☆LTK☆ - 44 - 46 By Dingdi Pachuau

 ☆LTK☆ - 44 - 46 By Dingdi Pachuau

TLUANGPUII

~~~~~~~~~

Pasal ka nei ve ta mai chu a nia, min hmangaiha min thlahlel êm êmtu a la ni zui, ka vànnei tak tak a ni. Ka nun engkim, ka chhûngkua leh ks chanchin engkim hretu a ni a, ka nu awm dàn leh ka fahrah malzia leh ka hmingchhiatna zawng zawng pawh hre vek chunga min iai lotu ka pasal hi kei pawhin ka hmangaih, Pathian leh a kohhrante hmaah thu ka tiam tawh a, thihna chauh lo chuan min țhen ka phal lo ang.

Ka pasalte in chu ka in a ni tawh a, a nu leh pate leh chhûngte chu ka chhûngte an ni tawh. Ka nutei min zilhna kha ka vawng reng, kan inneih hma khân min zilh reng a, pasalte in chhûnga awm dàn tùr zawng zawng pawh ka nutei min hrilh vek a ni.

Ka pa chu ka nêlin ka ko bawrh bawrh nghâl, ka nu pawh ka ko bawrh bawrh; mahse, dik tak chuan ka nêl lo. Keima dik loh a nih ka ring; be paha ka en apiang hian kan inneih hmaa phone-a min rawn vau lai vêl kha ka hre chhuak ziah lehnghâl a, ka nêl tak tak thei lo a nih ber chu. Ka bia a, ka ko a, ka nui tho; mahse, kha thil kha ka hre chhuak lo thei lo. Ka nu lah chuan a rùl tâwk bâkin min chhâng ngai lo.

U Puia'n min duat êm êm a, a bulah hi chuan ka dam hliah hliah. Ka rilru zawng zawngin a chungah ka lâwm a, hetiang pasal fel ka han nei ve mai hi mak ka inti a, phû lo ka intiin vànnei ka inti lo thei lo.

"Vawiin chu i ngawichawi riau mai, eng emaw thil dik lo a awm a ni tiraw?"

Ka en vat a, chal chuar nâng hian min lo en reng niin.

"Aih, awm miah lo, thil ka lo ngaihtuah kual nasa a nih dâwn hi," tiin ka nuih sak a.

"Eng mah zêp loh tùr kan tih tawh kha."

"Ka zêp lo. Pasala ka nei che hi ka vànnei tak zet tih ka lo ngaihtuah, ka ti tak tak."

Min en vang vang hnuah chuan," Kan vannei ve ve," a ti ta sup a.

"Ka vànnei zâwk," ka lo ti hrâm.

Kan in ațangin dàwr hi a hla hran lo va, U Puia nèn pawh kein kan kal mai țhìn. Exer a ni pah mai a, nuam ka ti viau mai.

Zanriah ei khamah chuan ka pa chuan," Ka kâwng a va kham tak êm!" tiin a kâwng chu a dawm a, a er deuh ngàng ngáng a.

"Ka pa, ka lo hmehsak dáwn che em ni ang?" ka lo ti vat a.

"A, a ngai lo ang, dàwrah i hah bawk si a, inah lehzel chuan awm hahdam mai mai rawh," nui chung hian a ti a.

"Ka hah rêng rêng lo; mahse, chaw kan ei kham deuh chiah sia, nakin deuhah ka lo hmet dáwn che nia," ka ti a.

Room-a ka luh chuan U Puia chuan," Kei pawh ka kâwng a kham lutuk!" khuma bawk thlawr pah chuan a lo ti ve a.

"Bawk lo rih teh, chaw ei kham veleha awm dàn tùr pawh a ni lo a nia, a țha lo," ka ti a.

"Ka kâwng a kham alawm."

"Chu pawh ni se, i taksa tân a țha lo, tho rih phawt rawh," ka ti a.

"Min hmehsak ve pawh i tum miah lo a ni maw? Ka pa lêm, hmehsak i tum tho si a?"

"Hmehsak dâwn chiang che! Mahse, tho phawt teh, bawk rih lo la?" ka tih chuan," Ka pa chu ka nu pawhin hmehsak ve ang hmiang, a nupui a nia, a hmehsak ve thei reng alawm," a ti sup sup a.

"Hei hei hei, a va mak sup sup ve! Ka nu chu ka awm tawh a, ka àwl a ngai ve tawh alawm," nui chungin ka lo ti a.

"Ka pa i ngaihtuah bîk lutuk! Ka kâwng pawh a kham ve tho."

A pa a thîk maw!!!

A bulah țhuin a kutah ka dawm a," Ka ngaihtuah daih zâwk che alawm, ka pa chu a upa ve tawh a, a fapa nupui duh tak ka ni a, kan duata kan ngaihsak hi a phû a ni. Keini'n kan ngaihtuah lohin tuin nge ngaihtuah ang? Kan duat an ngai a ni. Vawiina a hna thawk a chàu a, a kâwng a nâ a, zan dangahte chuan a sawi ngai hlei nem, ka nu ai chuan ka hmet thiam zâwk daih ang, nuam a ti dâwn asin. Nang chu zan tin i duh phawt chuan ka hmehsak thei reng che alawm, ka pasal duh tak," ka ti hnâp a.

A rawn țhu chhuak a, ngun zetin min en a, chutah," Pathian hi ka dem lek lek mai!" a ti leh ta sup a.

Zanina a awm dàn hi a mak!

"Engah ringawt maw?" ka lo ti a.

"Nupui țha lutuk min pe hi maw le!"

A malah chuan ka chùm dawt a," Min tihlauthâwng hman țêp alawm le!" ka ti chûl a.

A nui hawk hawk a," Ka'n titau der kual vêl a nih kha. Ka kâwng a kham miah hlei nêm. Ka pa kâwng saw ka kâwng ni thut mai se ka ti, i hmehsak dâwn sia, a nuam dâwn riauin ka hria a," a ti a.

"A kham ve ngang a niang, zan dangah a sawi ngai hlei nem."

Ka pa kâwng chu ka hmehsak a, U Puia chuan ka hmehsak hnuah a rawn zùtsak ve leh a, ani chu a chak a, a hmet na thei deuhin ka ring.

"Ka nuam huai huaiin ka hria," a ti a.

"A țhat hlauh chu. Ka pa, zàn dangah kan hmet leh dâwn nia aw, kan hmet dam vek ang," ka lo ti ve a.

Zînga ka thawh chuan ka nu chu a lo tho ve tawh a, ka inthiam lo angreng. Ka nu thawh hma hian thawh ka duh țhìn, ka pasalte in chhûng hi ka in a ni tawh a, an mo/ fanu nêp tak nih ka duh lo.

Biak hmasak ngei ngei ka duh bawk, ka pasal nu mah ni se ka nu a ni ve tawh tho bawk.

"Ka nu, i tho nuam em?" tiin ka zâwt vat a.

"Ka dam lo hlei nêm," a lo ti nghut thung. A țawngkam nèlawm lo zet chuan ka awm a tinuam lo deuh nghâlin ka hria; mahse, ka insûm a, ka rilrua a țha lam chuan engah mah ngai lova țha taka biak chhunzawm tùrin min ti; mahse, ka zah bâkah ka pasal nu, nu ti kher kher leh a rûka mi 'vau chîng' a nihna chuan a bula awm nuam ka tih loh phah a, ka nêl tak tak thei lo.

"Nizàn khân i pa kha țawngkam țha takin a kâwng nâ hmehsak i tiam a, i pasal i pun leh hlauh si, chîng tam tawh miah suh."

Ka zak lutuk a, ka bîng mum mum maiin ka hria. Mi dang an la tho lo hlauh chu ka lâwm khawp mai. Chuti lo chu hrehawm ka tihbelh ngei ang, U Puia'n ka thlavãng a hauh ngei ang a, chhûngkua a buai thei tlat.

"Bâkah, room-ah hian awm tam viau suh u, mawi leh mawi lo hi thliar thiam la," a ti leh a.

"Aw le...ka nu."

He vàng hi alawm ka nu hi ka nèl theih miah loh.

Ngaihtuah chhunzawm ka duh loh tehlul nèn, thil dang ka ngaihtuah thei dêr lo. U Puia ka hrilh thei dêr lo ang, hei kher hi chu. A nu a ni a, ani lah a fapa neihchhun. Pasal bula a nu rèl sep sep lah chu mo țha tih chi a ni miah bawk si lo.

Ka tuar mai a ni ang chu. A chhan chu hetiang vànga ka hlim loa ka lungngai a nih chuan keimah ka intihrehawm mai mai ang. Ngaihtuah duh lo tlat ila, rilru pawh a ei chhe lo ang.

Nu Parteite pawh kan tlawh a, a tìrah chuan min be tuitam vak lo nia ka hriat chuan a zak a niang ka ti a, a hnuah erawh chuan a pasalin min ngaihzawn vànga hetianga thil thleng hi a nih vàng a niang ka ti leh. A àwm ve tho, thil sual ti miah lote'n an tuar ve lo thei si lo. Nu Partei leh a fate keimah vàngin pa tel lovin hun an hmang mêk si, rilru a hrehawm duh ka ti.

"U Pui, lo ngaizâwng lo tawp che ila tiraw?" ka thil ngaihtuah kual nasat vàng chuan ka ti phawng mai a.

"Mai mai a, vawo thum pawh piang nawn leh ila nang tho hi a nia ka ngaihzàwn tùr tho chu. Thil ngaihtuah vak vak suh, thil sâwt lo a nih kha," a lo ti a.

"Ih, kei hi awm lo ta ila heti khawp hian mi chhûngkua an buai lo tùr a nia, Jail hial tânga pâwngsual leh-"

Ka hmui chu a rawn hup chat avàngin ka sawi chhunzawm thei lo.

"Khatiangin sawi tawh miah suh, eng mah thiam lohna i nei lo. Sawi tawh rêng rêng suh, theihnghilh hmak rawh," a ti a.

Ka ngawi leh ta rih.

Ka nu dam țhat loh avàngin dàwrah ka kal lo, U Puia pawh chawhma chauh kal a tum, rawn haw thuai a tum thu min hrilh chuan," Engati maw?" ka ti a.

"I tel lo chuan ka peih bîk lo," a ti a.

"I va ho tak! Nakinah fa ka neih hunah phei chuan nangmaha i kal ziah a ngai dâwn asin," ka ti a.

"Kan pahniha fa chu...ka hmu châk tawh!"

La rài hma hauh a...nuih chu a tiza duh angreng.

Ka nu chu a lu ka nemsak a, ka theih ang angin ka ngaihtuah. Nurse ka ni a, a dinhmun erawh a țha tih ka hria, hritlâng âwmna satliah niin ngaihtuahawm a ni lo.

Min tîr kat reng mai a, a dam țhat loh meuh chuan phunna tùr a hre kher mai. Saii chuan in chhûng chêt bâk a ngaihtuah hman bîk si lo va, ka nu phun thawm chu ka ngaithla char char a ni deuh mai.

"Eng nge ka nu chu a an? A zia deuh em?" U Puia rawn haw chuan a ti a.

"Umm, a țha e. I chau em?" ka lo ti vat a.

"Chau lo ve; mahse, i tel lo chuan a nuam lo êm mai a, chauhna tham chu a tlingin ka hria," a ti a, a nui duh miah lo.

"Ka lo zût ve dâwn che em niang?"

"I hah lutuk ang, ka nu i enkawl bawk si; mahse, lo kal hnai teh," tiin a kut a rawn phar chhuak a, ka lo ban vat.

Min kuah vang vang a, ka han a dam huai huai mai. Ka nu phun thawm kha ka hre tawh lo, ka theihnghilh nghâl vekin ka hria.

"I chau em? Ka nu chu a lo phunchiar bawk em?"

"A phun ve bel bel a; mahse, a dam țhat loh vàng a nia, ka hre thiam alawm," ka ti a.

"I va fel tak!" Duat takin min kuah vang vang a.

Thawhlehni tlai khat chu U Puia chu thil leiin a chhuak lawk a, U Hminga a rawn lût teh khiah. Mi dang chhawr kan nei ve tho nain ka lo chiauau vat a, kan nulai chuan mi dang a lo buaipui a.

"Teh tlat che chuan, lo lêng rawh," ka lo ti a.

"Nia, ka hman lo ve lutuk a, sikul bâng ka lo lût zawk a nih hi, khawnge in pa?" a ti a, a hawi kual a.

"Thil leiin a chhuak lawk ta a nih kha. A rei lo ang, țhu rih rawh," ka ti. U Puia țhian țha ber a ni a, kan tân a pawimawh êm asin.

"Chanchin thar lam hi kan hre dâwn tawh em?" nui chung hian a ti a.

"Eng lam maw?"

"Aw..naute lamte?"

Ka nui a," A la awm rih lo a nih àwm hi maw," ka ti a.

"A la hma alawm; mahse, kan fate chuan in fate chu an ngam nasa dáwn a ni mai."

Kan nui hawk hawk a, chutih lai chuan U Puia pawh a rawn thleng ve leh thuai a, tlangvál pakhat hian a rawn zui bawk a.

"Vèna hi naktûk ațangin lo kal ve tawh se ka ti a," a rawn ti lût bawrh bawrh a.

"A neitu i nia, i thu vek alawm."

U Puia leh U Hminga chu an titi a, chutih chhûng chuan Vena chu ka lo kàwm chiang a.

Mi rethei tak chhûngkua ațanga lo seilian chu a ni lo; mahse, a nuin a lo thihsan tawh a, tunah nuhrawn a hrawn mêk a, B.A zirin University kalna sènso tùr inhlawhna a duh a lo ni àwm e.

"Class reular taka kal a va har duh àwm ve," ka tih chuan ani chuan," IGNOU-ah B.A ka ti mêk a, class kal a ngai hlei nem," a lo ti a.

"E, college regular-in i kal emaw ka ti alawm, ka ti a, chutia amaha a zirna senso a intum tùr chu ka khawngaih reuh khawp mai, lehlamah a ngaihsànawm ka ti.

A tûk ațangin a lo thawk, min àwl hneh khawp mai. A mawng a zâng a, a fel khawp bawk, chhawr man a awm ka ti.

"Dàwrah chhawr pahnih in nei tawh bawk sia, Tluangpuii chu inah awm ve rih se a țha ang," zanriah kîl laiin ka nuin a ti a.

"Engah maw?" Ka pain a lo ti vat.

"Miin min sawi sep sep, 'mo tirh ațangin an chhawr nghâl char char' an ti a, chutianga miin min sawi chu ka duh lo a ni," a lo ti a.

"Mi sawi mai mai!" tiin U Puia chu a lo phun hluk a.

"A dik ve tho mai, inah kâr hnih khat awm se, bâkah ni tin dàwra kal chu a chau viau thei asin, chu chu a țha i ti em, Bawihi?" Ka pa chuan a lo ti a.

Ka pa thu hi chu hnial ka tum lo hrim hrim.

"In tih dàn dán le."

Ka vanneih asiam nge vànduai zâwk pawh ka hre lo, Saiin chu a u boral vàngin a haw ta thut, inchhûngkhur chêt zawng zawng chu ka hna a ni ta reng mai.

Mahse, ka huphurh lo. Ka che ve țhin tho, pasal ka neih avànga che lo tùr ka ni lo. A hma aia che nasa sauh tùr ka ni zâwk.

Mahse, ka nu làwm hmel hmuh tùr a awm chuang lo. Min duh thei ngang lo a nih ka ring, biain titipui mah ila a rùl tâwk bâkin min chhâng lo.

Kan pahnih chauha kan awm phei chuan ka huphurh țhìn. Ka thla a muang thei lo, ți dêk leh hau hlauin ka awm ziah.

U Puia leh ka pa bulah erawh a pângngai.

"Ka fapa nupui ni tùr chuan thil harsa leh hrehawm tak tak tawrh a ngai rêng asin, nang phei chu ka duh lo sa kha i ni a; min tihlawm tum hle rawh," a to țhìn.

Tlai khat erawh chu chaw ka chhuang tùr tui ka leih lai chuan ani pawh chu ka bulah a rawn kal ve a, cooker-ah tui so hlim ka leih zo ka inher chiah leh, ani lo kal sawn ve chiah chu kan intauh deuh chawrh a, tui so ka leih bàn la awm chu ka nu chuan a rawn vai bua a, a au țhawt a, kei pawh ka hlauhthâwng lutuk chu ka au țhawt bawk.

A bânah tui so chuan ka leih a nih tâk ber chu!

Ka hlauhthâwng lutuk a, ka nu bân chu ka en nghâl vat a.

Ani erawh chuan," Fîmkhur ta che! I titau em ni? I che ve dêk dêk a," tiin a kal sawn ta nghâl daih.

Room-a a luha kawngkhàr a khàr țhuai avàng chuan ka phu zawk. Ka kut veilam sa hum hum chu ka en vat a, a lo per ve tho a nih hi, a sa hum hum mai.

Chaw chu ka chhuang a, ka inthiam loh êm avàng chuan ka nute room kawngkhàr chu kikin," Ka nu, pawi ka ti lutuk, ka tihpalh lutuk ringawt, ka lo en chhin dâwn em niang?" ka ti a.

A ngawi reng a, thâwm pawh a nei miah lo.

"Ka nu..?"

"Kal bo rawh!"

Ka ding khawng ta reng mai!!!

*AN NUNHLUI ȚHA LO AVÀNGIN TU MAH HMUSIT NGAI SUH. INHMU CHHUAKIN, AN NUN AN THLÂK DANGLAM THEI A, NUNHLUI PAIH BOIN NUN THAR AN HMANG VE ȚHÌN BAWK*

☆LTK☆ - 45 By Dingdi Pachuau

Mak ka ti, hetiang teh thlâwt hi chu ka beisei miah lo!

Ka pasal nu a ni a, ka tán pawh nu a ni; mahse, a awm dàn hi nu angin a khawsa lo ka ti. Kei chuan ka theih ang angin ka bia a, min nèl theih nân leh kan inpawh theih nân ka theih ang ang chuan ka bei ve nasa ka ti; mahse, hetiang chauh hi ka chantâwk a ni si.

Thil dang ngaihtuah ka tum pawhin ka rilruah a awm reng, ka kut tlêm tea ka leih fuh ve palh pawh chu a sen țûn mai, a sa hum hum zui, ka nu bân kha engtiang taka nasain sen ang maw? A hrehawm ngawt ang.

Ka inthiam lo ngawih ngawih.

Eirawng chu ka bàwl chhunzawm a, ka kut erawh a sat hum hum avàngin colgate ka hnawih a, an lo haw hma chu ka hnawih rih ang.

Ka nu chu a lo chhuak ta miah lo. Hrehawm ka ti ngawih ngawih, a bân mawlh mai kha, kàng a huat viau phei chuan... ka awm a nuam thei lo rêng rêng. Ka pa bulah engtin nge ka lo sawi ang? U Puia bulah erawh chuan ka sawi lo ang, ka zêp ang tihna ni lovin ka pa bula sawi a țha zâwk ang.

Țhut pawh ka țhu thei lo, ka rilru a hah a, ka vei tawn chhên mai. Ka vànneih asiamin ka pa a lo haw hmasa ta zâwk chiah, ka nu room-a a inkhung reng avàngin ka pa lo thlen veleh chuan," Ka pa, ka nu ka ngaihtuah êm mai, a bânah tui sâin ka leih palh hlauh a, a zia lo tak tak a ni," ka lo ti vat a, ka kut chu ka thukru deuh hlek, ka inthiam lo tak zet a ni.

"Engtizia nge ni a?" a tih chuan thil awm dàn chu ka hrilh thuak thuak a, ani chuan," A nih tak chu, ka'n en ang e," tiin an room-ah chuan a lût ta nghâl a.

Ka kut kàng,colgate ka hnawih ka sil fai tawh si chu ka'n en a, a lo durh deuh pup tawh a, colgate kha hnawih vat lo ila chuan hei ai hian a durh nasa ngawtin ka ring. Kàng hi ka lo haw riau a nih dâwn hi, ka nu khân colgate hnawih nachâng a hria ang em le? E, nu a ni tawh a, a hria ang chu maw?

U Puia lo haw chu hlim takin ka lo làwm a, ka kut erawh a hmu ang tih ka hlau khawp mai. Rei vak lo hnuah chuan chaw ei ka siam a, ka pa leh ka nu pawh room ațangin an rawn chhuak a, ka nu bân chu a vâr luai mai, Colgate chu a lo hnawih ve chiang a nih hi.

"Ka nu, i bân chu engtizia nge ni?" U Puia chuan a lo ti vat a.

Ka nuin a chhàn hma chuan ka pa chuan," Tihpalh a nih hi, tui sâin a leih palh alawm," a lo ti vat a.

"Engtin nge i inleih theih a? A va zia lo ve!"

"Keiman ka leih palh a, a zia lo tak zet a ni," ka lo ti a.

"A ni maw?!! Chu, mo thar chetsual palh a thleng ve ta a ni maw?" nui chung hian U Puia chuan a lo ti vat a.

Za lo zet hian ka nui ve ringawt.

"I intipalh ve em?" U Puia chuan a lo ti leh vat a.

"Aih," ka lo ti vat, ka kut erawh ka thukru deuh zàl zál a, a zia viau, ka veilam a ni hlauh; mahse, ka thukru rei thei lo ang, a chhan chu chaw khawrh a ngai dâwn si; mahse, ka kham daih mai ang.

Ka kham hma ta rêng, ka pa chuan," I va puar hma ve!" a ti a.

"Nia, zanin chu ka ril a țâm vak lo va."

Ka nu kut chungchâng chu an sawi chhunzawm a, colgate hnawih a țhatzia leh a ngeihzia chu an sawi a. Ka pa chuan Aloe vera țhatzia leh mi țhenkhatin an ngeih ve tho tih a sawi chu ka hre fuh ta hlauh, naktûkah ka hnawih chhin teh ang, kan pot-ah a awm ve tak kha maw le.

Room-a kan awm hnu chuan U Puia chuan," Engtin chiah nge in intihpalh a?" a ti a.

Thil thleng ka hrilh hnu chuan ani chuan," A nih tak chu, inthiam lo duh suh, tihpalh a nih chu. I intina ve lo a, a làwmawm viau a ni," a ti a.

"Hrehawm ka ti tak zet a ni, ka nu bân kha a nat hmèl si a."

"Honey, tihpalh a nih kha."

"A ni tho a; mahse, hrehawm ka ti tho alawm," ka ti sap a.

"Lo kal hnai teh."

Khuma a țhu chu rawn thovin ka hnung ațang chuan min rawn kuah a, darthlalangah chuan kan lang chiang dùn hle mai.

"I rilru tihah mah ta che. Tihpalh a nia, tihpalh chu a dam leh țhìn alawm. Ka nu pawhin eng mah a sawi loh kha, a thinrim lo ang, tihpalh na na na thinrimna tùr a awm lo bawk a," a ti a.

Vawiina a thil sawi kha chu hrilh chi a ni miah lo, khatiang thil kha a sawi theiin a ring bîk lo ang, kei pawhin min țawng khum kher lo se chuan ka ring bîk lo ang.

Mutnaah chuan hnung lam ațangin min rawn kuah a, ka pasal bulah hi chuan hlim taka awm ka duh. Min kuah hian ka thla a muang țhìn a, hrehawm ka tih leh ka rilru natnate pawh a reh huai huai țhìn.

"In buai viau lo maw?"

Ka sam fâwp zoh pah hian," Buai lo ve, i awm ve lo erawh hrehawm ka ti viau, in lamah i lo țangkai viau bawk si a, ka bulah erawh awm la chu ka ti khawp mai," a ti sup a.

"Hetia inhmuh loh deuh hian min thlahlel thei deuh zâwk ang?" tiin ka fiam a.

"Hmuh reng theih che hi ka duh zâwk, Saii lo haw theih hunah chuan ka bulah i awm leh thei tawh ang chu; mahse, dàwra kalpui ziah che pawh hi i hah ang tih ka hlau țhìn a, ina i lo awm hian i hahdam thei zâwkin ka ring," a ti leh a.

"Hahna tùr a awm lo ve ve, inah pawh awm ila ka bulah i rawn haw dâwn tih ka hria a, hrehawm ka ti lo," ka lo ti a.

Ka ti tak tak. Inah ka nu bulah awm mah ila tlaiah U Puia a lo haw thuai dâwn tih ka ngaihtuah ziah a, rilruah hrehawm tih ve châng nei mah ila ka ngaihtuah rei duh ngai lo.

Ka bân a rawn chûl zai zai a, ka kut durh lai a rawn chûl thleng chu a tàwp ta hmak.

"Helai hi engtizia nge ni?!"

Tho thutin khum sîra light chu a tiêng ta nghâl a, thup theih a ni ta lo.

"A durh a nih hi, engtin...ni lo, engati nge i sawi loh? A nâ em? Eng nge i hnawih?"

Zawhna chu chhàn ber tùr ka hre lo.

A tho leh thut a, a chhuak ta daih. A thin a rim a ni ngei ang, ka zêp rù-ah a ngaih loh hrâm ka beisei.

A rawn lût leh har lo, Aloe vera a rawn keng lût, pot-a kan dah kha a la a ni chiang.

"Khawi, i kut kha."

Ka dawh ve mai, dìm zet hian min hnawihsak a," Naktûkah entîr a ngai a nih hi, engati nge min hrilh loh? Ni lo, engtin nge ka hriat loh theih? Ka hmu miah lo thei a nia..." a ti tlawk tlawk a.

"U Pui, a na hlei nem," ka lo ti vat a.

"Ni lo, a durh len êm hi, kàng i hua a nih hi, naktûkah kan entîr dâwn nia. Honey, dik takin min chhâng teh, ka nu hrawn hi a nuam fahran lo tiraw?" a ti ta daih a.

A thil sawi chu mak ka tih êm avangin ka en chho hau mai a, chhàn ka tum hran lo.

"Ka ti tak tak, hrehawm i ti em? I duh phawt chuan kan chhuak daih thei a nia, hrehawm ti taka nun i hman hi ka duh miah lo," a ti leh a, ngun zet hian min en a.

"U Pui, hrehawm ka ti hlei nem."

"Hrehawm i tih hi ka phal lo rêng a ni, hrehawm i tih ai chuan hmun danga awm chhuah ka pawiti miah lo a nia, ka nu leh pate pawh an inenkawl thei a, in dang ațang pawhin kan enkawl thei tho a nia," a ti leh a.

"U Pui, chutiang chu sawi ri tawh miah suh, ka nu leh pate hi chhuahsan ka duh miah lo, rei tak nu leh pa ka neih tawh loh hnuah ka han nei leh thei a nia, ka hmangaih ber nu leh pa an la ni zui, hrehawm ka tih i ring rêng rêng em ni?" ka lo ti thung a.

Ka thu sawi chu min ring se ka ti, a nu leh pa hi a nupui vànga a chhuahsan ka remti thei ngai lo ang. Chhûngkaw kehchhia hi a awm ka remti lo, bâkah, an chhûngkua tikehchhetu nih ka duh hauh lo bawk. A rûka hrehawm ka tih ve mai mai hi chu chhûngkaw kehchhia nèn chuan eng mah lo mai, ho lutuk a ni.

"Hrehawm i ti ang tih ka hlau a ni."

"Ka bula i awm tlat chuan hrehawm ka ti thei lo, ka hmangaih ber ka pasal nu leh pa bulah chuan ka him ber bawk ang," ka ti leh.

Min ring se, hetiang lam hi chu sawi tawh lo hrâm se ka ti, mo sual nih ka duh lo. Ka nu pawh hi ka chungah hlim lo viauin min en dàn dang viau mah se ka dem thei lo. A monu ni tùra a duh tak kha ka ni lo miau si a, kei hian min duh theih nân țan ka la la tâwk lo a ni, hei aia nasa hian țang leh ta ila a zia sawt ka ring.

"Eng nge i ngaihtuah? A nâ em ni?" a tih chuan ka inthingharh vat.

"I thil min hnawih kha a ngeih dâwn a niang, a sa hum hum pawh a reh tawh. A na lo, hetia en hian a nat hmel mai mai a nih hi," ka ti tlat. A sa hum hum reng a, kan thil sin pawh ka dehtîr duh lo.

"Zanin chu a tlai tawh sia, naktûkah kan entîr ngei ngei ang."

Thup theih ni hek lo, U Puia chuan a sawi chhuak a, tûkțhuan ei lai chuan ka pa chuan," I nu ai chuan i haw zâwk a nih kha. Vawiinah i kut kha chêtpui miah suh, e, chaw ei kham veleh hian doctor-ah entîr nghâl ula, a țha ang, damdawi țha deuh deuh an nei fur tawh a nia," a lo ti a.

"Kan entîr dâwn alawm," U Puia chuan a lo ti vat a.

"A na viau em?" ka pa chuan a ti leh a.

"Na lo, a zia lutuk."

Ka nu chuan," A nat viau loh chuan hna thawhpui chu a theih reng alawm. Keini pawhin kan chêtpui hmiah hmiah țhìn, colgate kha han tât luai mai la, a dam vat mai ang," a lo ti ve a.

"Aloe vera kan hnawih a, a ngeih riauin ka hria," ka lo ti vat a.

"A țhat hlauh chu, kan neih ve nual nghe nghe kha, a țûla hman hian a hlu ber mai," ka pa chuan a lo ti leh a.

Kan entîr a, damdawi min lo chawh a, hnawih tùr pawh min pe tel bawk; mahse, aloe vera hi hnawih zêl ka duh, a tizia deuh tlat.

Saii rawn haw hnuah pawh ka nuin dàwra kal leh tùra min tih lêm loh avàngin inah a țûl țûl ka chetpui. Ka hah hran lo va, bâkah Saii a awm tawh a, ka nu nèn chauh kan awm lo va, a zia. Ka kut nâ avàng erawh chuan Saii chuan min àwl hneh viau a; mahse, àwl ka duh bîk lo, thawh tùr neih miah loh chu hrehawm ka ti.

Ka nu nèn kan inkâr a țhat theih beiseiin ka be țha reng a, ka pasal nu a nih vàngin kei chuan ka be chhe thei lo. Bâkah, ka nu a ni ve tawh a, ani lo nu ka nei lo. Min be hrehin peih lo viau mah se keimahin ka biak zêl chuan min pawm hun a la nei ve êm êm ang. Chu chu ka beisei tlat a ni, rilru hrehawm deuh țhìn mah se ka tuar chhuak thei ngei ang. Ka nu min biak țhat duh loh vàng maiin kan inneihna thutiam kha nghìntîr ka tum bau lo.

"Ka nu, i kut chu Aloe vera hi ka lo hnawih ve leh dâwn em niang?"

Min rawn en zawk a, a hawi sawn leh nghâl daih. Min chhâng lo, Saii chu ka piah deuhah țhuin chawhmeh tùr Anțam a tifai malh malh a.

"Ka lo hnawih hmasa ang che," tiin ka pan phei a, a kut chu lâksakin a bân tui so buak palh hil deuh tawh chu ka ensak a.

"A dam tawhzia hi, i ngeih tak tak a ni. Kei pawhin ka ngeih ka tia, i ngeih ve tho hi ka ring rêng a ni," ti mawlh mawlhin a bânah chuan Aloe vera gel chu ka hnawih mawlh mawlh a.

"A rimchhia ka ti asin," a ti nghut a.

"Nia, a rimtui lêm lo; mahse, kàng tân a țha alawm, vawi hnih khat bâk hnawih a ngai tawh lo ang," ka ti a.

A țawng ve avàng chuan ka hlim sawt. Phûr takin ka hnawih, ka phùrzia erawh ka thup hrâm hrâm zâwk.

Saii chuan," A zia lo ngawt mai, keimah vàng vek a ni, ka lo lêt har lutuk a," a lo ti niah niah a.

"Ni lo, nangmah vàng a ni lo, ka zei loh vàng a nia, tui so khatianga keng tùr kha ka ni miah lo, a hlauhawmzia ka hre reng si a," ka lo ti vat a.

Saii vêk chuan," In vanduai vannei ka ti mai, ka pi lahin a lo haw fahran lo va, in taksate kha a fuh palh hlauh ang tih a hlauhawm zâwk, a nâin a hrehawm ngawt ang," a lo ti leh a.

"A dik chiah. Ka nu hian a lo haw vak lo hi a vànneihthlâk, ka chesual chhiava a ni," ka lo ti a.

"A, i chêtsual vek a nih bîk loh kha," ka nu chuan a lo ti ve leh a.

"Ka tidik lo alawm, a hlauhawm êm asin."

Ka nu rilru chu tlêmin a dang hret tih ka hria, a nuam ka ti. Hma sâwn lo viaua ka inhriat laiin ka beih hrâm hrâmna chu tlêm têin a rah chhuak ka hmu a, ka lâwm viau a ni.

Ka pa leh U Puia lah chuan ka chêt chu an phal lo khawp mai, ka kut chu a dam tawh lutuk; mahse, ka nu bân chu a hil chak daih zâwk. Mak ka ti, tui khân a buak nasa daih zâwk si a.

"Vawiinah Afaki kha kan dàwrah a rawn kal ve a."

U Puia chu ka en vat a, ngun zet hian min lo en, ka thîkna mitmeng hmuh a tum a niang.

"Eng nge a lo tih ve a? A dam țha em?" ka lo ti thung a, ka hmuh lohna rei tawhzia hre chhuak uar uarin engtin nge a awm ve tâk zêl ka hre châk khawp mai.

"Dâm țha a niang dàwrah a rawn kal thei tlat," tiin a nui suk phawt a," I thîk dâwn nange?" a ti leh a.

"Engah ngawt maw? Dàwra lo kal apiang ka thîk ringawtin awmzia a awm àwm lo e, i nupui ka nih hi," ka lo ti a.

"Dik chiah; mahse, ka bialnu hlui kha a ni ve sia..."

"A hlui mai mai..."

A nui ta hawk hawk a," Nang tê reuh hi chu aw, ka nupui i ni hi ka lâwm tak tak a ni. Nang anga mi fel hi an awm leh thei tawh pawhin ka ring lo," a ti duah a.

"Insûm, insûm. Miin an hre reu reu ang e."

Min pawm kâng thut a, ka țê țhat. Min virpui a, ka lu a tihai lutuk.

"Min thlah teh, ka lu a hai a nia," ka ti chùl a.

"Ka thlah phal lo che."

Ka maimichhîng tlat. Min nghah hnuah pawh ka meng ngam lo, nghet zetin a bánah ka la vuan tlat.

"Meng tawh rawh le."

"Ka lu a hai."

Khumah min mut a, chuti chung pawh chuan ka dik thei lo, bathroom-ah min hruai a, ngaihdam min dîl pah mawlh mawlh a.

"Ka tihpalh aw, a pawi lutuk."

Ka nghâwng leh ka chal chu tui vawt chuan a'n dep a, kei pawh chu ka meng ngam ve țan ta; mahse, ka lu a hai a, ka luak pawh a chhuak telin ka hria.

"Ka luak a chhuak."

"Aw, luak rawh, ka lo dawm reng ang che," tiin min kùntîr a, ka chalah leh ka tukkhum lamah a kut chuan min dawm bawk a.

Ka uak țhat țhat a, ka luak thei lo. Ka hrawkah erawh min rawn hnawh up up, a chhuak thei chuang lo.

"Sorry lutuk aw, Honey, pawi ka ti tak zet," a ti sup sup, a inthiam lo nasa a nih hi.

Tlêma ka zia hnuah chuan ka inphih harh a, dârthlalanga ka inen chu ka nuih a za lo kher mai.

Ka lan dàn bawrchhawrzia chuh! Ramhuai pawh ka ang lek lek alawm le! Ka sam a thur bù a, ka hmai a sen vek bâkah ka mit a sen râm, a lang bui châk bawk.

"I țha tawh em?"

Ka bu nghat a, chutah min rawn pawm kâng leh nawlh, ka complain lo ve.

Dìm takin khumah chuan min mut a, ka bulah lo mu ve nghâlin," I lu chu a la hai reng em?" a ti a.

"A zia tawh e," ka ti sap a.

"Ka hlauthâwng, a pawi ka ti, ka thiam loh vek a ni," a ti mawlh mawlh a.

"A mak êm a ni, ka lu rawn hai thut dàn kha, ka hre thiam lo. Chuan, i thiam loh a ni lo aw," tiin a bânah chuan ka chûl a.

"Ka virpui kher che a."

"Ni dangah pawh min virpui tho țhìn sia, ka bp hi a hniam deuh hlek a ni maithei a ni," ka tih chuan," Naktûkah inentîr ila?" a lo ti vat.

"A ngai hran lo ang, kan muhìl ang a, naktûka ka harh chhuah hunah chuan a lo reh hmak tawh mai ang," tiin ka lo țawng thlamuan ve a.

"Ka ngaih i tițha lo alawm."

"Ka zia tawh alawm, ka bp a niang, a che deuh thut pawh a ni maithei."

Kan ngawih vang vang hnuah chuan," LTK, i rai a ni thei ang em?" a ti chhuak sup a.

Eng maw?!!! Ka rai ang maw?!!

A ni thei ang...a ni lo thei bawk. Ka beisei; mahse, ka hriat chian hma chuan beiseina ka siamsak thei rih lo ang.

"Ka hre lo le." Ka chiang rih lo miau a.

"Rai tawh la ka ti."

Kei pawh ka ti. Ka ti tak zet. Ka nu hian tu kha a awt viau si a, kan inkâr a țhat phah thei tlat.

Ka va beisei tak.

*MIPA DIK TAK CHUAN A DIK LOHNA NI MIAH LOAH PAWH NGAIHDAM A DÎL ANG CHE, IN INKÂR A ȚHAT THEIHNA A NIH PHAWT CHUAN*

☆LTK☆ - 46 By Dingdi Pachuau

Nizàna kan mu, ka muthilh theih loh vàngin ka meng rei a, zînga ka thawh chuan ka rit lûkin ka hria, ka men rei vàng vek. Thil nuam tak chu a ni lo alawm.

Saii a lo tho tawh a, min lo hmuh chuan min lo nuihsak a.

"I rawn tho hma hle mai, in tùr i duh em?" a lo ti vat a.

"Ka lâwm e, ka lo insiam mai ang," ka ti sap a, pângngai thei ang berin ka awm.

Khua a vawh ve sûk tawh avàngin coffee in ka chîng chho a, coffee hi ka ngaina hrim hrim bawk.

Coffee rim ka han hre chiah chu, ka pumpui hi a rawn let but butin ka hria. Ka chil a rawn rial a, min rawn hnawh up up. Ka hmui ka hup vat a, toilet panin ka tlân nghâl.

Ka uak țhat țhat a; mahse, luak chhuah tùr erawh a awm lo. Ka țhu reng a, ka uak leh țhìn. A hnuah erawh tuirîl lam ka luak chhuak ve ta. Ka nawm loh sa nèn, ka khua a rawn tisik nghálin ka hria. Darthlalangah ka inen a, ka mit chu a buiin a sen deuh râm mai, ka hmai a sen nasa viau bawk.

Room-ah ka lût leh rih a, U Puia pawh a lo tho tawh. Bathroom lamah a ri sar sar mai, ka phone a lo ri ve chiah bawk. Ka lût vànnei khawp mai.

Ka nutei a lo nia, a la hma angreng sia, mak ka ti angreng viau.

"Aw, ka nute?"

"Bawihi, i țha em? Engtizia nge i aw chu?"

"A, ka thawhna a la rei lutuk lo va," ka ti ta ringawt. Min ngaihtuah ve thei si a, tuna ka awm dàn hi hrilh ta chiah ila a buai viau ang, a chhan chu ka awmna a hla tawh si a.

"A nih tak chu, i dam lo emaw ni aw ka ti a. Nizàn ka mumangah ka hmu che a, a țha lo riau mai si a, ka ngaih a țha thei ngang lo va, ka lo call tawp mai che, a ni," a rawn ti leh a.

"Nute, ka țha e, i mumang mai mai a nih chu."

"Nia, i patea pawhin ho a tia; mahse, ka ngaih a țha tlat lo va. I țhat chuan a țha a nih chu, vawiin lamah erawh fîmkhur la aw, ka ngaihtuah riau che a nia," a rawn ti leh a.

"Aw le, min lo ngaihtuah rêng rêng suh, ka țha a nia," ka tih chuan," E, lawk aw, tûnlai hian khawsik leh luak a lêng nasa a, i patea pawh kâr hmasa khân a na ve a, tunah erawh a zia ve tawh e. Invêng țha rawh aw, ka rawn ngaihven phâk tawh si lo che a, invèn fîmkhur bâk ka rawn chah thei tawh si lo che a," a ti leh a.

"A nih tak chu, a zia lo hle mai. Ka lo fîmkhur ang e."

Ka awm dàn nèn chuan a inan duh hmel riau mai. Ka khua a sik deuh er er a; mahse, hetiang mai mai chu ka tuar chhuak ve nasa tawh alawm. Tûnlai tlâng hrilêng a nih phei chuan a dam har vak hlei nem, damdawi ka ei ang a, a reh vat mai ang.

U Puia chu bathroom ațangin a rawn chhuak a, min rawn hmuh chuan," Min thawhsan daih a, min kaih thawh ve tal tùr a nia," a ti sup a.

A ni lah tak a, ka thawh dâwn khân vawiin nilênga nuam taka hun a hman theih nân a biangah ka fawh theihnghilh a, ni dangah hi chuan ka fâwp a, a harh ve ziah bawk.

"I lungawi lo tak tak lo ka hria a nia aw," tiin ka nuih tlawn a, min rawn pan hnâi a, min hmuh chian tâkah chuan," I hmel chu leh! Eng thil nge ni ta? I țap em ni? Engati nge i țah?" a rawn ti ta vat.

"Ka țap lo-"

"Tu nge? Ka nu a ni em?" tiin a tho ta vat a, a kawr hnungah ka man hman hrâm.

"U Pui, ka țap lo. Tukin chu ka nuamsam lo deuh a, tlâng hrilêng ka man ve ta a nih ka ring, ka luak nghe nghe a," ka ti a.

Inherin min rawn en vat a, chiang zeta min en kul pahin," Ni lo, i damlo thei lo ang, i rái a ni zâwk lo maw?" a ti a.

"Tûnlaiin luak leh khawsik a lêng alawm, ka patea pawh a nia, tunah kei ka ni ve ta a niang," ka ti a.

"Chuti, mu rawh, vawiinah i inentîr dâwn nia, inah hian i che nasa lutuk a niang ka ti," a ti leh a, khum lamah chuan min hruai a.

"Mut pawh ka duh chuang lo, a sik er er chauh alawm."

"Ni lo, mu rih rawh. Che tùr Saii a awm a, a țùl tâk viau leh ka pui mai ang, nge ka mutpui dâwn che em niang?" a ti leh a.

"Aih, a ngai lo."

"Damdawi ei ta che, ka rawn lâk ang che aw," tiin min muttîr phawt a, puan min sintîr hnuah damdawi la tùr chuan a kal sawn leh a.

Nizànah kha chuan ka rai a nih ka ring deuh a nih kha; mahse, ka nutei'n tlâng hrilêng chungchâng a rawn sawi a, ka rai ka ring lo zo vek. Test tùrin test kit lah ka nei dèr si lo, damdawi ei ringawt chu ka ngam lo deuh, ka lo rai mial chuan...

U Puia damdawi min pêk chu ka ei lo, ani erawh chuan ka eiah a ngai ngei ngei ang. Kei chuan vawiinah ka inentîr hunah damdawi min chawh chauh ei ka tum, tunah chuan ka ei rih lo ang.

Tûkțhuan ka kíl ve tho; mahse, Alu kan rim chuan ka luak a tichhuak leh tlat. Ka tho vat a, toilet-ah ka kal leh a, ka hriat lohin U Puia'n min lo zui ve reng niin.

"LTK, a hrehawm viau em? Tlêm té chu ei thei la ka ti asin, vawiina i chauh lutuk loh nân, ei châk i nei rêng rêng em?" a ti a, ka lu rawn dawmin min ngaihtuah tih hriat zet hian ka hnung a chûl bawk a.

"Alu kha, a rim kha ka haw lutuk!!" ka ti a, Alu rim chu ka hnârah a chám deuh tlata ka hriat avàng chuan ka uak leh tuar tuar a.

"Ka va dah bo daih ang e," tiin a chhuak nghâl a, " A ngai lo," tih ka tum a nia, ka hmu hman tawh lo.

Ka zia deuh hnuah chuan a rawn lût leh a," Lo kal tawh rawh le, i hmu tawh miah lo ang," a ti a.

Ka hmui tuai pah chuan," A ngai kher lo asin, kan chawhmeh duhzâwng tak a nih vei nèn, a zia lo tak tak a ni," ka ti sap a.

An lo kham dâwn tawh a, ka pa chuan," A zia lo hle mai, inentîr ngei i ngai a nih kha, i dam țha lo tih pawh kan lo hre lo va," a lo ti chuar chuar a.

"Khawsik ser ser mai mai alawm," ka lo ti vat a.

"Damdawi i ei em? Inentîr hmain ei la, chuti lo chu khawsik chunga doctor nghah chu a hrehawm duh àwm êm mai," a ti leh a, ka nu erawh a lo la ngawi reng. Lo țawng ve tùr pawhin ka phût chuang lo.

Ka ei hlek, chu pawh U Puia eipui ka duh vang chauh a ni. Thaw țha mang lovin ka ei, Anțam hâng chiah ka ban, chawhmeh rim chuan min tiluak chhuak tlat.

Ka nuin min lo en reng a nih ka ring," Nang hi, i ruak lo a ni lo maw?" a rawn ti a.

Za lo zet hian," Ni lo ang," ka lo ti ringawt.

U Puia chuan min enin," Vawiinah test ila a țha ang," a lo ti a.

Ka nu vêk chuan," Tukinah damdawi i ei em?" a ti leh a, U Puia chuan," Ei ang chu, a khua a sik alawm," a lo ti leh vat a.

"E khai!!!"

"Ka ei lo," ka lo ti thung a.

"A țhat chu, vawiin chu keima'n ka kalpui ang che," a ti a, a kal sawn ta nghâl a.

Ka lo rai ngei e.

Ka nu chuan a hlim hmel a thup thei lo; mahse, rei lo tê tak tak chauh a ni, makti zetin ka en hú ringawt!

"Ka va lâwm tak!!!"

Heti khawp hian tu neih a lo châk tawh a ni sia, U Mami pawh kha duh viau tùr a lo ni, a fapa faah a ngai ngèi àwm si a. U Puia tân min duh lohna pawh hi he naute lo piang tùr hian tibo vek se ka ti tak zet a ni.

U Puia pawh a hlim, a hlimzia chu a mitmeng ațangin ka hre thei. Min pawm vawng vawng a, a mittui pawh a tling hial nia!

"Ka lâwm e, ka lâwm lutuk!"

A hnuah erawh ka nu chuan eng mah a sawi chhuak leh tawh chuang lo, a awm ngai rengin a awm leh tawh; mahse, a hlim hmel kha ka hmu hman tho a, ka rai chu a hlim a ni tih ka hre tawh tho.

Ka pa pawh a phûr hle, U Mamawiite chhûng an phone a, chaw ei khâwm a rawt chûl mai. Ka chhûngte ka hre chhuak ve ram ram mai, an hlim ve ngawt ang chu.

Zànah chuan kan chhûngkua chu kan bengchheng ve khawp mai, U Mamawii fate pahnih chu an harh ve a, a pi leh pute'n biaksawm dàn leh fiam dàn an thiam si a, nuih an tiza dùn lutuk.

Mahse, ka nawmsam loh deuh avàngin U Puia chuan hma taka mu tùrin min ti tlat.

"Naute kha rei tak menpui a țha lo, hrisêl taka a lo pian chhuah kan duh chuan kan duat a ngai."

Ka nuih a tiza roh lutuk.

Ani pawh chu a tho chhuak ta bîk lo, duat zetin min kuah hlu hlu a.

"Ka pateate pawh ka va phone a, an hlim ve khawpin ka hria asin, an nautĕ khân nautĕ i nei ve dâwn ta chu a ni sia," a ti sup sup a.

"Nia, a mak e tiraw? Ka vànnei ka ti asin, kan inneihna lah thla li vêl chauh a la ni lehnghâl a; mahse, ka rai hma i ti em? A zahthlâk viau zâwk lo maw?" ka ti sep sep a.

"Teuh lo mai!!! Kan inneih zàn ațang khân rai nghâl la ka ti zâwk asin," a lo ti ve thung a.

"Mo țantirha rai nghâl chu, hna ka thawk tam hman lo êm a," ka ti niah niah a.

"Ka nupui ni tùrin alawm ka neih che. Hna thawh hun pawh awm chu a la awm ve ang; mahse, ka bula awm tùra ka duh vàng chauh chein a ni dàwrah pawh ka hruai che. I hmel hmuh reng theih ka duh si a," a ti leh sup sup a.

A hmaiah chuan ka chùlsak a, ka pasal hi ka duh tak zet asin. Min thlahlel êm êmtu hi kei pawhin ka thlahlel a, a bula awm reng ka duh ve tho.

"Zanin chu i dam țha si lo va, ka insûm rih mai ang, bâkah naute dim a ngai bawk si a, doctor lah khân dìm tùr chein min ti bawk si," tiin ka dul la thêp zaih chu a rawn chûl a.

"Mahse, ka insûm rei thei pawhin ka ring lo, ka bulah ka khawih reng theihin i awm si a. Insùm chu har tak a ni," a ti leh a.

Ka khawngaih roh mang e. Min thlákhlelhzia ka hre ve tho a, naute lo piang tùr hian a pa chu a hrem ve deuh hlak dâwn si a.

"Min ngei àwm..."

"Engah maw?!!"

"E, ka rai sia, i insùm a ngai bawk sia."

A nui hawk a," Naute tân a pawi chhûng chu ka nghâk thei alawm, naute tân leh nangma tâna him lo rêng rêng chu ka ti hauh lo ang, ka tâna rohlu ber ber tùr in ni si a," a ti a, ka samah chuan a fâwp zoh a.

Dàwrah ka kal ngai ta lo, U Puia'n a phal lo va, ka pa lahin a phal hek lo. Ka nu erawhin eng mah a sawi lo, an thu ang chuan ka awm mai.

Ka ei châk leh duh apiang min rawn hawnsak zêl a, ka ei a, ka in a, ka mu leh tawp ni berin ka hria. Eng mah ti lova awm chu hrehawm ka ti lutuk, eng emaw țhu paha tih tùr ka duh a ni.

U Puia chu là leh a phiarfung ka chah a, a rawn lei ve mai bawk. Ina awm mai mai pahin naute lo piang tùr mawza leh lukhum ka phiar a, tlêm chuan nî ka tumtàwi ve ta deuh.

"I duh a nih miau si chuan ka sawisèlsak lo ang che; mahse, i lo intihhah phah mai mai ang tih ka hlau a nia," a ti a.

"Eng mah tih loh chuan nî hi a rei êm a ni, thil dang tih tùr țha deuh záwk i hre zâwk mial lo maw?"

"Inah kan inawm mai dâwn em ni ang?" a tih chuan ka meng phâwk nasa.

"Ni lo, hetia ka awm mai mai pawh hi hrehawm ka tih tawh nâklaia, tihchî loh lutuk! Ka nu leh pate hmel ka hmu ngam nâng!" ka lo ti vat a.

A dik chiah rêng a ni. Ka nu leh pa lakah hian ka inthlahrung asin, hna ka thawh ve an phal bawk si lo. Ka pasal tal hian a thawh loh phei chuan, ngaihtuah pawh ka ngaihtuah duh lo.

Motor-a ka chuan pawh an phal mang loh vàngin U Rsate chhûngin min rawn kan a, ka pateate pawh an rawn phei ve bawk. U Puia țhianpa ber U Hminga pawh a rawn lêng a, min lawmpui thu a rawn sawi ve nasa.

"Dik tak chuan a tìrah kha chuan ka țhianpa nupui, ni lo, a ngaihzâwng tùr atân pawh hian ka duh lo che, a chhan chu i hre thovin ka ring, miin an sawi luai luai tlat chuan ni ta tlata ngaihna a awm ve tlat țhìn a ni. Min dem viau bîk ka ring lo, ka țhianpa a nih miau avàngin a tân chuan mi țha leh fel, sawisep kâi lo ka duhsak ve miau a."

"Mahse, a duh miau si che a, kan inkâr pawh a dik loh phah lek lek hial rêng a; mahse, hun a lo kal ve zêl a, mi sawi hi eng mah a lo ni lo tih ka lo hre chhuak ve ta zêl a, Mami kha ka duhpui țhìn, a hmangaih a nih miau avangin."

"Mahse, hun ral zêl khân a hmangaihna kha a lo tidal ve thei a ni ang chu, nang hi a duh zâwk ta tlat si che a, tih theih ka nei thlâwt lo, pawmpui mai loh chu."

"Mahse, a tisual lo tih ka hre chiang telh telh. A hlimzia hi ka hmu thei a, hun hrehawm tak a paltlang theih chhan pawh kha nangmah vàng hi a ni, hlimna tinrêng ka duhsak che u a, phûr takin naute lo pian chhuah hun chu kan nghâk tlâng a nih tâk ber hi," a ti dap dap a.

*******

Kum 1 hnuah chuan

"Duataaaa..."

A piin a awm a, kei chuan Aizawla kan in kha tihdanglam dan tùr ka buaipui mêk a, ka fapa hi ka chang hman meuh lo a ni ber. A pi leh a pu hian an inawm chhâwk a, a pi hian a awm deuh reng zâwk. Vun rawngah min chhùn a, a dangah chuan a pa siar. A lo pian chhuah khân ka taksain a tuar nasa a, rei tak damdawi inah ka awm phah. Harsa taka ka hrin chhuah a nih vàng nge ka hmangaih ngawih ngawih a, a hmel pawh a țha ka ti.

Min hringtu ka nu pawhin min rawn tlawh ve tlat asin, naute hmu tùr liau liauin a rawn kal! Mak tak a ni! Ka pateate lah an rawn lang sek a, U Rsate lah chuti bawk, nuam tak hi hi a ni ringawt.

Chûng zawng ai chuan ka tâna țha ber mai nia ka hriat chu ka nuin min huatna zawng zawng kha ka fapa lo piang hian a tireh vek hi a ni! Ka rai hràm hma kha chuan min ngaihven ang pawhin a lang lo, biak pawh min be vak chuang lo; mahse, ka rai len deuh hnuah chuan min duatin min ngaihsak ta lutuk a, ka ei atâna țha leh damdawi țha zawng zawng min ngaihtuahsak vek. U Puia pawhin mak a ti; mahse, a sawi lang bîk lo. Ka fapa hi a lo piang lo ang tih ka hlau hial țhìn, chhûngkaw tân hlimna leh inremna siamtu a ni tlat.

"Bawihi, Duata hi hnute pe teh, a ril a țâmin ka hre tlat."

Dawhkànah chuan ka lehkha ziah lai chu dahin Duata chu ka ban vat a. Ani pawh chuan min lo ban ve vat, a mitmeng mawlh mai hi, a pa chiah chiah, a pa fapa hi chu a ni chiang a ni.

"Eu, ka fapa chuan tèté a lo hne leh tawh a ni maw? Ka pawm châk asin le," U Puia chuan a rawn ti lût a. Ani hi, a lo haw leh tawh nia! Fapa a neih hnu hian dàwrah a awm rei ngai lo, an buai àwm tehlul nèn!

"Bawihte, Âpa a lo haw leh tawh a nia," tia Duata ka biak lai chuan rawn kûn hniamin," Ka fapa hi ka hmu châk leh tawh alawm, pawm ka châk a, ka làwm châk bawk a," a ti nung nung a.

"A mak thei! I upat ve tawh êm kha, dàwrah in buai àwm tehlul nèn!" ka nu chuan a lo ti ve a.

"Ka fapa hi a ngaihawm êm a ni," a tih chuan ka nu chu a nui hawk hawk a, kei pawh ka nui ve tho. Teh thlâwt hian, a ngai a ni ve mai.

Zàna ka nuin a puak mut hnuah chuan kan mut a, a pa chuan," Khawi maw ka'n fâwp leh lawk, a mumangah min hmu tùrin ka duh si a," tiin a fâwp leh hrâm.

Khua a vawh avàngin ka ke hmâwr chu a vawt viau a, a ke lum zeta min rawn khanin," Vûr ang mai! Pangti lum hi i nei ve miah lo em ni le?" a ti sup a.

"Nei ve bawk e, kut hmâwr leh ke hmâwrah hian a váng êm alawm," nui chung hian ka ti a.

"Heater-ah hem hmasa tal la?"

"Heater aia țha pasal ka nei che alawm. Thlasik laia ka heater i nia," ka tih chuan a nui hawk a.

"Țawngkam lah hi i thiam reuh siah."

"Thiam ve bawk ang chu, ka pasal duh tak," ka ti phawt a, chutah," Ka hlimzia hi aw, hetiang tluka hlim hi ka nei thei tawh lo hialin ka ring a ni. Duata hi a lo piang lo ang tih ka hlau ngawt mai," ka ti sap sap a.

"Piang ang, a pian loh ka phal hlei nem," a tih chuan ka nui hak hak a.

"Fa kan neih leh hunah chuan hmeichhe naupang duhawm zet sam kir chiat ni se ka duh," a ti a.

"Thu kan nei lo e."

"Nei ve tho e, kan siam thei alawm."

"Hah, chimawm lo teh, ka fapa hian min thlâkhlelhna kha min chhuhsak zo vek tawhin ka hre hial asin-"

Ka hmui a rawn hup a.

"LÊNGTINKHUM, ka nupui duh tak, i hre sual chhiava a nih chu, a hma ang chiah khân ka la thlahlel reng che aw, kan țan leh tawh dâwn em niang?" tiin ka bengah chuan a rawn seh nar nar a.

Ka lo thaw hak a.

*FÎMKHUR RAWH, VAWIINA I ȚHIAN ȚHA TAK NIA I HRIAT KHA NAKTÛKAH CHUAN I HMÊLMA A NI THEI*

FIN

(A lo tàwp ta. Ka regular lohzia ka hria, min lo chhiarsaktute, in zahawm ka ti a, in chungah ka lâwm lutuk. Ka regular loh ber țum a ni hial ang chu

Dam takin Pathian zârah kan awm ang a, story thar nèn kan inhmu leh thuai turah ngai ang. Lo inenkawl țha ula, kan inhmuh leh hma zawng atân BYE BYE. LOVE YOU ALL )