☆OKHEE☆ - 10 By Dingdi Pachuau

 ☆OKHEE☆ - 10 By Dingdi Pachuau

Ka chau riau asin, ka lu a nâ ngut ngut bawk, ani nèna inbiak phei hi chu ka peih vak lo, kan inhnial leh emaw kha a ni ang a, ka țawng tuitam peih lo ang.

In chhûnga kan luh veleh chuan ka bag chu ka dah țha phawt a, țhu chuang lo chuan amah hmachhawn zâwng chuan ka ding leh nghâl a. Ani pawh chu a la țhu bîk chuang lo, inhmachhawn chuan kan ding dùn ta ràn a. 

"I sawi duh chu?" ka tih chuan," Țhu ve phawt ila, bâkah, in in meuha ka rawn kalchilh che chuan thingpui hlawh pha ve tùr ni chuan ka inhria," a lo ti ve thung a, a țawngka chhuakah chuan nuihza awka hriat tùr awm lo mah se a hmel leh mitmengah erawh a nuih a za deuh tih chu ka hria.

Mit khap sak sakin," Ka chau a nia, sawi thuai thuai zâwk ang,"ka lo ti thung a; mahse, sawi tùr ang pawhin a awm chuang lo, min en reng ringawt. A sawi ang deuh khân inah meuh min rawn kalchilh a, a rawn kal ve chhan, hna chungchâng min sawipui a duh chu thu khat lo ni ta se, a in pênga ka din duh loh vàng pawh kha a ni thei tho a, ka thiam loh a ni ve pah deuh bawk nèn, zawi zet chuan thingpui chhuang tùr chuan ka kal ta chhat chhat a. Ka chau tak tak, ka zawi viau bawk, ka tui loh ber mai hna ka thawk bawk nèn, ka lu pawh chu a na deuh bûr maiin ka hria, hnial vak lo mai teh ang, haw thuai teh se.

"Lo țhu rawh, ka lo chhuang ang," tiin min rawn kal pèl a, ding datin a che vêl chu ka en ta ringawt! A pa len ang aiin a che rang a, a che zung zung maiin ka hria. Ka dinna ațang chuan ka lo en reng a, chutah," Fridge-ah bawnghnute a awm ang," ka ti a, ani lah chuan," A sen hâng alawm ka duh," a lo ti mai a, lâk tum hmêl pawh a pu lo, a sen hâng min inpui a tum tihna a nih àwm chu.

Ka țhu a, ka maimichhîng ta vang vang a, tunah hi chuan mut thlawr mai ka châk ber a ni. Ka ril a țâm hran lo bawk a, thil pawimawh kan sawi zawh veleh, a haw hnuah ka mu nghâl vat ang. Vawiina ka hna thawh rei deuh vàng kha nge ni, ka dàr chu a kham țhûm a, ka chau, ka zawi bawk.

"I muhìl ringawt elo?" a rawn tih chuan ka meng chhuak vat a, dawhkànah chuan thingpui a lo hûng khu vung vung tawh a, ka muhìl lo chuan ka hria a; mahse, ka lo muhìl hman sek a ni maithei.

"Thingpui sen hâng ka in peih lo," ka ti sap a, ka lu chu dawmin ka bek chu ka hmet nap nap a, ani chuan,"In la, i harh sawt mai ang," a rawn ti thung a, thingpui no chu a rawn hûng hnai pah bawk a.

Intiharhin ka han ban nghâl a, a sa țha ver vawr bawk a, ka han in chhin chuan ka phu zawk mai, ka lei a kàng lo chauh a ni! He pa vàng vek hi, engah nge in tùra min tih tlat ni.

"Inbual harh hmasa la?"

"Hna chungchâng kha a pawimawh hmasa zâwk," ka ti a, ngil takin ka țhu a, ka intiharh lui hrãm hrâm bawk; mahse, ka mut chhuah dàn chu mak tak a ni.  Ani chuan," I awm dàn en hi chuan mut phawt i mamawh a ni, eng kan sawi hlei thei lo ang, mu hahdam phawt mai teh," a lo ti ve thung a.

Nizàn lama ka mut țhat loh bâkah vawiinah hna min pek tam vàng vek a ni, chhìn sek chu ka duh tak zet, tunah tak phei hi chuan inbual harh ai pawhin ka mamawh zâwk.

"Kan sawi dâwn lo a nih chuan haw tawh la?" ka ti sap a, haw thuai se mu thuai ila ka ti a ni.  Ani lah chuan," Thingpui ka la in zo lo," a lo ti ve thung a, chutah," Thil ei miah lova mut a țha ngai lo," ti lehin," Khawiah nge chhang in dah?" a ti leh nghâl zat a, ngaihtuah vak lêm lo chuan ka kâwk ve mai bawk a, ka kawhna lam chu panin a va la chhuak a, dawhkàna rawn dahin," Ei rawh, thingpui nèn khân hmeh la, i ei zawhah i mu chauh dâwn nia," a ti leh zung zung a.

"Ka ril a țâm lo," ka lo ti ve thung a, ani erawh chuan cake chu ka kuta rawn hmeh belin," Ei rawh, i ei zawh hunah i mu dâwn nia," a ti leh sup sup a, vawiin tlai zet chu hnial tùrin chakna pawh ka nei lo, ka chau, mut thuai thuai ka duh avàng chuan hnial lovin ka hmawm nghâl a, ka duh aiin a lo la lian zui a, ka khuh khak khak mai.

Ka hnungah a rawn chùm dat dat a," I hmawm lian êm bawk a ni," a ti leh sup a, chutah, dawhkàna tui chu novah chuan thli chhuakin min han pe nghâl a, ka han in hnu chuan ka zia ta, ka helh avànga ka mittui tla chu hruin," Sawi tawh rawh le," ka ti leh a.

"Naktûk lamah kan sawi mai dáwn nia, i chau a nih kha," tiin a tho a, no chu seng nghâlin a sil leh nghâl bawk a, eng mah sawi lo chuan a che vêl chu ka lo en zui reng thung a. Ka bulah rawn kal hnai lehin,"Mu hma la, naktûk zîngah chuan i harh vâk tawh mai ang," a ti leh a, kawngka lam pan chuan a kal leh ta nghâl a.

A pawi miah lo. A chhuah pah chuan dìm tê hian kawng chu a khãr nghâl a, țawngkaa thlah pawh tum lo chuan ka en zui ringawt a, a thãwm ka hriat loh hnuah chuan thovin kawngka chu ka va kalh a, ka room lamah ka kal ta nghâl a. Hmai pawh phih lo leh intifai lo chuan khumah chuan ka mu thla thlawrh a, rei lo têah chuan ka muhìl zui ta nghâl a.

Ka harh leh meuh chuan zàn dâr 9 a lo ri tawh a, tho lehin tui ka in phawt a, bathroom-ah lût lehin ka intleuh zawk a, ka hate nâwtin khum lam chu ka pan leh nghâl vat a, muthilh leh ka tum a ni; mahse, ka duh ang ngawtin ka muhìl thei ta mai bík lo, ka mu meng ta kar a, ka rilruin thil ka ngaihtuah kual a, vawiin khân ni dang zawng aiin ka thawk ngawrh ve a, bâkah, ka hna chu ning viau mah ila ka sawisêl ngai ta miah lo tih ka ngaihtuah chhuak zêl bawk a, ka pa zin hi ka tân a lo țha viau a nih dáwn hi, a rawn haw leh hunah pawh puih a lo ngai leh ta a nih pawhin ka pui ve zat zat thei tawh ang chu tiin ka ngaihtuah ta hial a.

Vawiin tlaia Hminga awm dànte chu ngaihtuah kai zêlin mak ka ti tih ka zêp lo. Ka chau tih kha a hre chiang ve ngang a ni ngei ang, min vìn lo va, thingpui lumin min thlit ve thlap a, a hmeh tùr nèn lam min chhawp thlap a nia, chutah, ka dinhmun hre thiamin hna chungchâng pawh min sawipui duh ta lo kha a nia, a awm dàn kha a mak ve ngawt mai, vawiin tlai zêt kha chu a awm dàn kha a 'mihring' ve tlat, bialpa mi care ru ve tak; mahse, 'ka care a ni' tih tilang thiam chuang hauh lo pawh a nih duh hmèl ve alawm.

A tûka ka thawh chuan ka harh ta vâk mai. Ka dàr kham țhûm pawh chu a zia viau, nimin tlai lam kha chuan spa-a kal ve mai pawh min ngaihtuahtîr ve lek lek dâwn alawm le. Ei tùr ka insiam rak rak a, chaw erawh ka ei peih meuh lo chu a ni. Ka pate zin ațangin in hnuainu pawh a rawn kal ta lo va, a chhan chu ka ei tùr chauh chu keimaha ka insiam ve theih mai vàng a ni. Ka nu chuan chaw ka ei ngai lo tih chu hria se chuan min hau ngei ngei ang chu, mahnia chaw ei te zawng, ka peih teuh lo, a tui mawh êm mai.

Hming-thingtlangate ka puih ve ațang chuan an chhùn chawlh dàn ka lo tibuai vek hi a lo ni a! Mahse, pawi ka ti hauh lo, ril țâm lêm lo mah se hna han thawh ngawr ngawr reng kha a țha ka ti thei lo, bâkah, pum a ngaihtuahawm lutuk tlat. Taksa han zîkmar hun pawh nei lêk lova hna thawka țhut ngawr ngawr reng chu taksa tân pawh a țha lo, an insawisêl vat mai dáwn asin.

Chhùna ei tùr pawh chu pawisa thawh khâwm diat diatin pakhatin a order ta mai a, chu chu a huhoin kan ei tlâng mai a, titihona hun kan neih phahin hna thawktute inkârah pawh inpawhna țha leh innèlna a awm phah zêl bawk a, an bulah pawh chuan," Ka awm loh hnuah pawh hetiang hian lo ti zêl rawh u, ka pa hi chuan a thawhtîr ngawt ngawt zêl ang che u tih ka hria a ni, a tih dàn a ni a, ani pawh hi thawk ngawt ngawt chi hi a ni ve a, in lo hre thiam dáwn nia," tiin ka chah ve hlawm a, Remruata chuan," Ni e, i pa hi chu a thawkrim hle a ni," a lo ti a, mi dang pawh chuan an lu an lo bu nghat nghat hlawm a,  hmeichhe awmchhun Thlengi chuan," A mal tê têa chawlha titipui tùr neih loh ai chuan hetia han eihova titiho hi a lo nuam daih zâwk a nih hi," a lo ti ve bawk  a, chutah, rawn thle hnai deuhin," Hotupa pawh i dah nîl hneh khawp mai," a rawn ti sà sá a.

Ka hriat thiam loh deuh avàng chuan ka en vat a, ani chuan Hminga lam chu a melh phei vat a, Hminga ka va en phei chuan a phone hi a lo en rùn rûn a chutah, a nui ta suk a. Eng a hmu chu ni maw? Lawm loha nui mi fing an awm lo an tih kha, a phone-ah chuan eng tak en ni maw? Ani hi, nula saruak thlalâkte hi a lo hmu fuh a ni lo maw?

Ka rin aiin ka pate hi an rawn haw har daih mai. Thla khat a tling mai dâwn ta, ka hna thawh lai hi ka nin vàng pawh ni chuang lovin an zin rei ta phian mai chuan ka ngaih a tițha lo lek lek, an damlo te hi a ni mai lo'ng maw le, nimin lama biak ka tum khân ka thei lo ve ve a. Lehlamah chuan anni hian nuam an ti lutuk ang a, min rawn hrechang tawh lo a ni ang a tihte ka ngaihtuah deuh rum rum bawk a; mahse, chu êm zawng ka ring meuh si lo, han biaka han zawh ka duh viau nain biak buai ka hlau ve tho a, anni lahin min rawn be khât ve angreng bawk si. Bâkah, ka biaka ka zawh chuan ka hna hi ning ta viau leh ka nin avànga lo haw thuai thuai tawh se ka tihna angah an ngai ang tih ka hlau pah ve bawk a.

Tlai khat chu," Ka pa nèn in inbe țhin em?" tiin Hminga chu ka zâwt ta tawp a, ani chuan min en vang vang phawt a, chumi hnuah chuan," Be meuh lo, tlêm lai deuha ka inbiak bâk kha chu," a lo ti mai a, chutah," I ning viau tawh a ni maw? Nge i ngai viau tawh?" a rawn tih zawm leh zat a, kei chuan," Naupang ka nih loh hi maw le," ka lo ti mai a, ani pawh chuan,"Chuti,  ngaihtuah duh suh, an zin dâwn khân hmun hrang hrang tlawh kual an tum thu kha a sawi ngei kha, bâkah, a la rei hran hleinem," a ti leh mai a.

Hmun hrang hrang, nuam an tihna tùr deuh nia ka rin kha kei ngei pawhin ka sawihmuh nual a nih kha, an zin chhuak ngai lo va, an ãm ve deuh pawh chu a lo ni mahna, chu pawh chu lo ni se, min rawn biak ve zauh zauh tal tùr hi a nia; mahse, ka pa pawh khân a sawi chiang viau mai chu a nih kha, chanchin țha lo lam an nei lo tùrah ngai phawt teh ang.

Tunah hi chuan a hma anga ngei leh a thu hnial tum ràn ang khân ka awm tawh lo va, a lakah thinrimna pawh ka nei tawh lêm lo, chuvàng pawh chu a ni maithei, ani pawhin min kalh záwng leh inhnialna țawngkam ang chi kha a phuh chhuak tawh ngai bîk lo, thawhpuite pawhin chhùna kan chawlhho châng pawh hian an fiam ve zauh zauh a, a nui ve suk suk ta fo mai. Hmeichhe awmchhun Thlengi hi a țawng duh ve a, ka bulah hi chuan a duh duh sawiin a țawng ve bawrh bawrh reng mai.

"I lo thawh hma kha chuan Halan-a hi chu fiam pawh kan fiam ngam lo, bâkah, hetiang hian kan chàwlho ngai lo bawk, a nui ve țhìn tih pawh ka hre ngai miah lo, ka ti tak tak, a hnaah hian a bûr ngur reng a, kan biak hmasak loh phei hi chuan nilêngin inbe lovin kan awm tihna a ni mai, a hnaah erawh hi chuan a țha thlâwt, a thawhrim ém avàng hian kan zelthel ngam lo bawk. I lo kal ve achinah hian kan inbiain kan infiam ngam ta chauh a nih hi, ka pu lo haw hunah pawh lo thawk reng tho rawh aw," a ti sar sar a, a la nau ve deuh a, a puak ve phawng phawng a ni ber.

"Kal tho maithei a ni," ka tih chuan," I țawng duhin i fel a, bãkah, Halan-a i ngam ber a, a thu te hi i duh loh záwng a nih chuan i hnial ngam bawk a, keini chuan țîk pawh kan ti ngam ngai lo; mahse, chhúngril lamah chuan a lo fel  ve viau tho sia, a hlauhawm pawh ka ti ta vak lo; mahse, lo kal ziah tho  rawh aw, hmeichhia titipui tùr ka nei lo sia," a ti leh barh barh a.

Hna kan țan hma chuan ka pa room-ah chuan lûtin biak tumin a number chu ka han hmet chhuak a; mahse, switch off a ti tlat mai a, chutah, ka nu number chu ka han try leh a, a ring ta ral ral a, a la ngei tawh ang chu maw...

"'Hello?"

Ka thaw nghâl huai a," Nu, ka rawn tibuai che u em?" ka ti tê tê phawt a, ani chuan," Buai lo ve, i țha maw? Chaw i ei țha em?" a rawn ti nghâl vat a, kei pawh chuan," Țha e, khami lamah kha chuan min ngaihtuah suh u, nangmahni kha ka ngaihtuah deuh zâwk che u a, Father-a number kha ka rawn try hmasa a, switch off a ti tlat a, in țha zâwk maw? Kan inbe khât sia," ka ti luam a.

"Țha e, min lo ngaihtuah suh, i pa pawh a țha, chuan, a phone a charge daih niin ka hria," a rawn tih chuan,"In țhat chuan a làwmawm a nih chu, hlim deuhin hun hmang rawh u, tunah khawi lai takah nge in awm a?" ka ti leh a, ani chuan,"A, tunah tak hi chuan Vellore-ah kan awm," a rawn ti leh a, Vellore ber kher chu, ka lo ti rilru a, chutah," Pa chu a awm hnai em? Ka lo be ve rêng rêng  teh ang," ka ti ta zâwk a, ani chuan," A awm hnai lo, pâwnah a kal chhuak ta rih niin ka hria," a ti ban deuh chat a, kei pawh chuan," A, a ngai chuang lo, kan inbe khât êm a ka ti mai mai a nia, nang ka biak chuan ka pa bia ang tho alawm ka nih, hlim deuhin min ngaihtuah miah lo khân hun hmang zêl rawh u, hna pawh ka thawk țha lutuk tih ka pa chu i lo hrilh dâwn nia," tiin ka nui hak hak a, ka nu pawh chuan," Aw le, ka lo hrilh ang, i duh ang ngawr ngawra awm lo khân Office leh hna thilah chuan Halan-a thu kha lo zàwm la aw, i pain a rin êm kha," a rawn ti leh a, kei pawh chuan," Aw le," ka ti ve mai a.

Ka chhuah chuan pâwnah Hminga chu a lo ding reng tawh a, phone-in mi a lo be ve a niang, ka chhuak hnu chuan an inbe tàwp ve nghâl mai a, chutah," I pate chu i be thei ta em?" a lo ti dût a.

"Aw, kan inbe zo chiah a; mahse, ka pa ni lovin ka nu a nia ka biak," ka tih chuan min en leh vang vang a, chutah," An dam țha maw? Lo haw an tum hnai àwm em?" a ti leh a. Kei pawh chuan," Um, Vellore-ah an awm mêk a ni àwm e, an lo haw hun tùr erawh ka zâwt duh lo ta mai," ka ti ve thung a.

Tlaia kan bàn chuan," Ka lo chuang haw ve mai," tiin car-ah chuan a lút ta thurh a, ka luh hma hmaa a lût chu ka ngei țhelh a ni; mahse, chutiang ngaihtuah duh lo chuan," Engati nge lìrthei hi i ngaihven loh a?" tiin ka zâwt ta zâwk a.

"A ngai hran hleinem," a lo ti mai a, kei erawh chuan," Ngai ve e, fùr lai phei chuan thuamhnaw a huh duh alawm," ka ti leh a, min chhâng tawh lo, kei pawh chuan ka sawi chhunzawm ta bîk lo.

A in luah zâwn kan thlen chuan min dintîr a," Khawi lai ber hi nge i luah chu?" tiin ka zâwt a, a hmaa ka thlah ve khân ka zàwt lo va, ka la hre miah lo a ni. Ani chuan," Khi khi," tiin a kâwk a, chutah,"Lo lût ve chhin la? I la hmuh loh kha," a ti leh a. Ka han thlêk a, building hnuai a ni a, step-a chhoh hleka thlen theih  a nih avàng motor chu hûng remin kan chhuak dùn ta a.

Tlangvâl senior in luah tih takah a lo enkawl nuam phian roh mai. A zau hran lo nain in chhûnga bungraw awm tùr ang chi chu a lo awm kim ve biai a, building hnuai mah ni se êng a hmu țha a, nuam ve reuh tak chu a ni.

"Lo țhu rawh, in tùr ka'n siam ang e," a ti a, long chair-ah chuan țhu thlain ka hawi kual a, chutah," Luah manah eng zât nge i chawi?" tiin ka zâwt zui nghâl a, ani pawh chuan țha takin min lo chhâng ve nghâl a, a che ruk ruk pah reng bawk a, kei pawh chuan," A tìr lamah ka pa bulah sawi la chuan kan in hnuaiah pawh a luah theih reng àwm sia?" ka ti ve leh a.

"Hei hi ka inhmeh tâwk viau ka lo ti mai asin," a lo ti mai a, chutah, coffee no hnih hi tray-a rawn chawi pheiin ka hmaa dawhkàn lian vak loah chuan a rawn dah a, ka lo pui ve vat a. A coffee siam chu a tui hmel khawp mai,  tui kha a la lum hman àwm tawp si lo va, flask-ah emaw a lo dah sa a ni ngei ang.

"A tui hmel kher mai!" ka tih chuan," Tui ang," a lo ti ve leh mai bawk a, ka han in chhin hlek a, ka rin dàn chiah a ni, a sa țha viau bawk nèn, a tui vawng vawng ni berin ka hria.

"Tui lutuk!" ka tih chuan a lo nui suk a, tho leh nghâlin hmeh tùr bakery chhang a rawn keng phei leh a, ka hmaah chuan rawn dahin," Ei rawh," a rawn ti leh sup a, kei chuan," Ka duh vek bïk lo, ei ve rawh," tiin pakhat chu ka la a, a plate chu a lamah chuan ka nawr phei ta nghâl a.

Țawng rih lo chuan coffee chu kan in a, thlang lama motor tlân thãwm tih loh chu thãwm a awm lo, chutah, amah nèn chauh a in luahah kan awm a ni tih chu ka ngaihtuah chhuak thut a, eng emaw hlauhthàwnna ka nei deuh nghâl thut bawk, min sàwm avàng maiin a inah ka zui lût ringawt a nia, thil țha ber a ni ang em? Thil dang ngaihtuah duh vàng chuan," I chhûngte an dam țha maw?" ka ti ta ringawt a, amah nèn chauh kan awm dùn a ni tih lam chu ngaihtuah loh hrâm ka duh.

"Um..."

"A nih, Sêna?" ka ti leh a," Aw," a lo ti leh mai a, min chhâng tãwi ve bawk si a, zawh chhunzawm tùr pawh ka hre tawh lo; mahse, amah zâwk chuan," I chanchin min zâwt a," a rawn ti ve leh ta a, a zia leh deuh e.

"A ngaihawm ve reuh mai mai, heta i awm hnu hian a rawn zin phei ve tawh em?" tiin ka zâwt leh a, ani chuan," Vawi khat chu ka rualin a rawn phei a, kumin Krismas dâwnah hian a rawn bazârin ka ring," tiin min chhâng a.

"I haw phei ve ang tiraw?" ka tih leh chuan," Maithei," ti chauhin min chhâng a, ka en phei vat a, min lo en reng tawh thung a. Zak ru deuh hlek mah ila tilang duh lo chuan," I ngai ve țhìn ngawt lo maw?" ka ti ta vêl mai mai a, ka hawi sawn leh nghâl daih bawk a.

"Ngai lêm lo; mahse, huan leh leilet erawh ka hmu châk," a tih chuan rang zet hian," Kei pawh ka kal leh châk ngawt mai, luiahte khân ka kal leh châk bawk a," ka lo ti ve vat a. 

Coffee kan inna no chu ka tleuh a, chutih lai chuan ka hnungah a rawn ding ve niin ka hria, eng nge a rawn tih tih hre tùr erawh chuan ka en ngam miah lo thung, ka ngaihbel nge ni ang pawh ka hre lo, ka hnunglam chu a lum ham ham thei hialin ka hria!

"Lawmi?" 

Ka inher chuan kan inhnaih lutuk dâwn si a, ka din ngaia ding reng chung chuan," Um..?" ka ti sap ringawt a, ani chuan," Engati nge  i hmingah hian 'Lawmkimi' tih i nih?" a rawn ti ve ta daih thung a! A fiamthu thawh ve dàn chuh! 

"Ka nu leh pain ka hming atâna an sak a nia," tiin nui deuh chung hian ka chhâng a, ani chuan," Tu emaw làwmna tikimtu i la nih ngei ringin an sa a ni ngei ang?" a rawn ti leh ta, hei zet chuh, a inla zei mah mah a ni.

"Nang pawh Hmingmuanpuia i nia, i hming hi an thlamuanpui tihna em ni ang?" nui chung chuan ka ti a, no ka dah fel tawh avàng chuan ka inher a, ka hmaah tak chuan a lo ding reng tawh niin.

"I hmel țha ngawt mai!"

Eng thil nge a sawi chhuah tâk hi? A kawr âwm zâwn chu ka melh ràn mai a, a mitah pawh ka en chho ngam lo, hmaichhana tlangvâl senior-in hetiang min han sawi khum zet zawng, tlangvâl chhuak hlawt Sêna sawi ang ngawt chu a ni thei ta hauh lo mai, a mi deh dàn a dang zak bîk mai ka ti.

"Dâwt sawi suh," ka ti sap ngam țâwk a, kal sawn ka duh viau nain amah ber chu ka kalna dâlin a ding tlat si a, ka tâng a nih ber chu.

"Bialpa i nei lo tiraw?"

*THIL ȚHA ZÂWK NIA KAN HRIAT KAN ZAWN FO ȚHIN AVÀNGIN THIL ȚHA BER KAN NEIH TAWH SA RENG PAWH HI KAN HRE CHHUAK LO FO ȚHIN*