☆HLWILY☆ - 34 By Dingdi Pachuau

 ☆HLWILY☆ - 34 By Dingdi Pachuau

Damon-a a riah ve dâwn avàngin Mitei chuan mutna tùr a siamsak a, kei pawhin Mitei chu riak tùrin ka sâwm ve nghâl zaih bawk. A chhan chu nula ina tlangvâl riah ve ringawt mai chu miin an hre thiam lo ang tih ka hlau a ni, ani phei chu ka bialpa a la ni zui a, hmingchhiat a awl zual bîk.

Damon-a chuan sawisêl lo mah se ka bul hnaiha mut chu a lo inring rilru ve chuan ka ring ringawt a, a mutna tùr lam pawh chu a pan har khawp mai. Ka bulah țhuin ka kut chu a chelh reng a, a châng leh a hmui bula la chhovin a han fâwp leh zoh bawk a, țawng erawh a țawng lo thung.

Zànah chuan ka mu țha lêm lo nain mi pahnihte chu tihharh ka hlauh si avàng chuan thãwm siam duh lovin ka mu tlawk tlawk a, hrehawm ka tih tàwpah chauh ka che sawn țhin. Khua chu vâr thuai thuai se ka ti tak zet, ka pate an rawn phei dâwn bawk a, min ngaihtuaha min duattute bula awm chu ka châk tawh a ni.

Inentîr tùrin Lungleiah kan chhuk a, Damon-a'n a car kha a rawn keng hlauh mai a, a motor pakhat zâwk Thar erawh kha chu a chêtsualpui kha a ni si a, a sawi dànin a khalh duh tawh rih lo a ni àwm e. Engkimah min buaipui a, țawng lamah erawh keimah ka țawng char char thung. Min entu chuan," Tûnlai natna," a ti mai a, damdawi min chawh țeuh a, chutah," Kâr khat hnuah i rawn kal leh dâwn nia," min ti leh a, lunghnûr zetin ka chhuah tâk kha. Ka rin dàn chuan uluk takin min check ang a, test chi hrang hrang a ti bawk ang a, chumi result azir chuan damdawi min chawh chauh ka lo ring ve a nia, a rûk tak chuan ka lung a âwi lo kher mai.

Damon-a chu damdawi leiin a tlãn kual zar zar a, keiin motor-ah ka lo nghâk thung. Ka țawng nasa a, ka chau ngawih ngawihin ka hria, bâkah, ka kal kual ve bawk nèn, ka țhu hle hle ringawt tawh. Damdawi a lei zawh hnu chuan chhang leh ei tùr eng eng emaw leiin a kal leh zawk a, chumi hnuah chuan kan haw leh ta vang vang a, kawngah pawh chuan ka țawng peih lo.

Ka nute pawh an rawn thleng har lo va, ka tum ni miah lovin ka han hmu dùn thut chu ka lung a chhe tlat a, ka mittui rawn tlingin ka nu min biakna pawh chhâng thei lo chuan ka inhnît ta hlawp hlawp mai a, ka nu chuan min kuah vat a, chutiangin ka pa pawhin, an bula han awm theih leh meuh chuan puitlingzia put hi a lo har a nih àwm hi, ka lo damlo kher bawk nèn.

Ka damlo tân chuan damdawi țha tak an ni tak zet mai, a tûkah ka khawsik a han reh nghâl pang mai a, doctor damdawi min chawh pawh chu vawi hnih chauh ka ei hman a nih chu, ka thlah nghâl hmak a, ka nu erawh chuan ei chhunzawm tùrin min ti a; mahse, ka zàwm chuang lo ve tlat, doctor kha ka ring fahran lo pawh a ni mahna le!

Ka dam chak lutuk chu Rinpuii, Rinchhani leh Mitei'n min fiam min fiam a,"Damdawi mûm lian a lo thleng ta bawk a," tiin, Damon-a hriat phâk si loh hian min fiam a, a châng leh," Țawng ri miah lo pawhin a tidam thei che a nia, țawng rîk theih pawh hi eng ual a lo ni chuang lo a nih hi," an ti a, a châng leh," Țawng ai chuan chêtzia a pawimawh zâwk alawm; mahse, chhe ngel ngul e, nui duh bawk si lo, chutah, a la țawng thei lo zui a," an ti a, an nui țhâ hlawm a, a chanchin an sawi ber  Damon-a lah chu an sawi ang tak takin a ngawi ngul reng mai bawk si nèn, an sual hlawm tak tak a ni, chhàn lêt ngaihna hre hek lo le, sei fe fein lei ka chhuah khum vak vak hlawm ringawt a.

Hriati pa pawhin min rawn kan ve teh mial a! A rawn inthlahrung khawp mai a; mahse, ka nuin a lo be sawk sawk a, Hriati pa a nih tih ka hrilh hnuah erawh chuan ka pain a titipui ta thung a, an titi tui ve bawk a, a duh aia rei a lêng ve ngei ang chu, ka pa hi chuan  titipui tùr a hmuh fuh tawh hi chuan duh aia rei hi a kàwm ziah, an hmanhmawh ang em tih lam hi a ngaihtuah thleng ve tawh ngai lo.

Kan Head pawhin min rawn kan ve ngei a, a làwmawm ka tih rualin zahthlâk ka ti deuh tho, ka dam țha ve viau tawh bawk si a, school kal ka la zuam lo deuh chauh mai a ni tawh a, ka inthlahrung ru khawp mai. Ka dam țha chak viau mai hi ka nute ka ngaih vàngah ka puh lo thei lo, an rawn phei hnuah ka țha chak êm êm si a. Kâr khat zet min awmpui a, Hriatite inah pawh lêngin chaw eiah an lo sâwm ve ngei a, Damon-a nèn pawh min sâwm tel tho; mahse, kan tihautak dâwn lutukin ka hria a, kan pahnih chuan kan ei ve ta lo, bãkah, Damon-a'n nuam a ti lo ang tih ka hlau a ni.

Ka nute haw phei hnuah pawh ani chuan haw a tum ve hauh lo. "Ka dam tawh a, haw tawh rawh," ka tih pawhin a lu a thing a,"I tel lo chuan phei ka tum lo ka tih tawh kha," tiin min chhâng mai a, thu dang a sawi lo. Tihngaihna tak pawh ka hre bîk lo khawp mai, 'A duh chen chen awm ve rawh se' ti ringawt ila, school enkawl tùr a nei a, a thlahthlam reng chu a fuh lo ang. Bâkah, nula tlangvâl kan ni a, riah dun a mawi lo, Rinpuii a lo awm remchâng hlauh zâwk a, chuti ni lo se chuan miin min sawi viau tawh ang, min sawi pawh ni se a àwm viau si a. 

A nute biak ringawt lah chu a fuh ber ang em? Engtin nge ka va sawi chuan ang? "Ko haw teh u," ka va ti dâwn em ni?  A tàwpah chuan Michael-a ka va be ta ringawt a, ani lah chuan," School lam chu ngaihtuahpui duh suh, a chêtsual ațang khân in lam ațangin engkim a buaipui mai țhìn," a rawn ti ve mai a, chutah," Induatna hun in nei a ni mai alawm, țha deuh khân awm rawh u; mahse, ramri kân lam erawh kha chu ngaihtuah lo ula," tiin a rawn nui hawk hawk a, biak man a awm lo teh a nia, koh haw chu khawi lam.

Khawiah mah a chhuak ngai lo. School ka kal hlànin inah a lo awm a, tlai bàna in ka thlen hi chuan ei tùr min lo chhawp ziah a, ka chêt ve phal lovin rawng a bâwl țhìn; mahse, ka pui ziah tho. Ka nute haw ațanga kâr khat zet a liam leh hnu pawh chuan haw tum hmêl a pu chuang lo, a ţawng an hriat theih dáwn chuan loh vàng nge ni, phone call a dawng ngai lo va, khawih erawh a khawih ve zauh zauh thung. 

Stite pawhin fanu duhawm zet an nei tawh a, a hmel chu a pa chiah chiah a ni mai; mahse, a ngoin a chum reuh si a, a lawmawm tawp thung. A thlalâk hi min rawn thawn deuh chhên reng a, min rawn awhthîk ka ti mai, chutianga ka sawi pawh chuan rawn nui uar uarin," A dik alawm, kan fa hi chuan in fa chu a rawn ngam nasa dâwn si a, chuvàng chuan, an kum a inthlauh lutuk loh nân ti ve thuai thuai r'u," a rawn ti zûrh zûrh țhin. Kei erawh chuan," Nang ber i awm loh chuan tu nge min dinpui ang? In lo haw hunah chauh kan ti ang, kan tih hma i duh leh rawn haw thuai ula," ka ti thung a.

Ni e, tunah hi chuan kan pahnih inkârah hi chuan buaina a awm tawh lo, ani lahin ka dam chian hun a nghâk a, ka dam țha ve tawhin school pawh ka kal leh tawh a nia, sawi langin min nawr angin lang lo mah se hetia a awm tlat chhan hi min nawrnaah ka ngai, kan innghâk rei ve tawh tho a, pawi pawh ka ti chuang lo; mahse, a sawi chhuah hun ka nghâk ve a ni.

Zan khat chu zanriah kan ei laiin," Innei tawh ang," a rawn ti chhuak ta chiah a,  hre chiang lo ang deuh chuan," Eng maw?" ka lo ti vat a, a sawi ngai chu a sawi leh a, kei chuan," Engtikah?" ka lo ti leh mai a. "Zaninah," a tih tâkah chuan phâwk zet hian ka han en a, a nui suk a.

"Senior-tîr che ka duh lo a ni, bâkah, kan inkawp rei ve  tawh bawk," a tih chuan," Senior min ti tawh a ni maw?" ka lo ti ve vat a, ani lah chuan ngun zeta min en pah hian,"I tâwk chiah; mahse, hei aia i upat chuan i senior mai ang," a ti ve mai a.

Zanriah ei khamah pawh chuan," Innei tawh ang," a ti leh a, engtin chhâng lo chuan ka mit ka siai khum ringawt a, room-a ka luh chuan a rawn lût ve a, ka chhuah leh a rawn chhuak ve nghâl a, min zui a nih ber chu, chu chu ka hmuh chuan," Min zui zêl suh," ka ti hlak a, ani lah chuan," Innei tawh ang, min chhâng ve mai la, i duh ve tawh tho kha," a ti leh a.

"Ka duh lo a niang, ka chhâng lo êm mai che," nui duh miah lo leh thutak zet hian ka ti thung a, ani lah chuan inrintâwk hmel zet hian," Phat tum suh, i duh ve tawh tih ka hria," a lo ti leh mai a, chutah," Lal-Peter-i  nih i duh em ni? Zanlai âr khuan hmain vawi thum zet i pha hman mai dâwn asin," a tih tâkah chuan insûm hman lêk lo chuan ka nui ta vak vak a, dul na ûrh leh mittui tla phungin a nia ka nuih ni.

Zàna ka mu chu ka mumangah Damon-a ka lo hmu a, Damon-a chuan hlim hmêl tak hian," Ka țawng ri thei tawh asin," a lo ti a, a țawng ri chu chiang takin kei pawhin ka hria. Ka làwm êm avàng chuan ka kuah a, ka lo țap chhuak titih deuh lehnghâl a, ka harh chhuak zat bawk; mahse, Rinpuii leh Damon-a chuan an hre lo a niang.  Ka harh phah tâkah chuan ka mumang mai a ni tih hriain ka han maimichhîng leh vang vang phawt a, khua a vàr tawh avàngin ka tho chhuak ta nghâl a.

Ka mumanga a țawng rîk theih avàng chuan beisei sâng takin Damon-a zing rawn tho chu ka lo bia a; mahse, a aw a ri chhuak chuang lo. 'Mumang mai mai a ni' tiin ka han phun sap a, mumanga a țawng theih vàng maia a taka țawng ri thei tùra lo beisei ngawt chu, a dik bîk lo.

Mahse, School ka kala class ka la zo ka chhuak chu kan peon Pu Dara'n," I phone kha a ri sia, ka lo chhâng ringawt mai asin," a lo tih chuan," A nih tak chu, tu nge ni a?" ka ti ve mai a, ani chuan," 'Damian-a ka ni' a ti ta in ka hria,'Ka rawn be leh mai ang' a ti ta a nih kha," a ti leh a.

Pu Dara chu ka en rân reng phawt a, chutah, rang zet hian ka phone chu ka en ta vat a, Damon-a number ațangin a ni ngei mai! Inngaihtuah chiang lo chuan ka han call ta ngawt a!

"Kimkim... Ka hmangaih che."

Ka phone chu ka hmer ngat ngat mai! Damon-a aw ngei chu a ni si, a țawng ri thei tak tak! Làwm avàng chuan insûm zo lovin ka au chhuak țhelh a ni; mahse, au chhuak ta lo chuan ka ding chhuak phut ta thung a, làwm avàngin ka per tawr tawr a, ka thâ pawh a khùr vek thei nia! Ka mittyi pawh ka dang zo lo, Damon-a a țawng ri thei ta! A phurrit a lum bo ta vek e.

"Kimkim, Kimkim...Kimkim... Ka hmangaih che, he thu hi a ri ngeia hrilh che ka duh a, ka hmangaih che, ka hmangaih lutuk che..."

Ka țawng ve vak lo, amah zâwk chu a țawng mawlh mawlh reng a, a hlim tluk zetin ka hlimin ka ring. Min be rei hle a, a sawi ngai erawh a sawi tlut tlut a; mahse, ka ngaithla ning chuang lo, min hmangaih thu mawlh a ni a rawn sawi ni, a dinhmun ka hriat thiampui êm avàng chuan dawhthei tak, hlim takin ka ngaithla reng a, nuam ka tiin ka hlimpui êm asin.

Kan bàn veleh chuan chuan mi dang pawh nghâk khawtlai lo chuan ka haw ta thuai a, ka kal pawh a ni chiah lo , ka tlãn ni berin ka hre záwk. Veranda-ah min lo hmuak a, phone-ah mai ni lo chuan ka hminga min kovin min pawm nawlh a, min hmangaih thu chu min hrilh leh mawlh mawlh a. Kan hlimzia chu, hei aia hlimna hi kan nei thei tawh lo'ng e tih tùr khawpin a nia kan hlimnain a chîm sàn ni, a chhûngte pawh a lo hrilh ve vek tawh a, kei kha chu min rawn hrilh hmasa ber a lo ni.

"Țawng tam lutuk suh, i hrawkin a nat phah ang, vawilehkhata i țawng vak chuan i tuar leh palh ang," tiin, ka hlauhthàwnpui deuh avàng chuan ka han khap leh rih a, ani lah chuan," Ka țawng rîk theih loh chhûnga ka țawng tùr zawng zawng kha sawi vek mai ka duh asin, ka hmangaih che, sawi reng mai ka duh a ni," a lo ti leh mai a.

Engkim chu a fel ta kuar mai. A țawng rîk theih tâkah chuan a nute biain nupui neih a duh tawh thu leh a hmanhmawh tawh thute chu a hrilh tel bawk a, a biak lai chuan ka lo en ve reng a, ka lo nui sak sak mai.

"Ka pain i rai tawh leh tawh loh min zâwt a," a hnu deuha a rawn tih chuan râpthlâk ti deuh hian ka lo meng phâwk a, chu chu a hmuh chuan," Ka nun dàn chu i hriat kha," a ti leh zauh a. Chu pawh chu lo ni se, mu dùn tawhah min ngai ngei tihna a ni si a, a zahthlâk ka ti.

"Nula thianghlim i la nih thu ka hrilh hmiah, a dik ngei pawhin ka ring a, ni lo'm ni?" a tih chuan ka bu nghat a," Ka ring dik che, ka hria alawm, chuvàngin a ni ka thlèm duh loh che, thianghlim taka inneih i duh ngei ang tih ka hre bawk a," a tih leh chuan làwmthu sawi nân a hmuiah chuan ka fawhsak zoh a.

Induha inhmangaih kan ni bawk a, nu leh pate lam ațang pawhin hnialna a awm lo, a hma thei ang bera inneih a duh avàngin thla khat deuh âwrh chauh inbuatsaih nân hun kan nei; mahse, pawi ka ti chuang lo. A haw phei duh bawk si lo va, tih thuai thuai chu pawi ka ti bîk lo a ni. Sti erawh a rawn haw thei lo chiang a, min dinpui tùrin Mîtei ka sâwm ta ringawt mai a, ani pawh a lo inhawng khawp mai a, ka lâwm tak tak a ni.

Aizawlah kan innei a, ka thawhpuite pawh ka sáwm ve vek a, min rawn țawiawm thei lo nain thilpêk țha tak min pe a, ka lãwm viau tho, rawn tel tùr pawhin ka phût ngam lo. School chawlh a ngai dâwn si a, a rem thei bîk lo a ni.

Kan inneih thu chham lai chuan ka aw a khùr nasa hle mai a, sawi pawh ka sawi ring lo; Damon-a erawh chuan a sawi ring khawp mai, a hmêlah lah chuan a thutakin a ti tak tak tih a lang reng bawk a, hmel țha ka tih êm avàngin ka lo mitsìr leh vang vang țhin.

Michael-a'n," Keini aiin in ti hmasa ta chu a ni a; mahse, kan rawn zui har lo ang che u, tiraw Mîte? Ani lah hi hei a semi-final tawh a, final chiah a hmabâk tawh bawk a," min chibai laia a rawn tih chuan Mítei chu sen deuh ap ap hian a nui sâng a, ni e, an tih har vak loh beisei ang.

Ropui taka inneih kher ngai ka ti lêm lo a nia; mahse, Damon-ate lam an awmtheiin an inhawng hlawm bawk a, a ropui thei ang ber kha an duh dàn a ni bawk nèn, eng mah ka sawisêl duh bîk lo. A țha ber zêl an duh si a, kan thuamhnaw inbel man pawh a to khawp mai, thuam chhawm pawh chu ngai an ti lo viau nain ka pain," Chutiang ringawt a ni thei bîk lo, Mizovin dàn kan nei ve a," a ti ve tlat a, chu erawh an hnial ngam ta bîk lo.

"Kum kha leh chen kha ka nghâk tawh che a, zanin chu chau deuh mah la i mut ka phal dâwn miah lo a nia," a tih sup chuan ka nuih hak a," Nang aiin ka nghâk rei che aw, chutin ti miah suh," ka lo ti ve thung a. Ani chuan," Kan school-a class xi i rawn zir ațang khân ka chhinchhiah tawh che," tifuh intih hmel tak hian a ti a.

Ka nui pãwt pãwt phawt a, chutah, "Class x ka zir lai ațangin ka hre tawh thung che. Kha, i hnênah pawh tuition kan rawn kal nghe nghe kha, nangmah vàng liau liauin class xi leh xii pawh i thawhna school-ah ka rawn luh phah bawk," ka ti lêt ve leh a.

"A ni maw?!!"

"Niang chu, a rei tawhzia chu, han chhût mah teh," ka tih chuan bûk nghat pahin," A rei tawh bawk si a, chuvàngin zanin chu muhìl lo mai ang aw," a ti ta sup a, min pawm kãngin a khum lian zet leh dûp  uam takah chuan min nghat ta riai riai a. Nupa kan nih zàn a ni bawk a, ka lo dang lo va, lo dan ahnêkin ka lo puiin a nupui ka nihna ang takin ka pasal a nihna ka nemnghehpui a, nupa chauhin an tih tùr chu hmangmawh hauh lo chuan kan ti dùn ta a.

Honeymoon hmanga hmun danga zin ngai kan ti lêm lo. Kâr khat chhûng chawlh ka la bawk a, in lamah kan inawm heuh heuh reng mai. Chance min pe ka ti dâwn nge ni, a chhûngte (ka chhûngte ni ve ta) chu an zin chhuak diak a, kan pahnih chauhin kan inah chuan honeymoon kan hmang a nih ber chu. Hringnun hi a hlimawm a, engkim mai a thar sûrh vekin a hriat a, kan hlim êm vàng pawh a ni mahni, tunah hi chuan mi pawh an hlim ve vekin ka ring.

Ka hna chungchâng chu ka thutlûknaah a dah hmiah a, 'Bànsan rawh,' 'Bànsan suh,' min ti lo, eng mah a sawi buai loh avàng leh ka duh tak hna a nih vàngin ka han zawm leh rih bawk a, amah pawhin min zui phei ve zat bawk; mahse, min hringtu ka pain min rawn phone a," Bawihte, ngun takin ngaihtuah la a țha khawp mai. I pasal hian a chãwm thei lutuk che a, a nupui niin i pasal chhûngkaw fanu i ni tawh bawk. An ina awm hman lêk lova hna avànga i chhuak reng a nih chuan in inpawhna a țha thei ngai lo ang, 'Bànsan nghâl rawh,' ka ti hauh lo che; mahse, thil țha ber tùr ngun takin i ngaihtuah dâwn nia," a rawn tih chuan ka ngaihtuahna a kal thui khawp mai.

"Ka bâng daih dâwn em niang?" ti a Damon-a ka zawh chuan," E, i thu thu alawm, i hna a nia," a lo ti mai a, han bànsan daih chu a rûk tak  chuan ka ui ve alawm, a tìra hrehawm ti tak chung pawha ka lo thawh ve țàng țángna hmun kha a ni ve a, hlawh chu tam over lo mah se han bànsan tawp chu ka ui ve ngawih ngawih; mahse, ka duhna ringawt ka dah lal thei bîk lo. Damon-a'n min awmpui reng theih loh chin a awm ngei dâwn, in nghâktu tùr a ni a, ani hi awm bo reng thei a ni lo, ka bulah lah a tâp zêl chu a ni si a.

School thilah min hawsan lawk a, a haw hlàna ka lunglènzia mai chuh, zàna ka bula mua min kuahtu kha awm ta lovin a mutna chu a ruak huai a, min hmangaih thu min hrilha min chûl mutu awm ta lo chu a reh tlawk tlawk mai. Heti khawp hian a lo ngaihawmin ka rilru a lo nei thûk tak zet a ni tih ka hriat chhuah phah a, ngai ngawih ngawih chung chuan ni chu ka hmang liam a, zan hnih thum lek pawh chu a tel lo chuan hrehawm ka ti ta ngawih ngawih mai.

"Damon, hetianga kan awm dun theih loh zeuh zeuh dãwn ai chuan ka hna hi ka bànsan mai ang," ka ti ta thlâwt a, ani lah chuan," I thu thu alawm, i duh a nih chuan ka pawmpui vek che, ka nupui hi ka chãwm thei che tih ka hre chiang ve tâwk bawk; mahse, i hlimna ka duhin  i duh dàn ka hnial duh lo che," a lo ti mai a, theih se chuan tunah pawh hian Aizawl pana tlàn phei nghâl ka duh ang chu.

*******

"A va buaithlâk tak! Tihngaihna ka hre lo, a pa hian tihngaihna a hre deuh zâwk ang," tiin kan fanu Lily, luhlul zeta nuar chiam chiam chu Damon-a chu ka pe a, ni dangah chutiang chuan a awm ngai pawhin ka hre lo, chutia a han nuar ta chiam mai chu ka hre thiam lo viau mai. Bual ka tum a, a thuamhnaw pawh ka hlihsak vek tawh, kekawrte nèn chauh a awm tawh a; mahse, a rawn nuar ta chiam mai a ni.

Damon-a chuan a lo pawm a, Lily lah chu nuar chhunzawm zêlin a ke pahnih chu a leng bat bat a, a țap chiam chiam bawk. Kum hnih a ni ve tawh a, a luhlul reuhin a châng chuan enkawl dàn ka thiam lo țhin khawp mai. A țahbelh miah lo va; mahse, a luhlul a chhuah erawh hi chuan buaina tenau a ni mai, a pa hian tih dàn hi a thiam riau a, chutianga a awm châng chuan a pa hi ka pun mai țhin.

Chhuatah chuan a țhutpui a, Lily lah chu a pa kut ațang chuan tãl chhuakin bang lam hawi chuan a țhu a, a nuar chhunzawm leh nghâl bawk a, a ke chu leng tawn bat batin a kut pawh chuan bang chu a chùm leh dat dat țhin. A pa chu a bulah chuan țhuin Lily nuar chu a thlêm chuang lo va, a be hran lo bawk, a intina thei ang em tih chu a ngaihven ber niin a lang.

An pafa inawm chu ka en reng a, an inngaihsak loh hmel bawk si a, mak ka ti ru khawp mai. Lily chu a la nuar bãk bãk a, ngawi rengin a fanu bulah chuan țhuin a awm reng a, nakin deuhah chuan Lily chuan a bula a pa awm reng ta chu a pan ve ta mai a, ani pawhin duat takin a lo pawm vat a; mahse, a la nuar tàwp chuang lo, a pa pawm chung chuan a ke chu a leng kual leh a; mahse, a pa chuan a pawmna chu a thlah chuang lo. A hnu deuhah erawh chuan a bâng ve ta a, a pa áwmah chuan a bei ta hle hle a, duat takin a hnung chùlsak heuh heuh pah chuan Damon-a chuan zawi tê tê hian a be sap sap a, eng tak inhrilh ang maw ka lo ti rilru a.

Zàn mutnaah chuan," Engtin nge vawiin khân i tih bîk a?" tiin ka zâwt a, ani chuan,"Naupang tê mah ni se hun thãwl neih hi an mamawh ve a, kan duh dàn ang ngawta kan tih hian duh dàn an lo neih ve si chuan kan buai ta țhin a ni, an duh dàn kan dah lal ve hun hi siamsak an ngai, nuar chiam chiam hun lai hi an nei ve bawk a, an sual vàng leh luhlul vàng pawh a ni chuang lo, a hun lai hi a awm ve a," a lo ti mai a.

"Chuti ka nuar ve dâwn?" ka tih chuan," Nang phei chu ka thlêm thiam ngawt ang che, kan test dâwn em niang, han ti chhin chiah la?" cho zeta a rawn tih chuan ka nui hak a.

"Ka pate leh ka nute thlengin ka tibuai palh ang," nui chunga ka tih chuan," Maw, han nuar chhin teh, Bawihtei nge nuar thiam a nu tih kan en chhin a ni ve mai a," a ti leh a, chutah, min rawn hnaih sauh pah hian," Bawihtei pawh hi kum hnih lai a ni ve tawh a, a nau tùr hi ngaihtuah a hun viau tawh a ni, i ti ve lo maw?" a rawn ti sar sar a, ka kawr chu rawn hlîmin a kut lum zet chuan ka taksa chu a rawn chûl țan ta nghâl a.

*HARSATNA A LO THLEN PAWHA HMA LAM PAN HRÃM HRÂMTE HI AN CHAK BÎK VÀNG A NI LO, AN CHAU A, AN TLU VE ȚHIN THO ASIN; MAHSE, TLÛK HLEN TUM LOVIN AN THO LEH MAI ȚHIN ZÂWK A NI*

A TÀWP TA...