chu a mawi hle mai."

A lu chu a han khawih zauh a, a sam lem a lo la vuah reng tih a hre chhuak leh chauh a ni ngei ang, a pawt thla ta vat a.

"Ka lo theihnghilh palh," a ti niah niah a.

Kawngka chu a hawng a, min sàwm luh hma chuan ka lût that. Polite lo tak chu ka ni; mahse, polite taka vau ka tum hran lo.

A in lah chu a nuam reuh phian. Rilru pângngai pûin lêng lût ta ila nuam ka ti reuh ngawt ang, a zau viau lo nain a fel fai thlarh, bungrua pawh a pângngai hlawm viau bawk.

Țhu lo chuan ka ding reng a.

"Țhu la?"

"I thil tih țhin hi bànsan rawh," ka ti ta charh a.

A bag chu dawhkàna dahin min rawn en nghâl vat a, a hriat thiam loh hmel viau; mahse, min bum lo ang, min bum tumin a'n hre thiam lo der vêl a nia. Mak reuh hi ka ti a ni.

"Eng thil maw?!!"

"Hre lo der suh, YMA hruaitute leh khawtlâng hruaitute ka hrilh hma hian tàwp vat ang che. I sam lem vuah chhan te hi ka hria, bag nèn khawiah nge i kal țhin pawh ka hria a, eng nge i tih țhin tih thlengin. Tu pawh thurualpui mah la, an hum zo chuang lo ang che. Warning ka pe che a nih chu, chubâkah, ka enthla reng dâwn che a, ka phone-ah hian engkim ka record vek bawk," ka ti ta phiar phiar a.

A mitmeng bial kil kel chuan khap hauh lovin min en a, a hriat thiam loh hmel takzet; mahse, hei hi chu lemchanna mai a nia, lemchan chu a hnehsawh em hi maw. Kei ngei pawh min bum țhelh a nia, tun hnuah chuan min bum mai mai tawh lo ang.

"Eng maw i record?"

"Engkim. Ruihhlo i zuar țhìn tih ka hria a, i supply-na pawh ka hria a ni. Bànsan la, i bànsan chuan i thil tih țhin hi ka sawi chhuak lo ang," ka ti chang khalh a.

A ngawi reng, min en tawh lo va, ngun takin thil a ngaihtuah zâwk a nih hmel.

"Chumi hrilh tùr chea rawn zui che ka ni. Ka sawi tùr ka sawi zo tawh bawk a, ka kal tawh ang e."

*SUM LÂK LUH TAM AIIN A HMANNA TÙR RUAHMAN DIK HI A PAWIMAWH ZÂWK*