☆ HLWILY☆ - 33 By Dingdi Pachuau

 ☆HLWILY☆ - 33 By Dingdi Pachuau

Min hmuh duh bawk si loh avàng chuan ka haw hma a; mahse, phone lamah țan ka la ta thung. A tìrah chuan min chhâng duh hauh lo va; mahse, ka beidawn duh bîk loh avàng chuan a pick up duh ve ta chauh a, ka țhen dâwn lo tih leh ka hmangaih reng dâwn tih chu uar zet hian ka hrilh a, eng ang pawhin ngai se pawi ka ti lo, ka hmangaih a, ka țhen dâwn lo a ni tawp mai. A țawng rîk theih loh hi chhuanlama a hmang a nih chuan engah mah ka ngai lo; mahse, a bulah erawh ka sawi ri kher chuang lo.

Ka phei a hun tawh miau si a, ka insiam ta poh a, ka insiam peih vek hnuah erawh chuan an inah ka va pêng leh hrãm a, hmuha biak hrim hrim ka duh a ni. A lo awm ngei bawk a; mahse, ka biak fàl theihin a awm duh hauh lo a nih chu, an ina ka lût min lo thlêk zawk a, a hnu lam erawh chu ka tân chuan lungtum biak ang chauh a ni, chu mai bâkah, amah enkawl tùra nurse an lâk thar, tê fel êt mai, ngo vir ver leh sam tan tâwi hmerh tê pawh chu ka biak a phal lo. Kei chuan țha taka lo enkawl tùra biak ka tum mai a nia, ka biak theih tùrin a awmtîr miah lo a nih chu. Hetianga a awm hian ka țhen thei tùrah a ngai a ni maithei; mahse, a hre sual a ni, a thil tawrh hi ka la tawn ve loh thil a nih avàngin a rilru tak ka hriat thiampui pha ve lo va; mahse, a hrehawm ang tih chu ka ring, hrehawm a tih lai taka kalsan chu ka tum bîk bau lo.

School-ah chuan chanchin min zâwt ve sap sap hlawm a, Mitei phei chuan min zâwt uluk bîk khawp a, kei pawh chuan zêp nei lo chuan thil awm dàn dik tak chu ka hrilh ve mai a, ngawi rengin uluk zet hian a lo ngaithla a, ka sawi zawh chuan," A nih chu, a va zia lo êm! Mahse, thil țha lam chauh beisei phawt ang aw, a dam chho zêl ang a, a aw pawh a nei lêt leh tùrah ngai ang, chutih hunah chuan..." tia min hnèmin  a nui pah sâng a.

"A buaithlâk lai ber chu kei hian țhen duh miah lo mah ila amah zâwk hian min kalsan hlauh chuan tih theih a vâng dâwn êm a ni," ka ti sap a, ka dawhkàn chu ka hmu miah lo chuan ka en ngar a, hei hi ka ngaihtuah duh miah loh ni mah se, ka ngaihtuahnaa rawn awm zêl a ni. Ani pawh chuan," Ni ve thei tho mai; mahse, a țha lo lam chu ngaihtuah lo phawt la, heti chen i lo tuar tawh a, chuti mai chuan a kalsan bîk lo ang che," a ti leh sep sep a. Sti thlâktu ka ti mai, ka bulah min hnèm tùrin Sti awm lo mah se, Mitei hi a rilru a nghetin a puitling reuh a, thil thleng hi positive zâwng hian a thlîr thiam phian bawk a, a bialpa nèna an ințhen pawh khân kei ai kha chuan a tuar thiam rêng a ni, a hmaa hnèmtu kha tunah chuan hnem ngai ka ni ve leh ta mai a, hei hi hringnun inlumlet dàn chu a ni tak si a.

Chhùn lamah ka phone call min chhâng khât a, chuvàng chuan zàn lamah ka call tlângpui a, chu pawh chu a pick up țha duh lo vêl țhìn, vawi hnih vawi thum a ring kuit vek hnuah min chhâng ve hrãm țhìn, chu pawh a tihfuh deuh țumin. Damon-a'n phone a chhàn duh loh chângin a nuin min rawn chhâng ve zauh zauh a, tihngaihna tak pawh an hre bîk lo. A nu hnênah chuan ka beidawn dâwn loh thu leh kalsan ka tum ngai loh thu chu ka hrilh ve fo a, a hrisèlna chungchâng pawh ka zâwt tel ziah bawk.

'Ka beidawng tùr a ni lo' tiin infuih sauh sauh mah ila a châng chuan ka thil beisei hi awmze nei lo mai niin ka hre deuh thut țhin, hetia a awm renga keiin ani hi ka beisei tlat chuan thil awmze nei miah lova nghâk ve tlat ang ka ni dâwn si a, ani tân pawh nakinah ninawm mai nihna chen ka la awm ngei ang, tunah pawh hian ka ni tawh maithei bawk; mahse, vawilehkhata hetianga a awm thut hi hriat thiam a har ve êm a ni, hetia a awm tlat chhan hi dik takin min hrilh tal se... ka bulah chuan inkiltawih tùr a ni lo asin.

January thla chu a ral ve thuai mai a, hlim erawh ka hlim hran lo khawp mai. Valentine's Day lo thleng thuai tur chu ka huphurh a ni, mite chuan hlim takin an kawppuite nèn an hmang leh ngei ang a, ka awt àwm mang e! Ka innghahna-pa lah hian min be leh duh lo emaw a ni ang a, ka va riang dâwn tak! Mahse, chutiang lam chu ngaihtuah thui duh lovin ka rilru la pëng tùr tih tùr ka dap ta vat a.

Hriatite inah pawh ka lêng ve leh tawh a, a pa pawh lo awmin a lo harhfîm ve kar a, mak ka ti ru viau mai. Krismas dâwn khân ka tlawh zawk ringawt kha a ni a, Hriati naute pahnih thawmhnaw leina tùr kha ka pe ve hrâm a, Damon-a'n ka rilru a luah hneh lutuk a, a lo chesual ve bawk nèn khân, tûn țumah hi chuan kan in ațanga ka ken phei, ka nu leh pain an chhûngkaw tân liau liaua min thawn inchhûngkhur bungrua leh thawmhnaw ka pe ve thung a ni. Chumi pah chuan Pi Liani inentîrna tùra ka pain min pai leh kei pawhin ka dah hransak chu ka pe tel bawk a, Pi Liani lãwm, zak pah bawk si leh làwm vànga lungchhe hmêl chu hmuh hrehawm ka ti hran lo, làwmthu min hrilh mawlh mawlh a, a hmel ațang chuan a làwmzia ka hmu, kei pawh ka lãwm, mi lãwm hmel hmuh hi a nuam êm asin.

An pa chuan," A làwmawm viau rualin a zahthlâk hi ka ti ngawih ngawih, keimah hi ka inzahpui a ni. Ka thiam loh rah chhuah liau liau a ni si a, nupui leh fanaute uap thei lêk lovin ka duhna lamah ka tlãn a, an harsatna leh hrehawmna en kânin, pa ber leh an innghahna ber tùr si hi naupang ber chêtin ka chê a, a zahthlâk ka tiin ka inchhîr takmeuh a ni," a lo ti ve tlawk tlawk thung a.

Hlim rilru takin ka hãwng a, pa ber inhmu chhuak chu ka lãwm zual a ni. Ani ber a inhmuh chhuah chuan an chhûngkhur pawh a nuam sawt tawh ang a, Hriati pawhin class țhulh a nei tawh lo ang a, țha takin lehkha pawh a zir thei tawh ngei ang chu, ka duhsak viau a ni.

Valentine's Day-a a hmuh tùrin Damon-a chu thil ka thawn a, a lo duh kher lo maithei tih pawh ka ngaihtuah tho a; mahse, chumi vàng erawh chuan ka thawn lo chuang lo, ka tih theih tâwk leh ka tih tùrah ka ngai tlat a ni. Ka phone bawk a; mahse, min chhâng duh lo. Ka țawng a ngaihthlâk duh loh pawhin phone hi chu pick up ve tal se ka ti țhìn.

"In awm dàn hi ka hre thiam lo," Michael-a'n phone-a a rawn tih chuan," Hriat thiam loh vak tùr a awm hleinem, a inthlahrungin min țhen a tum a, keiin ka vuan tlat thung a," tiin ka chhâng mai a, ani lah chuan," A va mak dâwn ve! Inneih lamte in lo sawi rîk nasat tawh ka lo ring asin," tiin," Ka lo be ve chhin dâwn em niang?" a ti zui zat a.

"A, a ngai kher pawhin ka ring lo. A hmuna awm i ni bawk a, lo tlawh ngun deuh la chu ka ti khawp mai, ka rawn tlawh phâk ve tawh rih si lo va," ka ti a, ani pawh chuan," Aw le; ka hman hi chuan ka tlawh ve reng reng alawm; mahse, titipui hi chu a har riau, a room lamah hian a awm tamin mi dang zar hi a ngaithei tehchiam lo a nih hmel, a nu min hrilh dàn a nia," a rawn ti leh a.

Ani hi, depression a nei nasa a ni lo maw le? Amah chauha a inkhung nasat chuan ngaihtuah loh tùr túr hi lo ngaihtuahin hrehawm ti deuhin a lo awm reng thei tlat, Michael-a chu lo bengkhawna lo hre chiang tùr chuan ka chah leh ta ngawt a.

Ni hrehawm leh kum hrehawm chu a ni chiang alawm, beidawng mai lo tùr chuan ka infuih char char a, kei lehzêl ka beidawn chuan kan hma a thim dáwn lutuk. A châng chuan ka inngaihtuah lungpuam a, ka mittui a rawn tla leh zawih zawih bawk a, rilru ipik takin zàn hun ka hmang țhin a, ka beidawng dáwna ka hriat chuan ka țawngțai tawp ziah, ka țawngțai lah hi a châng phei chuan a mumal lo thei khawp mai; mahse, hei bâk hi tih theih ka nei chuang bawk si lo va, ka thlahthlam phal lo a ni.

Naupang an exam zo a, dik tak chuan haw phei pawh ka châk hran tawh lo. Amahah beidawng duh lo mah ila min hmu duh lo chung hmuh luih tum tlat kha ka inthlahrung ve a ni, zak ve thei tho ka ni bawk si a, zahnate hi lo pianpui lo tal ila...

Sti pawh chuan a theih tâwkin min rawn fuih ve nasa a, beidawng mai lo tùr leh a awm ang anga hre thiama en liam mai mai tùrin min rawn hrilh a ni; mahse, har ka ti. Ka hmangaih si a, mi â ang mai leh min haw êm êm ang maia a awm tlat chu a tuartu tân chuan hrehawm deuh mai asin, sawi mai hi chu a awlsam a; mahse, a taka chêt chhuah hi chu a har țalh si chu a nih hi. 

Min hnar nân a nih ka ring, amah enkawltu nurse chauh chu hmuh a duh a, ka mit ngeiin a room lama a ko chho pawh chu ka hmu fo mai, chu achhapah, phone-a va biak ka tum chãng hian nurse-nu chuan min lo chhâng țhìnin Damon-a'n sawi tùr a hrilh țhìn a ni ngei ang, ngeiawm lam rawng lek leka min rawn chhàn a chîng riau mai lehnghâl a, chutah, message ngeiawm tak tak hian min rawn ûm zui zauh zauh bawk.

*Rawn kal tawh suh, mi dang ka nei tawh*

*Induhtâwkna nei ve ta che*

*Mi â i nih loh kha, ka hnar che tih hi hre thiam rawh*

Rilru na ru tak chungin ka delete nghâl ziah, rilru na thei leh zak thei ka ni ve a, amah kalsan se min tih vànga min rawn thawn chu a ni ngei alawm; mahse, hetiang lo deuh tal hian rawn ziak ve se, min hmu duh lo rau rau a nih pawhin țawngkam mawihnai ve deuh hi chu a awm ve a.

Ka phone-ah chuan thu ka type ve mawlh mawlh a.

*Ka kalsan dâwn lo che; mahse, min hmu duh lova min be duh lo tak tak a nih chuan ka rawn tum lui tawh bîk lo ang, i chhûngte pawh ka zah ve alawm. Ka hmangaihna che hian min tur luih țhìn vang a nia, ka thiam loh a ni. Chuan, mi dang i neih thu erawh hi chu rawn sawi duh suh, ka âwih chuang lo, ka rawn kal lo a nih pawhin ka thlahthlam ta che tihna a ni lo ang a, ka hmangaih lo ta che tihna pawh a ni hek lo ang. I inpeih hun ka lo nghâk zâwk mai dâwn e ni e*

Ka han en nawn leh a, țha katih hnuah ka thawn ve ta chauh a. Ni e, ka thutlûkna hi a țha berin a dik ber lo maithei; mahse, tûn atân chuan hei hi kan mamawh niin kan hre tlat, hre thiam takin hun thâwl ka pe rih a ni mai a, zar buai tum lovin. Mi dang ka neihsan dâwn tihna a ni lo, a inpeih hun ka nghâk mai zâwk a ni.

Thu làwmawm leh mak deuh mai ka hre thar a! Michael-a'n Mitei nèn an induh tawn thu min hrilh chuan ka khêk râwih râwih lo chauh a ni! Mak ka ti a, ka lawmpui a, zawhna  erawh a rawn in-pâng-aw-zial tup tup mai, ka duh dàn ngeiin a bul tê ațangin min hrilh ta dap a. Theiriata a rawn pheia ka in luaha Mitei lo pèn zàn ațang khân Michael-a chuan a lo duh țan daih tawh niin, mak ka tihzia chu, a inthup thei hi ka ti tak zet a ni.

"Ka lawmpui hle mai che, Mitei pawh ka lawmpui tho, in inhmeh dâwn reuh e, a fel asin, i ti fuh ngawt ang," ka ti barh barh reng a, ka lawmpuizia chu ka thup thei tho, ka hmelah pawh a lang chhuak vek ang chu.

"Nangmah berin min duh loh tâkah chuan tiin--" a tih lai mêk chuan," Chutiang sawi chhuak tawh suh, a țhing tawh lutuk! Mitei phei chuan a hre tùr hi a ni lo tawp mai, kawp mai mai suh ang che," tiin ka han vau nghâl zat a, ani lah chuan," Damon-a nèn hian in tih har hmel si a, tihkhalh che u ka lo tum mai asin," a lo ti leh a, ka meng phar kual nasa mai.

"Chuti chen chwn chu in lo kal tawh maw?!! I va inzêp thei tak! Mitei pawh a châk lo ngawt ang, min hrilh pawh tum lo," ka ti hmarh hmarh a, ani erawh chuan," Hre thiam rawh, hrilh che a huphurh ve alawm, a zak ve bawk a," a lo ti thung a. Kei erawh chuan," Țan nghâl hlur suh, in inneih hunah phei chuan i ngam dâwn lo chiang hle mai, thaibâwih dâwn lutuk!" ka ti a, ka nuih vak vak a.

Chanchin hlimawm lam ka hria chu a țha e. Kei zawng, ka hlim thut a, ka hlim lo leh thut a, ka chunga thil thleng hi ka pawm thiam mai loh zawngin  tih theih ka nei bawk si lo, mite hlimnaah hian hlimpui ila a țha, Bible thu kan tidik tihna a ni mai.

*******

Nizàna ka inbual tlai vàng deuh nge ni, ka zîng tho chu ka tho nuam chiah lo. Zîng dang chu ka ang lo chiang tih ka hria; mahse, engah vak ngai duh lovin ka che tho a, school pawh ka kal; mahse, chawhnu lamah erawh chuan khawsikin min rawn țham er er a, ka lu a na tluk tluk bawk a, naupang zirtîr pah nèn chuan a nuam fahran lo khawp mai.

Office-a ka lût chu Mitei'n min lo hmuh veleh chuan,"E, i khua a sik a nih kha," tiin damdawi a ban vat a, min lo min pe vat bawk a. Ka hnial bîk lo, last period ka neih loh avàng chuan haw daih tùra min tih pawh chuan hnial duh bîk lovin ka haw ta daih bawk a.

In ka thlen veleh ka mu nghâl vang vang a, ka taksa chu a na țhûm a, ka lu na tluk tluk pawh chu a hai pah bawk a, hrehawm tak a ni. Ka muhìl thei lo va, men erawh ka meng ngam lo. Zanriah ei tùr pawh ka buatsaih peih lo, ka mu chawrh chawrh a nih ber chu.

Mitei leh Rinpuii an rawn kal a, ka tho chhuak peih meuh lo, anni pawh chuan tho lo tùrin min ti a, ei tùr erawh chu min siamsak thung a, anmahni zah vàngin tlêm chu ka ei ve, Rinchhani a rawn chhuk tel ve leh bawk a, rei tak pawh an awm lo, riahpui ka ngaih leh ngaih lohte chu min zâwt ve luam a.

Boruak inthlâk hun lai a nih vàng a niang, damlo pawh an awm ve nual   niin Mitei chuan a sawi a, tlêmin ka ngaih a țha deuh, duh lo teh mah ila school chu ka chàwl lo thei si lo va, ka rilru chuan naupang zir tùr leh test tùra ka pêkte chu ka ngaihtuah a, rilru a hrehawm duh khawp mai.

Ka pate pawhin min rawn biakin ka nuamsam lo a ni tih chu an hria a, min rawn ngaihtuah khawp mai, inthup ka tum viau nain ka aw ațangin an hre lo thei lo a ni. Ka ngaihtuahawm loh thu chu ka hrilh ve ngei a; mahse, min ngaihtuah ngawt ang tih chu ka hre ve tlat thung.

Mitei nèn kan inpawh zual tawh avàngin min rawn ngaihtuahin a rawn pêng ziah a, Hriati tê pawh a bengvâr reuh khawp mai, a school bâng a rawn pêng ve reuh a, awm erawh a awm rei lo. Rinpuii pawh a rawn dâk ve ziah a, ani phei chuan min riahpui a tum viau țhìn; mahse, a ngaih loh thu ka hrilh a, a haw chho leh nge nge țhìn.

Ka damloh ațanga zan lina a lo nih meuh chuan thil ka ei țha lo nèn, ka chau ve reuh khawp mai a, ka ei chhun lah ka luak zêl bawk nèn, naktûk lam chu inentîr ka ngai a ni, ka pate pawh lo phei an tum kha maw.

Mitei a lo lêng a, towel tê tui lumah chiah huhin a sâwr a, chu chuan ka taksa chu min hru zawi zawi a, ka inbual thei si lo va, hei hi ka mamawh a ni. Min hrûk zawh chuan ka zãng ve deuh hawkin ka hria, làwmthu chu ka hrilh nghâl mawlh mawlh a.

Kawngkhàr a rawn ri karh karh a, chhàwn turin Mitei chu room ațangin a chhuak ta vat a, kei pawh chu khumah chuan maimichhîng vang vangin ka nute rawn phei huna kan awm dàn tùr chu ka mitthlà chhin a, Lungleia min chhukpui loh pawhin min hruai haw ngei ka ring, ka pain min hmuh hunah keimah maia heta ka tawrh chu a phal dâwn lo tih ka hre sa reng mai. A pawi pawh ka ti chiah lo, mahni chauha awma damloh zawng a buaithlâkin a zawngchhangthlâk loh khawp ang.

Min en rengtu awma ka hriat avàng chuan ka han meng a, Damon-a hmêl chiang taka ka hmuh chuan âwih thei lovin ka mit chu ka han khap fak fak a, amah ngei a ni.

Nuih sak pah hian," Eng nge i lo tih a?" tiin aw zãngkhai thei ang ber chuan ka bia a; mahse, ka aw chu a thâm deuh tlat, thil ka ei țhat loh vàng leh ka chauh deuh vàng pawh a ni mahna. Ani erawh chuan min en reng a, chutah, a kut lum thar thar chuan ka hmai chu a rawn chûl ta a, a mitmenga min khawngaihna leh min thlâkhlelhna awm chu ka hmuh sual emaw ka ti hial mai, engati nge a rawn lan tlat,  ințhen a duh ta lo tihna em ni?

"A pawi ka ti tak zet a ni," hmui phuna a rawn tih chhuah tâkah chuan ka mittui chu a rawn tling nghâl kawl kawl a, a chhan chu a hmêlah chuan inchhirna leh pawi tihna ka chhiar thei tlat si a ni. Ka mittui ka bek tawn tawna luang thla chu dìm têa min hrûksak pah chuan," Naktûkah doctor kan pan ang a, i dam vat mai ang," a ti leh a, a awm dàn leh chezia chuan min tilungchhe tlat a, ka mittui chu a lo hnai zêl mai.

A hnu deuha Mitei, room-a a rawn luh chuan ka mittui pawh a lo hul ve tawh a, Damin-a erawh chuan a kut chu a la sawn duh chuang lo, Mitei chuan thingpui a rawn siamsak a nih hmel. A nui hmel ațang chuan thil awmzia a rawn hre sa a ni tih ka hre mai, ka hrilh vek tak alawm, bâkah, Michael-a hnên ațang pawhin a hre nual bawk ang chu.

"Min mamawh vak hmel loh êm mai," nui chunga a tih chuan ka ner deuh sak a, a chhuak zui leh ta mai bawk a. Damon-a hnênah chuan," Thingpui kha in rawh, a dai mai ang," ka ti a, ani erawh chuan ka hmai chu a chül a chül a, chutah," I dam veleh min nei duh ang em?" a rawn ti ta mai!

Ka en chho reng a, damloh chauh lai laia hetiang sawi chu, amah hi a rin tlâk ngût ang em? Kan inbiak hnuhnun ber țuma a thil sawi nèn kha chuan a va inang si lo êm! Min nei turin a inpeih tawh rêng em?

"I tel lo chuan Aizawla phei ka tum tawh hauh lo a nia," thutak zeta  a tih leh chuan," Ka damloh vàng maiin min hnem nân chutiang thu sawi suh," ka lo ti ve thung a.

"Tunah hi chuan eng thil mah ka pawi-sa tawh lo, i bula awm ka duh ber tawh a, ka bula awm reng tùrin ka duh bawk che, dam chhûng rei lo têah hian i bula awm loh ka hlau ber tawh," a rawn ti leh duah a, a hmui phun chu ka hre sual em ni aw ka ti hial a ni.

*ZIR SÀN LOH HI HLAWHCHHAMNA A NI LO, I THIL TUM TIHLAWHTLING TÙRA  I TEIREI PEIH LOHNA KHA HLAWHCHHAMNA BUL CHU A NI ZÂWK*