☆OKHEE☆ - 11 By Dingdi Pachuau

 ☆OKHEE☆ - 11 By Dingdi Pachuau

Chhâng lo chuan ka en ringawt a, rei erawh ka en lo, chhàn ngai pawh ka ti hran lo, Julian-a kha ka bialpa emaw a ti khân ka hre sia, tunah lah bialpa ka nei lo nia hriain min zâwt leh bawk a...

"Ka haw tawh ang e," ka ti ta daih a, kawng dàla a din avàng leh a chêt sawn bawk si loh avàng chuan a chêt sawn hun chu ka nghâk deuh det a; mahse, chutiang tih tum hmel pawh a put loh avàng leh min en ngur si avàng chuan a dinglam sîra inhnawh phei tum chuan ka saisîr phei ta nghâl a.

Inher ve nghâlin ka hnunglam ațang chuan min kuah bet ta tlat a, a tìrah chuan mak ka tih avàngin tàl nachâng ka hre lo va; mahse, a hnu lawkah chuan ka tãl ta laih laih a, min kuahna kut chu phelh tumin ka bei fat fat bawk a.

"Lawmi..."

"Hminga, min thlah teh!"

Min thlah ve mai bawk a; mahse, ka kutah erawh a la chelh tlat thung. Chu chu phelh tumin ka han țang leh a,"Min thlah rawh, chuti lo chu ka au vak mai ang," ka ti leh a, chu chuan a nuih a tiza a niang, a nui hawk a.

"Min ko leh lawk teh," a ti dût a, ka kut a chelhna pawh chu a la thlah duh chuang lo, kei chuan," Eng atân?" ka ti ve thung a, ani chuan," Min ko leh mai teh," dam dup hian a lo ti ve thung a.

Ka ko duh lawk lo va; mahse, min la thlah duh chuan loh avàng chuan," Min thlah rawh, Hming-senior," ka ti ta vak a, a phun deuh hluk a; mahse, min thlah ve nghâl tho a.

"Ka hmingah 'senior' tih kha a tel lo a nia," a ti sup a, chutah," Ka hming i lam rîk dàn kha ka duh zâwng tak a ni," a ti zui leh zat a, ka rilru erawh chuan," Hming-Senior-a ka ti mai mai che a nih zâwk kha, a dik takah chuan Hming-thingtlânga i nih kha," ka ti țhuai țhuai thung a, ka bag chu la nghâlin," Ka haw dâwn," ka ti nghâl vut a.

"Biak duhna che ka nei, zaninah ka rawn kal ang," a tih leh chuan," Ngai lo," rang zet hian ka lo ti a, kawngka lam pan chuan ka kal nghâl sawk sawk bawk a, a nui hawk ri chu ka hre zui nghâl zat nain hawi lêt ka tum lo, a tider a ni ngei bawk ang chu, ka tukkhum chu a hik map mapin ka hria, min en zui reng a ni ngei ang.

Car-a ka luh hnuah pawh chuan ka hawi lêt hauh lo. Ka lungphu a zia deuh thleng chuan ka thaw hawk hawk phawt a, chumi hnuah chuan ka tlân chhuak ta chauh a, min fâwp lo hlauh chu ka lãwm khawp mai. A in a ni lehnghâl a, a duh dàna ka awm kha a fuh lo.

Hmel țha min ti. Ka nui sak a, hmeichhe lam a ngaihsak loh hmel tehlul nèn, hmel țha min tih thu a sawi leh tlat mai a, a daw hauh lo ang, a daw tùr a ni lo, dâwt chu ni lo hrãm rawh se... Mahse, hmel țha min tih avàng ngawtin min duh tihna pawh a ni chuang nâng, ka thinlung chhûngril erawh a hlim ru veng veng tho nia.

In ka thlen veleh ka inbual phawt a, ni danga ka tih ngai loh ang takin rawng ka bâwl bawk a, chaw ngei ka chhùm ve bawk a, zanin chu ei ve ngei teh ang. Zaninah rawn kal a duh thu kha a sawi tak kha maw, a rawn kal ang em? Chaw hi ei hma ve deuh ila, a rawn kal tak tak tâk hlauhah...

Chaw ei khamah chuan nghâk titih pah deuh chuan ka room-ah ka awm a, dârthlalangah chuan ka inen vang vang a, khawi lai tak hi nge țha min tih lai tak chu ni ang? Ka mit, ka hnâr, ka hmui leh ka khabe chu ka en thla dan dan a, khawi lai ber hi nge ka hmel țhatna chu ni ang tiin ka en kual deuh reng a, ka hmu thiam lo, a hnu deuhah chuan  mascara chu la chhuakin ka mit chu ka han hnawih chhin a, ka inen leh a, khap fak fakin sîr zâwng chuan ka inen leh a, inhmeh dâwn riau hian ka inhre thar pek a.

A lo kal dâwn lo tawp a nih hi, tunah dâr 8 a pèl tawh a nia, min tihder a lo nih chiah hi. Hmel țha kha min ti bawk tak a, kha pawh kha dâwt bawk niin min tihder leh tho a lo nih dáwn kha.

A tûkah chuan lungawi lo ru deuh chuan ka chhuak a, mahni thu sawi pawha ding nghet lo mihring hi chu ka ngaithei vak tawh lo, engati nge ka lo rin ve leh viau ringawt ni? Mipa hi chu an rintlâk tak tak lo tih kha ka hre chiang viau tawh kha a ni si a.

Ka hmaa tih tùr awm chu ka thawk mawp mawp a, mi dang nèn pawh kan inbe lo. Chhùn chawlh hunah pawh chuan ka țhutnaah chuan ka la țhu reng a, Hming-thingtlânga bula chawlh chu ka duh lo a ni, ka share tùr erawh ka la tho.

"Chàwl rih rawh," a rawn tih chuan ka bulah a lo ding reng tawh tih ka hre ve chiah. En duh lo chuan," Ka ril a țâm lo," ka ti mai a, ka thawh lai chu ka thawh chhunzawm mawlh mawlh tho a, rawn kûn hniamin," I ril a țàm loh pawhin ei luih tum rawh," a rawn ti leh sup a, min rawn hnaih ka duh loh avàng chuan ka tho nghâl thuai a, ei tùr leh in tùr chu lain ka kal sawn ta nghâl bawk a.

Tlai dâr 3 rîk hma hret chuan ka phone a rawn rì a, ka lo mute lo palh hlauh a lo nih hi, mi dang a tìhbuai hman loh hrâm ka beisei, ka han en vat a, number ka save loh ni mah se rîk reitír ai chuan ka han chhâng nghâl a, min rawn betu aw ka hriat rual chuan ka țhu khawng nghâl awt maiin ka hria!

"Lawmi, hmuh che ka va duh tak!  Ka hmu thei che ang em?"

Zorema a ni a, a aw ri ațang chuan ruih a nei a ni maithei a ni, ruih nei pawh ni se a aw ri chhuak chu ka hai lo hrim hrim, khati khawpa min tizaktu kha a ni tlat si a.

"Thei lo ang, kan inhmuhna chhan tùr a awm tawh lo," ka ti chang fak a, ka awmna hmun ka hre lo țêp a ni, ka țawng chhuak nèlawm lo zet chu mi dang pawh chuan an hre ngei ang, pawi lo mai teh se. Engtin nge maw ka number chu a lo neih theih ni, a hlui kha ka hmang tawh miah si lo va.

"Khawngaihin, Lawmi, inhmuh remti hrãm rawh," a rawn ti leh a, kei erawh chuan insehruh țûn chung hian," Ni lo, duhtâwk rawh, min rawn be tawh suh," tiin phone chu ka hmet tàwp a, thinrim ru zet hian ka phone chu ka melh ngar mai, min kalsantu hian min rawn hnaih leh hi ka duh lo, a hmel hmuh leh pawh ka duh tawh chuang lo, inhmu tawh miah lo ila ka hlim zâwk ngei bawk ang.

A hnuah pawh chuan ka rilru ka sâwrbing hlei thei ta tlat lo, tho thuaiin veranda-ah ka va chhuak a, ka va thaw hawk hawk a, ka thinrimna chu thâwk chhuah vek ka duh a ni. Min rawn be leh ngam chu huaisen ka ti a, min hmuh a duh chhan tùr pawh chu ka hre thiam lo, nupui a nei tawh nghe nghe a, kei ni lovin amahin kawppui a nei a ni a, min rawn hmuhna chhan tùr a nei lo hrim hrim.

Message a la rawn thawn zui leh hrâm a! Chhiar pawh chhiar lo chuan ka delete nghâl daih bawk, a number chu ka block dâwn ûk ûk a; mahse, 'êm a' ka ti leh ta deuh a, ka ti ta êm lo.

Nizàn ațangin ka rilru a dik lo chho tawh a, ka țawng tlêm khawp mai, tunah phei chuan thinrimna tùr dang ka nei leh tawh bawk a, hna pawh thawk zo lo chuan ka haw ta daih nghe nghe a, Hminga pawh ka hrilh chuang lo, ka hãw tawp a ni mai.

Inah chuan ka ngaihtuahna kàwmin ka țhu reng a, hun kal tawh chu ka mitthlaah a rawn lang chuai chuai a, nunhluiah ka lêt leh a nih ber chu. A pa hrisèlna check-a Vellore a kalpui khân an vênga mi  nula chhe lo zet, contractor hausa tawntaw fanu, a nu pawhin mo atâna a duh hluah hluah a kal ve a, Zorema ka duh ve tawh êm avànga ka mit lo delzia kha kan ințhen hnu ațang chiah khân ka hre chhuak ve chiah a ni. A nu khân mo atân min lo duh hauh lo tih pawh kha ka lo hre hauh lo thei a nia,  ka ni lo ta rêng bawk a, engtin nge ka bulah khân a lo inthup theih viau aw ka ti ru țhin, tûn hnua ka ngaihtuah pawh hian a inthup thiam ka ti ve thlâwt a ni.

Kan in awmna a hre chiang nasa mai si a, ani hi, zànah hian rawn lèn a rawn tum mai lo ang maw? A rui țhìn a nih hlauh phei chuan zahna a nei dâwn hauh si lo va, chutah, ka nu leh pa zin bo lai a ni zui, hlauhthawnna mak tak chuan min rawn tuam a, tho vatin kawngkhàr chu ka va kalh teh ngawt a.

Thil dang ngaihtuah ka duh avàngin ka room-ah kalin games ka khèl a, thil țha lo pui pui suangtuah kha ka duh lo a ni, chutih lai tak chuan kan doorbell a rawn ri ta ral ral mai! Ka thil khelh lai chu ka tàwp chawt a, tu tak ni ang maw? Zorema a ni ngei ngei ang chu, ka hawnsak lo tawp ang, doorbell chu a rîk chhunzawm leh a, chêt sawn ka tum lo, ka hlauhna avàng chuan ka thâ chu a khùr deuh dar dar a. Chutia che lova ka ngaihchàn kar lai chuan ka phone a lo la ri zui zat a, ka phu zawk mai! Mahse, Hming-thingtlânga hming ka hmuh tâkah chuan ka thaw deuh huai a.

"Eng nge?" ka ti ringawt a, ka aw chu khùr lo tùr chuan ka thunun hrãm hrãm a, lehlam ațang chuan," I awm tiraw? Kawng lo hawng teh," a rawn ti dût a, doorbell rawn hmet ritu kha a ni ngei ang chu.

"Eng nge i duh?" 

"Lo hawng phawt la?"

Ka chhuak phei ta nge nge a, ka hawnsak hma chuan ka tha khùr tihreh tumin thâwk ka la hawk hawk phawt a, ka kut ka hûm ruh vak bawk a, chumi hnuah chuan ka hawnsak ta chauh a.

"I țha em?" Ka hmaah tak chuan a ding a, en duh lovin sîr lam chu ka hawi a," Eng nge i lo tih dâwn?" ka ti ve thung a. Amah ka en chuan ka mitmenga hlauhna awm chu a hmuh ka hlau a ni.

"Min en phawt teh," a tih pawh chuan ka en duh chuang lo, kal hêlin filter-a tui chu ka va in ringawt a, min rawn zui a ni chëk ang chu," I țha tak tak em?" ka bul lawka a rawn tih leh dût chuan ka phu lo chauh a ni! Ka âwm chu dawmin ka maimichhîng vang vang phawt a, chutah, mengin ka han en chho a," Ka țha, eng nge i lo tih dâwn sawi thuai mai zâwk teh," ka ti ta zêk a.

"I tûkchhuak a fuh chiah lo a ni tiraw? Chuan, vawiina phone call i dawn hnu ațang khân i dik lo zual bawk a, i hna pawh thawk zo lovin i haw ta daih a," dam dup chuan a rawn ti chhuak ta a. Kei chuan," Naktûkah ka thawh zawm mai ang," awlsam zet hian ka lo ti ve thung a.

"I pa khân an zin chhûng chu lo ngaihven tùr chein min chah a-" a tih lai mëk chuan," Ngaihven ka ngai lo, ka lãwm e, naupangchhia mai ka ni tawh bîk lo," ka lo ti hmanhmawh a, țawng chhunzawm lo chuan min en ta reng a.

"Ka pa chuan a lo chah che pawh a ni maithei; mahse, hei ngaihven ka ngai lovin ka țha tih chu i hmuh ngei ka beisei, chuan, min hawsan thei tawh ang em? Mut pawh ka duh thei a, a nih loh pawhin, inlêng pawh ka lo beisei thei tho va, chumi thleng thleng erawh chu ngaihven tùrin a tih loh hrãm che ka beisei," ka ti leh sak a, țawng nuam ka tih êm avàng chuan țawng zo vek rawh se min ti a niang, ngawi reng chuan min en tawp ringawt.

"Hna ka thawk a, ka theihtâwp chhuahin ka thawk ve bawk, chu chu a tâwk lo em ni?  Ka thawh aia thawk nasa tùrin min duh tihna maw? Ka pa hnêna ka lo sawi tawh vàng chauha rawn thawk ka ni, ka peih leh ka phùr viau vàng niin i ngai em? Ka ning asin, ka ning ngawih ngawih; mahse, ka phunnawi hauh lo, ka pa hnêna ka lo sawi tawh vàng chauh a ni," ka ti leh mawlh mawlh a, maimichhîngin thâwk ka la leh ham ham a, engtiziaa a bula ãng chiam nge ka nih ka inhre thiam chiah lo, thàwl erawh ka thâwl deuh hawk chuan ka inhria.

Ka țawng chhunzawm tâk loh avàng chuan," I sawi zo tawh em ni?" a lo ti dam ruih a, a aw chhuak dam reih ruih lutuk chu ka ngei tawp. Kei ka ãng bawrh bawrh a, a chungah ka thinrimna ka hrithla a, thinrim awka  chhuak ve hauh lova dam taka a țawng thei bîk chu ka ngei a ni ber ang chu.

"I àn bawrh bawrh lai pawh khán i hmel chu a la țha tho a nih kha," a rawn tih leh sup chuan inpetruh țeuh chung hian, rum zetin ka melh chho a, a lo nui suk duh chauh, ka melh dàn leh ka lungawi lohnate chuan amahah chuan awmzia an nei hlawl lo a ni ngei ang.

Zorema hmel a rawn lang ta lo ve. Min rawn biak erawh a tum leh ngei a; mahse, ka lo chhâng duh lo thung, message pawhin min rawn ûm zui hran ta lo, a beidawng ve rih pawh a ni mahna. 

Inrinniah chuan intithawvengin ka pite ka tlawh a, min lo làwm thiam khawp mai. Chutih rualin, Zorema chanchin kaihhnawih lam rëng rêng chu an sawi chhuak hauh lo va, nupui pasal chungchâng pawh an sawi lang hauh lo. Rei mawi tâwk tak ka lèn hnu chuan Martha-ite chhûngkua tlawh tùrin ka tlãn chhuak leh ta a.

Hming-thingtlânga chuan ka kal dâwn tih a lo hre sa em maw ni tih tùrin a lo awm reng tawh mai a, min lo hmuh veleh Martha-i chuan," Nangni pahnih hi, in rawn intiam rual a ni lo maw? Rawn kal dun in zak a ni chiang mai," a lo la ti chùl zui a, ka melh rulh ringawt. Ani lah chuan," Sawmkima pawhin a sawi a sawi che u a, rawn lang har tawh a ti riau che u a," a ti leh malh malh a.

Zanriah ei ve nghâl tùr chuan min sâwm viau nain ei ka tum lo va, chutiangin Hminga pawhin a lo hnial ve a, Martha-i pawh titipui tehchiam lo chuan Harriet-i chu ka chhaih mai mai a, a nui uar uar reng a, chhaih dàn thiam viau lo mah ila min nël ve êm êm a, a duhawm bawk si nèn, kei pawhin ka duh êm êm tho a ni.

Kan haw tlâng leh ta ngei a, hei pawh hi Martha-i vàng vek a ni, ka dâwnah," Halan-a hi phur haw ve leh nghâl mai la, a tân motor chàn a buaithlâk tho sia," a tih vàng a ni, ka tân hnial a nuam si lo va.

'Chhuah remchàn lai' tiin motor hùnna remchâng laiah dingin damdawi dàwrah ka lût a, ka thil lei tùr chauh ka ngaihtuah lai chuan dàwr neitu leh nu pakhat inbe ri chuan ka beng a verh ta zar mai, a chhan chu Zorema hming an sawi lan vàng a ni pakhat a, ka mitsìr zauh a, dàwr neitunu lo zâwk chu Zorema nu lo niin, en lo mah ila min lo hmu reng tawh a ni ngei ang.

"Min zah thiamin mi neinung tak fanu a ni bawk a, awm dàn mawi leh chêtphung pawh a hre khawp mai, inti hausa ve satliah fanu chu a ang lo khawp,  kan fanu ni tùe liau liaua lo piang niin ka hria. A pasal Zorema lah kan fa upa ber a ni a, upa ber nupui nih pawh a thiamin a nauteho pawhin u ang tak takin an en ve bawk," a ti bawrh bawrh a, chutah," Kan nei fuh cher cher a nia aw, a thil phal si, en la, hêngte hi min leisak vek a nih hi," tiin a rangkachak țhi leh zungbun chu dàwr neitunu chu a hmuh a.

Damdawi ka leia a mante kan inpëk fel lai chuan," Lawmi, nang i ni maw? Pasal i nei ve tawh em?" tiin min rawn bia a, biak loha inhmuh lohtir hrâm ka tum asin le; mahse, chutia min rawn biak tâkah chuan amah hmachhawn chuan ka ding ve ta auh a.

"Nei lo ve."

A nui var var a,"Nei ve thuai ta che le, tûnlai nulaho hi chuan zah hi an hre tawh lo, lèn rei hian nu leh pa leh chhûngte phurrit kan siamsak tel a ni tih hi zu ngaihtuah duh hauh lo hlawm chuan, intihtheih nân tak te hian an hmang lehnghâl a," a ti leh bawrh bawrh a, kei erawh ka ngawi reng thung a.

"In ințhen dànah Bawiha dem viau suh ang che, phû tãwk leh mahni awm dàn phung mil hi zawn thiam a ngai viau asin, phû tâwk hi kan hai ve fo a nia, bâkah, fanu neihchhun mo atâna neih hi mi hian kan châk tehchiam lo," a rawn tih leh tâkah chuan ka ngaithla chhunzawm duh tawh lo, ka țawng chhuah ve hlauh chuan nakina ka zahna zakhua tùr ka thlen palh ang tih ka hlau, nula ka la ni bawk si a, ani zawng a duh duhin țawng mai mai teh se.

Motor-a ka luh hma chuan ka thaw hawk hawk phawt a, ka lût ve ta chauh, min be lo hrâm se ka ti khawp mai, ka thinlung hi a tâwt țûn mai si a; mahse, ka hmel ațangin a hre thiam pawh a ni ve mahna, a țawng miah lo tlat.

Ka tlàn chhuah dâwn chuan ka phone chu a rawn ri leh rih a, number ka save loh bawk a ni; mahse, ka han chhâng hrâm tho a.

"Lawmi, in kawngka bulah ka awm a nia, khawiah nge i awm?" a rawn ti leh ta! A aw ațang chuan a rui tih hai rual a ni lo.

"Haw rawh, eng mah rawn tih tùr i nei lo," ka ti țhat a, a nuin min țawng khum zo chauh a, tunah aniin rui chungin min rawn be leh a, ka dawhtheihnain a tlin lo, an duh duha țawng khum tùr ka ni bîk lo, hun kal tawha mi an la ni zui.

"I rawn haw hun ka lo nghâk ang che, biak che ka duh a," a tih leh chuan," Haw nghâl rawh, inbiakna chhan tùr kan nei lo ka tih tawh kha," ka ti leh a, ka rilru tak tak ka sawi a ni, mualpho ka duh hauh lo, ani ruiina min rawn tàwng pawh ka duh lo, ka lo chapo deuh pawh a ni maithei, ani hian a duh hun huna min rawn biak tùr ka ni lo hrim hrim.

"Lawmi, ka hmangaih che."

Ka phone chu ka vawm bur lo chauh a ni, thinrim zet hian ka hmet tàwp nghâl vat a, inhûmruhin ka insehruh țeuh bawk. A thil sawi chuan ka nuih a tihzat lohzia chu pui tak a ni! Thinrimna hlîrin ka khat a ni mai, heti khawp hian min lo hmusit a ni maw?

*HUN HIAN HRINGNUNA KAN DUHTHUSÀM ANG TAK HI RAWN HER CHHUAHPUI LO MAH SE, KAN NI TIN HUN HI CHU A ȚHA THEI ANG BER ZÉLA HMAN KAN TUM HRÂM HRÂM TÙR À NI*