☆LTK☆ - 7 - 12 By Dingdi Pachuau

 ☆LTK☆ - 7 - 12  By Dingdi Pachuau

Thil dang sawi tawh miah lo chuan ka chhuak ta daih a, mak a ti ve khawp ang chu.

Ka tih dàn kha vau ni êm êm pawhin ka hre lo, a thil tih țha lo bànsan tùrin ka hrilh ve ni maiin a lang zâwk. Farnu hrilh takin alawm le ka hrilh le, ani pawhin lungloha a lâk loh ka beisei, a țha lo tih a hre ve àwm tho si a. A sim ngei pawh ka beisei a, ka duhpui bawk.

Thawhțanni tlaiah phone call ka dawng leh nawlh mai. Mipa naupang bike-in a sut nu khân min rawn bia a, làwmthu a rawn sawi nghâl mawlh mawlh a, min biak lai chuan kei chuan a hmel țha zet kha ka lo mitthla vang vang. A aw chu hriat a nuam kher mai, a zângkhaiin a dam hle a, nu țha tak a nih pawh ka ring.

An nupain min hmuh an duh a, hun remchâng ka neih hun an hre duh a ni àwm e. Làwmthu min hrilh an tum vàng a ni ngei dâwn si a, hmuh chu ka duh vak lo; mahse, hmuh duh loh ringawt lah chu a tihchi loh bawk si a. Serkawna awm tho an lo nih vàngin an in awmna min hrilh a, naktûk chawhnu bàna an ina ka pèn theih tùr chu ka hrilh a, a lâwm thiam kher mai.

Ni a liam a, September thla ralin October a rawn inher chhuak leh ta. Hun a nuam chho telh telh, Chhelovi erawh ka hmu khât ta riau mai, Sunday-ah phei chuan inkhâwmnaah pawh ka hmu ngai ta lo. A in luah a insawn àwm ka hre lo va, ka tihlau viau em ni aw ka ti zâwk. Ka tih dàn kha a dik tâwk chiah lo maithei a, ani hi khatiang nun lo nei sa tawh kha a ni a, a lo inthlahrung lutuk pawh a ni maithei.

Țhiante pawh nei lo, kàwm ngai lo ngang kha a ni a, mi vàntlâng zînga awm a inthlahrun tawh nâklaiin, Biakinah hial pawh a lo inkhâwm ngam tawh lo chu a ni si a, kei hian ka tidik lo deuh chu a ni lo maw?

*******

TLUANGPUII

~~~~~~~~~~

A thil sawiin min shock-zia chu hria se chuan amah ngei pawh khân mak a ti ngawt ang chu!

Ka ding reng a, a chhuah hnuah pawh ka che sawn chuang lo. Ka thil hriat kha ka hre dik lo a nih ka ring a, ka ngaihtuahna leh mang chhia mai a nih ka ring pah deuh bawk a; mahse, kawngka inhawng hiai leh rimtui ka hman țhin ni miah lo rim ațang chuan ka mumang ni lovin thil thleng ngei leh a tak tak a ni tih ka hre chiang leh.

Ka hmuh thut laia ka hamhaihzia leh laihzia kha, ka ina a rawn kal ve tlat mai kha a mak asin! Chhungrilah hlimnain min vûr hlawp hlawp a, he pa hian min duh ve deuh a ni ang tiin ka lo ring hman; mahse, a thil sawi chuan ka hlimna zawng zawng chu a hliah khuh hneh kher mai, paih bo ang hmak a ni. Mahni lo maha inkiltawih tawh naklaiin Ruihhlo zuarah min chhuah chu a ni ta mai si a...

Ka mittui hi a tla zen bîk lo, ka pa a thihin ka țap a, ka mittui a tla, ka nuin min chhuahsan hnuah a tla leh, tunah hian a tla leh bawk. Engati nge ka rilru ka tihnat viau? Mi sawisep ka kai țhin tho si a, engtiziaa kha pa thil sawi vànga rilru na viau nge ka nih?

Kha pa kha ka lo duh ve viau hman a ni ngei ang. A hming pawh ka hre lo va, min biak hmasak avàng maiin eng vàngin nge a lakah beiseina ka lo neih ve ngawt? Kei chu fahrah, nu chhuahsan leh pa thihsan ka nih hi, tu mah beisei ngam tùr ka ni lo asin. Chubâkah, mite thinhrik leh sawisep kâi ka ni a, min biak avàng khân mi dang aiin ka lo dah sâng a, mihring pângngai ka nihna angin min en ve niah ka lo ngai asin.

Mahse, a tàwp vek.

Ka mittui chu ka hru hul a, kei chu ka nu nunhlui, a khawsak dan leh nun dàn hian hlimthlâ angin min chènchilh reng a, min thlahthlam thei ngai dâwn lo a nih hi. Mi pângngai nih tumin bei ve viau mah ila mi fel tam tak bulah hian eng mah ka ni thei ngai lo ang, ka nu fanu ka ni tlat si a. Ka nu fanu hi ka dam chhûng leh thih hnu, thlàn thleng pawhin ka la ni fan dâwn si a, ka tân chuan an bula chèn, khawsak leh rualpàwl pawh hi thil har tak chu a lo ni.

Zànah ka muhìl thei lo. Dik tak chuan kha pa khân thil a hre dik lo a ni si a; mahse, engtin nge kei hian ka hrilh theih ang le? He khawvêl ka lo pian chhuah ve ațanga beiseina ka neih ve sêt sêt, mi pângngai anga rilru min puttîr theitu tùra ka hriat hian ka rilru a ti-down leh vek. Ka lo beisei sâng lutuk a ni, ani pawh hi mite ang tho, danglamna nei chuang lo a lo nih hi. An vênga awm atân min duh loh vàngin thil dik lovin min rawn puh a ni, ka nu vànga ka hmingchhiatna hian min va tihrehawm tak ém!

Mahse, ka nu a ni alawm. He khawvêl êng hmu thei tùra min hring chhuaktu, ka duh rêng vanga ka nu ni lo mah se ka thih ni thleng pawha ka nu ni tùra Pathian min pék a ni. A hming chhiat tawhna tam takte avàngin ka nun nasa takin tihchhiat a ni tawh a, mi zînga awm pawh nuam ti thei lo leh inthlahrung rêng rênga ka awm hnuah ka pateate nupain mi pângngaiah min chher chhuak leh a, ka pateate nupa hi awm lo phei se chuan he khawvêlah hian ka dam tawh kher lo ang.

Ka nu leh pa kha nupa hlim tak an ni ngai lo, ka nu kha a lêrh ve țhìn a. Ka pa khân hmangaih tak leh dawhthei takin a zilh țhìn a, thinrim awka erawhin a be ngai lo. A hmangaihin a duh takzet țhìn niin ka hria; mahse, ka nu kha a pãwngpawrh țhìn, ka pa thu sawi kha chu engah mah a ngai lêm lo.

Ka pain natna a tawrh hnuah phei kha chuan inah a awm khât ta a, ka pa chu ka theih tawpin ka enkawl ve țhìn. Ka nu chu ka zilh ve ngam ngai lo va, a chhan chu ka têt lai ațang tawhin min ngaina ngai lo a ni. Ka pain min hmangaih țhin êm avàngin ka pa chu ka duat a, ka ngainain ka ngai țhìn. Ka pa thih hnuah chuan a zia dik tak a rawn chhuah ta rêng a, amah a chhe lo bawk si nèn, zahna châng ka hre tawh si a, ka zak a, hrehawm ka ti ngawih ngawih țhìn a nih kha.

Min hringtu ka nu chuan min duh lo mah se ka nu a ni tho a, a chanchin chhia a țha ka ngaihven ve reng tho. Tûn hnaiah phei chuan police-in an man ngun si a, hrehawm ka ti thei lutuk. Damdawi(ruihhlo)a zuar țhìn a, a awmna vêng ațangin an hnawt chhuak thùl. A chanchin ka hriat hnuhnun berah phei chuan pasal nei lovin inzuar kual ang deuhin a awm a, ruihhlo pawh a zuar zêl tho a ni àwm e.

Ka nu nihna ang chiaha puha ka awm hian ka rilru a tina zual. Ruihhlo zuar ila chuan min hauin min rawn vau se ka hre thiam ngei ang; mahse, ka tih ni miah lo ka nuin a tih țhin avànga hetia puh ka han ni ve ta ringawt mai hi ka rilru a na zual a ni.

Aizawla phei ka duh. Ka rilru hlim lohna leh hrehawmna zawng zawng hi ka pateate nupa bulah thâwi dam phawt ila, anni chuan min lo hre thiam ngeiin ka ring. Ka unau ka zawn rûk ve lah hi a hming ka hre bawk si lo, lo hmu ta pawh ni ila, kei hmeichhe mâwl tak leh mi tâna hnawksak mai hi a unau atân min lo pawm duh lo maithei bawk asin.

Unau ka nei tih ka hriat tirha ka hlimnate kha vawm bo ang duak a ni tawh.

Ka phei hmain ka chhûngkaw chhar tharte kha ka tlawh leh rih a, anni pawh hian ka nun dan zawng zawng an hre hauh lo. Hrilh vek kher ngai ka ti lo va, anmahni țanpui theia ka awm hi ka lâwm tâwk a, anni tal hi chuan mi pângngai anga min hmuh hi ka duh a ni. Chuvàngin, an bulah pawh ka hmel lan dan ka thup fo. Nuam lo ti țhìn mah ila ka hlim ve theihna niin ka ngai a, min hriat chhuah hlauh chuan ka chhûngkaw pakhat pawh hi ka chân mai dâwn asin.

Ka pateate inah chuan ka innghat leh tawp. Ka phei fo tho a, ka phei chhan pawh min lo zâwt chuang lo. Ni rei pawh ka la awm hmain ka nu chanchin țha lo deuh ka hre leh chawpchilh a, a dam lo a, damdawi inah a awm a ni àwm e.

Ka patea chuan," Ka tilui dâwn lo che, i duh chuan i nu kan tùr chuan kal la, i duh loh pawhin a pawi lo. Nangmaha kan i hreh pawhin ka kalpui thei che a nia," a ti a.

Ka nutei chuan," Ngun takin ngaihtuah la, a hnua i inchhìrna tùrin thutlûkna siam hauh suh aw, i nu a ni a, mi dang țanpuitu leh awmpuitu pawh a nei hauh lo ang," a lo ti ve a.

Ka rilru a buai, ka awmpui pawh a duh kher nâng. Kei pawhin awmpui ka duh bîk lo, bâkah, nurse, doctor leh mi dang dang pawhin an lo hre vek ang a, va awmpuitu nih pawh a zahthlâk ngawt ang chu, a lâr si. A làr dàn lah a chhe lam hlîr, a fanu nih pawh a zahthlâk. Min duh lova min kalsantu hian a chunga khawngaihna lantîr a duh dâwn em ni?

Min hringtu ka nu a ni si a, min kalsantu ni mah se min lo mamawh reng tho maithei a, damdawi inah hial a awm a ni a, min mamawh thu chu a sawi ngam miah lo ang; mahse, min mamawh viau tho chuan ka ring.

Ka hmuh lohna a rei ve tawh bawk a, han kan chu a sualna ka hre hran lo, min lo hmuh duh loh leh ka kan malêk tawh thung ang a.

Ka patea nèn chuan kan han kal ta ngei a, durtlângah daih a lo ni nghe nghe a. Awm man ka rilruah a lo awm hmasa ber, a awm rei phei chuan khawia pawisa nge a pêk ang?

A lo chêr tawh nasa mai. Ka hai țhelh nghe nghe, a hmel țha tak țhìn pawh kha a hriat vak tawh loh,tunah chuan pitar hmel a lo pu tawh!

Min lo hre mai bîk lo. Ka patea erawh a lo hria a, min hre lo mah se a awm ka ti, min hmuh lohna a rei êm mai.

Awmpuitu a nei hauh lo, damdawi ina dah lûttu hi Bawngkawna ka patea thawhpui a lo ni a, ka patea thawhpuite bathlàrah nikhaw hre lovin a lo tlu a ni àwm e. Ka patea thawhpui chuan thuphungin patea bulah a lo sawi a, patea chuan ka nu a ni tih a lo hre nghâl mai.

Ka nu chu ka be miah lo, ka kal ve ringawt a ni mai. Biak hmasak ka hreh a, koh ka hreh bawk.

Ka patea chuan a bia a, ani lah chuan chhum bung zet zetin a chhâng. Ka nu min hringtu chu ni lo se chuan ka kalsan vang vang ang, kan han kan ve vang vang a nia, mi a lo chhàwn țha duh lo zui, ka rilru a tinâ. Mi dang awm veho pawh chuan min rawn en hrek hrekin ka hria, a zahthlâk ka ti ngawih ngawih.

A hnuah phei chuan pâwnah ka chhuak daih. Ka thinlung a tâwt a, hrehawm ka ti. Ka thin a rim a, ka khawngaih ve tho bawk si a, a hmel hmuh hrehawm ka ti bawk.

Haw kawngah chuan ka ngawi reng a, ka patea pawh a țawng hran lo. Kan tùra kal ka duh tawh lo, khatianga ka patea pawh a lo chhàwn țha duh lo kha ka thin a rim, duh lova min kalsan tawh hian ka han kan kher a phû pawhin ka hre lo ve.

Ka nutei chuan thil awm dàn min lo zâwt siam siam a, kei chuan chhàn dàn tùr vak ka hre lo. Thil nih dàn dik tak ka hrilh mai a, han zêp ngaihna pawh ka hre hek lo.

Aizawla ka awm chhûng chuan ka han kan tawh lo. Engtia rei nge damdawi inah chuan a awm pawh ka hre lo, ka ngaihven duh lo tawp.

Lunglei ka phei leh dâwn zànah ka nutei chuan ka nu chanchin chu dam takin min sawipui a, damdawi in ațangin dam takin a chhuak tawh a, a awm man pawh ka patea chuan a pêksak tih a sawi bawk.

Pawisa ka khâwl țeuh tawh a, ka pain min hnutchhiah țeuh bawk alawm. Ka nu tâna ka tih ve theih tâwk a damdawi in awm man chu keimah ngei hian pe tùr ka ni, min duh lova min kalsantu mah ni se, ka nu a nihna a bo chuang si lo va, ka patea pawisa rinsak ringawt chu a fuh ber lo.

"Nute, pawisa hi ka pawisa vek a ni bîk lo. In duh duhin in hmang thei, nangni hi min enkawltu in ni a, ka nu leh pate in ni. Ka hminga pawisa awm hi chu a hming mai a ni a, țûl a awm hunah chuan hman mai tùr, ka tâ a ni bîk lo. Ka nu awmna man pawh chu keima pêk tùr a ni alawm," ka ti a.

"A dik alawm. I patea tân a harsa hran chuang lo va, țûlah chuan inpuih tawn tùr chu a ni; mahse, i pawisa hi chu khawihpui che a duh lo, keini pawhin kan mamawh chu kan nei ve tho a, nakinah pasal a chhia a țhate i la nei ve duh ang a, i pasal fanaute tân a la țangkai dâwn asin," a ti ta duah a.

Ka nui hawk.

"Pasal neih ka duh hlei nem. Ngaihzâwng neih pawh ka duh chuang lo, ka nihna dik tak an hre chhuak ang a, hmusit taka min kalsan leh tùr chuan ngaihzâwng neih ka tum lo. Ruihhlo zuar, pawisa nei apiang ûm thei zêl fanu chu tu mahin an duh thei bawk lo ang," ka ti sap a.

Ka kuta chelhin," Bawihte, chutiang rilru chu pu mah ta che. Nula fel leh nungchang țha tak i ni alawm, i nu chuan a lo dai sual laklawh tawh a, dinhmun a pheh laklawh tawh chuan insiam țhat hi a har ve duh a nia. Nang chuan chutiang dai sual eng mah i nei lo va, nurse i ni lehnghâl, tlangvâl tam tak mit latu pawh i ni ngei ang, i rilru tihnual reng reng suh," tiin min fuih sauh sauh a.

"Nute, i hre lo a nih chu. Mi zawng zawng hian min hmu hé vek tawhin ka hria, inkhâwm pawh nuam ka ti tawh lo. Mi pângngai nih ka tum ve poh leh min hmuhsitna hi a langsàrin ka hria."

Ka nutei chuan dam tak hian," Bawihte, mi chak tak i nih kha. I nihna ni miah loah chuan buai lo la, i nu lo dai sual avànga hmu hé che an lo awm a nih pawhin dem lo la; mahse, i dai sual ve lo tih lantîr zâwk tùrin ka duh che. Miin an hmuh sual vàng chein i rilru ti-down lo la, mi pângngai chunglam zâwk i ni tih lantîr ang che. Mi tam tak aia hna zahawm thawk thei nurse i ni a, engti kawng mahin i hniam lo a nia. Miin i rilru an pawh hniamsak che hi phal ngai suh aw," a ti keuh keuh a.

Lunglei ka phei leh ta a, kawngah chuan ka nu chu ka ngaihtuah phei a. Ka hmuh ve theih chhunah pawh ka be lo va, ka ko duh lo a ni a. Ka nu khân min kalsan vàng khân a lo inthiam lo viau pawh a ni thei a, min be ngam lo pawh a ni maithei asin. Kei lahin biak ka tum lo ve ringawt si a. Ka nu chuan a dai sual laklawh tawh a, kei dai sual ve lo leh thil țha hre zâwk leh inkhâwm zing zâwk hian ka induh khum chu a ni si a.

Ka va sual zâwk si ém!

Lo biain țha takin enkawl ta ila a inchhìr thu pawh a sawi ve maithei asin. A fanu hi nurse ka ni tawh tihte kha hrilh ta ila min chhuang ve ngawt ang, a lakah khân eng vanga khatia awm kha nge ka nih le? Thla kaw chhûng hrehawm takin min pai a, min hmangaih vànga min pai puitling min hring chhuak a ni a, ka nausèn buchip chhûng zawng min enkawl bawk. Duat taka enkawl lêt tùr ka ni zâwk asin le.

Ka rilru ka siam ta sauh sauh. Engtin pawh miin min sawiin min hmusit mah se ka awm dàn ka tidanglam tawh lo ang, ka tih tùr ang ang chu ka ti hmiah hmiah tawh ang. Ka nu fanu ka nih avàngin ka zak tawh lo ang a, ka hmaa tih tùr awm ka țhulh phah hek lo ang.

Mahse, a hun takah hian ka rilru ka tipaukhauh thei ang em?

Ka thlen tûk zànah ka chhûngte ka tlawh leh hmasa ber a, min lo lawm thiam leh viau. Ka nauvi phei chuan min lo ngai hman leh viau tawh a, a thawmhnaw tùr ka hawnsakte ka pêk chuan a hlim khawp mai. U Muana leh U Tei pawh ka hawnsak ve tho, U Tei phei chu damdawi ka hawnsak tel leh bawk.

An hlim hmel ka hmuh chuan nuam ka ti. Mi hlim hmel hmuh hi a lo nuam a nih hi, mi tâna ka tih ve theih tawka thil țha ka tih hi Pathian pawhin mal min sàwmsak ngei ka ring.

Muangchângin ka inkhalh hâw leh a, ka taksa chau mah se an hlim hmel khân ka rilru a tichak a, ka hmaa harsatna eng eng emaw a lo thlen hunah pawh an hlim hmel kha ka mitthlaah a lang reng ang a, chu chuan chakna, thil țha tih duh leh zêlna min pe thei ngei ang.

Ka in step-a ka kal chhoh lai chuan ka hming ngei mai hian min rawn ko ri ka hre ta.

Ka khawng awt lo chauh. A chhan chu min kotu aw hi ka hre chiang lutuk tlat!

Hawi lêt lo chuan ka chahbi bâwr chu nghet zetin ka vuan a, eng nge a rawn tih leh dâwn ni?

"Khawiah nge i awm bo daih a?"

Khawiah mah ka awm bo lo. Bâkah, ka awmna ani lo hriat ve pawh a țûl kher lo.

"Ka zin."

Min rawn zui zêl a nih chuan ka au vak mai ang, hetianga min vau duhtu leh min hmusittu hi ka mamawh hran lo.

"Khawnge i sam lem kha?"

Chhâng lo chuan Step-ah chuan ka pên chho a, min rawn zui zêl.

Ding thutin," Eng nge i duh? Lêng tùrin ka sâwm hauh lo che," ka ti lêt ve ta a.

"Min sàwm thu ka sawi hauh lo."

Min tidang titih dêr nia.

"Min kalsan thei ang em?"

"Ka zui hauh lo che."

Ka in chhakah hian step a la kal chho zêl a, a sawi hi a dik thei tho. Min zui ni lovin a kalna tùra ka awm vàngin min bia pawh a ni thei, nge min enthla ni ang?

"Min enthla a ni maw?"

A nui hawk.

"Enthlâk ngai khawpin eng thil nge i tihsual a?" a ti ta khauh mai.

Eng mah ka tisual hauh lo.

Chahbi chu tala kuaah chuan ka rawlh a, ka hawng ta a. A lo luh hlau chuan ka pawt khâr ta nghâl a, a nui huk huk ri chu ka hria, min nuih a ni ngei ang. A lo luh ka hlau alawm le, a lo luh leh hlauh chuan ka rilru a tina thar leh palh ang a, chakna ka nei leh thei lo palh ang.

* I THIL HRIAT LOH CHU HRE LO NGAM LA, HRIA ANGA LAN KHER TUM HEK SUH*

☆LTK☆ - 8 By Dingdi Pachuau

Zan tin deuhthaw a in luah lam panin ka inkhalh chhuak ziah. A lo awm ngai miah lo, kal ka țhulh chuang lo. A lo awm tâk mialin tiin Afakite ina ka lèn pawhin ka hâw lam hi ka kual ziah; mahse, a in chu a thim țhap reng.

Mak deuh mai chu ka hmuh ngai tâk loh hnu hian ka vei ta tlat mai a nih chu! A nui hmel mawlh mai kha ka hmu leh châk a, a aw thâm chhâlh mai te kha ka hre leh châk!

A in luah neitute, a chung chiah luahtute chu a chanchin chu ka zâwt a, ka lèn tamna lam a nih loh vàngin min hre chuang lo va, a chanchin zawh pawh ka hreh hran lo.

Ka rin loh deuhin anni chuan a chanchin chu an lo sawi a, nula fel leh țawng duh tak niin an sawi ve thung.

Ka ring lo miah lo. Khawpui nula, mahnia in luah hrang ngam kha a ni miau a, fel thawkhat tùr chu a ni. Ni lo, fel thawkhat mai ni lovin fel tak tùr a ni.

"In luah manah a buai ngai lo va, thla tin ni nga hmain a luah man a pe hman ziah."

Pawisaah chuan a buai lo tihna a ni, ani ang la naupang tê si chuan pawisa khur a nei țha hle tihna.

Tlangvâlho titi kára pakhatin 'Fanuin a nu a chhùn' a tih kha ka hre chhuak zawk a, a nu hi eng ang mize pu nge a nih le? Engtin nge a khawsak a engtiang takin nge a fanu hian a chhun ka hre châk. Chhelovi chanchin ka hriat lah hi a țha lo lam vek a ni si a, a nu pawh chanchin țha lam nei a nih chu ka ring lo ve deuh ngawt a.

A chanchin chu ka ngaihtuah ka ngaihtuah a, eng nge ka lo buai ve viau ni? A duh duh dànin a awm thei alawm, ka nau a ni lo va, kan chhûngte pawh a ni lo va, ka bialnu lah a ni hek lo. A thil tiha va buai chiam tùr ka ni chiah em? Hmeichhia mahni chauha awm lehnghal, kei mipa inti hian ka han vau kual chu a ni si a...

Tunah lah a awm lo va, ka vei tlut mai si. Ka vau vàng kha a ni thei ang em hetia a bîkbo char char? Vau thei ka ni chiah em? Khawtlâng hruaitu ka ni lo va, tlangvâl pakhat ve mai ka ni. Țhian a nei lo va, chuti chung pawhin YMA thil tihnaah a tel ve zêl a, inkhâwm lah a peih viau bawk. Hetianga mi sawi sep hi a hre ve a nih ngat chuan a tân rualpàwl a harsat tùrzia leh hrehawm a tih țhin tùrzia ka ngaihtuah pha hauh lo chu mak ka inti lêt, mahni vêng tak tak pawh ni loah chuan YMA thil tihna vêlah kei chu ka tel peih miah lo ang.

Nia, ka awm hle hle thei lo alawm, a chanchin hriat ka duh a, mi sawi zawng zawng hi chu a dik vek dâwn lo si a, a hriate ka zawh a ngai a ni.

Ka inngaihtuah chhuak ta thut a, ka hre châk a nih chuan zawh tùr an awm nual ang chu, phûr zetin ka chhuak ta a.

A in a êng ta, a awm tawh tihna. Ka thinlung chu a va phûr tehrêng êm! Eng vànga phûr viau nge ka nih teh ngawt?

Zàn hnihnaah Afakite ina lêng lovin a in luah bulah ka kal leh a; mahse, a lo awm lo leh hman tawh! Pawi lo, ka lo nghâk ang, hmuh ngei ka duh.

Mahse, eng thil nge a bulah ka sawi ang?

Ka rin aiin a lo haw tlai reuh. A kalna chu ka rin hriat tho nain zu kal ve kher ka tum tawh lo va, ka lo nghâk. Rei chu ka ti, nghákhlel taka nghâktu nih chuan a rei hma.

Ka be ngei ang. Min làwm dâwn lo tih ka hre sa reng, a chhan chu vautu kha ka ni miau si a, kei pawh ni ta ila ka lâwm hauh lo ang.

Min làwm lo ta rêng. Pawi lo, he nu tê hi chhaih ka châk tho, a nungchang mak deuh reuh hi ka hre chiang châk hle si a.

A ina luh chu ka tum chuang miah lo nain step-a a chho chu ka zui a, ani lah chuan a ina ka luh chu a hlau chiang, ka nuih a tiza reuh tlat nia.

Ina ka hàw hnu thleng chuan ka nuih a la za tho. A awm loh chhûng zawng khân ka lo ngaihtuah char char tawh a, ka han hmu leh ta a, ka phûr hle a ni. Mut hmunah ka nui suk suk reng, mahni chauha awm pawha min tinui theitu chu amah chauh hi a ni.

Class ka lâk lai pawhin ka lo ngaihtuah vung vung nia! Zia lo tak chu a ni. Engtiziaa heti taka ngaihtuah nge maw ka nih tâk? Ka ngaizâwng em ni?

A ni thei lo ang, hetiang nula hriat chian hleih loh leh mi sawi sep kai hi ka ngaizâwng thei lul lo. Ka ngaizâwng lo, ka ngaizâwng teuh lo.

Zan tin ka chhuah țhin avàngin zanin pawh ka chhuak lo thei lo, chhuah ka châk zek zek. Ka pa pawhin min zilh tawh nghe nghe, zan tina chhuah tum ringawt chu a țha lo tiin.

Ka chhuak leh ta nge nge.

Hminga'n min rawn phone lehnghâl a, dâwt ka sawi phah ta ringawt. He nu tê hi belhchian ka duh, mi sawi hi a dik takzet em tih ka hre fiah duh tlat.

A in êng ka hmuh chuan a lêng chhuak lo tih a hriat nghâl. Han lût ila min lo hnar ang em? Nge min lo be țha duh lo ang? Min be duh miah lo pawh ni se a àwm ka ti viau ang.

Min hmuh chuan mak a tih hmel kher mai. Min lo en hrá a, chutah, a hre chhuak thut a ni ang, hawi sawnin," Eng nge i duh?" a ti sap a.

"Zanin chu i chhuak dâwn nange?" sawi tùr ka hriat loh lutuk vàng chuan ka ti ringawt a.

"Eng thil nge i duh?" Nichin ai chuan a aw a chang ta.

"I chhuak dâwn lo maw?"

Kan inchhâng lo tawn hle mai.

"Min rawn vau leh tùrin em ni i rawn kal?" a ti fak mai a.

"Vau i ngaih phawt chuan."

A kal sawn a, țhu tùrin min ti lo na a, ka tuang ka tichhah lui a, long chair-ah chuan ka țhu thla ta a.

*******

TLUANGPUII

~~~~~~~~~~

He pa hian eng thil nge a rawn tih leh dâwn ni? Min vau leh tùrin a rawn kal tihna nge ni ang a min rawn enthla leh dâwn? A thil sawi dik lohzia han hrilh phiar phiar ka châk ngawt mai.

"Khawtlâng leh ram duh loh zâwng eng thil mah ka zuar lo," ka ti ta ringawt a, he pa bulah hian sawi tùr tam tak nei mah ila sawi duah ka tum lo, ruihhlo ka zuar lo tih erawh hria se ka duh hluah hluah.

"Engtin nge ka hriat theih ang?"

"Mipa i nih ngai chuan zawng chhuak ta che, ka thu sawi i âwih lo a nih chuan i thu thu."

Min en rùn reng avàng chuan nuam ka ti lo kher mai. Ka hawi sawn daih, tûn dârkârah tak hi chuan âwihawm taka thu sawi dàn ka hre duh takzet a ni.

"I chanchin hi ka hre chiang châk ngawt mai."

A thil sawi chuan min tiphu zawk! Mi min sawi dàn zawng zawng a hre ve vek tawh ngei ang, amah ngei pawhin ruihhlo zuarah min ngaih kha, min ngai țha tehchiam lo tihna a ni a, ka chanchin hriat chian leh zêl a țùlna ka hre lo. A hriat châkna chhan tùr lah chu ka bangbo khawp mai.

"I ngaih ang hi ka ni lo," ka ti leh a.

Ruihhlo zuara ngaiin min vau a, tunah lêm, ka chanchin hriat chian a châk leh a, a awmzia ka hre thiam lo. Min bâwl kual vêl mai mai a nih dâwn hi, nula mahni chauha in luah ka nih vàng hian min zuam a nih dâwn hi.

"A nih, Ramthar mawngah khân eng thil nge i tih?"

A laka insawi fiah hi ka ba lo asin.

"Ka chhûngte ka tlawh."

Ngun zet hian min en rùn a, a bialnute hi ringhlelin a dâwp fo duh hmel ka ti ta rum rum.

"Lungleiah hian eng nge i rawn tih?"

He pa hi, ka chanchin ka hrilh vek kher a ngaihna ka hre hlawl lo, ka bialpa chu ni se ka hrilh mahna.

"Mi ka rawn zawng." Dâwt erawh ka sawi thei bîk lo.

A țhutna ațangin a rawn tho a, kei invêng rànin, tang hráin ka lo ding thung.

"Rawn inkhâwm leh ziah tawh ang che," ti supin a chhuak ta vut a.

A chezia leh țawngkam chuan min tihrilhhai lutuk a, ka en zui ringawt!

Ka inkhâwm a lo hmu țhìn tihna a ni. A va nuam sî ve! Ka inkhâwm leh khâwm loh a lo hria tihna a ni a, tlêm chuan min ngaihven ve deuh hlek a nih hmel, chuti ni lo se min hre tawp nâng.

Kei pawhin ka hmu ziah tho. Hmu angin ka awm lo mai țhìn a ni zâwk si, țhian ka neih lêm loh vàngin biak lûmlàm tùr nei lo ta chu, ka ngawi reng lo thei lo va, ngawichawi nih ka hlawh phah rêng. He pa kher hi chu ka hmu ve ziah, kohhrana inhmang tak a nih ka ring țhìn, inkhâwm a pelh ngai mang lo tlat.

Mahse, a thû lo ve chiang. Ani tih vàngin ka inkhâwm kher lo ang. A sawi aiah inkhâwm loh duhna rilru ka pu nghâl rum rum a; mahse, ka inkhâwm hian ka rilru nasa takin tihdanglam leh mi pângngai anga awma inhriatna ka nei țhìn a, bâkah, inkhâwm hi chu ka tih ngei ngei tùr, Pathian ka chawimawi theihna hun leh làwmthu ka hrilhna hmun, A thu ka hriatna hmun a ni a, mite hmuhsit pawh ni mah ila Ani chuan min hmusit ve dâwn lo tih ka hriat vàng chauha inkhâwm ka ni țhìn. Pa ka neih tawh loh vang leh ka nu dinhmun heti mai a nih vàngte hian ka țawngțai ve nasa țhìn a, Pathian ka pàwlna hmun a nih vàngin ka ngaihlû a ni.

A thil sawi erawh hnial ka châk!

******

'Mipa i nih ngai chuan zawng chhuak ta che'.

Hetiang țawngkam hi ka vawi khat hriatna! Ka tlàwmngai lutuk. Nia, ka hre chhuak ang, ka zawng chhuak dâwn. Ruihhlo chu a lo zuar lo tak tak em tih leh ka ngaih ang a ni lo chiah em tih chu ka hre chhuak khawp ang.

Mipa ka ni, mipa dik tak ka ni alawm. Ka hriat duh chu ka hre nual tawh rêng a, chiang tak erawh chuan ka hre vek lo. Ramthar mawnga a chhûngte lah khân a chanchin an hre tam lo hle si a, chuti chung chuan chhûngte thisena zawmpui ni miah lovin țhatna avànga chhûnga insiam an lo la ni zui!

Eng emaw zahawmna riau a nei ka tih kha, he nu tê hi eng emaw tak chu a ni! A thisen zawmpui ni miah lo chu a theih ang angin a țanpui a ni a, an tân pawisa sèn lah a ui hek lo. Hei hi pa ber thu sawi ka hriat a ni.

Eng emaw thil thup chu a la nei a ni. Ruihhlo zuar a nih si loh chuan eng vànga sam lem leh tarmit lian kha vuah nge a nih? Eng vànga a hmel kha thup tlat nge a nih ang le?

Ka ngaihtuah nasat poh leh ka hre lo telh telh. A hmel a thup chhan kher hi ka hre lo takzet, eng emaw tak chu a ni ngei ang, a nu leh pa leh unaute, a chhûngte chanchin hriat ka nei hauh lo lehnghâl.

Mi a zawng tih kha a sawi a, tu tak ni ang maw? A hmel a thup dànah Ramthar mawnga mite hi a mi zawn chu an ni thei mai ang em? An bulah kher a hmel leh lan dàn a thup bawk si a.

Ka phone a rawn rîk tâkah chuan ka phu teuh kher asin. Afaki a lo ni a, ka biak khàtzia ka hre chhuak nghâl vat bawk.

"Hii?"

"I va induh tawh tak! I call ka lo châng reng a... i dam țha maw?" a rawn ti a.

"Aw, țha e. I va fel ve!"

"I ngaihawm lutuk a ! I rawn lang khât bawk sia, min theihnghilh tawh chu a ni êm lo maw?" tiin a rawn nui a.

"Theihnghilh nâng. Buaina neuh neuh hi ka ngah ve a, remchàn veleh ka rawn lêng dâwn nia." Dâwt ka telh zeuh zeuh. Ka buaina hi a hre thiam dâwn si lo.

"Aw le, ka lo thlîr reng ang che."

Thâwk ka la huai. Afaki hi chu nula fel ngang hi a ni a, lungawi lo deuh mah se ka lakah a tilang ngai lo. Tûnlai tê hi an inah ka lêng khât ta deuh a, chanchin a rawn ngaichâng te pawh a ni mahna.

A laka ka rilru put dàn ka ngaihtuah chuan ka khawngaih lâwk. Ka bialnu a ni a, ka duh lo miah lo; mahse, hmangaihna mitin ka thlîr ngai lo tih ka hria. Ka hmangaih em tih pawh ka ngaihtuah nasat tawh țhin kha, Mami hnua hmeichhia ka ngaihtuah leh tâk tlut tlut chu Chhelovi hi a ni.

A mak a ni. Khawtlâng sawi sep leh hming țhatna nei miah lo hian ka rilru a luah khat ta viau chu a ni si a, ka rilru put dàn hi ka duh hlawl lo. Ka ngaizâwng a nih hlauh phei chuan...

*Ka bialnu kha a râi a*

E khai! Hminga mai mai chuh! A râi har chu ka ti reng a, a rài duh erawh ka lo ring ngai miah lo thung.

Ka call nghâl. Text tih vêl hi ka peih ve lo.

"Engtin nge a nih theih?" ka ti nghâl táwng a.

"Ka hre bík lo; mahse, kan titla dâwn. Kan pahniha duh dàn a nia, bâkah, nau pawm tùr chuan a la inring tâwk lo a ni, bâkah, nupui neih thuai ka la tum bîk lo," nui hawk hawk chung chuan a ti a.

"Țhianpa, țha chu ka ti lêm lo khawp mai; mahse, in thutlûkna a nia, ka lo sawi ve phâk a ni miah lo. Thla eng zât nge ni tawh?"

"A țan tìr chauh. A la naupang ve bawk sia, college han zawm ve a châk bawk si nèn, a țha ka ti mai."

Naute pài duh loh chuan rài loh mai tùr tih hi ka ngaih dàn a ni țhìn. Bâkah, sex hman loh mai tùr, sex hman loh miau chuan rài a har. A thuhrimah, tûnlaiah rài lohna tùr eng eng emaw tih tùr tam tak a awm tawh sia, a bialnu pawh chu a fîmkhur tâwk lo ka ti ve tlat, a pâi duh lo a nih chuan invènna lam uluk mai tùr a nia. Naute han tihtlâk ringawt mai chuh, a fuh vak lo.

Mami kha ka ngaihtuah chhuak, lo chêtsualpuiin râi hman se ka ti a nih kha. Râi se chuan ka nei dâwn chiang, min tlàn bosan bîk kher lo maithei bawk. Hetiang hian mal takin ka awm lo ang a, nupui fanau neiin ka awm ngei tawh ang chu!

"In thu thu alawm le!" Chu ka ti tak nain ka ngaih dàn chu a ni lêm lo.

Biak inah chuan ka hmu ta e. Inrinni zàn a ni a, tlar hma lam veilam sîr berah a țhu, a hnunglam ațang pawhin ka hai lo chiang.

Ka han vau ve kha chu a nia; mahse, tuna ka rilru puthmang hi chu a dang daih. A nui mawi zet kha ka hmu leh châk, engtikah nge min nuih sak hmel kha la hmuh leh ang le?

Inkhâwm chhûng zawngin chu thil chu ka ngaihtuah. Ka rilrua ka vei tlut mai hi a țha nge țha lo pawh ka hre thiam lo, Hminga'n hre ta se, min nuihzat àwm teh e.

Inkhâwm bànah chuan amah hmu thei ngei tùr chuan ka awm a, ani erawh chuan min hmu lo a ni ang, a hawi kual lo rêng rêng. A hâwkdâk lo lutuk hi a buaithlâk deuh chu a ni, min hmuh ve ka ring asin le.

*MI TU EMAW THINLUNGA TLÂK NAT VIAU I DUH CHUAN TÛN AI KHÂN HAN NGAIHSAK ZUAL SAUH TEH*

☆LTK☆ - 9 By Dingdi Pachuau

TLUANGPUII

~~~~~~~~~~

Min hrilh vàng ni lovin ka duh vàngin ka inkhâwm.

A țhutna ngaiah bawk a țhu leh kur ang chu. Inkhâwm a peih viau hi mak ka ti zâwk, thil hre chiang mang hlei lova mi puh hmingchhe ringawt mai, ka thin a rim chuang lo; mahse, ka lâwm viau lo. Mipa a nih chuan thu dik hre chhuak tùra ka tih kha maw, tlàwmah chuan a la ve khawp chuan ka ring!

Ka patea ațang hian mipa dinhmun leh nihna zahawmzia leh hmeichhia aia an chungnunzia hi ka zir chhuak chiang tawh a, zah pawh ka zah, ka ngaisâng bawk. Ka dah chungnun avàng leh Pathianin a din dàn a ropui êm avàng hian hmeichhe rilru ang lek pu tùrah pawh ka ngai ngai lo.

Mahse, mak ka tih deuh chu min hmusita min chhaihtute hi mipa an lo ni leh tlat, a țhente phei chuan min chhaih dàn hi mihring pawh ni ve lo hialin min chhaih niin ka hre ţhìn. Pathianin duh taka a siam țheuh kan ni si a, ka thlìr ve dàn chuan tu mah hi inhmusit thei kan awm lo ka ti țhìn; mahse, ka nu hetiang a nih hnuah hian nungchang, chezia leh nun dàn pawimawhzia ka hre chhuak zêl a, ka nu ațang tawha zah tlâk ni lo mah ila mi aia hniama nun hi ka tum ngai lo. Mi aia hniam tihah mite sawi sep kaiin a nia ka tih; mahse, ka theih ang tâwka ka nun ka uluk pawhin ruihhlo zuarah min la chhuah duh tho si.

"I rawn inkhâwm tak tak!"

Min tiphu țêp alawm! He pa hian eng vàngin nge min rawn zui ni? Hawi lêt lo mah ila ka hnung deuh chiahah a rawn kal tih a aw ațang chuan a hriat theih, a pên ri (a kal ri) ka hre miah lo chu mak ka inti khawp mai.

"Biak in hi i tâ a ni bîk lo."

A nui hawk ri chuan min tihrilhhai lek lek. Ka thil sawi chu nuihzatthlâk a ti ngawt ang, ka ngaihtuah chiang a, a naupanchhiatthlâk ka ti hnuhnawh.

"Min nuih rawh; mahse, min rawn zui tawh suh."

A nuih a za sauh a ni chiang, street light hnuaiah chuan chiang takin hmu lo mah ila a nui tih ka hre tho.

"I hnungah ka kal ringawt."

Hawi lêtin ka kal leh ta a. Nia, min zui kher pawh a ni lo ang chu, pèn kàwina tùr a nei pawh a ni maithei tho.

A țawng tawh lo va, kei pawh ka țawng lo; mahse, ka hnungah zêl a rawn kal.

Tlangvâl hawklakin min lo chhaih a, hawi pawh ka hawi sawn lo, ka kal ngaiin ka kal miah miah. Min rawn zui loh hrâm ka beisei.

"Khatiang tlangvâl hawklak kha i hlau em?"

Ka sîrah a lo kal reng tawh, min hlat lo viau bawk.

"Hlau...lo."

"Nula mahni chauha khawsa tân chuan an hlauhawm thei viau a nia," a ti a.

"Min sawi țhaih tihna a ni maw?"

"Sawi țhaih lo, thil nih dàn pângngai a nih chu."

Ka in panna bul ka thlen chuan ka péng chho nghâl a, ani pawh chuan min rawn zui zêl tho nia.

"Khawiah nge i kal dâwn?" tiin ka zâwt. Inah hian min zui lût ve ang tih ka hlau, ka duh lo, tlangvâl inlêng ka nei ngai lo.

"Ka kein min kalpuina lamah."

He pa hian min chhaih nge min diriam pawh ka hre thiam lo. Țha takin min chhâng lo réng réng, a chìn dàn chu a nih ka ring chiah si lo.

Tala chu ka hawng a, kawngka ka hawn lai chuan step-ah chuan chhoin," Ruihhlo zuar nula inah ka lêng peih teuh lo," a ti sup a.

Hmm, min la ringhlel reng a nih dâwn hi.

"Mipa tak tak i nih pawh ka ring lo ve," ka ti ve sak a, kawngka ka khàr nghâl chiah tho nain a nui thâwm chu ka hre tho.

Ka nui sak.

Eng maw?!! Tunah khân ka nui maw?! Thinrim tùr ka ni zâwk lo em ni le? Kha pa khân nawmnah tak takin min biak kha, ruihhlo zuarah min la puh zui, ka lu ka thing nak nak a.

"Theihnghilh hmak rawh, eng atân mah a ti lo che. Ngaihtuah zui a phû lo, nangmah vautu che a nih kha, mipa a nih tak tak chuan a thil tih vàng khân ngaihdam a dîl ngei ngei ang che," tiin ka inhrilh mawlh mawlh a.

Mipa dik tak chuan a thil hriat sualah ngaihdam a dîl hreh lo va, a hreh loh bâkah a thil hriat sualah a inzir fing ţhìn. Mihring a nih ve miau avàngin thil a tisual ve thei tho a, tihsual hi mihring zia a nih miau avàngin.

Zàn mut hmunah pawh ka ngaihtuah zui zêl. A nui hawk ri te kha hriat a nuam ka ti a, biak ina min biak hmasak ber țumte kha ka hre chhuak leh uar uar.

Mipa dangte hi chuan min en duh tih hre mah ila pâwnlâng takin min en țhìn a ni, min be ngai lo va, min biak ngai loh chhan pawh hi ka chhui thiam viau tho. Kan kohhran hruaitute zîngah pawh hian min melh hrak hraktu hi an awm ve tho a nia, ka chanchin hre chiangtute hian min be hreh tih ka hria a, min be hreh ve lêm lotu lah hian ka chanchin a hre dik lo hulhual bawk si. Min hre chiang ta se, min be peih kher bîk lo maithei.

A tûk inkhawmnaah pawh ka hmu khiau. A țhianpa ni àwm tak nèn an ding dùn a, min hrechang lo khawp ang, an titi mûk êm mai.

Min hmu lo a niang, nge min be zak? Kei chuan ka be dâwn lo, be hmasatu nih ka tum lo ve tawp. A hming pawh ka la hre lo hrim hrim, a hming hre miah lo hian ka àn khum ve nasa tawh chu a nih hi.

"U Pui??"

"Hello Cindy? Eng nge ni ta?"

Hawi kher lo mah ila a aw ațang chuan tu nge tih ka hria. U Puia. Eng Puia tak ni ang maw? A hming ka hre ve ta nawlh alawm le, U Puia chu. Tlangvâl naupang lutuk chu a ni tawh lo chiang, Tuna 'Cindy' a tih pawh kha kei aiin a upat hmel daih si, tlangvâl senior a ni deuhthaw hial tawh ngei ang.

Chawhnu lamah U Muanate in lamah ka lêng thla a, phone țhìn tho mah ila zuk hmuh hi an nuam ve hrim hrim; mahse, buaithlâk ta ber chu sam lem vuah ngai țhìn hi a ni. Ka lo vuah țhìn kher kher chu ka inchhîr tawh khawp mai, kha pa Puia lah khân min rinhlelh phah a, a ngaih dàn kha thil hre thiam lo tân chuan thil theih tak tùr a ni tlat a ni, ka nu an loh ka tum lutuk vàng a ni ber; mahse, a fanu ka nihna a bo chuang si lo.

"Tluangpui, tlangvâl pakhatin i chanchin hi min rawn zâwt vang vang asin," U Muana'n a tih chuan ka phu zawk, mak ka ti lutuk!

Tu nge ni ang? An bulah hian sam lem vuahin lan dàn derin hun ka hmang țhìn a ni si a, ka tân a hlauhawm thei ang em?

"Tlangvâl chhe tak a nih dâwn chu," nui chung hian zahzèlah ka ti ve zaih a.

"Tlângvâl hmel țha leh hleitling tak a ni, nangmah ngaizâwngtu deuh che a nih ka ring a, in inhmeh ngawtin ka ring," U Tei chuan a lo ti ve a.

U Muana chuan," Tlangvãl pângngai tak a ni, min zâwt chîk viau lehnghâl a, i u Tei phei chuan a fiam zauh nghe nghe a," a ti a.

"Ka chanchin hre châk mi tlêm tê zînga mi a nih dâwn chu. In lo hrilh țeuh lo'm ni? Rawn zâwt nawn miah tawh lo tùr leh hnâra khawn ang vang vang tùrin?" tiin ka nui a.

"Ka hriat ang ang ka hrilh, mi fel tak i nih thu leh chhûngkua ang mai kan nih thute ka lo hrilh a, khatia ka sawi tâkah kha chuan min be țha sawtin ka hria," tiin U Muana chu a nui a.

"A nih chiah chu, a loh theih loh," ka lo ti ve a.

Zanriah ei tùrin min sâwm ve ngial nain inkháwm zàn a ni sia, ka hnial rih. 'Ni dangah hun remchângah' tiin kan inthlah. Ka naute a lo awm lo va, ka hlim a kim tlat lo.

Haw kawngah chuan ka chanchin U Muana lo zâwttu chu tu nge ni ang aw tih ka ngaihtuah pah a, ka hriatzawng a ni ang em le? Eng atân nge ka chanchin chu a lo zawh ang le?

"...min rawn zâwt vang vang."

U Muana khân 'zâwt vang vang' tih țawngkam a hmang tlat, chuti a nih chuan chu pa chuan a rawn kalna hmun a sawi tihna a ni ngei ang, a hming pawh a sawi maithei asin.

A, tu pawh lo ni se, ngaihtuah buai lo teh ang, a lo zâwt a ni ve mai, a ho êm mai.

Zàn inkhâwmnaah pawh ka hmu leh. Zanin chu ka tlâi deuh tlat a, ka țhutna ngai lovah ka țhu. Ka hnung chiahah a țhu tih ka hria, ka hnunglam chu a za mer merin ka hre deuh tlat, inkhâwmnaa thu sawi pawh ka ngaituah thei lo lek lek alawm.

Bàn veleh ka haw vat vat. Buaithlâk ber mai chu ka hàwna lamah hian zàna inkhâwm ve țhìn an awm tlat lo, ka in thlang lama mite chu kohhran dang an ni a, ka in luahnate lah chhùnah bâk an inkhâwm ngai lo. Ka lawina biak in lah chu ka in luah ațangin a hnai fahran si lo. Short cut chu awm ve bawk mah se mi bathlàra kal a ngaih țhin vàngin a inthlahrunawm si. Kawng thui lama kal char char lah hi khawi laiah emaw tlangvâl rual hnih khat hi an lo awm ziah, mahni chauh chuan a nuam duh lêm lo khawp.

"Fîmkhur rawh, i tlu ang e."

Ka kal hmanhmawh lutuk a, ka pheikhawk ka rap lek zauh a, ka tlu lo chauh a ni.

Ka en lo, min rawn zui leh tawh a nih hi. He pa bulah hian inhau ka thiam tlat, inhau ka châk tlat bawk a, mak ve tak chu a ni. Ka bulah a kal tih ka hriatin ka thla a muang ru viau bawk a, tlangvâl dangte pawhin min chhaih loh phah deuh bawk.

"Lo buai suh."

Mak ka tih bawk chu he pa bulah hian ka țawngkam hman ngai loh ka hmang nasa tawh viau bawk. Mite tâna hriat nuam lo tùr țawngkam hi ka phuh chhuak khât viau asin; mahse, he pa bulah hian ka va chhâkchhuak tam tawh tak êm! Ka ngeiawm thei a ti viau ang chu.

Zàn inkhâwmnaah pheikhawk sâng lam deuh ka bun tawh miah lo ang, inbilh nat a hlauhawm dâwn tlat. Ka hmanhmawh thei si, flat bun nuam tak bun ziah tawh tùr a ni.

"Ka lo paw dâwn che em ni? Tlêm a tlêmah, i tlu lo chauh a nih kha, i pheikhawk bun thlâk i ngai dâwn a nih kha, a hlauhawm êm mai."

A thû lo bawk si, a sawi dik viau bawk si, ka ngawi reng ringawt.

"Ka lâwm e."

"Làwm viauna tùr pawh ka sawi loh chu."

A va ngeiawm thei tak!

Tleirâwl rualho chuan min lo chhaih deuh nain ka bul hnaih deuha a rawn kal vut avàngin tlangvâl kalpui ka nei tih an hriat chuan an riat ta mai mai a.

"Mahni chauha kal chu a him lo."

Min ngaihtuah vànga min rawn ûm zêl a ni ang em? Nge min thlîthlai a duh vàng záwk? Kei lahin ka lo be țha tehchiam bawk si lo.

"Chu chu min zui chhan a nih loh ka beisei."

A nui hawk a.

"Ka zui ziah lo che, i hnungah ka kal ka tih tawh kha," a lo ti a.

Chu pawh ni se, ka làwmna a tam zâwk tho. Ka bulah kal lo se min chhaihtute hian min zui lo ang tih a hriat miah loh.

"Ka hnungah i kal loh kha," ka ti hrâm.

"Tlangvâlho laka ka hliah duh vàng chein i rualin ka kal mai a nih kha," tiin ka hnung lamah chuan a tawlh leh ta a.

"Ka lâwm e."

"I làwm chuan i inah thingpui min lum thei ang."

Phakar ve mai mai asin.

Ka in luahah chuan a rawn lût ve leh ta. Min vautu kha min vêngtu a lo ni ta daih a, ka inah hial thingpui rawn in a tum ta chu a nia.

"Țhu rawh, a so har lo ang," ka ti a, gas-ah chuan tui ka chhuang nghâl a.

"Ngaihdam dìl che ka duh a," a ti ta!

Ka hawi lêt lo; mahse, ka chàwl dat thung. Ka thil hriat hi mak ka ti a, ani mi chimawm deuh leh min vautu hian ngaihdam min dîl ang maw!!

"Ruihhlo zuar anga ka puh vàng che khân ngaihdam ka dîl e, mipa dik tak ka nih vànga ka thil hriat suala ngaihdam dîl che ka ni bawk."

A thil sawi chu ka ngaithla kar a, ka țawng ve hauh lo. Sawi tùr pawh ka hre lo, min tihamhaih tlat.

"Mahse, sam lem i vuah chhan kha chu ka hre châk khawp mai, engah nge i nihna dik taka i lan mai loh? Rinhlelhawm zâwngin i awm tlat a, ngaihtuahna/ suangtuahna hian babel in sâng a din thuai duh asin," a ti leh a.

Thingpui chu a so va, thingpuia ka siam hnuah ka va pe a, làwmthu a lo sawi sup a.

"Ruihhlo ka zuar lo tih chu engtin nge i hriat chhuah?"

"Mipa ka ni alawm!"

Mipa nih loh chu a duh lo hle mai maw. Tuna a chêt dàn hi chu mipa dik tak tih tùr a ni rêng a ni, a thil tih dik loah ngaihdam a dîl ngam a nia, a pà ka ti!

Rei a lêng lo, thingpui in chhûng kha a ni deuh tak tak! Kei lahin titipui tùr ka hre lo khawp mai a, tlangvâl inlêng nei ngai lo ta chu, sawi tùr rêng rêng ka hre lo.

A chhuah dâwnah erawh," A la hma alawm," ka ti ve a, hma a ti tak tak ang a, a țhu leh rih ang tih chu ka hlau viau tho si.

"Mi i zawng ni khân i sawi a, pakhat chauh ai chuan pahnih chuan an hmu hma zâwk maithei a ni," a ti sup a, a chhuak ta nghâl a.

A thil sawi kha, min zawnpui a hnial lo tihna em ni? Hm, kan hmu har tho ang, tunah hi chuan buhpâwl kâra hriau bo zawn ang vêl a la ni rih. A hmingpum ka la hre tlat lo va, damdawi inah khân ka nu kha zawh chian ka châk viau nain ka be leh duh ta lo kha a ni a, Serkawn Lungleiah an awm tih chauh ka hre lehnghâl.

Ka pateate kha chuan an hriat ka ring lo, hria ni se min hrilh daih tawh ang. Ka nu ka lo zâwt chiang lo kha a pawi ber mai, min hrilh hreh pawhin ka ring chuang lo asin. Hetia mal taka awm ai chuan lo zâwt hke hke ila țha tùr.

A hàw hnuah chuan ka nu diary kha ka la chhuak leh a, ka chhiar chiang leh; mahse, a hriat theih chuang lo. A hming bulah R chu a awm ngei mai a, a gel pentui hman a pherh tlat a, hriat a har hle a ni.

"Tu pawh chu lo ni la, Pathianin min țanpui ang a, ka unaunu i ni emaw ka unaupa i ni emaw ka unaute in ni emaw ka la rawn zawng chhuak dâwn tho che u, ka beidawng lo ang," tiin ka infuih sauh sauh a.

Ka pa diary-ah erawh chuan a vâng khawp mai. Ka nu chanchin erawh hmuh tùr a tam, an hun hman dàn, a hlim theih țhinzia chu a lo ziak kûr nguai a, ka nu a hmangaihzia leh duhzia pawh chu a ziak zak hauh lo. Hei vàng tak hian ka pa kha ka khawngaih țhìn, ka nu kha a duh hlum lo chauh rêng a ni.

Ka nu diary chu ka chhiar țha leh ngat. Ka kawl hi a tam vak lo, a ziak țha peih vak lo lehnghâl a, ziah loh ni a ngah lutuk ringawt. Ka pian hma kum daih tawha mi chu ka ching let ka ching let a.

'23rd March: He in hi nuam ka ti thlâwt lo. Pasal nei hming puin min hmangaih miah lotu, ka taksa mawina chauh duhtu hi pasal atán ka nei a ni si a, nun zalèn hmâna ka neih ang țhin kha neih leh ka duh; mahse, naute ka pai tawh si. Zànah ka pum a nuam lo rûm rûm a, tu mah ka hrilh lo, ka hrilh tùr ber ka pasal lah inah a awm si lo.'

A ziak lo leh vang vang a, 2nd April leh 3rd April a ziak leh a, July a ziak leh. Chhiar tùr a tam hran lo hle a ni.

A diary hrang hrang chu ka kêu kual a, ka pa thih kuma a ziah chu a ziah hnuhnun ber a ni. Tah chuan a phêk tàwp berah hian lehkha them hi a lo inzep țât a, eng receipt emaw tak a ni ang ka ti a; mahse, ka han en chian chuan ka nu hawrawp bial kêrh chu chiang takin ka hmu thei.

'Ka fate pahnih tân hian nu nih ka va tling lo êm! Ruatsang, i nau Tluangpuii hi lo enkawl ngun viau rawh aw' tih tê hi a lo ni a!

Tluangpuii chu keimah. 'Ruatsang' a tih chu tu nge ni ta? Ka u tihna a ni ? Mipa nge hmeichhia? Ka u chu a ni ngei; 'i nau' tih a hmang tlat alawm; mahse, mipa nge hmeichhia a nih tih ka va hre thei si lo ve!

Ruatsang.

Hm, a hming ka hre ta tal e. Ka zawng chhuak thei êm êm ang, serkàwn lamah ka zawng ang a, pa leh nu upa deuhte'n an lo hre ngeiin ka ring, ka nu hming ka sawi ang a, ka pa hi chu an hre hlawmin ka ring lo, Aizawl lam mi daih a ni si a.

"U Ruatsang, mipa nge hmeichhia i nih ka la hre lo; mahse, ka rawn zawng chhuak dâwn che, min lo nghák reng rawh, ka rawn hmu thuai dâwn che," ka ti sap sap a.

*KAN HMA LAM HUN SECOND KHAT LEK PAWH HI KAN HRE LÂWK LO, TÛNA KAN HUN HMAN MÊK HI A ȚHA BER ZÊLIN AW NI ANG*

☆LTK☆ - 10 By Dingdi Pachuau

Ruihhlo a zuar lo tih ka hre chiang tawh a, tunah chuan kawm ngeih viau ka tum tawh! Kàwm ngeih tihah mi a zawn kha zawn chhuahpui ka duh. He nula te reuh têin ka thinlung a her kawi kual vêl dàn hi mak ka ti, amah hmu lova awm harsa ka ti tawh viau mai a, ka ngaizâwng ni chiah chuan ka hre meuh si lo, ka rilru a tibuai tak tak tawh a ni.

Eng pawh ni se zanin chuan ka hmu lo ang, ka hmuh ngun viau vàng a nih ka ring hetianga ka awm tâk ni, bialnu pawh ka nei ve reng a, ani aiin ka ngaina zâwk dâwn tlat, fuh lo tak a ni.

Sikula ka kal pawhin ka ngaihtuah chhuah leh țhin chu amah tho a ni. A nui mawi zet kha ka mitthlaah a châm reng a, tûn hnaiah ka bulah nui hmel pu ngai tawh lo mah se kha nui hmel kha hmuh leh ngei ka tum.

Lêng tùrin ka insiam malh malh a, khua a vawh ve tawh avàngin ka inthuam lum deuh. Krismas a hnai ve leh deuh tawh a, a rim pawh s nam țan tawhin ka hria!

Ka insiam zo room ațanga ka chhuah chuan ka nu chuan," Bawiha, lêng tlut tlut lo hian lâk luh dàn hi ngaihtuah ve tawh teh, zan tin i chhuak a, chhuah man a awm lo êm mai," a lo ti a.

"Hetiang lam hi chu hmanhmawh viauna chi pawh a ni emaw ni? Ngun taka ngaihtuah chi alawm," ka pa chuan a lo ti a.

"Aw kan tar thuai mai dâwn asin, Mamawii fate lah kan pawmpui ve tak tak hman bawk si lo. Tû puak ve pawh ka châk tawh alawm, ka tar tak tak hma hian tih tum thuai teh," ka nu chuan a ti leh țâlh a.

"Ka ngaihtuah chho mêk alawm," nui chung hian ka ti a.

"Hna i nei tawh a, i naupang lutuk tawh lo bawk. Afaki pawh hian a duh ve khawp che hi, a fel roh a, fanu țha tak a ni ngei ang. Bâkah, awm loh pawha in lo nghâktu, chhûngkaw tiphuisuitu kan mamawh ve tawh bawk."

Kawnga ka tlàn lai chuan ka nu thil sawi chu ka ngaihtuah a, a dik ve reng. Nakin lawkah ka nu leh pate hi an tar thuai ang a, an țhat laia nupui neih chuan fate nei pawh ni ila min enkawlpui thei dâwn a, ka nupui pawh a hah lutuk lo thei ang, bâkah, ka fa an hmu châk ve tawh pawh a ni thei a...

Afaki chuan min lo làwm thiam lehpek. He nu hi chu sawisèlna tùr hi ka hre miah lo, a fel êm êm a, min ngaihsak thiam thei si. Mipa dang lakah min kalsan ka ring miah lo bawk, mi rinawm tak a ni ngei bawk ang.

Mahse, mak tak maiin amah ka thlâkhlelhna kha, a bo țhen ta tlat! Ka bula a țhut lai pawhin ka rilru a lo vâk sawn hman a, nui mawi zet kha ka lo mitthlà hman tho a nih chu.

Ka bialnu ngei ngei bulah pawh hetiang rilru hi ka pu a ni tak si a, ka rilru a uire tihna chu a ni reng mai a, a fuh lo thlâwt a ni. Hetiang hian ka bialnu hian ka bula a awm laiin mipa dang ngaihtuah se chuan ka lung a âwi miah lo ang.

"Zanin chu i zia a dang deuhin ka hria, i chàu deuh a ni lo maw? I cool tlat."

Ka nui suk a, ka ngaihtuah hi a hre tak si lo va aw...

"Chau lo ve, thil dang ka lo ngaihtuah nasa deuh a ni," ka ti ta ringawt a.

"I buai thei si a tiraw? Mahse, i rawn lèn khàt hi chuan ka ngai thei bawk si che a, hmuh che hi ka thlahlel thei êm a ni."

Ka bulah hian sawi hreh a nei hran lo va, min duhzia lah a sawi hreh hek lo. Min ngai a, min thlahlel ve thei viau bawk. Kei pawh ka nih ve țhin tho kha; mahse, tûn kâr hnih khat bàwr vêl ațang hian ka rilru hi a dik lo țan ta deuh tlat a nih hi.

"Buai êm êm lo ve, nang hmuh theih nân chuan ka rawn tlànsan thei alawm."

A nui sak a, tu emaw nui hmêl nèn ka lo khaikhin nghâl zat. Ka duh lo kher mai, ka lu ka thing nghâl vat a.

Ka lêng tawh lo ang, ka hmu ngun lutuk a, min tibuai zo vek tawh a nih hi. Ka bialnu ka hmuh lai reng pawhin amah tho ka mitthlà zèl tho si.

Ka rilru hmun danga pêng tùr chu ka control nasa kher mai, hrehawm ka ti zâwk. Zawlaidi min lo tât tawh em ni zâwk le?

Ka hàw kawngah pawh chuan ka insehruh nasa. A in kalna pêng ka thlen phei chuan ka rilru a insual nasa asin, kal châknain min tur ut ut a, ka in-control thei hrâm.

Mut harsa ka tih vàngin ka meng reng a, ka thaw leh hawk țhìn. Thil chi hrang hrang ka ngaihtuah kual nasa, Afaki laka ka rilru put a dang zo si a, a hmaa a laka ka put ang kha ka pu thei tawh dáwn lo tih ka hria. A chhan chu Afaki hi hmangaihna mitin ka en ngai lo, duhna chauh a ni a laka ka rilru put dàn chu.

Tunah hian ka duh tawh lo ka ti chuang lo; mahse, Tluangpuii hian ka rilru a luah nasa tawh lutuk. Ka hriat loh kârin ka rilru chanve hi a lo chang tlat tawh, ka la lêt thei tawh lo.

Mahse, hmuh loh ka tum tlat chuan ka rilru puthmang hi a danglam thei deuh mahna!

Hmuh loh ka tum ta ngar ngar a, zànah pawh Afakite ina ka lèn peih loh chuan ka chhuak ta lo. A ina lèn châkna chuan min tur nasa thei viau; mahse, tih tùr ka dap a, TV ka en loh leh lehkhabu chhiar tùr ka dap bawk.

Inkhâwm erawh ka țhulh thei lo, a țhutna ngaiah a țhu leh dâwn si, ka melh lo thei ang em?

Thu sawitu ka en ràn mai a, a țhutna ka melh lo lui ngar ngar. Thu sawi pakhat tê mah ka hre lo, ka mit control ka tum lutuk vàngin thu sawi pawh ka ngaithla thei lo.

Bàn veleh chuan ka chhuak thuai a, ka hmuh theih lohna tùrin ka inthiar fihlîm vat, ka hâw nghâl thuai a, ka awm dàn chu a nuihzatthlâk ka ti lutuk tlat.

Naktûk ka huphurh a, zàn pawh ka huphurh lâwk. Zanin anga ka awm kha a ngai leh àwm si a, chuti lo chu ka hmuh leh hlauh chuan...

*******

TLUANGPUII

~~~~~~~~~~

Zanin kha min zui leh ka ring a nia, min zui hauh lo. Zui loh bâkah inkhâwm bànah khân hmuh tùr a awm hauh lo, a inkhâwm ngei tih ka hria. Ka u zawn ka tumnaah khân min puih kha a inhuamin ka hre si a, a peih leh lo tihna em ni ang?

Zan dang ang chu ni se min zui leh ang a, kan inhnial leh ang. Ni lo, chimawm zet khân min hnial ang a, a nui leh țhìn bawk ang. Ruihhlo zuara min puh lai pawh khân huatna ka nei miah lo kha mak ka ti a, tunah hian ka hre thiam deuh ruak ta. Min be duhtu ka nei kha ka lâwm a, mi zawng zawng deuhthawin min biak duh loh laia min betu awmchhun kha a ni tlat. Ka tân chuan a hlu êm asin, inhnialin ka duh loh zâwngin awm țhìn mah se hetia a reh deuh tâkah hian khatiang inhnialpui tùr leh chimawm taka che țhín, țawngpui tùr kha ka lo mamawh êm a lo ni. A thâwm ka hriat loh vàng chuan ka hnual deuh ringawt a, ka khua a tihar tlat.

Ka hawi lêt zauh zauh. Min zui ka ring ru tho a nih chu, zahthlâk zâwk hian. Ka lo ngaina viau hman tawh a lo ni, chhùn lamahte khân zàn hun ngaihtuahin ka lo hlim rilru viau a nih kha.

Tleirawl rualin min lo chhaih leh bawk a, chak zetin ka kal dàwr dáwr. U Puia ka ngai sawt, ani bulah kha chuan ka him asin, min chhaih pawhin ka hlau miah lo, zanin zet chu min tihrilhhai tlat.

Naktûk chu keimahin ka be hmasa tawh ang, mi awm lai leh hriat laia biak erawh ka duh hauh lo. Miin min sawi palh ang, hming a chhe hma si.

Rilru kim lo zetin ka mu a, U Puia chuan min be leh duh ta lo tihna a ni thei ang em? Nge harsatna a nei rih zâwk? Buaina a nei pawh a ni maithei. Inkhâwm bàn veleha tih tùr a nei pawh a ni maithei.

Khua a vawh deuh tawh vàngin heater ka on a, ka meng rei reuh khawp mai. Thil ka ngaihtuah kual a, ka u chu eng ang hmel pu nge a nih ang? Unau ni mah ila kan inang vak lo maithei a, kan lo inang viau thei tho bawk. Ka hmu châk tawh, nau angin min lo pawm duh ang em? Ka nu diary ațang kha chuan a pasal hmasa (ka u pa) kha ka nu nèn khân an inngeih tehchiam loh hmel si a, an inhmangaih lo a nih si chuan ka u pawh chuan hrehawm a ti ngawt țhìnin ka ring. Kei pawhin ka pa ka khawngaih ve țhin tho kha, kei min hmangaih lo mah se ka pa kha chu hmangaih takin enkawl se ka ti.

Ka u chu ka nu chuan a duh lo ve tho em le? Kei chu min haw deuh tlat țhìn kha a ni a, ka la naupan deuh hlek vàngin ka ngaihtuah thiam vak lo zâwk a. Tûn hnuah hian min duh loh chhan àwm kha ka ngaihtuah vak țhìn, a chhan ka hre chuang lo. Ka u chuan min duh loh loh hrâm ka beisei, a chhan chu he khawvêlah hian ka mal lutuk tawh. Ka pain min boralsan tawh si a, ka nu lahin min kal bosan daih bawk si, ka u chauh chu ka innghahna a ni tawh. Mi sual tak lo ni lo hrâm se.

Uluk takin ka inchei a, tukin chu makeup ka hmang ve nual. Ka rin aiin ka lo inhmeh ve! Ka hman ngai loh vàngin ka han inhnawih ve pawh chu ka confi lo khawp.

Biak ina ka luh chuan a țhutna ka mitsìr a, a lo la kal lo. Ka thaw huai a, a lo inkhâwm ngei ang chu maw, a țhulh ngai loh kha.

Inkhâwm bànah chuan tualah chuan ka chìn dàn lo ang takin ka hawi kual a, ka hmu mai lo lehnghâl. A hnu deuhah erawh ka hmu, a țhian ni àwm tak tlangvâl pakhat nèn an inbia.

Ka dinna ațang chuan an dinna chu a hla lutuk lo, a rawn hawi ve chiah. Ka lo en lai a nih vàngin ka lai lutuk ringawt. Ka nui sak ringawt a, amah ka hope viau angah min ngaih loh hrâm ka beisei.

Biak chu ka duh; mahse, mi dang a dinpui tlat. Va biak buai ve chu ka duh miah lo, amah chauh chuan ding se thuhran.

Chawhnuah ka lêng chhuak. Zànah erawh ka inkhâwm leh, naktûk lamah chuan Serkawn lamah ka lêng chho ve tawh ang, ka u chanchin chu ka thlîthlai a ngai ve tawh, a hming pawh ka hriat tawh kha.

Inkhâwm chhûng chuan ka u zawn dàn tùr mawlh ka ngaihtuah. U Puia hian min pui duh tak tak se ka ti, pakhat mai ai chuan a hlâwk dâwn chiang si a, min pui peih leh lo a nih pawhin ka hre thiam lutuk tho ang.

Inkhâwm bàn veleh chuan inthiarna room-ah ka kal vat a, ka chhuah chuan a tam zâwk chu hâw tawhin an lo reh deuh duak tawh. Hmanhmawh zetin ka kal sawk sawk a, mi kal ruala kal ve ka duh asin, mahni chauh chuan tleirawl rual tawh tùr an tam thei si, min lo chhaih leh palh ang.

Biak in bathlàr ban phèn ațanga mi pakhat lo kal ve tho nèn chuan kan insu chiang kher mai, kan kal tumna a inang kher a ni ang.

Ka chal a ri dawp a, ka tlu teuh kher mai, a kut chuan ka bánah min rawn man hman hrâm. Chuti ni lo se chuan mawng sawh dawtin ka tlu ngei ang.

"A na!"

"A na em?"

U Puia. Ani pawh inthiarna lamah a kal ve tho a ni ngei ang.

"I âwm a chang si!"

"I chal a chang zâwk!"

Ka chal chu ka tuai hauh hauh a, ka ner nâng bawk a, a na reuh êm asin. A pâwng luau ang tih ka hlau.

"U Pui, min pui thei tak tak ang em?" Ka u zawn hmuh hi ka duh êm asin, chu chu Lungleia ka awm chhan pawh hi a ni rêng a, zah pawh ka dâwn tawh lo.

Min chhâng lawk lo.

"Ka lâk tlâk ngût ang em aw?"

"Lunglei mi i nia, kei ai chuan engkim pawh i hre chiang zâwk ngei ang. Min puih theih chuan ka lâwm viau ang," ka ti sawk sawk a.

Min en vang vang a, kei pawhin ka en ve kar.

A hnu daihah chuan," Ka lo inngaihtuah phawt ang e, pasal tùr em ni kan zawn tùr chu?" a ti daih a, a hmel ka en leh phawt, fiamthu a ni tih ka hre thiam ve nghâl.

"Ni maithei a ni," nui chung hian ka ti a, he pa bula awm hi nuam ka ti tlat. Fiamthu pah deuh si chimawm taka a han țawngte hi chhàn lêt nuam ka ti, a bulah hi chuan mi dang bula ka awm dàn ni miah lovin rilru free takin ka awm ve thei tlat.

Min rawn zui zêl tih ka hmuh chuan," Nizànah khân min rawn zui ka ring a; mahse, i reh daih a, ka khua a har ringawt a nih chu," ka ti a.

"Min ngai tihna maw?"

"Ngai chuang lo ve, a reh lutuk a."

Țawng lo chuan kan kal leh ta a, ka hnung maia a kal vang chuan ka tukkhum hi a hit deuh mep mepin ka hria.

"A nih, khawi vêngah nge i mi zawn chu a awm a?"

"Serkawnah. Ih, ka u a nia, mipa nge hmeichhia tih pawh ka la hre lo."

A din avàngin ka ding ve ringawt.

"Engtin... engtin nge a nih theih? Ka va hre thiam lo ve?"

Nuam ti vak lo hian," Inah ka hrilh vek ang che," ka ti ta ringawt a.

Kan țawng chhunzawm ta lo.

Inah chuan ka inthlâk hmain heater ka on a, thingpui ka chhuang nghâl bawk a.

Thingpui pea a piah deuha ka țhut hnuah chuan," Le, sawi tawh rawh le," a ti ta a.

Zêp nei hran lo chuan a tâwi thei ang berin ka sawi a, ka nu leh pa chanchin erawh ka sawi tam vak lo. Ka u chanchin ka hriat chhuah dàn, u ka nei tih ka hriat dan chu ka hrilh a ni ber.

Ka sawi chhûng chuan ngun zetin min lo en reng a, a mitmeng fiah zet ațang chuan eng nge a ngaihtuah ang tih ka hre thei lo, ngun takin ka thu sawi a ngaithla tih chauh ka hria.

Ka sawi zawh lamah chuan," Zawn țan dan tùr ka bangbo lutuk a, Serkawn lam phei chu ka kal vak ngai bawk si lo nèn, ka mi hriat vete lah chu nurse an ni deuh mai a, thil an hre tam bawk si lo," ka ti duah a.

"Lungngai suh, kan zawng hmu ngei ngei ang, a lo la dam phawt chuan."

A lo la dam ang nge a lo thi tawh ang tih lam ka ngaihtuah miah lo! Dam tùrah ka lo dah ve ringawt asin.

"Ni lo, a thi thei lo ang, ka hmuh hma chu a thi thei lo ang, ka chhûngkaw neihchhun a ni mai tawh dâwn asin," ka ti chuai raih a.

"I nu a la dam chu."

"Ka nu chuan min chhuahsanna a rei tawh lutuk. Mal takin kum kha leh chen kha ka lo awm tawh a, ka u ka hmuh hunah chuan héng khawharna leh mal ngawih ngawiha ka inhriatna hi a bo vek tawh ang," ka ti sap a.

A thi tùr a ni lo, a lo la dam ngei tùr a ni. Ka hmu duh a, nau a nei a ni tih pawh hriattîr ka duh.

"I nuin a chhuahsan hnuah che nangmah chauhin i khawsa maw?!"

Aw thianin," Ni lo ve, ka pateate nupain min enkawl a, anni awm lo se chuan ka dam tawh kher lo maithei. An zârah nun pângngai ka hmang chho thei hrâm a ni," ka ti leh a.

En lo mah ila min en reng tih ka hria.

"Ka zawnpui ang che, kan zawn hmuh hma chu kan beidawng lo ang," a ti ta a.

Chu thu chuan min tihlim takzet.

*THIL HRE THIAM TÙRIN I RILRU INPEIH CHIN CHAUH NGAIHTUAH NGAI SUH*

☆LTK☆ - 11 By Dingdi Pachuau

Zah dâwn hauh lovin ka puihna a ngèn a nia! Ka rilru a hneh nghâl hmak, ka hming nèn lam pawh a lo hre vek tawh bawk si, ka hnial thei lo. A hmel ka en a, pa nei lo leh nuin a duh loh vànga chhuahsan ni tùr chuan ka ring phal lo! Ka ring thei lo, a la naupang si a, ka khawngaih lutuk! He khawvêla thihna nunrâwng tak hian a innghahna ber a pa nunna a lâksak tawh a, a nu lahin enkawl peih lovin a kalsan a ni si, engtin nge hringnun a hman chhoh theih zâwk ni? Ani ang la naupang lutuk tân chuan a lutuk hret a ni.

Beiseina chhe tê a la neih ve chu a u chauh chu a ni tawh. A hmuh ngei a ngai, a hmuh hunah chuan a u chuan a unaunu chhel tak hi hmangaih taka a lo pawm ngei ka beisei. Ka zawn hmuhpui ang a, nun hlim takin, mi zîngah inthlahrung hauh lo leh inkiltawih hauh lovin hun hmang ve rawh se. Chuan, țhian a nei bawk ang a, khawvêl hlimna hi chèn ve rawh se.

A hmel chu ka en cheuh cheuh a, he hmeichhe khawngaihthlâk leh mal tak hi engtin nge ruihhlo zuar duh ang khân ka lo ngaih theih le? Tunah tak hi chuan khawvêla hmeichhe khawngaihthlâk ber ni hialin ka hmu, pawm vawng vawnga a thinlunga natna tam tak a thuhrûk tlatte chu paih bosak ka châk.

Min la nêl lo, min la hre chiang hek lo. Hre chiang tùrin kawm pawh kan la inkàwm tam hek lo. Chuti chung pawh chuan ka puihna min dîl a ni a, țhian a neih loh bâkah mi sawi sep kai a ni a, officer chin ngat kawp țhìn leh lêrh tak, a nu chhùn tak a ni; mahse, hêng zawng zawng hi tunah tak hi chuan eng mah ka ngaihtuah duh lo, he nu tê hi țanpui ka duh tih chiah ka ngaihtuah.

A u zawnpui dàn tùr bangbo viau mah ila ka zawnpui ang, ka hmuh leh hmuh loh chu thuhran, tihbeidawn ka duh lo. Beiseina a neih hi tihchhiatsak ka tum teuh lo.

A mizia tê hi a frank reuh ka ti a, ka làwm reuh khawp. Thil zêp a nei lo reuh bawk si, a rilrua thil awm leh a ngaihtuah a sawi chhuak hreh lo va, mi pawi a va sawi a ni chuang si lo. A nui mawi tak hian chuai nî nei lo se ka ti, chuai atân chuan ka phal lo, a uiawm lutuk.

"Ka u min zawnpui dâwn sia, ka chanchin kimchang i hre belh duh em? Zawn pawh a awl sawt maithei a, thlalâk ațangte pawhin i hre chhuak maithei asin," a ti siam siam a.

"Min hrilh duh phawt chuan."

Thovin a phone a la a, ka bula rawn țhuin a phone chu a hmet melh melh a, a phone chu min pein," Thlalâk kha en la, kha kha ka nu a nih kha. Ka pate nèn kan pathuma kan lâk a nia, a rei tawh khawp mai," a ti a, thlalâk chu a rei ve thawkhat tawh viau a ni, ani pawh kum nga vêl bâk a la ni lo ang.

"I nu nèn in va inang tehlul êm!" ka ti chhuak phawng a.

"An ti țhìn; mahse, ka duh lo țhìn asin, ka nu ka an vàng hian min hre lo tùra ka ngaih pawhin min lo hre țhìn a," a ti sap a.

"Nu an chu a țha alawm, a fanu i ni tlat a."

"Ka tân chuan ànchhia a ni."

Chutiang țawngkam a rawn phuh chhuak chu mak ka ti, ka en vat nghe nghe. Ani erawh chuan a hmui a lo pet fan fan a, țap tùr a ang ka ti.

"Fanuin a nu chungchâng chutianga ka han sawi ta mai chu ka sual i ti ngawt lo maw?"

Mak ka ti deuh deuh. A thu phuh chhuah hi awmze nei lo leh sawi mai mai a ni miah lo, lungngaihna thûk tak leh thinlung ațanga chhuak hrehawm tihna rî ka hre thei tlat.

"Sual ka ti hauh lo che."

A nui sek a, a za hauh lo tih erawh a lang reng mai.

"Ka sual alawm, ka nu chunga hetiang rilru ka pu thei hi, fanu țha tak chu ka ni thei lo chiang. A dam loh pawhin ka kan ve nain ka ko duh hauh lo, ka be hek lo. Fanu țha chuan a nu chungah chutiang chuan a ti hauh lo ang," a ti leh a.

Mahni inthiam lohna nei țawngkam dik tak a ni. A thu sawi ațang hian amah a inpuang vek tih pawh a hre kher nâng, a rilru hi a thianghlim ka ti lo thei lo.

"I sual vàng a ni lo, fanu fel tak i ni. I nu dam lo pawh i kan vang vang a nia, i nu pawh a lâwm ngawt ang," tiin ka hnèm a.

Hnem duhna thinlung ka nei a, pawm vawng vawng a a thinlung natna hi paih bosak vek ka duh bawk. Ka khawngaih, ka khawngaih tak tak.

"Ka nu chu a hmel a țhat vàngin a nun a khawlo a. A mualphonaah ka mualpho a, sawisèl a kai apiangin ka tel ve bawk. Miin hnung lamah min sawi a, min kâwk luai luai a, dik taka awm ka tum ve ngar ngar pawhin ka nu fanu ka nih miau avàngin a hlimthla chuan min zui zêl țhìn. Kan inan miau avàngin a fanu tih min hre zêl a, a fanu ka nih miau vàngin ka nu ang tùr thoa min lo ngai an awm țhìn bawk, hrehawm ka ti țhìn," a ti duah a.

A kutah ka vuan a, a tê reuhin a vâwt thler reuh a.

"I uin a hmuh hunah che chuan a hlim àwm mang e! Unaunu fel tak a nei si che a."

Hlim hmel taka min en chung hian a nui seih a," Ka u chu a hlim i ring maw? Chutiang chuan min hmuh hunah chuan lo awm tak tak se ka ti takzet a ni," a ti sar sar a.

"A hlim viau ang tih ka sawi ngam sak."

Haw kawngah chuan ka ngaihtuahna ka hmang kual nasa. Kha nu tê kha a chanchin ka hriat chian tâk hnuah hi chuan amah ka ngaih dàn a danglam hneh lutuk ringawt. A rilru thianghlimzia ka hriat phah a, a nun hrehawmzia leh a tân nun fight a har tùrzia ka hre chiang viau bawk.

Ina ka thlen chuan ka nu leh pa an lo la meng a, ka nu chuan," Hminga a lo kal a, i awm si lo va," a lo ti a.

"Eng nge a lo tih a?" tiin ka phone ka check a, kan inkhâwm dâwna ka mute vàng khan min rawn call ka hre thei lo niin, missed calls 3 lai a lo awm, pahnih chu Hminga, pakhat chu Afaki.

Va fuh lo tak! He pa hian Afakite inah ka va lêng emaw a ti chiang mai, Afaki pawh a call a nih chiah hi.

"Ka phone ka mute daih a."

"Khawnge i lèn a? Afakite inah i lêng emaw ka ti a."

Ka pa chuan," A va ho tak! Tlangvâl a nia, nula inah a lêng ve ang chu, hriat kher tum lo la," a lo ti a, a lo khap a.

"Lèn kual dun dun a hun tawh lo alawm, Afaki hi a țha a, neih dàn zawn thuai thuai a ngai tawh a ni," ka nu chuan a lo ti leh a.

"Hminga chu ka'n phone nghâl ang e," tiin ka room lam chu ka pan ta nghâl a.

Whatsapp message ka check zawr zawr a, a hmasa berin Afaki message chu ka en nghâl bawk.

*Zanin chu biak tlang i har, a pawimawh viau a nih ka ring. Hminga'n a be duh che a*

Dâr 8:12-a mi daih tawh a ni!

Tlai tawh viau mah se Hminga chu ka call nge nge a ngai a nih dâwn hi, eng thil tak chu ni ang maw?

Ka call a, a ring rei vak lo, min rawn chhâng nghâl.

"Biak i va har tak! Nupui ka rù a nia."

E khai!!! A va hmanhmawh leh sî ve!!

"Eng nge thil awmzia?!" ka ti hú rêng a.

"Sawi tùr a tam, nakinah ka hrilh ang che. Khawiah nge i lèn daih a?" a ti a.

"Nula inah maw le."

"Afaki ka call a, i lêng lo va. Nang hi bial dang i nei em ni? Ka hriat miah loh hian i lêng nasa tawh riauin ka hria," a rawn ti a.

"Tunah khawiah nge i awm?"

"Kan ina awm a ngam si lo va, ka nîte in Chanmari-ah ka awmpui. A nâ a nia, i ngam loh vàng a nih kha aw," tiin a nui hawk hawk a, an nuin a sik deuh hlak a nih ka ring.

"Naktûkah ka lo tlawh dáwn che u nia, min mamawh laia biak theih loha ka awm chu pawi ka ti takzet a ni," ka ti a.

"A, eng mah a ni chuang lo ve, hei min rawn be tho alawm. Chanchin hrilh che ka duh vàng a nia," a lo ti a.

"Ka fate chuan i fate chu an ngam lo dâwn chu a ni phawt mai a," ka ti a, a lo nui hawk hawk a," Chanchin chiangkuang taka hriat a châkawm tawh khawp mai," ka ti leh a.

"Naktûk chu sikul ka rawn kâi lo phawt ang, Head pawh ka la be chuang lo, țhiani lah hi kalsan daih chi a ni si lo va," a ti a.

"A, kalsan lo ve. In ina in awm hunah i rawn sikul dâwn nia," ka ti ve a.

Țhiana chuan nupui a ru ta phawt chu a ni a, kei hian engtikah nge ka neih ve ang? Afaki ka ngaihtuah a, ani hi chuan min duh ve riau a, min hnialin ka ring lo; mahse, keima lam hi, nupui neih ka la tum rih lo.

A chhan ka hre lo. Afaki hi nupui atâna țha tùr chu a ni, nu leh pa mo duhzâwng tak a ni; mahse, ka hmangaih loh chu nupuia neih ka tum lo. Afaki hi ka duh țhìn, ka thlahlel țhìn a nih kha.

Mahse, tûn hnai ațang hian ka rilru tihdanglamin a awm ta tlat a nih hi. Afaki thlâkhlelhna pawh ka nei tawh lo va, lèn châkna pawh ka nei tawh lo, zanin ațang phei chuan. Heti khawpa ka rilru thlâk danglamtu hi Tluangpuii a ni tih ka hria, hrehawm ka ti. Afaki chunga ka rilru put dàn hi a hriat hunah nâ a ti ngawt ang, ka lêrh tihna em ni? Lêrh lo ni ila bialnu ka neih lai rengin mi dang ka rilru tawk deuhtu ka thlahlel thei dâwn em ni?

Ka in-control loh vàng a ni thei ang em? Hetiang hi ka duh ngai miah loh thil a nih țhin kha, ka duh miah loh angin ka awm ve ta tihna em ni?

Tluangpuii ka ngaihtuah a, ani hi chuan rilru thianghlim takin min dàwr niin ka hria, min țanpuina a dîl a, a mamawh vàng liau liauin. Ka chungah hian eng rilru danglam mah a puin ka ring ve lo.

Engati nge hetia ka awm tlat ni? Ka ngaizâwng tihna chu a ni deuh ber tawh a, a chunga ka rilru put dàn hi khawngaihna vàng chauh a ni tawh êm êm lo, tlangvàlin a nula duh chunga rilru a put dàn ang chiahin he nu chungah hian ka pu tlat a ni.

Sikul ka kal a, Hminga a awm loh vàng chuan a reh ruaiin ka hre nghe nghe. Class ka lâk loh kârah ka rilru ka kàwm a, ka titi vak lo.

Tlai bànah inah lût lovin Hminga ka phone a, a nîte in awmna lai chu ka zâwt.

In hnuaiah an lo awm a, room hran an lo pe thlap nia. Min hmuh veleh min lo nuih a, kei pawhin ka nuih ve tho. A dear-i pawh a lo nui tho nain a sen deuh awp awp tho.

"Dear, thingpui han lum lawk la?"

A chhoh hnu chuan Hminga chuan," Nizàn inkhâwm hlàn khân a room-ah kan awm a, a pa kha rin aiin a lo bâng hmâ bîk a, min rawn nangchîng khawlo kual vek a ni. A thin kha a rim si a, inrûk loh theih pawh a ni lo," a ti nghâl barh barh a.

"Naute kha in titla tawh rêng rêng em?"

"Tla tawh e."

"In va ti leh hma si ve?!"

Nui ruh ruh hian," Har ve deuh mai asin, nang anga insûm țhìn chu ni ila chuan a har hran lo ang; mahse, ka awm dàn chu i hriat kha, chawbêl bula țàmchhàwl chu ka duh teuh hlei nem," a ti leh a.

"I tum aia hmain i rûk tâk chûk chûk hi," ka lo ti vat a.

"Kan innei dâwn tihna pawh a ni chuang hlei nem. Zan tin ka tàmchhàwl dâwn lo tihna a ni mai a," a ti leh a, a la lâp ve khawp mai.

"Duh tak tak lovin i ru tho si a?"

"A loh theih hlei nem. A pain a vawhlum mai dâwn asin, chu pawh keimah vàng a nihna lai a awm ve tho a, ani pawhin pasal neihte chu a la duh miah hlei nem."

Hm, a buaithlâk a nih ber hi. Inneih la duh si lo, awm hrang thei bawk si lo.

December thla a lo inher chhuak a, sikul pawh rei lo te chauh kal a ngai tawh. Tluangpuii ka puihna tùrah lah chuan eng mah ka la ang lo, chanchin thar ka la nei lo. Zawn țan dàn tùr hriat a har ve bawk êm a ni, a nu hming chu a lâr lo nge, hria ka la hre tlat lo.

Hmingate pawh an indah lêt hran lo. Hmeichhe lamte'n an lam/hruai duh si lo va, mipa lamin dah lêt/ hruai haw thu va awm suh, an la inkawl ràn.

Ka nu leh pa pawhin Hmingate chanchin chu an hre lo thei bîk lo va, ka nu chuan min tur ve ta sek mai.

"Nang chu fapa mal i ni a, mo kan mamawh tawh êm a ni. Hminga pawhin a neihsan tâk che hi, bialnu i nei lo pawh a ni lo va, a fel êm êm bawk si. Palai kan tîr tawp mai dâwn em ni ang?" a ti a.

"Nu, tih chûk chûk chu a țha lo a ni."

"Dik chiah, nupui pasal neih hi hmanhmawh chûk chi a ni lo, hun chu a la rawn inher chhuak mai ang," ka pa chuan a lo ti ve a.

"Lo țan ziah lo teh, nupui neih a hun tawh alawm. Hna a nei tawh bawk, nupui fanau a châwm thei a, keini lahin tu hmêl hmuh kan châk tawh bawk. Hmanhmawh a ngai a nih hi," a ti bawrh bawrh a.

Keimah vàngin an inhnial țan dêr chu a ni si a, a nuam lo ve duh khawp mai. Kei lahin hmangaih loh nupuia neih chu ka tum bawk si lo, Afaki hi ka hmangaih lo tih ka hre chiamg tawh bawk si, rilru a buai. Hrilhhriat hun a huphurhawm, a rilru a na dâwn si. Min duh ve hle si a.

Zan khat chu Tluangpuii ina lèn ka tum a, a nu hming tak tak zawh a a nu diary chu ensak ve chhin ka duh deuh bawk a.

Khua a vâwt si a, car-in ka kal a, a in chu a lo êng kalh. Car ka dah tumnaah chuan car dang a lo awm a, car dahna ka melh a, a rem fahran lo kher mai.

Inah chuan patling lam deuh tawh a lo awm a, Officer Chhuana a nih ka ring nghâl. Ka la hmu chiah lo nain ka hre lâr viau.

"Lo lêng rawh, teh tlat che chuan! Ka lo beisei lo lutuk che a."

Min beisei lo tih ka hriat chuan ka rilru engtin emaw tak a awm! Min duh ni se zan tin min lo beisei ka ring a nia.

"Thil zawh chian che ka duh maw le."

Thingpui min lo chhuansak vat a, a inlêngpa chu ka melh ralh a, ani lah chuan Tluangpuii chauh chu a lo en thung.

A bialpa nia an sawi hi a lo dik reng tihna a ni em? Bialpa ni lo se he officer-pa hi a lêng ang em? Nupui fanau neiin a awm tawh a, sum a neih vàngin a sum hmachhuan hian a thlêm tihna nge ni ang? A nih loh pawhin Tluangpuii nèn kan inhriat hma daih ațang tawha lo inhre tawh an ni a, Tluangpuii pawh hian a duh ve tho tihna a ni ang em?

Thingpui min rawn pêk lai chuan," Tluangpui, ka hâw tawh mai ang, zanin chu ka hman lo deuh hlek a," a ti a, a nui pah a.

Hm, haw rawh se. Mahni fanute rual ngaihzàwn tlat zawng, a zahthlâk. Nupui fanau uap lum tùr a la nei, hâw thuai rawh se.

"I tih dàn dán le, i buai thei si a, min rawn tlawh hrâm hrâm țhin a, a làwmawm lutuk," a ti a.

"Naktûk kha aw, theihnghilh lo la?"

"Aw, ka hria e. Ka lo kal ang."

An inbiakna chu țhuthmun ațangin ka lo ngaithla a, naktûkah chuan eng thil nge an tih dâwn le? Khawiah nge an inhmuh dâwn? Officer-a chuan a lo nghâk dâwn a nih hmel, Tluangpuii'n hmu tùrin a va kal thung ang...

"Eng thil nge min zawh chian i duh chu le?" tiin ka țhutna ep chiah long chair-ah chuan a rawn țhu a.

"I nu hming tak?" tiin ka thingpui chu ka in zauh a.

"Lalbiaktluangi a nia, 'Nubawihi' tiin an hre zâwkin ka ring.

Ka chhinchhiah kar nain kha Officer-pain a sàwmna kha ka ngaihtuah chhuak lo thei lo, a enga mah hmain ka thîk nghâl êm êm ringawt. A kut hi a vawnsakin a chùlsak tawh ngei ang, vawnsak mai lo deuhte pawhin a mutpui tawh hial maithei asin. Sum a nei si a, sumin lei theih loh tak tak a nei si lo.

"Chuan, țûl thuta rawn phone-na tùr i number ka mamawh bawk ang," ka ti leh a.

"I phone number sawi la?"

A ngaihna ka hre lo lek lek a, ani chuan," Sawi la, ka lo call ang che a, chuan, ka number chu i nei mai ang," a lo ti a.

Ni dâwn tak e, a awlsam ber tak alawm.

A number ka save hnuah chuan," Engtik hunah pawh min rawn call thei ang, i hriat duh chu min zâwt zêl la," a ti a.

A inthuam dàn tê chu a inhmeh reuh, a kekawr lum hâk chu a dum niin a mawng bâwr vêlah tlêmin a tight a, a infit zaih mai. A kawrlum hring hâk chuan a vun no sar mai chu a tilang chiang êm êm lehnghâl a, Pu Officer-a'n a lo en duh viau pawh kha a àwm viau tho; mahse, ka duh hauh lo.

Zan dang angin ka țawng tam lo. A inlêngpa khân ka rilru a kam tlat mai a, an inkâr thil hi a lo ril viau a nih phei chuan... ka buai tak tak hmaa ka inthiar fihlìm a ngai.

"Zanin hi i ngawichawi ka ti."

Za lo zet hian ka nui a," Nia, țawng tlèm ka zir a," ka ti ta ringawt.

*NUI TAM LA, MI NGAINAT I HLAWH THEI ANG*

☆LTK☆ - 12 By Dingdi Pachuau

TLUANGPUII

~~~~~~~~~~

Pa Chhuana lo lèn chhan chu rin ka nei mai, a fapa birthday a hnai tawh a, chu chu min rawn hrilh dâwn a ni ang. Patea nèn an inkàwm ngeih a, kei pawhin patea tluk zetin ka ngaina a, a nupuiin min lawm vak loh avàng erawh chuan an ina kal pawh nuam lo ka ti țhìn.

Ka rin ang ngei a ni, min rawn tlawh pahin min sâwm bawk a, kal ngei chu ka tum ve ang. A fapa hian min ngaina ve a, a ngaihawm ka ti bawk. An in pawh ka tlawh lohna a rei ve tawh a, kal ve pawh a țha.

U Puia a lo lang hlawl mai! Ka beisei pha lo lutuk a, mak pawh ka ti. Lèn pângngaiin vawi khat mah a lo la lêng lo, zanin hi a vawi khatna a ni.

A țawng țha duh lo riau lehnghâl. Hun danga min zui țhin dàn nèn dang tak a ni. Nuam a tih lohna tùrin eng emaw sawi ka nei em ni aw ka ti, a hmel hrim hrim pawh a hlim hmel loh deuhin ka hria.

Ka țawng duh lutuk hian a pawi ka sawi deuh a ni ngei ang, kei pawh hi ka duh duh hi ka sawi chhuak phawng phawng zêl a, sim deuh chu a ngai. A țawng tlêm thar ta thut hian min tingaih țha lo deuh tlat.

"U Pui, eng hna nge i thawh?" tiin a țawng loh theih lohna tùrin ka be ta tho a.

"Zirtîrtu."

"Khawiah?" Ka zâwt zêl dâwn tho, ani bâk hi tunah phei chuan innghahna ka nei rih lo, ka u min zawnpui dâwn si a.

"Serkawn M/S-ah." Min chhâng ve zêl tho.

Serkawn. Ka u pawh Serkawnah a awm kha, a va fuh dâwn tak! Mi pawh a lo zâwt nual tawh maithei asin, ani hian kei aiin chanchin 'thar' a hre hma thei daih zâwkin ka ring.

"A va remchâng êm êm! Hmel hriat i nei nual tawhin ka ring a, i zâwt chhin tawh em?" Ka phûr lutuk chu lan chhuahtîr loh tumin ka in-control hrâm hrâm.

"Zâwt ve tawh e."

Ka duh aiin min chhâng tãwi zêl. A mood a off tlat mai hi hrehawm ka ti, a chhûngte nèn an inhau deuh em ni ang, nge a bialnu nèn zâwk? A țhiante nèn pawh a lo ni thei mai zâwk lo'ng maw?

"U Pui, i puihna ka dìl vàng che khân phurrita i lâk loh hrâm ka beisei, I hriat angin kei chuan țhian ka nei lo va, ka țhian ni hmasa ber i ni a, i tân țhian ni lovin phurrit mai ka nih ka hlau ta hnuhnawh viau. Bâkah, thil nuam a ni miah si lo va, ka nu hi chanchin țha lo tak nei reng a ni bawk si nèn, phurrit ka siamsak ta zâwk che niin ka hria," ka ti a, hreh taka sawi ka nih vàngin ka sawi zawh chuan ka zia deuh hawk mai.

"Theihnghilh daih rawh, ka sawi lo angah ngai rawh-"

"Tluangpui, ka zawnpui ang che ka tih tawh kha. Phurrit min siam lo va, phurrit lah i ni hek lo. Kan zawng ang a, kan zawng hmu êm êm ang," tiin ka țawng lai chu min rawn pawt chat a.

"Ka lâwm e, U Pui. Mi fel tak i ni, ka kàwm thei che hi ka lâwm takzet, ka chanchin țha lo tak tak hre vek chunga min la kàwm duh hi ka lâwm êm êm bawk a ni," ka ti a.

Ka lâwm êm asin. Ka chanchin tuihnai lo zet zet hre chung pawha min la kàwm duh tlat hi ka tân chuan làwm loh rual a ni lo, mi fel leh puitling tawh a ni bawk a, mi hriat thiamna pawh a nei khawpin ka ring.

"Mi fel ka ni lo, mi hnuaihnung leh sual ber nia kan hriat káwm duh lo thei khawpa mi țha an awm thei hek lo, Pathianin duh taka a siamte kan ni vek alawm. Tu mah inen hrang thei kan awm lo va, inthliar tùr kan ni hek lo, kan sualna leh kan chak lohna zâwn a inang lo mai hlawm a ni si a," a ti a.

U Puia thil sawi chu ka duh takzet. Ani chuan min en hniam ve lo va, min en hrang hek lo. Min be hmasatu zâwk a nih nghe nghe kha, mi fel tak leh induh lo tak chu a ni chiang alawm.

A haw hnuah chuan ka ngaihtuah kual nasa a, Pathianin min pêk a nih ka ring. A chhan chu ka biak hmasak pawh a ni lo va, ka va hope viau vàng lah a ni hek lo ang. Ani phei hi chuan duhna mitmeng pawha min la melh miah loh hi, mi lêrh tak pawh a ni lo ang, bialnu erawh a neih ka ring bur.

A bialnu pawh mi fel tak a ni ngei ang. Hetiang mi fel chuan fel tak a nei tùr a ni, a hmel pawh a țha ngawt ang, ka thîk sa tawp.

Ka mut dâwnah Pathian hnènah làwmthu ka sawi a, a chhan chu U Puia ang țhian fel min pêk vàngin. Ka phû loh țhian fel min pe si a, ka u kan zawnna lamah min pui tùrin ka dîl bawk, ka nu ka hre chhuak nain dìlpui ngaihna ka hre lo.

*******

Sikul chawlh veleh hman deuh zâwkin ka zawnpui thei ang chu. Sikul kai chung pawhin ka theih ang chuan ka'n zâwt kual vêl ve tho a; mahse, a lo rei ve deuh tawh bâkah mi chêng thar an lo tam ve tawh a, ka zawhho chuan an la hre lo zel chu a ni.

Dec 14 Zirtàwpni a lo inher chhuak ta, ka birthday a ni a, ka puitlin hnu hian engah vak ka ngai ta lo va, lawm pawh ka làwm ngai ta lo. Ka birthday a nih rualin kumin chhûng atâna sikul kan kal tàwpna nî a lo ni ve ta reng mai. Hminga nèn chuan kan hlim ve khawp mai a, sikul kal reng chuan chawlh hi a lo châkawm ve a, thaw a veng ve deuh thei dâwn a ni. Bâkah, an nu nèn an inhruai țha dâwn a, nupui neih la duh lo deuhin a nei dâwn ta chu a nih hi.

Ka phone a lo rì a, staff room-a ka awm lai a ni a, class ka la zo chiah a ni.

Number ringawt a nih vàngin ka hriat ngai loh, min hretu a nih ka ring deuh ringawt.

"Hello?"

"Sir Ruatpuia a ni em aw?"

"Aw, ni e. Eng nge ni ta?"

Mipa naupang damdawi ina ka hruai nu kha a lo ni a, a number ka lo neih loh vàng mai mai a lo ni, a hma pawhin an inah ka kal tawh tak alawm. Sikul bàn hnuah an ina lêng hãw tùrin min lo sâwm a lo ni a, a chhan chu an fapa birthday chu a lo nia, an chhûngkuain min hmuh an duh a lo ni a!

"Aw le, ka lo tum ang e."

"Lo pêng ngei rawh aw, kan pa pawhin hmuh che a duh bawk. Kan chhûngkaw tân i hlut dàn hi, sawi mai hian a hrilh fiah phak lo! Kan fapa Mpa tân phei chuan i danglam zak a nia, a nunna chhantu i ni si a," a rawn ti bawrh bawrh a.

Nuam lo ka ti leh tawh; mahse, ka kal ngei chu a ngai ang. Ka kal ve ang chu, min rawn sâwm ve bawk a, a hmaa ka kal khân an pa ka hmu lo va, a fapa pahnih ka hmu tel ringawt chauh a nih kha.

Hminga hnênah chuan thil awmzia leh thil thleng chu ka hrilh thuak thuak a, ani chuan," E khai! Spiderman i ni ringawt alawm le! Kal ngei ngei rawh, an tân i hlu dâwn lutuk. A hun lai khân damdawi in panpui kher lo mah la, mi dangin an panpui tho ang; mahse, an panpui tlai thei. Nang i lo awm hlauh a, a nunna i chhanhimsak ka ti lo thei bîk lo, kal ngei rawh," a lo ti ve bawk a.

Dàwrah birthday gift tùr tha tâwk tak ka'n lei ve a, to tak phei chu a ni lo. Pêk ve hrim hrim kha a țha ka ti a, an hausa a, a tân thil hlu tak chu a ni kher lo maithei, pêk ve hrim hrim ka duh a ni.

An in kawt zau zet maiah chuan ka tlân lût a, kawngka erawh a lo inkhâr vek thung. Pâwnah awmin min lo welcome ka ring deuh ringawt a, ka lo hope sâng hret chu a ni.

Motor ka hùn rem hnuah chuan gift keng chuan an kawngkhàr bulah chuan ka ding vang vang phawt a, a reh lutuk chuan ka ngaih a tițha lo lek lek hial.

Doorbell ka hmet a, rei pawh ka nghah hma chuan kawngkhàr design mawi zet chu a rawn inhawng a, mipa naupang Mpa, birthday an lawmsak tùr ngei kha a lo ni a, a birthday lukhum leh a biang tai têk chu a inhmeh kher mai, a lo nui sâng a. Chutah,

"Spiderman a lo thleng!" tiin a au ta vak a.

Min tiphu zawk mai.

Kawngkhàr chu hawng zauin," Happy Birthday," tiin ka gift kensak chu ka pe a, " Ka lâwm e," a ti reuh a. Chutih lai tak chuan piono ri mawi zet hian birthday song chu a rawn play ta ruai ruai a.

Mpa chuan min kài kûn a, ka biangah fâwp zauhin," Happy Birthday, Spiderman," a ti ta reuh a, a sawi zawh chiah chuan," Happy Birthday, Sir Ruatpui," tiin an lo au rual dual a, tu mah an awm lo emaw ka tih kha, in kil tin ațang chuan an rawn lang ta țuam țuam mai! Hrilhhai zetin ka ding ta reng ringawt.

Hmeichhe tleirâwl ve ek ek țan, hmel țha zet hian cake chawi hian min rawn pan a, piono rî a tàwp hnuah chuan nui sâng hian," Spiderman-in cake a lo zai tawh ang," a ti a, hrilhhai zetin ka la ding khawng reng tho, engtin nge ka birthday a ni tih an hriat theih, mak ka ti lo thei lo!

"Ânu, spiderman nèn kan birthday a inang tho sia, cake chu kan zai dùn thei ang em?" Mpa chuan a ti ta a, chutah chuan ka harh chhuak chiah.

"Kan pahniha birthday a nia, kan zai dùn thei ang," ka lo ti vat a, ani lah chu a lo phûr nasa.

Cake chu zai rualin kan inbarh ve ve a, ka zak tawh miah lo. An thil tih hi ka rin phâk bâk a nih vàngin ka ngai ropuiin ka ngai hlû a, ka theihnghilh phal tawh ngai lo ang, kum 20 hnu vêlah ka birthday lawmsak ka han ni leh ta a nia!

An pa hming chu Rsa a lo ni a, a fate lah chu naupang duhawm zet zet an lo ni bawk a, an hmel țhain an nèlawm tak tak. Mpa chuan min ngainain ka bulah zêl a awm a, ka kalna apiangah a kal zêl, min han ngai ropui khawp a,'Spiderman' ti bâkin min ko duh miah lo nia!

Ka birthday a ni tih an hriat dàn ka zawh chuan nu ber chuan nui sâng hian," I thawhpuite zînga mi Miss Vèni hi kan vênga mi a nia, in bio-data chu office-ah in ziah vek kha. Khata țang khân kan hria a, Mpa birthday nèn a lo inang chiah bawk nèn, làwmthu sawi pahin a remchâng dâwn riauin kan hria a," a lo ti a.

Pu Rsa chuan," I chungah hian kan lâwm takmeuh a ni, kan làwmzia hi sawi ngaihna pawh kan hre lo va, kan ngaihtuah ngun poh leh kan la lâwm deuh deuh dâwn niin a lang. Hei, ani phei hi chuan zàn mutnaah hian a la sawi chhuak ziah, kan fapa kan chàn teuhzia ngaihtuah hian i hnênah hian làwmthu kan sawi lo thei lo a ni," a ti a, an nu kut chu chelhin duh tih hriat tak hian a en chhuk bawk a.

"Kei kher lo pawhin an tlànpui tho ang."

"A dik ang; mahse, buaipui thuai a nih loh chuan a nunna khân a tuar dâwn a, doctor min hrilh dàn chuan a hun dik takah damdawi in kha a thleng a ni, minute khat lek pawhin tlai ta se a nunna kha chhan hman a ni tawh dâwn lo," a lo ti a, a sawi zâwng pawh chuan a mittui chu a tling kalin ka hria, a fapa tân a hlauhthàwnzia ka la hre thei tlat.

"A nunna chhantu kan ti lo thei lo che, Pathianin a hun dik takah a thlentîr che a, kan tân chuan theihnghilh theih i ni lo, Mpa tân hlauh phei chuan mi pawimawh lutuk, a nunna chhanhimtu vàntirhkoh i ni," a ti leh dap dap a.

Zanriah pawh ka ei nghâl, hàw an phal tlat lo. Ka chhûngte chu zanriah ka ei chhuah tùr thu chu ka hrilh ve nghâl vat bawk. Pu Rsa naute chhûngkua pawh an lo kal ve a, fa phìr ngo zet zet an nei ve thung. Chhûngkaw hmel chhe lo tak an ni hlawm, an fel si. Naupang inhmu khâwmho chuan nuam an ti khawp a, an inkàwm thiam riau hlawm lehnghâl a, an ri chèl chûl mai.

Ka hàw dâwnah birthday gift an tih chu min pe hlawm a, box lian lutuk lo hi min pe khâwm a, Mpate unau thum leh an nu leh pain min pe a, Pu Rsa naute nupain min pe bawk! Ruak zeta kal khân gift ka hàwn ta țawk mai!

Ka hlim a, ka khi reng mai.

In ka thlen chuan a lo tlai ve deuh ruih tawh. Ka pa chuan," I chaw ei chhuak chu i puar em? Kha, eng thil nge i rawn pawm luh a?" tiin gift ka dawn ka pawm lût țûn mai chu mak tih hmel zet hian min lo thlîr a.

"Birthday gift ka dawn a nih hi!"

"Tlangvâl senior tawh lama birthday lawmte chu a, a naupanchhiatthlâk e! Nupui neih lam pawh kan sawi ri viai viai tawh emaw ka ti!" Nui hawk hawk chung hian a lo ti leh a.

"Pa, mipa naupang hliam ka buaipui ka hrilh che u kha i la hre reng em? Kha mite chhûng khân an fapa birthday lawm rualin min lawmsak ve a, kan birthday a lo inang chiah a nih chu!" Hlim zet hian ka ti a.

Ka nu, an room ațanga lo chhuak chuan," Eng thil maw ni a? E khai! A va tam ve! Han sawi țha leh teh," a rawn ti ve bawk a, ka chunga thil thleng chu ka sawi țha leh a.

Ka gift dawn chu pen, motor chhûnga khai tùr Spiderman lem te, Spiderman T-shirt, spiderman lukhum, spiderman towel, engkim maiah chuan spiderman lem a chuang vek, ka nuih a za zâwk, ka khi sûng reng mai.

Room-a ka luh hnuah ka phone ka en ve chauh, ka silent vàngin ka birthday min wish duhtute pawh ka tihrilhhai maithei a ni!

Afaki missed call a lo awm a, U Mamawii missed call nèn. Whatsapp message ka check leh a, birthday wish-na chu a lo awm ve chuai mai.

Afaki chu ka call a, a la mu bîk lo tawp ang.

"Hello?"

"E, ka phone ka lo silent vàng a nia, i message pawh ka hmu e, ka lâwm lutuk a nia," ka ti a.

"Nia, min chhâng thei si lo va, i buai a nih ka ring a."

"Buai tawh lo, inah ka awm tawh e."

"Happy Birthday! Țawngka ngeia hrilh che ka duh a, gift pawh ka kawl reng a nia, i lo lam ngei chu a ngai ang aw," nui chung hian a rawn ti a.

"E, ka lawm lutuk e, miin chaw eiah min sâwm alâwm le!" tiin ka thil tawn chu ka hrilh ve thuak thuak a.

"A nih tak chu! Ka lawmpui che a, i phû ka ti bawk, kei pawhin ka fak lutuk che, i tițha ka ti bawk."

Ka thil tawn hi a danglam êm avàngin ka hlim a, ka hlim vàngin ka thinlung chu a zãng a, keimah chauha ka awm pawhin ka nui deuh reng mai. Tluangpuii ka han ngaihtuah chhuak a, tlêm chuan ka rilru a hnual leh deuh; mahse, rilru dang ka pu vat.

A tûk Inrinniah chuan Tluangpuii ka call a, a lo hman ve hlauh chuan kan pahnihin a u chu kan zawng dùn thei dâwn a ni.

Chaw ei khamah ka chhuak a, ka sâwm phei a, kan pahnih chuan kan chhuak dùn ta a, kalkawnga kan tlàn lai chuan a titi barh barh a, a hmel țha reuh sia, a hmuhnawm ka ti. Ka melh zauh zauh, melh reng theih ni hek lo le.

Miss Venite inah kan kal a, serkawnah hian kum khat vêl âwrh ka thawk a ni mai a, mi hriat ka ngah tehchiam bîk lo. Thawhpuite lah hi hmun dang, vêng danga mi an lo ni ve nual bawk si a, Veni hi a pi leh pu an la dam chuan an hre mial maithei asin.

Veni chuan min lo welcome țha khawp mai a, Tluangpuii chu a en duh viau bawk, ka bialnu emaw a ti a nih ka ring.

"Vèni, i pi leh pûte an la dam tiraw kha?" ka ti teh ringawt a.

"Aw, dam e, engtizia nge a?" a ti ta rêng a.

"Serkawna in awmna hi a rei tawh em?" Ka ti leh a.

"Aw, ka hriat theih tirh ațangin. Ka pi leh pu erawh chu ka hre lo thung."

Khua a vawh avàngin an bathlàrah nilum ai pahin coffee kan in a, ni a sa țha a, a nuam er awr viau mai.

"I pi leh pu chu in chènpui em?"

"Chènpui lo ve, kan in piahah sâwn ka pateate nèn an chêng."

"Chuti, min kalpui lawk thei ang em? Thil zawh ka duh a?"

Nui chung hian," Anni kher? Kei pawh min zâwt ve tho la?" a ti a.

"I la naupang lutuk! Hria la chuan ka zâwt dâwn che," ka tih chuan a ner nasa.

"Kei aiin i upatna kum a tam bîk lo."

Kan nuih lai chuan a nu a rawn chhuak ve a," In va nui nasa ve! Bawihte, kha i țhiante chu khawi lam mi nge an nih a? Thingpuite i lo lumsak em?" a rawn ti nghâl bawrh bawrh a.

"Ka thawhpuite an nih hi."

"A ni maw? In va fel ve! Lêng ve reng rawh u aw?"

Mite hi chu an va fel țhin tak!

Zah loh chhuahin," Ka pi, Serkawna in awmna a rei tawh bawk ang a, Lalbiaktluangi ' Nubawih' tia an koh țhin i hre ngai em? tiin ka zâwt ta chawt a.

A ngaihtuah vang vang a," Biaktluangi ka hriat chu 'Nubawih' tiin an ko ngai lo va, 'Biaki' kan ti mai a, nikum hmasa khân a boral tawh nghe nghe," a lo ti a.

"A nih tak chu, ka hre duh deuh a," ka ti leh tawp ringawt.

"Mi dang chu ka hre tawh miah lo, Serkawna mi chu a ni ngei si a maw?" tiin min zâwt lêt a.

"Aw, pasal nei a nia, a rei tawh viau ang, nangni ai pawhin a upa hialin ka ring deuh. A pasal nèn chuan an ințhen daih nghe nghe a," ka ti duah a.

"A nih chu, ka hre lo a nih ka ring."

Coffee kan in zawh hnuah chuan Veni pateate in lamah chuan kan phei a, Veni chuan thil awmzia min zâwt miah lo nia, kan hrilh hran lo va, min zâwt hran chuang lo.

A pi leh pute chuan veranda-ah nilum an lo ai a, an tar ve tawh khawp mai, an sam pawh a țuak vâr vo tawh.

"Ka pi, ka pu, in lo dam țha em?" Veni chuan a ti chùl a.

"Niminah pawh i lo kal reng kha, kan dam țha tih i hriat kha," Pitar chuan nui chung hian a lo ti a.

"Ka pi țhìn hi, in upa ve tawh a, mihring chuan kan hma hun kan hre hauh hlei nem le," a ti ve thung a.

"Bawihpuii hi chu, thil hi a hre dik thei teh e, pasal a neih hun chauh kan nghâk tawh," a pu chuan a lo ti thung a.

"Ka nei mai mai dâwn lo."

A hnu deuhah chuan kan țhu khâwm a, ka zawh duh chu ka zâwt ta a.

"Lalbiaktluangi chu ka hria e, nula hmel țha tak a ni țhìn. Hei, i bula nula nèn hian an inang khawp mai, Biaktluangi tleirawl chhoh lai kha ni àwm tak a ni."

Ka thin a lo phu dup dup mai!

*ȚAWNG TLÊM LA, MI HUATTHU SAWI I PUMPELH THEI ANG*