☆LTK☆ - 26 - 31 By Dingdi Pachuau

 ☆LTK☆ - 26 - 31 By Dingdi Pachuau

A tûk zànah ka lêng chhuak lo. Hun thawl neih ka duh, ka room-ah ka tawm khar mai.

Ka pa a lo lût teh tlat a! Ka room-ah hian a lo lût khât khawp mai, tuna a rawn lût pawh hi mak ka ti, a pawimawh viau a ni ngei ang.

"Zanin chu i chhuak lo teh tlat a! Eng nge thil thleng a awm em ni?" tiin min zâwt a, ka khumah chuan a țhu a.

"Awm lo ve, ka chhuak lo mai mai."

"Inhmuh thiam lohna in nei a ni ang maw?" a ti leh a.

Min hringtupa nèna hetiang lam sawi dun kher hi chu ka zak! Bâkah, kan la sawi dùn ngai lo bawk, ka zah bâkah ngaihzâwng chungchâng kan sawi dun hi ka la ring chhin ngai miah lo!

"Nei deuh."

"Eng chungchângah nge in buai deuh a?" a ti leh ta zêl a, sawipui loh tum pawhin min zâwt zêlin ka ring.

"Mi dang lakah ka ringhlel a."

Kan ngawi dùn vang vang a, nuam ka ti fahran lo khawp mai.

"Mahse, nizànah kan sawi dùn tawh a."

"Chuan?"

"Ka tihdik loh a nia."

Khum ațang chuan a rawn tho a, ka țhutna bulah chuan rawn kalin," I tihdik loh a nih chuan a tihdik dàn i hria ang chu tiraw? Mipa i nih kha," a ti dap dap a, ka dàrah chuan a rawn bêng dap dap bawk a.

"Ka fapa i ni a, i hlimna ka duhpui che. I nu hi chu hmeichhia a nia, eng eng emaw a sawi țhìn, i hriat thiam a ngai. I nu a nia, a hmangaih vàng chein i lakah a thinrim țhìn, i tâna țha ber a duh vàng a nih hi. Tihian, a âng chiam a, a inâng lungawi leh mai țhìn, a hmangaih vàng che a nih hi."

"Kei chuan i duh ber nei tùrin ka duh che. Hmanhmawh lo la, i duha i hmangaih leh nangmah hmangaihtu che nei ngei tùrin ka duh che. Tu fanu pawh ni rawh se, eng ang hmeichhia pawh ni se, i hmangaih a nih chuan ka pawm vek. Tuna mi hi i duh riau niin ka hria a, in inkâr a buai a nih pawhin siam țhat dàn tùr i hria. Siam țha ngei bawk rawh. Inngaizâwngte inkârah chuan tihtauh leh thinrim chângte, mi dang han thîk deuhte leh thil hriat sual palh châng a awm châwk; mahse, chu chu paltlang chuan inpawhna leh induh tawnna a pung țhìn. I duh ngaizâwng lo la, i hmangaih ngei ngaihzàwn i tum dâwn nia. Ngaihzâwng neih kual dûmte hi a țha ngai lo a nia, kawp hlauh phei chu tih miah loh tùr."

Zanin zet chu, ka pa khân thu țha min va fah hnem tehlul êm! Khatiang thu kha a hnên ațangin ka ngaithla ang tih ka la ngaihtuah ngai lo, ka zah thar a, ka lâwm bawk a, ngaihtuahna min sèn tamtîr viau bawk.

Muzâl pah chuan love song zàwi tê têin ka ngaithla a, zai ka ngaithla khât hle tih ka hre chhuak bawk. College ka kal ve laite kha chuan ka ngaithla nasa ve asin aw, ka lo zaipui ve țhìn bawk.

'Rewrite the stars' ka ngaihthla fuh a, ka vawi khat ngaihthlâkna a ni chungin nalh ka ti ngang mai, ka play nawn leh ngat. Ka rilru kal ding lutuk leh ngaihtuahna kal kual nasa lutuk dan nân a țha khawp mai, hla hi lo ngaihthlâk ve fo tùr a nih hi.

Class-a ka awm laiin ka phone a lo ri a, kan thawhpui Khawngaiha'n a lo chhâng. Staff room-a ka luh chuan Sir Khawngaiha chuan," Mami'n a rawn call a, Ka lo call țha leh mai ang' a tia," a lo ti a.

"E, aw le."

A pawimawh chuan a rawn call leh mai ang chu maw. Tluangpuii pawh hi min rawn text ve tal ka ring a nia, a la thinrim reng a ni pek ang, luhlul reuh lutuk mai. Ka la 'sawngkawlawi' ang maw le.

Mami chuan a rawn call leh tak tak!

"Hello?"

"Pui, khawngaihin, rawn pêng hâw lawk la?"

Hminga chuan min lo en kur, Mami thu sawi chu a lo hre ve hial emaw ni ka ti.

"Engati maw?"

"Rawn pêng hrâm mai rawh, ka lo nghâk ang che."

Biak chhunzawm theih pawh a ni lo, a dah daih. Hmeichhia hian min zuam zo vek tawh a nih àwm hi maw, a țhenin min thinrim khum a, min be duh lo thûl. A țhen lahin an duh chen chiah sawiin min rawn call bawk a, a țhen lahin min àn khum reng bawk. Hetiang hi ka khawvél chu a nih tâk hi, an tel lo lah chuan nun a hnîm ruih a, nun a hlim mang bawk si lo.

Ka pêng hâw ta hrâm. Min ngèn ve bawk sia, tihtùr ka lo nei hran bîk bawk si lo.

Kawngkhàr ka kik a, vawi hnih bâk ka kik hman lo, a rawn hawng ta nghâl a.

Nui sâng hian," Ka lo nghâk reng tawh che a," a ti sap a, a ner pah sak sak a.

Hmana mawi ka tih țhinzia kha. A hnâr te fel rìn rèn, mawi zet si hi min chhaih pahin a ner deuh sek sek țhìn a nih kha, kan nunhlui ka hre chhuak uai uai mai.

"Eng thil nge ni ta?"

Kawng chu a khâr a, ka bânah chuan kàiin," Lo țhu phawt teh," a ti a, room lamah chuan min luhsan ta daih a.

Long chair-ah chuan ka țhu thla a, ka hawi kual ruai mai. Bangah chuan Bangalore-a a awm lai thlalâk a lo târ thar nual, ka thlalâk pawh a awm ve chiang. Thovin ka han en chiang a, hei chu ka in luaha kan lâk kha a nih hi, ka nei ve miah lo!

"Lung a tilêng reuh tiraw? A ngaihawm reuh ka tia."

Nichin lawk kha chuan puan kha a veng kha a ni a, tunah chuan kekawr bùl tê nèn a ni tawh! A ngo reuh a, a kekawrbùl sen hâk chu a inhmeh kher asin.

"Ka nei ve miah lo."

"Hei hi en la?"

Photo album lian țha angreng tak hi a rawn keng chhuak a, album cover hmuh pawh chuan lung a tilêngin ka hria. Kei chuan pakhat tê mah ka nei lo, computer-ah ka dah vek țhin.

"I en chhûngin ei tùr ka lo siam ang che."

Photo album hmuh lohna pawh a rei tawh. Ka han en thuak thuak a, kan pahniha lâk a ni deuh vek, a țhen chu ka neih miah lohte a ni hlawm.

"Khami kha i la hria em? Chennai-a weekend hmang tùra min hruai hmasak ber zàn kha."

Ka bul chêtah chuan min rawn si chêtin a rawn țhu a, ei tùr leh in tùr chu kan hma dawhkànah a lo dah tawh niin. Beer vawt deuh ngiai hi kan in nasa a, kan pahnih chauha kan awm dun phei chuan thil dang vak kan in ngai lo.

"I va rang ve!"

"Ka lo peih diam alawm."

Ei tùr ei pah chuan thlalâk chu kan en a, kan lâkna hmunte chu kan sawi pah zêl a.

"Khâng hunte kha koh kìr theih se!"

Ka va en chuan kan thlalâk chu a lo en veng veng a, a ni lah tak a, kan hlim dùn thei êm asin.

"Ko kîr thei ngat ila chuan tuna kan awm ang hi chuan kan awm hauh lo ang maw le," a ti leh sep a.

"Kan tâna țha tùr pawh a lo ni-"

"A ni lo. A ni miah lo, kan tâna țha tùr zâwk a ni thei lo," a lo ti vat a.

"Kan hma hun tùr hi kan hre lâwk lo miau a."

"Mahse, kan thlâk danglam thei alawm, khâng hunlai anga hlim khân kan awm leh thei ang," beisei nei tak hian min melh tawh.

"Ni lo, Mami. Kan duhthlanna ni miah lo mah se kan pahniha awm dun hi a rem lo a ni ang tih hi ka pawm tawh asin, induh leh inhmangaih tak takte pawh hi an innei vek kher lo a nia. Hun hlimawm tak tak an hman hnuah an ințhen ve țhin tho asin," ka ti a.

"Pui, kei chuan ka tâna Pathian ruat i nih hi ka la ring fan asin. Kan inhmuh loh chhûng zawng pawh khân kan la inhmu leh ang a, hlim takin kan la awm dùn leh ang tih ka ring țhìn," a ti sep sep a.

Ka khawngaih reuh. A chunga thil thleng kha a duh vànga thleng a ni bîk dâwn si lo, tunah phei chuan chhûngte a nei tawh lo lehnghâl. Sawi tùr a vâng, a reh tlawk tlawk mai.

Beer chu ka in khawlh khawlh a, bûr khat ka in hnuah pawh a in ve tùra a dah chu ka ban leh nghâl zat.

"Vawiin hi hmâna kan pahniha kan inhmuh tàwp ni kha a nia, kan inhmangaihna thawnthu a tàwp ni kha. Kum heti chen lo ral tawh mah se ka theihnghilh ngai lo, paih bo ka châk a, vawiin ang ni hi nuai bo daih ka duh lutuk! Ka hriat rengna hi luah tawh lo se ka va ti tak!" a ti sep sep a.

"Chutiang chuan ngaihtuah suh."

"Ka duh ber leh min hmangaihtu ka chàn țan ni a nih vàng hian paih bo ka duh."

Ka kuah lo thei lo, ka thil in khân hna a rawn thawk a ni ngei ang. Hnem ka duh, inhuatna kan nei lo va, inhmuh loh vang vang vànga ințhen kha kan ni deuh mai a, induh lohna kan nei bawk hek lo.

A lung a chhia a niang, ka âwmah chuan a khùr deuh dar dar a, a hnu deuhah chuan a rawn inhnît ta faih faih a.

"Shhh...țap lo la?" Hnem dàn pawh ka thiam chuang lo.

"Ka ngai...thei...êm che a ni."

Min kuah lêt chial si a, a vun nêm nâl hen chu ka hre chiang lutuk. Duntâwka ka lo chùl ve tawh kha a ni a, chùl a nawmzia pawh ka hria. Ka thisen a lum pap pap mai, ka thil hriat chhuah chu ka duh lo kher asin, ka ngaihtuahna lah chu thunun a har phian lehnghâl a.

Ka khabe hnuaiah chuan a rawn dâk chho a, a mittui vàngin a mithmulte chu a la hnáwng chep a, hnai set sawtah chuan," Hmán ang khân ka la thlahlel êm êm che a ni, a aia nasa mahin," a ti sap a, min kuah nghet sauh bawk a.

"Keimah vàngin țap tawh suh aw."

"Nangmah vàng hian ka țap a, ka nui bawk. Mi lungngai ber ațang hian mi hlim berah min siam thei tih ka hria," tiin ka nghâwng chu a rawn fâwp zauh a.

Ka thisen a lum zual sauh.

Nghâwng mai pawh duhtâwk lo chuan ka khabeah a fâwp leh a, chuta țang chuan ka bengkâwm lamah a fâwp leh a, kei lah chu Thlèmsama ang maiin ka lo tlu duai duai mai. Ka ngaihtuahna ka hmang thiam tawh lo va, tuna a thil tih chauh hi ka ngaihtuah chhun chu a ni.

Long chair-ah chuan kan tlu dùn ta riai riai, chhia leh țha hriatna a bo vek a, a awm ngai a ni tih pawh ka hre tawh lo!

A t-shirt hâk thâwl deuh hnak chu ka hlìm chhohsak a, ani pawh chu lo insiam remin a lu lamah ka hlihsak ta nghâl. Kan hmui chu a inchàr bet ni berin ka hria, hmeichhia ka fawh lohna a lo rei ta bawk a niang, ka duhthawh em mai.

Engmah thil dang ngaihtuah lova kan pahnih chauh kan inbuaipui lai chuan ka phone a rawn ri ta tlat! Ka tàwp chat a, ani erawh chuan tàwp a la tum lo a nih hmêl, a mal pahnih chuan min la kherh bet tlat.

Ka phone chu a ri char char nia! Hun lo lutuk mai, nge a hun viau zâwk ni? Hun lo ka ti zâwk, tu tak ni maw? Hun lo lutuk, hetiang huna min rawn call rêng rêng ni?

A tàwpah chuan kan tho ta hrâm, tlêm a tlêmah Angelho fan ve ngai loh ram kan fang țêp a ni.

"Umm?"

"I bâng tawh tiraw? Min lo hruai leh mai teh, I u Zova a hman si lo va, a theih hrâm phei chuan rawn hmanhmawh la aw, tlai deuha haw ka duh si lo va."

Lalmamawii tak hi chu aw.

"Aw, ka lo kal nghâl ang."

Mami chuan a t-shirt chu a lo ha mawlh mawlh a, a hmel chu a samin a hliah avàngin a lungawi lo nge a zak ang tih ka hre thei lo. Kei pawhin ka thawmhnaw chu ka siam țha mawlh mawlh, kan chesual teuh lutuk chu a mak!

"Ka haw mai ang, ka uin min lo nghâk reng sia."

"Aw le, engtiklai pawhin ka lo welcome reng che tih hria la aw."

Steering chu nghet lutukin ka hûm. Ka thil in vàng a ni leh pek, ka insûm thei lo lutuk hi chu, buaina ka la tâwk ngeiin ka ring. Ka thisen kha a tilum tlat a, hetiangte chuan Tluangpuii ka hmu ngam dâwn em ni? Ka lu ka thing nawk nawk.

A hun takah ka u khân min rawn phone a ni. Min rawn phone lo ta se chuan kan chesual dáwn chiang, chu chu ka hming ka hriat chian tluk zetin ka hria. Ka thaw huai. Ka u kha ka ngei lek lek a nia, ka ngei leh ta lo.

Ina haw lovin ka kal nghâl. Ka nu nèn secondhand an en duh vàng lek lo niin! Hmeichheho tak hi chuh! Pawimawh hmel deuhin min rawn call a, a ho leh hle bawk si. Hriat thiam hi an har teh e.

Luhlulliani ka ngaihtuah leh a, zanin chu ka lêng ngei ang, thil awmzia ka sawi fel vek bawk ang. Rilru ka siam fel hmak tawh, Mami inah khân ka pêng tawh lo ang. Luhlulliani nèn kan inkâr a fel dâwn chauh a, ka tihnawk leh țêp a nih kha. Ka pêng tawh lo ang.

Ka va thlen lai chuan kha pa kha a lo țhu leh kur tawh a nih chu!

Thîkna meipui a rawn alh leh nghâl. Luhlulliani chuan min en mang lo chuan lût tùr chuan min sâwm a, ka lût khawp ang, tlêm chuan vawiin lama ka awm dàn vàngin ka inthiam lo kha a ni a, tunah erawh chuan a bo daih. Ka thîk tih hre rengin ani pawhin inlêngah he pa hi a lo nei ve tho.

Pu Chhuana chuan min be ve teh tlat! Ngei mahnâklaiin, ka chhâng lo țêp a ni.

Luhlulliani chuan in tùr min rawn pe a, a tiang pawh a hawl duh ta lo vêl a nih hi. He pa bulah hian a hawl duh lo va, ka bulah kha chuan min hlap hrep nâna hmang duh àwm tak khán a chelh reng a nih kha.

Aniin ngaizâwng lo mah se he pa hi chuan a duh ve chiang alawm. Ka hre thei tlat a ni, a mitmeng leh a cheziaah ka hre thei ve tlat. Tunah hian zâwt ta chiah ila, lie detector awm bawk ta se, thu dik chu a lang chiang ngawtin ka ring.

Ka phone khawih pah chuan a chezia chu ka chîk ru reng. Vawi khat chu Luhlulliani nèn chuan kan mit a intawng sak a, rum zet hian min en phawt a, a hnuah a hawi sawn chauh. Ka maimichhîng sawk, ka kut ka hûm ruh țeuh bawk.

"I dam zêl ang a, engtikah emaw kan inah chaw pawh i rawn ei leh ang chu tiraw? I lo ei khât tawh êm mai, hun remchâng hmasa berah ka rawn sâwm ang che."

"Nia, ka rawn ei ang."

Ka lo insehruh țeuh. He nu tê hian min tihthinrim dàn chu a hre takzet a ni, a châk dâwn lo lutuk hi a ni ringawt. He pa haw hnuah hian ka duh chu ka ti ve ang, ani bâi seih seih hian min hnial hauh lo ang.

Ka thil ngaihtuah vàng chuan ka nui ta suk a, min hnial thei hauh lo ang. Ka dang chêp dâwn alawm.

A haw hnuah chuan ngawi reng hian ka hlatna ber chair-ah chuan a țhu a, min biak pawh a tum chuang lo.

"Nuam i ti hle mai."

"I ngaihruatna a nih chu."

Min chhâng ve mai chu mak ka ti a, ka nui lo thei lo.

"I duh tâwkin nui rawh!"

A thinrim hmel chuan ka nuih a tiza reuh tlat. A inhmeh lo reuh ka ti dâwn nge a inhmeh lutuk zâwk, a thinrim tûm hmuiah tak sâwn a nia ka seh châk ni.

"Engati nge i thin a la rim reng a?"

"Hlimna tùr ka hre lo."

"I bialpa a lo lêng chung pawhin maw?"

Tiang kha chu hawl se chuan min rawn vaw țhuaiin ka ring. Rum zetin min rawn melh a,"Hâw rawh," a ti ta ringawt a.

"I thinrim chhûng chu ka hâw dâwn lo."

"A nih tak chu!"

"Ni e, chhin chiah ila?" tiin ka țhu țha sauh sauh a.

"Hâw tùrin ka duh che."

"I duh tak tak lo!"

"Ka mu duh tawh a nia."

"Mu ila?"

Rum zeta min melh hian a thaw hawk a,"Nula dang ina lènna tùr i hre àwm lo hi ka ti a ni," a ti leh a.

Min tihthinrim chu a tum ve a ni maithei a ni.

"I awm reng laia nula dang sawite chu," tiin ka chhaih pah zêl a.

"Kei pawhin i awm laiin pa inlêng ka nei ve tho."

Ka thin a tisa zak mai.

"Sawi tawh suh!"

"Engah nge i thinrim ringawt? Ka kawp-"

"Sawi...tawh suh!" A țhutna ka thleng phei nghâl a, a bânah nghet zetin ka hmer nghâl tlat. Ka insehruh tlat a, nuam chu a ti vak lo maithei.

"A na...a nia!"

"Kha pa kha, sawi tawh miah suh."

A mittui a tling kawl kawl mai, ka hmer na thawkhat a niang,"Min thlah teh, a na a nia,"a ti leh sap a.

Muangchângin ka thlah, ka thlah rual chiah chuan a mittui chu a far ta zâih a, a kut chuan a bân ka hmerna chu a chûl nghâl vat a.

Ka inthiam lo leh nghâl zat. Kha pa a sawi chhuah vàng khân ka thinrim khân khua ka lo hmu lo a ni, tunah hian ka duh tak chu a mittui ka titla leh ta si a, ka tinâ a nih hi.

"A na viau em?"

"Aw," a ti țiau a, 'na lo' tih pawh a tum chuang hauh lo, a nungchang tê hi ka lawm tlat.

"Ka lo en chhin."

A phal lo chuang lo. Ka hmerna chu a lo sen raih a, a duk hialin ka ring, a vun no takah chuan a lang chiang kher lehnghâl a.

"Ka tihpalh, ka thin a rim thut a," tin ka chùlsak hoh hoh a.

"Ka kawp lo ka tih tawh kha."

"Aw, ka hria. Sawi tawh lo teh ang," ka lo ti vat a.

"Engtin nge ka kawp duh theia i rin rêng rêng ni? Pawmlai nei lehnghâl, tlangvâl hmelțha leh fel nang ka neih lai lehnghâlin-"

A țawng chu ka titàwp chat. Sawi duah ngai ka ti lo, a kawp lo tih a sawi a, a tâwk tawh viau. Thil hi sawi sawi chuan buaina a tam mai mai, țawng lova cheziaa sawi mai hi ka duh zâwk.

A biang tawn tawnah chuan ka vuan a, duhthawh zetin ka fâwp bawrh bawrh. Dîm taka fawh pawh ka duh laiin ka duhthawhna chuan min tur nasa tawh lutuk.

"U Pui..."

"Shh..."

Țawng hi ka duh lo, buaina a titam ka tih tawh kha. Kan induhna hi chu chezia hian lantîr ila țawngkamah kan inbât lo nge nge.

"...ka ngai lutuk che a..."

Hrâm hrâm tak chuan.

"Min ngai ni la, min rawn call ve ang chu!" Keia pawh chu aw, a va țûl lo tak!

"Ka thin a ur ve alawm."

"A nih tunah?"

"Ka hlim tawh."

A hmui pawrh târhah chuan ka fawhsak leh. Nia, a hlim tih chu a mitmeng ațangin a hriat theih tawh, a de sar tawh a ni.

*MI FAMKIM NIH TUM LO LA, MI TAK TAK NIH TUM ZÂWK RAWH*

☆LTK☆ - 27 By Dingdi Pachuau

Dedicated to EUNIK c.h.i.k.k.i

A hnu deuhah chuan," Ka hmai hi phih ka duh a ni," ka ti chhuak ta hlawl a.

"Engah maw? A balh loh hi," a lo ti a, a kutzungchal chuan ka hmai chu a zût kual riak riak a.

"I mit tui leh hnap tui kha..."

A ner sak a," Va sual tak! Min tih țah vàng a nih kha," a ti sep a, meng khup deuh lap chuan a kut chu a la sawn nghâl bawk a.

Min en thei tùr chuan a khabeah chuan ka dawm kâng a," Ka tițap tawh miah lo ang che, ka ti tak tak," ka ti a, a kut chu lâksakin ka lungphu zâwnah chuan ka nghat a.

"Ka lung a phut dat dat chhûng chuan ka kalsan lo ang che, ka hlimna chu nangmah chauh i ni si a."

"Ka lâwm e," ti sapin ka khabeah chuan a fâwp zoh a, keiin a chalah ka fawhsak ve thung a.

A accident dàn chu ka zâwt a, ani lah chuan zêp nei hauh lo hian," Nangmah ang deuh ka hmu a, i ni emaw ka ti nghe nghe a, ka scooty khalh lai pawh ka lo ngaihtuah lo a ni," a ti ta heu mai!

"Khalh tawh miah suh."

"Nula pakhat a kuah a. Nangmah emaw ka tih vàngin ka â vek, i ni lo tiraw?" a ti leh a.

A hnar piaisak zoh pah chuan," Ni mai mai lo, Aizawlah ka rawn phei lo hrim hrim alawm," ka lo ti a.

"I ni emaw ka ti tlat a."

"A nih, i mal chu ka en ve i phal em?"

"Ka kekawr hi hlih a ngai dâwn asin."

"A lum bawk sia, hlîp mai la?"

Room lamah chuan a bâi phei a, bâi lutuk chu a ni tawh lo va; mahse, a la ring ngam vak lo.

A rawn chhuah chuan kekawrbùl tâwi tiu teu hi a rawn ha chhuak a, mak ka ti reuh lutuk a, ka lo en tlawk tlawk mai.

A mal dinglam a lo ni a, a lang khuar deuh a, a ser pawh a lian khawp mai; mahse, chûng ai chuan a mal ngo zet, mûm nalh zet si chuan ka mit a la zâwk!

"A va mawi ve!"

Mak tih hmel zet hian min en há a," Eng chu maw!?" tiin, a ngaihna a hriat loh hmel kher mai.

"I mal kha maw le!"

"A mak thei! A tliahna lai i en duh emaw ka ti!" a ti a.

"I mal ka en i phal leh phal loh ka zâwt che a nih kha," nui chung hian ka ti a.

"I va sual tak! A nih, i hmu tawh bawk a, a tâwk em?" a ti nghat a.

"Tâwk lo, ka bulah chuan khatiang khân awm ziah tawh ang che."

A mal ser chu ka khawihsak a, a ruh țang mai, a na reuh ngawtin ka ring.

"A la na viau em?"

"Na hran lo ve, a zia lutuk."

"A țhat hlauh chu. Chuan, i kekawr hâk kha i inhmeh, i hâk tùra an siam chhuah liau liau ni àwm tak a ni," tiin ka fak hlak a.

"Ka lâwm e. Ka mal nat vànga patea min lei a nia."

"A nih, nangmah enkawltu doctor chu mipa nge hmeichhia?"

"Hmeichhia."

"E, a zia hlauh chu." Mipa a nih chuan Tluangpuii mal chu a khawihsak ngei ngei dâwn si a, chu chu ka duh lo!

"Eng nge?"

"Eng mah."

A u Ruatsanga chungchâng chu kan sawi chhuak a, ani pawh chu a rilru a dang viau tawh. A uin a ngaihsakzia chu min hrilh sep sep a, chutiang u fel a nei chu a làwmzia a sawi bawk a.

"I nuin i chanchin a hre ve em?"

"Hre lo ve. Champhai lamah a awmin ka hria, hre mah se a lo kal chuang lo ang," a ti sap a.

"U, ngaihsaktu che i nei tawh tho alawm tiraw?"

"Um... pateate nupa nèn pawh an inhre tawh a, chuan, heta min rawn hruai pheitu pawh a țhianpa a nia, motor erawh ka u motor a nia, inah pawh hian vawi 4 vêl chu min rawn kan leh hman tawh asin," a ti siam siam a.

"A fel ka tih tawh kha."

"Nia, ka hre tawh alawm. Chuan, nang pawh i fel, i luhlul bawk," tiin a nui hak a.

"Nang pawh," ka lo ti vat a.

"Kei aiin i luhlul fé!" uar zet hian a ti a.

"Luhlul ka chhuah mai loh chuan min be duh si lo alawm," tiin a bek samah chuan ka kut chu ka zen lût a.

"Thil țha bîk, chàn ka duh lohah chauh ka luhlul țhìn," tiin ka kûn hniam leh zat a.

Zàn riah mai pawh ka hnial lo a nia; mahse, a phal tlat lo. A phal lo chung han riah luih lah chu thil ni thei a ni bawk si lo, zàn dâr 11:55-ah ka haw! Riah a phal loh chhan ka zawh lah chuan," I nute'n an ngaihtuah ang che," zu han ti a! Mipa naupangah min ngai emaw ni.

Tunah chuan ka hlim leh ta. Ka hlim dàn hi mak ka ti a, rilru a 'nuam veng veng' a, ngaihtuah loh ka tum pawhin ka thei lo. Ka hmuh loh hlekin ka ngai a, zan khat lek ka hmuh loh pawhin hrehawm ka ti tawh. Heti khawp hian hmeichhe pakhat zùnah ka uai nâ ang tih ka ring pha miah lo; mahse, he hmeichhe pakhat hi ka tân chuan a pawimawh êm a, ka hlimna a ni a, ka ngaihtuahna zawng zawng kawltu a ni bawk.

Mami pawhin min rawn call ve reng a; mahse, hun thâwl nei tùr chuan ka pêng tawh ngai lo. Chawhmeh bazár leh hmun danga ka hmuh erawh chuan ka be reng reng tho, hun fâl neih erawh kha chu ka duh tawh lo. Ka duhzâwng a hre hneh si a, ka bialnu ka uiresan thei tlat a ni.

Tluangpuii hi a châng chuan a rilru a puitlingin kei ai pawhin a puitling zâwkin ka hria a, a châng leh a naupang chhia viau bawk. A thil lawmte hi a ho thei viau, ka lakah erawh a titau ngai miah lo thung. Min ngai rinawm lutuk nge ka hre lo, hmeichhe dang lakah thîkthu a pe chhe ve hran lo. Hmeichhe dang chungchâng ka sawipui ve pawhin a lo ngaithla mai a, thil dang sawi ve phêt a tum ngai lo. A châng leh min en vang vang pah hian," Min duh hi i inchhîr țhìn em?" a ti ringawt a, a châng leh," Kei chu heti mai hi ka ni si a, min zahpui pawh ni la ka hre thiam lutuk che," a ti leh ringawt țhìn, hetiang a sawi chhuah phei hi chuan ka khawngaih sauh a, ka duhna hi a zual sauhin ka hre țhìn.

Sunday tlaiah kan ina lêng ve tùrin ka sâwm a, ka zahpui lo a ni tih hria se ka duh. Ka nu erawh chu a lo lâwm hauh lo ang tih ka hria; mahse, he nu hi ka duh a, a bulah ka hlim a, ka zahpui hauh lo a ni tih hriattîr ka duh.

A hmel ațang chuan a lâwm tih ka hria, meng de sawr sawr chung chuan," Lênga min sàwm hi ka ring pha miah lo asin, i chhûngte chu hmuh ka châk rualin a zahthlâk dâwn bawk sia," a ti a, chutah," Min lo duh lo ang tih chu ka hlau khawp mai," inrin tâwk loh hmel fé hian a tih chhunzawm leh sap a.

"I ngaihtuah nasa lutuk a nih kha, nang bâka duhawm an awm hlei nem," tiin ka lo hnèm a, ka nu a lungawi dâwn lo tih ka hre ru kar thung. Lungawi lo dâwn mah se, a fapa hian he nula hi ka duh a ni tih hria se ka duh tho tho.

Engtin pawhin inthuam mah se pawi ka ti lo; mahse, a mah zâwkin a ngai pawimawh tlat a.

"I nu leh pate ka vawi khat hmuhna tùr a ni si a, vawi khat hmuhna ațanga an lung ka dum loh chuan a țha lo," a ti tlat, kei chuan a kekawrbùl tiu teu kha ha se ka duh daih zâwk asin!

A inuluk khawp mai, makeup erawh a hmang mang lo, simple thei ang ber leh zahawm tho si chuan a inthuam. A tiang erawh a keng lo, pheikhawk flat a bun, a ke tân a țha zâwk, a sâng ai chuan. Ka en țhìn, ka lung hi a awi êm êm mai a ni.

"I mawi!"

"Ka lâwm e."

Car-ah lûtin kan in lamah chuan kan tlân ta a, a ngawi deuh reng. A zâm a nih ka ring, a kut pahnih chu hma lamah a suih zawm a, a thaw leh hak țhìn.

Garage-ah ka tlân lût a, kan chhuah dâwnah chuan a kutah ka vawnsak a, a lo vawt thler mai.

"Zâm lutuk lo la, i bulah ka awm reng dâwn alawm," ka ti a.

Min enin a nui sak a, a thaw hawk bawk a.

A kutah chuan ka vawnsak ta reng. Kan in kan luh hnuah pawh ka la vawnsak reng, ka pain min lo hmu hmasa a, a lo ding vat.

"Uai, tute nge ni?" nui chung hian a lo ti a.

"Pa, Tluangpuii a nih hi. Tluangpui, ka pa a nia."

An inchibai dâwn avàng chauhin a kut ka vawnsak chu ka thlah. Ka pa chuan a be nghâl bawrh bawrh, a tlângnél lo ang tih a hlau chiang.

Ka nu ve thung chu a țawng miah lo. Chibai pawh chu a hreh hmel kher mai, a nui lo va, a hnu deuhah phei chuan a kal sawn ta daih.

Ka pa erawh chuan ka nu awm dàn boruak chu tihbo tumin Tluangpuii chu a be sarh sarh reng a, a nuihpui a, fiamthu a thawh bawk. Ka pa nge nge, ka lâwm takzet a ni.

"Zanriah ei ve rawh aw, i lo lèn vawi khatna a ni si a, chaw ei lo chuan i haw ka phal miah lo a nia," ka pa chuan a ti a.

Nui sâng hian min en phawt a, chutah ka pa en lehin,"Ka pu, ka lâwm takzet a ni; mahse, a pawi ka ti, ka hnial che a ngai si a," a ti a. 'Ka pu' a tih lai chuan ka lo ner deuh sak, nakinah ka hrilh fiah ang.

"Eng vàng nge tih ka zâwt lo ang che, a nih loh tal pawhin ni dangah chaw ei tùrin lo lêng rawh aw," ka pa chuan a ti leh a.

"Aw le, tehrêng mai, ka pu."

Ka room hmuhtîr ka duh vàngin ka pa bulah chuan ka sawi a, ani pawh chuan a lo hre thiam ve.

"Kal rawh u, hlim takin inkàwm ula, ei tùr ka rawn pêktîr ang che u," a ti a.

Room-a kan luh chiah chuan," Wow!! A va nuam ve! Lal fapa room ang mai a nih hi," a ti ham ham a, a hawi kual nghâl ruai a.

"Lal fapa room i hmu tawh em ni?"

"A, hmu chuang lo ve; mahse, a nih duh hmel êm a," a ti leh mai a.

Revolving chair-ah chuan a țhu chat a, naupang chhia ang maiin a che kual sek a.

"Nichina ka zàm tehlul nèn, i room-ah chuan ka free ta zak mai," tiin chair chuan a tawlh sawn a, a bân pharin," I room hi ka duhzâwng tak a ni, tukverh awm dàn leh a colour zawng zawngte, parda colour leh a fual zâwng leh zàr dàn chenin ka duh. A, engkim mai hi ka duh vek!" a ti barh barh a.

"Eng hi nge i duh ber?" tiin ka zâwt lui ngat a.

Rawn tawlh hnaiin ka kâwngah min rawn kuah chat a," Hei hi ka duh ber," a ti sap a.

A hnuah chuan veranda-ah kan chhuak a, niin min rawn chhun pha lo chiah chiah , a êng viau thung.

"Ka pa kha 'Ka pu' i tia?"

Ka kut hmet nep nep pah chuan," Ih maw, ka hre ve reng a; mahse, ka zak a..." a ti ta sap a.

"'Ka pa' ti la chuan a lâwm ngawtin ka ring."

Meng hnuai deuh raihin," Min ngei viau em?" a ti sep a.

"Ka pa i pu vàngin maw? Teuh lo mai! Héi, lo hawi teh," tiin a khabeah chuan ka lam hawi tùrin ka kuai her a.

"LTK, ka thinlung zawng zawng i neih lai hian engtin nge ka ngei theih ang che? Ka duh ber i ni. Ka ngei ngai lo ang che."

"U Pui, ka nép tiraw? I pa pawh kha a hrilhhai ngawt ang, i bialnu dangte chuan an 'pa' ngei àwm si a," a ti a.

Ka nui hawk.

"Ka nu leh pa bulah ka bialnute ka hruai khât asin. Afaki kha chu a lo lêng fo, a ko bawrh bawrh mai," ka ti phawt a," Chuan, tu mah intehkhin miah suh. Nang chu i dang hlak, inthiam lo lo la, nakinah i la ko ve bawrh bawrh mai ang," ka ti a.

"Zanriah pawh kha maw, ka zâm lutuk a, ka hnial ringawt a nih kha."

A zàm vàng vek a lo nih chu, khawngaihthlâk reuh hian a.

Kuahin a chalah ka fâwp vang vang a," I bulah ka awm reng dâwn alawm, zàmna kha paih bo daih rawh," ka ti a.

"Ka duh asin; mahse, ka thin kha a phu nasa lutuk a, a rawn sawt chhuak ang tih te kha ka hlau asin," a ti leh a.

"Ka va'n khawngaih reuh tak!!"

Ka pa ngei maiin ei tùr min rawn pe! Tluangpuii chuan a lo nuih sâng a, ka pa nèn hian innêl viau tùrin ka duh, ka nu nèn hi chuan ka beisei sâng lo. Ka pa nèn tal hi chuan inngaina teh se, kan in nuam a ti lo lutuk palh ang.

"I pa hi a ngainatawm e tiraw? Ka pa kha ka hre chhuak lo thei lo. A duat ngawt lo che maw?" tiin thei tui chu a in khalh khalh a.

"Duat ve bawk e."

"Ka pa pawhin min duat țhìn asin, la dam ve se hetiang mai mai hian ka awm bîk àwm si lo va."

"'Mai mai' tih kha hmang tawh lo hrâm rawh aw. Hna zahawm tak i zir chhuak tawh a, i nun dàn zawng zawngte hi hmu se i pa chuan a chhuang dâwn lutuk che, inngai hniam viau țhìn lo teh, ka tân chuan a 'țha ber' i ni tho tho," ka lo ti vat a.

"Ka lâwm e, i chungah hian ka lâwm takzet a ni. Ka nihna dik taka min hmutu i nih vàng hian mi danglam bîk, ka tâna mi special tak i ni rêng a ni. Nang hi chu i danglam thlâwt," uar zet titak deuh hian a ti tan tán a.

Zanriah kîl laiin ka nu chuan," Vawi khat mah rawn hruai tawh suh ang che, kan in rawn rap tùrin ka duh lo ka tih kha. Țhenawmte'n an lo hmu ang tih ka hlau lutuk, min hmuh dàn a dang vek dâwn asin," a ti nghâl bawrh bawrh a.

Ka pa chuan," Duhtak, a mak thei êm mai. Kan nunhlui chu eng pawh lo ni se kan tûn hun hi alawm pawimawh ni, thil tihsual chu kan nei vek tawh ang, chuvànga inen hniam tùr kan ni lo. Ani pawh eng emaw vàngin a lo hming mawi lo deuh tawh pawh a niang, khatiang kha a ni tawh nâng, a fel reuh êm kha," a lo ti vat a.

"Eng mah tihsual a nei lo," ka lo ti thung a.

"Mi sawi dàn i hre vek, kan hre vek. Hetiang mi laka i inham buai hi ka duh lo, ka fapa i nih hi. I nu rilru hi tina suh ang che," a ti leh a.

"Nu,i rilru ka tihnat chuan a pawi ka ti; mahse, nang pawhin tunah hian ka rilru i tina asin."

Chaw ei a har khawp mai.

"Kha nu kha ka pawm thei ngai lo ang."

A tho nghâl a, kei pawhin ka ei chhunzawm tawh bîk lo. Ka nu thil sawi vàng chuan ka chaw châkna a bo vek.

"A thinrim ve rih a nih kha, rilru hlim loh phah nân hmang suh. A la reh ve mai ang, i nu zia chu i hriat kha," ka pa chuan a lo ti a.

Ka chhâng lo.

Zanriah ei kham veleh inkhâwm tum êm êm lovin ka chhuak nghâl a, ka nu chunga ka lungawi loh êm avàng chuan inkhâwm pawh ka peih lo.

"Eu, i inkhâwm dâwn nange?!" min lo ti rêng a.

"I bula awm ka duh zâwk!"

"Hmm, naupang chhia roh mang e!" tiin min nuih a, chutah," Chaw pawh ka la ei lo, ka ei peih lo va, hawh, kan pahnihin ei ang hmiang?" tiin min sâwm nghâl a.

Inah khân ka ei mang lo, ka nu khân ka pumpui mood a ti-off vek a, ei ve leh pawh chu pawi ka ti miah lo.

Chawhmeh a siam thiam reuh phian. Inchhaih pahin kan ei a, ka ei țeuh mai.

"Zanin chu ka riak ve mai ang aw?"

Min en há tih ka hria; mahse, kei chuan ka en duh miah lo va.

"Ka khum a tê lutuk!"

"Pawi lo, ka luahpui tam dâwn lo che. Khum têa nula mutpui dàn chu ka thiam lutuk," ka tih chuan ka bânah min rawn chùm chawrh a.

"Tenawm suh aw!"

"Nuam i ti viau ang!"

A beng chu a hup a, a au ta chiam chiam a.

Eng thil nge a tih ni?!

"Sawi tawh suh! Ka ngaithla duh lo. La..lal...la...blaaahh...blahhh..."

Ka nuih a tiza reuh thei a nia.

Ka nu chungchâng pakhat tê mahin kan sawi lang lo. Hlim takin a titi siam siam reng a, ka pa a ngainat thu a sawi chhuak leh zauh bawk a. Ka nu erawh a mitmei leh chezia ațang khân a awmzia kha a man ve a ni ngei ang, mi â nilêng lo tân chuan a hai theih loh alawm.

* THU DIK CHU A TLO A, KE A NEIH MIAU AVÀNGIN A TLU RENG NGAI LO, A THO CHHUAK LEH NGE NGE ȚHÌN*

☆LTK☆ - 28 By Dingdi Pachuau

Dedicated to Muantei Hlondo

TLUANGPUII

~~~~~~~~~~

U Puia'n an ina lêng tùra min sâwm thu ka hriat tluka ka tâna thu làwmawm hi a awm khât viau ang. Min duh tih leh a thinlung ka luah thu hi chu lo dah țha ta ila, engtikah nge min hmangaih thu min hrilh ang tih erawh zawng ka hre lo, tuna ka chantâwkah hian ka la lungawi êm êm a ni.

Ka hlim a, ka zâm a, ka phûr a, ka huphurh bawk. Chutiang nawk ka nih vàng chuan ka awmphung ka hloh deuh tlat a, ka kut leh ke hmâwr a vawt vek bawk.

A pa chu ka ngaina nghâl, a țawng duh si, a va nèlawm tak! A nu ve thung erawh chuan min ngaina lo tih ka hre thei ve nghâl mai, hriat har hek lo, a hmelah a lang miau a, Pa Chhuana nupui Nu Partei ka hre chhuak zawk. Nu rilru chhe tak chu a nih ka ring hran lo. A chhan chu a rilru a thup thiam lo va a hmelah a lan chhuahtîr tlat alawm, a nihna ang anga lang chhuak mi a ni ve si a, mi sual tak chu a ni lo ang.

Mahse, ka inthlahrung nghâl tho. U Puia mitmei ka vèn vàng liau liauin hlim hmêl takin ka awm lui zêl, a pain chaw eia min han sâwm ve thung chu, ka rilru tak takin ka hlim! Mahse, a nu ka vêngthâwng, ka châk viau nain ka hnial ta ringawt.

U Puia room chu a nuam tawp, ka duh dàn takin engkim a awm. Ka têt deuh lai khân ka room-ah khân zàna pâwn lam thlìr theihna tùrin tukverh lian zet a awm țhìn a, mu pahin arsi leh thla êng ka thlîr țhìn, parda ka zâr ngai lo. Chutiang chiah chuan U Puia room-ah pawh chuan zàna pâwn lam thlìr paha mut theih tùrin a khum a hûng a, a nuam dâwn tih ka hria.

Zanriah ka ei peih lo, vawiina U Puiate ina ka thil ei khân min la tipuar reng maiin ka hria. U Puia rawn lang thut ka hmuh chuan mak ka ti, inkhâwm a tum lo tih a thawmhnaw hâk ațangin ka hre bawk, engtizia nge ni ang le?

U Puia hian eng emaw hlim lohna a nei chiang, a nu khân a hau em ni ang? Nge thil dang vàng zâwk? Inkhâwm a tum loh vàngin an hau a ni zâwk maithei.

A hlim thei ang berin ka kàwm a, a hlim lohna hi lâk bosak ka duh. A nute'n an lo hau a nih hlauh phei chuan, kan awm dun theih lai hian hlim taka siam ka duh.

Haw hi a hreh ve thei ngàng ngàng sia, ka khawngaih țhìn; mahse, ka riahtîr hlauh chuan a tihchi miah lo ang. Zanina a thil sawite kha, ka lu ka thing nak, ka ngaihtuah zâwng ringawt pawhin ka zak mai dâwn, thil a zêp lo ve si a, ka zak mawlh mawlhin ka ring.

Hman deuha phone call ka dawn kha ka hre chhuak zawk. U Puia hi hnaih lo tùrin min hrilh kha a ni a, tu nge a nih pawh ka hre miah lo; mahse, a reh leh ta vang vang a nih si hi. Min theihnghilh ve tawh a niang, U Puia nèn kan ni ta chêng a, a reh daih si.

Thawhlehni chawhma dâr 10 vêlah ka u a rawn lang leh hlawl mai. A hnathawhna thawmhnaw nèn a inthuam chu a zahawmin a mawi zaih mai, hetianga a inchei hi ka hmu zen zen lo, Aizawlah kha chuan thawmhnaw pângngai nèn chauh ka hmu țhìn a, a țawng duh viau lo nain min ngaihsak a, ka nêl lutuk tawh.

"I lang zahawm hle mai."

A nui ve suk mai.

"Ka lâwm e," a ti sup a, chutah ka ke chu en thlain," A zia viau tawh a ni maw? Tiang i hawl tawh si lo va," a ti leh sup a.

"Aw, zia tawh lutuk! Lo țhu rawh, thingpui hâng ka lo lum ang che aw," ka ti sawk sawk a.

"Tibuai lo mai rawh, tui ka lo in zâwk ang e."

Tui chu ka pe a, a in hnu chuan," Naupangin Ànitei an hmuh châk tawh thu an sawi a," a ti leh sup a.

Ànitei! Ka va duh tak! Min kohna tùr a ni tak alawm. Ànitei ka ni ve tak tak tawh dáwn!

"Kei pawhin ka hmu châk leh tawh hlawm lutuk ringawt. Tunah chuan kan innêl tak tak thei tawh ang a," ka lo ti hliai a.

"Zanriah rawn ei chho la?"

Ka thu hriat hi! Zanriah ei tùrin min sâwm ve nia! Mak ka ti lutuk!

"I hreh loh chuan," a ti leh nghut a.

"Hreh lo ve, naupangte pawh ka hmu leh thei ang a," ka lo ti vat a.

"Ka haw chhoh rualin i chho dâwn nge? Ni lo, chumi hma chuan ka dah chhohtîr ang che, naupangte nèn in inkàwm rei lo lutuk palh ang."

U Rsa hi belhchian chuan a nèlawm ka ti, ka u a nih vàng nge phei chu ka hre lo. Min ngaihsak tih hriat hi nuam ka ti, kan inhriatna la rei lo mah se min ngaihsak êm êm tawh a, a pianpui dik tak ang chiahin min en tawh niin ka hria. Kei pawhin ka pianpui u ang chiahin ka en, ka ngaisâng a, ka zah a, a bula awm nuam ka ti.

U Puia ka phone a, u Rsate ina zanriah ka ei tùr thu chu ka hrilh a.

"A nih, i lo haw thla hma ang em?" a rawn ti khauh a.

"Ka hre mai lo le, min thlah hun hunah a niang chu," ka ti a.

"Ka lo hruai zâwk ang che?"

"A tihchi loh ang, an ina zanriah ei ka ni dâwn a, min thlah an tum ngeiin ka ring."

"Zàn a va huphurhawm dâwn ve!"

Ka nui hak a, min thlâkhlelh ve vàng a ni tih ka hria a, ka lâwm viau. Zan khat lek hmuh loh pawh hi hrehawm ka ti ve tho asin, a bula awma pangchan kualte hi a nuam ve ropui si a.

"Lo hawthlâk hma hrâm ka tum ang a," ka ti a.

"Chutiang tùr chu a ni, i lo thlenthlâk har chuan ka rawn call zut dâwn che a nia, phone i bulah dah reng ang che."

Hm, intithu bawk siah!

Naupang sikul bàn hmain ka u chuan a motor chuan min hruai chhohtîr a, ka u nupui U Dîtei chuan min lo làwm thiam hle, ka u nèn an lo inbe sa vek tawh bawk a, eng mah sawi a ngai lo.

Kan hlim tlâng asin. Naupangho lah chuan min bial tiau tiau reng a," Ànite," min ti reng bawk, nuam tak a ni. Ka kal bai deuh avàng chuan a chhante min zâwt a, naupang mah ni se dik takin ka hrilh hlawm a.

Ka u lo thlen hma hretin chhûngkaw pakhat an rawn kal a, nu ber chu a lian țha ziai zuai khawp mai. A hmelțha phuk mai a, ngo hle bawk, a pasal pawh a chhe lo, a țawngkam a fel fak mai a, mi fel tak a ni ngei ang.

An fa phìr hmeichhia ve ve chuan chhun tùr an nei țha bawk a, an ngoin an duhawm takzet. A naupang zâwk nia an sawi lei tâwt țawng, țawng fiah lo lutuk chu a nuihzatthlâkin a lawmawm thlâwt, ka be reng mai.

U Rsa lo haw chuan thil dang a sawi hmain nu lian ziai zuai chu a nau a ni tih sawiin ka u tùr a nih thu a sawi a, min barakhaih khawp mai! A lawmawm bawk si. Unau pahnih ka lo nei reng a!

U Âmpuii a ni, a hming chu. A nèlawmzia chu, U Dîtei nèn lah chuan an inkàwmngeih lutuk ringawt. A țawng duh si a, a awrâwl a ring phian bawk. A pasal Mama chuan nui sâng chung hian," Kan nu hi chu, i lo hre thiam hrâm hrâm dâwn nia, țawng hi nuam a ti ve a," a ti a.

Ka ute pahnih chhûngkaw bula awm chu nuam ka ti takzet. Mi pângngai tak tak ni ve tain ka inhre hial, anni ang hian chhûngkuate ka la nei ve ang a, pasal neiin fate ka nei ve ang a, chhûngkaw inhmuhkhâwm hunte kan la nei leh ang a...

U Puia ka mitthlaah a lo lang nghâl. Ani hian min duh ve viau a, ka pasal tùr a ni ang em? Ni hlauh se, a fel si. Nupui atân min duh ang em le? Ni lo, nupui atân chuan min duh tak tak lo ang, eng mah ka ni si lo. Bâkah, a nu khân min duh dâwn lo sa chiang, an fapa neihchhun tân chuan ka tling lo chiang lutuk!

Ka lu ka thing nak, hetiang lam hi chu ngaihtuah lo teh ang. Pasal neih pawh ka la hun lo, bâkah hna ka neih ve pawh a la ngai, hetiang chuan tu nu mahin mo atân min duh tawp nâng.

Sana ka en a, a lo tlai ve ruai tawh. U Puia khân min rawn phone tùr thu kha a sawi a nih kha; mahse, min rawn phone miah lo. Lo lèn a hman leh ta lo a niang, a buai ve pawh a niang.

U Rsa chuan min thlah a, naupangte pawh chu lo kal an châk ve viau nain a pain a phal rih lo, ni dangah hun thâwlah an chhûngin ka inah an lêng ang tih a hrilh hnuah chuan hlim takin min thlah ta zâwk a, ka haw hma deuh chiah hian U Âmpuiite pawh an haw tawh.

"I țhianpa kha a lo lêng țhìn em?"

Ka en zawk a, ka hawi sawn leh vat. U Puia a sawina a ni sia, kan chungchâng hi a hria a ni ngei ngei ang.

"Aw..." ka ti ban chat a.

"Mi fel tak a niin ka hria," a ti leh sup a.

"Nia..."

Inah a awm rei lo, a haw deuh nghâl mai. A chhuah hnu chuan ka phone khawihin U Puia chu call ka tum deuh thut thut a; mahse, min rawn call loh dànah a buai a nih ka ring deuh bawk si a, a number chu ka en ka en ringawt.

A rawn ri thut chu ka phu nasa lutuk!

"Rawn call che ka tum lai takin!"

"Kawng lo hawng la?"

Phûr zetin ka hawnsak a, kan inhmu chiah chu kan inpawm chat, miin min lo hmu ang tih a hlauhawm zâwk.

"Ka ngai hman tawh teh che a nia."

"Min rawn call ka ring a," ka lo ti thung a.

"Hlim taka hun in hmang lai, i uteho nèna hun hlimawm in hmang ka rawn tihbuai te'n le! Ka lo nghâk ngar ngar che alawm," a ti a, ka kut chu a kut chuan a hûm bo hneh khawp mai.

"Min lo nghâk reng tawh maw?!!"

"Dâwn lo'm ni?"

"Kan lo thlen khân i car ka hmu miah lo," ka tih chuan," A ngaiah ka ding lo alawm," a lo ti leh mai a.

"Chuti, ka va khawngaih che! Min lo nghâk rei dâwn si!"

"A nghâktu tân chuan a rei duh ve tho; mahse, ka hmuh che hian khatiang lam kha chu ka theihnghilh vek ziah," a tih chuan duh zet hian ka nuih sak a.

"Mi felpa, ka lâwm e, ka ke a dam chian hunah ka pua ang che."

A nui hawk a.

"LTK, keiman ka paw zâwk ang che. Tihian, ltk deuh hian awm reng la ka duh a nia."

"Eng nge chu chu?"

"I chhe lo tihna!"

Ka chal chuan a chalah ka tauhsak bap a," Ka lâwm e tihna!" ka ti ve kher a.

*******

Ka hlim lutuk hi ka ngaih a țha lo lek lek țhìn. In lamah ka nuin min àn khum țhìn mah se, Tluangpuii ka hmuh hian ka nu âng chu ka theihnghilh vek zêl. A bulah ka hlim, thil dang chu ka theihnghilh vek țhìn.

Zirtàwp tlaiah naupang test paper ka check a, zànah lèn ka duh dâwn vàngin check zawh vek a ngai.

Ka whatsapp message tone a ri rak a, ka en hran lo. Chutiang chuan vawi nga vêl a rawn rîk tâkah chuan ka en ve ta chauh, Tluangpuii a nih ka ring deuh ringawt a!

Number ringawt.

Message hmasa berah video.

*Lo n ve sin th*

*Nom hmel*

*He video hyn tu emo hnên thleg ta se?*

*Luhlul myh su*

Hetiang Mizo țawng kim lova type lehnghâl, a ngaihtuahna a ril lêm loh viau dáwn hi, intichangchâng si changkang si lo. Tu tak chu ni maw? Video chu ka han play a, makti lutukin ka en reng ringawt!

Mami ina ka lèn țuma Mami nèn kan awm dàn zawng zawng kha record vek a lo ni! Sound erawh a awm lo thung.

Tu phiangsen nge ni ang le? Min rawn thawntu number chu ka call ta nghal, switched-off a ti.

He thil hi Tluangpuii'n hmu ta se, engtin nge ni ang? Ni lo, a ni thei lo ang. Tuin nge kha thil kha lo record ang le? Inah khân mi dang an lo awm ve em ni zâwk? Mami kha amah chauhin a lo awm lo em ni? Mi dang hire-in kan chêt dàn zawng zawng kha a lo record-tîr zâwk em ni, min blackmail-na tùrin?

Test paper pawh chu ka check chhunzawm ta lo. Video hlîr chu ka ngaihtuah. He thil hi tu tih nge? Mami inah khân ka kal dâwn tih a lo hre lâwk em ni? Nge he thil record-tu hian kan pahniha awm a hmuh remchàn vàngin a lo record mai mai zâwk?

Mami hian ka tàl awhna tùrin thang a lo kam reng zâwk tihna em ni? Mi dang bialnu ka nei tawh tih kha a hria a, kan inkâr tihchhiat a duh vàngin hun remchâng a melh tihna em ni? Lo record-tu nèn hian an inthurual a ni ngei ang.

Dawhkàn chu ka chùm bur a, naupang test paper chu an kâng suau mai. Ka kut pawh a na cham cham mai, tuin nge hetiang hian min vau duh ang? A mipa hi ka ni tih a hriat hle mai si a, hmeichhia lah Mami, kan inchûl kual nasa bawk si. Thâwk ka la hawk hawk.

Video chu ka en nawn leh ngat. Kan hlawhtling ta lo kha a ni a; mahse, he video-ah hian a tàwp a lang lo nain kan awm dàn en hi chuan a tàwp kan thlen loh a rinawm loh.

Tluangpuii'n hmu ta se eng angin nge a ngaih ang? Zàn a ni lo tih a lang reng mai si a, ni tin sikul ka kal ziah bawk si, rinhlelhawm tak tùr a ni. A mipa lah ka ni chiang bawk si, a hmu tùr a ni lo, a hmu thei lo ang.

Mami tih vek a ni ang. Ani khân min kawih lunglèn leh kha chu a tum chiang a, ka chungah a thinrim a ni ngei ang, hetiang thil a tiduh mai hi mak ka ti. Mi fel tak leh min hmangaihtu, kei pawhin ka hmangaih țhin a nih kha, hetiang hi ka chungah a tiduh ang maw?

Ka sam ka țham nawk nawk. Tu tih nge tih lam ai mah chuan mi dang a hmuhtîr ang em tih ka ngaihtuah a ngai, kei hi mualpho thei tak tùr ka ni. Mi dangin an hmuh hlauh chuan a țha lo dâwn lutuk tlat.

Video chu ka en nawn ka en nawn. A ngai reng tho si, mi hmuh atân chuan ka duh hlawl lo, Tluangpuii phei chu a keh chhe vek ang, min ring si. Ka rinawm lohsanah a ngai ngei ang, ka rinawm lohsan teuhzia rêng kha, ka hlauhthàwn vàngin Mami inah pawh ka kal ngai ta lo a nih réng hi.

Mi hire ta se, a room ațangin a lo record ngei ang, bang leh kawngkhar lah a phui țha vek si a, khawi ațangin nge a lo record ang? Stick hmangin maw? Video chu ka en leh a, stick hmang a ni thei lo, video record hi a che dat dat lo tlat.

Video chu play-in Mami in ka ngaihtuah kual zêl a, khawi ațanga record nge ni thei ang tih chu a in mitthla reng chung chuan ka ngaihtuah a, hei hi a in thlang lam tukverh zâwn vêl kha a ni thei ang em? A ni ngei ngei ang, room ațang chuan a ni thei lo, a fiah dàn em em hi a camera hi a țha ve tâwk tih a hriat mai bawk.

Thlang lam bathlàr kha veranda-in a kal chhuak kha a ni a, mi pawh a inah kal duh ta se, kawngkapuia lût kher lo pawhin thlang lam tukverh ațangin a luh theih tihna a nih ber chu. Khata țang khân record a nih chiah hi, tu nge ni ta ang?

Hminga khân kan inbia tih kha a hre ngei mai a, min lo en kur nghe nghe kha. Mami'n a hre leh a, Sir Khawngaiha khân a hre leh maithei bawk. Tu ber nge ni ta ang? Min vau ngam tùr leh hetiang record lo nei thlap ta hi tu nge?

*SUM LEH PAI, MIPAT HMEICHHIATNA LAMAH FÎMKHUR RAWH, SER A LANG REI DUH BÎK*

☆LTK☆ - 29 By Dingdi Pachuau

Min hre chiangtu chu a ni ngei ang, ka phone number a hre chat mai a nia. A dp-ah thlalâk a awm lo va, ka call tlang thei hek lo. A message-a 'tu emaw' a tih pawh hi Tluangpuii a ni ngei ang, min hre chiangtu tak a ni ngei tùr a ni.

Eng nge a tân hlâwkna tùr niang? Pawisa a duh em ni? Duh ni ta se, engati nge a phone a switched off tlat si?

Hm, min vau ve khanglâng a nih hi. He video hian Tluangpuii hnên a thleng ang tih ka hlau ber, ka rinawm lohsanah a ngai ngei ngei dâwn, kan hlim ve leh țan chauh si a, kan boruak a tichhe ngei ang.

Zanriah ei kham veleh ka chhuak nghâl. Dik tak chuan kan boruak a chhiat hma hian Tluangpuii hmuh vat a, video hi hmuhtîr mai ka duh. A chhan chu mi dang hnên ațanga a hmuh chuan buaina a nasa zâwk ang tih ka hlau. Mami nèn kan chanchin ka hrilh vek tawh kha a ni a, hmuh pawh kan hmuh dun tawh kha. Mi â a ni bîk lo va, Mami hian min la duh reng tih a hre ve tho. Chuvàng tak chuan min rinhlelh tak tak hmain video hi hmuh ila, thil awmzia sawiin ka hrilh fiah vek ang a, min hre thiam thei zâwk ang.

Mahse, a va huphurhawm si ve!!! Mipa mah ni ila, bialnu bula bialnu hlui nèna kan chêt dàn han hmuhtîr dâwn chu, a lum up up mai ka ti.

Mahse, ka hmuhtîr ngei a ngai. Kan inkâr chhe leh tùr hian ka duh tawh lo, ani hi ka chân thei lo ang.

Min lo hre thiam duh lo thei tho bawk; mahse, chu rilru chu ka paih bo vat, a negative lam zâwngin ka ngaihtuah tùr a ni lo, thil pawimawh, hmanhmawhthlâk lutuk a nih hi.

A dàn ngai tein min lo làwm, zanin phei chu zan dang zawng aiin ka hmu nalh zual. Makeup a tâwk chiahin a hmang reuh a, t-shirt dum, chhîng tai mai leh kekawrbùl sen, chhîng tiu teu deuh mai kha a ha bawk. Keimah vàng liau liaua hetianga inthuam hi a a ni tih nui chung hian a sawi sap. Ka tih tùr chu huphurhawm hle lo se chuan ka va hlim dâwn tak!

Ka tih dik loh, ka tihsual liau liau a hmaah inpuangin ka chezia ka hmuh dáwn a ni a, huphurhawm tak ni mah se chàn hlen ai chuan ka ti ngei ang.

"Thil hmuh tùr che ka nei a," tiin thâwk ka la hawk a.

"Gift maw?!! Ka hmu châk tawh!!!"

Ka rilru a va hre lo tak em! Ani a hlimin a phûr si, kei lah ka thlan dup dup lo chauh a ni si.

A kutah chelhin," Ka tih ngei ngai a ni a," ka ti a, chutah," Ka hmuh phawt ang che; mahse, i rin ang a ni lo a nia aw," ka ti leh a, a kut chu thlahin ka phone chu ka phawrh chhuak ta nghál a.

Video a en lai chu ka lo thlîr reng. A hmelah chuan eng mah a tilang miah lo, a hmui a chîp a, a en zawh pawhin a kâ a âng miah lo.

"I hmuh kha thil ni tak tak a ni a; mahse, kan hlawhtling miah lo a nia aw. Insawi thiam ka tum lo; mahse, mi dang hnên ațanga i hmuh hmasak ka duh loh vàngin ka hmuh che a ni," tiin thil awm dàn chu ka sawi ta vek a.

Ka sawi laiin a lo inrawlh lo va, a ngawi reng mai. A che sawn lo va, min en hek lo. A țhut dàn ngaiin a țhu reng, ka ngaih a tițha lo.

"Eng emaw tal sawi teh! Mi rinawm lo tak ka ni tih leh, lêrh leh hurherh tak ka ni tih te pawh."

"Sawi tùr ka hre lo!"

Mauh mai a! Hei hi a ni ka duh loh. Sawi tùr a neih loh chuan a buaithlâk êm kha, a hma pawhin ka hriat tawh kha.

"Tluangpui, Mami nèn khán a tàwp kan thleng miah lo aw, beer ka in khân min tidik lo zo vek a ni."

"He thil hi eng vàngin nge min hmuh?"

"Mi dang hnên ațanga i hmuh ka duh lo va, chuvànga hmuh che ka ni," ka ti leh a.

A țawng leh tâk loh avàngin kan ngawi leh ta reng mai. Sawi tùr a vâng, sawi tùr hre țeuh mah ila a țawng duh loh chuan țawng bîk nih a nuam miah lo.

"Hetiang video hi nei ve ta ila-"

"Ni lo, i nei lo ang. A theih loh, ka phal miah lo!" ka lo ti vat a.

A nui hul hak, a za lo kher mai.

Thinrim angin lang lo mah se, chhûngrilah chuan a rim thoin ka ring. Kei ni ve ta ila, ani hian hetiang video hi nei ve ta se chuan ka thin a rim dâwn lutuk! Ka thin a rim lutuk ang a, khua ka hmu lo hialin ka ring!

A rilru tùr chu ka hre thiam ta uar uar. A chan hi ka chana ka dah ve phawt loh chuan a rilru awm dan tùr hi hriat a lo har a, tunah chuan ka hre thiam ve ta, hrehawm a ti viau ang. A thin a rim ang a, phatsan niin a inngai bawk ang.

"Thiamthu sawi tùr ka hre lo; mahse, ka tân nang tluka hlû an awm lo, tu hmeichhia mahin ka thinlunga i dinhmun hi an luah thei lo ang," ka ti sap sap a.

Ka rilru tak takin ka sawi a ni. Ani hi chàn ka duh lo, chân tùr ang leh a tel lova hun hmang tùr angin ka inchan chhin a, ka hmalam hun a thim vekin ka hria.

Ka inthiam lo ngawih ngawih, rilru na takin ka siam si a. Engtin nge a rilru nâ hi ka thâwi damsak tâk ang? Min àn khum bawrh bawrh se, min kêk nawk nawk se, min chùm nawk nawk se a rilru nâ a chhâwk thei deuh mahna. A rilru a nat chuan kei pawhin nuam ka ti rêng rêng si lo, ka thil tih rah chhuah vek a ni bawk si.

A hma aiin ka ngaihsak ta sawt. Ka thu sawi zawng zawngte dâwt a ni lo tih hria se ka duh, ani aia pawimawh ka tân an awm lo tih hriattîr ka duh a, ka nunah a pawimawh hluah hluah tih hriattîr ka duh.

Tlaiah sikul bàn veleh hawin a in ka pan nghâl vat ziah. A țan tìr lamah chuan a la thinrim ve deuh rih bawk a, min be țha duh lo; mahse, ka beidawng duh lo va, pèn ka țhulh hek lo. A châng chuan a lo awm lo va, a châng leh kawngka min hawn duh lo thùl. A thinrimna ka hriat thiam tlat avàng leh ka thiam loh a nih tlat avàngin ka thinrim lêt ve thiang lo va, dawhthei takin a thinrim reh hun ka nghâk char char.

Video min rawn thawntu khân message dang min rawn thawn leh tawh lo. Ka call apiangin switched off a ti ziah, chhui ka tum hran lo. Ka nun ka uluk a ngai tih ka hre chhuak tawh a, chuvàngin khatiang hun remchâng kha a hmu tawh miah lo ang.

Hmingate'n naute an nei a, Tluangpuii chu enpuiah ka sâwm ve ngial a, a duh tlat lo. Mi zîngah leh ka țhiante bulah ka zahpui lo tih lantîr ka duh a; mahse, a thinrim kha a la reh lo nge ni, min hnial tlat.

Ka nuin," I țhianpa ber pawhin nupui neiin fa a nei tawh, engtikah nge neih ve i tum? Kha nu erawh kha chu neih i tum ka ring lo, ka duh bawk hek lo," a tih hlaih hlaih chuan ka rilru a tâwt țûn mai.

"Ka la nei ve ang chu!"

"Kha nu kha chu nei lul suh ang che. Nimin piah phei chu kan țhenawmnu sâwn kan ina i rawn hruai kha a lo hmu niin, zahthlâk lutuk! Mi pângngai tam tak awm laia ani ber kher-"

"Nu, duhtâwk teh!" ka ti țhawt a.

"Min vìn elo? Nangmah hringtunu hi min vìn maw?!! Lalpa leh! Kha ramhuainu khán a hruai â vek tawh che a nih hi, a zial â vek tawh che. Ka va khawngaihthlâk tak em!"

A țawng ka hre tawh lo, ka room kawngkhàr chu ka khâr țhuai a, Tluangpuii'n naute ena kal ve a duh lo bawk nèn, ka thinlung a tâwt. Tunah tak hi chuan tihthinrim belh chi ka ni tawh lo, ka puak keh mai ang.

Ka nu hian ka duh êm êm hi min pawmpui ve thei dâwn tlat lo, a sawi zing malh malh ta. Thinlung luhlul tak nei a ni a, chu chu kei hian ka chhùn a ni. Luhlul ve ve intàwng chu, boruak a rit asin.

Mami'n min la rawn call zui, thinrim nâklaiin. Ka hmet tàwp hmak, ka bialnu a ni tawh lo. Ka bialnu hlui a ni a, tunah hi chuan ka nunah rawn inrawlhna tùr a nei tawh lo.

Message a rawn thleng leh zat. Ka en lo ang, block nghe nghe ila a țha ang chu maw le.

*******

TLUANGPUII

~~~~~~~~~~

Kan inkâr a pângngai ve dâwn chauh a, a video min entîr khân min tihnual leh vek. Ka thin a rim a, tih vak ngaihna ka hre chuang lo. Biak țhat duh lohah ka tlâk a, a châng leh a rawn pèn haw ziah avàngin inah ka awm duh lo thùl.

Mahse, a thil tihah hian beidawn a tum miah lo. Lo pèn a țhulh chuang lo va, ka biak țhat duh loh pawhin a țhu ve char char mai. Upa ve viau tawh mah se naupang chhia ang maia khawsak châng a nei a, min duh ve takzet zet niin ka hre leh bawk.

Video kha mi dang hnên ațangin ka dawng ve nawlh. U Puia ka hrilh hran lo, tu nge min rawn thawntu pawh ka hre lo. U Puia khân min hmuh hmasa lo se chuan ka thin a rim khawp ang, țhen pawh ka țhen hialin ka ring. Kha kha a lo hre lâwk a niang, min hmuh thlap kha.

Aizawla phei leh rih pawh ka duh viau a; mahse, U Puia pheisan ringawt chu thil țha ber a ni lo. Ka thinrim avànga phei ringawt chu a fuh lo, kan ințhen tak tak a nih hlauh chuan, hrehawm ka ti dâwn lutuk asin, a hmaa kan intih thinrim pawhin hrehawm ka tih êm kha.

Naute thar enpuiah min sâwm, a țhianpa Hminga fa a ni àwm e. Ka châk lutuk; mahse, ani pawh khân min nêl lovin min thinhrik viau a nih kha, khatiang bulah khân U Puia hi ka kalpui duh lo. Hmuhsitna thu chu ka dawng thei ang, ka tuar thei bawk ang; mahse, keimah vànga U Puia deusawha a awm ve zêl tùr chu ka ngai ngam lo tawp ang.

Phone call ka dawng nawlh mai. A hmaa mipa min rawn phone-tu aw kha ang ka ti deuh; mahse, number hran a ni si. U Puia hnaih lo tùrin min ti, chu zawng chu, a off leh hmak!

Rei vak lo hnuahU Puia nu call ka dawng nawlh mai! A insawi lêm lo nain a thu sawi dàn ațang chuan amah lo tu nge ni ang? A fapa laka inthiar fihlìm vat turin min ti, a sawi zawng zawng phei chu ka hre chhuak vek ngam tawh lo, min rawn call a ni tih U Puia bula sawi miah lo tùrin min la ti zui! Engtin nge ka hrilh ngam tehlul ang? A nuin min rawn call a, a lak ațanga inthiar fihlîm tùrin min hrilh ka ti dâwn em ni?

Teuh lo lutuk! Ka zak ngawih ngawih asin, engtin nge ka hrilh ngam ang? Țah zawih zawih ka duh; mahse, ka țap lo ang, mi chak lo zia a ni si.

Mi chhûngkua ka tibuai. U Puia pawh a rilru a lo hah țhìn ngawt ang chu, a nuin kei min duh si lo va, keimah vàngin hau leh àn khum a lo tuar nasa ngawt ang. Ka bulah erawh eng mah tilang lovin hlim tak hmel puin a awm thei reng si, kei lahin ka lo be țha duh lo zui bawk a.

Ka țhen mai dâwn em ni ang? Țhen tùr anga ka suangtuah chuan ka mittui a rawn parawl nghâl kuang kuang, U Puia hi ka ngainain ka lo duh takzet tawh a ni, a tel lova hun hman chu, ka suangtuah ngam lo.

Ka vei tawn sek, ka rilru a hah. Ka țhen thei lo ang, ani hi ka hlimna ber a ni si a.

Phone a rawn rì a, U Puia nu kha a ni leh ang tih ka hlau ngawih ngawih, tîm tak chuan ka phone chu ka en a, k patea hming ka hmuh chuan ka thaw huai.

"Bawihi, tunah chuan i dam viau tawhin i chàwl hahdam rei tawh bawk a, i hna țan ve tawh la. Tûn thla erawh chu hahchawlh nân han hmang zo tê tê leh phawt la, thla tharah join ve tawh rawh aw," a rawn ti dap dap a.

Nia, ka dam tawh, ka ke pawh a pângngai ve tawh viau.

"Aw le, pate. Ka lo tum dâwn nia," rilru dang ka put hmain ka ti ve tawp. Patea hian min buaipui nasa si a, tihbeidawn ka duh tawh lo.

"Good girl! Ngaihtuah i ngai lo tih hre tho mah ila, hna țha tak nei la ka duh vàng a nia, thla tharah i join theih chuan thlamuang takin ka awm ve thei tawh ang," nui chung hian a rawn ti leh a.

A fanu ang tak taka min en vàngin hna țha chu min duhsak ngei ang chu. Ngaihtuah ngai lo min ti taknain min ngaihtuah ém êm reng, nutei pawh a bãng chuang lo. Ka tâna an hlut dàn hi teh theih a ni lul lo ang, hei vàng tak hian patea thu hnial hi ka hreh țhìn.

Tlaiah chuan a rawn pêng haw leh. A lo luh chuan țawng lovin ngun takin a hmel chu ka lo en kar a, a nu thu sawi leh patea thu sawi kha ka hre chhuak rual ve ve a.

"...inthiar fihlîm ang che..."

"...i hna țan ve tawh la..."

Ka inthiar fihlim theihna tùr ber chu a bul hnaia awm tam loh, hna zawm chu a ni. Lungleiah ka awm thei lo ang a, ka hmu ngai dâwn lo tihna. Ani pawhin hna nghet a nei a, a lo phei thei lo ang, kei pawh ka zin hman tawh hek lo ang.

"Engati nge min en reng a? I rilruah lah chuan thil dang daih a awm bawk si?" tiin a chek tlak tlak a.

Ka harh chhuak thut a," I chau em? Thingpui in rawh aw," ka ti ta sawk sawk a.

"Pa ber office kai hawte chu kan ril hi a ţâm duh châwk a nia," tiin a nui suk a.

Pa ber. Nupa ang ziazângin. Nupa angin awm dùn ta rek rek ila, a nuam reuh ngawt ang chu.

Kan pahniha in tùr ka siam a, a lum a ti a niang, tàwnzau nèn a lo awm tawh.

"LTK, i rilrua i ngaihtuah ka hre thei ang," thingpui ka pêk lai chuan a lo ti a.

Ka meng kâwk ang chu. Ka ngaihtuahna hi a hre thei reu reu ang maw? A hriat hlauh chuan a zahthlâk ngawt ang.

"Ka ring chiah lo."

"Hria e, min han en la?"

Hlauthâwng rilru deuh takin ka en a, nuam lo ka ti a nia aw.

"Aw, i thil ngaihtuah chu..." tiin min en vang vang a, chutah," Hmm,' A hriat hlauh chuan aw' i ti a nih kha," a ti a, a nui deuh suk bawk a.

Ka hre thiam lawk lo va, a hnua ka hriat thiam hnuah chuan," Phakar ve asin, a dik deuh tak tak tho nain a dik zîktluak lo aw," ka ti a.

"Chu lo pawh ka hre leh a nia."

"Eng nge?"

"I rilru tibuaitu a awm, i rilru a insual a nih ka ring."

A dik leh ta. A mitah pawh ka en ngam tawh lo, hawi sawnin," I risk kual vel mai mai a ni maw? Ka lo la thutak ve êm êm a," ka ti a, ka nui lui sak a.

"Ka risk lo, ka thinlung min hrilh dàn a nih kha."

Nia, U Puia hi chu a fing a, a hre thei tak tak ang, tuna ka rilru awm dàn hlauh phei hi chu, ka hmel leh mitmeng ațangin a chhui thiam vekin ka ring.

"Nakin zànah i lo kal leh ang tiraw?"

"Aw."

"Thil hrilh duh che ka nei a."

"Tunah?"

"Ni lo ve, tunah chuan. Nakin zànah le."

Ngun zetin min en kur a, ngun deuha min en tawh hi chuan engkim a hmu tlang thei vekin ka hre hial țhìn.

"A làwmawm lam a nih ka beisei."

"A pahnihin."

*******

A in ka thlen chuan inlêng a lo nei leh hman tawh! He pa hian chaw ei lovin a rawn rîm tihna em ni? A rûk chuan lungawi lo viau mah ila, ka tilang duh bîk lo.

"Puia, i tluang zêl maw? I chhûngte an dam țha em?" a ti luam a.

Ngeiin lungawi lo viau mah ila chhàn loh ringawt chi a ni bîk lo. Țha tak chuan ka chhâng a, min zawhna chin chiah chiah ka chhâng zêl.

Chutah," Engtikah nge i hna zawm tùr chuan i phei dâwn?" tiin Tluangpuii chu a zâwt ta daih a.

"Thla tharah."

Thla tharah hna zawm tùrin a phei dâwn. Engati nge ka hriat ve loh? Kei aiin he pa hian a lo hre hmasa zâwk maw?

Tluangpuii chu ka en tlawk tlawk a, ani erawh chuan min en duh hauh lo. Ka hriat hauh lohin Aizawlah min pheisan a tum a ni a, eng angin nge min ngaih le? A nunràwnthlâk mah mah lo maw? Nge phuba lâk a tum? Min țhen hi a lo tum reng a ni zâwk lo maw?!

Ni lul lo mai.

Min țhen hi ka phal ngai lo ang. Ka theih tâwp ka chhuah ang a, min kalsan lo ang, a nih loh chuan ka ru chhuak tawp mai ang. Tih tak takah chuan, nupui neih ka hun ve tawh tho a, a duh emaw duh lo emaw ka ru chhuak ang a, ka nei tawp mai ang. Ka nu pawhin nupui nei tùrin min tih ve ziah kha, min hrilh țhat loh chuan ka ti khawp ang, min kalsan dâwn lo hi a ni tawp mai.

Zanin hian ka nupui ni tùrin ka sâwm a ngai a nih hi.

Ka thil ngaihtuah avàng chuan ka nui suk.

*KAN HMA LAWKA AWM RENG MIHRINGIN KAN HMUH THEIH MIAH SI LOH CHU KAN HMALAM HUN HI A NI, I TÛN HUN ZÊL KHA ȚHA TAKIN HMANG LA, I HMALAM HUN CHU A LO HLIMAWM MAI ANG*

☆LTK☆ - 30 By Dingdi Pachuau

"I patea'n a rawn hruai dâwn che em?"

"Hruai kher lo ang."

"Chuti, ka rualin i phei ve hlauh thei ang, mahni chauha tlàn vang vang hi chu a khawharthlâk duh em mai. Kan phei rual hlauh dâwn nia."

Ka thaw hawk. A chhan chu he pa pui hi ka ngei laklawh tawh a, a chunga ka rilru puthmang hi ka sawh sawn hlei thei tawh lo. Ka la ringhlel zui êm êm bawk, ka thîk vàng ringawt a ni lo, a mitmeng lêrh zet hi ka hua.

"Aizawla hna i thawh daih chuan lunglêng fê fê chu an awmin ka ring."

Ka en duh miah lo, min rawn en ngeiin ka ring, a nui sûng bawk ang. A hnarah tak sâwn ka hnek sawk châk; mahse, a thu sawi chu a dik lo miah lo asin.

"Lêng ve ang chu, kei pawhin ka ngai hlawm viau ang."

He nu lah hi aw, chhàn kher a ngai lo asin le. A phei leh phei loh tùr pawh a la hre chiang tawp si lo, ka chelh tlat phei chuan a phei thei nâng.

A awm dàn hi min tihthinrim ve a tum deuh niin ka hria, ka thîk tih hre reng chungin țha deuh deuhin a be lui tlat a, min en duh bawk si lo. A thil tum hi ka tihlawhtling tùr a ni lo, ka thinrim chuan a tân min pheisan kha a remchâng dáwn lutuk, a awlsam sawt bawk ang.

"I charger min lo hawhtîr teh? Ka battery a low tlat mai."

Mak a ti teh ang chu! Pawi dêr lo, he pa hi ka tih chhan deuh tak a ni zâwk, a be sek a, a ninawm. Haw lah chu a la tum miah lo zui ni àwm tak a ni.

A rawn la ve mai a, ka lo lâksak vat. Charge chu a la ngai miah lo; mahse, tirh sawn kha ka duh ve hrim hrim.

"Chuan, patea number chu ka va duh ém! Khawngaihin?" ka ti leh a.

Mak min tih hmel khawp mai a; mahse, eng mah a sawi chhuak chuang lo. A phone chu khawihin a patea number chu min pe ve mai bawk a.

"Nutei number nèn aw?"

Zak lo ve ham ham tak chu ka ni! An number ka save malh malh lai chuan "I call dâwn em ni?" a ti ta nge nge a.

"A țùl chuan."

Pu Chhuana chuan kan inbiakna chu a lo hre ve vek ngei ang, kan țawng zàwi hran lo tlat a.

Chutah, rin loh deuh hian a tho țuai țuai a,"

A lo tlai ve leh ta ruih mai, ka haw ve tawh ang e, hun thâwl pawh in duh ang, i phei țêp tawh si a," a ti leh kher a.

"Haw thuai mai teh, i hnawk," ka lo ti rilru mawlh mawlh a.

"A la hma alawm; mahse, tih tùr hi i ngah ve thei si a."

An lo inhre chiang tawh hle a nih dâwn hi. Hm, pawi lo, hun kal tawh a ni ngei ang, tûn hunah hi chuan keimah ngei hi min hre chiang tawh ang, hun kal tawh chu ka buaina tùr a ni lo e.

A chhuah hnuah chuan kan ngawi dùn vang vang phawt a, a hnu deuhah chuan," Aizawlah i phei dâwn maw?" tiin thinrim miah lo hian ka zâwt ta a.

"Pheiin ka ring."

"Engati nge ka hriat ve miah loh le?" ka ti leh a.

"Ka la hrilh lo che a... " inthiam lohna aw a ri tel.

"Mi dangin an lo hre tawh bîk a..." ka thîkzia hi ka thup thei hlawl lo.

"Ih, patea'n a hrilh a nih ka ring. Tlaia i lo pèn khân ka hrilh duh rih lo che a, zanina hrilh che hi ka tum a; mahse," tiin a dàr a chhìn ãk a," I hre ta alawm," a ti leh a.

"Ka rilru tùr i ngaihtuah em?"

Rilru nawm loh hmel tak hian a hawi sawn a, a kutzungpui tin chu a seh a seh a.

"U Pui, kei aiin i rilru a puitling daih zâwk alawm."

Teh daih chuan! Rilru puitlin leh tlin loh lam a ni lo, Aizawl phei lam a ni kan sawi hi.

"Chuan...?"

"Ih...i bialnu hna thawh nei miah lo hian hna a thawh chuan tlêmin i hmai a lo uang ve thei tawh ang a, i chhûngte leh i țhiante bulah pawh-"

"Hna thawh i neih loh vàngin ka chhûngte leh ka țhiante hmuhah hrehawm ka ti niin min hmu em?" ka ti leh a.

"U Pui, khawngaihin, ka sawi zo phawt ang aw. Chutiang rilru chu i pu miah lo maithei; mahse, ka rilru tùr min ngaihtuahpui ve chhin la? Tûnlaiah chuan hna chhe tê pawh thawh neih loh chu a zahthlâk ve tawh asin, i chhûngte fel viau mah se ka tân a nuam lo ve a, bâkah, U Afaki pawh khân hna thawh a neih kha," a ti zàwi raih a, a meng hnuai deuh raih bawk a.

"I el deuh tihna em ni?"

"Ka el phâk a ni lo. Ani chu chhûngkaw dik tak leh pângngai tak ațanga sei lian a ni a, engah mah ka phâk teuh lo," a ti tàn tán a.

Ka ngawi vang vang a, amah vêk chuan," Mahni inchâwm thei ni a inthlahrung hauh lova i chhûngte hmachhawn ka duh a ni. Chutih hunah chuan nang pawhin min chhuang ang a, kei pawhin nuam ka ti dâwn asin," a ti leh a.

He nu tê hian a sawi dik thei reuh hle a ni. Kei aiin a rilru a puitling zâwk hialin ka hria, tuna a thil sawite hi a dik thlap mai a, keima lam ngawt ngawt ka lo ngaihtuah bîk a ni, a chan tùr lam hi ka lo ngaihtuah ve miah lo.

Mahse, Aizawla a awm daih chuan ka ngai dâwn, bâkah, a chhe lo si a, tlangvâl tam tak mit a la ngei ang. An hĕl sup sup ang a...

"Innei mai ang."

Naupang chhia min ti ngawt ang chu! Mahse, neih ka duh a ni tih tal hi hria se ka duh, a rilru hriat nân pawh a țha.

A ngawih reng vàng chuan ka en phei a, maktih hmel deuh hian min lo en reng niin!

"Eng nge?"

"Inneih i duh maw?!!!"

"I duh lo em ni?"

A kutin a hmui a hup a, min en reng tho.

"I duh loh pawhin ka luhkhung tho tho ang che!"

A nuih a za thut a niang, a rawn nui chhuak ta hak hak a.

"Min tiphu hlum lo chauh alawm le! Pa Chhuana i thîk vàng maia khatiang sawi chhuah kher kha a ngai miah lo a nia," nui hak hak chung hian a ti a.

Ka va ngei reuh tak! Ka thîk tih hre reng chung siin țha tak takin a bia a, min melh ve duh hauh lo a nih kha.

"Luhkhung che ngam lo leh duh lo angah min ngai em ni? Zanin ațang hian țan ila ni mai alawm."

A nuihza hmel chu hlauthâwng hmelin a rawn thlâk ve ta thung.

"I ti tak tak lo tiraw?"

"Tak tak e."

Ka kut rawn vuanin," U Pui, ti tak tak suh aw. I tlâwm lutuk dâwn asin, i nu leh pa fapa neihchhun i ni a, an innghahna awmchhun i ni tawh. Chutianga i tih chu ka phal ngai miah lo ang," a ti zàwi raih a.

*******

TLUANGPUII

~~~~~~~~~~

Ka thin a phu nasa lutuk! Ka lung phu chu a tàwp mai dâwnin ka hria! A thil sawi chuan min țhâwng lutuk a! Làwmna nasa takin min vûr hlawp hlawp a, neih atân min duh a nih chu! Luhkhung hial pawh...hei chu ni lo, hlauhthàwnnain min rawn man leh nghâl vat bawk. A thil sawi hi a ti tak tak tùr a ni lo.

A nu leh pa ka ngaihtuah a, an lung a awi dâwn lo lutuk! Ni lo, thil theih loh bur a ni tawp mai. A nuin min rawn call a a thu sawite kha, ka lu ka thing nak nak. Ka dam chhûnga ka inchhìr loh nân he thil hi ka dang ngei tùr a ni, engti kawng pawhin.

"Min lo duh ve tak tak nange?"

A kut chu khàl nep nepin," Ka mipa duh ber i ni alawm," ka ti sap a.

"Mahse, min kalsan i tum tho si a?"

"Ka kalsan dáwn lo che, hna ka thawk ve mai dâwn chauh alawm. Hre thiam lo der lo la?"

"Ka mitah chiang takin min en phawt rawh," a tih avàngin zawi muangin ka en chho a.

"Phei kher a țùlna ka hre lo. Hetah pawh ka zawnpui mai ang che, i u pawhin sumdàwnna lian tak a enkawl a, chutah pawh chuan i thawk thei ang chu, engati nge Aizawlah kher?" a ti ta sup a.

"Ka u chu tihbuai ka duh lo. Ka hna tùr hi patea min hmuhsak a ni a, ka ke a nat vàngin ka thawk thei lawk lo zâwk a. Patea hnial hi ka hreh êm êm a, hnial tùr pawhin min duh lo bawk ang. U Pui, kei aiin i hre thiam zâwk ang, Aizawla ka phei avàngin kan inkâr a tàwp dâwn tihna pawh a ni lo va," tiin ka thiam dàn ang angin ka sawi fiah ve.

"Luhkhung che ila phei i tum tho ang em?"

Ka nu nun dàn a dik loh vàngin kei chuan a hniak zui hi ka tum miah lo. Pasal ka neih pawhin thianghlim takin ka nei ve ang ka ti, luhkhung lam hi chu vawi khat mah ka la ngaihtuah ngai lo!

"U Pui...!"

"Ka chân ang che tih ka hlau a ni."

Min chàn a hlauh vàng a lo nih chu! A thil sawi chuan min tilâwm a, min duh ve tak tak a ni tih a tilang bawkin ka hria. Inneih a duh thu a sawi tawh a nia! Ka tân chuan a làwmawm lutuk a, hei bâka thu làwmawm hi a awm leh thei tawh kher lo ang.

A nghâwngah kuahin," Ka lâwm e," ka ti sap a, sawi zawm leh nghâlin," Min chân dâwn lo. Ka thawh hi remti hrâm zâwk mai rawh aw? Kan pahniha tân tùr tho alawm, i chhûngte leh țhiante hmaah zahpuiawm lo ka nih theih nân a ni bawk," ka ti leh a.

Ka thu sawi hi hre thiam hrâm se ka ti. Hêng hi a tân vek a ni si a, kan awm hran theih chuan a tìrah chuan hrehawm kan ti hle ang, a rei deuh deuh hnuah erawh chuan kan intheihnghilh tial tial mai ang, harsa chu ka ti khawp ang; mahse, a nuin min pawm thei ngai dâwn si lo va. Zàwi zawia ka tawlh bosan hi a țha zâwk a ni.

Zàn riah ve phêt chu a tum a; mahse, ka hnial char char. Ka hlauthâwng, a tân ni lo ka tân zâwk a nia ka hlauhthàwn ni. U Puia fel ka tih êm êmna chu thil ka duh loh hi chu a hre thiam ve a, a tilui țàwng țáwng lo. Ka hma a ngai ve tho a, ka duh loh chu a tilui bîk lo.

Mut hmunah chuan ka mittui a luang nguah nguah a, hlimna leh lungngaihna inchawh pawlh kual vêl a ni. Inneih a duh tih a sawi khân min tihlim a, kei ve mai min nei duh hi mak ka ti lo thei lo. Lehlamah, ani hi ka nei thei ngai dâwn si lo, an chhûngkaw hlim lohna leh ințhen darhna thlentu ka ni thei lo ang.

Ka mittui ka hrûk lai chuan message tone a ri keuh a, tûn ang zan rei tawhah chuan U Puia bâkin min rawn thawn lo tawp ang.

*I luhlul reuh hle mai, i bialpa chunga thil țha lo a thlen i duh loh chuan kalsan ang che. Ka thlîr reng che aw*

Vauna. Hlauhna pawh ka nei hran lo. U Puia nu kha a ni thei mai ang em? Hetiang êm hi chu a nih ka ring lo asin!

A dang a lo thleng leh nghâl zat.

*Eng pawh a chungah thleng thei a ni, fîmkhur ang che*

Ka va ning tak! Engati nge U Puia nèna kan induh chu an phal loh êm êm bîk? Mi pawh an innaizâwng a, vauna an tâwk kher lo, engtizia nge ni keini pahnih hi? An eng pawi nge kan sawi ni ang? Message min rawn thawntu hi hriat chhuah kher pawh ka duh hran lo, U Puia nèna kan inkawp duh lotu a ni tih chauh ka hria, ka ning.

Min vau lo mah se țhen chu ka tum tho tho asin. Zàwi záwi a țhen ka tum, a nu thil sawi kha ka hre chhuak lo thei lo, a tân ka tling lo. Sum tam tak chu nei ve tho mah ila ka tling chuang lo, a chhan chu ka nu fanu ka ni miau a ni.

U Puia, U Teite, pateate nupa leh U Rsa vàng chauha he khawvêl hi nuamti ve chauh ka ni, ka nu fanu ka nihna hi engtikah mah a bo thei dâwn si lo va, ka kalna apiangah min zui zêl bawk si a. Mi hi ka dem rêng rêng lo, 'fanuin a nu a chhùn' tih a nih vàngin tu nu leh pa mah hian an fapa nupui atân leh ngaihzâwng atân min duh dâwn lo, an demawm lo ve.

Hun remchâng hmasa berah U Rsa pawh ka hrilh ve, ani chuan duhsakna min hlàn a, Aizawlah kher ka tum chhan chu min zâwt a.

"Ka patea min hmuhsak a nia, min ngaihtuah ve si a, ka hnial duh lo a ni," ka ti a.

"Lungleia awmin min pui thei tho a, i duh phawt chuan."

Ka nuih sak a," Ka lâwm e; mahse, sumdàwn lam hi ka mi sa ve lo, nurse nih hi ka duh ber a ni țhìn a, nuam pawh ka ti a," ka tih chuan a bu nghut a.

"A țha alawm, țha takin i thawk dâwn nia. Nula hausa i ni chung pawhin thawh i duh tho bawk sia," tiin a nui a.

Nui chung hian," Nang pawh," ka lo ti ve thung a.

A ngawih deuh vung vung hnuah chuan,"A nih chuan, Spiderman kha engtin nge a awm tâk ang?" Mitko sàn ãk hian a ti leh sup a.

Ka sen awp awpin ka ring, za lo zet hian ka nui ringawt a.

"I hman veleh i lo zin phei țhìn ang a, in pawh hi i luah chhunzawm reng tho ang chu tiraw?" a ti leh a.

"Aw, nia, phei leh țhìn ang. In hi chu ka patea thu thu a ni mai ang chu," ka ti a.

"Harsatna i tawh chuan min hrilh hreh lo la aw, ka rawn kal zut hman dâwn si lo va. U i nei tih theihnghilh ngai miah suh ang che."

Chutiang țawngkam ka hria chu ka lâwm lutuk ringawt. Ka thla a timuang hliah hliah.

*******

Naktûk mai hi a phei hun a ni tawh. Ka hneh thei lo va, a duhna kha ka zahsak lo thei lo a ni. A duhna ka zahsak ve loh chuan mahni hmasial lutuk ka ni dâwn asin; mahse, keimah ngeiin ka dah phei thei dâwn a, hun chu kan la ngah leh thei deuh ang.

Ka pa chuan," Aizawlah chuan eng maw va tih i tum?" tiin min zâwt a, an bulah ka sawi zauh tawh a, ka tih tum erawh ka sawi lo a ni.

"Ka zin lawk dâwn."

"A țha alawm, i chhuak khât bawk a, chhuah chhunah chuan hlim taka hman i tum dâwn nia," a ti a.

Ka nu ve thung chuan spy zet hian min rawn en kar a," I bialnu nèn khân in zin dâwn a ni lo maw? Mi sawi sep kan kài tawh tehrêng nèn, zak ve deuh teh," a lo ti a.

Chhâng lo chuan ka insiam mawlh mawlh a, ka pa chuan a lo khak ve bawk a.

"Duhtâwk teh, mite lah hian an tâna thil țangkai ni si lo hi an lo sawi ve a, eng emaw hlek hi an sawi vul chûk ziah. Mi sawi nazawng hi chu engah mah ngaih loh tùr," a ti charh charh a.

Ka nu vêk chuan," I fapa hi zilh ve ta che! Țhenawm khawvêngte titi tuina ber kan nih tawh hi, ka zak, inkhãwm pawh hi nuam ka ti tawh hauh lo," a ti leh hlaih hlaih a.

"E, mite sawi nih loh vanga inkhâwm tùr kan ni hlei nem. Pathian faka a thu ngaithla tùr alawm kan nih, țhian i kàwm tam lutuk a, i buai a nih kha. Min sawi sep sep chhan hi chu, min phâk loh vàng a ni duh a nia," ka pa chuan a lo ti leh a.

"Kha nu kha kan nun ațang hian bo hmak se a țha ber ang. Kan chhûngkua min tibuai vek tawh a nih hi, ka duh thei ngai lo ang, ka pawm thei lo a ni tawp mai," a ti leh tàwn táwn a, a thil sawi hriat leh pawh ka duh tawh lo, rang zetin ka chhuak ta daih.

Car chhûngah chuan ka țhu reng. Ka rilru a tâwt, ka duhtak chu naktûkah Aizawlah a phei tawh dâwn. Rilru tâwt naklaiin, ka nuin a lo sawi chhe ve reng bawk si, ka nun hi hahthlâk ka ti. Ka nu luhlul zet hian a pawm thei dâwn si lo, Tluangpuii duhna lah ka zahsak a ngai si, mi min sawina zawng zawng leh min en dàn hi hre lova hmu lo ka ni bîk lo. Ka nu sawi pawh kha a dik ka ti reng, mi thinlungah ser a lo awm tawh hi chuan a reh har țhin bawk a ni.

Ka mal a nghawr dat. Message a rawn thleng. Tluangpuii a ni tawh ngei ang.

*Pui, engtin nge ka tih ang? Ka hmuh thuai che a ngai a ni*

Mami message a ni. Ka hmuh lohna a rei ve ta, a rawn tider mai mai a nih hi, pawimawh tak tak ni se, phone call-in a rawn ti ang chu, chhuanlam a nih hi, chhuanlam dawrâwm.

Ka tlân chhuak ta thuai.

Ka va thlen chuan a thawmhnaw pawimawh țhenkhat a ken phei tùr chu a lo khung fel vek tawh a, a lum deuh bawk nèn, a sam chu sâng takah a lo țawn vah a, a nghâwng vâr hai mai chu hmuhnawm a tling ka ti!

"Ka lo ngaihtuah lai tak che!"

"Min va ngaihtuah khât àwm ve!" ka tih chuan," Ni lo, chutiang lam ni lovin," a lo ti vat a.

"Eng tiang lamin?"

"Ka ngai dáwn lutuk che a."

Ngun zetin ka en a, ani erawh chu a hawi sawn nghâl daih.

"Kal i tum țâlh a..."

"Nia."

"Zanin chu riak tùrin ka rawn kal."

Min rawn en vat, a mittui parawl kiang chu ka hmu thei.

"Lo hnai teh."

Ka kuah ta vat. Phei lohtîr mai ka duh leh ta rum rum; mahse, thutlûkna siam fel a ni vek tawh. A hnual zâwnga țawngkam neih ka duh lo, a duh hi han ti phawt se...

"Mite pawh an inngai ve tho alawm tiraw?" a ti țham țiak a.

"Aw, an inngaih viauna hian an inkâr pawh a tinghet sawt thei țhìn a ni," ka ti sap a.

"Ka ngaih viau che chuan ka rawn call zut mai ang che."

Ka nui hawk a," Min rawn call hmain ka rawn call hman ziah ang che," ka ti a.

*MI DANG CHUNGCHÂNGAH INRAWLH SUH, HNUH LUH I NI VE A NIH NGAWT LOH CHUAN, INTHIAR FIHLÌM ZÊL HI A ȚHA NGAI*

☆LTK☆ - 31 By Dingdi Pachuau

Zànah a khum lian vak loah chuan kan mu dùn a. Mut ve a phal lo nain ka tilui tlat a, a tàwpah chuan min hnial hneh ta lo va. Khua a lum a tih vàngin a taksa deh pawh a duh chuang lo lehpek. Inhma tawn ràna mu chung chuan a u nèn an inbiak dàn chu min hrilh niap niap a.

Mipa mah ni ila ka mut ngai lohna a nih vàngin ka muhìl thei lawk lo lehnghal a, bâkah, naktûk maia a phei tawh dâwn vàngin ka huphurh lâwk a ni ber ang chu, ka mut a chhuak miah lo.

Zîng lamah erawh ka lo chhîng ve sek a ni ngei ang, ka harh chuan khua a lo êng chiang tawh a, mak tak maiin min lo kuah chial tawh! Fet zet hian min lo khan zui bawk a. Ka âwm nghèngin a thaw sâk sâk a, a mut tui hmel kher asin.

Kan awm dàn chu ka duh êm avàngin ka che sawn lawk lo. Ka ke erawh a kham reuh lutuk, ka chét chuan ka tihharh ka hlau si, a mu churh churh tawh.

"A nuam reuh tawp, hetiang hian a nuam ang tih chu hria ila chuan nizànah pawh khân ka kuah daih tawh ang che."

A lo harh lai ka hre miah lo. A thophang aw, chhâng deuh țiak chu a sexy ka ti riau bawk.

Ka che ngam lo va. Ani erawh chuan a hma aia hnai leh nghet hian min la rawn kuah sauh sauh, a hmaiin ka âwm a la rawn nawr châk châk zui.

"Nuam ka ti!"

"Che tawh suh!" Ka thaw hawk a, che miah lovin ka la awm.

"Engati maw? Ka kuah khât tawh dâwn che asin," pangchang aw zet hian a ti leh a.

"Chêtsual i duh loh chuan tàwp vat mai rawh!"

Hre thiam lo zet hian min en leh phawt a, chutah a hre chhuak ta phut a niang, a tawlh sawn ta vat.

Ka taksa chu a en thla dan dan a, chutah, a tawp ta chat, a mit a la sawn rang lutuk. Hmun dang melh ta daihin," I tho hmasa duh em?" a ti ta ringawt a.

"Va tho rawh, ka rawn tho ve nghâl ang."

Inah pawh ka haw tawh chuang lo. Chaw ei khamah kan chhuak a, kan hmalam hun ngaihtuah duh lovin hlim takin hun kan hmang dùn a. A țawng duh a chhuak leh tawh a, a titi barh barh reng a, a châng leh fiamthu a thawh a, zin kawng nuam tak chu a ni e.

A pateate in kan pan nghâl. A pateate nupa chu ka hmuh tum loh dàn deuhin ka hmu a, an nupa chuan pâwn lam lan dànah chuan rethei ve tê an ang. An hmel a țha dùn tehchiam lo bawk; mahse, mi fel tak an ni. An fanu tak tak a ni lo tih a hriat miah loh, an duat takzetin ka hria, ka ngaih pawh tlêm chuan a țha deuh.

Ka chungah pawh an fel khawp mai. Mi fiam an hrât hmel ve khawpin ka hria, Tluangpuii an fiam loh leh keimah min fiam a, an bula nun a hahdam ka ti.

An inkhâwm hlànin Tluangpuii hnênah chuan," I patea leh i nutei hi an inneihna a rei tawh ngawt lo maw?" ka ti a.

"Rei tawh, ka pian tawh hnu chu a ni phawt mai."

Ka nui a," Nih, i pate lam hi mi hausa chhûngkua an ni em? Nge tûn hnuah?" ka ti leh a.

"Eng atân nge i tih? Ka pa kha chu Bank Manager chu a ni ngei mai a, patea erawh hi chu tûn hnuaa a thawhrim vàng liau liaua hetia khawsa thei ta hi a ni," tiin ngun zet hian min rawn en a.

"Kan hausa miah lo, kan nghei lo va, chu chu a ni mai," a ti leh a.

"Lo ngai haw lo la, i patea hi a hmel tha vak si lo va, i nutei pawh chuti tho. Tûn anga hausa hi hmânah khân lo ni se chuan nupui chhe lo deuh a neih ka ring a, i nutei ka hmuh hian mi hausa sa a nih ka ring lo ve deuh ngawt a," ka ti a.

"Ih maw, ka pa pawh a hmel țha chuang lo; mahse, pa hmelțha ber a ni ka ti tho. A thinlung chhûng kha a țha a, chutiang chiah chuan patea pawh. Pathianin mal a sàwm dùn ka ti mai, ka pa erawh a boral hma ta deuh a," a ti sap a.

"Fanu hmelțha zet, amah ang maia thinlung țha a nei tho alawm. Nula fel tak a la ni zui," ka lo tih zawm a.

Min kuahin a rawn dingdihlîp ârh ârh a, ka hmuiah chuan a rawn fâwp zauh.

"Chuan, mipa fel tak a la tawng zui a, vanduai viauin inhre mah se chu mipa fel tak vàng chuan a nun chu pângngai takin a hmang leh thei ta a..."

*******

Mipa pawh hi kan lung a lo lêng ve vawng vawng thei tho a lo nih hi. Aizawl a phei ațanga kâr khatna chiah a ni a, zànah lènna tùr ka nei tawh si lo va, room-ah ka inkhung chawt reng mai.

Ka call ãwl lo va, a buai deuh țhin avàng erawh chuan duh angin kan inbe tam thei lo. A buai loh veleh a rawn call a, rei tak tak kan inbe țhìn. Video call ka uar, a nurse thawmhnawte inbel chu hmuhnawm ka tiin inhmeh ka ti takzet. Thlalâk min rawn thawn tùrin ka ti ziah bawk.

Ka pa chuan ka chhuak ngai ta lo chu rin dàn a thiam mai ka ring deuh, min zâwt lo nain ka chhuah ngai miau loh tâkah chuan Tluangpuii a awm lo a nih a rin ngei ka ring. Ka nu ve thung chuan zàna ka chhuak ngai ta lo chu mak a ti a, ka hnung lama min en zui țhìn chu ka hmu ru reng. Eng rilru tak pu ang maw? Ka lêng chhuak ta mang si lo va, rilru dik lo a lo pu leh ringawt tawh maithei a ni.

Sunday tlaiah Mami'n min rawn phone a! Min rawn text ka chhâng ngai lo va, min rawn text khât viau tawh a ni a, call phei chu min call ngai lo tluk tawh a ni.

"Hello?"

"Pui, khawngaihin naktûk tlai chu lo pêng lawk teh, thil sawi tùr ka nei a," a ti a.

"Eng thil nge ni ta? Phone-ah hian a sawi mai theih loh em ni?" ka ti ve thung a.

"Theih tho e; mahse, hmaichhana hrilh che ka duh zâwk a, a pawimawh sia, i lo ka hman ang tiraw?" a ti leh a.

Kal chu ka duh lo.

"Naktûk lo thleng phawt se, ka hman chuan le."

"Aw le, ka lo nghâk ang che."

Eng thil nge min hrilh a duh ang le? A pawimawh si chuan... Mami hi hmuh tawh loh ka duh asin, a in a fâl ve tho si a, ka bialnu hlui a ni bawk si nèn, tunah phei chuan 'vâl lunglêng' ka ni lehnghâl.

Office-ah chuan Hminga chuan," I hmel a hlim lo riauin ka hria, in nu nèn in inkâr a țha meuh nange?" a ti sar sar a, a nui pah deuh a.

"Țha e, ka hlim loh àwm ka hre lo," ka ti thung a.

"Ka rin aiin in inkawp rei tlat."

"Kan induh tawn miau a,"ka ti ve ngat a, Hminga hian sawi dawt lo mah se a hmu hniam tih ka hre ve tho a, a bula Tluangpuii nihna dik tak sawi erawh ka tum hran lo, a duh duh dànin ring mai mai teh se.

"A bum hneh hle reuh che a nih dâwn chu."

Ka chhâng lêt peih lo. Tluangpuii chungchângah hian kan inrem thei lo va, thil dangah erawh ka țhianpa a ni reng tho, ka bialnu chungchângah hi chuan kan inmil thláwt lo ve.

"Ti leh ta daih ila, Mami kha i la tlawh reng tho em? Nge in nuin a khap che?" a ti leh a.

"Khap nâng, chutiang rilru a pu ve lo," ka ti sak a.

"A rilru a zâu ve reuh a ni maw? Ti ila rilru pu zâu tùr chin chu a ni ve tawh tho mai," a ti leh kher a.

Ka chhâng peih tawh lo. Tluangpuii rilru țhatna chanve pawh hi an rilru hi a ni àwm si lo va; mahse, dem viau tùr an ni lo ve, kei pawhin ka hriat chian hma kha chuan an rilru ang tho ka put ve tho kha maw.

Chawhnu bànah chuan zawi muangin ka tlân chhuak a, va pèn chu ka duh lo; mahse, ' a pawimawh' kha a ti ve bawk si a, eng tak ni ang maw? Pêng lo ta ila, thil pawimawh tak a lo nih bawk si chuan.

Ka péng ta lo. A pawimawh viau leh min rawn hrilh leh mai a niang chu.

Tluangpuii nèn kan in-text a, a rawn voice leh zauh zauh țhìn a, a buai deuh pawh a ni maithei, bâkah, min rawn reply har deuh țhìn bawk.

*Vawiin kha, i buai ta a nih ka ring, naktûkah i hman hrâm chuan lo pèn tum leh la, video chungchâng a nia*

Eng video nge ni ang? Min rawn thawn dârkâr ka en a, dâr 6:12 daih tawh khân a ni, tunah dâr 9 a ri tawh. Naktûk chu ka pèn ngei a ngai ang, kha video chhuanawm loh zet kha a nih vaih chuan...

Lo ni ta se, engtin nge a lo neih ve ringawt ang le? Tluangpuii'n a thawn ve em niang? Ka ring chiah lo deuh si, khawi ațanga a neih nge ni ang le?

Zànah pawh ka mu tui lo, ka rilru a luah leh ngut ngut tawh. Vawiin khân pêng haw ta mai ila, eng video nge tih ka hre daih tawh àwm si a.

Hmeichhe thu dàwn.

Tlaiah chuan ka pêng haw ta ngei, a hmel a pawr deuh phangin ka hria. Thil a sawi hma chuan a sawi tùr chu thu làwmawm lam a nih ka ring lo ve ringawt.

"Eng video nge ni a?" ka țhut veleh chuan ka ti a.

"Kha en la?"

A phone chu min pe a, ka rin ang chiah, kan pahniha kan inbawhbet chawt chawt lai kha a lo ni!

"Khawi ațanga i neih nge?"

"Tlangvâl pakhat ka hriat ngai pawh ni lo hian min rawn thawn a, min vau pah nghâl a. Pawisa ka pe lo a nih chuan social media-a pho lan a tum thu min hrilh a, ka hlauthâwng lutuk chuan pawisa chu a duh zât ka pe ta ringawt," a ti a, a hmui chu a pet fan fan a.

"Chu chu eng tikah khân maw?"

"A rei tawh, message pawh ka rawn thawn nghe nghe che kha, min reply duh lo va, ka call pawh i chhâng duh lo," rilru nat hmel taka min en chung chuan a ti a.

Ka va hre tawh mai lo ve! Message min rawn thawn a nih chuan hriat àwm tak, hetiang thil phei hi chu ngaihthah mai mai chi a ni hlei nem, engtin nge ka hriat loh theih le?

"A pawi ka ti, ka buai lai a ni ang," ka ti ta ringawt.

"Ni maithei."

"Chu pa chu hmu leh ta la i la hre thei ang em?"

"Hre tawh kher lo ang, mask a vuah tlat a."

"Nih, i delete-tîr em? A phone-a a dah chu?"

"Aw, a delete lai chu ka hmu alawm."

Chu video chu ka hmuh ve thu ka sawi lang lo. Theihnghilh hmak mai ka duh tawh asin, aniin buaina tawh phah nân a lo hmang ve zél mai chu zia lo ka ti, video-a lo latu hi hmuh ka châk a nia.

"I dam țha rêng rêng em?" tiin ka zâwt, a pawr reuh si a, a hmai a dâng riauin ka hre bawk a.

"Ka pum lam a chiang vak lo va."

"Inentîr ta che, tuar tlawk tlawk ziah suh," ka ti a.

"Nia, ka tum alawm."

Video vàngin pawisa a chân nual si a, ka mualphona tùr min lâk kiansak ve tho avàngin a inentîrna tùr pawisa chu a remti lo chung ka pe lui. A phû ve hrim hrim, kan fîmkhur loh dun vàng liau liau a ni a, a pawisa chauhin a tuar bîkna tùr a awm lo.

Ka hawthla chu Mami chungchâng ka ngaihtuah kual nasa hle a ni. A vànduai ve zia chu ka ngaihtuah, ka ngaihzàwn ațang khân a ințan ni berin ka hria. Ngaizâwng ta lo ila chuan amah duhtu tak pasal pawh a nei tawh maithei a, hlim takin pasal fanaute nèn an awm tawh ngei ang, kei kha lo tawng lo ta se.

A chhûngte bulah awm lovin tihian a kual a kual ve ta mai chu a ni si a, ngaihtuah cheuh cheuh chuan a khawngaihthlâk reuh ka ti, hna thawh mumal a nei bawk si lo. Kei lah a beisei phâk ka ni tawh si lo, indah sàn vàng ni lovin. Bialnu ka nei tawh a, ani hi ka ngaihsak thei tawh lo a ni.

Dam tlat chuan ni a ral ve zêl mai. Tluangpuii ka ngaih erawh a la reh thei lo, a bula awm ka châk tawh a, hun a neih loha a rawn phei hman loh chuan Zirtàwp chawhnu bàna phei mai ka duh, min hmuh chuan mak a ti dâwn êm asin.

Chutiang rilru chu ka pu a, ka tum avàngin hun chu a kal muang ka ti leh tawh. Ka nghâkhlel lutuk pawh a ni ang, a àwm ve tho, kan inhmuh lohna a lo rei ve leh deuh tlat tawh alawm.

Nilaithawhțanni chuan sikul kan chàwl a, holiday a nih vàngin . Naktûk ni zâwk se ka ti khawp mai, thlâkthleng thei ila ka ti.

Ka chhuak tho a, sikula bun tùr smart shoe en tùrin dàwrah ka kal dun dun mai. Inah ka haw hma peih lo, tih tùr a vâng leh dâwn si.

Thawhpui Venite țhian dùn pawh ka hmu, restaurant-ah kan chàwl tlâng nghe nghe, an titi barh barh reng a, Tluangpuii min tihre chhuak.

Kan chhuak dâwn tihah chuan ka pain min rawn call a, min call zen zen lo a nia, min rawn call ve meuh chuan a pawimawh khawp tihna.

"Bawiha, i laklawh viau loh chuan i lo haw thei tawh ang em?" a rawn ti a.

"Laklawh lo ve, eng thil nge ni ta?"

"Chuti, lo haw teh, sawi tùr a tam khawp mai."

A pawimawh.

Venite bulah chuan haw ka ngaih thu chu ka sawi a, kan ințhen ta a.

Kawnga tlân pah chuan ka pa min rawn call-na chhan tùr chu ka ngaihtuah a, ka bo tlat a ni. Eng thil nge ni ang? Motor hi an hmang duh em ni? Ka pain a khalh ngam tawh lo, U Mamawiite hruai an ngai leh em ni zâwk? A nih chuan anmahniin min rawn call mai tùr a nia..

In ka thlena sitting room-a Mami lo țhu vang mai leh ka nu leh pain an lo bia ka hmuh chuan mak ka ti lutuk. Kan inah a rawn lêng a ni si a, engtin nge kan in a rawn hriat theih? Ka nu leh pa bulah hian engtin nge a lo insawi ang le?

"E, i lo lan teh tlat..."

"Nia..."

Ka pa chuan min enin," Thil awmzia han sawi teh," a ti charh a.

"Eng nge thil awmzia hi? Ka va hre thiam lo, sawi tùr a awm lo," a ngaihna hre lo zetin ka lo ti vat a, an pathum chuan ka en tawn chhên mai.

"Fa i nei dâwn tih pawh i sawi duh lo va."

Makti zetin ka pa chu ka en. Tuna ka thil hriat kha eng thil nge ni ngai? Fa ka nei dâwn maw?!

"Eng...maw?!!!" Mak ka ti hlum lo chauh a ni!

"Tuna mi hi i fa a ni lo'm ni? Engati nge thil awm dàn hi i lo zêp tlat a? Fa hial a pai tawh chuan mawhphurhna lâk ngam tùr mipa i nih ngai chuan," ka pa chuan a ti leh.

Mak ka ti lutuk a, țawng nachâng pawh ka hre lo.

"Ka tu tùr chu ka hmu châk tawh a nia," ka nu chuan a lo ti a, a mitmenga phùrna lang chu a hmuh theih nia!

"Ka...fa...maw?!! Tuin nge ka fa ti?"

"Pui, ka hrilh fiah ang che," Mami chuan a rawn ti ta.

"Eng nge thil awmzia hi?" Chang deuh fal hian ka ti a, Mami chu ka en bîk a.

"Ka dam țhat leh țhat loh min zawh kha, ka lo ruak lo țan a lo nia. Pawisa min pêk khân ka inentîr a, ka hmang țangkai asin," a lo ti a.

"Engtin... nge...ka fa a ni lo, a ni thei lo hulhual!"

"Mawhphurhna i la ngei ang! I fa paitu chu i nei ngei bawk ang," ka pa chuan a lo ti țhak a.

*MI CHAPOTE CHUAN NGEI AN HLAWH ȚHÌN A, AN BULA AWM A HAHTHLÂK AVÀNGIN MIIN AN TLÀNCHHIATSAN THUAI ȚHÌN*