☆OKHEE☆ - 7 By Dingdi Pachuau

 ☆OKHEE☆ - 7 By Dingdi Pachuau

"Dam taka ka hmu thei che chu ka lâwm e, Halan-a ka nia," tiin a kut chu a rawn phar chhuak a, nui deuh suk pah hian ngun zet hian min en chhuk pah run bawk a, a kut chu vawnsak loh ka'n tum zet a nia; mahse, ka bulah ka pa leh mi dang dang an awm ve bawk si a, ka vawnsak ta hrãm. Ka pa vàng chauhin a ni ka vawn ni, fanu polite lo lutuk nei anga a inngaih ka duh lo a ni, ka thu chu ni se chuan min chibai duh lotu hi ka chibai bîk hauh lo ang le; mahse, tûn țum chauh. He pa hian ka lak ațangin zawhna tam tak a dawngin a chhâng ngei ang.

Ei siamte'n an siam tui bawk a, ka ei ve țeuh mai. Ka thil hmuh leh hriatte khân min shock viau lo phei se chuan ka ei tam ngawt ang chu. Chaw ei pah chuan kum hnih ka awm loh chhûnga thil thleng chu ka ngaihtuah kual a, Hming-thingtlânga pawh Halan-a lo niin ka pa hnuaiah, a kutke ber a lo ni hman a, lehkha thiam sa a lo ni rêng em ni? Engtin nge ka pa hnuaiah chuan a rawn intukluh rêng rêng? Tum neiin, ka pa a ni tih hre rànin, min thlèm thlûk tumin a rawn thawk em ni ang?

"I ngaihtuah nasa lutuk! A chhe lo i ti tih ka hre thei vek a nia aw," Martha-i'n a rawn tih sar sar chuan ka en phei vat a, a lo nui sâng a, chutah, Hming-thingtlânga lam chu a'n melh leh ralh a, ka va en chuan ka pa nèn lo țhu dùnin chaw ei pah chuan ka pa chu a țawng mawlh mawlh a, ani erawh chuan ka pa thil sawi chu ngun tih hriat tak hian a lo ngaithla ràn a.

"Mipa lam chu ngaihtuah tawh lo phawt teh ang," ka ti sap a, mipa ka rin êm êm vàngin mipa ka ring a, ka rin phâk loh ka chungah a thleng a, chuvàng chuan, mipa vàng mai maia buai ka duh tawh lo, pasal neih tih mai mai, ka nei malêk mai ang.

"Mipa an inang vek lo a nia, ani hi chu mi rin tlâk leh rilru nghet, innghahna tlâk a ni asin," a lo tih leh chuan," Inang vek lo mah se mipa an nih chhûng chuan ka ring har ve tawh khawp ang, inlaichìnna neihpui hlauh phei chu... Ani pawh Sawmkima țhianpa a nih vàng maiin ring bîk viau suh," ka lo ti leh thung a, ka rilru tak tak pawh a ni bawk. A sawi tùr ka lo sawi khalh pawh a ni maithei, eng mah sawi chhunzawm ta lo chuan a ngawi ta daih a.

Kan ei kham hnuah chuan kan eina chu kan tifel a, hmeichheho chu kan che suau suau a ni ber ang chu, kan indaih bawk a, kan tifel zo hma khawp mai. A chhangchhe zual, kan in hnuaite chu an awm rei hran lo, Martha-ite chhûng erawh haw ka la phal rih lo bawk a, Harriet-i nèn inchhaihin kan hlim dùn khawp mai. Ka room lamah ka kalpui a, a tihkeh theih loh tùr makeup bûr eng eng emaw ka pe khâwm a, amah pawhin nuam a ti, a nu makeup a lo khawih ve țhìn a ni chêk ang chu, 'Ka inchei e' a ti ve a, makeup brush ka lei thar ka hman duh leh tâk si loh hmang chuan a hmai chu a hâwl kual a, nui sûng chungin a inchei lai chu ka thlîr reng a, a zei vêl dàn ațang chuan a nu inchei lai a lo en nasa țhìn a ni ngei ang.

"Kan haw tawh mai dâwn em niang kan ti a," tiin Martha-i chu room-ah chuan a rawn lût a, a fanu chu enin," Makeup hi a làwm a nia, a nu a chhùn a niang," nui chung hian a ti leh a, kei pawh chuan," A zei vêl dàn ațang hian a nu inchei a hmu ngun tih hriat reng," ka lo ti ve bawk a, a nu a rawn lan tâkah chuan a thil khawih lai chu kalsanin a nu chu  a pan ta nghâl a, makeup bûr hnawk nuai mai chu dah felin, rei awm lo chuan kan chhuak zui ta nghâl a.

Hming-thingtlânga pawh a lo la haw lo niin, Martha-ite rual chuan a haw ve dâwn pawh a ni mahna, haw tùra an intintuah chuan a ding ve nghâl vut bawk a, kan chhûngkua chuan an motor bul thleng kan thlah a," Lo lêng leh vat rawh aw, Harriet Bawihte," ka tih chuan Sawmkima chuan," 'Nula tlawngãwl zâwk i nia, i lo lêng zâwk ang chu, kan in thar pawh i la hmuh loh loh kha' tirawh Bawihte?" tiin Harriet-i chu a bia a, min rawn enin a nui pah a.

"Ni e, hun remchâng hmasa berah min rawn tlawh ang che, 'Ka buai, ka hman lo' tih vêl kha chu chhuanlam a tling lo a nia," tiin Martha-i pawh chuan a lo tuihnih ve a, kei pawh chuan," Țang rual dùn ve hle mai maw, ka rawn tlawh dâwn chiang che u," tiin Harriet-i chu a biangah ka han piaisak leh rih a," Ka rawn lèn hunah thil țha deuh ka rawn kensak ang che aw, bye bye rih phawt le," tiin ka bye bye ta nghâl a.

In chhûnga kan luh leh hnu chuan ka pa chuan," Martha-i nèn hian in inrual em kha?" tiin min zâwt a," Kei aiin kum khatin a nau," tia ka chhàn chuan,"Kum 31 tihna maw? Amah a lian lêm lo bawk a, a kum aiin a lang naupang daih mai ka ti, kum 25 vêl àwmin a nia a lan ni," a ti charh charh a. Ka nu pawh chuan," A len loh bâkah amah tê hi a ngo ver reuh a, a lang upa mawh ang, fa a neih hma pawha ria sa na nâ nâ chu, fa a neih hnuah pawh a ria chhunzawm zêl chu a nia; mahse, țhan chu a țhang hlek chuan ka hria," a lo ti ve a, kei chuan," 'Hmeichhia chu fa pakhat an neih hnuah an țhang leh' an tih țhin kha," ka lo ti ve leh zat a.

Ka pa chu enin," Pa, thil dang daih, sumdàwnna lam i tihlen belh sia, thawktu eng zât chiah nge i lâk belh tâk?" tiin ka duh chu ka zâwt țan ta a, ani pawh chuan," Office lamah chuan pahnih chauh a nia, Halan-a nèn chuan, pathum a nih chu," tiin min chhâng a.

"An țha hlawm viau ang chu maw?" tiin ka zâwt leh a, ka puih ve zawk laia ka tui lohzia kha ngaihtuah chhuakin an buai viau loh ka beisei, kei anga tui lo kha an nih ve loh ka duhpui bawk.

"Țha hlawm e, engtizia nge i lo thawk ve leh duh deuh em ni?" tiin nui deuh chung hian min en a, ka lu ka lo thing vat a," Duh lo ve, i hah phah viau ang tih ka hlau zâwk a; mahse, rin tlâk tak i thawhpui niin ka hria a, a làwmawm ka ti khawp mai," ka lo ti ve thung a, ani pawh chuan," Ni e, a dik alawm. Halan-a hian a hna hi a tuiin a rin tlâk tak zet tih ka hria a, ka ring chawt rêng a ni, ka hahdam phahin ka àwl phah viau bawk nèn, ka chhawr fuh tak zet a ni," a ti leh bawrh bawrh a.

A țhat hlauh chu, tûn atân chuan. Halan-a a ni emaw Hming-thingtlânga a ni emaw ka pain hahdam phah nân a lo hmang a nih chuan a țhaah ka ngai rih phawt ang; mahse, kei chu ka pa ang maia mi ring hma ka ni lo, chuvàng chuan, ka lak ațangin zawhna tam tak a la dawng dâwn chauh zâwk a ni.

*******

Inrinni a ni a, chaw ei khamah muangmarin ka insiam a, dàwra kal ka tum lai chuan ka nu a rawn lût a," Vawiin chu țhulh mai teh, Ațana leh Julian-a an rawn kal a nia, han inthlâk la, lo chhuak vat ang che," a rawn ti sar sar a, a chhuak leh nghâl vat a.

Ka thaw hawk a. He hun hi a lo la thleng ngei ang tih ka ring mai ni lovin ka hre sa thlap a ni. Ka awm loh dâwn khân ka number ka thlâk daih a, a chhan chu ka ţhiante pahnih hian min rawn biaka min rawn hnem an tum ngei dâwn tih ka hriat vàng a ni, Julian-a phei chu Zorema min hmel hriattîra min sawi hmuhtu a ni lehnghâl a, a inthiam lo ang tih ka hre reng, min rawn biaka chutiang thil vêl an rawn sawi ka duh loh vàng chu a ni, tleirawl ngaihzâwng neia inţhen leh ta, rilru na deuha awm ang maiin ka awm tih chu ka hre ve tho; mahse, a dik reng tho mai, ka rilru a nâ a, ka zak êm êm bawk. Mi dang zawng zawng aiin keimah ka inzah a, Zorema ka huat aiin keimah ka inhaw bawk. Ka awm dàn dik tâwk loh vàng a ni thei tho bawk ang chu, a chhan chu mipa duh zâwnga awm dàn ka thiam ve lo va, mi fapate nupui tlâk leh țha ni tùrin ka awm ngai lo bawk, tuma thiam loh a ni lo va, keimah hi ka inen lêt a ngai a ni zâwk.

Thuamhnaw pângngai deuh haa ka inthlâk hnu chuan ka room ațang chuan ka chhuak a, sitting room-ah ka nuin a lo țhutpui a, min lo hmuh chuan Ațana chuan," Wow..!! Inhmuh lohna a rei ve ta bawk a, ka hai lek lek țêp che a ni, i dam țha tih ka hre mai," tiin a lo nui a, kei pawh chuan ka nuih lêt ve sak a, kan han inchibai tak nawk nawk a, Julian-a erawh chuan min en vang vang phawt a, chutah," I dam țha tih mit ngeia han hmuh chuan rilru pawh a dam huai e," a ti ve thung a, nui ve lêm lo mah se a hlim mitmeng ka hmuh chuan a hma ang chiahin hmuh nuam ka la ti reng mai.

Ka țhiante pahnih hmaichhana ka han hmuh leh meuh chuan ka rilru pawh a hlim ru ve leh ta, ka ngai ve êm êm țhìn a, biakpawh erawh ka duh lo mai zâwk kha a ni a, min ngaihtuah ve ang tih chu ka hre reng; mahse, ka chhûngte ațanga ka dam țha tih an hriat kha tâwk ka ti. 

Chanchin, ka hun hman dàn chu min zâwt ta chiah a, kei pawhin ka zêp chuang lo. Mizoram chhuahsanin kâr hnih vêl zet chu ka zin kual kha a ni a, a hnuah erawh a hmaa ka thawhna Company-ah khân awm mai mai ai tiin ka thawk leh a, țhian leh hmel hriat ka nei sa bawk a, hun harsa ka tawng lo, hun ãwlah hmun hrang hrangah kan zin kual a, ka hun tawn ngaihtuah lêt loh ka tum tlat avàngin hmun hrang hranga ka zin kualna chuan min pui nasa viau a ni.

"A țhat hlauh chu, i țap keuh keuh ang a, hrehawm ti takin hun i hmang ang tih kan lo hlau khawp a, i awm bo rei bawk si a," Ațana'n a tih chuan," Țap keuh keuh rual ka ni tawh hleinem," ka lo ti thung a, amah vêk chuan,"Ni dâwn tak e; mahse, kan tân chuan i la ni deuh tho," ti pahin Julian-a chu a melh zauh a, ani pawh chuan," Ni e, a châng hi chuan han țhianpa cheibàwl viau țhin che mah ila chhûngril lamah rilru no tak hi a lo awm ve leh tlat țhìn bawk sia," a lo ti ve a, chutah," I rawn haw ta bawk a, engtikah emaw hun remchâng hmasa berah kan pathum hian chhuak ho ang u hmiang, kan chhuak ho khât tawh si a," a ti leh a.

Ațana chuan," Ni e, ni khat chauh chu kan nupui fanaute kalsanin kan tlangvâl țha leh ang chu, khawiah nge ni ang?" a lo ti ve a, ka nuin in tùr thingpui leh a hmeh min rawn pêk chuan kan titi rei tawhzia ka hre chhuak ve chiah, an chhãwl a hãl tawh ngawt ang chu.

Hming-thingtlânga pawh a hna kaihhnawihah ka pa rawn hmuh zauh zauh a ngai si a, kan inah pawh vawi thum lai chu a rawn kal leh tawh. Ka inlëng a ni lo bawk a, ka lo be lûmlãm ngai lêm lo, ka hmaa tih tùr awmah ka thawkrim a, ka rilru pawh thil dangah ka sêng ngai lo, thil dang danga inham buai ka duh tawh lo va, pakhat chauh ngaihtuah ka duh tawh a ni.

Ni khat chu dàwra ka awm laiin Martha-i chuan min rawn bia a," Sunday khian rawn lêng tawh la, chuan, zanriah i ei ve nghâl bawk ang a," a rawn ti a, Harriet-i lo rãk nawk nawk thãwm ka hre pah bawk a.

"Nia, ka lo tum rûk dàn a nia, a dam țha maw?" ka ti zat a, ani chuan nui hak chung hian," Ka âwih lo nasa  mai a, rawn phone kher lo che ila chuan i tum tawp lo ang," a rawn ti leh a, kei erawh chuan ka lo pha ve tlat thung a.

Sunday chawhnuah chuan car chu ka la chhuak a, ka bike dahna lo ruak hiai lam chu ka en leh vang vang phawt a. Ka bike kha, ka awm bosan rei si a, ka pain a khalh ngai bawk si lo nèn, khâwl thil a ni a, dah ngawt ngawt chuan a chhe mai dâwn si a, enkawltu awm bawk si lo nèn, ui ru tak chungin ka hralhtîr ta kha a ni a, a rûk tak chuan ka ui ve reng, nakinah a dang lei leh ka tum rilru tho a ni. Car ken chhuah peih loh chânga chhuahpui zeuh zeuhah ka duh bâkah, car aiin ka ngaina zâwk daih.

Harriet-i cake tùr leh a kawr tùr chu seat-ah ka dah a, an in lam pan chuan ka inkhalh chhuak ta nghâl a, an in luah tharah ka la kal hauh lo va, a awmna hmun tak pawh ka hre chuang lo; mahse, a hmun min hrilh chian avàngin ka bo lo ang, phone a awm chhûng hi chuan bo ka tum lo hrim hrim bawk.

Ka va zawng chhuak ta mai rêng a, an nufain an lo awm a, min lo hmuh veleh Harriet-i chuan min lo pan vat a, ka thil ken lai dah chuan ka pawm vat bawk a, Martha-i chuan," Ánu chuan eng thil nge a lo kensak che aw..." tiin cake ka dahna chu a'n hawng a," Cake tui 'cial' chi maw? A tui leh dâwn mang e," tiin a'n nui sak a, chutah, a kawr awmna zâwk chu en lehin," A va mawi ve!! A inhmeh ngawt ang chu," a ti leh a, min rawn panin," Khawi maw, hâktîr chhin ang aw," a ti a, a rawn háktîr nghâl chawt chawt a.

"A inhmeh dâwn tih ka hriat sa vàngin alawm ka lei le, a puan hi a stretch deuh lehnghâl a, a ha rei thei deuh bawk ang," thlêk vang vang pah chuan ka ti a, ani pawh chuan," A țha khawp mai, a inhmeh reuh bawk si," a ti ve a, a hlihsak zui ta nghâl a.

"Sawmkima a awm nange?" ka tih chuan," Khawiah nge maw a lo kal leh hman tawh ni? Nichin lawk kha chuan a awm ve reng sia," tiin a han ko a; mahse, a awm hnai lo a ni ang, kei chuan," A, ka ti mai mai alawm, a hmel ka hmu lo êm a," ka lo ti ta vat a. Ani lah chuan," Weekend hi chuan a inla ãwl thei khawp a, inah hian hmuh tùr hian a awm meuh lo, a duhna lamah hian a lo chhuak hman ziah," a ti leh barh barh a.

Chutah,"Zanin chu chaw i ei ve nghâl dâwn kha aw, haw i tum ngawt ang e," tiin cake leh Harriet-i kawr ka leisak chu a ban a," Cake pawh ei a châkawm alawm, in tùr lam ka'n ngaihtuah ang e," tiin choka lam chu a pan ta nghâl a, Harriet-i nèn chuan sofa-ah țhu dùnin kan infiam a.

Chutih lai chuan Hming-thingtlânga ngei mai chu a rawn lût ve leh ta tlat mai a, biak nachâng pawh hre lo chuan ka lo en ringawt. Ani erawh chuan," An va reh teh diak ve a?" a rawn ti thûm dût thung a, a țawng ri chu choka ațangin Martha-i chuan a lo hria a ni ngei ang," Halan, i lo kal tawh maw? Lo ţhu rawh, in tùr ka lo siam mêk a, ka siam chhûngin Lawmi nèn khân lo inkàwm rawh u," a rawn ti làng láng a. Martha-i'n a lo sâwm ve a ni ngei ang chu, ka va ngei reuh tak! He nu hi match-maker nih a tum a ni ngei ang, a hlawhtling ngût ang em maw chu? Kan inhre sa tawh a ni tih hi he pa pawh hian Martha-i hi a la hrilh miah lo tihna em ni?

"Martha-i nèn hian cousin in lo ni reng a," a rawn tih chuan,"Ni  reng e," ka lo ti ve mai a, ngaihsak vak lo hian Harriet-i sam chu ka chùlsak a, ka phone a khalh lai chu a rawn rîk tâkah chuan enin ka chhâng ta vat a.

Martha-i chuan thingpui leh cake chu tray hian a rawn chawi a, a hùnna tur chu a lo siam remsak vat a,"Sawmkima chu khawiah emaw a kal lawk a niang, ka'n be nghâl ang e," Martha-i'n a tih chuan ani chuan," A ngai kher hleinem," a lo ti sup a, min betupa chuan min be zo tawh mah se an bula va țhut leh chu ka phùr lêm loh avàng leh an țawng chu ngaihthlâk rih ka duh avàng chauhin phone chu ka bengah ka la chuktuah a ni.

"A hman ve chhunah hi chuan a inla zalèn lutuk a, inah hian a awm hman thlâwt lo. Sa pawh chan a ngai a, a rawn haw thuai a ngai hrim hrim, mikhual chaw ei tùr pahnih kan nei si che u a," nui chung hian a ti a. Chu pa chuh, Martha-i chuan chaw eiah a lo sâwm ve pek a nih chu, a ei ve dâwn tih chu hre sa ila chuan ei ka tum miah lo ang. 

Cake chu ka ei tam ve bawk a, ka puar khawp mai. Martha-i chu a țawng pah reng a," Halan, eng nge i hna lamte? I buai em?" tiin a han zâwt a, ani chuan," Um, buai ve reng mai," a lo ti a, Martha-i chuan," Pa Puia(ka pa a sawina) hi chu a taima leh lutuk a, amah ang vek tùrah hian a hnuaia thawkte hi a ngai ang a, a chhawr nasa leh lutuk ang che u tih hi a hlauhawm ngawt mai. Lawmi, lo sawipui ve la, bâkah, ani pawh a upa ve deuh tawh a, hah taka thawk tùr a ni tawh lo, i pa hi chhâwk ve tawh la?" tiin min rawn en a.

"Ka tui ve lo, ka tui lo tih kha ka hrilh tawh chein ka hre sia?" ka tih chuan," Min hrilh pawh ka hre lo, min hrilh pawh chu a lo ni maithei, eng mah hi ka hre tawh lo, fa han neih tawh hi chuan eng mah hi kan hre rei thei tawh lo a nih dâwn hi," tiin a nui hak hak a.

"Kher kher a che, inla fa nei viau suh," ka lo ti thung a, la nui hak hak chung chuan," Fa ka nei tawh miau alawm le, dâwt ka sawi hleinem," a ti leh a, chutah," Sawmkima chu ka'n phone ang e," a ti a, a tho ta nghâl a. 

Kan pahnih chuan kan ngawi reng a, Harriet-i'n phone-a nursery rhymes a en bâk chu thãwm a awm lo, chutah, Martha-i chuan Sawmkima chu a be ta a ni ngei ang," Rawn thlâwk haw nghâl rawh, Halan-ate pawh an rawn thleng tawh a nia, sa chan a la ngai bawk nèn," a tih làwng láwng chu ka hria a, ka bul deuh lawka țhu pawh chuan a hre ngei ang chu.

"I rawn haw nghâl loh chuan i thî a ni mai," a ti leh làwng láwng a, a rûkin ka nuih a lo za khawp mai a, ka nui chhuak țêp hial a ni. Kan awmna lamah chuan rawn pheiin,"Khatia ka tih loh chuan a rawn ngai pawimawh tâwk lo ang a, a rawn haw har ang tih ka hlau a, a țuan hi a rang ve bawk sia maw," nui sûng chung hian a rawn ti leh nghâl bawrh bawrh a. 

"Sa chan kha chu ka ti thei reng alawm, lo awm mai maia ei huna ei leh țawk ringawt chu a fuh bîk nâng," Hming-thingtlânga'n a tih chuan kei pawh chuan," Chawhmeh siam chu thiam viau lo mah ila salad siam lam kha chu ka thiam viau aw," ka lo ti ve a, Martha-i chuan," Chu, a rawn haw thuai dâwn alawm, ka khualliante in ni sia, ka chhawr hrep che u chuan a fuh lo ang," a ti ve thung a, nuih erawh a nui sûng tho a.

Thingpui kan inna no chu ka sil a, chutih lai chuan Martha-ite pahnih chu an lo titi bawrh bawrh a, ka bula a țawng țhat duh loh nèn mi dang bulah chuan a țawng duh hle si a, min titipui a châk lo ve tho a lo nih dâwn hi. Pawi tawp lo, châk lo mah se ka zawhna zawng a chhâng tho tho ang.

"A lo haw thuaiin ka ring, a la tlai chuang lo va, eirawng bàwl nân chuan a la hma deuh tho nèn, Bawihtei ka'n bual leh lawk ang e, kan in luah hian ni a hmu țha deuh a, lum hi a ti thei lutuk a," ti bawrh bawrhin Harriet-i chu a pawm a, ka phone ka khalhtîr chu ka lo lâksak vat bawk a.

"Lo titi bawrh bawrh r'u, ka rei lo ang," a ti leh a, min en tawn dùnin a nui sâng a, an room lamah chuan a luhpui ta daih a. A va ngeiawm thiam tak! A thil tum hi hre thiam loah min ngai a nih teh chuan, mi â let tawp ka ni mai dâwn asin.

A reh tlawk tlawk phawt a, thil zawh tùr chu nei țeuh mah ila biak hmasak hi ka hreh ve deuh tho a ni. Ka rilru hria ni àwm tak hian ani lah chuan min biak hmasak lah chu a tum lo bawk si, zawhna ngah zâwk hian ka biak hmasak mai loh chuan...

"Engtin nge Hminga kha Halan-a a lo nih theih?" tiin zawhna hmasa ber chu ka han phuh chhuak ta a, ka en pah bawk a, min rawn en lêt ve nghâl zat bawk. Chhûngril lamah eng emaw awm mah se hawi sawn ka tum bîk lo, dâwt a sawi nge sawi lo ka hre duh si a ni.

"Ka hming a ni miau a," a tih chuan," Bumna a tel lo maw?" ka ti leh hrâm a, țawngkaa min chhâng lo chuan a lu chu a thing ringawt a, ka zawhna chuan amahah engtin nge nghawng a neih pawh chu ka hre thiam chiah lo, țawngkamin min chhâng si lo va.

"Ka pa hi hre sain i rawn pan nge thil thleng palh ve mai mai zâwk?" ka ti leh a, chu zawhna chu min chhâng nghâl vat lo, mit khap hauh lo hian min en reng phawt a, a hnu deuhah chuan,"Thil min zawh tùr i ngah viau a ni maw? A țha alawm, min zâwt char char rawh," a ti a, ka zawhna ngai bawk chu ka zâwt leh a.

"Ka hre sa lo a nih ka ring," ti chauhin min chhâng a, duhkhawp lo viau mah ila zawhna dang ka neih avàngin ka zâwt nawn rih lo.

"Ka pa a ni tih i hriat hnuah hian i hna hi bànsan tumna i nei em?" ka ti leh a, a nui ta hawk a," Engah nge ka bànsan ngawt ang? Phùrawm ka lo ti sawt asin," tia min chhàn chuan ka dang lek lek mai a; mahse, ka hmêlah erawh tihlan ka tum hauh lo thung.

"Ka pa a ni tih engtik ațangin nge i hriat? Kan inhre sa a ni tih i hrilh tawh em?" ka ti leh a, zawhna a tam lutuk a, a indawt dàn tùr pawhin ka thliar thiam lo zâwk.

"In ina zanriah ei tùra ka rawn kala ka hmuh thut che ațang chiah khân. Mak ka ti ve viau asin, i pa a lo ni reng si a," a tih chuan dâwt a sawiin a lang lo, a hmel chu a thutak viau bawk a, ti ila hmel hi chuan min bum thei viau tho bawk a, he pa phei hi chu hriat thiam a har viau țhin kha.

"Thu dik i sawi em?" 

"Dâwt ka sawiin i ring em ?"

Zawhna chu zawhna vêkin. A pawi lo, ka zâwt ang a, ka zâwt chhuak vek tho ang.

"Martha-i hnênah hian nang nèn hian kan inhria tih i hrilh em?" ka tih leh chuan,"Eng aiah nge ka hrilh ngawt ang?" a lo ti leh nghut a. Ka la duh tâwk mai lo," A nih leh, ka pa bulah?" ka ti țha leh a.

"Ka chanchin hi mi dang bulah ka sawi chhuak khât khawp asin," ti chauhin min chhâng a, chuti a nih chuan kan inhre sa tawh tih hi tu bulah mah a la sawi lo tihna a ni ngei ang, a țhat hlauh chu. Kan inhre sa tih an hriat hlauh chuan kan inkârah eng emaw awmin an ring leh ringawt palh ang.

Ka țawng chhuah leh hma chuan Sawmkima chhuak chu a rawn haw ve ta a, a rawn nui lût var var a,"Ka hun ãwl neih chhun ka han hmang ãm ve deuh alawm le, in lo inkàwm nasa em?" a rawn ti lût bawrh bawrh a, Hminga chuan," A àwm ve tho alawm, sa siam kha chu kei pawhin ka thei reng a," a lo ti vat a, Sawmkima chuan zàwi deuh hlek hian," Khawnge an awm a? A lian lêm lo na hian a hlauhawm ve thei reuh a nia, duhawm viau si hian ring leng làwnga min han koh tawh hi chuan hlauhlawp hian ka tlãn haw dàwr dàwr fo a nia," nui sûng chung hian a ti leh a, a hlau tak tak lo tih lah chu a hmel ațangin a hriat vek bawk si a, ka nuih a tiza khawp mai.

Sa chu mipa pahnih chuan an buaipui nghâl a, kei pawh lo awm mai mai bîk lo chuan bàwlhlo telh tùr leh thil țûl dang dangah ka lo buai ve a, Martha-ite nufa an rawn lan meuh chuan kan lo buai ve viau tawh hlawm a, inthiam loh ve hmel tak hian," Ka bual zo kha ka han awi nghâl alawm le, vawiinah a la mu miah lo va," a rawn ti luam a, kei chuan," Min puaktîr mai lo a nih chu," ka lo ti vat a, ani lah chuan,"I paw thiam dâwn ngawt ngawt mi?" lo tiin a nui zui hak hak a. 

"'Ngah nge ka thiam loh ngawt ang? Nau puak mai mai," ka lo ti ve thung a, Sawmkima chuan," Nakina i neih ve hunah i la paw ve dáwn nia, my dear-i hian Bawihtei hi chu puak hi a hauh deuh tlat zêl a, kei pawhin ka paw hman ngai lo," a lo ti a, rang zet hian Martha-i chuan,"A pa hian a hman ve châng pawhin min puak chhâwk a tum lo, a hahthlâk asin, vànneihthlâk takin lian lêm lo mah ila ka taksa hian mahni fanu na nâ nâ chu a lo zo ve êm êm a, chuti ni lo phei se chuan a, ka chhe vek tawh ang chu," a lo ti a, Sawmkima chu a lo nui vur vur a, chu chu a hmuh chuan," Nui vur vur suh, i chhiatzia kha," a ti lehnghâl zat a, chu chu kan nuih ve ta thung a, Sawmkima lah chu za zat hian a nui vur vur reng a, Martha-i pawh a insûm thei bîk chuang lo.

*DUH TAK TAKNA, INRINTÂWKNA, HUAISENNA LEH TEIREI PEIHNA HIAN KAN THIL TUMAH HLAWHTLINNA MIN HMUHTÎR ȚHIN*