☆HLWILY☆ - 29 By Dingdi Pachuau

 ☆HLWILY☆ - 29 By Dingdi Pachuau

Ruah sûr chuan bàn zái a rêl lo, a sûr tam telh telh em maw ni tih tùr zâwk a ni; mahse, awmpui ka neih avàng erawh chuan ka hlau miah lo, mahni chauh chuan awm ila chuan  ka hlau lehpek ngawt ang chu. Hetia ruah a sùr bur bur reng mai chuan a haw pawh a haw thei dâwn em ni? A haw theih loh chuan... Ni lo, a riak thei lo ang, a tihchi hauh loh. Banga sana chu ka'n thlêk zawk a, a lo tlai nasa tawh mai, mut a hun dêr tawh!

"Ka haw țêp, minute 5 chhûng chauh ka țhu tawh ang," a rawn tih chuan ka en zawk a, sana ka thlêk lai kha min lo hmu a ni ngei ang chu; mahse, zahah pawh ka la duh bík lo, a tlai ve tawh viau si a.

"Car i rawn keng em?" ka tih chuan a lo bu nghat a, car pawh chu lo keng ta tehrêng pawh ni se, ruah a sûr tamin a buakin a baw tláwrh tláwrh a ni si a, khalh a har ngawt ang chu, chêt sual pawh awl deuh tùr a ni; mahse, riak ve tùra han sàwm ngawt chu ni theiin ka hre lo, miin tlangvâl ka riahpui a ni tih an hriat hlauh chuan...kan dinhmun khirhzia an hre ve tawh dâwn si lo.

"Riah chu châk viau mah ila a ngai lo ang, nula mahni chauha in luah bula riah chu, ka che na lutuk palh ang," nui hawk hawk chunga a rawn tih chuan ka ngaihtuahna a rawn hre thei em maw ni ka ti hial a; mahse, min fiamna mai mai a ni tih ka hriat chuan chhâng duh lovin ka hawi sawn daih ringawt a, nuih pawh ka nui duh lo.

Nunrâwng leh khawngaihna, ngaihsakna nei lo lutukah min ngaih loh hrãm ka beisei, a haw dâwn chuan ruah chu a la sûr buan buan a, motor a dahna a thlen hma pawhin a huh hman ngei ang chu, nihliap hawntír ta ringawt ila kei pawhin pakhat bãk ka nei si lo, school-ah eng nge ka khum ang? Tlêmin khawngaihna ka thinlungah a rawn awm ve deuh a.

"Nihliap hi hàwn rawh," tiin ka pheikhawk dahna bula nihliap ka tun hul chu ka pe a, ani erawh chuan," A ngai lo, naktûkah khum tùr i nei lo palh ang," tiin a nui suk a, chutah,"Ka rawn kal leh hunah chuan nihliap leh raincoat ka rawn keng tel tawh ang," a ti leh zat a. Rawn lèn leh chu a la tum hle mai maw, a pawi lo, ka hlauh loh phah ve a, chu chu ka tân a hlu hle a ni.

Lungleiah khawi laiah nge a awma a khawsak tih pawh ka la zâwt miah lo, a thuhrimah chhûngte pawh an nei  ang chu, mi hausa chhûng an nia, bâkah, laina țhenrual an ngah êm kha maw, hmun hrang hrangah chhûngte an nei ngei ngei ang, a nih loh tal pawhin, ani hi chu a 'money' si a, hotel-ah nuam takin a awm thei bawk ang, a ho êm mai, keia lo ngaihtuah a ngai lo.

A tûk zîng ka thawha ka phone-a dâr zât  ka en chuan message lo awm reng tawh chu ka hmu vat a, a message ngei a ni, nizàn ka muthilh tawh hnua min lo thawn niin, ka han chhiar thuak a.

*Ka nula rìm dàn chuh, huh țha hnâp hnâp hle mai; mahse, hrehawm ka ti hauh lo, ka bei a dawn phah chuang lo bawk, a tàwp thlengin aw niang*  tiin, a message chu ka en vang vang a, a hàwn khân a tlai ve tawh si a, a huh viau phei chuan a muhìl thei lawk lo tawp ang le, a damloh phah hlauh phei chuan...

Kan office ațang hian chiang takin Sethlun helipad bul vêl zawng zawng hi a lang thei a, ruah a han sûr chuai chuai a, tlêma chhûmin a han bawm deuh chiai hian a mawi ka ti tlat pek a, class ka neih loh kâr chuan ka thlîr vang vang țhin. Mitei chuan," Mawi ka ti hlawl lo, chhûm zîng hi chu ka hnê," a ti ve ziah a, kei erawh chuan," Zîng chûk a ni hleinem, a mawi tâwk tùr chiahin a zîng deuh chiai alawm, hmuh a tinuam, lung te pawh a tilêng lek lek thei hialin ka hria," ka lo ti thung a.

Kan peon Pu Dara chuan," Ruah a han sùr zawha khua a thian kûk hian a lang fai sur mai si a, hmuh a nuam daih zâwk lo'ng maw?" a lo ti ve a, Mitei chuan rang zet hian," Dik chiah, Pa Dara sawi kha kei pawhin ka thlâwp e," nui chung hian a lo ti a, kei pawh chuan," Mawi tehrêng mai. Khua a țhat var pawhin a mawi tho a, ruah a sùr pawhin a mawi tho, mawi loh lai a nei lo a nih chu," nui chung vêk hian ka ti leh a.

Class vii class test ka neihpui a, a hmain test an nei dâwn tih ka hrilh lâwk vek tawh a, an thiam viau tùrah ka ngai. Ka rin ang ngeiin an thiam ve bawk a ni ang chu, tu mah pawh inzâwt lo chuan an ziak mawp mawp a, chak lo bera ka hriat Vanlalhriati pawh chuan a ziak ve char char a, a spelling erawh a rawn tidik lo leh nual thoin ka ring. A zo hnuhnung ber leh rêng bawk a, nikum lam ațanga ka lo hriat ve tawh avàngin ka chîk lo thei lo va, chak lo ber pâwlah a awm zêl tih pawh ka hre tel bawk.

Class ațanga ka chhuah dâwn chuan," Miss, khawngaih takin, ka haw thei ang em?" a rawn ti a, min en țha ngam lo chuan a kun deuh chal a, a kamis hâk ipte zâwn țet chu a hup pah deuh țât țât a.

"Eng nge ni ta, Hriati? I nuamsam lo em ni?" ka tih chuan," Aw..." a ti ban deuh charh a, a hmui chu a pet deuh fan fan a, ani hi, a pum te hi a lo nuam lo a ni thei ang em? Tunah chawhma 3rd period kan zo chauh a ni si a, a haw chuan nilêngin a rawn kal tawh àwm si lo.

"Damdawi i duh em?" ka ti leh a, ani erawh chuan," Aih...Miss, ka haw chu phal zâwk la?" a ti leh sap a, ka han en țhin, damlo hmel a pu hran si lo va, eng nge harsatna a neih ang aw tih chu ka ngaihtuah kual a.

"Aw le, i harsatna chu eng pawh ni se, haw la, naktûk lamah erawh rawn kal tum rawh aw, vawiin chauh ni rawh se," ka tih chuan a nui sak a, inthlahrung deuh dai hian," Ka lãwm e, Miss ," a ti a, a țhutna lam chu panin a bag chu a la nghâl a.

Office lamah chuan a chanchin chu Mitei chu ka zâwt chhin a, a nu leh pa hming leh an awmna lai ka zawh chuan Vêng chhak lam a nih thu min hrilhin a nu leh pa hming pawh chu min hrilh ve nghâl mai a, kan titi chu Pu Dara chuan a lo hre pha chêk a niang chu," Nunkima fanu upa ber niin nau pahnih hmeichhia leh mipa a nei a, a la naupan ve nèn, an chhûngkaw rinpui ber a ni țan dèr tawh, a nu hi a hrisèl lo ve a, ram hna pawh a thawk hlei thei lo, chutih laiin a pa lahin chhûngkaw ngaihsak aiin zû a duh a, a in karh karh reng  mai a, țawng mawi lo ni lo se, an khawsak a harsat ve nèn, ni tin a rui ve thei reng mai a, buaithlâk tak a ni," a ti bawrh bawrh a.

Ina ka haw thleng pawh chuan Hriati chungchâng chu ka ngaihtuah a, a la naupang si a, a nu hrisêl lo leh a pa zu in reng mai bul aţanga lehkha zir chu a harsa ve ngawt ang chu, hei vàng hi a lo nih dâwn hi a uniform pawh a hlui theih viau ni, nu ber hrisêl lo, hna thawk thei lo leh pa ber zu rui reng nei tân chuan a thar chu neih a har ngawt ang chu, ka khawngaih ru ta viau mai.

A tûkah chuan Hriati chu school-ah a rawn kal ve leh mai bawk a, ka lo chîk leh zual ta a, a rualpui naupang dangte aiin hna thawk nasa a niang, a kutțangte chu a no lovin, hmang țhang tih hriat tak hian a kutchâng chu a chuar tap mai a, ka en reng tih a hmuh chuan a zak deuh a ni ngei ang, dawhkàn hnuaiah chuan a dah lût ta zàl zâl a.

*******

"Kan lâwm hle mai, làwmthu sawi dàn tùr pawh ka hre lo, ka lâwm a ni tawp mai," mittui tling kiang chunga Hriata nu, Pi Liani'n ka kut a vawn vang vang chuan kei pawh ka mittui a hnai ve kuar thei nia. Anni țanpui theia ka awm hi ka lâwm ve tho a ni, ka lo hre chhuak har mah mah zâwk a, an chhûngkaw harsat vezia leh an tân Hriati school kaltîr ngawt pawh chu a har dâwn tih ka hria, ani hna thawk thei lo phei chuan Hriati thâ pawh chu a awt ngawih ngawih tawh dâwn asin.  Uniform leh zirlaibu an dawng thei hlauh zâwk a, chuti ni lo phei se chuan an tân chuan a harsa ngawt ang chu.

"Bawihtei hian school han bàn ringawt chu a ngai ngam bîk si lo va, pâwl sàwm thleng tal kal a duh ve thu inthlahrung taka min hrilh lai phei chuan chhàn ngaihna hre lovin ka en reng ringawt mai a ni. Kei hian tihsak theih ka nei lo, heti mai hi ka ni si a, eirawng bàwl mai mai pawh ka tân chuan a harsa lek lek tawh si a, i hre tawh tho ang a, pa ber lah hi a la piangthar thei si lo, ka bei hi a dawng țhin a nia," a tih leh phei chuan ka khawngaih reuh khawp mai, han hnem dàn tùr ka hre mai lo lehnghâl.

Ina ka haw hnuah ka pa ka phone a, hlim zet hian ka thil tih chu ka hrilh a, ani pawh chuan," Fanu, mi țanpui duhna thinlung nei ka nei che hi ka chhuang hle che a ni. Ni e, kan sumte hi harsa leh țanpui ngaite tân chuan ui chiam loh tùr a ni, Pathianin thawk chhuak theiin hrisèlna leh damna min pe a, a malsàwmna kan dawng nasa a, chu a malsàwmna kan dawn chu mi dang tân kan pêk chhuah hian anmahni mai ni lovin keimahni pawh hi kan lãwm țhin a, i pêk lai khân Pathian pawh a lo lâwm ngawtin ka ring," a rawn ti sauh sauh a.

Ni e, ka țanpui theih avàngin ka lâwm a, ka hlim bawk a ni. Ka thawh chhuah ve liau liau a ni a, ka ui hran lo bawk. Pathian zârah, ka pa hlawh  ațang pawhin mi awt ngawih ngawih bîk lovin kan awm ve thei a, ka hlawh chhe ve tê( tam chu ka ti ve tho) hi tam viau lo mah se mi dang țanpui nân leh an mamawh țhen țhen a lo phuhrûksak theih ve chuan a țha a ni mai.

Damon-a chu a reh ta vang vang rih a, huh zawr hnâpa a haw kha a sim viau a nih ka ring, pawi lo, tihian reh vang vang se a țha, reh hlen daih hial se... rilru nat leh kha ka duh tawh lo. 

Mahse, ka rin aiin a reh rei lo leh tlat. Zànah ruah a sùr loh avangin hla kan zir a, in chung nula a zin avàngin Tluanga leh Vla nèn kalin kan haw tlâng leh a, nui bâwk bâwka kan ințhen chiah tiha ka veranda-a Damon-a lo ding ngul mai ka hmuh chuan ka nui tàwp chiang khawp mai. Engati nge min lo nghah lehpek ni? Ka hawi kual a, a motor ka hmu lo. E, a bulah a bike a ding reng alawm, bike-in a rawn kal ve thung a nih hi.

"Nuam i ti hle mai maw," lungawi lo awka tih hriat taka a tih nghut chuan ka chhâng lo. Ka peih vêl lo, inhnialna a tam mai mai, bâkah, pâwnah kan la ding zui a, miin kan țawng  thãwm an hre palh ang.

In chhûnga kan luh hnu chuan," Khatiang khân min lo nghâk ve ziah tawh suh, hmu che an awm phei chuan min ringhlel nghâl ringawt dâwn asin, a nih loh pawhin mi sual, mi rawk tumah an ngai mai dâwn che a," ka ti hlak hlak a, a sawi chhuah hmain a thingpui tùr chu ka chhuang nghâl zat bawk a.

"Phone i chhâng thei si lo alawm," a ti phawt a, chair-a țhut pah chuan," In chung tleirâwl Rinpuii khân min hmu a, kan titi nual nghe nghe, a țawng duh reuh khawp mai lehnghâl a, Michael-a pawh a lo hre ve nghe nghe a," tiin min rawn en chîk deuh a. Rinpuii chuan a lo hrilh vek a ni ngei ang chu, ani zawngin zêp tùr leh tùr lo a thliar thiam ve dáwn dèr si lo va.

"Eng nge Lungleiah i rawn tih rêng rêng a? School pawh ngaihtuah ta che," tiin thil dang chu ka sawipui ta daih a, ka phone chu kheuhin Michael-a message ka thawn a, a hman veleha min rawn call tùrin ka ti a ni, a lo hre thiam ve mai ang chu maw.

"Ka ngaihtuah ngai lovin thawk an awm alawm," a lo ti mai a, chutah," Ka rawn zawng che a ni ber ang chu, i țhiannu Mitei kha hmu fuh lo hlauh phei ila chuan ka la hmu lo maithei che a ni, ni lo'm ni?" a ti leh a, chhâng lêm lo chuan thingpui so chu noah ka thli chhuak a, ka va pe nghâl a. Ka țhu ve dâwn chiah tihah chuan ka phone chu a rawn ri chhunzawm nghâl a, Michael-a hming ka hmuh chuan ka nui sak a. 

Kan inbiak chhûng chuan ka en duh miah lo va, rei tak erawh kan inbe lo. Damon-a a rawn lêng tih a rawn hre thei nghâl mai a, nui hak hakin min rawn fiam zui a, kan inbiak dàn ațang chuan Damon-a pawhin Michael-a a ni tih a hre ve ngeiin ka ring.

Ka ring dik chiah. Kan inbe zo chiah tihah chuan," Michael-a chuan eng atân nge a rawn biak che a?" a rawn ti chiah mai rêng a, a hmuh loh turin ka nui sak phawt a, ka thil tih chu a fuh dâwn e.

"Eng eng emaw pawh kan sawi ve ang chu," ka ti mai a, ani lah chuan," Ka thïk tih hre reng chunga i be lui zêl hi chu i luhlul ve ngawt mai ka ti; mahse, engah mah ka ngai lo, ka hlatsan phah dàwn chea i ring a nih chuan i ring sual chhiava ang," a lo ti leh nghut nghut a, min rawn en pah kur bawk a.

"Ka bialpa tharlâm ber a ni alawm."

A lo nui hawk a, a nuih a za tak tak pawh a ni maithei." Thîk viau mah ila i bialpa chu a ni lo, ka hre chiang ve tawh che, i duh zâwng a ni lo," a ti leh a, thil a intihre lutuk chu ka ngei țhelh a ni, a hre dik êm êm zui bawk si.

" Ka duh zâwng hre viauah inngai suh, kan upat ang zêlin kan duh zãwng pawh a inthlâk țhin a ni," ka ti ve thung a, ani lah chuan," A dik mahna; mahse, ka tân chuan a ni ve lo, ka upa ve tawh viau a, ka la duh ngar ngar tho che, ka duh ka la thlâk ve hauh lo. Chuan, Michael-a kher hi chu i bialpa a ni ĺo, a ni ngai lo ang," mahni inringtâwk tih hriat zet chuan a ti leh a, sawi tùr pawh min tihre lo, a thu sawi tlang tak chuan min tihlim ka ti dâwn nge, tlêmin ka zãng deuh huaiin ka hria; mahse...

"Ka rinnna i tichhe tawh a, ka ring thei tawh lo che," a hnu daihah chuan ka ti chhuak ve ta thung a, en pawh ka en duh tawh lo. A țawngkamin min tihdanglam theih țhinzia chu a hre chhuak ang tih ka hlau, a fing si a, ka mitmeng ațangin a hre thei leh vek palh ang.

"Kimkim, ka tân hian mi dang an awm lo asin, ka ti tak tak. Michael-a ka thîk êm avàng leh min phatsana min kawp nia ka hriat avàngin rui hnâpin zu ka in a, khatih lai tak khân Elena-i khân min rawn kalchilh a ni chêk ang chu, ka rui lutuk tih chu ka hria; mahse, ka fa êm pai tùr chuan ka ring thei lo, ka fîmkhur ve thei êm asin," a ti dap dap a, a thil sawi chu ngun takin, thaw dèp dépin ka lo ngaithla a, dâwt a ni êm dâwn em ni? 

"I ruih êm chu, eng mah i hre chiang tawp nâng, bákah, a hma pawhin,' Kan mu dùn,' i tih tawh kha," ka lo ti ve thung a, ka hmui chu ka pet fan fan a, a thu sawiin min hneh mai loh nân ka rilru chu ka tikhauh lui sauh sauh a.

"Ka harh chhuahin ka bulah a lo mu ve miau si a ni; mahse, ka rui êm a, sex hmang thei chi ziazâng niin ka inhre lo, bâkah, mi sex ka hmanpui  rêng rêngin condom ka hmang ziah bawk, ka fa a ni thei lo," a tih leh chuan," I hriat chian tawp loh chu, i ruih viau phei chuan condom lam i ngaihtuah thleng pha tawp nâng," ka lo ti ve leh thung a.

A ngawih vang vang hnuah," Ka hmuh theih loha i han awm bo daih kha chu ka â țêp hialin ka hria, khatia i awm chhan kha ka hre si lo, min hmu duh lovin ka biak dâwn che pawhin min be duh si lo va, zû ka in phah nasatzia kha, kha hun kha ka ngai lo tak zet a ni," a rawn ti leh vang vang a.

A haw hnuah chuan ka bân a rawn vawnna chu a la lum ham ham thei hialin ka hria, ka taksa min deh hlek pawha a thil tih theihzia ka la theihnghilh lo, ka taksa lah hian kei aiin a lo la theihnghilh lo nasa. Hetiang a nih chuan nèm hun ka la nei ngei ngei ang, min tawh theih tùrin ka awm tawh tùr a ni lo.

*******

"En teh, Damon-a'n min rawn bia a, engtin nge ka number a neih theih pawh ka hre lo," Sti'n a rawn tih chuan mak ka ti ngang mai," Eng maw?! Eng atân nge a rawn biak che a?" ka ti vat rêng a.

"I chanchin hlîr mai kan sawi maw le, ngaihdam min rawn dîl phawt a, engtikah mah bànsan che a tum loh thu a sawi bâkah hlim taka siam leh ngei che a tum thu a sawi bawk a, amah ka lo ngaih dàn tumtlang tak pawh kha a rawn țhiat darh vekin ka hria; mahse, kei chuan i duh dàn ka dah lal ber thung ang, Damon-a kha ka haw hran tawh lo tihna a nih ber chu," a rawn tih leh chuan," Min phatsan i tum a ni maw? I țhiannu nge i thlan dâwn Damon-a?" ka ti khar khar thung a.

"Nangmah le. Phatsan che ka tum hauh lo. Hlim takin awm la ka duh ber. Mipa, hlim taka siam theitu tùr che tawng la, nei la ka duh; mahse, chutianga siam theitu tùr che chu pakhat chauh a awm si a, a hre chiang bertu pawh i ni," a rawn ti leh kalh kalh a.

Zàn lama Michael-a min rawn phone lah chuan," Hlim taka i awm hi a hun tak zet tawhin ka hre ta, Damon-a a rawn lang leh tawh bawk a, lo be țha duh lo leh lo induh khum lo hian țha takin inbia ula ka duh khawp mai," a rawn ti bawk a, ka țhiante pahnih hian eng an hria nge maw ni, an thu kalpui dàn a inang deuh tlat, an lo inbe ru te hi a ni lo maw? An intiam rual a ni hial ang ka ti.

*HRINGNUN KAWNG CHHUK CHHO HIAN I THIL TUM(GOAL) KHA TIDANGLAM MIAH SUH SE, I THIL TUM I TIHHLAWHTLIN KHÂN I NUN A TIDANGLAM VEK THEI SI A*