☆HLWILY☆ - 30 By Dingdi Pachuau

 ☆HLWILY☆ - 30 By Dingdi Pachuau

"Lal-Michael, eng thil nge i hriat a?" ka tih chuan,"Eng thil mah ka hre lo, i hlim lo rei tawh a, hlim hi i phû tawh a ni. Țha takin Damon-a kha lo biain a thu sawite kha lo ngaithlâksak rawh," a rawn ti leh mai a. Eng thil nge a hriat ni? A haw êm ëm țhin kha a ni sia, bâkah, ani pawhin min hmangaiha min duh thu a sawi a, tunah lah Damon-a thu sawi ngaihthlâksak tùrin min ti leh daih a... ka hre thiam lo.

"Min phatsan tih chu nang pawhin i hriat chian khawp kha, engtin nge awlsam takin ka lo pawm leh theih ang? Ni lo ve, amah ngei pawhin an mut dun thu a sawi alawm," ka ti ve ta thung a, chuti maia awlsamin a thu sawi ka âwih thei ringawt lo ang, ka rilru natna nèn khân a inhen lo, ka ngaihtuah chhuah leh phei chuan ka thin a rawn na leh vawng vawng mai. Awlsam takin ka theihnghilh thei ngai lo ang, min tina êm asin.

"Mu dùn tihah ani rui lutuk chuan engtin nge sex hmanpui theia i rin? Mipa ka nih hi, ka thu sawi chu âwih mai rawh. Bâkah, a sàwm leh a koh pawh ni lovin Elena-i khân a rawn pan a nih kha, Damon-a fa a nih pawh ka ring hrep lo ve," a rawn ti leh charh charh a, a thil rawn sawi chuan min tibuai leh ta vek mai,  ngaihtuah ka duh loh thleng thlengin ka ngaihtuah leh dâwn chiang lutuk, ka va duh lo tak!

"Tu lamah nge i țan tâk? I unaupa lamah a ni tiraw?" ka tih leh chuan a rawn nui hak a," I lamah le, ka ţhiannu i ni alawm; mahse, in inkâr hi ngaihtuah nawn leh tùrin ka duh mai che a ni," a rawn ti ve leh a.

Engtik laiin nge Damon-a chuan a thinlung a lo hnehsak ni? Chu pawh ni se, kan inkawp reng laiin a bialnu hlui pan leh theiha a awm hrim hrim kha ka duh lo, kei chuan bialpa hlui pawh ka nei lo va, a thîk êm êm Michael-a lah ka țhian mai a ni a, a lakah ngaihzâwng rilru ka pu hek lo, a tân khân ka rinawm ngar ngar a ni, ka star țantirh ațang tawhin maw le!

Michael-a thil sawi chu ngaihtuah chhunzawm ka duh loh avàng chuan games ka khèl a, ngaihtuah loh erawh a har khawp mai. Vànneihthlâk takin Rinpuii a rawn chhuk ta hlauh mai, a rawn ri lût nghâl bawrh bawrh a, a țhut fel hnuah vawiin lama a thil tawnte chu min hrilh nghâl sârh sârh a.

"Vawiin chu i țhianpa Michael-a ang deuh kha ka hmu a, a ni emaw ka ti hial a ni; mahse, vawiina mi chu a lian lo deuh a, an hmel chu a inang tawp maw le," a ti barh barh a, kei chuan," Chu, i star leh deuh ringawt lo maw?" nui chung hian ka lo ti vat a, ani pawh chuan," Star țêp; mahse, i țhianpa kha chu a țha ka tiin ka duh daih zâwk tho," zak sen deuh ap ap chung hian a ti a, a nui tãwi deuh tak bawk a.

"Michael-a chu a lãwm leh ngawt ang chu, ka hrilh dâwn aw," fiamthua ka tih chuan," Aih, hrilh chi loh, a zahthlâk! Ka ngaihtuah zâwng ringawt pawhin ka zak sa," tiin a hmai chu a kut pahnih chuan a hup a, ka nuih a tiza reuh khawp mai, a naupanthlâk ka ti bawk sia, Damon-a ka star țantirh lai vêl ka ngaihtuah chhuak uar uar a, tuna Rinpuii ang chiah hi ni maiin ka inhria.

A hnu deuhah chuan," U Kimkim, in hla zir zàna rawn kalpa kha tu nge? I țhianpa ni thovin a insawi a, U Michael-a a ni lo tih ka hria a, ka lo bia a, a pà tawp ka ti," nui deuh pãt pãt chung hian a rawn ti chhuak leh a, kei chuan," Aw, ka ţhianpa tho a nih kha, Aizawl lama mi tho a nia, min rawn tlawh ve a nih kha," ka lo ti ve mai a, ka bialpa hlui a nih thu erawh ka hrilh tel lo.

"Ka khawngaih deuh a, kan ina lêng rih tùrin ka lo sâwm alawm. Ţhianpa i nei chhe lo thei e ka ti, kha pa kha chu a pà ka ti a maw; mahse, U Michael-a chu a țha zâwk ka ti tho tho," a tih leh chuan ka nui sak a, ka nuih vak chuan a zah ka hlau deuh si a ni, a thil sawi chu Damon-a'n hria se a run àwm mang e tiin ka lo ngaihtuah pek a! 

Naktûk class kal ni a nih loh avàngin a lêng ve ta reng a, kan titi chho zêl a, thingpui lumsakin a duh lo chung chung chu kurtai nèn ka chhawpsak a, a tàwpah chuan a in ve ta tho, ka inpui ve miau si a.

"Naktûk zànah tlangvâl rawn lèn tum ka hria a nia aw, ka rawn lêng ve thei awm si lo va ka tia, chuvàngin zanin chu ka rawn lêng a," a tih chuan,"Uai, tlangvãl inlëng ka nei dâwn maw?!!" ka lo ti vat a, ka nui pah hak hak a, ani chuan," Aw, a hma pawhin rawn lèn chu an tum an tum tawh a; mahse, an ngam leh lo țhìn a; mahse, naktûk zàn chu rawn lèn an tum nghet tlat tawh," hre chiang inti fê hian a ti leh nghat nghat a.

"A nih chu; mahse, rawn lêng ve tho la, chuti lo chu ka zak dâwn asin," ka ti leh a, ani lah chuan," Zak duh suh, an la naupang lutuk! Ka țhiannu Neneihi  kha i hria tiraw, ka rawn hawpui ziah kha? Kha mi u chiah Dylan-a leh a țhianpate an nia, U Dylan-a tak chuan a nia ngaizâwng che; mahse, ka sawi a ni tih lo hrilh miah suh aw," a ti leh barh barh a.

A naupanchhiatthlâk thei a nia, ka nuih tiza viau mah se a thutak ve si a, lo nuih uar uar chu ka duh bîk lo. A han titi thui zêl hian a la naupanzia a hriat theih telh telh a, hei tak hi ka làwm țhìn.

Dâwt chu a sawi bîk hauh lo, 'U Dylan-a' a tihte chu an rawn lêng tak tak roh a, an rawn inla puitling dùn ve khawp mai; mahse, an hmel ațangin an la naupanzia chu a hriat theih vek si a, chutiang inlêng ka han nei chu ka nuih a za deuh tlat mai a nih chu; mahse, țha takin ka lo be tho, ka inlêngte an ni miau si a.

Thingpui pawh ka siamsak ve ngei, ka pe zo ka țhu dâwn chiah tihah chuan kawngka a rawn ri zat a, ka han chhàn chuan Damon-a a rawn pên lût ta khauh khauh a. A bike ri àwm ka va hre lo, ti ila car-in a rawn kal pawh a ni thei tho.

"Lo lêng rawh, kha, lo țhu rawh."

A țhu ve mai bawk a, chutih pah chuan ka inlêngte pahnih chu a han thlêk dùn a, a hmêlah eng mah tilang lo mah se a thîk leh ringawtin ka lo ring ve ngawt, a thîkthu a chhe ve si a, ka bula mipa awm tawh phawt chu a thîk vek ni hialin ka hre țhin.

Țawng ve lo chuan a ngawi ngul mai a, kei pawhin biak ka tum hran lo, Dylan-ate pahnih chu ka biak chhunzawm leh a, anni pawh an rawn luh tirh ai chuan an țawng duh ve ta deuh. Dylan-a ai chuan a țhianpa chu a țawng duh deuh, ka zawhna pawh Dylan-a'n min chhâng lovin amah hlîrin min chhâng vek.

Damon-a chu thingpui sen ka thlitsak ve a, han biak loh bîk reng chu tiin vawiin lama a thil tih ka han zâwt ve luam a, ani pawh chuan țha takin min lo chhâng ve mai bawk a. Ka biak loh hnuah erawh chuan rawn țawng ve pawh tum lo chuan a ngawi ta reng a, nuam lo ka tih phah hran chuang lo, Dylan-ate țhian dùn chu ka titipui leh a.

Rei an lêng lo hlauh, nuam an ti vak lo pawh a ni maithei a ni, tlangvâl țhan kin tawh, țawng duh lo tak, an bul lawka țhu ngur mai nèna lèn tlàn chu a nuam fahran lo ang, anni aiin a upain a nèlawm loh viau bawk si a.

"Ka nuih pawh an tiza pha lo, khatiang naupang inlêng neih te chu a, i zirlaite an ni nghe nghe lo maw?" a ti hluk a,mi sawi el a ni tih hriain ka chhâng hran lo. A thil sawi ho mai maiah ka buai lo ang, thil dang buaina tùr ka ngah ëm mai.

"Aizawlah i haw phei em?" tiin zawhna ka zâwt ta zâwk a, ngawih reng ai chuan a ninawm lo deuh ang chu,  ani lungawi lo phun hluk hluk ngaithlâk ka peih lo. Ka rin loh deuha," Vawiin chawhnu khân ka rawn phei leh chiah, i pate pawh ka rawn tlawh kha," a rawn tih chuan âwih lo zet hian ka en hâ a, ka pate chu eng vàngin nge a va tlawh? A va tlawh tak tak a nih chuan tlaia kan inbiak laite khân ka pa khân a va sawi chhuak si lo ve!

"Eng tiin nge i va tlawh a?" ka ti leh kher a, ani lah chuan," Ka tlawh ve bawk ang chu, nakinah phei chuan ka la tlawh kûr dup dâwn asin," a lo ti leh mai a, ka en reng a, min chhàn dàn avàng chuan ka ner deuh sak ringawt,  inla polite zeta va tlawh chu a țûl kher lo ve chiang a ni, engtin tak ka pate chuan lo ngai ang maw? Zak lo a tih lutuk avàng leh min vènthàwn avàngin ka pa chuan min hrilh duh lo a ni ngei ang. Anih loh tal pawhin a thin a rim a ni ngei ang.

A lêng rei lutuk lo ve. A haw dâwnah erawh chuan," Khatiang naupang chumchiap kha chu inlêngah nei tawh lo hrãm la ka ti, ka paw nawlh duh mai ang," a ti a, a nui miah lo lehnghâl a, ka ngei roh tak tak! Ka duh vànga lo lêng pawh an ni tawp si lo, nula inah an lêng ve a ni mai a, an thu thu alawm.

Hriatite inah pawh vawi hnih lai chu ka lêng ve leh tawh. Ka vawi hnih lènnaah chuan an pa pawh a lo awm ve a, a rui pawhin ka hre lo, a lo inthlahrungin min lo zah der khawp mai a, chutih laiin Pi Liani chuan țha takin min lo be sawk sawk a, Hriati erawh a naute pahnih nèn, an huanah thingphurin an lo kal daih a, ka hmu hman lo. Fate hna thawka chhuak si a pa ber ina han awm tlat chu ka hre thiam lo dâwn dàwn a; mahse, a pum a lo nuam lo ve niin, a chhan sawi lo mah se, a zu in effect a nih ka ring nghâl mai a. 

Ka haw hnu rei vak loah chuan Hriati chu chawhmeh min rawn pein ka inah chuan a rawn kal vang vang a, a inbual zo hlim hlawt a niang, a sam pawh a la huh phang a. Làwmthu hrilh pahin chawhmeh chu an neih leh hunah lei atâna ka duh reng thu chu hrilhin, a naute nèn a an pocket money tùr chu a duh lo chung ka pe lui bawk a. A kal hnu chuan Anțam min rawn pêk chu chhum tùrin ka buatsaih nghâl a, chutih pah chuan Hriatite chhûngkaw dinhmun chu ka ngaihtuah a, anni chhûngkua țanpui theia ka awm chu ka rilru a hlim thar leh veng veng a.

Ka uin min rawn be ve teh tlat a! Kan inbiak khàtzia chu ka ngaihtuah nghâl rauh rauh mai, pasal a neih hnua a rehziate chu ngaihtuah kaiin a dam țhain a hrisêl chu a ni phawt ang a, naute a nei țêp tawh bawk nèn, a țha lamah ngai ang, keimah hrim hrim pawhin ka be khât a ni. Ani'n min rawn biak loh pawhin nula hman zâwk chuan va be pawh tùr hi ka ni zãwk a, ka tidik tâwk lo a ni ka ti leh rih bawk a, a hnu deuhah phei chuan mahni inthiam lohnain ka khat ta zâwk a.

Favàng boruak nuam zet chu fùr lai boruak nèn chuan a inang lo thlâwt a ni, han hawi vêl ila tlâng hmuh theih chin chu hring dapin a thiang kûk mai a, chhûm hmuh tùr a awm lo, engkim mai chu a lang fiah kûk maiin a hriat a, nuam ka ti. Nakinah zànah thlà a han bial êng leh kung mai ang a, a nuam lehpek ngawt ang chu, October thla zàn êng phei chu a êng zual bîk țhìn si a.

*Zanriah chaw ka rawn ei chho dâwn, min lo bàwl kêp rawh aw*   Hei chu Michael-a a ni, engtik laiin nge Lungleiah a lo phei a? Min hrilh hauh si lo, eng a rawn ti dâwn chu ni maw? Office thilah em ni? Hetiangte chu lo sawi lãwk tùr a nia, chawhmeh hawn phei tùr pawh ka lo lei kêp thei tur hi a nia...

A rawn ei chho ta ngei a; mahse, a rawn thlen chhoh tlai deuh avàngin kan tlai angreng khawp mai, chaw ei pah chuan kan titi a, a lo phei chhan ka zawh chuan nui chunga nupui neih tawh mai a duh thu chuan min chhâng a, kei chuan," Tu nge i neih dâwn?" ka lo ti vat a, ka en kal bawk a, ani erawh chu a nui leh mai a.

"Tihder nuam viau teh suh, i âwih tak tak maw? Khawia mi nge nei se min tih a?" a tih chuan," An tam ang chu," ka ti phawt a, chutah," I nei lo tak tak a nih chuan zawng nghãl ang che, in chung tleirãwli  khi chu a la nau viau mai si a, star viau che mah se," tiin ka nui a, ani pawh chuan," A ni maw? Kan ti mai dâwn em niang?" a lo ti ve a, kan han nui leh rih a.

Zanriah ei kham thlèng ka sil lai chuan Mitei a rawn lût a, polythene hian eng emaw hi a rawn khai lût bawk a, ka hmuh veleh chuan kathlèng sil lai chu dahin," Teh tlat che chuan, lo lêng rawh, eng nge i khai a?" ka lo ti vat a, ka kut chu ka hru hul nghâl bawk a. Ani chuan," Pa Țanate inah ka rawn kal lawk, rawn pèn a remchâng êm a, ka rawn lût zawk a nih hi," a ti a, bathroom ațanga Michael-a lo chhuak chuan," I bathroom hi a zîm mah mah i ti em?" a rawn ti chhuak a.

"Ti mai mai lo, ka tân chuan a tâwk chiah," tiin Mitei leh Michael-a chu ka inhmel hriattîr nghâl a, ka ţhiante ve ve an ni a, ka tân chuan an hlu ve ve si a. Thingpui thlitsak ka tum chuan Mitei chuan," Aih, ka in lo ang, ka țhu rei hman lo, damdawi hi ka pain a ei thuai a ngai si a," a lo ti a.

Michael-a nèn kan awm hnu chuan Damon-a nèn kan inkâr chuan hma a sâwn em tih min zâwt a, a ngai reng tih ka hrilh chuan a thaw hak a," I luhlul chhunzawm reng tih hriat reng, i luhlul reuh dàn hi chu aw!" a ti vang vang a.

"Inkawp lai renga hmeichhe dang mutpui thei chu rin leh harsa deuh mai tùr asin, nang ni la i ring thei bîk dâwn em ni?" ka ti ve thung a, ani lah chuan," Sex a hmanpui ka ring lo, a theih loh," a lo ti leh tlat a.

"Hmanpui lo se an mu dùn tawp nâng, bâkah, bialnu hlui pan theiha la awm rêng rêng, a la duh reng tihna a ni mai, ka tân  inthiar fihlìmsan hi a țha, buaina a awm lo ang a, a duh duh a mutpui thei bawk ang a," ka ti nghat nghat a, ani erawh chu thaw hawk chungin a maimichhïng vang vang a, rawn meng lehin," A duh duh a mutpui lohin a duh loh loh em ni a mutpui ang?" a rawn ti a, rum zet hian ka lo melh a, min hmuh chuan a nui leh hawk a.

"Ani hi chu a luck êm a, bâkah, hmeichhe lamah a lo lêrh ve țhin deuh bawk nèn, a tân insùm a har turzia hi i ngaihtuah chhin tawh em? Mipa i ni lo tak, i hre leh si lo ang. Nang a neih hnu che hian a insûm thei zâwk hi ka lo ti a, a piangthar țha ka lo ti khawp asin," a ti duah a, a ngawi leh vang vang a, chutah," Hmeichhia hian an pâk thei êm a, amah takin a duh hmasak a mutpui hi chu an tam kher lo ang, a hmeichhia zãwkte'n an pâka an zar huam huam chuan a tân chuan lo hnar kha a nuam lo ve dâwn bawk a," a ti leh a.

A haw dâwnah chuan chawhmeh ka lei țhen țhen chu ka hawntîr ve a, a țang ve nasa mai a; mahse, a rucksack-ah chuan ka hnawh lui mawlh mawlh thung, a lo phei khât si a, hawntîr ngei ka tum ruh ve tlat a ni. A tlàn chhuah dâwn thleng chuan," A ngai lo asin le aw," a ti nang nang a, min rawn enin," Sawi fel thuai ang che u, nang pawhin luhlul chhuah lo la," a ti leh zauh a, a tlàn chhuak ta nghâl a. Ka thlîr zui reng a, a tlàn liam thleng chu ka thlîr a. Ina ka luh dâwn chuan zàwi têa min ko ri chu ka han hria a, Rinpuii a lo ni a.

"U Michael-a a lo kal tih kha ka hre reng a, ka rawn lêng châk lutuk a; mahse, ka zak a, chhuanlam siam tùr ka hre bawk si lo va," an veranda ațang chuan a rawn ti sar sar a.

"A nih chu, chhuanlam siam kher ngai lovin rawn lèn mai tùr hi a nia, i ve meng rei ve a?" 

A thaw hak a," U Michael-a haw thleng kha men ka duh si alawm, a tlàn liam thleng khân hmuh ka duh a," a ti leh a. A star ve si a, ka nuih a tiza reuh tak tak a ni. A chhûngte hriat hlau takin a rawn chhuak chu a ni ve àwm si a, țawng pawh a țawng ring ngam lo a nia.

*I HARSATNA, I HLAUHNA LEH MI DANGIN AN SAWI SEP CHE AVÀNG KHÂN I TUM KHA ȚHULH HAUH SUH, INDANTÎR HEK SUH, NANGMAH KHA I PAWIMAWH BER TIH HRE KAR ANG CHE*