☆HLWILY☆ - 28 By Dingdi Pachuau

 ☆HLWILY☆ - 28 By Dingdi Pachuau

Hla zir tùr chuan ka chhuak ta ngei a, Damon-a lo lèn a tum a ni tih ngaihtuah duh lo chuan hla zir lamah chuan ka rilru chu ka pe a, thiam pawh kan thiam chak viau e. Suprano part sa zîngah chuan ka țhu ve khar a, ka aw a ring lêm si lo va, ka thawh hlâwk lo ve khawp chuan ka ring, chumi vàng erawh chuan tel loh ka tum chuang bîk lo.

Dâr 9:30- ah kan bâng a, Damon-a pawh a haw daih tawh ang chu, haw rawh se, min rawn hmuh tum tawh lo nghe nghe se a țha ang.  Rinchhani nèna kan inmangțha zo chiah tihah chuan ka thil hmuh avàng chuan ka phu deuh zawk mai, min lo la nghâk niin!

"Haw rawh, a tlai tawh," ka ti sap ringawt a, ka țawng ring ngam lo, in chungte'n ka țawng thãwm an hria ang tih ka hlau a ni, Rinchhani kha a lût ve deuh chiah bawk si a, bâkah, mipa a la ni zui a, tún ang huna an in hnuaia mipa țawng thãwm leh mi ka be thãwm an hriat hlauh chuan a fuh lo ang.

Mi â a ni lo va, țawng rin ka duh lohzia a man thiam ve nghâl a ni chiang, kawngka ka hawna ka luh hma chuan țawng pawh a țawng ve lo, kawngka ka hawna ka luh rual chiah erawh chuan a rawn lût ve nghâl thung a, kawng pawh a khãr zui nghâl zat a, kei erawh chuan ka melh chho râm a.

"Zàna nula chhuah chhuah chu a țha lo asin," a rawn tih sup chuan," Ka lêng chhuak lo bawk," ka lo ti hlar a, kawng khàr a ni tawh bawk a, țawng zawih chiam a ngai tawh lo.

"Ka lo nghâk rei bawk che a, ka chhãwl a hãl huam huam mai," a ti leh a, thingpui lumsak a phût a ni chiang, a zak bawk si lo, haw thuai se ka ti asin le.

"Min lo nghâk tùrin ka ti hauh lo che," ka tih chuan," I ti ka ti hauh lo, ka nghah rei thu che ka sawi mai a ni. Thingpui chu, a sen hângin aw," a ti leh mai a, long chair-ah chuan a țhu ta nghâl a, ka thaw hawk hawk ringawt, lumsak nge nge chu a ngai dâwn a ni.

Gas-a a thingpui tur ka chhuan lai chuan," Ka thu sawi hi engati nge min âwihsak duh tlat loh a? Dâwt ka hrilh hauh lo che," a rawn ti leh dût dût a, ka chhâng peih lo, a duh duh chu sawi mai mai teh se, chuan, haw thuai bawk se.

"Michael-a bialnu mutpuiah lah khân min ring tlat lehnghâl a, tu nge Michael-a bialnu pawh ka hre hauh si lo, a thuhrimah, hmeichhia ka hmuh remchàn apiang mutpui duh zêl hmêl ka lo pu rêng rêng em ni?" 

Thingpui pêk pah chuan," Thu mu hnu sawi chhuah a ngai lo," ka ti fak a, a ni rêng lah tak a, khâng kha kan buaina a ni tawh lo va, sawi chhuah khân awmzia a nei lo. A bul hnaiah pawh țhu duh lo chuan amah hlat thei ang ber chuan ka țhu a, chu chu a hmuh chuan," Natna țihbàiawm tak vei ang maia min hlat tlat le," a ti nung nung a, kei lah chuan," I vei lo ang tih pawh a sawi theih hleih nem," ka lo ti thung a, a haw viau a niang, a rûm nghut mai.

A hnu deuhah erawh chuan," Thu mu hnu sawi chhuah hi a ngai țhin, kan buaina pawh kha tunah chuan thu mu hnu tiin a sawi theih tawh maithei a; mahse, sawi chhuah leh ka tum tho, a ngai tlat," a rawn tih leh chuan," Sawi chhuah khân awmzia a nei tawh chuang lo, thil thleng tùr a thleng vek tawh," ka lo ti a.

"Sawi a ngai, kan inkârah buaina sawi fel ngai a awm tlat a ni," a ti leh a, thingpui sen hâng chu a in leh hlak phawt a, chutah," Elena-i kha ka bialnu hlui chu a ni a, office-ah pawh khân min rawn hmu ngei bawk; mahse, a lakah khân rilru ka pe tawh hauh lo, engah nge nang ka neih reng lai chein ani kha ka ngaihven theih ang?" a rawn ti chhuak leh ta nge nge a.

"I office-ah khân in infâwp a, i fa a pai bawk. Chuti chung chuan a lakah rilru pe tawh hauh lo angin i insawi thei maw? Mipa dâwihzep leh dâwt sawi chîng hi ka ngaina lo," ka ti ve ta thung a, Office-ah an infâwp tih hi ka sawi chhuah vawi khatna a ni, ka hmu tih pawh kha an hre hauh lo rêng ang.

"Dâwihzep..." tiin a thaw hawk a, a sam chu tuaiin a maimichhîng sawk bawk a, a rawn meng leh chuan a lâwm vak lo tih ka hre thei nghál mai, a hmui a chîp deuh hmak bawk a, a țawng dâwn ta lo emaw ka tih hnuah chuan," Ka fâwp lo," a ti leh nghut a.

Mipa ni ve si, a insawi thiam zawt zawt chu ka haw tawp. Ka hmuh dàn kha chuan an infâwp chiang alawm, a sawi anga a mah hian a fâwp lo a niha a hmeichhia zâwkin lo fâwp pawh ni se, lo țang ve tùr a ni ang chu, a duh lo a nih chuan a lo dawh reng dâwn em ni? A lo nam sawn bawk ang. A, ngaihtuah lo teh ang, theihnghilh vek ka duh.

"Insawi thiam suh," ka lo ti ve thung a, ani chuan min rawn en rùn rún pah hian," Thu dik chauh ka sawi," a ti a, chutah, a lu chu a thing deuh nawk nawk a," Hmeichhe bula ka insawi fiah a ngai ta chu a nia," tiin a nui chhuak hawk a.

"A ngai hleinem, i duh chuan i kal thei," ka lo ti leh kher a, a haw ngang a niang, a ding thut a," I luhlul ve ngar ngar reuh khawp mai maw, a țha, tu nge luhlul zâwk kan hria ang chu, hmeichhe laka ka tlàwm chu ring duh suh, eng pawh tih ngai se ka ti mai ang, a tàwpah hnehtu zâwk kan hria ang," a ti nghut nghut a, min rawn hnaih thutin ka kutah a rawn hmer chawt mai chu, hlauthãwng zet hian ka lo en hrâ a, min hmerna chu nâ ka tih avàng chuan ka țhen sak bawk a.

"Ka zawng rei chein hun ka pe rei tâwk tawh bawk che a, chhuah che ka tum tawh lo, lo inring ang che," tiin a nui suk a, ka kut a hmerna chu thlah in a chûl zui a," Mangțha, tui deuhin i lo mu dâwn nia," tih leh rawn kùn hniam thut chu rualin ka hmui chu a rawn nûl thuak a, ding ngîl leh nghâlin a nui leh suk a, a chhuak zui ta nghâl a.

Ka ding khawng reng ringawt a ni. A țawngkam leh chêt dàn khân min tihamhaih zo a, chêt nachâng ka hre lo, ka en zui tawp ringawt mai. Bike-in a rawn kal a niang, bike ri dat dat chu ka hre nghâl a, chak zeta tlân chhuak riin a zui leh zat a, a thãwm a reh hnuah pawh ka la che sawn chuang lo.

*******

"Michael, min pui teh!" Teh thlâwtin.

Mitko sàn ãk pah hian,"Eng kawngah maw?" a rawn ti phawt a, sawi zawm lehin,"Sawi hreh suh, ka tlãnchhe ngai lo ang tih chu i hriat kha," a rawn ti leh a. Ni e, ka hria alawm, mi fel a ni a, a hnêna țanpuina ka dìl phawt chuan a tlãnchhe lo tawp ang tih hi chu ka hre chiang a ni. Ka inthlahrung viau nain kawng dang ka hre lo, ani chauh hi ka ngam tlâk leh innghahna a ni rih, Damon-a thîk ber a ni bawk a, a remchâng ber ang. Mipa dang, ani ang tluka ngam tlâk, hmel hriat țha leh kawm ngeih ka nei dèr si lo.

"Ka bialpa angin awm rawh!"

A rawn nui hak a,"Wow! A va nuam dâwn ve!" a rawn ti phawt a, chutah, rawn thutak ta deuhin," Engtizia nge? Damon-a'n a rawn hmu chhuak che a ni maw?" a rawn ti leh a, kei pawh chuan zêp tum hran lo chuan," Aw... mahse, ka inthlahrung ve tho a nia, kawng dang ka hre si lo a ni," ka ti ve a.

"Inthlahrung  lo ve, țhian țha kârah chuan inthlahrunna tùr a awm hleinem," a rawn tih leh chuan," Ka lâwm ngawt ang," ka lo ti sap a, ka ti tak tak a ni, ani hian min hre thiamin a innghahna tlâk bawk a, hetiang țhian ka nei hi ka lãwm tak meuh a ni.

"A chanchinte kha i hre chiang châk êm?" a rawn tih chuan ner deuh nak hian ka melh rum a, a rawn nui sûng mai. Kan in-video call a, a vâwt deuh a niang, a inthuam lum hmel si a, ruah a sûr leh tawh pawh a ni maithei, hetah chuan a sûr lo ve rih  tlat, chhûm erawh a zîng chuai thung.

Eng eng emaw thil ho mai mai sawiin kan inbe zui a, kan inbiak zawh meuh chuan a lo tlai ruih tawh mai. Mu tùrin ka insiam nghâl a, ka mut hnu rei vak loah chuan ruah chu a rawn sûr leh ta sung sung a, thlî a thaw pah deuh bawk a, in bula thing hnah chu a rawn chhêm ri sung sung mai. Muhìl lo chuan ka meng kar a, building hnuai luah mah ni ila ruah sûr nasa leh thli thãw hi ka hlau reng tho a, ruah sûr nasa lêm lo hi chu ka hlau hran lo; mahse, zanin chu thlî a thâwt tel avàngin ka muhìl thei mai lo. Ka meng rei ta phian mai, thli thâwt reh thleng rak ka meng alawm. Dâr zât ka en chuan muthilh a hun tak zet tawh tih hriain ka țawngțai țha leh a, ka mu țha leh a.

Fùr lai ngang a ni a, ruah a sûr duh tlek tlek khawp mai. Nipui laia a nawm theih tehréng nèn, fùrah hi chuan chhûm hi a zîng chuai reng mai a, lung a tizîng țhìn ka ti. Chhûm a zìn loh chânga tlai ni tla tùr erawh a mawi thlâwt, ka phone camera hi a rim thei a nia, senior lamah chuan hetiang hi kan lo làwm duh ta deuh a niang a ka tih phah ringawt nghe nghe, ka phone-ah hian ka thlalâk ai pawhin tlai ni tla tùr thlâ ka lâk hi a tam zâwk ngei ang.

Sti pawh a naupai chu a haw deuh a niang, kan inbiak lai pawh chuan a han uak leh țhat țhat țhìn a, ka lawmpui viau rualin ka khawngaih reuh angreng, a hmel lah chu a lang chêr ve kiam a, sawi lang lo mah se a chhûngte a rawn ngai ve ngawt ang chu, hun harsa leh hrehawm kan tawh lai hian chhûngte an ngaihawm thei êm mai.

Damon-a chanchin chu ka hrilh ve a, a rawn thinrim nasa mai. Lo be țha duh miah lo tùr chuan min chah nasa a," I natzia kha theihnghilh lo la, a țawngkam țhaah khân tawlh thlu miah suh, ka ngei a nia, hmuha àn khum hrep ka châk," a rawn ti bawrh bawrh a, ka nuih a tiza angreng khawp mai. Ka dem hauh lo, ka natzia min hriatpuitu kha a ni miau mai si a.

"I rilru kha tikhauh tlat rawh aw. I duh thláwt tih chu ka hria; mahse, ka lung a awi thei hlawl lo, i lo pawm leh dâwn a nih pawhin hrem deuh hlak tho rawh, hrem deuh reng kha a phû ve tlat," a rawn tih leh phei chuan ka nui ta hak a," Pawm leh tum lam kha chu ka lo la ngaihtuah miah lo, ka duh thlâwt tih chu ka phá lo; mahse, ka pawm leh dâwn a nih chuan ka duhna zawng zawng lêt thawka min duh a ngai ve tawh ang," ka ti a, ka nui leh hak hak a.

"A țha, ka ngaihtuah dâwn lo che, nula puitling dik tak i ni tawh a, i tâna țha tùr chu nangmah khán i hre ber," a rawn ti ve leh a, a han uak leh țhat țhat a, maimichhîng vang vangin," Ka va ning tak!" tia rawn mengin a mittui chu a'n hru hul a," Rinsiama hian min duat viau mah se ka ngei deuh tlat a nih chu, a rimte hi ka ngaithei lo va," tiin a hmui chu a'n hup leh rih a, a luak a chhuak tih ka hre thei mai a.

"Rinsiama chu a va khawngaihthlák dâwn tehlul êm! A thlahlel ve dâwn tho si che a, nang lahin i ngaithei dâwn si lo," ka tih lai chuan a uak leh zawk zawk a, chu chu ka hmuh chuan," Luak bawrh bawrh rih phawt teh, kan la inbe leh dâwn nia," ka ti a, kan inbe tàwp chu a ni nghâl mai.

Zan khat chu ruah a sùr sung sung a, nuam ka ti hran lo khawp mai, Rinpuii  rawn lêng se ka tih viau lai chuan kawngka chu a rawn ri dat dat a, Rinpuii a nih chu ka ring lo tawp, ani a nih loh chuan tûn ang huna rawn kal chu, thil pawimawh tak a ni ngei ang tiin ka lo chhâng vat a, Damon-a huh hnâwng deuh chupa a rawn pên luh chuan makti deuh hian, biak nachâng pawh hre lo chuan ka lo en reng ringawt a. Tûn ang hunah te rawn lèn rêng rêng, ruah sûr kârah lehnghâl, a rawn huh nasa lo zâwk a, a vànnei khawp e.

"Min en zo tawh em?" 

Ka hawi sawn rang lutuk ringawt. Thil țûl lêm lo ka lo ngaihtuah avàngin ka lo en reng tih ka lo hrechang lo a ni, a huh deuh chup avàng chuan a inhrûk hul nân puan ka pe ta vat a,  ka bialpa ni tawh lo mah se a damloh chu ka duh bîk nâng.

"Ka lãwm e," a tih sup chuan,"I rawn kal chhan a pawimawh viau a niang chu maw?" ka ti nghâl zat a, a inhem hul theih nân heater ka on-sak nghâl bawk a. Ani pawh chuan," Pawimawh teh rêng mai, a pawimawh êm a, ruah sûr tih vêl mai mai hian min dang thei lo a ni," a lo ti ve mai bawk a, kan inchhâng tâwk viauin ka hria.

Thingpui ka thlitsak lai chuan ruah chu a hma aiin rawn sûr tam a, in bula thing hnah pawh chu a rawn ri leh ta fuap fuap mai. Nipui laiin țangkai viau mah se ruah sùr laia ari fuap fuap țhin leh thli a thâwt deuh chânga a hnah ri sung sung țhìn hi chu ka hua, min tihlau, zànah phei chuan thinthîin ka mut theih loh phah fo mai.

"Vawiin chawhnu khân Aizawl ațangin ka rawn phei a, kawng lah chu hmun thum laiah a min lehnghâl a, zanin pawh hian a tlang thei lo maithei a ni."  Titi pângngai a rawn vawrh chu ka beisei chiah lo asin, lo ngaihthlâka lo țawng ve miah loh chu  duh mah ila a nunràwnthlãk mah mah ka ti si a.

"Tlang ang," ka lo ti mai a, ani chuan," Engtin nge i hriat?" nui hmel pu deuh hian a lo ti ve thung a, a inhrûkna puan chu lâksakin thuamhnaw ka hem rona tùra thîrzai kualah chuan ka zâr pharh a. Min lo en reng a ni chêk ang chu, ka zâr zo chu," Zanin chu tlêmin biak i nuam ta deuh, i hmel pawh hmuh a hrehawm loh," a lo ti a.

"Hmuh ka hrehawm leh min en lo mai rawh," ka tih chuan a nui hawk a," Hmuh hrehawm han tihah khân, min ngei hmel taka min en hian hmuh i nuam lo ka tihna mai a nia," a lo ti leh a.

Nia, zanin chu ruah a sûr nasa deuh bawk si a, inlêng ka mamawh lai tak a ni nèn, ani kher hi chu mamawh lêm lo mah ila thlamuanna riau ka nei tlat si a ni, chuvàngin ngeiawm lutuka han biak chu ka duh chiah bîk lo.

"Ka pi kha a dam țha chiah lo va," a rawn tih leh chuan rang zet hian ka en vat a, a pi tê kha, a upa ve viau tawh a nih kha, upa viau tawh mah se a hrisèl țhat reuh êm kha, eng vàng tak chu ni maw? A ngainatawm reuh a, dam țha reng se ka duhsak asin le.

"Engati nge?" ka tih chuan," A, a upa ve tawh a, bâkah, a bp kha a lo sâng ve reuh a, ka rawn phei thuai theih loh phah a ni, min ngai ve bawk sia," a tih leh chuan âwih lo rilru tak hian ka en leh a, a piin a ngaih viau chu ka ring thlâwt lo, Michael-a kha chu ni se ka ring thei mai ang, ani kher hi chu...

"A va zia lo ve!" ka ti ve ringawt a, han sawipui dàn vak ka hre lo. Han titipui hluah dâwn ila, ka duh meuh si lo, a chhan chu ka lakah beiseina a rawn nei chho zêl ang tih ka hlau, beiseina siamsak ka duh lo a nih ber chu.

"I thawhna chu nuam i ti bawk em?" a rawn tih leh tâkah chuan," Aw..." ka lo ti vat a, han chhàn zui zêl dàn  pawh ka hre chuang lo. 'Nuam lutuk' han tih hluai lah chu, dâwt a ni pah ve deuh dâwn tho si, nuam chu ka ti ve tho a,'lutuk' han tih atân chuan a fuh lo, dâwt a ni si a.

"A làwmawm viau rualin ka ngai êm êm thung che a ni, i tel lo chuan a reh ruih mai a, office kal châkna rêng rêng pawh ka nei tawh lo va, ni tin ning ru viau chungin ka kal a ngai a." 

A ti tak tak hauh lo. Min hneh a tumna mai a nih hi, a țawngkamah ka tawlh thlu tùr a ni lo ka tih kha, ka âwihsak tùr a ni lo ang, ka cheng a man tawh lutuk a, tunah pawh hian ka rilru hi a rawn hre thei vek hialin ka ring a ni. Chuvàngin, ka âwihsak tùr a ni lo.

"I duhthlanna alawm," ka tih chuan," Ka duhthlan a ni lo, thil hriat sual palh vàng a ni zâwk," a lo ti leh a, ruah a sùr nasat deuh avàng chuan kan țawng pawh a ring dùn viau.

"In infawh leh i fa a pai chungchâng kha thil hriat sual palh maw lo ni a? Ngawi teh, sawi tawh lo teh ang, thil awmze nei loa inhnial buai hi ka peih lo a nia," ka ti a, a thingpui no chu sengin ka thawhpui ta nghâl a.

"Ka fâwp lo ka tih tawh kha. Kan mu dùn ngei mai; mahse--" a tih lai chuan ka kut chu ka lo phar vat a," Duh tâwk teh, awmzia a awm lo, hriat pawh ka duh tawh lo," ka lo ti vat a. Dik tak chuan a mutpui a ni tih a sawi chhuah chiah khân ka nat vawng vawngna kha a lo lêt leh a, ka hre duh lo, a sawi ngat phei hi chu, nula dang a mutpui thu chu min hrilh lul suh se.

"Michael-a kha ka thîk tih hre reng chungin i kàwm lui zêl a, in pahniha in thlalâk dun ka hmuh leh a office-ah ka awm loh laiin i va lêng a ni tih ka hriat khân min tinain phatsan niin ka inhria a..."

Ruah rawn baw tlãwrh tlãwrh avàng chuan a thu sawi chu ka hre thei chang chang chauh a; mahse, ami deh dàn a dang tlat, a inpuan ve vawi khatna a ni hial ang chu, eng vàng nge ka hre lo, thu dik tak vek a sawi niin ka hre tlat a nih chu.

*MI DANGIN AN NGAIH DÀN/ HRIAT DÀN / PAWM DÀN CHE AIIN NANGMAH I INNGAIH DÀN/ HRIAT DÀN/ PAWM DÀN KHA A PAWIMAWH ZÂWK*