☆HLWILY☆ - 32 By Dingdi Pachuau

 ☆HLWILY☆ - 32 By Dingdi Pachuau

Aizawla ka phei ve theih meuh chuan kãr khat deuhthaw a liam dèr tawh. A pi thiha ka phei khân ni khat ka chàwl tawh si a, school lama chawlh dìl leh chu ka inthlahrun bâkah a tam thei ang ber zirtîr hman ka duh a, chuvàng chuan, ãm takin class ãwlah pawh lût zêlin English chu ka zirtîr a, kan hmalam hun tùr ka hre hauh si lo va.

Zirtàwpni chawhnuah ka inkhalh phei a, inah pawh awm khawtlai lovin Durtlâng lamah ka tlãn chho ta nghâl a, a awmna Michael-a hnên ațanga ka hriat sa vek tawh avàngin ka zawng buai lo, Damon-a nuin min lo chhàwn a, mi dang chu an lo awm loh lai tak a lo ni a.

Hmêl dâng deuh del leh a lu bandage-a tuam lûk chunga damdawi in khuma a lo mu bâm ka hmuh chiah chuan ka mittui chu tlâk lohtîr tumin ka inpet fan fan a, amah fuih chaka țawng thlamuana hnèm mawlh mawlh tùr zâwk hian hnem ka va ngai zâwk ve le! Ka țap lai hmuhtîr erawh ka tum bîk lo, ka țah chhuah ka hlauh avàng  chuan țawng pawh ka ţawng duh tawh lo. A hnârah pipe a invuah rùn mai lehnghâl a, hmuh hrehawm ka tiin ka rilru a tina tak zet, Michael-a khân ' Ngaihtuahawm lo' ni khân a sawi si a, min lo hnemna mai mai a ni tih ka hre chiang ta khawp mai. A nu chu zàwi deuh hlek hian a țawng sep sep reng a, a nat dàn chu min hrilh ve ni berin ka hria; mahse, ka hre tam lo khawp mai thung.

A kut chu vawnsaka ka hmangaih thu hrilh mawlh mawlh ka châk,  mahse, a nu a awm reng si a, ka ngam lo. Ka en tlawk tlawk ringawt a, hlauhthàwnna neiin a thi mai ang tih ngaihtuahin ka rilru chu a bîng deuh chûk chûk a, hrehawm ka tihzia chu namai lo tak a ni.

"Hlauthãwng suh, hmâ a sâwn ve tawh khawp a nia, rawn harh pawh a châk ve tawh khawp ang," tiin a nu chu rawn țawng chhuak lehin ka kokiah chuan a kut chu a rawn nghat a, awka ka chhuah ngam loh avàng chuan ka lo bu nghat ringawt a.

A nu kal sawn hnuah erawh chuan a kut chu ka vawnsak a, a lo la vûng deuh ul a, zàwi tê têin ka chùl theih chin chu ka chûl a, lo mengin lo harh se, nikhua rawn hria se ka ti tak zet a ni. Kal sawnsan ka duh loh avàng chuan a khum bulah, a kut vuanin ka țhu reng a, țap lo tùrin ka insûm hrâm hrâm a, ka rilru chuan ka be mawlh mawlh reng a.

"A na ngawt ang tiraw? Ka hre thiam a nia; mahse, tuar fan fan rawh aw, i tuar fan dana i tuar chhuah a ngai, tûn hun hi luhlul i chhuah hun tùr dik tak chu a ni, lo harh tumin bei fat fat la, kei pawh i bulah i harh hun nghâkin, kalsan lo chein ka lo awm reng dâwn nia," ka ti mawlh mawlh a, a nu rawn lët leh hnuah pawh chuan a kut chu ka thlah chuang lo, kum khati chen kha ka vawnsak tawh lo va, tunah hi chuan thlah tawh loh ka duh a ni. A tân damna thlen tùrin eng ka ti thei lo a nih pawhin a kut hi chu chelhsak reng ka duh.

Ka kalsan lo a, a nuin ei tùr min rawn pêk pawh chuan ei châkna ka nei lo; mahse, ka hmaizah avàng erawh chuan tlêm chu ka ei ve, a hming tak meuhin a ni, ka ei ni. Michael-a a rawn lang a, chutia a rawn lan ve tâkah chuan pâwna chhuah lawk a rawt a, ka chhuak ve ta chauh. Chutah chiah chuan ka lo insùm vena zawng zawng chu leih buak hawk hawk ang  a ni, ka țap chhuak hawk hawk a, ani pawhin min hre thiam a niang, eng mah sawi lovin ka hnungah chuan dìm têin min chùlsak hoh hoh a.

A hnu deuhah chuan,"A ngaihtuahawm loh tak tak tùrah ka lo ngai ve ringawt a," ka ti ta țiau a, țap tawh lo mah ila ka țahna avàng chuan ka hnâr a la ping țûp a, kaaw pawh a la dik thei lo.

"A zia thuai mai ang, i lo phei tawh bawk a," a tih chuan," Engati nge a dinhmun dik tak kha min hrilh mai loh?" ka ti leh thung a, tlêm chuan ka thiam lo lek lek a ni tih a ni pawhin a hre thiam ngei ang chu; mahse," A țhâwng lutuk dâwn che asin, tunah chuan hei ngaihtuahawm pawhin a awm tawh lo va, a nat dàn engkim ka hrilh che chuan mi â ber ka ni ang chu," a tih leh tâkah chuan kei pawh chuan Michael-a dinhmun harsat tùrzia chu ka ngaihtuah chhuak ve ta thuai a.

"A bulah ka țap ngam si lo va, i bulah ka inbun ruak ta mai a ni, ka chak lo hmêl a hmuh chuan hrehawm a tiin a  inthiam lo ang tih ka hlau si a, a tuar mêk pawh hi a hrehawm tawh dâwn tehlul nèn, keiin ka belhchhahsak phei chuan..." ka ti sap sap a, ani pawh chuan," E, a țha chhuak vat mai ang, țap hmêl chu hmuhtîr lul lo ve, a chakna i ni a, chutih rualin a chak lohna i ni tel bawk. A chakna ber a bula i keh chhiat mai chuan a buaithlâk lutuk ang, chak takin awm tum la, i bulah kan awm reng dâwn tho a, chuvàngin harsa ti tak chung pawhin i tuar hrãm hrãm a țha ang, a mamawh ber i ni a, i fuih sauh sauh a ngai a ni," a ti ve charh charh a.

Zànah riahpui ka duh ve viau nain ka pain min rawn lam tlat a, an phal chiah lo a nih hmèl, a chhan chu a chesual tih ka hriat ațang khân kei pawh zànah ka mu thei bîk lo tih ka pa hian a hre ve kar si a, chuvàng chu a ni, ka taksa pawhin a tuar ve tho bawk si a. Zanin chauh chu kan in lama mu hahdama a tûk zàn ațanga riahpui chu an titlu ta niin ka hria, puitling zâwk thil sawi a nih avàng chauhin ka hnial lo, ka hawsan dâwn chuan mi dang pawh zah zo lo chuan a kut chu ka vawnsak leh rih a, ka mittui erawh tihtlâk ka tum lo, Michael-a thil sawi kha ka duh dàn a ni ve tlat si a.

Sti pawhin min rawn hnèm ve nasa khawp mai a; mahse, ka ngaih a țhat phah chuang lo. Ka bulah awm ve se, Damon-a hi a takah rawn hmu ve se chuan ani pawh a mangang ve thoin ka ring; mahse, min rawn hnèm ve țàng țáng erawh a tilàwmawm ka tiin ka ngaihna a tizual sauh bawk.

Hma a sâwn mawh ka ti khawp mai, ka nghahhlelh luat vàng pawh a ni maithei, a tûkah pawh a la rawn meng chhin miah si lo va, ka rilru chu ngaihțhatlohna leh thlaphànnain a rûm vawng vawng a ni, ka hmêlah erawh tihlan ka tum lo, a rawn meng ang a, ka hmel ațanga ka chak lohzia a rawn hriat ka hlau a ni.

Sunday chhùna in lama ka inbual hlànin a lo meng ve lep lep a ni àwm e, ka awm laia meng si lova ka awm loh veleha a meng chu ka thin a rim lek lek a ni; mahse, a làwmawm tho tho, hma chu kan sâwn ve det ta alawm. A chhûngte pawhin kan chanchin chu an hre chiang ve tawh a, min en hrang lovin min duat viauin ka hria, ka riahpui chu an phal lo viau nain Michael-a'n min lo țan ve tlat a, a na tawrh laia enkawl hi ka hmangaihna lantîrna țha ber niin ka hre tlat a, hah leh mut chhuak pawh ka ngaihtuah duh lo rêng a ni.

"Tu nge luhlul zâwk hriat kan tum kha, kei chu ka tlâwm hnâp tawh a nia, nang erawh chu i tlâwm thiang lo aw, luhlul tak leh huaisen takin tuar chhuah tum teh, i chak tâwk tih ka hria a nia, tlangvâl țhalai, nâ pawhin a tlàwm theih loh khawpa luhlul ni teh, kei pawh min tlàwm tawh a, hêng i nâ zawng zawng pawh hi rawn tlàwm leh vek teh, rawn harh thuai rawh aw," tiin ka be sep sep reng a, a kut pawh ka thlah phal lo. 

Hma a sâwn chak loh êm avàng erawh chuan ka rilru a mangang thei khawp mai, school lam ka ngaihtuah lo thei bawk si lo nèn, chawlh ringawt lah chu, naupang an ngaihtuahawm ve tho bawk si, heta awma ani enkawl reng chu duh viau mah ila duty nei ka ni ve bawk si a.

"A țha chho zêl tùrah ngai ila, va phei leh ta rih la, rawn phei leh i duh a nih pawhin i ai chhawr lawk tùr va tifel la, ţha ka ti khawp mai," ka pain a tih chuan ka nu pawh chuan," Ni e, saw lam ngaihthah ringawt chu a fel lo ang, thil va tifel la, thil awm dàn dik tak Headmaster hrilh bawk la, a lo hre thiam lutuk ang," a lo ti ve a.

An thuràwn ang chuan ka phei leh ta rih a, kan zir tùr chu a tam tawh loh avàngin hmanhmawh phelênga zirtîr ai chuan tiin kâr khat chhûng aikal tùr ka la ta ringawt a, kan Head min ràwn dàn a ni bawk a, ka thaw a veng ve deuh huai mai.

Aizawla ka phei zànah, Damon-a kut ka vawnsak lai chuan min rawn hmer lêt ta tlat mai a, a hmêl ka en vat a; mahse, a meng lo, chutah, a kut chu ka en leh vat a, min lo hmer lêt chiang a ni, chêt pawh a chê alawm. Hlimnain ka khat a, ka kut lehlama a kut chùlsak hliau hliau pah chuan," I bulah ka awm reng aw, ka kalsan lo che a nia," tiin ka bia a, a hriat theih nân a hmai bulah chuan ka kûn hniam leh deuh a," Damon, min hria tiraw? Ka țawng ri hi i hre thei tiraw? I mitmeng mawi tak kha han meng tawh teh, mawh, min rawn en theih hun ka nghâk reng a nia," tiin ka be leh sap sap a.

Inthiar tura ka kal leh inbual tùra ka kal sawn tih lohah hi chuan a bulah ka awm reng a, a kham lutuk tawh ang tiin a kut leh ke ka hmehsak a, ka hru fai a, ka be pah reng bawk. Doctor-in an rawn ngaihven reng a, hmâ a sâwn ve zêl a ni tih an sawi chuan âwih harsa ka ti a, Michael-a erawh chuan," Hma sâwn duak duak tùrah ngai mah ta che, doctor-in a sawi erawh chu ring  la," min ti țhìn thung. Ka duh dàn ang ni lova ka mit hmuh ngeia hma a sâwn lohzia ka hmuh chian êm avàngin ka țawngțai nasa țhin; mahse, ka dìlna leh duhna A hnênah ka thlen mai a ni bawk a, A duh dàn erawh ka duh dàn ang lo takin a muang raih thung si a nih àwm hi.

A hmai ka hrûksak laiin a rawn meng a, a fiah lo a ni maithei, a han khap deuh sak sak a, ka hlim êm avàngin mittui tling piauin ka lo nuih a, ani erawh chuan mit khap tawh lo chuan min en reng thung a. Chutah, a hmaia chùlsak pah chuan," I lo meng tawh maw? Ka va lãwm tak êm!! Ka lãwm lutuk ringawt, i bulah ka awm reng a nia, i lo meng ang a, min rawn melh chho kiau ang tih ka hre reng a ni," ka ti a, ka mittui tling chu tihtlâk loh hrâm ka tum avàngin ka mit chu ka khap mawlh mawlh a.

A rawn nui ve suk tih ka hriat chuan," Țawng tum suh aw, i chau ang, i lo meng tawh a, ka lãwm lutuk ringawt," ka ti a, hlim hmêl pu tak chuan ka en vawng vawng a. Mi dang pawh an rawn kal hnai ve a, an han be tliar tliar nain a chhâng hlawm lo, a chau ang tih ka ring a, chuvàngin chhàn tum lo se ka lo ti ve viau bawk.

Hma chu a sâwn chak lo khawp chuan ka hria. A han meng thei a, a țawng thei chuang lo va; mahse, ka duhãm lutuk niin ka hre leh a, ka inthiam lo leh deuh a. A harh tawh a, kan țawng pawh a hre thei vek tawh bawk a, a làwmawmzia lam ngaihtuah lovin a bâk zêl duhnain ka lo duhãwm viau a ni tih ngaihtuahin,' Hma chu a la sãwn zêl dâwn alawm, tûn ang reng hian a awm dâwn lo' tiin ngaihtuahna dang ka nei leh a, a bulah phei chuan lunghnûr hmël ka pu tùr a ni lo, ka hlim hmêl lo hi chu a hmu tùr a ni lo a ni tawp mai.

A awbâwm lamah chiang lo a awm a nih ring mah se amah a la chak tâwk lo va, check tùrin a la hma an tih avàngin a bulah phei chuan kan sawi lang duh lo, țha takin kan enkawl chho zêl a, ka aikal pawh thla khat tawp atân kan be leh ta ringawt. A chhan chu Damon-a'n khawiah mah ka kal sawn a phal lo va, ka kut chu a chelh reng mai a ni. Mi dangin an khawih leh hrûk fai pawh a duh lo, a nâ pangchang zo vek ka ti mai, a chhûngte lah chuan an fiam nasa thei khawp a, chhâng lêt ve tùra aw a chhuah theih loh miau avàngin melh rum bâk tih theih nei hek lo le, a tàwpah erawh a nui ve leh suk suk țhin.

A țawng chhuah theih loh chu keiin țawng tam nân ka hmang thung a, ka theih tâwkin ka fuih reng a, ka hmangaih thu ka hrilh pah reng bawk a, a hlim thu a rìin sawi thei lo mah se a mitmengah erawh a lang chhuak chiang êm êm thung. Meng dul raih kha tunah chuan a mawina belhchhah tùrin hlimnain a kâp êng tawh a, ka thlîr ning thei lo.

Doctor-te chuan a aw chhuak ri thei lo chu a ngaihna an hre vak bîk lo va, an han check pawhin an hre thiam chuang lo, a awbâwm a chhia a niang kan ti deuh ta ringawt mai. Nakinah hmunpui lamah an kalpui leh ang chu, a taksa lam erawh a țha chho zêl thung a, tunah chuan inthiar tùr pawhin mahniin a kal thei tawh a, a changkâng tawh lutuk tlat.

A awbâwm check tùra kal an tum ni chuan naupangchhia ang maiin kal ve tùrin min han ti leh chiam mai a nih kha, puitlin hnuah a naupang țha leh ka ti mai, kei lah Lunglei lama phei ka tum ve tawh nèn, naupangchhe thlèm takin ka han thlêm leh rih a, buaithlâk tak a ni. A lo hàwn chhoh leh hunah leh a dam chian huna inneih a tih tlat avàngin ka han 'aw' ve ta mai a, chutianga ka tih loh chuan lungawi thei hek lo le, hunin a la hril chho zêl ang chu. A chêtsualna hian a thluakah dik hlel deuh a siamsak em maw ni chu aw ka tih phah hial a ni; mahse, kawng lehlamah erawh chuan min thlâkhlelhna a zual phah a, ka lãwm angreng viau tho si.

Theiriata ka awm leh tâk hnuah chuan keimah zãwk chuan ka be ta țhìn a, ani lah a aw a chhuak thei si lo va, min chhâng thei hek lo le, ka țawng nasa thei a nia; mahse, hman ve deuh erawh a ngai, a lungawina zâna reia ka biak loh chuan min rawn call nawn tluk tluk mai a ni, chuvàng chuan, zîng lam ai mah chuan tlai lamah hian ka be țhìn, message a type peih meuh si lo va, a châng chuan a țawng ve ai hi hla min ngaihthlâktîr țhìn, ka ngaithla tluan ve țhak ziah tho.

A zuk inentîr ve chuan awmzia a nei lëm lo a niang, hmasâwnna hmuh tùr a awm lo va, Krismas chawlh hmanga ka phei pawh chuan eng mah a ang chuang lo; mahse, a hnual tùr zâwngin eng mah ka sawi duh lo va," A la rei lo êm mai, damdawi i ei ang a, i zia mai ang," ka ti țhìn; mahse, kei ngei pawh hi ka beidawng ru tho. A chhan chu mi ka zawhho pawh hian a ngaihna an hre bîk lo va, 'Kum hnih kum thum hnuah a țawng ve leh thei mai ang, damdawi a awm hran chuang lo,' an ti mai ţhìn si a, anni hmunpui zâwka kal an ni a, an sawi ka hriat rûk dànin doctor-te pawhin a ngaihna an hriat loh a ni tlat mai a, keini thiamna nei ve lo tân phei chuan a ngaihna a awm lo; mahse, ka ngaih dànah chuan a nunna a chân lo va, a aw a ri chhuak thei lo a nih pawhin a bul hnaia awm chuan a țawng kan hre thei tho va, chubâkah,  a hmui phun ațang pawhin kan hre thei a, pawi lo kati ta mai. A țawng rîk theih chu duhthusàm a ni; mahse, a theih loh miau chuan a tûn dinhmunah hian ka lung a awi mai e.

Inneih lam kha a sawi leh mai tùrah ka ngai a; mahse, a sawi chhuak ta miah lo. A la dam țha tâwk lo deuhah a inngai ni hmiang ka ti mai, a la kal bãi deuh a, lèn pawh a la lêng chhuak thei lo, motor phei chu khalh thei a la ni lo hrim hrim, chuvàng chuan, a la inpeih rih loah ka ngai hmiah mai a, a sawi chhuah rih loh chuan sawi ka tum bîk lo, hrehawm a ti lutuk palh ang.

Krismas chu hlim takin a bulah ka hmang a, chutiangin kum thar pawh, ani erawh chu hlim tak angin lang mah se  a melh ngai a melh leh vung vung țhìn chu ka hmu ru vek a, eng nge a ngaihtuah ang aw tiin ka inzáwt țhin a, amah pawh ka zâwt zauh zauh; mahse, min chhâng lovin a lu a thing ringawt țhin thung, ka zâwt lui zêl duh bîk lo, a awm zêl dàn tùr hi a ngaihtuah ve ang a, hrehawm a ti ang tih ka hlau a ni. A bulah hian hmêl hlim thei ang berin ka awm ziah a, ka hlim tho bawk, ka fuih a, ka hmangaih thu ka hrilh chàmchî țhin, chubâkah, a hmalam hun chu ngaihtuah vak vak lo tùrin ka hrilh ve bawk țhìn.

School țan a lo hun leh dâwn ta, a bula awm kham lo viau mah ila duty nei ka nih tlat avàngin ka pheisan leh rih a ngai dâwn a ni. Ni tin zan tin deuhthawa an ina kan țhìn ni mah ila riah êm chu ka la riak bîk lo, nupa kan la ni tlat si lo va, ka pheisan hunah chuan ka ngai lehpek khawp ang chu.

"Kârleh khian ka phei a ngai leh tawh a," tia ka hrilh chuan min en reng a, eng mah a sawi lo.  A thin a rim leh ringawt palh ang tih hlau deuh chuan ka han nuih a," Ka va rei leh tawp nâng, ka rawn haw leh thuai ang a, kan inawm leh char char dâwn nia," ka tih leh chuan a hmui phun chuan," Ințhen ang," a rawn ti ta a.

Ka nuih mai a, fiamthu hian," Han sawi leh vaih teh, ka phuar hlãwm che ang a, tuipuiah ka paih daih ang che," ka ti a, ka nui pah sâng a, ani erawh chu a nui ve miah lo.

"Ințhen ang ka tih chu, ka nei thei lo ang che," a ti leh a, a thil sawi chu ka hre sual a nih ringin ngun takin ka en a, thutak zet hian min lo en lêt rùn a, ka nui hmêl pawh a reh riai riai ang chu.

"Min neih loh pawhin ka nei tho ang che," ka ti ve thung a, a thil sawi ka hriat duh tawh loh avàng chuan amah pawh chu ka en duh tawh lo. Thil dang daih sawiin ka phûl hlut a, Stite chanchin chu ka hrilh a, an awmna nawmzia leh hun hman dan, an hna thawh hrang hrangte chu sawiin ka titi chiam a, amah erawh chu ka en duh miah lo.

Ka haw hnuah erawh a thil sawi chu ka ngaihtuah rauh rauh thung. A țawng rîk theih loh vàng mai hian em ni min țhen a duh ni?  A nih chuan ka remti hauh lo ang, țawng ri thei lo tih avàng maia ințhen chu ka duh hauh lo, a chan hi ka chana ka indah chhin chuan hrehawm chu ka ti ve tho ang a; mahse, inthên phah nân êm chuan ka hmang lo ang.

Ka phei dâwn zàna ka va kal erawh chuan min hmu duh lovin room-ah a inkalh khum ta tlat mai a, ka han ko țhin, kawngkhàr chu kikin," Damon, lo hawng teh, khawngaihin? Hmuh che ka duh a nia, mawh, lo hawng hrãm teh," tiin ka ngèn a, țawngkain min chhâng thei lo mah se ka țawng ri a hre thei a, a duh phawt chuan min hawnsak thei tih ka hria; mahse, a lo hawng duh chuang lo.

A nu chuan ka bânah min rawn pawt a, in hnuai lamah min chhuk thlâkpuiin sitting room-ah min kalpui a, a bulah min țhuttîrin," A awm dàn hi ka hre thiam chiah lo, nimin piah khân kan bulah pawh a sawi a, inneih a duh loh thu leh țhen che a duh thu a sawi a. Mak kan ti a, a chhan kan zawh lahin min chhàn a tum bawk si lo, a awm dàn hi kan hre thiam bîk lo a ni," a ti sar sar a.

A chhûngte bulah pawh a lo sawi tawh a nih chu. Eng nge a chhan ni ang aw? A dam țhat lohna hian amahah, rilru lamah nghawng a nei a ni lo maw?  Tunah lah min hmu duh lo ta tlat chu a ni si a, eng nge a chhan ni ang aw? Ka va hre thiam lo êm!!

"Eng nge a chhan niang le?" ka ti sap a, Damon-a room lam chu ka melh chho a,  a nu chuan," Ka hre thiam bîk chiah lo, hre thiam hrâm rawh aw, a rilru a buai vàng a nih ka ring, hmâ a sâwn mawh ve bawk si a, a pa nèn pawh hian kan fuih ve nasa; mahse, a hlim hmêl phènah hian hlim loh rûkna a awm tlat țhin a ni," a ti leh dap dap a.

Ni e, a melh ngai a melh vung vung țhin kha chu ka hmu ve țhìn ngei alawm, min țhen a lo tum ru reng țhin tihna a ni ngei ang, hei vàng hian inneih lam pawh kha a lo sawi chhuak duh miah lo a ni mai thei ang em? Min țhen a tum chhan hi, mi dang a lo nei ru reng em ni? A țawng rîk theih loh vàng nge, mi dang a nei ru? Nge a chêtsualna lamah hian insawh khawlovin a pawimawh lai a lo sawh pawi deuh em ni zâwk? Tunah tak hi chuan ngaihthah ringawt theih a ni miah lo a nia, min tibuai ta nuai mai.

*RILRU HNUAL, ZAHPUIAWM, LUNGHNÜR LEH TLÂWM NGAWIH NGAWIH TÙRA SIAM I NI LO, SIAMTU CHE HIAN CHAK TAK LEH HUAI TAKA AWM TÙRIN A SIAM CHE*