☆OKHEE☆ - 12 By Dingdi Pachuau

 ☆OKHEE☆ - 12 By Dingdi Pachuau

Ka maimichhîng vang vang a, ka thinrimna chu tihreh tumin muangchângin thâwk ka la leh ham ham bawk a, ka thinrimna tihreh phawt a ngai, heti chunga motor ka khalh chuan ka chesual mai ang tih pawh ka hlau hlel lo ve. Vawiin zet chu boruak a fuh lo vêl vek, a nuin min țawng khum a, tunah amah lahin rui chungin min rawn be leh a. Eng thil nge ka tih bîka hetia min han tihbuai leh tâk viau ni? Kum hnih kalta chhûng khân vawi khat tê pawh ka tibuai hauh si lo.

"Thâwk kha la vak la, muangchângin thaw chhuak leh riai riai ţhìn rawh."

Ka bulah Hminga a awm tih ka lo theihnghilh dêr tawh niin, ka meng chhuak a, amah pawh en chuang lo chuan hma lam chu ding takin ka en a, ka hmui chu ka pet fan fan a.

"Ka sawi ang khân han ti chhin teh," a rawn tih leh sup chuan maimichhîng leh nghâlin, a sawi ang chuan thinrim țûn chung chuan thâwk ka han la vak a, chuap khat hnawk tùrin, chutah, muangchâng hian ka han thaw chhuak leh ta a, chutiang chuan  vawi nga vawi ruk vêl ka ti a, chumi hnuah chuan ka meng chhuak ta nghâl a.

"I zia tawh em?"

Țawngkaa chhâng lo chuan ka lu chu ka bu deuh zauh ringawt a, ka zia ve deuh hlek tawh tak tak alawm! Tunah chuan motor pawh ka khalh thei tawh ang.

A in pêng chho thlen hma chuan traffic a jam tho bawk a," Hetah hian chhuk mai rawh, ka thlah lo mai ang che," ka ti sap a, ani erawh chuan," Vawiin chuan ka thlah ve thung ang che," a lo ti sup thung a, chutah," Bodyguard pawh i mamawh maithei asin," a la ti zui a, țhen sak chung hian ka en phei a, a lo nui ve hauh lo, en pawh min en lo chuan kan hma lam chauh chu a lo en ngur a.

"Buaina ka duh hauh lo," ka tih chuan," Kei pawhin le," a lo ti leh sup a, ka en vang vang hnuah chuan thaw huaiin hma lam chu ka en ve leh ta a, kan hma chiaha motor a chêt tâkah chuan ka che ve nghâl a. He pa hian chhuk a tum mang si lo va, ka phurh ve zêl mai loh chuan... Zorema chu kan kawngka bulah chuan lo awm lo hrâm se ka ti khawp mai, a ruih viau phei chuan  buaina zakhua a thleng thei tlat, ani vànga mualpho chu ka duh hauh si lo.

Garage-ah motor chu dah nghâlin ka chhuak chu min lo nghâk reng a, Step-ah chuan chho nghâlin Zorema hmuh inring tak chuan ka pên chho zêl a, ka bulah Hminga pawh chu a kal ve zêl a, kan inbe lêm lo. Chutah, kawngka bula Zorema lo țhu sawp nuaih ka hmuh tâkah chuan ka inpetruh nasa ta mai, ka ding chawt bawk a, ani pawh chuan min lo hmu ve nghâl a, tho nghâl țuah țuahin Hminga nèn chuan min rawn en tawn chhên phawt a, chutah," Ka lo nghâk reng che a," tiin min rawn en ding ta ngar a, a din bûk lãk lãk ka ring a nia, a ruih hmel tehlul nèn, a țawngkam pawh a buh nuai miah lo.

"Eng atân nge min lo nghah?" chang deuh khal chuan ka ti a, ka pen chho leh nghâl bawk a, amah hnaih takah erawh ka ding duh lo. 

"Thil sawi dun ka duh a," a tih leh chuan," Sawi dun tùr kan neih àwm ka hre hauh lo mai, kei phei chuan i hnênah hian sawi tùr ka nei lo hrim hrim," ka ti lêt ve khauh a, rui mah se a rilru a harh țha tih ka hriat avàng chuan thu dik hrilh țha ka ti a ni, a hnênah hian sawi tùr nei lo miau hek le.

"Ka ngaih theihzia che chu," a tih chuan za hauh lo hian ka nui hak a, ka thinrim vànga nui ka ni zâwk ang chu," Kha lam kha chu duh táwk teh ang, tûn hnuah chuan min ngai tawh ngai suh," ka lo ti hmak a, polite taka biak lêt kher ka tum lo, ani pawhin polite takin min kalsan hleinem.

"Hmuh che ka duh a--"  a la țawng lai mêk chuan,"Hei min hmu tawh bawk a, i haw thei tawhin ka ring, haw tawh rawh," ka lo ti leh a, a hmel chu ka en lêt ve kar a, zu a in nasa a ni ngei ang, a hmaa a hmel chhe lo deuh țhin kha a paih ve tawh êm mai. An nupa nun pawh a hlimawm viau lo a ni ve thei tho bawk; mahse, chu zawng, ka lo ngaihtuah phâk pawh va ni suh.

"Lawmi, ka la hmangaih reng che."

"Sawi tawh suh!" tiin ka bân chu ka phar vat a," Haw thuai mai teh, ka lût duh tawh a nia," tiin ka pên chho nghâl dat a, ka thin a rim tak zet tawh a ni, ani erawh chu awm sawn a tum hauh lo, a din ngai chuan a ding reng a," Ka haw dâwn lo, inbiak ka duh alawm," luhlul fe chuan a ti leh a, chutah, Hminga chu enin," Nang kha, tu nge i nih? Lawmi hi ka bialnu a nih hi," tiin a kâwk ta vah a.

Ka bulah min si chêta rawn dingin min rawn kuah pah chuan," Tu nge ka nih i hriat kher a ngai lo, Lawmi hi ka bialnu a nih hi, tûn ațang chuan a lak ațang hian lo inthiar fihlîm tawh ang che," thûm deuh dût leh dam dap si hian a rawn ti a, a chët dàn leh a țawng chhuak chuan min tihamhaih êm avàng chuan ka en chho hau mai a, ani erawh chuan Zorema chauh chu a en ngur thung a.

Tàl chhuah tumin ka han țang deuh dâwn a, a hma aia nghet lehzual chuan min kuahin," A bialpa hlui i nih ka ring, a nunhluia mi i nih avàngin tunah hi chuan engtin mah ka ti lo ang che; mahse, amah tibuai zâwnga i awm a nih hlauh chuan..." tiin a ngawi ta daih a, min kuah ang ang chuan ka awm ve ta tawp mai.

"Nang aiin min duh hmasa zâwk, tunah pawh hian ka chunga a thinrim rih vàng mai a nih hi, lo hre rawh, nang hmel thingtlâng ve zet ai kha chuan min duh daih zâwk!" tiin a phun bul bul a, chutah," Zawhna ka zâwt ang che, i bialnu a nih chuan vawi khat tal a âwmbâwr i dehsak tawh em? Nge in mu dùn--" a sawi zawh hma chuan a ri țhuai a, a thle sawk mai chu ka hmu vuai. Thil thleng chu mitkhap kâr lêka thleng a nih avàng chuan ka hmu chiang hman lo; mahse, thil thleng chu ka hre si, râpthlâk ti tak hian ka hmui ka hup vat a; mahse, la sawn leh nghâlin," Duh tâwk rawh!" ka ti ta vak a, tu zâwk chu nge duh tâwk tùra ka tih pawh ka hre lo, Zorema țawngkam hman duh dàn vàng chuan a chungah ka thin a rim a, Hminga chungah pawh a ni ve tho, dàwt sawiin kut a thlâk bawk, buaina ka duh lo tih a hre reng si a. Thinrim viauin zak ru viau mah ila buaina ka duh lo, miin an lo hriat rêu rêu phei chuan...

"Helai hmun ațang hian kal sawn nghâl rawh, ka insùm theih lai hian," tiin Hminga chuan awka dam dap anga lang si; mahse, hlauhawm ru deuh si hian a ti a, Zorema chuan a hmai chu a tuai nauh nauh phawt a, chutah, min rawn enin," Ka la rawn hmu leh ang che," a ti a, a biang chu dawmin step-ah chuan a rawn chhuk a, rum fê hian Hminga chu a melh pah bawk a, kawng chu ka lo kian vat a.

Ina kan luh hnu chuan," Engati nge dâwt i hrilh kher a?" ka ti a, ani chuan,"'A pa hnuaia thawk ka nia, a eng mah ka ni lo' tia sawi tùrin min duh tihna a ni maw?" a lo ti nghut a, a lung a awi fahran lo tih a awka chhuak ațang chuan a hriat theih reng si a, nuam lo ka ti rilru ve tho. Lehlamah chuan khatiang khân Zorema bulah khân sawi lo ta se emaw kut kha thlâk lo ta se, tunah hian a hãw tawh kher ang em? La awm rengin a la rãk a la rãk lo ang maw?

"Chutiang lam pawh a ni lo," ka ti sap a, ani lah chuan," Chutiang lam a nih loh chuan eng lam nge ni a? Ani zu rùi..." sawi zawm ta lo chuan a ngawi leh ta daih a, hetianga a sawi zawm loh hian a zawm tùr ka lo hre châk țhìn, a hrât viau a nih dâwn hi.

"I hàwtîr avàngin ka lãwm e; mahse, hei hi chu ka buaina a nia, lo inrawlh lo la ka duh khawp mai," ka ti sap a, Zorema a hàwtîr thei chu ka lãwm tak tak a; mahse, kan inkâra lo inrawlh tùrin ka duh lo, hei chu ka mimal buaina a nia, bâkah, lo inrawlh tùrin ka bialpa pawh a ni lo va, buaina thûk zâwk leh mualphothlâk zâwk a thlen hlauh chuan engtin nge ni ang? Bâkah, Zorema lakah chuan ka invêng ve thei ang.

"I la duh reng tih ka lo hriat loh vàng a ni, ka lo hre reng tawh ang e. Ka lo inrawlh tawh lo bawk ang; mahse, khatiang țawngkam mawi lo kha chu phuh chhuak tawh lo tùrin i hrilh dâwn nia, hmeichhe zahawmna a tichhia a ni," tiin a tho nghâl vut a, kawngka lam pana a kal nghâl chu ka hmu reng, a chêt dàn chuan min tihhrilhhai avàng chuan biak zawm leh koh lêt ka tum lo, ka en zui ringawt.

A reh ta vang vang mai, a haw daih a ni chiang. A thin a rim a ni ngei mai, khawi lai ka thu sawi ber khân nge tithinrim ang le? Ka buaina a nih vànga lo inrawlh lo tùra ka tih vàng kha em ni ang? Nge dâwt hrilh ka tih kha a ngai haw ta viau zâwk? Engah nge kei kher kher pawh, khatiang kha ka hrilh ni? Mualpho hauh lovin Zorema zui rui min hnawh hawsak a nia, ka bula a awm ve vàng chauha Zorema zu rui pawh hlau lo thei ka nia, lãwm hle tùr hi ka ni si a; mahse, làwmthu pawh ka hrilh ve reng kha, a hre ve reng alawm. A, ngaihtuah tawh lo teh ang, ka rilru ka tihah mai mai.

Mahse, rilru erawh a nuam bîk miah lo. A tûkah pawh chuan rilru nuam vak lo chung chuan ka inkhâwm a, thu sawitu Pathian thu min hrilh pawh chu ka hre lo tluk a ni, ka ngaithla mang lo miau a. 

Lèn chhuah pawh ka duh viau a nia; mahse, ka lêng chhuak lo. Ka rilru nawm lohna leh thinrimna belh tùrin Zorema nuin min rawn be zui, min rawn àn khum phiar phiar mai.

"Ka fapa chu i lo duh hlarh hlarh hle mai maw? Engtin nge in inah pawh chuan lêng tùr tea i lo sàwm ngam ni? Nupui nei lai a nih tawh hi, mî pa a ni, i hria em? I lo hetih vàng a lo nih chiah hi tûn thlenga pasal pawh i la neih loh ni. A zahthlâk tak zet a ni," a rawn ti bawrh bawrh a, ka chhâng lo. Ka chhàn chuan amah ang lek ka ni dâwn si a, bãkah, ka nu rual a ni a, a thil sawi zawng zawng hi dâwt vek a ni bawk a, ka inrawlh peih vêl lo a ni. Sawi fiahin hrilh fiah pawh ni ila a âwihin ka ring chuang lo.

"Ka fapa tân ka lo duhpui thei miah lo che pawh kha i lo hetih vàng hi a lo nih chiah hi, i lo la duh viau a nih pawhin mî pa, kawppui nei a ni tih hriain zah ve tal la, hmuh fàla kawm fàl lo tum tawh lo ang che, chuti lo chu ka duh lohnaah hi chuan ka che nasa ve thei viau a nia, ka lo hrilh lâwk che a nih chu," ti lehin a hmet tàwp ta hmak a.

Thil a hre lo lutuk chuan ka nuih a tiza zâwk hial mai. Thinchhe ve tak kha ka niin ka inhre sia, chhâng lêt hauh lo leh thinrimna awka pawha țawngkam khat tê pawha ka chhâng lêt lo chu mak ka inti, chuti taka ka inthunun thei ta leh ka zahawmna ka hum hrãm hrãm thei chu ka lãwm khawp mai.

Hminga pawh ka chungah a lung a la awi lo chhunzawm zêl a niang, Office lamah chuan min be lo va, min melh hek lo. A thawk mawp mawp a, chhùna ei tùr kan lei pawh chuan a share a la a, a dawhkànah a ei daih. Mi dang lah chuan ka ngaihtuah ang chu an ngaihtuah ve lo a ni chêk ang chu, an titi bawrh bawrh a, boruak awm tlat chu an hre ve lo a ni, aàwm ve reng mai. Anni zawngin Inrinnia thil thleng kha an hre ve tlat si lo va.

Nuam lo chu ka ti ve det. A chhan chu thawk tlâng kan ni si a, kan tlêm bawk nèn, pakhat chauh pawh a lungawi loh chuan a nuam lo, ani phei hi chu, a lungawi loh chhan lah ka hre chiang ngang bawk si. A tûk lamah pawh a boruak chu a ngai reng, chutiangin a tûkleh lamah pawh, a senior ve tawh tehlul nèn, a chêt dàn chu a naupangchhia ka ti ngawih ngawih, hetiangte chuan bialnu pawh a nei thei nâng, eng emaw hlekah a titau reng mai dâwn tihna a ni a.

Zirtàwpni chawhnua hna kan thawh mawlh mawlh lai chuan a phone a rawn ri ve teh tlat mai a, ka en ru reng a, a phone chhâng tùr chuan tho vatin min rawn melh a, min rawn en ka rin loh lutuk avàng chuan ka mit pawh ka lo la lasawn hman lo hrim hrim, min rawn en veleh ka melh hnuai nghâl vat a, hna chu ka thawk nghâl mawlh mawlh a, ani chuan min rawn kal pèl a, veranda lamah a chhuak ta daih a. A pawimawh bawk a ni ang chu, a bialnu pawh a lo ni maithei asin. Ka nui sak a, ka thil ngaihtuah chuh, a rinawm loh viau a ni.

Tlaia kan bàn chuan,"Min phur haw ve mai teh," a rawn ti a, min be duh lo leh melh pawh min melh chhin duh tawh lo kha a ni si a, mak ka ti rilru khawp mai a; mahse, ka sawi chhuak chuang lo. Ka phur haw ve leh mai bawk a, traffic jam kâra kan tàn lai chuan," Mahnia chaw ei chu ei tui a har si a, ei dùn ang hmiang," a rawn ti leh a, ka en zawk ringawt. Vawiin hi eng a hria chu ni maw, min pawh leh min nêl êm êm angin a awm tlat.

"Eirawng i bàwl a ngai lo ang, ka ti vek ang," a la rawn ti zui leh a, mak ka ti zual sauh a ni. Rawng a bàwl thiam chu ka ring ve deuh tho a; mahse, ei siam tùra a inpe ta mai chu, a ei siam chu ka ei ngam dâwn êm ni? Ka ring ngam ang maw? Ka nute awm loh a hria a, ei tùra eng emaw telha min khuaikhemte hi a tum a ni lo ang maw? Thil awm thei a ni tlat.

"Ka thil eiah eng emaw telh i tum lo tih engtin nge ka hriat ang?" ka ti lêt khauh a, min en vang vang phawt a, chutah," Mi â ka ni lo," a ti ta sup a, țawng chhunzawm lehin,"I chunga ka lungawi lohna kha chu theihnghilh tawh teh ang, vawiin ațang hian kei pawhin ka theihnghilh nghâl e, a țha em?" a rawn ti leh a, kei chuan," Mak ka ti rêng che a ni, eng emaw ei sual i nei a ni hial lo maw? A nih loh tal pawhin eng emaw thil tum i nei a ni zâwk ang," ka ti leh a.

"Tum chu nei e."

Râpthlâk ti zeta en chung hian,"Theihnghilh nghâl rawh, eng thil pawh han tih tum teh, i châk lo ang," ka ti a, ka chungah thil țha lo tih han tum teh se... ka maniature rifle ka ngaihtuah chhuak rauh rauh mai.

"Ka thil tum chu nang nèna chaw ei dun mai a ni, thil țha lo lam kha suangtuah vak vak suh, i ngaihtuah ang rilru kha ka pu lo ve," ka thil ngaihtuah rawn hria ang mai hian a rawn ti nghut a, a chek hluk zui bawk a. Ka en reng ringawt, ka mitmeng ațangin ka thil ngaihtuah chu a hria a ni ngei ang chu.

Chhuk duh hek lo le, kan inah chuan min zui lût leh ta poh a," Kan inkâr siam țhat ka tum a nih hi, ka tumna hi zahin min țanpui ve ang che," a ti a, țhut pawh țhu lo chuan a jacket hâk chu hlîpin chair-ah a dah a," A țan nân thingpui ka'n lum phawt ang e," a ti leh zat a, choka lam chu a pan ta nghâl a.

Kei pawh ka room lamah ka thuamhnaw thlâkin ka lût zawk a, ka chhuak leh nghâl vat bawk, thingpui a siam chhûngin hmeh tùr chhang ka lo la chhuak a, ka lo chhawp chhuak sa diam a. Dawhkànah thingpui no hnih a rawn hûng a, a sen leh bawk, a tui ka ti hlawl lo.

"A siamtu zah viau che mah ila thingpui sen hâng hi chu ka ngaina hlawl lo," ka lo ti a, min rawn enin," A hrisêl ber alawm," a ti phawt a, chutah, ka no chu rawn lain,"Ka'n siam țhat ang che," a ti leh a, a tho leh nghâl vut bawk a, ka ti ve thei tho nain ka ko lêt duh lo, vawiin tlai chu amah zâwkin a huam bawk a, tirh theihnaah chuan tîr char char ang.

Zanriah chawhmeh pawh amah vekin a siam a, a bulah ka lo awm ve mai mai a ni ber mai. Ka thiam ve zâwng tak salad ka lo siam ve a, ka duh tâwk dèr, chair-a țhu chung chuan a che vêl chu ka lo thlîr mai mai a, a pa lian ve roh si a, apron ha chunga kan chokaa a che kual vêl chu inhmeh ka ti deuh tlat mai a nih chu.

"Playing card i nei em?" a tih chuan ka en háw a, computer games-ah bâk ka nei hauh lo. Lo nei ta pawh ni ila, khelhpui tùr ka nei lo, hostel-a ka awm laite kha chuan nei ve rêih rûih țhìn chiang e.

A chhuak lawk a, rei lo te hnuah card keng chuan a rawn lût a," Zanin chu kan inkhèl ang, i thiam ang maw?" a tih chuan," Thiam loh ka nei lo," tiin awlsam zet hian ka lo chhâng vat a, mitko sàn ãk chung hian min rawn en a, chutah, bu nghatin,"A țha, ka duh chi tak!" a ti sup a, țawng zawm lehin," Kan inkhèl phawt dâwn nge chaw kan ei nghâl dáwn?" a ti leh a.

Ka phûr kher mai. Soft-copy lam ni lo, hard-copy ngeia han infiam leh chu, Playing card hmanga ka infiamna chin rei tawhzia ka han ngaihtuah a, hostel awm lai daih a ni tawh! Tleiràwl lai, kum eng emaw zât liam tawh daiha ka khelh kha a ni.

"Tunah inkhèl ang."

Kan inkhèl rei zêk a, card hmanga  game khelh theih chi zawng zawng chu kan khèl kim hial ang aw ka ti! Nuam ka tihzia chu, chaw kan ei dâwn meuh chuan zàn dâr 7 a lo pèl țêp tawh maw le! Chaw kan han ei a, a chawhmeh siamho lah chu a ei tlâk phian mai a! Pasal ţha tak a nih theih ngei ka ring, chawhmeh siam a thiam êm mai, kei lah ka tlaw ropui mai si a.

"Mizo chawhmehah hian eng nge tui i tih ber?" ka tih chuan," Tui tih ber ka nei lo," a lo ti mai a, kei chuan," A va mak àwm ve!" ka ti phawt a, chutah," Bàibîng hi tui ka ti ber a, chakai pawh tui ka ti a, chuan, maite leh pasi pawh," ka ti duah a, ka thil sawi vàng chu nge ni, a nui suk a.

"I nuih hian i lang nèlawm sawt, ka thil sawi avànga min nuihzat pawh ni mah la, nui ve zauh zauh rêng rawh ka ti a ni, nilêng lênga inhmuam ûp reng ringawt hi zawng, i hrisêl thei lo ang," ka ti a, ka țawng bawrh bawrh reng a. Hetia ka bula titipui theih ka nei ta hi ka lãwm a ni, ka nute zin ațang khân titipui tùr ka nei lo ta vang vang a nia.

Ani erawh chu a țawng ve mang lo, zawhna ka zawhin min chhâng ve chauh a ni mai a, chaw ei lai a nih vàng pawh chu a ni maithei tho bawk. Kan chhûngkua hi chu, chaw ei lai hian kan țawng bawrh bawrh mai zêl a, ka bànsan hlei thei lo a ni.

Chaw ei khamah thlèng ka sil a, ka phal lo chungin dawhkàn a lo tifai thung a, ka sil zawh veleh chuan," Kan ti leh dâwn em niang?" ka ti nghâl zat a.

Kan inhrem a, a chak lo zâwk 'chal inpensak' kan ti a, kan inpen tawn chhên mai. A hnuah chuan tih dàn thlâkin 'Kan inkâr a lo țhat deuh deuh theih nân a chak zâwkin chak lo zâwk hnênah a duh duh a zâwt thei ang' kan ti a; mahse, 'chhànna chu comment zui âwih loh' kan ti thung a, ka phûr kher mai, hetianga game khelh hi nuam ka ti ve hrim hrim. Vawi sàwmah vawi 6 ka chak a, zawhna ho tê tê bâk kan inzâwt chuang lo; mahse, a tàwpna berah erawh," Kum heti chen hi i tlangvâl ve tawh sia, bialnu eng zât nge i neih ve tawh?" tiin ka zâwt ta khauh a.

"Kum heti chen ka tlangvàl hnu hian..." muangchâng hian ka sawi dàn zûl chuan a ti phawt a, a ngawi dat a, chutah," Bialnu pakhat ka nei ve tawh," a ti ta sup a," Âwihawm loh!" âwih lo tih hriat zet hian ka lo ti vat a, ani chuan a kut tihrîk zauh pah chuan," Punishment," a lo ti dût a, ka chalah chuan a rawn pen ta kawrh a. 

A zawhna tàwp ber ve thung chu," Eng vànga i bialpa nèn khân ințhen nge in nih?" tih a ni ve thung a, kei chuan," Min duh tawh lo a ni mai a ni," tiin ka lo chhâng a, ka nui pah bawk a, min en vung vung a, engtin mah a comment ve lo, comment se pen fawk ila ka tih tehlul nèn.

Kan inkâr chu a țha chho leh ta a, chhùnah pawh kan chàwl tlângin kan titiho leh thei ta a, kei lah țawng nuam ti leh țhian ngaina ka ni si a, ka țawng bawrh bawrh reng mai. Thlengi nèn hian hmeichhia kan nih vàng nge kan țawng duh bîk tak tak a ni.

Ka nuin min rawn bia a,"Tlêmin kan duhthawh leh ta deuh mai aw, kan zin chhuak khât leh tawh àwm si a, i pa chuan a ngaihtuah viau tawh che a, lo thawk leh hrãm hrãm mai rawh aw," a rawn ti a, 'nuam an ti viau a nih dâwn hi' ka ti rilru neuh neuh a, ka nu hnênah pawh chuan," E, min lo ngaihtuah miah suh u, hna pawh ka thawk țha lutuk a nia, in kham hnâp thleng khân han zin kual ula," tiin ka nui a," Mahse, khua hi a vawt ve lam tawh si a, intuam lum țha ula aw, in damlo hlauh ang e, ka pa chuan nuam a ti viau bawk a ni tih a hriat reng mai a, a țha e," ka ti a, chutah," Pa chu ka lo be ve rêng rêng teh ang, a awm hnai em?" ka ti leh zat a.

"Inthiar tùrin a lût chiah a," ka nuin a tih chuan," A mak e, kan inbe fuh ve thei miah lo nia, nangmah rêng rêng pawh hi ka pa awm remchàn loh lai hian min rawn be ve ziah a," ka ti a, ka nu chuan," Nu leh pa chu nupa kan nia, nupa chu pumkhat kan ni alawm, min biak chuan i pa bia angah inngai mai rawh," a rawn ti ve thung a, rang fahran hian," Ka tlâwm e, ka tlâwm e," ka lo ti chùl a.

Zorema pawh a rawn kal leh tawh rih lo va, a nu erawhin min rawn be zauh zauh thung. Mi hmuhsitna ţawngkam chu a chham chhuak thiam hi ka ti khawp mai a, a hmel leh an ina ka lèn laia a awm dàn nèn chuan inhmeh lo ka ti țhìn tak zet a ni. A fapa nèn kan inkawp laia a awm dàn zawng zawng kha a der vek a lo ni si a, inthup thiam ka ti thlâwt a ni. Kei ka duh loh zâwng leh ka pawm loh zâwng laka ka inthup thiam loh tehlul nèn, ka hmêl leh awm dàn chezia thlengin ka tilang nghâl zêl a nia, kan inang lo teh e.

Inrinni vawi khat  chu Julian-a dàwra ka awm laiin Zorema chu a rawn kal ve a, Hlimhlimi pawh a awm ve a, kan titi bawrh bawrh laiin a nia a rawn luh ni, rui hmel a pu pawhin a lang lo; mahse, a țawngkam hman duh dànah chuan ruih chu a nei a nih ka ring. Julian-ate nupa chuan țha takin an chhàwn zêl a, kei erawh chuan ka be lo hrim hrim, a rawn kal hnu phei chuan awm ve reng pawh ka peih lo va, haw tumin ka tho ta thuai rêng a.

"Haw bîk lo la?"

Amah pawh en lo chuan," Tih tùr ka nei tlat, Hlimhlim, ka haw tawh mai ang e," tiin Hlimhlimi chu ka en daih a, ani chuan," A la hma alawm," a lo ti thung a; mahse, ka haw lui ta tho a.

Ka pên thui hman lo tihah chuan ka bânah a rawn man chawt a," La haw bîk lo ve, ka rawn kal veleha haw te i tum ni, i thurûk ka sawi chhuah i hlau a ni maw? I awm țhat chuan ka sawi chhuak lo ang," a rawn ti ta a. Eng ka thurûk nge maw a sawi ni? Tãl nghâlin," Min thlah rawh, eng thil nge i hriat a?" ka ti țhat a, ka mitsîrin Julian-a rawn kal chu ka hmu a; mahse, buai loh ka duh, buaina thlentîr lova hmeh mih ka duh.

"Zorem, min thlah la, ţha takin awm teh, engati nge hetiang hian i awm a?" zaidam thei ang ber chuan ka ti a, a rûk erawh chuan ka thinrimna chu chhûnglamah a so bulh bulh thung.

"Min hmu duh lo vei a nih kha," a tih chuan," Hei ka hmuh reng che hi," ka ti leh sap a, ka inthunun hrãm hrãm a ni, kawnga kalte'n min en deuh hâ hâ tih ka hmuh chuan," Min thlah la, țha takin sawi teh ang," ka ti leh a, kan bula Julian-a lo ding chu mitmeiin inrawlh lo tùr chuan ka signal nghâl a, min thlah se ka duh ber mai. 

"In inah rawn kal ka duh."

Kawng sîr maia kan din avàngin leh buaina ka duh loh avàngin ka inzui hawtîr ta poh a, ina kan luh veleh chuan chair-ah a țhu nghâl vat a, kei erawh chu țhut ka tum lêm lo. 

Biak hmasak ka tum lo, bâkah, ka thinrimna chu sùm hrâm htâm a ngai, ka tih chhuah hlauh chuan buaina leh mualphona a thleng ngei ang. Kan ngawih reng hnuah chuan,"Ka phatsan ta viauah che inngai bîk suh, kan inkawp chhûng zawng khân nang pawhin kei aiin Julian-a i duh zâwk tho kha, thiam loh min pe ngawt thei bîk lo," a rawn ti chhuak ta a.

Ka en ngar ringawt. Ka thurûk keimah chauha ka vawn khiau kha

a lo hre ru ve reng tihna a ni si a, engtin nge a hriat ni? Tu mi dangin nge hre ve ang? Țawng ngaihna hre lo chuan ka en reng tawp.

"Kha i phat miah loh kha, chuvàngin rinawm lo hmasa zâwk chu nangmah i ni," a rawn ti leh a, kei chuan," Thil kal tawh sawi buai a ngai lo, nupui nei tawh i ni a, eng mah kan inkârah hian a awm tawh lo, chu chu pawm la, min rawn hmuh tum tawh suh," ka ti ve ta a.

"Ka nula i ni a-"

"I nula ka ni ngai lo, kan inkawp chauh a nih kha," ka tih chuan," Inneih hial kan tum kha," a lo ti leh a.

"Inneih kan tum avàng khân i nula ka ni tihna a ni lo, tenawm zet khân min phatsan lo la chuan kan innei hial mahna--" ka tih lai chuan țèng chhuai hian,"Min hmangaih hauh lo chung khân min neih i tum a tiraw? I țhianpa Julian-a i duhna nung reng chung khân, kei kha i inthupna hmanrua mai ka ni, mi dang hmangaih nei reng chung khân min neih i tum a nia, rilru uire reng chungin," a ti bawrh bawrh a.

"Duh tâwk rawh!" ka insûm thei tawh lo, min puh chhiat dàn êm êm chu a, rilru uire min la ti zui.

"Min vìn hauh suh! Ka hre chiang ve khawp che asin," tiin a rawn ding hluai a, min rawn hnaihchilh nghâl a, ka lo che sawn ve vat thung; mahse, ka tlai hret, min rawn man hman tho.

"Hmeichhe thianghlim leh rinawm ang chuan awm tum lo mai teh, rilru uire reng chungin, khawinge, kan hria ang chu, i thianghlim tawh tawp nâng," tiin ka samah chuan a rawn țhâm țâwk a, ka țê deuh țhat a, tàl chhuah ka tum nghâl a; mahse, a țhãm fuh kher a ni, a na khawp mai.

"I ã tawh a nih kha," ka ti a, hlau rilru deuh mah ila ka rilru a fîm a, tih dàn tùr ka ngaihtuah nghâl zung zung a, mualpho leh buai chu duh lo viau mah ila a awm dàn hian a chi chhuak dâwn tlat si a ni.

"Țang țang lo mai teh, i duh ve reng," tiin ka kawr chu a rawn pawt leh a, ka theih anga nasain ka lo țang ve bawk a, kan insual thàwthâng a ni ta, hmeichhia mah ni ila hmeichhia taka chêt dêm dêm hun a ni lo tih hriain hmanrua tùr ka melh kual deuh a, a hnuah chuan ka pheikhawk bun lai chu tlawh phelhin  ka chhar nghâl vat a. Ka vaw thâwr dâwn, ka vuak nasat chuan nâ ative àwm êm mai. Tunah hian țang ve thei viau angin lang mah se hneh theih ka inring tho, zuin a ei nasa ve tawh a, a țang rei thei lo ang tih ka ring tlat a ni.

"Eng thil nge-" tih ri ka hriat rualin Zorema chu a kat dâwrh a, kei pawh ka ni ve tho. Ka kawr a thlêr ri kâwk a, Zorema nèna kan inkârah chuan Hminga a rawn ding vat a, Zorema chu hmachhawn nghâlin," I huaisàr hle mai, Jail tâng tlâk i ni," tiin a hmaiah chuan a va hnek a ni ngei ang, a ri no chawk a, chhuatah a tlu nghâl țhuai bawk a.

*KAN NI TIN NUNAH HIAN THIL MAK HI A THLENG RENG ASIN. I BUL VÊLA THIL MAK THLENG KHA HMUA HRE THIAM THEI TÙR CHUAN 'THIL MAK' I THLÌR DÀN/PAWM DÀN KHA I TIHDANGLAM A NGAI*