☆WHY...?☆ - By Dingdi Pachuau

 ☆WHY...?☆  

By Dingdi Pachuau

Ka hmaa țhu nula chu mit khap hauh lo hian ka en reng a, ani pawhin min en ve  zauh zauh nain a zak deuh hlek a ni tih ka hre thei thung, a nui deuh a, chutah, meng zîm deuh ser ser chung hian a hmui chu a liak huh leh zoh a, a hawi sawn ta nghâl a, ka en reng vàngin a zak a hawi sawn a ni tih ka hria. Hmeichhe duhawm tàwp chu a ni chiang alawm, ka mit hmuhah kher ni lo mi dang mitah pawh a ni thoin ka ring. 

Ka vawi khat chhuahpuina a ni a, hmeichhe zakzum reuh tak a ni tih a chezia ațangin a hriat viau, a zahzum hi chu ka ring sa hrim hrim a. A, ka ring mai pawh ni lovin ka hre thawi tawh a ni zâwk ang chu, a țawng paha a nui deuh sen sen țhin leh a zah deuh avànga a sen leh ap ap țhinte chu inhmeh ka tiin en nin a har ka ti. A zahzum avàngin ka țawng hmasa zêl a, ka țawng chhuakah zawhna ka telh zauh zauh avàngin min chhâng ve zêl a, chuti ni lo phei se chuan ngawi kan dawh dùn a ni hawt ang chu.

"Kan ei zo tawh bawk a, kan chhuak tawh dâwn em ni ang? Gate an khãr țêp tawhin ka ring," a tih chuan ka lo en veng veng reng a ni tih ka hre chhuak leh a, hawi sawnin ka sana bun chu ka melh zoh a, ka vawi khat hmuhna pawh ni si lo heti tak maia ka en duh leh hmuhnawm ka ti hi kei ngei pawhin mak ka inti ve khawp mai.

Kan thil ei man chu ka pe a, chhuahpuitu ka ni a, restaurant-ah ka chawlhpui bawk a, ei man chu ka pe tùr alawm. Vawiin chu bike ka ken chhuahni a ni lo hlauh a, a zia e. Bike-a han phurh vâwk vâwk chu nuam a ti lo ang, bâkah, kei pawhin ka duh lêm lo, lo innêlin lo inbe fo tawh țhin ni ila chuan ka vêngthãwng hran lo ang a; mahse... chutiang hun pawh chu a la inher chhuak ngei ang chu.

Car-a kan luh hnu chuan," In hostel awmna tak ka hre lo va, a kawng min hrilh chawp zêl mai a ni ang chu tiraw?" ka tih chuan," Um..." a lo ti mai a, ka melh phei a, min lo en ve zoh a; mahse, hma lam a en leh nghâl vat a, a hmai chu a sen deuh ap ap a ni tih ka hmu thei.

Kan tlàn chhuah hnu chuan," Hrehawm i ti em?" tiin ka zâwt a, en phei kher lo mah ila min rawn en zawk a ni tih ka hre tho. "Aih... a hrehawm lo, a hrehawm lo tak tak," tiin rang zet hian min lo chhâng a. A kut pahnih chu a mal chunga dahin hma lam chu a en ngar a, a chezia en chuan nuam chu a ti vak lo tih a hriat theih maiin ka hria, ka thlah kher hi a duh lo a ni thei mai ang em? Kei hian ka lo ti lutuk a ni mai lo'ng maw? A nervous dàn êm êm hi...

"Nuam i tih loh chuan sawi hreh lo la," ka ti leh a, min rawn en chuang lo chuan," Nuam ka ti alawm, mi dang awm vete pawh an fel a, bâkah, kan warden-in mi hriat thiamna a ngah bawk a," a ti ta duah a.

Ka zawhna leh min chhànna intuha lo lutuk chuan ka nuih a tiza lek lek a ni; mahse, ka nuih chhuah chuan hrehawm a tiin a hre thiam lo ang tih ka hlau si a, ka hnár ka tuai ta zoh ringawt a.

"A țhat hlauh chu, hrehawm i tih chuan sawi hreh lo la, puih theihna che pawh ka lo nei mial thei a," tiin nui deuh chung hian ka hawi phei a, ani pawh chu lài zet hian a lo nui ve sak a, a hmui chu a pet pah bawk a. A laih vàng a ni tih chu ka hre reng; mahse, a awm dàn chuan min hîpin sexy ka tih zâwng tak a ni tlat thung, a laih avànga a chêt dàn chuan min hîp viau a ni tih hre na se chuan aw... a tlãnchhe dàwr dâwr duh hial maithei a ni.

Hostel thlen hmain ding tura min tih avàng chuan ka han ding a," He laiah hian ka chhuk mai ang," ti sepin a chhuak zui ta nghâl a, a sam a benga zeh pah chuan a lo hawi leh a," Ka lãwm e," tiin, zah hmêl deuh hian a nui leh sak a, a kal ta nghâl a, ka en zui deuh reng  a.

Ka chhuahpui vawi khatna chu ni lo se chuan heti mai hi chuan a kal mai hauh lo ang le, a zakzum reuh lutuk a, ka tih-rehsak vat a ngai a ni. Vawiin chhùn pawh khân inah pawh hruai ka duh a; mahse, a zakzum lutuk a, a rilru tùr ka ngaihtuahpui vàng leh a zah ka hlauh vàng chauha

hruai lo ka ni, ni dangah, hun dangah ka la hruai ngei ang.

Ka hming chu Joy Bates Hauhnar a ni a, Bates hi ka nu hnam hming ka chhawm niin Hauhnar hi ka pa hnam hming ka chhawm a ni thung. Ka nu hi New Zealand mi niin  ka pa erawh Mizo a ni thung. Engtiang chiaha intawng nge an nih chu ka hre lo na a, nula leh tlangvâl, opposite sex ni ta na nâ nâ chu an induhin an innei ta ni maiah ka ngai. Mizoram aiin ka nute ram New Zealand-ah kan awm tam zâwk a, tuna ka kum hmun thuma țhen hmun hnih hi chu New Zealand-ah ka hmang a ni. Vànduaithlâk takin ka tleiràwl chhuah chhoh lai vêlin ka nu leh pate chu an ințhen ta tlat mai a, ka pa chuan ka nu hnêna awm phal lovin, a bulah ka awm ta a, India ram in hrang hrangah a hna avàngin kan awm kual nasa a, Aizawla kan awm ngheh ve tâkna pawh kum hnih êrh âwrh chauh a la ni. Ka hriat dànin ka nu pawhin tunah chuan a hnampui ngei pasalah a nei tawh a, ka pa erawh a la single zêl rih chu a nih hi; mahse, a pawi lo, kan inpawh zâwk. Ka pain nupui dang neia kan inah mi dang an lo awm ve a nih chuan eng eng emaw buaina a awm palh ang.

*******

A vawihnihna atân ka chhuahpui leh ta. Vawiin chu an college kawtah ti ila an college building kawtah záwk a niang chu, a class bâng ka lo nghâk a, ka hrilh lâwk sa avàngin ani pawhin min rawn hmu nghâl mai a, a țhiannu chu hrilhru zohin ka awmna lam chu min rawn pan ta nghâl a.

"Min lo nghahna a rei tawh em?" tia rawn țhu lûtin min be hmasa ve tlat mai, ka en deuh reng a, min rawn ena ka lo en reng tih a hriat chuan a lài leh deuh si a, hawi sawnin a seat hnung chu a nghèng dat a, a hmél leh chezia zawng zawng hian min hîp hneh tak zet ti ila ka sawi sual lo ang.

Nghâk rei ka inti phal lo, ka nghaha ber ka hre chiang a, rei deuh pawh nghâk ila a phû êm! Ka thinlung hlimna siamtu ni miau hek le.

"Rei lo ve, ka nghâk chhuak che a, a làwmawm," tiin a lak ațanga ka mit la sawnin ka tlãn chhuak ta nghâl a, chutah, țawng zawm lehin," I țhiannu kha khawi vêng nge kha?" ka ti leh zat a.

Inah hruaiin ei tùr ka siamsak chu ka chhawp a, amah hmachhawn zâwnga țhu ve nghâl zatin a ei zah loh nân ka ei hmasa leh phawt a, a ei ve hnuah chuan a zah loh nân thil chi hrang hrang ka zâwt kual a, a țawng duh chho ve ta viau. An chhûngkaw chanchin leh an khaw chanchin leh a awmnate sawi chho vein min hrilh ve sârh sârh a, a țawng siam siam chu ka lo en reng thung. A hmuhnawm ka ti êm a ni, a  lài hmêl hlei hlei hian a tihmuhnawm zual, a hmui a han liah huh zauh chângte chuan mit tla dáwnin ka lo en lo chauhin ka ring!

Kan inkawp chho zêl a, a chanchin pawh ka hre tam viau tawh. Amah ka duhna lah chu a ni tèlin a zual tulh tulh mai a, ni khat lek pawh a hmêl hmu lova awm chu hrehawm ka ti chho țan ta viau, kan dàwrah pawh ka awm hman ta meuh lo. Chhùna a chawlh hun ka hria a, hmuh ngei ngei ka duh țhin avàngin ka chhuak leh nge nge țhin, kan ina ka hruai loh leh restaurant lãr lêm lo, mi tam lohna tùrah ka hruai mai țhin a, kan inhmu ngei ngei țhin. Ani hi chu ka lo kawp tawhte ang lo takin hmun hulùm leh ualau-a kal a duh ve ngai lo, chuvàngin, a châng hi chuan min zahpui deuh nge maw ni le ka ti rilru fo, mi dang ka lo kawp tawhte kha chuan miin min hre lo ang e tih hlau ni àwm tak khân an kal duhna an sawi mai țhin kha a ni si a, an kal duhna lah kha a lãr ber ber leh mi tamna hmun kha a ni zêl bawk a.

"Joy, thil pakhat ka zâwt ang che aw?" tiin a thil eina fian chu dahin min rawn en a, mit khap lo lêkin ka lo en reng tih a hmuh chuan a sen leh nghâl ap ap a, melh hnuai raih pahin zàwi deuh sap hian," Min en hian laih loh ka tum pawhin ka lài ziah tho," a rawn ti ta reuh a.

A thil sawiin min tihhlimzia chuh! Tunah tak hian fawh vawng vawng mai ka duh. Duh tak hian ka en vang vang a,"Ka hmuh theih lai reng che hi chuan hmun dang en hi ka thei lo, ni khata ka hmuh theih che hun chhûng hi a rei lo êm mai a," tiin ka chhâng a, ka kut chu enin," Um, tunah i duh duh min zâwt rawh, pakhat mai ni lovin," ka ti leh a.

A ngawih deuh vang vang hnua,"Min zahpui em?" a rawn tih chuan rang zet hian ka en leh ta vat a, ani pawh chuan  hmui pet deuh pah hian min rawn en a," Kei chu i hriat angin, khawpui mi ka ni lo va, thingtlâng-" a la sawi lai mêk chuan a kut veilam chu ka kut pahnih chuan ka vuan chawt a, va kûn hnai deuhin,"Engtin nge... ni lo, ka zahpui lo che, ka zahpui hauh lo che aw, Chhan. Chutiang zawhna chu...Aw, a pawi lo, eng pawh min zâwt zêl rawh," ka ti bah deuh nawk nawk a, amah zahpuiah chuan min ngaih loh hrâm ka beisei, ka zahpui thlâwt bawk si lo,  thingtlâng mi a ni emaw khawpui mi a ni emaw tunah chuan he khawvêla ka duh ber a ni a, min ring tùrin ka duh tak zet, ka zahpui hauh lo, min zahpui loh phawt chuan.

"Min zahpui ka ti miah lo che aw, min hre thiam hrâm dâwn nia, ka tih chhan chu min hruai chhuah hian heta min hruai loh leh hmun kilkhãwr deuh leh mi awm tam lohnaah hian min hruai ziah si a," inthiam loh hmêl pu lek lek chung hian a ti niah niah a, a thil sawi zet chuan min tithâwl ta hawk mai, thaw huai chung hian a kut chu ka nghet deuh zâwk hian ka vawnsak a.

"Hmun hulùm leh ualau i ngainat loh thu i sawi vàng khân ka hruai duh ngai lo che a ni. Ka zahpui lo che ka tih kha thu dik a ni, ka zahpui ngai bawk lo ang che," tiin thutak zet hian ka chhâng a, sawi zawm lehin," A nih, chutiang hmuna hruai che chu i duh em? Tunah pawh hian kan kal thei reng a nia," tiin ka tho deuh nghâl uaih a; mahse, min pawt țhu leh rang khawp mai, inthiam lo hmêl pu chung hian," A ngai lo, hetiang hmun mi min chîm lohna hi nuam ka ti daih zâwk, ka thil sawi i lo hriat reng avàngin ka lãwm e," min en ràn chung chuan a ti a, chutah, nui sen senin,"Min zahpui lo tih ka hria a, ka lãwm, kei pawhin ka zahpui hauh lo che," a ti leh sep sep a.

Chawhnu class a kal ta lo, kan inah chuan kan pahnih chauh chuan kan awm a, kan hlim tak zet a ni. Tlai lama ka pa nèna kan ei tùr chu min siampui a, ka rin aiin ei siam pawh a lo thiam ve reuh khawp mai.

"Joy, i ei tùr siam kha a tui hlê sia, i siam a ni tak meuh maw?" tiin min zâwt a, kei chuan," Ni e, engati nge, i ring meuh nange?" nui deuh chunga ka tih chuan," A, ring tho e, a mak ka ti deuh mai mai, ei i siam ngai ka lo ring lo va," a lo ti leh mai a.

"Ka nu khân min zirtîr țhìn a." Ni e, ka nu khân 'Eng ang mi pawh ni la ei siam hi chu i thiam tùr a ni' min ti țhìn a, min siampuiin min siamtîr ve bawk țhìn, ka chhawr țangkai tak zet chu a nih hi.

"A nih chu, a ti țha hle mai. Kei chu kan unau zinga upa ber ka ni bawk a, eirawng ka bâwl hma a, thiam viau lo mah ila ka bâwl thiam hma viau. Chubâkah, thingtlânga awm chuan engkim mai hi kan thawh vek a ngai a, thingtlânga hna thawh theih ang chi hi chu ka thiam vek ti ila a dik ang," a tih chuan ka en vang vang a, min rawn enin a hmui chu a tipawrh a," Eng nge, min en vung vung a..?" a tih chuan hnaihchilh phutin a hmuiah chuan ka fawhsak zoh a.

"I duhawm êm vei a nih kha," tiin ka ding sawn leh ta nghâl a, amah zâwk chuan min rawn din hnaih ta thung a, min kuai kûnin a vawi khatna atân amah zâwk chuan min rawn fâwp hmasa ve ta tlat mai! A chêt dàn chu mak ka tih ëm avàngin ka lo chhâng lêt lawk lo va; mahse, a rei lêm lo khawp, uar leh duhthawh tak chuan ka chhâng lêt ve ta buan buan a.

"Joy... Joy...!!??" a tih tâk ruaiah chuan ka harh chhuak ve ta chauh, kitchen island-ah pawm chhovin Flask kan lo nawr tlu țhelh tawh niin, chêt chhunzawm tawh lo chuan thâwk ka la ham ham phawt a, ani pawhin Flask a lo vawn tàn hrãm hrãm chu a lo hûng țha ve chiah bawk a, kan inen chu kan nui ringawt.

Zanriah kîl laiin ka pain," Zanin chu kan chawhmeh tui dàn a dang tlatin ka hria, vawiinah rawn lêng an awm a ni maw?"nui deuh țhâ chunga a tih chuan ka melh zoh a, ka nui ve ringawt a. Ani lah chuan tàwpsan tum loh hmèl tak hian," Tûn țuma mi chu a danglam deuh a ni maw? Ka la hmu ve hauh lo nain a zakzum deuh a nih ka ring," a ti leh a.

"Um, zakzum ve deuh bawk e."

Nui var var chung hian," Engtikah nge min hmuhtîr ve dâwn?" a ti leh a, chaw chu a țhial pah țãlh țãlh bawk a. Chhâng lo chuan soup chu ka in hlak phawt a, chutah," Girls' Hostel-a awm  a nia, min rawn tlawh theih hun leh ina i awm hun a intawng remchâng thei lo ang," ka ti ta a.

"Saturday, Sunday tih vêlah a chhuak lawk thei lo tihna em ni? Hmuh ve pawh a châkawm alawm," a tih leh chuan ka chhâng tawh lo. Chutiang chu Chhani  ka la zâwt ngai hauh si lo va, zawh ve ngei a ngai a ni, an lo phal mial thei a...

Ka pa hriat loh tur hian bialnu ka nei ngai lêm lo, thup ka tum lo tihna a nih ber chu, ka kawp tawhho mi dang dang kha chu kan inah pawh zànah an rawn riak ve mai thei a, ka pa pawh an zah hran lêm lo,  khawpui chhûnga mite an ni țhin bawk a, an chhûngte pawhin an phal ve mai ni tùrah ka ngai, an rawn riak thei miau si a; mahse, kan inkawp rei lutuk hlawm lo thung, mipa dang nèn min lo kawp ve khanglâng ţhin hlawm a, ka tei thei țhak lo. Kei chu pakhata lungawia rinawm mai țhìn ka nih vàng pawh a ni mahna le, min kawp tih ka hriat veleh an chan chu țhen hmak kha a ni mai.

Ka taksa pianphung hi hmeichhia ni mah se, ka rilru erawh mipa a ni thung. Ka nu sawi dànin ka nu rai hma ațang tawhin ka pain mipa fa neih a duh a, ka nu a lo rai pawh khân mipa a neih a ring bur; mahse, hmeichhe pianphungin ka lo piang chhuak ta si a, ka pa chuan hmeichhia ka ni tih a âwih thei lo, a pawm lo bur a nih ber chu. Ka thuamhnaw leh ka lawm zâwng tùr ka toys tùr hrim hrim pawh chu mipa duh tùr vek chi a lei a, hmeichhia angin min en duh hauh lo. Min enkawl chhoh dàn hrim hrim pawh fapa ang vekin a ni, ka cousin hmeichhia rêng rêng kawm a phal lo va, mipa chiah ka kàwm țhin. School pawh a pângngaiin ka kal ve lo va, in lamah home tutor ruaiin chutiang ngat chuan lehkha pawh ka zir chho a ni, ka pa min enkawl dàn vàng chu a ni mahna, mipa rilru ang chiah ka pu a, mipa thuamin ka inthuam a, hmeichhia ka nihna a lang ngai lo. Ka vànnei ka ti dâwn nge, ka nu pian ka chhùn a, ka sâng a, âwmbâwr ka nei lo hle bawk, chuvàng chuan ka tân chuan âwmbâwr thup viau a ngai hran lo.

Mizorama awm hrehawm ka tihna ber chu chhiatni țhatni-ah leh inkhâwmnaah hian a ni, ka țhan chhoh dàn leh min kaihruaitu min kaihhruai chhoh dànin a zir bawk a, ka chhûng hnai tak an nih loh chuan thihnaah pawh ka kal lo hmiah mai, mi zînga awm nuam ka ti lo va, hmeichhehovin min en hrek hrekin ka hria a, mipaho lahin ngaihtheih loh hmel zet leh ei lo tih hriat takin min melh bawk țhin niin ka hria a, a rûkin nuam ka ti lo ngawih ngawih, hetiang hunah tak hian mal ngawih ngawihin ka inhre țhin, ka nu hnêna awm ka châk leh thut țhinna chhan pawh hei vàng chiah hi a ni. Khitah kha chuan eng thuamhnaw pawh inbel mah ila min en hrek hrek ngai lo va, nun a zalèn a, nuam ka ti. Ka pa erawh chuan hêng ka thil tawn zawng zawng hi a hre vek kher lo ang, engtik lai pawhin ka bulah a awm reng lo miau si a. Mal tak hmuh pawhin min hmu lêm lo ang, zîng leh zàn  bâk hi inah a awm ngai lo tluk a ni si a; mahse, ina a awm ve chhunah hi chuan min ngaihtuahin min ngaihsak êm ëm thung, ka pa mah ni se ka mamawh engkim min tihsak vek, hmeichhe puitling mamawh thlengin, ka mamawh thu ka hrilh ngai miah lo a nia, mipa mah ni se a ngaihtuah thui ve khawp mai.

*******

Ka pa a hna thilah a zin chhuak leh a, mahni chauha zàn ka riah a ngai leh dâwn ta, Chhani ka hre chhuak vang vang a, vawiin chu kan inhmuh hunah sâwm chhin teh ang, warden-te'n an lo phal mial chuan a zia dâwn êm mai.

Vawiin chu restaurant lâr ve tâwk takah ka hruai a, kan țhut hnu chuan a rawn kûn hnai deuh a," A nuam ka ti," nui sen sen chung chuan a rawn ti sep a, a hlim hmêl leh mitmeng nung ser sawr chuan min tihlim tak zet. Hetiang hi a ni dâwn tih chu hria ila chuan ka hruai daih tawh ngei ang.

Ei tùr kan ei lai chuan," Zanin chu rawn riak la?" ka ti chhuak ta chiah a, a thil ei lai chàwl meuhin min rawn en a, a mit pawh a khap lo. Nuih sakin," Keimah chauhin ka riah a ngai dâwn a, i awm chuan ka hlau lo deuh thei ang a ka tih vàng a nia," ka ti leh a.

"I pa?" a tih chuan," A zin daih, i lo riak ang tiraw?" tiin, ngen tak tê chuan ka han sâwm-ngèn a, a rilru a buai ve deuh nak tih a mitmeng ațang chuan ka hre thei, a rûkin ka nui var var thung.

Warden bulah a chhûngte damdawi ina awm riahpui a ngaih thu chu hrilhin riah chhuah chu a dîl hlawhtling ta ngei a, kan hlim dùn khawp mai, amah ngei pawh chu a phûr khawp mai. Last period a neih pawh a phûr tawh lutuk avàngin a off phah, a cute thei reuh hi ka tia.

Ina haw lovin ka lèn kualpui phawt a, ka tlãn chak ve deuh pawh a ni maithei, nghet zetin ka kâwngah min rawn kuahin ka hnungah a bei chial a, nuam ka ti tak zet. "I hlau em?" tia ka zawh chuan," Aih, ka ring tâwk che a, a nuam ka ti," a lo ti a, min chhànna chuan min tihlim zual.

Zànah ka khumah kan mu tlâng a, kan infâwp a, ka kuah chial reng bawk. A bula ka awm pawh hian ka ngai ngawih ngawih ni maiin ka hria.

"Ka kuah reng chung che pawh hian hei aia hnaih lehzual che hi ka la duh fo nia," ka tih chuan a lo nui hak a, ka kut fawh zoh pah chuan," Kei pawh, zàna ka mutte hian nangmah chauh ka ngaihtuah țhin che," a lo ti ve a. Ka lam hawi tùra kawih her pah chuan,"Ka hmuh theih lai che hi chuan en reng che ka duh," ka ti leh a, ngawi rengin kan inen a, kan infawh leh vawng vawng hnuah chuan," I mut a chhuah chuan muhìl tawh rawh," ka ti sap a.

"A la chhuak lo, hawh, titi mai mai ang, thil ka zâwt mai mai ang che aw," a rawn ti ve thung a,"Umm.." ka tih chuan,"Ngaih loh lamah ngai lo la maw, in nihna leh kan Mizo society hi a la inmil lo hle si a, hrehawm i ti țhìn em?" a rawn ti leh ta a.

Ka chhâng lawk lo, ngun taka ngaihtuah vang vang phawt ka duh avàng chuan ka chhâng vat lo a ni.

"Chhàn hrehawm i tih chuan a ngai chuang lo, a mak ve ngawt mai tiraw? Kei pawhin hetiang lam hi ka lo ngaihtuah ngai vak lo va, nang ka tawn che hnuah chauh hian ka ngaihtuah chho ta a ni," a ti a, ka khabe chu a tuai nauh nauh a.

"I inchhîr em? Ka tih awmzia chu, kei min duha min kawp hi a nia ka tih ni,"ka ti ve khauh thung a, ngun zet hian ka en bawk a, ani chuan," Inchhîr dâwn ni ila ka kawp hauh lo ang che, ka inchhîr lo, hma hun chu ka ngaihtuah thui lo; mahse, kalsan che ka tum lo, ka duh che alawm, ka hmangaih chein ka hre nghe nghe asin," a ti sep sep a.

A hnâr hmâwrah chuan ka fawhsak zoh a," Ka lãwm e, ka thlah hauh lo ang che," ka ti ve a, a zawhna chu chhâng zuiin,"Ka nihna hi ka nih loh dàn a ni maithei a, ka nih lohna hi ka nihna a ni thei bawk. Ka inpawm mai a; mahse, kan society-ah hi chuan hrehawm tih châng chu ka nei alawm, min en hrang lovin mihring ka nihna ang hian min en thei se chu ka ti khawp mai," ka ti ban deuh charh a.

Zan rei tak thleng chu kan titi dùn a, a zawhna min zawh rêng rêng chu ho viau mah se țha takin ka chhâng vek a, min zâwttunu hi duhawmin cute viau lo se chuan ka chhâng ho ve thei khawp ang.

Kan inkawp chho nghet zêl a, ka pa pawhin hmu tawhin a mamawh tùra a rin eng eng emaw a leisak leh ringawt bawk a, hetiang hi a ni ka pa awm dàn chu. A birthday -ah pawh a kawr tùr a lo leisak ve hmiah bawk a, a tih ve dàn a ni a, sawisêl mah ila a zàwm chuang lo. Kei pawhin a mamawh tùra ka rin eng eng emaw chu ka pe fo bawk, a duh lo ve țhìn ngei alawm; mahse, hostel-a awm a ni a, leina a nei lo ang tih vàng ni lovin a pawisa save-sak ka duh vàng  a ni, a nu leh pate'n thingtlâng ațangin an rawn chãwm vang vang si a. Ni tinin kan induhna a zual telh telh a, kan induh tawnzia pawh kan thup sêng tawh lo, khawlaiah pawh mi hmuh laiin Bike-in  ka phur ta fo a, nuam a ti thei khawp mai, a châng leh kan inah ka riahtîr thùl, kan tân chuan khawvël hi a pâr vul chûk a ni ber mai.

Vawi khat chu an hostel-ah ka tlawh ve ngei a, visitor's room-a kan ţhut laiin a second cousin, Lawngtlai lama miin a rawn tlawh ve bawk a, kan titi luam a, a cousin pawh chu a țawng duh khawp mai, kan pahnih chauha awm dùn ta chu min ringhlel dùn nghâl a ni ngei ang, nui uar uar chung  chuan min fiam dùn a, kan hlimpui phian mai.

Mahse, chàn loh khànah Chhani nu leh pate hnênah kan inkawp thu a lo hrilh a ni ngei ang, an ngaih dàn a lo ni lo nasa mai niin, a pa a rawn kal nghâl ta chûk chûk a ni ngei ang,  Chhani'n min rawn phone-in inhmuh a duh thu a rawn sawi chuan an hostel ka tlawh ațang ni lina chiah a ni.

Phûr takin kan inhmuhna hmun chu ka pan vat a, ka inuluk lehpek khawp mai, a hmuha mawi loh hi ka hlau êm asin. 

Kan inhmuhna hmun tùr ka thlen chuan Chhani hmel ka hmu mai lo, a rawn tlai deuh dâwn a nih ringin ka ding a, țhut pawh ka peih chiah lo. A lo thlen veleha lo din vat kha ka duh leh àwm si a, ka piah deuha putar țhu erawh chuan kan pahniha kan inhmuhna hun țha chu a dàl loh hrãm ka beisei.

Minute 5 a ral hnuah pawh a la rawn kal lo, ka sana chu ka bih deuh sek a, chutah, ka phone chu la chhuakin biak ka tum ta chhin a, eng emaw rokhawlhna pawh a nei thut thei si a, chanchin hriat vat ka duh, hruai pawh a ngai thut thei asin.

Ka piah deuha putar ipte ațang chuan  phone ri  chu a rawn ri chhuak ve ta chiah mai. Makti rilru tak chuan ka en a, chu putar pawh chuan a phone chu lain a hawi kual a, min rawn en ve ta chiah bawk a.

"Mami, ka fanu Chhani țhiannu i ni tiraw?"

Chhani pa a ni chiah e. Chhâng lovin ka lu ka bu ringawt a, min rawn pan hnai a, ka hmaah chuan dingin," Ka fanu nèn in inkàwm țhìn niin ka lo hria a, khawngaih takin lo kàwm tawh lo hrãm ang che, a rilru a thianghlimin a thil tih pawh hi a hre chiang hauh lo ang tih ka ring. Tûnlai mi hi ka hre thiam chiah lo che u a nih chuan min ngaidam la, kei chuan hetiang thil hi ka pawm thiam ve hauh lo. Ka fanu pawh hi inhnamhnawih tùrin ka duh lo, a dik lohna chen pawh a awm ang; mahse, min hre thiam la, lo kàwm tawh lo hrãm turin ka ngèn tak meuh che a ni. I kawm duh loh phawt chuan ani chuan a rawn tilui hauh lo ang che. Ka fanu upa ber a ni a, hmêlah leh nunah mi aia chungnung ni lo mah se ka chhuangin hetiang mai maia awm tùr hian ka la ngaihtuah chhin ngai lo, ka rilru a tina tak zet a ni, a nu phei chu zànah pawh a mu thei lo hial a ni, mipa dik tak chu ni la chuan ka dodãl miah lo ang che u; mahse, i ni tlat si lo,anpui kawp chu Bible pawhin a duh miah loh kha, chuvàngin, ka thu sawi hi ngun takin ngaithla la, ka fanu hi kiansan hrãm ang che, ka ngèn che a ni," a ti ta mawlh mawlh a.

Ka dinna lei hi inzial tup tup se, min zial hnanin bo daih thei ila ka ti kher mai, ka zak a ni, ka zak ngawih ngawih. Ka pa rual, ni lo, ka pa ai pawh upa daih tùrin chutiang thu sawia min han ngèn ta ngawih ngawih mai chu, ka zah avàngin ka bîng chum chum ni berin ka hria.

Ka room-ah inkhungin Chhani pa min ngenna thu zawng zawng kha ka ngaihtuah chhuak leh a, ni e, a thu sawi kha dik lohna a awm hauh lo. An fanu upa ber, an innghahna leh an chhuan ve êm êm chuan bialpa atân mipa nei lovin kei, hmeichhia ni bawk si lo, mipa ni bawk si lo min han nei a nia, an rilru a thianghlimin an hre thiam hauh lo ang, an rilru pawh a na viau tih a hriat mai. Thingtlâng ațangin an rawn kal vang vang mai a nia.

Ka inngaihtuah pah zêl a, ni e, chhuan tùr ka nei lo, mahni nihna ang ni lovin ka nung tlat si a, hei hi eng vàng nge ni ta le? Ka piangsual tihna em ni? Ka rilru hi a piangsual nge, ka pian chhuah dàn hi a dik lo zâwk? Mipa tùr kha tisa chuan hmeichhiain ka lo piang a, ka rilru leh ka inthuamna erawh mipa a ni thung si, ka duh ber pawh ka duh ber thei dâwn ta si lo. A pa kha ka zah lutuk tlat, a rilru tùr ka ngaihtuahpui a, ka dem rêng rêng lo, a tih tùr dik  a rawn ti a ni, ka zah ngawih ngawih.

Mahse, Chhani chu hmu tawh lo tùra ka indah chuan  hrehawm ka ti lutuk a, ka mittui pawh ka dang zo lo hial mai, ka ngai dâwn lutuk a ni. A rilru thianghlim tak leh a hmel duhawm takte kha ka hmu thei tawh lo ang a, ka hmu ngai tawh dâwn lo. Ka rilru a va na tak êm! Amah pawhin hrehawm a ti ve dâwn êm asin, ka thlâkhlelh ang tluk zetin min thlâkhlelh ve tho kha...

Engati nge mipaah ka lo pian mai loh? Mipa ka nih loh chuan engati nge mipa rilru ka put tlat si? A nih, mipa ka nih loha hmeichhia ka nih si chuan engati nge hmeichhia chu ka nih si loh? Zawhna hlîr mai, keimah chu ka inzâwt char char a, a chhànna lah ka hre der mai si lo.

"I va reh ve a? Thil thleng a awm em ni?"

Ka room kawngkhàra ka pa lo ding reng chu enin ka inhnît hraih a," Pa, engati nge mipaa ka pian loh? Engati nge? Tu thiam loh nge? Engati nge mipa ni si lo chu hmeichhia ka nih bawk si loh? Eng nge a chhan?" tiin țap țuau chung chuan ka zâwt ta a.

Ani erawh chuan ngawi rengin, țawng  hauh lo chuan min en tlawk tlawk ringawt a.

*KAN NUNA HARSATNATE'N MIN KIAN FELSAN HUNAH CHAUH HLIM KAN TUM TÙR A NI LO, HARSATNA KAN TAWH LAI MÊK PAWH HIAN HLIM CHU KAN TUM THO TÙR A NI*