☆LTK☆ - 20 - 25 By Dingdi Pachuau

 ☆LTK☆ - 20 - 25 By Dingdi Pachuau

Hminga leh Mami lo inhriat daih dàn chu ka lungkham tehchiam lo va, lo inhre reng si, an sawi miah bawk si lo pawh chuan ka rilru a luah tehchiam chuang lo, chu ai chuan Tluangpuii min rawn call chhan kha ka hre châk ber.

Min be duh lo va, min hmu duh lo bawk a, ka call lah a chhâng duh lo a nih kha. 'Busy' a tih loh leh 'switched off' a ti zêl a, ka call a chhàn duh loh vàng chuan ka lung a âwi bîk lo va, ka chhâng duh bîk lo a nih kha; mahse, min rawn call chhan kha ka hre châk hle si.

Mami chungchângah chuan zawhna ka la ngah lutuk. Ka call theih tâk loh chhan te, fb lamah pawh ka biak theih loh chhan leh a inlâk bo daih chhan kha ka la hre duh bawk. Bâkah, min duh reng si a nih chuan a hma pawh khân ka bulah sawi ve mai àwm, nupuia neih ka hreh dâwn loh tehréng nèn.

Tunah hi chuan ka rilru ka siam fel hmak thei tawh lo. Ngun taka inngaihtuah ka duh tawh, thil chi hrang hrang ka tawng hnem ve tawh a, hmeichhe lamah phei chuan ka fîmkhur a ngai viau. Nupui ka thlan fuh loh vaih chuan chhûngkaw buaina a ni mai, ka nu lah hi a khirh bawk si a, nupui fel tak ka neih loh vaih chuan an inmil dâwn lo sa, chhûngkua kan hlim loh chuan buaina zakhua a ni mai. Tunah pawh kan chhûngkua chu kan nuih tlàn hleih theih tawh miah loh hi, a bul ber chu ka ni tho nain duhthlanna thiang ka nei a, ka duh chu ka thlan ve a thiang tlat a ni.

"Khawiah nge i lèn lehpek a?"

"Serkawnah."

"I chhûngte hi min ngaihtuah miah lo tiraw?"

Ka lung a lo awi lo sa deuh tawh bawk nèn, han vin deuh tuar ka tum thut a; mahse, min hringtu 'ka nu' a ni tih ka ngaihtuah chhuak leh hman hrâm.

Zàwi sap hian," Ngaihtuah e," ka ti ringawt.

"Bawiha, nang bâk kan neih tawh loh che hi, khatiang hmeichhe tân kha chuan ka phal thei lo che a ni. Nun țha pângngai ni se ka sawisêl miah lo ang; mahse, miin an sawi hat a tling ve a, a nu lah hriat chian a ni bawk a, ka pawm thei lo a ni," a ti leh a.

"Nu, mi sawi ațang leh pâwn lam lan dàn ațanga in-judge ringawt hi chu a fuh ber lo a nia."

"Miin an sawi chuan awm a awm tihna a ni ngai. Thil awm lo an sawi ngai bîk lo," a la ti leh tlat a.

A dikna chen a awm ve tho. Ka hnial lo, Tluangpuii pawh a inah Officer Chhuana kha a lêng ve tlat a, a motor-ah lah a phur tawh bawk, kei pawhin ka hmuh tawh kha. Sawi mah se, a dikna lai a awm ve tlat. Tunah pawh hian a ngaizâwng lo tih ka hre bîk miah hlei nem.

Room-a ka luh hnuah chuan ka phone chu ka'n en leh chhin a, min rawn call nawn ka ring asin le. Min mamawha a pawimawh a nih chuan a rawn tinawn leh chiang khawp ang chu, ka châng deuh reng a; mahse, a pawimawh tâwk lo a ni ang.

Inkhâwmnaah ka hmu lo. Ani hi, a ute hnênah a chho emaw ni le? Ka ring chiah lo deuh a, nge Aizawl lamah hian a phei thut? Nge a nuamsam lo? Nge Officer inlêng a nei? Zawhna a rawn inpâng-aw-zial tup tup mai, chu pawh a țha lo lam vek lehnghâl.

Thu sawi ka ngaithla hauh lo.

Bàn veleh ka phone chu ka hmet êng a, whatsapp message lo awm vàng chu phûr zetin ka'n en a; mahse, Tluangpuii hnên ațangin a ni hauh lo, Mami hnên ațangin a ni zâwk!

Engtin nge ka number a lo neih hman ni? Hminga'n a pe a ni ngei ang.

*Naktûk chu, i hman chuan lo lêng la, kan titi mai mai dâwn nia*

Ka chhâng lo, țûl pawh ka ti hran lo.

Tluangpuii number chu ka hmet chhuak a, ka call ang nge call lo ang tiin ka rilru a inhnial phawt a, thaw hawk pah chuan ka call ta nge nge a.

A ring ve char char a; mahse, min chhâng hauh lo. Ani tê hi, a thinrim tak tak em ni le? Ka fâwp a, ani pawhin min chhâng lêt ve tho a, ka chunga thinrim tâk daihna chhan tùr chu ka ngaihtuah a, ka hre chhuak thei lo.

Ka luhlulna lamah a kal a, ka call leh ngat. Min chhàn hma chu ka call ngat ngat mai ang chu!

Ka call vawi rukna, a ring tàwp dâwnah min rawn chhâng ve ta chiah, ka rilruah chuan 'Min chhâng lo a nih pawhin ka tibuai ve rêng rêng ang' tih rilru ka pu hman a nia, min chhâng ta hlauh zâwk a.

"Hello?"

"Ka call chhàn chu a va na àwm ve a?"

"Engtin maw? U Pui, hello? I țawng ka hre țha thei lo a nia," a rawn ti sap sap a.

Ka țawng pawh a hre țha duh lo a nih chu!

"Inah i awm em? Ka rawn kal dâwn a nia." Ka luhlul laklawh tlat tawh, min hmuh duh loh chhan leh min biak duh loh chhan hi hriat chhuah ka duh tlat.

"U Pui, damdawi inah ka awm daih asin."

Eng a?!! Damdawi inah maw? Eng nge a tih? Nurse a ni a, a thawk ve ta tihna em ni? Nge, a hrisèl loh vàngin damdawi inah chuan a awm zâwk niang?

Ngaihtuah deuh anga lan chu ka duh vak si lo, amah a awm a nih ringin ka tâwt deuh up up bawk si.

"Eng nge i tih?"

"U Tei kha damdawi inah ka dah lût a, ka awmpui nghâl a."

E khai! A ni maw? A va zia lo ve aw, ka rilruah inthiam lohna a rawn awm nghâl zat.

"Ka rawn call che a, min chhâng thei lo va," a rawn ti leh sep a.

"Ka tihpalh!"

"Ka mang a ang lutuk a, call chea tihbuai che ka hreh viau a; mahse, nang lo chu call tùr ka hre si lo."

A pawi ka ti takzet. Ani chuan a mangan êm avàngin min rawn call a ni ngei si, kei lahin ka lo chhâng duh lo vêl a ni si a.

"Tunah eng nge a an tawh?"

"A muhìl a, a pang erawh a la sa khawp mai," a ti sep a.

"Khawi damdawi inah nge?"

"Hope-ah."

Inah ka lût a, ka insiam sawk sawk. Zànah damlo kanin a kal theih em tih lam pawh ka ngaihtuah lo, Tluangpuii mangang tùr chu ka mitthlaah ka hmu a, ka kal lo thei lo.

Ka pa bulah chuan ka țhiante damdawi ina awm kan ka tum thu ka hrilh zawk zawk a, ka tlân chhuak nghâl. Ka nuin min rawn hmu hman lo hlauh, min rawn hmu hman se zawng, a âng leh nasa maithei a ni.

Hope Hospital kawt zawnah chuan kawng chhak lamah, a remchâng laiah chuan ka ding a, Tluangpuii chu ka call leh.

"Ka rawn kal ve dâwn asin, rawn luh ve an phal ang em?"

"Ka ring chiah lo."

"Tunah eng nge a an?"

"A ngai reng, khawsikin a kalsan lo va; mahse, nichin lawk khân damdawi chu kan pe leh a, a kiansan thuai tùrah ka ngai, a muhìl leh ta a nih kha."

Ka meng ve reng, car chhûng chu a vawt hran lo va, a zia khawp mai.

Ka kal ve a ni tih ka hrilh miah lo, ka bia a, a mangan lutuk loh nân ka țawngțai hial!

A tûkah ka han kan leh. A ei duh tùr zawngte ka leisak a, an pahniha ei tùr ka lei loh chuan ani pawh a ril a țâm duh ngawt ang chu!

Ka fawh hnua ka hmuh leh hmasakna ber a ni a, fiah kel kawla ka en chuan min en lêt vak ngam lovin ka hria. Phone-a ka biak ang kha a ni miah lo, hmai chhanah chuan a țawng siam siam nain min zah deuh tlat a, bâkah a lài tlat!

Lài deuha a awm hmel hmuh chu nuam ka ti phian si. A la naupang bawk nèn, a lài hma a nih ka ring, a hmai sen tàn tán hmuh chu a inchhìrawm loh! A hmuhnawm a, thlìr a nuam.

A 'u Tei' pawh a zia ve deuh ta. A khawsik pawh a zia deuh tawh a, amah pawh a țawng peih. A pasal fanaute'n an rawn kan ve bawk a, an tân chuan Tluangpuii hi Angel dik tak niin ka hria!

Pa ber tân riahpui dâwnin a fate pahnih awmpui a ngai bawk si, a fàte fel viau tawh mah se an pahniha kalsan ringawt chi an la ni dèr si lo, an awm dàn a khawlhkham ve tlat.

Mami pawh thil zawh fiah tùr ka la ngah viau nain tunah hi chuan thil dang ka ngaihtuah thei rih lo, Tluangpuii ka kalsan thei lo. Ani hi tunah chuan mi pawimawh ber a ni rih tlat. Ka thinlungah a lian ber a, ka vei tlut tlut a, theihnghilh pawh ka tum chhin lo.

"I ute hrilh ve la?"

"Ni lo, a hriat ve kher a ngai lo."

A u nèn an inhmuh hnua a chanchin kan sawi chhuah lehna hmasa ber a niin ka hria. A u a hmuh khân a rilru a hlim a, min biak duh pawh ka rin tawh loh laiin, a mangan lai ber pawhin min rawn call leh ta a ni a, min nél ve tak tak tih hriat hi nuam ka ti a ni, ngaihtuah chianin rilru chhûngril a nuam veng veng.

*******

"I chau em?"

A 'u Tei' Hope ațangin a chhuak leh tawh a, kâr khat a ral dèr tawh bawk. Ka kalsan thei lo va, ka tlawh hman loh pawhin chanchin hriat tumin ka call ziah.

"Chau lo ve, eng nge i tih?"

"Hei ka bia che a nih hi," tiin ka nui hawk a.

"Lo lêng la?"

Mak ka tihzia chu hmu se chuan a phu zawk hial ang chu!

A in ka luh meuh chuan dâr a lo kal leh duai tawh. A chhan chu sikul kan țan tawh vàngin ka buai leh char char tawh a, buai chung chungin lêng tùra min sàwm vàng chauh tak takin ka lêng, a sàwmna ka hnar phal lo.

"Ka tibuai teh che tiraw?"

"Buai lo ve, a țha lamah ngai ang," ka lo ti vat a, min tihbuai dàn hi chu tihbuai dàn țha chi a nia!

"I lo piang lo ang tih hi a hlauhawm teh e!"

Min fak dàn reuh chu, a làwmawm dàn a ril a, a nuam.

"Nang deuh alawm le, LTK."

Min rawn en há hian," Eng maw?! Engtin nge tunah khân min koh?"a ti a.

"LTK i nih hi."

"Chu chu eng nge?"

"Nakinah hre mai ang."

"Nang pawh LTK i ni ve tho."

"Eng tihna nge pawh i hriat loh kha."

"Kei pawhin ka tih awmzia i hre bîk lo." Tlàwm te zawng a tum bîk hauh lo.

Thingpui tui zet min siamsak hnuah chuan," Thil ka zâwt ang che aw?" ka ti a.

"Aw le, han sawi la?"

Min biain min chhâng lêt ve țhìn mah se ka mitah tak min en khât viau, min en ve pawhin hmun dang a en nghâl daih zel.

"Ka call i chhàn duh loh chhan leh min hmuh duh loh chhan kha ka hre châk a."

"Hei ka hmuh duh reng che hi," a ti daih.

"A hma khân maw le, inkhâwmnaah khân biak hman i ni lo va, ka call pawh i chhâng duh lo va."

"U Pui, hun kal tawh a nih chu."

A sawi dik chiah. Kha, sawi tùr min tihre lo ringawt a nia, ka ngawi ta kur.

"Tûn hun hi a pawimawh ber alawm, hei kan inbiain kan inchhâng tawh a, a țha vek tawh e."

A țawngkam lah chu, a puitling thei phian bawk si, a châng leh a naupangchhia viau bawk a.

"Hun kal tawha chèn reng hi ka duh tawh lo."

Hei chuan awmze thui tak a nei thei ngei ang, a tân mai pawh ni lo ka tân pawh a ni thei ang chu.

"A dik alawm," ka lo ti bauh a.

"Thil pakhat leh chiah," ka tih zawm zat a," Eng vànga ka mit taka en duh lo nge i nih?" ka ti leh hrâm.

"Ka zak alawm."

Thu dik a nih ka ring.

"Ka zei lo bawk si," a thil sawi chu ka hre thei che che.

A hmaah tak chuan ka țhu hniam a, a kut chu vawnsakin," Tluangpui, thil nihna tak sawi dùn ang. Tunah hian ka thinlung zawng zawngin ka vei che a, hmuh reng che ka duh țhìn bawk. Kan inkâr ințhian țhatna hi kha kan infawhna khân tichhe lo se ka duh," ka ti a.

"Min en teh."

A lài tlat a, min en țha ngam lo a ni; mahse, chutia ka tih tâkah chuan thu âwih tak chuan min en ve mai. A mitmeng fiah zet mai chuan min en kal a, a zàmawm lek lek țêp.

"Tluangpui, ka duh che a ni. I hmel mai ni lo i nungchang zawng zawngte nèn lam hian ka duh vek che."

Min en kal a, a mitmeng chu hlimna avàngin a êng sar maiin ka hria, min en deuh ràn rán hnuah chuan meng sawr sawr pah chuan a nui sak a," Kei pawhin ka duh che," a ti ve ta chhak a.

Min duh ve tih hriat chu thil nuam tak a ni! Kan mi duh takte'n min duh lêt ve tih hriat tluka hlimawm hi a awm thei dâwn em ni?

"Ka fâwp leh dâwn che. A hma kha chuan i phalna la miah lovin ka fâwp che a, tunah hi chuan i phalna thlapin fawh che ka duh."

"Min fâwp thei ang."

Tu mah dang kan ngai lo. He khawvêlah hian mi dang an awm ve a ni tih pawh ka hrechang tawh hauh lo!

"U Pui, ka zei lo i ti em?"

A mizia tê hi a frank reuh a nia.

"Zei tâwk chiah!"

"Mipa ka fawh hmasak ber i ni."

Chu thu zet chuan min va tilâwm tehlul em! Min tihlàwm rualin dâwt min hrilh loh hrâm erawh ka beisei.

"Chuan, tun ațang hian i bialnu ka ni tawh tiraw?"

Ka nui suk.

"Ni chiang, mi dang inrawlh ve ka phal hauh lo a nia."

"Mi dangte chu, a tihchi nâng."

*MI DANG HLIMNA SIAMSAK LA, NANG PAWH MI DANGIN HLIMNA AN SIAMSAK NGEI ANG CHE*

☆LTK☆ - 21 By Dingdi Pachuau

Mami tih loha ka duh hmeichhia ka tawn lehna hmasa ber a ni.

"U Pui, engtin nge min duh theih? Min hre chiang viau bawk si lo va."

Kuah hle hle pah chuan," Duh tùr che hian hriat chian kher che ngai ka ti lo. Ka hre chho bek bek che a, a tâwk ka ti viau a ni," ka ti sap a.

"Kei chuan maw, Biak ina min biak ațang tawh khân ka duh tawh che. Ka duh phâk loh ni mah la ka duh tho che a nih chu, min duh ve hi ka ring pha lo rêng rêng."

Ka nui hawk a.

"Min duh phâk lo maw?"

"Aw, ka dinhmun hi ngaihtuah la?"

"Ka ngaihtuah a, chuan?"

"A hniam em hi."

"A nih, kei eng nge a sàn bîkna?" tiin min chhàn dàn tùr hre châk tak chuan ka en ràn a.

"Pakhatnaah chuan tlangvâl fel tak, hmel țha tak leh thla tin hlawh nei niin chhûngkua i nei a. Pahnihnaah chuan pakhatnaa mi tho khi a ni leh a, pathumnaah pawh pahnihnaa mi tho khi a ni leh bawk a."

"Mihring, Pathian siam țheuh țheuh leh nunna pakhat nei țheuh țheuh, sâng bîk kan awm lo tih hi ka ngaih dàn a ni țhìn, a ni reng bawk. Tu mah inen hniam leh inhmusit thei kan awm lo tih nèn hian. Chuvàngin, tu mah hniam bîk kan awm lo va, sâng bîk kan awm lo tihna a nih chu," ka ti duah a.

"A țha khawp mai, mi zawng zawng ngaih dàn leh pawm dàn ni ve se..."

A țawng duh reuh a, thil ho mai mai kan sawi. A titi tak tak chuan a la naupanzia ka hre chiang telh telh a, a mize frank tak chu lawmawm ka ti hle bawk.

A zawhna min zawh, ho deuh deuh, lawmawm bawk si chu,'Ka khawi lai ber hi nge min duh chhan?', 'Ka zei lo i ti em?', 'Ka naupangchhia i ti em? tih leh 'Mi zînga kan awm ve hunah i kut ka vawn i phal ang em?' tihte a ni. Dik tak vekin ka chháng, ho deuh angin lang mah se khitiang zawhna khi ka la chhâng ngai lo va, tu mahin min la zâwt hek lo, ka ngaihlu tlat.

******

Vawiin chawhnu chu Hminga a sikul lo va, an nu inentîr tùr a hruai a, ka mal reuh khawp mai. Tluangpuii ka ngai vawng vawng, ka ngaihtuah rauh rauh. Hminga awm loh chu ka ngauhtuahna a kal ding ziah. Pa a nih hnu (nupui a neih hnu) hian kan inkàwm tam vak tawh lo nain kan inbe reng tho a; mahse, kan inzui tam tawh lo. Sikul lamah erawh kan inthlah lo, in lamah erawh a buai ve tawh a, kei lah tlangval ka la ni bawk nèn, a inkawp theih tawh loh.

Ka bulah Tluangpuii chanchin a sawi chhuak ngai lo va, Mami erawh a sawi ngun thung. Ka hmangaih tih kha a hre ve tlat a, ka rilru natzia pawh kha min hriatpuitu a ni tlat. Chuvàngin, nei lêt leh thei tùr chuan min buaipui ve khawp. Kei erawh chuan ka hawi vak lo, a chhan chu ka rilru a nat êm avàng khân hmalam pan tùra ka inzilh nasat êm tawh avàngin ka rilru ka siam nasa a, a thil sawi zawng zawng pawh hi thu dik a nih vek ka ring thei lo. Min duh tak tak a niha ka tân a lo lêt a nih chuan min be pawp ngei tùrah ka ngai tlat.

Serkawn pheiah chuan Mami ka hmu chiang khawp mai. A lo inkhâi bâwr khawp lehnghâl a. Ka tlân chak lêm lo bawk a, ani pawhin min rawn hmu nghâl, min lo nuih var var a.

Kei pawhin ka nuih ve tho. Ka thlah a phût ngeiin ka ring, remchâng laiah chuan ka ding a.

"I haw dâwn tawh em? Ka lo thlah dâwn che em niang?" Kalkawngah zawh tùr ka la neihte kha ka zâwt pah ang chu.

"La haw dâwn lo deuh sia, ngai lo mai ang. I va mal ve a?"

"Keimah chauhin alawm ka hàw țhin."

"Nia, ka hre tho a, i ţhianpa kha a nia ka lo sawi chu, in thawk tlâng a ni lo'm ni?"

"E, an nu inentîrnaah a hruai a... Thlah chu i ngai lo tak tak maw?" Biak chhiat ka duh lo, ka rilru tina viau mah se ka bialnu hlui kha a ni ve tlat.

"Ngai lo tak tak, ka la haw hman lo va."

Ka tlànsan ta. Thlah ka hreh hran lo va, ka bialnu ka rinawm lohsannaah pawh ka ngai chuang lo ang, engtin mah kan awm loh phawt ahnu.

Tluangpuii chu ka call a.

"LTK, inah i awm em?"

"Awm lo, U Teite inah ka awm a."

"Engtizia nge? A zia lo leh deuh em ni?"

"Ni lo ve, ka kan ve lawk a. Eng thil nge ni ta, LTK?" a rawn ti ve deuh kher a.

LTK awmzia hi chu hria se a hmang àwm dèr si lo va.

"Ka hmu châk che a."

A lài leh ringawt ang chu. A sen leh ap ap bawk ang a.

"Kan inhmuh lohna a la rei vak loh kha."

"Nizàn daih tawh a nih kha," ka ti thung a.

A nui hak hak a," Ni ve tho, chuti, ka rawn haw dâwn em niang?" a tih chuan," I thu thu," ka ti nghut a.

"Hm, i lung ka tiâwi lo em ni? Ka rawn hâw nghâl e. Min lo nghâk la aw?" a ti dàr dár a, ka nui suk. Han tihbuai ve hrim hrim ka châk tlat.

Nghah chhûng a rei reuh dâwn avàngin dàwrah ka lût kual leh rih a, ei tùr ka lei pah. A scooty kha a rawn khalh leh dat dat ang a, fîmkhur tak chak vak lo khân, a lo thleng har dâwn asin.

Car-a ka luh chiah chuan min rawn call.

"I hâw lo tiraw? Khawiah nge i awm? Ka thleng chiah a," a rawn ti a.

"Ka la rawn thleng lo, dàwrah ka la awm rih a. I va thleng hma ve!"

"Hmmm, ka hmanhmawh ve tehlul nen! Min hmu châk lo chiang a nih chu."

Titau ka thlèm a ngaih hmel!

A lo titau awzâwng lo mai! Min hmuh veleh hlim zetin min lo kuah a, ka kuah hmasak a ngai miah lo! 'Ka ngai che' ka tih vàng kha a ni ngei ang, a zahzumna a dah bo ve rih te pawh a ni mahna.

"Kei pawhin ka ngai ve tho che."

"I sawi dàn kha a lâp e."

"Chu chu eng nge?" Hm, naupang tak hi chu aw...

"Heti chen lek hian min ngai tihna," tiin ka kut chuan ka entîr a.

"A ni lo! Heti tiat hian alawm," tiin min kuahna chu thlahin uar zet hian a kut chu a'n phar kual a, ka nuih a tiza reuh viau nain ka nuih duh bîk lo.

Innghèng rialin ei tùr ka lei chu kan ei a, kan țawng pah sap sap a, tu dang kan ngai mawlh lo.

"U Pui, lo ngai haw lo la, U Afaki kha ka hmu asin, biak ka duh viau nain sawi tùr ka hre dâwn si lo va, ka be lo ta ringawt a," a ti siam siam a.

"Ngaih huatna tùr a awm hlei nem."

"Ih, nang ka neih theih vàng che hian làwmthu hrilh ka duh a; mahse, hrehawm a ti ang tih ka hlau bawk sia, bâkah a lo thinrim thei tho bawk a."

"Keimah hi làwmthu chu min hrilh zâwk la?" tiin ka nuih a.

Haw kawngah pawh chuan ka nui vur vur reng. He nu tê hian min tihlim a, min tihhlim ang ngei hian kei pawhin tihhlim ve ka duh.

Ka lèn ve tâk foah chuan a țhenawmte pawhin min fiam zuk zuk. A in luh hma hian kawngthlang lama awm, Dàwr têah ka lût ve ziah a, heta țang hian mi an lêng em tih ka chian phawt țhìn. Officer Chhuana hi lèn ve zauh zauh a chìn vàngin a lêng em tih ka hre hmasa phawt ziah.

Zan khat ka va lêng pawh a lo țhu ve kur a, a lènna a rei tawh hmel.

Ka be hran lo va, ani pawhin min lo be chuang lo. A rûk têin ka chîk reng a, a langa enthlâk chu ka duh bik lo.

"I patea lo phei a tum hnai em?" tiin a zâwt a, ngun zetin a en pah bawk a.

"A rawn sawi miah lo."

"Lo phei leh tawh se tiraw? Inhmuh a khât ve tawh a."

"Nia, kei pawh Krismas ka hmang phei si lo va, ka hmuhna a rei ve deuh ta," a lo ti ve leh mai a.

Thil țûl lo tak tak a zawh avàng chuan awmhmunah ka lo thinur țûn a, he pa hian ka lêng ve tih a hre reng sia, ani pa tawh lehnghâl chu hàw a hun tawh asin maw le.

"Zin phei ila?"

"A châkawm khawp mai."

Tluangpuii nui chu ka run lutuk a, rum deuhin ka melh. Ani lah chuan min rawn en duh hauh lo, chu Officer-pa lam a en bîk lo erawh tlêm chuan ka ngaih a tițha deuh.

A lêng rei zêk. Ka țawng lo, ka en ru leh hrak hrak țhìn, Tluangpuii a en reng țhìn chuan ka thin a tirim a, ka awmhmunah eng mah ti thei si lovin ka thin a rim țûn mai.

Dâr 9-ah a haw ta. Ka thaw huai, thinrim viau mah ila a rûk tak chuan ka lâwm. Tluangpuii erawh chuan țawngkam țha takin a thlah thlap a, chûngte chu ka lo haw ve ringawt.

"Tlangvâl angah a inngai tihna a ni maw?"

Mak tih hmel deuh hian,"Engati maw?" a lo ti vat a.

"Tlangvâl lèn chen zet a lèn kha."

A nui ta hak hak a.

"Pa Chhuana hi chuan min ngaina ve a, a fel asin. A fanu ang chiahin min en nghe nghe, ka patea țhianpa a nih vàng hian kei pawh hian ka pa ang maiin ka ngai ve bawk," a ti deuh duah a.

Aniin a sawisèl loh miau chuan keiina lo sawisel chiam kha a fuh vak lo. Thinrim țûn mah ila tihlan a rem hauh lo, a chhan chu pa anga a en a ni ve si a, keia lo huat emaw lo thîk emaw kha chu a fuh vak lo ang.

"Mahse, a lêng rei e. Nang nèn inbiakna leh titina hun pawh kan nei hlei nem."

"A lo lèn khàt viau hi maw, hre thiam hrâm hrâm la?"

"Ka sawisèl miah loh kha. Tlangvâl fel tak ang maiin ka țhu ngawi kar alawm," ka ti ve tlat a.

"I fel rêng a ni," tiin ka bulah chuan a rawn țhu hnai a, min nuihsak pah chuan," Tlangval fel tak leh chhe lo zet i ni a, ka bialpa i ni hi ka lâwm hle bawk a ni," a ti sap sap a.

"Min fak zel teh, ka lung a awi lo țûn a nia, ka nêm deuh sawt sawt mahna!" tiin ka nui duh miah lo va.

Ka kuta rawn chelh da da hian," Ka chakna ber i ni a, Biak in kawta min biak ațang khân chakna min pe daih tawh a ni. Mi zawng zawng endawng leh hmuhsit ka ni lo tih ka hre chhuak a, mi pângngai anga min be duh khân mi pângngai ka nihzia min hriat chhuahtîr bawk. I chungah hian ka lâwm takmeuh meuh a, ka khawvel nun min hman chhohpuia ka kianga i awm duh hi ka vànnei ka ti takzet bawk," a ti sap sap a.

Chutiang chu ka ring phâk hauh lo. Ka phût chhuah a ang bawk si, ka lâwm a, chutianga min han ngai ropui chu a zahthlâk ka ti bawk.

"Ka kiangah awm reng la, ka sirah ka pên rualin pên zêl ang che aw. Khati chen kha i tel lovin ka lo kal tawh pawh a ni thei, rei lo tê chauh kan la kal dùn pawh a ni thei; mahse, i tel lo leh i ke pên rual lova pên hi ka huphurh tawh ngawt ang. A chhan chu ka ke pên hi a khingbâi tawh dâwn lutuk a ni."

Țawng tawh lo chuan ka koki nghèng chuan a lu a rawn dah a, kan kut a invuan chial bawk. A kut te reuh tê pawh chu a lum ve thar thar mai.

A hnu daihah chuan," Ti ta daih ila, i u i hmu tawh si a, Aizawl lamah phei i tum ang em? Heta i rawn awm chhan a hlawhtling tawh si a," tiin ka zâwt a.

"Ka hre rih lo le."

"I hriat loh dànah phei i tum deuh a ni maw?" tiin ka chhimbudawi a.

"Ih, tum deuh tho a; mahse, thutlûkna ka la siam fak lo," a ti leh a.

"I u nèn in inbe tawh em?"

"Be lo, U Dîtei chuan min rawn phone a, chaw eiah min sâwm. Ka u chuan min sâwm se chuan ka ei ang," a ti a.

"I u nupuiin a sàwm tho che chu?"

"Ani chu ka chhûng zâwk a ni hlei nem," a ti leh a.

Kan ngawih vang vang hnuah chuan," I u khi mi țawng duh tak a ni lo ve a, a tân chuan pawm har tak tùr pawh i ni maithei a," ka ti phawt a, a lo țawng ve loh avàng chuan," A pawm lo ang che ka tihna ni lovin hun pawh a la duh ve thei a, pawm thut che chu har ve deuh tùr a ni," ka ti leh a.

"Mahse, kei chuan ka u ah ka pawm thlap si a?"

Hm, a u lakah a beiseina a sâng si a, ani lah mi cool ruih leh mi pâk huam chi a lo ni si lo va, aniin a u ang taka a pawm nghâl ang hian ani, Rsa lah chuan a lo pawm nghal vat lo a nih hmel.

"Nang chu i dang alawm."

"Engti kawngin?"

"Kawng hrang hrangah. I țawng duh a, i nèlawm bawk. I u nèn chuan hemi kawngah hian in hrang hlak, i u chu dem tùr pawh a ni chuang lo. Bâkah, hmeichhia leh mipa hi kan hrang bawk," tiin ka hnèm ve luam a.

"Nang pawh i dang ve tho."

"Engti kawngin maw?" A zawhna ang chiahin ka zâwt ve.

"Mi fel tak i ni ringawt mai!"

Kan inen a, kan innuih a, làwmthu sawi nân kan infâwp zauh a.

"I zei reuh e!"

"A ni maw?!!" A hmelah chuan a hlim tih a hriat mai. Nichin deuhah kha chuan lungawi chiah lo awka kha ka hre deuh a, tunah tak hi chuan a bo leh hmak tawh. A mood hi a inthlâk nasa țhìn a nih hi.

"Ni e, i practice nasa tawh-"

"Teuh lo lutuk!" a lo ti vat a.

"A ni chiang."

"Aih, a ni lo tak tak! Ih, thurûk a nia," a ti ta sap a.

Thurûk! Chu thurûk chu ka hre châk khawp mai, hre châk tak ka ni.

"Min hrilh la?"

"A, a zahthlâk!"

"Ka bulah pawh maw?" ka lo ti vat a.

A sawi hreh ve ngang a ni ang, min en lo chuan hnuai lam a bih ta daih a.

"A nih, sawi lo mai rawh. Ka hre thiam mai ang che," nui chung hian ka ti a, a thil sawi chhuah hreh tak, sawi luihtîr chu ka duh bîk nâng.

"Nia...ka la hrilh tho ang che," a ti sap a.

Ka haw hnu thleng pawh chuan eng thurûk tak ni ang maw tiin ka ngaihtuah. A sawi hreh ve sia, thurûk sawi chhuahtîr phêt tum ka ang alawm le.

Mutnaah chuan ka phone ka en lawk a, Tluangpuii message lo awm ràn chu ka en hmasa ber.

*Naute lem leiin ka fâwp țhìn."

Naute lem ațangin a inzir chhuak a nia, a mak danglam ve hranpa rêng rêng e. Ka thil hriat ngai pawh va ni suh, ani ka tawn hnu hian thil mak deuh deuh chu ka hriat belh ve zel chu a nih hi!

*Lo practice char char rawh* tiin ka reply a. A nuih a za ngawt ang chu.

*I sual* a rawn ti ta rêng a.

*Nang i fel thung a*

*DUH DUH DÀNA AWM CHU DUH LOH DÀNA AWMNA*

☆LTK☆ - 22 By Dingdi Pachuau

Kan in chhûngkhur boruak chu tlêm chuan a zia ve deuhin ka hria. Ka nu chuan min àn khum chiam chiam tawh lo nain a lung erawh a la áwi lo chiang. Kan awmpui nula fel zet Vâri chuan hrehawm a ti ang tih ka hlau thìn a, ka nu thinrim hi chuan mi zahpah vak a nei si lo va, nuam lo a tih ka hlauh vàngin ani hi chu ka be lui hrâm hrâm țhìn.

Nula fel tak a ni reuh a, a lian lêm lo nain a ngo paw vâr veu mai a. Chuvàngin, a hmingah pawh 'Vâri' tih a ni, a haw bîk lo.

Tluangpuii nèn kan inchukha hnuah chuan Mami thlalâk, ka room-a ka tàr pawh chu drawer-ah ka dah lût ta daih. Ka room hi Vâri hian a tifai țhìn a, ka bialnu ni tawh lo pui thlalâk a hmu chhén tùr hi ka duh lo, ka bialnuah a lo ngai palh ang.

"U Pui, ka uin inhmuhpuiah min sâwm asin!"

A aw ațang chuan mak a tiin a phûr over tih ka hre mai. A phùr hle tih hriat chu a nuam ka ti, a u kha hmuh a châk hle a nih kha. A hmu ta chêng a, Rsa lah mi nèlawm lo leh țawng tam lo zet a ni si a, a phùrna a reh ta deuh vek a, a u nupuiin chaw eia a sàwm pawhin a kal duh loh tawh kha.

Mahse, tunah chuan a u ngei chuan inhmuhpuiah a sâwm ta chiah a, a phùrzia hi, an inhmuhna hian thil țha rawn her chhuak se ka ti, hlim takin hun hmang se, a hmaa a phùrna kha nei lêt leh vek se...

"A va làwmawm ve! Engtikah nge in inhmuh dâwn? I huphurh em?" ka ti a, a huphurh viau chu ka ring hran lo.

"Vawiin chhùn dâr 12 hian a nia, inhmuhna hmun tùr chu min la rawn hrilh dâwn chauh. Eng atân nge min hmuh duh le? A nau ang tak takah min ngai tawh tih min hrilh a duh em ni ang le? A ni thei mai ang em?" a rawn ti sep sep a.

Chutiang beiseina sâng lutuk a neih chu ka tihchhiatsak thei lul lo ang, chhûng leh khat a duhzia leh a mamawhzia hi, Officer Chhuana pawh a lakah ka sawisêl ngam lo a nih kha!

"A ni ngei ang, a nau dik tak i ni a, i u dik tak a ni alawm."

Zâm tih hriat deuh hian a nui hak a," Mahse, ka u hian min nêl lo ve chiang a, min en dàn hi a mikhual ka ti," a ti leh a.

"Inla inhriat chian tawn loh vàng mai mai a nih kha. Inhmu tamin inbe tam ula, a dik vek mai ang," tiin ka hnèm leh a.

"Nia; mahse, min biakpawh loh chuan ka tân chuan biak hmasak hi a har ve êm asin, ka inthlahrung ngawih ngawih a. Entîrnân, ka nu kha a lo haw ngawih ngawih pawh a lo ni thei a, theihnghilh hmak a lo duh phei chuan a tân chuan ka ngeiawm ngawt ang," a ti leh a.

"In inhmuh hunah i sawi vek dâwn nia. A pawh vak lo chea i hria a nih pawhin nangmahin be bawrh bawrhin pawh viau tum la, i thei ang tiraw? I thei tih ka chiang, nula fel tak i ni si a," tiin ka fak pah a.

Hun chu kal muang ka ti kher mai. Sana ka thlêk chhén mai a, an inhmuh hun tùr chu ka lo nghâkhlel ve viau ringawt. Thil țha lo lam aiin thil țha lam an sawi chhuah ka beisei, Rsa pawh pa țawng duh tak ni lo mah se, pa mâwl tak a ni dâwn lo chiang a, a nau rilru nâa a dah duh ka ring lo.

Zàn lamah lesson plan ka siam vángin ka lêng chhuak lo. Mut dáwnah ka call mai ang chu ka ti a, a ina ka lèn loh chuan chhuah ka tum ngai lo.

Ka buai viau lai chuan ka phone chu a rawn rì a, nui deuh suk chuan ka'n en a, min rawn call-tu hming ka hmuh chuan ka nui ta lo.

"Hello?"

"Pui, naktûk chu i sikul bànah rawn pêng kâwi lawk ta che? I hman ang tiraw?" a rawn ti a, a in luah ka hre tawh a, hnar dàn tùr a buaithlâk khawp mai.

"Ka lo tum dâwn nia, ka hman ngei ngei ang chu ka ti ngam miah lo," ka ti a.

"Aw le, ka lo beisei ang che."

Mami hi ka va ngeiin ka va haw hran chuang lo; mahse, bialnu dang ka nei tawh a, chuta kâra ani va hmuh deuh chhên chu țha ka ti lo, Tluangpuii hian min lo hmu palh se a lo thîk thei a, thil ho têa ngaihah kan inkâr a buai thei tlat.

Ka plan zawh hnu chuan a lo tlai ve ta deuh ruih mai. Tluangpuii chu a la mu bîk êm lo ang chu maw.

Ka va call chuan a lo chhâng rang khawp mai.

"I call ka lo nghâk reng tawh a," a rawn ti nghâl hliai a.

"A ni maw? Chutiangte chu min rawn call mai tùr alawm."

"Ih, i buai ka hlau alawm."

A inthlahrung thei a nia, a châng lahin min hruai chhuak leh dàwr dáwr nawk si.

"Lesson plan ka buaipui a."

"Chu i buai êm chu, hun thâwl tak hnuaia biak che ka duh alawm; mahse, lesson plan chu i zo tawh tiraw?"" a ti leh a.

"Aw, zo tawh e. Ka free tawh alawm."

A u nèn an inhmuh dàn chanchin chu min hrilh nghâl malh malh a, a thil sawi kâr lakah chuan 'I ning tawh em?' a ti deuh chhên a.

Kei lah chuan," Ning lo ve, sawi zêl rawh," ka lo ti zêl a.

Kan inbe rei khawp mai. A u chuan a hna thawh tùr kalsanin chawhnu pum deuhthaw chu a nau tân a hlàn a nih àwm chu! A chhan chu an inhmuh hun chhûng a sawi dànah chuan tlai lam dâr 2:30 vêlah chauh an ințhen țâwk a ni si a, a fel tawh a niang.

Hlim takin a titi a, a u nèn an titi dan chu zêp nei hauh lo chuan min hrilh a, a hma ang maia nèlawm lo leh țawng mawh kha chu a lo ni tawh love!

Ka lâwm khawp mai. Ka tân chuan hlâwkna tehchiam a awm lo maithei; mahse hlim takin a tit siam siam a, chu tluka hlu chu a awm chuang dâwn em ni?

"Ka u chuan ngaihdam min dîl a."

"Engah maw?!!"

Mak ka ti khawp mai.

"Ih, a hmaa kan inhmuh hmasakna bera a awm dàn vàngin. A nau dik tak ka ni si ."

Mipa mak tak leh puitling tak chu a va ni êm!

"Ka lawmpui che!"

Ka lawmpui tak tak alawm. A chhan chu ka bialnu a nia, hlim taka awm tùrin ka duh alawm. Ani bâka hlimna kawnga duhsak tùr hi ka hre chuang lo, hlimna tinrêng nei se ka duh a ni.

A hlim vàngin ka hlim ve a, rei tak kan inbiak phah. An inkâr chu țha deuh deuh se, unau inpawh tak ni chho teh se...

Chawhnu bànah chuan Mami chuan min rawn call nawn leh vàng chauhin a inah kal ka ngai a ni tih ka hre nawn leh a, ka rei vak loh hrâm ka beisei. Hminga hnênah chuan ka kalna tùr chu ka hrilh hran lo nain ka pènna lam chu a hmuin a hre thoin ka ring.

A in ka thlen chuan mi dang an lo awm hauh lo. Hlim takin min lo làwm a, a hlim hmel hmuh chu a nuam kher asin. Hmana ka hmangaih țhin hmeichhia kha a la ni a, ka tân chuan mi mai mai leh mi pângngai chu a ni mawh viau ang.

"Pui, hmanhmawh lo la, thingpui kn lawk ang aw?"

Thingpui chu tui zetin min siamsak a, ka bulah chuan a rawn țhu bawk a.

"Pui, ka hmangaih che tih i hria a, nang pawhin min hmangaih tih ka hria. Hmâna kan awm dàn leh kan hun hman dun țhinte kha lo lêtin koh kìr theih se ka ti țhìn. Kei chu tihian mal takin ka awm ta rak rak chu a ni sia, nang lah chuan nang tlàn bosanah leh pasal nei taah min ngai si a, ka ngaihtuah lêt cheih cheuh hi chuan ka inkhawngaih ve țhìn," a ti keuh keuh a.

Nia, ka hmangaih țhìn. A hmel chu ka en a, tlêmin a lang upa ve ta deuh e tih lohah chuan danglamna a awm hran lo. Ka hmangaih țhìn, ani nèn hian hun duhawm tak tak hmangin kan ințhen hlei thei lo țhìn a nih kha.

Ka thil hriat duh zawhna hun niin ka hria.

"Mami, thil ka zâwt ang che aw. Kan ințhen hnu khân, min hawsan hnu khán eng vanga min be duh lo ta nge i nih? Nang ka biakpawh theihna tùr zawng zawngah i biakpawh theih miah loh a nih kha," ka ti ve ta a.

Min en kiau chuan a thaw hak phawt a, a âwmbáwr insêp deuh dârh dârh chu ka en a.

"A chhan chu nang ka țhen theih nâna ka chhûngte thil tih vek a ni. Bialpa ka nei tih an hre vek a, ka tãn harsatna tùr i ni tih an hria. A chhan chu an bulah pawh i chanchin ka sawk a, Israel-a pèm thlak ka duh lo tih an hre tlat a," a ti a.

"Vawi khat tal chu min biaka chanchin min rawn hrilh ve chu ka ring a nia."

"Phone ka kawl an phal lo a ni. An ruala ka kal ve ngei a ngai dâwn si a, nang ka biak leh țhin che chuan min thlêmtu sual hmanruaah an ngai ngeu dâwn che a, min block theihna apiangah min block a ni mai. Kan kal hma kha chu ka room-ah ka tawm tlawk tlawk țhìn, ka ngai em em che a, biakpawh che chu khawilam, phone ka hmu ngai lo va, ka vànduaina êm êm pakhat leh chu i number ka vawng lo kha a ni. Ka phone chu hmu lo mah ila , i number lo hre bel viau ila chuan ka bepawh thei tho tùr che a ni a, ka rilru buai lutuk vang khân ka buai chiai zo pawh a lo ni ta a niang."

Ngun zetin ka en a, min en lêt ve tho a, a mittui tling deuh pamte chu ka hmuh hmaih hauh lo.

"A nih, Israel-a kal chungchâng kha?" tiin ka zâwt belh leh a, ka inthiam lo chho deuh țan tawh a.

"Kal ka tum lo sa hrim hrim. Kha pawh kha thlawh chhuah dâwn țêpah ka pût chhuak thei hrâm a, min rawn ngaihven zui taknain keiin ka ngaihven lo a ni. Nang kalsan daih che hi ka ngaihtuah ngai lo, nang hmu pha lo chea dam chhûng hun hman ka tum lo."

"Phone ka hmuh theiha an dah loh vangin i number chu ka hre ta miah lo va, biakpawh ngaihna che a awm lo. Ka țap ka țap țhìn, i rilru tùr ka ngaihtuah a, hrehawm i tih dàn tùr kha ka ngaihtuah thiam ve tho a ni. Ka thiam loh vek a ni tih ka hria, chu chu tûn thlengin ka la tuar chho ta zêl chu a nih hi. Nge Pathian hian hetiang tùr reng hian min lo buatsaih bîk ni maw? Hmangaihna awmzia min hriattîr tê tê a, hun hrehawm ber ber min hmachhawntîr leh si," tiin a insût hraih a, ka inthiam lo va, ka khawngaih viau bawk.

"Mami, hetiang dinhmuna kan awm chhan hi keimah vang-"

Ka hmui chu a rawn hup ta chat a, mittui luang ngiai ngiai hian," Ni lo, thiam lohna pakhat mah i nei lo, engkim hi keima thiam loh vek a ni zâwk. Engti kawng emaw tala biakpawh che tum tùr kha ka ni a, ka chanchin hrilh hre tùr tal che pawhin, ka thiam loh vek a ni," a ti sap sap a.

"Ka hmangaihna kawng hi hetiang tùra ruat bîk hi ka lo ni a niang, a châng chuan Pathian ka dem a, ka chhûngte ka dem bawk a, a bul ber chu keimah tho ka lo ni, ka hmangaih miah loh tùr ka lo hmangaih che a," a ti leh a.

Keimah avànga hetianga awm hi a ni tih hrilh hriat thar kher ka ngai lo. A chhûngte bula awm duh lovin, ka tân engkim huamin a chhûngte lak ațangin a tlân bo a ni si a, kei lah chuan hetiang dinhmunah hian ka dah ta mai chu a ni si a.

"Min ngaidam rawh, hetiang dinhmuna dahtu che chu keimah hi ka ni," ka lo ti a.

"Ni lo ve, keima thiam loh a ni alawm. Lo hâw chho miah lo tùr kha ka ni a," tiin a mittui chu a hru a, a hnâr sen têk chu hmâna hmuhnawm ka tih deuh țhin kha a la ni reng.

Hrehawm ti taka a awm hmel hmuh chu hrehawm ka ti, ka khawngaih a, hetianga awmtîrtu hi keimah ka ni si s.

A bâna vuanin," Keimah vànga i tawrhna zawng zawngah ngaihdam ka dîl ngawih ngawih che," ka ti sap a.

Mittui tling piaua min enin za lo zet hian a nui sak a," Pui, ngaihdam min dìl a ngai lo, ka tawrh tur atân Pathianin..." a țawng zawm theih rih loh avangin a ngawi dat a, a țap chhuak ang tih a hlau a ni ang.

Muangchângin ka kuah a, ani pawh vawm thlawp ang maiin ka âwmah a bei nghâl ta chial a, a inhnît zui ta hlap hlap a.

Nghet takin ka kuah. Ka hnèm thiam lo, kan pahnih chunga thil thleng hi a khirh kual vêl lutuk a, hmeichhe pakhat tân phei chuan tuar a har viau ang.

He nu ka duh theih țhinzia kha. Kan inkâr hlatna khân ka duhna kha min dang thei lo va, hun ka neih apiangin ka pan țâwk țâwk thìn a nih kha, ani pawhin ka bula weekend hmang tùrin min rawn pan țhìn a nih kha, kan induh tawn a, kan hun neih ang ang chu kan inhmanpui tawn ziah țhìn.

"Pui, ka la hmangaih reng che asin, ka thinlung hi i tân chauh ka la dah a ni. Tu mipa mah hian i ta ka nihna hi an la rûksak lo che asin."

Ka thiam lohna ka hmu zut zut a, he nu ka tâna rinawm reng hi ka kalsan a, keichuan bialnu pahnih lai ka lo neihsan reng tawh! Tu thiam loh nge ni ang? Ani hian thiam lohna a nei em le?

A in ațanga ka haw hnuah pawh ka inngaihtuah reng a, ka khawngaih a, hetiang dinhmuna dahtu chu keimah hi ka ni. Hlim taka engmah ngaihtuah nei lova a lèn laiin a thinlung ka rûksak a, khatih lai khân a la naupang a, rilru thianghlim tak pawh a la ni. A thinlung ka rûksak miau avàngin a tân tihngaihna a awm lo va, min zui ta rêng a nih kha.

Mi thinlung ka tinain ka hliam a, mi pakhat mai pawh a ni lo. An nun ka tichhia a, Pathian pawh hian min la tihchhiatsak ve ngei ka ring tlat a nih chu, a chhan chu phuba lâk hmang Pathian a ni si a, ka thil tih dik lohah min la thungrulh ngei ka ring tlat bawk.

Ka ngaihtuah nasat vàngin Tluangpuik min rawn call pawhin ka chhâng peih thlâwt lo, ka țawng châk lo a nih ber chu. Kan inbiak rei loh nèn, ka mood chhiatzia chu a hre rang ngang mai, kan inbe rei lo rêng a. Ka thil tawn chuan ka nunram a tichau a, chhuah pawh ka peih lo.

Zànah ka muhìl thei lo va, ka let ka let mai. Chhìn khat tê mah ka chhîng lo, zîngah chuan ka mit a thial ûrh mai a, sikul kal chu peih lo hle mah ila chawlh ringawt chi a ni hauh lo.

Ka boruak hre hauh lovin ka nu chuan min han hauin min àn khum leh deuh ringawt bawk a, ka boruak a ipik lutuk. Bialnute vànga tlangval senior pui tawh hauh ngun ber ka nih dâwn hi! Chhâng lêt lo tùrin ka insûm hrâm hrâm.

Ka thin a chhe khawp mai. Naupang chungah ka lantîr chuang lo nain zàn mut țhat loh zet chuan thin a ram duh khawp mai. Class-a naupang țawng deuh hlekte chuan ka beng a verh hle a, class lâk laia naupang pakhat awm țha duh lo chuan ka mood a ti-off zual a, ka vìnin ka hau vak ang tih ka hlauh vàngin class ațangin ka chhuah phah, chuti lo chu ka insûm thei lo mai ang a, ka hrem na palh ang.

Chawlh laiin Tluangpuiin min rawn call a, Aizawl lamah phei thut a ngai tih min hrilh phei chuan ka thin a tirim thut. Inthiam lo taka min rawn be buaia min rawn hrilh ve a ni nàngin ka mood a fuh loh sa miau avàngin ka thin a ram a, ka vîn deuh țhat. Kitchen-ah a ni hlauh a, ka vànnei khawp mai. Ka mualpho lo chauh chu a ni.

"Engati nge, U Pui, i duh loh zàwng ka sawi palh a nih chuan pawi ka ti-"

"Duhtâwk ang, tluang takin i kal dâwn nia," ka ti chhuak thei hrâm. Thâwk ka la hawk hawk a, ka mit kham țhûm mai chu ka nuai nawk nawk, tuna ka awm dàn hi chu a chìn tam chi loh khawp mai. Nakinah mood țhat deuh hnuah Tluangpuii chu ka be țha leh mai ang, tunah hi chuan biak châkna ka nei lo, biak rih loh a țha zâwk bawk, ka vìn hrep palh ang.

*Pui, nimin i haw hnu ațang khân ka khua a sik char char a, i bàn hunah rawn pêng kawi zawk ta che, khawngaihin?*

Mahni inthiam lohna hlîr mai. Hei pawh keimah vàng bawk, Pathian hian phuba a rawn la țan a ni chiang mai.

*U Pui, ka tihpalh aw, ka tibuai che a nih ka ring*

Ka lu ka thing nawk nawk. Au nghek nghek ila ka mood hi a zia deuh mahna!

*KAN CHUNGA THIL THLENG TAM TAK HI CHU KEIMAHNI CHO CHHUAH A NI VE CHÂWK*

☆LTK☆ - 23 By Dingdi Pachuau

Dedicated to TETEI FANAI

A tûk tlaiah chuan Mami damlo chu Hminga nèn kan han tlawh kawi ta ngei a, Khumah a lo mu bâm mai a. Rei tak erawh kan awm lo, Hminga chu an nute inah zanriah an ei dâwn avàngin kei aiin a haw hma deuh a, kei erawh chuan rilru khingbái takin eirawng ka báwlsak a, ka bialnu hlui a nih vàngin leh kan pahnih chauha awm rei ka duh loh vàngin ka haw tlai bïk lo.

Bialnu dang ka nei tawh a, ka ngaihtuah a ngai. Ani hi chu ka bialnu 'hlui' a ni tawh, lehlamah chuan khawngaih viau mah ila, ka bialnu 'ta' ka nih tawh avàngin ka ngaihven viau pawh hi a rem tawh bîk lo. Tluangpuii mitmei ka vèn a ngai a, bâkah a tihchi vak loh. A bialpa hlui ka ni a, hming chhiat mai pawh a awl duh ang.

Eirawng ka bàwlsak a, a mu reng mai si a, mihring pângngai nih chuan kalsan ringawt kha a tihchi bîk loh a ni.

"Damdawiah inentîr vat ang che."

"Ka natna ka hre sa a, chumi damdawi chu ka ei tawh alawm," a lo ti mai a.

"Chu pawh ni se, inentîr chu a țha ber."

"Nia..."

Eirawng ka bàwl zawh chuan rei țhu lovin," Ka hawsan ang che, eng emaw a thleng a nih chuan min lo call hreh lo la," ka ti a.

Haw kawngah chuan ka awm dàn chu ka ngaihtuah kual a. Tunah hian harsatna hi keima insiam a ni ta berin ka hria, ka nunhlui vàngin ka buai a ni. Engati nge ka nunhlui hi ka inbawh buaitîr tlat le? Hun kal tawh chu hun kal tawh a nih angin liamtîr mai ila.

Tluangpuii phei hi chu ka ngaihzàwn tak tak hma ațanga harsatna ka tawh nghâlna kha a ni lehnghâl a, ka nu àn khum leh tihtauh ka hlawh ziah a nih kha. Harsatnaa bul țanin kan inngaizáwng a, tunah Mami, ka bialnu nghet hmasa ber ka hmu țhin tih hre ta se, engtin nge a ngaih ang le? Mahse, Mami hian hmel hriat vak a nei awm si lo va, a lo damlo bawk nèn, han buaipui ve ber tùr chu ka ni tlat a ni. Tluangpuii pawh hian a hriat thiam ka ring, a remtih loh bîk ka ring lo. A rilru a țhat em hi, ka ngaihsak loh pawhin amah zâwkin ngaihsak tùrin min tih tho ka ring, a chhan chu ani pawh hi chhûngte ngai pawimawh mi a ni si a, țhian pawh a neih vak bîk loh hi.

In ka thlen chuan Tluangpuii number chu ka hmet chhuak a, kan inbiak hnuhnun ber khân ka mood a fuh loh vàngin ka be țha lo a nih kha, ka vìn deuh nghe nghe a nih kha. Hm, a thin pawh a lo rim hial maithei a ni, kei ni ila a rim dâwn chiang.

"Hello?" A aw chu a cool raih mai.

"Hi, i țha em? Thil dik lo a awm lo tiraw?"

A thaw huai a," Ka rawn biak lai che khân i mood a off lutuk a, i hlauhawm ka ti lutuk ringawt, ka rilru a nuam thei reng reng hlei nem," a ti sap a, chutah," I mood a off tawh lo tiraw?" a ti leh a.

Ka nui hawk a," Ka tihpalh lutuk. Nia, a pawi ka ti, ka chungah rilru dang i put phah hial lo maw?" ka ti a.

"Phah țêp."

"Phah țêp suh se, engtikah nge i lo haw phei dáwn?"

"Ka hre rih lo, patea thu thu a ni mai," a tih chuan," A theih loh!" ka ti leh ringawt a.

"Eng chu?"

"Lo phei thuai teh, i awm loh chuan a reh lutuk! Min khawngaih lo em ni?"

"Nula dang inah lo lêng rih la?" a tih chuan " Tak tak?" ka ti vat a, a ti tak tak lo ang tih ka hre ve tho nain ka zâwt ve châk hrim hrim.

"Aw, lèn mai mai chu a pawi lo; mahse, a chintâwk chu i hriat ka ring."

"Chintâwk hi ka hre lo a nia."

"Chuti, lêng lo mai rawh," tiin a nui hak hak a, a nui ri han hriat leh meuh chuan min tiharh sawng sawngin ka hria.

"I patea chu lo haw phei dîl thuai rawh aw, ka ngai tawh che a nia."

"Aw le, ka lo haw hunah eng nge ka lo hawn ang che?"

"Nangmah!"

"Min ngai tak tak em?"

"Tehrêng mai!"

"A nih chuan, naktûkah ka lo phei dâwn em niang?"

"Min fiam kher lo la?"

"Min ngai sia, ka khawngaih che alawm!"

He nu tê tak hi chu aw!

*******

Kan sikul naupang a boral vàngin Zohnuai lamah kan kal a, zirtîrtu zawng zawng leh boral ta Zonunsanga classmate-te chu kan kal vek a, an in a zau fahran si lo va, class dangte kan kaltîr lo chu a fuh khawp mai.

Kan Head chuan thu a sawi ve bawk a, rei erawh hun a la lo. Pu Rsa pawh hmu tlatin ka inhria a, ka hmuh chian theih hnuah chuan amah ngei a ni tih ka hmu thei. Tuna boral ta nèn hian eng nge inkungkaihna an neih ang aw ka ti rilru a.

Min hmuh ve lêm loh avàng leh kan țhutna a inhlat vàngin leh hun chêp tak avangin ka be thei lo. Ani chu in chhûngah a țhu daih a, keini chu páwnah silpauline zàr hnuaiah kan țhu.

Kan hnungah tualchhûng mite pawh an țhu ve tho a, kan naute chuan an țhianpa thlahna atân hlâ an rem bawk. Zai thiam teh lua lo mah se an tițha ve hrim hrim, an zirtîrtu nih pawh a nuam e.

"En teh, Rsa ka hmu! A chhiat lohzia saw!"

Mi kan tam vàngin țhutna inhnaih chêtin hùn a ni a, khûpin kan hma chiaha țhute mawng a si chêt a, chuvàngin ka hnunga nula ni àwm takte țawng chu ka hre lo thei lo, an inhrilhru ve deuh tho chu a ni nain kan inhnaih lulai lutuk a, an țawng a hriat loh theih loh.

"A ni maw?!! Ka hmu ve duh a nia!"

"Ka duh chiang e!!!"

"An nu a lo kal ve em le? An pahnihin an lo kal a ni ngei ang."

"Kal lo ang, naupang enkawl a ngai alawm, a rawn kal hman lo ang."

"I inti hre chiang vêl e..."

"A chanchin storyfb-a mi pawh kha vawi eng zát nge ka chhiar chhuah tawh pawh ka hre tawh lo, ka hre bel tawh teh a nia!"

"Awi, râpthlâk hian a. A nih leh, a nau hming kha han sawi chhin teh."

"Âmpuii, 'Lalțanpuii' a nih kha."

"Nih leh, a nupui hming?"

"Dingdi Pachuau. Min zâwt min zâwt mah la ka hre vek tho ang."

Mitthi chanchin an sawi lai a ni a, kei erawh chuan ka hnunga mite titi chu ka ngaithla char char. Ka hriat Rsa chanchin hi an sawi lai chu a nih ka ring deuh ringawt.

"U Dîtei kha chu kan vêng mi a ni nain ka hre chiang ve vak miah lo, pasal a neih khân ka la naupang ve êm bawk a ni. A pa nèn chauh an khawsa tiraw?"

"Aw, an chanchin kha chhiar leh teh, i hre vek mai ang."

"True story tihna em ni?"

"A niang chu, an chanchin tak tak ni miau sia."

An thil sawi chuan ka beng a verh lo thei lo. Rsa nupui kha Dîtei a ni ve ngei bawk si a, an thil sawi leh ka mi hriatte hi thuhmun an ni tlat a ni, chuti a nih chuan an chanchin chu storyfb-ah en ve tùr a nih chu. Tluangpuii tân tak pawh a țha dâwn asin, a u chanchin chiang lehzualin a hre thei dâwn a.

Nilêngin kan awm a, thlàn thleng kan zui bawk. Țhut ngawt ngawt chu thil nuam tak a ni lo, ke dahna a tawngchham bawk si, ke a kham țhûm mai.

Zànah erawh lèn ka țhulh lo.

"I u chanchin chiang taka hriat i duh em?" tiin ka zâwt phawt a.

Min en reng phawt a, chutah," I hria em ni?" a ti ta a.

"Hre lo ve, storyfb-ah a awm an tia."

"Chu chu eng nge a?"

"Ka hre bîk lo, google chhin la?"

A phone chu a khawih neuh neuh a, ka lo en reng thung a. Hetiang nula chhe lo lutuk nèn kan induh ta mai hi a mak! A chhiat loh dàn lah hi, a sexy ka ti! A mithmul er târh mai, tihluih ni miah lo te leh a hmui sexy êm êmte chu thlìr nin an har ka ti, en reng mai ka duh.

"Min zawnpui ve la?"

"Lo thlìr veng veng che hi a nuam ka ti zâwk."

"I ngaihtuahna a bawlhhlawh ngei ngei ang."

Ka nui hawk mai.

"Lo bawlhhlawh pawh ni se i hmu thei chuang hlei nem."

Chutah, thutak ta deuh thutin," Ka țhian hlui ka hmu chhuak a," ka ti phawt a, min ngaihven tâwk lova ka hriat vàngin," Inpawh tak kan ni țhìn a, kum tam tak kan inhmu tawh lo bawk a," ka ti leh a.

"Mipa nge hmeichhia?"

"Hmeichhia."

Min rawn en ta vang vang a," I bialnu a ni maw?" a rawn ti ta chat mai.

"A 'hlui' maw le, nang ka tawn hma daiha mi a ni tawh a."

"Pasal a la nei lo em ni?"

"Aw."

A ngawi ta vang vang a, kei pawh ka ngawi ve tho, a rilru tùr àwm ka lo ngaihtuah.

"I la duh reng em?"

Min zawhna chu mak ka ti, chhâng lawk lo chuan ka en deuh reng phawt a.

"Aw, min chhâng suh, ka hre thiam e."

"Nang ka nei tawh che alawm," ka lo ti vat a.

"Ka lâwm e."

"A damloh vàngin a nia ka hmuh ni. Hmel hriat a nei vak si lo va, kei a hriat ber ka ni si a," ka tih chuan," A va khawngaihthlâk ve! A dam tawh em?" a ti ta daih a.

Ka rin loh deuh min zawh vàng leh a thinrim loh vàng chuan mak ka ti lo thei lo!

"Aw, dam tawh e."

"Lungleia mi hi a ni maw?"

"Aizawl zâwk. Hetah chuan hna a rawn thawk a niang, a chhûngte Israel-ah an pêm vek a, amah chauhin a awm ta."

"A nih tak chu, a chanchin min hrilh vàngin ka lâwm e. Ka hmu ve châk hle mai, a chhe lo ngawtin ka ring."

Nui chung hian," Engati maw?" ka lo ti a.

"Bialnu chhe deuh tak i neih ka ring lo," a tih chuan," A nih nang?" ka lo ti vat a.

"A, kei ve te chu a.." a ti niah niah a.

Hnaih sauhin," Tuna ka bula țhu mêk hi a chhe lo ber," ka ti sap a.

"Uang lo teh!" a lo ti vat thung a.

"Ka uang miah lo, i chhe lo ber. Mami chu hun kal tawha mi a ni a, nang chu ka tûn hun hman mêka mi. Tûn hun hi a pawimawh ber alawm," ka ti leh a.

"U Pui, i inchhîr țhìn em?"

"Engah chuan maw ka inchhìr ang?"

"Min duh hi."

"Ka la inchhîr chhin lo," tiin dik takin ka chhâng a.

"Eng mah thawh ka nei si lo va, bâkah, nu leh pa leh chhûngte mumal pawh ka nei bawk si lo va, i tân hian-"

"I țha ber, ka duh ber i ni tho tho," tiin a kut chu ka vuan a, a lo vawt leh thler tawh.

"Vûr ang mai," ka ti sap a, ka kut pahnih ka vuan sauh sauh a, tihlum ka tum a ni.

"Thlasikah hi chuan pasal neih ka châk ziah, eng emaw lam ni lovin pangti lum nghènga mut ka châk țhìn, ka ke a vawt thei si."

"Tunah a la vawt em?"

"Aw."

Ka mal kârah chuan a ke chu ka dahsak a, ka kekawr hâk chu a chhah lutuk loh avàngin a ke vâwt var chu ka hre ram ram thei.

"U Pui, i bialnu hlui chuan a ui thei ngawt chein ka ring. A lo țhen ta che hi a inchhîr ngawt ang chu tiraw?" a ti ta daih a.

"Ka hre lo le."

"Ka țhen ve dâwn miah lo che, ka thâwk tàwp thleng pawhin ka la duh reng ang che."

A thil sawi chuan min tilâwm a, kuah vang vangin a hnuah chuan dïm takin ka fâwp a. Kan uar dùn bawk a, kan inthlah hlei thei lo va, kan duhtâwk hlei thei lo, a bâk duhnain ka khat tlat.

Ka kuah mu riai riai a, ani pawh a thâwk a mumal tawh lo deuh a, min hnial bîk miah lo leh a țang miah lo chu mak ka ti.

"U Pu-"

Ka fawh leh chiah tawh avàngin a țawng chhunzawm thei lo, kan indûtin kan inkeih mawlh mawlh a.

"Ka duh che a ni, ka duh takzet che," tiin a remchâng laiah chuan ka fâwp zêl a, amah duhna hlîra ka khah vàngin thil dang ka ngaihtuah thei miah lo.

A kawr chhûnga ka kut ka zen luh chuan a lo thaw hak mai. A taksa nâl hen mai chu chùl a nuam, ka kut lah chuan chùl ngaihna a hre lo zâwk hialin ka hria, hmun hran hran a chûl lâwr dun dun mai.

"U Pui...ka thâwk a tàwp...dâwnin ka hria..."

Ka nui sak. Hetianga awmtîr theitu hi ka ni ve tlat, awm ngaihna a hre bîk lo, ka nghâwngah min kuah a, thâwk mumal lo zetin a lu chu a chêt sek mai.

"Ka phal miah lo a nia."

"U Pui, chesual lo ang aw."

Ka chêt chu a tàwp chiang hle mai. Tuna kan awm dàn ngaihtuah hi chuan chesual thei dinhmunah kan ding tlat a ni, a kaihruaitu ka la ni zui.

"Min...thlah rawh."

Ka aw chu leh! A mumal lo hle mai, ka nghâwng min kuahna leh a mala min kherh tlatna chu a lâk sawn a min thlah loh chuan a thil sawi kha ka hre reng thei lo ang!

"U Pui, i thin a rim em?"

"Min thlah phawt rawh."

A kut min kuahna chu phelhin a ke pawh chuan min kherhna chu a phelh nghâl vat a, ka thin a rim emaw a ti a ni maithei.

Min thlah fel hnuah chuan kei chu ka tho ta vat a, ani pawh chu hlauhthàwn hmel takin a rawn tho nghâl a, ka maimichhîng vang vang a, ka thil ngaihtuah lai chu paih bo ka duh.

"U Pui, ka tihpalh...ka...khatiang khân awm ka tum miah lo..."

Kei erawh chuan muangchângin thâwk ka la a, ka thaw chhuak leh hawk hawk thung. Ka normal lohna chu siam țhat a ngai.

"I thin a rim tiraw?"

Chutah, a lam hawi ve tain a mitmeng fiah kal mai; mahse, hlauhthàwn hmel zet si-ah chuan ka en ta ràn a.

"Ka thin a rim lo, duh aia thui ka lo kal țêp a ni."

"Ka tihpalh a ni, thlêm tùr che kha ka ni lo va..."

"A tâwk e, ka insùm theih loh vàng a ni e."

*******

A ni tèlin Tluangpuii ka duhna chu a zual telh telh maiin ka hria. La naupang tê si, a rilru puitling ru riau si chu ka zah a, kei hian a hnên ațang hisn zir tùr ka nei țeuh tih ka hre bawk.

Mami pawh ka hmu zauh zauh, Tluangpuii lakah ka zêp duh hek lo. Ani pawhin hmuh a châk a, Inrinni tlai khat phei chu Serkawn lama kan lèn chhoh laiin kawngah a lo kal a, chawhmeh a lei a ni maithei, min hmuh avàngin a biak loh theih loh a, in thleng kan va thlah ta nghe nghe, hmeichhe pahnih chu an titi dùn nasa khawp mai.

"A fel ka ti."

Haw kawngah chuan a ti chhuak hliai a. A ngawih ran ran reng avàngin ka be buai duh lo a ni a, amah zâwk a rawn țawng chhuah tâkah chuan kei chuan," Mahse, a tluk lo chein ka hria," ka lo ti fiamthu a.

"Chuan, a melh dàn che kha ka lo chîk reng a, a la duh chiang che tih ka hre thei mai."

"I va hre thei bîk!"

"Ka tifiam lo, hmeichhia ka nih ve tho hi."

Zànah chuan ka inkhâwm bànah inah ka haw lawk a, Mami chuan min rawn phone a.

"Vawiin avàng khân ka lâwm e. Chuan, in nu kha a chhe lo reuh, a fel bawk."

"Ka lâwm e, nang pawh fel a ti tho che a nia."

A nui hak a," A la naupan hmel kher mai," a ti a, ka thawmhnaw hâk lai chu hlîpin sweat shirt ka inthawlh a.

"Upa hran lo."

"Kan inngaihzawn țan lai hun ang vêl tho kha a ni maw? Duhsakna ka hlàn che u."

"Ka lâwm e."

Zanin chu tlêm ka lem hlek, ka tih lohna a rei tawh bawk a, țawng tinuamtu atân ka duh chauh a ni. Inkhâwm bàn a ni tho tawh bawk a, a sual tampui lo tùrah ngai ang.

Tluangpuii ina ka va luh chuan Pu Chhuana a lo țhu kur tawh! A inkhâwm bâng a lo châng a ni ngei ngei ang, ina ka haw leh rih kher kher chu ka inngei khawp mai!

Awm ve miah lo ang maiin a la titi zui, awmhmunah thinrim ru zetin ka lo insawh leh nasa!

"Thawhlehni khian Delhi-ah ka kal dâwn asin, eng nge ka lo hawn ang che?" a ti sûrh sûrh a.

"A, eng mah hawn ka ngai lo, eng nge i tih dâwn a?"

"Hna lam thilah a nia. Ka rei vak lo ang, i duh chu sawi la? Țhi, bengbeh, ngûn, kawr, pheikhawk, bag..i duh duh a ni mai," a la ti zui deuh deuh.

Tluangpuii ka melh a, ani lah chuan min melh duh miah lo. Mi dang bulah hian min melh ngai lo, ka bialnu a ni tih an hriat a hlau a niang! A bialpa ka ni tih hriattîr a duh lo pawh a ni thei tho.

A lêng rei phian. Dik tak chuan a mitmeng hi ka ngaithei lo. A hur hmel ka ti a, bâkah, fanu enin a en ka ti ve hek lo, a rûkin a ngaizâwng ka ti tlat.

A haw hnuah chuan," A melh dàn che hi țha ka ti lo," ka ti chhuak phawng a.

"Engtin maw?"

"A melh dàn che hi a hrisêl lo."

A nui ta hak hak a.

"Nui ringawt suh, fanu enin a en lo che," ka ti leh a.

"Chutin puh chhe ringawt suh, pa anga ka en a nia, min ngainain min duhsak ve alawm," a ti a.

"Thil dik lo deuh chu a awm tho ang," ka la ti țâlh a.

Min rawn en vang vang a.

"I hriat chian hmain mi puh chhe ringawt suh," a ti ta charh a.

"I țan hle mai."

Maktih hmel deuh hian min en a," Eng maw? U Pui, eng thil nge i sawi?" a ti hluai a.

Ka sawi laklawh tawh, ka sawi zo ang.

"Kha pa kha kei chuan ka ring hlawl lo, a melh dàn che kha a dik bawk hek lo," ka ti ve ta khawl a.

"Duhtâwk teh ang, thil ni lo lo i ngaihtuah a nih kha."

"A ngaizâwng che a ni lo maw?"

"U Pui!!!"

Zanin chu ka dik lo vêl vek. Thîkna nasa tak vàng a ni ngei ang, kan inngaihzàwn hmaa a kawp nia an sawi vàng khân thîkna ka nei sa tawh bawk atin ni.

*THINRIM LAI BER PAWHA INSÛM THEITE HI MI VÀNNEI AN NI, THINRIM A REH HNUAH LÀWMNA TAM TAK AN CHHAR CHHUAK ȚHÌN*

☆LTK☆ - 24 By Dingdi Pachuau

Tlêm ka lem sek vàng khân ka rilrua ka lo vei leh ka thîk êm êm țhin hetia a țan tlat mai hian ka rilru a tina tlat. Normal takin awm ni ila chuan hetiang hi ka ni kher lo maithei, tunah hi chuan ka pawmzam mai thei tlat lo.

"A dik tiraw?"

"U Pui!!!"

"Kan nih hma ațang tawha i kawp a ni lo'm ni? Ka sawi dik tiraw? Kha, sawi tùr pawh i hriat miah loh kha. Thu dik han sawi chhuah meuh hi chuan sawi tùr a vâng zak mai asin," ka ti leh bawrh bawrh a.

A hmai chu a sen tal mai. A hma kha chuan a vâr paw pheu kha a ni a, tunah chuan a sen vek tawh, a zak a niang. A thurûk ka phawrh chhuak ta vek si a, mak a ti viau pawh a ni maithei, sawi tùr a hriat loh dànah.

A ngawi reng mai a, kei lah chu tifuh ka inti khawp mai. Ka hmu thiam ve êm! Mipa ka ni a, ka mipatpui chezia leh hawiher ațang hian a duh chu ka hre ve thei miau alawm.

Rei fê ngawi renga kan awm hnu chuan," Eng emaw tal sawi la? In inngaizâwng lo a nih chuan in inngaizâwng lo tih te pawh," ka ti a, a ngawih reng chuan nuam ka ti fahran bîk hauh lo.

"Sawi tùr ka hre lo."

A awka chhuak chu a dang daih. A thinrim a nih loh pawhin a insûm nasa hle a nih ka ring, bâkah, a chang falh mai. Kan inhriatna a lo rei ve tawh a, hetiang aw chhuak hi ka hriat vawi khatna a ni.

"I thin a rim a ni maw?"

Min chhâng lo. Min en hek lo, ngîl âtin a țhu a, a kut erawh ka hmu thei lo.

Ka tho ta thuai a," Min chhàn duh bawk si loh chuan ka haw mai ang e," ka ti a, keimah zâwk chu ka thin a rim țûn mai. Thu dik ka sawi chhuak a, chu chu a thinrimpui a nih chuan a thu thu le.

Min thlah tùrin min en lo va, a tho hek lo. Țawngkam țha pawhin min thlah lo, 'Mangțha' tih takngial pawh ka hlawh lo! Ka va tlâwm ngawih ngawih ve!

In ka thlen veleh ka room-ah ka inkalh khum sauh sauh a, ka thil dah țhat chu phawrh chhuak lehin ka in ta mial mial. Rùi hnâpa eng mah ngaihtuah thei lova awm ka duh, Tluangpuii leh kha Officer-pa kha theihnghilh hmak ka duh ber mai. A ngaihzâwng ni lo se khatiang khawp khân ka țawng kha a ngai haw lo ang, bâkah, 'Kan inngaizâwng lo' pawh a tih ngam miah loh kha.

Kha pa liau luau kha, ka va haw tak! Nupui fanau nei reng chunga nula, a fanu rual zet a han kawp duh mai hi, a tenawm ka ti. A nupui leh fate a ngaihtuah lo êm mai, nupui nei ve ta ila ngaihzâwng dang ka neihsan hauh lo ang.

Ka hnek bur châk!

*******

TLUANGPUII

~~~~~~~~~~

Zankhuain chhìn khat tê pawh ka chhîng lo. A thil sawi khân min tina lutuk! Engtin nge khatiang khân min puh theih le? Ani hi chu mi danglam bîkah ka lo ngai a, mi min sawina leh min puh chhiatna zawng zawngte hi engah mah a lo ngai lo emaw ka lo ti a; mahse, ani pawh hi mi dang ang tho a lo ni.

Engtin nge Pa Chhuana hian min ngaizâwng anga a ngaih theih? Hrehawm ka ti, ka rilru a tina lutuk ringawt. Anni chhûng leh U Teite chhûng bâk hi Lungleiah chhûngte ka nei lo asin, ka u Rsate chhûng an ni leh tawp a, anni lah ka la pawh lo ropui bawk si.

Pa anga ka neihchhun hian min ngaizâwng ang maw? Inkawp angte khân min sawi a!! Lalpa leh! Ka â thei takngial dáwn, engtin nge khatiang rilru kha a put theih? Mi a puh chhiat bâkah Pa Chhuana pawh a ring chhe lutuk. Hre phei se, engtin nge niang? A hria ang tih a hlauhawm zâwk.

Ka lu ka thing nawk nawk. Ka ngaihtuah nasa lutuk a, ka lu na ngut ngut chu a puak keh thei dâwnin ka hria, maimichhîngin ka chal chu ka hmet nawk nawk a. Khatiang thu râpthlâk kha chu hriat nawn leh ka duh tawh lo. Pa chhuana nèna inngaihzàwn maw? Ka nui hawk, kan inngaizâwng lo lutuk a, ka nuih a za zâwk! Sawi tùr min tihre lo hial a nih kha.

Ngaihzâwng vawi khat mah la nei lo hian ka pa rual zet, chutah pawh nupui neia fa nei tawh ka ngaizâwng ang maw?!! Huh, min hmu hniam ngawih ngawih a ni, hei bâka inhmuh hniamna a awm leh thei tawh lo ang.

Peih lo deuh chuan khum ațangin ka tho a, eirawng ka bâwl peih lo. Coffee ka insiam a, chhang ka hmeh leh tawp. Rilru tihthawven nân vawiin chu U Teite ka tlawh teh ang, ina awm chuan ka ngaihtuah loh tùr túr ka ngaihtuah palh ang.

Peih lo chung chungin ka inkhâwm. Ka phûr lo lutuk, inkhâwmnaah ka hmu ngei àwm si a, chu chu ka duh loh ber a ni. Khatiang țawngkam a neih hnu khân hmuh ka hreh ngawih ngawih tawh, ka zak a, ka thin a rim tho bawk. Min ring chhe lutuk kha mak ka ti a, khatianga min puh kha ka ring ngai miah lo asin. Min ring tùr a ni asin, ka rin ang tluk zet hian min rin ka ring ve a nia; mahse...

Inkhâwmnaah chuan ka hawi kual eih lo. Hmusit taka min lo en tùr ka ngaihtuah lo thei lo va, thu sawitu thu sawi pawh ka ngaihtuah hlei thei lo, ka tukkhum lah chu a hit mup mup reng lehnghâl a.

Bàn veleh ka hâw nghâl. A inkhâwm em tih ka hre lo va, ka melh hek lo. Min zui ka hlau ni pawhin ka hre lo nain ka hmanhmawh a, ka thawmhnaw inthlâkin lêng tùrin ka chhuak ta nghâl.

U Tei pawh a lo zia tawh lutuk. A inkhâwm lo va, mi dang chu inkhâwmin an lo bâng fel vek tawh a, chhùn thingpui pawh an lo in tawh bawk a.

U Tei nèn chuan kan inkàwm deuh reng a, a bulah chuan ka rilru pawh a thawveng deuh. Ka thil ngaihtuah chu a bulah tihlan loh hrâm hrâm ka tum a, ani pawh chuan a hre kherin ka ring lo.

Ka phone a rawn rì a, U Puia a nih ka ring a, ngaihdam min dîl dâwn a ni maithei. Phûr zetin ka phone chu ka phawrh chhuak a, min rawn call-tu hming ka hmuh chuan ka down rawih mai.

"Aw, eng nge ni ta, pate?"

"Bawihi, thil țha deuh mai ka hmuhsak che a nia, naktûkah rawn phei ta che, i buai viau loh chuan?" a rawn ti a, a aw chhuak chu a phùr hmel viau.

"Pate, eng thil nge ni ta? Pasal tùr min hmuhsak em ni?" nui chung hian ka ti a, U Tei pawh chu a lo nui ve a.

"Pasal tùr maw? Aw, ka hmuhsak tawh che alawm, innghahna tlâk tak a ni," tiin a nui ve a, chutah," Tak tak chuan, hna chungchâng a nia, i lo phei hunah kan sawi chiang dâwn nia,"a ti leh ta a.

"Aw le, vawiinah pawh tih tùr ka nei hlei nem, ka lo phei mai ang."

"Ni lo ve, Bawihi, sunday chuan ni lul lo ve, kan ngaihtuah lutuk palh ang che, naktûkah ti zâwk rawh."

Heta zàn hun hman leh pawh chu ka huphurh tawh asin le, ka muhìl leh thei pawhin ka ring chuang lo. Thinrimna, zahna leh enhniamna lak ațang hian tlàn bo ka duh. Min hmuh theih lohnaah, dâwta min puh theih lohnaah leh min diriam phâk lohnaah awm ka duh.

Nilêngin ka lêng. Ka tih dàn țhin a ni miah lo, U Teite nupa lah chuan chaw ei tùrin min sâwm chhên a, chaw ka ei a nih chuan zànah ka inkhâwm hmanin ka ring si lo; mahse, hma takah chaw chu kan ei ta hlauh. Chaw ei khama hmun ka tihfelpui hnuah ka haw ta chauh, inkhâwm ka duh si a.

Inkhâwm chu ka peih lo kher mai; mahse, mipa pakhat vàng maiin ka țhulh thiang lo, a thuhrimin a hma pawhin mi enhniam leh hmuhsit ka ni reng reng a, ka tuar zel tho a nih kha. Tunah, mi pakhatin min țawng khum leh deuh a, la na viau tùr ka ni em ni? A hma pawhin ka tuar thei a, tunah pawh ka tuar thei leh ang chu.

Mahse, tuna mi hi chu a dang êm a ni. Ka duh êm êm leh ka rin êm êm a ni si a, ka bula awm tam ber leh hlim taka hun ka hmanpui ber a ni bawk. Ka rin anga min ring zo ve lo hi nâ ka ti ber, 'inngaihzàwnnaah chuan inrin tawnna a awm loh chuan thui a kal theih loh' an tih kha a dik ngawt ang, tunah pawh min tina chu a nih tawh hi. Hetiang hrim chuan thui tak chu kan kal dùn lo tawp ang, hetia kan awm pawh hi a țha zâwk a ni ang e, nakina na lutuka min siam hmaa hetia lo nat lâwk hian ka na lutuk lo zâwk maithei si a.

Inkhâwm ka nin ber țum a ni àwm e.

Bànah chuan ka lêng ta bîk lo. Mi dang titipui tùr neih loh chu thil țha lo ka ngaihtuah ngut ngut zel si a, tihtùr dap ka duh.

Ka phone chu ka la chhuak a, ka u Rsa chanchin inziahna chu ka zawng leh chhin a. Rei fê ka zawn hnuah ka hmu ve ta, ka mutna chu ka siam rem sauh sauh a, chapter khatna ațang chuan ka chhiar nghâl ta par par a.

Ngaihnawm ka ti phian mai a, ka rilru zawng zawngin ka chhiar bawk a, a chângin ka mittui a lo tla ve a, a chângin ka nui bawk. U Rsa tawrh nasatzia chu ka hre thei ta, min lo nêl vak lo leh min lo làwm huam lo pawh kha ka hre thiam ta kuar kuar mai. A tân chuan pawm ka har dâwn lutuk, ka nuin a chunga a thil tihte, a pain a tih dàn zawng zawngte chuan ka rilru a tihnatpui takzet, kei ai mahin a lo tuar nasa ka ti. A rilru zawng zawng an tihchhiatsak vek hial ang chu, chutih kâra kei ka lo inrawlh ve chuan a nunhlui zawng zawng kha a hriat chhuah phah leh ngei dâwn, a tân zawng pawm ka har dâwn lutuk.

"Ka u, i awm dàn tùr chu ka va hre thiam tawh tehlul em! Tunah chuan ka hre thiam lutuk tawh che. Ka thiam lo tawh lo che, min pawm lo pawh ni la ka dem miah lo che; mahse, kei chuan nang lo chu unau ka nei lo va, ka chhûng neihchhun i ni tho. I nih ang angin, ka u i nihna angin ka hmangaih tho tho ang che," tiin ka phun sap sap a.

Ka chhiar zawh meuh chuan zîng lam dâr 2:30 a ri tawh! Ka mut pawh a chhuak chuang lo. Tunah chuan ka u chanchin ka hre chiang tawh a, min làwm huam lo mah se keimah zâwk hian pawh ka tum ang, zawng chhuaktu ka ni alâwm le. Ka innghahna neihchhun U Puia lahin ka rilru a tina tawh si a, ka u lo hi chu innghahna ka nei tawh lo a nih hi.

Ka chhîng ve sek a niang, dâr 6-ah ka tho a, ka inhnawh puar hnuah muangchângin Aizawl phei tùr chuan ka insiam ta nghâl a.

*******

He nu tak hi chu aw!!!

Ka biak loh chuan min biak a tum hauh lo nia. Inkhâwm bànah biak hman lohin a hâw nghâl, biak a duh lo a ni ngei ang. Nizàn khân a thinrim viauna tùrin eng thil vak ka sawi loh kha, ka thîk a, ka thîkthu ka tilang a ni ve mai a, engah nge a lâk thutak chiam ni?

Call ka tum thut thut a, ka țhulh leh. Engtiziaa hetia awm tlat nge a nih? Ka lakah a thinrim a nih chuan min hrilh mai se, thil hriat fiah loh a awm chuan sawi fiah mai se, hetia awm hi a duh zâwk a niang.

Mahse, kei chuan ka ngai. A titi siam siam leh a țawng barh barh te kha a hmuhnawmin ngaihthlâk a nuam ka ti, hetia min be duh lo leh min melh duh hauh lova a kal awh awh hian ka thinlung a tina.

A chhan chu amahah hian ka lo innghat lutuk tawh tlat a ni. Ka ring a, ka hmangaih hmasa ber pawh ka hnâwl tawh a ni a, ka rin lutuk vàngin ka lo ring sual ve duai tho a lo ni. Ka thil sawi kha ka sawi dik lo a nih chuan a sawi fiah ka ring a, sawi fiah miah lovin sawi tùr a hriat loh thu chiah kha a sawi tlat a, rinhlelh loh theih pawh a ni lo. Mipa dang pawh ni se an ni ve thoin ka ring, nge ka senior tawh lutuk a, ka lo dik lo zâwk?

Zànah inkhâwm lovin room-ah ka awm. Min hmu lo der tlat leh hmanhmawh lutuka biak hlauva a kal daih kha hmuh ka duh tawh lo, natna hrik hlauhawm kai ang maia min țih leh min kalsan châk kha hmuh leh ka duh tawh lo.

Ka in leh mial mial a, amah vànga in ka ni lo. Ka duh vànga in ka ni, ani chuan tel vena pakhat mah a nei hauh lo.

Ka phone a rawn ri a, ka room banga sana chu ka en a, dâr 8:30 a ni tawh. Tu nge min rawn phone ang le? Amah a ni thei ang em? Engati nge min rawn phone le?

"Hello? LTK?"

"Hello? Pui, eng nge i tih a? Inkhâwm i bâng tawh em?"

Hei chu Mami aw a ni!! Engtizia nge ani hian min rawn chhàn daih a?

"LTK i ni nange?"

"Tu nge chu chu? Puia, i ni tiraw?"

"Ni e, engati nge min rawn call a?" Ka sehchilh nak mai, ka in tam ve deuh tawh bawk a ni.

"I ngaihawm êm a. Min rawn call i tum bawk si lo va," tiin a nui har har a.

"Tum loh pawh a awm lo."

"Rawn lêng leh ula? Bâkah, i va kâi àwm ve a? I aw lah chu, a sexy tawp a nia aw."

Ka nui hawk.

"Ka kâi ngai em ni?"

"Hai chiai a ni maw?"

"Mai mai a, i dam țha tawh a nih kha."

Kan inbiak zawh hnu rei vak loah chuan sofa-ah chuan ka let tawp a, ka muhìl deuh nghâl a niang, engmah ka hre tawh lo.

A tûk niléngin ka lu a rit. Mahni inhremna dik tak a ni, chìn tam chi loh khawp mai, a tuartu mi dang an ni lo, keimah tho ka ni.

A thinrim rei ta phian mai. A la naupang reuh a, a la na ve viau a nih dâwn hi. Hetianga kan awm hi ka ring ngai miah lo a nia, thu dik hriat chhuah vat a ngai a ni.

A number chu hmet chhuakin ka call a, 'switched off' a ti leh tawh. He nu hi a phone battery a țha lo em ni le? A switch off reng mai a, biakpawh theih pawh a ni lo.

A in luah lamah ka pêng haw a; a tukverh a inhawng lo. Bâkah, parda pawh a inzâr vek, a la haw lo a niang.

A number chu ka hmet chhuak leh a, ka call pawhin a ngai tho, biakpawh a duh loh vàng a ni ngei ang chu. A hmeichhia zâwkin a cho phawt chuan kei mipa zâwk hian ka call dûk dûk tùr a ni lo, a cho a nih chuan kei pawhin ka cho ang chu; mahse, insawi fiahna erawh ka phût. Ka dik loh chuan ngaihdam pawh ka dîl hreh hauh lo, thu dik lova inpuh chu a na tih ka hre ve tho.

A reh vang vang a, a in luahah ka pêng haw ziah; mahse, thehmeh ang mai a ni, a reh vang vang. Ani hi Aizawl lamah a phei a nih ka ring ta, min pheisan ta a ni ngei mai.

Hun chu a kal dàn ngai rengin a kal chho zêl a, ka hlimna neihchhun a bo leh tâkah chuan zàna lem deuh pap pap ka chîng chho ta tlat. Hmuh tùr a awm lo va, biak theih lahin a awm hek lo. Ka thil sawi holam tak (ka tân chuan a holam maithei a, ani tân a lo holam lo viau thei bawk a) kha a ngai thutak hle si a, khami zàn khân lem sek lo ila hetiang hun hi kan tawng kher ang em? Ka lem sek avànga ka thil sawi kha a dik lo viau em ni? Hetianga tlàn bona tham tùr em ni a lo nih?

Ka ngai, ka ngai takzet. Zànah ka mumangah ka hmu ziah a, min be ngai hauh lo. Mumangah lehzel pawh min be duh lo chu a nia.

Ka mal leh ta ngawih ngawih mai!

*******

"Spiderman!!!?"

Min kotu mipa naupang lam chu ka hawi vat a, nui sêng hian hlim hmel zet hian a lo țhen sâng a, a ha a lo bal a nih hi.

"Hi, Mp, i lo dam em? Inhmuh a va khât ve!!"

A nu nèn an lo ni a, restaurant piah chiah dàwr ațangin an lo chhuak a, kei ka chàwl ve tùr ka lût dâwn tihah min rawn hmu a ni.

"Khawiah nge ànî kha? Kan inah khân in lo kal dùn sia? Ka va hmu ve lo ve?!"

Ànî. Tluangpuii a sawina a ni ngei ang. Hetiang hian a u fapain a ko tih hria se Tluangpuii chu a lâwm àwm mang e!

"Ànî maw?" ka ti nawn leh ngat a.

"Aw, ànî, hmel țha deuh kha. Kan ina in lo kal lai khân ka lo kal lang duh lo va, âpa nèn khân thil sawi tùr an ngah sia. Spiderman, ânî chu kan inah rawn kalpui leh la? Chuan, birthday kha kan làwm leh ang a?" a ti leh a.

"Aw le, tehrêng mai."

A nu Dîtei chuan," Mp, Lungleia a rawn phei theih veleh Spiderman chuan a rawn hruai vat mai ang," tiin Mpa chu a bia a, chutah min rawn enin," Tluangpuii accident kha i hria ang chu tiraw?" a ti ta sap a.

Accident! Engtin? Engvàng nge? Ka hre hauh lo.

"A accident...maw!!?" Mak ka tihzia ka thup hauh lo.

"A țhian ber i ni sia, i hriat daih tawh ka lo ring asin. Scooty a khalh kha Truck nèn an intâi palh alawm."

Lalpa leh! Hei chu chanchin țha lo tak a ni.

"A na em?" Ka hlauthãwng khawp mai.

"A mal ruh a tliak a,a nunna tán erawh a hlauhthawnawm loh a ni àwm e. Damdawi inah a awm, ni hnih lai a liam tawh. Rsa pawh a phei nghâl a, a nau chungah nèlawm lo viau mah se a chunga thil țha lo a thlen chu a phal bîk miah lo asin, a nau, a unaunu a ni miau si a," a ti leh barh barh a.

Lalpa, a chungah thil țha lo thlentîr lul suh ang che.

*I LAK AȚANGA KAL BO A DUH CHUAN KALTÎR RAWH, I TA TÙR A NI LO TIHNA A NI MAI*

☆LTK☆ - 25 By Dingdi Pachuau

Biakpawh ka tum nasa hle a; mahse, ka be thei ngai lo. A phone a tinung duh lo pawh a ni maithei, damdawi ina a awm chuan a kawl lo thei tho bawk.

Hetia kan awm chhan hi ka ngaihtuah neuh neuh a, khami zàna ka lem sek vàng kha a ni tih ka hria. Țha tê têa thil sawi fel theih a nih lai khân keimah kha ka pàwr tlat a ni, kha pa kha ka lo thîk ve tumhrang bawk si a, bâkah, tûn thleng pawh hian a mitmeng ațang khân ka thil sawi kha a dik ka la ring reng tho.

Eng pawh ni se, a lo phei hunah vawi khat na na na chu sawipui ka tum ang, a theih ngang loh chuan sawi theih ka nei tawh lo ang.

Biak ina ka inkhâwmnaah a tân hial ka țawngțai ve ta. A damna tùrin ka dîl, a dam lo ang tih ka hlau. Ka țawngțai ve pawh hian ka tân ka dîl ngai lo, lawmthu ka sawi tawp țhìn, ka chhûngte tân pawh ka dìlsak ngai lo. Mi sual țawngțaina a chhâng țhìn an tih țhin tho kha maw, sual viau mah ila min chhàn ka ring, thil ka dîl khât êm mai.

Hun chu a kal muang ka ti takzet. Lo haw phei tawh se ka ti, a chanchin zawh tùr ka hre dèr si lo. Zànah ka chhuah khàt phah a, ina ka awm lah chuan ka nu chuan min melh hruk hruk duh chauh a, min be siam siam khât khawp mai.

Thil ka hre chhuak ta, Tluangpui'U Tei' kha biakpawh a ngai a ni, anni kha chhûngte anga a neih an ni a, an inbe pawp rengin ka ring.

Ka tho thut a, chhuak tùr chuan ka insiam a, va zâwt ta ringawt ila an lo hre kher bîk ang em? Ka va tibuai mai mai zâwk lo ang maw? An lo hriat ve loh phei chuan ka va țhâwng dawt zâwk lo'ng maw?

Min hriat tawh avàngin min lo welcome țha viau. Tei chu eng nge a an zêl tihte chu ka zâwt hmasa luam phawt a, a hnuah a point-ah ka lût ta chat.

An lo hre tawh. Damdawi in ațangin a chhuak tawh tih thlengin an lo hre vek, a bialpa zâwka an ngaih hian eng mah ka hre ve zâwk si lo.

"Lo phei thuai a tum nghe nghe, kan mamawhte pawh min rawn zâwt nual a."

Lo phei leh chu a tum ngei e. Chu chuan min tilâwm viau mai, a lo phei a nih hrim chuan titipuina hun ka nei ngei ngei ang.

"A number-ah ka call tlang thei lo va, number dang a hmang emaw ni ka ti a," ka ti a.

"Aw, a sim kha a chhia a, a accident-naah khân a phone a tikeh darh vek alawm. Min rawn be hmasa lo phei se chuan keini pawhin kan hre miah lo ang," Tei chuan a ti sap sap a.

Min rawn be ve lo ngei mai a. Chuti a nih chuan a la thinrim reng tihna. Biak chu duh viau mah ila a rawn phei dâwn tho chuan a țha e, ka be ngei ang.

He nu tê hi a luhlul zêk reuh a nih àwm hi, lo phei teh se, tu nge luhlul zâwk chu kan hria ang chu!

*******

"Puia, i dam țha em?"

Ka inher vat a, Afaki ka hmachhawn nghâl.

"Aw, dam țha e, eng nge i tih ve a?" ka ti lêt vat.

Kan ințhen, ni lo, ka țhen hnu khân ka hmu ngai ta lo. Tunah hian chiang takin ka hmu ve chauh, tlêmin a chêr deuhin ka hria.

"Ka pa damdawi tùr ka ensak a, i nu leh pate an țha maw?" a ti leh a.

A fel țhìn thlap thlap a nia.

"Aw, țha e. I pa chu a damlo em ni a?"

"Dam e, a nerve lam a sawisêl ve deuh hlek a, na viau phei chu a ni lo."

"A va zia lo ve!"

"Hei hian kan jection ang a, a zia mai ang chu," tiin polythene duma a khai damdawi ni àwm tak chu a lek kâng zauh a.

"Nia, zia ang," ka ti phawt a, chutah," Nangmah i dam țha maw?" ka ti leh a.

"Dam țha e, ka lâwm e," tiin a nui sak a, chutah a thil khai chu enin," Ka'n kal tawh ang e, ka be khawtlai rei tawh êm mai che," a ti ta a.

"A țha alawm, i pa chu lo dam mawlh teh se."

A kal chu ka thlîr zui reng lo, a khawngaihthlâk reuh ka ti. Min duh ve êm êm a, tunah pawh khân min be hmasatu a ni taknain min en țha ngam lo chu a nih kha, a fel ngaiin a la fel reng. Hmangaihtu dik tak tawngin hlim takin a hun hmang chho se ka duhsak hle a ni. Kei hi chu a tân chuan ka hniam mah mah, phùr chânga lem mai thei ka la ni zui. Ka tla vang vang, ka hmangaih loh vànga țhen ka ni zâwk nain min țhen vang vang tùr zâwk a ni.

Dàwr chhûng lama ka luh chuan Mamawii chuan," I bialnu em ni?" a lo ti vat a.

"A hlui zâwk."

"'A hlui' ti ti lo hian nei nghet la, nupui neih zâi rêl tawh ta che. I fate'n ka fate chu an ngam lo dâwn chiang si a," tiin a nui hak hak a.

A fapa Eddie-a pawmsak pah chuan," Ka âwl thei zâwk alawm, hei min chhawr țangkàizia hi en ta che," ka ti ve thung a.

"Ni ve tho; mahse, unaunu ka nei châk ve tawh a."

Eddie-a chu ka làwm a," I nu hi a phakar ve sia tiraw? Unaunu neih a châk tawh vàng ringawtin i putea hi nupui min neihtîr a duh a nih chu! Mak thei e tiraw?" ka ti a.

"Putea senior deuh a neih ka duhpui lo alawm."

An in thleng ka thlah. Inentîr tùrin ka hruai a, ka thlah leh bawk, min chhawr țangkai ve asin. Nupui neiin pa chu ni ve tawh ila chuan hetiang hian min pùr ngam dâwn hlei nem.

U Zova chuan," I hman remchâng hlauh chu a tihzia ngawt mai, a ute pahnih awmin kei lah chu ka buai tâwk êm êm mai si a, tlangvâl reng rih mai teh," a lo ti thung a.

U Mamawii nèn chuan kan inen a, kan nui ringawt.

*******

Kawng ațang chuan a in chu ka thlîr chho a, a êng vang tawh. Parda a zàr phèna a thla pawh ka hmu e. Niminah a rawn phei tawh tih ka hria a, nizàn khân lèn nghâl vut vut ka duh lo a ni. A patea emaw tu emaw takin a rawn thlah àwm si a, mi awm laia lèn chuan eng mah ka sawipui thei dâwn si lo. A la thinrim ngeiin ka ring a; mahse, biak chu ka tum tho.

Car chu a rem laiah ka hûng fel phawt a, a inah chuan tu pawh lo lêng mah se ka lût ve tho ang.

Kawngkhàr chu ka kik karh karh a, vawi 2 ka kik hnuah chuan ka nghâk deuh vang vang rih a.

Thâwm a awm miah lo, a reh vang vang.

He nu hi a awm chiang si a, engati nge min chhàn duh loh le? Zàn a rei tawh pawh a la ni si lo.

Ka kik leh a, ka nghah hnuah pawh min chhâng chuang lo.

"Tluangpui, lo hawng teh."

Awmzia a awm chuang lo. Thâwm a awm lo va, min chhâng hek lo.

"I awm tih ka hria a nia, inbia ang."

Ka țawng ring ngam bîk lo. Thlang lamah dàwr tê a la inhawng a, kawngah lah mihring an la vei zauh zauh bawk.

Min chhàn loh vàng chuan," Min biak duh loh pawhin ka be duh che a nia, ka țawng i hre thei tiraw?" ka ti leh a.

Lungtum biak ang chauh a ni!

Min chhàn loh avànga beidawng tùrah min ngai a niang, ka rilru a hre lo hle mai.

"Kawngka sîrah hian thil ka dah a nia, i la dâwn nia."

Ka chhuk leh rih a, motor-ah chuan ka zu țhu rèn ráwn rih a, a in lam chu ka thlîr chho reng tho a.

Dârkâr chanve ka țhut hnuah pawh kawngkhàr chu a hawng miah lo nia! Rin aiin a tawh a khirh reuh dâwn tlat; mahse, tu nge tawhkhirh zâwk kan hria ang.

Zanin atân chuan a rawn hawng dâwn lo. Chuvàngin, heta awma nghah ringawt chi a ni lo va, ka inkhalh haw ta rih a.

Tei kha Tluangpuii number ka lo dîl duh lo chu ka inchhîr țêp, kha pawh ka induhtâwkna vàng a nia; mahse, nei pawh ni ila ka call a chhâng duh chuang lo ang.

A tûk zànah tha tharin ka kal leh; mahse, a ngai tê tho. Min chhâng lo va, min chhàwn hek lo. A luhlulna hi ka làwm reuh tawp, thinrimah ka la thei lo, a inhmeh reuh ka ti.

Nizàna ka thil dah, pangpâr bâwr kha chu hmuh tùr a awm tawh lo. A paih nge a la lût nge pawh ka hre lo, engtin pawhin ti mah se a hmuh chuan a tâwk ka ti tho tho.

Heti khawpa a luhlulna hian ka luhlulna a kài tho ve tlat! Tu nge luhlul rei zâwk ang? Tlàwmah ka la tlat a, a luhlul peih chhûng chu min luhlul khum se, kei pawhin ka tih dan ngai tê hian ka tibuai reng tho ang. Ka luhlul chen hi a luhlul peihin ka ring hauh lo.

Hmaichhanah hmu lo mah ila parda chhanah ka hmu tawh a, a bâi deuh. A ke kha a la dam chiang vak hman dâwn si lo va, chêt a khirh ve maithei a ni.

Chuvàng chu a ni maithei, inkhâwm pawh a rawn inkhâwm lo. Motor-a hruaitu chu awm se chuan a inkhâwm thei mahna.

"Rawn hawng teh, luhlul tlat lo la?"

Slipper ri thlep thlep ri ka hria a, a rawn hawng dâwn a ni ngei ang.

A rawn hawng lo nasa! A kalh hmiah zâwk maw le!

"Inbia ang, rawn hawng la?"

"Kal mai teh!"

Min chhâng ta! Hma ka sâwn ta hlek e. Min chhâng ve ta alawm, a luhlulna step khatin a hnìam ta e.

"Inbiak ka duh alawm."

A reh leh ta hmiah.

Min chhàn ve ațanga zan thumna chiahah chuan min rawn chhâng leh.

"Ka hawng dâwn lo, haw rawh," tiin.

"Min hawnsak hma chu ka hâw dáwn lo," ka ti ve ta tlat a.

A thâwm reh hmiah mah se ka chechàng hauh lo. Kawngkhàr bulah chuan ka ding reng a, zanin hi zan sàwmna a ni tawh. Ka be ngei tawh tùr a ni, min hawn lo a nih pawhin naktûk zîngah tal a rawn hawng ngei ang!

Dârkâr khat a liam a, ka che sawn chuang lo. Khua a vâwt lo va, boruak a nuam tâwk chauhin ka hre lehnghâl a, a kawng hawn hun nghah chhuah pawh a huphurhawm lutuk lo e.

A pên ri thlep thlep chu ka hria a, min rawn hawnsak pawh ka ring chuang lo; mahse, haw ka tum chuang lo.

Dâr 9 a ri a, dâr 10 a ri leh a, kawng thlang lam dàwr tê pawh an khâr tawh. Mi veivâk pawh an awm tawh mang lo va, a châng zeuha tlangvâl kal bâk hmuh tùr an awm tawh lo.

Dâr 10:10-ah chiah ka phone a rawn nghawr dat a. Peih lo zet chuan ka en a, number ringawt ațangin message ka dawng!

*Hâw rawh*

Tluangpuii a ni! Ka number zawng a lo hriat khawp hi maw, min phone duh lo vêl a niah!

Nui sak chung hian ka call ta vat.

A phone ri chu ka hria; mahse, a hmet tàwp vat. Min biak chu a la duh lo hle mai maw.

Mahse, duh lo mah se ka luhlulna a rawn kaih thawh tawh miau avàngin ani aiin ka luhlul thei tih ka hre chiang a, ka call nawn leh vat.

Min chhâng chuang lo.

Ka call chhên mai, min chhàn hma chu ka call ang.

A tàwpah chuan a ning ta deuh nge, a tlâwm ta zâwk," Hâw rawh, zàn a rei tawh a nia," a rawn ti ta a.

Ka Halelui tuar lo chauh a ni!

"Inbia ang. Inbiak chauh a ni mai."

A hmet tàwp leh ta daih. He nu tak hi chu aw, ka thin hi rim țûn se ka va ti tak!

A ri rak a, ka rin loh deuhin kawngkhàr chu a rawn hawng ta mai!

"Eng nge sawi tùr awm?"

A khàr leh hmain ka lût vat. Ka luhlulna chuan a ngêng a chhun ve ta alawm, ka khi suk a. Luhlul hian țhat vena deuh a nei asin, ka luhlul vàngin kan inbe thei dâwn si a.

Ngun zetin ka en reng a, a invèn vàngin tiang a la hawl a nih ka ring. Tiang tel lo pawhin a kal thei lutuk tawh ang; mahse, fîmkhur hi a țha rêng a ni.

"I ke chu a na viau em?"

Min melh ralh ringawt. Țawng tum hmel pawh a pu lo, a hmui a chîp hmak mai a, a ti che eih lo.

"I chunga thil thleng kha pawi ka ti khawp mai. I țha chho zêl a, a làwmawm."

A țawng chuang lo. Luhlulliani mai mai hi!

"Kan inkâr hi engtin nge awm se i tih? Ka thil sawi kha i lâk nat viau chuan thil awmzia dik tak sawi ve la, thu dik lo a ni tihte tal pawh, i sawi loh chuan engtin nge thu dik ka hriat theih ang?"

Amah dem tel deuh, dem lutuk si lo chuan ka ti a, a hriat thiam tho ka ring.

"Sawi sual ka nei a nih chuan ngaihdam ka dîl nghâl e; mahse, thu dik chu hriat ve ka phû lo em ni?"

A ngawi reng tho.

"Min be duh chuang lo maw? Min chhàn dâwn loh chuan hetah hian ka riak ve mai ang."

A meng phar deuh hlek chu ka hmu hman. A rûkin ka nui suk, min chhâng duh lo vei a nih kha.

Long chair-ah chuan ka mu thla ta nghâl a, ka pheikhawk bun lai chu ka tlawh phelh nghâl bawk a.

"Mangțha mut tui le."

Ka inhersan hmak mai a, a rûk erawh chuan ka nuih a za ngang mai.

"I riak thei lo ang."

Ka chhâng tawh bîk lo, zàn sàwm ka nghâk tawh a, tunah chuan ka hun a ni ve tawh.

"Mawh, i riak thei lo ang, hâw rawh."

Ka maimichhîng a, muhìl ang chiahin ka awm. Ka ngaihven duh lo der, hre lo ang hmiahin ka awm ve. Ka thiam ve tho.

"Muhìl der lo teh, hâw tawh rawh, police ka call mai ang?"

Police. Han call teh se, buai tùr chu amah bawk.

Ka che lo, ka awm ngai rengin ka awm.

"U Pui, hâw tawh rawh, khawngaihin?"

Ka meng a, țhu chhuak nghâlin," Ngaihdam ka dîl tawh che a, kan inkâr hi engtin nge awm se tih i duh sawi phawt la ka hâw ang. Tàwp tak tak se i duh chuan ka chelh lui dâwn lo che, thu dik erawh min hrilh ve ka phût tho bawk," ka ti ve ta a.

A ngawi ràn a, en pawh min en lo.

"I sawi hma chu ka hâw dâwn lo a nia."

Minute hnih hnu vêlah chuan zàwi sap hian," Ka ngaizâwng lo," a ti ta sap a.

"In inkawp hauh lo maw?" ka ti leh țâlh a.

"Ka patea țhianpa, nupui fanau nei tawh hi ka kawp ang maw? Min ngai hniam hle mai."

A țawng zàwi sapah chuan a rilru a nâ tih ka hre thei.

"Mi sawi dàn-"

"Mi sawia i buai chhûng chuan kan inkárah eng mah a awm thei lo ang," a lo ti vat a.

"A tìrah khân min hrilh mai rêng ta che." Thiam ka la inchantîr ve ngar ngar.

"I danglam bîkah ka ngai che alawm."

Mut hmunah chuan a thil sawi chu ka ngaihtuah char char. Mite aia danglam bîkah min ngai a nih chu, kei eng mah ni lo leh mite aia chungchuanna nei hauh lo hi danglam bîkah min ngai. Min ngai special tihna a nih chu.

Chutiang taka danglam chuan min hmu a ni si a, kei lah chuan mite sawi ang thovin hmaihmaah ka țawng khum kha a ni si a, nâ a tih dan tùr leh a zah dàn tùr kha ka lo ngaihtuah phâk miah lo.

Ni lo, a rilru nat tùr leh zah tùr lam kha ka ngaihtuah phâk lo mai ni lovin ka lo deusawh vêl kha a ni a, ka bialnu ni reng chung si khân ka lo ring zo lo a lo ni. Inrin tâwkna tel lo chuan engtin nge kan inkâr chu a fel theih tehlul ang? Ani chuan min ring tâwk a, khatiang ka sawi chhuah kha a ring pha miah dâwn si lo va, râpthlâk a ti ngawt ang.

Ka thaw hawk a, min rinna ka tihchhiatsak vek ngei ang. Ani ang la naupang, a thil tawnte hre deuh vek tawh chunga khatianga ka la țawng khum kha ka tih dik loh liau liau a ni. A rilru dik tak ka lo hre phâk hauh si lo, ka kut chu ka hûm ngawt ngawt a.

Kan inkâr hi a tàwp lo ang, ka titàwp dâwn lo. A tichhetu ka ni a, a tițhatu ka ni leh ngei ang, heti chen ka lo kal tawh a, tàwp mai tùr chuan a pamhmâi lutuk.

*KAWNG AWM TAWH LO NI A I HRIAT HUNAH ANI CHUAN KAWNG A KAWHHMUH ANG CHE*