☆LTK☆ - 13 - 19 By Dingdi Pachuau

 ☆LTK☆ - 13 - 19  By Dingdi Pachuau

Tluangpuii pawh a lo phûr ngang a ni ang, ka kut a rawn vuan chawt a, a khùr ru dar dar bawk.

"Miss Mizoram pawh a lo ni tawh àwm e, a chhe lo ve ém bawk a ni; mahse, a pasal nèn khân an innei rei lo lulai ém a."

Miss Mizoram. A fanu hian a lo chhùn a nih chiah hi, a chhe lo êm asin.

"Mahse, Serkawna kan awm chhoh hma kha a nia, chutih lai chuan Lunglawnah kan la awm a, in hi kan la sa mêk a."

A țawng chuar chuar a, a nghahhlelhawm ka lo ti.

"A pasalte kha chhûngkaw hausa tak chu an ni ngei mai; mahse, ka hre chiang ta tlat lo. An innei rei lo tih ka hre leh a, Aizawl lamah a awm ta daih a."

Ka lo phùr tawh tehrêng nèn, ka rilru a down leh rawih rawih mai.

Veni pateate in ațanga kan chhuah hnu chuan Tluangpuii hmel ngui deuh raih chu ka melh zawk a, kan kal lam nèn chuan a boruak a inang lo lutuk a, ka khawngaih reuh khawp mai.

"I ril a țâm em?"

A ngaihtuahna a kal ding lutuk a ni ang, ka zawhna pawh chu hre àwm pawhin a awm lo, min rawn en bawk lo.

"I ril a țâm em?"

A kut ka va tawk a, chutah chiah chuan a harh chhuak ve chauh.

"Eng nge ni ta?"

"I ril a țâm em? Chàwl ila?"

"I ril a țàm leh țàm loh a ni mai, i thu thu," a lo ti mai a.

Hminga nèn kan chawlh ziahna țhínah chuan ka chawlhpui a, a thawkte pawhin min hre țhang tawh bawk a, min lo fiam chùl a.

"Puia, i bialnu thûlkhung chu i rawn hruai ve ta a ni maw? In inhmeh lutuk tlat, a hmel ţha ka tihzawng tak a ni," a neitunu chuan ka beng bulah chuan a ti sar sar a.

"Ka bialnu a ni lo-"

"A țha reuh lutuk! A hmel a changkàn bâkah a la naupan hmel reuh a, i thlang chhuak thiam tawp, chhuah miah suh. A fel leh fel loh chu thuhran, a fuh reuh thlâwt," a la ti deuh deuh a.

Tihngaihna ka hre lo lutuk a," Ka lâwm e," ka ti ringawt. Sawi thui a ngai mai mai a, ka peih lo.

A bula ka țhut hnuah chuan," Ngui duh mah ta che, kan la zawng dâwn chauh alawm. Kan hmu dâwn chiang," tiin ka hnèm a.

Nui sek hian," Ka ring alawm. Ka lo phûr lutuk tawh vàng kha a nia, ka nu pasal leh a pasal chhûngte kha hre chhuak thei mai tùra ka ngaih vàng a nia," a lo ti a.

"Kan la zawng dâwn chauh a, i beidawng nghâl ringawt tùr a ni lo. Ka zawnpui zêl dâwn che alawm."

A nun ngui lutuk chu tihharh tum chuan ka phone ka phawrh a, a number chu hmet chhuakin ka call ta nghâl a.

A phone a rîk tâkah chuan a bomber jacket mawi zet hmalam iptê ațang chuan a phawrh a, ka call a ni tih a hriat chuan makti zet hian min en a.

"Chhâng ta che!" tiin a phone chu ka melh a.

Ban zet hian," Hello?" a ti sap a.

"Tluangpuii maw? Puia ka nia, miin i hmel țhat thu hi an sawi ve ziah a, hmaihmaah ngei hmuh che ka duh a, ka hmu thei che ang em?"

A zak chu a sen deuh ap ap a, a kut chuan a hmui chu hup deuhin," I hresual a nih chu, mi sawi sual i hre sual a ni ang," a ti a.

"Hre sual lo, i thlalâk ka hmu tawh a."

"Khawia mi maw?"

"Ka nei ve tawp."

"Ka awih thlâwt lo! Dâwt min hrilh."

"I chhe lo ka ti lutuk a."

"Awi, U Puia hi," tiin min rawn chùm a, ka lo nui hawk hawk a, ani pawh a nui ve tho. Hmaichhana 'chhe lo' tia infak chu a dãwl bîk lo a niang, sen ap ap chungin a nui sek sek a.

"I nui ta! I nui hmel kha hmuh a nuam a, nui zêl rawh. I hmel a ngui chuan kei pawhin hrehawm ka lo ti a, kan thil tihah hian kan intihchak tawn a ngai nasa a nia, beidawnna leh ngui hmel hian min bàwm tùr a ni lo," ka ti sauh sauh a.

"U Puia hi, naupangte i fuih phûr thiam ngawtin ka ring, sikulah hian naupangte hian an ngaina ngawt lo che maw?" a ti teh daih a!

"Ngaina lêm nâng, ka țawngkam hi a vîn deuh țhìn si a, min hlau deuh țhin hialin ka hria," nui chung hian ka lo ti a.

"A awihawm loh lutuk! I vîn lo tawp. I pa len vàng a ni ngei ngei ang; mahse, ka pa pawh a palian chuang miah lo va, a thinchhe miah lo," a ti leh barh barh a.

"I pa chu hmuh ka châk ve ngawt mai, a fanu felzia leh puitlinzia hi hrilh ka châk! A chhuang ngawt ang che," ka ti a.

A hmelah chuan hlimna ka hmu thei.

"Ka pa chuan min chhuang tak takin i ring maw? Ka pa kha chuan min hmangaihin min duat êm êm a, eng pawh ka dìl kha chu min pêk a tum tawp țhìn, a neihchhun liau liau ka nih vàng pawh a ni maithei, la dam se chuan tûn ang hi ka ni àwm tawp si.lo va," a ti keuh keuh a.

"Lungngai miah suh, i u chu kan hmu ngei ngei ang. I pa pawhin a thlarauin a lo thlîr reng ang che, a rawn țanpui ngei ngei bawk ang che."

Min en chuan a nui sak a," Ka lâwm e," a ti sap a.

Nilêng chuan kan inzui ta a, kan biak vete lah chuan an lo hre lo zêl bawk si a, hre deuh tùra ngaih chu upa deuh lam an nih vàngin upa lam deuh kan hrût tawp a, a lo rei ve deuh tawh avàngin an lo hre chiang mang hlawm si lo.

Ni khatna atân kan duhtâwk ta rih a, a inah chuan ka thlah haw ta rih a.

In kan lût âwrh tihah chuan a phone a rawn rì a, a'n chhâng a.

"Hello? A ni maw?!! Aw le, lo chiài lo ula, kan lo kal nghâl ang," a ti a, a phone chu dahin," U Pui, khawngaihin Ramthar mawng lamah min hruai thei ang em? E, ni leh lo, keimah pawhin ka kal thei mai ang," a ti sawk sawk a, a țawng ang chiah chuan a chê pawh chu a rang a.

Bag a la a, damdawi bûr leh jection-na ilo vêl a khung niin ka hria, a hmanhmawh êm avàng chuan ka ngaih a tițha lo viau a.

"Eng thil nge? Ka hruai ang che," ka lo ti vat a.

"A hmanhmawhthlâk lutuk! Kan thlen thuai a ngai!"

A chê chu a buai ve deuh niai mai, tala pawh a kalh țha hlei thei lo, ka lâksak vat a, ani ngei pawh hi a chiâi buai a nih hi.

Motor ka khalh chhûng chuan a țawng lo, a kut chu a hûm ruh tlat a, a țhu hle hle thei lo lehnghal, thlenpui thuai thuai a ngai.

Ramthar mawng lam, a hmaa a kalna inah khân a nih ka ring nghâl mai a, anni kha Tluangpuii chanchin ka zawh ve nual tawh tak kha. Min lo la hre reng ang em le? Hriat tâk leh a pawi tawh lo mai, ka insawi fiah ve tawh mai ang chu.

Kan thlen veleh chuan a bag khai chuan a tlân chhuak nghâl a, a hnungah ka zui ve vat. Kawngka pawh kik lovin a tlân lût nghâl a, room lamah a lût nghâl a ni ngei ang, ka zuk luh ve pawhin ka hmu lo.

Țhutthlèngah chuan hmeichhe naupang kha a lo țhu a, a lo țap pàr lehnghâl a, a bulah chuan a u ni àwm tak mipa naupang a lo awm a, hmeichhe naupang ai chuan a lian deuh zâwk a, a u ni tùrah ka ngai hmiah, an inang ve tho bawk si a.

Min hmuh chuan an zak ve deuh a ni ang, mipa chuan," Lalbawih, țap suh, ânu chu Au Tluangpuii khân a tidam dâwn alawm," a ti sap a, a thil sawi chuan min tiharh chhuak zawk mai.

Room ațang chuan," U Pui, min lo pui teh!" Tluangpuii chuan a rawn ti a, ka lût ve nghâl tawp.

"A ke kha lo hmehsak teh aw, a kut nèn khân."

A lo khawng tlat mai a, hmanhmawh takin ka theih ang chuan a kut leh ke chu ka hmet ta bawrh bawrh a, pa ber pawh chuan a kut lehlam hmehsakin a khât tâwkin," Tei, Tei, i harh em?" a ti ve reng bawk a.

Tluangpuii chu hmanhmawh takin a che reng a, a chêt dàn chu a buai hauh lo! Inah kha chuan a chîâi buai deuh a nih kha, tunah hi chuan a chêt dàn hmanhmawh viau mah se a buai lo, a dik thlarh, a zei thlarh tawh!

A bp a check pah reng a, a chângin a mit a keusak a, a marphû a check reng bawk. Minute 10 hnu vêlah chuan," A bp pawh a țha tawh lutuk, a zia țêp," a ti sap a, pa ber chu a thaw huai a, kei pawh ka thaw chu a veng deuh sawt tho.

A kut leh ke a zawi hnuah chuan kan hmet ta lo va, Tluangpuii chuan," A zia ta e, a chàu viau rih ang. Hahchawlhtîr ila. U Pui, naupang kha lo va ngaohtuah teh," a ti a, ka hre thiam mai a, room ațang chuan ka chhuak a, ka chhuah lai chuan a hming chuan a ko pah bawk a.

Hmeichhe naupang chuan min lo hmuh chuan," Ânu chu a țha tawh em?" a lo ti vat a.

"Aw, țha tawh e, tunah chuan a muhìl rih a."

Mipa naupang chuan," Kha, ka hrilh che kha, Au Tluangpuii'n a tidam dawn ka tih kha," a lo ti vat a.

"Ânu bulah kan kal thei ang em?"

"A hahchàwl rih a, a muhìl daih bawk si a, a harh hunah a bulah chuan kal zâwk mai la tiraw?" ka ti a.

"Au Tluangpuii țhianpa i ni em?"

Chu zawhna chuan min tiphu deuh zawk mai!

"Aw, a țhian ka nia," ka ti ringawt.

Tluangpuii a rawn chhuak a, a hmel hmuh pawh a hahdam ta deuh e.

"Au Tluangpui, Ânu bulah chuan kan kal thei tawh ang em?" hmeichhe naupang chuan a lo ti a.

"Aw le, kal rawh u, a muhìl rih a, ko tho kher suh u aw."

An chhûngkua tê chauha an lo awm bâm mai chuan thil thui tak min ngaihtuahtîr. An țhenawm khawvêngte pawh koh ve awm? Bâkah, an țhenawmte pawh hian an chanchin hi an hre lo tihna em ni?

"A țha tawh tak tak ang maw?" tiin ka zâwt sap a.

"Ka beisei takzet. U Tei hrisèl loh vàng hian an chhûngkua hi ka ngaihtuah ém ém rêng a ni, kan inhriat țanna pawh a ni."

"Nurse i ni em?"

Min rawn en zawk a," hmun dang en leh nghâlin," Ka nihna chhan pawh hetiang mi rethei leh țanpui ngai ngawih ngawihte mangang au ri ka hriat vang hi a nia," a ti ta reuh a.

He nu hi ka duh thlâwt, a engkim hi ka duh vek!!

* HMANGAIHNAIN A DAWHTHEI A, NGIL A NEI BAWK ȚHÌN*

☆LTK☆ - 14 By Dingdi Pachuau

"U Pui, a tlai tawh angreng si a, haw i duh tawh àwm mang e? Min hàwsan mai ta che, inkhâwm i duh dâwn bawk si a, ka inthlahrung zozai tawh êm mai."

Hawsan ka tum lo hrim hrim. Țanpui ngai puih tùr an awm chuan tlànsan ka tum bîk lo, tunah hian Tluangpuii 'U Tei' pawh hi eng nge a dinhmun zêl tùr kan hre hauh lo!

"Ni lo ve, ka awm ve ang e."

A hmel hlim sawt chu ka hmu reng, ani pawh hi a rûkin a mangang ang tih ka ring a, a lo dik chiah. Hmeichhia hi chu chak deuh angin lang țhìn mah se, mipa ai hian buaina a lo thlen hian an chîaiin an mangang hma bîk țhìn si a.

"I sam lem kha i vuah mang si lo va-"

A hre chhuak thut a ni ngei ang, a lu a dap vat a, meng zâu káwk pahin," Ka va theihnghilh chiang tak! Min hre chhuak chiang viau tawh ang chu," a ti sap a, phûr lo zetin a ding a.

"Thu dik tak hrilh mai la?"

"A ngai ngei tawh ang."

Kan pahnihin an inah chuan chaw kan ei! Ka chunga thil thleng zen zen lo chu a ni chiang. Miina chaw ei hi ka hreh ngawih ngawih a, chhûngte inah, ka u Mamawiite inah ngei pawh chaw ka ei khât lutuk! Mahse, Tluangpuii bulah chuan 'hreh' tih țawngkam ka hmang thei miah lo.

An chhûngkua an fel reuh êm êm zui. Pa berin rawng a bâwl a, Tluangpuii'n a nupui chu a lungphu check rengin a bp pawh a check reng; mahse, a zia chho ve zêl.

Chaw ei lai chuan naupang pahnih chuan Tluangpuii chu an en duh viau. Ani pawhin a lo man vat," Au Tluangpuii kha ka ni reng alawm, a hma kha chuan ka sam ka tikir a, tunah chuan nula deuha awm ka duh ve tawh a, ka tisei ve tawh a," a ti a.

"Au Tluangpui, tikhân i inhmeh daih zâwk, i hmel pawh a țha lehzual, a hma kha chuan pitar i ang deuh a," hmeichhe naupang zâwk chuan a lo ti vat a.

"Ka lâwm e, ka sam chu ka tikir tawh miah lo ang."

Naupang kham hnu, room-a an luh hnuah chuan Tluangpuii chuan pa ber hnênah chuan sam lem a vuah chhan chu a hrilh par par a, kei pawhin ngun takin ka lo ngaithla ve reng. A chhan chu a chanchin ka hriat loh tam tak ka hriat phah tlat a ni.

"In rawn thlen țantirh ațang khân ka lo chîk daih tawh che a, sam lem i vuah tih phei chu ka hriatna a rei tawh lutuk, ka zâwt duh ngai lo che, vuah duh chhan i nei a nih ka ring nghâl hmiah. Ka lo buaina tùr a awm lo bawk a."

Pa ber hi rin aiin a lo fel zêk ang. A thil sawi chu dik ka ti, a buaina ni miah loah chuan a inrawlh lo va, ka pawmzâwng tak a ni.

"Ka nu vàng hian țhian ka kàwm ngai lo va, ka kawm ve deuh ber pawh nurse ka training-puite an ni; mahse, a țhen chuan min hre chhuak a, min țih êm êm, hrehawm duh tak a ni."

Zàn dâr 9-ah kan hâw. A inah ka pêng leh rih a, pêng tùrin min sâwm tlat a, ka hreh loh zâwng tak a lo ni bawk nèn, kan luh veleh coffee siamna tùr tui a chhuang nghâl a, heater ài tùr a on bawk.

"U Pui, i lo kal ve ka làwmzia kha chu, sawi vak ngaihna ka hre lo zâwk! Keimah chauh chuan khalh pawh ka inkhalh thleng thei pawhin ka ring lo, ka hlauthâwng lutuk a," a ti sap sap a.

"I chîâi buai tih ka hria alawm."

"Nia, ka buai vek. A chhan chu khatiang khân a la awm ngai miah lo, kan training laia nula pakhat awm dàn ka hre chhuak a, khatiang khân ka bâwihsâwm thei chauh a ni. A lung lam a felhlel deuh a," a ti leh a.

Coffee dût hlak pah chuan," Nurse i awm hlauh a, an vànneihpui khawp chein ka hria. Nurse fel tak leh...hmel țha tak i ni si a," ka ti duah a.

"I mi faknaah ka lâwm e; mahse, ka fel lo asin, ka nu min hringtu ngei pawh ka ko duh lo a nia, fel tih thu ka hriat hi chuan ka îp châwih țhìn," a ti leh a.

"I fel tho tho."

Mawi ka tih ang chi khân a nui sêih a, ka en vawng vawng.

"U Pui, bialnu i nei tiraw? A hmel a țha ngawt ang!"

A thil min zawh chuan min tiphu zawk. Nei e, bialnu ka nei. Bialnu nei reng chungin ani hi ka duh hlê chu a ni tak si a.

"Nei ve bawk e."

"Vawiin lamahte i be tawh em? Nilêngin ka tibuai che a, zaninah lah ka tibuai zui bawk che a, a lung a lo awi lo viau tawh ang. Bia la, thil awm dànte sawi la, ni dangah chuan hetiang thil hi a thlen tawh loh hrâm ka beisei."

Afaki chuan mak chu min ti tawh viau ang. Ka birthday gift a lei pawh ka va la lam lo chu a nia, vawiin nilêngin ka be lo va, zànah lah ni se ka lêng bawk si lo, a thin a lo rim tawh maithei zâwk a ni.

"Ka hàw hunah le."

"Hmeichhia hi chu dawm thiam kan ngai a nia, a lung a lo àwi chiah loh pawhin tihlungawi tum hrâm rawh aw, keimah vàng vek a ni si a, nuam lo ka ti hlê tawh a nia."

"Ka phone ang a, a țha vek ang. Chutiangin lungawi lohna a nei hek lo ang, nula fel tak a ni alawm," ka lo ti thung a.

"A țhat hlauh chu. Nula fel tak a nih chu ka ring sa hrim hrim bawk."

A nui sak a, kei lahin amah chauh chu ka en reng a.

"Bialpa i nei ve tho ang chu tiraw?"

Min rawn en zawk a, hawi sawn leh nghâlin," Nei lo ve, ka tân chuan neih chî pawh a nih loh hi," a ti ta daih a.

Dâwt min hrilh ta phawt chu a nia.

"Eng nge neih chî lohna?" Ka dîlchhût duh tlat, a bialpa officer pawh ka hmuh ve reng tawh kha.

"Tu mahin min duh nâng! Ka chanchin chu i hriat tawh kha."

Duh tehrêng mai! Kei pawhin ka duh a, kha officer pawh khân a duh ngei kha.

"I zawng lo a niang chu?"

"Hetia awm hi a nuam zâwk alawm."

"A nih leh, officer Chhuana kha?" ka ti țêp a ni, dâwt min hrilh ve reuh chu a ni si a!

Coffee kan in zawh chuan," Ka hâw tawh ang e, ka lâwm lutuk e," ka ti a, ka ding ta nghâl a.

"Aw le, U Pui, ka lâwm lutuk a nia aw. Ka lâwm tak tak a ni."

Kawngka thleng min thlah a.

"In nu chu be ngei ngei rawh aw," a la rawn ti tak țâwk țâwk a.

Ka chhûngte bulah khân ka țhiante inah chaw ka ei dâwn ti khân ka hrilh kha a ni a, in ka thlen chuan an lo la meng a; mahse, min lo zâwt chîk lo. Ka pa hi chuan mi puitling ka nih tawh vàngin min buaipui vak lo va, ka chungchângah phei chuan a inrawlh ngai lo. Ka nu erawh hi chuan min buaipuiin engkim hi hriat ve vek a lo duh ţhìn a, a lo buai ve chûk țhìn.

Afaki chu ka va phone ta ngei.

Ka buai vàng tih ka hrilh chuan," I buai vàng a nih ka ring alawm. Naktûkah erawh chuan i hman ve thei ang tiraw? Hmuh pawh i châkawm tawh a, ka ngai bawk che a," a rawn ti a.

He nu hi lungawi lohna châng pawh a hre lo a niang ka ti. Hmeichhe dang ni se chîk zet zetin thil min han zâwt kual emaw a ni ang a, ani hi chu a dang zak. Ka sawi a ring nghâl thlap a, lungawi loh emaw sawi fiah chiam emaw a phût hek lo. Mi fel leh rinawm tak chu a ni ngei mai, mi a rin ngam thlap dànah hian a hriat.

Mahse, kei hi ka rilru a danglam zo tawh a nih hi. Mi fel ka duh, rinawm tak pawh ka duh; mahse, ka rilru hi ka duh lohna lamah a kal ta tlat si a, Afaki, nula fel leh duhawm, mi pawhin an thlìr zui ve vawng vawng hi kei hian hmangaihna mitin ka en thei tlat si lo, ka duhna kha hmangaihna emaw ka ti tih hriat reng, a rilru chu ka tina ngei dâwn a nih hi.

Zîng inkhâwmnaah Tluangpuii chu ka hmu a, a țhutna ngaiah bawk. A thawmhnaw chu ka lo chîk ve deuh a, a hâk àwm ka la hmu miah lo, a inhmeh ngiang bawk.

Inkhâwm bàn veleh pâwna ka awm laiin ka text.

*I thawmhnaw chu i inhmeh khawp mai*

Ka inthiam lo leh țêp. Ka bialnu pawh a ni lo va, rilru hê min puttîr ang tih ka hlau leh hnuhnawh.

*Ka lâwm e Ka birthday-a ka dawn a nia* tiin min rawn reply ve mai. A lo ngai haw lo chu ka lâwm khawp.

*I 'U Tei' chu a țha zêl em?* tiin ka text leh.

A nuih a zâ a niang.

* 'I u Tei' han tih deuh kher aw, a zia e, zîngah pawh khân chaw a ei a*

Chawhnu lamah chuan Afakite in lamah ka inkhalh chhuak ve ta poh a, nizàn lamah lèn ka tiam tawh tlat. Mipa ka ni alawm, thutiam ka hlen ang chu.

Min hmuh chuan a lo hlim khawp mai. Amah chauhin a lo awm lehnghâl a, gift chu min pe nghâl bawk a.

"I birthday kan làwm ta si lo va, vawiin tlai chu làwm ang aw, hetah chaw ei la?" tiin min sâwm a.

"A ngai lo, tlangvâla pumpa naupangchhia ang maia birthday lawm te chu, hei gift min pe a, a tâwk viau a ni, ka lâwm lutuk e," ka ti tlat a.

"A nih loh tal leh, lêng ve reng rih rawh aw."

Ka lêng ve ta reng. A thil min lei chu mipa hman chi rimtui a lo ni a, a rim a tui vawng vawng khawp mai. A to ngawt ang chu, mrp ațang pawhin a hriat theih mai e.

"A rim a tui hle mai."

"A làwmawm a nih chu, i duhzâwng a ni lo ang tih ka hlau lutuk a," a ti sar sar a.

"Ka duhzâwng tak a ni."

Min kaikûnin min fâwp zoh a, kei ka ding khawng tlat thung.

"Min ngai lo riaua hriatna ka nei deuh hlek, ka ngai si che a, i hman lo viau lo tiraw?" a ti sap a.

"Hman e, ka hman vàng alawm ka lo kal," nui deuh hlek hian ka ti a.

"I buai chung chung hi min hmu tùr hian, ka tih vàng mai khân, i rawn kal lui ang tih ka hlau thut a. Ka hmuh loh hlek che hian ka ngai hman ziah si che a," a ti sap a.

A mipa zâwk ngâwi zâwka țan reng chu a tih chî miah loh.

"Ka hman ka tih chu, chuan, ka lâwm hle bawk a ni," ka ti a.

"I lâwm chuan a țha, i làwm loh hi ka hlau ber alâwm. Ka hlimna i nia, ka laka i hlim loh chuan hrehawm ti ber tùr ka ni bawk, i hlimna tùr ang zêla awm pawh ka duh," a ti leh a.

"Nula fel tak i ni alawm-"

"Puia, ka lâwm e; mahse, ka tilâwm thiam tâwk lo chein ka hria, i lo thlen ațangin fawh pawh min la fâwp miah lo a nia."

Ka khabe hnuaiah duhawm takin a dâk heu mai si a, a thiam anga no chuan min rawn melh chho sar bawk nèn, thil hmuh hrehawm tak chu a ni lo.

He nu hi duh lo ka ni bîk lo, ka duh ve vànga inngaizâwng kan ni alawm le. Kan infâwp a, a duhthawh ve khawp reuh, min thlahlel tak tak a ni tih a tilang thiam hle mai.

"Puia, ka duhin ka hmangaih takzet che a ni, i bulah hi chuan nula sihhnip tak ang chauh ka ni, a chhan chu ka ngaiin ka thlahlel hle si che a."

Fiam hlak ka châk ta tlat.

"Min thlahlel tâwk lo tih ka hriat tawh kha, min dan tlat tawh kha, min thlahlel tak tak ni la chuan, min dang hauh lo ang maw le," ka ti ve ngat a.

"Nia...ni ve tho mai, virgin ngeia pasal neih ka tum ve țhìn a; mahse, ka tum chu ka thlâk mai dâwn em niang?" a ti ta.

Nula virgin.

Lalpa leh! Ka thil hriat hi âwih a va har êm!

Ngun zetin ka en a, chutianga a rilru put dàn min han hrilh ta mai chu mak ka ti a, ka âwih lo lek lek hial a ni! Nula fel tak a ni a, nula thianghlim a la ni bawk a! Min duh vàng maia a rilru thlâk a duh ta mai chu ka âwih lo phal lo, dâwt min hrilh lah ka ring bîk hauh lo.

"Nula thianghlim i ni maw?!!"

"Aw, engati nge? Min ring lo em ni?"

"A mak!"

"Ka sawi tawh kha, ka thianghlimna hi ka pasal tùr tân ka la hum ve țàng țáng alawm, ka tân Pathian ruat i nih ka ring asin. Chuvàngin, tunah hi chuan i tân chuan...ui ka nei tawh hauh lo," a ti sap a, a zak leh deuh si a niang, a meng hnuai ta raih a.

"A làwmawm, ka lâwm e; mahse, heti chen i lo hum tawh i thianghlimna hi chhuhsak che ka tum hauh lo a nia. Pasal i neih hma chu ka humhimpui ang che," ka ti ve vat a.

Ka nupui a ni dâwn si lo va, duhâm taka a duhawmna pâr tlan chu ka duh hauh lo, min hnial dâwn miah lo tih hre mah ila. Mahni hmâ sial lutuk hi a țha ber lo, a pasal tùr tân thianghlim takin invawng zêl se ka duhpui.

"Puia, ka hîp miah lo che tihna em ni?"

Min hip alawm. Mipa ka ni a, a vun nêm leh mâm zetin min han dek phei chu, mipa ka nihna ka hre chhuak ve vawng vawng asin. Ka nupui ni miah lo tùr leh ka hmangaih loh hi chêtsualpui ka tum lo mai a ni, a har asin.

"Min hîp takzet."

"Chuti?"

"Afak, inngaihtuah chiang rawh. Nakina i inchhìrna tùr eng thil mah ti suh, nichin kha chuan ka fiam mai mai che a nih kha."

A zak sen ap ap chu chiang takin ka hmu thei, a kun deuh ta daih nghe nghe a.

"Ka zak hle mai, min mutpui theih loh vàng khân min thlahlel ve lo niin ka ngai a-"

"Ni nâng."

"I bula ka inpuan avàngin min ngaihniam sawt em?"

Uar tak hian," Ka ngaisang sawt che. Nula thianghlim i ni tih ka hriat phah bâkah a hlû ka ti, nangmah ang hi an vâng ngawt ang!" ka ti a.

"Ka lâwm e."

A chhûngte rawn țawng thâwm a rawn awm tâkah chuan ka bul ațangin a kal sawn ta nghâl a, eng thil mah a sawi dun theih tawh loh.

Zanriah chu ka ei ta lo. Min sâwm ve liai liai a; mahse, ka hnial thei hrâm. A nu leh pate pawh hi ka zah ru viau tawh, an fanu hi ka hmangaih si lo va, an fanu rilru tinatu mai ka ni dâwn si, hetia kawp reng pawh hi a rem reng dâwn si lo. Hrilh hun tùr ka huphurh, a rilru a na dâwn si a.

Zànah ka inkhâwm a, Tluangpuii pawh ka hmu nain ka be lo va, ka text chuang lo. Afaki chu ka ngaihtuah a, ka khawngaih lâwk a ni.

Krismas a hnai tawh takzet a, mi tin mai chu Krismas lo thleng tùr boruak vàngin kan sâhâwk a, bazar lam lah a lùn êm êm bawk. Bazàr ka peih lo viau nain 'vawi khat tal han bazàr loh chu' tih vàngin ka chhuak ve hrâm.

Mi kan innêk tâwlh tâwlh a, kei pawh ka inzep kual ve nasa. Thil zuar an âu a, a țhen lahin aurinna nèn, thâwm chi hrang hrang hriat tùr a awm, beng a rim mawlh mawlh e.

Ka hawi kualna lamah chuan hmeichhe pakhat ka hriat hnu ang deuh ka hmu tlatin ka hria, ka thin a phu dawt dawt mai! Ka hawi lêt leh a; mahse, mi dangin an lo din hliah tawh. Kei pawh miin min nèk kal vàngin ka awmnaah ka awm reng thei bîk lo.

Mi ka hmuhna lam chu ka thlîr țâwk țâwk a, a tukkhum chauh ka hmu, ka hria a ni, ka hre lutuk!

"Mami!" ka ti sap a.

Ka theih veleh ka hmuhna dàwr lamah chuan ka lêt leh vat, a lo awm tawh lo. Helai dàwr thleng phei thei tùr pawhin minute tam a ngai asin le! Ka va ui tak! Amah kha a ni chiang alawm, ka hai hauh lo.

Israel ațangin a rawn hâw tihna em ni? Lungleiah eng nge a rawn tih?! Min rawn zawn a tum em ni ang?! Mami a ni chiang, ka hai hauh lo tih ka hre chiang!

Khawi lamah nge a kal ang le?

*HRINGNUN HIAN HUN HLIMAWM CHAUH A RAWN HER CHHUAHPUI LO VA, LUNGNGAIHNA LEH MANGANNA PAWH A RAWN HER CHHUAHPUI FO, HRINGNUN HI A NGAI RENGIN A KAL SI LO VA*

☆LTK☆ - 16 By Dingdi Pachuau

Ka chhoh chuan inthiam loh hmel zet hian min lo en a.

"Keimah vàng vek a ni tiraw?"

"Eng chu maw?"

"Hre lo der kher lo la."

Ka thaw hawk a," Theihnghilh rawh, inthiam lohna tùr pakhat mah a awm lo bawk," ka ti a.

Ngawi reng chuan ei tùr a chhawp chu kan ei a, kei phei chuan tui ka tih vàngin ka ei țeuh lehnghâl. Ka ei zawh hnua ka va en phei chuan ani chuan a lo la ei ve hauh lo, a lo chawk let kual mai mai niin.

"Ei ta che, a tui tehlul nèn!"

Min rawn en a, a mitmeng nalh takah chuan nuam lo tihna a lang chhuak chiang hlein ka hria. Afaki nèn kan inbiakna kha a hre ve vek a ni ngei ang, ani lah kha a kal nghâl ta daih si a, a lungawi lo kher lo ang chu maw? Thil dang sawipui a ngai a ni.

"Engtikah nge i u chu kan zawn leh ang?"

"U Pui, min puihna zawng zawngah ka lâwm êm êm a, tunah chuan a hmâwr kan bâwk thei țêp tawh bawk a, hmanhmawh lo ila ka duh. Ka hmalam hun lo thleng tùr hi ka huphurhna leh ka châkna a inzât vêl hialin ka ring, kum thar zawh lamah ni ta se a țhain ka hria," a ti sep sep a.

"A țha alawm."

Sawi duh nei ni àwm tak hian min en leh zauh țhìn a; mahse, a sawi hreh pawh a ni ve maithei.

"Tluangpui-"

"U Pui-"

Kan țawng rual chiah a, kan inen a, kan nui ringawt.

"Lady first."

"I bialnu kha a chhe lo khawp mai. Ka lo sawi ve tùr chu a awm lo nàngin, inhmuh thiam lohna nei lovin sawi fel hrâm r'u aw. Hmeichhe dang ina i lêng chu a hre thiam vak lo ang tih ring la; mahse, a lungawi lo a nih chuan thu dik tak hi i hrilh vek mai dâwn nia, zépna chhan tùr a awm hran lo bawk a," a ti duah a.

"Lungngai suh, hriat thiam loh tùr lah a awm hek lo."

Zànah chuan ka va lêng ta ngei a, min lo chhawn dànah lungawi lohna nei àwm hmel a puin ka hre lo. Hlim hmel takin min bia a, a lan dàn a danglam hauh lo.

Ka duh dàn takah chuan thinrim se, min be duh lo se ka ti mah zâwk! Mak min ti maithei, a chhan chu rilru na deuha kalsan ai chuan tunah hian min tihtauh khumin min hre thiam lo se ka ti daih zâwk!

Mahse, chutiang chu a ni hauh lo. A hma aiin min be țha zâwk a, vawiin lam chanchin phei kha chu sawi pawh kan sawi chhuak hauh lo. Hlim nui sângin min bia a, a awm dàn hi ka hre thiam miah lo!

A thin a rim lo em ni? A awm dànah hi chuan a lungawi lo hmel ni lovin min duh ngawih ngawih leh min thlahlel hmel ka hmu tlat si.

Ka lèn chhûng chuan hlim lo hmel, thinrim deuh leh rilru hah hmel ka hmu miah lo, min ngaihsak a, min be siam siam reng a, he hmeichhe rilru hi ka hre thiam phâk lo ve!

Tluangpuii kha a thîk ve deuh ka ring asin, a hmuh ngei pawh ka ring, tlêm tal chuan a lungawi loh ve ka ring a nia; mahse, insawi fiah tùr leh zawhna chi hrang hrang min zawh ka rin vena zawng zawng chu boruakah a thâm ral ta vek. A țha a ni mai alawm, thîkna tùr a awm hran lo bawk. Ka bialnu ni miau hek lo le, a u ka zawnpui a ni mai. Țhian angin min en, chubãk a awm lo.

Mami chu ka zawng pah reng a; mahse, a vâng ka ti. Hmeithai zînga pathlâwi zawn ang vêl a ni, hmuh tùr a awm lo. Keimah pawh ka inringhlel ta rum rum mai, ka hmuh sual a ni ngei ang ka ti a; mahse, ni theiin ka hre bawk si lo.

Afaki chuan a hma zawng aiin min ngaihsak a, phone-a min rawn biak loh leh a rawn lêng a. Ka nu leh pate nèn pawh an inngaina takzet tawh, a chângin chaw a rawn ei bawk.

Zanriah ei laiin ka nuin," Kum thar lamah chuan innei tawh ula a țha ang, kan mamawh tawh bawk. Bâkah, in induh tawn tho a, hetia inkawp reng ringawt hi a țha lo, mi pawhin an sawi duh lutuk ang che u," a ti a.

"Nu, i hmanhmawh lutuk a nih kha!"

"Afaki hian a hnial lo tih ka hria. A nghâk zâwk che a ni, i inpeih hun a nghâk. Mipa i ni a, nghah ngaia i awm hi ka ring lo asin."

"Darling, i lo hmanhmawhpui lutuk a nih kha. Hetiang hi chu hmanhmawh viauna chi a ni lo ka tih tawh kha," ka pa chuan a lo ti ta hlauh a.

"Amah hi kan nawr a ngai alawm, a fate ka hmu hman lo ang tih ka hlau asin."

Nui chung hian," Nu, thih hma tum lutuk lo la, ka fate chu i hmu hman hrim hrim ang. I hrisêl a, i thi thuai dâwn lo," ka lo ti a.

"Kum thar lamah a hma lamin innei thuai mai rawh u," a ti leh țâlh a. Ka hnial peih tawh lo va, ka thawhsan ta daih a.

Hmingate chu ka tlawh zauh zauh. Nupui a neih hnuah hi chuan kan inkawp tak tak thei tawh lo nain kan inbe reng tho, a chângin an inah ka lêng a, ani pawh a rawn lêng ve zauh. Nupui neih la duh miah lo kha a ni a, tihian nupui a nei chu a ni ta mai si a, lehlam zâwnga ngaihtuah chuan a ti țha ka ti angreng.

Hmangaihna ka dah pawimawh a, ka hmangaih loh chu neih ka tum lo ve bur. Afaki pawh hi ka kawp rem tùr a nih ka ring lo, ka hmangaih si lo va, chu tak chu hrehawm ka ti, aniin min duhin min thlahlel êm êm si.

Mami kha ka hmangaih. Hmuh leh ka châk tak tak, eng rilru nge ka chungah a put tâk ka hre lo va, kei erawh hi chuan ka thinlung chhûngril ber ațang hian ka lo pawm leh dâwn tih ka hre thlap.

A rûkin ka chhuah phawt chuan ka melh kual nasa țhìn. A vâng, hmuh leh thut chu ka inring ru tho. Tluangpuii nèn erawh inkhâwmnaah bâk kan inhmu ngai lo, text pawh kan in-text meuh lo. A u kha kum thar lam daiha zawn hmuh a tih vàng khân han inhmuh viauna chhan tùr a awm lo a ni.

Urlâwk zànah Țhalaiin hun kan hmang nain kei chu ka tel lo. Hminga, ka kawm ber țhinin nupui a nei tawh si a, tlangvàl lai angin a free thei tawh si lo. Car ka la chhuak a, Afaki bulah erawh chuan Țhalai thil tihnaa tel angin ka insawi, lèn kual mai mai ka duh tlat.

Tluangpuii in luah lamah ka kual a, a inah lèn ka tum chuang lo. A in chu a lo thim țhap, țhalai thil tihnaah a tel pawh a ni maithei. A nungchang ka ngaihtuah cheuh cheuh hian mi pa ngaizâwng duh tùr êm chuan ka dah phal lo, a inhmeh lo ka ti tlat; mahse, nungchang hi chu a thup theih êm asin, bâkah, a duhzâwng tak pawh a lo ni maithei asin, a hmangaih zâwng tak a nih hlauh phei chuan...

Ka tlán kual zêl a, mal ngawih ngawiha inhriatna ka nei deuh thut. Engati nge mal tlata ka inhriat le? Bialnu fel tak ka nei a, țhian lah ka nei ve tho bawk.

Mahse, engati nge ka mal tlat?

Ka hmangaih ka chân tlat a ni. Ka zawn ka zawn pawhin ka hmu thei lo va, tûn hnai têah a hnung lam ka hmu leh zawk a ni a, hmuh nawn leh tum mah ila ka hmu thei rêng rêng lo. Ka rilru, hmangaihna avànga muhìl tawh chu a rawn kài tho leh tlat mai a, ka hmangaih kha ka hmuh leh tâk loh avàng hian ka kim lo tlat a ni.

Zàna ka țhangharh chuan dâr 1 a lo pèl tawh. Ka light ka lo off miah lo niin, ka phone chu ka'n en a, ka hmu phê ruai mai. Ka mit chu ka'n nuai chat chat a, message pawh a lo awm nual.

*Krismas chibai*

Țhiantehoin min lo bûk liam liam hlawm niin, Afaki leh Tluangpuii pawh an bãng lo ve. Ka reply ve char char, a nuam ve mai mai ka ti.

Krismas a lo thleng a, inkhâwmnaah Tluangpuii ka hmu hauh lo. Engtizia nge ni? A dam lo em ni le? Nge Aizawl lamah a phei leh tawh? Nizànah pawh khân a in kha a thim țhap kha a ni a, a phei a ni ngei ngei ang.

Inkhâwm bànah Krismas chhang, Zochhangban kan ei a, a tui khawp mai. Ka ngaina a, ka ngaisâng bawk. Hunpuiah hi chuan ka nu hian a lei ziah, Lalmamawii khân tui a ti thei bîk zual. Lalmamawii ngaihtuah chhuah tâkah chuan vawiin chu an i ah lêng teh ang, ka tlawh khât êm mai.

Chawhnu lamah ka va lêng phei a, an lo chhangchhe khawp mai a. An țhenawm naupangte nèn an lo inkhualtelem a, toys leh puan nèn, an lo hnawk nuai mai.

Rei pawh ka awm lo, ka motor dahnaa ka kal chuan an in hnuai step ațang chuan Mami ngei mai chu kawr lum lian zet hain a rawn chho.

Ka hmu thut chu ka phu dâwrh lo chauh! Ka hmuh ka inring lo va, helaiah hlauh phei chuan ka ring lo leh zual! Mahse, amah ngei a ni!

"Mami!!..."

Ani phei chu thlarau hmu ang maiin a hmai a dâng vâr nghal vek. A meng kiau a, a khap hauh lo. Min hmuh a ring lo lutuk nge, țawng nachâng pawh a hre lo, a dinna bula ban chu a vuan ta chawt a.

"Kan inhmu lo rei ta vang vang hle mai!"

A âwm a dawm vang vang a, chutah thaw hakin," I lo dam țha a nih ka ring, nupui i nei tawh ang chu tiraw?" a ti sap a, a aw pawh a la pângngei reng.

A aw ngaihnobei zet ka han hre leh thei chu vànnei ka inti a, ka hlim hle bawk. Heti chen ka hmu tawh lo va, amah ka hmangaihna lah a la thi hek lo. Hetia ka hmuh leh tâkah phei hi chuan phûr zetin a rawn zuang tho zawk ni berin ka hria.

Ka nui hawk a.

"Ka la nei lo a nih ka ring zâwk, nupui atâna duh ka la nei lo pawh a ni mahna! Nang pasal i nei tawh em?" tiin ka zâwt ta thung a, kan inchibai lo va, kan inhlatzâwng chu pên tlêm tê bâk a ni lo ang.

"Nei tawh e."

Ka thu hriat zet chuh, dâwt mai a ni!

"Dâwt min hrilh kher lo la?"

Min en kal chung chuan," Dâwt a ni lo, dâwt ka hrilh lo che," a ti leh a.

"Dâwt! Dâwt vek! Nangmah ka hmuh pawh hi dâwt vek!"

Ka rilrua rawn awm awm ka sawi chhuak tawp tawp. Pasal a neih ka ring thei lo, mumal tak pawhin kan ințhen hauh loh kha, mi dang inkawpsan hi chu ka hre thiam ang; mahse, nupui pasal inneihsan kher hi chu, a mi den dàn a dang zak!

"Min theihnghilh tùrin ka duh che!"

Ta deuh deuh chuan!

"I nunrâwng hle mai! Hetiang tak hian engtin nge i nunràwn theih? I inhmeh hauh lo a nia," ka ti mawlh mawlh a.

Ban a vawnna chu thlahin nghet zetin a kut pahnih chu a hûm tlat a, inlâkluhlul a tum ve hle reuh mai.

"Ka inhmeh loh tùr thil chi hrang hrang ka ti țeuh tawh! Hmana i hriat ang kha ka ni tawh lo, mi dang, mi hrang hlak ka ni tawh," a ti a.

"Lungleiah hian eng nge i rawn tih? Israel-ah i awm char char ka ring a nia," ka ti ta daih a, a thil sawi ang hi ka sawipui peih lo.

"Ka kal ve lo."

"Engtin a?!!!"

"Thil thleng a tam lutuk! Tuna sawi vek sèn lah a ni hek lo. Nupui i la nei lo tak tak maw? Keimah vàng a ni em? Min la hmangaih reng a ni maw?" tiin a nui var var a.

"Duhtâwk teh!" tiin ka au țhawt a.

"Hmalam panin kal rawh. Thil hlui, nun hlui chu dah bovin theihnghilh vek rawh, hriat reng tlâk a tam lo êm mai."

A țawngkam tin mai chuan min tina zawk zawk. Ka thinlung tinain chemte hriam takin min chhun sawk sawk ni maiin ka hria, he nu hi ka hmangaih êm asin, ka hmangaih êm avàngin bialnu dang nei ve mah ila ka khàikhin lo thei lo va, hmangaihna sem zai thiam tak lah ka ni hek lo. Ka duhzâwng hi ka hmangaih lo va, hmangaih chu a hrang hlak tih ka hre ve kar.

"Mi nunrâwng tak hi ka lo hmangaih si a maw! Mi khawngaihthlâk tak ka lo nih hi!" ka ti vawng vawng.

"Hmangaihna hi a awm tak tak lo, min duhna kha hmangaihna emaw i ti a nih kha."

Hm, min zilh ve deuh em ni? Ani hian kei aiin hmangaihna awmzia a hria ang maw?!! Teuh lo lutuk. Hmangaihna kher hi chu, ka hriat chanve pawh a hre lo ang!

Ka ngaithla duhtâwk. Ka hre zêl a nih chuan ka nat belh zel dâwn, tunah pawh hian ka thinlung hi na tawh tak a ni!

"Dam ţha taka ka hmu leh thei che chu ka lâwm e."

Car chu hawngin ka lût ta vat. Chak zetin ka khalh chhuak a, side-glass ațang pawhin ka thlîr lêt hek lo, ka thinlung a tina ve tâwk!

Ka rin lohnaah ka hmu a, ka rin loh deuh țawngkam ka dawng bawk. Ka rin loh lam ațangin min tina a, min nghaisa a, min theh phar kual vêl niin ka hria.

Hmana Mami hmel kha chu a la pu si a, engtin nge khatiang rilru kha a lo put theih tâk le? Mi nunrawng a ni lo va, min ngaiin min thlahlel a, min duh ve viau bawk a nih kha.

Ka nuihsawh niin a ngai em ni le? Israel ni anga a insawi laia ka nuih vàng khân ka hmusit niin a ngai a ni ngei ang. Ka hmusit lo, ka nuihsawh hek lo; mahse, mak ka ti a nih kha. Kha vàng khân a thinrim em ni le? Heti chen inhmu tawh lo mah ila thinlung na deuha ințhen kher hi ka duh lo asin, a țawngkam kha a sawi ni àwm lo tak hlîr a ni lehnghâl!

Thil ka ngaihtuah kual nasa a, ka room-ah ka awm deuh chawt. Thlalâk hlui ka hai chhuak a, rei viau tawh mah se, a ngai téin a lo la awm țhap. Khâng hun lai kha chuan kan la hlim asin, ka hlim takzet. Ka khawvêl kha a pâr vul chiai chiai reng a nih kha, tunah chuan, tunah tak phei hi chuan a chul rup maiin ka hre ta.

Ruai ka țheh lo va, ka chhuak hek lo. Afaki min rawn call pawh ka chhâng lo, mi dang call pawh chuti tho. Ka bialnu hlui, pasal min neihsantu ka sûn a ni!

Ka hmangaih a, pasal min neihsan chu thuhran, a țawngkam mawlh kha, a hriam a ni. Min ât hlawih hlawih a, mipa mah ni ila, nâ ka lo hre ve tho si. Hmangaihin lo duh viau lo ila chuan ka tuar vakin ka ring lo; mahse, ka hmangaih êm a ni.

*Thil dik lo thleng a awm a ni tiraw?*

*Ka tilungawi lo che em ni?*

*Vawi khat chauh tal min chhâng teh, Puia*

*Ka nawr lutuk che a ni tiraw? Min ngaidam rawh, i lung tihawi loh hi ka tum miah lo a nia, i duh ang chiah zêlin ka awm tawh ang*

*Ka hmangaih che tih i hriat kha, hrehawm ka ti a nia*

Afaki message chu a lo thleng reng reng a; mahse, ka reply chuang lo. Ka nu lah a mangang a, chanchin eng mah ka hrilh si lo va, a àwm viau a ni. Chaw ka ei laiin min zâwt a, engkim a țhat thu chauhin ka chhâng; mahse, a țha lo tih a hre ve tho.

Hminga a rawn kal ve ta, ka nu mangangin a pùr a ni ngei ang chu. Nute nge nge, fate buainaah hi chuan an lo buai ve thei khawp mai.

"Eng thil nge thleng a? Afaki a mangang a, i nu lah chuti bawk. Eng emaw tal chu min hrilh teh," a ti a.

"Eng mah a ni lo, thil hlui ka ngaihtuah a."

"Thil hlui mai mai a nih tho chuan call tal chu chhâng ve la?"

"Ka peih lo a ni, engkim hi ka hnê," ka ti leh ringawt a.

"Tlangvâla pumpa, hetianga awm te chu, a chhan tal han sawi la? Problem solve dàn a awm maithei asin," a ti leh a, a nui deuh sûng a.

Ka ngawih vang vang hnuah chuan,"Ka hmangaih ka chân a ni," ka ti sup a.

Ngun zetin, mit khap hauh lo hian min rawn en a, a ngai serious ve chiah a ni tih ka hria. Nui hmel pawh a pu tawh lo, a reh hmak tawh.

"Tu?!!"

"Kan inkawm hmaa thil thleng a ni."

Hminga bula ka sawi zawh hnu chuan ka thâwl ve deuh huaiin ka hria. Hmeichhehovin an rilru natna leh hahnate an țhiante bula an sawi liam liam țhìn hi ka hre chhuak zawk, a lo țha phian dâwn a nih hi.

"Ka hmangaih a, kum heti chen ral tawh mah se ka theihnghilh lo, ka han hmuh leh tâk thutah khân ka la hmangaih reng tih ka hre thar leh a; mahse, ka tum loh dàn deuhin heti khawp hian min tina ta si. Hmangaih viau lo ila chuan heti khawp hian min tina thei lo ang," ka ti charh charh a.

A ngaihtuah ve nasa a ni ang, a hnu deuhah chuan," Kei chuan hmangaihna chungchângah kher hi chuan sawi tùr ka hre hauh lo, a chhan chu hmangaihna awmzia ka hre lo va, hmangaih lah ka nei hek lo. Tuna ka nupui pawh hi ka hmangaih em tih ka la hre miah lo, chuvàng chuan, sawi tùr ka hre lo. I la na hle si a, i hmangaih ngei a nih ka rinpui che," a ti ta daih a.

Hmangaihnaa tlu lût ve lo tân chuan a awmzia hi hriat thiam a har rêng a ni. Rin loh deuha ka hmuha ka hlim tehrêng nèn, a țawngkam tin mai khân min tinâ a ni. Min chhun sawk sawk a, rei lo tê chhûngin thinlung keh sawmin min siam. Pasal a neih kha chu a țha, a țawngkam mawlh kha, a mak! Min tihnat a tum rêng em ni?

*I MIHRINGPUITE I ZAH THIAM POH LEH NANGMAH KHA I ZAHAWM SAWT ZÊL ANG*

☆LTK☆ - 17 By Dingdi Pachuau

A țawngkamin min hliam avànga nat hlen hlauh erawh chu ka tum hauh lo. Hmalam ka pan zêl ang, ani pawh ka tel lova a awm thei a nih chuan kei pawhin eng nge ka theih loh bîk ang? Mahse, ani zawngin min hmangaih hauh lo va, kei lahin tihtak zetin ka hmangaih si a, kan thinlunga a thawh dàn chu inang lo tak tùr chu a ni.

Afaki ka timangang a, ka nu lah chuti bawk. Tunah chuan duhtâwk tawh ang, ka hawi kîr tawh lo ang. Ni e, tunah chuan ka hmangaih hmasa chu ka sûn nasa tawh a, ka tàwp tawh ang.

Amah ka hmangaih avàng khân min nuihzat maw? Pasal a neih hnuah kei hian nupui ka la neih ve loh vàng maiin khatiang khân min țawng khum ngam a nia, mipa tân chuan a zahthlâk! Ka zak ru cheuh cheuh, khati khawp khân ka duh ve a nia; mahse, ka dem thei chuang lo, min hmangaih lo a ni ve mai. Bâkah, chanchin kan inhre pawh lo vang vang si a, a tân pawh ka chanchin a hriat loh miau chuan lo rinawm chu har tak tùr a ni.

Pathianin ka tân a ruat a ni lo va, ka hmangaih avàng ringawtin ka chelh thei hek lo. Kha chen inhmu tawh lovin mahni duhzâwng ve vein tãl mah ila ka hmangaihna a bo chuang lo a lo nih kha; mahse, ka tân Pathianin min ruatsak lo bawk a, ka thlah vang vang tawh ang.

He hmangaihna khawvêl ata hi ka inthiar fihlìm rih a ngai a ni, hmangaih ka nei leh thei tawh rih lo ang. Ka thinlunga hmangaihna ka neih hmasak berin min kalsan ta si a, ka tân pawh chawlh ve rih a ngai, heti chung hian hmangaihna kawng ka zawh thei rih lo ang. Ka tawrh ang kha mi tawrhtîr ve ka duh lo, hmangaihna avànga hliam chu a dam har dâwn si. Hmangaihna vêka tuam dam a ngai dâwn asin, chu nun chu risk tùrin tu mah ka duh lo, min tuam dam tùr hian tu mah ka duh rih lo, inthiar fihlìm ka duh ber rih, tûn atân chuan.

31 zàn chu Afakite inah kan hmang a, mi dang an hlim viau lai chuan kei chuan thil chi hrang hrang ka ngaihtuah kual nasa. Pathianin ka tân he nu hi min ruatsak a ni ang em? A nih chuan, engati nge hmangaihna mita ka en theih si loh le? Hun eng emaw chen duh takin ka lo zui ve tawh a ni a; mahse, ka hmangaih lo tih ka hre chhuak tawh si a, hetia zui reng mai hi a tihchi tawh hauh lo. Ani pawh hian ka hmangaih lo tih a hriat hma hi a țha zâwk ngeiin ka ring, a tâna ruat ka nih loh chuan a pawm thiam ve lutuk ang, mi fel tak leh puitling tak a ni alawm, nakina kan inchhìr ve ve lohna tùrin keimah hi a pawimawh hmasa zâwk chu ka ni.

Bathlàra kan țhut dun lai chuan," Puia, nuam lo i ti em? Hrehawm i tih hmel riauin ka hria. Mi dangte nèna hmanho hi i duh lo deuh em ni?" tiin min vêngthâwng tak chuan min zâwt a.

"A țha vek, min ngaihtuah lutuk a nih kha. Nuam lo ka ti hlei nem, thil ka lo ngaihtuah kual a."

"Puia, ka ngaihtuah che alawm, hrehawm i tih ka duh lo va, kan pahnih chauha hman i duh-"

"Afak, a țha vek ka tih tawh kha. Kan chungchâng hi ka lo ngaihtuah a," ka tih chuan hlauhthàwn hmel fé hian min rawn en chho a. Tukverh ațang êng lo chhuak avàng chuan a hmel chu chiang takin a hmuh theih, kei erawh a thim deuh chin chiahah ka awm thung.

"Ngun taka kan ngaihtuah a ngaiin ka hria. Afak, nula fel tak leh puitling tak i ni a-"

"Eng thil nge sawi i tum, Puia? Min tihlauthâwng a nia, min țhen i tum em ni?" a rawn ti chhuak ta chiah.

"Nang ka tawn hma che hian hmeichhe pakhat hmangaih ka nei a, kum tam tak a liam ve ta. Tûn hnaiah ka hmu leh a, ka thinlung a tikeh sawm vek a ni."

"He hmangaihna khawvêl ata hi inthiar fihlìm rih ka duh a ni, chu ka natna tawrh ang chu tuar ve lo tùrin ka duh che a, tu mah hian tuar ve lo se ka duh."

"Puia, kei chuan ka hmangaih che alawm, i hun liam tawh chu engah mah ka ngai lo. Ka nghâk thei che, ka nghâk che ang a, i inpeih veleh i thinlung keh sawm tuam dam tùr chuan ka inbuatsaih nghâl ang," a lo ti sap sap a.

Ni lo, min nghâk tùr hian tu mah ka duh lo, ka ngên ngai lo bawk ang. Ka inpeih hun hriat a ni lo, an nun risk tùrin tu mah ka ti thei lo, kan hma hun tùr lah kan hre hek lo.

"Ni lo, nula puitling i ni ka tih tawh kha, hmangaihna hi ka ngai pawimawh a, ka dah pawimawh hle bawk. Ka inthiar fihlìm avàng erawh chuan inthiar fihlîm ve tùrin ka duh lo che, nun chèn la, hmangaih pawh tawng rawh; mahse, na suh ang che. Hmangaihna avànga nat hi thil țha a ni hek lo, hmangaihte avàngin nat loh tùr, hlim zâwk tùr," ka ti ta duah a.

A ngawi vang vang a, chutah zawi sap hian," Nangmah vàngin ka hlim țhìn asin," a ti a.

Afaki hi chuan min duh ve tak tak a, ka lungawi loh a hlau țhìn tih ka hria. Ka tân hi chuan a țha ve thlâwt; mahse, ka hmangaih tlat lo. Induh tawnna ringawt hi chuan a daih rei si lo, pâwn lam mawina nèn hian an inang rengin ka hria.

An in ațanga ka haw hnuah chuan ka rilru chu a thâwl hawkin ka hria. A rilru a na ve ngei ang; mahse, kan inkâr 'lem' zet hi ka kalpui thei tawh lo. 'Lem' ka tih chhan pawh kan inkârah hmangaihna a awm tlat lo. Hmangaihna chu mi pahnih inkâr a ni tùr a ni si a, mi pahnih inkâra mi pakhat zâwk chauhin hmangaihna a neih chuan an inkâr chu hmangaihna tluantling a ni thei lo, hmangaihna khingbâi a ni ka ti tlat. Chutiang chu tuna Afaki nèna kan inkâr hi a ni.

Afaki chuan a tuar ve ngeiin ka ring, ka nun a râwng in ti maithei, a dik ve tho mai; mahse, nakina hrehawm ti taka hringnun hman chhoh ve ve ai chuan hetia sawi fel hi a țha mai zâwk. A nun zawng zawng ka tihchhiat hma ngeia hrilh hi a finthlâk, a tân hun hawnsak hi ka tih ngei tùr a ni bawk. Hrehawm a ti ang, min dem viau bawk ang; mahse, a hriat thiam hunah erawh chuan fel min la ti viau mahna! Kei erawh chuan hmangaihna kawng hi chu ka pènsan rih tawh ang. Ka hmangaihna hmasa ber kha Mami tân ka hlàn tawh a, ani lah chuan ka hmangaihna kha min pe lêt leh tawh si lo. Hmangaihna semzäi thiam ka ni lo va, holam taka ngai mi ka ni lo bawk.

Mami hi ka dem viau thei bîk lo ang. Min duh ve viau kha a ni a, ka lo zar viau țhìn em ni zâwk le? Min duh lo thei lovin ka lo siam tlat ang a, hnial thei si lovin ka lo siam a ni maithei asin. Zalèna a awm tâkah chuan min kalsan ta vang vang pawh a ni thei a, min hmangaih loh chuan chu chu a tih tùr awmchhun a ni tlat. Ka lo tizalèn lo lutuk a niang, ka thlâkhlelh ang leh ka hmangaih ang thoa min hmangaih ve ka rin lutuk vàng a ni, mahni hma ka lo sial mah mah a ni ang e.

Kum a lo thar a, Afaki chu a reh vang vang mai. Ka nu lah chuan kan chanchin chu hre ve hek suh, nupui nei tùr chuan min nawr țan leh ta. Kan chanchin chu hrilh ka tum bîk lo, ka ngawi mai mai. Afaki leh ka nu ka tibeidawng leh dâwn ta chu a ni si a, fapa fel lo tak chu ka lo ni.

Lalmamawiite in luah bula va kal leh pawh ka duh viau a; mahse, eng nge ka va tih ber ang? Mami hmu tùrin maw? Engah nge min lo ngaih ang? A duh loha pasal a neihsan tawh hian ka va zawng leh dûk dûk dâwn tihna maw? Ni lo ve, min kalsan thei a, kei pawhin ka thei ve. Ka thei ve chiang tùr a ni, awm lo ngèn rual ka nih tawh loh hi.

*I dam țha em? Inhmuh a khât hle mai*

Ka thaw huai. Nia, ani hi Aizawl lamah Kum thar a va hmang a ni ngei ang, a hmel hmuh tùr a awm miah lo a nih kha. Mami boruak vàngin ka lo hrechang tawh dêr lo, min rawn text lo phei se chuan ka lo theihnghilh hmin dèr dâwn asin.

*Dam alawm, i lo phei tawh em?* tiin ka reply ve thâwr a.

*Hetah ka awm reng alawm, mak thei e*

A ni maw? A va bengngawn theih ve le!

*Ka va hmu ngai si lo che!* ka ti leh ringawt.

*Nia, Ramthar lamah ka che tla tam deuh a*

Tun țum chu ka tidik ve ta tlat mai! Helamah a lo awm tam lo a nih chu, ka risk vêl mai mai kha a ni sia.

Mi biak ka peih vak lo nain a pawimawh a nih ka ring a, ka call ta a.

"I u chu engtikah nge zawn leh i duh?"

Ani chuan rang zet hian," Aw, chu tak chu, ka lo phone ngam lo che a. I hman veleh ti ila? Kei chu ka hman reng a nia; mahse, i buai chuan ka nghâk thei che a nia," a rawn ti a.

"Buaina a awm lo, ni 15 hma chu ka free char char."

"A va lawmawm tak! Chuti tunah kal mai ila?"

A fiamthu ve a ni tih ka hre nain ka la thutak lui a," Um, ka'n insiam ang e aw," ka ti a.

Rang zet hian," Ka ti mai mai a nih kha. Naktûk lamah ti zâwk ang hmiang, i hman ang em?" a ti vat a.

"Ka hman reng ka tih tawh kha."

"Petrol a vâng sia, ka tum ve tawh ang. Keimah vàngin i hek nasa tawh si a."

"Aw le, i tum vek dâwn nia."

Zanriah ei laiin ka nuin," Afaki nèn in ințhen a ni maw? Thil awmzia min han hrilh teh, engati nge i țhen a? Hmeichhe dang i kawp em ni?" tiin min zâwt ta thut a.

Melh chuang lo chuan," Ka hmangaih lo a ni, ka hmangaih miah loh chelh khawtlai ka duh lo," ka ti a, chaw chu ka ei mawlh mawlh tho a.

"Khati chen i kawp tawh a, hmangaih lo si engati nge i kawp reng a? A tuar na ngawt ang chu," a ti sap a, chutah," Hmeichhe dang i kawp a ni lo maw?" a ti leh a.

"Kawp lo."

"A nih, khawiah nge a hma khân i lèn ziah?"

Ka pa a lo inrawlh vat.

"Tlangvâl a ni alawm, khawiah pawh a lêng ve ang chu. Duhtak, duhtâwk teh, i inrawlh lohna tùrah inrawlh lo la?" a lo ti vat a.

"Ka fapa a nia, ka inrawlh ve ang chu. Nupui nei tùrin ka duh tawh a, chu chu sual em ni? Ka fapa nuna ka inrawlh lohin tu nunah nge ka inrawlh ang? A țhiante nunah maw?" a ti ta hmarh hmarh a.

"A inpeih hunah, a hmuh chuan nupui chu a la nei ve ang chu. Nawr kher a ngai lêm hlei nem, a duh tak a la hmu lo ah ngai mai la, a fel vek mai ang," ka pa chuan a lo ti leh a.

"Lo heti ziah suh, Afaki tluka nula fel a hmu tawh lo ang, ka ui asin."

"A aia țha, hmel ţha leh fel tak, a hmangaih leh duh tak a la hmu mai ang, i lo hmanhmawhpui a nih kha."

"Hmanhmawh e, kei chuan Afaki hi ka duhpui. Nula dang i melh lo chiang maw?" tiin rinhlelh hmel deuh hian min rawn en a.

"Nu, duhtâwk teh," ka ti a, ka tho ta nghâl a.

"Ni lo, ka ringhlel tlat che a ni, ani lah chuan eng mah a sawi duh si lo, min tibuai takzet," a ti leh a.

Hmeichhia vàngin kan buai ta chu a nih hi, keimah mai ni lovin kan chhûngkua thleng thlengin kan buai zo. Chaw ei pawh a tui nek lo ve.

Chhùn dâr 12 pelh chuan restaurant-ah kan țhu leh rân tawh. Mi kan zâwt nual tawh a, Ruatsanga chu an lo hre mang tlat lo nia, a pêm tawh pawh a ni maithei a ni. Hmun dangah a lo pêm tawh a nih chuan zawn hmuh chu a har ve maithei a ni.

"Beidawng lutuk lo la, kan la zawng zel dâwn alawm," tiin a indawm kun lap chu ka hnèm ve a.

"U Pui, ka u hi a thi tawh a nih loh chuan a awm tawh lo a nih ka ring, hmun dangah a awm daih tawh pawh a ni maithei tho. Ka tibuai thei bawk che sia, mi zawh kual dun dun lah hi thil nuam a lo ni vak bawk lo nèn, vawiin chauh hi ka tibuai tawh ang che," a ti a, a aw ațang chuan a beidawn hmel ka ti, ka khawngaih reuh. Kei pawh ka beidawng lek lek tawh, a chhan chu kan zawhho hian an lo hre lo thei viau si a, Ruatsanga a ni lo em niang aw ka ti deuh rum rum hial a ni.

"Kan zawng hmu êm êm ang."

Kan chhuah dâwnah chuan Tluangpuii chu inthiarnaah a lût lawk a, keiin pawisa ka lo pe thung a, chutih lai chuan nutling pakhat rawn lût ve mêk hian," Sir Ruatpuia kha i ni tiraw?" tiin min rawn be chawt a.

"Aw, ni e... eng nge ni ta?"

A lam hawiin ka en vat a, ka hre chhuak mai lo va; mahse, ka hre chhuak har lo. Naupang leh nutling bike-in a hnâwl a nutling kha a ni tih ka hria e.

"Kan va inhmu khât ve!"

"Nia, tiraw? Kha i țha zêl maw?" tiin ka be luam a.

"Aw, țha e, ka țha lutuk."

Tluangpuii inthiarna room ațanga a lo chhuak chu meng phar âwk chungin, ngun zet bawk si hian a lo en a, a makti hmel chu keiin mak ka lo ti ve bawk!

"U Pui, kan kal hman tawh tiraw?" A sam a benga zep țha pah chuan a ti a.

Ka chhâng lo va, nutling min betu lam mawlh chu ka la en.

"Nula, ka hriat hnu i va ang ve! Biaktluangi fanu i ni hial lo maw?!!!"

Makti zetin Tluangpuii chuan min en phawt a, chutah, nu chu enin," Ka pi, ka nu chu i hria em ni? Mawh, ka pi, ka nu chu i hria tiraw? Ka va lâwm tak!" a ti chhuak hliai a, a aw ațang chuan a phùrzia a hriat theih.

"Lalpa leh! In va inang tehlul em!! I nu kha i ni emaw ka ti țêp a; mahse, i la naupang sia, a fanu i nih ka ring ta zâwk a."

Ka pi hi ka lo hre chhuak har ka ti. Serkawna awm nghet a nih chuan hre ngei tùr a ni, Tluangpuii nu kher lo pawh, Tluangpuii u Ruatsanga pawh chu a hre ngei ngei ang!

"Ka pi, ka va lâwm tak!"

"I nu chu i chhùn takzet a ni. I nu kha a hmel a țha asin."

Chhuak mai lo chuan kan țhu țha leh tak sauh sauh a, kan thu hriat chu a làwmawm êm a ni. Tluangpuii tân tak chuan a nia làwmawm dâwn ni, a lo zawng rei ve tawh si a.

"Ka pi, Serkawna awm nghet hi i ni em?" tiin ka zâwt a.

"Aw, ni tawh mai e."

"Ruatsanga i hre mial lo maw? Pu Duhkima fapa a ni àwm e."

Maktih hmel zet hian min en a," I hriatzawng mi a ni em ni a?" tiin min zâwt lêt a.

"Hre lo ve; mahse, kan zawng mêk a."

"Eng atân maw?!"

"Tluangpuii u hi a nia," tiin Tluangpuii chu ka melh zauh a.

"Lalpa leh!!" tiin a hmui chu a hup a.

"Ka pi, i hriatzawng a ni tiraw?" tiin ka lo zâwt vat.

"Thil mak tak a va ni êm!!"

Tluangpuii nèn chuan kan inen a, kan hre thiam lo ve ve a nih ka ring!

"I u chu a va lâwm dâwn ém!!"

"Ka pi, ka u chu i hria tiraw? Khawngaihin, a awmna min hrilh thei ang em?" a lo ti sawk sawk a.

"Aw, ka hria alawm."

Ka phùrzia chu, Tluangpuii phùr tluk zetin ka phûr ve hial ang chu. A chhan chu ka puihna hi a thlàwn mai mai dâwn lo si a.

Car chu ka khalh a, kawng min hrilhnaah chuan ka tlànpui zêl a, kan tlàn pah chuan ani chuan phone-in mi a bia a.

"Mikhual ka rawn hruai dâwn a nia, Dî-te."

Rei an inbe lo, thui vak lo kan tlàn hnuah chuan Pu Rsate in kawtah chuan kan tlân lût ta a.

"Hei chu, Pu Rsate in a ni lo em ni le?" ka ti rilru a.

"Aw le, Ruatsanga chu a awm lo ang, a nupui leh a fate erawh an lo awm ang aw," tiin ka din hnuah chuan car ațang chuan a chhuak ta nghâl a.

Chhuak vein Tluangpuii beng bulah chuan," I huphurh em?" tiin ka zâwt sap a.

Min rawn melh chho zawk a," Aw, ka huphurh a, ka phûr bawk," a lo ti sap a.

"A làwmawm ka ti kei chu."

"Nia...kei pawh," tiin a thaw hawk a, a kut hûm ruhin," Ka hmu châk tawh," a ti leh sap a.

Doorbell chu a hmet ri a, rei pawh kan nghâk lo, nu hmel țha zet hian a rawn hawng a, hei pawh ka hriat hnu a ni leh tlat, Pu Rsa nupui a nih hi!

Nui sâng hian," Lo lût r'u, ka lo beisei reng che u a, lo țhu r'u," tiin min lo chhàwn țha kher mai. Chutah, min hmuh chuan," E, Sir Ruatpuia ni rengin! I dam em? Teh tlat che chuan!" tiin min rawn chibai a, Tluangpuii pawh chu a chibai ve tho.

"Dam e, in dam zâwk maw? In inah hian ka rawn kal ang tih ngaihna ka hre miah lo nia!" ka lo ti a.

Kan țhut hma chuan ka pi chuan," Dî-te, ka nula rawn hruai hi tu nge ni a i rin le?" a ti a.

Ani chuan," Ka va ring thiam mai lo ve, sawi ve mai la, Nu Sangi tak hi chu, thil hi min rin chhintîr hmasa ve ziah," nui chung hian a ti a.

A hmel a țha ka ti tak tak a ni. A țawng duhin a fel bawk si, Pu Rsa pawh khân a duh viau rêng kha.

"Rsa nau a nih hi."

Nu hmel țha, Dî-tei makti hmel chu hmuhnawm tak a ni!

"Nu Sang, engtin nge a nih theih?!!"tiin a zâwt phawt a, chutah, Tluangpuii chu enin," Rsa nau maw i nih? I hmel țha hle mai, i u chu i hmu tawh ang chu tiraw? Khawi maw, ka lo chibai nawn leh teh ang che, i in a nih hi aw, inthlahrung miah suh aw," a ti nghâl bawrh bawrh a.

Sofa-ah chuan țhutpuiin a kut chu a chelhsak tlat a, Tluangpuii chu a țawng ve miah lo. A hamhaih zo vek a nih ka ring, a kha a chih zo a niang.

"Rsa nu Biaktluangi fanu a nih kha, a u chu a rawn zawng a, kan intawng fuh ta a ni. Rsa'n a hriat hun chuan mak a ti dâwn êm asin," Pi Sangi chuan a ti a.

Ruatsanga chu Pu Rsa, Tluangpuii u hi maw lo ni a?!! A va mak ve!! Engtin nge ka hriat chhuah loh theih le?!!!

"I u chu a zin lawk a, ni 12 khian a lo haw ve chauh ang, a hmu châk viau chein ka ring. Ka hrilh châk tawh lutuk ringawt! Kan chhûngkua hian tûn hnai hian thil țha kan tawng chho mawlh mawlh ni maiin ka hria," a ti malh malh a.

"Ka u chuan nupui a nei hmel țhain a nei fel ka ti hle mai."

A aw thâm chhelh mai chu a thâm zualin ka hria, ka lo țang ve lutuk.

"Ka lâwm e, i u chu a lâwm dâwn êm mai. Lo haw thuai thuai se tiraw? In la inhmu miah lo maw? A țha e, kan lo surprise dâwn nia, unaunu dang a lo nei reng tih a hre àwm tawp si lo," a ti leh a, a hlim hmel chu hmuh a nuam takzet.

"A lài leh nasa ang chu!" Pi Sangi chuan a lo ti a.

Nui hawk hawk chung hian," Nia, ih maw i u chu a zâm leh ngawt ang, a kut a hit leh vek mai ang," a ti siam siam a, a nèlawm ka ti tak tak a ni.

In ka thlena room ka luh hma chuan ka nu chuan," Nula dang ka kawp lo i ti maw? Kha nu Officer-kawp-lâwri kha em ni i bialnu thar chu? Ka rei! Lalpa leh, a ni ti lul suh! Ka duh thei lo, ka duh hauh lo a nia! Ka ina lo lût tùr pawhin ka duh hauh lo tih hre rawh!" tiin min lo àn khum nghâl phiar phiar a!

*NANGMAH PAWH I INZAH ZAWH LOH CHUAN MI DANGIN ZAH TÙR CHEIN PHÛT HAUH SUH*

☆LTK☆ - 18 By Dingdi Pachuau

"A va mak tuar tuar ve! Eng thil nge ni ta?" ka pa chu an room ațangin a rawn chhuak ve nghâl a.

"Amah kha zâwt rawh," tiin ka nu chu an room-ah chuan a lut ve ta hmak thung a, kawngkhàr lah chu a khãr ri țhuai bawk a.

"Bawiha, eng thil nge thleng a?"

"Pa, ka nu khân a hre sual a nih kha," ka lo ti a.

"Eng nge hriat sual tùr chu? I pa ka ni a, min han hrilh teh," tiin min zâwt chîk leh deuh a.

"Pa, sawi tùr pawh a awm chuang lo. A thil tihah ka pui ve a, chu zawng chu a ni mai, puih min dìl chuan ka pui mai ang chu, thil sual pawh a ni lo va."

Min en vang vang a," A țha alawm, puitling mahnia thutlûkna siam thei rual i ni a, ka ngaihtuah lo che. Chuan, chhûngkua tihmingchhetua i awm duh pawh ka ring hek lo, i nu kha chu ngaihtuah duh suh," a ti a, choka lamah chuan a lût phei a.

Ka rilru a hlim ve tawh tehlul nèn, ka nu min àn khumna chuan min tibuai zo leh ta rih. Tluangpuii nèn kan chhuak tihte kha engtin nge a lo hriat ni? Nge min lo hmu dùn zâwk ni ang? A lo chhuak ve zâwk em ni ang? Engtin nge min lo hmuh rêng rêng ni?

Zanriah ei lai pawhin ka nu chu a lo chhuak duh lo. Ka pa chuan," A la thinrim ve rih a nih kha, i nu hi chu i hriat chian kha. Nakinah a reh ve mai ang, i nu a nia, a hmangaih che a, i tâna țha ber a duh bawk țhìn. A duh ang lo hleka i awm chuan a thin a rim vak țhìn tih chu i hriat tawh kha," a ti bawrh bawrh a.

Ka ngawi reng. Keimah vànga kan chhûngkua hetia kan awm vawi khatna a nih vàngin nuam lo ka ti, ngaihzâwng vàng hlauh phei chuan hrehawm ka tih a zual; mahse, Tluangpuii hi ka bialnu a ni miah lo, lo duh pawh ni ila min duh tawp nâng. Ka nuin kan awm dùn a lo hmu pawh a ni maithei a, hetia thinrim vak ringawt hi chu a zia lo deuh chu a ni.

Zànah pawh ka chhuak lo, room-ah ka awm char char. Tluangpuii'n min rawn call a, a hlimzia sawiin lawmthu min hrilh mawlh mawlh a, chutih rualin a u Ruatsanga chuan a hmuh hunah a ngaina lo ang tih leh a lo pawm duh lo mai ang tih a hlauh thu chu a sawi siam siam bawk a.

"A fel alawm, pa fel tak a ni asin, a ngainain a nau i nihna ang ngeiin a lo pawm ngei ngei ang che," ka ti a.

"A êng zâwnga thil i thlìr hian min tihlim țhìn. Tuna i thil sawite kha lo thleng tak tak tùr leh dik ngei tùrah ka ngai tlat a nia aw, mi rilru hneh dàn i thiam e."

Ka nui suk. He nu tê hian ka hlim loh lai pawhin min tinui thei nia.

"I mi faknaah chuan làwmthu ka sawi e."

"Ka fak che pawh a ni lo, thil nihna tak tak ka sawi a nih chu. Nang awm lo la chuan ka u pawh ka la hre chhuak dâwn hauh si lo, ka lâwm nawn leh e."

Kan inbe zo chiah tihah chuan Hminga'n min rawn call nghâl zat.

"Ka thil hriat hi thu dik a ni em? Ni lul suh se!" a rawn ti nghâl a.

Eng thu nge a lo hriat? Ka nu hriat ang tho kha em ni? Hm, engtin nge a lo hriat theih le? Thil thlen dàn hi ka duh miah lo.

"Eng thil nge ni ta?"

"OC-i kha i kawp tih min hrilh miah suh!"

OC-i. Chu hming a sawi chuan ka thinlung a rawn tina zak mai!

"Ka kawp lo," ti bâkin ka chhâng lo.

"Mahse, engtin nge hmuh dun in nih theih? Engati nge eng thil mah ka hriat ve loh? Afaki nèn in in-break chhan pawh kha nu vàng kha a ni tiraw? Țhianpa, ka rin i lo ang lo kher mai, kha nu kawp duh êm tùr chuan ka ring phal lo che asin," a rawn ti mawlh mawlh a.

Ka ngawi tawp. Ka țawng chuan ka țawng na palh ang tih ka hlau. Ka kawp lo tih ka hrilh tawh a, a tâwk ka ti viau.

"In inkawp miah lo maw?"

"Aw."

"A nih, engati nge in chhuah dun si? A chhan awm miah lovin Afaki i țhen thut a, chutah, OC-i nèn hmuh dun in ni nghâl bawk a. Hriat loh ka nei tihna a ni thei em?"

OC-i. OC-i tih reng mai. Hming a nei, Tluangpuii a ni.

"OC-i a ni lo, Tluangpuii a ni. Puih a ngai a, ka pui a ni mai, chubâk a awm lo," ka ti hmak a.

A rawn nui hawk a," E heu! Hming a lo nei ve maw? I puih hial a dîl ngam a nia, in lo inhre țha tawh àwm hle mai. Ni lo, in lo inchûl nêl hle tawh zâwk a nih chu!-"

"Duhtâwk teh! Ka sawi nawn peih tawh lo a nia, ka kawp lo," ka ti leh a.

"A inah i lêng bawk a, in chhuak dùn bawk a. I chang sâng tawh lutuk! Officer Chhuana nèn in inchuh dâwn tihna a ni maw? E khai! Țhianpa, i châwm thei dâwn em ni? Hetianga i awm hi ka ring phâk lo asin. Fîmkhur deuh teh, kei pawh ka awm țha duh lo viau nain khatiang hmeichhia kha ka kawp ngai miah lo a nia, natna țha lo i kai hlauh ang e."

Thinrim zetin ka insehruh a, engati nge ka kawp anga an ngaih hlawm ni? A chanchin hre chiang mang hlei lovin rin thuin an sawi kual a, a nihna ni miah lovah kei pawhin ka puh tawh kha. A lan dànah hian thutlûkna kan siam ringawt țhìn hi chu thil fuh lo tak chu a ni chiang, thutlûkna siam dâwn chuan belh chiana thu dik tak zawn chhuah phawt tùr hi a ni ngai a nia...

Ka nuin min àn khum chiam tawh a, tunah Hminga a ni leh. Nakinah tuin nge min àn khum leh ang le? Tluangpuii ka țanpui vàng nge, Afaki ka țhen vàng? Ka hmangaih miah loh chu ka țhen thei lo em ni? Ka hmangaih ka neiha ka hlim miah loh chuan a tuartu tùr chu kan vaiin kan ni dâwn lo em ni? Min duhsak viau hlawm mah se nun intihchhiat tawn ka duh hlei nem. Chuvàngin, ka thutlûk siamah hian ka tihdik lohna ka hre lo va, kan tâna țha tùr ka ngaihtuah vàng a ni. Nakina tuar tlawk tlawk ai chuan tuna hrehawm tih deuh hleka nakina nawm ka duh zâwk. Nupui ka nei a nih ngai chuan țhen ka duh miah dâwn si lo, ka hmangaih miah loh ka neih pawhin ințhen ka duh dâwn si lo va, damlai hremhmun kan pahniha hman ka duh lo a ni, ani pawhin kei tluk zetin hrehawm a ti dâwn si a.

Ka thil ngaihtuah chu dah bovin Tluangpuiite unau chu ka ngaihtuah ta daih a. A u lo hàw hunah chuan a u chuan a lo pawm hrâm ka beiseipui. Pu Rsa khân nau hmeichhia kha chu a nei ve ngei mai a, tuna a nau pakhat, a la hmuh ngai miah loh hi a nau a ni tih a hriat hunah chuan a hlim ve tho ang em? A nau hi mi fel tak leh mal tak, khawngaihthlâk tak a ni tih a hre dâwn si lo va, duat tak leh lâwm taka a lo pawm loh phei chuan Tluangpuii'n hrehawm a ti viau dâwn si.

Mahse, Pu Rsa kha pa fel tak a ni a, amah zawng ngar ngartu a nau hi a lo pawm duh loh bîk chu ka ring hauh lo. A nu leh pate chanchin ka hriat tampui lo khawp mai a, innei rei vak lo khân an sawi si a, naupang têin nu leh pa bul lovah a pi leh pu bulah a seilian tihna a ni a, a chhel ru phianin ka ring. Bâkah, ani pawh a malin a khawhar thei ngawt ang chu, nu leh pa bul lova seilian a nih chuan a nau dinhmun khirh zet hi a hre thiam ve ngeiin ka ring.

*******

Ka nu chu ka chungah a thinrim deuh reng mai a, ka hre thiam tho mai. A fapa hian ka kawp lo tih ka hrilh pawhin a awih chuang lo. A rilru a nâ tih ka hria; mahse, kan inkârah thil eng mah a awm lo tih hi ka sawi peih tawh lo. Ka hrilh tawh a, sawi nawn chhên a țùlna ka hre tawh lo. Ka sawi a âwih loh chuan a pawi lo, amahin thutlukna a siam fel tawh a, ka thil sawi chu a âwih tawp nâng. Min rinhlelhna chu a dik lo tih a hriat hunah chuan a hre thiam ve tawh ang chu.

Tluangpuii chuan min rawn phone loh pawhin min rawn text. A u rawn haw a hnaih telh telh vàng chuan a phùr thu leh a zàm thu a rawn sawi ziah. A ni thei lutuk ang, kei pawhin Lalmamawii hi ka u, ka hriat ngai loh leh a awm ve a ni tih pawh ka hriat loh ni ta se, u ka nei a ni tih hre ta thut ila, mak ka tiin pawm har chu ka ti ngei ang, chutiang chu Pu Rsa pawh hi a nih ka ring tho.

Hminga chuan inah min rawn lènchilh a, ka nuin lêng tùra a hrilh a nih ka ring. Kan chanchin pawh hi ka nu hrilh a nih ngei ka ring, chuti ni lo se a hre lo tawp ang.

"U Pui, ka u chu min hmuhpui leh rawh aw, chu chauh chu ka ngèn tawh ang che. Keimah chauha han hmuh chu ka hreh a, ka phûr lutuk nain ka hreh lutuk tho bawk sia, i hman ang tiraw?" tiin min ngèn siam siam a.

"Boss-in i tih tlat chuan."

"A, i Boss fé zâwk. Nang chu țanpui vartu hnai reng i ni, ka mamawh hunah ka ko chein min țanpuina ka dîl pawhin phûr takin i lo kal thei zêl a, ka innghahna tak tak i ni. Ka u ka hmuh hunah chuan i chunga ka rilru put ang chiah hi a chungah ka pu ve thei tawh ang a, i phur pawh a zâng huai tawh ang."

"Ka phur a rit lo," ka lo ti vat a.

"Ni lo ve, i phur hi ka tirit tih ka hria a ni; mahse, a tàwp dâwn tawh a, i chunga làwmthu sawi ngaihna pawh hi ka hre tawh lo hial zâwk a ni," a ti leh sep sep a.

"Zanriah vawi khat min ei chhuahpui thei tihna," fiamthuin ka lo ti a.

"Tehrêng mai. Vawi khat mai ni lo, vawi hnih vawi thum lai pawh ka ei chhuahpui mai ang che. E, chuan, ti leh ta daih ila, i bialnu nèn khân in la țha zêl em?" a rawn ti ve ta khauh mai.

"Kan țha tawh lo."

"A ni maw? A va pawi tak! Ka ina i lo lèn vàng kha a ni thei ang em? I hrilh fiah-"

"Ni lo ve, kha vàng kha a ni lo. Kan ințhen a ni tawp mai, nang chuan lo tel vena i nei hauh lo," ka lo ti thuai a.

"A nuam lo e ka ti. In inhmeh dâwn bawk si a."

"Engah nge nuam lo i lo tih ve ngawt?"

"A, ka hre chuang lo."

Pu Rsa lo hàw zànah chuan min rawn phone leh. Inthlahrung tak chuan a tûka lèn chhohpuiah min sâwm leh a, kei pawhin ka hnial lo. Ka țanpui ve theihna hun a tàwp tawh dâwn a, ka țanpui ngai miah lovin a u thlazàr hnuaiah engkim a ti thei tawh ang a, kei chu ka awm ve tih pawh a hrechang tawh lo ang.

"U Dî-tei lah chuan min rawn call zut mai. A fel ka ti tak tak a ni, ka u nupui a nih vàng pawh ni lovin a felin a hmel țha ka ti, a țawng duhin a nèlawm bawk si, i ti ve em?"

"Ti ve e, in mizia a inang deuh ka ti a."

Kan han chho ta ngei. Tluangpuii phùrzia leh huphurh sizia chu, ka en chuan tâwi zet zetin min lo nuih ringawt! A hmai chu a sen deuh tal a, a kut pahnih erawh suih zawmin a chêttîr sek. A zâm viau a ni.

"Zâm viau mah ta che!" tiin ka hnèm a.

"Ka thei lo alawm."

Kan thlen chuan Dîtei khân hlim takin min lo welcome a, Pu Rsa chu a lo awm lo, a fate nèn an chhuak lawk tih a sawi a.

"Rsa bulah ka la sawi miah lo, a chhan chu surprise ka duh vàng a nia, ka hmui ka la chîp tlat a ni, hrilh ka châk tawh lutuk a; mahse, ka la insûm thei hrâm hrâm. A lo thlen veleh Tluangpuii hi tu nge nia a rin ka zâwt ang," a ti bawrh bawrh a.

Tluangpuii kut chelhsak pah chuan," I huphurh lutuk a ni maw? Zâm mah ta che, ka làwm ang tho hian i u chuan a hriat hunah a làwm ang che tih ka hria a ni," a ti sauh sauh a, a kut chu a tuaisak hauh hauh a.

"Mahse, ka u chuan min lo pawm duh lo ang tih ka hlau."

"Shh, ni lo ve, unau a nei tih a hriat chuan a lâwm leh dâwn lutuk! A hma pawhin hetiang deuh chiah hian nau a nei a ni tih kan hre chhuak a, mak a ti asin! Thil làwmawm tak a ni bawk a," a ti leh barh barh a.

Rei vak lo hnuah chuan motor thâwm a rawn awm a, Dîtei chu a tho thuai a, a kutzungchalin a hmui chu a tawk zauh a, kawngkhar lamah chuan a kal nghâl vat a.

Tluangpuii zâm lutuk chu ka khawngaih. A kutah chuan ka va chelhsak a, a lo vawt vek!

"Thâwk la hawk hawk teh le."

Thu âwih takin ka sawi ang chuan a ti a, chutih lai chuan kawngka lamah thâwm a rawn ri lût nak nak a.

"Inlêng duhawm tak kan nei a nia aw."

Mpa a lo tlân lût hmasa ber a, min rawn hmuh chuan," A, spiderman a lo lêng!" tiin ka lamah a lo tlân vat a, a hmel duhawm zetah chuan hlim hmel a lang chiang kher bawk.

"I lo dam țha em, Mp?" tiin ka lo be vat a.

"Aw," a ti phawt a, chutah," Âpa pawh a lo haw tawh asin, kan lêng lawk a. Spiderman, i bula mi hi tu nge ni?" a ti ta reuh a.

Mi dang rawn lût avàng chuan ka chhâng hman lo. Pu Rsa chuan," E, spiderman a lo lêng a ni maw?"nui chung hian a rawn ti ve a.

A hmel chu a hlim tih a hriat kher mai. A hma aiin tlêm chuan a lang chêr ve deuh em aw ka ti, hna a thawk nasa pawh a ni maithei; mahse, a nupui fanaute bula a awm vàngin a hlim tih chu a hriat mai.

"Bawihte, Junior-a nèn khân in thil lei kha in room lamah keng chho ula, țha takin lo dah fel ula aw?" tiin a fate chu a tîr nghâl a, a pasal chu duh zet hian a melh chho a," Darling, i duh chuan inbualna pawh peih sa diam a ni aw," a ti zat a.

A fate pahnih chu an thil lei pawm țûn chuan thu âwih takin in chung lamah an chho a, Mpa erawh ka bulah a la awm reng thung.

Tluangpuii chu ka en zauh a, a u chu a lo en ngam hauh lo!

An nupa chuan kan țhutna bulah chuan an rawn kal hnai a, Pu Rsa chuan min rawn chibaiin," I lo dam țha maw? Inhmuh a khât leh ta deuh a, i chanchin lah kan sawi bâng lo, naupang lah chuan spiderman tak tak i nih an ring tlat a," nui chung hian a ti sup sup a.

Kei pawh ka lo nui ve tho," Ka ni tak tak alawm, tiraw Mp?" tiin ka melh a, ani lah chuan uar zet hian a lu a lo bu nghat nghat a.

"I bula mi ve thung hi?"

"Tluangpuii a nih hi."

Pu Rsa hmel chu insûmin tihlan tum lo viau mah se a hmel ațang chuan mak tihna ka chhiar thei. Tluangpuii chu a en rùn mai a, a hmel nui deuh sâng kha a bo vek tawh!

"Darling, chibai la?"

Rei tâwkfang chu mit khap hauh lovin a en reng tho; mahse, a inngaihtuah harh hnuah erawh a rawn chibai a, a țawng ta miah lo. Dîtei chu a titi a, ka lo zàwm zauh zauh. Pu Rsa chuan Tluangpuii chu a en leh rùn rùn țhìn a, thil hriat chhuah a nei a nih ka ring.

"Min ngaidam teh u, i țhiannu hmel ka hmuh hian thil hriat chhuah ka nei atin ni," a rawn ti chhuak phawng a.

"Ka nu hmel i hre chhuak a ni tiraw? Ka nu kha ka chhùn êm a, ka nu tleirâwl chhuak kha ang min ti fo asin," Tluangpuii chuan a lo ti thâm chhêlh a.

"I nu chu tu nge?"

"Lalbiaktluangi, Miss Mizoram pawh lo ni ve tawh kha."

A hnuah an unau chuan Pu Rsa office-ah an awm dùn ta a, Dîtei'n hun thâwl pêk a duh a ni.

Sitting room-ah țhuin a pasal chanchin chu min hrilh ve sep sep a, a têt lai chanchin, a thil paltlang leh a sumdawnnate chu min hrilh ta vek a.

Kan lêng rei lo thei lo. Office ațangin an rawn chhuak lawk si lo, hawsan daih lah chu a dikin ka hre meuh bawk si lo va, Dîtei titi chu ngaihthlâk nuam viau lo phei se chuan ka ning ve hial maithei a ni.

A tàwpah chuan an rawn chhuak ve ta țâwk. Tluangpuii chu a hmel ațangin a țap tih ka hre thei mai, a hnâr a sen deuh a, a mit lah chuti bawk.

Pu Rsa erawh a hmel ațangin eng mah ka hre thei lo. Tluangpuii erawh a en leh rùn rún țhìn, a nau dik takah a pawm ngei ka beisei.

"Zanriah ei ve r'u aw?"

"Ni lo ve, kan lâwm e. Kan ei lo zâwk ang e, kan tibuai lutuk ang che u," nui chung hian ka lo ti a.

Kan haw tùr chu veranda thleng min thlah a, Dîtei chuan a pasal kut chu a vawnsak tlat tih ka hmu reng mai. Nupa induh tawn tak, inhmangaih leh inlungrual tak an ni chiang alawm, a nuam ngawt ang chu!

Kan tlàn chhuah hnuah chuan," I țap a ni maw?" tiin ka fiam leh hrâm a.

"Ka insûm thei lo va."

"A pawi lo, a àwm viau a ni."

"Ka țahbelh tiraw?"

"Tlêmin."

A inah ka pêng a, a u nèna an thil sawi chu ka zâwt hran lo. Min hrilh a duh hunah chuan min hrilh ve mai ang, lo zawh ve sek chu a tihchi loh.

"U Pui, ka lâwm e."

Hnung lam ațangin ka kâwngah min rawn kuah thut si a, ka ding khawng awt mai! Ka beisei leh rin loh lutuk a ni si a, awm dàn pawh ka thiam lo!

"Nang awm lo la chuan ka u pawh ka hmu dâwn si lo, ka tân chuan i hlu takzet a ni."

"Ni lo, i hmu tho ang."

"Teuh lo! min puihna hi engtikah mah ka theihnghilh ngai lo ang. Ka tân chuan vàntirhkoh i ni, Pathianin ka tâna a rawn tirh i ni."

Chutiang chuan min ngai maw?

"U Pui, ka pain min țanpui tùra Pathian hnên ațanga a rawn tirh i nih ka ring, ka lâwm e, ka lâwm takmeuh meuh e."

Min thlaha a hmel ka hmuh theih chuan a muttui a lo tla a ni tih ka hmu a, ka thinlung hi a țêk sawkin ka hria. A mittui chuan ka thinlung a khawih lo thei lo!

"Țap suh, Tluangpui, engtikah pawh țanpui i ngaihnaah chuan ka țanpui zêl ang che."

Min rawn melh chho hau. A mittui tling piau hmel țhatzia chuh, ka en reng ringawt! Ka hawi sawn thei lo.

"U Pui-"

"Shh..."

A mittui far thla zaih chu ka en reng a, chutah ka kutzungpui chuan ka tuai hulsak a, ka kut chu a lo vuan ve vat a.

Thîrhîpthei ang maiin min hîp bet tlat! Ka lu chu a kûn hniam hret hret zêl a, ani lahin hawi sawn zai a rêl si lo, hun chu chàwl țhuap angin ka hria!

Kan inen dùn kar a, ka kûn hniam zêl avàngin a mit ațangin a hmuiah. Ani pawh a mit a lo chhîng chial tawh a, a mittui pawh a lo far leh tawh. Ka hmuiin a hmui a zu deh chiah chuan engtin emaw mak tak mai hian electric current man ang maiin ka țêk sawkin ka hria!

A hmui nêl thep chu rose pâr thianghlim tak ang mai a ni!

Tu zâwkin nge duhthawh zâwk pawh ka hre thiam tawh lo, kan duhthawh ve ve a, titàwptu nih kan tum lo ve ve bawkin ka hria!

Kan tàwp meuh chuan kan thaw dùn halh halh a, kan thaw a chham dùn lo chauh a ni! A hnâr sen deuh tât mai chu a inhmeh ka ti kher mai! Ka en reng avàng chuan sen țâwn țâwnin meng khup lapin a hawi sawn a.

"La hawi sawn lo teh!"

Thu âwih tak chuan min rawn en chho leh mai bawk a, a hnâr tuaisak zohin," A mawi reuh lutuk!"ka ti sup a.

"Naa, i sual!"

*HRIAT RENG ATÂN KAN DUH LOH THIL HI KAN THEIHNGHILH THEI LO FO*

☆LTK☆ - 19 By Dingdi Pachuau

"Fel min tih tawh kha."

Lài zet hian a nui sak a, lài viau mah se a nui mawi êm êm tho si. A laih poh leh a hmuhnawm zâwk mah maiin ka hria!

Ka kuah vang vang a, ani pawhin nghet zetin min kuah lêt. Eng mah kan sawi tawh lo, țawng lovin kan thinlungin thil tam tak kan sawi dùn a ni.

Ka hâw tùr chu hàw ka hreh ta țalh mai! Hetiang rilru hi ka pu ngai pawhin ka hre lo, amah chauha kalsan chu ka hreh tlat nia. A khua a lo har ang, mipa dang an lêng ang, Officer Chhuana kha a lêng palh ang tihte chu ka ngaihtuah chhuak zut zut mai a, ka bialnu a la ni miah si lo. Hetiang ka ngaihtuah ta mai hi mak ka inti! Kan infâwp dêk dêk chauh a la ni si a.

Tlangvâl luck tak chu ka ni lo alawm. Ka bialnuin pasal min neihsan a, ka dem hran miah lo, chanchin kan inhre tawn lo rei êm a ni. Ka hmangaih ni lêm lo bialnu ka nei leh a, chu pawh ka țhen leh tawh, ka hmangaih miau si lo va. Tlangval luck tak chu ni ila kawp tùr ka hmu ve țên țûn ang chu.

Ka nu hian spy hi a lo nei țha àwm hi ka tia, in ka thlen chuan min lo àn khum leh nasa. Tluangpuii ka chhuahpui tih a lo hre leh tawh! Mak ve tak chu a ni, ani kher hi chuan min zui ka ring si lo. 'Tu emaw' a nih ka ring, ka awmna hmun a hre thei zêl tlat.

Ka chhâng lêt lo va, ka ngawi reng. Afaki ka țhen kha a thin a rim a ni ve mai a, chuvàngin, ka chungah lungawi lohna zawn chiam ngai lo pawhin ànna tùr chu a hmu tawh tho tho a, hmeichhe dang bula ka awm min hmuh phei chuan a âng pawh hi thil àwm tak a ni ve tho...maithei. Hmeichhia hi zawng, sawi tùr leh ànna tùr hi an ngah ve a, hriat thiam an ngai.

"'Ka kawp lo' i ti maw? Nula leh tlangvâl, unau ni lo leh țhian ni lo, inzui reng mai chu inngaizâwng lo an ni ngai em ni?"

Ka nu sawi chu ka ngaihtuah a, nichîn deuh lawk ațang khân ka ngaizâwng lo ka ti ngam tawh miah lo, ka fâwp miau mai si a, ni lo, kan infâwp a ni zâwk. Nula leh tlangvâl induh lo chu an infâwp miah lo ang le. Ani pawhin min hnial lo va, duhthawh takin min lo chhâng lêt ve a nih kha.

Khatianga bul kan țan chhoh chhan ber kha eng vàng nge ni ta ber ang? A mittui tla ka hmuh vàng kha ni ta berin ka hria, ka thinlung a dek a, tihhlim duhna leh kuah vawng vawng châkna kha ka nei a, ni leh lo, hnung lam ațanga min rawn kuah ațang khân a ințan chho zâwk tak. Amahin min rawn kuah hmasa a, rilru thianghlim tak puin min rawn kuah pawh a ni maithei; mahse, kan tàwpna chu khatiang kha a nih tâk kha.

Ka thaw hawk. A hmui kha chu fawh a nuam takzet a ni, a zei lo miah lo va, zei over a ni chuang lo, a tâwk reuh ka ti. Bialpa pawh a nei ve țhìn tawh chiang ngawt ang, a thiam reuh tlat.

*******

TLUANGPUII

~~~~~~~~~~

Ka u kan hmu chhuak a, ka hlim takzet. Min zawn hmuhpuitu U Puia chungah ka lâwm êm êm a, ani hi awm lo ta se ka la hmu miah lo ang.

Ka u kha ka hmuh tum dàn nèn a inang lo viau. Kan inan ve deuh ka ring a nia, a pa lam a chhùn a ni ngei ang. Bâkah, min en rùn rún zêl a, nuam lo ka ti rilru deuh hlek, a țawng duh lo ka ti bawk. A nupui a țawng duhin a fel hle si a, a hmel țhain min lo kàwm nêl nghâl bawrh bawrh thei a, an mizia chu a inang lo thlâwt ka ti.

Room-a kan pahnih chauha kan awm pawh khân min en rùn rún a, ka rin dan chuan min kuah ang a, min hmuh avàngin hlim leh lâwm hmel takin min biain min kuah ang a, nèlawm taka a awm ka ring a nia, ka rinna leh a tak chu inpèrsan tak a ni!

A ding reng a, a kekawr ipteah a kut a zen tlat a, chutiang chuan room-a kan inbiak chhûng zawng a ding thei nia! Kei chu ka hlim a, nèlawm loh viau mah se ka u a ni a, ka nêl tho tho, ani bâk unau ka nei si lo.

Ka chanchin kimchang takin min zâwt a, ka zêp lo, ka hrilh vek. Ka nu chanchin pawh ka hrilh vek, a nu a ni ve tho a, a duh emaw duh lo emaw a hriat ve tho a ngai.

Ka têt lai chanchin ka sawi lai chuan ka țap a, min kuah chuang miah lo. Ka mittui hrûkna tùr rawmawl min pe, min kuah ngiata țap pawh ka ni chuang lo; mahse, ka u hi nèl har tak tùr a nih ka ring tlat.

Mahse, a pawi ka ti chuang lo. Ka hmu tawh a, min hre tawh bawk a, a tâwk viau. Ka lung a âwi tawh tho tho, pawisa lam ka phâng dâwn chuang lo va, unau kan nihna kan inhria a, a tâwk.

U Puia chunga ka làwmna hi a sâng ber mai. Miin min biak țhat duh loh lai pawhin ani chuan min rawn be chat a, mi sawi hi engah mah a ngai ve lo a ni ngei ang. Min hmusit ve lo va, mi min sawina hi a hre ve tho chuan ka ring a; mahse, engah mah a ngai duh lo va, țhian ka neih phah a nih hi.

Țhian. Ka en dàn hi chu țhian a ni lo chiang. Amah hian țhian enin min en tlat a, ka tân chuan chu bâk chu phût chi pawh a ni hek lo. Kawng engkimah min pui a, ka nihna a hriat sual ațang khân kei chuan che chimawm viau mah se min be duhtu a nih vàngin ka en dàn a dang tawh hrim hrim. Tûn hnuah phei hi chuan ka awm dàn ațang hian ka duh a ni tih hi a hria ang tih ka hlau ngawih ngawih, bialnu a neih bâkah ka tân chuan a sâng a, ka beisei phâk a ni hek lo.

Min fawh lai khân hnial tùr ka ni tih ka inhria; mahse, ka hnial phal lo. Bâkah, ka inthiam lo lutuk lo deuh, a chhan chu a bialnu a țhen ve tawh tlat. Mipain min fawh vawi khatna a ni a, chutah, ka duh leh ka vei êm êm mipa a la ni zui, ka tawng tawh kher lo maithei si a, ka hnial phal lo a ni.

Zànah ka muhil thei lo. Vawiin tlaia thil thleng kha ka ngaihtuah veng veng a, min fawh lai khân zei lo min ti viau ang em? Mipa ka fawh vawi khatna a ni miau si a, a lem leh a tak tak fawh chu a dang daih si a, ka zâm viau bawk a ni.

Mipa ka ngaihzàwn ve huna ka zei loh lutuk loh nân tiin naute lem lian pui pui hi ka lei a, ka fâwp țhìn! Ka lo ti țhìn lo ang tih ka hlau ta, U Puia khân zei lo min ti dâwn lutuk asin, ka practice chung pawhin ka zei loh viau kha.

Ka zak, blanket-in ka inlukhup a, ka țhen sak sak ringawt. Kan la inhmu leh ngei àwm si a, ka zak ngawt ang chu! A mitah pawh ka en ngam tawh nâng, ka blanket sin lai chu ka seh tlawk tlawk.

Easy min ti ngawt ang. Ka infawhtîr thei a nia, bâkah, ka duh a ni tih a hre tawh ngei ngei bawk ang chu. Bâkah, mi min sawi țhin dàn zawng zawng a hriat vek phei chuan min beisei ve hialin ka ring. Awi, a zahthlâk ngawt ang, mipa ka hnaih ngai lo tih lo hrilh hman tal ila aw...

Ka u nupui Dîtei'n min rawn phone a, Inrinni tlaia chaw ei tùrin min rawn sâwm; mahse, ka hnial rih. Inkhâwm ka duh dâwn sia, bâkah, U Dîtei ni lovin ka u ngeiin min sàwm ka phût ve deuh bawk. Ka induh vàng ni lovin ka u a nihna angin min sàwm ka phût, ka phût sâng viau maithei; mahse, ka rilru ka sawh sawn dâwn lo.

Inkhâwmnaah chuan U Puia pawh a tel leh ngei ang chu. Ka tukkhum chu a za mar mar hialin ka hria, min en a ni chiang mai. Ka va zak tak! Inkhâwm bànah min biak loh hrâm ka beisei, ka hmu zak tawh, khatianga kan awm hnuah kha chuan hmuh ka hreh ngawih ngawih. Inngaizâwng chu ni ila chuan inngaizâwngte thil tih dàn țhin a ni ve tho a, a dàn tùrah rêng a ngaih theih ang a; mahse, kan pahniha inkâr hi chu inngaihzàwnna a ni lo.

Bànah chuan ka hawi chhuak duh miah lo. Ka hawi chhuah loh miau avàngin ka hmu lo va, in ka thlen chuan ka țang lutuk a, ka thlan a tla hialin ka hria! Ka thaw huai huai a, min be lo va, min zui hek lo. Lâwm tùr ka nih laiin engtin emaw tak ka awm, ka ruak deuh huaiin ka hre ve ringawt.

Min fawh avàng ringawtin min duh tihna a ni lo. Ani phei chuan engah mah a ngai tawp nâng, bialnu tam tak neiin a fâwp nasa tawh ang a, eng hè hùah a ngai lo ang. Nula pakhat, mi sawi duh êm ém leh lêrh zet mai a fâwp ve maiah a inngai hial ang chu!

Mahse, kei chu kha thil kha ka theihnghilh thei ngai lo ang. Ka first kiss a ni si a, a hlu êm asin, ka mipa duh ber nèn a ni bawk si a.

Ka phone a rawn rì a, U Puia a nih ka ring viau a, phûr zetin ka en a; mahse, number ringawt a lo ni a.

"Hello?"

"Tluangpuii i ni tiraw?"

"Aw, ni e. Eng thil nge ni ta?"

"Ngun takin lo ngaithla rawh aw..."

******

Inkhâwm ka peih lo kher mai. Nizànah khân ka hmu reng a, vung zetin, hawi chhuak hlek lovin min kal pèl vâwk vâwk a nih kha. Ka fawh vàng khân a thinrim a ni ngei ang, Lalpa leh! Kan ințhian țhatna ka tichhe ta dêr tihna em ni?

Ka phone chu ka en a, a number ka hmet chhuak a, ka en vang vang ringawt. Min rawn text loh dàn ațang hian a thin ka tirim a nih ka ring ta tlat, ngaihdam ka dìl mai pawh a ngai maithei a ni.

Tunah phei chuan min mamawh tawh hauh lo. A u a hmu tawh a, mi rethei tak an ni hauh si lo, kan vêngah pawh hian a awm rei duh tawh lo hial maithei asin, heta awm chhan hi a nei tawh si lo va.

Hlauhthàwnna ka nei ta phut. Aizawl lama a phei daih chuan kan inhmu khât tawh ngawt ang, dik tak chuan hmuh reng theih ka duh! Ka nu min àn khumna leh Hminga'n a sawichhiatna zawng zawngte khân amah ka lainatna leh ka khawngaihna a tizual a, an sawichhiat poh leh ka rilru chu a khauh tulh tulh mai a, tukin thlengin ka nu phei chu a la âng! Ka ngaithla liam mai mai, chhàn lêt ka tum lo.

Biak in tualah Hmingate nupa chuan min lo ko a, Hminga hi ka haw chuang lo. Ka țhian a la ni reng tho a, ka tâna țha a duh vàngin a thil sawi kha sawi ve maiah ka ngai, ka la thutak rùn lo; mahse, OC-i ti kher kha chuan sawi tawh lo hrâm se ka ti.

"Vawiin chu lêng chhuak lawk ang aw?" a lo ti a.

"Khawiah maw?" ka lo ti thung a.

"I hre mai ang, kan lèn hunah," a ti thung a.

Kan inkhâwm chhûngin thu sawi lam rêng rêng ka ngaihtuah lo. Tluangpuii ka mitsìr a, che miah lovin a țhutnaah a țhu reng a, he khawvêl thil hian a tihbuai ve loh hmel ngawih ngawih.

Bànah pawh a ngai ang chiah, a hawi chhuak lo va, a kalna, a rahna tùr chiah enin a kal leh ta. A thin chu a rim chiang a ni, ka chungah a ni ngei bawk ang.

Hetianga a awm avàng hian ka rilruah ka vei tawlh tawlh lehnghâl. Biak ka duh a, min chhàn duh ka ring si lo. Ka lo fâwp ta kher kher kha ka tihdik loh chu a ni, kan ințhianna ka tichhia chu a ni dêr tawh si a.

In ka thlen veleh a number chu ka hmet chhuak a, ka nu thinrim hmel hmuh ka peih loh vàngin ka room-ah ka inkalh hnan. Ni tina a hlim lo hmel hmuh hi nuam ka ti bîk lo, kan in chhûng hi nuam pawh ka ti tawh lo.

Busy. A hnuah phei chuan switched-off a la ti zui. Min be duh lo tih a chiang ta hle mai, hetia a awm thut chhan hi keimah vàng chiah a ni.

Hminga'n min rawn sâwm a, thingpui in zawhah chuan kan chhuak dùn ta nghâl a. Serkawn lamah kan tlân chho a, Serkawn ațang chuan DIET lamah kan pêng a, DIET thlen hma deuh hleka building lian angreng tak lo ding lûrh kawtah chuan kan ding ta a.

"Chhuak ila?"

Eng mah zâwt lo chuan ka chhuak ve mai bawk a, vawiin chu Hminga kid ka ni mai.

Chhâwng chung berah kan chho a, Hminga chuan kawngka chu a kik kârh kârh a, eng nge kan tih dâwn tih pawh ka hre lo, kawngkhàr lo hawngtu ka hmuh erawh chuan maktiin ka meng phar âwk âwkin ka ring hial.

"Lo lût rawh u."

Engtin nge hetah hian a lo awm leh hman? Pasal neiin ka u Mamawiite in luah bulah khân awm ve niin ka ngai asin. Tunah lah amah chauhin ka hmu bawk si, khawiah nge a pasal kha le?

Kan inhmuh hnuhnun ber țuma min țawng khum dàn chu ngaihtuah lêtin ka thin a rawn sa leh deuh phat phat a, Hminga'n helaia min hruai chhan hi ka hre lo va, Mami nèn an lo inhriat dàn lah ka hre hek lo, he nu hi hmuh leh tawh loh ka duh asin, min rinawm lohsan a nih kha. Pasal hial a nei tawh a, min hmuhsit viau nghe nghe kha.

Ka țawng lo, an pahnihin nêl takin an inbia a, kei erawhin ngawi ka lo dawh.

"I va ngawichawi ve!"

"Sawi tùr awm hek lo!" ka ti lêt hmak.

"I thin a la rim reng a ni maw? Ka thil tih chuan hna a thawk țha khawp alawm, ka tum dàn a ni rêng bawk a."

A thil sawi awmzia chu ka hre ta map lo mai!

"Khawnge i pasal?"

"Pasal ka nei lo."

Dâwt a sawi chiang lutuk. Min tihbuai a tum a nih hi, min tibuai hauh lo ang.

"E, a nih tak chu!"

"Pasal nei angin ka awm a nih kha. Kei chu Israel ka nih vàngin nang nèn kan inkawp rem thei ngai dâwn lo va, ka chhûngte pèm ruala pémthla ve tùr ka ni a; mahse-"

A thil sawi lai chu ka lo en reng a, dâwt sawi hmel a pu lo. Thu dik tak a sawi pawh a ni maithei; mahse, dâwt pawh a sawi thei tho, a thil sawi hi ka âwih ringawt lo ang.

"Thlawhnaah khân ka chuang ve ta lo. A chhan chu kumkhuaa kalsan che kha ka thei lo, ka hmangaih ber i nih vàngin. Ka phone ka tihbo vàngin biakpawh ngaihna che ka hre lo va, pawisa lah ka nei hek lo. Delhi-ah chuan ka awm rèn ráwn a, Mizorama lo chhoh chu duh viau mah ila pawisa ka neih loh vàngin Delhi-ah chuan inhlawhna ka zawng, dam khawchhuah ka duh miau si a, hna tê lua awm lovin ka thawk vek. Ka thawk nasa asin."

"Kum 3 zên zâwn ka thawh hnuah pawisa ka lo inkhâwl tam ve ta a, ka rawn haw chho. Lunglei Rahsivengah i awm tih ka la hre reng a, Aizawl ațangin ka rawn phei a; mahse, ka pawh ngam tawh lo che. A chhan chu kan inbiakpawh lohna a rei tawh si a," a ti dap dap a.

"I thil min hrilh zawng zawng kha dâwt tihna a ni maw?"

Mawi ka tih țhin deuh ang khân a ner deuh sak a," Aw," a ti sap a, chutah," Tuna ka thil sawite erawh kha chu thu dik vek a ni," a ti leh a.

Ka ngawi ta reng. Ngun zetin ka en ràn reng a, hmâna ka hmangaih țhin Mami hmel dik tak kha hmu leh tain ka inhre hial! Min țawng khum dàn zawng zawngte kha thu dik a lo nih loh chuan...

"Nupui i la neih loh chhan hi min la hmangaih reng vàng a ni tiraw? Kei pawh ka hmangaih hmasak ber kha i ni miau a, ka theihnghilh ngai lo che. Hrehawm ka tawrh lai pawhin nang ka ngaihtuah chhuah apiang che chuan beiseina ka nei țhìn a, thil hrehawm ka tih ber pawh hrehawm vak lovin ka tuar chhuak țhìn," a ti leh sap sap a.

Hminga chu a inthiar fihlîm tawh a, kan pahnih chauh kan ni. Ka hmangaih țhin kha a ni a, a thil sawi chu thu dik a lo nih hlauh chuan keimah vàngin hrehawm a lo tuar ve tho tihna a lo ni a, a lo khawngaihthlâk reuh êm asin.

"A nih leh, eng vàngin nge a hma khân pasak nei anga i awm tlat a?" tiin ka zâwt ta nge nge a.

"Ngaihzawng i nei a, in induh hle tih ka hriat vàng a nih kha. In inkâr tichhetu nih ka duh lo va, kal kian dàn ka hriat chhun, hnar theih dàn tùr che ka hriat chhun a nih kha. Ka rin aiin hna a thawk țha lehnghâl a, kan inhmu lo ta vang vang réng a," a ti leh a.

A thu sawi hi a dik tak tak ang em? Ka tân a lo la invawng reng em ni le? Ka tân a lo la rinawm reng maw? Ni lo, a theih loh. Heti chen min nghâk lo ang.

"Nula thianghlim i la ni tihna em ni?"

A melh hnuai ta nghâl daih. A kut tuai nauh nauh pahin," Sawi tùr a tam lutuk. Thil țha lo tak ka chungah a thleng a, sawi chhuah pawh ka duh lo asin. Chuvàng tak chuan rawn pan che a rawn hmuh che hi ka hreh ngawih ngawih rêng a ni," a ti sap a.

"Min hrilh hreh lo la?"

A ngawi vang vang phawt a, chutah, hriat theih chè ché hian," Ka hnathawhnaah pâwngsual ka tâwk a," a ti sep, a sawi dàn ațang chuan a rilru a la na hle a niang tih a rin theih mai!

Lalpa leh! Lo țanpui ta che.

"Hmuh chea rawn pan che hi thih hrehin ka hreh ta rêng a ni; mahse, hmuh che ka duh tho bawk si a. Min hriat thiama min ngaihdam theih ka ring a, ka beisei êm êm bawk a; mahse, ka ngam ta chuang lo va. I hmel hmuh ringawt pawh ka zak tawh a, nula thianghlim ka nih tawh loh vàngin kiansan che ka tum leh ta a ni," a ti leh a.

Thil kal dàn hi a va mak tehlul êm!

"Tunah hian ka beisei vàng che a ni lo, thu dik erawh hria la ka duh a, i dam chhûnga min dem renga hun i hman ka ngaingam bîk lo a ni, tunah chuan thu dik i hre ta bawk a, rilru thlamuang takin ka kal bo thei tawh ang," a ti a, a mit a tuai zauh bawk a.

"Khawiah nge kal i tum a?"

"Ka hre lo, ka intunnunna tùra ka thawh a ngai ve si a, hna thawh tùr pawh ka zawng pah ve zêl ang a, ei tùr nei lovin ka thi bîk lo ang chu!" tiin a han fiamthu ve a; mahse, a nuihzatthlâk hauh lo.

Ka phone a rawn ri a, ka'n en chuan Tluangpuii a lo ni a; mahse, ka chhâng lo, ka hmet tàwp daih! Ka call pawh min chhàn duh bîk hauh loh kha. Ka sual thiam ve chiang êm!

"Tu nge a?"

"Tu mah, company a nih kha."

'Company' tiin a call ka hmet tàwp tih hria se chuan a hlim bîk vakin ka ring lo!

Kan hàw kawngah erawh min rawn call chhan tùr ka ngaihtuah a, ka lo chhâng lo chu ka inchhìr leh hnuhnawh. Awmzia erawh a awm tawh lo.

*I TEHNA ANG CHIAHIN AN TEH VE DÂWN CHE*