☆HLWILY☆ - 31 By Dingdi Pachuau

 ☆HLWILY☆ - 31 By Dingdi Pachuau

Mut hmunah chuan ka ngaihtuah kual a, Rinpuii ang rual ka nih lai, lungkham vak ka neih loh lai leh ngaihzâwng ka neih hma nun chu ngaihtuah kai zêlin khatih hun lai kha a lo nuam ber maiin ka hre ta, rilruin enghelh leh vei rùn a la nei lo va, engkim mai kha kan hlimpui thei vek mai a, chubâkah, rilru kha a la thianghlim ka ti, rilru nat lah kha kan la hre thiam phâk ve tak tak bawk si lo va, tunah zawng rilruin àwn lam a nei hû tawh mai a, a țhenin kan rilru tinain kan han ngei a, kan han be țha duh lo thùl a ni a, hei hian hun eng chena rei nge a duh dâwn tih lah kan hre bawk si lo.

Michael-a'n min rawn text a, a thlen tawh thu leh min mangțhana thu a lo ni a, ka han chhâng lêt ve a, news group lamah lût lehin like ka han pe tuar tuar a, a tlangpui chu ka chhiar zawr zawr bawk. Chutih lai tak chuan Damon-a'n min rawn call tlat pek a nih chu! A tlài tawh nèn, engtizia nge ni le? Thil pawimawh tak a ni thut thei asin tiin, ka han chhâng hrãm a.

"Phone-a i aw hriat a khât ta viau si a, i online tih ka hmuh khân  i la muhìl lo tih hriain ka rawn be buai châk thut che a ni, zaninah naupang chumchiap kha an rawn lêng leh em?" a rawn ti nghâl a, khap fak fak pah chuan," Ka muhìl țëp tawh asin," ka lo ti thung a, ka aw chu ka'n tidang lui pah a, mut chhuak deuh aw ang thei tùr berin ka ti ve a ni.

"A, mu bîk lo ang, meng ve rih rawh, naupang chumchiap pahnih kha, an rawn lêng em?" a rawn tih leh chuan," Lêng mai mai lo, chutiang mai mai min zâwt tùr chuan min rawn bia tihna em ni?" lungawi lo ang tak thei tùr chuan ka ti deuh nang nang a.

"I aw ka hriat loh chuan zàn a rei dâwn lutuk a, bâkah, ka ngai pah bawk che a," a rawn tih leh chuan," I rui a ni maw?" ka lo ti vat thung a, a rawn nui hawk a," Rui lo tlat, ka pi menpui a ngai dâwn a, ka in duh ta lo a nih kha," a rawn ti leh mai a.

"I pi chu a la țha chhuak thei nange?" Tunah chuan ka biak dàn ka serious ve ta, a pi dam țhat loh thu kha ka hre ve tak a, a chanchin han zawh ve nachâng ka lo hre pek lo  a ni, mãwl ve thei bawk si a.

"A upa ve tawh êm a ni, kum upa deuh tawh an han damloh hi chuan țhat chhuah tak tak hi a har ve tawh a," a tih chuan," A pawi hle mai, lo dam țha leh hrãm teh se," ka ti sap a.

"Eng nge a an dâwn ni?" a ti phawt a, sawi zawm lehin," A dam țhat laia nupui neia tùr khân min tur țhìn a, ka fa hmuh hman a duh thu a sawi țhìn bawk a," a ti leh a, rang zet hian," I nei tawh reng alawm," ka lo ti vat a.

A chek hluk a,"A ni lo," ti ringawtin min chhâng a, kei erawh chuan," Engah nge maw phat i tum chiam le? In mu dùn tih kha theihnghilh mah ta che," ka ti leh a, chhâng fuh ka inti thei khawp mai.

"Thil nihphung hi i hre ve tak si lo va," ti ringawtin min chhâng sup a, chutah, thâwk deuh hawk pah hian," Muhìl tawh rawh, ngaih reng i ni tih erawh kha theihnghilh lo la, zanin pawh nangmah chauh ngaihtuahin a nia ka tlaivàr dâwn ni," a rawn ti leh charh charh a.

A thil sawi chu ka ngaihtuah zui avàngin ka muthilh har phah, rilru a tinuam deuh veng veng nain chu a țawngkam thlum eng emaw vàng maia duap deuh erawh tum lovin ka infuih sauh sauh a, ka tlaivâr ve lo chauh a ni, zînglam dâr 3 pelh vêlah ka muhìl thei ve chauh.

Tunah chuan Hriati pawhin min zah lutuk tawh bîk lo va, ka inah pawh chawhmeh ilo min pein a rawn kal ve ta zauh zauh a, thawmhnaw ka hâk theih tawh loh, la țha si pawh ka pe nual tawh. Amah hi chuan a ha tâwk rih lo ang tih chu ka hria, a nuin a lo hâk duh tâkin ka ti a, bâkah, Lunglei kal remchàn laiin secondhand thuamhnaw ka ensak ve țhìn bawk a, a naute pahnih pawh vawi hnih chu ka leisak tawh, an duh zâwng tak a lo ni thei bawk a, an hlim hmél ka hmuh hian nuam ka ti veng veng țhin. 

October thla kan thleng chho a, zànah thla a êng thei si a, mak deuh maiin ngaih bîk êm êm nei lo chuan ka lung a lêng veng veng mai. Rinpuiite unau nèn an in chung zâwlah thla êng kan làwm a, Phone-a hla play-in kan zàwm ve rât rât a, Rinpuii ve thung chuan uar zet zet hian a zàwm thung a.

Rinchhani'n a duh ber hla a thlang a, 'D hlui' chu play-in lo zaipui ve pawh a phal lo ngei a, Rinpuii'n a lo ei lo nasa mai; mahse, zaipui lo chuan a lo chek tlak tlak ringawt a. Hla chu lungrun takin Rinchhani nèn chuan kan ngaithla a, rilru taka ka ngaihthlâk avàng chuan duh lo viau mah ila Damon-a ka hre chhuak vawng vawng mai. A pi a hniam viau tawh avàngin a rawn phei  thei tawh rih si lo va, phone-ah erawh min rawn be zauh zauh thung, chu chuan nunhlui min hriat chhuahtîrin ka lung a tilêng zual ni berin ka hria. School chawlh neiha a pi va kan ve pawh chu ka duh khawp mai, țhianpa Michael-a pi a ni ve tho a, ani pawh hian kan chawlh lai a nih loh avàngin sawi chhuak duh lovin min phüt ngam lo mai mai niin ka hria.

"U Kimkimi chu, tu emaw i ngaihtuah chhuak ve a ni maw? Au Mami pawh hian, tu emaw tarmit vuah țhin kha a ngaihtuah chhuak tih ka hria a,"Rinpuii'n a rawn tih chuan Rinchhani chuan," Lo bengchheng lo teh!" a lo ti vat a, Rinpuii chu titau tih hriat tak hian a hawisawn nghâl nghauh a, chu chu ka hmuh chuan ka nui sak a, a rilru la naupanzia chu ka ngaihtuah tel bawk a,a dam chho zêl ang a, upa chho zêlin a duh tak a tawn hunah chuan tuna a u awm dàn leh dinhmun hi a la hre thiam ve ang a, a dem bîk hauh lo ang. Rinchhani hian bialpa duh deuh a nei a; mahse, a bialpa nu chuan mo atân nula dang, mi hausa tak fanu duh zâwkin neih atân an biaksak hmiah mai a, nu nasa ve tak a nih avàngin a bialpa chuan buaina a punluna hmingchhiat vak ai chuan tiin duh vak lo chung chuan a nei ta hmiah mai ani, chu chu kum hnih thum kaltaa thil thleng a ni àwm e, chu a bialpa hlui, mi pa ni ta chuan Lungleiah hna a neih avàngin hmuh zauh châng a awm lo thei si lo va, he hla hi a duh ta viau ni àwm a ni, rilru na takin min hrilh ve sap sap a, tunah chuan tuar thiam viau tawh mah se a la theihnghilh theih loh thu min hrilh lai chuan ka lo hre thiam nasa, ka tawn ang deuh tawng hi an lo awm ve nawk a nih dâwn hi ka tih phah hial a ni.

Mu tùra ka chhuk thlâk chuan Damon-a'n min rawn bia a, a pi boral thu a rawn sawi chuan ka phu ve zawk mai! Inthiam lo ru tak leh pawiti zet hian," A pawi hle mai," ka ti sap a, ani erawh chuan," A upa ve tawh a, a tuar rei ve tawh bawk nèn, a tân a nuam tawh zâwk ang," a rawn ti ve a, a aw chhuak chu a pângngai chiah lo tih ka hre ve thei bawk si a, a rûk tak chuan ka khawngaihin ka tawrhpui tak zet a ni.

Michael-a pawhin min rawn hrilh ve tho. Ani phei chu a la naupang ve deuh a, a pi, a chènpui ni lo mah se Damon-a ai chuan a ngainat deuh zâwk ka'n ring ngawt a, a thinlung pawh a na zâwk ngeiin ka ring bawk.

"Ka rawn phei ve ang aw?" ka tih chuan," A, a ngai lo ang, school kal i ngaih kha," a rawn ti ve thung a, ni tho mai; mahse, naktûk khi Zirtàwpni a ni a, chawhma chauh class kal a ngai a, chawlh hreh viau mah ila kan Head hnêna ka dìl chuan min lo hre thiam ve maiin ka ring, Pathian zãrah ka dam thei a, buaina kan nei ngai lo bawk nèn, ka thawh hnuah ni khat chawlh pawh ka la dîl lo bawk a, min phalsak êm êm ang.

Huphurh ru viau mah ila scooty chuan ka phei ta vang vang a, 'Damon-a'n min lo hmuh chuan mak a ti ngawt ang chu' tiin ka ngaihtuah a, chutiang bawkin Michael-a leh ka nu leh pate pawhin, an beisei loh leh rin loh deuhin min hmu dâwn tihna a ni si a, kan in ka hmuh lohna pawh a rei ve tawh a, hmuh ka châk bawk, ka ute ka tlawh ve zawk bawk ang a.

Ka chhuak hma bawk a, kawng lakah ka chàwl bawk si lo nèn, ka thleng hma khawp mai. Inah ka lût lawk a, min lo hmuh chuan mak an lo ti khawp mai; mahse, ka hmanhmawh tawh êm avàng chuan kan titi rei hman lo va, ka pa nèn Damon-a pite in lamah kan inkhalh chhuak ta nghâl a, ka nu erawh chu ka haw phei thut avàngin ei tùr siamin inah a lo awm thung dâwn a ni.

Mi an lo tam khawp mai a, țhutna awm remchâng kan hmuhna laiah chuan kan țhu ve tawp mai. Damon-a  hnênah emaw Michael-a hnénah emaw a pi vuinaah ka awm ve a ni tih pawh hrilh kher ka tum chuang lo, duh leh nakînah, naktûk lamah emaw ka hrilh ve mai ang chu.

Kuang thla an lâkpui laite chuan kan la awm ve reng a, Damon-a hmel bawrchhawr lek lek leh a mit hnuai ve vea val dum kual kalh pawh chu ka hmuh hmaih lo, min rawn hmu ve lêm lo mah se khawngaih ru tak chuan ka en reng a, he pa hi ka duh êm êm leh ka hmangaih țhin kha a ni, tunah pawh hian ka la hmangaih reng a ni tih chiang takin ka hria, va kuah hnem mawlh mawlh ka va châk tak êm! Mahse, tihchi a ni hauh si lo. Michael-a pawh ka hmu, ka rin aiin a pi boral chu a tuar hmel ka ti, mipa a ni a, a tân țah ve chu a mawi kher lo maithei a; mahse, a hmel ngui zet leh a mitmeng dul zet chuan a tuar thawkhat tih a tilang reng mai, a pite in ding luah chu ka han thlîr chho a, hlim taka a pi birthday kan lawm zànte kha ka hre chhuak leh ta uar uar a. 

Ina kan haw veleh chuan ka inbual a, ka mawng chu a kham țhûm mai, chutiangin ka mal pawh a ni tho. Tui sa deuh hleka han inchiah vang vang chu a nuam kher asin, Damon-a hmel mitthla pah chuan ka maimichhîng vang vang a, vawiina ka hmuh dàn kha chu a hlimawm thlâwt loh; mahse, ka la duh rengzia ka hriat thar leh phah a nih kha.

Ka inbual zawha ka nu puih ka tum chuan a lo remti hauh lo mai. "Lo awm mai mai rawh, kan hmuh phâk lohah chêtpui phâk lohah awmin nangmah chauhin i buai a,  ei tùr tui tak pawhin kan chãwm phâk si lo che a, i rawn haw phei chhunah chuan i che tùr a ni lo," a ti tlat a, ka chêt ve a khap bur a ni mai.

Ei tùr kan ei zawha room-a ka awm lai chuan Damon-a'n min rawn phone a, a aw ațang chuan a chauh hmel tak zetin ka hria. Vawiina ka hmuh kha chuan a chauh hmel tho nain mi harh ve ngang a ni a, a intiharh lui pawh a ni tho maithei a.

"Ka chau, ka chau tak zet a ni, ka bulah awm la, ka taksa nghèng riala kuah chea muthilh bawrh bawrh ka châk ber a ni," dul ruiha a rawn tih sup sup chuan dâwt a sawi ka ring hauh lo, a chau ang, a chau tawngkhawng tawh a ni ngei ang, a pi kha awmpuiin zànah a menpui nasa si a.

"Inah i haw daih tihna em ni?" ka tih chuan," Aw, zah pawh dâwn lovin ka hawsan vek a, muthilh zawk duhin; mahse, hei ka muhìl thei dèr lo chu a nih hi," a rawn ti dul leh ruih a.

Thil ngaihtuahna chhuah thar nei thutin ka tho vat a, ka nute hnênah chuan ka chhuah lawk tùr thu sawiin ka tlãn chhuak ta nghâl a, a tâna ka tih theih ve tâwk tihsak ka duh a ni, eng teh ual chu a ni lo maithei; mahse, tihsak ngei ka duh.

Doorbell chu vawi hnih lai ka hmet a, a lo la muthilh loh hrãm ka beisei. A chhûngte pawh an lo la haw lo a ni ang, a reh țhap si a. Min rawn chhâng dâwn ta lo nia ka ngaih hnuah chuan kawngka chu a rawn inhawng a, kan indinchilh ta ràn mai.

A sam sei deuh hlek chu a kawi nuai a, a hmuihmul leh khabe hmul pawh a mehna a rei ve ta a niang, a lang bawrchhawr viau nain fai rim a nam tho, a inbualna a la rei fahran lo a niang, mit khap lo lêkin; mahse,vài deuh ruai mitmeng hian ani pawh chuan min rawn en chhuk ve rùn a.

"I ni tak tak em?!!  Ka mit vài a ni lehpek lo maw?!!"

A mit vàiin min lo hmu țhin a ni ngei ang chu, khawngaih rilru tak chuan ka nuih deuh sak a," Zîng hmâ takah ka rawn phei a, i pi pawh ka rawn thlah liam ve hman hrâm a ni," ka ti sap a, a kut rawn phar chhuakin ka lu-ah a rawn khawih a, chutah, ka biangah.  "I ni tak tak!! Ka mit vài a ni lo," ti leh supin a mit chu muangchâng hian a khap ta a, a mut a chhuak ngawih ngawih a ni tih a hriat kher mai.

Ka khawngaih êm avàngin a room-a min hruaia khuma min kuah pawh chuan ka hnial lo, ka kuah lêt ve a, khuma min tlûkpui pah chuan," Ka mit vài i ni lo hi ka lãwm a ni, muthilh pawh ka duh ta lo," a ti sup sup a, a hnuah," Ka muthilh chuan ka harh hunah i lo awm lo palh ang," a ti leh a, a chângin," Ka muthilh loh chuan i kal phal lovin ka kuah reng thei dãwn che a," a ti leh bawk a, a thil sawi pawh chu amah pawhin a hre chiangin ka ring lo.

A sama chùlsak pah chuan," Muhìl rawh, i chauh êm kha, mu pahin min kuah reng thei ang," ka ti sap sap a, muhìl se a chau tawngkhawng pawh hi a reh thei ngeiin ka ring. Min kuahna bân chu a nghet lo telh telh a," Ka muhìl duh lo, kaltîr che ka phal tawh lo a ni," a tih leh sup chuan ka han en a, a maimichhîng tawh a, a țawng tàwp lam pawh chu a hriat chian theih tawh mang loh, a muhil chhunzawm nghâl a ni ang, a thâwk pawh chu a muang deuh ta raih raih a.

Kha maw, a chau tih a mah pawhin a sawi kha, a chau tak zet a nih hi, a sam chu ka chùlsak heuh heuh reng a, a muhìl hmel pawh chu hmuhnawm ti tak hian ka thlîr bawk a. A mitko hmul dum buk zet chu a inhmeh ngawih ngawih, mahni thu duh leh luhlul hmel tak a nih duh hmel nain a inhmeh viau, a tipà ngawih ngawih ka ti ve tlat, zàwi tê hian ka kutzungchal chuan ka rìnsak riak riak a, chutah, a hmaiah, a hnârah, a khabeah, a hre hauh lo, a thaw sâk sâk a, a mu tui tak zet a ni ngei mai.

Chhuah lawk tum kha ka ni a; mahse, ka hawsan thuai thei tlat lo, a muhil tawh a, min kuahna bân pawh chu ka phelh thei ngei mai; mahse, a lo harh huna ka awm loh a hlauhzia kha, muthilh a hreh chhan pawh a nih kha, ka khawngaih a ni; mahse, a lo harh huna haw ka tum chuan,  engtikah nge a lo harh ang? A chhûngte pawh an rawn haw thuai tawh ngei ang a, a room ațanga ka chhuak an hmuh hlauh chuan...

Mahse, kei ngei pawh chu ka mut a rawn chhuak selh selh mai, a bula mut lah chu a nuam nasa mai si a, a muhìl hmel chuan ka mut a tichhuak ve a nih ka ring, bâkah, kawng thui tak zawhin scooty ka khalh bawk sia, chu chuan min tichau ve pawh a ni maithei a ni.

Ka mumanga phone ri bengchheng deuh avàng chuan ka han meng chhuak hlawl mai a, ka hmai bul chêna min lo en rengtu ka hmuh chuan ka han khap sak sak a, Damon-a lo niin, ngun zet hian min lo en reng a. 

"Morning...Beautiful."

Ka khap leh sak sak a, tunah hian zîng a ni tawh maw?!! E khai, a bulah ka lo riak ve ngawt tihna em ni! "Ka haw vat a ngai," tiin ka tho thut a; mahse, ka mu thla leh rang lutuk ringawt!

"Zîng a ni lo, dâr zât khi en la?" tiin min kuah bet a, banga sana chu ka melh zoh a, dâr 5 a lo pèl hlek tawh a, chuti a nih chuan, dârkâr hnih vél chu kan muhìl tihna a nih chu.

"I harhna a rei tawh em?" ka tih chuan," Ka harh laia i lo la awm reng chu ka lãwm e, ka bulah ka kuah reng theih lai chein engtin nge ka muthilh theih zâwk ni?" a lo ti thung a, chutah," Alarm ka lo off theihnghilh a, i harh phah ta a nih kha. Ka han harha ka bula ka hmu che kha ka mumang a ni emaw ka la ti fan a; mahse, a tak i lo ni reng a," a ti leh a, ka hmai hliah deuhtu ka sam chu ka bengah zepin ka hmai chu a chûl pah hoh hoh a.

"Ka lo muhìl ve ringawt a," inthiam lo rilru deuh taka ka tih sap chuan," I rawn inkhalh pheina lamah i chau ve a nih kha, i rawn phei vang vang avangin ka lãwm e, ka pi pawh kha a lãwm ve ngawt ang chu," a ti sup a, sawi zawm lehin," Minute 10 vêl mu leh rih ila kan tho chauh dâwn nia, thawh thut chu lu a hai duh," a ti leh a, chutah, nghet zeta min kuah țha lehin, a mal sei thlurh chuan min han kherh bet zui nghâl bawk a. 

Tuna kan awm dàn hian chatuan daih thei se ka ti tak zet, tunah hi chuan kan inkâra inhriat thiam lohna leh inhuatna, thinrimna leh buaina kha a kiang duak maiin a lang si a, nuam ka ti a ni, hetiang nun hi ka thlahlel tak meuh si a.

Ina ka haw chuan ka pate chuan ka kalna chu min lo zãwt vat a, țhian ka tlawh zawk thu leh ka duh aia rei ka awm tâk thuin ka chhâng ve mai a, dâwt ka sawi avàng erawh chuan an mitah pawh ka en ngam lo, thil sual ti lêm lo mah ila dâwt ka sawi tlat si a; mahse, Damon-a bulah ka kal tih leh a khum ngeiah kan muhìl dùn a ni tih ka hrilh ngam bîk teuh lo.

Zànah chuan Damon-a min sàwm lâwk tawh ang ngeiin a pite ina lêng tùr chuan ka inkhalh chhuak a, ani erawh chu a lo awm sa daih tawh a, ka thlen phei chuan kawtah lo dingin min lo thlïr reng tawh a lo ni a, tunah chuan a hmel hmuh a nuamin mut chhuak hmel leh chau hmel pawh a pu tawh lo va, min hmuha a han vei khîk deuh suk phei chuan ka thinlung hi a tui ral zawih zawih ni maiin ka hria.

Michael-a pawh ka hmu ta, ani pawhin min rawn hmu ve nghâl vat a, min nuih sakin ka bula țhu Damon-a chu a melh leh ralh a, ka nui ve ringawt. Ani pawh a mu sek hman a niang, tlêmin hmuh a nuam ve deuh tawh bawk. Inbiak theih a ni si lo va, haw dâwnah erawh kan inbe ta hrãm a, Damon-a pawh kan bulah a awm ve reng nain eng mah a sawi lo, ngawi rengin kan inbiakna chu a lo ngaithla ve tawp ni maiin ka hria.

"I lo phei ka ring pha miah lo va," a tih chuan," Nia, ka chhûngte pawh ka hrilh chuang lo, mak an lo ti ve viau a ni," ka ti ve a, ka phei leh hun tùrte min zâwtin rei tak erawh kan inbe lo va, kan ințhen dâwn chuan," Hun i neih hlauh chuan ka pi thlàn pawh i tlawh ve ang chu tiraw?" a ti leh a, kei pawh chuan," Teh rêng mai," ka lo ti ve leh vat a.

Hun nei tam lo mah ila ka hmang thiam khawp mai. Ka ute ka tlawh a, ka rin ai daihin a lo rai lian mai a, lian ka ti lutuk chu,"Phìr a niang," ka ti lehpek a, kârlehah neih a inring tawh a ni. Awm ve ka châk khawp mai; mahse, mahni thu thua awm thei ka ni tawh si lo. 

Damon-a pi thlàn pawh ka tlawh a, pangpâr pawh ka dah ve a, sawi tùr erawh a vâng khawp mai. Chhûngkhat lainate'n a thlànte hungin an siam nghâl a, mi awmthei an ni fur bawk a, an tițha khep khep khawp mai. Tlaiah zanriah an buatsaih a, hnial theih miah lohin Michael-a'n min sâwm a, ka ei ve leh tâk kha; mahse, an fel hlawm khawp mai, min lo hre sa ve deuh tawh bawk nèn, chhûngkhat ang maiin min be ve bawrh bawrh a; mahse, nuam lo chu ka ti ru ve deuh tho. A chhan chu Michael-a bialnu treat-in min treat deuh tlatin ka hria a, Damon-a a lo awm ve kur bawk nèn, ngawi rengin min lo en reng ziah a, eng eng emaw chu sawi se chuan a zia deuh mahna.

Ka pate remti vak lo chung chuan Sunday chawhnuah ka phei leh ta a, min ngaihtuah avàng chuan car keng phei mai tùrin min ti a; mahse, ngai ka ti lêm lo, Pathian zârah him dam takin ka thleng leh thei ngeiin ka ring thung. Zirtàwpni ka chàwl tawh a, Thawhțanni han chawlh leh kha ka inthlahrung tawh a ni, ni dang hun dangah, loh theih loha chawlh ngaih hun a awm thei a, chitih huna chawlh ka inthlahrun loh nân haw phei ngei ka duh a, ka pate pawhin min hnial lui thei ta bîk lo a ni.

Ka tlân chhuak, in aţang chuan ka lang thei tawh lo ang tihah chuan Damon-a'n min lo chãng reng niin, sawi buaina hun min pe lêk lo chuan ka scooty chu motor dangah an hlâng a, kei chu a motor-ah ka lût ta thung a, kawnga kan tlàn lai chuan thil awm dàn chu min hrilh fiah ta chauh a, scooty phurhna motor kha a țhianpa motor niin, Lunglei lamah a phei ve dâwn tho ni àwm a ni.

"I rawn phei vang vang tawh a, thlah phei che hi chu i phû a ni," a ti tlat a, pawi pawh ka ti hran lo. Scooty khalh kha a ninawm êm mai, ka mawng a kham hlur tawh dâwn lo tihna a ni mai a, bâkah, a bulah nuamti takin ka țhu thei dâwn bawk a, hlêp hlang a ni mai.

Theiriata ka in kan thlen chuan zàn inkhâwm reh lai tak a lo ni a, eirawng bâwl buai lovin thingpui leh a hmeh tui tâwk, ka nu min ken pheitîr ngei mai chu kan ei a, kan puar viau tho mai. Ka scooty phurhna motor pawh a rawn thleng har lo, thingpui ka lo buaipui vat nain hnial tak têin an hnial tlat a, an tlân chhuak leh nghâl a ni mai. Damon-a erawh a la lêng deuh reng thung a, zàna riah ve chu sawi lang lo mah se a châk tih ka hria; mahse, ka sâwm duh hauh lo, hmingchhiat a hlauhawm, mikhual leh mi min en bîk ka ni bawk si a.

Chuta țang chuan kan inkâr chu a dik ta thluam mai, min hmangaih thu a sawi lo, kei pawhin ka sawi chuang lo; mahse, inhuatna leh inbiak țhat duh lohna kha a awm tawh lo, inpawh takin kan awm a, a rawn phei loh kâra min rawn biak erawh chuan min ngaih thu a sawi chàmchî thung, kei erawh chuan ka sawi chhuak ngai lo; mahse, ka ngai ve tho, sawi chhuak tùr êm chuan tlàwm ka la hreh pawh a ni mahna le.

Michael-a pawhin Damon-a nèna kan inkâr țha leh ta chu làwmawm a tih thu min rawh hrilh a, chutiang thu a rawn sawi chu ka lâwm khawp mai. Bâkah, Damon-a pawh a huat tawh loh thu leh a unaupa a nihna anga a en tawh thu a rawn sawi phei chuan min tilãwm zual, chutah," Elena-i fa kha a fa a ni lo aw, ka'n hrilh tlang rãwt tawh ang che, mipa hi kan ruih hnâp tawh chuan maw, kan pà thei tak tak lo a nia, bákah, a fanu pawhin Damon-a anna a nei lo rêng rêng, a rawn puh hmingchhe ve mai mai a ni. Chuan, Elena-i kha a hmingchhiat dâwn êm avàng chauhin Damon-a khân eng mah sawi ve duh lovin a lo pawm mai a ni," a rawn ti ta charh charh a.

Ka thâwl ta huai mai; mahse, kawng lehlamah chuan Damon-a kha ka lo mawhpuh kual nasa tawh si a, khati chen kha buaina kan tawh phahin, a insawi fiahnate kha ka lo âwihsak duh lo a nih kha, hrehawm a va ti dâwn tak! Ka tuar reitîr bawk si, ka tuartîr bâkah kei ngei pawhin ka tuar bawk a.

*******

  

Ka uin naute mipa lian zet a nei a, naute leh a nu an țha bawk nèn, hlimnain min hmuak a ni ber mai. A thlalâk ka han hmuh phei chuan a taka hmuha pawm ka châk ngawih ngawih, ka phei theih hun a la rei dâwn si, kum tàwp lamah daih a ni tawh dâwn si a, thlalâk min rawn thawn thar apiang chu ka en ka en ringawt mai, chu chu ka theih tâwk a ni si a.

"Thil hrilh tùr che ka nei a, ka rawn phei lawk dâwn aw." 

Rawn phei se, a chunga ka thil tih zawng zawngah khân ngaihdam ka dîl ang a, ka hmangaih thu pawh ka hrilh tawh ngei ang, eng pawh ni rawh se, min hrilh loh pawhin ka hrilh hmasa mai ang, ka tum ru khiau tawh a ni.

Kawng laka a thang chin hre tùra biak chu duh viau mah ila ka tihbuai ka rin avàng leh a rawn thlen thuai tawh dâwn tho avàngin ka be duh ta lo va, school kan bàn thleng pawha min rawn biak loh avàng chuan biak tumin ka phone chu ka la chhuak a, a rawn ri ve ta chiah mai; mahse, Michael-a a ni thung a.

"Aw, Boss, eng nge ni ta?" zãng vah hian ka ti a.

"Kimkim, Damon-a a chesual tlat mai; mahse, a ngaihtuahawm loh aw, rawn ngaihtuah lutuk lo la, hei damdawi inah kan awm mêk a."

Damon-a a chesual. Ka phone chu ka hmer ngat ngat a, tlûk ka hlauh avàng erawh chuan bang chu ka nghèng nghâl vat a. Hei vàng hi a lo nih chiah hi min rawn biak loh ni, engati nge keimah tal khân ka lo biak loh?  Engin nge min mawlh rêng rêng, min rawn biak loh pawhin keimah tal khân lo va be tùr hi ka ni a... A chungah eng thil pawh thleng se, a chhe ber thleng pawhin thleng thei a ni, ka hmangaih thu pawh ka hrilh hman hleinem. A ni thei lo, a thleng thei lo ang, rilru fîm taka awm ka duh avàngin ka intiharh hrâm hrâm a; mahse, ka thu hriat zet khân min țhâwng tak zet a ni.

*TIHNAT I LO NI TAWH A NIH PAWHIN THEIHNGHILH TUM HRÃM HRÃM LA; MAHSE, ZIRLAI A PÊK CHE ERAWH THEIHNGHILH HAUH SUH ANG CHE*