☆LTK☆ - 38 - 43 By Dingdi Pachuau

 ☆LTK☆ - 38 - 43  By Dingdi Pachuau

Engkim hi a buai nuai ta vek mai a nih àwm hi.

Ka chunga thil thleng hi ka lo suangtuah ngai hauh loh thil a ni.

Lungleiah ka thleng phei a, rilru tâwt taka ka awm chu min belhchhahna tùr ni àwm takin Mami chu mi kut tuara thi a nih an ring lehnghal. Tu thah tak ni ang maw?

Tluangpuii laka ka thil zêp, sawi chhuah țûl lo nia ka hriat lah kha kan inkâr chhiatna thlentu a lo ni ta bawk si. Ni lo, kan inkâr hi a chhia ka la ti thei lo, kei hian ka siam țha ngei ang. Tunah awm bo rih mah se hmuh hun ka nei ngei ngei ang, thil awmzia a hriat hunah chuan a hre thiam êm êm ang.

Mami khân chhûngkhat laina a nei hauh lo. A chhûngte neihchhun lah Israel-ah an pêm daih si a, a ruang chu an post-mortem a, a mah hretu kan nih miau avàngin ka pa chuan a ruang chu riang taka vui liam a phal hauh lo, kan inah ruang an dah a, kan chhûng mi ang chiaha thlah a titlu tlat.

Dàn lam ka hre vak lo va, ka phei hma khân an lo sawi fel vek a nih ka ring a, news lamah pawh an lo tilang nasa a ni awm e. Ka phone ka en loh vàngin eng mah ka lo hre ve lehpek lo.

Ka rilru a tâwt lutuk a, ngaihtuah tùr ber pawh ka hre lo. Thil thleng hi a rang lutuk a, rilru inbuatsaih dàn ka hre hlawl lo. Mipa mah ni ila ka chunga thil thleng hian min nghawng viau a ni.

Mami hi thah a nih si chuan tu thah nge ni ang? A pawisa duh vàngin an that em ni? A nih loh chuan eng vàng nge ni ang? Thil dang ka ngaihtuah lo, chu chuan ka ngaihtuahna a luh ngut ngut a, ka pa leh Hminga ngaihțhat loh deuhna kha ka ngaihtuah chhuak zawk zawk a, thil ni thei a lo ni dâwn a nih hi ka ti rilru ve ta chauh.

Hminga pawh ka bulah a țhu ve reng. Ka be lo, Tluangpuii bula thil awmzia chiang taka sawi si lovin Mami min luhkhung chungchâng kha a hrilh a ni si a, amah bâk hi rin ka nei lo. Ka țhianpa mah ni se ka ngei lek lek. Tluangpuii hmu mawh țhintu leh sawi chhe char chartu kha a ni bawk a, ka biak thâ a tho tlat rih lo.

Tu thah nge tih mawlh ka ngaihtuah. Naute kha a pai tak tak a nih chuan naute pa hian a that a ni thei mai ang em? Nge mi thah ang takin a inlantîr zâwk?

Ka hun hman dàn chu thil nuam tak a va ni lo tehlul êm!

Mami chungchâng ka ngaihtuahin Tluangpuii ka hre chhuak zêl bawk. Ani kha ka ngai a ni, a aw hriat ka châk a, a nui ri hriat ka châk leh êm êm bawk. Duat takin min kuah se, engkim a țha leh vek ang tih min hrilh se, tuna ka mamawh ber chu a bula awm a ni; mahse, chu chu thil theih a ni rih si lo.

Ka ngai, ka ngai ngawih ngawih. Heti khawp hian ka ngai thei ang tih ka ngaihtuah phâk lo. Ka hmuh theih leh biak theih loha a awm ațang chiah hian ka tân a lo hlutzia ka hre chhuak thar uai uai a, a tel lo chuan nun hi thil ho tak niin ka hre bawk.

Ka hmangaih tihna em ni ang? Mami kha ka hmangaih ka ti țhìn a, ka hmangaih ngei ni pawhin ka hria; mahse, heti tak maia ka thinlung ațanga nawh reh a han ni ta mai hi, Tluangpuii ka hmangaih leh tâk vàng a ni mai lo maw?

A tel lo chuan ka nun hi a ruak ngawih ngawih a, rilru na taka hun a han hmang tùr leh min rin êm êm laia khatiang thu a han hre tùr kha ka khawngaih a ni. Chu pawh ka hrilh hmasak loh vang, ka lo ngaihtuah kim lo deuh a ni. Ka kâ ațang ngeiin hre hmasa se hetiang thil hi kan inkârah a thleng hauh lo ang maw le.

"Mâwla leh!!" tiin ka inhau mawlh mawlh. Ni e, ka lo mâwl êm a ni, dik tak chuan ani kha ka phû lo asin, thinlung țha lutuk neinu kha. A thinlung țhat vàngin tunah pawh min kalsan a nih hi.

Ngawi tak rawh se, ka zawng chhuak khawp ang. Eng thil pawh thleng dâwn se, ka zawng hmu ang, chutih hunah chuan zah pawh dâwn lovin thil awmze dik tak ka hrilh vek ang, min hmangaih chuan min pawm ngei ang tih ka beisei tlat bawk ang.

*******

Mami chungchâng thuah kei pawh Police lamin min ko ve ta tlat mai. Mak ka ti lutuk ringawt! Ka pian ahnu lamah rinhlelh thua police station-a ka kal vawi khatna a ni hial ang chu!

Thil min zâwt nasa ngei mai.

A chhan chu Mami phone ațang khân ka number deuh chauh hi chhui tùr a lo awm a! A thih hmaa a biak hnuhnun ber pawh keimah ka lo ni!

A mak asin, a mak ka ti lo thei lo. Mami hian min rawn call hauh si lo, ka message ni àwm tak takte pawh a lo la awm nual. A țhen chu a dik ngei a, ka phâ hauh lo; mahse, Phone-a kan inbiak hnuhnun ber pawh kha a rei tawh viau a, message phei chu tûn hnaiah pawh ka thawn lo hrim hrim.

Bâkah, ka rinhlelhawm deuhna chu a thih laia a hâk a kekawr ipteah hian kan pahniha thlalâk a lo awm leh tlat bawk, note zawr tawh tak nèn.

Note chu ka thawn ni àwm tak a ni, ka handwriting nèn erawh a inang fahran lo.

*Nakin zànah kan inhmuhna țhinah khân lo awm rawh, naute chungchângah khân thil sawi fel tùr kan nei a nia

. - Puia*

"Hei hi i ziak a ni rêng em?" tiin police officer pakhat chuan min zâwt a.

"Ni lo, ka ziak lo. Ka handwriting a ni lo bawk, ka pu."

Dik tak vekin ka chhâng. He thilah hian min hnuhluh tum mah se zàm erawh ka tum lo, ka tih a ni hauh si lo. Thu dik tak chu lo lan hun a awm ngei ang tih ka beisei tlat, mi sual chuan chan țhat hun nei mah se chhiat hun a nei ve tho ang tih hi ka rin dàn a ni. A chhan chu thu dik a ngêt ve thei tlat lo a ni.

Mahse, ka rin aiin he thil hian hun a duh rei dâwn tlat, bâkah Mami thihnaa mawhphurtuah hian evidence awm theiho hian min kâwk vek tlat. He thil titu hian min tàl awhtîr a tum chiang hle mai, min hre chiang hle a nih hi, min hriat chian bâkah Mami pawh a hre chiang khawp ang, min haw deuhtu a nih ka ring, thil sual zawng zawng ka chunga bûrbun vek a tum dànah hian a hriat mai.

Mahse, ka va hre si lo ve!! Ka rilru chuan ar bo a zawng tak meuh meuh a ni. Tuin nge min hua? Hetiang tualthahna hial ka tih anga lantîr tlattu hi ka va hre châk tak!

*******

TLUANGPUII

~~~~~~~~~

Ka hun hman dàn chu mumang țha lo tak hi ka tehkhin ber. Mi luhlul ve tak chu ni lo ila chuan ka ât theih hial ka ring, ka hmangaih ber ka kalsan ta si a. Ka hun hman a nuam thei lo va, hlimna ka hmu hlawl lo bawk.

Mahse, a kalsantu zâwk ka ni a, hrehawm ti viau mah ila ka thi bîk lo ang tih ka hre ve tlat. Ka rilru la pêng thei tùr thil tih tùr ka ngaihtuah vat vat, Shillong-ah khân ka awm ta lo. Kâr khat chu ka awm ve a; mahse, kan group 'Close'-a nurse ka training-pui țhin 'Da-rini' kan tih ţhin chuan min rawn be fuh ta hlauh mai a, ani erawh hi chu Chennai lamah daih a awm thung a. Amah chauha in a luah vàngin leh inhmuh a châk êm avangin ka pan thla leh ta a ni a, a bulah chuan ka hlim thei zâwkin ka ring bawk a ni.

Ka hnial loh chhan chu amah chauha awm a nih bâkah ka kawm rualpui a ni tlat a ni. Bâkah, a in luah bul chiahah Mizo chhûngkua an awm ve bawk a, kan ngaihtuahawm dâwn lovin ka hria a ni.

Min lo hnèm teh meuh mai. Kan nungchang a inang viau a, a țawng duh ve viau bawk. Ka thil tawn chu min zâwt hran lo nain hun harsa ka tawng tih a hria a, a chhan chu kan group-ah khân ka sawi lang zauh tlat a, chu lam chu min sawipui duh hauh lo. Hlim takin a titi siam siam reng a, min tihhlim a tum hle tih ka hre bawk.

Kei pawh ka theihtâwp ka chhuah ve a, kalsantu zâwk ka nih ka inhrilh hre mawlh mawlh țhìn. Hlim ka tum ve hle bawk; mahse, a har a ni. Ka ngai a, hlim lo taka ka awm hi min hmu ta se min khawngaih ve tho ka ring, ka awm lo va, ka kalsan a ni tih a hriat tirha a awm dan tùr pawh hriat ve ka châk; mahse, ka nuteite chu eng mah ka zâwt ngai lo.

Phone ka nei ve tlawng a, ka nuteite ka phone loh chuan mi dang ka be ngai lo. Ka fb ngai lo va, ka whatsapp ngai lo bawk. Ka rilru la pêng thei tùr tih tùr ka dap ruai țhìn, keimah chauha ka awm phei chuan U Puia number-a call ka châk zek zek țhìn. Ani erawh chuan ka number thar hi a hre dâwn miah si lo va, min rawn be pawp thei dâwn bawk si lo va, a beidawng ve viau ang em?

Mahse, nupui a nei tawh ang a, min hre chang tawh nâng. Ka kalsan tih a hriat țantirh chuan mak a tiin a hre thiam lo ve ngei chuan ka ring, U Mami chu hlim taka nei tùrin ka duhsak tho. Ka hmangaih êm avàngin ka duhsak lo thei lo, ka hmangaih avàngin mahni hma ka sial ringawt thei bîk lo a ni, hma sial takin fahrah ka piantîr thei lo. Pathianin ka țawngțaina a hria a, ka tán thil țha tak a rawn thlentîr ka ring tlat.

Inhlawhna tùr ka zawng, a chhan chu keimah chauha ina awm reng chu ka duh lo, ka ngaihtuahna a kal ding thei lutuk a, tih tùr a vâng si. Hna ka hmuh hlauh chuan ka rilru kal ding lutuk pawh a zia ang, rilrua thil ngaihtuah ngut ngut ai chuan buai deuh hlek pawh ka duh zâwk.

Țhenawmte chhûng pawh an fel khawp, an pa chu company-a thawk a lo nia, fa naupang tê tê pahnih an nei. Hun âwl ka neih chuan ka lêng lût ve, an fate chhaih an nuam reuh a, ka lunglèn khawharna pawh kawng tam takah min hnawh bosak ve tlat a ni.

Hun chu kal muang ka ti tak zet. Hna lah chu a vâng, hlawh tam ka zawng hran lo nain hna him tak ka duh bawk si a, a tàwpah erawh kan awmna ațanga hla lo têah dàwra thawhna tùr ka hmu. Dàwr lian lutuk a ni lo va, thawk pawh an tam hran lo.

In luah tùr ka zawng ve tho nain Da-rini chuan a phal tlat lo. A pawi pawh ka ti lo, mahnia luah ai chuan ani nèna awm dun ka duh daih záwk, a țawng duh sia, ka rilru hrehawmnaah min hnèm viau a ni. A fel ve hrim hrim, hetiang tak hian a lo fel tih hi tûn hunah hian ka hre chiang ve chiah. Kan pahniha kan awm dun tawh phawt chuan eng eng emaw mai mai kan sawi a, kan hnathawhnaa thil thleng vêl kan sawi mai mai țhìn a, kan pahniha khawvêl bâk hi kan sawi ngai lo. Khawvêl hmun danga thil thlengin kan rilru a tibuai lo va, kan ngaihven hek lo.

Krismas a lo thlen dáwn erawh chuan ka rilru a vâk kual nasa kher mai. Mizoramah chuan Krismas hla an play leh nasa dâwn si, krismas carol service an ti ang a, țhalaiin programme eng eng emaw an buatsaih leh ngei ang. Mi tin mai chu krismas hun hlimawm hmang tùrin an inpuahchah mup mup ang a, a rethei a hausain thil thar an lei leh sup sup ang a, bazâr pawh a lùn lehpek ngawt ang chu.

U Mami pawh a puar lian ve tawh ngawt ang chu. Țha takin naute nei se, U Puia nèn pawh țha takin awm dùn zêl se ka ti; mahse, ka ui. Nupui dang nei tùr anga han ngaihtuah hi chuan ka rilru a la bîng deuh mup mup ziah, dik tak chuan ka hmangaih êm a ni. Ka tân awm tùrin ka duh a; mahse, thil ni thei a ni tawh si lo.

Hlim lêm lo takin hun chu kan hmang chho ve zêl a, ka pateate pawhin min rawn call zing, min ngaihtuah ve deuh a niang. Chho tùrin min ti lo nain Krismas erawh hman ho an duh ka ring, an pahnih chauh an ni ve tho si a, an khua a har ngawt ang chu.

Mahse, chhoh ka tum lo, ka chhoh chuan ka rilruah U Puia a thar leh ang a, hrehawm ti takin awm ngaihna ka hre lo zâwk palh ang. Hetah buai deuh taka awm hi ka thlang rih zâwk, haw chhoh hun chu ka la nei lo thei lo ang; mahse, chutih hunahte chuan ka rilru pawh a lo zia tawh ang a, hunin min hnèm ve tawh ngei ang chu. Tunah hi chuan a la rei lo ve êm bawk a, a harsat hun lai tak a la ni rih si a.

Hun chu kal muang ti viau mah ila dam miau chuan a lo ral ve zêl. Tunah chuan thinlung takin nui thei rih lo mah ila, a lang a mawiah chuan ka nui ka nui ve thei tawh. Bâkah, Da-rini hi a nui duh a, fiamthu a thawh a, min tihnuih phêt a tum țhìn, a hlawhtling tawh hle rêng a ni.

Ka rin aiin kei pawhin nuam ka ti chho ve ta phian a, Sunday-a inkhâwmnaah leh Mizo inhmuhkhâwmnaahte Da-rini chuan min hruai ve a, ka tlângnêl chho ve mai. Mizo awm an lo tam ve phian mai, hna thawh nei leh college kal an lo ni deuh vek lehnghál a, mi pângngai chin vek an nih vàng a niang, an bula awm a hahthlâk lo.

Thla a ral a, in luah man leh ei man chu kan inchawi sem mai a, a chângin keiin ka pe thung a, a chângin aniin a pe leh a, kan sawi buai lo. An chhûngkaw dinhmun ka hria a, ani pawhin min hre tho bawk. Min hria tih lêmah ka pateate nupa hi ka nu leh pa dik tak an ni emaw a ti thung. Ka hrilh fiah bîk chuang lo, hetiang hian ngai mah se pawi ka ti lo.

Chapchàr kût hman kan tum ve a, keini pawh kal ve ngei kan tum; mahse, Mizo thuam ka keng thla miah lo va, ka ken chhun chu Ngotekherh chauh a ni, chu pawh chu Sunday-a ven atân ka ken a nia, a lo fuh phian dâwn a nih hi.

Ka phûr ve viau. A chhan chu hetiang programme hmannaah hian ka kal ve ngai lo va, ka hâwkdâk lohna lam tak a nih vang a nia; mahse, hetah chuan kal ve ngei ka tum.

Da-rini erawh chuan kawrchei a lo nei a, a ha dâwn. Kei chu kawr dum hain Ngotekherh chu ka veng dâwn, kan insiam ve nasa.

"Makeup kha hmang ve deuh la aw?"

Ka hmaiah sunscreen ka hnawih mawlh mawlh a, ani erawh chuan a mit a line mawlh mawlh thung.

"Mascara ka hmang tawp ang a, a tâwk mai lo em ni?" ka lo ti a.

"Chhah deuh hlekin aw. Chuan, lipstick sen deuh hlekin kan inhnawih bawk dâwn nia, thlalâknaah hmui sen lo hi chu a mawi lo duh a nia," a ti leh a.

A hnuah chuan ka mit chu min line-sak ve hlek, sîn têin. Ka line ngai lo va, ka inhmeh em pawh ka hre lo, lipstick erawh a hmun kan thlen hnuah kan inhnawih chauh ang.

Kan thlen ve meuh chuan an lo awm țeuh tawh mai; mahse, kan tlai bîk lo, function an la țan hlei nem.

Hmel hriat ka nei êm êm lo nain panga vel chu ka hria, bâkah kan țhenawmte ka hre ve leh bawk a, ka mikhual dûk bîk lo.

Inkháwmna ațanga ka hmel hriat Zuali chuan min lo hmuh chuan min lo ko ve vat a.

"Awi, chhiat loh si zia hi. I mit i line a ni maw?" min lo ti var a, ka mit chu a kâwk pah zauh bawk a.

"Chhe lo ve bawk ang chu. Zawnglai ka ni ve a," nui chung hian ka ti lêt a.

"Lêrh s'u."

Lalmawia chu kan en ţhap a, ani pawh a rawn intinalh ve lutuk.

"Mawi, i lâm dâwn tiraw?" Zuali chuan a lo ti vat a, Da-rini chuan," A ni maw?!! E khai!! Ka lo thidang der chiang ngawt ang!" nui chung hian a lo ti vat bawk a.

"Mai mai che u hian. Ka rawn kai chhuak vek dáwn che u, vawiin chu in chang sâng dâwn lutuk," Lalmawia chuan a lo ti thung a.

"Kei tiam lovin aw," ka lo ti vat a.

"Tiam e a, a hmasa berah ngat maw le."

A ti tak tak ang tih ngaihna rêng ka hre hauh lo. Chheih zaiah a lâm a, min rawn kai chhuak tak tak! Ka zak bawk si a, ka thi lo chauhin ka ring. Engtin nge ka làm ve tâk pawh ka hre lo, min rawn kai chhuak miau si a, lâm duh lo bîk nih ka duh lo va, ka lâm ve chiang tih chu ka hria.

Programme chu a light thei ang berin hman a ni a, ka rin ai daihin nuam ka ti. Zaia an sàwm ho lah chu a lâr ber ber an ni a, an zai laiin kan lo zawm ve dual dual bawk, tu pawh mai chuan Mizo hnamzia tilang thei tùr thawmhnaw kan inbel vek a, kan hlim a, nuam kan ti vek bawkin ka hria.

Ruai țheh a ni a, mizo chawhmeh dik tak hmanga ruai țheh chu manhla tak a ni. Ka ei țeuh mai, Lalmawiate nèn chuan kan țhu tlâng a, Da-rini chuan kan lâm chungchâng a rawn sawi chhuak a.

"Mawi, i lo làm thiamzia kha!!"

"Tluangpuii a zei daih zâwk!"

Ka biang a sen nasa ang chu aw. Rum deuh hian ka melh phei a," I tih tak tak pawh ka rin loh nèn, ka zahzia kha. Eng làmin nge ka lam pawh ka hre lo, ka zak lutuk a," ka tih chuan an nui dar dar a.

"I lâm thiam lutuk, i thiam tih ka lo hre miah lo va," Da-rini chuan a ti a, Zuali piah chiaha țhu Amy chuan," A lo inthup thei hle a nih kha, kan piah tlangvâlho lo àu nasatzia kha," a lo ti ve bawk a.

"Thil dang sawi tawh teh ang u," ka tih chuan Lalmawia chuan," I lâr tawh ngawt ang, youtube lamah an upload tawh ngeiin ka ring a, celeb tenau i ni ringawt ang," a lo ti leh a.

"I va sual tak!"

"Ka tilâr che sia, min be țha hle rawh."

U Puia ka kalsan hnua ka la hlim ve ber ni a ni ngei ang.

Inthiarnaah ka kal lawk a, ka chhuah chuan mipa inthiarna ațanga tlangval pakhat lo chhuak ve chiah nèna kan inhmu chiah chu, mak ka ti lutuk a, ka meng phâwk nasa ngawt ang chu! He pa ka ngaihzia leh ka theihnghilh lohzia hi ka hre thar uar uar mai.

Va pawm chawt a ka ngaihzia thu hi hrilh mawlh mawlh ka va châk êm! Ka ngai a ni, heta ka han hmu thut hi ka mit vài chu a nih chu ka ring lo, ni sa hnuai pawh a nih loh hi.

Ani pawh chuan min en reng ringawt! A hmai lo chêr ta deuh leh a sam lo sei ta deuh hlek chu a inhmeh zâwk emaw ni ka ti, a chhiat loh ngaiin a lo la chhe lo reng. Ni lo, a hma aiin a țha zâwk mahin ka hria.

Inen reng chuan kan in-exam tawn mawlh mawlh a ni ber ang chu. He function-ah hian a lo kal ve ngei tihna a ni a, eng nge a lo tih ve rêng rêng ni? Chennai-ah hian a nia ka tih. Hnathawh a nei a, chawlh a neih ka ring hauh si lo.

Nge inentîr tùrin? An chhûngkuaah tu emaw damlo an awm em niang? Nge amah ber hi?

Mahse, chutia damlo hmel a put àwm ka hre si lo. A lo chêr ta deuh tih a ni mai a, hrisêl lo hmel a put loh hi.

"I dam țha tih ka hmu thei e," tia a rawn țawng chhuah tâk supah chuan ka suangtuahna ațangin ka harh chhuak rang kher mai.

"Nang i dam țha em?" tiin ka zâwt ve nghâl, biak chhiat ka tum lo hrim hrim. Mi pa pawh ni se biak chhiat kher a țùlna ka hre lo. Kan inzui leh dâwn tihn a a ni kher lo va, ka beisei leh dâwn tihna lah a ni hek lo.

"Taksa chu dam e. I lang dang kher mai!"

Min chhàn dàn kher chuh!

"Eng nge i lo tih? Tu nén nge in lo kal a? Hetah Chennai-ah hian i awmna a rei tawh em?" Zawhna hlîr mai.

"Ni hnih thum bâk a la ni lo, Tluangpui, ka hmu leh thei che hi ka lâwm tak zet a ni," a tih chuan ka nui sak a, kal a hun tawh tih hriain," Kei pawh le, ka țhiannuin min lo nghâk reng tawh a, ka kal tawh mai ang," ka ti a.

A bula awm reng hi thil dik a ni lo. Mi dang pawh an rawn lût ve leh zawk bawk si a, mi pa nèn a fâla min hmuh hi ka duh lo, bâkah U Mami pawh a lo tel ve maithei asin. Nupa inkâr khì hi eng emaw ho tê vàng a ni thei tlat, ka fîmkhur a ngai.

"Tluangpui, khawngaihin, thil sawi fiah ka duh asin," a rawn tih chuan ka pên lai chu ka pên chak sauh a, hei tak hi ka duh loh thil a ni.

Eng mah sawi fiah tùr a awm lo. Nupui neiin fa a nei dâwn tawh a, sawi leh tùr hi a awm tawh lo, awmzia a awm tawh lo bawk.

Ka hnungah a rawn kal ve tho tih ka hria a, ka thaw țha ngam lo, ka theih tâwka chakin ka kal, Da-rini ka hmuh chuan ka thaw huai mai. U Puia hian ka duh lo leh remti lo chung chu min be lui dâwn lo tih ka hria a, mi zîngah mi mit la zâwng leh zahpuiawmin min siam lah ka ring hek lo.

"I hnunga mi kha i hriat zâwng a ni em?" Ka beng bulah chuan a rawn ti sar sar a.

"Ka hre-"

"A rawn en reng che a nia, a mit a khap hauh lo. A chhe lo êm êm zui a," a ti leh sar sar a.

He hmun ațanga a rang thei ang bera chhuah vat hi ka duh.

*NUI HMEL MAWI BER BER PHÈNAH HIAN THURÚK TAM TAK A INPHÛM ȚHÌN*

☆LTK☆ - 39 By Dingdi Pachuau

In kan thlen chuan ka lo khùr nasa hle tih ka hre chiah. Da-rini chuan eng thil mah min zâwt lo, a mitmeng ațang erawh chuan thil awmzia min zawh a duh viau tih ka hre thei.

A àwm reng, eng thil mah ka la hrilh tlat lo a ni. Ka hrilh loh chuan eng mah a hre lo ang; mahse, a fel ve êm êm ka tihna chhan chu ka hrilh loh pawh hian min zâwt duh chuang miah lo. Ka hrilh loh chuan hriat țûl a ti lo a ni ang, a insûm thei ka ti.

U Puia ka han hmu leh ta a ni a, tuna ka thin la phu rang lutuk pawh hi amah vàng a ni tih ka hria. Heti khawp hian keimahah awmzia a la neiin theihnghilh ka tum ve chu a ni si a, awmzia a la awm lo chiang hle a ni.

Eng mah ngaihtuah nei lova kuah vawng vawng ka châk. U Mami leh a fa dinhmun ngaihtuah lêk lova a ângchhûnga awm ka châk, ka thlá a muang leh dâwn êm asin. Kan tum dàn phei kha chuan kumin kum laihawl vêla inneih tum kha kan ni nghe nghe a nih kha; mahse, tunah zet zawng, kan hma hun kan hre lo lutuk hi ka nuih a za zâwk.

"A nuam ve reuh reng tiraw vawiin kha? I lâm thiam bawk si," a tih chuan ka harh chhuak nghâl, za lo zet hian ka țhen sak. Ka zei lo tih ka hre ve reng si a, min fiam dàn kher kher chu ka ngei reuh tawp.

"Ka zahzia kha! Lalmawia ni lo se chuan ka thin a rim ngawt ang!" ka lo ti a.

"Ani ni lo se a kai chhuak nâng che, a ngamtlâk ve che a; mahse, kha i làr phah viau dâwn kha," nui chung hian a ti leh a.

"A zahthlák, sawi lo teh, ka zak êm mai," tiin ka hmai chu ka hup a, a rûkin ka la zak veng veng.

"Chuan, Chhelova kha i hria tiraw?"

"Tu maw?!!"

"Hmm, hre lo der vêl. Ka la hmu ngai hauh lo, ka awmna a rei ve tawh a, Mizo kan inhmuh khâwmnaah pawh ka tel ve fo, ka hmu ngai lo. In inhria tiraw?" a ti ve ta a.

Zêp a țùlna pawh ka hre tawh lo, hriat hi a phû ve tawh ka ti.

"Aw, U Puia, Lungleia mi a nih kha."

"Wow!!! Hriat belh zél a châkawm."

Ka thaw hak a," Nupui a nei tawh alawm, fa pawh a nei tawh," ka lo ti leh a.

"Chuan?"

Da-rini en chuan," Eng mah a awm tawh lo, ka rawn tlànchhiatsan a ni," ka ti ta hlawl a.

Chîk zet hian min en a, a hmelah makti hmel hmu mah ila thup a tum hrâm hrâm a nih hmel.

"Mahse, a rawn hmu leh ta che sia?"

Lu thing nakin," Awmzia a awm lo, nupui nei lai ka kawp thei hlei nem, a fa fahrahin ka siam thei lo bawk," ka ti sap a.

Ani lah chuan," A bul tê ațangin ka hre châk, min hrilh peih chuan," a la ti deuh deuh a.

Ka hrilh ang, tuna ka rilru tâwt deuh țûn pawh hi a zia sawt mahna.

Zêp nei lovin ka hrilh vek. A lo inrawlh ve miah lo, ka sawi par par a, a lo ngaithla char char.

"Duh viauin hmangaih viau mah ila ka kalsan chhan chu i hria ang chu, ka tidik tih ka hria. Ka hmangaih êm avàngin ka hma chauh ka sial thei lo, a chhan chu nu leh a fa lo piang tùr kha ka ngaihtuah lo thei lo a ni. Fahrah ka nihtîr thei lo va, ka hmeichhiatpui lah sâwn ka pawmtîr ringawt thei lo a ni," ka ti sap sap a.

"I tițha lutuk! Ka chhuang lutuk che," tiin ka kut chu a rawn vuan a.

"Mahse, a harsa ve êm a ni. Ka hmangaih hmasak ber chu ka kalsan a ngai a, a thil tih chu dik lo mah se ka dem thei chuang lo. Ka dem theih loh vàng erawh chuan thil thleng ka siam țhain ka thlâkthleng thei chuang lo, kawng dik ber nia ka thinlungin min hrilh chu ka zawh ta tawp mai a ni. Min dem bîk lo tiraw? Mahse, thlahna mumal tak ka hrilh lo erawh kha chu hrehawm ka ti ve deuh țhìn, a chhan chu ka kalsan tih a hriat khân nâ a ti ve dâwn êm asin, min duhin min thlahlel ve hle si a," ka ti duah a.

"Mahse, in inkawp lai rengin a bialnu hlui a rài thei a nia," a lo ti vat a. U Puia chu a thiam lo tih ka hre mai, a àwm ve tho.

"Ni tho, U Mami khân a la duh ve êm a ni. A hmeichhiain a la duh ve tho bawk si chuan a lo zar ve țhin a niang; mahse, U Mami kha hmeichhe lêrh leh awmherh a ni miah lo, kan inkawp tih pawh a hre vek," ka lo ti a.

"Chu pawh ni se, an mu dùn tihna a nia, ka thiam lo ve ve, an thiam lo ka ti ve ve tho tho," a lo ti țâlh a.

Ka ngawi ta rih.

"Nupui nei reng chungin a la rawn beisei che a nih chuan ka sa khawp ang!" a ti ta.

"Ni lo, min beisei lo ang, eng emaw ti tùrin a rawn kal mai a niang," ka lo ti vat a.

"Heta a rawn kal vaih chuan a châk lo ang," a ti leh khar khar a.

"Eng nge a lo tih ang? Àwmang lo lutuk! Inhresa kan nih vangin min be mai a nih kha."

"A lo kal a nih pawhin keima'n ka hmachhawn ang, lâktlâk loh lutuk!" a ti leh a.

Hetiang țawngkam hi a hmang ngai miah si lo va, a lungawi lovin a thinrim viau a nih ka ring.

Pawi pawh ka ti chuang lo, inbiakna chhan tùr leh inhmuhna chhan tùr kan nei tawh lo va, eng thil mah sawi fiah tùr pawh a awm tawh hek lo.

Mutnaah chuan ka muhìl thei lo. U Puia hmel kha ka maimichhìn apiangin ka hmu zêl a, ka mut a chhuak thei lo. Ka harh tulh tulh maiin ka hria, ka ngaihtuahna ka kàwm chho ta mai mai.

Ka hmu kha mak ka ti hle a, ani erawh kha chuan mak a ti ve lêm lo a nih kha, makti hmel a put ve miah loh kha. Eng nge a lo tih ang? Min hmu tùrin a lo kal em ni? Ka awih chiah lo, kan inhmu fuh satliah mai mai a niang.

He pa hi chu ka hmangaih a ni. Mi pa ni tawh mah se ka la hmangaih tho, amah ka thlâkhlelhna leh ka duhna a kiam hek lo, chu chu vawiin khân ka hre chiang khawp.

Mahse, chutiang chu ni mah se ka va beisei leh tihna a ni lo, ka beisei lo. Ka beisei tùr pawh a ni hek lo, ka hmangaihna erawh ka la bo thei lo. A tân ka thinlung kawngkhàr ka hawng tawh a, mi dang ka hawnsak thei tawh lo ang.

Vawiin kha, a chhe lo chiang. A thangchhuah kawr hâk kha a inhmeh ka tia, a tilang lianin a tizahawm a, vawiina khatiang kawr ha zawng zawng zîngah chuan a inhmeh ber hial ang chu.

Ka phone-a kan pahniha kan thlalâkte chu ka en leh rih a, mut chhuak mawlh hek lo, a hmel lah chu a hlim ngaiin a la hlim reng si. A thlalâk ka thlír ziah a ni tih hi hre ve tak ang maw?

A thlalâk chu ka zoom a, a hmel lang kim vek si, lian thei tùr berin. A hmai chu ka chûl dan dan a, a hma kha chuan phone thlalâkah ni lovin a takah ngei khân ka chûl thei a ni si a, tunah erawh ka chûl phâk tawh si lo, mi tâ a ni tawh si.

Thil thleng awm lovin ni khat a liam a, U Puia chu hmuh ka inring rilru deuh a nia, a lo lang miah lo. Kha maw, min hmuh tumin a lo kal lo, thil țûl vàng a ni ka tih kha.

"Mi pa a ni tawh, fa neiin nupui pawh a nei tawh, beisei lo ti siin i beisei ru tho a ni maw? Mâwl lutuk suh, theihnghilh tumin i kalsan a ni lo'm ni? I thil tih kha a dik si chuan hma lam pan ta che," tiin ka inhau mawlh mawlh reng a.

Muangchângin ka kal a, ka phone chu ka hûm reuh reuh reng. Nichin lawka ka nutei min rawn phone-a a thil sawi chu ka ngaihtuah ngut ngut.

U Puia chanchin lam rêng rêng ka zâwt ngai lo va, anni lahin an sawi ngai hek lo. U Puia chanchin kaihhnawih lam eng mah ka hre duh lo tih an hriat vàngin min sawipui ngai lo; mahse, tûn țum chu a mak ta tlat!

"Puia'n i awmna min zâwt chamchî a, i patea'n a hrilh tâk kha, a pawi viau em?" a rawn ti a nih kha.

U Puia chuan eng vàngin nge ka awmna chu hriat a duh le? Khati chen kha min ngaihven lo va, tunah min rawn ngaihven e ka tihna ni lovin ka awmna ka chhûngte a zâwt a, kan inhmu ta bawk. Min neih lêt a tum em niang? U Mami kha a țhen leh tawh tihna em ni?

Ka ngaihtuah nasat êm avàngin in ka thlen lai pawh ka lo hre lo! Ka harh chhuak thut a, step-ah ka lo ding reng tawh niin.

Ka thaw huai a," Suangtuahna hian mi a va timâwl thei tak!" ka ti sap a, bag ațangin chahbi ka phawrh a.

"Tluangpui?"

Ka khawng awt lo chauh! Ka chabi ken lai pawh ka thlauh țhelh. Ka hnung deuh chiahah a ding a nih ka ring, a chhan chu a aw chu ka hre hnai lutuk. Engtin nge ka lo hmuh loh theiha ka lo hriat loh theih? A thâwm takngial pawh ka hre lo a nia, mi sual lo ni ta se vawi eng zât nge min thah hman ang?

Ka âwm ka dawm a, ka inher lo, ka hmu duh rih lo. Ka hmu ngam lo a ni mah, a chhan chu tûn ni hnih khat chhûng hian ani chauh hi ka ngaihtuahnaa awm a ni si a.

"Khawngaihin, ka be thei che ang em?"

'Khawngaihin'. Ni e, he țawngkam hi vawi hnih a hmang ta, ka hnial thei lo ang.

"Tu nge i nih?"

Da-rini aw fiak țhak chu ka hre chawpchilh nghál, ani hi chuan U Puia hi a rawn kal chuan a châk loh tùr thu a sawi tawh kha, hmachhawn ngei a tum kha.

"Puia ka nia, Tluangpuii hi biak lawk ka duh a."

"Tluangpui, i be duh lo tiraw? A nih chuan inah han lût hmasa rawh," a rawn ti ta mai.

U Puia hriat laiin Da-rini chu hnial ka duh hauh lo. Ka țhiannu a ni a, U Puia rawn lang hi a thin a rim a ni tih ka hriat vàngin ka hnial lo ang, bâkah, mawi lo takin U Puia chungah hian a che lo ang tih ka hria.

In chhûngah chuan rilru nuamin ka awm miah lo. Engtin nge an inhmachhawn ka hre châk a, an inbiakna ka hre châk bawk. Ka țhu hle hle thei lo va, ka vei sek. Da-rini chu rawn lût tawh se ka ti.

Amah chauhin a rawn lût, U Puia a rawn luh ve ka ring deuh ringawt nia! Kei hian ka lo la beisei chiang lutuk!

Eng mah a sawi loh avang chuan zawh dûk dûk lah ka hreh ve, ka hre châk tho bawk si, hrehawm ka tihzia chu. Min hrilh loh chuan ka zâwt bîk lo ang.

"Nâktûk zàn chu, zanriah ei chhuak ang hmiang?"

A rawn luh hnua a țawng vawi khatna!

"Engati teh thut nge?" ka lo ti vat a, zanriah kan la ei chhuak dùn ngai hauh si lo.

"Ka ti deuh thut maw le. Heta țanga hla vak loah a nia, dàwr thar a ni sia, an thil siam a tui leh tui loh hriat a châkawm ve alawm" a lo ti leh mai a.

"Pawi pawh ka ti lo; mahse, a mak teh thut ka ti," ka la ti țâlh.

"Kan dine-out vawi khatna tùr a nih hi, i châk ve lo em ni?"

Châk ve tho. A vawi khatna tùr, a phùrawm alawm.

"Châk e a, kan kal ngei ang," ka lo ti a.

Khua a lum vàngin fan hnuaiah chuan kan mu phar huang a, Da-rini chuan," Chhelova khân a nupui țhenin rawn pan tum ta che sela, i lo pawm duh ang em?" a ti ta thut a.

Fiamthu a nih ringin ka en vat a, a lo nui hauh lo nia.

"I sawi râpthlâk e a."

"Mipa chu ni ila ka hnek châk asin!" a ti leh daih a.

Ka nuih hak a," I hneh lo ang, ani chu a lian asin," ka lo ti a.

"Len leh len loh lam a ni lo, rilru hi a ni zâwk."

Titi dang vawrh ka duh vàngin," Da-rin, i bialpa chanchin i sawi ngai lo ve ngawt mai, i nei lo em ni? A hma kha chuan i neih ve reng kha," ka ti a.

"Thil hlui a nih tawh kha."

"I duh ve theihzia kha aw!"

A nui hak hak a," A dik alawm, ani kha chu a nihna a sâng tawh a, nuthlawi hausa zet a nei daih tawh. Nikum hmasa khân a nia, card pawh min pe thlap alawm," a ti a.

"A ni maw?! Ih, sum kha a ngaina ve riau tiraw?"

"Ve chiang e. Sum chu kan duh vek nain duh uchuak bîk hi an awm ve a, a mawi leh mawi lo pawh thlu lova sum ûm hi chu an awm ve alawm, a duh ber a nei tawh a, a hlim viau tùrah ka ngai," a ti leh a.

"Ni e, a hlim ang. Chuti, a dang kan zawng leh ang a ni mai alawm. Lalmawia hi ti mai la?" ka tih chuan a nui ta vak vak a.

"Hmeichhe enin min en lo va, kei pawhin mipa enin ka en bîk lo," a ti a, a nui leh vak vak a.

"A fel ve tûrh túrh alawm le," ka lo ti thung a.

"Fel e, fel tak a ni. A puitling bawk, nupui țha tak nei se ka duhsak hle a ni, kei ni lovin," a ti a, a nui leh var var a.

"Lalmawia chu ka fuihpawrh dâwn," ka tih chuan," A nuih a za ngawt ang, amah a han insawisa zui leh ngei ang a," a ti a, kan nui dùn hawk hawk a.

Ka sawi chhin dâwn chiang. Ngaihzâwng nei se a țha, mipa rintlâk tak ni ngei bawk se, kei hi chuan ka duh tawh rih lo thung.

Zanriah kan ei chhuahna chu hmun nuam tak a ni, a nuam ka tihzâwng tak. Mi dang pawh an awm ve țeuh tho nain kan fel thliam a, a bengchheng chuang bawk si lo, an thil siam pawh a tui e, a vâi viau lo bawk.

A phone a rawn ri a, a chhàn chuan Lalmawia a ni tih ka hre mai.

"Um, eng thil nge ni ta?...aw, thei e, aw, kan dine-out a...tak tak maw? Aw, rei lutuk lo ila tiraw?"

An inbiak zawh chuan min rawn enin," Lalmawia a nia, inhmuh lawk a ngai a nih kha. Min ngamtlâk ve sia, hnial ka hreh ve alawm, thil țûlah ka tibuai ve țhìn bawk nèn," a ti sap sap a.

"A țha alawm, kei chu inah ka lo hahdam veng veng ang."

Lalmawia chuan pâwnah min lo nghâk tawh! Zànah chuan kea kal hi a nuam a, a hlauhawm lêm lo bawk. In bul thleng min thlah a, an pahnih chuan an kal ta. Kei pawh muangchângin step-ah chuan ka pên chho chhat chhat a, țhenawmte pawh an la êng kalh mai.

Kawngkhàr bula lo ding ka hmuh chuan ka ding leh chat. Ka thâte chu a zãwi vekin ka hria, min lo nghâk tihna em ni? Min hmuh a tum tihna a ni ang maw?

"Eng nge i lo tih?"

Teh tâwng mai a.

"Biak che ka duh ka tih kha, khawngaihin?"

Hm, ka hnar reng thei lo ang, min biak a duh chuan min bia se, hekna a awm hlei nem.

"A țha e, sawi la, ka țhiannu kha engtik hunah pawh lo haw thei a ni tih chu i hriat ka ring, a hmuh che chuan a lâwm vak lo ang," ka ti a.

"Ka hria e."

Pâwna inbiak chu ka duh lo, mi dangin min lo hmuh chuan a mawi fahran dâwn lo. In chhûngah chuan ka luhpui a.

"In chhûngkua in dam maw?" Sawi tùr a vâng ve deuh ruih tlat a ni.

"Aw, dam e. A nawm reuh hi," tiin in chhûng chu a melh kual a.

"Nuam ve e."

"Tluangpui, i laka ka thil zêp vànga hetiang hun kan tawng hi pawi ka ti, ngaihdam ka dîl duh che a ni," a ti ta a.

A sawi chhuak thut a, min tihamhaih thut bawk.

"Nia, thil zêp hi a țha lo asin," ka ti ve ta ringawt.

"Pawi tùr leh buaina thlen thei tùra ka rin loh vàng a nia, i chunga hetiang ka thlentîr hi pawi ka ti tak zet a ni, thil thleng ka hrilh loh vàng che leh thil thleng chiang taka i hriat loh vàngin tûn hun hi kan tawng ta a ni," a ti leh a.

"U Mami'n i fa a pai thu leh a luhkhung thu che kha maw? Mi dang hnên ațanga hriat chu a mi deh dàn a dang rêng asin, min lo kawp hi ka ring phâk ngai lo rêng rêng, ka rinzia che kha; mahse, heti mai hi kan nih tâk hi. A țha vek, i hlim a nih chuan a țha a ni mai," ka ti chhuak ta hlawl a.

"Tluangpui, chu tak chu-"

"Keimah anga i rîla rah ngei fahrah a ni tùr kha ka ngaingam lo, mipa i nih anga i mawhphurhna la ngei tùrin ka duh bawk che a, ka tisual lo tih pawh ka hria," ka ti leh hmawk hmawk a.

"Tluangpui, ka hmangaih che."

"Ni lo, U Pui, kei chu min hmangaih suh, i nupui hmangaih la, i fa leh i chhûngte nèn. Kei hi chu min theihnghilh hmak rawh." Ka thin a phu nasa lutuk, ka țang țûng bawk a, ka thlan a bawl țek țekin ka ring hial a ni.

"Tluangpui, nupui ka nei lo."

"In ințhen maw? Ințhen hi a țha ngai lo asin, ințhenin a hrin chhuah țhat lohzia hre chiangtu ka nih hi."

"Khawngaihin, khawngaih takin ka thu sawi tùr hi lo ngaithla hrám teh."

A aw chhuaka ngenna nasa tak lang chu ka hria, chuvàng chuan ka ngawi ta. Ka thin a phu nasa a, chhûngrilah ka khùr bawk, tilang chhuak lo tùr erawh chuan ka inthunun hrâm hrâm. Ka kut nghet zetin ka hûm a, ka thlân a tla bawrh bawrh tawh hial.

"Mami khân min rawn luhkhung ngei, a fa paah min rawn puh bawk; mahse, thu dik a ni lo va, ti lo thei lova vauna a dawn vàng a ni zâwk."

Vauna a!!! Eng thu nge ka hriat tâk hi!

*MIHRING TU MAH HI HUN KAL TAWH SIAM ȚHA THEI AN AWM HAUH LO; MAHSE, TU PAWH HIAN NUN THAR BUL ȚANIN AN TÛN HUN AN SIAM ȚHA THEI THUNG*

☆LTK☆ - 40 By Dingdi Pachuau

Mahse, makti hmel ka hmuh duh lo. Thu dik tak a sawi nge sawi lo ka hre hauh si lo va, bâkah, a țhen leh tawhin a țawngkam thiamna hmangin min rawn bum leh a tum pawh a ni thei tho; mahse, chutiang mi chu a ni lo tih ka rilru lehlamah chuan ka hre kar tho bawk a.

"Vau maw? Tuin nge chutiang ti tùra vau a?" tiin a thuphungin, hriat chák hmel vak loh hian ka zâwt; mahse, ka hre châk lutuk, ka insûm hrâm hrâm zâwk a ni.

"I rin loh daih a ni ang!"

"Vau lo ni ta se, a rawn luhkhung che a, chu chu min hrilh hauh lo va," ka ti leh a.

"Hetiang hian kan inkârah buaina a rawn thleng ang tih ka hriat loh vàng a ni, Aizawl ka rawn phei hma ni, Zirtàwpni khân a rawn lût a, Aizawl ka rawn pheisan a, ka haw hma ngeia kan in lo chhuahsan tùrin ka ti a. A lo chhuah tâk ngei avàngin ka hrilh lo che a ni pakhat, a chhan chu chhuak lo mah se ka chhuahtîr ngei dâwn si a," a ti a.

A thu sawi chu tak tak a ni ang em? Chuti a nih chuan message ka dawn kha chu U Mami chhuah hnu daihah a ni tihna a nih chu.

"Chuan, a fa chu?"

"Ka fa a ni lo, sex ka hmanpui loh miau chuan engtin nge ka fa a pai theih ang? Ka rinawm lohsan ngai lo che," a ti leh a, min en reng. A thu sawi chu ring tùrin min duh tih ka hria; mahse, 'mahse' a la awm tlat. A chhan chu mi dang sawi ka hre tlat lo, ama sawi chauh hi ka hriat a ni rih si a, side A ngawr ngawr hi chu rin ngam theih a la ni lo ka ti tlat.

"Nang leh kei kan ințhen duhtu thil tih vek a ni. A duh chu a hlawhtling ta rêng a, kan inkâr chu heti hi a lo ni ta a, nangmah hmuh leh theih nâna ka tawrh nasatzia hi i hre thiam phâk pawhin ka ring lo, hloh che hi ka duh ngai lo va, kal botîr che hi ka tum miah lo bawk," a ti leh a.

Mahse, a thu sawi hi ring lova ka lêt duh loh miau chuan, tih theih a nei tawp nâng.

"I number-a ka rawn call nasatzia che i hre lo ang, number thar i hmang daih si a. I pateate ka zâwt chàmchî a, min hrilh duh hauh lo. Min hrilh lo mah se ka beidawng ngai lo, min hrilh hun an neih ka rin tlat vàngin. Zan tin i number-ah ka rawn call ziah che a, i hmang tawh lo ang tih chu ka ring tho; mahse, ka thei lo. Min ngai ang a, i khua a lo har ang tih ka hlau a, ka biak loh che chuan i ngaih a lo țha lo palh ang a, ka chungah titauin i thinrim ang tih ka hlau a ni."

"Zîng ka thawh hlim leh zàn ka mut dâwna ka rilrua lang hmasa ber, ka ngaihtuah hmasak ber i ni ziah a, i kal bo hnu khân zàn mut dâwnah 'muttui' tiin ka thlah ziah che a, nilênga i hun hman dàn ka zâwt ziah bawk che. Chhùnah pawh ni se ka buai lai pawhin ka ngaihtuah tho che a, i dam țha ang em tih leh min ngaihtuah ve țhìn ang em tih ka ngaihtuah ziah bawk."

Ka simcard hlui kha chu ka la dah țha reng, ka hmang duh tawh lo a nih kha. A chhan chu U Puia min rawn call ka hlauh vang a ni a, bâkah, mi dang ka number neiho pawhin min rawn call ang tih ka hlau, mi dang lak ațangin ka inthlawn hlauh tihna a nih ber chu. Ka pateate erawh hi chu ka be reng reng, ka nu leh pate an nia, anni hi chu an dang tlat.

"Ka ngai lutuk che a, ka ngaih lutuk vàng chein i in luah țhin bulah khân ka hman phawt chuan ka kal fo, a hnu lamah erawh ka thei ta lo va. Kan pahniha hlim taka kan awm dunna kha ka ngai a, khami in bula ka kal kha chuan i bula awm leh ang hialin ka inhre țhìn. A chângin kawngkhar bul step-ah khân ka țhu reng a, zàn dâr 10 pelh hnuahte ka haw chauh țhìn," a ti leh sup sup a.

Chuti khawp chuan min lo ngai a maw? Nupui a neih si loh chuan, hrehawm kan lo tuar thlàwn mai mai tihna a ni em? Ka thil zawh chian loh vàngin heti chen hi ka lo inhrem maw?

"Thil awm dàn dik tak ka hrilh che a nih chu, Tluangpui. Ka thil zêp vàng a ni a, ka thiam lo tih ka hria, harsatna min thlentu a ni ang tih ka hriat loh vàng a ni. Dik tak chuan kan ina a rawn luh vàng khân ka thin a rim lutuk a, a chanchin ka sawi peih hlawl lo a ni. Nang hi ka chàn che ka hlau a, thu dik lova min puh avàng erawh chuan ka chàn che hi ka ring miah lo thung; mahse, hun liam tawh, hrilh che ngaia pawh ka hriat loh kha i lo hre ve leh ta si a, thil a buai zo ta vek a ni," a ti leh charh charh a.

"U Mami khân a la duh êm êm che tih ka hria asin," ka lo ti sap a, amah pawh ka en ngam lo. Ka mitmengah hian rilru natna leh thîkna a lang chhuak chiang dâwn si a.

"A thlarau ka zah viau nain, ani ai chuan ka duh daih zâwk che. Mami chu hun liam tawha mi a ni a, nang erawh chu ka tûn huna mi i ni alawm. Ka duhzia leh ka thlâkhlelhzia che pawh i hriat kha, nang ka mamawh ang che hian Mami kha a hun lai pawh khân ka mamawhin ka hre lo, nang hi chu ka damna, ka nunna i ni, i tel lo chuan eng mah lo mai ka ni. Chuvàngin, chance vawi khat chauh min pe leh rawh, khawngaihin? Kaltîr che hi ka duh lo, ka phal lo bawk, a chhan chu ka hmangaih che a ni. Min kal bosan hnuah hian ka hmangaihzia che leh ka tân i hlutzia ka hre chhuak thar a, eng pawh thleng se ka hmuh leh ngei che a ngai tih ka hria, a theih dan zawngin ka rawn pan ta rêng che a ni," a ti leh duah a.

Min hmangaih. Min hmangaih tak tak ang em? Min duhin min thlahlel tih chu ka hria, min hmangaih nia a sawi hi a ni tak tak ang em? Ka ring ngam thei ang em?

Kawngkhàr a rawn ri a, Da-rini a rawn lût. Lalmawia a rawn lût ve miah lo, kawngkhar bul thleng chu a rawn thlah ka ring tho, amahin a rawn hawtîr lo tawp ang.

"Ka rei viau em? In lo sawi fel thei maw?"

Makti tak hian Da-rini chu enin," Engtin maw?" ka ti deuh há a.

"In inkár thu maw le, in sawi fel thei em ka ti."

U Puia chuan din pahin," Ka haw tawh ang e, hun min pêk avàngin ka lâwm e," tiin Da-rini chu a bûk khum nghat a, chutah min rawn en leh vang vang a, ngawi rengin a chhuak ta nghâl a.

Sawi tùr pawh ka hre lo, ka ngaihtuahna a buai nuai nuai maiin ka hria. U Puia ka hmu thut a, chanchin min hrilh zawng zawng kha ka rin loh lam daih a ni si a, min hmangaih thu chenin.

Da-rini chuan min rawn en a," I țhianpa nèn chuan in sawi fel thei ta em?" a ti leh a.

"Ka hre thiam lo, thil awmzia a sawi a, ka awihsak dáwn em ka hre lo va," ka ti ringawt a.

"I thinlungin a pawm dàn a ni mai alawm, i duh a, i hmangaih a, thil awmzia a sawi fiah chuan i lo ngaihdàn leh i lo hriat dan nèn a i an loh chuan i thinlung hrilh dan che kha a pawimawh ta ber ang chu," a lo ti leh mai a.

"Ka la hre thiam lo, ka buai."

"Hm, hun i mamawh a nih kha. A thil sawi kha i lo hriat leh pawm dàn nèn a inang si lo va tiraw? Hun i mamawh a ni," a ti leh a.

"A dik ang."

Mut hmunah chuan ka ngaihtuah nasa mai a, ka thutlûkna tùr erawh ka hre chiang sa tho. Ka thinlung duh dàn hi ka la pawm lo mai mai zâwk a ni.

Chance pêk leh ka duh; mahse, ka hlauthâwng deuh bawk si. Awlsam taka chance lo pêk leh ringawt pawh chu...

Mahse, chumi hma chuan ka nuteite phone-in thil awmzia ka han zâwt ang a, an ngaih dàn ka zâwt ve chhin phawt ang. An duh loh dàn anga awm chu ka duh lo, kawng engkimah ka engkima engkim an ni si a.

U Puia thil sawite kha ka ngaihtuah lêt a, khatiang khân a lo awm țhìn tak tak em ni le? Ka ngaih tluk zetin min lo ngai ve a, hrehawm ka tih tluk zetin hrehawm a lo ti ve tho tih kha a dik tak tak ang em? Dâwt ni tùr chuan ka phal lo, a lo tuar nasa ve êm a nih kha.

Mahse, zanin khân eng thu mahin ka thlah lo a nih kha. A lo kal leh ang em? Lo kal leh lo hian min haw chhohsan daih ang em? A thil sawi ka awih leh awih loh ka hrilh hauh si lo.

Ani hian keimah ang khân min kalsan ve daih ang em? Ka hlauthâwng leh ta deuh tù tú mai.

Zîngah ka nutei ka bia a, U Puia lo kal chanchin leh a thil sawite chu ka hrilh a.

"Nute, ka hre thiam lo tak tak a ni, ka thinlung hi chuan pawm a duh a; mahse, ka la hlauthâwng deuh bawk si a, thutlûkna siam a har ka ti," ka ti a.

Ka nutei chuan," Thil thleng engkim a hrilh che maw? Engkim a nia ka tih," a rawn ti a.

"Aw, hrilh e. U Mami nau pai kha a fa a nih loh thu leh an in pawh a chhuahsan nghâl thu min hrilh. Chuan, U Mami khán ti lo thei lo dinhmuna a din vànga luhkhung niin a sawi a, vauna a dawng niin a sawi bawk," ka ti a.

"A dik alawm, a sawi dik a nih chu. Helam chanchin eng mah hriat i duh loh vàngin kan hrilh lo che alawm, thil dang sawi a nei em?" a rawn ti leh a.

"Thil dang a la awm zêl em ni? Nizàn chauh khân kan la inbia a, a la sawi hman lo a niang," ka ti a.

"Aw le, a la hrilh mai ang che, i patea nèn chuan i thutlûkna ang ang kha kan pawm vek, i hlimna kan duh ber alawm, kan fanu i ni miau a."

Ka nutei leh ka patea hi chu aw, ka tân hian an lo piang lo ang tih hi ka hlau ngawt mai. An rila rah fa ni lo mah ila, an fa tak ang chiahin min enkawl a, hmangaihna leh dawhtheihnain min dawm kâng a, ka lungngaih lai ber pawhin min hnèmin min hre thiam êm êm a ni si a.

Nilêngin ka ngaihtuahnaah U Puia a awm. Eng nge a tih ve ang? Khawi laiah nge a innghah ang? Nakin zànah a rawn kal leh ang em? Min kal bosan loh hrâm ka beisei.

Zanriah ei khamah chuan ka awm hle hle thei tawh lo, a lo kal ka ring a, ka lo nghâkhlel lutuk ringawt. Nizàna min la hrilh zawh lohte chu min hrilh leh ang a, min hrilh tùr a la nei ang chu maw. A nih loh tal pawhin min hmangaih thu kha min hrilh nawn leh se...

A rawn lang hauh lo. Zàn a rei telh telh a, ka harh tulh tulh. Ka hlauthâwng a, nizàn lama ka biak țhat loh vàng khân min hawsan a nih ka ring deuh bawk.

Thil awmzia sawiin a rawn insawi fiah te te a, a reh leh ta hmak si. Chance pe leh tùrin min ngên te te a, min ngaihsak leh si lo. Amaha beiseina nei tùrin mei a rawn tiling leh sêt sêt a; mahse, a rawn ngaihven leh si lo. Ka thinlung a tihnèm leh tawh nèn, min ngaihsak lohna chuan min tina leh ta tlat.

Ka mittui chu ka hru tâwk a, ni e, a tâwk a ni. A tân ka thinlung ka lo hawng leh țan a ni a, ka nêm leh viau tawh a, min tihderin min tihnat leh a tum a nih chiah hi. Ka panna lai a hria a, thiam takin ka panna zâwnah min rawn bitum chat a, min hneh teuhzia hi.

Tunah chuan beiseina ka nei tawh lo ang.

Da-rini hlim taka a titi bawrh bawrh lai chuan doorbell a rawn rì a, nichin deuha Da-rini Lalmawia'n a rawn biak avàng khân a rawn kal leh a nih ka ring a, ka lo ûksàk lêm lo va.

"Aw, nang i ni maw? Lo lût rawh, hei țhiani pawh a khua a lo har tawh lutuk a," a ti bawrh bawrh a.

Ka ngei reuh tak tak, chutiang a sawi kher chu. U Puia bulah hian a nungchang hi a danglam vek ni maiin ka hria, a inlâk hlauhawm ve tehlul nén khân, tunah lêm, hnap ang chauh a nih leh tawh hi.

"Hawh, lo țhu rawh, țhenawmte inah ka'n kal lawk ang e. Lo inkàwm ula, lo sawi fel vek tawh rawh u," tih leh tlàn chhuah a rual nghâl a.

Nizàna a lo lan loh vàngin ka thin a tirim a, melh pawh ka melh duh lo lui tlat. Ka beisei êm êm laia a lo lang lo khán min tilungawi lo.

"Vawiin lamah i hah em? I chauh hmèl riauin ka hria," a ti a, min rawn en reng tih ka hria.

"Ka chau lo," ti ringawtin ka chhâng, ka aw chhuak pawh a nèlawm tehchiam lo.

"Ka lo kal hi i lâwm lo em?"

Chhàn ngaihna ka hre miah lo. Lo léng tùrin ka duh a, ka duh lo bawk. Ka thin a tirim a, ka thinrimna lah chu han tihlan chiam chi lah a ni mang meuh bawk si lo.

"I làwm loh hmel riauin ka hria. Thil hrilh tùr che ka la nei a, ka lo kal lo thei lo a ni. Min lo ning viau a nih chuan pawi ka ti, hmuh leh che hi ka duh si a," a ti leh sup sup a.

"Eng nge min hrilh tùr chu?"

A ngawi vang vang phawt a, rei ka lo ti. Ka lo nghâkhlel lutuk a ni mahna.

"I lung ka tiawi lo a nih chuan a pawi ka ti, ngaihdam ka dîl nghâl e. Nizàn khân rawn kala rawn hrilh leh vek che kha ka tum a, ka țhianpa ber a pum a nat vàngin ka buaipui a ngai si a, ka lo kal thei ta ngang lo a ni. Zîng dâr 4 vêlah ka mu ve thei țâwk a, ka muhìl thei lawk lo lehnghâl," a ti dap dap phawt a.

A țhianpa pum nâ a buaipui vàngin a rawn kal thei lo a nih chu. Dâwt a sawi nge sawi lo hriat tumin a hmel ka en ta vat, ngun deuh hian mit khap miah lo hian min lo la en kur reng.

"Tu i țhianpa?" ka ti țâlh.

"Manipur-a mi a nia, hetah hna thawkin a awm a."

"A dam tawh em?"

"Um, a zia tawh, damdawi inah erawh a la awm a, ngaihtuahawm erawh a ni tawh lo," a ti leh a.

Nizànah a buai vàngin, a țhianpa buaipuiin a lo kal thei lo va, kei lahin lungawi loh nân ka lo hmang a, ka lo be țha duh lo vêl a. Ani chuan a țhianpa a buaipui vàng liau liauin zîng dâr 4-ah a mu ve thei chauh a ni si a.

"A zia lo hle mai," ka ti sap a.

"A ngaihtuahawm tawh lo ka tih kha, naktûk lamah chuan a chhuak thei tawh mai ang. Nizàn hmasaa ka thil sawi kha i lo ngaihtuah em?" a ti ta a.

"Ngaihtuah ta ila?"

"Min ring tùrin ka tilui thei lo che; mahse, ka sawi zawng zawng kha thu dik vek a ni. Ka hmangaih che a, beiseina nèn ka rawn pan che; mahse, i thinlung ka thunun thei lo, a neitu i ni si a," a ti leh dap dap a.

A sawi dik lo. Ka thinlung neitu chu amah hi a ni, amah chauh hi ka thinlung neitu chu a ni asin.

"Hun harsa ka paltlangtîr che avàngin a pawi ka ti, chu pawh ka thil zêp vàng liau liauin. Siam țhatna hun min siamsak leh rawh, ka siam țha vek ang," a ti leh a.

"Nizànah i rawn kal ka ring a, ka lo beisei êm êm che a," ka ti ta sap. Ka thinlung nèmzia chu a hre chiang nghâl dâwn lutuk.

"Ka tum alawm; mahse, ka țhianpa kha ka buaipui a ngai tlat si, vànduaina hi ka lamah a țang thut ni berin ka hria asin. Chanchin rawn hrilh tùr chein i number ka nei si lo," a ti a.

"Mahse, min lo beisei reng tih hriat chu a nuam ka ti," a ti leh zauh a.

"Thil dang min hrilh tùr i la nei em?"

"A tam mai, a pawimawh ber chu 'ka hmangaih che' tih hi. I tel lova nun hman kha hrehawm ka ti a, i tân rinawm lova min hriatna khân min tihrehawm zual țhìn; mahse, chakna ka neih phahna a ni leh tho bawk. A chhan chu i tân ka rinawmna hmuhtîr leh ngei che ka tum tlat vàngin ni tin ka infuih thar țhìn a ni," a ti leh a.

"Kei chuan hlim taka hun in hman theih nân leh in țhat tlàn theihna a nih ringin ka kalsan che asin, i fa lo piang tùr a fahrah loh nân ka ti bawk a," ka lo ti a.

"Tunah chuan thu dik i hre tawh a," tiin beisei nei tak hian min en a, a mitmenga beiseina lang chiang zet chu a hmuh hmaih theih loh.

Rei deuh tak kan ngawih dun hnuah chuan," Nichin khán dâwt i sawi. Ka thinlung neitu hi ka ni lo, a neitu chu nangmah chauh i ni," ka ti chhuak ta nge nge a.

Min rawn hnaih dâwrh. Ka kut vuan chung chuan ka thu sawi chu ring ngam chiah lo deuh hian," I ti tak tak em? Tak tak a ni tiraw, Tluangpui? Chance min pe a ni tiraw?" a ti mawlh mawlh a.

"Aw, chance ka pe che, ka hmangaih êm che vàngin. Chuan, kan inkârah eng thil mah zêp tùr awm tawh suh se," ka ti a.

Ka țhutna ațangin min pawm tho lawp a, nghet zetin min kuah. Kei pawhin ka kuah lêt a, min thlah leh phal tawh lo a niang tih tùr khawpa nghet leh reiin min kuah. Ka thâwk a tawp thei mai dâwnin ka hria.

Lungchim lutukin kan infâwp. Kan infâwp lo rei tawh a, țawng pawh kan tum lo. Kan duhthawh a, kan tàwp hlei thei lo, a àwm ve tho. Kan induh tawn a, kan inthlahlel hle si a.

A hnuah erawh min kuah nghet lo ta deuh, min thlah chuang lo.

"Ka hmangaih che, Darling. Engtikah mah i kal ka phal tawh lo ang, ka chelh tlat tawh ang che, ka lâwm e," a ti mawlh mawlh a.

"U Pui, min hmangaih thu kha han sawi nawn leh teh!"

"Ka hmangaih che, Tluangpui. Ka thinlung, taksa leh thlarau hian a hmangaih che. I tel lo chuan nun ka duh tawh lo, ka nunna ber tel lo chuan he khawvêlah hian dam ka duh tawh lo."

A țawngkam hman chu, ka nuih a tizâ a, ka duh viau bawk si. Hetiang hi a sawi chhuak ve thei ang tih pawh ka ring pha lo a nia.

Tunah chuan ka hlim tak zet tawh. Nichîna ka rilru leh tuna ka rilru awm dàn chu a inthlau lutuk a, lei leh vàn ang vêl ni hialin ka ring. Ka hlim lutuk a, ka ngaih a țha lo lek lek hial zâwk!

"U Pui, ka kalsan hnu che ațanga i hun hman dàn zawng zawng ka hre châk! Min hrilh duh ang em? Ka lo ngaithla ang," ka ti sap sap a.

Chair-ah țhuin a mal chungah min țhuttîr a," A thui dâwn lutuk asin, i ngaithla peih meuh ang maw?" a ti sup a.

"Teh réng." A hmuiah ka fâwp zauh a, ka nuih sak a.

"Eng thil nge i tih?"

"I hriat reng kha."

"Min fâwp dáwn emaw ka ti a."

"Ka fawh reng che kha."

"Ka hmui pawh i dek hlei nem."

"Nakinah min hrilh zawhah ka fâwp ang che," ka tih chuan a meng sawr sawr a.

"Mipa dangin an lo hêl che em?" a ti daih a.

"Ka hre lo, kei chuan ka hêl lo," ka ti a.

"A nih, làmnaa kai chhuaktu che kha?"

"Min lo hmu elo?!!!"

"I lam thiamzia kha-"

A hmui ka hupsak vat, ka lâm kha min lo hmu reng a nih chu. A zahthlâk, ka lâm thiam lo si.

"Sawi tawh suh!"

A hun hman chhoh dàn chu a sawi ta sap sap a, U Mami thih thu a sawi chuan makti zet hian ka meng phâwk nasa.

"U Mami a thi maw!!! Ka rei, engtin nge a nih theih?" Mak ka ti, min țhâwng lutuk!

"Kei pawh ka hriat tirhin min țhâwng lutuk! Mak ka ti a, thah a la ni zui. Mak leh zual ber chu Mami thattuah chuan puh ka ni!"

Sawi tùr rêng ka hre lo! Makti zetin U Puia chu ka en reng ringawt!

* TAKSA MAWI TAK NEI HMEICHHIA CHU ZAN KHAT ATÂN A TÂWK A, THINLUNG ȚHA TAK NEI HMEICHHIA ERAWH DAM CHHÛNG ATÂN A ȚHA THUNG*

☆LTK☆ - 41 By Dingdi Pachuau

"U Pui..!!!" ka ti chhuak hliai a, mak ka ti a, thil theih loh tàwp ni tùrah ka ngai.

"Ka ngai che asin, i tel lova khâng hun hrehawm lutuk ka pal tlang thei kha, min hmangaihna vàng chauh a ni. I mi hmangaihna vàng chauhin ka tuar chhuak thei asin," a ti sup a.

A nghâwngah ka kuah a, nghet takin. Ka tel lova a lo tawrhnate chu ka tihnêpsak thei tawh lo tih ka hria; mahse, chutiang thil hrehawm rilru chhûngril thleng hliam thei a lo tuar chu ka khawngaih, eng mah ka hre ve si lo.

"A pawi ka ti, kei lahin eng mah ka lo hre ve si lo. Pawi ka ti tak tak a ni, hrehawm i ti lutuk dâwn si a," ka ti a, a hnungah chuan ka chûl pah a, a rilru hliam nasa tak chu tihdamsak ka duh.

"Ka bulah awm la, engkim ka tuar thei ang."

"Ka kalsan tawh miah lo ang che." Ka rilru tak takin ka sawi, ka thu tak viau bawk, a chhan chu kalsan ka duh tawh lo. Ka tawrh ang tluk zetin a tuar ve tho ang, bâkah, dâwta puh niin hmingchhiatna namên lo a la tuar zui.

"Ka lâwm e," tiin ka âwmah chuan a hmai chu a thukru a, a thaw hawk hawk bawk a.

"I rim hi ka ngai țhìn, i engkim hi ka ngai ngawih ngawih. Ka bula awma min hnèm tùr leh engkim a țha leh vek ang tih min hrilh tùrin ka duh țhìn che. Zan tin ka ngaihtuah che a, ka tel lova i hlim theih hi ka ring bîk ngai miah lo, a dik tiraw?" tiin a rawn dâk chhuak a, ngun zet hian min en a.

"Hlim nâng, ka ngai lutuk che alawm; mahse, nupui i neih tawh chuan ka tân chuan lo inrawlhna chi a ni tawh si lo, kârah naute a awm tawh phei chuan ka tân chuan inthiar fihlìm mai loh chu tih theih a awm ngang lo a ni; mahse, tunah chuan eng mah zâwt chiang lo chea ka kalsan daih che kha ka inhaw hnuhnawh ta kher mai," ka ti a.

"Tunah chuan engkim a fel tawh alawm, inhuatna tùr a awm lo. Hrilh mai tùr che ka nih laiin ka hrilh lo che a, tunah hi chuan engkim ka hrilh vek zêl tawh ang che," tiin ka hmui chu a en vung vung a.

"Nia, zêp nei lo dùn tawh ang aw. I mit hnuai inrîn hi keimah vàng a ni tiraw?" tiin a dark circles chu ka kutzungchal chuan ka tawk dan dan a.

"Ni tho, ni lo tho bawk. Zànah mut lama harsatna ka nei țhìn a, chuan, zu ka in tawp mai țhìn, min chhâwk êm êm phei chu ka hre lo, ka chahthlâk tawp erawh chuan tlêm chuan a zia. Tûn thleng hian chu harsatna chuan min kiansan thei lo; mahse, zu chu ka in chhunzawm tawh chuang lo a nia aw. Damdawi ka ei ta mai zâwk, a awlsam bawk a."

Zu a lo in țhìn maw? 'Eng mah zêp loh tùr' kan ti tawh bawk a, a sawi chhuak ta niah ka ngai. Zu hi chu ka duh lo viau asin, mi tu mah hian in lo se ka duh, insùm theih lohna a awm si a.

"Nih, ka bulah mu ta la?" Damdawi a ei pawh chu ka duhpui lo, țha ka ti lo.

"Min thlêm hauh suh!"

"Ka ti tak tak alawm, ka bula i mut chuan ka kuah che ang a, i mut hma chu ka chûl che ang a, 'I bulah ka awm reng ang' tia hnèm chein 'Engkim a țha vek ang' tiin ka thlamuan bawk che ang a..."

Ngawi rengin min en ngur ringawt.

A hmuiah chuan ka fawhsak a," I chunga hetiang thil a thleng hi pawi ka ti lutuk ringawt-"

"Sawi tawh lo ang," tiin min rawn fâwp leh hmak, ka țawng chhunzawm lo chiang ta kher mai.

Da-rini a rawn haw a, U Puia mal chung ațang chuan ka țhu sawn vat, ani erawh a rawn nui lût sâng. Dâr zât ka en vat a, ka rin aiin a lo tlai tawh! Thil dang kan lo ngaihtuah loh vàng a ni, kan pahnih chauh kan lo inngaihtuah a!

"Ka lawmpui che u, in sawi fel thei ta tih ka hmu thiam, in inkârah buaina a awm pawhin inzâwt chiang țhìn ula, in inkârah eng emaw harsatna pawh a lo thleng a nih pawhin zêp nei lovin inhrilh țhìn ula, in pahniha in țan rual tlat chuan sut kian dàn tùr chu a awm zêl mai ang," a ti duah a.

"I puitling sawt ka ti!" ka lo ti vat a.

"Ka puitling sa reng," a lo ti a, a nui pah hak hak a," Zanin chu thil sawi tùr in ngah àwm sia, ka mutsan dâwn che u aw," a ti leh a.

Sawina hun remchâng a niin ka hria.

"Zanin chu U Puia hi riak ve ta se pawi i ti ang em? Ni lo, khatiang lam kha a ni lo, engtin mah kan awm dâwn lo, ka bulah mu se ka duh mai a ni," ka ti a, a makti hmel nuihza hmelin a rawn thlâk tâkah chuan kei pawh ka nui ve tho.

"I va ho tak! Hlim deuhin inkàwm r'u," tiin bathroom-ah chuan a lût ta daih a.

"I bula ka riah i phal maw?! I ti tak tak em?" ani lah chuan a lo ti a.

"Aw, i harsatna tawh kha solve dàn kan zawn a ngai alawm, tihtàwpsak che ka duh a, damdawi leh zu tel lova tihtàwpna kan zawn a ngai a ni, bialpa zu in ka duh lo va, damdawi tih hmang lah ka duh bawk si lo," nui chung hian ka ti leh a.

Da-rini mut hnuah chuan kan mutna tùr chhuatah ka phah a, khua a lum bawk si a, ka khum a lian si lo, kan pahnih chuan kan chêp lutuk palh ang.

Toothbrush thar ka la hman loh chu ka pe a, kan mut theih meuh chuan a lo tlai leh zual tawh.

"Hetia ka han kuah leh thei ta che hi ka mumang a ang ka ti rum rum mai, zîngah ka harh rualin i bo leh daih ang tih ka hlau," kuah ngheh sauh sauh pah chuan ka ti sap sap a.

"Ka bo dâwn lo, i lak ațang hian ka bo ngai lo ang, ka lak ațang pawhin i bo ka phal tawh hek lo."

A chalah chuan ka fawhsak vawng vawng a, ani pawhin a hmai chu ka áwmah a phûm vang vang a, a chângin ka kawr chhanah chuan a hmui chuan a rawn nawr leh châk châk țhìn a.

"A lum sia, i kawr hi hlîp daih la?"

"Aih...thlèmna a hnai duh," ka lo ti vat a.

"Ho e, kâwng achin chung lamte chu a pawi hlei nem. A rai theih loh bawk a."

"Mahse, a chutney a ni ve tho aw."

A nui tih ka hre mai, a kut chu ka hnung lamah rawn zen lûtin ka kawrhnuai kilhna chu a rawn phelh ta zauh a.

"Chimawm miah suh!"

Kan țawng ring lo va, Da-rini pawhin a hre pha hauh lo ang. Kan thil sawi hi ring deuh deuha sawi chi lah a ni hek lo; kan phun deuh sar sar, a romantic ka ti phian.

"U Pui, kan chesual lo ang tiraw? A chhan chu nula thianghlim ni chunga pasal atân neih che ka duh a ni, chu chu min vènpui la?" ka ti, hetia ka tih loh chuan a duhna hi a tihlawhtling ang a, ka lo tum ve țang țang nula thianghlim ni chunga pasal neih kha ka tlin lo ang tih ka hlau. Keimah ngei pawh hi ka inhlauhpui, a chhan chu mi pahnih induh kârah chuan châkna hian lalna chan a duh țhìn si a.

"I duh loh chu ka tihpui miah lo ang che. Ka hmangaih che alawm, nupa ni lo inkárah chuan sual a ni tih ka hre ve tho a nia."

He pa hi chu ka va hmangaih tak!!!

"Mahse, i kawr hi chu hlîp hrâm la, a nih loh pawhin i kawrhnuai tal kha."

Ka kawrhnuai zâwk chu ka hlîp ta nge nge, awlsam zet khân a kilhna kha a phelh tawh a ni a, tuna ka kawr hâk hi chu bân bùl teng niin ka thâwl hnak bawk, bâkah a chhîng tiu teu hle a, khua a lum avàngin inah chuan ho deuh deuh hlîrin ka awm ţhìn, mutnaah phei chuan kawrhnuai ka ha khât khawp mai.

"Hetia kuah che hi ka duh alawm."

Ka kawr a hlìm chhoh avàngin ruak thàwthâng tho chu ka ni; mahse, ka hnial bîk lo, ka zak hran bîk lo bawk.

Kan ngawih vang vang hnuah chuan," U Pui, tu nge tualthattu chu ni ta?" tiin ka zâwt leh țan ta a.

"Han ring chhin lawk teh, i mi hriat chian a nia."

Ka ngaihtuah a, rin chhin tùr pawh ka hre lo. Kan chunga sual duh tùr ka hre tlat lo, bâkah, ka hmel hriatho zîngah hian tualthat duh tùr àwm ka hre tlat lo.

"Ka hre lo, rin chhin tùr pawh ka hre lo," ka ti sap a.

"Pu Chhuana," a ti ta sup a.

"Pa Chhuana!!..maw!!!" Mak ka tih lutuk avàng chuan a beng ka khawihsak niap niap pawh chu ka tàwp chiang lutuk tlat! Engtin nge a nih theih? Thil theih a ni lo.

A va mak! Ni lo, engtin nge a nih theih! Pa Chhuana chuan min duat êm kha, ka patea țhianpa a la ni zui. He thil hi, a mak ka ti tak zet, râpthlâk ka ti bawk.

"Ka thîk țhinzia kha, kei chuan kha pa kha ka ring ve thei lo a ni, nangma chungthuah ngat phei chuan. A ngaizâwng che ka tih ziah țhin kha, a chhan chu a mitmengah khân a duhna che a lang tlat zêl a ni," a ti sup sup a.

"A mak e!!!"

"Mak ka ti ve tho a nia, tual han that duh tùr êm chuan ka ngai lo bawk," a ti leh a.

A mak êm a ni. Tual a that a, U Puia an puh daih bawk sia, ka la hre thiam lo. U Puia nèn kan inngaihzàwn vàngin U Puia tàl awhtîr nân tual a that tihna em ni?

"Engati nge U Mami chu a thah daih le?"

"Sawi tùr a tam."

"A bul tê ațangin ka hre châk ngawt mai, Pa Chhuana chu a mak ka ti, Nu Parteite an zak dâwn ém mai, an rilru a na dâwn si, chutiangin ka patea pawh, a țhianpa ber a ni si a," ka ti sap sap a, a beng chu ka tuai neuh neuh reng a.

A mak a ni! A mak ka ti lutuk a, awih a har hial zâwk!

"A nih, U Mami a thah chhan chu i bialnu hlui a nih vàng maw? Nangma thah ang tùr berin a ti tihna em ni? Chuan Jail i tàn chuan kei nèn kan ințhen thei ang a," tiin ka ngaihtuahna chu ka sawi chhuak ve a.

"A hmasa berah chuan i hmel țha lutuk hi a ni, mipa lu tihai țhìn chu. I pa Chhuana pawhin hmel țha chu a hai bík lo, bâkah nang chu i thinlung a hausa tel bawk si a," a ti phawt a, chutah," Mami fa paina kha Pu Chhuana tho hi a lo nia," a ti leh a.

E khai! Pa Chhuana chu leh! A va mak lehzel ve! A fa a pai vàngin a thuhnuaia kûn tùrin a ti em niang? U Mami chuan a lo duh ve tho tihna em ni? A fa hial a pai a nia!

"An inngaizâwng tihna em ni?"

A thaw hawk a," Pu Chhuana chuan a pâwngsual a ni," a ti leh ta!

Zanin hi ka hriat loh ka hre tam ta lutuk a, a râpthlâk chi hlîr lehnghal, mak tiin ka phu nawn awn awn a nih ber hi.

"Pa Chhuana chuh, a va mak êm êm! Chutiang ti duh tùr khawp chuan ka ring thei thlâwt lo! Engtizia nge ni le?" ka ti vang vang.

"Mami kha ka bialnu hlui tih a hria a, a hriat dàn erawh ka hre lo. A inah a han lènchilh a, nang leh kei inkâr tibuaitu atân a thlêm ta a, ani chuan a lo duh lo. A hnial tâkah chuan ţha té chuan a chhuahsan ve mai; mahse, a han lêng leh. Tah chuan tum nei rânin a che ta. A che fuh ta bawk, Mami chu a thuhnuaiah a dah thei ta a, dâwt sawia min luhkhung tùrin a ti a, a mutpui tawh miau avàng leh a mutpui lai video a neih tlat avàngin Mami chuan a hnial thei lo, a hnial chuan thahah a vau lâwk diam bawk."

"Naute kha a lo pai bawk sia, kha kha titla tùrin a ti bawk. A naupai pa nia min puh tùrin a ti a, kei lah khân eng mah ka hre si lo, thinrim tàwpin ka lo chhàwn a, in chhuahsan tùrin ka ti bawk si. Khatih lai khân a rilru chu a buaiin a hrehawm ve ngawt ang, ka khawngaih hnuhnawh asin."

Kan ngawi dùn ta vang vang.

A hnu daihah chuan,"Thu dik kan hriat chhuah theihna chhan chu kan in a chhuahsan hma khân a phone-ah video-in a thil tih dàn leh a thil tih chhan zawng zawng chu a puang vek a, vau a nih dàn leh pâwngsual a nih dàn zawng zawng chu a record thlap a ni. Chu chu Hminga hnêna a kalin memory card chu Hminga kawr ipteah a lo dah a, Hminga chuan a dah tih pawh a hre lo. A chhan chu khami zàna a kawr hâk kha a ha chhuak leh tawh lo tihna a ni ber ang chu."

"Jail-ah ka awm a, ka awm rei ve hman asin, Hminga chuan memory card chu a hmu chhuak ta hlauh a, chuta țang chuan thil awmzia chu chhui țan a ni ta a, Pu Chhuana chu a inpuang lo thei ta lo a ni," a ti leh sup sup a.

U Puia chuan a tawrhna chu a sawi lang mang lo a ni a; mahse, ka ring thiam deuh tho. Tualthattua puh ringawt pawh chu a râpthlâk lutuk, a tih ni miah loah Jail a luh phah a, hmingchhiatna zawng zawng a phur vek tho a nih chu. Thu dik hriat hnuah chauh chhuah zalèn a ni.

U Mami pawh chu, a va lainatawm tak! A chan rápthlâkzia leh khawngaihthlâkzia chu, hrehawm a ti dâwn lutuk!

"U Mami chu, ka va khawngaih tak! Hrehawm a ti dáwn ém asin, a zahthlâk dâwn bawk si, a lainatawm tak zet a ni," ka ti sap sap a.

Kan ngawi leh rih. Kan ngaihtuahna kan kàwm a, țawng lo chuan ka ngaihtuahna chuan hmun hrang hrang a fang zut zut a, U Puia Jail awm te chu ka mitthla chhin bawk a.

"Eng mah ka hriat loh avàngin min ngaidam tawh aw, nun hrehawm tak, damlai hremhmun dik tak i tuar si a, kei lah hnèm tùr chein i bulah ka awm si lo, ka thiam loh a ni," ka ti sep sep, a bulah lo awm tal ni ila chuan...

"Min hmangaih tho alawm." A aw chu, a mut chhuak aw ngawih ngawih.

A chalah chuan ka fâwp vang vang a, ka mittui pawh a luang nghâl zãih bawk.

"Muhìl tawh rawh aw, tunah chuan engkim a țha vek tawh. Ka hmangaih che. I bulah ka awm tawh a, ka kalsan tawh lo ang che, i bulah ka awm reng tawh ang," ka ti sep a.

Min kuah nghet sauhin," Ka lâwm e, kei pawhin ka hmangaih che," a ti ve. A mut chhuak aw han sexy-zia chuh, he pa hi chu a aw ringawt pawh hi ngaihzàwn tham a tling ve chiang a ni. Ka bialpa a ni hi ka vànnei ngawt mai, ka hmangaih a, min hmangaihtu a ni bawk si.

A lu chu ka chùlsak reng a, kan țawng tawh lo. A muthilh hmaa muthilh ka duh lo va, ka intiharh hrâm hrâm.

A thâwk dàn ațang chuan muhìl a ang tawh khawp mai, a muhìl thei a ni ngei ang. Ka va lâwm tak! Zu leh damdawi hmanga a han intimu tùr chu ka mitthla chhin a, ka khawngaih hluah hluah.

"Tui takin muhìl rawh aw, ka hmangaih. Tihian ka kuah reng ang che, muthilh theih lohna tùr a awm tawh lo, mangchhiain an kal bosan vek tawh che," ka ti sep sep a.

Ka mut dàn ngai ang lo deuha mu ka nih vàngin ka harhvâng viau. A rawn che deuh hlekah chuan ka harh nghâl a, ka kuah leh vat. Ka bula mu hi ka hre chiang a, a bulah ka mu a ni tih hria se, hringnun mangchhiain a kalsan tawh a ni tih hria se ka duh bawk.

Zíng lama ka harh chuan a lo harh daih tawh! Kan lo inkuah tawh lo va, a kiua lukhama inbeng kângin min en kur reng tawh!

"Hi, i harhna a rei tawh em?" Ka aw chu leh, a ri chhuak mang hlei nem le.

"Morning, LTK. Lungmuang takin ka muhìl ve a ni tih chu a àwihawm loh lek lek a ni! Chutah, khawvêla ka duhthusàm, zîng ka harh veleh ka bula muin i hmel ka hmu thei nghâl bawk a. Hetiang hian zîng tin ni thei se ka ti."

"I muhìl thei chu ka lâwm hle mai," ka ti a, min en hnai sia, ka hmai chu a mawm ngawt ang chu!

"Engtin nge ka muthilh phal zâwk le tih ka lo ngaihtuah a," tiin ka hmai ațang chuan min enthla dan dan a.

Ka nuih sak a, kan puan sin ve mai mai, pan angreng tak chu pawt chhoin ka âwmbâwr lang thei deuh lek lek chu ka khuh a.

"A mawi alawm, i khuh bo daih te'n!"

"I la hmu hnê hlui dâwn asin," tiin ka fiam zauh a.

"A teuh lo! Ka hnê thei hauh lo ang che."

Kan tho peih rih lo, inkuah rialin kan mu leh vang vang. Kan țawng tawh rih lo va, kan kut erawh a chângin a insual deuh nak nak a.

*HNUNGLAMA SAWICHHETU CHE CHU ENGAH MAH NGAI SUH, AN AWMNA HMUN DIK TAK, I HNUNGAH A NI AN AWM NI. I HMAKHALH VEK TIH I HRE RENG DÂWN NIA*

☆LTK☆ - 42 By Dingdi Pachuau

"E, thil pakhat hrilh loh che ka la nei a nia."

Nûr nang hian a hmel chu ka en chho a, zêp neih kan duh tawh lo emaw ka ti!

"Ka zêp a ni lo, ka la sawi lo chauh a ni zâwk," za vak lo hian a nui pah a.

"A nih chuan...han sawi la?"

"Mahse, min țhen phah hauh suh ang che, tiam phawt la?"

Min tur sek avàng chuan ka ngaih a tițha lo deuh a; mahse, ngaihțhat loh viauna tùr thil a tih ka ring bawk si lo.

"Naupang chhia viau lo teh, kan hlim dùn ve chauh a, țhen thu sawi leh te chu. Min hrilh phawt mai teh?" ka ti a.

"Sawrkâr zêm ka zen tawh lo; mahse, ka châwm zo dâwn tho che a nia."

Ngawi reng chuan ka en a, a thil min hrilh tam zâwk hi a mak hlawm lutuk a, chhàn lêt vat dàn ka hre țhìn lo.

"Zirtîrtu ni tawh lo mah ila eizawnna dang ka dap tho, nang leh ka fate chu ka châwm zo dâwn chiang che u," a ti leh a.

"I thawh tawh loh chhan chu...-"

"Sawrkâr hna thawk tân case neih a theih loh kha, Jail-ah ka táng a, thil sual titu ka ni lo tih hriat chhuah a nih hnuah pawh ka thawk zawm ta lo. A pawi i ti em? Kan dam zêl ang a, nang leh ka fate chuan rual in awt hauh lo ang, ka tiam a che," thu tak zet hian a ti a, mit khap hauh lo hian min en rùn reng a.

Ka khawngaih lutuk! A taksa leh a rilru chu thuhran, a hna thlengin a tuar phah, chu pawh a thil tih ni miah loah lehnghâl.

Ka kuah a, ka mittui chu hmuhtîr loh hrâm ka duh. Hna nei lo mah se, ka hmangaih tho. A hna vànga hmangaih ka ni lo, amah a nih vànga hmangaih ka ni alawm, dam chuan kan nghei bîk lo tawp ang.

"Ka hmangaih che, nangmah hi alawm ka hmangaih, i hna ni lovin."

Da-rini thawh hmain kan tho a, ei tùr pawh kan siam dùn vek.

"Vawiinah engtin nge kan awm ang?" tiin ka zâwt a.

"I tih dàn dàn le. Kei chuan hna thawh ka nei tawh si lo va, nang erawh chu pawisa thawk chhuaktu i nia, chàwmhlàwm mai mai tân chuan..." nui sûng chung hian a ti a.

"A nih, hna thawk tùra kalsan daih che i duh em ni?" tiin ka zâwt ta khauh a.

"Duh lo ta ila i kal dâwn lo tihna?"

"Ka hna aiin i pawimawh zâwk alawm," ka tih chuan min rawn pawm kâng lawp a, nghet zet hian min kuah bet tlat a.

"I va han duhawm tak!!! Sweet si, sexy bawk si-"

"Awh, tihpalh, ka hmu lo che u angah inngai r'u," Da-rini chuan a rawn ti a, bathroom ațangin a rawn chhuak tawh niin, ka lo hre hauh lo. Kan inthlah vat, a chhan chu ka țhiannu mah ni se a hmuh laia inpawm chual kher chu ka duh lo, a mawi vak lo.

Kan lo inpawm ve chual bawk sia, amah a zak zâwk pawh a ni maithei.

"Kan inpawm ringawt alawm," ka ti sap a, U Puia chu ka melh ralh a.

Da-rini chuan," Nia, inpawm chhunzawm r'u, ka chhuak dâwn e," nui chung hian a ti a, room-ah a lût leh phawt a, rei vak lo hnuah a chhuak ta.

"Le, tunah chuan kan pahnih chauhin kan awm tawh bawk a, mitmei vèn tùr a awm tawh lo. Han che tak tak ila?" tiin min rawn pan nghâl a.

"I va ho tak! Kan inneih hma chu kan chêtsual theih loh kha," ka tih chuan a nui suk a.

"I rilruin chutiang hlîr chu i ngaihtuah a ni maw? I ngaihtuah 'hniam' reih ruih lutuk!" a ti dût a.

"I thil sawiin a zir êm alawm, a ngaihtuah loh theih loh," ka ti a, inenin kan nui dùn a.

"Duh mah ila i remtih loh chuan ka tilui hauh lo ang che, hlauthâwng suh. Amaherawh chu, fawh che erawh hi chu ka mamawh reng fo dâwn a nia, kuah nèn," a tih chuan a nghâwngah kuahin ka uai nawlh a.

"Thil hrehawm tak a ni hlei nem, ka phùr záwng tak," tiin a hmuiah chuan ka fawhsak a, chimawm chhuahin a hnuai lam chu ka sehsak zauh bawk a.

Chawhma zawng chu kan chhuak lo. Chawhnu lamah erawh a thlenna lamah kalin a țhianpa Manipuri, damdawi ina awm chu kan kan zawk bawk. A bialnuin a lo awmpui a, chhuah an lo tum ve mêk bawk, dine-out chungchâng an sawi, pawi ka ti tehchiam lo.

Zàna kan ina riahtîr leh ringawt chu Da-rini lakah ka inthlahrung; mahse, mutpui leh ngei kha chu ka duh, a chhan chu damdawi a ei leh ringawt ang tih ka hlau.

"Ka thlenna lamah riak ve tawh thung ila?"

Ka hnial thei hauh lo. Da-rini chuan min ngaihtuah viau nain ngaihțha taka awm tùrin ka ti a, a remti vak lo tih chu ka hria.

"Engtin nge kan awm dàn tùr hi?" A ngaihna ka hriat loh avàngin ka zâwt ta chawt.

"I duh dàn sawi la, ka duh dàn ka sawi ve ang," a lo ti mai a.

"Sawi hmasa rawh, mipa i nih kha."

Ka hna chu bànsan ka phal leh phal loh min zâwt hmasa te te a, haw chhoh thuaia inneih thuai a duh thu a sawi chuan ka hlim rilru khawp mai.

"Nikuma kan thil sawi kha, kum khat hnua inneih chungchâng a nih kha. Hei kum khat chu a ni țêp tawh a," a ti sup sup a, ka sam chu a khawih malh malh reng a.

Min duh phawt chuan hnialna ka nei hauh lo. Ani tluka pasal atána țha tùr leh min hmangaihtu tùr ka hmu tawh lo bawk ang, kei lahin ka hmangaih êm êm bawk si a.

"Engkim i kutah a awm, kei chu i duh dan dána awm tùr mai ka ni."

Da-rini chuan min lawmpui hle a, U Puia chanchin zawng zawng chu ka hrilh vek tawh a ni. Inneih kan puitlin phawt chuan inneihna hmang tùra lo chhoh ngei a tum thu a sawi chuan," Ngawi teh, min dinpui tùrin ka duh ang che, lo inring rawh aw," ka ti a, ka nui pah sâng a.

A khêk ta tuarh a, min tiphu chiang lutuk ringawt! Min tiphu hlum lo chauh!

"Ka châk tawh lutuk!!!"

Kan chhoh hmain dàwra ka thawhnaah bànna ka theh lût a, U Puia nèn khawpui chu kan fang kual bawk. A lo tâl nasa tawh a niang, thil a hriain hmun a hre hle bawk. Kei chu ka la awm rei lo va, bâkah ka chhuah ngai loh vàngin khawpui nuam tak a ni tih pawh ka lo hre lo!

"Ka pateate chuan mak min lo ti ngawt ang chu, min hmu thut dáwn sia," hlim tak hian ka ti sar sar a. Kan chhoh tùr thu hi ka hrilh miah lo, U Puia lo kal thu hi chu ka hrilh chiang, kan hlim dùn leh tawh tih an hriat chuan anni pawhin min lawmpui.

"LTK, i thutlûkna siamah hian i inchhîr lo ang tiraw? I la naupang a, nulát i la kham lo thei a, ka nawr mah mah-"

"Nulât hi ka kham ta! I nupui ka nih chuan buaina a awm tawh dâwn lo zâwk asin, nula ka nih vàng chiahin buaina pawh hi lo thleng niin ka hria," ka lo ti vat a.

"Mahse, nula ni lo ta la chuan ka ngaizâwng thei nâng che," a lo ti a.

"Ni leh bawk si."

Kan haw chho a, U Puia chu kan inah a lo riak bawk. Ka patea nèn chuan khùnkhàn zet hian an titi char char a, ka nutei chu U Puia nèn kan insawi fel dàn chu ka lo hrilh ve bawk a, ngun takin a lo ngaithla a.

"A làwmawm ngawt mai, i hmel hlim tak ka han hmu leh thei hi ka lâwm tak tak a ni; mahse, pasal min neihsan leh daih chuan kan ngai àwm che e," a ti siam siam a.

"Nute, kan inneih chu rem in ti ang tiraw?"

"Kan remti lo ngam nâng aw," nui chung hian a lo ti leh a.

Pasal ka nei dâwn a nih chuan ka nu tak tak leh ka u Rsa pawh hrilh ve ngei chu an ngai ang chu. U Rsa, ka va phone khât ta ve! Ka simcard ka thlâk avàngin ani pawhin min rawn call thei miah lo ang, naktûk lamah ka bia ang, min ngaihtuah ve viau maithei asin.

U Rsa ka va bia chu, min lo ngaihtuah khawp mai a lo nia, a chhan chu U Puiate chungcháng kha a lo hre ve vek bawk sia, min lo ngaihtuah a lo ni; mahse, ka zin bo tih ka patea hnên ațangin a hria a, ka țha tih a hriat hnuah erawh chuan min ngaihtuah viau tho nain min ngaihtuah nêp ta a ni àwm e.

"Chuan, min hrilh tùr dang i la nei em?" a tih chuan," Eng maw?" ka lo ti vat a.

"Hmu tùr che leh zawng tùr chein a rawn kal ang tih ka ring thiam ve tho a nia," tiin a nui huk huk phawt a, chutah," A hmangaih tak tak che a nih chuan chu chu a tih tùr a ni miau a," a ti leh sup a.

"Haha, a lo kal alawm, tunah chuan engkim a fel tawh e. Hun remchâng hmasa berah inneih kan tum a." Ka biang chu a sa hat hat, hetiang ka han sawipui ta mai hi mak pawh ka inti, ka zak ve tho bawk.

"A țha, ka lawmpui che u."

"Ka lâwm e, ka u."

Ka thaw huai, U Rsa hi chu a langah nèlawm viau lo mah se ka chungah a fel tih ka hria. A nau ang tak takin min en a, kei pawhin pianpui unau ang thovin ka en. Chêng dùn lo mah ila ka u a nihna a bo lo va, min thlahthlam ngai lo ang tih ka hre ve tlat bawk.

*******

In ka thlen chuan chawhnu dár hnih a pèl vah tawh. Kan nula a lo awm a, ka nu erawh chu dàwr lamah a awm leh tawh a nih ka ring, ka pa pawh ka hmu lo.

Tluangpuii ka phone vat a, ka thlen thu ka hrilh chuan," A làwmawm e, tluang takin i thleng thei a; mahse, ka ngai lutuk che," a rawn ti sar sar a.

"Ka lo phei leh nghâl mai dâwn em niang?" ka tih chuan," Pawi miah lo, rawn inpalai mai la?" nui hak hak chung hian a ti a.

"Ka duh tak tak dáwnin ka hria."

Rei tak kan inbe lo, kan inbiak zawha ka room ațanga ka chhuah chuan Saii chuan," U Pui, i hmel hmuh a nuam tawh mang e! Tunah chuan i nui hmel hmuh tùr a awm tawh si a," a lo ti a.

Kei hi ka lo nui vur vur reng em ni le.

"Ka hlim tawh alawm."

"A țha, ka pi leh ka pu pawh an hlim ve tawh viau ang chu, i hlim loh hian hrehawm an ti ve tho si a," a ti duah a.

Ka nu chuan ka hlim leh hlim loh a ngaihtuah ngai vak hlei nem. Tluangpuii zawng tùra ka chhuak tùr pawh kha a lungawi vak lo a nih kha; mahse, min sawisêl ngam lo kha a ni mai a, min sawisêl mah se ka tum ka țhulh phah dâwn chuang lo tih a hria a ni mahna.

Zanriah kîl laiin ka pa hnênah chuan nupui neih ka duh thu chu ka sawi ta a, zahah ka la duh lo. Ka pa chuan," A țha e, i nupui neih hun hi kan lo nghâkhlel tawh lutuk alawm," hlim hmel tak hian a ti a.

"A rang thei ang ber ka duh, palaite chu tûn kâr ngei hian kal thei se ka duh bawk."

"I va hmanhmawh ve! In mualpho i hlau leh si a ni maw?" ka nu chuan a lo ti khauh a.

"Mualphona tùr eng thil mah kan ti lo, nghah reng a țùlna ka hre lo va, ka nupui ni thuai tùrin ka duh a ni mai."

"Lungngai suh, zanriah ei khamah hian i u Zova ka phone nghâl ang, i pa Dawnga nèn ni se a țha mai ang tiraw?" ka pa chuan a lo ti vat a.

Zàn dâr 9-ah U Mamawii'n min rawn text. U Zova chuan a hrilh a ni ngei ang, pawi lo, a hre dâwn tho tho. Bâkah, ka u a nia, hre tùr chu a ni hliah hliah.

*Min hrilh ve ka ring a nia, a chhe lo em?*

Ka nui sak a, chhe lo mawlh mai hi kan la buaipui chu a nih àwm hi.

*Khawvêl hmeichhia zawng zawng zîngah a chhe lo ber* ka ti deuh kher.

*A țhat chu, hmuh ve a châkawm, ka fate'n 'Pitei' chhe deuh an neih ka hlau a* a rawn ti ham ham mai.

*I hmuh hunah i hmu fiah mai ang* tih ka thawn leh.

A hnu daihah chuan *Ka nuin a hnial che em? A hmu ve tawh ang chu maw?* a rawn ti leh a.

*A neih tùr a ni lo va, ka neih tùr a nia* ka ti. A ni chiah, ka nupui tùr a nia, a duhzawng tak a nih loh pawhin a neitu tùrin ka hmangaih a ka neih chuan a pawm thiam ve mai tùr a ni.

Mut hmunah rei tâwk Tluangpuii nèn kan inbe leh. Ka ngai a, a bula mut leh kha ka châk, ka taksa hian a lo mamawh êm a lo ni. Ka mut theihna damdawi țha ber a ni a, Jail ațanga ka chhuah hnua damdawi ei miah lova ka muthilh lehna hmasa ber chu a țhiannu nèna an in luaha kan mut khân a ni. Ka tân chuan damdawi țha ber a ni tlat.

Kan inbiak zawh hnuah ka va text leh hrâm.

*I choose you and I'll choose you over and over and over. Without pause, without a doubt, in a heartbeat, I'll keep choosing you*

Thu mawi leh țha ka tih hi chu ka vawng rei ve thei alawm, khawi emawa ka chhiar a nia, ka duh reuh lutuk a, ka vawng reng ta a ni.

A lo intiduai lo ve nasa, min rawn reply vat a.

*U Pui, thank you for coming into my life, thank you for making me smile like crazy and thank you again for making me happy* a rawn ti hnâp mai.

Kei pawh mi â ang maiin chhiar chung chuan ka nui ve vur vur tho alawm.

Hna thawk lova awm ringawt chu ka duh bîk lo. Ka nu dàwr hi tilian ta ila, hei ai hian tichangtlung ta ila tih ka ngaihtuah. Hna chu thawh peih chuan a tam a, Tluangpuii nèn kan inneih hnua kan pahniha kan thawh tlàn theih tùr ka duh a ni.

Dàwr hi kan tihlen chuan ni tin kan pahnihin kan nghâk dùn thei ang a, ka nu pawh kan àwl thei ang chu. A rai hunah chuan kal ka phalsak tawh lo ang a, ka nuin a nghâk leh mai ang a, chhawr tùr mi pahnih khat la bawk ila...

Ka buaipui ta vat vat. Vànneihthlâk takin LG Company lamin Lungleiah Agent rintlâk tùr an duh a, chu chu Hminga hnên ațanga ka hriat a ni nghe nghe. A chhan chu ka hna ațangin ka bâng tawh a, sumdawnna lam ka buaipui tih a hre ve tho a, min lo ngaihvensak ve a ni.

Kan thil ruahman chu a tluang purh mai. Chung khuanu hian min hawisan bîk lo a niang, awlsam takin harsatna awm miah lovin inneih chungchâng kan tifel a, sumdàwnna lamah ni se chutiang bawk. Ka vànnei lutuk chu mak ka ti zâwk, Tluangpuii hian vànneihna min thlen a nih ka ring ta rum rum mai, kan chhûngkuaah pawh hlimna a rawn thlen ngei ka ring tlat a ni. Ka nu hian làwm lo viau mah se min sâwisêl ngam lo, ka thu ka titlang dâwn tih a hriat vàng a ni mahna.

Kan inneihni tùr pawh a lo hnai ta, kâr khat chiahin min dang tawh. Ka phûr hle mai a, khawvêl hi a lang thar sur vek mai hian ka hria, mite pawh chu ka hlim vàng nge an hlim ve vek maiin ka hre bawk.

Engkim kan buaipui fel vek tawh a, Hminga ka best tùr a nia, Tluangpuii chuan Da-rini a dinpui dâwn bawk. Ropui taka tih kan duh lo ve ve a, thianghlim taka kan innei thei tùr chu kan lâwm tâwk viau.

Chutih kârin min sawi chhiatna hrang hrang erawh ka hre țeuh tho, Tluangpuii pawh an sawi tel tho. A hmaa ka lo hriat ve ang chi tho kha, khatiang khân an sawi a, tuar hrehawm ka ti. Kei chu engtin pawhin min sawi mah se pawi ka ti lo, Tluangpuii an sawina erawh chuan min tinâ. Min lawmpui thei lo chuan min lawmpui lo mai se, hetia thu dik ni lo, thu phuahchawp leh thu hlui phawrh chhuah leh hi ka duh lo tak zet.

"U Pui, kan inneih hmain Pa Chhuana kha vawi khat tal hmuh ka duh êm mai, kan hmu thei ang em le? Min hmuhpui la?"

Hetah Lungleiah a awm tawh a, kan Biak ina kan invawn dâwn avàngin a rawn phei tawh a ni.

"Eng atân maw, Darling?"

"Hmuh ve ka duh, hmu ang aw?"

Duh lo viau mah ila ka hnial lo, thil țha lo a lo thleng dâwn tihna pawh a ni chuang lo va.

*HMEICHHIA ZAWNG ZAWNG HIAN SUM KAN ÛM VEK KHER LO, KAN DUH ZÂWK CHU HMANGAIHNA, HUN LEH NGAIHSAKNA A NI*

☆LTK☆ - 43 By Dingdi Pachuau

Ka phûr fahran lo khawp mai, a duh tihhlawhtlinsak loh ka duh loh vàng chauha hmuh phal ka ni.

Ka hmuhpui loh chuan kha pa pui khân a lo melh kual vêl ang tih ka hlau a, bâkah, kan inkâr tihchhiat a tum vànga hetiang thleng hi a ni a, eng thil pawh a lo ti duh leh maithei bawk.

Kei chu pakhat tê mahin ka țawng ve lo. Ngun zetin ka lo en reng ringawt, ka nui lo va, ka melh rum hran lo bawk.

"Pa Chhuan, hrehawm i ti em?" A thil zawh chu mak ka tih avàng chuan Tluangpuii chu ka en zawk a, ka hawi sawn leh nghál.

Pu Chhuana erawh chu a rawn hawi chhuak miah lo, a zak ve deuh pawh a ni maithei, a kun deuh chhur reng mai.

"Thil țha takin ei rawh aw. I hun kal tawh chu kal liamtîr la, i hmalam hun erawh țha takin hman i tum dâwn nia, ka haw lo che, Pathian hnênah i tân ka lo țawngțai ziah ang. Min duat theihzia kha ka theihnghilh lo, pa ang hiala ka en i ni a, ka zah che a, in chhûngkua zawng zawng ka hmangaih vek che u. Tuna Nu Parteite nufa dinhmun tùr ka ngaihtuah hian ka rilru a na ngawih ngawih a ni, pa tel lova naupang a han enkawl chho tùr leh a rilru buai dàn tùrte, ka suangtuahpui thiam lo zâwk. Chûng chu, Pa Chhuan, han ngaihtuah la, an khawngaihthlâk i ti ve lo em ni? Pa ber chhûngkaw uaplumtu tùr ber i awm lo ta daih si a, an mangangin an khua a har ngawt ang."

"Mahse, thil tisualtu chu hrem tùr a ni miau si a, hrem i ni ta chiah a, tuar ve miah lo tùrte'n an rawn tuar ve lo thei lo a ni. I tuar avàng erawh khân beidawngin thinrim lo la, i tuarna kha hlâwknaah chantîr thei la ka duhpui hle che a ni, chu chu ka țawngțaina pawh a ni ang."

"Pathian chuan ngaihdam theih loh a nei lo va, inchhîra sual sima a hnên pantu a hnar ngai lo. He Jail hi i tân Pathian i zawnna lo ni se, harsatna, lungngaihna pawh malsawmnaah a chang thei tih a lan chhuahna lo ni hrâm se ka duh hle a ni."

"Chuan, U Puia nèn hian kârleh khian kan innei tawh dâwn a, hetiang thil hi i chungah thleng lo se chuan hlim takin hun kan hmang ho thei tùr a nia... Eng pawh ni se, lo dam țha la, i rilru kha siam thar i lo tum dâwn nia, Nu Parteite nufa chu lo ngaihtuah lo la, ka lo tlawh țhìn ang," a ti dap dap a.

He nu tê hi, ka va tluk lo tak! Naupang tê ni mah se a puitling ka ti tak zet. Tuna a thil sawi zawng zawngte kha ka ká ațang hian a chhuak ve thei ngai lo ang, ka dam chhûng hian khatiang thu kha ka sawi ve thei pawhin ka ring lo.

"I va ngawichawi ve! I lung a awi lo em ni?" kan haw kawngah chuan a ti a.

"I puitling lutuk hi ka zah thar riau che a!"

"Nge sawi dik loh ka nei em ni?" a tih leh chuan," I sawi dik lutuk kha alawm mak ka lo tih, ka nupui tùr hi chu kawng engkimah hian i lo fel vêl vek a nih ber hi," tiin ka fak hlak a.

Ka fak der pawh a ni lo, thu dik tak a ni.

"Pasal min hmangaiha min hre thiam êm êm tùr ka nei tùr hi ka vànnei hle zâwk a ni," a lo ti ve a, ka kut chu a rawn chûl a.

"Ka lâwm e, ka thil duh min tihpui avàngin. Pa Chhuana'n i chunga a thil tih zawng zawngte leh a thil tih hrim hrim ngaihtuah hi chuan hmu duh lo tawp tawh pawh ni la, ka hre thiam lutuk ang che; mahse, min hnial miah lo va, ka lâwm tak tak a ni," a ti sap sap a.

"I thu ka hnial ngam hlei nem," ka tih chuan ani chuan a lo nui sâng a.

"Tenawm suh!" a ti țhat a.

Ka nui hawk hawk a.

Kár khat a ral leh meuh chuan kan innei ta. Harsatna eng eng emaw kâra hetiang dinhmun thleng thei kan nih vàng hian kan thu tak a, kan thu chham pawh ring deuh lèng làwng leh ti tak zetin kan chham.

Ka nupui hi tuna ka mitah tak chuan khawvêla hmeichhe hmel țha ber a ni. A nih reng ka ring bawk. A inthuamna simple tak chu a tân liau liaua țhui a ni a, a chei dàn lah chu a tâwk chiah chiah bawk. Makeup a hmang nasa lo a, a lang fresh-in a lang natural thei ang berin an chei a, a lang duhawm tak zet a ni.

Rsate chhûng leh a nau Âmpuiite chhûng an rawn kim vek a, Tluangpuii pateate leh an țhenrual țhate an rawn kim viau bawk. Teite chhûng pawh an rawn lang kim thei a, a làwmawm. Tluangpuii nu erawh a rawn kal miah lo, hrilh erawh chu an hrilh ve; mahse, a lo kal chuang lo. Tluangpuii nu leh pa tihah chuan a pateate nupa an rawn lang nghâl zêl, an fanu a ni lo tih mi tam tak chuan an hre lo ang.

Ropui taka tih kan duh lo a, mawi lo tak pawh kan duh chuang lo. U Mamawii a intithu khawp a, ani chuan Tluangpuii hi min duhpui lo miah lo, a vawi khat hmuhna ațangin a be nghâl bawrh bawrh mai, ka lâwm khawp mai.

Da-rini pawh escort-tu a nei țha khawp mai! Tluangpuii'n a fiam zauh chu ka hre hman a, an inhmeh khawp e. Tluangpuii ka chhuhsak leh daih si a, kàwm hlimtu a mamawh a, a chanchin Tluangpuii'n min hrilh ve nual tawh bawk nèn, hetia an inzui ta hi ka lo lawmpui ve êm êm a ni.

Zàn a lo ni a, kan inneih min lawmpuitute an la awm far mai. Tluangpuii chu a chau ngawtin ka ring, a chhan chu vawiin lamah nilêng deuhthawin mipui chîm deuh nuai nuai reng kan ni si a, inneih hun hman hi hlimawm viau mah se hahthlâkna chin hi a awm ve tlat, khua a lum phei chuan inhmuam ûp a lo ngai ve bawk si a, kei pawh ka țang țùng reng asin.

Mut dâwnah chuan kan intleuh zawk a, inbual dun ka rawt chuan a lo duh tlat lo.

"Nupa kan nih tawh hi," ka ti a.

"Kan la mu dùn hlei nem," a ti tlat, a la zak deuh a nih ka ring a.

"A țha e, naktûk ațang chuan kan inbual rual tawh ang," ka tih chuan a nui sak.

"Teh rêng mai."

Bathroom ațanga a lo chhuah chuan ka lo pawm kâng lawp a, a țê țhat.

"Zei lo lutuk, ka pate'n i țê ri an hriat hlauh chuan, a tihchi vak loh ang aw," ka ti a.

"Ka hlauthâwng alawm, min thlauh thut thei asin."

Ka nui hawk a," Ka thlauh phal teuh lo che, zanin chu i chàu viau maithei a nia aw," ka tih chuan ka hnungah a sik vâwt a.

"I țawngkam kha, fîmkhur rawh, ka hlau mai tùr che a nia," a ti leh a, min tihphùr dan a thiam reuh riau.

"Hlau nâng, a hlimawm viau ang!"

Mut hmain kan pahnihin kan țawngțai dùn thlap!

"Kristian chhûngkua din ka duh sia, nang pawhin i duh tho tiraw?"

Duh teh réng mai; mahse, rilru tak takin ka țawngțai thei lo!

Ka khum ni țhìn, zanin ațanga kan khum ni ta zau nuam tak, mut puan pawh a thar hlak an phahah chuan kan han tlu dùn ral mai a, thuin kan pahnihin inkâr boruak chu a sawi fiah zo lo, chêtze hmanga lantîr ngai chi a ni.

Ka nupui ni ta Tluangpuii tâna mipa hmasa ber ka ni chu ngaih hi a țha hliah hliah; mahse, na a tuar deuh erawh ka khawngaih khawp mai. Pathian ka dem lek lek hial a ni, dìm theihtàwpin ka che ve a nia, a mittui parawl kiang mai ka hmuh chuan hrehawm ka ti zâwk.

"A pawi ka ti, nâ ka tuartîr si che a."

A nui lui sak a, duat zetin a mit hnâwng chapah chuan ka fawhsak ve ve a, ka care a ni tih hria se ka duh.

"A na reng bîk nâng."

"Dik chiah e, a tìrah chuan hetiang hi a ni vek alawm."

A hnuah erawh a zia ta, ani pawh tunah chuan a che ve ngam ta. He khawvêlah hian kan pahnih chauhin kan awm ni maiin ka hria!

"Ka hmangaih che, LÊNG-TIN-KHÛM."

"Kei pawhin ka hmangaih che."

A aw chu ka hre thei chang chang, a chàu a ni tih ka hria, ka dimdâwih viau, ka chêttîr phal vak lo a nia; mahse, ka chêt dàn mil zêlin min lo pui ve zêl si a.

"Muhìl tawh rawh le."

Ka kuah a, ani pawhin ka âwm chu a hmai chuan a rawn nawr sat sat. Ka kuah loh chuan a lo bo mai ang tih ka hlau, muthilhsan pawh ka ui rilru deuh nia.

A chhîpah chuan ka fâwp leh vang vang, a taksa nâl han pawh chu ka chûl ning lo. Ani erawh a thaw sâk sâk tawh, a chàu a nih hi. Nia, a chàu ang.

Zînga ka harh meuh chuan khumah a lo awm tawh miah lo! He nu tê hi, khawiah nge a lo kal hman ni? Min tihrilhhai hle mai.A tho tawh tihna a ni ngei ang a, eng nge a tih ang? Eirawng bàwl a lo tum a ni ang e...

Ka harh veleh a hmel hmuh ka duh asin le.

Ka tho ve vat. Ka inphih fai hnuah chuan room ațanga chhuakin choka lamah ka phei a, a lo awm tak tak!

"LTK, engati nge min thawhsan?"

A rawn hawi chiang kher mai! A hmel țhatzia hi chu aw, ka nupui mah ni se țha ka ti êm êm tho.

"I lo tho tawh tih ka hre miah lo, morning, chhûngte dang thawh hmain eirawng bàwl dan tùr ka lo ngaihtuah a. In tùr i duh em?"

"Duh lo, a la hma si, lo kal phawt teh," ka ti a.

A la hma lah tak a, Saii pawh a la tho miah hlei nem!

Min rawn pan ve mai, a bânah manin room-ah ka kai lût leh a, kawngkhàr ka kalh nghál hmak bawk.

"Inneih tûk zînga hrilhhai taka min siam man," tiin ka pawm nawlh a, khumah chuan ka keuh dat a.

"A pawi ka ti; mahse, mo țha nih ka duh alawm."

"Ka duhthusàm i ni tho tho."

Kan inbuan nghâl a, inbuan azawnga nuam ka la tih ber a ni ngei ang. Ka chak zâwk dâwn tih ka hre ràn bawk si a, nuam dangdai ve tak chu a ni.

"Nizàna ka hming i sawi kha eng nge kha?"

"Lalzeii."

Ka âwm chu a chùm dat a," I va sual thei tak! Min hrilh țha mai mai teh," a ti nâng nâng a.

"LÊNGTINKHÛMI."

"Lêngtinkhûmi. A mawi loh lêm loh chu; mahse, mi zîngah sawi miah suh aw, kan pahnih chauha thuŕûk ni rawh se," ti sap sapin ka âwm chu a chûl riak riak a, ka awm dan a tidanglam leh nghâl ringawt nia!

"Nizàn ang kha a ni tawh lo ang," tiin bul ka țan nghâl a, ani pawhin min lo pui ve tho. A cheziaah erawh a la tîm deuh tho tih ka hria.

"Hlauthâwng tawh miah suh, a danglamzia i hre thei mai ang."

*******

Kan inneih hnu kâr khatna ațang chauhin dàwr lamah kan kal. Ka pa chuan a phal lo viau a; mahse, a hrehawm hran lo tih ka hriat avàngin hruai ngei ka duh.

A patea chuan ka kutah Tluangpuii in chungchânga lehkha pawimawhte chu min hlàn thlap, a chhan chu min ring a, a fanu pasal ka ni tawh miau bawk a.

Ka theihtâwpin ka duat a, ani pawhin min duat tho. Ka pate leh mi dang mit hmuhah erawh an mit tikham tùrin a awm ngai lo, ka pa chuan a be bawrh bawrh țhìn a, ka nu erawh a țawng tam lo khawp mai.

"Ka nu hi a nèlawm loh i ti em?" tiin ka zâwt phawng a.

"Tih pawh ka hre lo, țawng tlêm hi an awm ve fo a nia," a ti. A rilru hi a țha chiang a nia.

Ka pa pawhin ka nu chu a zilh nasa tih ka hria; mahse, hmasáwnna hmuh tùr a la vâng.

Rsate'n chawhlui min siamsak a, kan nu pawh a vahte chuan an nêlin kei ngei pawh an ni pasal ka lo nih tâk avàngin min nêl leh zual a, Mpa phei chuan," Spiderman ni reng tho rawh aw, Àní pasal ni mah la, spiderman a nih theih reng tho," a ti deuh tlat a.

*MITE ȚHAT LOHNA LAI ZAWNG NGAR NGAR ȚHÌNTE HIAN A TLÂNGPUI THUIN ANMAHNI DIK LOHNA PAWH AN SIAM ȚHA THEI LO, A CHHAN CHU MI ȚHAT LOHNA ZAWNGA AN HMANHLEL AVÀNGIN AN TÂN HUN AN NEI THEI LO*

HETIANG MI HI ENGAH MAH NGAI SUH, MITE ȚHATNA HMU THEI RÊNG RÊNG LOTE NUN HI A AWHAWM LO A NIA, AN HLIM THEI LO, RILRU HRISÊL LO ZIA A NI E.